رواية المعلمة شيكا الفصل التاسع
مختار: احلي شهور السنه ياريت السنه كلها رمضان
شيكا: ياريت علي الاقل الناس تحس ببعضها عن اذنك بقي
لتتركه شيكا
شيكا: اما اشوف السقط عمل ايه مع الأبله بتاعته
لتتصل علي سقط
سقط بحزن: ايوه يا معلمه
شيكا: مال صوتك يا حزين
سقط: مافيش
شيكا: وهو انته غريب عليا مالك بجد
سقط: هقولك يا معلمه
ليقص عليها سقط كل ما حدث بينه وبين سنيه
شيكا: يخربيتك انزل بسرعه وتعالي علي الجامع عشان نفك العمل ده
سقط: حاضر
شيكا: يخربيتك يا سنيه اعمال ايه وزفت ايه تكفري بربك عشان راجل اما وليه عبيطه صحيح طاب ما انا اهو بقاللي اد ايه بحبه وهو حمار مش فاهم ولا حاسس اقوم اعمل كده ليه يعني اخر قطعه نزلت من الرجاله وبعد كده هيمنعو الصنف أعوذ بالله
وبعد عده دقائق يصل سقط
شيكا: تعالي يا فالح نروح للشيخ مصطفي
وها هم يذهبو الي المسجد
لتقص شيكا ما حدث علي شيخ الجامع
الشيخ مصطفي: ادخل اتوضي وتعالي
وبعد أن توضاء السقط وجلس بجانب الشيخ مصطفي وها هو يتلو عليه آيات من الذكر الحكيم
الشيخ مصطفي: انته مش مسحور ومافيش اي حاجه
شيكا: ازاي ده شرب العصير اللي فيه العمل
ليضحك الشيخ مصطفي
الشيخ مصطفي: انتو قولتو السحر اتعمل عند مين
سقط: واحد اسمه حنيدء
مصطفي: ده نصاب مش دجال وبيضحك علي الناس وبياخد منهم فلوس وطيور وحاجات كتير وانا وقفتله كذا مره ربنا يهدي العاصي
سقط: حضرتك متاءكد اني مافيش سحر ولا عمل
مصطفي: اه يا ابني
شيكا: الحمدلله
سقط: يعني انا حبيت سنيه بجد من غير اعمال
مصطفي: سبحان مؤلف القلوب والعقول
مصطفي: بس هيا لازم تتوب وترجع لربنا وتكفر عن ذنبها
سقط: طاب وانا اعمل ايه يا شيخنا
مصطفي: استخير ربنا وربنا سبحانه قادر يدلك على الصح
شيكا: طاب والزفت ده هنسيبه يا شيخنا
مصطفي: لاء يا بنتي احنا حاولنا ننصحه كتير بس هو مبيرتجعش عشان كده بلغنا عنه والحكومه بقي تعرف شغلها معاه
سقط: مش عارف اعمل ايه انا شكلي حبيتها بجد
مصطفي: زي مقولتلك استخير ربنا وربنا هيدلك علي الخير
شيكا: اسبقني انته يا سقط هساءل شيخنا سؤال
سقط: حاضر
ويتركهم سقط ويذهب
شيكا: اتفضل يا شيخنا ده المبلغ بتاع الأسر المتعففه وإنشاء الله هروح المحل ابعتلك حصتي من اللحمه
مصطفي: ربنا يكرمك يا بنتي ويراضيكي علي اد ما بتراضي الغلابه
شيكا: كله من فضل الله وبعدين اكون انا ايه ولا مين ده رزق ربنا باعته وانا مجرد سبب
مصطفي: ربنا يسعدك
شيكا: بالنسبة للدفعه التانيه من البطاطين جايه اول يوم رمضان إنشاءالله بعد صلاه الفجر عن اذنك يا شيخنا كل سنه وانت طيب
مصطفي: وانتي طيبه
اما منجي فكان يجلس في شقته وهو يفكر ف شيكا
منجي: ايه البنت ديه ادب واخلاق وجمال وواقفه وقفه رجاله وبتساعد الكل وطيبه جدا يعني فيها كل المواصفات اللي يتمناها اي راجل
قصدك ايه يا منجي اعقل انته وراك هم ميتلم اخواتك البنات وامك حب ايه وكلام فارغ ايه هتخيب ده انته بتوفر اجره الحلاق وعايش بطقمين عشان تقدر توفي بوعدك لابوك الحب ليه ناسه وانته مش منهم ومتفهمش عطف شيكا عليك أنه اعجاب أو حتي حب ديه قدامها معلمين اد الدنيا هتسيبهم وتبصلك انته فوق وانزل دور ف الساقيه وشوف شغلك وخدلك حتتين لحمه شفقه عشان تفطر بيهم انته واهلك اول يوم رمضان انته فين وهيا فين
اما في شقه نعمات
شوقيه: انتي فين يا ماما
نعمات: تعالي انا ف المطبخ
شوقيه: عندي ليكي خبر حلو اوي
نعمات: خير يا رب
شوقيه: عريس لشيكا ابن ناس ومحترم ومرتبه كبير وكمان مستعد لكل طلباتنا صاحب محمد جوزي وكان ف اعاره ولسه راجع
نعمات: وهيا اختك ديه وش جواز وهيا معلقه نفسها في الاستاذ مزيكا
لتضحك عليها شوقيه
شوقيه: ده انتي عليكي تشبيهات يا ماما
نعمات: اعمل ايه ما هو من غلبي نفسي بقي البت ديه تتجوز عشان ارتاح واشوفلها حتت عيل قبل ما اموت
شوقيه: بعد الشر عليكي
نعمات: اتصلي عليها خليها تطلع بدل ما هي عامله فيها شفعات
شوقيه: يعني منجي الدكتور أمام حرام عليكي يا ماما ديه اختي عسل
نعمات: اه ما انا عارفه عسل اسود علي دماغ اهلي قوليلها تبقي تخلي حد يجيب عيش طازه عشان السحور
شوقيه: لسه بدري
اما نسمه بنت المعلم حلاوه فها هيا قد ذهبت الي محل شيكا ومعها زجاجه عصير
شيكا: خير انتي كمان عايزه ايه
نسمه: ده انا جايبه عصير للاستاذ منجي
شيكا: شكرا يا اختي وياتري عامله العمل فين وعند مين
نسمه: عمل ايه في حاجه يا ابله شيكا
شيكا: ابله ف عينك ده هيا سنه اللي بينا
نسمه: انتي زعلتي يا بطه
شيكا: بطه يا بقره ده انتي اتخن من العجل اللي جوه ده بقولك ايه ارمي الشبك علي حد تاني اصل منجي خاطب بت عمه ف البلد
نسمه: ايه ده بجد
شيكا: اه متيجي اجوزك الولا اللقط اهو حلو ومقلوظ زيك وانتو الاتنين تعملو ازمه ف الأمن الغذائي
نسمه: ايه ده ده تخين اوي وبيمشي زي البطريق
شيكا: شفاعتك يا رسول الله
نسمه: عليه افضل الصلاه والسلام
شيكا: يعني انتي اللي رفيعه اوي يا حزنك المغلي ف كنكه يا شيكا
نسمه: اصل منجي شبه احمد مظهر وسيم وطويل وجسمه رياضي وله دقنه هو بس محتاج يتظبط وهيبقي فشر ممثلين السيما
شيكا: يا بنت الحلال قولنا خاطب صدقيني اللقط حلو عليكي وابقي خديه وروحو جيم
نسمه: انا ماشيه
وهنا يقترب منهم سماره الحلاق
شيكا: خير يا اسطا
سماره: هو احنا مش هنشترك ف ماءده رمضان
شيكا: لاء اصل أهل الحاره معروفين ومافيش غريب بيدخل الحاره فالاحسن نجمع مبلغ من بعضينا ونفرقه علي المحتاجين من أهل الحاره ونشوف كل بيت ناقصه ايه ونجيبه
وهنا يقترب منهم حلاوه
حلاوه: انا سمعتكم بس الصراحه الماءده ليها طعم تاني
شيكا: خلاص نعملها كل واحد فينا يطلع مبلغ بس هنلحق امته نشتري الحاجه ونجهزها
حلاوه: اه صح
شيكا: خلاص بكره انشاء الله نعمل فته ولحمه جهز انته بس شادر الماءده
حلاوه: شوفي عايزه مني كام
شيكا: بكره بعد الفطار نقعد نتحاسب
سماره: طاب ايه
شيكا: ايه
سماره: طاب ايه يا جميل
شيكا: روح محلك يا سماره
حلاوه: طب الفطار هيتعمل فين
شيكا: ف بيتنا ف الشقه الفاضيه
سماره: خلاص يبقي كده كله تمام
شيكا: طاب ياله بقي منك ليه روحو شوفو شغلكم
سماره: متيجو نتسحر سوا
شيكا: روح اتسحر مع عيالك ده انته عايزلك قدره فول وفرن عيش
ليضحك عليها حلاوه
حلاوه: بقى ياراجل عايز تتسحر ليله وقفه رمضان ف الحاره وتسيب عيالك ده انته راجل عجيب بس كلامه صح يا معلمه متيجي نتسحر سوا
شيكا: ايه الناس ياله يا حلو منك ليه خلينا اشوف اكل عيشي
وتتركهم وتدخل المحل
شيكا: ولا يا لقط اقطع خمسه كيلو لحمه حته حلوه وطلعها للاستاذ منجي اصله مسافر الصبح بدري
لقط: مش لما الرؤيه تبان
شيكا: افتح التلفزيون خلينا نشوف
وبعد نصف ساعة يبدء استطلاع هلال الشهر الكريم وتثبت الرؤيه وغدا اول ايام الشهر الكريم
شيكا: اهو رمضان بكره يا غلباوي اعمل حسابك بكره الفطار عندنا بس الاول عدي علي خالتك ام صلاح ووديلها يا ميش رمضان وحاجه الفطار ربنا يجعله شهر الخير علي الكل
لقط: ربنا يديكي علي اد كرمك وطيبتك
وبعد عده ساعات يبدء المسحراتي في إيقاظ أهل الحاره
نادين: عمو يا مسحراتي قول اصحي يا نادين
المسحراتي: اصحي يا نادين يا ست الحلوين رمضان كريم
عمرو: وانا يا عمو
المسحراتي: اصحي يا عموره يا اخو نادين الاموره اصحو يا اهل الحاره السحور وجب
شيكا: استني يا خد السحور بتاعك ومتنساش تعدي الصبح تاخد الاشياء
المسحراتي: اصحي يا ست شيكا طعمه وحلوه ومزيكا
