رواية خيط وابرة الفصل الخامس والثلاثون 35 بقلم شمس العراقية

صباح الخير أحبتي الأعزاء .. بارت مليان أحداث مليان ونفس الوقت ما تقصرون كالعاده 🤎✨

لبنى ... 

لم تكن صدف أبداً بل كانت قراراً مقدّراً من رب الكون

ولم تكن صدفةً من صدف الحياة بل كانت أيضاً قراراً واختياراً مدبّراً للعيش والاستمرارية . 

​ها أنا أقف على قدمي من جديد

ليس لي نهاية كنهاية العشاق

بل لي بداية كبداية المراهقين

وأحمل قلقاً يوقظ الحواس وخوفاً واحساس وشعور يولد من جديد .. 

على سبيل المثال .. 

تماماً كطقطقة الأصابع المتوترة على حافة الانتظار . 

نفس نبرة الصوت لكنها هالمرة محمولة على إنكسار ثگيل .. 

نفس الطول والكاريزما اللي يفرض هيبته رغم التعب وقميصه الأسود الداكن بسواد الليل كأنه يرتدي عتمة روحه والجكارة ما تفارگ أصابعه، بل كانت رفيقه له في كل ثانية وكأنها تشاركه نزيف الحكاية بصمت

هالفترة المرت صح هو محترم نفسه وأني كذلك مرتاحه ومأمنه من عنده بس من خلال هالفتره العايشنها سوى تحت سقف واحد من خلال تصرفاته كلامه عصبيته صرت أحسه يشبه باقر لا هو باقر وگمت أقارن بينهم والكي روحي عايشه مع خيال باقر بس بشخصية نافع! 

أني عايشه بوهم بس ألكي روحي حابه هذا الوهم يذكرني بي بسوالفه وبحنيته وبنرة صوته .. تخيلاتي ويه باقر ما تفاركني بكل ليله الگي روحي بحضن باقر ريحته بخشمي صوته حنيته العودني عليها هيج أغفي مرتاحه لما أصحى الصبح 

.. أشتاقله حيل أشتاقله هو حيل جان حنين عليه حيل أمي وأبوي وأخوي وأهلي وكل ناسي ودنيتي وعيت على الدنيا بمراهقتي بكل ظروفي الصعبه العشتها على حبه على حنيته المفرطه اللي نحرمت منها وأني توني وعيت لدنيا هو جان دنيتي بس الدنيا ظلمتني وما نصفتني من أخذته من حضني وهو أعز شيء عندي وراح ضلن بناته من ريحته .

كل ليله أحضن موبايلي أكلب بصوره وأسترجع محادثتنا ما بيهن قساوه بس أخر فتره والسبب جان مني وسحب موبايلي علمود لا يغثني وأبداً ما مقهوره منك والله بس أنت لاتزعل مني لان أخذت أخوك .. 

بجيت وگمت والبيت أظلم رحت غسلت وأكب ماي على وجهي أريد شيء يبرد نار گلبي .. طلعت وتفأجئت بي فززني بطوله بالظلمه 

نافع ـ كاعده بيچ شيء 

لبنى ـ وجه فلاش الموبايل على وجهي وغمضت لا ما بيه بس بنات كعدن وگلت أتوضى وأصلي . 

نافع ـ أستغربت لأن شفت ضوء الموبايل مشتغل ً

ـ صفنت البيده موبايلي گبل سحبته لا ما بيه گلشي عبرته ورجعت نمت .. معقوله شاف موبايلي وهو شعنده كاعد لهسه .. 

نمت وكعدت الصبح بس أسمع صوت موبايله يشوف لعبه .. رفعت رأسي شفته كاعد وتالي رجعت نمت شو مالي خلك اليوم وما عندي شيء وبناتي نايمات .. 

بهاي الفتره بقينا أني وبناتي أنام بالصاله وهو بالغرفه وشكله نسه يصلح التبريد أني هم ما حاجيته هو ضايج من سالفة لينا وجاي يساعد أخوه على الرغم ما راضي بس ما عاف أخوه حنيته حلوه على أخوانه .. 

جنت يم أهلي بس وصلنا هو دخل غير ملابسه ها تطلع 

نافع ـ أي رايح الجم تركته من طلگت نورس وأحس هملت نفسي وراها 

لبنى ـ وشذكرك بيها 

ـ طليقتي شيء أكيد أتذكرها 

ـ أي من حقك .. أتذكرها منو لازمك 

ـ هو لان محد لازمني أتذكرها . 

ـ حجه وأكد على كلامه وسويت نفسي ما فهمت ومشيت المطبخ وگال 

ـ يله رايح تردين شيء 

ـ لا .. طلع ورجعت كملت شغلي علمود بس نتعشى أكعد ما عندي شيء أحب أشتغل العصريات وهو يطلع بس بالليل يبقى .. ورا ساعه أتصل جاوبته 

ـ سويلي عشه راح أجي 

ـ تمام 

ـ أكو صدر دجاج بس طلعي تبلي وعوفي من أجي أحمسي . 

ـ ماشي . 

ـ محتاجين شيء علمود أجيب وياي 

ـ أي صمون وخيار وطماطه وليمون وحفاظات وباجر خميس مو 

ـ أي خميس ليش 

ـ عبالي تجيبلي صينيتن بقلاوه تگدر لو مو على طريقك 

ـ شتسوين بيهن تردين ثواب 

ـ أي والله جييلي وياك من تجي أنطيك فلوسهن 

ـ شنو تنطيني فلوسهن مو عيب عليج هالحجي 

ـ لا مو عن شيء بس أني الثواب الأسوي من راتبه بخيره يعني .. فهمت عليه مو

ـ ها ماشي بعد رايده شيء 

ـ لا هذا هو .. سد الخط وأجه وما جايب وعيوني على أيده كل ظني بالسياره مخليهن

ـ ما لحگت عليهم عزلوا على باجر 

ـ تمام . 

ـ سوي العشه لما أسبح 

ـ دخل يسبح ووگفت أحمس الصدر وطلع من الحمام شفته ما لابس بس الشورت ويفتر ومنشفته يآيده صديت وچهي گبل وأحمس وما أحس بي غير أجه ومن ورا ظهري أخذ الخاشوگه من أيدي ويحمس ويحجي وأني متوتره من هالقرب جسمي ملتصق بصدره تقربت عالطباخ أكثر وهو مستمر يحجي 

ـ خليتي فلفل أسود 

ـ أي هسه أكمله وأجيبه الك 

ـ يله أستعجلي لان جوعان . 

ـ تقرب أكثر وصوته قريب من أذني غمضت عيوني ونفسي ضاك عليه ضغطت على أيدي حجيت نافع وخر خل أسويلك العشه

أبتعد وهو يفتح الثلاجه نافع البس ملابس ما يصير من البنات جسمك مكشف . 

ـ صار 

ـ گملته وديته جان كاعد بالصاله 

ـ تعشيتوا

ـ أي تعشيت ويه البنات .عفته ورحت عليهن يلعبن بالسرير بقيت كاعده يمهن لما شفته راح غسل وكملت شغلي وكعدت على التلفزيون أني والبنات هو مقابلنا كاعد من بين أندماجي ويه البنات الكاه يباوعلي أتجاهله بس يسرق نظره وترني اليوم .. تالي گمت جبت فراش وفرشت هو ضل كاعد لا بيه أتمدد لا أضل كاعده غير يحس ويگوم للغرفه

ـ شنو نعسانين من هسه مو عبالك بعد وگت 

ـ لا ينامن من وگت أحسن 

ـ مسويتلهن نظام 

ـ أي أفضل . 

ـ يله نرفع الزحمه 

ـ وأخيراً راح الغرفه بس عاف الباب مفتوح وتمددت بصفهن وغطيت نفسي زين وشافني أباوعله من خرب بحظي على هالموقف الخايس گبل نمت خفت منه بس هو گالي أمني أكيد عند كلمته أي أكيد .. 

ثاني من الصبح مشينا القريه علمود أرتب جهاز لينا

ولبست وطلعت وصاح وراي 

نافع ـ وين .. العبايه حالها من حال حجابج ما تطلعين من دونها 

لبنى ـ بس أحنه رايحيين بالسياره وگبل أنزل للقصر مالها داعي لابستها وأذا لبستها مره لان رحت السوك وناس على گولتك جسمي بارزه معالمه مو معناها أضل لابستها . 

ـ يعني جنتي تضحكين على عقلي من وافقتي علمود تروحين السوك! جاهل كدامج أني حاجيني 

ـ لا ما أضحك عليك بس ما مقتنعه بيها ولبست جفيان شر وگلت مع الوگت يتقبل أني ما أكدر البسها ما أحبها . 

ـ لبنى خلي شياطني نايم وتجفي الشر وتمشين تلبسينها وأنتِ الممنونه ولغوة زايده ما أريد وهذا الموضوع ناقشتج بي أني . 

ـ ما البسها گتلك ما أحبها ليش ما تفهم 

ـ صوتج لا أكسر حلكج وكلمتي هي التمشي ووين تولين أنتِ مباوعه على جسمج شلون مبين شايفه صدرج خو من ترضعين بناتج تنسين ترفعين الحمالات وتعال نافع أسكت وأنلطم على حلگك أذا أنتِ ما ساتره نفسج أني شلون أقبلها كرن كدامج كرن . 

شوفي هنا دقيقتين وأدگلج هورن لبستيها خيراً على خير ما لبستيها ما يصير خير والله . 

ـ أخذ البنات وراح ورجعت لبستها مزعوجه وروحي طافره وباوعت على صدري حيل جبير ومورم بعدهن ما راضعات ضبيت الحماله الحليب كام ينزل خرب شكد مدقق والله محد يباوع غير أنت .. 

لبستها وطلعت ورفيف مخليها بالكرسي مالتها ليورا نايمه خليت لهايه بحلكها بس رانيه كاعده صعدت وهو نزل يقفل الأبواب وكامت تبجي تريد ترضع رفعت شالي وكعدت أرضعها ولفيتها بالعبايه زين وأجه باوع وسگت

وضلينا واكفين وأيده على حلگه ويفر أصبعه على سنونه عبالك ذيب مفترس مو رجال بشري عاد شيفضها على راسج لبنى .. 

أدري بي ليش واكف لان كعدت أرضعها لما شبعت ونامت باوعلي وگبل غطيت صدري وسحبها مني خلاها بالكرسي مالتها بصف أختها وشغل السياره وتوكلنا للقصر .. 

طول الطريق ساگتين ورفيف كعدت جبتها يمي تتنعوص طلعت الها بسگت كعدت تأكل لما وصلنا 

ودگ هورن وأنفتح الباب عمي جاسم فتحلنا ودخلنا جانت عمتي وهبيه بالطرمه وگفت متحزمه والسياره نافع طبگها قريب منها ونزل وأجتي علينا . 

وهبيه ـ خوش حاطج بالصدر ويفتر بيج وأني حرموتني من ريحة أبني حسبي الله عليكم تعالي جده تعالي أبوجن طمه التراب وأبو المتع صار عليجن والي . 

لبنى ـ همزين نافع راح ينزل الجنط وهي أخذت مني رفيف ونزلت رانيه وهو ينزل الجنط خلاهن بالطرمه ودخلت سلمت عالحجيه وفررحت بينا وتبوس بيه بكل حيلها بس فجأه ملامحها تغيرت وعگدت گصتها ما عرفت شبيها! 

وكعدت يمهن وعمتي تبوس بيهن وحاضنتهن بكل حيلها أنقهرت عليها ودخل نافع الجنط خلاهن باب غرفة حربي لان مقفوله 

نافع ـ الشيخ وين 

الحجيه عطايات ـ طالع يمه عنده شغل يكظي عوفهن هسه تجي لميعه وتفتحه عاف المفتاح عدها . 

لبنى ـ مشى يجيب الباقي وهناك وجان عمتي تحجي ما تعرف تسگت 

وهبيه ـ والله يعمه لما سلابات أختها ما تجي ولا نشوفها من يوم التزوجت بالجذب ما گالت خل اجيب البنيات على جديتجن ووين حجيكم طلعتوا تضحكون عليه . 

الحجيه عطايات ـ حشى نضحك عليج يوهبيه بس هما ملتهين وهي ملتهيه ويه أختها ومو وگته هالحجي كظبي لسانج . 

لبنى ـ سگتت وأجه نافع تقرب سلم على الحجيه وحضنته وتبوس بي من خده ومن عيونه وهو ضل حاضنها 

الحجيه عطايات ـ يمه فدوه لطولك ولريحتك شلونك حبوبه شلون كيفك . 

نافع ـ زين حبوبه زين الحمدلله . 

لبنى ـ كعد بصفها وحاضنها من جتفها وهي لازمه أيده ويباوعلي عاگد الكصه 

الحجيه عطايات ـ ملبسها عبايه ولك عفيه بوليدي عفيه تربيه حبوبتك . 

نافع ـ مو بله . 

لبنى ـ هذا راح يستوكح بالزايد خاف جان بي هون أستلمي يلبنى أخذتي واحد تربيه حبوبته .. 

وعمتي وهبيه تباوعلي أكلتني أكل فصلتني تفصال خو وجهي تباوعله بكل تركيز تريد تشوفني خوما حافه مرتبه نفسي .. بالگوه كاعده وأجتي خالتي لميعه سلمت عليها وعمتي صالحه جابتلنا الجاي ونافع شرب الچاي وگام وأشرلي برأسه ولحگته .. فتح باب غرفة أخو

ودخلنا والغرفه هوسه وكراتين والحمام بعده ما منظف مبني ومطبك بورسلين جديد ضليت أباوع مصدومه ونافع يفتح بــبوب الكنتور ويضرب عالخشب يريد يشوف الغرفه زينه لان هو دافع فلوسها ههههه . 

نافع ـ خوش غرفه مو

لبنى ـ أي حلوة تخبل بس تريد تنظيف وترتيب 

ـ أي بس غرفتنا أحلى منها ما مأخذ من المكان الأخذت منه رايح على غير واحد . 

ـ أني رايحه أجيب منظفات أنظفها 

ـ يله لما أدخلج الجنط 

ـ طلعت وعفته يفتر جوله بالغرفه ورحت أدور عالمنظفات والفرشه علمود اجلف الأرضيه ولاكتني عمتي شافتني شايلتهن . 

وهبيه ـ ليش شبيها تنظفينها مو سوالها غرفة شحلاتها 

لبنى ـ شنو شبيها عمه غير الأرضيه كله شغل العمال باقي والصبغ والأخشاب ما ممسوح من التراب . 

ـ والله هي رايده حمام خاص وبنالها شتريد بعد وأحنه ملتهين بشغلنا محد گاعد وگرت عيني هو من هسه قافل غرفته وگال أم رانيه تجي تنظفها يزامط بيجن ما مصدك مأخذله زعطوطه 

من أهمداني على تخلفتي فرحت وگلت هذا الشيخ كظبة أيدي واجتي أختج فرته على أصابعها ورگصته وخلته مسودن وعاند الكل وأخذها بس خل يأخذها وبالاخير ترگد عجاجته ألا يعض أصابعه ندم على هل الأخذه .. 

شيخ وكلنا نزامط بيك تالي ما تالي تجيب زعطوطه ما تريد تكشخ بيها أنه أحطها وأتباهى بين النسوان حتى تضيع بالدشداشه كومة عظام

.. بس تحلم أختج تصير مرت الشيخ وتكظب القصر تحلم .. وهذا الزواج محد راضي عليه وما أرضى عليه 

دبگتن على بيت حبيب خوما دبگتن 

ـ عمه شنو لازومه هالحجي وبالنهايه هذا أختيار أبنج ليش توكفين بطريق سعادته 

ـ عساه لاشاف السعاده ويه هالمكموعه من كمعها البين الصفيره حية التبن عبالي فقيره طلعت تحفر من ليجوه ليجوه أم دروب أم الفواين تلوزز بعيونها . 

ـ أستغفر الله وأتوب اليه ..ردت أمشي وگالت 

ـ وأنتِ شبيچ تغيرتي ولحگتي ربعج مو جنتي الزينه ما بيهن وأزامط بيج لبنى يلبنى شبساع لحكتي تنسين باقر وحنيته شبساع غزر وتغزرتي بنافع وخليتي يسيطر عليج ويمشي گلمته ويلبسج عبايه لو لگاج على گد أيده وشاخ عليج وهو گبل نورس جانت حاكمته ويرركض وراها بس يريد رضاتها .. 

بس تبقين خوثه وما تلحگين الأوادم أذا نافع خليتي يحكمج بس مبين مسلمتها تراب وما مصدكه تزوجتي 

مع الأسف على هيج نسوان بسرعه تنسى وما يغزر بيجن لا عشره لا حب وعمت عيني جان يباوع على حلگج ويتفدا طولج عمت عيني على شبابه الراح . 

ـ عفتها ومشيت مقهوره منها ومن كلامها مثل السم وأكدر أرد عليها بس گلت مقهوره من حربي وعذرتها بس طوختها هواي هسه أنتِ مشكلتج ويه إبنج شگو رجعتي عليه ليش بكيفي صار هالزواج مو أنتِ من الناس قنعتيني هسه صار نافع أبو المتع دام ابو المتع ليش زوجتوني اله .. عليكم تناقضات فضيعه ما ينعرفلكم وجه الله يعين لينا شلون راح تعيش بهل القصر .. 

دخلت ونافع ما موجود وبلشت جلف وغسل نظفتها تنظيف من كل گلبي خليت الحمام والغرفه تلمع لمع وفرشت الموكيت وطلعت الأغراض والورد ولوحات الخالتي مشتريته ورتب الغرفه وفتحت الجنط كعدت اصفط ملابس وصارت دنيا الظهر وأذن ودخلت عليه خالتي لميعه جابتلي بنات جوعانات عفت من ايدي كعدت أرضعهن وهي كعدت يمي تباوع على أغراضها . 

لميعه ـ وگلتهن مبين ما سگتن أمي كالت الا يرضعن وجبتهن .. بس عاشت أيدج شلون منظفتها والله أنه گلت بالليل أرد وأكعد أنظفها على كيفي زين ما سويتي خومت تعبتي جان جيت عاونتج بس البنات وهبيه عافتهن عليه وگامت . 

لبنى ـ لا خاله ما يحتاج تسلمين 

لميعه ـ يله كملي لما اروح أشوف الغده علمود نتغدا 

لبنى ـ طلعت ورانيه رضعت وتمشي خطوات وتوكع هاي تمشي قبل أختها وراحت فرحانه على أغراض خالتها تالي وياج .. ودخل نافع گبل غطيت صدري وأفتر بالحمام وباوع عالغرفه . 

نافع ـ ها شبعدلج 

لبنى ـ بعد ملابسها شوفة عينك ما مخلصه . 

ـ هاي ما شبعت عوفيها وكومي علمود نرجع البيت 

ـ لا خليها جاي ترضع ليش نرجع بهل الظهريه 

ـ أي ما بيه أضل للعصر 

ـ بس خل أكمل تعزيلة ملابسها .. شال رانيه وطلع ورفيف نامت خليتها عالجربايه وگمت كملت ترتيب وخالتي لميعه جابت ملابسه كومه أكثر من ملابس لينا حجز نص الكنتور دشاديش وستر وقوط وملابس بيت وطلعه والأحذيه والشحاطات لاتعد كله جديد ويلمع هي تولت ترتيبهن .. وضلت بس الثريا طلعت أدور درج 

وتلگاني 

نافع ـ ها ما گملتي علمود نتغدا ونمشي 

لبنى ـ شعندك مستعجل خل أكمل شغلي وبعد الثريا اريد درج 

ـ لاتوكعين يمعوده أمشي هسه أني أجيبه . 

ـ يله لا تتأخر .. جابه وما قبل أصعد .. لعد شلون نافع 

منو ينظفها وأني نظفت الغرفه ضلت بس الثريا

ـ وإذا وكعتي وتكسرتي تردين تصخمين وجهي 

ـ ليش أصخم وجهك وين صاعده قابل برج باريس هو درج بس الزمه اليه زين لما انظفها .. صعدت وهو لازملي الدرج وحسيت بي لزم رجلي ونزيت من لمسته ياربي شلون بيك تأففت 

ـ شگو شبيج بس تنفخين 

ـ ما بيه شيء بس الزم الدرج زين ووخر أيدك والزم الدرج مو تلزملي رجلي

ـ غير خايف عليج لاتوكعين وأحير بيچ 

ـ اللهم منك الصبر .. ورجعت أمسح وباوعت عليه يباوع على رجليه والله فد فاين والله ما خايفه من درج بكثر خايفه منك لان صاير أدبسزز .

.. رجعت أمسح وأستعجلت هذا كلشي أتوقع منه هسه أرتبك ووأوكع عليه وهو ما يگول باطل . 

ـ لاتستعجلين نظفيها على كيفج 

ـ ها مو على أساس نروح البيتنا وخبصتني يله ويله 

ـ لا غيرت رأي أنتِ تعبتي وورانا طريق كملي شغلج براحتج شگو ورانا! 

ـ بگلبي لا والله مستمتع بالوگفه رسمتني رسم خرب بهل السالفه أجتي عدله الك عاجبته الوضعيه الأخ 

.. . كل شوي أباوعله الكاه صافن على جسمي ونظراته مدري شلونها سخيفه بلعت ريگ وأستعجلت يله كملت 

ـ ها بهل السرعه 

ـ أي شتريد لعد .. نزلت وهو حضن الدرج مو لزمه صرت قريبه منه گبل أنهزمت منه وهو طلع الدرج وراي .. 

دخلت الحمام غسلت وطلعت لگيته واكف عبالك ينتظرني وجگارته بإيده! ها صبوا الغده . 

نافع ـ ما أدري .. ها نمشي البيتنا 

لبنى ـ هسه بهل الظهريه! بعدنا ما متغدين مو كلت ما نروح شغيرك أشو أنت كل شوي برأي 

ـ شنسوي بالغده مناك أخذلكم من المطعم مو أحسن وين نبقى الوجوه مگلبه والشيخ ما موجود ها شتگولين نمشي 

ـ بگلبي هذا وراه سالفه مستعجل يريد يأخذني البيت جاوبته لا عيب من عمتي هسه دگول جايه بس علمود ملابس أختها وما شافت البنات زين .. نمشي نتغدا والعصر نرجع وأذا نبات أحسن 

ـ مو بكيفج أمشي أني .. ماكو مبيت خارج البيت

ـ ليش

ـ بكيفي منا وهيج خارج بيتنا ما تباتين أبداً حتى يم أهلج 

ـ ليش شگوو يا ستار

ـ گلشي أكو .. لغوه لاتلغين كلامي الأكوله هو اليمشي 

ـ ردت احجي وسگتني 

ـ يله تحرگي . 

ـ مشيت المطبخ فلا صاحي هذا تسودن.. صبينا الغده وتغدينا وأني لكيتها فرصه بس راح يغسل گبل أخذتهن وأنهزمت بغرفه عمتي نومتهن واجتي فرشت بصفهن ونامت مبين ما حجت بعد عذرتها گلت أم وگلبها محترك على ولدها .. فرشت بصف بناتي ونمت كون ما يلگاني وبأخذني بهل الظهريه للبيت 

أخذتني النومه للعصر خالتي لميعه تكعد بيه . 

لميعه ـ لبنى أكعدي نافع يريد يمشي يگول خل تتحضر

لبنى ـ أي خاله گايمه وباوعت على فراشي بناتي ماكو وعمتي هم .. گمت غسلت ولبست عبايتي وطلعت لكيته واكف يم السياره ويدخن دخانته تهفهف .. 

شافني وصاح بيه 

نافع ـ ديله عاد فضينا ما شبعتي نوم . 

لبنى ـ أي أجيت بس خل أسلم عليهن وأرجع عفته ورجعت سلمت عليهن وشفت الشيخ طلع من غرفته وأبتسملي 

الشيخ حربي ـ أم رانيه ممنون منج ما قصرتي يجزيج الخير على تعبج ويانا . 

لبنى ـ تدلل شيخ .. يله مع السلامه طلعت وطلع ويانا وگف سلم على نافع ويحجي وياه وأجتي عمتي باوست البنات وخلت بإيدهن كل وحده ٢٥ وأني ما باوعت عليه .. راحت وسحبتهن منهن لايشككهن 

وأجه وطلعنا لبيتنا وجسمي كله مكسر تعبت هواي أشتغلت اليوم .. 

وصلنا البيت وأني گبل أخذت بناتي ورجعت نمت وهو ضل بالصاله متمدد وجه ثگيل هذا شبي زعلان ومطنكر وطول فترة العرس هو مدخن ما أدري يمكن من ورا اهله لا أسمعه يصييح عالموبايل شايل الصاله بصوته . 

نافع ـ هو وگته هالحجي هذا هو تزوجها شيردون هسه يطلگها والله شاخطين قسم بالله أي مو جنت هناك الوجوه تتباجى عبالك فاتحه مو عرس وهو لا سوا حنه للبنيه لا عرس ما خايف عليه وأدافعله بس ما مسوي شيء وتزوج أسكتوا دكافي عاد خل الله يوفقه بحياته .. بعد لاتتصل أني سوالف أهلك كلهم مخزنات بگلبي راحت بنفسي يوم أسمع عنهم حالين مشكله بدون خرابيط وشلغهم الأعوج . 

لبنى ـ واكفه أتحضر وهو واكفلي صعد البنات بالسيارة هسه أجي . 

نافع ـ مو تشلعين گلبي 

ـ بشنو 

ـ عبايتج 

ـ أهووو نافع 

ـ وجعوو لبيسها وبله لغوه 

ـ هم رجعنا 

ـ أي هذا الموجود .. يله لاتتأخرين أساساً تأخرنا 

ـ صحت وراه ما البسها والله 

ـ أشنقج بيها ومحمد أنتِ لاتلبسيها شوفي شسوي بيج 

ـ مـا البسها .. أصيح وراه وهو صوته وصل الباب تقربياً

ـ راح أجي وأتصرف تصرف ما يعجبج ولا يعجبني . 

ـ تعال 

ـ أجي والله أريدها من الله حتى للعرس ما أروح 

ـ خفت منه ركضت قفلت الباب 

ـ هاا خفتي جبانه أدري بيج يله لبسيها وصيري حبابه ولحگيني السياره ولاتعصبيني منج خليني محترمج وتصرفات مزعطه بطليها مو أنتِ خوش مره . 

ـ دگيت رچلي بالكاع ولبستها جفيان شر وطلعت مقهوره منه وصعدت كالبة خلقتي وشغل وطلعنا للقصر ووصلنا الوجوه مگلوبه كالعادة وعازمين كل القريه الهوسه گابه للستار ومن نزلت صاح عليه 

ـ وين طايره جنج حصان الحمزه 

ـ شگوو هم رجعنا تعيب وتغلط 

ـ لاتتنرين لا أفرك حلگج 

ـ مشيت وعفته 

ـ تعاي أحاجيج

ـ شتريد نافع 

ـ مو تصيرين سباعيه وتكومين تجلفين جدوره ويدگن عليج شغل لزمي بناتج وأركدي بكاعج محد رايح منج ومن أخذج البيت تفگين حلگج يومين ممطوله بالفراش . 

ـ شگو جايبني لعد وأذا صخرني شلون 

ـ جايبج تضريين هبيط .. چا غير مرتي وجايين نتغدا وحالج من حال الكل ليش تبقين غشيمه هذا يمتى تشغلينه يله لزمي بناتج وكعدي بصف حبوبه والله أذا شفت طولج تفترين 

ـ أشو صاير تهدد شگوو 

ـ گلشي أسوي مو بس أهدد لو ما تارس عينج ست 

ـ يله رايحه وأنت وين تروح

ـ هنا ما رايح كاعد مكابل خلقتج ما ينطني گلبي أعوفج 

نزلت راسي ومشيت وعفته وهو يحچي ورايه وعصبيته طالعة من خشمه خبل والله

مشيت واني أجر ببناتي رحت گعدت بصف الحجيه

لميت روحي وكعدت وهو هم إجا گعد گبالي مو بعيد وعيونه ما نزلت مني لحظه

كل ما أرفع راسي ألگاه يباوعلي يباوع ويتوعد بنظراته

وحبوبة تحچي وياي وأني أهز براسي إي أي وأني كل عقلي يمه ويم نظراته الخبيث شلون حكم عليه وكعدني صنم أمامون .

البنات يلعبن يمي، وأنا حاطة إيدي على گلبي وأباوعله ما جان هيج مخلي كل عقله وباله عندي 

شوية وگام جابلي رانيه وكعد قريب مقابلي وصوته ناصي همس

نافع ـ سمعتي كلمتي ولزمتي مكانج عفيه بالسباعيه

لبنى ـ ما رديت ظليت صافنة بالصينية الگدامي

رجع گال بهمس محد يسمعه غيري

ـ هيچ أريدچ گاعدة يم بناتچ ساكتة وحلوة مو مثل حصان الحمزة قبل شويه 

ـ ما گدرت ما أضحك عضيت شفتي حتى لا أبتسم وگلتله لا تحچي وياي گدام العالم حبوبه عينها علينا أرجع لمكانك . 

.. ضحك ضحكة خفيفة هز راسه

ـ ما ينطيني گلبي 

ـ ما جاوبته وگام رجع لمكانه يگلب بموبايله والحجيه حاجتني 

الحجيه عطايات ـ شبيچ يمه لبنى أشو ساكته وصافنه صاير شيء بينكم شنهي متعارگين 

لبنى ـ ماكو شيء حجيه بس تعبت من الطريق

سگتت ما مقتنعه وهي تباوعلي وتباوعله كأنها فاهمة كلشي 

وشويه وصاحن عليه 

ـ لبنى گومي جيبي الخبز 

لبنى ـ توني أريد أگوم سمعت صوته ورايه

نافع ـ خليچ كاعده أكو غيرج كومة .

لبنى ـ ما حجيت أول مرة حسيت روحي صغيرة گدامه مثل جاهلته وهو فرحان لأنه روض حصان الحمزة وگعده بصف حبوبته . 

صار وگت الغده وتغدينا وأني غسلت بناتي وكعدت يم الحجيه مثل الجاهل المهدد بكتله! وهو ما شفته بعد راح يم الزلم والبنات وعمتي حربيه يباعن عليه لان ما گمت بقيت كاعده .. 

ووصلتني رساله من عنده 

نافع ـ يله لازم نرجع قبل الزفه 

ـ ليش مو ويه الزفه 

ـ إني عاجبني أروح قبلهم مو وياهم 

ـ ليش 

ـ أغار عليج وجعيش بله كثرة أسئله تحضري وخلص

ـ تمام هسه أتحضر .. كمت حضرت غراضي وهنا مخبوصات ويغسلن وينظفن لان جهال ما خلت شيء نظيف وهوسه مو طبيعيه .. وشافتني عمتي حربيه 

حربيه ـ خير وين موليه بس على گد الغده وكبعتي لو مصدگه روحج عروس! كاعده خاتون لا شغله لا عمله لما عرس أختج . 

لبنى ـ ردت أحجي نافع صاح عليه 

نافع ـ يله 

لبنى ـ شلت رفيف وهو تقدم شال رانيه وطلعنا للبيت

طول الطريق يدندن هذا اليوم مزاجه عالي الجودة .. 

وصلنا وشفت أختي حبيبة گلبي تمنيت أفرح بيها مثل باقي العواريس بس حظها هالشكل والحمدلله على كل حال أن شاء الله ما يخيب ظنها ويسعدها ويكون الها سند هي نشلع گلبها عمي محمود گتل بيها گتل مال حيوانات والله ششافت من حياتها وسوالف صفا كسرت ركبتها بيها . 

الله يسعدج يا لينا .. أباوعلها مبتسمه والدنيا مو واسعه فرحتها بسيطه وما طلبت گلشي غير الأمان والحنيه الشافتها من الشيخ كون هل الشيخ يطلع

كفو وما يخذلها ويخذلنا .. 

فض العرس على خير وعبالي أشوفها بس نافع مستعجل يريد هسه يرجع والدنيا ليل مو مال رجعه بس هو عناد والحجيه وعمي مشعان واكفين يقنعونه واني ونور واكفات عالصفحه .. 

وأجه من بعد كلام طويل ما أقتنع أبداً ما ادري ليش ربطت ما يريدني أبات بغير مكان من ورا تصوير الفيديو هيج أجه بالي وربطته بعقده نافع بهل السالفه .. 

طلعنا للبيت وهو شايل بنين نايمه على أجتافه ورانيه بيد نور .. 

نور ـ عبالي نشوفها قبل لانروح بس أشو نافع مستعجل 

لبنى ـ ما شفتي شگد حجوا وياه ما أقتنع 

يله باجر اكوله نجي عليها حتى لو عالعصريات 

ـ ماشي عيني . 

ـ طلعنا للبيت .. وهدوء والليل أظلم ونور والبنات نامن بس أني وياه كاعدين الجو بي خيط بروده حاولت أنام ماكدرت لما وصلنا وهو نزل شال بنين ودخل قبلها 

نور ـ يله عيني تصبحون على خير 

لبنى ـ وأنتِ بخير عيوني .. شويه واجه ووصلنا بيتنا گبل بعدني بملابسي فرشتلهن على الرغم الجو حلو ينام بالغرفه بس هو بعد ينام بيها .. 

أخذ ملابس ودخل يسبح وأني بس غيرت ملابسي وفتحت شعري وذبيت الشال على رأسي وطلعت شايله الملابس الوسخه صار بوجهي . 

نافع ـ زعلانه مني 

لبنى ـ لا على شُــنو 

ـ على سالفة العبايه 

ـ لا عادي شسويلك بعد 

ـ أني علمودج والله أنتِ شايفه روحج طلعتي بيها قنبله 

ـ نزلت رأسي مستحيه منه لا مو بهل الدرجه تريد تقنعني بيها وتضحك عليه علمود ألبسها .. 

ـ ليش أضحك عليج أني رايدلج الستر وما أحب غيري يشوف اللي أني أشوفه 

ـ ما جاوبته بس بگلبي هذا شيشوف صخام الصخمني وتقرب باسني من رأسي بدون سابق أنذار بحيث تصمنت بهل الجرأءه هيج فجأه 

ـ هاي بوسه رأس خاص لأم العبايه علمود خاف تگولين حكم عليه لا هذا مو حكم هاي غيره رجال على حلاله . 

ـ نزلت رأسي أريد أنهزم منه لان حيل قريب مني وأني حتى نفسي كاطعته الا هو يحجي بإريحيه . 

ـ مو بس أم العبايه تنباس الحلوه هم تنباس بس مو من الرأس! ..

ـ رفع خصلات شعري وطبع بوساته خفيفه من تحت أذني لحد خدي ما تحملت دفعته نافع وخر وخر 

.. أبتعد وخله أيده 

ـ تمام تمام وخرت لاتصيحين البنات نايمات 

ـ خليك بعيد نافع 

ـ هذا هو رايح على گيفج لاتثورين 

ـ عفته ورحت الحمام لازمه صدري وأحس نار تطلع من رأسي ووجهي غسلت ومسحت بوساته خرب يومك . 

طلعت لكيته نايم ومطفي الأضويه ورجعت يم بناتي 

والصبح كعدت على صوته يخابر بالغرفه هذا شعنده أزمة أتصالات ما يلگي وقت الا الصبح .. رفعت رأسي مخبوص وعصبيه گابه خير يا ساتر منو خابره هسه گلبي گبل نغزني على لينا .. 

گمت وگفت يمه وأسمعه يحجي .. 

نافع ـ ناجح هذا حجي بشرفك أهلك صاحين على نفسهم وليش هسه يله يحجون الا تزوج يله تردون تكسرون رگبة هاليتيمه وتهجمون بيتها والله عرفت يتصخم وجهها والله عرفت هاي تاليتها وحاط أيدي على گلبي من أهلك وأدري زين أدري كلهم طابگين ويه خالتي وهبيه . 

ناجح ـ هسه أنت دتعال يمعود خالتي وهبيه راح تطلع حالفه يا حربي يأخذ مره يا تطلع للغربيه لأهلها وبعد ما ترجع للقصر! وأذا راحت تنلاص وعلي تنلاص وتعرف أهلها خوش ناس وجدي حبيب وحبوبه يطردونه كلنا 

من القصر وخالتي ما تطلع . 

نافع ـ هسه راح أچي .

لبنى ـ يردون يزوجونه 

ـ أمشي لبسي تروحين وياي 

ـ والبنات 

ـ نأخذهن وين تعوفيهن.. أريد أفهم طلابتهم شنهي 

ـ عالسريع لبست وحضرت بناتي شلناهن هنا نايمات تملخن يوميه نسحل بيهن والله تعبانه من خرب بعقلكم على هالسالفه أحتركت بنار ونفط على أختي حسبي الله ونعم الوگيل .. 

طلعنا حتى ما بلغت لا خالتي ولا نور شإبلغ غير تهد عليهن تفضحهن فضاحه والله نور تعمل بيهن العمايل بس خل أوصل اني هم أهد بيهن وبعد ما أسكت السالفه من توصل هجمان بيت أختي وهي بعدها عروس بارحه تزوجت والله أهجم بيوتهن على روؤسهن 

.. وصلنا ونزلت من السياره ‏خالي مشعان يفتر أباله حسبه ‏باوعت على نافع ‏خير شصاير عبالك عدهم ميت

‏نافع ـ أسم الله خل ندخل ونفهم السالفه

. 

لبنى ـ ‏ماشي .. دخلنا والوجوه ما تبشر بخير أبداً 

‏عمتي حربيه كاعده بصف عمتي وهبيه شاده حزامها وغراضها بجنط مصفطه هاي شگو 

و‏خالتي لميعه وصالحه يباوعن من المطبخ والحجيه كاعدة وتضرب على رچليها وجدي حبيب وجهه مغضب

حجه نافع 

‏نافع ـ خير يا طير وجوهكم متبشر بخير ميتلكم ميت

‏الجنازه وين تلاطمون من صباحيه الله جبتوني جفي وعلى وجهي شكو . 

لبنى ـ ‏حليم وناجح أخذوا البنات وطلعوا و‏ردت عمتي وهبيه

‏

وهبيه ـ وأنتَ من داز عليك خط مصخم وتجي ما صدگت أخذت ارمله أخوك ‏وخنست ذيج الخنسه ولا الك صوت . 

لبنى ـ ‏خاله عيب هالحجي شتحجين أنتِ 

‏وهبيه ـ أنتِ سكتي ولا حرف لا غزر بيج أبني ‏ليش جذب الگال نافع طلك نورس من وره لبنى ونور ‏لا والله 

الحجايه بمكانها . 

لبنى َ ‏عمه عيب هالحجي لأ عبالج ساكته بس أحتراماً الج والا الي كال هالحجي لا يخاف الله ولا عباده ‏لا ذمه ولا ضمير شترچى منه 

.. ‏نافع ساكت وأني برنو وأنطلقت 

وهبيه ـ ‏اي يالخنساويه جنتي ساكته وأدكين ناعم طلعتي حاطه عينج عليه ‏ليش من سمعتينا اني وحربي ضليتي بس تنوحين مثل الجلبه بس نافع لا گبل وافقتي عليه . 

لبنى ـ ‏والله عاد نافع رجلي على سنه الله ورسوله لا نهبت ولا سويت سحوره ‏وحربي ما زال جان حاط عينه على اختي شون الي نفس ‏ونافع رجال لا وراه ولا جدامه

... ‏نافع يحجي وبينه وبين نفسه

‏نافع ـ أي والله صدك

وهبيه ـ ‏اي هسه طلعلج حس من اخذتي نافع جنتي مثل الدجاجه خانسه 

لبنى ـ ‏يطلعلي حس گافي عاد لو شفتونه سود گلتوا هنود نضل قشامر وياهو الاجه وطعن وبينا وبشرفنا 

‏ما مليتي أخذت باقر لو ناهبته ما سويتن هالعمل هاي الكاعده يمج عمتي من اكون لا الي العمه زين 

‏حجت وطعنت بشرفي وبشرف أخواتي هي وبنت أخوها إلا بزعت واجيتي أنتِ وجملتيها 

وهي‏ طعنت بشرف نور وحجت براس خالتي صبيحه لما هجتت غافر وشال رأسه وسافر

.. ‏وهذا اخر شيء خلصت المسرحيه خلصتن سوالف رجعتن على لينا و‏عبالكم نستحي لا والله أشيل المستحى على صفحه واطلع غاديجن أنتن مو مال يگول عيب ويحشمجن كافي بس تطعنن بإعراض بنات الناس ما كافي البشر يتعض من أغلاطه 

‏طلع الشيخ وصاح . 

الشيخ حربي ـ ‏ام رانيه بويه على كيفج هدي. 

لبنى ـ ‏لا خلص الكلام ضايع وياكم عندي أختي هنا واذا تضل وجوهگم هيج اني اختي مأخذتها ما ميتين جوع

‏واحمدوا ربكم لينا راضيه ‏شجاب لجاب خاف عبالك ‏انتو الي ما راضين على الزواج ‏لا والله اني ولا نافع ورافضين ‏لان بنت مثل الورده دارسه وشهاده بنت عز ودلال وجمال وصغيره مثل فلكه الكمر ‏فكافي التعالي من وره شغل ومو من نسوانه وما أعرف ايش معارضين هالزواج وقسمه وصارت ‏سويتو فاتحه مو عرس .. 

‏وحتى أختي هم ما أشوفها بس والله أذا سمعت كاسرين رگبتها لو البالكم يصير وهجمتوا بيتها من الصبح أجي أخذها وبساعتها أطلگها مو معناها يتامى مالنه ظهر .. 

.. ‏يلا نافع و‏طلعت اهف وجهي نار حرگوت دمي وعمي مشعان لحكني .

مشعان ـ هدي بنيتي هدي ‏ميخالف يابه

لبنى ـ تقرب باسني من رأسي ‏عمي فدوه لعينك يا ميخالف طلعوها من ماعونها مو گدامك سمعت الحجي وزين تدرين شكثر حجن وطعنن بينا والله ما يصير هالعمل أدور رجعن على لينا الفقيره بعدها

جاهله من أول يوم زواجها متحزمات الها . 

‏وما شفتهن بعقد السيد لو بالعرس تكول فاتحه مو عرس وبلعنا وسكتنا هسه مسويتلها مسرحيه يا يزوج ثانيه يا تروح لـ الأهلها ادري حتى اليهود هم ما يسوي سوايتها الله مـا يراضاها يا عمي ..

بالقرأن يا عمي وغلات بناتي أذا هالأمر صار هسه أدخل أسحب أختي وأمشي وخل يحترك گلبها من أول يوم تبجيلها يوم يومين شهر شهرين وتسگت بس مال تنزل عليها الثانيه ما أرضاها بإي شكل من الأشكال . 

مشعان ـ لا عمي گولي يالله مــا يصير الأ خير وعمتج بعدها مقهوره من أبنها هي تتعود وما طولني طيب هذا الأمر ما يصير أني هم ما أرضاها أشيل خطايا بنات الناس .. 

لبنى ـ بعد ما أدري يعمي ضلت يمك .. من رخصتك 

مشيت ونافع جان واكف بصف عمي يسمع ما أعرف شگاله عمي ولحگني . 

نافع ـ على كيفج تركضين ركض 

لبنى ـ طلعني من هالقصر بسرعه نافع كرهت الساعه الشفتكم بيها . 

ـ لاتگومين تمسلتين أحنه شگو لاتشبچين الحجي يله صعدي .

ـ صعدت وهو شغل السياره 

ـ بس والله ذيبه .. شيخه شيخه والله شيخة النسوان فدوه لطولچ . 

ـ بگلبي خير أن شاء الله هذا صار يتفدا عـايزة والتمت 

مشينا وشفنا ناجح وحليم واكفين يم المحل أخذنا البنات وتوگلنا لبيتنا .. 

وصلت فاحطه من القهر گبل دخلت الحمام سبحت وعفت البنات عليه طلعت لكيته منومهن ها نامن 

نافع ـ أي تعبن من الطريق .. 

لبنى ـ دخل يسبح وكعدت أمشط شعري بالصاله وراي الغده مالي خلك أطبخ شيء وأتصلت عليه نور ها عيني 

نور ـ شلونگم .. أكولج ورا الظهر ترحون القريه أمي تروح تشوف لينا . 

لبنى ـ والله مـا أدري بس تعبانه ما بيه والبنات تعبانات 

ـ لا فدوه أمي گالتلي بالها يم لينا بس نشوفها ونرجع ما نطول وأحنه بالسياره قابل مشي . 

ـ خل أشوف نافع

ـ رديلي خبر . 

ـ تمام .. شفته طلع من الحمام ودخل الغرفه ولفيت شعري بالمنشفة ودخلت للغرفة لگيته گاعد على طرف الچرباية لابس فانيلة وشعره بعده مبلل يباوعلي بنظرة غريبة أول مرة أشوفها

- شتريد أسويلك غده گالها بسرعة حتى يغطي على نظرته.

ـ گيفج 

ـ أسوي مقليات عادي

- كلش عادي

ـ ذبيت المنشفه ولفيت شعري عالسريع وذبيت شال على رأسي وهو كاعد على گعدته مشيت أريد أسوي الغده لزمني من أيدي ومنعني بحيث قربني لصدره كلش خفت منه أريد أسحب أيدي متمسك بيها وحجه بصوت ناصي 

نافع ـ لبنى ... 

لبنى ـ قبل لا أحچي باسني من شفايفي بوسة قوية ومستعجلة وبلهفه .. أني سكتت ثانية ثانيتين مصدومة ما دفعت بالبداية ما استوعبت بس بعدين حرارة البوسة فزتني دفعته بكل حيل وصرخت بوجهه ودموعي نزلت 

شلون تبوسني!! شلون إلك نفس بيه مو أنت گلتلي أمني ولاتخافين مني وأخذي راحتچ وين حچيك

.. شلون گدرت تسويها وخر وخر ما صبرت ما صبرت شلون أنطاك گلبك لما جنت زوجة أخوك گبل بسرعه نسيته وحنيت وگمت أدور مني حقوق .. دفعته وضربته على صدره الله يأخذني

وأخلص بعدني ما مستوعبه زواجي منك تجي تبوسني ما كدرت تصبر عليه . 

وگفت أمسح وجهي وأبجي وهو واكف ساكت ما حجه ولا كلمه .. خلص نافع أذا تريد مني حقوق أني من هسه أكولها الك ما أكدر أصيرلك مره البگلبي ما يخليني وتريد تعيش حياتك روح أتزوج وأخلص وخلصني من هل الهم وهذا زواج جان علمود البنات أما زواج يتم ما جاي أكدر أتقبلك أفهمني نافع ..

طلع من الغرفة خلاني وحدي أبچي مصدومه بيك نافع .. 

گبل سديت الباب وراه وخايفه حيل حضنت بناتي بكل قوتي ونمت ما توقعتها منك بهل السرعه تصدمني

بقيت للعصر كاعده ما طلعت من الغرفه حتى غده مسويت تالي أذن العصر وگمت باوعتله نايم عالتخم دخلت المطبخ طلعت لحم وطبخت تمن وسويت كبه والبنات نايمات .. بقيت للعشه وجمدت الباقي .. 

شفته گعد ودخل الغرفه شوي وطلع شايل السويج أريد أحجي وياه واسأله بس مستحيه منه تالي شغل السياره وأني بمكاني .. دزيتله رساله أحسن ما أحجي وياه 

تتأخر لو تجي لان مسويه گبه علمود أكليها . 

نافع ـ رايح السوك الثلاجه فارغه شتردين عدا المسواك

لبنى ـ هسه أكتبلك شافها وما رد عليه 

كتبت اله قائمه الاحتاجهن وما طول ساعة ورجع والبنات جانن كاعدات عزلت المسواك وصبيت العشه كعدت أوكلهن وهو يفتح الكبايه يأكل الحشو ويذب التمن وتعبي المن مسويتها أذا هيج تحب الحشو 

گمل وگام گمت سويتله الجاي ووديتله وعبالي أكوله على روحتنا تالي سگتت .. 

كملت شغلي ورجعت الغرفه وهو كاعد ومشغل البلازما 

گمت جبت البنات أنومهن لان تأخر الوقت ودزلي رساله 

نافع ـ الصبح تحضري نروح القصر . 

لبنى ـ تمام .. عرفت نور گايلتله يله بعد أحسن ونمت والصبح كعدت لكيته كاعد ويشغل بالسياره وعبالك ما نايم ماكو لا فراش لا مخده وأني هم نسيته ما فرشتله .

كعدت البنات وتحضرنا وهو هم دخل غير ملابسه وقفل الأبواب ومرينا على أهلي ردت أنزل وخالتي تصعد ليگدام بس ما قبلت ونزل نافع صعد الأغراض كومه مأخذتلها شغلات ترست الصندوك.. بعدها توگلنا . 

وصلنا وتلگتنا لينا فرحانه بينا حضنتنا وخايفه عليها كعدنا يم الحجيه ونسولف وأني بالي عنده ماكو ما أعرف وين راح .. دخلنا الغرفه لينا والفرحه تارسه وجهه

نور ـ أكولج صدك عمتي وهبيه ما شفتها 

لينا ـ سگتي خليها مشت البارحة الصبح خابرت أهلها أجو أخذوها وحربي دايخ من وراها زعلانه شلون تتزوج على رغبتك وأني ما يهمني دام حربي ما مهتم هي أول تالي ترضى شگد تريد تضل زعلانه 

نور ـ والله أمهات أخر وگت أبنج تزوج على رغبته شگو واكفه بطرريق سعاده 

لينا ـ يحجن وأني بالي مو صافي طلعت أشوفه وين راح ماكو حتى سيارته ما موجوده وشفت عمتي صالحه عمه نافع شفتي . 

صالحه ـ أي رجع الولايه وگالي العصر يچي يأخذكم 

لبنى ـ ماشي .. ليش رجعت ضل بالي وصار وگت الغده ورا الظهر كعدنا بغرفة لينا للعصر ننتظره هو ماكو وأتصل عليه ما يجاوب تالي خابرت على ميثم 

ميثم ـ ها لبنى . 

لبنى ـ ميثم روح على بيتنا شوف سيارة نافع بالبيت وأذا موجودة دگ عالجرس من يطلعلك گوله يتصلون عليك

ميثم ـ تمام هسه . 

لبنى ـ راح وشوي وأتصل ها بشر 

ميثم ـ أي موجود وطلعلي جان نايم 

لبنى ـ ماشي عيني وشويه ودز رساله 

نافع ـ تحضروا راح أجي .. 

لبنى ـ وتحضرنا ورجعنا البيت هو ساكت مطفي ولازم رأسه يمكن عنده صداع وبيومها رجعنا هو ساكت بس على گد سؤال وجواب مو مثل قبل يحجي وأني هم عفته على راحته لان أدري بنفسي قسيت عليه وضاج مني وأخذ موقف وأبتعد . 

كاعدين هو متمدد وأيده على رأسه اليوم جان عنده خفاره بس خابرهم ما راح .. وأني كاعده بالكاع وعيني بالبلازما وبناتي مندمجات يباعن وكل شوي متعاركات بينهن وهو فاز ولاحظت عليه بي فزه من أقل حركه يفز .. توني ردت أخذهن للغرفه وأعوفه يرتاح وأتصل موبايله فتح خط بس ما عرفت المتصل منو . 

نافع ـ أي وأمك شبيها .... هي هاي سالفه بربك ما جان تحجي دگول ليش المرض عيب وشگول الها هسه وليش أنت ما أتصلت عليها من حقها تعرف أخبارك 

ماشي الله وياك ...! 

لبنى ـ سد الخط ومبين عليه مزعوج منو أتصل عليك صاير شيء . 

نافع ـ غافر ...! 

لبنى ـ غافر وين چان شگالك .. ما جاوبني شال موبايله وطلع من البيت عبالي أعرف منه عن غافر شلون سالفه شيصبرني وأكيد راح يكول لنور يله بيها الخير ..

____

نور ـ گلها مشت حياتها وفرحانه من گل قلبي وأتمنى السعاده الهن بس مقهوره على نفسي وين جنت وين صرت منو جان يگول نافع يأخذ أختي! وأني وياهم ومشاركتهم بگلشي

ومنو جان يگول أنسى وأحب غافر الحب الحقيقي وأضعاف مضاعفه وباقيه أنتظره وكل يوم يمر أموت أكثر من القبله مثل الورده أذبل يوم عن يوم وغيابه طال حيل طاله كمل سنه تقريباً وهو ماكو منه أي شيء أي خبر أو حتى رساله أطمئن عليه وأعرف أخباره بس أعرفه هو بخير .. 

معقوله ما صحلك مجال ولا دقيقه تحاجيني تطمئن على بنتك شنو سر غيابك هذا والله راح أتخبل من كثر التفكير .. شگد أحاول التهي وأضحك واسولف بس ما أكدر غصه بداخلي وگلشي بروحي يريدك ونفس الوقت مقهوره منك قهر ما شايله بشر ساعات أحقد ساعات أشتاق ...

كاعده وأيدي على خدي وأسمع صوت أمي وسمعت صوت نافع شچابه بهل الليل خفت يكون متعارك ويه لبنى! لبست شالي وطلعت وباوعلي وسگت ها نافع صاير شيء 

نافع ـ أي بس ما أدري شگولج .. تعاي الأستقبال عمه تعالي وياها . 

نور ـ مشينا وراه نافع خوفتني شگو شبيك .. أباوعله يفر بالموبايل ويلم بشفايفه قلقتني . 

سميعه ـ أحجي يمه وگعت گلوبنا 

نافع ـ غافر أتصل عليه . 

نور ـ الكاع أفترت بيه .. غافر أتصل وشوگت وشگالك وينه وينه رجع مو أي رجع 

نافع ـ على كيفج نور 

نور ـ نافع أحجيلي شگالك وينه رجع لو بعده 

ـ گالي منا لـ أسبوع إذا أمي ما صارت زينه أني ما أوصل المطار وما أرجع العراق بعد! 

ـ يعني ما يرجع وخالتي مريضه وبسببها سافر 

ـ هيج الظاهر 

ـ وگالك ما يرجع مو 

ـ أي 

ـ وما سأل عني وعن بنته؟ ما سأل مو .. أي ما سأل 

ـ لا والله سألني وگالي گوللها هالكلام وصلها الها 

ـ وليش ما يگوله هو خايف مني خايف يواجهني

سميعه ـ نافع أحجيلي يمه يعني ما يرجع وخالتك شنو مرضها 

نافع ـ سرطان مسويلها عمليتين وحده فاشله والثانيه ناجحه وبعد يسويلها وأحتمال هالأيام يسافر للهند عمتي صبيحه موزينه عمه موزينه . 

سميعه ـ أذا موزينه غافر ما يرجع بعد .. غافر يتنفس وجود أمه . 

نور ـ صحت بيهم شُنو ما يرجع بعد شنو شنو ... شتگول أنتِ وأني الأنتظره يوم يوم ساعه ساعه مو بكيفه ما يرجع مو بكيفه ماما يگول ما يرجع ما يرجع وأني وأني وأني شُــنو شسويتله 

مو بابا أمنه عليه مو أني يتيمه وبحمايته هو هيج يصون الأمانه يروح وبعد ما يرجع هـــــيچ.. بابا تعال شوف شسوا ببنتك بابا ..

وگعت بالكاع أبجي وأصرخ بحضن أمي ماما ما يرجع بعد ليش وأني شعليه بمرض خاله قابل أني مرضتها ليش أخذها وسافروا وما گالوا اليه ليش أشسويتلهم شنو الذنب الاقترفته ويعاقبني عليه ليكون عباله أني السبب أني مالي دخل بمرضها وهذا المرض ما أتمناه لعدوي مو عاد خالتي الربتني بس أبن أختج حاقد وگلبه أسود ومحملني سبب مرضها وسافر وعاف وراه الف علامة أستفهام علمود يعوفني أكل بروحي والوم بنفسي . 

نافع ـ هذا الحجي تحجينه من يرجع وتكعدون وتتفاهمون . 

بقيت ساكتة.. بس دموعي تشرح حالي بهذيج الساعه وشصار بيه آني مو آني نار شبت بصدري بظلوعي گلبي احترك وانترس رماد

هم يحچون فوك راسي وأمي تسأله عن أختها وعن مرضها وكل علامات الخوف تجمعت بوجهه خافت لاتخسر أختها 

.. بس أني محد فكر بيه محد گال شبيها نور محد گال شنو شمرت عليها الأيام من سافر ومحد سمع شحچت الناس عليه بغيابه 

شلون چنت أبلع الحچي وأنام ودمعتي على خدي

راح سافر فجأة وخلاني بحيره من أمري وهسه مسوي فضل رايح متصل على نافع ووصللها الحچي! هم ما يكلف على نفسه ويتصل عليه .. 

.. شهگت ومسحت دموعي وحچيت والغصة بحلگي

نافع أريد رقمه أنطيني رقمه هسه أريد أحچي وياه!

نافع ـ مغلق أتصلت عليه قبل لا أجيج ردته هو يحجي وياج بس غلقه لان جان طالع عنده شغل .

نور ـ لازم يفتحه أنطيني رقمه .. أنطاني موبايله وسجلت رقمه بموبايلي وطلعت وعفتهم ورحت الغرفة أخواتي وقفلت الباب ودخلت الواتساب لكيته موجود مفعل بي ..

دزيتله الحمدلله على سلامتك زوجي العزيز عاش من سمع صوتك وعرف أخبارك أبو بنين! .. 

بقيت أنتظر الرد وهل من الرد منك يا غافر .. 

للصبح عيوني تراقب الشاشة ووصلت الرساله شافها وگلبي دگ وضربت صدري دفره ونومته بمكانه عساك دگيت .. 

يكتب ... 

غافر ـ عندي شغل أكمله وأحاجيج 

نور ـ مـا يحتاج تكمل شغلك وتجي تحاجيني أصلاً ما أخذ من وقتك أو يجوز تريد تتهرب وتحذف الحساب وتقطع التواصل لان أنت صار أسمك المخفي مو غافر 

ـ شتردين نور .. مالي خلگج ومحمد گتلچ بعدين 

ـ لا راح أخلصك مني ومن همي ليش ضال بالغربه وتوصلي أخبارك! وما يحتاج أعرف أخبارك بعد خلص گلشي واله نهايه والصبر الا وقت وينتهي وأني

صبري نفذ منك ومن غيابك .. 

راح أرفع دعوه وأباشر بالأجراءات مالت الطلاق وأنفصل منك علمود لاترجع فدمره وأساساً أنت ما تريد ترجع! 

غافر ـ أنتِ ما تسوينها أصيله نور . 

نور ـ هو أنت خليت بيها أصيله .. خلص حبيت أبلغك علمود يكون بعلمك .. شافها وما رد عليه 

...عفته وصفنت وأكيد تگولي ما تسوينها لأن مستصغريني وشايفني صابره ومتحمله وكاعده أنتظرك بس خلص بعد ما أنتظر أكثر خلص أنت أنتهيت من حياتي ومن گلبي وراح أسويها وأنفصل عنك ومحد يدري أصدمك مثل ما أنت صدمتني .. 

حتى ما فكرت بعد بساعتها راسلت صديقتي ليلى أختها محاميه ودزتلي رقمها وحجينا بهواي أمور وطمنتني .. 

ومن بلش الدوام الجامعات أجتي لجامعه هي وأختها وكعدنا وحجينا وأنطيتها المستمسكات .. ست رهف شتردين أني حاضره بس أتطلك منه 

رهف ـ لا يمعوده تدللين خل ارفع الدعوه وبعدين أبلغج بگلشي . 

نور ـ تمام وضليت على تواصل وياها وإتفقت وياها على مبلغ زين بس تطلگني منه وفعلا بجلستين تم گلشي وأنفصلت منه هو صح أنفصلت منه ورديتها اله بس بداخلي قهر بس الله يعرف بي أني مو مثله حقيره بس راح أكون أحقر ... 

ورسلت اله رساله أنفصلت منك وانتهى گلشي وبعدها حظرته .. 

للعصر أجو علينا نافع ولبنى جنت كاعدة بغرفتي وأسمع صوت نافع يسأل عليه . 

نافع ـ وينها بكيفها تتصرف .. وينج نور تعالي أحاجيج 

نور ـ شگو بشنو تحجي 

ـ أنتِ شلون هيج تتصرفين من رأسج هي هاي سالفه بشرفج ومنو گلج تنفصلين منه وهاي محاميه *** وين لگيتها شمسويه أنتِ شمصخمه بعمرج شون تسوين هيج بغافر . 

سميعه ـ أنفصلتي صخام الصخمج شلون ولج 

نور ـ أي أنفصلت هو هذا زمن المفأجات! سهله رحت وگلت محاميه أخت صديقتي وهي مشتلي بالدعوه وطلگتني خلال جلستين وكم فلس زايد وخلصتني منه على شنو مبقيني على ذمته صارله سنه لا رساله لا أتصال حتى من سافر ما گال شنو سبب سفرته 

سميعه ـ چا بكيفج مشيتي من رأسج ورحتي تطلگتي تخبلتي ينور تخبلتي تردين تفضحيني تصخمين وجهي 

عايشين بتركيا بتركيا هالمسلسلات خبلتچ ما خلت عقل برأسج ولج صارت وتطلگتي منه 

چا مو خالتج مريضه مو عرفنه سبب سفرته تكومين تكسرين ظهره بهل السالفه ناقص حمل وتجملينه عليه ولج هذا غافر گتلي نفسج عليه ليلج ما تنامي من البجيات شلون هيج تسوين بي .

نور ـ محترك دمج على أختج وأبن أختج وتحجين عليه بس ما مقهور گلبج على بنتج عايفني صارله شگد كاعده أنتظره وتالي يتصل على نافع ووصلها كلامي هم ما يكلف على نفسه حضرة جنابه ويتصل عليه لا وصللها كلامي

عود أذا أمي ما صارت زينه ترة أني ما أرجع العراق يعني هو أساساً ما يرجع بعد لان أختج على حسب كلام نافع موزينه وغافر بكل الأحوال ما يرجع أني شگو باقيه أنتظره

هاا أني لازم أكون الزوجه والحبيه الوفيه عشتوا هو يستاهل ما تسكتين يمه مو گلبي مشتعل بنــــار 

أني محد يحس بقهري محد يحس بيه وجاينيني ودمكم محترك على غافر وأنت هيج يهمك غافر وما راضي على قراري وتصرفي السويته ما حاجيته ما گتله ما عاتبته بس لو نادرين عليه محد اله حق يمي هلكدود وهذا قراري وخلص .. 

نافع ـ بس هذا قرارج أستعجلتي بي گتلج يجي من سفرته وأكعدوا وتفاهموا مو تروحين تتصرفين تصرفات مال واحد عقلها مو برأسها مو العاقله مثلج تسوي هل السالفه . 

نور ـ وأذا ما أجه شلون فهمنياها هاي أذا صاحبك ما أجه شــلون ... وأني سويت هيج لأن أدري من يرجع ما يطلك لهذا هذا أفضل قرار أتخذته ومستحيل اكدر أعيش ويه انسان بإقل زله يتخلى عني بدون ما يبرر ويشرح ما فكر بيه ولا بنته .. 

.. وهو من صدمني وسافر أنه هم أصدمه وأخلي حاير 

چا بس هو يحرك بگلبي وأساساً مو مهمه عنده وأخر أولالياته وقبل لا أحجي ويه محاميه بلغته ولا أهتم وأصلاً هي يكيف خلصته مني أوفر عليه وقت . 

نافع ـ يله هذا هو صار اللي صار بالأخير هاي حياتج وحقج ما الومج 

سميعه ـ چا وغافر 

نافع ـ غافر جان لازم يحسب حساباته عمه هي هم طگت روحها وهو الصوج منه ما عرف يلملم عائلته ويصلح غلطه وأذا مشكله يحلها ويرجع مرته 

وبعدين ليش ضم مرض عمتي وسافر شكو أحد گايله المرض عيب لو خايف من نور تتشمت بي .. لا عمه غافر واحد مخربط تگه ماكو منه من ضم مرض أمه وسافر صارله شگد هسه يخابر ويدزدز كلام 

والانفصال صار بعد شيقدم شيأخر الكلام هاي هيه كلمن يضم حجايته ويدفي بطنه ويسگت وهي أعرف بمصلحتها مو جاهل ولا زعطوط .. وحجيت لان ما أريد أحد يلومها ويحجي عليها لان هي مره معدله صبرت وتحملت بس صارت بعد ..

.. يله روحي غسلي وجهج وأنتِ عمه كافي عوفيها لاتضلين تلومين بيها غافر عنده أمه أنتِ عندج بنتج باعي عليها لاتخسرينها وقهره من القهرات يصير بيها شيء منو يفيدج خليج ويه بنتج وحزمي موقفج .

نور ـ رحت غسلت وبچيت ولحكتني لبنى وحضنتها عبالكم سهل عليه بس هيج أحسن النا هو دمرني لو بس گايلي ليش سافر جان عذرته والله جان عذرته بس كلامه لبنى كلامه يدگ بگلبي يعني متنازل عليه حي على الصلاة . 

لبنى ـ خلص عيني خلص شو تعالي . 

نور ـ طلعتني من المغاسل ونافع باوعلنا واكف ويه أمي يحاجيها .. دخلتني الغرفه ونمت بصف بنتي وعبرتي تارسه صدري .. 

لليل هم اجه عمي بس ما حجه موقفه وياي مو ضدي 

محمود ـ زين تسوي بي عاشت أيدها وأني من زمان ردت اطلگها بس أنتِ ما قبلتي گلتي لاتهجم بيت بنتي وهذا بيت بنتج طلع مهجوم لان المنطيته بنتج واحد مسربت أبن مسربته من نامت لا گامت العوجه 

سميعه ـ أستغفر الله وأتوب اليه يعني أنت محد يسلم من للسانك بس تحجي عالعالم والمره مريضه جوز من حالها 

محمود ـ جذابه أم الفنود مريضه عرج ما يطگها مأخذه أبنها رايح تديح بالخارج بحالي بحالج بحال بنتج . 

نور ـ عفتهن وكعدت بغرفتي ضليت أيام مالي خلك لگلشي وأمي دوم تسأل نافع على غافر تريد تسمع أخباره وأخبار خالتي بس ماكو شيء منه غالق خطوطه ومختفي وأمي تدك وتلطم عذرتها مهما يكون أختها وهنا خوتهن حلوه بس بأخر فتره خربت بسبب النسوان 

سميعه ـ بس لا ماتت من عمت عيني عليج خيتي منين أجاج هالمرض وتلفگلج وينك يمه غافر تجي تطمني على أمك .. 

نور ـ ضلت أمي حالها يقهر منا أختها منا بنتها حتى ضغطها معلك واخذها نافع لدكتور وجابها ويوصي بيها ورجع بساعتها للقريه ما اعرف صايره مشكله ومتعارك هو واهله واني هالفتره لا حاجيت اخواتي ولا سألت شصار ما صار ملتهيه بضيمي .. 

وفرحت الهن عبالي يستقرن ويعيشن بسعاده بس أثاري حظهن مخالف وعبالك واحد داعي علينا دعوة شر 

.. أكتشفت شيء ماكو سعادة حقيقيه ولا دائمه لان دائما من نعيش بسعاده تنسي بسرعه عكس الحزن والالم الوجع يكون فعل حقيقي ما ينسي بسهوله يدك وجعه بالعظم بالگلب بالعقل يدمر الشخص دمار .. 

وصفت حياتي بطرك أني وبنتي ومصيرنا مجهول وليش مجهول عشتوا كاعده ومنجبه بيت أبويه معززه مكرمه وجاي أدرس وراتب أبويه موجود وما عدنا بس ميثم أمي ناذره عمرها اله تتفدى طوله من فدوه لطوله هذا سندنا الباقيلنا ..

أي هذا هو والله أكعد وأسكت وأكابل أمي وأخويه وأعيش بنتي مو بحال أحد رجع أو ما رجع وعلى شنو لطم والقهر ما كافي كظيت عمري لوعات وشوغات وهضم .. بس گلبي حان ومشتاك لأبويه وقنعت أمي ووافقت نروح نزوره مبين عمي محمود الله هادي علينا هو بناته الخانسات وهذا الخنوس أبداً ما مرتاحتله! .. 

وصلت گبره ورجليه ما تشيلني حضنته وبچيت بچي بردت خاطري وعاتبته بصوت ناصي وحجيتله ضيم الدنيا الجررى على گلبي وعلينا وعلى بناته ..

أمي مغطيه وجهه بالعبايه وتبجي وجهه صار دم خفت ضغطها يصعد رحت يمها حضنتها وميثم أخذ مكاني وضل يبجي وعمي محمود قرأ الفاتحه ومشىٰ 

محمود ـ يله أني أنتظركم بالسياره 

نور ـ مشىٰ وأمي أخذت رأحتها وخرت عبايتها وضلت تبجي وتعاتبه . 

سميعه ـ أجيتك والهضم تارس صدري يبويه أنت أبوي أني تيتمت عكبك يإبو عمت عيني عليك ينور عيني وأرتاح لاتشيل هم بناتك وميثم أن شاء الله ما أقصر وأعذرني على التقصير بحياة عينك بس أنه جنت أحبنك وأغار وحگي بعدني عروس وكبعتني بيها وهضمتني أنه هم نظلمت بس الراح الرح وكظى وكته وكلمن اله وكته يإبو نور وكتنا جان أخير مو هالوكت ..

والله يرحمك ويرحمها ويجعل مكانكم الحنه خلصتوا وضليت أنه .. بس أنه بنياتي محتاجتني الله يمد بعمري ما أخلي أحد يهضمهن .. أرتاح يبو نور أرتاح 

گوم يمه ميثم گوم أقرا سورة الفاتحه گوم وليدي 

نور ـ قرينا اله الفاتحه وودعته وعيوني على گبره ومرينا على گبر خالتي قلق هم قرينا الها الفاتحه وأمي ضلت تدور على گبر باقر وخابرت على نافع وسألته ودلالنا ورحنا قرينا اله الفاتحه وأمي هواي بجت عليه وعلى شبابه هيج گلبي نزرف تخليته كدامي وأباوع على صورته بالملابس العسكريه شگد حلو هيج ولد مثل الورده جوه التراب ونورس العار عايشه 

.. وهسه عرفت رانيه ورفيف نسخه من أبوهن الله يرحمك يا باقر .. 

رجعنا البيت وميثم بالصدر وأمي نايمه على جتفي وأني صافنه عالشوراع وعلى الناس وبالي يم بنين عفتها يم بنات لبنى وخطية رادت تجي ويانا تزور گبر باقر بس أشو نافع ما قبل گال غير مره خلت وسگتت 

_____

لينا ـ ‏صحيت على صوت إشعارات مو هلاهل ‏هاي جانت صباحية عرسي و‏هو مو يمي ساعه ١٠ونص ‏هدوء بس صوت حمودي يلعب صوته واصل لغرفتي 

‏فتحت موبايلي ونافع يتصل جاوبته ها ‏نافع خير يا طير صاير شيء قلقتني من الصباحيات بشرفك هاي سالفه شگو .

نافع ـ ‏ماكو شيء بس حبيت أصدمج بما أن گلبج متعلم على الصدمات 

ـ ‏شكوو خير

ـ ‏من هسه جدي حبيب ناوي يزوج حربي ‏

ـ بس اكيد حربي ما يمشي بكلام أحد

ـ ‏أن شاء الله

ـ ‏اي اكيد متقبل غلط .. ‏نافع عالاقل خلي اعيش كم يوم حلو ليش تنقط عليه بشغلات ما تصير وأني حربي أعرفه ما يسويها واثقه منه اطﻤئن لاتفاول عليه بالشر

ـ ‏دنجبي راح أجيب نور وعمتي ولبنى ‏نتغدا يمكم خوب أنتِ متدرين بالدنيا بعدج . 

ـ ‏لا وين ما أدري توني گعدت 

ـ ديله 

ـ ‏سد الخط وكمت سبحت ورتبت روحي لبست قفطان العرايس بس ما راهم عليه كتفه هادل صح اني طويله بس مو مال هيج لبس ‏هذا مال شيخات وأحجي واعدل بي دخل بقيافته وطوله وابتسامته ‏

حربي ـ صباح الخير

لينا ـ ‏صباح نور عروس جيس حب 

ـ ‏ههههه ليش 

ـ ‏اني حلمت كومه أحلام هاي مثل الاجانب وصينيه وفطور وخبصه وغزل وخبصه 

ـ ‏ههههه ليش لا من حقج .. تعالي حدري بحضني أشتاگيتلج 

ـ رحت حضنته وين جنت 

ـ هين يم أهلي وما حبيت أكعدج مبين عليج تعبانه 

ـ أي والله ظهري يوجعني 

ـ أخذتي المسكن العفته الج عالميز 

ـ هسه أتريك وأخذ بس أشو من حضنتك نعست عادي أنام بس مو أكعد ما الكاك

ـ لا باقي يمج وين أروح .. نامي بويه نامي . 

ـ نمت بحضنه وحاضنته من صدره وهو يتحسس بشرتي بشواربه قشعر جسمي وما سوا گلشي بس باسني شوي عمق بالبوسات هههه وبعدها نمنا .. 

كعدت قبله عفته نايم وهذا الثوب ضايقني شلون يلبسنه أحس هوسه مالها داعي .. كمت نزعته ولبست دشداشه فانيل مرتبه بلون ماروني وطلعت الدنيا مغرب والقصر هدوء بس حمودي يلعب بالطوبه 

اجاني يركض وفرحان 

محمد ـ تلعبين وياي الله عليج 

لينا ـ ولك صاير لسانك مشككك أي وداعتك ما أفشلك تعال .. طلعت وياه بالحديقه الجو يخبل بي خيط بروده خلصنا من حر الصيف وضيمه صمطنا صمط ... 

شمرها عليه وشمرتها عليه هو يضحك أني أضحك وياه وطلع جدي حبيب شافني وهز برأسه مثل ما عجبه عفت طوبه وحمودي مجلب بثوبي ويتوسل بيه 

ـ يله نلعب لينا 

ـ بسته من خده غير مره والله هسه لازم اروح .. دخلت القصر وهو نظراته عليه فشلت من باوعلي لازم احسب حساباتي صرت مرت الشيخ شيخلصني عاد اقل تصرف عيونهم عليه .. 

من دخلت حبوبه عطايات باوعتلي واشرتلي أويلي بس لا تگوم تقدم نصايح والله اعرف ما يصير بس على كيفكم عليه .. 

الحجيه عطايات ـ تعاي جاي يلينا تعاي حبوبه . 

لينا ـ ها حبوبه 

ـ كعدي يمي ليش وجهج مخطوف جنج محكومه أعدام

ـ لا حبوبه ما بيه شيء 

ـ شلون كظت ليلتچ 

ـ فشلت من سؤالها هسه شجاوبها .. الحمدلله حبوبه 

ـ چا عندي حجايتين وأريدنج تخليهن ترجيه بإذانج . 

ـ گولي حبوبه 

ـ حمودي عوفي غاد يلعب ويه البعمره وأنتِ گبرتي وتسمعينها مني أخير ما تسمعينها من غيري عوفي سوالف الجهال وكظبي نفسج ورزيها صرتي حرمة الشيخ والعيون كلها عليج . 

ـ أن شاء الله 

ـ گومي على زلمتج ولزمي سجادتج علمود الله يوفقج 

ـ هزيت رأسي وگمت وأجتي خالتي لميعه وكعدن يحجن

لميعه ـ والله يمه حاجيتها الا رصيدي خلص ما تفعل وتكول السالفه وصلت أبوي الشيخ وأنه طلابتي حلها عدكم ما أرد القصر أذا ما تكظون الأريدنه .

الحجيه عطايات ـ وهبيه زعلها ثگيل .. گومي جيبي سجادتي والتربه أكظي صلاتي عگبها أحاجي أبوج وحربي ونشوف حل لهل الطلابه . 

لينا ـ أستغربت عمتي وهبيه وين معقوله زعلانه يم اهلها .. دخلت الغرفه وأبالي الف سؤال وحيره بسالفة عمتي وزعلها ولگيته يصلي وگفت أباوع عليه وأتامله حتى وهو يصلي لافت نظر ومأخذ عقلي وأفكاري لدرجه طار من گلشي وأكتفيت أباوعله .. 

گمل وأندارلي 

حربي ـ شبيج صافنه

لينا ـ ‏عليك وعلى وقارك بالصلاة شكد حلو .. ‏كمل الصلاه وشال السجاده والتربه . 

ـ صليتي 

ـ هسه أصلي 

ـ ‏زين تعشيتي 

‏ـ أنت شتكول

ـ ‏أكيد لا 

ـ ‏ههههه أي مالي نفس من أنت ما موجود أخذني بحضنه

ـ ‏بيج أني مجنون

ـ ‏ههههه تنكلب عليه شاعر

ـ أني روحي شبابيه لايغرج المظهر هواي شغلات أحب اعيشها وياج وأنزل وأتنازل ‏حتى اعيش وياج بسعاده

ـ ‏ليش أنت ما عايش شبابك

ـ ‏يا شباب ليش أني من شفت من شبابي گظيتها بين الحلال والفلاجه والدراسه شلعان گلب و‏لزمت كلشي واني بعمر وصغير لا تعينت ولا شيء بس جدي فتحلي مكتب وشركه عقارات ومقاولات الحمدلله شغله ماشي ونعمه من الله بس هم مو من ضمن أحلامي 

.. ‏صرت اطلع ويه جدي وتعلمت و‏هيه شمره مو تعلوم

‏اني ما أحبها للشيخه بس بعد صارت 

ـ ‏ليش

ـ يعني هيه حلوه تحس الكل رأيدك ويا فصل ويا طلابه أنت تگظيها والكل يحسبلك الف حساب 

.. ‏من أيام شبابي واني احلم اخذ أمي وباقر الله يرحمه واعيش بالمدينه واختار الأنسانه الأحبها واخلص من جبروت حبيب وعطايات .

ـ هيج يعني

ـ هذا القصر التشوفينه ما يعيش بي بس الگلبه ميت جثير جرت عليه مصايب وگبلج بإعوام چانت طلايب كتيبه وزكيه وبعدها أستارثنها عطايات ومهديه وناس تطعن بناس ومكايد وسوالف ما تنحجي . 

بس بالنهاية گلشي مقدر ومكتوب ‏اني ما اختاريت حياتي ‏كلشي أختارني وقيدني‏ ومن شفتج هواي حلمت أحلام وياج أن شاء الله احققهن كلهن الج

‏بهذا القصر وأغير گلشي بي نترسه جهال ونربيهم تربيه صالحه وأريدهم كل ولد أريد أحقق أحلامي بيهم . 

ـ ‏كان جوابه كلشي بوكته ‏.. أدري بيك ضايج من وره عمه 

ـ لا ‏الي ضايج منه تختبر محبتي الها وضعفي 

ـ ‏يعني تجبرك 

ـ ‏اني ما انجبر على شيء بس تصير شغلات نسويها بارإدتنا بس احنه ما راغبينها

ـ ‏مثلاً تتزوج!

ـ مو شرط .. ‏بس إتاكدي أني مستحيل اتخلى عنج مهما كان الثمن 

ـ ‏اني كلش أحب اهتمامك ‏وحنتيك 

ـ ‏وبعد

ـ ‏وشكلك وهيبتك وريحتك حضنك يمكن لان ماشفت حنان من أحد .. ‏يعني يعني اني مجان أحد يحن عليه ويسأل غير نافع هو الوحيد زين وياي يسألني يتفقد عني من يوم الشفته هو ما عافني صح أخاف منه وأهابه وأصلاً أول ما شفته جنت أسمي عزرائيل الموت بس مع الوگت أكتشفته يخاف عليه لان حاسبني وحدة من أخواته وأني أحسه اكثر من اخو ‏من تنزل دمعتي أول انسان أتمنى احجي وياه لان يفهمني

ـ بس هسه أني موجود 

ـ ‏اي فدوه لعمرك

ـ ‏باسني برأسي 

ـ ‏دبدلي خل نطلع بالسياره

ـ ‏هههه هسه

ـ دمشي امشي . 

ـ ‏لبست صايه فوك دشداشتي وشحاطه نازكه ولزمني من إيدي حاضنها ‏وطلعني مثل الحراميه اهل القصر كلهم من وكت يتعشون ينامون ‏صعدنه بالسياره . 

لازم أيدي يبوسها ز‏طلعنا من القريه بعدنه من المكان لحد ما لاكانا مطعم و‏نزل اخذ عشا واجا و‏صفينا عالشارع الجو حلو بليل بس حار بالنهار و‏بروده واكف باب السياره واني منزله رجليه واكل كلشوي يدنك يبوسني وشارع فارغ الأجواء تخبل ليل ونجومه وحبيبي . 

‏كملنا عشا ومسح على شفتي وباسها 

ـ شگد طيبه 

ـ أبتسمت فرحانه بي ونزلني نتمشى بالشارع 

‏الشي الغريب بي ‏شعري طالع وهو حاضني ما عارض ولا گال ممنوع مخليني على راحتي أتمنيت الحياه تتوقف هنا

.. ‏جوه أيده يلعب بخصلات شعري يبوس كصتي

ـ ‏بعد كل مره أجيبج هنا ونضل نتمشى هدوء بعيدين عن الكل بس أني وياج وعشگنا 

ونشوف غير مكان مو أحلى نغير شتگولين 

ـ ‏اي كلش يونس

ـ ‏فدوه لطولج شكد احب اسمع حجاياتج . 

ـ ‏أنت شيخ بس داخلك شيء يختلف يجنن شيء أني شايفته وحابته بيك ما جنت متوقعه بهل الهيبه والجبروت الكي أنسان يفهمني وأفهمه . 

‏ـ أني بشر طبيعي . 

ـ أي .. ‏رجعنا باالسياره والوقت متأخر وهو مشغل أغنيه حبك غدا بالروح ويغني وياه وأني أتامله ما أمل منه 

.. وصلنا القصر نزلني شايلني من أحلى اللحظات من وصلنا الغرفه ‏وهو لهفته تزداد ‏حضنه ريحته بوسته ‏شلون شايلني شلون محتويني وخايف عليه ‏دخت واني اتأمل كلشي بي و‏ختمنا أحلى لحظاتنا بنومه عميقه كنومه الأ حلام الوردية .. 

بقيت على هالحال الحلو عشرة أيام عشتهن من احلى أيام عمري .. وأغسل ملابسه وأكويهن ويجي فوك رأسي يشرف على شغلي بس الحمدلله أني اعرف أكوي ملابس خلصت من هاي المهمه الصعبه .

واكفه وأعدل بدشداشته ولبسته ساعته ومحابسه وهو رايح بعالم ثاني يتأملني ويتأمل دلالي اله أخر شيء رشيتله العطر ومحضره المبخره بس خليت البخور وبخرته 

أخذ مني المبخره باسني من رأسي . 

حربي ـ خاف اتأخر نامي لاتتنظريني وأتعشي . 

لينا ـ لا أبقى أنتظرك ليش أنت مو تروح تجيبها وتجي خوما تبات يم خوالك . 

حربي ـ لا بس أخاف اتأخر 

ـ تمام ترجعلي بالسلامه 

ـ يسلمج الله 

ـ طلع الله وياه ولملمت الغرفه وطلعت لكيت عمتي صالحه تطبخ العشه عمه أساعدج بالعشه 

صالحه ـ لا يمه شتساعديني أنه هذا شغلي وما عليج كعدي وأستريحي

ـ لا خل أساعدج بالطبخ أذا ما اعرف علميني عادي 

ـ لا يمه شلج بي وبشلعان الگلب وانه العشه ما سويته بس الج العيال تأكل الوجه كعدي يمه والطبخ أنه لازمته لاتخافين ما أكولن لينا ما تطبخ وأحجي عليج 

ـ تحجي وتضحك فدوه لعينج عمه 

ـ أسم الله عليج يمه .. بس كعدي يمي ونيس كافي 

ـ شگد طيبه .. كعدت يمها ومن صبن اني فرشت السفره وكعدت بس الحجيه ما أكلت عينها عالباب العرفته عمي مشعان وجدي حبيب وحربي رايحين الأنبار على أهل عمتي وهبيه يرجعونها ومن العصر راحوا ما بينوا .. أكل للكمه وعيونهن عليه غصيت وأختنكت وگمت رحت الغرفه ها عيني أشو تأخرت . 

ضليت أنتظره لا ساعه لا ساعتين ماكو رد منه وطلعت يمهن خالتي لميعه نامت بمكانها بصف حبوبه وحبوبه تسبح بسبحتها وعينها عالباب وحمودي يلعب ويه عمي منعم وجاسم .. 

كعدت شوي ودخلوا علينا والوجوه ما تتفسر وعمي مشعان ضايج وجدي حبيب مشى الغرفه معصب 

حربي گبل راح الغرفه مستعجل 

الشيخ حبيب ـ يريد يصخم وجهي ويخزيني ويه خواله 

مشعان ـ بويه على كيفك بهداي بهداي . 

لينا ـ نظرات الشيخ تحولت لغضب اله وعصرت شالي. عمي مشعان أشرلي برأسه معناها لحگي رجلج مشيت سريع لكيته ذاب شماغه وعگاله وكاعد على حافة الجربايه وطابك أيديه ومحتار .. گلبي نغزني بخوف بقيت متصنمه بمكاني الا فززني صوته 

حربي ـ ليش واكفه تعاي هين گربي صوبي بويه شمالج مخشبه بكاعج . 

لينا ـ تقربت عليه ولمني بحضنه يبوس بيه ويعصرني قوي بحضنه

ـ مشتاگلج حيل 

ـ وأني هم .. إشسويت .. عمتي ليش ما رجعت وياكم 

ـ ما رجعت شسويلها هي ترجع من تصفن على وگتها ترجع 

ـ ها .. وليش جدك ضايج ومعصب 

ـ يعصب لكيفه شعلينا بي .. ليش خوما عصب عليج 

ـ لا بس باوعلي بنظرات تخوف 

ـ ما عليج منهم گومي طفي الضوه وتعاي حدر بحضني . 

ـ گمت غيرت ملابسي ولبست شيء خفيف وطفيت الأضويه ونمنا .. ويومين هو رجع مشغول ومخبوص بسالفة زعل أمه رايح راجع لـ الأنبار وعمتي بعدها معانده ما ترجع واهل القصر ضايجين من الوضعيه

وهو العرفته زعلان من جده ما يتحاجون حتى گام مـا يروح وياه يروح وحدة بس ما ترجع . . 

حتى يچي ضايج حيل وبس يجر جگاير وما يحجي يلف رأسه وينام دايخ وأباله ما عرفتها شنو هي! الأ بيوم أجه نافع وشال القصر بصوته وحربي طلع مستعجل وأني لحكته يا ستار . 

نافع ـ گابلوني وحاجوني شُــنو هذا السمعته لو أذني أشرگتني بس أذني بگلشي تشركني الا سوالفكم تطبل عليها 

الحجيه عطايات ـ شبيك محترك دمك وجاي هاد علينا ولك نويفع مو أحش رجليك وأطبر لسانك بسجينه عميه لاتعلي حسك وحياة أهلك طيبين كصر حسك يحبوبه وأحفظ ماي وجهك وأكظب دربك وأكظب بيت وحرمتك لان السالفه ما تخصك يا حبوبه أطلع منها وخل أهلك يحلونها . 

نافع ـ شلون يحلونها بله حاجيني عطايات حاجيني لاتسوديني بسوادينج أنتِ وحبيب وطغيانه على أهل القصر .

وهذا حلچ لهل الطلابه هم خياط بإبره عميه وشبج مثل ما عرفناها وتعلمنا عليها مثل خياطج چا كظى بيج العمر ونسيتي خياط عمتي سميعه وصباح ومحراث الشر الورثتنا أنتِ ومهديه وخليتي العرب تأكل عربين وتوارث الحقد من جيل لجيل لما وصلنا لهل الحال وتطيح حظنا وأنعل سلفىٰ سلفانه ..

أذا أنتِ نسيتي أنه ما ناسي يحبوبه وتدگ بگلبي مثل الأبره لأن أنت جنتي السبب بي وما أسمحلج تدگين الأبره بگلب غيري مثل دگيتيها بگلبي ..

وعدواتجن أنه ما ناسيها لاترجعين تعيدين الخياط شلون ما جان علمود ترضين أهل الغربيه! 

ـ چا أنه طلعت مربيتلي واحد يريد يأكلني ولك هيج تحاجيني ينويفع هيج تجازي الربوك تعايريني يحبوبه 

ـ من ورى سوالفكم شوگت تخلص شوگت تنقرض ما مليتوا الكراظه ناس تأكل بناس الأ أم راضيه على أبنها 

وتأكل بلحمه لا الأب راضي على مرته لا الجد راضي على أحفاده لا الحفيد عايش حياته مثل هالبشريه تزوجون بكيفكم وتطلگون بكيفكم وخطايا بنات الناس منو يشيلها بيا قاموس عشائري جيبوليه هسه وگابلوني جيبولي قاموس يحجي على كسر رگاب بنات الناس 

الشيخ حبيب ـ شبيك صوتك عالي گاولي مثل خالك وطلع نفسك لاتتدخل محد رايد منك .

نافع ـ لا جدي السالفه من توصل بنت خالي ويتيمه وأمانه خالي وشغلكم الأعوج أتدخل وحجايتي أكولها لو على گص رگبتي وهذا الزواج ما يتم لو وهبيه تضل كاعده بيت أهلها وخل هما يتلون عقلها ورعونيتها من مخليته ويه وحده لو مزوجه حربي جان بگد حفيده من حفيداتها .. وعلى شنو ما تردونها وما راضين على هالزواج على شغل ترى محد أجه من بطن أمه يعرف كلجن تعلمن وتمرمرن على أيد عماتجن ليش تنسن 

لو عدجن ثارات وجايه تأخذ ثأرها من هالطفله وأنه الأعرفه المظلوم ما يظلم ويطغى على عباده أشو

بهذا القصر أشوف العجايب . 

هي حجايه وكلكم تسمعونها وكدامها هي هم تسمعها زين إذا هذا الأمر تم بساعتها أجي أسحبها وأطلگها وكلمن يسد بابه ويصم حلگه وخل حلولكم تفيديكم وخطايا بنات الناس تكسر رگاب وتهدم بيوت 

ومن الأساس أنه زواج حربي من لينا ما داخل عقلي لان أعرفكم وأعرف بيها ما تعيش عدكم بس سگتت لان الأمر صار مو يمي وهي تسمعني كلش زين .. 

الشيخ حبيب ـ الظاهر أنت نسيت نفسك وگمت ما تحشم أحد 

لينا ـ يحجي بصوت عالي ودمه محترك ويأشر بأيده وعصبيته تطلع منه عيونه أشتعل بنار ولبنى شالت بناتها خلتهن يم عمتي صالحه نصرعن من صوته 

وكل هذا حربي مخلي أيده بجيبوبه وساكت ما 

يحجي وأني مثل الأطرش بالزفه بس تقريباً عرفت نافع شيقصد بس معقوله حربي يسويها ويگسرني .. 

أجه عمي مشعان سحب نافع قوي من تيشرته من گدامهم ويصيح عليه وهو ما مهتم يدردم ما سگت ولا اله طفيه توالهم الصلي .. والشيخ حبيب طلع مزعوج حيل وحربي أندار وباوعلي وطلع لحگهم باوعت على عطايات ودمعتي نزلت شنو حبوبه تردون تزوجونه تردن تهجمن بيتي وأني يله صارلي ١٢ يوم من متزوجه 

ليش إشسويتلگم أني شُنو ذنبي بعدني عروس ما خفتي ربج أحسبيني وحده من بناتج . 

الحجيه عطايات ـ أنه مالي شغل منج لعمتج وهبيه هذا شغلها هي ما تريدج وتريد بنت أخوها وشاده حزامها عليج وگبعت ومشت لأهلها وگالت لرجلج ما تريدج چا هي وليه يا يمه . 

لينا ـ يعني صُدك تردون تزوجونه ... حاجيني حبوبه صدك الگاله نافع .. هزت رأسها ونزلت رأسها 

لينا ـ نزلت دموعي وحرگة گلبي بهذيج الساعه تحرك كل أهل القصر .. أباوعلهن ساكتات بس أني البچي والهضم بگلبي رفعتني لبنى وأخذتني تغسل بوجهي 

لبنى ـ غسلي زين لايصيرلج شيء حسبي الله عليهن 

لينا ـ وگفت الطم على وجهي بكل قوتي ولج لبنى يردون يزوجونه يردون يأخذونه من حضني عمتج تريد تحرك گلبي على حربي ليش ليش أني أشسويت الها

تريد تهجم بيتي وتجيبلي ضره تريد تكسر گلبي 

أني والله والله ما ركضت وراه والله هو الاجاني وحاجاني وخلاني أحبه وأني من ضيم الدنيا والزقنبوت الشفته بحياتي حبيته تعلقت بي

... لبنى هو روحي من الدنيا لبنى أموت والله أموت أذا طاع أمرهم وتزوج أموت .. بس حربي ما يسويها أي ما يسويها هو وعدني ما يكسرني أي وعدني أي أي . 

لبنى ـ گافي تردين تموتين نفسج ومنو يستاهل حشىٰ گلب نافع من الله يأخذهم . 

ـ صرخت بيها لاااا تدعين عليه لأااا تدعين عليه هو ما اله دخل أهله أهله وأمه گله من أمه وأني عبالي خوش مره وطيبه وتخاف الله طلعت أنكس من حربيه بقاطات حربيه وجهه لوجهه هاي بالضم هاي ينخاف منها يا يلبنى ينخاف منها وخافي على أختج تموت بسبب البرأسها والله أموت أذا حربي تزوج أمـــوت

دگيت ولطمت وملخت نفسي وهي تحاول وياي ما گدرتلي الا صاحت وهي تبچي

لبنى ـ نافع الحكلي نافع الحكلي لينا راح تموت وتروح من بين أيديه . 

لينا ـ أجه مفزوع أخذني منها رفع وجهي ويطبطب على وجهي بضربات خفيفه شالني وخله رأسي بالمغسله وشغل البوري نكع رأسي ورفعني گبل وأرتميت بحضنه أنت أخوي يردون يكسرون أختك تراضاها على كسيرة أختك تراضاها 

نافع ـ لو أرضاها شايفتني واكف گبالچ ولج أنتِ دمي وهضيمتج ودمعتج هذا الشيء ما يصير وأذا صار ما الج كعده بهل القصر أخذج يمي وأني أتكفل بيج .. 

لينا ـ أنطاني لـ لبنى سندت نفسي بحضنها وأخذتني الغرفه نمت وأني حاضنتها أريد أضيع بحضنها بحنيتها بريحة أمي .. يمه لاتعوفيني بعد يمه يردون يكسرون گلبي يمه هضموني يمه هضموني... شتاگيتلج يمه مشيتي من وگت وخليتنا عايشين بهضم جنت أسمع اليتيم دومه مهضوم بس ما عبالي هيج هضم كل ظني ينهم على أهله وعلى اليتم العاشه مو على الظلم اليشوفه هالبشريه الوحوش .

بقيت حاضنتها ومتمسكه بيها وهي تبوس بيه وتبچي وياي لاتعوفيني لبنى لاتعوفيني أبقي يمي اليوم حن گلبي على أمي لو هي عايشه أني مو هذا حالي .. 

نافع ـ ها نامت 

لبنى ـ لا بعدها تشهك خليني يمها وباجر الصبح نروح 

ـ ماشي أبقي يمها والبنات أني أروح أنومهن أذا كدرتلهن 

ـ لا ينامن بس أنطيهن لهايات والبطانيات مالتهن بقيتهن بالسياره وغطي روؤسهن گبل ينامن بس طبطب عليهن . 

ـ ماشي . 

لينا ـ أختفى صوت نافع وسمعت صوته ولهفته وخوفه 

حربي ـ شبيها شصارلها منو حاجاها

لبنى ـ لينا عرفت گلشي يحربي وأذا هذا الشيء صار خطيتها برگبتك لان أنت وافقت وتكفلت بهل اليتيمه وأنت زين تعرف رفض أمك وأهلك بعد ضلت يمك يا أهلك يا لينا . 

حربي ـ شتحجين أم رانيا وهذا الأمر ما يتم بكيفهم يحجون وأنه ساكتلهم بس أذا أحجي أزعل هواي ناس خليني ساكت وأشوف تاليها وياهم بس لينا محد يكسرها وأنه عايش . 

لبنى ـ دير بالك عليها .. 

لينا ـ أبتعدت وسمعت صوت الباب أنقفل تقرب رفع خصلات شعري الرطبه ومسح على وجهي 

حربي ـ هاي شصاير بيج بويه من عساها بحظهم وبختهم شبيج أنتِ چا مو حجيت أنه كل شوي أعيدلج 

لينا ـ گلبي ما مرتاح 

ـ لا حبيبه أرتاحي هذا الأمر ما يتم وسدي موضوعه 

ـ رفع الغطا وقربني اله ونومني وهو يلعب بخصلات شعري وفكره شارد يحجي شيء وصفناته شيء ثاني! 

نمت ونار مشتعله بصدري وگعدت الصبح ما لكيته شفت موبايلي سحبته وأتصلت على لبنى تجيني 

لبنى ـ هلا عيني شلونج شلون صرتي 

لينا ـ على الله وينج .. أذا بناتج نايمات تعالي للغرفه 

ـ وين أجيج مو بالقصر أني 

ـ ليش وين لعد بس لا رجعتي 

ـ أي والله رجعنا 

ـ مو الوقت جان متأخر شلون رجعتوا جان ضليتوا 

ـ بعد نافع قفل الا نرجع والله الشوارع فارغه تخوف بس شسويله عناد ما يقبل نبات بغير بيت 

ـ ليش شمعنى 

ـ ما أدري عنده عقده بهل السالفه وولج طلعنا والوگت حيل متأخر وأني حجيت ما يفيد بي ليش حبيبه أحد گاله لاتطلع أبقى بات والصبح أمشي ولا أحد فتح حلگه 

ـ حقراء لان حقاني وكاشفهم وما يرضى بالغلط والعوجه ما يردونه يچي القصر . 

ـ أي هيج 

ـ لبنى بيج ما بيج أديرين بالج عليه نافع رجال سبع يسوى كل أهل القصر والله 

ـ زينه شمسويتله 

ـ وينه مبين صوتج واضح 

ـ طلع راح السوك هسه على جيه وأنتِ هم گومي أسبحي صلي صلاتج أستغفري وتحسبي . 

ـ أن شاء الله بوسيلي البنات وسلميلي على نافع

ـ تمام عيني أنتِ .. 

سدت الخط وگمت سبحت وصليت وبقيت بالغرفه ومر أسبوع هدوء وهو يروح الدوامه ويكظي شغله ويرجع طبيعي يتصرف وياي نفسه ما تغير والسالفه محد حجه بيها يا رب يكون حجه ويه أهله ونهوا هالموضوع .. 

أني ليش أحبك . 

حربي ـ لان أني أحبج 

ـ لا غلطان لأن أني أحبك وبس 

ـ فدوه لحجايتج الأحبهن تارسات گلبي ترس 

ـ ما يصير تضل يمي 

ـ يصير ليش ما بصير بس هاي الطلابه الرجال نخاني بيها يصير شيخج يطلع بالوجه الأسود وأتفاشل ويه الأوادم . 

ـ لا يمه طبعاً ما أقبلها الله يبيض وجهك وخطاك يبعد بيتي .. 

ـ عجل خليني أتوكل لأن إذا تبقين گبالي أكنسل هالطلابه وأتكفل بطلابتج . 

ـ ضحگت وتقرب باسني من گصتي وشال إيفون وطلع ورجعت العطر عالميز ولملمت الهوسه الأحبها ساعاته عطوراته سوالفه الأحبهن شماغه عگاله .. رتبت گلشي وعندي دشداشه اله مغسوله بعد ما مگويه كعدت أكوي بيها وأغني بإغنيته المفضله حبك غدا بالروح ... 

فجأه أنفتح الباب وفز گلبي ويه دخلته وملامح وجهه من حربي الى شخص ثاني .. تقرب وموبايله بإيده 

حربي ـ چا هيج يا بنت الناس تلعبين على گلبي هذا الجزه يا عليلة گلبي 

لينا ـ شُــنو! ... خله أيفون گدامي وهو يسحب المحادثات والصور كلها كانت عاريه وبفستان مناسبات ركبتي مبيه وشعري وكل الأشياء الثمينه عنده بوسط محادثه شرفي وسمعتي محصور بيها 

.. والكلام أخ الكلام يسحب الشاشه وأني رجعت لنقطة الصفر الخلاني وبلني بيها ماكو كلمه توصف حقارتهن أستغلن هالشيء لصالحهم وشافنا ساكت ومطنش كل أهله لخاطري عرفن شلون يوجعن گلبي وسونها الما يخافن الله 

.. من بعد صفنه وأنتهت المحادثات وتوقف لأخر سطر 

كانت الكتابه بسطر مليان قذاره .. كل نومه أنام بيها وياج .. ما گدرت أكمل الكلام غمضت عيوني هاي بيوم من الأيام ردت أنذبح وتطير رگبتي بس نافع خلصني منهم لان الوحيد الصدگني بس هسه منو يخلصني .. 

راح يصدگني يسمعني ما يظلمني 

وركع الأيفون بالحايط تتطشر وحجه 

الشيخ حربي ـ هاي شُــنو لينا ..