رواية حين تتغير الاقدار الفصل الثالث بقلم سناء الهموندي
يرحلون ثم تصمت الشفاه عن الكلام ولا تتحدث سوى نبضات،،قلب تقطر،، ❤ وجعا، وألما
جوريه: مرت على وفات امي شهرين واني افتقدهه بكل شي حواليه حته حيطان البيت احسهه حزنت ويانه كاعده وصافنه على تختهه وأذكر شلون ماتت وانا كل ضني نايمه حساس بشع احسه جوايه طفله وفقدت حنان الام كلماتهن ترن بأذني شلون يكولن ملتهيه بالاكل وامهه تموت لو واحده تكول خطيه ماتت امهه منو الهم ذول اليتامه كلمه يتامه جنه نسمعهه بس منحس بيهه لان امي الله يرحمهه جانت النه اب وام وماخلتنه بعوز صارت خيمه ولمتنه من البرد والحر وحمتنه من كلشي عاشت حياتهه واحنه نحسهه مكسوره جنح متكدر اطير متكدر تكون حره وتعيش مثل الخلك عاشت بغصه بداخلهه واني مدركت هل شي اله بعد فتره من الزمن .
رجعنه وره أربعين امي لبيتنه واول ايام كضيناهه ونين انا وضويه مهدي جان يطلع للزرع ويرجع يم بيت جدي ويه ولد عمي لو بيده حته يبات بس يدري عمامي مقبلون شون يعوفنه وحنه وحيدنه بلبيت يرجع تالي الليل يلف رأسه وينام ضويه من بعد وفات امي صارتلي ام قايمه بواجبي واجب البيت .
ضويه :كل يوم صرت انضف واطبخ واسولف قصص الانبياء لجوريه مثل مجانت امي سوي حته لا تحس بغياب امي اواسيهه وانا اريدلي من يطبطب عليه ويواسيني بيت جدي بين يوم ويوم نروح الهم نكعد يم جده شويه ومن نسمع حجي يغث نرجع للبيت عبن مالي حيل اجادل واحجي الجنت احجي علمودهه راحت وعافتنه .
جوريه: ضويه أنا ضايجه ومخنوكه امشينه شوي يم جده .
ضويه :شبيج يبعد اختج محتاجه شي ليش مخنوكه .
جوريه: طكيتهه بجيه ضويه أنا مشتاقه لامي هيه ليش عافتنه والله أنا كل يوم بليل اذكرهه وابجي .
ضويه: بجيت لبجي جوريه شبيدي يجوري هذا أمر الله لا بيدنه ولا بيدهه امي تعذبت وبحياتهه ونشلع كلبهه راحت يم ابوي ترتاح جوري شو باعيني انتي مو تحبين امي .
جوري : أنا روحي بامي والله.
ضويه :لعد قريلهه فاتحه ودعيلهه وصليلهه ركعتين الله يرحمه هيه من شوفنه مرتاحين ترتاح .
جوريه :يعني اذا اصلي وادعيلهه تسمعني.
ضويه : جا شون ماتذكرين هيه جانت صلي هواي ومن سالناهه كالت اصلي للموتى واحجي وياهم بلدعاء معناته هيه هم تسمعنه اذا حاجيناهه.
جوريه : بست ضويه وكلتلهه زين لعد هاي هيه بس انتي لا تعوفيني مثل امي .
ضويه :وانا شعندي غيرج حبيبه مكابلتج وكاعده ياله هسه امشينه لبيت جدي نروح شويه يم جده وعمه نبعه هم تجي .
جوري:رحنه لبيت جدي وجانن عماتي جايات يم جده يشوفنهه ونسوان عمومتي يشتغلن بتنور الطين متفلش وكاعدات يبنن غيره صاحتني مرت عمي :تعالي ولج جوريه روحي جيبيلي نفيش خل اعجنه ويه الطين البخ بي التنور .
جوري :عمه اخافن اروح للكاع وحيدي خلي حسيون يروح يو اي واحد
مرت عمي: وشكو تخافين قابل راح ياكلوج .
ضويه : عمه ماكدر اخليهه تروح للكاع وحيدهه خلي حسيون لو صبيح .
مرت عمي :يمه منجن وحدتجن مو السان اكلتني اكل وين دازتهه قابل أنا تهي بهي .
صاحتنه عمتي سعديه طبينه كالت شبيهه المصكوعه وياجن .
جوريه :مابيهه عمه اجت عمه نبعه هم كالت شمالهه ام عطوب وياجن
ضويه: تريد دز جوريه وانا كتلهه ماخليهه عبن اخافن عليهه
نبعه: عفيه بعد عمتج عينج علئ اخيتج هاي خوافه مو مثلج .
ضويه : يا خلفله عليج عمه جا أنا وكحه.
سعديه : هههههه انزول عليج موش هيج تغصد عمتج حبيبه.
نبعه: شمالج حبيبه اتقشمر وياج تعاي يم امي تنده عليجن.
جوريه : كعدنه يم جده بوستنه ونعت شويه مثل كل مره وحجت .
ام صالح :شونجن جده .
ضويه وجوريه :بخير جده الحمدلله .
ام صالح: يمه ضويه ليش ماجيبين اختج وتجن تعيشن يمنه .
ضويه :جده بيت ابوي المن عايفي جده بيتنه متعودين عليه .
جوريه :جده أنا ماريد اعوف مكان امي .
ام صالح :براحتجن يجده أنا علمودجن كلت كدام عينه اامن الجن.
ضويه ماتقصرين جده .
عمتي سعديه :حصنتنه وبجت واحنه بجينه وياهه وجده جده كامت تنعي .طب مهدي .
مهدي :ها انتن هنا وانا رحت للبيت ومالكيتجن شعدجن .
ضويه :جينه يم جده شويه .
مهدي :خوش ابقن بليل نرجع سوه.
بقينه بيت جدي والعصر كلش اجو بيت عمي ابو صادق عمي ابو صادق عنده صادق وفرقد و فضه .
جتي فضه كعدت يمنه وتسولف على بيت جدهه بغداد شون عايشين وانا وجوري ننسمع بتمعن . لمحت صادق يباوع بتجاهنه بس انا وهمت نفسي كلت يجوز متوهمه واشوفه يطب ويطلع يباوعلي خجلت كلش وكلت أنا رايحه جوه جوري .
طبيت يم جده وعماتي وحجت مرت عمي .
ام صادق : شونج يمه ضويه شخبارج .
ضويه :الحمدلله عمه بخير .
ام صادق : دومج نشالله بخير شوفيهه حجيه جنهه ورده مفتحه أنا من هسه اكلكم هاي حصه صادق لاتنسون أنا طالبتهه من كبل.
ضويه: خجلت كلش ونزلت راسي .
عماتي حجن وين نلكه مثل صادق وجده فرحت وراهه اجه مهدي ورجعنه للبيت وهيج مشت الايام والأشهر والسنين.ومرت ٣اسنين أو أكثر على وفات امي مهدي زوج من عمام ابوي بيغير ديره وبعيد علينه عبن ابن عم ابوي عنده بنات خير من الله شاف مهدي سبع شاله وحيده من بناته وطاهه اله بس راح عاش بديرتهم عبن يشتغل ويه نسابته عدهم كيعان وحلال وصار كل ٦اشهر مره بجينه صارله سنه تزوج ومرته حامل اخذهه هوه مهدي يمنه ومحاسين بي مو هلمره بغير محافظه كبرت جوريه وانا كبرت وبينت عندي معالم الانوثه وانا اخجل وماعرف شلون اتصرف عماتي ملتهيات بعيشتهن واستحي حته اكلهن عله حاجه او اطلب شغله حته بوكت البلغت كعدت ابجي وابجي تالي متحملت دزيت عله عمتي ومن شافتني نقهرت وعلمتني وغسلتني وكالت يمه انتي كبرتي بعد صرتي مره وهلشي يصير عد كل النسوان كل شهر خجلت منهه وغيرت هواي شغلات كمت بيه وما بيه البس وسيع حته لا يبين جسمي وحجابي ملتزمه بي من عهد امي وحته جوريه حجاب وصلاتنه بوكتهه.
اشوف صادق كل مره ينضرلي بنضرات ماعرف افسرهه علطول يراقب كل حركه مني ودايما يجي يسأل علينه ويشوفنه شمحتاجين بيتنه من ضمن بستان بيت جدي بستان مسيج ومابي غير بس بيوت عمامي وعماتي يعني المراقب بس صاير بصف بيت عمي صادق وعمي الله ينطي ماعافنه من موتت ابوي وادئما يلمحلي أنا لصادق لحد ما اجه اليوم الحاجاني عمي .
ابو صادق :عمي ضويه يبعد عمج تعرفين انتي واختج حاسبجن حساب فضه احبجن عبن تسون كل البنات ادب واخلاق وجمال سبحان الخالقجن .
ضويه: تسلم عمي
ابو صادق: ضويه تعرفين أنا اليوم جاييج خصوص احجي وياج بموضوع واريدنج ماترديني
ضويه:كول عمي تامر امر
ابو صادق :بنيتي أنا جيت اكلج صادق ابني مشه عليج وطلبج مني وأنا كتله خير مختاريت زينه البنات ضويه
ضويه :بداخلي طرت من الفرح صادق كل بنات السلف يتمننه ادب وجمال ومثقف صادق اكبر مني ب٦سنوات عمره ١٩يدرس همه بيت عمي ابو صادق مثقفين يحبون التعليم وعكس باقي عمامي كل همهم شغل وزرع وحلال مفرقد يدرس بيت جده بغداد وحته فضه تدرس بس ماعرف ياصف أنا كلت وين الكي مثل بيت عمي بس انا بالي كله بجوريه شلون بيهه جوريه كلش فقيره وصعب اعوفنهه
ضويه : عمي انا وين الكه احسن منكم بس عمي كلي جوريه ماكدر اعوفنهه هاي متعلقه بيه وتخاف بيوم اعوفهه.
ابو صادق:وين نعوفهه حبيبه ناخذهه يم امي أنا حاجيت الحجيه وكالت تبقى يمي داريني وداريهه.
ضويه: أنا فكرت بيني وبين نفسي هاي جوري اذا رحنه ونسوان عمي لو احد حجه حجايه لو غثونه بشي ساعه متتحمل حجيهم ونرجع للبيت شلون تتحمل تعيش وياهم ضليت بحيره ومر يوم وكعدت الفجر صليت الصبح وصليت استخاره وكلت امري لربي وكعدتهه تعوفين من ردت فعلهه تعشينه ونمنه والفجر كل عاده تصلي وتريكنه ومر اليوم بدون شي جديد العصر عجنت جوريه وانا خبزت للعشه خلصت وجيت طبيت للهول وأشوف جوريه تفلس تمر تسوي مدكوكه ودكه بالهاون (طاحونه )ثواب على روح امي وابوي
ضويه :ها جوري كملتيهن إذا كملتي نطيني اودي لبيت عمي ونتي اخذي الحبوبتي هيه توزعهن ويه الروبه قبل ليتعشون تدرين بحبوبه تتعشه من وكت طلعت البيت عمي ابو صادق لكيته ماد الخوص وعليه تربه وسبحه ومتوجه للصلاة .
ابو صادق:هلا بضاويه هلا يبعد ابوج
زينب:خليت الروبه والحلاوه بلكاع جانت الشمس توهه مغوربه .
ابو صادق: عمي ضويه تهيري الخميس الجاي نزفج لصادق عمتج ام صادق مجهزتلج نيشان والبارحه بليل جديتج دزت عليه وكالت انج قابله وحتى الحجره مال صادق هم جاهزه يبويه خلنه نفض سالفتكم ليش نطول بيهه ويه هلحجي طلع صادق للطارمه واكف ويباوع من بعيد ويبتسم انا مدري شصار بيه أطرافي بردت جاوبت عمي وجوريه شلون اخليهه وحدهه بعدني ممحاجيتهه.
ابو صادق:بويه جوريه امي كالت بعيوني وانتي ياعمي شوفي حياتج وهيه هم كله سنه سنتين وهم تزوج .
ضويه :براحتك عمي انا اترخص طلعت وطلع ويه طلعتي صادق وهمسلي انتضري اوصلج أنا عيوني منرفعت من الكاع مشيت ويا وهوه يحاجيني بهدوء ضويه انتي قابله بيه سكتت استحي اجاوبه كال أنا أريد اسمعهه منج باوعتله وبتسمت هوه ضحك وكال هذا هو يبوي اخذت الجواب وصلني وراح وانا طبيت جني مريضه مدري شصارلي من الخجل من الخوف من شنو ماعرف
هلسبوع جهزت نفسي عمتي خيطتلي ثوبين ستن وردي واحمر وثوبين مشجر وثوب العرس ابيض وبيت عمي جابولي كردانه وحجل وملاوي ثنين ومحبس انا طرت بيهن طير وخطيه عمتي حته الجوريه خيطت ثوب اصفر عكس ويه شكارهه صارت مثل العسل وسولي زفه بسيطه من بيت جدي لبيت عمي أنا كل فكري بجوريه اخافن عليهه من الحسد لنهه تشع من الجمال كاعده وارتل بهدوء ايات قرانيه الحافضتهن ونسوان تصفك ويكولن كولات حلوه بس محفضت منهن شي هههه ( عرس قبل مو مثل هسه قبل كلش بسطاء)
وانا كاعده جتي مرت عمي ام صادق وهمستلي لا تشيلين هم جوري بعد طلبهه عم ابوج ابو محمد لابنه محمد وعمامج واخوج قابلين هسه اجه فرقد وكالي .
ابو صادق :كاعدين ويه المعازيم بلعرس اخوتي وأولادهم ولد عمامي واحفادهم كلهه جاييين وملتمين يباركون لصادق كاعد انا بصف ابو تحسين وأبو محمد وحجه ابو محمد.
ابو محمد :يا جماعة الخير مادامكم ملتمين بهل مناسبه الطيبه أنا حاب اطلب ايد المحروسه بنت المرحوم صالح الصغيره لابني محمد .
محمد : لتفتت لابوي بصدمه
محمد :أنا محمد عمري ٢٤سنه متزوج صار سبع سنين وماعندي خلفه متزوج بنت عمي ماعرف الصوج منين بس انا ذابهه على الله بيوم عزمنه ابن عم ابوي ابو صادق على عرس ابنه ورحنه نادي الواجب ونحضر الزفه. ابوي فاچاني بطلبه ونقهرت بداخلي شلون ابوي يرضاهه عليه أخذ بنت طفله واكسر بختهه أنا شايف بنت المرحوم صالح صغيره سكتت وماكدرت أعارض واكسر حجايته .
ابو صادق : كبع وخذ ابو محمد انا وين الكي احسن منكم اامن المحروسه يمهم مايكون خاطرك اله طيب .
ابو محمد : ماتقصر ابو صادق انا الي شرف أخذ وحده من بنات صالح شرايك يمهدي اشوفنك سكتت .
مهدي : لا يعمي البت بتكم بس انا سكتت عبن عمي جاوب مكاني.
ابو محمد ؛ ونعم منكم
ضويه :من سمعت طالبين جوري كلبي برد شويه وامنت أقلها بيت رجلهه وأمن حياتهه ومحمد أنا اعرفنه دائما يسولفون بي ولد عمي خوش ولد وأخو خيته وكلش محترم بس هوه مزوج أنا عود اسال عمتي عليه وأشوفن شنهي الصار .صبوا عشه وعمتي ام صادق كالت كومي يمه نفوتج لحجرتج فوتنوني عمتي ام صادق واختهه وانا رجلي ترجف مثل السعفه خايفه واماعرف شي كعدني وفهمني عماتي السالفه وكاللي لا تخافين وانا راد يغمه عليه من الخوف شوي وسمعنه هوسات الزلم دل على زفتهم لصادق طلعن وعافني وحدي .
صادق :زفوني ربعي وانا فرحان واخيرا اخذت زهرتي طبيت لحجرتي وشفت ضويه كاعده على تخت وعلى جتفهه عبايه ابوي وراسهه بلكاع تقدمت لزمت ايدهه وكومتهه بستهه براسهه اطمنهه وأحاول اتعامل وياهه بهدوء أنا هسه زوجج لاتستحين مني انا وياج ستر وغطه اضمج بكلبي واخليج على راسي ان سمعتي كلامي وحسبتيلي حساب راح اخليج اميره بيتي أنا ما حب المره التعلي حسهه وماتحترم طول مانا موجود اخذلج حقج من حلك السبع أذا بيوم أحد اذاج وماخلي أحد يمسج وانتي بالمقابل اريد منج الاحترام وانا اعرفج ونعم منج صلاتج وصيامج واخلاقج ولكل يحلف براسجن من صغرجن يوم عن يوم تكبرين بعيني أكثر وهسه اخذي راحتج يالحبيبه نصليلنه ركعتين نفتح بيهه باب حياتنه ونشالله ربنا ينورنا للطريق الصحيح .
ضويه :هوه يحجي وانا بس اهز براسي اخجل حته اجاوب راح صادق توضه واجه وانا متوضيه من قبل وكفت ورا وصلينه وراهه جابوا العشه كعدنه اكلنه . كملنه شلت الصينيه مقبل اطلعهه هوه خذاهه واجه حجه وياي بهدوء كالي.
صادق: تعالي كعدي يمي خلني اسولفلج شكد جنت هاويج.
ضويه: كعدت يمه وانا ترجف.
صادق : ليش ترجفين يا بعد هلي لو تعرفين شكد احبنج جان مارجفتي هلرجيف.
ضويه : بده يتقرب مني بهدوءوووو................... فضت سالفتنه كعدنه الصبح باركولنا وتريكنه ويه بيت عمي شويه وحجه عمي بموضوع جوريه .
ابو صادق:عمي ضويه تعرفين محمد متقدم لجوريه واخوج وعمامج ماعدهم مانع أنا جيت اكلج حته انتي تحاجينهه .
ضويه:خوش عمي انت تامر بس عمي جوريه صغيره ومحمد مو مزوج .
ام صادق :يمه زنوبه محمد صارله ٧سنين مزوج وماعنده خلفه وانتي تعرفين كلهه بلديره تأخذ ثنين وتلاثه يمه الشرع محلل هلشي ومرته كالتله روح زوج ممعارضه .
ضويه :فرحت كتله عمي انا اكيف أقلها اامن حياتهه وصدك مر سبوع و حاجيت جوريه باوعتلي وسكتت هنوب كالت
جوريه : ضويه يعني اعرس مثلج واروحن عد زوجي .
ضويه :اي ويصير يحبج ويداريج مثلي انا شوفي صادق شلون شريد يسويلي ومداريني .
جوريه :زين هوه مو متزوج أنا اخاف شلون خاف مرته ماراضيه .
ضويه :لا تخافين هوه كايل اذا ازوج اكعدهه بحدهه وحته مرته هم كايلتله ازوج بس لا جيبهه للبيت كبالي يعني بيتج وحيدج .
جوريه :بكيفكم أنا ماعرف اذا عمامي قابلين هاي هيه انتم بكيفكم بعد .
ضويه: من عمامي ردو موفقه وراهه بيومين جتي أم محمد ومرته وخواته أمه ومرته مرتاحيت الهن عبن أمه مبينه كويه ونضرتهه تخوزر ومرته تباوع ومعاجبهه شي كالت هيه وينهه العروس شو ماشفناهه.
ضويه : مرت محمد شاهد الله الجمال الشايلته مو طبيعي عيون بلون السمه وبيضه مثل الشحم تطلع بل٢٠من عمرهه يعني ماتتعيب بس هاي عاداتنا الزلمه يأخذ ثنين وتلاثه خصوص اذا ماخلفت لو جانت خلفتهه بس بنات عمتي سعديه راحت جابت جوريه طلعت خجلانه وخايفه خواته صلن علنبي أمه بعدهه معاجبهه ومرته مثل النصدمت كالت اااااا هااااا هاي طفله بعدهي صغيره.
عمتي : كلتلهه كلنه بعمرهه اخذنه تكبر على ايده (ذاك الوكت البنيه 11او12سنه هاي تعتبر حق زواج ).
ضويه : خوات محمد سألني على عمرهه وكتلهم ١١سنه أنا اكبر منهه بسنتين عمري ١٣ .
ام كاطع اخت محمد: زين هيه تعرف تطبخ تخبز شلون دبرهه وحدهه وهيه صغيره .
عمتي ام صادق : حبيبه احنه بناتنه من صغار نعلمهن وكلشي يعرفن وجوريه وين اكو منهه صلاة صيام ومره معدله كلشي تعرف تسوي .
ام محمد : خوش خيه ونعم منكم احنا لو ما الخلفه ما نزوجه عبن مرته بت عمه وتسوه الف مره جمال ونداره بس احنه نريد ولد يحمل اسم محمد.
ضويه :عيوني صارن بكصتي شو أمه مدري شلون تحجي اباوع على جوري مثلي مصدومه مرت عمي سكتت حجت جده .
ام صالح: وحنه هم جوريه الف من يتمناهه احنه لو مانعز ابو محمد ماننطيهه عبن ولد عمهه رايديهه بس ابو محمد طلبهه كدام العشيره وحنه مانرده ومحمد الله يستر عليه شاب ونعمه الشباب اخو خيته وسبع نشالله يخاف الله بهليتيمه ويراعيهه عبنهه فقيره .
ضويه : سكتت ام محمد وراهه طلعن وثاني يوم سوو كعده عمامي واهل محمد جويه طلبو جوريه وفضوهه وكطعو حقهه سيد .
جوريه : راحو أهل محمد بعد متفقو سبوعين وياخذوني وانا جده كعدت تحاجيني وتعلمني شلون اتصرف وياهم ويه زوجي وضويه هم حجت ويايه شويه كالتلي شيحجن لا تردين انتي تعكسين تربيتنه هناك اريدن الكل يكول ونعم التربيه شويه وصادق اجه عليهه واخذهه حبوبتي خلت عمتي تخيطلي دشداشتين وجابتلي شيله جديده وانا فرحت بيهن كلش....مر سبوع وجوي جابوا خوات محمد نيشان ثوبين وكلاده ام السبحه وتراجي ومحبس وانا عبالك عندي عيد شوفتهن الضويه خطيه باستني براسي وكالتلي الف عافيه يبعد اختج انتي ذهب دير بالج على روحج وعلى زوجج وهوه يجيبلج كلشي تتمني .
مر سبوع لاخ واجه يوم زفتي جانت كلش بسيطه الزفه لبست ثوب ابيض منفوش وحجاب ابيض وضويه حطتلي كحل عرب وهاي اول نوبه احط عيوني صارن يخوفن احسهن كبرن أكثر وبرزن وحطتلي عمبر وحنت ايدي وتقره عليه آيات وتصلي على محمد وال محمد.اجو أهل محمد هوسوا. وخواته كامن يدبجن (رقص جنوبي) مرته مشفتهه اجه عمي ومهدي الماشفته غير بس بعرس ضويه وعرسي وسلموني اله عمي لبسني صايته وغركت بيهه كد ماجبيره خلاهه على راسي ورحنه لبيتنه مبني من طين وخوص بس مرتب وحلو بلنسبه اليه جنه بس بعيد صاير بطرف البستان بعيد عن أهله وبيت جدي طبينه وطبن بس خواته وعماتي وضويه هوه راح ويه الزلم العرس بيت اهله وحنه هنا ركصن وهوسن صار الغروب أخته كالت انعوفج ترتاحين جتي وحده من بنات عم محمد جايبه العشه وكالت جده تكول خله تتعشه عبن محمد يتعشه ويه الزلم ونسوان راحن كلهن بيت اهل محمد عل عشه كعدت وحده من خواته ومرت عمي ام صادق يمي وضويه ماعافتني وعمتي سعديه هم بقت وياهن تعشن وتعشيت وياهن وراهه إذن كمت غسلت وتوضيت ومرت عمي كالت احنه نروح يمه راحت هيه وعمتي سعديه وضويه .
وضويه: بدموع ديربالج على نفسج انتي كدهه اريدج ترفعين راس امي وابوي وهم بكبرهم باستني وطلعو.
خلصت صلاة وأحس شخص اتحم حم طلعت اباوع شفته محمد استحيت ودنجت كال.
محمد :اخذي راحتج بويه البيت بيتج أنا بس اذا تكدرين جيبيلي فراش انامن هنا عبن تعبان كلش رحت جبت وجيت فرشت كال كون تخافين تنامين وحدج .
فاطمه : لا لا عادي انا متعلمه انت متتعشه .جاوبني لا يأبه تعشيت ويه الربع وخله رأسه ونام .
محمد : احجي بداخلي وره مراحت جوريه ياربي هاي طفله اخاف عليهه حته من نضراتي اخاف اتقربلهه واذيهه احسن شي اخليهه تكبر وتفهم بس كون الصبر من ربي لان أنا بديت أضعف كدامهه سبحان الخالقهه تكول ملاك ويمشي نشالله اراعي الله بيهه وماخلي أحد ياذيهه أنا هلطفله خشت كلبي من يوم كطعت حقهه نعلت الشيطان وكمت صليت ركعتين ودعيت الله ينطيني الصبر واعوضهه عن اهلهه وعن كلشي خلصت ورجعت حطيت راسي ونمت .
جوريه : كعدت قبل الأذان الفجر كعدت ادعي وصلي لحد ما أذن صليت وكعدت محمد للصلاة كعد صبح عليه وصلى وطلع أنا خليت القوري علنار بس شفته طلع ستحيت اسالنه وين رايح كلت انضف البيت نضفت وكملت الجوه وتوني اريد اكنس الحوش عبن من طين وطب محمد جان الصبح توه طالع الشمس بعدهه ماطالعه بس اكو ضوه خفيف طب وصفن عليه شايل بيده صينيه كيمر ودبه حليب همس بهدوء اخذيهن بويه وحضري ريوك .اخذتهن منه وهوه طب جوه من اوكف كباله يباوع على كلشي اله عليه ميباوع وانا هم استحي اباوعله حضرت الجاي والكيمر جان جايب ويا دبس وخبز وحليب من أهله خواته هنه يسون كلشي صبيت وكعدنه ناكل سوه وهوه كلساع يشيل عينه يباوعلي ويرجع يأكل كال .
محمد:أنا راح اضل بليل عندج وبلنهار يم اهلي تعرفين مرتي هم الهه حق ولازم اعدل بينجن وانا ماكدر اعوفج بليل وحدج لهذا راح اعوض النهار يم اهلي وانتي ديربالج على نفسج وابد لا طلعين معليج بشي أنا كلشي اجيبلج .
جوريه : تسلم ماتقصر بس اريد سنارتي بيت جدي عفتهه اكضي بيهه فراغي احوكن بيهه .
محمد: تامرين أمر أنا اجيبلج غيرهه كملنه ريوك وهوه طب سبح وطلع كالي اي احد يسالج على شي يخصنه كليلهم مايرضه احجي هزيت راسي .وطلع وطلعت ورا بلطارمه دنك عليه بأس راسي وكال في امان الله وطلع .
مرت الايام هيج وانا امكضيه فراغي بلحياكه ومرات يأخذني بيت اهلهه بس أمه ومرته يضلن يسمعني حجي وانا ماتحمل وهوه يشوفني دمعتي بعيني يرجعني للبيت .
محمد : شبيهه عيون غزالتي تلمع لا دمعين اروحلج فدوه تدرين بيه ماتحمل اشوفنج مغثوثه .
جوريه : لاله مابيه يمكن تراب طب بعيني.
محمد : لا يبعد روحي أنا اعرفن امي تغثج بحجيهه وداعتج حاجيتهه وعاتبتهه وكالت بعد ماعليه بيهه هنا مر على زواجنه ٦اشهر ومحمد تغير حجيه وتصرفاته كلشي ختلف حته أنا بديت احجي مثله أحسن تعلمت عليه وعلى حجيه الحلو .
محمد :. جوري
فاطمه: كولي يبعد جوريه وديرتهه .
محمد اخخخ اخخخ يا جوري تعبتيني شوكت تكبرين واشتم وردتي تدرين اخاف عليج من نفسي أنا كوه كاض نفسي منج
جوريه : برائه ليش أنا شسويت .....
