رواية صرخة مؤجلة الفصل السادس بقلم ود الزهراء
يا حزن ، ياريت اعرف چنت اسويلك حديقة ياسمين
وممشى من كاشي الفرح جدام بيتك
ياحزن ، ياريت اعرفك وين تسكن
چنت اكلك لاتجيني وتمشي كل هاي المسافة ، انا وحدي جان اجيتك
ياحزن ، وحياة حزنك ماعرفتك
چنك مغير مشيتك..
-مُظفر النواب
••••••••••••••••••••
سَدف
صحيت و انا بالمستشفى و بيدي كانيولا و چانت يمي لُجين بس شافتني صحيت راحت صاحت للممرضة ، أجتني الممرضة عدلت المغذي تحاچيني و تسألني و أنا لساني ثگيل و بالگوة احچي أجر الكلمة جر، قاست ضغطي و كملت كل الاجراءات و طلعت گلتلي لُجين
لُجين:: شلون صرتي؟
سَدف:: الحَمدُللّٰه بس بطني جاي توجعني كلش
لُجين:: باعي... فد شوي و تدخلين الـغرفة العمليات
خفق گلبي و أحس نفسي ثگل من گالت هالحچاية باوعتلها متوترة و كاضة گلبي بيدي
سَدف:: عمليات؟!! شبية
لُجين:: سَدف بس على كيفچ لا تندميني لأن گتلچ
سَدف:: ياااا لُجين لا تسودنينيي ، شبية ولچ
لُجين:: واللّٰه ما أعرف التفاصيل، هسه شوي و تجيچ الدكتورة تفهمچ حالتچ
ضليت أبچي كلشي ما مفتهمة و لُجين تورطت احتارت شتحاچيني و شلون تهدأني لـ حد ما أجت الدكتورة النه و ضلت تحاچيني
- على شنو البچي، سَدف ضرغام غازي مو صحيح؟
سَدف:: أيي دكتورة عفية شبية
- ماما لا تخافين عندچ نزيف داخلي نتيجة الأصابة و الفحوصات بينت الأصابة بأحد المبيضين لازم ندخلچ عملية حتى نوقف النزيف و نصلح الضرر كل ما أستعجلنة بالعملية كل ما كانت النتيجة أفضل، و هسه صلي على النبي و سمي بأسم اللّٰه و أن شاء اللّٰه كلشي سهل
ضليت أحدق بوجه الدكتورة مصدومة و درت وجهي الـ لُجين ساكتة و مدنگه گلت للدكتورة
سَدف:: و أذا ما سويتها؟
-راح يستمر النزيف و ممكن حالتچ تتدهور و لهذا ما نگدر نأجل الموضوع
و بعد أقناع طويل من لُجين و من الدكتورة وافقت بس خايفة كلش، ورا شوي اجت براء و عمتي وحيدة يمي و لُجين بعد راحت لـ عيالها و أنا قبل لا أروح وي الممرضة كضيت عمتي
سَدف:: فدوة عمة خاف يصير بية شي عينچ على أخواني فدوة براء فدوة أعتبريهم حالهم حال ابنچ عليچ اللّٰه ولا تخلن واحد يطگهم
وحيدة:: ياااعع يمة أسم اللّٰه گولي يا اللّٰه عمة هسه تطلعين بخير و سلامة و ترجعيلهم سالمة غانمة
بچيت مأيسة ما أدري شبية و أجتني براء شبگتني تحاچيني
براء:: گولي يا اللّٰه خية خلي عينچ بعين اللّٰه صيري سباعية واللّٰه نذرت لو طلعتي سالمة نذبحلچ جوة رجليچ ثلاث دجاجات
سكتتني بالگوة و هم حاولت أسكت لأن البچي ما يفيدني مشيت وي الممرضة الغرفة التبديل و ما ببالي غير أخواني و أدعي رب العالمين يطلعني من هاي الشدة مو الخاطري الخاطر أخواني لأن محد يضل الهم خفت كلش من حسيت بدأ الوكت يمشي بسرعة و قرب وكت العملية بحيث بالگوة سيطرت على أيدي ترجف بدلت و طلعت و لساني يلهج بذكر اللّٰه و أهل البيت و أردد بيني و بين نفسي
سَدف:: نادِ عليًا مُظهر العجائب تجدهُ عونًا لكَ في النوائب كُل همٍ و غمٍ سينجلي بعظمتكَ يا اللّٰه و بنبوتكَ يا محمد و بولايتك يا عـلي يا عـلي يا عـلي
ضليت أكرر بيها و أمشي وي الممرضة و تسألني خو ما خايفة؟ و أنا أچذب أذا گلتلها لا، وصلنة الغرفة العمليات باردة ثلج رحت گعدت على السدية لـ حد ما أجة دكتور التخدير مبستم أبتسامة هادئة حقن مادة التخدير بالكانيولا و گال
-عدي تنازلي من العشرة للواحد وراها ما راح تحسين بشي
سويت مثل ما گال.، شوي شوي حسيت بدوخة و رحت بنوم عمييق.....
حاولت أفتح عيني بس الرؤية مغوشة و بالگوة ياللّٰه فتحتها الضوة صار بعيوني، چانت يمي براء و ممرضة بس شافتني الممرضة صحيت ضلت تحاچيني
-تسمعيني؟
سَدف:: أي
-شنو أسمچ؟
سَدف:: سَدف
- وين انتِ هسه؟
سَدف:: بالمستشفى
-هاي شگد؟
مسويتلي بيدها رقم أثنين گلتلها
سَدف:: أثنين
- الحَمدُللّٰه، شلونچ هسه جاي تحسين بألم لو لا
سَدف:: شوية
- طبيعي هسه شوي و يروح، ياللّٰه انا طالعة بس تحتاجين شي خلي أحد يصيحلي
تشكرت منها براء و هيَّ تگللها العفو هذا واجبي و طلعت، و براء گالت
براء:: شلون صرتي؟
سَدف:: زينة، براء أخواني وين
براء:: يم رَجلي همَ و أبني عفتهم
سَدف:: عمتي وين؟
براء:: راحت للبيت تجيب عشا النه
سَدف:: شگد طولت بالعملية
براء:: واللّٰه هواي تقريب الاربع ساعات او أكثر ما ادري شگد بالضبط
سَدف:: ابوي وين
براء:: خيولي الخايس ولو أغلط عليه گدامچ من طردوه الولد بعد ما أجه
هزيت راسي مقهورة هو سبب وصولي الهالحالة ما أعرف شگول سكتت شوي و حتى براء سكتت أنوب گلت
سَدف:: وين چنتوا كل هاي الفترة
براء:: رحنه يم بيت أهلي كم يوم و طلعنا لأن ليث تضايق أنوب ضلينة يم بيت وسام ضلينة يمهم، و مناك خابرتني نيروز من موبايل أمها تگلي لحگي السَدف راح تموت سودنتني ضليت أدگ و الطم ليث يحاچيني يريد يعرف شكو بس انا فقدت گلت سولها شي ذني الحياية خابر ليث امه و گلتله السالفة أنوب بس گلالي تسودنت أكثر انتظرت عمتي وحيدة تمر عليَّ و اجينة گبل للمستشفىٰ، أنوب ضليت أحچي عليهم ليش مخلينج بحكومي باع الوصاخة همزين ما موتوچ
سَدف:: دياللّٰه يمعودة زين و من سووها الي و ما خلوني معلعلة
سكتت شوي تباوعلي و من سألتها شكو كالت ماكو شي گلبي ضل يلعب بس ما لحيت عليها سكتنة شوي و هيَّ غيرت الموضوع جابتها عليَّ و انا بعدني مبنجة
براء:: تدرين بروحچ ضليتي تبچين!
سَدف:: چذابةة
براء:: و ضليتي تصيحين ولچ براء جيبيلي أخواني يعني براء شتسويلچ رحمة الأهلچ
بس ضحكت أنوجعت حييل بمكان العملية و أنوب ضل يزيد الألم تحنطت ما اگدر. اتحرك بس اتحرك شوي انوجع براء سكتت عني و راحت صاحت للممرضة أجتني و أنطتني أبرة مسكن شوي شوي خف الألم، أحس جسمي متكسر و هزيل و هيچ ميتة من التعب گبل نمت أول ما أنطتني المسكن
ما گعدت ألا على صوت عمتي وحيدة جايبتلي شوربة وكلتني سألتها على أخواني گالت من تصيرين زينة أجيبهم الچ، و ضليت بالمستشفى أربع أيام و براء خطية ما عايفتني يتبادلن هيَّ و عمتي وحيدة يمي، و عمامي أجوني ببدال ما يتحمدولي السلامة يوصون بيه ما أعترف على أبوي و أگول طحت من الدرج و صارت طيحتي علىٰ بطني، لأن الدكتورة من فاحصتني شافت الكدمات و الزراگ مبلغة ادارة المستشفى. و مناك طالبين الشرطة و بس أجه الضابط دخل و وياه بعد كم شخص
- السلام عليكم
سَدف:: و عليكم السلام
-الحَمدُللّٰه على سلامتچ، أعرف حالتچ تعبانة فَـ ما راح اطول عليچ بس اسألچ كم سؤال و أروح
هزيت راسي متووترة گال
- سولفيلي شنو صار
سكتت منزلة عيني الأيدي ما أدري شحچي گال
- الدكتورة گالت عندچ كدمات بأماكن مختلفة من جسمچ و أصابتچ مو بسيطة اريد أعرف شصار بالضبط
بلعت ريگي و سميت بأسم اللّٰه بگلبي و گلت
سَدف:: طحت.... طحت من الدرج
رفع حاجبه ما مقتنع گال
- متأكدة؟؟
سَدف:: أي
بقى يلح عليَّ و أنا ضليت أجيبها منا و أحطها منا و بالگوة سكت رغم ما مقتنع و قبل لا يطلع گال
- اي شي تحتاجينة احنه بالخدمة
هزيت راسي و طلع، دخلوا وراه عمامي و عمتي يستفسرون شنو گلت ما گلت، و انا جاوبتهم بأختصار و غطيت راسي بالچرچف و نمت و فزيت على صوت عمتي و براء يهلن بأخواني همَ بس شافوني رگضولي عمتي تگللهم على كيف لا تتأذة، شبگتهم أثنينهم و بوستهم حييل أفييش شگد مشتاقتلهم و همَ ساكتين سألتهم
سَدف:: شلونكم شخباركم مشتاقتلكم حيلل
مينا:: أحنه هم
علي الرضا:: عبالنه رحتي بعد ما تجين
سَدف:: يااا وين أروح
مينا:: عبالنة راح تتزوجين
سَدف:: شمعرفكم بهذا الحچي
علي الرضا:: هاي عمتي صبيحة تگللنه بعد چم يوم سَدف تتزوج و تعوفكم هنا
سَدف:: براء مو على أساس بقوا يم زوجچ
براء:: أي خية يمه بس وين يرحون غير يضلوون ببيت عمي لأن بيت وسام عدهم جهال فَـ ما يتراهمون سوا
سَدف:: صدگ چذب براء واللّٰه لو أدري فلا اخليهم، باللّٰه انا شمدريني بالنااس أنوب عايفتهم يم صبيحة و نيروز شتدرين بيهن انتِ يگبلنهم
وحيدة:: على كيفچ شو انهديتي على البت مو زين و جاية تعينچ هنا لو ما هيَّ تضلين هيچ
سَدف:: عمة ما گلت شي بس لو جايبيهم هنا أرحم من الگعدة يم صبيحة
براء:: ماله داعي هذا الحچي، ياللّٰه خية العتب عليَّ انا فد وحدة ما أگعد و اسكت أمداني و أمدة حظي
سَدف:: يااا براء عود صدك
ما جاوبتني كضت و طلعت من الغرفة أنوب اتندمت لأن حچيت بس انا ما حچيت شي ليش ما گلتلي همَ يم صبيحة، أتنهدت و درت على أخواني أسولف وياهم و اسألهم شنو سووا بهاي الأيام و همَ يسولفون منطلقين و أستمع الهم بكل أهتمام، تعشيت و عشيت أخواني و براء ما أجت سألت عمتي عليها گالت خذاها رجلها باوعت للساعة بعد وكت مو مال أنام أخواني خطية تبهذلوا شوي و أجت الدكتورة تطمنت عليَّ و گالت
- وضعچ تمام أن شاء اللّٰه باچر تگدرون تطلعون و بعد عشر أيام و تعالوا مرة ثانية نفتح الخياط
كيفت من گلتلي هيچ لأن أنا تبهذلت و الكل تبهذل وياي، طلعت الدكتورة
أخواني فرشتلهم عمتي بطانية بالگاع و ناموا عليها، و انا هم شفت الوضع هدوء لفيت راسي و نمت، گعدت على صوت عمتي تلملم بالطايح وتحچي
وحيدة:: ياللّٰه يمة گوموا هم ياللّٰه نحضر غراضنا و نطلع
سَدف:: عمة باللّٰه تگدرين تگوميني اريد اتحرك شوي أحس جسمي مات ما أحس بيه من ورا الگعدة
أجتني گومتني على كيف وگفت على حيلي بس كاضة بعمتي بس مشيت شوي گب عليَّ الوجع و ضليت أصرخ لا انا الگاعدة ولا أنا الواگفة ضليت متحنطة لازمة بالسدية، عمتي حاولت تگعدني بس انا ما اگدر بس اگعد أمووت جسمي كله أشتعل نار أنوب طلعت تصيح العمي علمود عربانة گلتلها عمة نفس الشي هم ما اگدر اگعد گالت لا حتى بعدين لا احنه نتعذب ولا انتِ گبل بس اخلي عليچ عباية و نطلعچ ضليت منتظرتهم لـ حد ما أجت عمتي و وياها ممرض يدفع بالعربانة حطاها و عمتي لزمتني من أيدي تريد تگعدني بس ما اگدر الولد ضل يحاچيني ما يفهمون اگللهم ما اگدر اتأذة
و بألف يا علي گعدت على العربانة، أخواني گعدوا من النوم و عمتي لمت غراضي و علاوي شال الجنطة عدلت حجابي و عمتي انطتني العباية لبستها و طلعنا عمتي تدفع بيه بالعربانة شفتها تعبانة گلتلها
سَدف:: مشكورة عمة تعبتچ وياي
وحيدة:: ياا يمة شني السالفة واللّٰه حالچ حال لُجين ترا مرات من اگوم عليچ بس احچي شوي و اتندم
سكتت و كملنا طريقنا تلگانه عمي و سوه الاجراءات الباقية و طلعنة من المستشفى بكبرها و أخواني لازمين الكرسي كل واحد من جهة وگف تكسي عمي فلاح و گومتني عمتي من العربانة للسيارة صعدت و عمي أخذ العربانة رجعها للمستشفى و أخواني و عمتي صعدوا أنتظرنا عمي على ما أجه ياللّٰه حرك السايق السيارة
طبگ السيارة كلش بالباب مال بيت عمي و نزلتني عمتي و بالگوة صعدت البايات لأن شوي البيت عالي، فتح الباب عمي أول ما دخلنة تلگتنة براء و لمياء و وياهن صبيحة و نيروز واگفات على صفحة و أكو دجاجات عدلات مخليهن بصندوگ شال وسام دجاجة منهن ذبحها جوة رجلي و الدم ترس هدومي و الگاع دخلتني عمتي جوة البنات سلمن عليَّ و أتحمدلي السلامة، لزمتني براء ببدال عمتي وحيدة و لگيتها مخليتلي فراش بالغرفة الجوة فارغة ما بيها أحد بس بيها الثلاجة. و المجمدة گعدتني على الفراش رادت تروح كضيت أيدها
سَدف:: براء خو ما زعلانة مني والعباس مو قصدي
براء:: يااا لا واللّٰه أنا هم چنت ضايجة قبلها چنت متعاركة وي ليث و ذبيت حرگتي بيچ اعذريني
عافتني وراحت و أخواني گاعدين يمي
علي الرضا:: سَدف عوراچ أبوي؟
سكتت ما جاوبتة رد گال
علي الرضا:: ترا انا چبير أفتهم مو صغير أدري أبوي طگچ
سَدف:: حَبيبي بعدك صغيرون لا تدخل بهيچ سوالف
علي الرضا:: لاا أتدخل بعد منا و جاي انا أحميچ و ما أخلي واحد يطگچ لا انتِ ولا مينا
أبتسمت عيوني مغورگة بالدموع شبگته و ضليت أبوس بيه و مينا من شافتنة هيچ هم أجت حضنتنا بوستهم أثنينهم ياللّٰه وخروا مني ضلينة نسولف على شنو سووا هنا و ضلوا يسولفون و أسمعلهم، شوي و أجت براء جايبتلنا ريوگ تشكرتها و گعدنه ناكل، و هيچ تمشي الأيام و أنا بالفراش ما أتحرك و على نفس الروتين خطية براء رجعت للبيت علمودي و أهتمت بعلاجي و بأكلي و حتى بأخواني ما أدري شلون أجازيها، اما عمتي وحيدة التهت بالبيت و نادرًا ما تجيني لأن مشغولة و عمامي ما مهتمين لو يصيحون و يغلطون على أخواني و عليَّ و على أتفه الاسباب لو محد يسأل علينه
أحس روحي طلعت من الگعدة ما أحب أكعد متعودة على الشغل و الحركة، و أصبر بروحي أكول هاي الفترة أخليها شوي فترة نقاهه أرتاح من الشغل وراي شغل يابو شغل بس اگوم على حيلي تتلگاني صبيحة و بتها
أجة يوم فتح خياطاتي رحت انا و عمتي وحيدة و عفت أخواني يم براء ضلت عمتي تسألها على حالتي و شنو الأشياء الي أحذر منها و شنو الأعراض الجانبية الي تطلعلي گالت الدكتورة
-شوفي ماما حاليًا صحتچ ممتازة و كلشي تمام الحَمدُللّٰه، بس باعي ماما خلي أكون صريحة وياچ الأصابة الي تعرضتيلها قوية و تعرفين أنتِ أثرت على المبيض الأيسر بس يعني الحَمدُللّٰه صلحنا الضرر بس
سكتت شوي أنوب رجعت گالت
- ممكن هاي الأصابة تسببلچ صعوبة بالحمل مستقبلًا بس يعني ممكن مو مية بالمية ممكن لأن اكو هواي مثل حالتچ حملن لكن بصعوبة، هسه اهم شي تلتزمين بالعلاج و تهتمين بصحتچ
ضليت أباوع بوجهة مصدومة عمتي وحيدة ساكتة چنها تعرف بس أنا ضليت متصنمة بمكاني ما بدر مني أي ردة فعل أجتني الدكتورة تحاچيني و بأن هذا الشي طبيعي و ما أعرف أيش بچيت و أنا اگللها
سَدف:: يعني ممكن ما أصيرن أم؟
-ماما تواجهين صعوبة گلت ممكن هذا الشي
بقت توضحلي شنو يصير لـ حد ما هدأت شوي و بعدين طلعنة من العيادة، لگينة غسان بالباب واگفلنه أستغربنة شعجب جاي؟ رحنه سلم على أمه و فتحلي الباب صعدت و عمتي هم صعدت و حرك السيارة يسولفون عادي هوَ و أمه راح وگف على مرطبات جابلنة عصاير الي و العمتي و جاب بعد ثلاث عصاير گال
غسان:: هذن الأخوانچ و هذا الزيوني أبن ليث
يحچي حاط عينه بعيني و أباوعله بأستغراب منه من الشيطان، خلاهن يمي و عدل گعدتة خليت عصيري بصف العصاير ما شربت منه نقطة ما دام من هذا الشفيّه ما أشرب، لـ حد ما وصلنة فتحت الباب و تلگتني عمتي كاضتني و گلتله عمتي جيب العصاير وياك شالهن و گال
غسان:: ليش ما شربتي عصيرچ؟
سَدف:: مالك غرض
غسان:: أستغفراللّٰهه يا ربيي واللّٰه لو ما مريضة چان عرفت شلون أتصرف وياچ
سَدف:: شتردوون منيي فكو ياخة عنيي
بس حچيتها بچيت ما أدري شبية بس هيچ منتظرة أحد يحاچيني حتى أنفجر بيه
غسان:: أها هاي شمالها هسه انا شگلتلها
وحيدة:: أمشي غساان ولي أدخل جوة لا تسوولنه سالفة بهالمغربية
سَدف:: أستغفرراللّٰه يا ربيي أنطيني الصبرر على هاي البشرية التعبـ.....
عمتي گبل سدت حلگي بيدها و مشتني تغلط علينة أثنينة، ضليت أرافس مخلية أيدها على حلگي و خشمي خنگتني وخرت أيدها
سَدف:: عمة والعباس اختنگت
وحيدة:: و خنگتهم واللّٰه لو يدري بيچ فلاح هيچ مراددة غسان يسوي بيچ فلك
سَدف:: دياللّٰه عمة هسه هوَ منو غسان ولي العهد
طكتني على ظهري تگلي
وحيدة:: خايبة ترحيلة فدوة ما أرضى تحچين على غسان
ضليت أهز بيدي طبينة للبيت رحت ذبيت ملابسي و لبست دشداشة و خليت حجاب على راسي و طلعت أشوف وين براء رحت للمطبخ لگيتها تسوي بالعشا و أخواني گاعدين يمها صافنين گلت
سَدف:: هلو
براء:: هلاا شني بشري؟
رحت يم أخواني گعدت و من گلتلي هيچ حصرتني العبرة و بچيت
سَدف:: تگول الدكتورة راح تصير صعوبة بحملچ يعني ما أحمل بسهولة بالمستقبل
غطيت وجهي بأيدي و أنفجرت بالبچي، أجت يمي تهدأني و تصبرني دخلت عمتي وحيدة سألتها براء شصار گلتلها هيچ و هيچ السالفة سولفتلها التفاصيل گالت
براء:: چا خية أذا هيچ السالفة بسيطة أن شاء اللّٰه منا لـ حد ما تتزوجين و تحبلين الف باب دگولي يا اللّٰه و روحي ذكري اللّٰه
مسحت وجهي و گمت و رحنا انا و أخواني للغرفة أتوضيت و صليت و بقيت أبچي على السجادة و أدعي بچيت كلش لـ حد ما حسيت عيوني يبسن، لميت السجادة و ذبيت الأحرام، و عدّت الأيام على نفس الروتين لو أشتغل لو أحبس روحي بالغرفة يم أخواني و براء بعد التهت وي عائلتها ما متواجدة كل يوم حدها تسوي العشا و تصعد الغرفتها، أما أخواني كل ما أجالها نفسيتهم بالنازل قبل چانوا يضحكون و يلعبون و ما يهتمون الـ أي شي أهم شي چان عندهم يلعبون و يباوعون أفلام كارتون بس هسه كلشي تغير شالوا هموم أكبر منهم، حاولت أغير شوي من نفسيتهم و نسوي خطة بالليل من كلها تنام نطلع و نلعب بالحديقة شوي يتونسون بيها و احيانًا يلعبون وي زين العابدين أبن براء بس ما يتراهمون سوه يلعبون شوي وراها تگب العركة بيناتهم
و عدة أربعين أمي بس ما خذوني الها و شبعت بچي، و تمشي الأيام و كل ما جايلهم يصيرون اسوأ وياي ضليت حتى ما احاچيهم لأن مالي خلگ و دائمًا أشكي من راسي كلش يوجعني من گلت العمتي گالت
وحيدة:: سَدف لا تضلين تتجعبنين علينة يومية رايحة للمستشفى
سديت الموضوع بس الوجع لا يُطاق بس ما طولتها و بلعت موس و سكتت و ما فتحتة مرة ثانية، بيوم چنت نايمة انا و أخواني بالغرفة الجوة و فزيت على صوت مينا تريد ماي طلعت من الغرفة أريد اجيب بس أستوقفني ضوة غرفة عمي فلاح مشتغل و مبين من الأصوات بيها مجموعة يعني مو بس عمي و عمتي، ما أعرف شلون رحت يم الباب و ضليت أتسمع عليهم بس يا ريتني ما سمعتهم من گال عمي
فلاح:: خوش قسمة و أنا الرجال أعرفنة خوش زلمة بس هوَ مطلگ لأن مرتة الأولى ما تسمع حچايتة و طلگها... أكو احسن من هيچ؟؟
وحيدة:: فلاح مو چنها صغيرة مو مال زواج
فلاح:: لا هم ياللّٰه العمر يركض و بعدين هيَّ ياهو مگلبها شو سمعة أبوها تارسة الديرة ياهو يجي يخطبها
غسان:: بوية أنا رايد سَدف
