رواية فصلية بديلة ( شموخ ) الجزء الثاني الفصل الثامن والثلاثون 38 بقلم ام ملكوت

:-مرت الايام وبعد زواج محمد وعبير ب اقل الاسبوعين اتصل عمو ساجد وسببلنه او بالاحرى سببلي صدمه من كال لبابا ان احسان راح خطب بنت جوارينهم

وقرروا خطوبتهم الاسبوع الجاي بقيت مفهيه واضرب اسداس باخماس منو هيه وليش وشصار

حتى قبل احسان يخطب بنت جوارينه فجاة وهوه قبل فتره محاجيني حتى اقبل بي معقوله يحبهه او ماخذهه غصب عنه بس

ليش حتى ياخذهه غصب وشنو الصار .. حسيت السالفه بيهه ان بس ماهتميت بالعكس رغم غرابه الموضوع الا اني تاملت يكون بيهه خيره ويعيش

بسلامه وياهه وتعوضه عن سنين حبه الراح بدون مقابل وتمنيت ربي يجبر خاطره بهاي البنيه وتطلع بنت حلال .. جان الخبر مثل بقيه الاخبار سوه

فرحه وحماس بكلوب الكل وخلال هل اسبوع الكل صار يتسوك ويعدل ويبدل وانه باقيه حيرانه من جهه اكول لازم اعدل وابدل واكشخ ومن جهه

اكول خاف يشوفني فرحانه ويحس اني ارتاحيت منه وينكسر خاطره وماعرف شسوي بس تالي قررت اشتري فستان حلو ومرتب واكون حاضره

بس اسميا واحاول ما ابرز بين البنات لو يلمحني ماعرف سبب تفكيري فقط الاعرفه ان عندي احساس احسان بعده عنده مشاعر اتجاهي وخايفه

عيونه تفضحه كدام خطيبته وتصير مشكله بيناتهم ولو انه ردت ماروح اصلا بس بالنهايه اعز صديق هذا وابن عمي العزيز ولازم اكون حاضره بخطوبته..

مر الاسبوع برمش العين واجه يوم الخطوبه ومن الصبح قفلنه بيتنه انه واهلي واخذنه شغلاتنه وطلعنه لبيت عمي ساجد ..تقريب الساعه وصلنه

وفتحلنه احسان الباب بعدما دك هورن محمد دخل السياره بالكراج ونزلنه وانه عيوني تدور بوجه احسان السعاده وماكدرت الكاهه .. اجه مزيف

الابتسامه سلم على اهلي وطلعوا خالتي وعمو ساجد عفتهم يسلمون عليه ورحت لعمي وخالتي سلمت عليهم حتى اتفادا سلامي اله وبقيت واكفه

بعيد ونظراته مافاركتني لحدما دخلنه للبيت اجت جنان سلمت علينه واخذتهه لغرفتهه دخلنه وسديت الباب التفتت علي وهيه تباوع بتساؤل وكتلهه ...

.

.

_قبل اسبوعين _

ثاني يوم بعد عرس محمد وعبير بليل وبعدما كملت صلاتي رحت طلعت الموجود بالثلاجه كصكصتهن وكليت وفرغت الجبن بالصحون خليت

قوري الجاي يحمى ونكلت الاكل للصاله على ماكملت هوه حامي الجاي صبيت بالكلاصات واخذتهن التمينه عل سفره نتعشه وبابا كال موجه الكلام الي..

_بابا جنان شلون صارت رجلج

_زينه بابا لا يضل بالك 

_زين خابرتي محمد

_لا بابا ماخابرته ليش 

_ علمود اول امس والمشكله الصارت بينه وبين مرتضى ماحجالج شنو سببهه 

_لا بس هيه المشكله صارت لان تحاجيت ويه مرتضى ومحمد عباله يريد يضربني فتعارك وياه

_يعني علمودج تعاركوا

_اي بابا

_وليش وشسوه مرتضى حتى تتحاجين وياه

_هيج لان دخل سلام ياخذ الاكل ومانتبهت لحجابي زايح عن راسي ..

ركع احسان الخاشوكه بالصحن وكال بعصبيه وهوه شاد قبضه ايده..

_وشله علاقه هوه ويحاسبج عندج اهل وزلمه يحاسبج لمن يصير شي هوه ياهو مالته باخت السالفه

_بصفته ابن عمي قابل ليش يحجي وانت تدري بي حتى من يحجي بهدوء صوته يكون عالي وجنه معصب 

_يولي شكو ويحجي وياج اصلا

_عوفه اصلا محمد ماقصر وياه كله عدهه انه واهلهه نحاسبهه وهذاك من كله انتو غافلين عنهه ضربه بوكس وتعارك وياه

_حيل وابو زايد بي ولو ادري بي هيج مسوي جان كملت عليه شني غافلين عنج قصده بناتنه كحا* 

_لا مو هيج قصده شبيك هسه احسان عوفنه منه سالفه راحت ومشت واخذ جزاته هوه..

تنهد بابا وهز راسه باسف واشر لاحسان ان يسد الموضوع كملنه اكلنه وشلت الماعين للمطبخ رجعت مسحت الارضيه وكالي بابا..

_جنان بويه انطيني رقم محمد

_ليش بابا

_محتاجه بكلمه راس 

_جا مو عندك رقمه 

_لا عند احسان ومالحكت اكله عليه قبلما يطلع

_هاا اوكي..

ذبيت الوصله ورحت لغرفتي وانه لازمه كلبي ليش بابا يريد رقم محمد وشنو الكلمه اليريد يحجيهه وياه خاف يريد يكله يحي يفسخ خطوبتنه لا بس ماضن بابا يتدخل بيناتنه ويتخذ عنه القرار يجوز على غير شي يريده خير اللهم اجعله خير..

اخذت نقالي ورجعت للصاله دخلت انطيته اله ورجعت النقال كملت مسح الصاله وانه اباوع لبابا بترقب وهوه يكلب بالنقال مالته .. رجعت الوصله

والماي للحمام ورحت يمهم بحجه اريد اباوع تلفزيون شويه واتصل بابا على محمد ورد عليه خله وكام للحديقه يحجي وياه يعني كعدتي

ماجابت نتيجه ومعناهه السالفه بيهه ان.. كمت لغرفتي وبقيت افتر قلقانه شيريد بابا من محمد زين شلون اعرف لا اكدر اراسله ولا اكدر اسال بابا

لان مايريد يحجيلي ..طلعت بالحديقه من باب المطبخ وبقيت اتسمعلهم مافهمت شي وحجه اخر كلامه ودخل للصاله تافافت وفضولي وقلقي قتلني

اخر شي طنشت ودخلت للغرفه بقيت اكلب وافكر شنو ممكن حجه بابا ويه محمد او شنو طلب منه معقوله حب يستفسر عن سبب العركه ياويلي اذا

محمد حجاله الصدك لو حجاله غير كلامي هاي انه شلون احجيله هيج وما متفقه ويه محمد والغبيه حتى من طلب بابا رقم محمد راح من بالي ادزله

رساله واكله يحجي الحجيته لو سالوه عن سبب المشكله .. تافافت وكمت طلعت ملابس الدوام كويتهن وحضرتهن ورجعت اباوع افلام واتحسر

لل١٢ طفيت النقال لفيت راسي ونمت لثاني يوم الصبح كعدت سبحت وبدلت واخذني احسان للدوام وراح لدوامه .. وكفت باب الشركه اخذت

نفس وزفرته اهدي بكلبي ويرجع يتوتر قويت نفسي وكلت اليوم لازم اخصمهه ويه محمد كافي صار شهر لا انه مطلكه ولا معلكه ولا هوه

مسامحني ولا هوه رافضني .. انفتح باب المصعد ودخلت وصعدت للطابق الثاني وانه روحي تصعد احسهه وترجع و اطرافي ترجف وماعرف شلون

اواجهه بعد المشكله الصارت والفكره الغلط الاخذهه عني .. انفتح الباب وطلعت منه شفته

ماموجود لا هوه ولا بثينه استغربت سلمت عل بنات واشرتلي زميلتي عل حديقه التفتت واشوفهم يسولفون ويضحكون وهيه كلما ضحكت ضربته

على ايده خفيف رفعت حواجبي بتعجب وشديت قبضه ايدي تحلفت بيهم اطكهم راس براس بس تعوذت الشيطان وغيرت اتجاهي للمطبخ دخلت

سويتلي كهوه وانه النار احسهه تشتعل بصدري .. انفتح باب المطبخ والتفتت شفته هوه رجعت عيني عل كوب وصار كلبي يرجف وكف يمي اخذ كوبه

سواله كهوه والهدوء عام بالمكان راد يطلع غمضت عيوني محاوله اقوي بكلبي ولزمت ايده التفتت باوعلي باستغراب وكتله..

_محمد خلينه نحجي 

_مابيناتنه حجي الشفته والسمعته قبل يومين يكفي وزياده

_كل السمعته والشفته سوء فهم و مايصير نبقى هيج لا احنه سوه ولا مفترقين

_شنو قصدج مزعوجه من فكره ارتباطج بيه ولا يهمج حاجيت ابوج البارحه وكتله اريد اجيب الشيخ نطلك وهوه وافق

_شنوو شكاعد تحجي انت محمد 

_مثلما سمعتي خليني انطيج حريتج وخلي حبيب روحج يستمتع ليش ضال شوكه وحجره بيناتكم وهم انه اعيش حياتي

_يعني انت صدك تحب بثينه 

_عن اذنج

_جاوبني..

هز راسه باسف وطلع من المطبخ وانه انادي مايرد علي لزمت الكوب وركعته بالحايط بعصبيه خليت اديه الترجف على عيوني وصرت ابجي بحركه

دخلن البنات يمي على صوت الكوب وكتلهن ماكو شي طاح ونكسر عفتهن ورحت للحمام بقيت ابجي بحيره وانه كلبي يعتصر ماعندي حيله ولا وسيله

ترجعلي محمد خلاص حب غيري وعافني يريد ينفصل عني ويكطع اخر امل لوصالنه وارتباط كلوبنه شسوي هسه انه وين انطي وجهي ليش ما

كلي بابا عن هل موضوع جان لا اجيت للدوام ولا سمعت كلامه الجارح جان انطميت بكبري وماشفته يضحك ويه غيري .. بقيت فتره بالحمام واجن

البنات يدكدكن بالباب قلقات علي مسحت دموعي وكمت للمغسله غسلت وجهي رتبت مكياجي وطلعت اكتفيت بابتسامه تعبانه مزيفه

على وجهي لمن باوعلي بقلق ورحت لمكتبي اخذت الملفات وكعدت اشتغل ومارفعت راسي بعد ولا باوعت بوجه احد لحدما حسيت رقبتي تريد

تنكسر غمضت عيوني ورفعت راسي ادلك بيهه حسيتهه ارتخت ورجعت كملت منا لخلص الدوام لميت ملفاتي وشغلاتي وطلعت اول وحده من

المكتب وبدون ماباوع بوجه محمد لو بثينه الزفته بعد.. وكفت سياره احسان كبالي صعدت وسديت الباب حيل باوعلي باستغراب وكال وهوه يقفل بالبيبان..

_خير شصاير استاذ بوز

_ماصاير وديني للبيت اريد انطمر

_يول انتي ماتستقرين يوم مريضه يوم كئيبه يوم معصبه ويوم هادئه ويوم نشيطه الله يعين كلبه الياخذج

_عساني لا تزوجت ولحد اخذني وعانه وياي

_لا بطه

_والله خليني اموت بيت اهلي وبحدي احسلي شحصلت انه من دنيتي والله الموت اشرف والماتوا ارتاحوا..

بهتت ملامحه بقلق وكال وهوه يرجع يقفل بالبيبان..

_لا تحجين هيج وشيلي كل الافكار السيئه من بالج الدنيا حلوه بس انتي ماتعرفين تعيشيهه والروح عزيزه تره وامانه حرام نضرهه ونسوي بيهه شي 

_شسوي مثلا اخر مره تكسرت وشبعت ضيم متوازيه حتى اعيدهه..

حجيت هيج حتى لا يضل قلقان وخايف علي شفته زفر براحه هز راسه بايجابيه وحرك السياره.. وصلنه للبيت ونزلت بوجهي دخلت لغرفتي ذبيت

ملابسي ولبست الدهداشه ونمت بعد ساعه من المعاناة والبجي .. للعصر كعدت على اثر كابوس جان كابس على انفاسي كمت سحبت روحي كوه

راسي موتني من البجي وصخونه سيطرت على عظامي.. دخلت للحمام اسبح بماي دافي حتى افتك من البروده والرجفه الحاوطني ..

كاسرت الماي دافي مايل للحروره صار الحمام كله بخار ذبيت دهداشتي عل تعلاكه ودخلت جوه الماي حسيت جسمي ارتخى ودفيت متجاهله قله النفس الصارت بالحمام

اخر شي حسيت بديت اختنك وجسمي يرجف كمت بسرعه لبست الدهداشه مكلوبي بالف يا ويلاه كمت مشيت للباب وانه عيوني مغوشه وراسي صعدت بي بروده وصداع رهيب وبسرعه وانه سانده ايدي عل حايط محاوله اعيد وضوح الرؤيه ماحس الا

دخت وماعانتني رجلي حتى اوكف طحت بالكاع وانه اجر نفسي كوه واصرخ بكل مابيه من حيل واحس صوتي مايطلع ..حضنت رجلي لصدري

والماي الحار بعده مستمر يصب ويبوخ المكان ..خفقان كلبي زاد عيوني غوشت ونفسي

انقطع تماما وماحسيت على شي بعد ضعت بعالم مجهول توقف الوقت عندي فتره الى ان مرت ساعات مو طويله..

فتحت عيوني لكيت نفسي بغرفه مشتركه وبجانبي مرضى هواي عرفت نفسي بغرفه الطوارئ تنهدت ورفعت ايدي سحبت الكانوله منهه و ماهمني لان

الدنيا ماتت بعيني من زمان وايقنت شمهما صار بيه مادام ماحانت ساعتي فما راح يصيرلي شي.. بقيت صافنه بالفراغ لحدما اجه الممرض ويه اهلي

حجه علي لان طلعت الكانوله من ايدي بدون اذنه وشلون طلعتهه اصلا.. هه مايدري بالكانوله صارت جزء ماتتجزء من حياتي وايامي .. 

هز راسه باسف ومسح الدم الطالع من ايدي وراح اجت نوره و امي كعدت يمي وسالتني بقلق عن حالي وشصار

عاد كتلهه انقطع نفسي من البخار الحار وتخربطت هزت راسهه باسف وحجت بعدما جرت حسره..

_صابتج عين يايمه شمالج كل فتره تتخربطين لو يصير بيج شي ليش هيج متعلعله انتي دون خوانج

_حظي يايمه حظي المصخم وكلبي المارهمت عليه راحه

_لا مو حظج يا يمه هاي عيون النسوان جا شني هينه هيه لمن تلبسين الاحمر وتطلعيلهن وهاي تكول يا بياضهه وذيج تكول يا ترافتهه 

_شسالفه هوه انه وينه جمالي يايمه وتتحسدني النسوان اشو اكو الاحلى مني يركضن علي المن

_بعين نفسج انتي مو حلوه بس بعين الناس تخبلين وياجمالج وهنه النسوان على كلشي يفطنن ويتحسدن شحال لو شافلهن وحده حلوه وبارزه بين بناتهن

_والله مادري يايمه ان جانت عين او بزازين مو مهم مادام ربي كاتبلي ساعه محد يموت بغير ساعته

_اي والله يايمه بس انتي هم من نرجع للبيت اقري المعوذات على نفسج من تطلعين ومن ترجعين حتى كل عين تريد تصيب بالقرآن تخيب

_انشاءالله امي الا صدك وين ابوي

_ابوج بالمزرعه ماكلناله تخربطتي لا يروح الزلمه يجي بسرعه ويصير بي شي بالطريق لا سمح الله 

_جا منو جابنه هناا

_خابرت لمحمد خطيبج

_لا صدك امي

_اي والله جا شبيدي ابوج بالمزرعه واخوج معزوم عرس وانتي شفتج طايحه بالحمام لا حس ولا نفس ماطلع بيدي غير اكول لنوره تتصلي على

محمد وخطيه اجه يركض الولد عليج شالج بين اديه وطار بيج للطوارئ وتالي من تطمن عليج اجه علينه جابنه الج 

_وهسه هوه هنا

_اي راح يجيبلج علاج من يمته اشو مارجع بعده

_بله روحي شوفي يمه خاف ماشايل فلوس خاف شي

_اي والله صدك شلون ماخطر بالي خل اروحن جا يمه اشوفه وانتي يمه نوره ابقي يم اختج لحدما نرجع

_حاضر يمه..

طلعت من يمنه وبقيت صافنه وافكر بي ليش اجه علي لمن اتصلت عليه امي واخذني للطوارئ ليش اهتم بيه وبعلاجي شنو خصه هوه وشله علاقه مو

يريد يطلك وينهي كلشي على شنو بعد مسوي نفسه مهتم معقوله جابني هنا بصفه انسانيه مو خوف علي او حبا بيه .. استغفرالله ربي شلون بيه

وبزماني شلون بيه وبحظي الاغبر .. جريت حسره ودمعت عيوني لمن دخل هوه وامي بيده علاكه الدوه باوعلي وكال ببرود ..

_الحمدلله على سلامتج 

_الله يسلمك ليش تعبت نفسك وجبتني لهنا جان خليتني اموت وريحت راسك ..

باوعلي بنظرات ماعرفت افسرهه وبلع ريجه بصعوبه هز راسه وخله اديه على خصره وطلع من يمي بعدما باوع لامي بحيره وهيه الثانيه اجت يمي وكالت بعتب..

_ليش حجيتي هيج ويه الولد هاي فوكات ماكسر نومته واجه يركض خايف عليج ومتلهف

_ماشفتي شلون كالب خلقته علي ويحجي من وره خشمه خلاص هوه مو يريد يطلك بعد على شنو

مسوي بيهه مهتم وماكل همي خلي يطلك ويروح يتزوج بثينه الطرمه يحب هيج شكولات هوه 

_ياا هاي شبيج عل ولد شنو يريد يطلك شنو بثينه شتحجين انتي

_علساس ماتعرفين يامي ان حضرته خابر بابا امس وكايله اريد اجي اطلك

_محمد

_اي جا منو احسان

_لا ابد يايمه ماسمعت هيج حجي واصلا ماكال هيج هوه الولد خابره ابوج علمود المزرعه يلي بجانب مزرعتهم يريد يشتريهه ولا جاب طاري الطلاك ولا كال

_اي يجوز بابا ماحجالج بس هوه كال بعضمه لسانه ان حاجه بابا عل طلاك

_بعد والله مادري يايمه يجوز محاجي وانه مادري بعد احنه نروح للبيت ونسال ابوج لمن يرجع 

_تمام انتي حاجي مالي كلب اساله واسمع جوابه

_انشاءالله بنيتي يله هسه شدي حيلج وكومي خلي نرجع للبيت قبلما يرجع ابوج ومايلكانه

_اي تمام ..

كعدت على حيلي لبستني العبايه وانه دهداشتي ناشفه على جسمي لكيتهه سندتني نوره بجهه وامي بجهه وطلعنه شفته واكف يدخن بالباب

استغربت وعصبت بزايد صاير يدخن همين بعد امه بسيطه انه اله والله لوما البيناتنه جان طفيتهه بحلكه عايزني واحد يدخن انه افتك من خيسه

مرتضى يطلعلي محمد يريد يلعب روحي منه بريحه الدخان .. مشيت للسياره صعدت وره ونوره يمي وامي بالصدر صعد هوه همين بعدما ذب

جكارته وسحك عليهه حرك السياره وانه رخيت راسي عل كشن وغمضت عيوني متجاهله خزراته الي .. عرفته ضاج من حجيت وياه بطريقه مو

حلوه مساع بس ماهمني مو هوه يريد يعوفني لازم مايهتم بكلامي شمهما حجيت .. رفعت اكتافي بحركه لا مباليه ونفضته من افكاري.. 

مسافه الطريق وصلنه ودخلنه للبيت وبابا دخل ويانه استغرب وراح سلم على محمد وسال امي وين جنه عاد امي كالتله ان ضغطي ارتفع وودتني

للطوارئ انطوني ابره بقه يعاتبني ويسال شماكله وليش ارتفع ضغطي وكتله اني اكلت مالح هواي الصبح تنهد وتشكر من محمد ركب سيارته وراح

وبابا اجه سندني ودخلنه للبيت سويه وهوه يوصيني كالعاده على نفسي وصحتي .. اخذني لغرفتي خلاني انام غطاني وطلع بعدما باسني

براسي تنهدت وصفنت بالماخذ عقلي ليش يدخن ليش كاعد يدمر صحته بهل طريقه نوب شلون يسحب نص الدخان برئته ويزفره كلش تضايقت

وانقهرت لان اعرف الزلمه من يشرب جكاره يكون مقهور وطالعه الدنيا من عينه .. ردت انام وسمعت صوت الاذان كمت توضيت وصليت وانه جسمي

بعدهه الرجفه بي دخلت امي بعدما كملت وصلاتي بيدهه صينيه العشه .. كعدت عل جربايه وكمت انه لفيت المصلايه وكعدت يمهه صارت تسوي لفات

وتنطيني اكل لحدما شبعت وحسيت الدم رجع يمشي براسي شالت الصينيه عني وراحت كمت انه غسلت وجهي وحلكي ورجعت تمددت عل جربايه

ومر يومين تقريبا على نفس الوضع ويه محمد صرنه كلما نجتمع بمكان وحدنه واحد ينتر بالثاني بس انه احجي باستفزاز وهوه يقابلني ببروده

اعصاب .. لحدما مر اسبوع وشفته ما اجه ولا مثلما كال جاب الشيخ وطلك للحظه دب امل بكلبي ولو هوه ابد مانطفى بس ساعدني هل شي على ان

اتجرأ واحاول احاجي مره ثانيه وهل مره ماسمحله ينهي النقاش الا لمن اعرف الباله شنو وشيريد بالضبط بهذا التاخير الكاعد يسوي ..

نمت بليلتهه على امل وايمان بربي قوي اني راح اكدر احل سوء التفاهم والمشكله يلي بيناتنه وراح نرجع حبايب مثل قبل واحسن.. ثاني يوم الصبح

تريكت وكملت وطلعت للشركه وانه كلبي يعتصر احس خلاص لو تطلكت فعلا من محمد وخسرته للابد بعد كلشي ينطفي بعيني والدنيا والروح تصير

رخيصه رغم اهلي يحبوني ومسانديني ورغم عندي شغلي ووظيفتي وراتبي بس كل هل امور ماتكدر تجبر كلبي يلي طاح بحبه واستنجد بي

حتى يطلع من المستنقع الجان خانكه كل السنين الفاتت .. محمد هوه سعادتي احسه ولو ابتعد وتخلى عني ماراح احب شخص ثاني بحياتي ولا

ابقى احس بكلبي مرتاح لان هوه صارلي النبض والروح لكلبي ودوه لجروحي .. اخذت نفس وزفرته بحيره لزمت كلبي ودعيت ربي يقوي ويشد عزمه

ويفتحلي ابواب السعاده ويه محمد مو ويه غيره .. انفتح باب المصعد وطلعت منه واول ماجت عيني عل حديقه وهمه على نفس وكفتهم

كل يوم يسولفون شديت قبضه ايدي بتوتر ورحت باتجاهم حتى احجي وياه بس جمدت خطواتي لمن سمعته يكلهه..

_ بثينه انتي لازم تلكين حل لزوجج مايصير تضلين هيج متعذبه وياه اذا ماعندج اهل يحمونج روحي اشتكي عليه كليلهم عن اهاناته وضربه الج ليش ساكته

_مو بيدي محمد كل الناس حوالي واكفين ضدي ولو رحت اشتكيت عليه انه يلي راح اصير بمشكله واول ما اهلي يتعاركون وياي

هاي اذا ماخلوه يحبسني ويبطلني من دوامي وهوه الشي الوحيد يلي معتمده عليه واكدر اسند روحي بي

_تردين اكعد واحجي وياه انه واشوف شنو سبب تصرفاته هاي او اخذ عشيرتي واوديله كوامه اذا تردين

_لا لا فدوا عوفك منه تره مخبل هذا لا نوب تصير مشكله ويوصلهه للدم

_افاا مايخوف جلبي

_ادري بيك والله بس محمد عوفه انه كاعد احجيلك عن همومي افضفض حتى تريحني وخنكه صدري تروح لاني امنت بيك ماتحجي لاحد مو علمود تروح تحجي وياه 

_تمام بكيفج..

رجعت بخطواتي وانه بحيره رحت كعدت يم زميلتي يلي هيه جيرانهم وسالتهه عن بثينه اذا فعلا متزوجه وصدمتني لمن كالت..

_اي حبي وقبل شهرين تقريبا طلكهه وتزوج ثانيه

_بس ليش طلكهه

_لاكيهه تراسل واحد بالبوبجي ومتعاركه وياه خله وطلكهه وهيه معروفه بمنطقتنه من زمان تحب

سوالف الصحبه واهلهه زوجوهه وهيه صغيره بسبب هل شي عبالهم راح تستقر اذا صار عدهه زلمه بس بعد ابو طبيع مايغير طبعه 

_تحجين صدك

_اي والله ياجنان المهم عوفج منهه لا نحجي باعراض الناس هسه بس هاذ السمعته سمع اذني من اختهه وعماتهه

_جا اختهه تحجي عليهه

_لا عود تحجي قصتهه النه وبنظرهه اختهه ماغلطانه وتكلي صديقهه باللعبه وتحجي وياه عادي 

_لا بطه

_اي والله المهم عفتهه بعد انه ولا تماشيت وياهن وشوفه عينج هسه حتى من تحجي وياي اعاملهه كزميله مو جيران وصديقه طفوله

_الله يبعد هيج نماذج عنه

_امين..

صفنت والتفتت عليهم يعني مطلقه وجايه تطرح زوج براس محمد وهذا الفطير مصدك ويريد يساعدهه عبالهه لو فضفضتله وحجتله معاناتهه

راح يحبهه لو يشفق عليهه ويتزوجهه ماتدري بيه اكل النار لو حبت تلامس جلده .. شديت قبضه ايدي بعصبيه وكمت للمطبخ وانه متحلفه بيهه

وافكر شلون اكشف حقيقتهه كلهه دقايق من التفكير وانه اشرب الكهوه دخل هوه باوعلي لحظه

وبعد عيونه عني واجه اخذ كوبه وكف بعد مسافه عني يسوي كهوته وانه تحمحمت وحجيت وياه بصيغه سؤال..

_اكيد بثينه تخطت الصار وياهه والصدمه

_شنو يعني

_كالت صديقتهه انهه تطلكت قبل شهرين وشفتهه هسه تطلع وتسولف وتضحك وياك كلت اكيد تخطت طلاكهه وغلطهه 

_شنو قصدج بغلطهه

_ليش كل هل ايام التوكفون تسولفون بيهه بالحديقه ماكلتلك انهه تطلكت قبل شهرين بسبب خيانتهه لزوجهه ..

بقه يباوعلي بحيره وعاكد حواجبه يتذكر كلامهه تنهد وهز راسه بايجابيه وكال ببرود وهوه يتوجه للباب يريد يطلع..

_اي كالتلي بهل شي لا يضل بالج عليهه ..

نرفزني ببروده هذا وبعده مصر يدافع عنهه ويصدك كلشي تحجي اله خليت الكوب من ايدي عل كاونتر

واجيت عليه قبلما يلزم يده الباب لزمته من ياخه الستره ودرته علي وانه احجي بعصبيه ونار صدري وجت بعيوني..

_محمد تره زودتهه صارلك اكثر من شهرين لا حجيت وياي ولا خليتني احجي تكلي اريد اطلك وماتجي تطلك 

وفوكاهه كاعد تسولف وتضحك ويه هيج نماذج زفره ومصدك كلشي تحجي الك مثل الغبي

_احترمي ونزلي ايدج

_لا ماحترم ولا انزل ايدي لانك فعلا غبي ولو ما هيج جان حاولت تعرف الحقيقه ومانجريت وره كلام بثينه ودافعت عنهه 

_مو شغلج

_تريد تخبلني انت تريد تقضي على شويه العقل الباقيه براسي عبالك تجاهلك و تصرفاتك هاي حلوه لو راح تحببني بيك

_ادري اكو غيري بكلبج على شنو احاول احببج بيه

_غيرك ههه ليش هوه غيرك لمن فكر وحاول يتقرب من حلالك كدر ونال اليريده منهه ليش هوه غيرك من دور وراد يشوف الحب بعيون حلالك كدر

يشوفه .. غيرك لو بكلبي مثلما تكول ماتلكاني هسه ملزمه بياختك وروحي محتركه عليك .. غيرك لو يهمني جان ارتميت بيناتكم وخليت الصار بي

يصير بيه بهذيج الليله .. غيرك لو احبه بعدني جان خليتك غصب عنك تطلكني ورحت ارتميت بحضنه وطلبت ياخذني حلاله

_وتالي ..

ارتخت قبضه ايدي وبهتت ملامحي من رده الجامد بعد كل هل كلام السمعه مني جان جوابه بس وتالي

يعني شنو ماهمه حركه كلبي وروحي وبحه صوتي الترجف كباله لو مامصدك كلامي بسبب اخر موقف مر بيناتنه ويه مرتضى ..لزم ايدي نزلهه عنه والتفت

فتح الباب راد يطلع واجيت لزمت الباب سديته و سحبته من ياخته ومافكرت بشي غير هدفي بهاي اللحظه وهو يا اما نطلع من هل مكان منفصلين

للابد يا اما راجعين وطبعا فكره الطلاك والانفصال جانت اخر افكاري واحتمالاتي لان ماكدر اعوفه وانه احبه وادري وحاسه بي بعده يحبني همين .. 

✋️🔥

رفعت نفسي على اطراف اصابع رجلي وطبعت شفايفي بشفايفه فتح عيوني ورفع اديه عني بصدمه بس سرعان ماغمضهن حيل ونزل اديه

لازمني من خصري ومرجعني عل باب وهوه لازك جسمه بجسمي اخذ يتفنن بالبوسه دقايق يروي اشتياقه ويذب حركه كلبه بهل بوسه حسيت نفسي انقطع وراسي جمر خليت ايدي على صدره

وحسيت بنبضات كلبه العاليه دفعته خفيف عني ابتعد خطوه وهوه صدره يصعد وينزل ومغمض عيونه وجبينه على جبيني ناخذ نفس كوه

بقيت عيوني على صدره ماكدر ارفعهن بعيونه من الخجل والحراره الصعدت براسي ..حضن وجهي بثنين اديه ورفعت عيوني اله ابتسم خفيف وكال وهوه مغمض ..

_انتظرت سنتين عبالك مو شهرين على ماخطيتي هل خطوه اتجاهي

_محمد

_جنت منتظرج تحبيني وتعترفين بهل شي جنت منتظر تجيلي وانتي روحج محتركه على فراكي والفضل لله ماخيبني  

_ليش سويت هيج بيه ليش خليتني بنارك اشتعل كل هل شهرين وماحنيت علي ولو بنظره

_لان ردتج عمر وياي مو يوم لو لحظه ندم جنه

_احبك محمد ..

فتح عيونه بتقاجئ وحسيت نفسه انقطع ثواني بقه يتامل بعيوني و تقرب باسني بيهن وهمس بعذوبيه ..

_امووووت انه بعيونج 

_بس عيوني

_وكلج من جدمج لراسج ومن كلبج لروحج واولهم شفافج..

ابتسمت ورجع على شفايفي بوس ومابتعد الا لمن اندك الباب علينه فزينه ثنينه واحنه نجر نفس كوه مامستوعبين وين احنه نسينه الدنيا ونفسنه والموجودين بره ابتعد وهوه يمسح بشفايفي مسحت الحمره من

وجهه واخذت نفس رحت سويت نفسي اسوي كهوه وجدمي كله يرجف احسه وهوه راح بجهه ثانيه اندك الباب مره ثانيه ودخلت زميلتي

يلي حجيتلهه عن خطوبتنه باوعتلنه بشك وابتسمت تحمحمت اخذت كلاص ماي وطلعت بسرعه ساده الباب وراهه

التفتت على محمد وابتسمنه بخجل تقدم واحد عل ثاني بسرعه وضعنه بحضن وعصره ضلوع روت كل اشتياقنه لبعضنه بهل شهرين وانه استنشق عطره لريتي

وتمنيت مابتعد عنه واضيع بهل حضن.. ثواني ياله ابتعد خله جبينه على جبيني ورفع ايدي التكصكص جلدهه بسجين مرتضى باسهه بحنيه وكال بغصه..

_ليش خاطرتي بروحج هل شكل وتاذيتي جنه ليش تدخلتي بمشكله غيرج

_منو كلك هيج صار

_جا غير تخبلت من شفتهه ملفوفه بالصوره كبل رحت حاجيت احسان كتله منو مسوي بمرتي هيج وكلي انج دخلتي بالنص بين بت عمج واخوهه وانجرحت ايدج 

_اي هيج صار بعد خفت على بت عمي يسوي بيهه شي ماتحملت فكره انهه تنجرح لو تنضرب بالسجين كدامي هيه اختي وروحي قبلما تصير بت عمي 

_اي بس روحج مو الج بعد لمن يصير هيج موقف فكري بيه لو صار بيج شي وين انطي وجهي وشسوي بحالي

_انشاءالله ماراح يتكرر هيج موقف بعد

_زين منو منهم ابن عمج مرتضى لو غيره

_احم اي هوه واخته تعاركوا

_ عساهه انكسرت ايده ولا جرحتج

_لا تخلي بالك وياه يولي 

_هاا جنه رجعنه ندافع

_لا مو ادافع والله بس ماحب تحجي بي وتجيب سيرته احنه مو جنه متفقين مانجيب سيرته ننساه ونطلعه من حياتنه 

_اي وهوه هيج  

_اي بعد شنو 

_تمام وهسه بس كونهه ما تاذيج ايدج

_لا بس تكرصني مرات 

_سوده علي

_اسم الله عليك عيوني انته 

_اروح فدوا لعيونج 

_ههه اكلك صدك ماكتلي شنو البينك وبين احسان مارتاحيتلكم من لما شفتكم تسالمون وميانه بيناتكم

_لااا الا الشرف يابت الناس لا تتهميني بشرفي تره عندي مره انه 

_هههه عوفك من الشقه واحجيلي شصاير 

_عوفج من الصاير شلون تسوين هيج بيه وتجمرين كلبي بالماروني والرمانات والرقبه طالعه

_هاا يا ماروني

_ولج جننه الجهنم الدزيتي صورتج لابسته الشعلتي بي الخلفني بقيت ليالي الوب عل صوره وكلساع داخل عليهه والزم روحي كوه وماجي لبيتكم اكلهن لهل زنود الست 

_هههه عوفنه من الجهنمي وزنود الست بعدين نتناقش بيهن هسه كلي شصاير بينك وبين احسان ويمته تطورت علاقتكم

_ههه اي نتناقش بعدين نقاش معدل المهم ماصاير شي بيناتنه فقط من وره ماطلبت منج نفسخ العقد بجم يوم خابرني احسان بطلب من ابوج وعزمني

بره كعدنه نسولف وحب يفهم شنو المشكله يلي بيناتنه حتى نفسخ العقد بهل طريقه وبعد فتره قصيره 

_اي بله وشنو كال 

_خلينه نطلع بالحديقه ونحجي لا الناس عبالهم كاعد نسوي شي بالمطبخ

_اووف من سوالفك شكلهه بثينه مطلعه عينك

_من اشوفج عيوني تطلع من وحدهه ماتحتاج لا بثينه ولا بتيته

_هههه..

ابتسم ومسد على خدي وطلعنه من المطبخ للحديقه كعدنه عل كراسي عدل كعدته طلع باكيت الجكاير والجداحه من جيبه وكتله قبلما يحجي..

_لحظه قبل كلشي انطيني اشو هذن 

_شنو..

اخذت الباكيت والجداحه وكمت شمرتهن من فوك على الساحه الترابيه وره الشركه ورجعت كعدت باوعلي وابتسامه استغراب على وجهه وكتله معلنه سيطرتي..

_سوالف السرسريه هاي ماتعجبني جكاير بعد ماكو 

_تضبطين 

_اي حلالي واخاف على صحته عندك مانع

_لا ابد كل مانع ماعندي اكيف لو اشوف اهتمامج بيه

_لعد خلاص هسه حلت الكعده خلينه نبدي من رحتوا للكوفي شنو حجيتو

_اي يا حبيبتي اخوج جان عباله الصوج منج او طالع منج تصرف مو حلو ولهل سبب طلبتي تفسخين العقد حسب معرفتهم فحب ان يوضح سوء التفاهم ويفتهم مني الصار

_اي 

_فكتله ان صار سوء فهم بيناتنه وانه الطلبت افسخ العقد اختك مالهه شغل سالني وحاول يعرف ليش

وشنو السبب بس ماحجيت لانج مامنه سرج يمي بس يلي صدمني لمن سالني اذا بسبب مرتضى 

_لا بربك

_اي والله انه بقيت مفهي ماعرف ارد عليه لحدما كسر الهدوء هوه وكال "مرتضى شخص مو ادمي رغم هوه صديقي ورفيقي من الطفوله بس اعرف

البي مايسمحله ان يسعد شخص ثاني هوه نرجسي واناني ويحب يعيش حياته بطول وعرض واليعجبه ياخذه خاوه وانه اختي ماريدهه تتورط

وياه باي طريقه وحتى لمن دخل على ابوي للديوان وطلبه على صفحه وحاجاه عليهه انه رفضت وماوافقت ابوي ينطيهه لمرتضى لهل سبب خله القرار بيدهه وهمزين رفضت " 

_يعني احسان ماجان قابل وانه اكول ليش متحيز اتجاه مرتضى اخر فتره مرت اثاري شاك بتصرفاته ونيته وياي

_اي والفهمته من كلامه ان شك بيج تردينه او مهددج وطالبج بفسخ الخطوبه 

_وتالي

_حاولت ابعد عنه هل شكوك وكتله مو بسبب اي شخص وانما بسبب مشكله بيناتنه حاول يفهم ويعرف السبب وكتله شي خاص بينه ماكدر احجي

بس طلبت مساعدته حتى يخليني اوضحلج سوء الفهم واخليج تتقبليني وتحبيني وهوه ماقصر وياي

جان رايد تكونين الي وترجعيلي باي طريقه لان خايف عليج من مرتضى ومن ان تنجرفين وراه 

_وهيج صرتوا تتفقون علي هاا 

_لا والله بس كلي عن اطباعج وعن طريقه حتى اوصلج بيهه وجانت الغيره والحرمان هيه أقرب

طريق لكلبج وتصدكين لو كتلج جان يدري بيج تحبيني من اولما طلبتي فسخ الخطوبه منهم 

_شلون وانه ماجنت ادري بروحي

_احيانا الانسان يضيع بهوسه افكاره ومايعرف طريق حتى يخرج منهه ويباوع لنفسه ويتمعن بيهه فيظن ان ضايع وبحيره بينما الناس تلكيهه فاهمتج

وعارفه تصرفاتج هاي وسببهه شنو فتصيرين تلتهين بمشاعرج وتخلين كلبج يصير مرئي لغيرج

_فعلا هيج لان ياما حاجتني شموخ ونصحتني شسوي وانه اتفاجئ شلون تكدر تعرف البيه وتلكالي حل اله 

_اي ياعزيزه كلبي

_زين هم كالك احسان عن اخر حادثه صارت وياي ..

بهتت ملامحه ولمعت الدمعه بعيونه رفع ايده مسد على خدي بيهه وهوه يكول..

_حسيت كلبي تكسر بكل كسره من عظامج 

_احتاجيتك يمي 

_اجيتلج بس ماشفتيني

_يمته وليش ماشفتك

_بيومهه جنت مخنوك وكلبي ياذيني طلعت تارك نقالي بالبيت ورحت اتمشى بالشوارع ضايع بتفكيري بيج منا لل١ بليل رجعت لكيته واكف باب بيتنه استغربت وخفت يكون صايرلج شي وطلع خوفي بمكانه ولمن حجاالي الصار وياج

وانج يوميه ترددين باسمي وانتي موجوعه وانتي نايمه بدون ماتحسين انهد حيلي وماشالتني رجلي كعدت على اقرب بلوكه يمي وانه دمعتي تجري لاول مره كدام بشر غير امي وانتي وقتهه حاول يهديني ويحجي وياي كتلهه شنو السبب وسوت هيج

ساعتهه كلي بحيرتج وضنيت انه السبب بالصار وياج لان خليت ضميرج يانبج علي وتحيرين بمشاعري قررت اتركج براحتج وابتعد بس احناجيت اشوفج ساعتهه كتله اخذني اشوفهه بس ساعه تالي اروح وماوريهه وجهي بعد 

_وتالي

_تالي حجه وياي وحاول يفهمني انج تحبيني بس ماحاسه على روحج وان انتحارج جان بسبب بعدي عنج ساعتهه احتاريت انه هم بين الاصدك كلامه وبين الاجذبه واكول يجوز يحجي هيج حتى

يخلص اخته من مرتضى المهم خابر على ابوج وكله بطلبي بشوفتج وطبعا ابوج مامانع بالعكس كيف وتامل برجعتنه سويه 

ولمن رحت لبيتكم ودخلت لغرفتج مادري شصار بيه روحي صارت تلوب عليج تمنيت احضنج تمنيت اخذ الوجع عنج كلبي صار ينعصر بكل ونه وجع طلعت منج 

_ليش ماتذكر انك اجيتلي

_جنتي بيومهه موجوعه وضاربينج ابره مسكن ونايمه ماتدرين بشي كعدت يمج نص ساعه

تلمست وجناتج البارده بوست اديج المتجرحه بست وطيبت كل كسر بيج من ايدج لصدرج لحد كف رجلج المكسور ساعتهه تمنيت انام ولو دقايق على صدرج وادفي ضلوعي بيج بس خفت الجم كسرج وتكعدين بقيت صافن اتامل بيج لعبت بشعرج تاملت طولج وانتي ماتدرين بيه 

_ حسيت بيك حسيت بوجودك يمي ولمحتك كبالي تطيب جروحي بس جان عبالي حلم بقيت نايمه بامل مايخلص هل حلم ماجنتي ادري بيك موجود صدك يمي ليش ماكعدتني محمد ليش خليتني نايمه وانه جنت بحاجتك بيومهه جنت رايده حضنك احتاجيت كلماتك الدافيه تمحي بروده عظامي ليش محم...

غصيت باسمه ونزلت دموعي قهر فكره ان جان موجود يمي وانه بامس الحاجه اله وماكدرت اشوفه او احضى بحضنه تقهرني وتعصر كلبي ..

كام على حيله سحبني اله على جهه الحايط حتى لا يشوفه احد وحضني لصدره بقيت دافنه وجهي بصدره واستنشق عطره ودموعي تجري على خدي..

رفعت راسي واجت عينه بعيني بقيت اتامل بجمالهن واحس صار سنين مامتمعنه بيهن وشوق بداخلي عميق لعمق نظراتهن مسح دموعي بثنين

اديه عن خدي و تقرب طبع بوسه خفيفه على شفايفي فزينه على صوت بثينه لمن شهكت وصاحت بصوت عالي ....

الفصل التاسع والثلاثون من هنا 

شكرا لزيارتكم عالم روايات سكيرهوم