رواية جريمة قتل الاب وزوجتة الفصل الثالث بقلم ياسر عوده
ورغم نصيحه الاب لـ بنته، بس سميه اتربت على انها تقف مع جوزها وتساعده، وفعلا هي راحت وباعت الدهب ودفعت فلوسه لـ مصطفي، وعلشان ماتزعلش ابوها منها اشترت دهب تقليد علشان مافيش حد من اهلها يعرف اللى هي عملته.
اول لما مصطفى خد منها الفلوس قالها:
-انا عمري ما هنسي الجميل اللى انتي عملتيه فيا ابدا يا سميه، واوعدك اني هعوضك احسن منه وبأسرع وقت.
سميه كانت مصدقه مصطفى في كل كلمه قالها، وسافر مصطفى فعلا، ومن ساعه لما سافر واحواله اتغيرت، مصطفى كانت احواله كويسه اوي، هو قدر يلاقي شغل بسرعه واحواله الماديه اتحسنت اوي، بس المشكله انه رجع لهوايته القديمه وعلاقاته النسائيه الكتير، وماكنش بينزل مصر الا 15 يوم بس في السنه، وبعد مرور السنين كانت سميه خلفت من مصطفي ابنها محمود ودا الابن الكبير، وكمان منال ودي بنت مصطفي اللى راحت بعد كده وقدمت البلاغ.
فضل مصطفى في الخليج حوالي 20 سنه، وبعدها قرر انه يرجع يستقر في مصر، وبعد ما رجع بفتره اتفاجئت سميه بان مصطفي بيقولها:
-انا شوفت وحده وعجبتني وقررت اني اتجوزها.
الغريبه ان سميه ماردتش عليه وقتها نهائي، واتجوز مصطفى من هيام فعلا، واشتري ليها بيت يقعدوا فيه هما الاتنين بعيد عن اسرته.
ــــــــــــــــــــــــــــــــــــــــــــــــــــــــــــــــــــــ
دي كانت التحريات اللى جمعتها الشرطه وقدمتها للنيابه، وكان اول قرار للنيابه انها طلبت تفتيش شقه المجني عليهم وفحصها بدقه، كان عندها أمل اننا نلاقي أي دليل يساعد في التحقيقات، ويمكن دا احسن قرار خدته النيابه.
كنت انا وفريقي من المعمل الجنائي اللى اشتغلنا في شقه المجني عليهم، وكانت في مفاجأت كتير اوي، ولما سألني وكيل النيابه:
-في أي دليل قدرتم تتوصلوا ليه يساعدنا في التحقيقات؟
-الحقيقه يا فندم احنا مش بس اتوصلنا لدليل واحد، الشقه بالنسبالنا كانت كنز ادله.
-مش فاهم تقصدي ايه؟
وقتها انا صدمت وكيل النيابه وقولتله:
-جريمه القتل للمجني عليهم مصطفى وهيام تمت هنا في شقتهم.
وزي ما قولتلكم، كلامي كان صدمه لوكيل النيابه، اللى سألني:
-انتي متأكده من الكلام ده؟
-طبعا متأكده يا فندم، انا وباقي الفريق اول لما دخلنا الشقه انتبهنا لـ ريحه المنظفات الشديده اللى في الشقه، وعرفنا وقتها ان في حد كان بيحاول يخبي حاجه، ومن هنا ابتدينا عمليه البحث، وظهرت ادله كتير اوي.
-أي هي الادله دي؟
-بقع دم في المطبخ، دي اول حاجه لقناها، واضح كده ان المجني عليها اللى اسمها هيام اتقتلت في المطبخ، لاننا لما قارنا الحمض النووي لبواقي الدم ده مع دمها لقناه متطابق، ورغم ان الجاني حاول كتير ينضف المطبخ من الدم، بس هو ماكنش عارف ان احنا عندنا اجهزه ومعدات بتساعدنا نظهر الدم حتى بعد التنظيف.
-طيب وبالنسبه للزوج مصطفي؟
-تم قتله في الصاله، ودا كان واضح من اثر الدم اللى لقناه في الصاله، واضح كده ان الجاني هاجمه وهو مش شايفه او منتبه ليه، وطعنه اكتر من مره، وبعدها لقينى ان اثر الدم رايح للحمام، ومش بس دم مصطفى، لا حتى المجني عليها هيام، تم سحبها للحمام وهناك ابتدي عمليه التقطيع علشان يقدر ينضف المكان كويس بعدها.
-تمام رفعتم البصمات من الشقه؟
-ايوه يافندم، ومالقناش غير 3 بصمات بس، البصمه الاولى للمجني عليه، والتانيه لمراته، اما البصمه الثالثه فكانت لـ منال بنته، احنا لقينا بصمات لـ منال في كل الاوض والصاله، بس مالقناش أي بصمه ليها في الحمام خالص.
-طيب لقيتم أي اثر للعنف؟
-للاسف لا احنا لقينا ان باب الشقه سليم، يعني اللى دخل الشقه دخل بالمفتاح بتاعها، اما بالنسبه للشبابيك فكلها كانت مقفوله، ومافيش أي اثر لـ أي محاوله لـ اقتحام الشقه نهائيا.
-شكرا يا دكتوره، انتم عملتم شغل كويس اوي.
وبعد ما خلص وكيل النيابه كلامه معايا، بعدها اتكلم مع دكتور الطب الشرعي، طبعا الشقه ماكنش فيها جثه، وشغل الطب الشرعي ماكنش كتير في الشقه، بس الدكتور قال معلومه مهمه اوي هتفيد التحقيقات، والمعلومه دي ان الدكتور قال:
-انا حاولت احدد تسلسل الاحداث عن طريق اقدميه اثر الدم في المكان، وقدرت اوصل لـ استنتاج مهم جدا، في فرق زمني بين الجريمتين حوالي ساعتين كاملين، واول جريمه حصلت هي جريمه قتل المجني عليها في المطبخ، واضح ان الجاني هجم عليها وهي مش منتبه، وطعنها اكتر من مره، وبعدها بـ ساعتين قضي على الزوج في الصاله.
-احنا ممكن نستنتج من كلامك يا دكتور ان الجاني دخل الشقه وقتل المجني عليها الاول وكان زوجها مش موجود، وبعدها انتظر عوده الزوج وبعدها قتله؟
-بالظبط يا فندم.
ورغم انها كانت معلومه وحده بس كانت مهمه جدا، والمعلومه دي خلت النيابه تحط اول المشتبهين فيهم هي منال، كانت هي الوحيده اللى معاها مفتاح شقه ابوها، ودا اللى قالته قبل كده في التحقيقات، واستدعي وكيل النيابه منال للتحقيق معاها:
-انتي الوحيده اللى كان معاكي مفتاح شقه المجني عليهم، ومن الطبيعي تبقى اول حد نشتبه فيه بارتكاب جريمه القتل؟
-يا فندم لو انا اللى قتلت زي ما حضرتك بتقول، ليه اروح واعمل محضر باختفاء بابا وهيام.
-لا دا مش دليل يبراءك، ببساطه يمكن انتي اتعمدتي تبلغي علشان نستبعدك من دائره الاتهام.
-يا فندم مافيش أي سبب يخليني اقتل بابا ومراته، حضرتك ماتعرفش بابا بالنسبالي كان ايه، هو عمره ما حرمني من حاجه، وكان بيعاملني معامله مختلفه عن معملته لـ امي واخويا، هو كان ديما بيقولي يا منال انتي عندي غير كل الناس، انتي حببتي.
-علاقه ابوكي بيكم كانت شكلها ايه؟
-علاقه بابا بـ امي واخويا كانت غير علاقته بيا خالص، لما بابا رجع من السفر وقعد معانا في البيت، كان اخويا كبر وكان اتعود على عدم وجوده في البيت، وامي نفس الموضوع كانت خلاص اتعودت على غيابه، اما انا فلما بابا قرر انه يستقر ومايسافرش تاني كنت فرحانه اوي، اصل انا حياتي كانت صعبه في غيابه.
-صعبه ليه؟
-حضرتك مش عارف يعني ايه اب يغيب لفتره طويله اوي، او ممكن تقول اب ماكنش موجود من الاساس، النصف شهر اللى بابا كان بينزله اجازه كل سنه او حتى اوقات ماكنش بينزل خالص كنا بنعتبره زي الغايب او ممكن نقول بابا كان ضيف بالنسبالنا، يادوب يجي ويقعد معانا شويه وبعدها يسافر مره تانيه، ولما قرر انه يبطل سفر انا فرحت، اصل اخويا محود كان متحكم فيا، كان بيتعامل معايا على اني يتيمه وهو اللى مسئول عني، كان مخلي حياتي صعبه اوي بتحكماته فيا.
-طيب وايه موقف امك من الموضوع ده؟
-من زمان واحنا عارفين ان محمود حبيب امه زي ما بنقول عندنا، امي كانت بتعتبر محمود كل حاجه ليها رجلها وسندها وابنها الكبير، هي ماكنتش بتحب تزعله ابدا، ومن صغره وهي بتتعامل معاه على انه راجل البيت، وعلشان كده كانت شايفه ان تصرفاته معايا صح ومافهاش أي مشكله، زي ما كانت بتقول ديما اخوها ولازم يربيها.
-ايه طبيعه علاقه محمود بـ ابوه؟
-كانت تقريبا كده مقطوعه، محمود وبابا عمرهم ما اتفقوا ابدا، ولما كان بابا عايش معانا كان كل يوم في خلاف بين محمود وبابا، ومش بس كده اقوات حصل بنهم خلاف لدرجه ان محمود طرد بابا من البيت وقاله انه بالنسباله راجل غريب.
-وموقف امك ايه من التوتر اللى كان بين اخوكي وابوكي؟
-امي ديما كانت في صف محمود، اصل هي كانت ديما سبب الخلاف، امي ديما كانت بتشك في تصرفات بابا، كانت لما بتتخانق معاه بتفكره بعلاقاته مع الستات، هي كانت مقتنعه ان بابا ليه علاقات نسائيه كتير، وبسبب خلافاتها مع بابا كان محمود بيتدخل وقتها، وعلشان كده امي كانت دايما وقفه مع محمود في كل حاجه.
-انتي عارفه ان احنا مالقناش أي بصمات في مسرح الجريمه غير بصماتك انتي بس هي البصمات الوحيده اللى كانت موجوده في الشقه مع بصمات المجني عليهم؟
-حضرتك انا كان معايا مفتاح الشقه، وكنت بدخل وبخرج من الشقه برحتي، وطبيعي ان بصماتي تبقى موجوده في الشقه، انا اوقات كنت بدخل وبابا ومراته مش موجودين فيها.
-الكلام دا يبرر وجود بصماتك في الصاله وممكن المطبخ، بس ليه بصماتك موجوده في اوضه النوم وعلى الدولاب؟
لما وكيل النيابه سأل السؤال ده، وقتها منال سكتت خالص وماتكلمتش في البدايه، وقتها وكيل النيابه اعتقد انها هتعترف بالحقيقه وهتقول انها هي اللى قتلت ابوها ومرات ابوها، بس الحقيقه ان منال لما اتكلمت فعلا قالت كلام تاني خالص، هي قالت:
-انا هقول الحقيقه كلها يا فندم، انا كنت بدخل الشقه اوقات كتير اوي، خصوصا في الاوقات اللى بابا ومراته مش موجودين فيها، انا كنت ببقى عارفه هما فين ولما بعرف كده بروح على الشقه على طول.
شكرا لزيارتكم عالم روايات سكيرهوم
