رواية لا أمان لك الفصل الثالث 3 بقلم ورود الخالدي

يعمر:::

طلعت من البيت صعدت سيارتي افكر شلون راح اجيبها يعني ادك الباب تطلعلي اكولها..تعالي وياي شنو قابل بت عمي بت خالي هيه ومن تسمعني تجي وياي واني جافص ابطنها قبل اقل من ساعة..يعني شراح اكولها وشلون ابرر الها الي صار بعدين منو يكول تطلعلي هيه من ادك الباب والدنيا ليل يجوز اكو احد بالبيت..بس لا ..اكيد محد بالبيت بس هي لان الي اعرفه انه ام نازك عايشه هي وبناتها وحدهن وزوجها متوفي وحتى من ردنا نخطب معدهم احد انتظرنا عمها منا لما اجه من الديوانية على موعد الخطبة يله مشينا عليهم يعني هنه نسوان عايشات وحدهن..بس منو يكول الكاها وحدها واكعد اشرحلها يجوز عدها بعد اخوات اني مشايفهن او ما اعرفهن..لا..لا ..لو عدها بعد جان جني لعرس اختهن..هسه اني شبيه خابص نفسي خلي اروح ادك بابهم واليصير يصير..وكفت سيارتي كبال بيتهم ودكيت الباب..مرة ..مرتين  تلاثة اصلا فلشت الباب ومحد طلع يصير مراحت للبيت ..لعد وين راحت بهالليل ..اهووو..بيتهم داخلي والممر طويل ليجوة يمكن متسمعني..خرة بالحظ حتى جرس ماكو..انتبهت شفت خيط طالع من الباب  سحبته انفتح الباب ..شنو يعني الباب انفتح قابل افوت عليها..وهي وحدها خاف هاي تتفاجأ وتضل تصرخ وتلم العالم..ههه ياعالم الي تلمهم بيتهم غميج..يمكن لو ينكتل احد جوة محد يدري بيه..المهم فتت..بقيت امشي بالممر الى ان وصلت للباب الجوه.. اباوع البيت سنطة عبالك ماكو احد اكيد سنطة لك اثول البنية وحدها قابل تسولف للحياطين دكيت الباب ع كيفي حتى متتفاجأ وتخاف !

امنية::

جنت مخبوصه ناثره القماش بالصاله مخليت مكان مدورته فتت لغرفة ماما ادور ماكو يربي يمكن موبايلي مو بالبيت اصلا..بينما دا ادور سمعت دكات خفيفة ع باب الصاله....يمكن هاي ماما فكدتني وجتي تعاتبني شكو رجعتي للبيت بهالليل بس ماما  ليش ادوك الباب هي تعرف تفتحه من برة..يووووه شمدريني اروح افتحلها الباب واحجيلها الصار....ورحت فتحت الباب بسرعة 

ماما..ادري بيج.راح..ت..

مكدرت اكمل كلامي..لساني انعكد من شفته واكف كبالي ..شلت راسي حتى شفت وجهه..وهالكد متفاجئت بشوفته يمكن مرت كم ثانيه يله كدرت احجي:

ان..انت..انته شتسوي هنا..وش..وشلون فتت البيتنا..و

قاطعني:

اختي لحظة...هسه اوضحلج كولشي؟؟

زمخت بيه حيل واحنا واكفين ع عتبه باب الصالة'

ل..لك شتوضحلي ..شدخلك البيتنا..وشكو جاي وفايت لهنا..انت شبيك مخبل ..مكبسل...شارب؟؟؟؟!!!!!!!!!!!

اختي كتلج لحظة خلي احجي

هالكد مكلبي محترك.من وراه مفكرت هو رجال شطوله شكده بسرعة دفعته من جهه صدرة باثنين اديه وبعلو صوتي كتله:

لك ..امشي منا..اطلع من بيتنا فورا

دفعته بكل قوتي بس عبالك دا ادفع بحايط مو بشر ..لزم اديه اثنينن وكلي:

اهدي لتصيحين الدنيا ليل والناس تسمعنا!...دقيقة وحدة انطيني بس خلي اوضحلج الموضوع

سحبت اديه من اديه وكتله:

واني انتظر الى ان تحجي وتوضح كتلك اطلع..

ما اطلع الى ان احجي..

فصرخت ..

حرامي...خاله ام حسام..حرامي.....حرااا

مخلاني اصرخ اكثر بلحظة دفعني دخلني للصاله وسد حلكي وهالكد مجان مستعجل حتى يسد حلكي راسي انلطخ بالباب ..سد الباب برجله وبقه ساد حلكي بايده شلت اديه ردت اوخر ايده هد حلكي ولزم اديه خلاهن وره ضهري ردت اصرخ مره لخ خله ايده الثانية على حلكي واللخ عاصر بيه اديه حيل وزمخ بيه:

لج اهدي شببج تصرخين يعني زين الج من تلمين الجوارين علينا..مخبلة انتي ..خلي احجي انطيني فرصه  احجيلج..

بس اني ما اريد اسمعه احسه موطبيعي ومجاي يحجي عززززة بس لا يسويلي شي واني وحدي بالبيت هذا ساقط والساقط كولشي يطلع منه..قابل انتظره يسولف ويوضح..مستحيل لازم يطلع حالا من بيتنا!ورغم اني خايفه منه بس قررت ما ابين خوفي اله هو عاصر اديه وساد حلكي..بس اني هم مو شويه فريت ايدي وبحيث صارت اظافري ع ايده وبكل قوتي دخلت اظافري بأديه بلكي يتوجع ويهدني بس مهدني شفته ابتسم وكال'

هاي العندج..ماشي ..مو مهم ملخيها لايدي بس غصبا عليج تسمعيني..

عصبني ولا مهتم معندي حل ثاني هو ساد حلكي بسرعة فتحت حلكي وعضيت اصبعه حيل بسرعة هدني  وكال:

خرررب لج..مخبلة..والله مخبلة  انتي

اطلع من بيتنا..

اشو هذا عافني وراح كعد ع القنفه وكال:

يله صرخي هوسي..لمي العالم تره من فكرج الناس تلتم عليكم عادي اني محد يعرفني بمنطقتكم..؟؟

لك ..اطلع منا

كتلج اسمعيتي يله اطلع..

هالكد مضوجني بروده كتله:

احجي شعندك!!

اهدي وكعدي كبالي خلي نحجي مثل الاودام

كعدت كباله كتله بصوت حاد:

احجي وفضها وانقلع بسرعة

مد ايده بجيبه وطلع موبايل..خررب ..هذا موبايلي شلون وصله...

هذا موبايلج مو؟؟

كمت بسرعة من مكاني..وركض وكفت كباله:

اي موبايلي ما اعرف شلون وصلك وشلون صار بيد واحد مثلك..انطينياه وولي منا!!

زمخ بيه!!

احترمي نفسج ادب سز شنو ولي منا..بنيه شكبرج شبيج..لسانج جنه سجينه بعدين ما انطيجياه الى ان تسمعيني..

ما اريد اسمعك..شنو معندي شغل وعمل اسمع واحد مثلك انطيني جهازي واي صوره بجهازك احذفها وبالنسبه للي صار اليوم ابد مراح يمر ..بسهوله اني رجعت للبيت مو لان خايفه منك لو من تهديدك تره ما اخاف بس من رب العالمين...بس تجي ماما احجيلها خرابيطك كولها واكولها شلون طردتني ولا عبالك ماما حتسكت اكيد يوصل الحجي لاهلك لهذا اجلت الموضوع للصبح حتى العرس يخلص وميخرب اول وتالي هذا عرس اختي خطيه الي ما الها ذنب لان عدها حمه مثلك..

شو هذا كام وجرني من نفنوفي وقربني منه وحجه بوجهي:

لج انتي شو..فايته بزودج شنو متسمعين واحد مثلي شنو اختج معدها ذنب لان عدها حمه مثلي شتقصدين !!

تعرف شاقصد انطيني جهازي واطلع من بيتنا فورا!!

مخبلة قسما بالله مخبلة انتي ..بس مو مهم مخبلة عاقله اسمعي وبس..وقبل متصيحين وتقاطعني  اريد اكولج تره جهازج لكا واحد من جماعتي بالتكسي..

اي هاي هيه فهمت انطينياه وروح.؟؟

لج اوكفي...خررب...خررب خلي احجي..

احجي..احجي..احجي لخاطر الله شتريد تحجي!!

شوفي من لكه الجهاز ..بقه عنده ونقل صورج لجهازة طبعا هو مو خوش ادمي وجنا طالعين اني وجماعتي فعرض عليه صورج ع اساس انتي وحده موخوش..وتواعدين ضباط ثكال وشباب وحتى اخذ مني ٣اوراق مقدمة لكعدة خاصة بشقه وياج....

من سمعته هيج حجه وحدهن دموعي جرن ..متحملت هيج يحجي ومن شافني بجيت تغيرت ملامحه::

اختي لتبجين..حشاج من هالحجي..والله هذا الي صار ردت بس اشرحلج ليش طردتج..مو قصدي ابجيج ..موقف حيل سخيف والله .من شفتج تسولفين وي سناري..وتاكدت انه انتي نفسج صاحبة الصور دين مضل براسي كلت هاي الساقطة شلون فاتت البيتنا..شنو مالك دزها لو احد عازمها جان كل همي اطردج لان مفكر انتي مو خوش بنيه ومو محترمة..و..

بقيت صافنه ودموعي وحدهن يجرن على خدودي وهالكد منهاريت حسيت رجليه كوه شايلاتني رجعت ليوره وكعدت ع القنفه وغطيت وجهي باديه:

اختي الخاطر الله لتبجين ..حشاج ..من هالحجي اكيد ..مقاصدة عليج بس شسوي حظي المصخم حطني بهيج موقف وياج..

بينما هو ديحجي كلت لنفسي عمت عيني عليمن ابجي كدام هذا السربوت شمسويه حتى افرفح وابجي كدامة شلت راسي ومسحت دموعي حيل ووكفت كتله

خلصت كل الحجي العندك!!

اي تقريبا كل الي ردت اكوله كلته

ماشي ..انطيني جهازي واطلع من بيتنا فورا؟؟

شفته مثل الي خجل من كلامي لان حتى بعد مسمعته طردته فكال:

مقبوله منج حقج اطرديني اني غلطت وياج..هوايه واستاهل انطرد..

ولان كلبي..مجمر منه ردت أأذيه اكثر فكتله!!

لا..لا..لتفكر اني دا اطردك لان غلطان وياي!

لعد..؟؟؟

شوف انت مو طردتني من بيتكم لان معتقد انه اني بنيه مو محترمة وميشرفك...ادخل بيتكم؟؟

اي ..كتلج جنت معتقد او الاصح غلطان!!

بس اني هسه لامعتقدة ولا غلطانه اني متأكدة كل التاكيد انه انت شخص مو محترم..وطردتك من بيتنا واجبة عليه

حسيت نفسي جبتها بالكصة مضبوط لان شفت العصبيه طلعت من عيونه...وهالكد متعصب منتظر بسرعة ادنه ولزم ايدي جرني وكلي:

ادب سز..زمالة من جيت لهسه تشمرين بالحجي واني متحمل وساكت واكول ميخالف اني ابيتهم..وهي مهما تكون بنيه..مينوخذ بحجيها ..لان عصبيه..واني غلطت بحقها..بس تتجاوزين حدودج وتكولين مو محترم تره اي اعتبار ميوكف كبالي سنونج اكسرها بحلكج

ها..تريد تضرب يله اضرب ..اني ممكسرة هم عندي ادين تضرب ضربه ارجعها بعشره لاعبالك بنيه واخاف هم اكدر اكسر سنونك بحلكك..

ههههههه..انتي تكسرين سنوني بحلكي..!!

ردت افلت ايدي واوخر ايده لزم ايدي الثانيه وجرني صرت كباله وجه بوجه وشفت ضحكته خفت صارت ابتسامة وحسيته يباوع بعيوني وكلي بسرعة:

اويلي شرسه..حيل ووكحة..اخرب ع الابنية الوكحة..والشرسه..

شفت نظراته موراحة دفعته ووخرت وكتله:

انت شكد متستحي كتلك اطلع منا..يله

لا ما اطلع وحدي تجين وياي؟؟

اجي وياك شنو!!

اي ترجعين وياي لبيتنا محد يعرف انتي طلعتي حتى امج خليت سناري تلهيها حتى متحس انتي ماكو..فرجعي وياي لبيتا وتصرفي عادي وكانما مصاير شي!!

والله انت تحلم وانت صاحي من كل عقلك ارجع ويه واحد مثلك

كتلج لتطولين لسانج وخليني محترمج..امشي وياي وخلي نقفل هالسالفة المخربطة..

ما ارجع انطيني موبايلي وروح..

ما انطيج جهازج وحتى صورج ما امسحن اي صور بنيه حلوة يفيدني!!

شتقصد!!

شوفي لا اقصد ولا ما اقصد رجعي وياي للبيت وتصرفي عادي وموبايلج انطيجيا  عند اهلي وحتى صورج امسحهن مترجعين بكيفج والنتائج مراح تعجبج؟؟

فكرت كلت خلي ارجع واخذ موبايلي ..احسلي شكو واكفه اخذ وانطي ويا بالحجي وهو ابيتنا واني وحدي وشخص مثل هذا ميتامن صح مسويه نفسي قويه ومخايفة من وجوده ابيتنا بس بداخلي كلبي يطكطك من الخوف خلي اسايسه واخذ موبايلي واخلص

ماشي ارجع لبيتكم واتصرف طبيعي ..انت روح واني جايه وراك؟؟

شنو جايه ورايه غير سيارتي بره اخذج وياي!!

انت من كل عقلك اني اصعد بسيارة واحد ما اعرفه!!

شنو متعرفيه تره احنا صرنا اهل!!

لا مو اهل حتى لو اخذتو اختي تبقى غريب وما اعرفك روح واني اصعد بتكتك واجي!!

لج ليش شبيها سيارتي؟؟

السيارة مبيها شي بس صاحب السيارة ممقبول عندي فهمت!!

امنية تره هوايه تحملتج ومو من طبعي اتحمل حرف من بشر..روحي بخشمي!! امشي كدامي واتقي شري!!

كتلك ما اصعد بسيارتك مستحيل اصعد بسيارتك روح واني اجي بتكتك!!

ماشي راح اطلع بس انتظرج اباب اهلي تجين..

ماشي...

يعمر:::

طلعت من بيتهم موبايلها بجيبي صعدت سيارتي بس شنو دمي فاير شبيها هاي من اجيت لحد مطلعت ترزل بيه وواحد مثلك..ومتاكدة ممحترم..وما اصعد سيارتك وانت ممقبول شنو السالفه شنو فكرتها عني يعني..خرررب لك شنو فكرتها عنك يعني كتلها..انت تواعد بنات وادور صور بالموبايلات بعد شتكون فكرتها عنك..حسيت نفسي غلطت مره لخ..من شرحتلها الموضوع..صفنت ..كلت يابه وطبها مرض شتاخذ من فكرة خلي تاخذ من شوكت اني اهتم لافكار الناس عني شو اني بايع  ومخلص..وما اهتم لاي بشر بهالدنيا ..حركت بس فريت الستيرن شفت  اثار اظافرها ع ايدي وتذكرت من نبتت اظافرها بيدي ومن مهديتها عضتني..حيل خلتني اهدها غصبا عليه..ههه وشكالت تضرب اضرب واكسر سنونك بحلكك لا هاي هيه تالي عمري اسمع مرة تكولي اكسر سنونك بحلكك بس خرب يومها..صدك تموت شكد جذابه وكاحتها واني اخرب ع البنية الوكحة المتخاف..اموت من الفاهيه..حتى من حجيتلها..مالك شلون شوفني صورها بجت بس مو بجي مال وحده مستسلمة لاوالله دموع بعيون كلها وكاحة وتحدي ..دوختني خرة بساعة السودة الشفت صورتها بيها....وصلت لبيتنا بقيت واكف بالشارع منتظر جيتها وشفتها نزلت من التكتك..واول مرة انتبه ع مشيتها..اي..مشيتها مجانت عدله هيج تكزل خفيف ع رجلها اليسرة بس ليش تمشي هالشكل انتبهت رجلها مبيها شي طبيعية ليش من ادوس بالكاع تكزل يمكن مجروحة لو مفصوخة رجلها ومتكدر ادوس طبيعي. شافتني دارت وجهها فتت قبلها صحت سناري:

سناري ام نازك هم سالت على امنية؟؟

اي سألت ودزيتلها مريم كالت الها امنيه يم سناري وخليت مريم شويه تلهيها هي وينها امنية

 جتي امنيه سويلج فلم ع اساس جانت يمج بغرفتج ومطالعة فهمتي!!

مو خاف هيه تحجي لامها!!

لا متحجي بس انتي ضبطي السالفة!!

ماشي!

شفتها فاتت كعدت ع نفس القنفة مال التخم عاد سناري بسرعة جتي كعدت يمها..سمعت امها كالت:

وين اختفيتي ماما صار فو الساعتين ماكو!!

سناري بسرعة كالت:

خاله جانت يمي ..بغرفتي جنا نتفرج ع البوم الصور وشوفتها ملابسي فتأخرنا..

هااا مو اكول مدري وين غطت..

عفتهن يسولفن صعدت لغرفتي طبعا ع مارحت لمالك ورجعت ورحتلها وهم رجعت شفت الناس خفت الاستقبال فارغ حتى عمامي رايحين بس خالاتي ..وبناتهن وام نازك واختها الزغيرة وامنيه كاعدات وبغرفة امي كم مرة من اقاربنا...دويه مال نسوان..ومتاكد مراح ينامن الى ان ينزل صفوان من غرفته عسما ينزل وجه الصبح هم ينتظرنه هي هاي عوايد النسوان ميرتاحن اله يتاكدن العروس صارت للعريس شلون عقول فاصخة

ردت انزع حذائي حسيت معدتي انهركت من الجوع تذكرت اني متعشيت الناس كولها ضربت لحم وشبعت واني التهيت اصب ومتعشيت وراها التهيت بسالفه امنيه ..كلت ما ابدل انزل اكول لسناري تصعدلي عشه نزلت فتت للمطبخ صحتلها:

متعشيت ..صبيلي اي شي ..وصعدي لغرفتي!!

اي هسه..بس..يعمر ..امنية تريد موبايلها شافتك نزلت وصحتني  كالت فدوة جيبي موبايلي منه..

اذا تريد موبايلها هي تجي تاخذه::

يااا..وين تجي يعني انت راح تصعد لغرفتك..غير!!

لا راح اطلع برة انتظرها بالممر خلي تجي تاخذه..

ليش خو انطينيا واني اخذه الها!!

مثل مكتلج هيه تجي تاخذه!

المهم طلعت برة وكفت ابداية الممر ادخن جكارة شفتها طلعت عاد اني فتت للممر اعرف حتجي وراية بينما امشي سمعتها:

اوكف وين فايت جوة انطيني موبايلي. 

مشيت كم خطوة جتي ورايه 

شنو مسمعتني انطيني موبايلي..

متعمد ادخل جوه للممر ...لان اريد احجي وياها..بعد من صرت بنص الممر جتي وكفت كبالي مدت ايدها:

شنو اضل اركض وراك مو كتلي تعالي للبيت واتصرفي طبيعي وانطيج موبايلج

مديت ايدي بجيبي طلعت موبايلها وخليته بيدها..اخذته رادت تلتفت كتلها اوكفي..

فتحت جهازي..كتلها تعالي 

ادنت يمي. 

هاي صورج..وبديت احذف بالصور ومن حذفتهن كولهن كالت:

انت حذفت الصور واصدقائك الي بقت عدهم الصور شلون حتحذفهن من اجهزتهم..؟؟

اول مره احس بنبرة صوتها مثل الرجاءوبصرحة نبرة الرجاء بصوتها..خلتني بسرعة اكولها:

تره ماكو الج اي صوره عند اصدقائي وحتى صورج الي بجهاز مالك جبرته يحذفهن وحتى اذا محاذفهن يعرف هو حق المعرفة اذا تطلع اي صورة منهن اكتله خلاص..

توقعت ردي راح يخليها تشكرني بس صدمتني من كالت:

تره انت ممتفضل عليه ولا اعتبرة موقف شهامة لان هذا هو الصح..مو فضل منك

وعافتني مشت خطوتين كتلها:

امنية اوكفي. 

التفتت:

شتريد شعندك بعد؟

امنية شبيها رجلج؟؟؟!!!