رواية الشيخ عرب والمسحورة الفصل الرابع
وفات أسبوع وغادة رفضت رفض قاطع أي تعامل مع عرب ومفكرة إنه مشعوذ ومقاطعة أمها من ساعة ما عرفت اللي عملته وفي نفس الوقت كان خالد أعجب جداً بغادة وغادة حست إنها منجذبة له ولكلامه لكن رفضت الفكرة من بدايتها ودلوقتي في مكتب خالد غادة دخلت وهي بتقول
غادة
حضرتك طلبتني يا فندم
خالد شاور لها تقعد وهو مبتسم
خالد
ولو ما كنتش طلبتك كنتي هتيجي من رأيك؟ اتفضلي اقعدي في موضوع مهم محتاجك فيه
غادة بصت له بقلق وقعدت
غادة
خير يا فندم أنا حصل مني حاجة ضايقت حضرتك.
خالد
إنتي حصل منك حاجات جننتني مش بس ضايقتني على العموم إيه رأيك نخرج نشرب فنجان قهوة مع بعض النهاردة؟
غادة
بعتذر منك يا فندم بس سابق وقولت ما بخرجش وما بشربش قهوة
خالد بابتسامة
طيب إيه رأيك نشرب شاربات.
غادة باستغراب
مش فاهمة
خالد
توافقي تتجوزيني يا غادة؟ بجد أنا معجب بيكي أوي عمري ما واحدة جذبتني زيك وبجد حاسس إنك الإنسانة اللي أنا مستعد أستقر وأكمل باقي حياتي معاها
غادة اتوترت
حضرتك أنا ما تنفعش صدقني حضرتك تستاهل الأفضل مني
خالد بهدوء
أفهم من كدا إنك رفضتيني؟
غادة ردت بسرعة
غادة
لا والله بس
سكتت فجأة خالد ابتسم
خالد
طيب بصي أنا مش بقولك نتجوز من الصبح أكيد في فترة خطوة هنعرف بعض أكتر أنا عارف إن معرفتنا ببعض قصيرة وممكن ده السبب اللي مخوفك
غادة بدموع
إنت مش فاهم حاجة يا خالد أنا واحدة اتجوزت مرتين ومطلقة عروسة ولسه آنسة
خالد بصدمة
اتجوزتي مرتين ومطلقة ولسه آنسة إزاي يعني مش فاهم؟ معقولة القمر ده يتجوز مرتين ويطلق؟
غادة اتضايقت من كلامه لما حست إنه بيستهزأ بيها قامت وهي بتقول
غادة
أيوه اتجوزت مرتين واتطلقت عن إذنك
خالد قام بسرعة وجري وراها وهو بيقول
خالد
غادة استني مش قصدي أزعلك والله حقك عليا
مسكها من دراعها وهو بيقول برجاء
خالد
والله آسف ما قصدي أضايقك بس اتفاجئت مش أكتر صدقيني
غادة بدموع
مش هينفع نتجوز يا خالد صدقني
خالد
طيب فهميني السبب أنا والله شاريكي بكنوز الدنيا ومش عندي مشكلة حتى لو متجوزة ألف مرة المهم إنك آنسة
غادة بدموع
ما هي المشكلة إني لسه آنسة يا خالد لو سمحت شيلني من دماغك أنا ما ينفعش ليك ولا لغيرك صدقني
خلصت كلامها وسبته وخرجت وفضل خالد واقف مش قادر يفهم قصدها إيه…
ــــــــــــــــــــــــــــــــــــــــــــــــــــــــ
خرجت غادة وهي منهارة في العياط وحاسة بخنقة ومش قادرة تتنفس خدت بعضها وجريت على بره الشركة في نفس الوقت كان عرب داخل لخالد وهو بيتكلم في الموبايل
عرب
يا ابني اهدي أنا داخلك أهو
وفجأة ما حسش غير وهو وغادة خبطوا في بعض ودماغهم اتخبطت في بعض
غادة
ما تحاسب يا حمار إنت
عرب بغيظ
أنا ولا إنتي دي تاني مرة على فكرة
غادة كانت حاطة إيدها على وشها ومش كانت شايفة بصت له بغضب
غادة
هو إنت تاني إنت بترقبني ولا إيه يا جدع إنت؟
عرب
أعوذ بالله من شر ما خلق وأنا أراقب وأتجسس على حياة الناس ليه؟
غادة
لا حوش اللي زيك يعرف ربنا يعني
عرب
كفاية إنك عارفة علشان كدا بتتكلمي في نوايا الناس وكأنك شايفة اللي في قلبهم ثم إنتي بصفتك إيه واقفة تتكلمي معايا أصلاً وكنتي مين ولا تعرفي عني إيه علشان تحكمي على اللي في قلبي أنا كنت ناوي خير مع واحدة الظاهر ما تعرفش شكله عن إذنك
عرب خلص كلامه سابها ودخل وهو متضايق من كلامها وحكمها عليه من غير أي سابق معرفة وغادة حست إنها زودتها دخلت وراه علشان تعتذر منه أول ما رجعت الشركة لمحته داخل مكتب خالد
غادة
يا ربي على لساني اللي موديني في داهية ده أنا عملت زي البلعة اللي انفجرت في وش الراجل وحتى لو مشعوذ أنا بأي دليل أشكك في اللي في قلبه استغفر الله العظيم وأتوب إليه هروح أعتذر له قبل خير وبركة ما قبلش برحته بقا
اتحركت ناحية مكتب خالد وهي مترددة وكان الباب مفتوح وقفت مصدومة أول ما سمعت صوت عرب مع خالد
عرب
والله خير ما اخترت واضح إنها محترمة جداً وفي رأيي تتقدم لها رسمي أفضل برضه بس إنت لازم تكون متأكد إنك مقتنع بيها فعلاً وفترة أسبوع يعني مش كفاية تتأكد فيها من مشاعرك وكدا
خالد
لا أنا واثق جداً وبعدين الحب بييجي مع الوقت البنت دخلت دماغي أوي يا عرب ومتأكد لما نعرف بعض هنقرب أكتر بس أنا ما أكذبش عليك خايف شوية من حوار إنها اتطلقت مرتين دي وكمان غريبة إنها يعني لسه آنسة
عرب
بص يا خالد لازم قبل ما تاخد أي خطوة جد تكون مقتنع أوي بيها والسبب في اللي بتقوله ده لازم يكون عندك علم بيه وده من حقك بس مش من حق مخلوق غيرها يقول لك
خالد بشك
إنت عارف حاجة ولا إيه ولا تعرف غادة أصلاً؟
عرب
أيوه بس مش من حقي أتكلم في أعراض الناس خصوصاً لو بنت ونصيحة حبها هي يا خالد مش حاجة تانية دور على روحها علشان تعرف تكسبها لو فعلاً حبتها
غادة كانت واقفة مذهولة من اللي سمعته وهي مش قادرة تتخيل إزاي بيتكلم عنها بالشكل ده رغم إنه عارف كل حاجة ولو كان واحد غيره كان حاول بكل الطرق ينقذ صاحبه ويمنعه عنها
عرب خلص كلامه مع خالد وسابه يكمل شغله وهو كمان يلحق صلاة الظهر في المسجد ولما خرج ما خدش باله من غادة اللي كانت واقفة في جنب جريت وراه وهي بتقول
غادة
استنى لو سمحت
عرب وقف بصلها باستغراب
عرب
أفندم محتاجة حاجة؟
غادة مذهولة
إنت إزاي كدا؟
عرب
كدا إزاي مش فاهم؟
غادة
إنت إزاي كدا بجد ده لو كان واحد غيرك ما سابش كلمة وحشة في حقي غير لما قالها
عرب فهم قصدها بصلها بضيق طفيف
عرب
أولاً صفات التجسس غلط وحرام قبل ما تكون غلط ثم أنا ما أعرفش عنك غير كل خير وحتى لو أعرف حاجة تعيبك ربنا ستار حليم وأمر بالستر عن إذنك علشان هتأخر على صلاة الظهر
عرب سابها ومشي وغادة فضلت واقفة متابعاه لحد ما خرج من الشركة وفضلت تفكر في اللي حصل وتقارن بينه وبين عز اللي رغم إنه كان جوزها وفضح خصوصيتها وفضلت تفكر في عرض جواز خالد وتقارن لو وافقت عليه هيكون زي عرب ولا عز وافتكرت عرض جواز عرب ولعنت نفسها على غبائها وإنها ضيعت فرصة العمر
غادة
أنا منحوسة والله مني الله كان راجل بجد والله
ــــــــــــــــــــــــــــــــــ
خلص اليوم وغادة رجعت البيت وعقلها مشغول باللي حصل لاقت خالد قاعد مع أحلام وهاجر وكان معاه عرب اللي وصله لهم قربت منهم وهي متفاجئة
غادة
أستاذ خالد إنت إزاي هنا ووصلت قبلي إزاي؟
خالد ضحك وهو باصص لعرب
خالد
عفريت عرب اللي جابتنا كتر خيرهم
عرب رد بهزار
طيب خد بالك أصلاً قاعدين معانا
هاجر بصت حواليها بخوف وجريت قعدت على رجل أحلام
هاجر
يا مامي هو الكلام ده بجد؟
خالد وعرب بصوا لبعض وانفجروا في الضحك أحلام ضربت هاجر على كتفها
أحلام
انزلي ياشحط من على رجلي اتصغطي من جديد ولا إيه؟
كانت القعدة لطيفة بين مزح خالد وعرب وحركات هاجر العفوية بس غادة كانت غرقانة في تفكيرها والقلق واضح على ملامحها وهي حاسة من وقت ما سمعت كلام عرب إنها منجذبة له أكتر من خالد وتوترت أكتر لما فهمت سبب الزيارة بصت لأحلام اللي قالت بهدوء
أحلام
تعالي يا غادة يا حبيبتي الشيخ عرب حكالي إن الأستاذ خالد مديرك وحابب يتقدملك إنتي إيه رأيك؟
غادة بصت لها وفضلت ساكتة أحلام بصت لهم بإحراج وقامت بزعل. لما فهمت أن غادة مش حابه وجودها
أحلام
طيب أنا هقوم أحط العشا إحنا هنتعشى كلنا مع بعض
أحلام خدت بعضها ومشيت على المطبخ عرب بص ناحيتها بزعل عليها وبعدين بص لغادة وسكت غادة راحت وقعدت جنب هاجر هاجر بصت لعرب
هاجر
بقولك هو إنت مرتبط؟
عرب ابتسم بعفوية
عرب
لا لسه والله ادعيلي
هاجر
إنت عندك كام سنة طيب؟
خالد غمز لعرب وعرب رد بعفوية
عرب
تديني كام سنة طيب؟
هاجر
يعني خمسة ستة وعشرين بالكتير يعني
خالد
بس يا بوكشة ده تلاتين سنة
هاجر
سبحان الله مش باين عليه خالص
خالد
وأنا يعني اللي عجوز؟
هاجر ضحك
كفاية القرعة يعني مش محتاجة كلام
خالد
نفسي أفهم إنتي منين شايفة إني أقرع ما تقولي حاجة يا غادة لأختك اللي بتعملي سمعة مش كويسة قدامك دي
غادة بصت لعرب وبعدين سكتت شوية قبل ما تقول
غادة
في مثل بيقول اللي مش قد الهزار ما يهزرش
خالد حس بالإحراج من ردها الجاف بص لعرب وسكت عرب حس بتقل الموقف فحب يخفف الجو
عرب
أما قوليلي يا آنسة هاجر هي الحجة عاملة إيه على العشا؟
هاجر
الله يكرم خاطرك يا شيخ عرب أول واحد يحترمني ويفهم إني بقيت آنسة ويحسسني بقيمة نفسي كدا. المهم الحجة عاملة ملوخية بالأرنب إنما إيه تسلم البطن اللي هتاكلها.
في نفس الوقت كانت أحلام خلصت رص الأكل على السفرة ونادت عليهم
أحلام
يلا يا جماعة العشا جاهز
رغم إن خالد كان حاسس بالضيق بسبب تصرف غادة وحاسس إنها مش قابلاه زعل أكتر بس ما حبش يبين أو يكسف أحلام وقام واتعشى معاهم هو وعرب في وسط جو حلو بين الضحك بسبب خفة هاجر وبين الزعل والحيرة اللي بيمروا عليهم كل لحظة وبعد شوية كانت خلصت السهرة وخالد وعرب مشيوا..
