رواية خلخال مشوه الفصل العاشر 10 بقلم زمرده

 

 

رواية خلخال مشوه الفصل العاشر بقلم زمرده



فراغك و الگبر
يتشابهن بالعين
منو المنهن يعيش
بروحي وصيته

•---∞∞∞∞∞∞∞---•

رأجس : انا رأيد ازوج ثنين من الولد ،وگلت الكبار بالاول وما دامكم گاعدين انا مقرر ،ميمنة لصخر وهيفاء لضيرم

فوضى وصوت السوالف عاليه لهنا للمطبخ اسمع صوتهم بس بحجايات جدي خله الكل يسكت وچن يردون يستوعبون شگال ،انا بساع اخذت صينية الجاي ومشيت ،وزعتها وگعدت بصف ميمنة الصافنه على جدي حتى ما ترمش

كسر الصمت أبوي وهو يأيد اختيار جدي
محمد : جا والنعم ما ختاريت بوية

باوع الابوي ورد باوع لجدي
صخر : شني جدي ميمنة اخيتي حالها من حال هيوفة

رأجس : شني مثل اخيتك ،لا تطلعلي بسالفة ما تنعگل ،ميمنة بت عمك وتحل عليها

صخر : انا ما رايد اتزوج جدي شني السالفة ،وبالاصل لازم تسألني تأخذ رأيي مو أنا حالي من حال الگاعدين اعرف

رأجس : كلمة فوگ كلمتي ما تعلى ،انا مقرر وهاي گدام الگاعدين الجمعة الجاية عقدكم

صخر : شني السااالفه جدي ،جااا شجاي احجي انا

دار وجهه جدي منه يحجي وي عمي يوسف وبحركته وصل فكره لصخر كلمتي تتنفذ ،بحيث خلى صخر يشيط لسابع سمه وحتى ما ضل گاعد طلع بساع روحه ما حاملها ،وبأمر گال وخلانه ناس تصفن بوجوه ناس
رأجس : حضروا روحكم الجمعة الجاية عقد صخر وميمنة وبس تگوم هيوفة نسوي عقدهم هي وضيرم

ضيرم : وضيرم ساكت بس يباوع بعيونة مو ؟

رأجس : جا أنت هم الك نية تعترض ؟

ضيرم : لا ابد لان شفت الأعتراض ما يجيب نتجية

رأجس : جا شني بنات عمكم اللمن رايديهن ؟

محمد : هاي هي يابه كلمتك تمشي

انداريت على ميمنة بعيونها الرفض كله بس كلنه نعرف الأعتراض ما اله أي فائده والحجي كل نتيجة ما يجيب لو حجينه ،ندستها اريدها ترمش بعينها صافنه بس چن حتى بالها مو يمهم ،اندرتلي بلعت ريگها وغمضت عينها تريد تحجي بس ما تعرف شتحجي ،انا اعرفها ابد ما حاطة براسها صخر حتى گالتلي هيوفة يمكن راح توافق على مهند صديق الولد
هيوفة : ميمنة تعاي اخذيني للغرفة

بدون ما تحجي گامت دفعت كرسيها وطببتها للغرفة
وانا اعرفهن من يگعدن وحدهن ما يردن أحد يگعد يمهن ضليت گاعده وما مشيت وراهن ،اسمع سوالف جدي وعمامي على العرس والعشه

°هيوفة°

بين الفرحة الزرعها جدي بروحي بقراره ،وبين قهري وانا اشوف الرفض بعيونها ،ما گدرت حتى ابين فرحتي گدامها وگدام عيونها المكسوره ،انا وهي نعرف گلب أخوي شبي ومني متربعه بي وشلون ما ناسيها وجدي ضربنه على راسنه من قرر ميمنة لصخر

ردت تاخذني للغرفة حتى اگدر احجي وياها ،بس طببتني گعدت گبالي ودموعها عشرة عشرة يطيحن مال واحد واصل الاخر مراحل الحيره ...!

خليت ايدي على جفتها اسكتها ،وانا حتى سالفتي نسيتها وما ببالي شلون بيها وشلون راح تستوعب الراح يصير وهي تعرف بأخوي شلون ميت على بت عمنه وصاحبتنه
_ ميمنة

باوعتلي والحسره البصدرها تسولفي بدون لا تنطق وتگلي
ميمنة : شأسوي ؟ شلون بي ولج هيفاء شلووون ؟

من حيرتي شاجاوبها ضليت ساكته ،وهي مفرفحه روحها
ميمنة : ولج والله يحبها ،ولج يموت الف موته كل ما يشوفها گدام عيني انا اشوووف ،شلون ارضى اصير مرته وانا أعرف ما اخذ مكانها بگلبه

وانا يا حيرتي بكل كلمة تحجيها
_ شنسوي گليلي تحجين وي جده ؟

ميمنة : وشني راح توگف بوجه جدي ؟ هو جدي منو يوگف بوجهه ،شفتي أبوي ولا كلمة فك حلگه ولو عرف انا ما راضية يطيح حضي

_ جا شلون ؟

مسحت عيونها بطرف ردان ثوبها
ميمنة : ما أعرف ،والله ما أعرف ،اموت ولا احط راسي على صدر واحد باله مو يمي ولا گلبه يمي .

_ اسم الله شبيج

ميمنة : جا شني ،هيفاء أخوج من سابع المستحيلات ينسى ريحانة ،انا الجنت شاهده على حبه شلون ارضاها على روحي اعيش وي بشر بس يمشي سفينة وياي لأني انفرضت عليه ومو انا الرايدها

_ جا احجيلي شلون هسه ؟ الحل شني ؟

ميمنة : ما تنحل ،لان لو حجيت راح إأذي اخوج وريحانة گبل روحي وانا ما اگدر علمود مصلحتي أضر أحد ،راح اخليها على الله هو يكتفل كلشي راح يصير

تحجي واعرف بيها هي ما مقتنعه بحجيها وتريد تقنعني ،اعرف كلش زين جاي تعيش حيره شكبرها تفسرها حسرتها ..! !

باوعتلي مبتسمة تريد افرح وهي جاي تعيش شعور المحترگ ،تجبر روحها تبين فرحتها كاملة الي بس انا أعرف بيها جاي تظم ضوجتها لخاطر مشاعري الشهدت عليهن
ميمنة : شأخبار گلب العاشگة هسه ومحبوبها راح يصير الها

أبتسمت وخليت ايدي على گلبي
_ يريد يطلع والله

ميمنة : أعرف بي

_ ولا تخيلت انا الاختارها جدي اله

ميمنة : الله قاسمة الج ،والبشر ما ينال غير قسمتة من الدنيا ،وتدرين نطق جدي واختارج اله بس هذا اختيار رب العالمين مو بني آدم

_ ونعم بالله ،بس تعرفين أحس جده وره هاي السالفه

ميمنة : شلون يعني ؟

_ مو هي درت بي احبنه

ميمنة : هاي شوكت ؟

_ من تصوب ،وراها انا طحت ونسيت حتى احجيلج

ميمنة : جا يجوز صدگ هي حطتج ببال جدي

_ أي هو انا اگول

ميمنة : جا انا منو حطني ببال جدي

_ يجوز لان أنت عمرج قريب لعمره

دنگت رأسها تطگطگ باصابعها ،وبنفس الوكت طبت ريحانة سدت الباب وأبتسمت مخلية ايدها على بطنها تحجي ويانا
ريحانة : عرايسنة شعدچن هنا وحدچن ؟

باوعتلها ميمنة وردت دنگت وانا أبتسمت اضيع ضوجة ميمنة
_ تعبت انا وگلت لميمنة تجيبني هنا وضلت يمي حتى لا اضل وحدي

ريحانة : اممم

أجت گعدت گبالنه فتحت شالها
ريحانة : جا ميمنة شبيج ضايجة ؟

اخذت نفس وأبتسمت بقهر
ميمنة : تعرفين شبيه ،ليش تسألين ؟

ريحانة : وأنت كل عقلج تضوجين على سالفة صارلها اكثر من ست سنين

ميمنة : لا مو ست سنين ،هاي من حاجاج صار ست والگبلها ما محسوبات

ريحانة : جا يضل طول العمر ما متزوج ؟

ميمنة : لا يتزوج بس مو انا ،انا ما اگدررر ،اوگع بعنادج وراسج اليابس وهو ومشاعره ،هاي جزات تعب عمري شذنبي

ريحانة : وانا شدخلني ،شبيج ميمنة ؟

سكتت تباوعلها ودارت وجهه طاحن دموعها ،گامت گعدت گبالها تحجي وياها
ريحانة : حاجي هو يگدر يسد السالفة

ريحانة : ما شفتي جدي ما خلاه يفك حلگة ،ومن حجايتة ما يطلعون تعرفيهم ،وانا الراح اوگع بيها مو احد غيري

ريحانة : جا شلون ؟

ريحانة : الله يحلها ،هسه خل نفرح لهيوفة راح تاخذ اخوج

باوعتلها بقهر وأحس بيها جاي تلوم روحها بنفس الوكت ميمنة تتظاهر هي بخير علمودي ،ضلينا نسولف شوي إلى أن طبت غاية ضايجة ،گعدت تنفاخ
شوي وتطيرنة
ريحانة : شبيج ؟

غاية :مليت كلساع جاي جاي ،شني بس انا جايي طيب عمي توررررطت

ضحكت تطيها حل
ريحانة : مو اگلج جم مره سوي محترگ هسه يتوبون

غاية : خايبة ما يطيني گلبي اشربهم جاي معطب مثل جايج

ضحكت انا وميمنة وهي كفخت غاية وعبست
ريحانة : شني قصدج هااا ؟

خليت ايدي على حلگي اريده اسكت لا يجون يحطونه برگبتهم
ميمنة : ابد ابد ما تقصدج

ريحانة : انا الج غاية هاي عود أنت العاقلة

غاية : أي والله عاقلة بس احجي الصدگ

ريحانة : جا تحجين الصدگ على حسابي ؟

غاية : جا اجاملج واگلج جايج يخبببل ؟

ريحانة : لا بس اسكتي

غاية :ما اگدر كل ما اسوي جاي اتذكر جايج المحترگ

ريحانة : يبووو عليج يا غاية ،هاي لان جايج طيب هيج تحجين والله لو مو طيب فلا تفكين حلگج

غاية : يا جايي يخبببل

ريحانة : أي جا اكليها ،ضلي كلساع ومسويتلهم جاي

غاية : جا شسوي ما يقاومون جايي

سكتت ريحانة مأيسة ،وشوي وأجت بركة گالت رجل ريحانة برة يريدها ،عدلت حجابها ومشتله ،شوي وردت شمرت حجابها وگعدت
ريحانة : جاي يريدني ارد ويا ،گلتله باجر صباحية العرسان واريد اضل

ميمنة : وشگال ؟

ريحانة : گال ضلي فدوه الگلبة ما حجه شي

بركة : حباب

ريحانة : أي والله صدگ حباب

شوي وطبت حواري گعدت يمنه ما تتحاجع والطنگورو واصله لما أعرف وين ندستها اريدها تحجي وهي ماكو گالبة الخلقة

°حواري°

گاعدة بالصاله وبصفي جفون ،گالت نگوم للمطبخ عدلت حجابي وگمت وراها ،اول ما طبت نزلت قفص طيورها خلتلهن ماي وگالت

جفون : تطلعين يم بطاتي اشوفهن اليوم ولا شفتهن ؟

_ امشي نشوفهن

جفون : يلا

مشيت وراها ،طلعنه بالحوش يم الگن ،وخرت الخشبه المسويتها مثل الباب وطلعتهن بنص هذا الليل والوكت المتأخر بس حتى تشوفهن ،گعدت انا اباوع عليها تلعب وياهن ،بنفس الوكت الفروخ تطشرن يركضن كل واحد بجهه ،ركضت تلمهن صوتهن صار شعلوه
جفون : ولج حواررري گومي كضي هذاك راح يزرگ من الباب

ركضت اجيبه لان صدگ راح يزرگ والباب مفتوح ،گبل لا يطلع كضيته وهيج روحي كاشه ،شلت راسي حتى أرد وبس عدلت وگفتي صارت عيني بعينه ،جريت شالي اغطي بروحي
عينه نزلت وي أيدي ورد باوع بوجهي وهمس
همس خلاني اجمد بمكاني
عبد الحق : أم دلعة شوكت تتسترين

رمشيت بعيوني واحس الدم صعد الرأسي من المستحى حرت وين اطي وجهي ،هذا شبي ؟شصايرله ؟ ليش يحجي وياي هيج ؟ ،حق مو هيج ولا يحاجي وحده بينه بس متقصد كل ما يشوفني بموقف يفشل ويا يخجلني بالزايد،لو هذا حضي يختلف عن الكل ..! !

درت وجهي ومشيت والدمعه بطرف عيني ،هذا ثوبي جديد مخيطته علمود عرس فقار وعود يم أم أحمد و وصيتها لا تسوي دلع بس حضي دلعته جبيره وكل حل مايصيرلها وانا بيوم الآلبس دلع الله يحط حق بوجهي ولازم يفشلني

اخذت البطه من أيدي وهي مزغرة عيونها تباوعلي وانا الطنگورة صعدت عندي كلش ،عفتها وطبيت جوه لگيتهن ملتمات بالغرفة گعدن اسمع سوالفهن وايدي على خدي

ميمنة : شعجب حواري ساكته ؟

بركة : انا هم انتبهت ،منج من الشيطان ؟

تأفأفت احاول ارجع روحي طبيعية
_ ماكو شي بس تعبانه واريد انام

هيوفة : مديلج فراش ونامي احسلج

_ هو گايمة لان كلش انتهيت

هيوفة : افرشي بصف نسمات هناك

اشرتلي على المكان ،وانا مشيت للنضده نزلتلي دوشگ وبطانية ومخده حطيتهن وبس مددت نمت من التعب والركضه جريتها للصبح وما گعدت غير على صوت جفون يم رأسي
جفون : خااايبة گومي راح نمشي لبيتكم

رديت غمضت عيوني وهي تجرجر بالبطانيه تريدني بس اگوم
جفون : خااايبة گومي شني سالفتج

گمت اخوزر بيها ،غمتني وطلعت گدامي وانا وراها نسيت البيت مو بيتنه وانا طالعة بدون حجاب وما طخت براسي الا من طبيت للصاله وجده عاطت بي
غضة : الفلك الفلكج ولج حجاااابج

وعلى صوتها اندار باوعلي وصد عينه بساع ،وانا بس استوعبت ركضت للغرفة ادگ واللطم
هم شافني ،هم شاااافني بدون حجاب ،وين اضم روحي يااااربي ليش كل المواقف التفشل والتخزي تصير وي هل انسااان هذا ،شجاااك راسي ثول حتى ثول عقلي من اگعد فاصل ،بس مو وكته والله وين اطي وجهي منه خوب هل مره شاف كفشتي التخرع وهستوني گاعده خلف الله على المرات الفاتت

شوي بعد وابجي ضليت گاعده بالغرفه ما طلعت الا من طبت علي ريحانة ،بس شافتني لافه روحي بالغطه وگاعده گالت
ريحانة : جا شني ما تطلعين شعدج هنا گاعده ؟

وانا بس عيوني مطلعتها واحجي وياها
_ طلعت ونسيت روحي ما لابسه حجاب وطلع حق گاعد يم جدة

ريحانة : يااااا

_ أي والله

ريحانة : جا شبيج أنت ؟ شلون تطلعين هيج ؟

_ مو گلتلج نسيت ،تعرفيني من اگعد عقلي يضل لاطش بالمخده ،ومن گمت نسيت انا مو ببيتنه

ريحانة : جا صارت بعد تضلين تلومين بروحج ،واكيد ما انتبه

گلت بگلبي
_ يا ما انتبه غير صار يسميني أم دلعة

ريحانة : هم يلا تحظرين روحج راح نمشي

شمرت البطانيه وگمت ،بس شني ولا اگدر انسى غسلت وجهي ورديت للغرفة لبست حجابي واخذت عباتي بأيدي وطلعت مشيتلهن للمطبخ كلهن لابسات عبيهن ومتانيات الريوگ و وي طبتي للمطبخ طب نوح شايل صينية الگيمر بأيد وعلاگة الصمون بأيد و وراه طب عزيز شايل علاگة الأجبان وطبقة البيض

مشتلهم ريحانة اخذت صينية الگيمر من نوح وعزيز حط الطبقة على الكاونتر وانا لبست عباتي واخذت العلاگة من ايده
عزيز : بعد محتاجين شي ؟

نجوى : لا يمه سلامتك

عزيز : الله يسلمج ،امشينه نوح للگاع مو تغلس

نوح : لا اله الا الله وين مغلس هاي انا مو واگف يمك

عزيز : أي اگول يعني دير بالك تفكر تطفر

هم مشوا للگعيان واحنه گبل طلعنا لبيتنه ،بس دگينه الباب طلعلنه فقار ،تلگانة والوجه يضحك والفرح مبين تارس روحه ،الضحكه شگت وجهي وانا اشوف فرحته
فقار : والله گعدت كاتلني الجوع ،لا أعرف اسويلي شي اكله ولا اگدر اطلع واجيكم شيخلصني من لسان جده

زهرة : جا ما جابولكم عشه البارحة ؟

فقار : جابولنه بس انا وين اصبر من البارحة لليوم بلايه اكل

ضحكت
_ عمه عدج فقار يموت على الاكل وياكل ولا يبين عليه

زهرة : بعد هذا عودة

نجوى : بصائر وين شو مالها صوت ؟

فقار : نايمة ،صاعد اگعدها

مشى يصعد فوگ وانا والبنات طبينه للمطبخ نحظر بالريوگ وشوي وطبت عمة شيماء وميمنة وبركة
ضلن يمنه بالمطبخ وبس عمه مشت للصاله يم امي وعمة زهرة ...

طلعت طاوة البيض وانداريت عليها من گالت
ريحانة : انا انصدمت من شفت ابنها بحضنها

_ جا عود بت خالتنه ولا أعرف بيها شوكت عرست وشوكت جابت

ريحانة : جا مبينة ابوها ما خله خالتي تعزمنه

_ أي يجوز ،بعد زيدي البيض

أخذت بيضتين زيادة وطگتهن وي الباقيات بالطاسه ،حطيتلها الطاوة على النار وبين ما تحمى مشت شرت الصمون حتى لا يعورگ
ميمنة : الگلاصات وين ؟

_ هنا

أشرت الها على الكاونتر ،مشت تطلعهن وبركة تاخذ من ايدها تغسلهن ،بنفس الوكت سمعنة صوت هلاهل أمي وعمة زهرة بالصاله ،هديت من ايدي علبة الجاي وركضت للصالة والبنات وراي ،عماتي وأمي يبوسون بيها ويتباركلها وهي غادية حمرة من المستحى چن تريد تختفي ،وفقار واگف وراها مبتسم يباوعلها من
ردنه احنه نتبارك الها جرها
فقار : رجاء من بعيد سلمن عليها ،الا بوووس

ضحكنه كلنا على كلمته الاخيره الگالها ومبين غيران
نجوى : ولك جا شني بس الك هي

فقار : أي والله بس الي ،اعذروني بوس بعد ماكوا بس انا أبوس

وگدامنا كلنا باسها من گصتها ،اعتلت صوت ضحكاتنه وهو ولا چن يشاقة گعد وگعدها بصفه يباوع علينا كلنا واگفات نباوعلهم
فقار : التتقرب ياويلها ،اكلتن مرتي اكل خدودها هسه يرحن من وراجن

زهرة : يااا ياااا شني هذا ابنج نجوى

نجوى : جا هذا فقار بعد لسانه مو جديد عليكم

مشيت للمطبخ وراهن ،كملنا الريوگ وفرشنه السفره بالصاله ،النسوان كلنا هنا ألتمينه يم العرسان والريوگ صار على حساب جدي ،بس كملنا كلشي گعدنه وهم بنصنه ،أبتسمت وانا اشوفه شلون يوكلها لان يعرف بيها مستحية ،درت وجهي من انتبهولي عيوني يمهم ،وربطت فيشة وي عمة زهرة وريحانة

زهرة : ما صار بالجاهل نبض ؟

ريحانة : أي گالت بي نبض ،بعد اسبوع اخلص الثالث

زهرة : صلاوات على محمد ،الحمدلله عينج على روحج عمه

ريحانة : والله ياعمة كل ضني من احبل عيالي گشاية ما يخلوني اشيل بعد كل هاي السنين بس شو طلع العكس وكرابهم زاد

زهرة : ياا يااا ليش ؟

ريحانة : اندري ،بس انا احاول ما اضغط على روحي

زهرة : بعدج بأول حبالتج لازملج راحه ياشغل هذا

ريحانة : جا عمة مو كل الناس متشابهه ،اكو اليرحم واكو الما بگلبة رحمة

زهرة : أي والله صح حجيج

بس كملنا لمينه السفره وانا وميمنة غسلنه المواعين وبركة وغاية نضفن وجفون عزلت ويانه المطبخ وطيور الحب ماخذين ركن يتبسبسون ،عايشين بغير عالم فدوه لگلبهم ...

نشفت ايدي بهدومي وطلعت ورا غاية ترش بالشجره
بس حست بي وراها باوعتلي وردت اترش ،وگفت بصفها
_ خوب تموتين على الماي أنت

غاية : لان احب اشم ريحة الخضار من يلوحه الماي

_ اممم ،صح طيبة ريحتة

غاية : أي ،خلصتن ؟

_ أي ،تردين اعاونج ؟

غاية : منج من الشيطان

_ خايبة والله لوما فرحانة فلا اگلج

غاية : أي جا ما اعرفج ،امشي بدلي هدومج منگعة لا تستبردين

_ جا وأنت ؟

غاية : انا أكمل وامشي لبيتنه يم نسمات خطية ضلت وحدها

_ جا مو جدة وهيوفة يمها

غاية : حتى لو ،امشي بدلي لا تمرضين وأنت منا شلونج بلاية مرض وما تتحركين

_ يااااا

ضحكت وهددتي تبللني بالصونده لوما طبيت ،وعاد صدگ من عاندت رشتني خلتني اگمز الماي كلش بارد مال ماطور
غاية : يلا امشي

_ انا الج

ضحكت وردت ترش بالحياطين ،وانا شمرت عليها المكناسة وطبيت اركض ،اخذتني الرجافة ركض ركض بدلت ولفيت روحي بالروب وما دفيت ،ركضت للصالة حضنت الصوبة وگعدت گبالها ما تحركت
نجوى : خايبة شبيج ترجفين ؟

_ بردت شو

نجوى : جا من اگول اتدفي زين ما تسمعين الكلام

_ مو هل لابسة حتى الروب

نجوى : هاي هسه ،يوميا بطرگ الدشداشة تفترين علي جواريب برجليج ماتحطين

سكتت من تگابلن علي أمي وعمة زهرة وعمة شيماء تزيدها من تگلهن أي والله ،وگبل أذان الظهر كلهم مشوا وضلينا بس انا وأمي وريحانة العرسان صعدوا لغرفتهم واحنه التهينا بالغده

ريحانة : يمه تسويها المرگة بيضه لو حمره ؟

نجوى : لا حمره اطيب

ريحانة : جا خوش انا اركبها أعرف للحمره

نجوى : أي مو أتذكر علمتها الج من جنتي مخطوبة

ريحانة : أي

گاعدة أنا اباوع عليهن بالمطبخ ،امي اعتمدت عليها اجت گعدت يمي بيدها علاگة الخضره وسله وگعدت تلگط بيها وتحجي هي وريحانة وانا اصفن هسه غير الله يهديني واگوم اقره ،هم زين عدي بس امتحان يومي وما عدي شهري جان نلاصت علي لان العرس سطرنه سطر وهاي عود الخميس كلنا فد إجازة اخذنا ومن دونة داومت بركة لان جان عدها امتحان وماقبلت المعلمة تأجله الها

مشيت للغرفة اقره شوي ما دام هدوء ،گعدت وطلعت كتبي وبديت وبس كملت اليومي شفت اكو بعد وكت كملت الكتابة العدي ،وطلعت اتغده من صاحتني أمي و وي طلعتي ،طلعت ريحانة من المطبخ بأيدها صينية غده العرسان بس شافها ضيرم تريد تصعد طفر من مكانه واخذها منها
ضيرم : جا شلون تصعدين أنت بأيدج الصينية ؟

ريحانة : شعلي خوية

ضيرم : يا شعليج بلا طحتي ،امشي اصعدي گبلي وانا اوصلها الج وانزل

ريحانة : خوش

صعدت گبله وهو وراها ،وشوي ورد نزل وهي هم ما طولت ونزلت تمشي للمطبخ ،وانا لحگتها من صاحتني
ريحانة : حواررري تعاي بساع

بس طبيت حطت بأيدي دولكة الماي
ريحانة : صعديها نسيتها

اخذتها من ايدها وصعدت ،دگيت باب غرفتهم وطبيت من گالي
فقار : تعاي

أبتسمت وخليت دولكة الماي بصف الصينية
_ رايدين شي بعد ؟

فقار : لا سلامتج .

شمرتلهم بوستين بالهوه ودرت وجهي وطلعت من الغرفة وانا اسمع صوت ضحكهم وراي ،وعلى أثر ضحكتهم أنا مبتسمة وگعدتهم الحلوه ما تروح من بالي ابد

وبس نزلت شافني عزيز صاح
عزيز : ضمي سنونج شبيج تتمضحكين

ضيرم : وأنت شبيك ؟

عزيز : تتمضحك هواي

ضيرم : ليش مايصير ،عزيز بيك شي حبيبي ؟

عزيز : سلامتك

هز أيده ضيرم ورد يحجي وي أبوي وانا مشيت للمطبخ اساعد ريحانة ،وبس تغدينة وكملنا خابرها رجلها راح يجي
نجوى : يمة والله لو تضلين يمنه أحسن عاد بين ما يثبت هل طفل هذا ... 



تعليقات