رواية صرخة مؤجلة الفصل الرابع بقلم ود الزهراء
رحتي ... رحتي وخيالچ لاغفه ولامشه
ولا عاف روحي ولا بعيني استقر
اربع مواسم ظل خريفج يجي
وطاحت ملامح وجهي مثل الشجر.
- علي رشم.
•••••••••••••••••••••••••
سَدف
أمشي وراهم كاضة الجنطة بأيد و الأيد الثانية لازمة أيد مينا، أحس روحي ضايعة أمشي و انا خسرانة كلشي ما عندي شي أسند روحي عليه اذا تعبت و ماعندي أحد أشكيله همي و يخفف عني، باللّٰه انا شنو اليضمن اليّ هذول ما راح يأذوني؟ اذا هو أقرب الناس اليَ كسرني ببدال ما يصيرلي سَند، بس اسكت روحي بـ هو چان زين بس اصدقاء السوء همَ الي وصلوه الـ هاي المرحلة و ضيعوه و ضعنه وياه
ضامة بگلبي عتاب لو أحچي بيه منا الباچر ما يخلص عتاب مو مال يوم و يومين مال سنيــن، أتنهدت ذبلانة روحي و أحس گلبي معصور عصر باوعت گدامي عمتي وحيدة صايرة بصف أبنها يسولفون بيناتهم ما أسمعهم عدل علاوي يمشي بصفي و مينا كاضة بأيدي، الشارع اظلم كلش لأن أمبيرية فَـ ما نشوف عدل طبينة الشارع بيت جدي نمشي بيه لأن البيت صاير بنهاية الفرع
لـ حد ما وصلنا سحب الخيط الي موجود بالباب غسان و دخل فاتحلنه الباب و دخلت عمتي وراه و احنه اول ما دخلنة كفختنة ريحة الأكل واحد جاي يگلي
طب غسان للهول و عمتي انتظرتنة نذب احذيتنة حتى ندخل سوة كملنة أخذت من عندي الجنطة مالتنة و طبينة، أستقبلونة عمي صباح و عمي فلاح يرحبون و يهلون بينه بس مبين من ورا خشومتهم
صباح:: كل الهلا عمي زارتنا البـركة
فلاح:: هلا بيكم بوية تعالوا تفضلوا تفضلوا
فتحلنة الطريق و دخلنة لگيت ولد هواي متجمعين بالهول شي ممد و شي يشرب نارگيلة و يضحكون و يباوعون بنقالاتهم، درت عيني الـ عمتي عقيلة من صاحتلي رحت يمها و گلتلي
عقيلة:: روحي الغرفة نيروز فوگ تصير ثاني غرفة على أيدچ اليمنة تلگينها حطي غراضچ هناك تضلين يمها انتِ و اخوانچ
درت عيني النيروز من نفخت هوا بضوجة متكتفة حسيت روحي ثگيلة عليهم متحمليني بس علمود حچي الناس، هزيت راسي بمعنى خوش و أخذت الجنطة من أيد عمتي وحيدة و مشيت صاعدة و اخواني گدامي يمشون، وصلت النهاية الدرج تلگاني علاوي شال مني الجنطة لأن كلش ثگيلة رغم ملابسنة مو كلش هواي بس گوة شايلتها أيدي بايدة
ضليت أدور عيوني بالمكان ممر و من الجهتين اكو غرف بيبانهن صاج، باوعت للغرفة الثانية الصايرة على اليمنة أشرت العلاوي و ميونة عليها و دخلنالها چانت غرفة عادية الأثاث صاج و چرباية نفر واحد صايرة بالزاوية، حطيت الجنطة بالگاع و ذبيت عبايتي و گعدت بالگاع و اخواني هم گعدوا يمي ما أعرف شسوي أنزل لو ابقى هنا، گالت مينا
مينا:: أگلچ احنه راح انضل هنا؟
سَدف:: أي
مينا:: أحس ما أريدن
علي الرضا:: حتى انا
ضليت ساكتة ما أعرف شحچي، همَ همين التهو يلعبون و انا گاعدة يمهم صافنة مرت فترة شوي طويلة و دخلت نيروز خشمها ما يگصة الموس گالت
نيروز:: هاي شمسوين بالغرفة صدگ چذب ما صارلكم ساعة و هيچ مخيسينها
باوعت على المكان نظيف بس الجنطة و يمها عبايتي گلتلها
سَدف:: نظيفة ما بيها شي بس الجنطة ما أدري وين اخليها
نيروز:: أستغرراللّٰه، نزلووا تعشوا
سَدف:: ما نريد
نيروز:: بعد احسن
طلعت من الغرفة و عافتنة حتى ما لّحت علينة الحَمدُللّٰه و الشكر، چنت جوعانة بس من شفت أسلوبها مو حلو عبالك نشتغل عدها، دار عليَّ علي الرضا
علي الرضا:: شني هيَ سَدف انا جوعان
مينا:: انا هم وعلي
سَدف:: كافي عفية أسكتوا انا هم جوعانة
سكتوا و انا بطني ضلت تطلع صوت من الجوع، أنوب ضلينة ما ادري شگد و محد تعب روحة شوي و أجانة يلح علينه عبالك ما صدگوا واللّٰه يا اللّٰه
مر الوكت كلش بطيء و احنه گاعدين نصفن مينا خلت راسها على رجلي و نامت بقى بس علاوي صافن سألته
سَدف:: بـ شنو تفكر علوش
علي الرضا::أگلچ يعني هسه أمي بعد ما نشوفها؟ هذا آسر گلالي يگلي راحت بعد ما ترجع
سَدف:: راحت المكان أرحم من مكانها الچانت بيه، راحت يم رب رحيم هناك المكان الـ هيَ بيه يخبل بيه كلشي
علي الرضا:: اللّٰه چا خلي أروحن وياها
سَدف:: أسم اللّٰه يمة أسم اللّٰه لا تگول هيچ
سحبته الحضني طاير گلبي، ضليت أبوس بشعره و هوَ ما مفتهم شي دفعني عنه يباوعلي بأستغراب
علي الرضا:: شمالچ سَدف
أنتبهت الروحي چفصت هزيت راسي بـ ماكو شي و أبتسمت بوجهة، سكت هوَ و انا سكتت ضل يباوع بالغرفة صارت عينه على مخدة گام جابها و أجه، حطاها و تمدد عليها بلاية فراش خليت أيدي على راسه أطبطب عليه على كيف لـ حد ما غفى، حسيت رجلي خدرت لأن عليها راس مينا شلتها من حضني و خليت راسها على كيف بالگاع و گمت جبتلها مخدة خليت راسها عليها
أنوب احتاريت شسوي ضالة وحدي گلت خلي أنزل يم عمتي وحيدة لأن الوحيدة الأرتاحلها، طلعت من الغرفة و نزلت البيت هدوء بس اصوات مواعين نزلت على كيف أباوع منا و منا الهول فارغ محد بيه مشيت للمطبخ موجودة بيه براء و نيروز و عمتي صبيحة دخلت مستحية أنتبهتلي نيروز و صاحت
نيروز:: ياا هلا بـ سَدف
حچتها بنبرة أستهزاء من صوتها انتبهن الي براء و صبيحة، براء گالت
براء:: هلا سدوفة تعالي شني خطار قابل، ليش ما أتعشيتي
سَدف:: خية ما أشتهي
براء:: لا شلون ما تشتهين عمتي وحيدة گالت ما كلت بالغدا ولا أتعشت
صبيحة:: تدلع علينه
سَدف:: مو بَعد مساع ما أشتهيت
براء:: چا ياللّٰه هسه أكيد جعتي عزلتلچ صحن الچ و الأخوانچ
سَدف:: مشكورة خية ما تقصرين
أبتسمت اليَ و نيروز و صبيحة يباوعلي بطرف عينهن عبالك كاتلة أبوهن الحَمدُللّٰه و الشكر، أخذت الصحن بيه سمبوسة و فلافل و بتيتة خليتة بصينية و أنطتني براء خبز و خضرة هم خليتهن و خلتلي سراحية ماي شلت الصينية أريدن أصعدها فوگ صاحت صبيحة
صحبية:: غرفة بتي عود ما الگه طايح بيها سمعتيني لو لا
هزيت راسي و كملت طريقي فوگ، رغم حچيها و حچي امها المعلگ گلت حقها البنية غرفتها وحدها و گاعدة و ساكتة و احنه طگيناها صفح اكيد تخاف على غرفتها، دخلت للغرفة گعدت أخواني و كلينة بس خلصنا نزلت الصينية و غسلت مواعيني چان محد موجود فَـ بسرعة كملت، و رجعت مرة ثانية صعدت باوعت للساعة الي بالغرفة عبرت العشرة بالليل و أخواني رجعوا ناموا سودة عليَّ بدون جودليات منهم للگاع و نيروز بعدها ما صاعدة حتى اگللها على جودليات
ضليت منتظرة نيروز يمتى تصعد حتى اگللها كلش طولت، شوي و فتحت الباب گبل گلتلها
سَدف:: خية بس أريدن جودليات للجهال راحوا تكسروا من الگاع
نيروز:: أييي نسيت أمي انطتني جودليات و بطانيات الكم خلي أروح اجيبهن و أجي
هزيت راسي و هي طلعت من الغرفة بقيت منتظرتها لـ حد ما أجت و جايبة وياها جودليات قديمات كلش و رايحة ارواحهن چلب حشى السامع ما ينام علبهن وصخات حيل بحيث من شمرتهن الغرفة انترست تراب
سَدف:: عود صدك؟ ننام على هذني!
نيروز:: ليش شبيهن اصلًا هواي عليكم
ضليت مبحلقة عيوني مصدومة من وكاحتها، و المصيبة ما اگدر احچي لأن اصلًا جاية ضيفة هنا مو بيتي هذا، راحت نامت على چربايتها و الفراشات الوصخة بالگاع أتعوذت من الشيطان و رحت لميتهن و خليتهن على صفحة مو بـلازم ننام على فراش باچر أگعدلهن من الصبح أغسلهن ياللّٰه ننام عليهن اليوم ندبرها شلون ما كان و ما أدري شلون أگضي عمري بين هذول العالم اذا هو احنه أول ليلة النه و كلونه شلون بيه أذا اكمل وياهم سنيين
رحت غطيت اخواني بعبايتي و صرت بنصهم و نمت، ثاني يوم الصبح فزيت على صوت عمتي صبيحة داخلة للغرفة
صبيحة:: گومي سَدف
سَدف:: ها عمة
صبيحة:: نزلي عمچ يصيحلچ يگول خل تنزل تساعد البنات
هزيت راسي و گمت باوعت للساعة بالستة رحت غسلت و رجعت للغرفة أخواني نايمين طلعت و سديت الباب، نزلت جوة لگيت الكل نايم بس عمتي صبيحة تطلع بالزوالي للساحة رحت يمها بس شافتني گبل گلتلي
صبيحة:: ياللّٰه شدي حزامچ وياي خلي نغسل الزوالي جاينة الشته
باللّٰه هسه انا بيا حال وكت زوالي؟ گلتلها
سَدف:: عمة واللّٰه حيلي بايد
صبيحة:: شلچ بهالعيارة هاي تعاي تعاي ما بيچ شي
تحچي و تفتح بالزولية، دخيلك يا ربي شني هاي المذلة صرفنت أرداني و شديت حجابي و گلتلها
سَدف:: خاف واحد من الولد يدخل
صبيحة:: لا محد كلهم بالشغل بس غسان و آسر نايمين مو بحالچ
سَدف:: عمة بس راح اجيب الجودليات أغسلهن
صبيحة:: يا جودليات؟
سَدف:: البارحة انطتنياهن نيروز كلش وصخات حتى ما گدرنه ننام عليهن راح هسه أغسلهن وي هذن
صبيحة:: نظيفات ما بيهن شي
سَدف:: لا عمة واللّٰه وصخات و ريحتهن مو حلوة
صبيحة:: اي هذا الموجود، هسه بسچ و تعالي غسلي هذني ياللّٰه خذانه الوكت
سكتت و كفيت دشداشتي خليت الزوالي وحدة فوگ الثانية و بديت أرش بيهن و هيَ واكفة على صفحة تباوعلي و توجهني حتى تقيم ادائي نحمد اللّٰه و نشكرة، الجو بيه نسمة برودة شوي و من گعدت افرك بالزولية تنگعن ملابسي و كلش بردت و هاي عود بعدني أول زولية وراي أربع زوالي كل وحدة بگد بيتنة أنوب هاي شوي و عافتني و طبت جوة لا هيَ المساعدتني ولا مخلية أحد يساعدني، نزلن دموعي محترگ گلبي من وراها ضليت افرك و أمسحهن بكتفي
على ما كملت الزولية الاولى انا منتهية من التعب و أنا اصلًا حيلي بايد ما ادري شبية، هسه أحتاريت شلون أشيلها ثگيلة حييل بعد شتائية و لاحاها ماي ما تنشال، ضليت واگفة صافنة عليها متخوصرة ما أدري شسوي
لا بيه أدخل أصيحن الأحد ولا بيه أبقى، طبگتها و ضليت أسحگ عليها حتى ينزل الماي شوي و وي ما انا صاعدة طلعت براء هستوها گاعدة
سَدف:: اللّٰه جابچ تعالي شيلي وياي الزولية ضالة محتارة شلون أشيلها
براء:: عود صدگ وكت زوالي هسه هاي منو گلچ تطلعينهن
سَدف:: عمتي صبيحة گالت هم ياللّٰه گلتلها عمة انا ما بيه حيل بس ما أهتمت
براء:: شو تعاي طبي طبي باعي شصاير بيچ انا اكملهن
سَدف:: ياا خية ما تگدرين وحدچ انا أساعدچ
براء:: گلتلچ طبي مالچ غرض انا هسه اروحن اگعد لمياء و نيروز وياي روحي كملي نومتچ
سَدف:: ياهيَ لمياء؟
براء:: مرة غيث أبن عمچ صباح ما أجت الفاتحة أمچ
سَدف:: و انتِ مرة منو؟
براء:: انا مرة ليث اخو غيث، و وسام مرتة اسمها شيماء عازلين
سَدف:: يعني ولد عمي صباح كلهم متزوجين حتى رافال
براء:: اي رافال متزوجة قبل لا انا اجي يمهم و عدها وليد و خمس بنات و كلش نادر تجينة لأن رجلها شوي متشدد و ما يخليها الا بالمناسبات القوية
سَدف:: زين و ولد عمي فلاح انا ادري بس لُجين متزوجة بس الباقيين ما ادري بيهم...
أخذتنا السوالف و ضلينة نغسل و نسولف و هيَ نست السالفة
براء:: عدنان و مرتضى متزوجين و عازلين و لُجين هم متزوجة بس غسان باقي بدون زواج
سَدف:: شعجب ما يتزوج
براء:: واللّٰه ما ادري رغم اهله شگد يلحون عليه بس هو ما يريد
سَدف:: و بيت رباح؟
براء:: كنان و آسر ما متزوجين و نيروز همين بعد تدرين انتِ
سَدف:: نيروز فد متغيرة ما عبالك گبل چنة الروح بالروح و لعبنة كله سوة هسه لو شايفتها البارحة تحچي من ورا خشمها وياي و جابتلي جودليات وصخات كلشش گلتلها يابة هاي شلون ننام عليهن تگلي هواي عليكم، عليچ اللّٰه يعجبچ هذا الحچي؟
براء:: ياا عمت عينها ما اجيتيني و انا انطيچ
سَدف:: ما چنتي موجودة و الوكت متأخر أستحيت بعد
براء:: اختچ انا بس تحتاجين شي غرفتي مقابيل غرفة نيروز
هزيت راسي و ضلينة نسولف عن أمور عادية تسولفلي مواقف عمتي عقيلة وياها و شلون شالعة گلبها
سَدف:: يعني بصراحة احچيها ما مستغربة من تعاملها وياچ لأن السم يمشي بالدم هيَ و حتى صبيحة، من چنت صغيرة گعدنة فترة هنا ببيت جدي و راونه النبي عربي هنه و جدتي تخيلي أمي اللّٰه يرحمها چانت حامل و بتوأم بعلاوي و مينا چانن يذبن عليها شغل البيت كله يعني تخيلي بعد هذا البيت كله على أمي و چانوا جهالهن صغار يوصخون و أمي تلم وراهم و كل هذا و ما تحچي لأن سودة عليَّ تخاف لا يطلگونها و هي وحيدة اهلها و ماتوا يعني محد ضل الها تروح يمه لو تطلگت، و همين انجبرنا نگعد من ورا أبوي اختفى شهر كامل و احنه بعد اضطرينة نجي
و من اجة هد حيلها بجيتة و هو فاقد جايبينة عمامي واللّٰه لـ حد هسه اتذكر من دخلوا ابوي شلون الفاقد الوعي بس يسولف بأشياء ما مفهومة، و جدي من سمع حچي عمامي و شلون لگاه أبن عماد و فضحنة بالديرة انجلط و عمامي احتاروا بيه بالمستشفيات و أول ما صحى گال العمي صباح أطردهم كلهم ما اريدن أشوفن وجوهتهم من أرجع، أجانه عمي صباح يصيح لمن غراضچن ياللّٰه ما الچن ضلة هنا، و أمي تتوسل بيه خوية فدوة وين نروح انا و بتي يگلها بعد ما النه غرض بيكم انتِ و رجلچ، لمت أمي اغراضنة ميتة من البچي
و أنا ابچي على بچيها طلعنة المغربية واللّٰه براء لـ حد هسه أتذكر طلعنة و چانت اكو عركة مال بزازين و انا ضليت أصرخ خايفة و أمي شابگتني و هيَ هم خايفة، ضلينة واگفين على صفحة لـ حد ما هدأن ياللّٰه مشينة البيتنة و من يومها أمي ما رجعت الطبيعتها
مجرد ما بديت احچي خانني دموعي و براء عافت الصوندة و أجت يمي تسكتني و تتحسب عليهم، مسحت دموعي و كملت فرك افرك من كل گلبي أطلع ضيمي بالفرك انتبهتلي براء
براء:: سَدف روحي نامي
سَدف:: لا ما نعسانة ياللّٰه راح نكمل
و انا افرك و افرك ما متوقفة و بعد هيَّ ما حاچتني لـ حد ما خلصناهن كلهن و عفناهن يوشلن اباوع الروحي غاطة بالماي و كتلني البرد گالت براء
براء:: هسه ياهو يجيبلنة ملابس
سَدف:: ما ادري باللّٰه شوفي عمتي صبيحة چانت گاعدة
مشت براء الباب المطبخ تصيح على عمتي لـ حد ما أجتها عمتي هادة
صبيحة:: و خفة الهالصوت شترديين ما تگولين الوادم نايمة
براء:: روحي گعدي رجلي گليلة براء تريد دشداشتين
راحت عمتي و ضلينة منتظرينها لـ حد ما أجة رجل براء راد يطلعلها بس هيَ و گفتة
براء:: هووب هوب البت هنا
ليث:: يا بت؟
براء:: بت عمك
ليث:: هاا أعتذر
دخل جوة و براء أنطتني دشداشة دخلت للحمام الخارجي بدلتها و طلعت و رحت غسلت القديمة بأيدي بالمغسلة و شريتها و دخلت جوة، باوعت للساعة عدة الوكت بساع بساع صعدت أريد أشوف أخواني لأن مو من عوايدهم يضلوون نايمين لـ حد هاي الساعة كل مرة يگعدون من الصبح و اصلًا همَ الي چانوا يگعدوني، دخلت للغرفة لگيت نيروز گاعدة و تمشط بشعرها
ما حاچيتها رحت لمينا گعدتها و گعدت علاوي و نزلنا جوة يم براء، لگيتها تسوي ريوگ ردت أساعدها بس ما قبلت ضليت بس گاعدة و اخواني يمي همستلي مينا
مينا:: أريد أباوع دورايمون
علي الرضا:: انا هم
درت الـ براء گلتلها
سَدف:: خية وين التلفزيون يريدون يباوعون أفلام كارتون
براء:: تعالوا وياي بالهول، يا قناة يباوعون
سَدف:: سبيستون
هزت راسها و گاموا وياها، انا شفت كم ماعون وصخ وگفت أغسلهن و هيَ أجت
براء:: يااا خية شني السالفة شو هديهن هديهن
سَدف:: عوفيني أگضي وكت بيهن شعندي گاعدة
عافتني و كملت تخلي البيض و الأجبان بصحونة گلتلها
سَدف:: گعدوا؟
براء:: أي ضلوا يباوعون و هسه اسويلهم لفات و گلاصات حليب جابة عمي البارحة
سَدف:: مشكورة يا بعد گلبي
براء:: شني السالفة ترا حالهم حال أبني
أبتسمت الها و وي ما كملت ما احنه جاي نسولف سمعت صوت بچي مينا و علاوي طار گلبي، ركضنة انا و براء نريد نشوف شبيهم اول ما وصلتلهم وگف گلبي من شفت علاوي مفشوخ راسه و دمه بطوله
شكرا لزيارتكم عالم روايات سكيرهوم
