رواية فصلية بديلة ( شموخ ) الجزء الثاني الفصل السابع والثلاثون بقلم ام ملكوت
:-اخذت جنطتي مالت المكياج ورحت لغرفه خالتي سماء ووكفت عل ميز امكيج براحتي كملت وطلعت فستاني من الجنطه مالته اجيت اقفل
الباب حتى ابدل وانفتح علي وصار مرتضى بوجهي لزمت كلبي خايفه وصار الخفت منه دخل وقفل الباب بقت اطرافي ترجف وكوه طلع من لساني وحجيت وانه متصنعه العصبيه..
_خير شكو شعدك دخلت للغرفه اطلع بره مرتضى المن قفلت الباب شتريد
_خليني احجي العندي واطلع بدون محد يدري بيه
_وانه ماريد احجي وياك اطلع بره مايكفيك المشكله السويتهه امس وكسره الخشم من خطيبي ماجابت نتيجه شنو
_خطيبج هذا نكعي وشربي مايه وحسابه على هل ضربه بعدين ياخذه مربع
_تجرأ وسويله شي وشوف شسوي بحالك
_ايباا صايره تهددين
_ماهدد انه انفذ
_هسه عوفينه من هل عار والتمسلت
_والله العار ماغيرك احترم نفسك وضب لسانك ومحمد لا تغلط بسيرته احسلك ..
نطت عيونه بعصبيه ولزمني من فجي عصره وهوه يحجي بصوت شبه مسموع..
_لا تغلطين بالحجي وياي جنانه خليني محترمج
_غصب عنك ورجلك فوك راسك تحترمني فاهم
_جنااان
_اطلع بره مرتضى لا اصرخ والم العالم عليك اطلع برااا..
جمعت كل قوتي ودفعته عني رجع خطوتين ونتر وجهي من ايده وجهلي اصبعه وكال بأمر ..
_تكعدين وتسمعيني شريد احجي وغصب عنج تمام
_استغفرالله ربي الضاهر انت الحجي ضايع وياك ..
بعدته عني وتوجهت للباب لزمت اليده ردت افتحه وهوه خله ايده عل باب مانعني غمضت عيوني ونفخت بنفاذ صبر باوعتلهه ببرود وكتله ..
_شتريد مني مرتضى ليش كاعد تشلع كلبي هل شكل ليش ماتعتقني وتخليني بحال سبيلي
_احبج جنان اريد نرجع هذوليج مرتضى وجنان الصغار الواحد يحن عل ثاني واحد يحب الثاني
_العفو منك خويه بس يمته حبيتك انه وانت يمته حبيتني اشو كاعد تتحلم انت
_اعرف شموخ حجتلي معاناتج لمن جنت بالخارج صح انه لهيت روحي بالدراسه والنسوان بس جان بالي يمج وانتظر يوم يوم ارجع واشبع عيوني
بشوفتج جنان انه اعترف اني غلطت بحقج وجرحتج بالكلام بس صدكيني جان بسبب رفضي للزواج جنت خايف ومتردد اعترفلج بحبي كل هل
سنين بسبب خوفي من اني ماراح اتقبلج كزوجه خفت اوعدج بشي صعب علي اتقبل فكرته حتى
_والسبب
_ماكدر اكلج بالسبب بس صدكيني انه احبج واتمنى نرجع سويه نحب ونعشك ومايهمنه شي ولا يردعنه شي من ان نسوي النحبه
_شنو الحب بالنسبه الك
_شنو
_اذا حبيت بنيه شنو افكارك اتجاهه شنو التحب تسوي وياهه وشنو خططك لمستقبلكم سويه كل هل اساله ببالي
_اذا حبيت بنيه شنو افكارك اتجاهه شنو التحب تسوي وياهه وشنو خططك لمستقبلكم سويه كل هل اساله ببالي
_انه الشخص الاحبه ماحب امتنع عنه ماحب ابتعد عنه اريد كون لمن اشتاقلج اريدج يمي احضنج انام على همساتج لمن امر بضيجه خلك بوساتج ترفه
عن روحي وتشفيهه لمن اخاف اريد حضنج ياويني واحس بحبج اتجاهي لدرجه ان مامتنع عن لمسج اريد احسج الي وقريبه مني وملكي للابد
اريد اسعدج بهاي الامور واغرقج بحبي اكثر تمنيتج تتفهمين رفضي للزواج وتحاولين تبدين
وياي صفحه جديده تره الزواج مو كلشي ولا ضروري لمن شخصين يحبون
_كملت
_جنان تطلكي من محمد وخلينه نرجع حبايب تمام ..
باوعلي بتوسل ومد ايده يريد يلزم وجهي ابتعدت عنه خطوتين وكتله بنفاذ صبر..
_كملت
_جنان
_اطلع بره يله
_ليش هل قساوه هاي
_لا على شنو قساوه انه بنيه مخطوبه وكلبي وروحي وجسدي ملك لشخص ثاني وكلامك هذا وياي عيب وحرام بس راح اعبرهه الك حتى تفهم
ان كل كلامك الحجيته قبل شوي ماهامني ولا هز شعره من راسي والتكول عنه حب هذا نكعه واشرب مايته واستمر من الطريق الاجيتني منه
_روحي تريدج مو بيدي جنان
_مرتض......
قبلما اكمل تقرب علي بسرعه وحضني دفن وجهي بصدره وسد حلكي بيده تخبلت وصرت ادفع بي محاوله اتلمص منه وانه باشد غضبي حسيت بايده
نزلت على فخذي تخبلت بزايد وصرت بكل قوتي وحلاة روحي ارافس وادفع بي عني واصرخ على
امل يطلع صوتي والحمدلله اندك الباب علينه لزمني وهوه ساد حلكي باحكام وكال بهمس..
_اشش جنان لا تسوين هيج بينه انتي الي وماريد هل جسد والروح تصير لغيري صدكيني اكتله اليتقرب منج انه اريدج جنان روحي متخبله عليج ..
بقيت احاول اتملص منه منقرفه من كلامه اليصاحبه بوسات خفيفه على جبيني ووجناتي تعبت وانهد حيلي كعدت لامه رجلي لصدري ونزلت دموعي بهدوء وحركه على خدي لمن
شافني هديت ابتعد عني من وحده صرت ابجي واشهك وهوه محتار شلون يسكتني وكلما طلعت شهكه مني خله ايده على حلكي وهوه يهدي بيه ويحجي بهدوء..
_جنان فهميني اذا اعوفج لهذاك العار اموت روحي ام عيون شمسيه باوعيلي شوفي هاي انه مرتضى الجنتي كل عمرج تنتظرينه وتتمنين تنامين بحضنه
هسه انه كبالج وبالغرفه ومقفول علينه الباب والج حق كلشي تسوين بيه مدام تحبيني واحبج ماكو شي يردعنه..
شهكت من بين دموعي وحجيت بصوت يرجف من الخوف ..
_مرتضىىى اطلععع منييي لااا امووت روحييي هسسسه اطلعع من حياتييي كافيي دمرتنييي دمرت كلشي حلو بحياتييي اطلعععع..
عليت صوتي واندك الباب اقوى عرفتهه شموخ وبسرعه صرخت باسمهه خله ايده على حلكي بس مالحك يسكتني لان طلع صوتي وراح لزم شعري
بثنين اديه حيل ضربني بعصبيه بجبيني وكام دخل للحمام يلي بالغرفه كمت سحيت روحي كوه وفتحت الباب دخلت شموخ باوعتلي بصدمه
ونزلت علي حضنتني وانه ابجي واشهك بخوف جانت لحظات مرعبه بالنسبه الي وفكره ان ممكن يربط حلكي ويسوي بيه شي جانت تهد حيلي
وتخبلني اكثر .. شافته طلع من الحمام وكامت بعصبيه ضربته بوكس على خشمه الملفوف وهوه تخبل لزمهه من رقبتهه خانكهه وهيه ماقصرت وياه
سوت حركه سريعه مدري شلون ولوت ايده وره ظهره ولزكت وجهه بالحايط حجت بعصبيه وعيونهه حمره شرار...
_و رب الكعبه يامرتضى ان تقربت من جنان مره ثانيه لو مديت ايدك عليهه لو علي ماحسب انك
اخوي و اطلع وافضحك كدام العالم واكلهم راد يعتدي عليهه واخلي ذبحك يصير حلال
_عوفيني ولججج عوفينيييي..
بقه ينكت بروحه يريد يخلص ايده منهه وهيه لازمتهه حيل وتلوي بيهه اكثر وعيونهه حمره دم من العصبيه صارت وعروك رقبتهه برزت خفت
عليهه يسوي بيهه شي جمعت قوتي وكمت فتحت الباب ورحت على اثر هوسه النسوان والجهال بسرعه لغرفه محمد لكيته كاعد يلبس بقاط العرس انتبه علي وكتله بخوف..
_الحك محمد شموخ ومرتضى كاعد يتعاركون بغرفه عمو شهم وخايفه يسويلهه شي
_شنوو ..
عاف الستره من ايده وطلع سوه الدرج شبختين وكلهه انتبهتله عود ماردت احد يعرف وتكبر المشكله .. دخل للغرفه واسمعه يصيح على مرتضى
ويسحل بي فتحت حلكي بصدمه لمن شفته طلعه سح وهوه لازم بشموخ ويعتهه من شعرهه تهسترت وبقيت اصرخ ركضت عليه عضيت ايده ودفعني
لزكني بالحايط عبالك واحد مخبل دخلوا الزلم على صوتنه انه والنسوان وفكوا شموخ يلي لا ردت ولا خافت لازمته بوكسات على بطنه مسويته كيس
ملاكمه دخل عمو شهم بيناتهم وضرب مرتضى ونهال عليه بوكسات وجيب اليفكه هسه من ايد
عمي سحبه ابوي وعمي شعلان كوه عنه وهذاك تخبل مرتضى صار يزاكط ويصيح..
_تطكنيي اننه يابويه تطكني كداام النسواااان اليومم احرك البيت على راسكممم اليومم ماخلي
هل كحب* عايششه ولجج انننه تلوينن ايدييي وابويي يضربني كدام الناسسس والله ماخلييي احدد بيكم عايشش اليوووم وااالله ..
كام والولد كوه لازمينه سحبهم وياه للمطبخ لزم السجين واحنه لزمنه كلوبنه وشهكنه لمن اجه على شموخ يريد يضربهه وهيه مخبله راحت بدفع صدرهه تقدمت عليه وتتحداه يضربهه بالسجين
تهت من بين صرخات النسوان وصياح الزلم عليه وبين شموخ يلي يا ساعه تجي بيهه السجي نه وتموتهه وماعرفت شسوي ماطلع بيدي غير ان اروح عليه والزم السجينه بيدي بقيت اتلاوه وياه وهيه تكصكص بيه والدم صار نافوره هدا لمن شافني هيج وشمر السجين عني باوعلنه وهز راسه بوعيد وطلع التموا اهلي علي وانه اباوع لايدي وتايهه عن الدنيا ماصرت احس بالحوالي ولا اعرف شيحجون وياي بس اشوف ايدي تنوخذ من واحد للثاني ويمسحون بدمهه لعبت نفسي ودخت ماحسيت على روحي الا وانه بحضن ابوي طايحه
والصوره بقت ضبابيه وبطيئه والصوت يروح ويجي وانه كاعده بالكاع مسحونه روحي غمضت وكأن مرت لحظه وحده وصار بين الحادثه وبين الساعتين رمشه عين فقط فتحت عيوني فتره يله وضحت الرؤيه وشفت نفسي بالغرفه وشموخ يمي تمسد على راسي باوعتلهه بتساؤل واحس ماصاير شي حسيت وكأني جنت بحلم مو حقيقه..
لا دموع مبلله على خدي ولا غصه محاوطه كلبي ولا خنكه ماليه صدري والوضع طبيعي عندي
انتبهت علي شموخ وكالت وهيه دموعهه تجري على خدهه وريانه حاضنتهه معلكه برقبتهه...
_هاا جنانه حبيبتي تسمعيني
_اي خيه ليش تبجين
_ليش سويتي هيج ليش خاطرتي بروحج علمودي
_ليش شصار
_ماتذكرين
_شتذكر..
صفنت بوجهي قلقانه ومسحت دموعهه وحجت بترقب..
_ماتذكرين المشكله الصارت بيني وبين مرتضى مساع
_لا شصار ماتذكر
_لا بس لان ضوجني بالكلام راد يشمر علي السجينه وانتي لزمتيهه ..
باوعت لايدي متصنعه الصدمه واشوفهه متعقمه وملفوفه باندج رفعت راسي الهه وحجيت بتساؤل..
_شبيهه ايدي هيج ملفوفه
_انشكت بالسجين وخيطوهه الج ولفوهه ..
صفنت وايقنت ان فعلا هذا الجزء ماتذكره لمن خيطوهه الي اما الباقي كله فهمت ان مو حلم وانما واقع صار ويانه فكلت الاحسن اتصنع النسيان حتى ينسون الشغله ومايذكروهه بعد وينقهرون علي ..
هزيت راسي بايجابيه وابتسمت وانه اكول بنشاط..
_هسه عوفينه شنو بيش الساعه هسه
_ب٣ ونص
_لا بربج يعني العروس على جيه
_لا راح يتاخرون لل٥ ياله تطلع الزفه
_اي جا اذا هيج بعد عدنه وقت خلي نكوم نبدل ونكشخ وين صايره هاي الناس الغربه تكشخ و اخت العريس وبت عمه وجوهتهن ملح
_انكسر واهسي والله كومي بس انتي بدلي وروحي يمهن راح الزم بنيتي وغرفتي واكعد
_ لا بطه ليش انكسر واهسج صاير شي
_لا ماصاير
_لعد على ايش بعد انكسر واهسج دكومي كومي عرس محمد هذا مو ياهو الجان يهون عليج تكسرين خاطره بهيج يوم حلو
_مالي نفس والله
_ميخالف كومي بدلي وانه اسويلج المكياج واسرح شعرج بعد شتردين بس طلعي ووري انج بخير وحاضره بفرحته
_تمام ..
جرت حسره وكامت بتعب دخلت للحمام وانه بهتت ابتسامتي المزيفه باوعت لايدي واسترجعت بالي لمن تلاويت وياه وشعورهه وهيه تنغرز بايدي
وتكصكص بيهه غمضت عيوني بالم وشوغه روح كمت على حيلي باوعت للمرايه وشفت المكياج البوجهي صاير دمار وحرب غسلت وجهي واخذت نفس يمكن هذا احسن شي سويته لمن تصنعت النسيان حتى همه كذلك ينسون ومحد يسالني عن الكابوس العشه بغرفه عمي..
طلعت بعدما نشفت وجهي اخذت مزيل مكياج وقطن وصرت امسح بوجهي كامت شموخ توجهت للكنتور وانه ردت اروح اجيب مكياجي وترددت
عاد عفته بغرفه خالتي سماء واخذت من مكياج شموخ وكعدت اخلي لبست الفستان هيه وكعدت تباوع لافلام كارتون ويه ريانه بذبول .. كملت
مكياجي بسرعه ومشطت شعري سرح مايحتاجله تسريح عاد بس رفعت الكذله بقراصه وكمت كلتلهه تجي تكعد عل كرسي كامت وضلت ريانه تاشرلهه
تاخذهه لمن شافت امهه مساع خافت خطيه وبقت متعلكه بذيالهه ماتعوفهه عاد شالتهه وكعدتهه بحضنهه وانه بديت بيهه مكياج سويته
على شكل ملامحهه وحسيتهن برزن اكثر كملت وره ساعه وسرحت شعرهه سمعنه صوت بره
وهوسه النسوان فتحت الباب وصحت لنوره اجت وهيه تلبس بعبايتهه وتكول..
_ها خيه شلون صرتي
_زينه بس شصاير ليش انخبصتو
_كال عمو شهم امشينه هسه نجيب العروس
_جا مو على اساس ب٥
_لا كال عيب من الوادم نتاخر ومدام السالفه فضت خلي تطلع الزفه
_هاا اوكي
_تجن انتن غير
_لا انه راح ابقى يم شموخ انتي روحي ويه امي
_هيه امج راح تبقى يمج تكول يضل بالي يم جنان اذا رحت
_شسالفه قابل شبيه انه امشي كليلهه جنان كاعد تمكيج شموخ ومابيهه شي لبسيهه عبايتهه وخلي تروح وياج
_انتي اكيد مابيج شي
_اي والله مابيه شوفه عينج
_تمام جا راح اكلهه واخذهه وياي اخاف اروح بحدي انه
_تمام..
عدلت عبايتهه على راسهه وراحت سديت الباب واجيت كملت تسريح شعرهه ورشيتلهه عطر ورشيتلي لبسنه الكعوبه وصرت اخذلنه صور وهيه
كوه تبتسم عاد انطيتهه النقال تكصلي انه وريانه .. كلهه ساعه تقريبا وصار صوت هورنات بالحديقه طلعنه انه وشموخ للصاله وطلينه من وره البرده
وشفناهم شلون نزلوا من السياره هوه وعروسته ايد لازمهه وايد شايل الفستان من الكاع وطالعين يجننون عين الله عليهم ..ذب حوا دجاجه جوه رجلههِ
والخروف جواهم ثنينهم ودخلوا شردت انه لبست الجبه والحجاب ورجعت للصاله ويه دخلتهم .. دخلن النسوان والعرسان وياهم وهنه يهلهلن ويطشن جكليت عليهم وهيل وكف محمد كبالهه فتح الكبوس واخذه عنهه باسهه بجبينهه وخدودهه واخذهه من ايدهه كعدوا عل قنفه
ونسوانهم وعماتي وخالاتي يذبن كولات بالوسطه هنه والعجايز ويهوسن واحنه واكفين نصفك.. اشر لشموخ وراحت يمه وهوه وكف باس راسهه يجبر
بخاطرهه وهيه برطمت رادت تبجي حضنهه وبقه يهمس باذنهه لان صوت المسجل عالي وهيه تهز براسهه وتبتسم مسح دمعتهه وكامت عبير همين
حضنتهه وبقت تمسد على شعرهه حجت وياهم ورجعتهم بيدهه للقنفه مبتسمين كعدوا وهيه وكفت يمهم وتصفك .. والنسوان مستمرات
بالكولات ابتسمت وتذكرت كولات اهل محمد من عقدنه وفرحه امه واخته بيه جريت حسره شكت
صدري واختفت ابتسامتي صاير كلشي بحياتي يتمحور حوالين هذيج الفتره وكل موقف يصير كبالي يذكرني بي وياخذ عقلي يمه..
رغم حبي اله لهل درجه وبفتره قصيره بس انه حبي اله مانخلق من عبث ولا لسبب معين وانما انخلق وبده ينمو بكلبي
بالفطره وطول هل فتره جنت افكر بمشاعري اتجاهه واتمعن بيهن وبكل مره اشوف بيهه مرتضى من بعيد احس ان كلبي فعلا ميت اتجاهه ومن
زمان همين وايقنت طول هل سنين ان مشاعري اتجاهه مو حب ولا عشك وانما جرح باقي اثره او اشتياق لذكريات قديمه او رغبه دفينه بالوصول اله ..
فهمت ان حبي لمرتضى مات وتلاشى خلال هل سنين النتظرته بيهن ومشاعري تبددت اتجاهه بكل مره حاولت انساه وبكل مره يحاول يستغلني بيهه..
ايقنت اني نسيت مرتضى واختفى حبه من كلبي بهذيج الفجريه يلي وكفت بيهه متوجهه لربي ودعيته يمحي حبه من كلبي ويعوضني الاحسن منه ..
تاكدت بعدها ان الشخص الحبيت امتلكه والجنت اشتاقله مو مرتضى هذا وانما شخصه القديم جنت اشتاق لمرتضى يلي بعمر ال١٦ سنه يلي جان يهتم
بيه ويدللني ويلعبني مراجيح ..وكل هل فتره مرت وانه بالي مشغول بمحمد وحسيت شكد حبيته وصرت اشتاقله بكل لحظه تمر علي واحن لحضنه
وعطره واشتعل نار وانه اشوفه يحجي ويسولف بمكانه القديم ويه غيري واحترك واتضايق لدرجه اني اطلع من المكان كله.. وانه احس من قبل ان
محمد يخصني وماتحمل يجي غيري ياخذه مني وهوه من قبلما نرتبط جان زميل عزيز على كلبي وصعبه شخص عزيز يجي الغير ياخذه ويشغل باله
مو نوب وانه هسه روحي متعلقه بذكراه وتريده بكل لحظه .. بس فات الاوان حتى استوعب و افهم ان المشاعر يلي بكلبي اتجاهه و يلي اطلقت
عليهن اسم تانيب الضمير والندم والشفقه او غيره أصدقاء هنه بالاساس مشاعر حب واشتياق وغيره اتجاهه والتسميات الغير هذن جنت اضحك على
نفسي بيهن ومستبعده ان الانسان ممكن يحب شخص ثاني بفتره اسبوعين حتى لو اعرفه من
سنتين بس الوقت التقربت بي منه اعتبرته هوه بدايه لمشاعري اتجاهه واستبعدت اني ممكن اكون حابته من زمان وماحاسه على نفسي ..
تنهدت وخليت ايدي على كلبي محاوله اقوي صفنت بالعروسين لمن باس ايدهه وشغلولهم اغنيه "جننهم حبيبي /حاتم العراقي " كاموا ايد بايد
يركصون ويهزون اكتافهم سويه واحنه نصفك .. تقرب بعدما خلصت الاغنيه وحضنهه دافن وجهه برقبتهه يضحك .. ياااالله على حضنك يامحمدي شكد دافي
غمضت عيوني واسترجعت هذاك الشعور الدافي والحنون بحضنته بلعت ريجي بصعوبه ورفعت نقالي دخلت على رقمه وصرت اقره رسايلنه سويه
واول مانتبهت على اخر رساله بيناتنه قبلما نفسخ الخطوبه وهوه يسالني بقلق شبيه وليش متغيره وصايره اصفن واذا مريضه او صاير مشكله وياي
واذا جنت سعيده ومرتاحه بخطوبتنه او لا بقيت مصدومه واحاول استرجع ذاكرتي لهذاك الوقت شلون مامنتبهه على هل رسايل وانه راده عليه
وكايلتله راح انام تصبح على خير بكل برود يعني جان متضايق وكالي افسخ الخطوبه منه ومن ذاته بسبب برودي وياه وعدم جوابي على سؤاله بطريقه
مناسبه يعني جان من بدايه حاس اني رايده ارفضه وخفف علي هل حمل وحجه هوه .. طلعت مضوجته حتى بدون ماجنت حاسه و جارحته
وكاسره كلبه وخاطره .. بقيت اقره بالدردشه من اول ما كتله يجي يخطبني لحد هاي الرسايل الماجنت منتبهه عليهه لعد شكد جنت ضايعه
ومادري باليصير حوالي واليحجي الي .. بقيت الوب وانه ارفع راسي اباوع للعرسان شحلاتهم واتذكر محمد وفرحته بيوم العقد ماعرف شصارلي
بلحظتهه اختنكت وكمت طلعت من يمهم ومن المكان كله.. رحت للمطبخ و بقيت الوب شلون ارجع محمد يلي ضيعته بيدي شلون ابينله اني
احبه واريده بهذا الوقت اكثر من غيره شلون وانه مالي عين اباوع بوجهه لو احاجي ..تنهدت و رحت لغرفه شموخ اهدي بروحي وشارده من كل البشريه
مستفرده بتفكيري بي كمت شمرت الجبه والحجاب عني وتمددت عل جربايه وانه افكر بطريقه ترجعه الي لان خلاص ماتحمل بعد بعده
ولا اتحمل شخص ياخذ كلبه غيري وهوه مرتبط بيه .. تافافت بعد دقايق غير معدوده من التفكير وكمت ردت البس الجبه ورفعت راسي للمرايه..
شفت فستاني الماروني بلون الخمر البارز بياض جسمي واجت عيني على رقبتي وكتفي وتذكرته لمن دفن وجهه بيهن وبجه بيوم العقد تلمستهه باصابعي وانه
احاول احس بشعوره لمن يحضني .. فكرت وكلت اسويهه وادزله احب شي على كلبه واول شي نزل عليه دمعه فرحته.. بلكي يفهم هل شي على ان
اشاره لاشتياقي اله او لحنيتي لدفو حضنه .. رفعت النقال دخلت عل سناب وكصيت صوره لنص وجهي ونازل لرقبتي وكتفي الطايح عنه سير الفستان الرفيع..
باوعتلهه وصار لحظتهه تضارب بين عقلي وكلبي من جهه كلبي يدفعني ارسلهه ومن جهه عقلي يمنعني ويوسوسلي هل شي عيب ومايصير ادزهه
اخيرا تجاهلت كل الهوسه البداخلي ودزيتهه اله طفيت النت وطلعت من المحادثه وانه كلبي يخفق بجنون وحاوطت اطرافي رجفه خوف وتوتر وقلق
وخجل هدت حيلي.. لبست الجبه والحجاب و طلعت امشي كوه رحت اخذت كلاص عصير من الثلاجه وشربته دفعه وحده حتى اهده ..
اخيرا اخذت نفس وتجاهلت وتناسين هل سالفه السويتهه واعتبرت ماصار شي ولا دزيت شي يعني نكرت فعلتي بعدما سويتهه ..
اجيت للصاله لكيت محمد رايح يم الزلم بالديوان والنسوان العجايز يهوسن يم العروس والجو ممل انطيت نقالي لشموخ تصورني شغلت اغنيه
" بعدك معذبني "
ذبيت الجبه والحجاب ودخلت بالوسطه اركص والنسوان يصفكن ذبيت حركه كلبي بالاغنيه ودخلت وياي نوره اختي صرنه نركص سويه ولاول مره ادري بروحي هيج اعرف
اركص صار حماس و دخلن البنات من المعازيم وبنات عمي وكلهه طلعت حافظه الاغنيه وتغني وياه ..
صارت الحفله مالت العرس احلى من الخطوبه لان بالبيت ونكدر ناخذ راحتنه بالركص مو نفس القاعات متقيدين ونخاف من التصوير..
خلصت الاغنيه وبدينه بغيرهه وغيرهه وغيرهه لحدما تعبت كلش كعدت واخذت نقالي من شموخ الجانت تباوعلي بتعجب كعدت يمي وبحضنهه ريانه وكالت..
_كواج الله وماقصرتي
_ههه يكوي حيلج
_ بس لا رح تدزينه للمقصود
_منوو
_محمدج ..
فتحت عيوني بتفاجئ وباعتلهه وهيه مبتسمه جرت حسره بعدما نزلت راسي عل نقال وكالت..
_تره حلالج مو صاحبج هوه
_اعرف
_لعد ليش نزلتي راسج
_مو قبل شوي دزيتله صوره واستحيت من كلامج
_وشكو بيهه اذا دزيتي صورتج لخطيبج قابل رح ينشرهه
_خاف يكول علي مو خوش بنيه واريد اغري
_شدازتله هسه انتي الشسمه لا تخليني احجي هسه واجفص يمعوده
_ههه دزيتله هاي الصوره كوه وخايفه من تفكيره و رده فعله..
اخذت النقال باوعتلهه وابتسمت بتعجب رجعتلي النقال وحجت بهمس..
_تردين تحركين عشيرته دازتله رقبتج وزنودج بالاحمر
_ههه حلوه لو عيب
_لا حلوه بس جنهه راح تسوي كلبه جهنم الليله بلون هل فستان
_خو مايفكرني غير شي لمن يشوفهه
_هسه هوه شافهه تلكي وراح بعد شيفيد التسائل
_ماشافهه يمكن
_مادخلتي عل صوره
_لا طلعت وطفيت الشبكه اولما دزيتهه
_دخلي بله خلي نشوف شافهه لو لا
_استحي
_تدخلي هسه استحيتي ام حلك
_ههه اي والله مدري بشنو جنت افكر لمن دزيتهه اصلا
_اويلي عل خجول انه دفتحي النت خل نشوف الولد واصلتله شايفهه لا
_ تمام..
فتحت نت وبقيت لازمه كلبي ومنتظره اشعار منه بس مارد كلت اكيد ماشايفهه عاد دخلت عل محادثه ولكيته شايفهه وبعده متصل الان بقينه
نراقب فتره ربع ساعه وطلع من البرنامج باوعت لشموخ باستغراب وهيه كذلك وكالت..
_هذا يا اما ما همه مظهرج ومبادرتج هاي يا اما تخربط وانسحلت روحه
_هفف هسه انه المن دزيتهه بله شكد اتعاير
_ههه تره الولد ماكال ولا حجه شي يجوز تاثر بيهه وفهم رسالتج من وراهه بس يريد يواجهج وجه لوجه ويرد عليج
_هيج رايج
_اي خيه بعد مدام دزيتيهه عوفي ولا تدزين شي ثاني بعد باجر عكبه داومي وشوفي رده فعله بشكل واقعي كبالج
_تمام انشاءلله
_يله كومي هسه كملي ركص
_جا وكاوليه العائله منهه من الشيطان كاعده وساكته بعرس اخوهه وين صايره هاي
_مالي واهس اجذب على روحي اذا كمت اركص وكأن ماصاير شي
_ملاحظه على روحج من حبيتي لهسه صاير كلبج ضعيف وتكتئبين كلما مريتي بموقف مو حلو
معقوله هيج الحب خله شموخ الشامخه والقويه تضعف عزيمتهه وينكسر واهسهه بهل سهوله..
بلعت غصتهه كوه ونزلت راسهه تمسد بشعر ريانه عرفت ان كلامي الحجيته بالشقه هو فعلا صاير وياهه تنهدت وكمت يم خوات العروس وكلت لاسراء..
_اسراء حبي اكدر احجي وياج شوي
_اي عمري احجي
_شموخ اليوم صار وياهه موقف مو حلو او بالاحرى خلي نكول تعاركت ويه اخوهه وهسه
مكسور واهسهه وشوفي شلون كاعده ومكتئبه تقبليهه عليهه هيج تسوي باحلى يوم لاخوهه واختج
_لا طبعا اصلا ماقبلهه حبيبه كلبنه تضوج روحهه علمود اي شخص
_جا روحي احجي وياهه لان تعبتني من مساع لهسه احجي ومافاد وانتي ادريج عزيزه على كلبهه وتسمع كلامج
_تمام حبيبتي خلي انطي ابني ل بان واجي احجي وياهه
_تمام مشكوره يروحي
_لا شسالفه عليمن الشكر..
ابتسمت وهيه شالت ابنهه خلته بحضن اختهه بان وراحت كعدت يم شموخ وبقت تحجي وياهه رحت انه ربطت الدي جي على نقالي وبقيت اكلب
بالاغاني طلعت اغنيه "المصاري /غزوان الفهد" وخليت النقال عل ميز رحت اخذت ريانه منهه وبقيت لازمه بيدهه واركص انه وياهه وشلون طلع
عدهه حركات المفلوكه بعد ياهيه امهه.. دخلن البنات الوياي واسراء كومت شموخ وتركص بيهه خلتهه بالوسطه وشوي حسيتهه ترفهت من حجت
وياهه بقت تركص وتهز جتف خلصت الاغنيه وخليت ردح لان من دون اغاني ساجده مايتسمى عرس علكت اغنيه "جويسم ابو الغيره" وشدت
اسراء الشال على خصر شموخ ودفعتهه بالوسطه وصار الهز ماله والي وهيج مرت ساعتين من اغنيه لاغنيه لحدما صار غروب ياله طفينه المسجل
وذبينه روحنه عل قنفه تعبانين ونضحك من التعب سحبت شموخ ريانه من يم الجهال وكلتلهه..
_ولج يمه كافي ادري بيج كاوليه على امج بس لا تختنكين
_ماا اايد اركث
_هههه ولج كعدي بربوكه تره اكول لبابي عليج
_ماحبث
_ميخالف انه احبث
_مااا..
بقينه نضحك عليهه وهيه كاعده زعلانه بحضن امهه وتلعب باصابيعهه اجت خالتي سماء وكالت وهيه عركانه خطيه..
_يله يانسوان كومن صلن حتى نفرش السفره وتتعشن تره يردون يزفون العريس ب٨
الكل : اي كايمين..
راحت خالتي والبنات استلمن عبير يخوفن بيهه وانه ميته ضحك عليهن نوب من يمي خفت بس يدرن بيهه ماتهتم وكلما حجن حجايه تكلهن
"روحن خوفن العريس لان انه يلي رح افترسه الليله " واحنه نضحك عليهه ندري بيهه تشاقه وتكول هيج حتى نسكت عنهه بس الخوفه والتوتر
مبين بعيونهه .. اخيرا عافنهه وكمنه نساعد خالتي بصب الاكل كملنه صب وكلهه التمت عل سفره وانه ونوره واكفين هاي التصيح اريد خضره وهاي
التصيح اريد لحم وهاي تكول اريد سوب واووو وحده تروح ووحده تجي خليناهن كلشي متوفر يمهن ياله كعدنه انه وشموخ ونوره وخوات
العروس بغرفه شموخ ناكل بعدما لمينه الماعين وعطرنه الصاله .. كملنه بسرعه بسرعه وطلعنه غسلنه .. اخذوا العروس امهه وخواتهه للغرفه تالي
صارت هوسات بره جماعه محمد واولاد عمي طلينه من الشباك طبعا هاي عاده مانبطلهه نحب نشوف هوسات الزلم باوعت واشوف حبيب روحي
بارز بين الكل وشلون يهوس ويهز الكاع بكولاته .. صار نبض كلبي يخفق ويه دكه رجله بالكاع وكولاته اليذبهه ضحكت بفرح وكالوا راح يزفون العريس طشينه احنه
النسوان كل عشره بغرفه وبس نباوع من طرف البيبان دخلو محمد شايلينه على اكتافهم ويهوسون تالي نزلوه وصعده عمو شهم وسلام لغرفته ورجعوا قصص ماي هوبس
نزلوا همه.. طلعوا الزلم من باب المطبخ وطلعنه احنه سدينه البيبان وبعد صار هدوء كلهه بدلت ملابسهه وحضرت روحهه حتى بس يطلع العريس
يطشون لبيوتهم مدري المن منتظرينه يطلع عاد انه والبنات غيرنه ملابسنه حتى لا تتلف وتفرقنه ثنين تغسل ماعين وثنين تكنس وتمسح الارضيات
ووحده تعطر البيت ورانه .. كلهه نص ساعه تقريبا وسمعت خالتي سماء هلهلت هيه والنسوان طلينه عل صاله وشفته محمد لابس دهداشته البيضه
البارزه شخصيته واكف مستحي سلم على خالتي وباس راسهه هيه وام العروس ورجع صعد لغرفته بعدما همس لخالتي سماء ..والكل فرحله خطيه
خوش انسان ويستاهل كل الخير.. اجت خالتي سماء طلعت البلامه مالت اكل العرس من الفرن خلته بصينيه هوه وسفره ولبن وتمن وهاي
الشغلات وصعدته الهم .. كملنه احنه شغلنه والنسوان كلمن اخذهه ابنهه لو نسيبهه وراحوا حتى ام العروس وخواتهه همين بدلن ملابسهن
وراحن بعدما تطمنوا عل عروس وودعونه .. صفر البيت من الخطار وصار نظيف عاد بقينه كالعاده بس احنه صبينه جاي حطينه كرزات بصحونه
خليناهن بالصينيه واجه سلام اخذهن للديوانيه واحنه كذلك حطينه كرزات وعصاير وكعدنه نسولف عل عرس ونكرز .. صارت تقريب الساعه ١١
طفينه بعد اخذنه دواشك واغطيه للديوان فرشتهن لاحسان وبابا وعمو شهم وسلام وانه كالعاده بغرفه شموخ وامي ونوره بغرفه خالتي
سماء .. لفينه راسنه ونمنه للصبح بعد تفكير وقلق دام ساعتين كامله .. كعدت الصبح على هوسه امي ونوره وهنه يحضرن ملابسنه حتى نروح لبيتنه
باوعت للساعه ب١٠ الصبح كمت صبحت عليهن ودخلت للحمام غسلت وطلعت لبست فستان الطلعه وكلت لامي تودي فستان الحفله بطريق
رجعتنه بعد شيودي احسان كلساع عاد كالت هاذهو لبسنه وحضرنه ملابسنه وشغلاتنه وكعدنه نتريك كلنه سويه نزلوا محمد وعبير ايد بايد
وشحلاتهم عين الله عليهم كاشخين ولايكين لبعضهم اجو باسو راس عمو شهم وخالتي سماء وكعدوا ويانه عل ريوك ماحبوا يتريكون وحدهم
بالغرفه وهم سوالف وضحك ماليه البيت بس سرعان ما سكت الكل وانكلبت الملامح لمن محمد جاب سيره مرتضى وكال موجه الكلام لعمو شهم..
_لا بويه عوفه يولي لا اريده ولا اريد اعتذاره ولا اريد يعتب باب البيت بعد خلاص مو توظف هوه خلي يلم روحه ويفتحله بيت يتزوج ويكعد بي
_بس هيج مايصير يابويه مرتضى ماله غيركم انت ابوه وامه مايصير تحرمه منكم وهوه ضل بعيد
عنكم سنين بالغربه هوه غلط يابويه وكتلك اجيبه ويطلب السماح منك ومن اخته والمسامح كريم..
بقه عمو صافن وهادئ ماحجه شي الى ان هز راسه باسف وكله ..
_شتريد تسوي سوي بس هاي اخر فرصه اله اذا صارت مشكله ولو تافهه بسببه خلي يعتبر ماعنده اهل بعد مو انه الخلفتي تتعارك ويه الغربه وتمد ايدهه على اختهه
_حاضر بويه مرتضى انه اكفله الك بعد يكعد عاقل ومايسوي مشاكل ويه احد
_هاذهو اذا على كفالتك
_اي بويه..
انتهى النقاش ويه ماخلصنه ريوك كمنه غسلنه وحضرنه نفسنه ودعناهم وطلعنه لبيتنه وبطريقنه رجعنه الفستان للمول وطلعنه مسافه الطريق
وصلنه ونزلت رحت بوجهي لغرفتي غيرت ملابسي وذبيت روحي تعبانه عل جربايه بقيت اتكلب خمس دقايق وغفيت بدون مادري بروحي
تعب العرس والحنه طلع علي همزين كملوا زواجهم بدون تاجيل وخراب الحمدلله والشكر .. للعصر كعدت على صوت الباب فتحت عيوني ودخلت نوره وهيه تكول...
.
.
:- اخيرا خلصت حفله زواج محمد ومن تعب بليلتهه ذبيت روحي ميته مو نايمه عايفه البنات يسولفن فوك راسي للصبح كعدتني
ريانه وهيه تتلمس بوجهي وخشمي سحبتهه يمي حاضنتهه وابوس بيهه باوعتلي وكالت ..
_ماما نيني عم
_جوعانه يبعد امج
_اي
_يبعد حيلي هسه اكوم اسويلج عم..
ضحكت بلطف وحضنتهه حيلل لصدري بيهه تشفى كل جروحي وباناملهه الصغار تمسح على كلبي بالصبر .. كمت شفت جنان بعدهه نايمه اخذت
ريانه وطلعنه للحمام غسلت وفرجت وطلعنه للمطبخ لكيت امي تسوي ريوك صبحت عليهه وكعدت ريانه عل كرسي ورحت جبت بيض خليت
الطاوه عل نار طكيتلي بيضتين بيهه رشيتهن ملح حميت ماي وخليت حليب بالكوب الصغيرون مالتهه وانه صبيتلي جاي بكوبي كملت واجيت
خليتهن عل طاوله وصرت اوكل بريانتي واكل وياهه لحدما كملنه وشفتهه شبعت كمت خليت الماعين عل سنك واخذتهه للمغسله غسلت حلكهه
واديهه واخذتهه لسلام بالصاله بعدما صبحت عليهم هوه وابوي واحسان وعمو ساجد رجعت للمطبخ كملت الريوك ويه امي واجن خالتي حلى
وجنان ونوره محضرات نفسهن صبينه وكعدنه سويه نتريك نزلوا محمد وعبير شاركونه وكالعاده خربت ضحكتنه من جابوا سيره مرتضى ضجت
ولعبت نفسي عفتهم يحجون بي وكمت للمطبخ .. صبيتلي عصير بكلاص وكعدت عل طبله اشرب واكلب بنقالي اجت عبير سحبت الكرسي وكعدت كبالي وهيه تكول..
_هاا حبيبتي شموخه ليش ماكملتي ريوكج
_عمري انتي جنت شبعانه قبل شوي اكلت ويه ريان
_هاا بالعافيه بعدج ضايجه من اخوج مرتضى
_الله يعافيج لا تجيبين سيرته عبير ما طايقه حتى اسمه
_احجيلي حبيبتي ليش هيج علاقتكم وشنو سبب مشكله البارحه
_بسبب بنت عمي جنان
_جنان الحلوه ماغيرهه
_اي هيه
_ليش شنو دخلهه بيكم
_الاخ جان يوهمهه بحبه وخلاهه تنتظره على امل طول سفرته بالخارج وطبعا هناك لعب لعب ويه النسوان وحتى راد يجيبله وحده اجنبيه يتزوجهه
ويحطهه يمنه وهسه الافندي جاي يكول اريد جنان واحبهه من زمان وضحك على البنيه وخلاهه تفسخ خطبتهه من الولد وهذاك شكد يحبهه وشاريهه بماي عيونه
_ياا خطيه وتالي رجعت لمرتضى شنو
_اي على اساس هيج بس لمن تعاركت وياه مره عرفته يريد يلعب وياهه وتالي يتزوجهه
_شنو يعني بس لا البالي
_اي خيه
_يحجي صدك هذا اخوج
_اي والله صدمتي بي مو اقل من صدمتج تالي لمن حجيت لسلام ابوي جان يسمعنه فقرر يسوي عليه خطه وخلاني ابوك لسانه ويحجي الناوي صدك ويه جنان
_وتالي
_تالي مثل الورد حجه كلشي وكال الا احبلهه ياله اتزوجهه واجيبهه تخدمني وطبعا هل حجي كله مسجل بالنقال
_شوف جان ضحك عليهه وانجرت وراه
_لا جنان ماتنجر وره هيج سوالف واصلا من فسخت عقدهه لهسه هيه ماترد عليه ولا تحاجي
_زين تسوي سباعيه والله
_اي بس هوه ضل يحوم عليهه يريدهه تطلك من خطيبهه وترجعله واخر مره البارحه لكيته حابسهه بغرفه اهلي ودخلت لكيت حالتهه مزريه
_لا يالله خو ماسوه بيهه شي ولج
_لا همزين اجيت بالوقت المناسب وجان بس يحاول يقنعهه ان ترجعله
_اي الحمدلله خطيه تلكيهه عاشت برعب بالغرفه
_اي والله حتى ماتحملت منظرهه كمت ضربته بوكس ولويت ايده وهوه تخبل علي بقه يرافس لحدما لزكني بالحايط واخذني من شعري وانه
اضرب بوكسات ببطنه ووو هيج صارت المشكله لحدما اجه محمد اخذه مني وابوي انهال عليه
بوكسات ومن خبال مرتضى رادت البنيه تروح بيهه من شافته لازم السجين يريد يهد علي راحت لزمتهه واخذتهه منه
_يوو خطيه وانتي ادري بيج ماتسكتين
_رحت بدفع صدري ادري بي جبان مايكدر يسويهه ويضربني
_اي كال محمد احنه منا لازمينه كوه ونبعده عنهه وهيه تتقدم عليه تتحداه يضربهه المخبله
_ههه والله ياخيه احس الدنيا تافهه ومالي نفس بيهه بعد وصدكي محد يموت بغير يومه ولو جانت منيتي على ايد مرتضى تصير ومحد يردعهه
_اي والله بس ليش هيج تحجين انتي حياتج مو تافهه واحنه بيهه محتاجينج بكل لحظه من حياتنه وبنتج شلون البنيه مالهه غير امهه بدنيا
_ هوه هذا المخليني اقوي بروحي تفكيري بريان هوه همي واهتمامي بالحياة ولاجلهه اضطريت ابتعد عن شخص روحي تعلقت بي
_شكله الكلب مليان حب ولج
_اي والله
_ منو هوه بله سولفيلي هنياله سعيد الحظ المالي كلبج
Savana - UK Fashion
_منو بعد اكو غيره المكابل عيوني كل الايام
_منو ولج بس لا راهب اخوي
_اييه ياعبير
_ الله عليج
_والله
_من يمته ولج وهيج متعلقه روحج بي وانتو ماصار كم شهر ملتقين
_كولي شجم سنه
_شنو يعني
_احبه ياعبير ومو هسه انه راهب احبه من ١٠ سنين جنت متناسيه حبه كوه وانه بكل مره يزورني بالحلم اضل ايام اتخيله موجود يمي وهسه روحي تعلقت بي اكثر وانه اشوفه كل يومي واسرح بتفاصيله
_لجج شموخ تحجين صدك تحبين راهب من سنين وضامه بكلبج
_اي والله خيه
_ايا بذاته
شكرا لزيارتكم عالم روايات سكيرهوم
