رواية لا أمان لك الفصل الرابع 4 بقلم ورود الخالدي

امنية:::

من سمعته كلي:

امنية شبيها رجلج!!؟؟

المفروض سؤاله مينرفزني لان اكثر الناس الميعرفوني ويشوفوني لاول مرة يسالوني شبيها رجلج لان مشيتي موعدله رغم رجلي مبيها شي.. متعودة على هذا السؤال وممخليتله فد اهميه وعادي اي احد يسالني اجاوب واشرحله انه اني انولدت هالشكل بس ما اعرف ليش من سألني يعمر حيل ضجت..ورديت عليه بحدة:

و..وانت شعليك برجلي وتسألني عنها؟؟

امنية تره مجرد سؤال..اكولج لتخلين سوء التفاهم الي صار ببناتنا ..يخلينا نصير مثل الاعداء اول وتالي احنا صرنا اهل والي صار فد موضوع سخيف انتهى بوقته..و

قبل ميكمل قاطعته بنفس الحدة وكتلة

شوف يعمر..اريدك تخلي ابالك او تضيف لمعلوماتك حتى تعرف شلون تتعامل وياي مستقبلا..اولا ..ما اريد تكون بيني وبينك اي مواضيع من اي نوع..لا موضوع نظيف ولا موضوع سخيف..ثانيا..لتكول احنا اهل انت اخر واحد بهالدنيا ممكن اعتبرة من بقية اهلي ..ثالثا بالنسبة لسوء التفاهم الي حجيت عنه تره مو هو السبب الي مخلينا تقريبا نحجي بعداوة لان اني قبل ما اشوفك رأيي نفسه بيك ومتغير..سواء بسوء التفاهم او بدونه

صفن بوجهي وكلي:

مفهمت يعني شنو رايج نفسه بيه حتى قبل متشوفيني؟؟

تكدر تسأل نازك عن هالموضوع..معندي وقت اشرحلك اسمحلي!!

ردت امشي خطوه لزم ايدي وجرني حيل وزمخ بوجهي:

لا اشو انتي تشرحيلي وهسه😡😡

اول مره هد ايدي..وهذه اخر مره تمد ايد وتلزمني هالشكل وثاني شي..اذا سألت نازك راح تكولك شكد حاولت اخليها ترفض الخطبة وتبطل من هالزواج والسبب مو بصفوان ولا باهلك جان اعتراضي الوحيد هو وجودك انت بنفس العائلة الي راح تعيش بيها..اي يعمر قبل ما اشوفك جنت اعرف اختي راح تتعذب عدكم ومراح ترتاح بس شاسوي مسمعت مني وصارت قسمتها الكم!!

ليش..ليش اني شمسويلج..وحتى قبل متعرفيني..حكمتي عليه انه اني راح اكون سبب بعدم راحة اختج عدنا..؟؟لج انتي شتعرفين عني حتى مخليتني بهالخانه السودة من تفكيرج..

اعرف هواية عنك واعرف انت معيش اهلك ومصدر رزقهم انت واعرف صورتك كدام الناس شلونها؟؟

شبيها صورتي خاتون؟؟

مو اني الي اكول الناس الي تكول عنك مو خوش ادمي..عمي سأل عنك وكل جيرانكم واهل منطقتكم وصفوك بهالوصف؟؟

اني احجي واحسه حياكلني حتى شرايينه طلعت  هالكد معصبته بكلامي لزم ايدي ولواها حيل حتى الموبايل وكع من ايدي وكلي بصوت يخوف:

لج اني مو خوش ادمي!؟؟؟

ومن خوفي منه بسرعة كتله:

اني شعليه وتخوف بيه الناس تكول مو اني..؟؟

لوه ايدي حيل..توجعت

اخ..اخ هدني..هدني كتلك..اني شعليه منطقتكم هيج كالو لعمي..هدني؟؟

بس مهدني بايدة الثانيه لزمني من شعري حيل وكلي:

تعرفين شنو الي يشفعلج هسه وميخليني اموتج باديه ..اليشفعلج بس كونج ابنيه وابيتي..ومااكدر امد ايدي على مرة..ضعيفة لان مو رجال اليضرب مره..وضيفي المعلوماتج..مثل مضفت اني معلومات عنج حتى تتعلمين شلون تتعاملين ويه واحد موخوش ادمي حسب كلامج..ضيفي هالمعلومة..المهمة اني يعمر .اي.يعمر الي فار الدنيا هاي باصبع رجلي الزغير....لتخليني اخليج براسي واندمج على كل حرف طلع من حلكج والله والله والله اذا اخليج ابالي..راح تشوفين ايام سودة تتمنين الموت ..ولا تشوفيها افتهمتي!!

هو يحجي واني هالكد موجعتني ايدي..حسيت راح ابجي ..طلع صوتي يرجف

ه..هد..هدني ..خ ليني اروح..

ولي..

هدني..ورحت من يمه امشي ع السريع..تذكرت موبايلي وكع رجعت دنكت واخذته..ومشيت  ..فتت جوه..بس كلبي احسه ماكو حيل خوفني..حسيت المواقف الي صارت بيني وبينه حيل اوفر..ومبالغ بيه ولد اليوم شفته وغلط وياي بدون ميقصد واجه شرحلي وبررلي كولشي  .المفروض لهنا وينسد الموضوع ليش خليت الموضوع يكبر وع كولته نصير مثل الاعداء..لا..لا حيل بالغت....وتصرفت خطأ..هالمرة..من فتت كعدت بالصاله شفت ماما كاعده ورفوله نامت على رجلها وسمعت خاله صفوان سألتها:

اكولج شبيها هاي بتج الزغيره حيل ضعيفة ووجها اصفر شنو عدها فقر دم؟؟

ياريت عدها فقر دم ...لو ع فقر الدم سهلة؟!

لعد شبيها مبينه مريضة!!

اي والله مريضة من عمرها ٣سنوت شكل عدها التهاب بالكليه..ومن يومها مصحت هالطفلة ..ومن مات ابوها زادت بالزايد جانت متعلقه بيه كولش وهسه حايره بيها كل اسبوعين فحوصات وتحاليل مره ينزل التهابها يصير صليبن ومره يصعد اربع صلايب وجراحة..وتشوفينا من طبيب لطبيب..وعلاكه دواها وياي وين ما اروح اخذها وياي..حتى اذا عندي واجبة نسوان هم اخذها شسوي مدري قسمتها مدري قسمتي..!!

خطيه..بس اكولج هم راجعتي بيها   عد اياد البير قبل كم سنه هم عدنا ولد عنده عجز بالكليه وتعالج عنده وطاب!!

يااا هاي انتي وين عايشه اكولها ماخليت طبيب يعتب عليه حتى هذا اياد البير هم ردنا ناخذها ورحنا ندور على عيادته اباب المعظم كالو مموجود من زمان انتقل لغير مكان ومندليناه..

هااا يجوز انتقل... لان من زمان تعالح عنده كرايبنا عموما الله يشافيها لرفوله خطية طفله بعدها وينها اوين الكليه!

الله يسمع منج!!ويشافيها ويريح بالي

هنه يسولفن واني بالي يم الكلام الي حجيناه اني ويعمر بصراحة حيل ضجت شدعوه هالكد..حجيت ويا بحده وبعداوة قابل اني من احجي ويا هالشكل راح اصلحة لو راح يتغير..بمجرد ميعرف رأيي بيه يعني اول وتالي احنا ناسبناهم..والمفروض ما..ابين كرهي اله حتى لو اني بداخلي فعلا اكرهه صح اليوم شبعت بجي من وراه من طردني بس تندمت ع كل كلمة كلتها اله بالممر قبل شويه..يعني صعبه احد يواجه شخص بعيوبه هيج وجه بوجه باول يوم يشوفه بيه...حسيته حيل ضاج واعصابه صارت نار..واني ما احب اضوج احد مني حتى لو اكرهه ..اصلا من طبعي لا اتدخل ولا اجامل ولا اختلط ودائما اكول دع الخلق للخالق كولمن عقله براسه يعرف خلاصه شكو سويت نفسي مصلحة اجتماعيه وملتهيه اوصله فكرتي عنه..يله شسويله بعد الصار صار ومن الوم نفسي هم مراح يتغير شي هو ضاج مني واني هم ضايجة منه تعادلنه واصلا بعد ما احب  اي موضوع ينفتح بينا اصلا بس يصير الصبح ونرجع لبيتنا ..كولشي ينتهي وانشاء الله بعد ما اشوفه

بقينا كاعدين جابولنا فاكهة امي وخالات الولد ياكلن ويسولفن ويضحكن 

خاله صفوان كالت الماما:

خطية الطفلة ركبتها راحت واحنا بعدنا كاعدين اخذنها نيمنها وغطنها حتى ترتاح بنومتها!

خليها نايمة  شيشيلها الي..بعدها ماما دتحجي شفته فات وديصعد الدرج سناري ركضتله:

يعمر صعدتلك عشه من زمان وين رحت هسه ثلج الاكل!

مو مشكله

 بعده ممكمل الدرج خالته صاحته:

يعمر خاله ..شو تعال شويه:

نزل  

كولي خاله

خطية الطفله نامت وركبتها راحت ..بلكي تشيلها تنيمها بغرفة وحده من البنات:

اي صار..

وشفته دنك شال رفوله ومشه بيها..سناري كالت:

جيبها بغرفتي يعمر..

واخذها  ودخل لغرفة سناري ..بقت عيني عليه متوقعت هو هم يلتفتلي جانت نظرته مليانه كره اي حقه اني حيل ضوجته وحقه يكرهني..اي ميكرهني وشنو يعني طبه طوب..وشفته رجع صعد والحمد لله بعد منزل..وبقينا كاعدين نسولف اني نعست وسناري  ومريم اخوات صفوان هم نعسن ..مريم كالت:

اكولجن اشو خالاتي يدكن سوالف شنو مينامن!!

شمدريني اني قفلت وهنه عبالك عدهن نهار..

هههه خالتهه سمعتها:

اذا قفلتن كومن نامن شعليجن بينا بعدنا كاعدات..احنا..

سناري كالت:

كومن خلي انام بغرفة مريم:

لا..اذا بغرفة سناري احسن اني اريد ابقه يم رفوله لان تفز  نص الليل واخاف تكعد تستغرب مكان نومتها..

ياااا تستغرب شنو بنيه عمرها ٦سنوات شنو قابل طفله

اي هيه تستغرب وخوافه..

بكيفج نروح بغرفة سناري..ورحنه لغرفتها رفوله بقت ع الجرباية واحنا البنات فرشنا بالكاع ونمنا.. كعدنا تقريبا بالتسعة الصبح اني اول وحده كعدت ع صوت ماما:

امنية كعدي ماما..هم يله نروح..عيب نتأخر يجلبون بينه ع الغده اذا تاخرنا اكثر..

تحجي بصوت ناصي ..اني كمت لكيتها ترتب بشعر..رفوله..ردت اغسل وجهي..فرحت للمطبخ لكيتهم  يتركون غسلت..ام صفوان كالت:

كعدي تريكي امنية خاله..

باوعت ع ماما وكلت لام صفوان:

لا خاله ..هم يله نروح اتريك بالبيت:

يااا..ترحن شنو تحجن صدوك جذب اشو تتريكن وتتغدن شنو ترحن محد تروح وروح اخويه غداجن يمنا..شنو صايرة دايرة اهل عروستنا يطلعن من الصبح..كعدي ..كعدي تريكي..بعدين حتى عروستنا بعدها نايمه شنو ترحن ومتسلمن عليها

ماما كالت:

عود كلت ندك الباب نسلم عليها ونروح 

ماكو هيج حجي..بعدين شعدجن رايحات وراجن الديوان قابل ضلن يمنا للعصر....

ههههه تكول وراجن الديوان..عمي نضل شنسوي بعد وانتي تحلفين  بالاعزاز

واضطرينا نبقى اني تريكت ورجعنا كعدنا بالصاله بس عيني يم الدرج متوقعة ينزل بس الظاهر هو مموجود..او نازل من وكت اي الحمد لله مراح اشوفه..ساعة بالعشره ونص انفتحت..باب العرسان ودخلنا كعدنا يم نازك بس خطية نازك وجهها مخطوف  كتلها:

شبيج نزاكة شو وجهج اصفر..!

ماما ضحكت:

هههه اي كل عروس تصوفر مصباح العرس..هههه هسه تتمكيج وتصير تجنن..وفعلا..جتي بت خاله صفوان مكيجتها وبدلت وطلعت تخبل ..ومر الوقت اتغدينا بغرفة نازك ..وشربنا جاي ساعة ٢,..الظهر ماما كامت بوست نازك وكالت:

احنا نروح هسه..

يااا مو كتلجن تضلن للعصر:

لا نروح هسه..قابل منها وخلصت اني هم ما اكطع عن بتي اضل رايحة راجعه عليها منا لما اطردوني!

ههههه..تكول اطردوني..دكعدي يمعودة حلوة السوالف وياج!

لا نروح..باجر امر لنازك..

اذا باجر تجن براحتجن لعد..بس انتظرن ..يعمر على جيه ويوصلجن:

ناخذ تكسي 

عمي عليمن مستعجلات هسه يجي يعمر يوصلجن..بسيارته.

اني كتلها..

لا خاله ..ع شنو ناخذ تكسي لو صفوان يوصلنه ..ماكو داعي نزعج يعمر

تزعجنه شنو ..بعدين تدرن صفوان ميعرف..يسوق ومعنده سياره:

ياااا..ميعرف يسوق..شكد يجذب شو كلي عمه سيارتي بالمعارض مالت اخويه اريد ابدلها!!

هههه جذاب ضحك عليجن اصلا بايسكل ميعرف يسوق ..وابو يعمر هم جان يسوق بس..شوفه مو تمام بالسنتين الاخيرات وضاله سيارته وره البيت لاهو بايعها ولا مستعملها..ومنقذ ملتهي بدراجته يعني بس يعمر ابو سيارة عدنه..

ههههه..خرب يومه شلون يجذب يكول اريد ابدلها برانج وهو ميعرف يسوق بايسكل

اي ...غير يربن على خطيبته..

هههه..

بعدنا نسولف ومريم جتي

ماما اجه يعمر..

اي خلي يوصلجن.

حيل ضجت من عرفت هو حيوصلنا شيخلصها هاي من  البارحة اتمنى الوقت يخلص حتى ما اشوفه مو لان مضوجني لا والله لان احس اني الي مضوجته يمكن اني فطيرة هالكد ما شيل هم احد اضوجه حتى لو جان واحد  مثل يعمر..المهم ..صعدت ماما بالكدام واني ورفوله كعدنه وره ..توقعت بالطريق يلتفتلي او تصير عيني بعينه ..رغم ما اني احاول اباوع عليه واكول هسه هو هم يبادلني فد نظره..غضب لو عتب لو اي شي بس هو ولا عبرني ساكت الطريق كله وقبل منوصل شفته ورث جكاره..وصلنا لبيتنا..ماما نزلت وفتحت الباب رفوله نزلت من ردت انزل الفتت لكيته يباوع عليه بس مو نظره عبالك..نظرة ذوله الي ينفذون الحكم بالاعدام..نزلت بسرعة ..ماما كالتله:

الله وياك بعد خالتك 

اني بسرعة فتت للبيت.. ثاني يوم الصبح نازك خابرت ماما وتبجي..تكولها ما اعرف انام عدهم لو اكل اريدج تجين خطيه ماما انكسر خاطرها كالت اروحلهم ميخالف بعدها ممتعوده على فراكنا وهمه ناس غرب..حقها تحس بالوحشه..فاخذت رفل وراحت ورجعت ساعة بالعشره كلت احتمال لان اول ايام..بس ثاني يوم وثالث يوم هم ماما راحتلها من رجعت كتلها:

يوم شو يوميه رايحة ع الناس تره عيب هسه شيكولون شنو اول الناس بتهم تتزوج ومجلبين بيها!

هههه لا ميكولون والله ام يعمر دره من الله هي تجلب بيه وتحلفني الا اجي والبنات طايرات بيه والله طلعو خوش اوادم خو ابو يعمر..ذهب صافي..

ميخالف ..ماما بس احسها ثكيلة روحتج الهم يوميه 

لا مو ثكيلة اصلا يجلبون بيه واني اتعمد ارجع من وكت.. صدوك ذكرتيني الاربعاء السبعة ولازم نعزمهم؟؟

هااا نعزمهم..

اي غير السبعة

يوم اني شمعرفني بالعزايم عود عزميهم انتي قابل اني منال العالم واطبخ للعزايم..

وجتى الاربعاء تركض ماما اخذت فلوس من كنتوري وراحت تسوكت اشكال والوان..ومن الظهر بلشت تطبخ للعزيمة مال العشه وفعلا..جوي المغرب ماما منتظرتهم ومن فاتت نازك  شبكتني وباستني وكالت:

مشتاقتلج..

اني هم بوستها هي انتبهت:

ماما عمتي وصفوان وسناري ويعمر بالباب ..اني سحبت الخيط وفتت...

.ماما جرتني من ايدي

تعالي خلي نستقبلهم شنو يضلون بالباب..

وفعلا رحنا استقبلناهم ورحبنا بيهم ..صفوان وامه وسناري فاتو بس يعمر كال:

اعذريني خاله ام نازك عندي شغل..

عندك شغل شنو ..غير معزوم دفوت..فوت وبطل هالحجج؟؟

والله متواعد ويه جماعة غير مرة ان شاء الله..بس اريد كلاص مي..

اي هسه وفتنا جوه ماما كالت:

ولج اخذي كلاص مي للولد واكف  بالشارع..

رحت اخذت مي طلعت هو جان ملتفت ع سيارته بس سمع صوت الباب التفت شافني كلت هسه ياخذ المي مني بس هو من شاف المي بايدي عافني وراح صعد سيارته بسرعة..كلت بكلبي ..طبك مرض واذا مشربت مي كبر عقله مثل عقل الجهال..

وخلصت السبعه بس ماما مكطعت هم يوميه تروح الهم لا وصارت هي وام يعمر صديقات كل يوم عذر شكل حتى خالتي هم عرفتها عليها ..هههه صارن شله ام يعمر واخواتها وماما وخالتي...وكامن يطلعن للواجبات لليموت ولليعرس..ماما مكيفة بام يعمر تكول مره معدله ومعارفها كولهن...زنكيلات وخوش نسوان يعني..هاي هيه تصادقن للنخاع...ومره طلعت للسوك اني وماما اشتريت دانتيلات ودكم ولا ستيكات وخيوط غراض للخياط..مالتي..ومن ردنا نرجع ماما كالت نمر على ام يعمر ناخذ الطرشي شلون مسويتلي طرشي الصبح خابرتني ومدامهم قريببين خلي نتمشالهم..

يوم روحي انتي اني اخذ تكتك وارجع ..

لج دمشي قابل راح ياكلوج شكد..تعقدين الامور..

واضطريت اروح وياها دخلنا وهنا يسولفن لاساعة لا اثنين صارت ساعة ١١ ونص وهنه يسولفن النوب ام يعمر جلبت اله تتغدن..اني مقبلت كتلها :

خاله تره اكو نسوان راح يجني عدهن هوايه خياط واني ع باب الله مضطرة اروح..

هههه شوف بتج شلون تتحجج:

والله ما اتجج..اسالي ماما حتى. 

ماشي بس هاي وحده عليج روحي ..انتي بس امج ورفوله يضلن ياكلن من دولمتنا..

الف عافيه خاله اروح اني تأخرت

..اول مطلعت من بابهم شفت عمو ابو يعمر نازل من سيارة ابنه الشفية اول مشافني كلي:

هلة عمو..وين رايحة بوكت الغدة!!

هلو عمو....والله عندي شغل هواية حتى خاله جلبت بيه بس فعلا عندي شغل ان شاء الله ع الجايات اتغده..عدكم

لعد خلي يعمر يوصلج

لا..لا عمو ممستاهله اخذ تكتك!!

تاخذين تكتك..شنو تره عيب هالحجي..تسولفين بالتكتك وسيارتنا واكفه

وسمعت يعمر كال:

يابه خليها ع راحتها..خلي تاخذ تكتك شنو قابل نجبرها حتى نوصلها:

انجب اثول..صعدي عمو صعدي.؟؟

واضطريت اصعد بس حسيت عمو برد كلبي من كله انجب اثول!!🤭🤭🤭

يعمر:::

صعدت بسيارتي بس شنو ع اعصابي حركت اصلا اني حيل ضايج منها صارلي فوك الشهر ونص من يوم عرس صفوان لحد الان اويلي لو تصير بيدي الا اكسر ضلوعها بس شسوي متصح بيدي..وهالكد مضايج دست بانزين حتى بسرعة اوصلها واخلص من شوفتها..صح مو من طبع كلام الناس ياثر بيه ولا اهتم لاحد بس حجيها بذيج الليلة بعده حافر كلبي حفر وعبالك انتظر فرصة زغيره حتى ارجعلها..الاهانات بقاطات..اثناء مدا اسوق سريع مدري منين طلعت بزونه ..كبال السيارة بسرعة دست بريك وكفت ..غير تسد حلكها وتسكت لا شلون تسكت لازم تشمر عليه حجاية تاذي:

هاي شبيك انت صدوك جذب اكو واحد يوكف هالشكل هبطته الكلبي..بعدين شدعوة طاير تريد تموتنا..

استغفر الله ..صبرك يا إلاهي..لج انتي متعرفين تسدين حلكج..اله تشمرين منه سم..

وانت شبيك..عبالك ادور وياي ثارات تسوق سرعة ومخلي كلبي ابلعومي كل شويه احس راح ننكلب واخرها وكفت هالشكل حتى راسي طخ بالكشن الكدام..شهالتصرفات مال الزعاطيط؟؟

خلفلله عليج اني زعطوط؟؟ يله حجي وحده مثل وضعج ماعليها عتب مو يكولون المخبل ماعليه عتب!!

تره اني مو مخبلة دا احجي حجي عقلاني بس انت الي شكدك شكبرك والي عمرك فوك ال٣٣سنه والي بعمرك هسه عدهم دسته جهال تتصرف مثل المخابيل 

هاااا..ولج تعيريني لان ممتزوج هههههه..متفيدج هاي!!

لتكول ولج افتهمت؟؟

اشو ولج ونص بعدين تعالي اكولج تره اني الي ما اريد اتزوج بخاطري والزواج عندي مثل شربة المي اني الي ممتكتفي عنه وما اريد دوخته اساسا!!

عشتو..مكتفي..هو انت اصلا منو الي تاخذك؟؟!

هااا..اي حسب رأيج المحترم اني مو خوش ادمي ومنو تاخذني مو؟؟

همزين تعرف نفسك!!

تره حتى لو مو خوش ادمي اجيب احسن مره بفلوسي واعتقد انتي تعرفين الفلوس تجيب احسن عروس وبالوقت الي اني احدده..وحتى لو عمري فوك ال٣٣ اني رجال ما ابور....مو مثل المرة تبور بس تجزي ال٢٥سنه!!

رادت تحجي كتلها:

اوكفي خلي اكمل كلامي وبعدين عود شمري عليه سم براحتج..بمكان متعيريني الي وتكولين الي بعمرك هسه متزوج وعنده دسته جهال ..كولي لنفسج هالكلام..تره انتي عانس ..ومحد مكلبج..ولا احد راح يكلبج مستقبلا..؟؟

طبعا..كلت هالكلام ..واني متقصد اضوجها..واردلها ..كلامها الي مأذيني صار شهر ونص..اي..اريد اضوجها بالضبط مثل مضوجتني بس من سمعتني سكتت وشفت عيونها الحلوات لمعن وكالت بصوت ناصي ومتقطع:

ل..ليش..اش..اشبيه اني ومحد مكلبني ولا احد راح يكلبني مستقبلا؟؟؟

وحتى اقهرها اكثر كتلها:

اعتقد تعرفين شبيج!!!!! واني شخصيا ما احب انزل لمستوى اوضحلج بيه شلون وليش وشبيج؟؟؟

احبتي بعد هذه الاهانات المتبادلة....ماذا تتوقعون هل هناك بصيص امل ..ولو ضعيف ..لتتحسن به الامور بينهما ام ان الحرب الكلامية ستبقى مستمرة بينهما..اكتبوا لي