رواية خيط وابرة الفصل السادس والثلاثون 36 بقلم شمس العراقية

مساء الخير أحبتي الأعزاء .. بارت من وگت لعيونكم الحلوه ✨🤎

لينا ... 

ـ ‏‏ضليت صافنه دقايق تعد بعداد عمري أريد أستوعب الصدمة .. وفززني بنرة بصوته 

الشيخ حربي ـ ‏لينا إحجيلي شنو هالسوالف الي إندزتلي

لينا ـ ‏ما أحجي كلشي لان أني بريئه ومظلومه بس كل الي اكدر أكوله هذه مو أني ولا هاي سوالفي و‏برائتي بقت يم الله وأختك صفا ماتت وأخذت كلشي وياها واني الي ضل العار ملاحگني . 

.. أبتعد و‏ضل يروح ويجي نار تطلع منه يحير شيسوي بروحه لو بيه داخ دوخه تحرك الأخضر واليابس ويمكن تحرگني بسبب هالمصيبه الرجعلي بيها .. 

ـ ‏واني شلون أصدك گولليلي حاجيني لينا شلون أصدك هذا الشافته عيني ما ينحجي ولج ما ينشاف سوالف أستغفر الله منين أتلكاها أني منين .. 

ـ ‏تبقى هاي مشكلتك 

ـ ‏لينا احجي عدل لا أكسر حلگج . 

ـ ‏خابر على نافع

ـ ‏وليش أخابر قندره هو شعليه 

ـ ‏هو ادرى بكلشي صار وأعرف خل هو يحجيلك وحتى لـو أني أحجيلك يجوز ما تصدگني بس أخوك يختلف روحله هو يفهمك وينطيك برائتي . 

ـ ‏يعني كلها تدري واني مغمض والمغفل الوحيد 

‏ـ لان كلها ما صدكت لهذا صار موضوع عادي وكلها طعنت بشرفي ومحد صدگني لان أختك لبستني التهمه بدلائل مثل ما وصلتك وصلت عمامي قبلك وصار اللي صار . 

.. ‏بس نصيحه لا تتخذ هالسالفه حجه لأن راح تصغر بعيني دير بالك تسويها حربي خليك على موقفك لاتكسرني وتخلي الكل يتشمت بيه لاتخيب ظني 

بيك حربي 

.. ضل ساكت وشال موبايله و‏عافني وطلع بقيت كاعده وأحس نار تطلع من رأسي بس ما أبجي بس هيج أحترك من الداخل وغضب الدنيا برأسي ما فاتت رأسج نورس والله أنتِ الدزيتي گلشي اله والله ..

لأن الوحيده المحادثات جانت عندج من رسلتهن صفا أذن بقيتي محتفظه بيهن وهذا سكوتج وهدوئج مو بلاش أستغليتي فرصتج وأكيد عمتي گالتلج أكيد . 

بقيت أنتظره ‏لا ساعة لا ساعتين والوب هذا وين راح وصار صار المغرب وهو ماكو .. تذكرت نافع موبايلي وين خفت لايكون أخذه بس همزين موجود أتصلت

عليه بسرعه جاوب نافع حربي يمك 

نافع ـ أخذي نفس على كيفج 

ـ جاوبني نافع حربي يمك أجاك سألك 

ـ أي أجاني وسألني يا ساقط غيره دزله المحادثات يريد يعرفه منو 

ـ يعني هو مصدگني 

ـ مصدگج يابه والله مصدگج بس سألني گال منو من جماعتنا جان يدري والمحادثات ليش موجوده وأني بساعتها حذفت گلشي وكسرت مهجومها منين طلعن هالصخام منو نبش الگبور علمود أحفرله گبر وأطمه 

ـ ما أعرف بعدين نحجي بس هسه گولي حربي شگالك بعد شسألك 

ـ أي شبيج گتلج سألني وحجيتله گلشي والله وأقتنع ما جاب طاري خطيه بس يريد يعرف منو رسلهن اله 

ـ بس أني أحسه ما مصدگني خايفه ما يصدك بيه نافع

ـ لا مصدگچ أنطي وگت وكل رجال مكانه صعب يتقبل الأمر بالبدايه والمحادثات الواصلته توگف العقل لينا أني لو بمكانه أعمل العمايل موقف صعب ياعيني 

ـ ليش أنت ما حجيتله من فض سالفتك من عمي محمود طلب منك تعقد عليه ما گالك ما سألك بوگتها جان حجيت وفهمته 

ـ لا سألني وگلتله سوالف وعداوه نسوان ما يحبنها لان لسان وما تسكتلهن وحشن برأس عمامهن وصارت مشكله وأنه رحت تكفلت بيها وجبتها للقصر .

ـ أنت مو جنت ما موافق على زواجنا شعجب ما حجيتله 

ـ لينا شبيج من كل عقلج أني أسويها تردين أطعن بشرفج مقابل حربي يعوفج وأمنع هذا الزواج لاا بويه لا هاي دگه ناقصه مال كواويد مو لنافع .

وأنه الأعرفه هاي السالفه ماتت ويه صفا وحذفت گلشي منين طلعن منو محتفظ بيهن هاي الشالشه عقلي 

ومن منعت وعارضت هذا الزواج لان أعرف ملتنا طينه نكسه وشفتي القذاره الواصلات الها ما يتوبن لا والله بس خل ألزم رأس الخيط وأعرفها مني! وأنه شاك بيها وأذا تيقنت منها قسم بالله برأسي شيء حالف الا أسوي وأطيفها طفية تحلم تخلي عينها بعيني! 

ـ تمام من تجي ونحجي بس هسه أريد أعرف حربي وين 

ـ جان يمي أجاني للبيت حجينا وبعدها رجع للقصر وين يروح هسه يجي وأني عندي خفاره بس تخلص الخفاره وأتفرغ لهاي السالفه! وأريد أعرف منو رسلهن اله 

ـ متأكد رجع القصر أشو أحسك تضم عليه أخاف ما مصدگني 

ـ هو مصدكج والله حسب كلامه بس نفرض ما مصدكج نفرض .. والله من تخلص خفارتي أجي مو بكيفه ما يصدك برائتج أرجع احجيله اليوم وباجر بس حربي متفهم لينا والله بس خواله مدوخينه بسالفة زعل أمه هو كاعد مية الف مره أتصلوا عليه خبصوا خبصيه

ـ خاف راحلهم 

ـ هو يرجع لايضل بالج ودام مصدكج لاتخافين بعد 

ـ ماشي عيني مشكور نافع 

ـ أشو دنجبي شنو هاي تتشكرين صايره ما عرفتج 

ـ ضحكت رغم قهري 

ـ سهله لينا سهله 

ـ تمام عيني أخذ راحتك .. سد الخط وضل بالي عند حربي وينك دام نافع حجالك وأنتَ مصدگني ليش ما رجعت القصر! 

طلعت وأضويه القصر مشتغله لونها أصفر وعمتي صالحه كاعده وتكشر بيتنجان .. عمه هم شفتي

حربي 

صالحه ـ يمه حربي مشىٰ للأنبار على خواله هو وعمي حبيب!

لينا ـ حيل ما ضل بيه سگتت ومشيت وحضنت أيدي ولميت روحي وأباوع من شبابيك القصر عيني على البال عبالك باب قلعه رغم جماليه هالقصر بس صرت أحسه گبر ويخنگني ..

معقوله رحت برجليك وناوي على كسرة گلبي 

‏لحد التسعه بليل كاعده بالحديقه ‏كلها أتعشت ونامت وأني عيني عالباب أنتظره وعندي ثقه بي ما يسويها 

‏لحد ما شفت الاضويه ‏سيارتين ‏رجعت ليوره الدنگه 

‏نزلت خالتي وهبيه فتحت باب الحوش ‏دخلن السيارات

‏نزل هو منها وقفل السياره 

‏والسياره الثانيه واحد من خواله وبنيه وياه! ‏وعمتي هبيه تفتر تنزل غراض و‏جنط شگد

‏إنصابيت بروده قويه بجسمي ‏هو دخل للقصر ما شافني لان سحبت نفسي للظلمه .. ‏ضليت كاعده ورأسي بحضني ‏يا خيبتي ويا همي اني حتى بضعفي قويه وحتى دمعتي غاليه .. وبهل للحظه أحتاجيت أمي رفعت رأسي الجو گمريه ولا كان نهايه صيف مغيمه 

‏بيها خيط بروده ‏لميت رجليه البروده وصلت عظامي واني اشوفهم يتحركون ‏بلمضيف .. 

‏أبجي لا ليش أبجي هاي رغبتي شفت بيك الهاويه ومشيت بيها بكامل أرادتي وقواي العقليه .. 

.. بس ‏لا ابجيكم دم بدال الدمع لاخليكم تتحسرون على رحمه الله ... ‏والله الأ أكعد بليله خاصه بس الكم حتى ادعي عليكم من كل گلبي كون حوبتي ما تتخطاكم ربي أني يتيمه ومظلومه وشالوا خطيتي ربي حوبتي ربي لاتنساني من عبادك وأخذلي حگي .. 

‏مسحت دمعتي بطارف رداني ورجعت لغرفتي هو بالحمام گبل أخذت الغطا ما أريد أتصادم وياه ولا أشوفه طلعت ورحت يم خالتي لميعه من شافتني فزت لان شكلي مبين عليه أنكسرت أخط برجليه وفتحت أيدها 

لميعه ـ ‏يمه الرحمن شبيج 

لينا ـ ‏خاله راح جابها لبنت خاله جابها وأجه هو وأمه 

ـ جابها يمت ولج .. بس لا سويتها يحربي على بختك يا عمه چا واليتيمه ما فكرتوا بيها مو حوبة تعثر يعمه 

ـ ‏خليني يمج انام احتاج أمي طلعتي روحي عمه أريدها تحضني 

‏أحجي وشفايفي ترجف ماكو وصف يوصف حالي كعدت وخلتني بحضنها وأني كل جسمي يرجف وگلبي ينفض من صدري وعبرتي تارسه صدري . 

ـ ‏حسبي الله بيج يا وهبيه سويتي اللي برأسج 

ـ أرجف بحضنها ‏حبوبه كعدت تمسح على رأسي وتعدل بعصابتها وشيلتها ‏تحجي بينها وبين نفسها 

الحجيه عطايات ـ هسه نافع أذا درى شيحجي شيعمل الا يسودنكم من عمت عيني عليج يا لينا يا حبوبه . 

لينا ـ خليت رأسي بحضنها وتطبطب عليه و‏انفتح الباب واسمع صوته . 

حربي ـ ‏عميمه يمج لينا

لميعه ـ ‏اي يمي لينا ‏.. سويتها يحربي كسرت گلبها چا هيج عرفناك ما مرجيه منك يعمه . 

حربي ـ ‏لو بودي ماسويها بس دگه خوالي الناقصه ما تتسولف يعميمه ‏أني ليش اكره سوالف المشيخه لأن يسوكون الحرمه مثل النعجه وبالاخص خوالي . 

ـ ‏ولينا يحربي 

ـ ‏هو محد حارك گلبي غيرها .. ‏نامت 

ـ ‏لا بعدها بس كلبها يريد يهج من مكانه 

ـ ‏تقربت خطواته ووصل ليمي و‏لزم شعري

ـ ‏لينا يابه فدوه اروحلج حاجيني لينا عيني 

ـ أحلفلك ‏بروح باقر تعوفني .. أحجي احس الغصه كسرت بلعومي وبعدها ‏طلع وما شفته . 

‏شلون ممكن تمر ليله على إنسان يتلقى خيانه أو غدر أو كسره جبيره وتزرف گلبها زرف ويالأخص أذا جانت من شخص كان أخيتارك .. ‏تمر هي وغيرها 

‏ضليت اردد "‏سبحانك لا اله انت اني كنت من الظالمين 

‏لحد ما غفيت والقهر ينش بظلوعي نهش وفزيت الصبح على‏ صوت نافع لحد اذاني هو يعيط ومحترك گلبه وحبوبه ما تحرگت ضلت راگده بمكانها . 

نافع ـ سويتوها كواويد سويتوها يا ظالمين وگسرتوا بختها من عساها بعافيتكم .. 

ها وهبيه خاتون أرتاحيتي بردتي گلبج هسه رضيتي من أبنچ مشىٰ على رغبتج وتزوج التردينها .. أنتِ أم أنتِ من غضب عليجن من نسوان عدجن كيد الله يترس منجن جهنم 

عمي ليش تحجون على بيت ياسين طلعتوا أنتو بيت البله وما تفرقون عن بيت ياسين بشيء هما يطعنون بالشرف وأنتوا تشيلون خطايا . 

.. ولكم طفله هاي طفله يتيمه أم وأب شنو أنتوا عقولكم وين من خرب بروح أهله اليكابلكم بس والله والله أني قسمت وحلفت إذا هذا الأمر تم لينا ما تبقى أني أخذها عندي وأتكفل بيها وأنعل الخير والشريف ما بيكم تزعلون ترضون طبكم مرض ... 

لينا ـ طلعت وصرت گباله وأباوعله شلون يحجي ودمه محترك عليه وأني ‏دمعتي نشفت 

نافع ـ والله والله يا حربي ليكون حلمك تلزم ثوبهاااا بعد ملطشه عد الخلفوكم هي ‏توليتوها وجبتوا عليها شريچه . 

‏حربي ـ سد حلكك وتوكل لبيتك محد رايد منك تتدخل

‏الحرمه حرمتي ومالك دخل . 

لينا ـ ‏ضل يحجي وتلاغوا بينهم أخر شي تعب نهد حيله وطلع والكل سگت ما تدخلوا بينهم خو حبوبه خنست بغرفتها . 

.. ‏ضليت صافنه الله ما أنطاني أخ اكبر مني ولا أب استند عليه بس عندي نافع اكثر من اخ هاي نعمه 

‏أروح وأرجع ورحت ‏حضرت جنطتي وأغراضي 

‏صار الظهر هو يفتر ما طلع دخل ‏شاف الجنطه وما حجه 

‏للعصر اني كلشي ممأكله وگمت ‏رجعت كلشي بمكانه ما أريد أستعجل ‏لازم افكر زين . 

‏لحدما صار العصر رحت سبحت وصليت جمعت أغراض الي احتاجها ‏ذهبي كلشي يخصني والمستمسكات كلشي حتى عقد الزواج ..

‏دخل هو واني متمدده أتصفح بالموبايل شيء طبيعي الله نزل السكينه بگلبي من بعد الصدمة ‏او يمكن اني وقفت الاصوات براسي ‏بس حتى أعيش يوم اخير يضل بذاكرتي .. 

ضل واكف ‏ما حجه شيء ركز اكو شغلات ناقصه من أغراضي وكل هذا وأني ساكته ما حجيت ولا مانعت ولا ناقشت ولا عاتبت حتى! 

ومن طلع قفل الباب ‏هذا ذكي خاف اطلع وراه و‏رجع وكت العشا تعشيت والأمر طبيعي 

و‏خابرت نور ولبنى كلهن يصبرن بيه بالي مو يمهن

‏الي عندي مو سهل ومستحيل يخليني اطلع براحتي 

‏يومين هو مراقبني ومن يطلع بليل يقفل الباب ومن يجي ينام هم يقفله أثنينا ساكتين .. 

‏صرت أحس نفسي قطعه أثاث و‏صبري بلش ينفذ ما أريد انهار كدام احد حتى كدامه . 

و‏نافع كل يوم يمنا يفتر ويرجع باله يمي اني حرف ما نطقت أكل اشرب طبيعي ولا كأنه صاير شيء 

أفتر وأحوس بهل القصر الأكشر وگلبي بارد اشوفها كل يوم تاخذها وتطلع للسوك عرفت إسمها سوسن وما يرجعن غير المغرب شكلها لبسها عادي وكلش سمره بس ضخمه مبينه معدله ابتسامتها حلوه لسانها عسل مرات تحجي ‏وابتسم على حجيها ‏لهجتها حلوه .. 

‏ناجح مقيم يمنا و‏نافع يفتر مثل ملك الموت ‏يجي هيج كشف اني ولا الي نفس انطق حرف و‏عمي مشعان ساكن القصر يخاف من المشاكل 

‏حربيه اللوكيه هم تروح وياهن ‏عالواهس جابت ناجح وأجتي تتشمت بيه وهم ‏عبالها عمي مشعان يگلبها

و‏اليوم صابغه شعرها وتشوفه لعمتي صالحه ومشت حبوبه وغمتها . 

الحجية عطايات ـ ‏يمن كون گبور التطمج يالخزي

‏عالگبره جبه حمره . 

‏لينا ـ وهي تنفض بنفسها وتلفلف بالربطه و‏ناتفه الحواجب و‏متحضرات تلفلف بالجبه وشايله الجوزدان على كولتها وأني حاطه جف كرزات واكرز كاعده على بايات الدرج 

‏ونافع يهز بيده ما أدري على برودي ما أدري عليهن 

نافع ـ أي ‏دخذنها ‏رتبنها أي أي حضريها اليوم عرسها برد گلبج نتفي صلخي من غضب الله عليجن مو نسوان 

‏حربيه ـ تنجب أنتِ لاتتدخل عيب عليك زايده منك حاشر روحك بسوالف النسوان شعندك كاعد وكاظ الباب ما تولي على مرتك 

نافع ـ ‏يمه لا تمشين ويه الموجه ترى أكلب الموجه واهلها على رأسج 

‏حربيه ـ تأكل نعالات مكطعه على حلگك 

ـ چا هيج صارت دصبريلي الا أطلگج يحربيه والله مو أبن أبوي مشعان أذا ما طلگتلج وديتچ على قويدر . 

ـ خاب ما تنجب تطلگني چا هيه بگيفك الأغم لوگي بنات صباح

‏ـ أحسن مــا أكون اللوكي للضرتي

ـ أتأدب نافع تره أكطع النعال على راسك لأتشوف نفسك كبرت

ـ ‏يحجي واني أبتسم على حجيه ما سگتلهن عاف أمه وتوجه على عمتي وهبيه ويحجي على اهلها بسامير

نافع ـ ‏شون أهل جيس حب يسوگون النسوان مثل الغنم .. ‏هو أنؤ حربي غرفه أخشاب اشتريتها وهسه تراجعت أريد افلوسها ‏مو عاد يهدونه مره حتى ترضى الماما 

لينا ـ ‏عمتي وهبيه سكتت ما ردت عليه ‏بس حربيه وما ادراك ما حربيه متحزمتله على الحجايه 

حربيه ـ ‏اي اي أحسن من ما يحب وحده وتضربني بوري وتاخذ صاحبي واروح ازوج أختها واصير اللوكي الرسمي الها وأركض جدامها والله أمانة صاحبي چا والحب وين صفى بي الوگت 

‏

نافه ـ أقلها عندي شرف وغيره ويمه أفقر انواع الفقر 

‏فقر الضمير وإذا ذمه ماكو معناها سالفه مكيسه مو يمه! 

‏عبالج تعبر عليه أني ما ناسيچ مخلي بالي وعيني

وراج بس ‏والله والله يا يمه مثل ما رجعتج وخليتج ساكنه القصر بس حتى مشعان يتنوعلج لـ أخليج بيت ابوج عند قويدر

بس والله يا يمه أنتِ على سوالفج وشايفه بنتج ماتت وهي ما غلطانه ولعبتي لعب بهل اليتامى مال واحد حتى يم قويدر ما يخليج حتى بدار العجزه ما يوديج گبل أشمرج عالحدود ‏لان مثل يول البعير ترجعين ليورا ودگچ ومدگوگچ بالدنيا الفتنه والنفاق ‏وأصلاّ همج بالدنيا بنات صباح ‏يشبعن ذل وأهانه ‏بس أنه نافع وأخو خيته

‏لا اخلي حلم بإحلامج تتشمتين بوحده منهن 

ـ من غمى تغمتك أنت وبنات صباح وتغمتني وساعة الگشرة الحملت بيك وجبتك وخوش فارات عقلك على أمك دخل يشبعن بيك من أهمداك يا يمه 

لينا ـ سگت وهي طلعت ووياهن تفر بجبتها وجوزدانها

وهذيج يسوگن بيها مثل النعجه وأنقهرت عليها نوب شاون اذواق عدهن كله مال همج من رجع ويفتحن ويشوفن حبوبه وتهز برأسها عليهن كله دراعيه مشترياتها يشهد الله موديل ٢٠١٠ وكل هذا هي ساكته .. ‏شنو من اهل عدها ‏هذوله حسبالهم بيت حبيب ما مخلين وراهم ولو يدخلون ويطلعون الخيسه العدهم ‏يعع الله يبعدني عنكم ويخلصني منكم ومن قصركم كله فتنه ونفاق ودجل .. 

أختنكت ‏طلعت بالحديقه كعدت يم جدي حبيب وعمي مشعان كاعدين شافوني ما حچوا .. كعدت يمهم بعد مسافه قليله ‏وحمودي يفتر وأجه نافع جان يحجي عالموبايل سده وصل يمي .. صدك ليش ما جبت لبنى وياك

نافع ـ وين أجيبها أخاف عليها يأكلنها 

ـ هـــههه لا شسالفه 

ـ يمعوده عاد حابتها يثردن بدمها وأنطيهن يحجن عليها ومن أخذها البيت يومين مطنكره خليها تگابل بناتها أخيرلها . 

ـ شوگت تروح البيت 

ـ عندي شغله أكظيها وأروح ليش تردين تجين وياي

ـ لا وين ما يخليني وما أريد أورطك ويه لسانه وتتعاركون مهما يكون أخوك وتطلع بوجهي 

ـ شگد أدمي أنتِ . 

ـ عافني وراح وجدي حبيب دگ عوجبته وگام يمكن زعلان من عنده وضل بس عمي مشعان

مشعان ـ ليش ما تحاجي جدك وحبوبتك 

نافع ـ من ورى سوالفهم وسوء تصرفاتهم تريد تقنعني حبيب ما فتل فتالته بهل العجاجه الكشره الشلتوا خطية هاليتيمه

ـ نافع بابا تأدب هذول أجدادك أحترم ولاتتجاوز حدودك أوادم گبار ما يصير أبني وحبوبتك ليش مكاطعها وما تحاجيها تفوت وتطب ما تسلم عليها هيج تجازيها حبوبتك هاي ومهضومه منك حيل ينافع 

ـ بعدين أصفي عقلي وبالي وأحاجيهم بس هسه عندي سالفه وجايك بيها وأريد منك تسمعني وتكظيها . 

ـ شنهي سالفتك گول وليدي

ـ سالفتي جبيره بويه تخص أمي 

ـ شبيها أمك 

‏ـ ‏يابه أمي طفح الگيل وياها اني رديتها لخاطرنه ولخاطر أخواتي بس شيل الخاطر على صفحه والعيب والمستحى ‏لان خوالي فد مره مسوينها نورس مشيعه على لينا مو بنيه والشيخ جاب وعليها مره ولد قويدر يحجون عليها وعلى شرفها وأنه أدري كلش زين هذا كله شغل أمي أتصالاتها شغاله حتى وهي بالقصر ..

‏ونورس دازه كلشي يخص بنتك المگبوره بگبرها الي على أساسه لينا والسالفه النعرفها وطشت عليها أي

ودازته لحربي حاجاني وگتله عالموضوع هو مـا يصدك بهيج سوالف لان واعي بس المحادثات أندزت بغرض خراب بيت لينا

‏وها وبيت نور هيه هجمته وهي هجمته وأمي ونورس محشياب بإذن عمتي صبيحه لما هججن غافر وصار الي تعرفه . 

.. ‏عاد يابه أني ‏طكت حوصلتي أمي مو أدمي رجعها لأهلها خل تعلم مالات الاوادم وتبطل تطعن بشرف هاليتامى حتى لبنى طعنت بشرفها محد سلم من شرها . 

ـ وهذا هو وأني ما هضمتها ورديتها لخاطرك ولا الي نفس اعاين بخلقتها عگب سالفتها ويه أختك والشيخ الي ردها لذمتي تروح تجيبه ‏وأطلكها وبيدك ترجعها لقويدر وتكله الدم صار ماي لا أنتوا خوالي ولا أنه أبن أختكم ولا أعرفكم ‏والرابط الي بينا بس بنات صباح وهذا هو وحجايه ما تحجي فوك حجايتي .

ـ ‏أسمع وعلى وجهي إبتسامه خفيفه گملت السبحه على رأسج يعمه من عمى العماچ من بين العمات 

‏صارت دنيا الليل وهنا رجعن وحربيه مكيفه صالخه الوجه 

‏ومبين مشتريه ثياب نوم وخالتي لميعه تحاجيهاا

لميعه ـ باتي هنايه وجربي حظج وياه عسا ولعل يحاجيج سنه لازم نسىٰ 

لينا ـ ‏فرحانه ومكيفه وعمتي وهبيه وياها صايرات حبايب وحبوبه ما عاجبها حالهن وتصرفاتهن يزعطن بنفسهن بس ساكته ومن تشوف نافع تمشي لغرفتها ما تضل بالمكان الهو موجود بي زعلانه من عنده وزعلها ثگيل وهو هم من يوم الصارت السالفه يچي وحده لليل يرگب سيارته ويرجع البيته ما يبات أبداً . 

عفتهن ورجعت كعدت بالحديقه وأجاني يهف بالسويچ ها تروح 

نافع ـ لا باقي على گلبج شتردين مني وأختج ما تسأل عليه بگدج . 

ـ شمدريني شفتك شايل السويج 

ـ هسه شوية أنوب أروح .. أكولج أجني أمي والعربانه وجنتها الجنتل مان . 

ـ ‏اي بالبيت ليش . 

ـ ‏هيج 

ـ ‏راح وره دقايق أجه حاضن امه يبوس براسها شكد حيال هالزلمه 

نافع ـ ‏تعاي يمه تعاي اليوم احنن گلب أبوي عليچ وحاجيته 

‏لينا ـ حاجته وهي فرحانه وما مصدگه

حربيه ـ ‏يفدوه قربان طولك وليدي أدري بيك گلبك طيب 

أي شگالك 

نافع ـ أمشي وياي وتعرفين 

‏لينا ـ مشت وياه وطلعت وره ربع ساعه تشهك وتبجي

وتقربت عليه ‏تفلت بوجهي

حربيه ـ يالصفيره هجمتي بيتي 

‏لينا ـ لا لا على بختج عمه ما مرجيه منج ‏عفتها وطلعت وهيه تشكي لحبوبه وتبچي ‏هو يصيح عليها

‏نافع ـ يله يوووم أوديج قويدر محضرلج عشة أستقبالج بمناسبة طلاگج .. 

‏

الحجيه عطايات ـ تستاهلين كله من أيدج مو حاجيتچ وگتلج ثكلي وگبري عقلج بطلي رعونيه ترى أنه أطلگج تالي تطلگتي على أيد أبنج مثل ما ردچ رجع طلگج لانچ مو أدمي ما حشمتي روحج ولا كظيتي لسانج على حاجته وتدرين زين سميعه وبنيتها عزيزات گلبه وهو گلبه ملچوم ومكسور خاطره عليهن وهذن أمانة أخوج وهو تكفلهن ليش تتحارشين بنارچ ليش .. چا هيج أحسنلچ دروحي گابلج أمچ خل تفيدچ هم لحگتيهن وخربتي من غمى التغمچ طيني رأسج على عزاج الأجاج من أيدج يحربيه 

لينا ـ لفت عبايتها ومشت ما حجت شيء بس تبچي ومن طلعت تفلت بوجه نافع 

حربيه ـ عساك لاتوفقت بحياتك ينافع كون تضل معلعل طول عمرك يالعربانه وضل ملاحك سميعه وبنتها ضل أبو النسوان صايرلي كافل اليتامى المسربت خل نشوف لبنى تحملك أنت ياهي التعيش ويه مرك وترجع سوالفك أذا أمك ما بريت بيها عاد أرملة أخوك من عساك لا الك المره ولا بيت اليلمك يا نافع وربي وگلبي ما راضين عليك .. 

لينا ـ ما حجه أبداً بس بلعومه يطك تصعد وتنزل وعيونه صارن چمر .. عفيه شُــنو من گلب عندج تدعين على ظناج هيچ .. مشت تهف بعبايتها وتصيح على ناجح مشى مزعوج منها وعيونه على أخوه حسيته ضاج عليه مهما يكون أخوه أكيد يضوج .. 

نافع ضل واكف دقايق وعيونه بالكاع وأباوعله وگلبي أحترك عليه عفت نفسي وقهري لان ما يستاهل هيج أم ..

دك موبايله رفع الشاشه وتنهد وأندار وجاوب 

نافع ـ هــاا أي هسه راح أطلع من القصر ما أدري شوگت أوصل هي سياره قابل أجيج بطياره .. ليش محتاجه شيء 

يله دزيهن أجيبهن بطريقي .. خوما طلعتي من البيت عبالي .. أي غصباً عليچ ديله ديله .

لينا ـ شال السويج وطلع ها تروح 

نافع ـ أي تجين 

لينا ـ توني ردت أحجي دخل حربي بسيارته وباوعلنا لا روح الله وياك سلملي على لبنى 

نافع ـ خابريني بعدين نتفاهم . 

لينا ـ مشى وشغل سيارته وأتوكل وحربي نزل وعيونه عليه عفته ومشيت ‏صار العشا مالي نفس دخل هو وجايب عشا جاهز و‏دنك باس رأسي تمسكت بي من دشداشته وأحتضني بكل قوته اني أنسانه تعودت على الحنان مو قصه كرامه وكبرياء مكسور و‏نفسه الإنسان الي كسرني أني بحضنه ممكن يجبر شيء بسيط ‏واني اشتم عطره وبالي هاي اخر لحظات ممكن اعيشها وياك و‏جسمي كله يرجف تحت إيديه و‏دموعي كانت تجري لحالها حار بيا طريقه يحتويني ويبرد نار گلبي أخذت نفسي ورحت نمت .. 

‏بذيج الليله ضليت أفكر أني ممكن اتنازل واعيش وياه تحت سقف واحد .. كاعده لوحدي ومترادمه أني وأفكاري هوسه بنص رأسي گمت دورت على موبايلي ماكو مأخذه

تالي ‏طلعت الدنيا لليل وأدور عليه وسوسن بغرفه باقر 

‏وهو نايم بالمضيف و‏رجعت لغرفتي وحضرت كلشي 

‏صارت الدنيا فجر وأني ما غمضت عين حاولت أنام ما گدرت أبالي شيء أكبر مني! 

‏كعدت ساعه خمسه الفجر لميت كل أغراضي 

‏وطلعتهن شوي شوي و‏كلها نايمه بس عمتي صالحه دربت عمي منعم ورجعت نامت ولحد ما اختفوا الرعيان صارت ست اله ربع لبست صايتي ولفيت شالي زين وطلعت من القصر وجنطتي بإيدي

إ‏سرعت لحد ما وصلت لشارع الي يطلع من القريه احنه شارع القصر فرعي يعني الي يدخل للقريه شيء واليدخل لفرعنا شيء 

‏ضليت أكو شجره نبك كعدت جواها باوعت على ساعة بإيدي صارت الساعه ٧ طلاب كليات يطلعون ‏وكفتلهم ووكف أبو الخط . 

ـ ‏ها عمي وين رايحه

لينا ـ عمي اني طالبه منا بس الخط ما اجا بلگي توصلني وياك لبيت عمتي وبكروتك 

ـ ‏ماشي عمي صعدي من هسه اخذ ٢٠ الف ترى

ـ ‏هذا هو عمي ٢٠ ‏صعدت واني اشوفهن يمكن مراحل ثانيه ثالثه لان المرحله الاولى لشهر ١٢يلا ‏وحتى دور ثالث بعده ما مبلش 

‏أفكاري كلها مخربطه بس كل الي متأكده منه ‏هذا اخر يوم عشته بهذا المهجوم .. 

وصلت و‏نفس التوقيت الي نكسرت بي وصرت بدون سند نفسه لكيت نفسي محمله بهم جبير وجنطه ملابس ومستمسكات 

هالمره ما رجعت وحدي رجعت والخيبه والخذلان تارسات گلبي رفعت راسي والشمس تضرب بعيني وصلت ودكيت الباب وفتحته نفسها الفتحت باب گبري!

حچيت بقهره تحرك گلوبهن

​.. حسبي الله ونعم الوكيل بيچن.. عسى حوبتنا ما تتعداجن يا برابيك! ربي أخذ حق اليتامى ربي إحنا متكفلين عندك والله ما النا غيرك ... 

نورس ـ خير شجابج وشگو فاگه حلگج وتدعين منو يمج 

لينا ـ دفعتها من گدامي ودخلت البيت بوجه طافي ومشاعر مكسورة و‏تلكتني خاله اضل أتذكر هاللحظات وكآن تذكرني بنفسي شكد غبيه .. ‏بيدها سجينه تكص لحم . 

سميعه ـ ‏ها لينا

لينا ـ ‏ها خاله لزمت السجينه الي بيدها ‏خاله هيج ذبحني بيها .. ‏أرتميت بحضنها واني اشهك من گلبي

‏لمتني بحضنها مثل ام لبنتها ‏أخذتني لداخل وهي ضامتني لصدرها وتلكتني نور رجليها مبينات عليه 

گبل ‏ارتميت بحضن نور وحجيت نور ‏ولج خيتي أني جيت برجليه واني اللي رحت برجليه 

نور ـ ‏كافي كافي هو الخسران

لينا ـ ‏دموعي على خدي ‏اني الي خسرت اني ما كانت اي كلمه تواسيني أحتاجيت غرفتي عفتهن ودخلت لفراشي و‏كلشي باقي بمكانه أصلاً مالحكن يغيرن شيء هنه ٢٥ يوم ورجعتلهن .. 

‏خليت رأسي عالمخده خليت أيدي على راسي ‏دموعي كانت شي الوحيد الي يريحني ‏.. وأنفتح الباب نور دخلت الغراض حاجيتها ‏دزيلي على لبنى أحتاجها . 

نور ـ ‏تمام عيوني هسه أخابرها . 

ـ ‏غفيت على وجع گلبي ‏اسمع صوت نافع و‏يسآل

نافع ـ منو جابها شبيها و‏تالي يعني ما سآلتنها 

والله ‏من بدايه اعرف النهايه بس غالطت روحي

‏هيج بهل سرعه

و‏خابرني يگلي أنت مأخذها ولا جاوبته گبل سديت الخط واجيتجن حتى اعرف اغطي عليها وحدها چايه وشلون شوگت يعني منهزمه منه . 

‏لينا ـ أخ الله شنو هالقهر شگد ثگيله هالكلمه ‏اندك الباب ‏مجاوبت ‏دخل هو

نافع ـ لينا كاعده أحاجيج 

لينا ـ واكف ونور وخالتي وراه ‏عدلت كعدتي ومسحت دموعي . 

نافع ـ ‏ها لينا شو هيج وأني كلت تقبلت الموضوع وراح تبقى

لينا ـ ليش ‏شكلي يوحي اني ممكن اتقبل هيج كسر وهيج زواج أبداً بس ضل بالي أعوف القصر ومن يجي گوله ما عليك ‏وسحبت روحي

ـ يجرالج والمهم وصلتي بالسلامه ما عليج بالباقي وأنتِ بيت أبوج محد يگدر يندك بيج بحجايه 

ـ نافع أني ‏القاهرني بعده التاريخ الي كتلي بي 

‏گتلي لا تجين تبجين وتكولين متندمه و‏هسه أني متندمه ‏بس ما أبچي 

ـ ‏لينا كافي سدي الموضوع صار الي صار 

ـ طلعت العبره البصدري ‏ايديه على عيوني ‏أبجي بحركه گلب أني مو سلعه مو قطعه أثاث يحبسني وأسبوع حابسني اني ماكو احد يكدرلي .

‏ـ أني أعرف زين وأنتِ لينا القويه مو اي احد لأتگولين انكسرت و‏الطلاك الانفصال مو أنكسار ‏حتى بزمن الرسول اسماء بنت أبو بكر هم اطلكت و‏الإنسانه القويه مثلج ما تنكسر بهيج شغلات وأنتِ بنيه شخصيتج حلوه مرتبه ‏ذكيه شاطره والحياه كدامج ‏دراستج تتنظرچ بعده مستقبلج بإوله .. والله ليتندمون على كلشي سووا بيج . 

ـ ‏حسبي الله عليهم واحد واحد .. ‏مسحت دموعي

‏شكراً لانك موجود بحياتنا ما أجازيك أبداً 

‏ـ أنتِ الشكر الج لان خليتني احس أني اخو زين واوكف وياج بكلشي وأنتِ نسخه مني أشوف نفسي بيج لينا

خليج قويه لينا لأ تخذليني بإنكسارج وديري بالج على نفسج ولاتضلين تقهرين بروحج وگلشي اله حل وداعتج .. يله أنه أترخص هسه يهد عليه وبس لبنى بالبيت تخرط العافيه .

ـ طلع ولحگته خالتي ومسحت دموعي اخذت من تراگاتي وبدلت رفعت شعري مسحت كلشي بوجهي 

‏رجعت تمددت وشصير خـل يصير مهم وصلت بيت أبويه سالمه وبإمان 

بقيت متمدده وأحس بروحي حيل تعبانه وفجأه سمعت صوته يصيح بالبيت أجه .. گبل إنداريت على صفحه ونمت ‏وإنفتح الباب 

‏الشيخ حربي ـ أنتِ ششايفه نفسج تطلعين من القصر مهزومه بدون محد يدري وهل التصرفات الطايشه متسويها وحده متربايه و‏بنت عالم وناس 

لينا ـ كعدت وعدلت كعدتي وحاجيته ‏أني مو بنت شيوخ ولا عندي ام تربيني ولا اب على رأسي ‏ولا عندي خوان مثلكم ‏بس ما صاحبت ولا إنهزمت ولا حبلت بالحرام وشردت ويه صاحبي وخليت وراي فضيحه وعار تكسر ظهر أهلي وتنزل رأس أخواني 

أني‏ وحده ماتت أمها وهي بثالث متوسط ‏ومات أبوها ورى أمها ‏وضلت ملطشه ‏وصاحبت بنت الشيوخ ‏تالي طلعتها بفضيحه إنكس من فضيحتها ‏وماتت بنت الشيوخ وضلت عليه السمعه النكسه 

‏وبنت الشيوخ ماتت بسمعه طيبه وتستروا عليها وطمموا الها لان عدها لطمات ونوحات وكلها تترحملها وفاتحه والدنيا نگلبت عليها وأني حدو على رگبتي السجين رادوا يذبحوني لما أخوك يتلاحگني جان أني هسه بالنجف بصف أمي وأبويه ظلم بظلم وخيطت حلگي وگلت ميخالف لخاطر نافع وكفاتها ويانا ما تنعد وتكبعت بكل سوالفها وسگتت وماتت واني ما حجيت ولا بريت نفسي وعمي تفله بيه تفله بالكاع كل مشكله تصير يحطني يصبغني صبغ 

وعشت حياتي أربي نفسي بنفسي ‏شسويت بروحي كلها حجت ونصحت ومنعت بس مره وحده ردت أعيش ايام حلوه بحياتي المره گمت خذت شيخ ربعه 

وكلش ‏عادي يزوج عليه واني مامكمله شهر ‏ويحبسني مثل قطعه أثاث مستعز بيها ‏شتأمل من الشيوخ من قصر كله كرم ونخوه وهيج طلع منه . 

و‏عادي شفت الموضوع سهل طلعت الفجر و‏ضليت ساعات واكفه جوه الشجر لحد ما طلع خط طلاب 

‏صعدت ويه طلاب وهما يسعون على مستقبلهم ويمتحنون دور ثاني واني ضربت شهادتي بعرض الحايط 

ولحگت گلبي ‏عادي هي الحياه تجارب وهذا حظي من الدنيا هلگد .. 

‏ما سمعتله صوت أبداً ما حچه لحد ما انسد الباب وطلع 

‏طلعت وراه منهاره و‏نور تباوعلي...

‏اني ليش هيج سويت بروحي ‏هذا گلبي احركه حتى ارتاح أني عار عار رخصت نفسي ليش شناقصني ‏ادك على وجهي 

و‏حضنتني 

نور ‏حضنيني اني احتاج انام لدرجه ماكعد أنتِ تحسين بوجعي ‏موو 

‏نور ـ هما عارات مابيهم خير

لينا ـ ‏لج لا تحجين عليه هذا حبيبي

ـ ‏حبتج الكراده يا حب هذا يكسرج هالكسره 

ـ ‏لبنى وين اني أحتاجها دزي عليها تجيني ليش ما أجتني ليش .. معقوله سمعت بي هنا وما أجتي 

ـ هسه تجي بس أنطي مجال ياعيني هي هم بيتها وبناتها ورجلها ومشاكله ويه أهله وراجعين عليه گايلين هو مهزمها ذابينها برأسه وأكيد هسه صاير بارود خل يهدأ وتجيج . 

‏ـ أخذتني وتمددت بصفي تمسح على رأسي

‏نمت والنومه كانت عميقه كل ما أكعد ارجع أنام

‏ما حسيت على روحي غير ثاني يوم و‏لبنى بالمطبخ وبناتها يفترن ‏عمي محمود بالحوش يعيط

‏هذا شبي

نور ـ ‏بيه خبال أن شاء الله

لينا ـ ليش ‏شكو

لبنى ـ ‏يكول خل تنكلع لبيت رجلها أول اخر واحد يزوج على مرته 

لينا ـ ‏خلي ساكت مني لا اشلفه من البيت كله 

‏رحت نمت بحضنها ‏وينج هواي دزيت عليج ليش ما تجيني مو تدرين بيه أحتاجتج 

‏ـ ما كدرت اطلع نافع متعارك ويه اهله ومشاكل ما تخلص وأجه حربي وجملها عليه وتعارگوا بينهم . 

ـ ‏نافع إبتلى بينا ‏احنه ما عدنا أب بس عدنا نافع 

ـ ‏الله يخلي يارب 

ـ ‏تمسح على رأسي حاضنتها واشم بريحتها الأحبها أمي هاي أمي ‏بس باستني رجعت دموعي مثل المطر 

‏بقيت بحضنها لحدما غفيت 

لما ‏فتحت عليه والباب خالتي

سميعه ـ ‏ليونه عيني كعدي ‏لج والله اروح اخزيهم والله وأبردلچ گلبج بيهن الما يخافن الله حسبي لله عليهن هاي عود الزينه ما بيهن أثاري البشر ما ينلزم مية الف وجه عنده تتنقمين من أبنج خوما تتنقمين بس لا شلون بنات صباح أثنيهن صارن لولدي وعلى رغبتهم هذا الشيء ما يمشي عدها . 

‏والله يحلمون ترجعين لذاك المهجوم . 

لينا ـ ‏خاله ليش ما عندي حظ ليش خاله شنو ذنبي عروس يله عشرين يوم وتنزل عليه ضره . 

سميعه ـ ‏كلجن حظجن مخالف

لينا ـ لمتني بحضنها و‏مسحت على رأسي ‏ضليت أيام حالتي نفسها وتسوء يوم عن يوم و‏كل يوم اكول راح اصير أحس وأحاول أنفض نفسي ‏بس ميفيد النحول موتني ‏ما بيه أرفع رأسي ‏خالتي تجيب الاكل ومالي نفس بس الخنگه عاصره روحي أحس جاي أنازع والموت محاصرني ..

____

لبنى ـ طول هالفتره المرت علينا بصعوبتها وحال لينا والقرارت الصدرت بحقها وهي طفله وهي نفس الوقت تسرعت بقرارتها ولگينا نفسنا ضعنا بوسط هالمعاناة 

لا أم ولا أب يحتوينا ويلمنا ويوقف هالقهر ويسد حلوك العالم علينا بس المن تحجي هي أخته من الناس الطعنت بينا لو نسلم منها إحنه بخير .. وكل هذا وبعدنا صامدين ضد كل الحچي .. عبالك ورانا لعنة شر 

وأما عن حياتي عادي ما بيها شيء أني ملتهيه بيتي ومساحتي وبناتي وكلش مرتاحه الف الحمدلله

وهو ملتهي بمشاكل أهله وقرارتهم وما راضي على كل تصرفاتهم ومقيم عدهم ما يجيبه غير الليل حتى أني گام ما يأخذني وياه .. 

كاعده ودخل علينا ها أجيت 

نافع ـ لا بعدني بطريق .. أكو غده مال الظهر صبيلي جوعان بس مرگه وسويلي سلطه 

لبنى ـ أي هسه أصبلك تسبح لو تتغدا 

ـ لا أسبح الوسخ گتلني 

ـ شعندك سابح مو الصبح سبحت .. باوعلي وصغر عيونه وهو شايل المنشفه نفضها وحجه 

ـ لا مو نمت ويه وحده بالطريق 

ـ أستغفر الله شهل الحجي نافع 

ـ مو سؤالچ مدري شلونه هسه شعليج بيه أسبح ما أسبح مسبحتني أنتِ 

ـ يبووه لو أدري فلا سألتك 

ـ أي لاتسألين أحسن 

ـ دخل يسبح وعندي مرگة لحم على بتيته صبيتله مرگه بدون تمن وخضروات وطرشي وثرمتله ماعون سلطه وأجه تعشىٰ .. لينا شلونها 

ـ زينه تسلم عليج 

ـ عليكم السلام .. ليش ما جبتها وياك مو تكفلت بيها وگلت أجيبها 

ـ ردت اجيبها حربي ما يقبل وهي هم گالت ما اروح وياك ما تريد تصير مشاكل بيني وبينه . 

ـ وهسه شلون تضل هيج تقهر بروحها 

ـ ضلت يمها بعد تريد تجي هلا بيها تريد تضل كيفها بس أجيبها أجيبها هاي ما تعيش وحربي ساكت ذابه على الصامت ومخلي أمه هي تتصرف . 

ـ حسبي لله ونعم الوكيل على الكان السبب .. گمت سويتله چاي 

ـ هم طلعتي وراي 

ـ لا وين أطلع 

ـ منا منا 

ـ لا والله 

ـ أهلج 

ـ ولا أهلي 

ـ أي زين 

ـ وليش ما تخليني أطلع 

ـ ما أخليج وخلص 

ـ مو عبالك حكمك مشدده عليه 

ـ أي هذا الموجود ليش ما عاجبج 

ـ أي ما عاجبني أني مو صغيره تسجني بالبيت حتى بالحوش ما تفترين ما يصير نافع أني أعرف بنفسي ماله داعي تمشي وتأكد وتوصي وتسأل بطل شگوك وأنت هناك وبالك هنا ما عندك ثقه شگو حاطني بيتك 

ـ منو جاب طاري الثقه والشگوك بالنص 

ـ والله گول لنفسك هالحجي 

ـ يعني الحريص واليغار على حلاله صار شگاك وما عنده ثقه من خلف الله عليج . 

ـ هذا مو حرص ولا غيره 

ـ هذا هو كلامج هو الصح ويله سدي حلگج وجييبلي چاي ولاتخلين شگر 

ـ راح الغرفه صبيتله هو أساساً يمتى مخليه شگر من شفتك وشفتني تشربه مر مثل طبعك 

‏

أخذته اله ورجعت يم بناتي على گد ما شرب الچاي نام والصبح كعدت من وگت لان بناتي نايمات غسلت الحوش ونظفت وهو كاعد ولابس شنو تمشي 

نافع ـ أي رايح القصر 

.. كملتي غسل علمود أقفل باب الحوش

لبنى ـ ليش تقفله 

ـ يمكن اتأخر أخاف عليج أقفله أحسن 

ـ بس تقفله ما أكعدلك بالبيت والله العظيم هسه أمشي كافي عاد لكيتلك وحده على كد أيدك تمشي حكمك عليها هاي العايزه تقفل علينا الباب أني وبناتي بله أحتركنا طك علينا الطباخ متفكر بس تفكر تقفل الباب ... صوتي جان عالي وبالحوش گبل ضربني على حلگي وسحبني لداخل . 

ـ من غضب الله عليج شنو أنتِ شهل الصوت تصلين صلي كاعده بالشارع أنتِ والدنيا صبح صوتج واصل لسابع جار جرمت حجيتلي حجايه جرمت بس أنتِ عرصه 

والله عرصه 

ـ ما حجيت طلع وعاف الباب مفتوح ما قفله ما أجه لورا الظهر وجان حيل مزعوچ حتى أكل ما أكل على عشىٰ البارحه .. دخل الغرفه وهو جان گبالي عيونه بالموبايل يحجي ويفتر أخر شيء عبرني ودخل الأستقبال وسد الباب! . 

.. ما أعرف منو أتصل والفضول صعد برأسي گمت وخليت أذني وأسمعه يحجي ومن صيغة كلامه عرفته يحجي ويه بنيه! صخام منو هاي ليا ساقط ما جذبوا من گالوا عليك أبو نسوان! 

نافع ـ تدرين لما الحلال والحرام جان كسرت عينج وأخليج طول ما أني عايش ما تشوفيني وجهج وتخلين عينج بعيني وتباوعلي بصلافه وتجبريني عالموزينه الما تعجبج ولا تعجبني !

لبنى ـ الصخام هذا شناوي! 

نافع ـ أي لان أني أعرف شتردين علتج ودواچ عندي والله 

أوكفي أوگفي خل نتفاهم .. على گلشي شتردين ها هيج أني صرت مو جنتي تموتين على ديني أذكرج لو نسيتي بس جلبه ما يغزر بعينج گلشي . 

ها عوفج من العصبيه هاي من الأشتياق مفوله والله 

شتگولين! وهم نجدد طاقتنا وأشتاقينا هـــههه مو واضح تكرهيني جذابه أني حافظج بصم من تشتاگيلي تگومين تنفخين بسمج عليهن تعرفين شلون توجعين نافع من تتقربين على حاجته 

هسه جربي حظج وما عليج گلشي يمي أني أدبر المكان بس تعالي .

أذا على لبنى أشلفها على أهلها يم أخواتها وأبيتها هم والبيت فارغ أرضيج والله أرضيج بس بالمقابل تعوفيهن وتبطلين تنبشين وراهن ترى أدري وزين أدري أنتِ ورى گلشي أني مو غشيم ... هــا تقنعيني مو أنتِ ما أقتنع الا تجيني تقنعيني .. دتطيري على أساس

گاتل نفسي عليج رخيصه بس ردت أشوف رخصج وين واصل ليا مستنقع . 

لبنى ـ أبتعدت مصدومه من كلامه ولعبت نفسي بشكل واليحجي وياها نورس صح ما ذكر أسمها بس هي ماكو غيرها يعني يريد ينام وياها بالحرام وعادي عنده ويطلب منها بعد شگد قذر .. 

طلع وباوعتله بحقد 

نافع ـ خير شعندج مطگگه هالعيون عيون الصيني 

لبنى ـ نافع لاتتقشمر وبطل سوالفك تعيب وتتنمر ولا عبالك أني غشيمه وغبيه بس أذا درب الأعوج مشست بي وثبت كلام الأنكال عنك صح ما أضل بهذا البيت دقيقه ومثل ما نور أنفصلت عن غافر أني هم أنفصل عنك وخل حبابيك يفيدنك . 

ـ ليش سامعه شيء جديد عني . 

ـ ما يحتاج أسمع تأريخك يشهدلك 

ـ أحجي عدل لا أجي أفرك حلگج .. وبعدين شعدج لاطشة أذانج على الباب أذن هاي خصوصيه وهاي حياتي مالج حق تحاسبيني وتمنعيني شسوي ومو أنتِ گلتي روح أتزوج شتغير هسه 

ـ أي گلت روح أتزوج بس بالحلال مو تراهق بالحرام 

ـ وأنتِ شعليچ مني مالج دخل أطب أطلع أروح ملاهي أجيب نسوان للبيت حياتي وأني حر بيها وأذا عالزواج ما أحتاج زوجه أنتِ تكفين شسوي بشلعان الكلب مرتين 

ـ وعادي عندك تمشي بالحرام وتگابلني 

ـ ما ضارچ بشيء أنتِ بحال وأني بحال وأني شاب ومن حقي أعيش حياتي خوما أضل أباوع على طولج! 

ـ ماشي سوي اليريحك . 

ـ مرتاح لا تشغلين بالچ 

ـ گمت وتقربت عليه أذا تحن الها ليش طلكتها 

ـ منو هي 

ـ عفته لان مستفزز ألى درجه وحيل ضجت منه ومن صدك تجاهلته وضل أيام يشمرلي كلام يبسمر يعيب يتنمر وكلمة والثانيه الصيني وساكتله ما أحاجي بس واكفه على شعره وأنفجر بي لان صدك طوخها ولازم موبايله عبالك ما شايف وكل شوي يباوعلي ويضحك 

ـ حبيبي گومي سويلي ماعون فواكهه من أيدج الحلوه أيد الصينين 

ـ لاتتغزل وكافي بس تعيب شويه أحترم 

ـ ما أتغزل عمي نسحب كلامنا وليش ما تحبين الصنينين ترى شحلاتهن أصلاً هما يشبهونج مو أنتِ تشبهينهم . 

ـ نافع كافي عاد 

ـ أعصابج علينا يابه بس لاتثورين .. ديله گومي سويلنا ترتيباتج الحلوه 

ـ نفضت الگوشه وگمت بعصبية وقلة صبر يارب منك الصبر على هالرجال . 

ـ أويلي صاروخ وأنفجر علينا دخنت يابه دخنت لك مو مره دنگه والله دنگه . 

ـ ما جاوبته أدري بي يحجي وگلبها تصنيف وغزل علمود يغطي على سوالفه السرسريه الناوي عليها ويه عشيقته وطليقته الساقطه مثله ساقط أبو نسوان أبو المتع ما جذبوا لا والله لو تموت ما أصيرلك مره .. 

سويتله وخليته ومشيت لزمني من أيدي ومنعني نافع عوفني 

نافع ـ طبع التتنر عقلي يطير منه ..رجعي كعدي لمكانج ولاتضلين تدردمين ترى سامعج وحلگج أفركه أذا سمعتلج صوت .. يله كعدي بمكانج وبله لغوه . 

لبنى ـ كعدني مكاني مثل الأستاذ والطالب يريد يفرض سيطرته بس تحلم ما لكيت الا لبنى.. أكل ووگل البنات وگام وبسرعه فرشت النا ونومتهم وأجه شمر الخاولي وصاح 

ـ وين من هسه منومتهن شگو مو جاي يلعبن وكاعدين مثل الأوادم لو الا تخربين الكعده 

ـ نعسانه وأريد أنام 

ـ ما تنامين وصخم الله وجهج أذا نعسانه بس شلون نافع كاعد ومرتاح بكعدته الا تسوينها سم عليه .. دنامي شبعي نوم . 

ـ هذا شبي گب .. تجاهلته ونمت ومرت فتره بين عراكتنا أني وياه وبين مشاكله هو وأهله وسمعت لينا چايه وردت من نافع بساعتها أروحلها بس الأجواء حاميه خليت وگعدت غير مره أكوله وهي هم خل ترتاح ونور خابرتني وتعذرت منها .. 

كاعد ومزعوج وأهله يخابرونه هو مغلس عنهم ما يجاوب بس جاوب أخوه وما حسينا غير الباب يندك فتحه ودخل حربي! دخلوا الأستقبال . 

نافع ـ سويلنا چاي . 

لبنى ـ أي .. دخلوا وسدوا الباب وبس حطيت القوري گبت العيطه وصوت حربي عالي . 

حربي ـ چا منو خله الهزيمه برأسها عداك أنت سودنت البنيه بحچيك كلمة والثانيه أخذج وأخذج چا هي بكيفك تأخذها ما عدها رجال . 

نافع ـ وأني شعليه بهزيمتها هذيج مرتك وروح اسألها شگو عايفها وساكت حتى زواجك من بنت خالك ما بررته الها 

ـ مو بكيفي رايح مصخم ومتزوج متشوفيني متونس على شغلك ولاتنقعني بسالفة هي جايه لوحدها ما تگدر تطلع لوحدها بس گولي أنتِ هزمتها أي لان من يومك ما ردت هذا الزواج يصير ودگ ومدگوك تهجم هالزواج وهجمته وخربت عقلها وسودنتها 

ـ والله مو أني عمي روح اسألها أنت شگو كل مشكله تصير تجي تذبها برأسي أني شعليه وأني نعم حجيت وبعدني على حجايتي لان لينا على هذيج الكسره ما تعيش بالقصر لو تسويه الها جنه . 

ـ لان أنت محراث الشر وهي تسمع بس منك وحاطها وتقرأ برأسها ومن يوم صارت السالفه أنت عبدت القصر عباده تعلمني بيك وبسوالفك كل أهل القصر عاديتهم ومقاطعهم من ورا لينا وتريد تقنعني أنتِ بريء .

بس والله يا نافع أذا لينا ضلت على زعلها وما رجعت فه أنت السبب وياريت تسحب نفسك وتكظب بيتك وتحترم روحك لان كل وحده يتدخل بحياتي ما يجراله خير 

من هسه أحذرك أسحب نفسك ولا تتدخل بحياتي خليك بحياتك وبيتك . 

لبنى ـ فتح الباب وطلع ونافع أنزعج حيل بس ما حجه 

وبعدها ورحت شفتها ورجعت لان بس يصيح يله ويله شگو خبصتني بس تريد أولي للبيت 

نافع ـ والله لو عليه ما أخليج تطلعين واليريدج هو يجي يشوفج عليمن متعبه رجليج وفاحطه روحج . 

ـ نافع ترة صرت أوفر كافي لخاطر الله تريد تجلطني 

ـ أوفر تحجي بالأوفر أنهجم بيتك يا نافع دمشي يابه وبعدين تعاي أكولج أنتِ شگو ضاله يم أهلج ما شفتي خالي محمود ما مليتي من صوته وصياحه على أقل بيتي هدوء وسكينه مو بله 

ـ ويصيح على نفسه هو شگو بيه شعليه مني ليكون ولي أمري وأني ما أدري وعلى شنو يصيح يمه لو وحده من بناته يعمل هالعمل بس لينا ما يقبل تضل ولازم ترضى وتسكت . 

ـ لا أني ولي أمرج 

ـ هذا وين يحجي فاصل والكعبه فاصل .. صعدت وصلنا البيت 

ـ سوي عشى من وگت علمود أطلعكم أفرركم بالسيارة 

ـ يعني تأخذنا لفد مكان لو شنو 

ـ لا نفتر بالسياره

ـ المن طالعين 

ـ يعني ما تردين تفترين

ـ يله خلف الله عليك

ـ أشو ما عاجبج ست 

ـ لا عاجبني مشكور 

ـ عبالي علمود ما أطلعج 

ـ سگتت يريد حجه ينكسل الطلعه واحس حجاها وتورط 

نزلت وعفت عليه البنات يضحكهن بس صوتهن واصل لعندي مندمح وياهن .. 

شگد زين بس ما أنساها اله وتدك برأسي سوالفه وياها وگلت باجر أحاول اروح بيت أهلي وأشوفه وأشوفها هي هم أذا عدهم شيء ينكشفون يابه اذا صار شيء بينهم شسوي شعمل بيك ينافع! 

تعشينا وطلعنا بس أفترينا بالسياره ولا خلانا ننزل وجابلنا حلويات وكرزات ما خله شارع ما افتر بي عبالك ما شايفين شوارع وحسبها علينا ونسه والله سوالفك نافع 

نافع ـ تونستوا مو بله 

لبنى ـ أي كلش تونسنا متشوفني شلون فرحانه أبتسمت مجامله . 

ـ وأبو الحسن جذابه من أبتسامتج هاي مال وحدة سحاره 

ـ لا يــا نافع .. أكل كرزات وأباوعله شلون يحجي ويقلدني ويوصفلي ضحگتي

ـ چا أسردي حلگج مثل ما متعود هيچ 

ـ قلدتي ضحگتي يابه متت من الضحك 

ـ هسه تمام بس كافي دخيل الحمزه چلبتي تجيبهن التايه والضايع من أهله .. سدي حلگج أغار ولج أغار . 

ـ غصيت خرب بيومك 

ـ هاي عليمن خرب بيومك 

ـ عليه والله عليه ... تلافيت الموضوع وشغل السياره ورجعنا البيت وهو دخل الغرفه تمدد ويگلب بموبايله وأني أخزره بنظراتي ما مرتاحتله أحسه متونس عليه 

ـ شگو شبيچ تباوعين گاتل أهلچ مره ثانيه عيونج أطلعهن أذا تباوعيلي هيج ويله ناموا وبله أزعاجات نعسان وأريد أنام . 

ـ نام منو لازمك 

ـ محد لازمني ... أيدج وهداية الله 

ـ هذا مو راحه گبل أخذت فراشي ونهزمت منه 

ـ تخاف نعله على يومج ونعله على يومي هم .. مو مره ضيم . 

ـ عفته ونمت وثاني يوم رحت على أهلي لگيتهن كاعدات ولينا تحجيلهن وأني أرضع بناتي ومن بين كلامها أستوقفني أسم نورس لحظه لحظه شگلتي ويا محادثات يا صور تقصدين ونورس شعليها

لينا ـ فضيحتي ويه أبو مسار نورس الدزت گلشي لحربي متأكده هي سوت هالشيء بس ما عندي دليل بس متأكده حتى نافع شاك بيها لان محد يحتفظ بالمحادثات عداها هي الناقصه لان بوكتها صفا دزتلها ودزت لعمي ولهشام تذكرن . 

نور ـ عيني هي ما يحتاج دليل قابل عمي لو هشام يفضحج لا لا الزلم ما عليهم بهل السوالف وتزوجتي شعليهم بس گولليلي هذا شغل نسوان أكولج أي نعم وهذا سگوتها وهدوءها وخنوسها طلع مو بلاش مو گتلجن خايفه منها . 

لبنى ـ أي وشگوو ساكتات لحد هسه ما تگومن نحطها ونكتلها ونطردها من البيت المن ملفيات وحده تطعن وتحجي بشرفنا صدك تحجن لحد هسه كاعدات گومن 

يباعن عليه گومن شگو متصنمات بوحهي قليل طعنت بينا صار الوگت نأدبها ونكظبها الباب . 

لينا ـ ها هيج تگولين 

نور ـ أموت على الطلايب ومن زمان أريد أفوخ گلبي بيها گومن 

سميعه ـ وين تگومن عوفنها خل تولي هاي لسانها لسان كحبه محد يسلم منها لاتذب وراجن بليه سوده 

لبنى ـ خاله لخاطر الله الى متى نضل ساكتين أخذتهن ودگيت الباب وطلعت هي تعصر بيعونها صح النوم حضرة برنسيسه قندره . 

نورس ـ أنتِ منو باع**شگو گابه .. أمشي بابا مالي خلك أتعارك ويه جهال وروحي كظبي رجلج الدايح المسربت أبو النسوان بعدين تعالي عليه والله يالله ناس شگد فارغه 

لينا ـ هاي عليمن دايح أبو نسوان والله من أنعل أبوج لابو ملفيج بيته يا ساقطه يا بنت الساقط دتعالي عليها أخواتي والله اليوم نصلخج صلخ أطلع حركة گلبي كلها بيج هجمتي بيتي من عساج لا صارلج بيت . 

لبنى ـ جرتها لينا وأني وياها ولزمنها دگ گتل وأخواتها يفازعن ونور دفعتهن وقفلت عليهن الباب ورجعت نامت عليها تضرب ضرب عبالك ملاكمه واني نمت عليها وعضيتها بكل حيل الا حلگي صار مالح من الدم وتعيط وهي وحده واحنه ثلاثه وخالتي تدك على رأسها شگينا ثوبها وهلسنا شعرها وأكلتها أكل بسنوني بردت گلبي وقهر نافع كله طلعته

بهل البربوك بحيث صارت جنازه ونفضنا أيدينا ونور تقربت تفلت عليها 

نور ـ هاي تفلتي تشرفج يا بربوك تطعنين بشرفي وبشرف أخواتي ولج أحنه بنات صباح تاج رأسج يا ساقطه ويله أمشي طلعي من بيت أبونا ما نلفي عليج شگيلات تعبانه يله خل بيت جدح يلفونج يله برى . 

سميعه ـ ولج أشو هاي لا حس لا نفس بس لا ماتت صخام الصخمجن هو هيج الگتل مال موت .. هسه أذا عمجن محمود أجه وشافها شتگولن اله مو يكلب البيت على روؤسا وروس الخلفونا أبوها گاولي چا يرضى بهل العمل المسويته بنته لا ما يرضى ويهججنا بليلة ظلمه هو هيج يا أمي خو لبنى نگلبتي جلب خاله على بختج يمه . 

لبنى ـ خالتي تكعد بيها وهي تعن وأحنه وحده تباوع الثانيه

لينا ـ خابري نافع هو يخلصنا منها خل يأخذها بيت جدها گبل لايچي عمي ماكو الا هالحل خابري لبنى بسرعه . أني بطني گامت توجعني عمي أيده ثگيله والله يعوفجن ويجي عليه هو يگرهني أنتِ رجلج يخلصج وأنتِ أمج بس أني منو يخلصني منه عزا العزاني . 

لبنى ـ أخذت موبايلي وأتصلت عليه گبل حجيت نافع تعال لبيت أهلي 

نافع ـ على كيفج أخذي نفس شبيج عبالك جنتي تركضين شگو نفسج عالي 

ـ تعال هسه 

ـ شمسويه من مصيبه 

ـ وأني شگو بالمصايب يمي گرباي 

ـ أحجي شگو أشـو ما مرتاحلچ 

ـ هاي بنت خالك گتلناها وأشو أنمطلت سلمتها تراب ما أدري ميته عدله بس لا عدله شيموتها بزون بسبع أروح .. أي تعال خلصنا من لسان خالك وتواله لايجي يهلهل علينا أحنه بشاربك 

ـ بشاربي!! تسون مصيبه وتعال نافع حلها وشعليجن منها ليش تگتلنا شمسويتلجن 

ـ مو أدمي والمو أدمي ينكتل ويطيح حظه وهي من زمان ينراد الها هالگتله قليل طعنت بشرفنا على شنو مبقينها بيت أبويه وتأكل وتشرب وتطعن بينا وين صايره هاي لا والله أكتلها وأنعل والديها وحده ما مربايه وأدبسزز وهجامة بيوت . 

ـ خل أجي ويصير خير . 

ـ دتعال ننتظرك وأستعجل قبل لايجي خالك وتوديها بيت جدي وتخلصني منها وتسوي عليه فضل للموت ما أنساه الك 

ـ وأني اوديها بعد 

ـ لا لا مو أنت خل تروح لوحدها مكسره بس أني خابرتك تجي تتفاهم ويه خالك قبل لايجي فدوه . 

ـ ماشي چاي صايره أم المشاكل أني اعلمج طركاعه 

ـ سد الخط بوجهي ورجعت عليهن أخواتها مگوماتها وهي تبچي وسبأ تدعي علينا ونبأ ساكته ودخل علينا نافع باوعلها وباوعلنا وحده وحده 

نافع ـ منو بيجن أقترحت گتلتها هذا عمل مسويتها بيها يهود أنتن يهود شيخلصجن من للسان عمي

لينا ـ مو أني .. ما عليه 

نور ـ ولا أني 

لبنى ـ باوعلي وسگتت وهي گامت وثوبها مشگوك من صدرها وكل صدرها مبين دفعت نافع ودخلت الغرفه وطلعت لابسه صايتها هي وسبأ وطلعن 

نورس ـ والله الا أطيح حظجن يا برابيك .. أدبسزز أنتِ ورجلج الساقط

لبنى ـ لاتقصرين يا أدبسزز يا بربوك يا منفلته 

نافع ـ هوب هوب لبنى لسانج وأنتِ أمشي ولي لبيت جدج ما مخليات شيء بجسمج صاحي ولسانج بعده يلعلع غضب عليجن يالنسوان بس مشاكل وعمه أنتِ شُنو شغلج ليش هالعمل هذا 

سميعه ـ شسويلهن وهي هم تستاهل عاشت أيديهن وخل تولي بيت جدها مالها طبه لبيتي بعد أدبسزز

نافع ـ عمه صدك تحجين أستلم السوالف التعبانه التجيك يا نافع 

لبنى ـ طلعن ومشىٰ وياهن وصلهن للباب ورجع وگفتله يم الباب شگو محترك دمك عليها وتحجي علينا ولا بعد رحت وصلتها الباب جان فدمره حضنتها وطبطت عليها أدري بيك حنين وگلبك رهيف وتموت على هالسوالف وأنوب عيني هي مدلعه ومشلتحه وعينك وما شافت خو شبعت شوف .. روح وراها طبطلبها خطيه محتاجتك . 

نافع ـ غضب الله عليج وعلى صوتج شگد عرصه

ـ أي غضب عليه بس هي لا الخطيه والمسكينه ونسيتوا سوالفها وشسوت بينا وشحجت علينا وهجمت بيت نور وبيت لينا وأخرها سالفتها ويه لينا وكل هذا تعالن سگتن لا والله أنعل والديها أدبسزز 

ـ أنتِ ما گاتلج حجت والما حجت ولا گاتلج ضيم نور ولا ضيم لينا أعرف علتچ وين بس أصبريلي أذا ما رجعتها 

ـ رجعها أنت هاي التريدها گاتل نفسك علما تلزمها 

تقرب سد حلگي 

ـ صوتج ولج صوتج فضيحه 

ـ دروح رجعها مو تريد ترجعها وجانت گبل أعقد عليها

عليش مستحي ومحروك دمك على لبنى . 

ـ وأنتِ شبيج دخنتي مثل التنين والنار گامت تطلع من أذانج وخشمج عطبتي وريحة العطاب شگت خشمي 

باوعي وجهج شلون صار أحمر جمره 

سميعه ـ ولج سگتي شجاج أنفتگتي عليه شو أمشي على بناتج فحطتي . 

لبنى ـ عفتهم والنار تطلع من رأسي صخنت صرت فحم من وراها البربوك وهو هم أحسه متونس .

.. ودخلت يم أخواتي يباعن ومصدومات شگو شبيچن 

نور ـ لا هيج عيني سلامتج أني طالعه يم أمي أشوف تالي هالسالفه . 

لبنى ـ طلع ومرت ساعه وگبت العيطة بصوت عمي أحتركنا لينا گرصت ولفت رأسها ونامت وأني طلعت أشوف أنجازاته شيسوي مو يريد يرجعها أني اعلمك نويفع .

محمود ـ هذا عمل مسويتها بيها كلنا حقجن وبنتي مو أدمي بس ما يصير من جلب يجلبجن تخبلبتن ما مخليات شيء بجسمها صاحي صالخات وجهه عاضاتها جلاب ملفي بيتي جلاب من غضب الله عليجن ساردات ثوبها لاعبات فلك بيها الكفار ما تعلمن عملجن بس أنتن تردن واحد يضبجن زين تسربتن علني .. وأنت شعندك شنو شغلك صغير انت تمشس ورى نسوان 

مو على أساس كظبة أيدي ما بيكم صالح ** عليكم 

نافع ـ وأني شگو بنتك مو أدمي ومن أجيت لكيتهن متعاركات 

محمود ـ هيج من كيفهن لا والله مو من كيفهن وأني عفت البيت هدوء گلشي ماكو ولينا من اجتي لحد هسه ماكو مشكله بينهن بس لفيتوا انت ومرتك كبت المشاكل وكتلنها .. ويله هسه أخذ مرتك وولي ما وراكم بس المشاكل . 

لبنى ـ عمي دخل الأستقبال يعيط وعمتي باوعتلنا ونافع اشرلي 

نافع ـ أمشي لاننكتل أمشي أم الدگايك . 

لبنى ـ أني شگوو .. عفته ودخلت جبت جنطتي وبناتي وطلعنا للبيت ومقهوره منه وردت أروح للبيت مشي وصاح وراي 

نافع ـ وين حبيبي المن طابك السياره بالباب لكواويد غير الج يا روحي من اروح صدقه لهل الطول الحلو . 

لبنى ـ نافع بطل سوالفك 

ـ بطلنا عمي بس صعدي خل نولي لبيتنا مو فحطت من وراج والله فحطت أني شجابني على لسان خالي من خليتي يهلهل عليه لما أنتِ المورطتني وياه .. 

وأنوب عاضتله بنته ليش عاضتها صدك .. أشو من نتعارك ما تعضيني بس تعضين نورس .. 

ـ نافع گافي ترى ما ناسيتها الك 

ـ أي لاتنسين أني ما أريدج تنسين يله صعدي وكافي تحركين بدمج لايصيرلج شيء ما تسوى تروحلج فدوه هي وأبوها وكل عمامها . 

ـ صعدت السياره والله محد مفحطني وشابعني قهر غيرك 

ـ أني شعليه شمسويلج ياعيني أنت .. يابه دخنت دخنت گبت العطابه . 

باوعتلة بحقد وصديت وجهي عنة متونس هذا گضاها غزل ويحرك بيه شگد ساقط وأبو النسوان..

وصلنا للبيت هو كعد بمكانة يسولف وية حبابية طبيعي ولا كأنه صار شيء واني من القهر گبل فتت للحمام سبحت احس صخنت وحرگة دمي صارت براسي

طلعت لميت شعري بالمنشفة وسويت العشة خليت البيتنجان على النار أسوي شوي وگفت عالسنك اثرم سلطة وأحاول اشغل روحي وما احس الا حضن سريع وأنحضنت من ظهري

بقيت ثابته وايدي تثرم بس هو تقرب اكثر لحد ما صرت كلش بصدرة بلعت ريگي بصعوبة وما اتحركت.. بس شُــنو دخت كلش أريد اوزن نفسي ما اگدر ما أعرف شصارلي رجفتي كلها صارت برجليه

همس يم أذني صوتة اقرب للهمس ونفسة حار على رگبتي

ـ ثرميها ناعمة وخلي عليها ترتيباتج

ـ تمام ... وخر طرف المنشفة من على رگبتي وحضني من صدري وبدا يبوس برگبتي بهدوء بوسات خفيفة وحارة تخليني انسى وين أني

غمضت عيوني دايخة والسجينة وكعت من ايدي وهو مستمر أحس راح اطب جوا السنك من گدما دا يشدني الة بقساوة وحنية بنفس الوكت

حجيت بصوت ناصي مخنوگ نافع وخر..

ـ ها ليش

ـ رجع راسه نزل جوة رگبتي وطبع بوسة خلت جسمي كلة يرجف وبعدين أبتعد .. أخذت نفس عميق وايديه يرجفن .. 

ـ أشوفج ما أنفعلتي وخنستي تموتين على الخنسات 

ـ عصبت منه نافع كافي عاد

ـ تغارين .. نار الغيره موتتج أحترگتي حرك 

ـ ما حجيت وهو بكل برود رجع يگلب بالبيتنجان وكأنه كلشي ما صار وطبيعي الامر عندة الا اني راح اوگع من طولي شگد خبيث هذا الرجال وأني الارعنه ضعفت اله من ثول يثولي لازم أحطله حد .. 

كملت العشه وهو رجع كعد بمكانه عاقل ... أجيبلك چاي

نافع ـ كيفج يابه 

لبنى ـ صبيتله وگعدت أباوع مسلسله تركيه صارلي فترة متابعتها وهو يتصفح بموبايله ويباوع وياي وأحس بي يحوص شعندك لازك بالبيت دطلع

دقني دق بحركاته اني أعرف مو غشيمه بس مغشمه روحي 

والبنات نعسن وكمت فرشتلهن ونومتهن بالكاع وفرشت الي 

ـ شعجب هنا تنامين الغرفه مكان للنوم ترى 

ـ لا البنات مرتاحات وتعودنا أنام أهنا 

ـ تمام أني حنام ماكدر أتقيد يمكم اروح بالغرفه احسن انااااام 

ـ يجر بكلمه انام دوخني ويرجع يحجي بصوت اقرب للهمس . 

ـ غطي البنات زين وأنتِ هم تغطي لاتبردين الجو صاير بي بروده 

ـ أي .. ويحجي ويغمز والله عرفت نيتك خبيثه رحت أخذت مخده ورجعت هو تمدد عالجربايه ويحجي بصوت ناصي

ـ حجاره! شُــنو أنتِ متحسين 

ـ غلست وطلعت نمت وهي النومه وهو كل شويه يطلع ويرجع يدخل قلقني بس يفتر أضمن عليه ما نام 

ونمت ماحسيت للصبح يندهني ويكعد بيه 

ـ لبنى عيني لبنى كعدتي تأخرت عندي شغل 

ـ فزيت هو كاعد عالقنفه ومخلي رجليه على ظهري اني نايمه على بطني يسوي حركات برجليه على جسمي 

قشعر جسمي گبل لزمت رجليه ورفعتهن هو أبتسم 

ـ يله كعدي وأني اروح اغسل وأنتِ حضري الريوك

ـ گمت وراه رحت غسلت فتحت الثلاجه اكلت تفاحه لكيت مربى تين أكلت خاشوكه افتح ريكي شربت كلاص مي أخفي توتري من صباحيه الله وخليت الجاي عالنار واكفه يم الطباخ شسوي ما أدري المهم واكفه وهو بالغرفه يبدل ملابسه شعنده من شغل من الصبح لو متعمد يخرب نومتي ...

فزيت من لزمني من كتفي وطخ جسمه بجسمي أخذ الجداحه ويبتسم .. ادري هذا شناوي عليه يموتني 

اني مو حمل هالاحساسيس والمشاعر أذوب

بدل كمل وكعد أصلاً ولا باله الريوك بس يشرب جاي وياها جگاره وخلص هذا ريگوه وضل البيض والاجبان على حطتهن صافن وصافنه وياه عالواهس 

ـ جيبيلي محفظتي بالغرفه 

ـ أي رحت جبتها مثل الشاطره ركض واكف باب المطبخ مخلي عكس عالسنك ويسحب جگاير والدخان منطي تفصيله ملفته ويه ملامحه الهادئه وأنطيته المحفظه وسحبني اله 

.. باسني من تحت أذني قريب على خدي دنكت راسي رفعه باصابعه وشمر الجگاره رجع كرر البوسه هالمره قرب شفتي أكثر اني سلهمت ورفع إيديه خلاهن على ركبته ضليت رافعه نفسي أوزان طولي ويه طوله رافعه راسي وأتامل شكله والابتسامه شاكه وجهه بس بخبث 

اصابع أيديه متشابكه بفروه رأسي ومتناسيه كلشي مر بحياتي 

هي لحظات بس كانت لحظات أشبه بترميم بعد دمار واني السكره لزمتني بعدها أبتعد وهو يمسح على شفتي وتقرب باسني من راسي وهمس بإذني

ـ أحتاج هل اللحظات تتكرر بليل حصراً لان ما بيه بعد صبري فاض وخصوصاً هالسكره والرجفه ولزمت إيدج الناعمه من تقسى بركبتي . 

ـ طلع واني صافنه على گلشي صار قبل شويه وكعدت بالكاع الطم على وجهي من گبر لفج عار شكد صلفه 

أمداج أمده حظج الخايس 

أمداني امداني الطم على وجهي نسيت كل شيء وكعدت أبجي والطم على حظي وبالي هالشي حرام عليه حرام أعيش بعده 

هو جوه التراب وأني وأني كبر لفني من عمت عيني اي والله ريتني أني الميته ولا هو نسيتي لبنى نسيتي الله يأخذج إشسويت بروحي إشسويت .. 

______

نور ـ من أخر فترة رحت زرت بيها بابا حياتي توقفت تماماً .. كسره بداخلي ما تنجبر رغم أمي واكفه وياي وساندتني بس شعور صعب ساكن گلبي ليش هنت عليك .. 

وصلتني رساله من نافع سكرين شاشه لمحادثته ويه غافر كاتب بيها 

نافع ـ أقري وارجعي أتصلي عليه 

نور ـ تمام .. بديت أقرا ..

غافر ـ نافع أنتوا هيج چاي تجبروني على الموزينه نور بهاي سوايتها تجبرني أعوف العلاج عالنص وأجي وأذا أجيت أسوي تصرف ما يعجبها والله أكسر رأسها وأطيح حظها زين . 

بلغها كلامي ووصللها خل تفتح الحظر نحجي ترى قسم بالله واكف على شعره هي تتصرف بعلقة وعي ورعونيه بس أني أعلمها بس أجي سهله سهله . 

نافع ـ وأني شعليه مخليني بينكم بالنص روح حاجيها 

غافر ـ منين أحاجيها من الكواويد مو حاظره الرقم شبيك أنت أشو هم كمت تزومل مثلها صايرين جلاب أثنينكم . 

ـ أحترم أني شگوو تشملني 

ـ ووصللها كلامي وما عليك گولها غافر يريد يحجي وياج 

ـ وأذا ما حجت 

ـ غصباً على رأسها تججي أطيح حظها والله كافي عاد طگت روحي ناقص أني تجملها عليه هاي بدال ما توكف وياي بمصيبتي! 

ـ العفو يابه وين توكف وياك بمصيبتك! ترى ما صارلك فترة من عرفنا أخبارك وعرفنا خالتي مريضه .. سنه أنت مختفي مالك حق تحجي عليها وتحاسبها لو أجيت بالسلامه واكعدوا وتفاهموا وعالموبايل ما تنحل مشكله بالعكس تكبر وتنلاص بالزايد وأني راح أوصللها حجت حجت ما حجت منك إلها . 

ـ أنتظرك وحاول تقنعها أخوي أخوي 

ـ أحاول تدلل .. 

نور ـ گتبت اله ما أحجي وياه مستحيل هذا الشيء يصير غافر أنفصلت عنه وهذا الموضوع أنغلق عندي بعد ما أحجي بي لا وياك ولا ويه غيرك 

ـ هسه شدوس أني 

ـ ووصلله كلامي گوله نور قافله لايحاول بعد . راح وشوي ورسل رساله سكرين 

نافع ـ ما تقبل قافله الموضوع وگتلك تجي وأحجي وياها 

غافر ـ هذا هو أني هم بعد ما أحجي وياها طبها مرض 

لاتحجي 

ـ أشو هيج هسه جنت تتوسل 

ـ أمي موزينه نافع ونور أخر خيط أمل باقيلي بالحياة وهي كطعته خلاص بعد براحتها حقها ما أجبرها 

وأذا أمي كسرتني بعد هي هاي حتى تواصل ينكطع مع السلامه ديري بالك عليهن هنا بإمانتك أني فشلت بالأمانه لان أمي كسرتلي ظهري .. 

نور ـ أتصل وجاوبته ها نافع 

نافع ـ أنتِ ليش ما تحجين وياه شهل القساوه العندج 

ـ أحسن وخلص سد موضوعه ومستحيل أمن بي بعد لو يسردلي جرايد منا لباجر ما أصدكه وأثق بي الباعني وراح مستحيل التفتله . 

وياريت هذا الموضوع ينغلق نهائي وبعد ما تحاجيني بي ولا حتى توصللي أخباره لان ماأريد أسمع شيء عنه 

وأذا تسحب نفسك من عدنا يكون أحسن وتسوي فضل علينا .. 

ـ أسحب نفسي مو! أكول نور هو الصوج من منكم لا والله ... الصوج مني أني المتدخل لان عبالي أوادم وأحل مشكله بينكم بالأخير طلعت حالي حال أبو الفتنه والنفاق! 

وأنتوا حالكم حال العندي حربي ولينا الأفندي هاد عليه لبيتي ويعارك يگولي أنتِ السبب بهزيمتها أني شگو!يالحمزه أني شعليه 

والله قريت برأسها وسودنتها وأنت هزمتها يعني عايف مرته أم الفواين أم الدگايك وما يكلف على نفسه يسألها شلون نهزمت ويحاسبها يجيني أني أخوه يرزلني لا وبعدها ما يصدكني بس مرته يصدك ويثق بيها أدري كواد أني مو أخوك ..

بس هذا اليسوي زينه ينكرهه وبعد بعد فلا عليه عسى ما ناركم تأكل حطبكم طبجن مرض عدجن عقل وعدجن زلم خل هما يتحملونجن ويحلون مشاكلجن أني شگو كل مشكله تصير تذبونها برأسي 

وهسه نافع أسحب نفسك سهله من عيني أذا شوفتجن جهرتي بعد فلا عليه والله فلا عليه بسيطه وهذيج الثانيه أم القرارات عفيه نافع لاتتدخل بالمشكله وحربي يضوج منك وهذه قرارتي! يابه دتطيري خل تفيدج قرارتج طبج مرض أنتِ وحربي وأنتِ وغافر هم وبعد لاتتصلين لو بنص النار لاتدگين عليه والگواد اليوصل بابكم سهله من عيني .. 

نور ـ غلق الخط خرب ليش أنطه مجال أنسرد عليه صلي صلي بس خطيه وگعت برأسه المفروض ما أحاجي هيج هذا زعل يبــوه شيخلصني بعد .. 

وفعلاً زعل ضل أسبوع لايتصل علينا ولا على أمي وحتى ما يجون علينا لاهو ولا لبنى وأمي أشتاقت للبنات وخابرنا عليهم محد يجاوب هم هو هم لبنى

عزا هذا زعلان لازم نأخذله علبة حلويات ونروحله البيت نراضي .. 

كاعدين العصريات أني وأمي ولينا وميثم راح يشتريلنا من الماركت .. وبنات عمي محمود موليات يم بيت جدي وعمي محمود گالب خلقته وأهله يتصلون عليه من كثر ما ضاج ركع موبايله بالحايط ويسب ويلعن نبش أهل أهله بالمسبات والفشار ولبس والتحق لدوام

.. وضالين بس أني وأمي ولينا وميثم وخلصانين أجواء فول راحه وناسه صح لينا مالها خلك وتتنعوص وتلوب عينها عالباب بس مونسينها وشيخها هم بعد من أخر مره لا أجه ولا وصل ولا أتصل 

كلها زعلت وهجت وشالت روؤسها سودنه الزلم وهما من كاعهم مسودنين .. 

ولاحظت أمي هالفتره دايخه ماما شبيج 

سميعه ـ أريد أروح على جدج حبيب 

ـ شتسوين وليش تروحين قصدج علمود لينا 

ـ لا مو علمودها 

ـ چا علمود منو 

ـ بعدين منا لوگتها لو رحت يصير خير .. 

ـ ما فهمت شيء منها بس الأعرفه ضايجه من الوضعيه وتعبت نفسيتها وضغطها دوم معلك من عياطه ومشاكله هو وبناته ... الله يخلصنا منه . 

ودخل ميثم بإيده علاكة الحلويات أخذتها لينا من عنده وكال 

ميثم ـ ماما أكو رجال يم الباب گال نريد أبو نورس لان ننتصل عليه ما نحصله! 

سميعه ـ خير أن شاء الله منو هذوله .. أكعدن هسه أشوفهم وأجي مو تلحگني تعال وياي يمه

نور ـ طلعت أمي وراها ميثم وأني ما صبرت گمت ولحگتها وفتحت الباب رجال تقريباً بعمر بابا الله يرحمه سلم على أمي 

ـ شلونج خيتي أم نور .. أني أبو جهاد 

سميعه ـ هلا خويه هلا بيك خيي

ـ أني صديق المرحوم أبو نور جنا نشتغل سوا بالسوك وكظينا العمر بالسوك والمصلحه والشراكه 

ـ أها هلا بيك خويه 

ـ أي خيتي واليوم أجيت على أبو نورس لان ننتصل عليه وما نحصله

ـ والله خيي أبو نورس موبايله عطل وأشترى جديد ويجوز الأرقام تبدلت وما تحصلونه وهو هسه بالدوام ملتحق خير خويه صاير شيء علمود أنه ابلغه واكوله 

ـ والله خيتي علمود إيجارات المحلات دزوهن وياي المأجرين وأجيت وجبتهن وياي اله . 

سميعه ـ يا محلات! 

ـ محلات أبو نور المأجرهن أبو نورس! 

نور ـ بس عمو محلات بابا الله يرحمه باعوهن وزعوا حصصهن! شلون مأجرات ما فهمت 

أبو جهاد ـ لا عمي محلات أبو نور موجودات ومأجرات والأيجارات ننطيها لأبو نورس! 

الفصل السابع والثلاثون من هنا