رواية حين تتغير الاقدار الفصل الثامن بقلم سناء الهموندي
كمر خده ابظلام الليل....... ويلا
شفته وكمت اصيحن ويل....... ويلا
لزمته وردت بوسه وصاح...... وي لا
ولك يابوسه عمي استرعليه.
يگللها..؟،احب طفلي اذا منچ♥️ وبنوتاتي اريدنهن يشبهنج
ضويه : كاعده اطبخ احضر غده وأنور يفتر ورايه يبجي نعسان وازهر بحضن عمتي صوته يوصل يمي من البواجي نخبصت وكمت اشتغل على السريع والك يمه نويري روح يم جده .
انور : انام مامه انام يمج
ضويه : اي والله هسه أكمل وانومنك روح يم جده بعدني أحاجي ودايره وجهي وماحسيته اله عاط عيطه درت وجهي عليه واشوفن مفرفح وكله دم اريد اعرف منين الدم كمت ادك والطم اجوي على صوتي عمتي شافته تخبلت.
ام صادق : ولج ضويه شبي الولد احجي عوفي البجي.
ضويه : بجي الحكيلي عمه ابني راح يروح ..بعدني احجي واجه صادق ركض اول مشافه شاله وركض للحمام غسله وانا واكفه ابجي عفيه صادق شبي كلي .
صادق : فتت للمطبخ وأشوف انور مدمه وأمي وضويه مخبوصات أخذته غسلتله حتى اعرف منين الدم وصدك اشوف أيده مجروحه جرح جبير شديده اله وضويه أخذته تنومه وانا نهد من حيلي حيل عليه من حركت كلبي حجيت على ضويه شوفي اكلج بعد تعوفين كلشي وتنتبهين للجهال يعني لو السجينه رايحه بعينه ذاك الوكت شسوين حجيت بعصبيه.
ضويه : حجيت ودموعي تنزل والله هوه يمي وانا ماخليت شي كدامه بس مادري هوه منين جايب السجينه.
صادق : خلص الصار صار بعد انتبهي .
ام صادق : يمه على كيفك قابل هيه متقصده وصوتك عيب منا عماتك هذا قدر ..يمه نوير سوده عليه بعد روح جديتك.
ضويه : مرت الايام واجه يوم عرس فرقد أجواء حلوه وغريبه مو مثلنه بلسلف انور أيده صارت احسن وعمتي طول ما هيه يمنه كمت من اشتغل تكعدهم يمهه ومتخليهم يتحركون سوينه العرس بيتنه بليل راحو العرسان لبيتهم بقو عمامي بيتنه ثاني يوم كلهه راحت حتى عمتي ام صادق رجعت البيت فرغ علينه تعلمت عليهم مرت الايام وحياتي ماشيه ويه صادق وانا تعلمت على بغداد فرقد على طول يجيب مرته ويجي يمنه كلش حبابه ومثقفه من اخر مره رحت للسلف قبل عرس فرقد بعد مرحت ازهر قبط سنه وشهر مرت الايام بيوم عزمت فرقد وانتضار مرته وعزمت بيت خالهم ضمد كعدت الصبح حضرت الغده صادق اجه من المحل لزم الجهال واني كملت الشغل لل١١الضهر اجوي بيت فرقد سلمت وكعدت شويه يمهم .
فرقد : شوكت يصير عندي مثل زهوري واطلعه ويايه وين ما اروح.
صادق : ههههه دكول ياله كلك اربع اشهر مصار على زواجك شبسرعه تريد ديحه لو تريد تعلمه مثلك
انتضار زوجه فرقد : ههههه يمه فدوه لله هذول عليمن طالعين حلوين هيج.
فرقد : على عمهم غير.
صادق : من يا صفحه باله من عيونك العمص .
انتضار : هههههههه لا صراحه همه حلوين على امهم..
ضويه : عيونج الحلوه بعد كلبي ...كمت أصبن غده جتي ورايه انتضار .
انتضار : فرقد كال نروح لبيت عمتي وصراحه اني مرايحه واستحي اروح ليش متحاجين صادق ونروح سوه .
ضويه : تامرين أمر أنا أحاجي صادق عبن من كبل عرسكم أنا مارايحه وهاي انتم صارلكم ثلاث اشهر متزوجين .
انتضار : صوت امي يمكن جوي اهلي.
ضويه : اي جوي صوتهم هذا هلا بيهم ... رحت سلمت عليهم .
ام انتضار : شونج دادا شون كيفج .
ضويه : الحمدلله بخير شنهي شو كايمه ماتجينه.
ام انتضار : والله يام انور ملتهيه باامي مريضه .
ضويه : ماعدهه غير العافيه انشالله ...صبينه غده تغدينه وراهه كعدنه تعللنه ضلو يمنه للعصر وراحوا لميت البيت وجيت يم صادق كاعد يلعب بازهر .. اكلك صادق.
صادق : كولي يبعد بيتي .
ضويه : انا اكولن شرايك نروح ويه بيت فرقد للسلف .
صادق : كالي فرقد نروح سوه .
ضويه : وانت شكتله .
صادق: إنشاءالله خير أكمل شغلي ونروح .
ضويه : اي فدوه اغديلك عبني كلش مشتاقه لجوريه .
تستمر القصة أدناه
جوريه : مرت الايام وبطني برزت صفيه شدت وياي كامت حتى شغلهه ذبه عليه
فتنه اخت محمد: شونج خيه جوريه .
جوريه :هلا هلا بيج ام علاء .
فتنه: شنهي امي وين .
جوريه : اليوم من الصبح طلعت للنقق جف ويه محمد ردت اروحن وياهم وما خذوني.
فتنه : ياااا يبعد اخيتج شنهي تردين تكتلين الفريخ خله يثبت بطنج توج كملتي اربع اشهر.
جوريه : هوه محمد ماقبل وانا كلت ياله من اجيبن كعدي ام علاء ليش واكفه.
فتنه: ادري شنهي توازيتي على هل سمجات تيبسيهن وحيدج جا صفيه وين مرت محمود وين .
جوريه : مرت محمود خطيه راحت تحلب الهايشه مكاني وصفيه بحجرتهه .
فتنه : وشنهي مخدره بحجرتهه ماتطلع وياجن ساعدجن.
جوريه: خيه خليهه شريدن منهه أنا بدقايق اكضي كلشي بعدني احجي وطلعت صفيه من حجرتهه .
صفيه : بعدج توج طبيتي تردين توجيهه شوفي ام علاء أنا احترمج لخاطر عمي عبنج بنت عمي وماريدن اخرب علاقتنه بسبب الغريبه.
جوريه : أنا اسمعهه بس ما حجيت شي رفعت راسي باوعت عليهه ورحت غسلت ايدي بلحوض شو هاي كبي بوجهي .
صفيه : شنهي حضرت جنابج هيج تباوعيني شنهي عيني عود انتي تستحقريني .
جوريه : صفيه يرحم اهلج بسج أنا مو قصدي لا تسويلي سالفه تره مليت كليوم طلابه حتى الزلمه مل من الطلابي.
صفيه : خايبه انتي جوري بنت الفصليه تعلميني الادب اليوم يو أنا يو انتي بلبيت اطلعيييي ما ضلين دقيقهه.
جوريه : أنا كاعده بيت زلمتي وهوه يجي وشيكول انفذ وماطلع اله بإذنه.
فتنه : ولج صفيه وين تردين بالبت احترمي رجلج وعود هوه يجي ويشوفلجن حل .
جوريه : ام علاء كدامج أنا لا علت ولا حجيت .
حسنه: طبيت بيت اهلي واسمع صوت جوريه تبجي والله هلبت كاسره كلبي عبن امي وصفيه اله يهججنهه ياله يجوزن طبيت وصحت شكووو شصاير .
صفيه : أنا العدي حجيته بت الفصليه دقيقه ماتبقه هنا وان بقت أنا اطلع مابقى.
حسنه : شتردين منهه صفيه عوفيهه بحالهه مامذيتج بشي وانتي لا اول ولا اخر مره تزوج عليهه زلمتهه هاي أنا وضرتي شوفي شحلاتنه جنه خوات وما فديوم غثيتهه لو غثتني بحجايه .
صفيه : انتي ناقصه عكل عبنج مبقيه ضرتج عدج أنا كلت ماريددددنهه تبقققى خلهه تولي بيت عمهه .
فتنه: يمعوده تره السالفه متسوه استهدو بلرحمن .
جوريه : بجي واشهك ما بيدي غير حل واحد يجي محمد
واحاجي أنا بعد ماضلن هنا شنهي ماعدي كرامه .
حسنه : صفيه كعدي أعوج وحجي عدل أنا ما ناكصة عكل أنا رضيت بقسمتي وسكتت عبن ما حبن انبص عيشه زلمتي .
جوريه : صارت هوسه حسنه من جهه وفتنه من جهه وصفيه بنصهن تهدد بهلهه وصيح أنا خفت وحسيت بذنب كلت اكيد الصار بسببي على حسهن ومانحس اله.
محمود : بسسسسسس ولجن بسسس من كون ضربجن العباس شنهي ماتستحن مالجن أحد يردجن حسجن واصل لذاك الصوب وانتي حسنه بدال ماتهديهن انتي العود.
حسنه : خويه أنا ما حجيت غلط بت عمك دورلهه زله على هل يتيمه شنهي هيه وليه .
محمود : شنهي يبت عمي شمالج ويه البت امذيتج بشي جايبه طاريج .
صفيه : بصياح ماريدنننننهه بلبيتتت يو أنا يو هيه .
محمود : هس حسج لا تعلي بوجهي عيب عليج والبت ماتطلع الماعاجبه لا يضل .
جوريه : أنا واكفه ودموعي صب هذا الماله أحد الوادم والزمن عليه الحمدلله الله راحمني بخوان محمد يخافون الله بيه محمود حجه على صفيه وهيه راحت طبت الحجرتهه .
فتنه: الله يبس ريجج يصفيه يوميه مهوسه علينه .
محمود : جوريه يرحم اهلج فد طاسه ماي .
جوريه : رحت اجيب ماي من الحب حاطي بلحوش وأشوفن صفيه طلعت لابسه العبايه وحاطه البقجه بيدهه باوعتلي صفح وكالت.
صفيه: اليوم انهي كلشي يو أنا يو انتي بلبيت .
جوريه : فكيت عيني متفاجاء متوقعت سوي هيج هيه كل مره تهوس وراهه تهدأ فاتت منيمي وراحت للهول.
صفيه: أنا رايحه وماضلن مادامك توكفون بوجهي علمود الغريبه.
حسنه : والله انج سويته بليه ملح خايبه لا تشوفينه ساكتين أنا اروحن لعمي واحجيله كلشي .
محمود : بت عمي كعدي وتعوذي من شيطانج زلمتج ماهو موجود بس يجي وانا الي ويا غير حجي.
صفيه : جا خوش أنا اروحن وانت من يجي حاجي وكله راح عبن ماترضه بلضلم وانتم ضلمتوني من زوجتوا محمد والله يهجم بيت يجوري مثل مهجمتي بيتي .
جوريه : احسن بعد مالي طاقه اتحمل .... ابو حمزه رحمه لابوك أخذني لبيت عمي أنا بعد ماضلن يجي محمد و ارجع لبيتي البطرف البستان ولا اتحمل ذله .
حسنه : جوريه ابقي لا طلعين البيت مثل ماهيه بيت رجلهه انت هم الج نفس حقنه.
فتنه : اي صدك حجي حسنه لا تعوفين حكج .
جوريه : ماريدن أنا تعبت خلي ارجع لبيتي أنا احجي وهيه تباوع عليه بنضره انتصار كتله لابو حمزه ها خويه تأخذني.
صفيه : فضوهه حتى إذا متطلع أنا اروحن لهلي.
محمود : الله يهديج شكلج وانتي بت عمي ياله جوري حضري رويحتج بويه .
جوريه : لبست عباتي وأخذت سلاباتي ورحت لبيت عمي محمود راد يأخذني بيتهم يم مرته بس انا ما قبلت وصلنه طبيت لبيت عمي طلعت مرت عمي سلمت عليهه وعلى فضه .
ام صادق : شنهي اليوم الشمس منين طالعه.
جوريه : ههههه كلت اسير عليكم عبن مضايجه .
ام صادق : يا ميت هلا بيج بنيتي شونج اخبارج محمد شونه .
جوريه : الحمدلله اليوم راحوا للنجف هوه وعمتي .
ام صادق : انشالله يرحون ويردون بسلامه أنا ما رايحه صارلي هواي من اخر مره رحت مشي أنا وياج وعمي ومحمد.
جوريه : حيييييل صار هواي عمه بل سنه ونص صادف بيهه حتى أم علي بيت حجي مطر جتي ويانه هيه وزلمتهه.
ام صادق : اي صدك خوش مره ام علي الله يحفظه ولج فضه ما كملتي شنهي هيه معجانه هاكدوتهه .
فضه : كملت يا بعد عمري يمه يااااا هاي منهي عدنه جورية خايبه يراد ذبيحه .
جوريه : عاد شنهي لا تضلميهه مو ذاك اليوم عدكم .
فضه : وين صارلج شهرين اخر مره جيتي علمود جده من طاحت ونكسر ضهرهه .
فضه : اله صدك شونهه جده عمي شونه شو ماكو .
ام صادق : جديتج تعبانه تعرفين مره جبيره وعمج اجوي عليه جماعته من كبل وراح وياهم يحلون شغله فصل .
جوريه : خير انشالله ضليت عد بيت عمي العصر رحت لبيت جدي اشوفن جده كلش تعبانه ضلينه للغروب واجه عمي سلمت عليه كعد شويه وكال اروحن للبيت احنه كمنه ويا ردينه للبيت بس عمي شكله غريب مو مثل كل مره من يشوفني يكيف ويحير شيسوي هالمره أحسنه اكو فرد شغله محيرته وكلساع يباوع لعمتي ام صادق .
فضه : اليوم ابوي مشتاق لامي شو من جاي لسه ماشال عينه منهه ههههه.
جوريه : ضحكت وياهه ورحنه نمنه بحجرتهه بليل طلعت اتوضه حتى اصلي صلاة اليل مثل كل يوم طلعت للحوش واسمع صوت مرت عمي وعمي صوتهم شبه عالي يتعاركون أنا مادرت بال كلت مره ورجال رجعت صليت ونمت ثاني يوم الصبح كعدنه أنا وفضه على صوت عالي .
ابو صادق : يا مره أنا شبيدي
ام صادق انت كلشي بيدك تكدر كلشي تسوي.
ابو صادق : تعوذي من بليس ام صادق كتلج الشغله جبيره شتردين يكولون عني مو زلمه يأخذ بحجي نسوان .
ام صادق : جا خل حجيهم يفيدك وكت الاعوفنلك البيت واروحن .
ابو صادق: كبري عكلج يا مره وخلي ترجيه باذنج اذا خطيتي خطوه بليه علمي بعد مالج رده هنا .
ام صادق : وانا كتلك أن سويت الطلبو منك مابقالك دقيقه.
فضه : يأبه شصاير فدوه شجاكم نحسدتو شو جنتوا جنكم بلابل.
تستمر القصة أدناه
ابو صادق :ماكو شي بنيتي
ام صادق : لا احجيلهه ليش ضم يمه فضه ابوج يريد يتزوججججج يفضه يريد يجيبلي ضره من تالي عمري .
جوريه : عمتي تحجي وترجف ملخت روحهه عمي من شاف الوضع عافهه وطلع كومناهه أنا وفضه وهيه بس تبجي وتصيح الله ينتقم منكم .
فضه : شماليج يمه ماتكليلي دحجي وريحي كلبي صدك ابوي يريد يتزوج .
ام صادق اي ولج يمه بس خلي بالج أنا أن سواهه مابقالكم دقيقة بلبيت .
جوريه : شصاير عمه عمي صارله فوك العشرين سنه متزوجين وهوه يحبج ويريد خاطرج وشكد جديتي رادت تزوجه وهوه ما قبل شجا هسه .
ام صادق : ولج يمه عمج اجوي عليه وراح يحلون طلابه صايره طلابه جبيره وصدك عمج ماخذ من معارفه ساده وشيوخ وشيخ عشيرتنه وحالين السالفه والفضل لعمج عبن هوه شايل فلوس ومنطي بدال الفصل مال أهل الولد الضاربي بس ماميت .
جوريه :خوش جا شنهي الصار .
ام صادق : الصار أهل الولد الضارب هادين بتهم لعمج وعمج يكول عيبه بحكي اردهه.
جوريه : والله يا عمه هم انتي حكج وهم عمي حكه عمي مابيده شي عبن احنه نعرف عدنه بلسلف الزلمه اليرد الهديه حشه عمي ماهو زلمه .
ام صادق : جا خوش خله يجيبهه وشوف مني تضل عده.
جوريه : فضه كامت تبجي رحت وراهه اطيب بخاطرهه عبن هيه مامتعلمه أمهه وابوهه يتعاركون . لليل وعمي ماكو اندك الباب طلعت مرت عمي واجتي كالت زلمتج واكفلج بلباب ماقبل يفوت لبست عباتي وسلمت عليهم ورحت طلعت كلت خلني اباوع بعينه واشوفنه خافن معصب عليه باوعت عليه وكتله زياره مقبوله .
محمد : بابتسامه زرنه وندعينالكم يا هلا با أم وليدي هلا بجوريتي توني طبيت للبيت وتلكانه محمود كال اخذتهه لهلهه عبن تعبانه خلاني اعوفن كلشي واجيتج اشوفنج خافن مريضه يوجعج شي .
جوريه : نمشي بلقريه ضلمه ساعه بلعشره تقريبا ماكو احد كتله محمد اريدن احجي وياك بشغله من نوصل للبيت بسلامه.
محمد : تامرين أمر يلغاليه .
جوريه : اول ما طبينه ونسمع هوست صفيه .
صفيه : أنا هذا العدي عمه ليش يروح يجيبهه خله يرجعهه منين ما جابهه وإذا يريد يأخذ الولد من جيب أنا اربي وخلهه هيه اروح تزوج وتخلف عود غيره .
محمد صفيييييييه وعلي أن سمعت عايده هذا حجيج راح اراويج وجهي ثاني لا تشوفيني احترمج وماريدن اكسر بخاطرج ومراعي الله بيج لا تخليني اسمعج الميعجبج.
صفيه : أنا ماريدنهه كبالي خلهه تأخذ ابنهه وتروح منا .
محمد : تقدمت عليهه كوه لازم نفسي مامد ايدي عليهم كتلهه والسماج صفيه أن ما سكتي راححح.
ام محمد : بسككك يحميدان شنهي تنطي بنت عمك وبت اختي لخاطر هلجاهله جا اسمعها مني هلبت ماتضل عبنهه سويت بله انا هم ماريدنهه تبقى أخذ الجاهل وردهه لهلهه.
جوريه : دموعي تكت احسن بطني عصرتني من القهر ايست كلت راح يأخذون الجاهل ويشمروني .
محمد : جا ما دامكم هيج تكولون أنا أعتبر كرامتهه من كرامتي وحترامهه احترامي والمايريدهه مايريدني امشينه يجوريه لمي غريضاتج وامشينه .
محمود : استهدي بلرحمن خاطر الله محمد لا تكبروهه.
محمد : لا يخوي هيه جبيره من كاعهه خلني اطلع هليتيمه منا لا حوبتهه تعثرنه.
ام محمد : خلهه بالك يمحمد أن خطيت خطوه بره البيت ويه هلبت اتبره منك احرمنك من الورق.
محمد : امي حركت كلبي ومنا جوري بعدهه واكفه صحت بصوت امشي لمي غراضج فضيهه .
جوريه : فزيت من صوت محمد ركضت لميت هدومي بقجه وطلعنه بعدنه باب الحوش وصاحت
ام محمد : لا انت ابني ولا اعرفنك ومن حتى لجنازتي ماريدنك تحضر .
جوريه : محمد داير وجهه من سمع حجي أمه لزم ايدي قوي وطلعنه تمشينه لطرف البستان رادين لبيتنه محمد بعده لازم ايدي قويه ستحيت اكله نص الطريق وهوه انتبه على روحه فك ايدي بوعلي وبتسم بحزن وكال.
محمد : جوري تعرفين امير المؤمنين (ع)جان كافل لأيتام ويكطع من لكمته وينطيهم ويكول من كفل يتيم دخل الجنه بس يجوري زمانه لا يخافون الله بيتيم ولا بفقير وانا مشيت وياج عبن اخافن حوبتج تعثرني انتي مثل الجوهره محد يقدر ثمنهه بس اليعرف قيمتهه انتي جوهرتي الغاليه جوري وانا مستحيل اعوفنج.
جوريه : هوه يحجي وانا كلبي يدك فرح حزن خوف من المجهول كل هذول نجمعوا عدي وصلنه للبيت طبينه البيت على حطته بس مبين مهجور الزرع الجنت زارعته ميت وماضال حتى أثر اله صار شكد عايفته فتت كنست ولميت البيت وطبيت فرشت ونمنه بس محمد احسن بي ليل كله يتكلب مثل السمجه المتزوهره .
ضويه : اخذت الجهال ورحنه بيت فرقد مرت فرقد احوالهه مكلوبه عبن عرفت بنفسهه حامل وفرقد طاير من الفرح بيهه بس خطيه نسواتهه كلش مو زينه متكدر شيل راسهه يأخذني صادق نوبات اروحن اساعدهه خطيه تستاهل هيه من تجي يمي متقصر تلزم جهال ساعدني بلبيت روحه للسلف اجلوهه لحد ما انتضار شويه تصحه .
انتضار : لج دادا عوفي والله اني اطبخ لتعبين روحج مو كافي خربت روحتكم بسببي.
ضويه : لاله لا تحجين هيج ازعل منج انتي بحسبت جوري حبيبه أنا كملت اروحن لبيتي احضر غده لصادق
انتضار : دضليلج شويه شعندج.
ضويه : هم ياله بس حاجي فرقد يوصلني عبن استحي وداني فرقد للبيت وهوه راح توني حطيت ازهر من أيدي نايم وندكت الباب قوي أنا خفت رحت اشوفن منو فتحت الباب واتفاجاء ب.........
شكرا لزيارتكم عالم روايات سكيرهوم
