رواية الشيخ عرب والمسحورة الفصل الثالث
وبعد دوام يوم متعب لغادة بسبب طلبات خالد اللي مش بتخلص رجعت شقة أهلها في ست أكتوبر لاقت هاجر قاعدة على السفرة وأمها بترص الأكل
غادة
طيب والله أنا بنت حلال راجعة ميتة من الجوع
أحلام أم غادة
يا قلبي يا ضنايا تعالي يا حبيبتي اقعدي كلي لما تشبعي
هاجر بغيرة
هي قلبك وضناكي وأنا اللي شاخخة عليها الكلبة مش كدا
أحلام وغادة بصوا لبعض بابتسامة غادة حضنت أحلام وهي بتغيظ في أختها
غادة
وإنتي مالك يا أختي أنا أول فرحتها إيه مزعلك إنتي يا صفرا
أحلام بصت لغادة بحزن وحاولت تكتم دموعها بعدت عنها وهي بتقول بتوتر
أحلام
هدخل أجيب باقي الأكل على ما تغسلي
أحلام سابتهم ودخلت على المطبخ غادة بصت ناحيتها بقلق وبعدين بصت لهاجر
غادة
هو في حاجة حصلت ولا إيه أمك مالها؟
هاجر
مش عارفة بقالها يومين مش على بعضها ممكن متأثرة بسببك حالك اللي واقف ده
هاجر كانت بتتكلم بعفوية ومش واخدة بالها من كلامها اللي نزل زي الخنجر على قلب غادة غادة دموعها نزلت هاجر بصت لها بحزن
هاجر
أنا آسفة يا غادة والله ما خد بالي من لساني مني لله والله حقك عليا والله مش قصدي ازعلك
غادة
عادي ما قولتيش حاجة غلط حالي واقف فعلاً بصي أنا راجعة تعبانة أوي ومخنوقة هدخل أغير وأنزل أتمشى شوية
هاجر
طيب ممكن نبقى ننزل مع بعض؟
غادة ما حبتش تحسسها إنها زعلت منها فابتسمت غصب عنها وهي بتقول
غادة
ماشي اتفقنا وما تكليش عزماكي على شاورما بمناسبة الشغل الجديد
هاجر قامت بفرحة
هاجر
يسلم بوقك يا شبخة هلبس هوي
هاجر خدت بعضها وجريت وغادة افتكرت مناكشة خالد ليها طول اليوم ابتسمت وخدت بعضها هي كمان ودخلت على أوضتها تغير هدومها
ــــــــــــــــــــــــــــــــــــــــــــــــــ
وبعد شوية كانت غادة وهاجر بيتمشوا على الكورنيش وكل واحدة ماسكة ساندويتش شاورما بتاكل فيه
هاجر بحماس
يا بنتي احكي لي حصل إيه في الشغل الجديد ويا ترى في مدير واد مز كدا ودمه خفيف زي ما بيحصل في الروايات ولا إيه؟
غادة ضربتها على كتفها بخفة وهي بتقول
غادة
يا دي أم الروايات اللي بوظت دماغك دي يا بنتي إنتي في ثانوي عام لو تذاكري نص الوقت اللي بتقراي فيه روايات هتاخدي الدكتوراه
وفجأة غادة سكتت لما لمحت عز قدامها وهو ماشي ساند واحدة باين عليها حامل عرفت إنها مراته دموعها نزلت بصمت هاجر بصت لها باستغراب
هاجر
خير مالك يا غادة حصل إيه؟
غادة لفت بسرعة عشان تمشي قبل ما عز يشوفها
غادة
مافيش تعالي نمشي من هنا
بس كان عز شايفها بص لمراته وهو بيقول لها
عز
ثواني وراجع لك
عز جري ورا غادة ومراته فضلت واقفة مش فاهمة حاجة
عز
غادة ثواني لو سمحتي
هاجر بدهشة
عززز؟
غادة بصت له وهي بتحاول تبين قوية ومش هاممها
غادة
أفندم حضرتك تعرفني؟
عز بحزن
وأعز المعرفة أنا بجد نفسي نرجع حتى لو صحاب وننسى اللي حصل ده
غادة ضحكت بمرارة
غادة
ننسى اللي حصل هو بالساهل كدا؟ انسى إنك دوست على كرامتي وفضحت خصوصيتي لا وكمان روحت اتجوزت بعد طلاقنا بشهر امشي يا عز امشي من قدامي ربنا يصلح حالك ويصلح حالي
وقبل ما عز يرد غادة خدت بعضها ومشيت بسرعة وهي منهارة في العياط وهاجر جريت وراها في نفس الوقت كان الشيخ عرب واقف مع خالد صاحبه وغادة جاية من ورا ومش واخدة بالها خبطت فيه وقعت على الأرض خالد وعرب اتفاجئوا بيها هاجر جريت على غادة تساعدها
هاجر
يا حوستي السودة.. غادة إنتي كويسة؟
عرب
أنا آسف والله ما خدش بالي
غادة قامت بخجل مع هاجر من غير ما تبص
غادة
لا عادي أنا اللي غلطانة
بصت بدهشة لما سمعت صوت خالد
خالد
طيب كويس إنك معترفة بحاجة
غادة
أستاذ خالد؟
هاجر
إنتي تعرفي الجدع ده؟
غادة بإحراج
مديري في الشغل
هاجر بصت لخالد وبعدين بصت لعرب اللي غض بصره
هاجر
أنهي واحد فيهم الأقرع ولا الموز ده؟
خالد بصدمة
أنا أقرع؟
عرب حاول يكتم ضحكته على منظر خالد غادة نغزت هاجر في كتفها بغضب
غادة
اسكتي يا خربيت لسان أهلك
هاجر
طيب وأنا مالي ما هو أقرع جبت حاجة من عندي يعني
غادة بصت لخالد بإحراج وسحبت هاجر بغيظ ومشيت خالد فضل باصص ناحيتها وهو بيتمتم
خالد
اللهم صلي على النبي هي شكلها العيلة كلها بعافية شوية
عرب ما قدرش يمسك نفسه وانفجر في الضحك خالد بص له بغيظ
خالد
بتضحك على إيه يا خف دم أهلك إنت كمان؟
عرب بضحك
عمال أقولك اتجوز يا خالد قبل ما القرعة تلمع مش راضي تسمع الكلام اهي لمعت
خالد بغيظ
لا حوش إنت اللي لسه نغغة يعني
سكت شوية لما افتكر غادة ابتسم وهو بيبص ناحية المكان اللي مشيت فيه
خالد
بس شكلها هانت أوي ونتجوز ليه لا؟
عرب بص لساعة اللي لابسها
عرب
طيب يا عم ربي يسعدك ويرزقك بالذرية الصالحة.. أنا همشي بقا عندي مشوار مهم كدا وما ينفعش أتأخر عليه أكتر من كدا هحضره وشوية وجيلك
خالد
طيب أجي معاك أو حتى أوصلك
عرب وهو ماشي
لا خليك هو قريب من هنا
ـــــــــــــــــــــــــــــــــــــــــــــــــــ
في شقة أحلام دخلت غادة وهي متعصبة ومسكه هاجر من ودانها
غادة
ابقي تفي على قبري لو عادت تحصل ونزلك معايا تاني
هاجر بوجع
طيب ورحمة أبوكي تسيبي القرقوشة وامسكي حتة طرية علشان والله وجعتيني وبعدين ما هو أقرع أنا جبت حاجة من عندي
غادة سابتها وهي بتقول بزهق
غادة
الصبر الصبر من عندك يا رب
طلعت أحلام على صوتهم وهي لابسة عباية سمرة وطرحة
أحلام
في إيه يا مصيبة منك ليها حصل إيه هو إنتوا ما تطلعوش مشوار غير لما ترجعوا تتخنقوا كدا
غادة باستغراب
إنتي رايحة فين دلوقتي كدا؟
أحلام بصت لها وسكتت شوية قبل ما تقرب من هاجر وهي بتناولها 50 جنيه
أحلام بحدة
امسكي وروحي عند خالك أنا كلمته وقلت له إنك هتباتي معاهم النهاردة
غادة وهاجر بصوا لبعض باستغراب وهاجر قالت
هاجر
إنتي بتوزعيني ولا إيه يا حجة؟
أحلام بحدة أكتر
اسمعي الكلام من سكات
هاجر نشطت منها الفلوس ومشيت غادة بصت لأمها باستغراب وقلق
غادة
في إيه يا ماما وإنتي من إمتى بتسمحي لواحدة فينا تبات بره البيت؟
وقبل ما أحلام ترد ظهر عرب على الباب قال وهو خافض بصره
عرب
يا رب يا ستر السلام عليكم ورحمة الله وبركاته
غادة بدهشة
إنت بتعمل إيه هنا؟
أحلام بتوتر
اتفضل يا شيخ عرب دي غادة بنتي اللي قلت لك عليها
عرب غصب عنه رفع عينه وبصلها اندهش من جمالها
عرب
سبحان الله الذي أبدع خلقه
انتبه على صوت غادة فغض البصر
غادة
ممكن حد يفهمني هو إيه اللي بيحصل ومين عرب ده وجاي يعمل إيه؟
أحلام بحزن
جاي يخلصك من اللي إنتي فيه يا غادة
غادة باستغراب
وإيه اللي أنا فيه يا ماما مش فاهمة؟
عرب بهدوء
آنسة غادة مش هينفع نتكلم على الباب كدا ممكن ندخل جوه ونتفاهم بالهدوء أحسن من كدا
غادة بصت لأمها بقلق وبعدين بصت لعرب
غادة
أكيد اتفضل
عرب دخل وهو بيبص لأحلام وابتسم بهدف يطمنها غادة قفلت الباب ودخلت هي وأحلام ورا عرب
ــــــــــــــــــــــــــــــــــــــــــــــــــ
في أوضة الضيوف قاعد عرب وغادة وأحلام اللي مش قادرة تبطل عياط غادة بصت لهم باستغراب
غادة
ممكن حد يفهمني إيه اللي بيحصل؟
عرب بص لأحلام وبعدين قال بهدوء
عرب
بصي يا آنسة غادة الحجة ولاد الحرام ضحكوا عليها وغلطت غلطة وكلنا بنغلط وربنا غفور رحيم وأنا ربنا وكلني أصلح الغلطة دي وبإذن الله أنا لها
غادة بصت لأمها باستغراب وبعدين بصت لعرب
غادة
مش فاهمة برضه عاوز تقول إيه وغلطة إيه اللي أمي عملتها؟
عرب
طيب هبسطهالك إنتي ما فكرتيش إيه سبب عدم توافق جوازك رغم إنك اتجوزتي مرتين طيب ما فكرتيش إنتي إزاي آنسة رغم إنك اتجوزتي؟
غادة سكتت شوية وشريط جوزتها الاتنين بيتعادوا قدام عيونها وبعدين بصت لأحلام بشك
غادة
وإيه السبب؟ أنا من حقي أعرف عملتي فيا إيه؟
أحلام ما قدرتش ترد ولا ترفع عيونها حتى عرب رد بدلها
عرب
للأسف الحجة عملتلك عمل ربط غشاء البكارة وللأسف الموكل على الأنواع دي من السحر قوي وشديد جداً جداً وبإذن الله علاجه موجود
غادة قامت وهي مصدومة وبصت لأحلام
غادة
إنتي إنتي عملتي لي عمل إنتي يا أمي تعملي فيا كدا؟
أحلام بدموع
كنت خايفة عليكي لا واحد ابن حرام يعمل فيكي حاجة وأنا لوحدي ماليش راجل يسندني واحدة بنت حرام ضحكت عليا والله العظيم وهي اللي دلتني وفهمتني إني كدا بحميكي
حطت إيدها على وشها وانفجرت في العياط وغادة وقفت مصدومة ومش قادرة تستوعب اللي بتسمعه قام عرب وقف قدامها وهو بيقول بهدوء
عرب
آنسة غادة بعترف إن الحاجة غلطت وغلط كبير كمان بس الغلط بجهل مغفور بإذن الله وبإذن الله أنا قادر على علاجك بس
سكت فجأة وبص لأحلام غادة بصت لهم بشك
غادة
بس إيه كمل سكت ليه ما هو مش هيبقى في مصيبة أكبر من خيبتي دي
عرب بتردد
نتجوز يا آنسة غادة جواز شرعي على سنة الله ورسوله طول فترة العلاج مش هقدر أعالجك غير وإنتي على ذمتي
غادة بحنق
نعم نتجوز وبأمارة إيه أتجوزك ولا أعرف إيه عنك علشان أوافق عليك أصلاً؟
عرب
مش مهم تعرفي عني إيه المهم هتشوفي مني إيه ويعلم ربي هتقي الله فيكي ومش هعملك غير بما يرضي الله ثم إنتي من غير علاج صحيح صعب جوازك أو معاشرتك واللي يتجوزك لازم يكون فاهم حالتك وظروفك كويس أوي علشان يصبر عليكي ولا هيتعاد نفس اللي حصل كل مرة
غادة بصت له بقلق وسكتت شوية وبعدين قالت
غادة
يعني إيه أنا لو اتجوزت تاني هطلق برضه؟
عرب
الله أعلم لكن لو اتجوزتي إنسان مش طمعان فيكي يمكن اللي متوكل عليكي يفك العقدة لكن لازم صبره لأن النوع ده باله طويل أوي غير كدا صعب
غادة بصت لأحلام بغضب وحسرة ودموعها بتنزل
غادة
منك لله أنا مش مسامحاكي ومش هقول غير حسبي الله ونعم الوكيل
غادة سابتهم وطلعت جري وهي منهارة في العياط وانفجرت أحلام في العياط وقف عرب محتار وهو بيبص ناحية المكان اللي غادة خرجت منه.
