رواية صرخة مؤجلة الفصل التاسع بقلم ود الزهراء
﴿بِسْمِ ٱللّٰهِ ٱلرَّحْمَٰنِ ٱلرَّحِيمِ﴾
افتحلي باب القفص
من عمري ضاعت فرص
احجيلك اني قصص ما مرت بانسان
طير اني اهوى السما
و متعلق بسجان
لا يحن هوَ علي ، ولا طاير وخلصان
••••••••••••••••••
سَدف
طلعنة من البيت الدنيا تگص گص من البرد و منانة ميتة من الخوف و للحظة ردت أتراجع و أدخل للبيت بس أتذكرت الينتظرني لو رجعت لـ هذا البيت و كملت طريقي، لازمة أخواني كل واحد من جهة و علاوي مخلي الجنطة على ظهرة و ضلينة نمشي للمجهول بالشوارع المظلمة ، نمشي بعشوائية لأن كلشي ما نندل لـ حد ما ضيعنة البيت و هنا زاد خوفي و ترددي بس ما بينت الأخواني خوفي لأن همَ ثاقيين بية و يمشون وياي و أزيد خوفهم خوف لأن همَ مطمئنين لأن كل ما واحد يرفع وجهة يباوعلي أبتسم بوجهة، نمشي و نمشي بين الأفرع المظلمة و أصوات أنفاسنة متعالية و أتخيل على أي لحظة يلگونة عمامي و غسان، عشت برعب فضيع ردت شلون ما كان أطلع الشارع العام و أحصل سيارة و أبتعد
لـ حد ما لگينة شارع عام بس بيه سيارات قليلة لأن الدنيا ليل، وگفنة عالشارع لازمة أخواني حيل منتظرة تكسي يعبر حتى نصعد وياه وگف تكسي النه و نزل الجامة گتلة
سَدف:: تاخذ للگراج؟
- أي أصعدوا
سَدف:: شگد تأمر؟
- بكيفچ
سَدف:: ما أعرف شگد الكروة خمسة كافي؟
- خوش، خمسة أصعدوا
گلبي يدگ حيل و التوتر يقره ألف صعدت اخواني و أنا صعدت وراهم و سديت الباب و ضليت اقرأ قرآن و اقرأ آية الكرسي
سَدف:: بِسْمِ ٱللّٰهِ ٱلرَّحْمَٰنِ ٱلرَّحِيمِ
اللَّهُ لَا إِلَٰهَ إِلَّا هُوَ الْحَيُّ الْقَيُّومُ ۚ لَا تَأْخُذُهُ سِنَةٌ وَلَا نَوْمٌ ۚ لَهُ مَا فِي السَّمَاوَاتِ وَمَا فِي الْأَرْضِ ۗ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ ۚ يَعْلَمُ مَا بَيْنَ أَيْدِيهِمْ وَمَا خَلْفَهُمْ ۖ وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ ۚ وَسِعَ كُرْسِيُّهُ السَّمَاوَاتِ وَالْأَرْضَ ۖ وَلَا يَئُودُهُ حِفْظُهُمَا ۚ وَهُوَ الْعَلِيُّ الْعَظِيمُ
﴿صدق اللّٰه العلي العظيم﴾
اقروها بميزان حسناتكم♥
من كثر الخوف ختمت القرآن بگعدة وحدة و لازمة أيد علاوي حيل لأن صاير بنصنا و أردد نادي عليًا مظهر العجائب دائمًا و بكل شدة أقراها و تنحل بأذن اللّٰه، حچة وياي السايق
- هذول جهالچ؟؟
سَدف:: أي جهالي
-شعجب وين أبوهم
أحتاريت شگلة فكرت بچذبة سريعة و گلتلة
سَدف:: موجود أبوهم بالگراج منتظرني نريد نسافر راح گدامي لأن عندة شغل و أضطر يروح
خرطتهن خرط بسرعة حتى لا يطول بيناتنا الحديث و يبقى يتسئل بية، سكت و أنا هم سكتت و أخواني هادئين مو حچوا ولا كلمة باوعت العلاوي متوتر همستلة شبيك؟
علي الرضا:: سَدف خلي نرجع للبيت
سَدف:: ليش؟
علي الرضا:: ترا أنا خايف
شبگته و لزمت أيد مينا لأن ما ألوحها حتى أشبگها همستلة
سَدف:: أنا يمكم ليش خايف؟ نفتك منهم أحسن و أنتو تداومون بالمدرسة و أنا أشتغل و أجيبن الكم فلوس و تصير حياتنا حلوة
دنگ ساكت و مينا همين الخوف واضح على عيونها، حاولت أطمنهم بنظراتي بس ما يفيد لأن حتى أنا الچبيرة متوترة أكثر منهم ممكن همَ معتمدين عليَّ بس أنا على منو أعتمد؟، نزلنا السايق بالگراج و أنطيتة الكروة و نزلنة الجو بارد يگص گص و أخواني لابسين بس تراكات بدون قماصل أخذت الجنطة من علاوي و لفيتهم شوي بعبايتي بقينة نباوع من بعيد على السواق من يصيحون بأسم المحافظة اللي يريدون يروحون الها ضليت أباوع على منو يصيح بغداد ما لگيت تقدمنة شوي أدور بعيوني لـ حد ما لگيت رجال چبير بالعمر عندة كية يصيح
-بغداد آخر نفرين
أسرعت بممشاي و أخواني هم أستعجلتهم علمود نلحگ بيه لـ حد ما وصلنة يمه
سَدف:: السلام عليكم
-عليكم السلام
سَدف:: أكو مكان نصعد ثلاثتنة
- اي مو مشكلة هذول الجهال ناعمين
سَدف:: بيش النفر؟
- 15 يعني أنتِ و الجهال أحسبلكم 30 راح أعتبرهم نفر واحد يگعدون أثنينهم بكرسي
هزيت راسي و صعدنا بالكية و گعدنا بكرسي أبو النفر على الجامة و فتحولنة الكرسي اللي يصير بالوسطة گعدوا بيه علاوي و مينا كفاهم و الجنطة خذاها مني السايق خلاها بالصندوگ و گاعدين بصف أخواني مرة چبيرة و أبنها ولد شاب، صعد السايق و شغل دعاء الصباح بصوت ناصي بالمسجل
اللَّهُمَّ يَا مَنْ دَلَعَ لِسَانَ الصَّبَاحِ بِنُطْقِ تَبَلُّجِهِ، وَسَرَّحَ قِطَعَ اللَّيْلِ الْمُظْلِمِ بِغَيَاهِبِ تَلَجْلُجِهِ، وَأَتْقَنَ صُنْعَ الْفَلَكِ الدَّوَّارِ فِي مَقَادِيرِ تَبَرُّجِهِ، وَشَعْشَعَ ضِيَاءَ الشَّمْسِ بِنُورِ تَوَهُّجِهِ، يَا مَنْ دَلَّ عَلَى ذَاتِهِ بِذَاتِهِ، وَتَنَزَّهَ عَنْ مُجَانَسَةِ مَخْلُوقَاتِهِ، وَجَلَّ عَنْ مُلَاءَمَةِ كَيْفِيَّاتِهِ...
بـ صوت الشيخ فاضل المالكي🍃.
و صاح السايق
-رحم اللّٰه من قرأ الفاتحة الىٰ أم البنين مسبوقة بالصلاة على محمد و آل محمد
ارتفعت الأصوات بالصلاة على النبي و قريت الفاتحة، صوت الدعاء و صوت السيارة و هيَّ تمشي شعور مريح نوعًا ما أباوع من الجامة على المحلات و البسطيات البلگاع و التفكير ماكلني أفكر وصلت البغداد و بعدين؟ وين أروحن و أنا وياي أثنين جهال شنو أشتغل؟ وين أگعد؟ شلون أعيش و أعيشهم؟؟ راودني شعور الندم بهاللحظة بس ماكو فرصة للتراجع هسه لازم يكون كل تفكيري بـ شلون أبني حياتنا الجديدة من الصفر، طلعني من بحر التفكير ندهة مينا الي همستلي
مينا:: أريد أنامن
حطت راسها علىٰ حضني و غطيتها بالعباية و نامت رفعت راسي باوعت العلاوي لگيتة يغفي راسه كلساع يطيح أحتاريت شلون أنومة ندهته و گتلة
سَدف:: تچي راسك علىٰ الكرسي
نفذ كلامي بس المرة الگاعدة بصفنة گالتله
-تعال يمة نام بحضني
سَدف:: لا حجية خاف يضايقچ
- لا لا
و هيَّ تحچي خلت راس علاوي بحضنها و غطتة بالعباية گلتلها
سَدف:: رحم اللّٰه والديچ حبوبة
أبتسمتلي و بقى نايم علي الرضا على حضنها و أنا هم غفيت لأن التعب ماكلني و ما نايمة و فزيت على صوت رجال يحاچي السايق يوگفنة يم مطعم لو شي لأن وياه مرة چبيرة و تعبت من الطريق، الدنيا هستوها ياللّٰه بدا يطلع الضوة و أحس رجلية تكسرن لأن مينا نايمة عليهن و اصلًا ما متعودة على سيارة و طريق طويل كلش تكسرت عدلت حجابي لأن شوي مخربط و ضليت اباوع للطريق منا لـ حد ما طبگ السايق على مطعم و بدوا ينزلون گعدت مينا و علاوي عدلت هدومهم و گلت للسايق ينطيني الجنطة حتى أطلعلهم ملابس،أنطانياها بسرعة طلعتلهم جاكيتاتهم الثخينات كل واحد لبس مالتة و أنا هم بردت عندي شال ثخين ينلبس فوگ الملابس چان مال أمي خذيتة بيدي حتى من أروح للحمامات البسة و أنطيت الجنطة للرجال رجعها المكانها، نزلنة انا و الجهال و يا شعور الراحة من توگفون بعد ما چنتوا گاعدين فترة طويلة حسيت الدم هسه ياللّٰه وصل الرجلية
لزمت أخواني كل واحد من جهة و مشيت ورا اليمشون لأن كلشي ما أعرف طبينة للحمامات غسلت و غسلتلهم و توضيت و رحنه للمصلى صاير مقابيل الحمام گعدت أخواني گبالي و صليت الفجر بس خلصت طلعنا باوعت لفلوسي اللي مخليتهن بجنطة صغيرة گلت خلي أشتريلهم فد شي ياكلونة بالطريق لأن يجوعون و الطريق طويل رحنا للأسواق الموجودة يم المطعم و أشترينا چم شغلة همَ أختاروها و وديناهن للولد حتى يحسبهن أنگصبنة و طلعنة لأن كلش غاليين، صعدنا بالسيارة و شوي أنتظرنا لـ حد ما أكتمل العدد ياللّٰه كملنة طريقنة بنص الطريق و المرة الچبيرة ضلت تسولف وياي و أنطتنة لفات جبن تشكرت منها و ضلينة نسولف
- يمة هذول فريخاتچ؟
سَدف:: أي خالة
-بعدچ صغيرة و صلاوات جهالچ كبار عبالك أخوانچ مو ولدچ
سَدف:: خالة بعد تزوجت بعمر صغير و خلفت من وكت
-چا رجلچ وين
سَدف:: ببغداد و هالرايحة يمه حتى نضل هناك
- ياااا، أنتِ چنچ مو من المدينة
سَدف:: أي خالة أنا من الريف شلون عرفتي
-مبينة من حچيچ
سكتت و مستغربة من كلامي شلون بسرعة سفطت الحچي و ذبيت الچذبة يمكن المعلومة الوحيدة الصحيحة أنا من الريف، ضلينة نصفن و أخواني رجعوا نامو و أنا بعد ما نمت ضليت گاعدة عبرنة السيطرة مال بغداد و السايق گال
-الحَمدُللّٰه علىٰ السلامة
الكل رد عليه، مشى شوي مسافة و گال
•لهنا حدي راح انزلكم على الرصيف و روحوا وين ما تردون ما اگدر ادخل داخل بغداد كلش وراي طريق
كلهم تشكروا منه بس انا ضليت آكل بروحي شسوي هسه؟ شلون ادبرها انا كلشي ما اندل، طبگ الكية على صفحة و بدوا ينزلون الركاب گعدت أخواني و عدلت أنفسنة لأن متبهذلين و انطيت الكروة للسايق و نزلنة، ضليت متانية السايق حتى ينطيني الجنطة شوي ياللّٰه اجانة وزع الجنط مال الركاب و أنطاني جنطتي و ضلينة واگفين أحنه و الناس اللي چانت بالكية ندور على تكاسي و الدنيا تثلج من البرد خليت الكبوس مال الجاكيتات على روسهم و علاوي شايل الجنطة بدوا يوگفون تكاسي النة بس ما الحگ بيهم الويانة يأجرونهم بقينة بس احنه و ويانة أثنين ولد شباب و رجال چبير وياهم وگفت تكسي وحدة گلالي الرجال الچبير
- صعدي وياه يابة
سَدف:: رحم اللّٰه والديك بوية
صعدت أخواني و صعدت وراهم تعاملت وي ابو التكسي على السعر و گتله
سَدف:: اخذنة للامام الكاظم ؏
هز راسه و مشت السيارة بينه لأبو الجوادين، بقينا نباوع من الجامة على شوارع بغداد شلون تخبل و على المواكب المنصوبة بالشوارع گالت مينا
مينا:: هذني شنو؟
مأشرة على المواكب همستلها
سَدف:: هذني مواكب ناصبينهن لأن راح يجي شهر محرم
هزت راسها مستمرة تباوع هيَّ و علي الرضا الىٰ أن وصلنا للامام أنطيت الكروة للرجال و نزلنا و انا كلشي ما اندل ولا اعرف گلت امشي و اسأل، الأجواء تخبل صبح و يم الامام شريد بعد؟ شفت الگبه من بعيد و رفعت أيدي
سَدف:: السلام عليكَ يا باب الحوائج، السلام عليكَ يا موسىٰ أبن جعفر الكاظم
سلمت و كملنا طريقنا بأتجاه الگبه نمشي لـ حد ما صادفنة لافتة مكتوب عليها تفتيش النساء دخلنا للتفتيش انا و اخواني فتشتنة المرة و طلعنة من غرفة التفتيش للسوگ اللي يصير يم الامام مشيت و مشيت و صادفنة نفس اللافتة دخلنا و تفتشنة گلتلي
- ممنوع دخول الجنط خليها بالأمانات
سَدف:: ما اندل
- اسئلي و همَ يدلونچ
طلعت محتارة وين أنطي وجهي شفت بنية شابة وي زوجها گلتلها
سَدف:: وين الامانات بلا زحمة
دلتني عليهن و رحت و بيدي اخواني كاضتهم حيل اخاف يضيعون مني و وين الگاهم، رحت سلمت الجنطة للأمانات و انطاني الرجال ورقة صغيرة بيها رقم الكشوانية و رجعت الأم التفتيش فتشتني و دخلنة و يا جمال المنظر و الراحة اللي بهذا المكان حتى اخواني انبهروا بيه و بجمالة مشيت وي النسوان اليتقدمن داخل الحرم أول ما عتبت الباب نزلن دموعي، مشينة لـ حد ما وصلنة للمكان البيه الشباك و صايرة كتلة مزدحم كلش حاولت ادافع بس ما گدرت هسه لو وحدي اگدر ادخل بس اخواني أختنگوا أضطريت أطلع
طلعنة و گعدت اخواني على جهة يم الحايط علىٰ صفحة و رحت جبت تربة و كتاب الزيارة و وياهن سبحة، صليت صلاة الفجر و صليت ركعتين لوجه اللّٰه و رفعت أيدي بالدعاء دعيت من كل گلبي رب العالمين يرتبلنة حياتنا و نستقر قريت الزيارة و اخواني متمددين بصفي و بدوا يغفون حطيت طرف عبايتي على وجوههم حتى يحجب الضوة عن عيونهم بس كملت قراءة نمت يمهم متغطين بالعباية مالتي
فزيت على صوت مرة لازمة ريشة گالت
-گومي زايرة وكت صلاة
گمت بسرعة گعدت و گعدت اخواني بالگوه ياللّٰه گعدوا كلش تمرمروا و مرمروني وياهم گاموا وياي نريد نطلع علمود أجدد وضوئي حتى نصلي الظهر، ضليت اسأل على باب الخروج لـ حد ما دلونة و طلعنة من الحضرة و سألت عن الحمامات و دلوني عليهن و دخلنة الهن اتوضيت و غسلت وجوه اخواني و عدلت شعرهم بأيدي المبللة و طلعنة من الحمامات، و وگفنة بالباب مالتهن علمود أعدل عبايتي لأن جوة ازدحام مجرد ما تركت ايد اخواني و رفعتها علمود أعدل حجابي و العباية اختفوا عن مناظري
شكرا لزيارتكم عالم روايات سكيرهوم
