رواية خلخال مشوه الفصل الحادي عشر بقلم زمرده
ريحانة : والله يمة جا ما اتمنى ،بس حمزة يكسر خاطري ماله احد
نجوى : جا وامه واخته وين ؟
ريحانة : ملتهيات بالمشاكل
نجوى : الله يهديهن ،گومي جا لمي غريضاتج
ريحانة : هو گايمة
مشت للغرفة وانا گمت وراها ،حطت جنطتها وگعدت تلم هدومها وغراضها بحيث الجنطه بالگوه انسدت
وبس كملت بدلت بثوب محظرته ،وخلت بس حمره سحرية ولبست شالها وباوعتلي تسألني
ريحانة : حلوه ثوبي ؟
_ كلش حلووو ولونه يخبل عليج
ريحانة : احب اللون الازرگ ،شتگولين شال اسود ويا البس احلى
_ أي حلو ،عدج لو اطيج ؟
ريحانة : لا جايبة بس الجنطه شيفتحها
_ خل اطيج شالي الجديد وعود من تجين جيبي
ريحانة : خوش اطينياه
گمت طلعتلها الشال من الكنتور لبسته وطلعت بساع من صاحها عزيز ،شلت جنطتها وطلعت اخليها الها بالصاله وگبل لا تمشي صعدت سلمت على العرسان ومشت وي رجلها ،ومن هاي روحتها جانت الها بداية على الراح يصير ويلوحني حتى ..! !
°غاية°
_ جفووون ولج وينج صار ساعة اصيحج
صحتها حتى تجي تطيني قلم صار ساعة گاعدة اريد اقره واتوسل بيها تجي وهي ملتهيه تركض وي كتاكيتها
نسمات : جنها ولا راح تجيج لان ملتهيه وي فروخها
_ خل اگوم انا هواي احسلي
فتحت خانتها ادور بيها ،هم زين صارت گدامي علاگة القرطاسية مالتها ،طلعت منها قلم ورديت سديت الخانة وگعدت اللخص ،وكل بالي شلون راح الحگ وي هاي المادة الضخمه ...!
بديت اقره وساعة تجر ساعة ولنص الاليل الا خلصت ورفعت ضهري حتى دمار برگبتي لزمني و وين الا فكني وگدرت اگوم
وبس گمت بوجهي للمطبخ گليتلي طماطه وگعدت اكل بس انا بالمطبخ وطيور جفون يزقزقن گدامي
كملت ورديت للغرفة ،فراشي بصف فراش نسمات بس حطيت روحي على الفراش غفيت وبنص نومة التعب فززتني دفرة منها خلتني اگعد على حيلي ومن شفتها حتى نسيت وجع خاصرتي وضليت بس اريدها تگعد ،تبجي وهي نايمة وترافس بجسمها اكثر من مرة ندهتها وهي ماكو ولا فزت ،الا من جبتها بكفخة زينة الا صحت وفتحت عيونها تباوعلي وتتنفس بسرعه
_ شبيج نسمات ليش تبجين ؟
ردت اتمددت وعينها بالسگف
نسمات : مابي شي ،لا تخافين انا بس لان اتحلم
_ ما خايفة منج بس خفت عليج
اندارت تباوعلي وأبتسمت
نسمات : نامي وراج دوام
هزيت رأسي ب أي ومددت ضليت هواي افكر وبالي كله يم حالها وما أعرف شلون وبعد شگد الا غفت عيني وگعدتني الصبح أمي حتى امشي للمدرسة ،گمت امط بجسمي وطلعت من الغرفة صار گدامي ليث يريد يمشي للگاع بس شافني گال
ليث : لوما مدرستج جان مشيتي وياي
زغرت عيوني اباوعله أعرف بي جاي يضحك علي
_ جا خل أجي ونروح انا وياك
ليث : لا ما اگدر العصر عدي شغل
_ جا ليش تگلي وتحرگ گلبي
ليث : ليش احرگ گلبج ،انا بس گلتلج
تخصرت اباوعلة والله اعرف لو ما عدي دوام ويعرف لازم امشي جان ولا حجه ،حرك حواجبة يأشر على أيدي عود نزليها ،نزلتها ومشيت للمطبخ ضايجه والله لوما الامتحان جان سويتها صدگ ومشيت وياه واخلي يتورط ...
تريگت وگعدت راجعت شوي ومن كملت گمت بدلت ومشيت من اجه الخط ،وبس خلص الدوام ورديت شفت سيارة غريبة مو النا طابگة ببابنه ،نزلت من الخط وطبيت بس شفت جفون بالمطبخ تسوي جاي سألتها
_ شني منو يمنه ؟
جفون : أبو نسمات جاي ياخذها
_ يااا
جفون : أي والله جاي تلم هدومها
_ خل امشي اشوفها
مشيت للغرفة بس طبيت شفتها گاعده يم هيوفة تسفط هدومها ،نزلت جنطتي احجي وياها
_ شني راح تمشين صدگ ؟
نسمات : أي والله صارلي اكثر من اسبوع
_ تعودنا عليج ،قنعي ابوج تضلين بعد
نسمات : ما يقبل أعرفه ،بس والله هم اخذلي فتره واجيكم
هيوفة : هلا بيج عاد تغيرين شوي جو يمنه
نسمات : أي والله تنفست عاد هنا ،هناك سجن وما بحياتي غير الشغل
طبت جفون گعدت يمنه
جفون : صدگ أنت ياصف وگعدتي ؟
نسمات : رابع اعدادي
جفون : يااا جا والله حرامات ما ضلج شي للسادس
نسمات : كله من عمامي شدوا وياي شني تطلع وتطب
هيوفة : شدخلهم بيج ابوج هو المسؤول عليج
نسمات : ماكو هيج حجي ،عمامي حتى بأبوي يتحكمون
هيوفة : شني عود لان الزغير ؟
هزت رأسها ب أي وگامت تلبس حجابها ،طلعتلي هدوم ومشيت للحمام بدلت ورديت ،بس طبيت للغرفة سمعت صوت نوح يصيحني ،رديت طلعت بس شافني گال
نوح : صيحتي البت ابوها يگول هم يلا نمشي
_ خوش
رديت للغرفة گتلها ،شالت جنطتها وطلعت وانا وراها بس عبرت باب المطبخ ضليت واگفة اباوع عليها وهي مشت الابوها ويمه جدة تحجي ويا
غضة : اريدك تجيبها الخميس لأن عقد صخر الجمعة
غافر : لا خوية يعني بعد أربعت أيام
غضة : حتى لو اودي صخر وأم صخر يجيبوها
غافر : جا خوش اذا هيج لان انا بعد يومين ماشي للدوام
غضة : جا خوش
غافر : يلا بوية امشينه
نسمات : مع السلامة عمه
غضة : الله وياج حبيبتي ،عينج على روحج
نسمات : أن شاء الله
بس مشوا ردت جده ،طبت للصالة وانا مشيت وراها ،گعدت يم أمي گاعدة تثرم تولة ويحجن علمود الخطوبة
غضة : أبو محمد گال الخطوبة كلها عليه يعني لا يفكر بيها صخر
زهرة : والله ياعمة ما أعرف انا هسه حايرة بصخر عمي قرر وأبني فلا مقتنع وحتى للبيت ما جاي يلفي هواي
غضة : جا أنت تعرفين جدهم لو حجه شي بتنفيذ وما بيهم واحد يگدرله
زهرة : بس مو بالزواج ،خل بكلشي يتحكم بيهم بس بالزواج لا
غضة : جا هو ليش ما راضي ؟
زهرة : مو گال يشوفها حالها من حال أخته ،وحگة عمه ربوا سوه
غضة : شني يا أخته ،واذا ما اخذ ميمنة شني ياخذ غريبة ؟
زهرة : لا يا غريبة عمي وين يرضى
غضة : جا هاي هي والله انا اشوفها راهمتله وبس هي تحمل خبالاته
زهرة : يااا ياخبالات عمة ؟
غضة : جا عصبيتة مو خبالات ومني تحملها غير المنه وبي
زهرة : والله ما أعرف شاگلج
غضة : لاتحجين بس حضري لخطوبتهم وفضت راحت
ماحجت شي امي بعد وضلت تثرم وهي ساكته ،ومن ثاني يوم بدت ركضة الخطوبة ،تنضيف ودراسة انشلشنه شلش وگبل الخطوبة بيوم ،الفجر مشى صخر وأمي حتى يجيبون نسمات وجيتها صارت وي العصر بحيث أول ما طبت گالت جدة
غضة : امشي نجوى اخذيها للسوک خل تشتري هدوم للخطوبة
نسمات : والله عمة عدي وجبتهن وياي
غضة : لا أريدن تشترين جديد حالج حال البنات كلهن اشترن
نسمات : ما يحتاج والله
غضة : انا گلت تمشين ،يلا ردي اللبسي عباتج بساع
سكتت من شافت جدة قافله ،اخذتها عمة نجوى ومشت وانا ضليت اركض منا ومنا هم زين خميس عاد براحتي ،طلعت بساع من المطبخ من سمعتة يصيحني
ليث : غااااية
رفعت رأسي اباوعله يحاجيني من فوک
_ هاا
ليث : دشداشتي البيچية اكويها
_ شأحلگ انا
ليث : جا شلون منوا يكويها ؟
_ اخذها لبيت عمي باقر ريحانة هناك تكويها الك حتى نوح ودالها دشداشتة
ليث : خاف زحمة
_ لا يمعود يازحمة
ليث : جا خوش ماشيلهم
°حواري°
اغسل بالمواعين وكلساع واحد طاب شامر دشداشته علينه حتى تكويها ريحانة لان ماكو البنات ما جاي يلحگن وريحانة على گعدتها تكويهن
ريحانة : حواااري ،جيبيلي ماي شوي خل اترس الاوتي
ترست گلاص ماي ومشيت للصالة اطيته الها و وگفت اسألها
_ هاي دشداشة منو ؟
ريحانة : دشداشة نوح وراها ابدي بدشداشة ليث
_ خوش
ريحانة : اصعدي نزلي دشاديش الولد هم خل اوكيهن بطريقي
_ خوش
مشيت فوگ جبتهن ونزلت گبل لا يمشون كل واحد گالي على دشداشتة الراح يلبسها ،وي ما اطيتهن الريحانة سمعت باب المطبخ يندگ ،لبست شالي وطلعت بساع بس انا وريحانة بالبيت امي يم بيت جدي ،بس فتحت باب المطبخ صار گدامي صخر
وبدون سلام گال
صخر : هاي دشداشتي اكونهه
اخذتها منه
_ خوش
ما حجه بعد شي ومشى ،ضليت اباوع عليه ولا چن مبين عليه فرحان وباجر عقده
رديت للصالة بس شافتني گالت
ريحانة : منو اجه ؟
_ صخر وهاي دشداشتة جابها تكويها
بلعت ريگها وباوعت على الدشداشة بايدي
ريحانة : جيبيها
مشيت خليتها يم الدشدايش الما مكوية ورديت اكمل شغلي وبس كملنا ودت أمي حق علينه ،بدلنه ومشينا لبيت جدي ،بس طبينه صارت گدامنا هوسة الولد كلهم ملتمين بالحوش ،وبس طبينه للمطبخ صار بأذنه صوت الديجي انا شني بساع نزلت عباتي ومشيت للصالة بس شافتني جفون جرتني وياها رگصنه رگص من كل خاطر
بنص رگصنه صاحت جده
غضة : اسمعن خل اهوسلچن
نصيت الدي جي وركضت جبت صينيه
_ يلا هوسي
رفعت ايدها تهوس
غضة : وعرس جبير الگوم يا ناس افرحوله اخذله بنية مكحلة ومزيونة
خلصنه الليل كله هوسات ،عاندت ما امشي وضليت هنا يم البنات وحتى ريحانة هم ضلت
جريت النضده طيحتها وصعدت على البوفية گعدت اباوع عليهن گاعدات يسولفن
ريحانة : مشت حفت شوكت ؟
هيوفة : امس حافه فدوه لعيونها أجت شفتها طالعه تخبل
ريحانة : أي عاد هن حواجبها بدون حفافه ويخبلن
هيوفة :صدگ جا أنت ليش هيج تأخرتي ؟
ريحانة : يا مو نعمة من خلوني اجي ،غير والله وگعت وذرة من لساني الا عمتي اقتنعت تگلي حامل وتدگين دروب هسه يصير شي بالجاهل خطية تخاف علي
هيوفة : أي كلش حنينة
ريحانة : اشتريتن هدوم ؟
هيوفة : أي جا شلون ،وأنت ؟
ريحانة : اخذني حمزه اشتريت امس
هيوفة : ششتريتي ؟
ريحانة : فستان بنفسجي كلش حلو
هيوفة : انا ازرگ
ريحانة : صدگ ميمنة يا لون بدلة حجزت ؟
هيوفة : بصلية وبيها تطيرز ذهبي
ريحانة : الله حلو
ضلن يسولفن لنص الليل وانا وجفون كلساع ماخذاتلنه فره ونرگص ،لميت شعري وحطيت الشال على رأسي وطلعت اريد اشرب ماي ،بس من طبيت وشربت ماي وردت ارد ما گدرت وضليت واگفه بمكاني من لمحته گاعد على دجة المطبخ وحتى ما حس اكو احد هنا ،الجگاره بايده وباله ما أعرف وين گعدته گعدت واحد مهموم ..! !
بس طفت جگارتة شغل وحده ثانية وسحب نفس قوي منها ،بنص تركيزي ويا وفززني صوتها وراي
ريحانة : شعدج واگفه هنا ؟
بساع باوعتلها وبنفس الوكت طب للمطبخ هو سكتت من شافته ،باوعتلي وباوعتلة وهو اخذله صفنة بوجهه ،عدلت شالها ايدها ترجف وبساع طلعت من المطبخ وهو رد طلع ،وانا يا ذيج الصفنه الاجتني بحيث حسيت مكاني بي صمغ وما اگدر اتحرك وضليت بس أعيد بالصار براسي ،عيونة ،ورجفتها غير الي افكر بي صار هواي، ماكو اله تفسير ..! !
رديت للغرفة انا وافكاري حطيت راسي على المخده ومددت حايرة بيهن گد ما فكرت انسطرت وما أعرف حتى شلون نمت وگعدت الصبح على صوت الهوسة گمت لبست شالي يم راسي صارت بي خوفه أخاف انساه
غسلت وجهي وگعدت اتريگ وي غاية ،وس كملنا بدت الخبصة ،الطبخ برة وعود مو يمنه بس احنه مخبوصين ،الخوال والعمام بدت تلتم ،واحنه نركض منا ومنا بس أجواء كلش حلوه الضحك والرگص بفلس ،طبيت للغرفة وره غاية تريد تبدل ما ضل شي وتجي ميمنة من الصالون
وگفت حايرة شلون ابدل وهدومي هناك ما جبتهن وياي وشلون امشي على هاي الهوسة بره والله اذا گتلهم اريدن اروح يحطوني بالجدر ويسوني غده للمعازيم
غاية : ما جايبة هدومج مو ؟
هزيت رأسي ب أي
غاية : جا شلون تنسيهن
_ گلت ارجع الصبح گبل لا تجي الناس وراح من بالي شلون بي هسه
غاية : ريحانة جايبة هدومها ؟
_ أي جابت جنطتها وياها گالت أو وتالي هنا نبدل بس انا غبرة کالت جيبي كلشي تحتاجي گتلها لا الصبح ارد
غاية : جا شلون بيج ماضل وكت
_ امشي اگول الأمي تاخذني لان مابي حيل حجي اخوتي
غاية : أي احسن
مشيت گلت الأمي بالاول رزلتني وراها گالت امشي لبسي عباتج ،ركضت جبت أول عباية اجت گدامي وگتلها يلا ،لبست عباتها وطلعت وانا وراها وأول ما فتحت باب المطبخ صار بوجهنه حق
باوعلي ورد باوع الأمي
عبد الحق : ها وين ماشين ؟
نجوى : حور ناسية هدومها بالبيت
عبد الحق : امشوا
مشى يوصلنا ،اني وامي وراه بس طبيت للبيت ركضت طلعت جنطة لميت بيها كلشي اريده بساع بساع وبس كملت شلت الجنطة بأيد والفستان بأيد ومن طلعت شافني شايلته هيج ما رضى
عبد الحق : ليش شايلته هيج ،شني قلة علاليگ ؟
_ لا مو يتكسر وهو مكوي
عبد الحق : جا زحمة هيج شايلته
نجوى : اطينياه انا اشيله
اخذته أمي من ايدي وهو ضل يباوعلي ما راضي ،استغفر ومشى گدامنا وردينا للبيت وبس طبيت تلگتني جفون مبدله لابسة فستان احمر
طالع ياكل ويشرب وي بياضها وشعرها الأسود
جفون : بساع ولج برهان مشى يجيبهن من الصالون
_ هو ماشية ابدل
اطيتها الجنطه وانا مشيت للحمام لبست فستاني. وطلعت ،طبيت للغرفة اعدل بشعري وبس شافتني نسمات صاحتلي
نسمات : تعاي اكويلج شعرج حتى يگعد وي الفستان
_ خوش
گعدت وهي بايدها الكاوية ،وبس كوته وكملت گمت انا اباوع على روحي بالمراية صدگ صار حلو ،انداريت عليها مبتسمه
_ عاشت ايدج كلش حلو
نسمات : تدللين ،بعد مني تريد اكويلها گبل لا اكوي لروحي انا
غاية : ماكو بعد بس أنت ضليتي هم يلا اوكي شعرج وبدلي
ماحجت شي وگعدت تكوي بشعرها وبس كملت مشت للحمام لبست فستانها وردت ،اندارت مطيتني ضهرها
نسمات : السحاب سدي
وخرت شعرها حتى لا يچلب بالسحاب وانا اسده أجت عيني على ضهرها ،بلعت ريگي وصفنت اريد اعرفه شنو هذا ،حست بي يمكن وجرت روحها تباوعلي مرتبكة وتحاول تسد بيها ،حاولت احسسها ما شفت شي بس هي عرفت بي كلش زين انا شفت
ضهرها والبي ...!
طبت تركض وتصيح
جفون : أجتي ولجن تعالن نتلگاها
طلعنه كلنا بساع ،و وگفنة بباب المطبخ نشوفها من طبت ،الحوش فارغ وبس ولدنه بي لان وكت غده الزلم هسه ،بس طبت تلگيناها بالهلاهل والجكليت وبس طبت للصاله شالت ريحانة البرگع منها وكلنا صلينا على محمد من شفناها ،طالعه تخبل مكياجها الوردي كلش لايگ الها وتسريحتها كلش هادئه وبسطيه بس گاعدة وي شكل البدله لا هي نفخ ولا هي فستان انصدمت من شفتها شگد حلوه
°هيوفة°
بس خلص الغده گالوا نعقد الهم ،هي طول الوكت ساكته بس من سمعت راح يعقدون دموعها صارن يطيحن عشرة عشرة ،حاجيتها بس ارديها تسكت بدوا ينتبهولها ،والتبجي بيوم خطوبتها الف أن يخلون بكل دمعة تطيح من عيونها ،لبستها البرگع بصائر ولفتها زين وطبت لغرفة جدة يعقدون بيها
وبنفس الوكت طب أبوي وجدي وصخر والشيخ وصوت الهلاهل اعتلت بطبته ،اباوع الاخوي رأسه ما رفعة ،ولا جن ذاك أخوي الكلنه نعرفه ،هسه هو انسان ثاني ،أنسان ما مسيطر على رجفة ايده
سدوا الباب وكلهن التمن يم الباب خالات اذاناتهن ،شوي وعلت هلاهلهن دليل على هاي هي ميمنة صارت الأخوي الگلبة مو الها ،بهل وكت شگد دعيت الله يزرع الحب تجاها بگلبه ،تمنيت ما تنسكر ولا اشوفها بيوم ضايجه ،هي عزيزة عدي وأخوي هم دعيت ينسى هواي بهل وكت لان ميمنة تستاهل بس الخير ولا تستاهل بيوم يحترگ گلبها ويكون السبب من اخوي ...! !
بس طلعوا من الغرفة تلگنهم بالهوسات وانا بالي كله يمها ،تمنيت اگدر امشي واروحلها شوي اهدي من خوفها ،اعرفها خايفة واعرف البگلبها شني هسه وشجاي تفكر ،بس ما گدرت وضليت اباوعلهم من بعيد گعد يلبسها الذهب وانا عيني يمه بس اريده يباوعلها ولا رفع عيونه ،وبس كمل بساع طلع وهي دارت عيونها احس بيها تدورني ومن اجت عينيها بعيني هزيتلها راسي اطمنها ،اخذت نفس وبالگوه على روحها زرعت ابتسامه تجذب بيها على الموجودين بس مو علي صاحبتي واعرفها جاي تمر باصعب لحضات ما تمنتهن بيوم
للمغرب خفوا المعازيم وبدأ يفرع البيت وطبوا جدي وعمامي و وراهم طب صخر وبرهان وعبد الحق ،وگفت تلم البرگع تغطي صدرها وايدها ،تباركولها وطلعوا وضل صخر واگف بنفس مكانة يباوعلها بس انا من دون الكل احس نضرته بيها الف سالفه وسالفه ماگدر يحجيها ..! !
دارت عيونها مستحية منه ،وگعدت وهو خله وطلع
صحت لغاية توديني يمها وبس مشت غاية لزمت ايدي حيل ترجف
ميمنة : گلبي راح يوگف هيوفة شلون اصدگ الصار
_ حاسة بيج والله ،بس هاي هي صارت ولازم تصدگين
ميمنة : أخاف لا جاي يتخيلني هي ،اخاف لا يكسرني
_ أخوي مو هيج ميمنة ،بس گولي يا الله وخلي ثقتج بربج جبيره
تنهدت بحيره
ميمنة : ونعم بالله
اجت بصائر تتمخطر بمشيتها هي وفستانها الأبيض
بصائر : تگومين تنزعين البدله ؟
ميمنة : أي والله لان كلش اختنگت
مشت هي وبصائر للغرفة ،نزعت بدلتها وردت گعدت بصفي وصفنه تاخذها وصفنه تردها ،خليت ايدي على رجلها
_ ما جعتي ؟
ميمنة : لا اكلت بالصالون جابلنه برهان غده
_ جا صار هواي
ميمنة : ما اشتهي والله
_ شني السالفة ؟
ميمنة : ما اريد والله من اجوع انا اگوم أصب الروحي
_ خوش
°جفون°
واگفة انا وفستاني الأحمر بالمطبخ من گد ما عاجبني وحابته ما اريد انزعة ،البيت فرع وبس انا وغاية بالمطبخ هي تعزل وعود انا اعاونها كلساع وعايطة علي لان ما اشتغل بساع ،أخر شي گالت امشي عزلي الديوان
_ شلون اطلع
غاية : محد هنا كلهم مشوا يم بيت عمي باقر
_ جا خوش
أخذت المكناسة وطلعت ،بس طبيت للديوان رفعت شعري عالي وبديت اعزل بي ،صاير هوسة ومن كملت بديت اكنس واغني وي روحي
_ عيون الغزال عيون چنتنه ،وصلوا على النبي هل صيدة صيدتنه
طبعت براسي اليوم كله ،والله صدگ تنطبق على ميمنة عيونها مكحلة جنهن عيون غزاله
_ احمم
رفعت رأسي على الصوت وفزيت من شفت نوح واگف بباب الديوان ،حرت وي اضم روحي وانا فستاني مكشف و ولا يم الستر ابد ،ركضت ورا البرده لفيت جسمي وراسي وبس عيوني ضلت طالعة ،وهو تقدم يمشي علي مد ،ايده ورا ضهره وقدم رأسه يباوعلي مسافة قليله كلش بيناتنه ل أول مره احس لساني انبلع وما اگدر احجي مثل كل مره
نوح : اليوم طالعة حلوه الخايسة
ضميت وجهي وخليت بس عيوني طالعة
_ أنت الخايس ابو ريحة
نوح : اذا مثل ريحتج هنياله ،شني العطر المخليته ؟
_ هااا
نوح : شحمة ولابسة احمر .
حجة ودار وجهه وبساع طلع من الديوان ،خرب لوما لبسي فضيحة جان عرفت شلون ارده ،امداج جفون هي غاية منو يسمع كلامها وأنت مثل الثولة مشيتي بحجيها
گعدت اغم بروحي ليش سكتتله وما حجيت بس هو شبي ما عاركني مثل كل مره ،هو هذا ما ينحزر نوح ابو السفينة
كملت كنس ورديت أول ما شفت غاية غميتها
_ كله منج نوح شافني هيج
غاية : وانا شدخلني
_ جا صح مو صوجج صوجي انا سمعت حجيج
غاية : أي بعد أنت زوج
خزرتها وطبيت للغرفة اخذتلي ثوب ومشيت بدلت ورديت لفيت راسي ونمت گعدت ثاني يوم على صوت حواري يم راسي
حواري : گومييي بساع أجيت أخذج
_ وين
حواري : جا مو اليوم سبعة فقار هم يلا نتحظر شني منو يشتغل وياي
_ جايتني علمود الشغل ،عبالي علي
حواري : جا شني ميته على شكولج
غطيت راسي
_ لو تموتين ما امشي وياج
حواري : جا امشي اكسر بيضات خرزة
گامت وانا طفرت
_ حتى اموووتج حواري والله اموتج كلشي ولا خرزة
حواري : جا لبسي عباتج وأمشي وياي
_ اريد اتريك
حواري : انا هم بعدني ما متريگة امشي لبيتنه نتريگ انا وياج
باوعتلها مزغره عيوني
_ اتوسلي
حواري : انجبي
_ جا ما امشي
اجت تجرجر بي
حواري : عليج الله امشي جا انا غير أحبج واريدج وياي نرگص ونشتغل
_ خوش اذا بيها رگص امشي
ضحكت وانا هم ضحكت ومشيت طلعت غسلت ولبست حجابي وعباتي وطلعت وياها غاية بس شافتنه گالت
غاية : انا هم امشي وياجن بس اوگفلي اللبس عباتي
حواري : بساااع
مشت لبست عباتها وأجت ويانه وعمه نجوى من باب بيتهم تباوعلنا بس طبينه اتلگتنه بصائر ،سلمنا عليها وطبينه ،ترگينه وبدينه نشتغل والديجي بنصنه كلساع مطلعات اغنية شكل ونرگص ونهوس هل أيام الفرح تارس قريتنه وما عدنه غير الرگص والونسه ما جنت ادري هاي الايام بداية لكل شي راح يصير ..! !
وللعصر التمن الخالات والعمات وانا رديت بساع للبيت انا ونسمات بدلت وحظرت روحي ورديت ،بس طبيت للمطبخ صارت گدامي هوسة العشه نسمات مشت جوه وانا ضليت واگفه يمهن
نجوى : زهرة شوفي الدولمه تحتاج بعد تضل على النار لو كافي ؟
مشت عمه شافتها ،طلعت سلگاية تضوگها
زهرة : لا كافي أستوت
نجوى : جا خوش طفيها منج
واگفه يم باب المطبخ الجوه ،صاحتني
ميمنة : تعاي جفون لا تصير بيج ريحة طبخ
سمعت حجيها وطبيت للصالة يمهن صدگ ريحة الطبخ قوية بساع تتشبع بالهدوم
غاية : اكلج ما شفتي صخر ؟
_ لا ليش ؟
غاية : أمي تگول اليوم مصبح مريض وحتى ما طالع
_ ياا اسم الله
غاية : أي والله
_ شني شبي ؟
غاية : فلاونزه ومصخن
_ جا شلون يضل وحده
غاية : گبل لا تجي أمي موصية ليث يضل يمه
_ جا خوش
ميمنة : خوما هم ضغطه صعد ؟
هيوفة : ما أعرف
°هيوفة°
ما گدرت اگلها ضغطة صاعد والبارحة بالليل ليث گالي واصل عشرين وخلص ليلة حتى جوه ما طب وضل گاعد بالديوان ،شأحجي جا غير يكتلها القهر وراح تحس وهي ما يعبر عليها شي وكلشي يضل بخاطرها
بس خلصت سبعة فقار ردينا للبيت بالليل ميته من التعب ،مددت رجلي كلش توجعني وما اريد اقلقهم علي من اتحرك اتأذه بس ما اگدر ما أحظر الافراح هاي وانا انتظرتهن ساعه ساعه
لفيت روحي بالبطانية ما اريد ابرد ،البنات گدامي يقرن ونسمات گاعدة تباوع عليهن ،صحتها تجي تگعد يمي گامت وأجت بصفي ،خلين ايدي على رجلها
_ تحبين الدراسة ؟
نسمات : كلش احبها
_ ارجعي حتى لو تقرين خارجي
نسمات : وين اقره وكت ماعدي نهاري كله ركض
باوعتلها حايره صدگ وين تلحگ تقره وهي ما تگعد ولا تعرف شي اسمه گعده ،من شافتني سكتت گامت على فراشها وانا مفعول الدوه قوي ما خلاني اطول هواي ونمت بساع
°حواري°
شمرت الكتاب روحي طافره هسه أني شالحگ ماضلي وكت وعدي امتحان وما نايمة ،رفعت راسي على صوتها
بصائر : شنو شبيج ؟
اجت گعدت يمي وخلت صينيه الفواكه گدامي
بصائر : اكلي ما شفتج تعشيتي
_ تعبت والله عقلي قافل
بصائر : نامي ساعة واگعدج
_ هااا
بصائر : أي والله عاد من تگعدين تسوعبين التقري
_ جا خوش ،بس مو تخليني نايمه
بصائر : لا والله انا هم منتظره فقار يجي ،وهاي الفواكه يمج من تگعدين اكليهن
أبتسمت
_ شكرا
بصائر : العفو
گامت مشت وانا بس حطيت راسي على المخده نمت وما گعدت غير على صوت فقار يم راسي
فقار : اگعدي حواري مو تردين تقرين ،ولج تمبببل
فتحت عيوني اباوعله وارجع اغمض بعدني مطفيه بس فززني قطرات المي على وجهه ،طفرت اگمز من مكاني
_ هااااي ليش
فقار : جا اگعدي مو موصية بصائر تگعدج
_ بس مووو هيج تگعدني شبيك
فقار : جا ما ضلج وكت
_ مشكور وأنعم الله عليك من گعدتني
فقار : تدللين
ضحك وطلع من الغرفة وانا مشيت غسلت ورديت گعدت اقره والفواكه يمي خلصتهن اللهي روحي بيهن ولان دوامي صبحي حتى مشيت ما نايمة وبس طبيت للمدرسة ركضت لصفي أول درس الامتحان والحمدلله عده الامتحان بخير ودرجتي اكثر من درجة النجاح تطلع ،رديت للبيت انا طايره ما راح تعبي بلاش ،بس ما دامت فرحتي ابد من طبيت للقرية وشفت الولد مسلحين و واگفين ومبين من وگفتهم اكوا طلابة صايره ...
والله اشعل الروح
شموع لو جيت
تدري انت شكثر
تكتل الفرگه
•---∞∞∞∞∞∞∞---•
°غاية°
زهرة : ولك يمه نوووح شصاير
طلع بساع يركض التفگه بايده والولد برة يصيحون عليه بساع وامي هنا مثل الطير المذبوح بس تريد تعرف شكو وشصاير ،وگفتهم برة واصواتهم العالية تدل على طالبة صايرة بس ليش و وي منو محد جاي يحجيلنه
طبت جفون من المدرسة تباوع بالوجوه وتسأل شكو
رفعت اچتافي حايره وصدگ ما اعرف شصاير
_ كلشي ما نعرف ،الولد مشوا للگيعان وماكو ساعة وردوا وهاي وگفتهم بره ومابيهم أحد طب وحجالنه
جفون : طبعا هم عركة
_ جا شني مبينه ،بس وي منو النوبه
جفون : جا اكو غير بيت غازي غازات
_ مو فضت وي بيت غازي
جفون : يا فضت ،بس مال گيعان والحرگ مو گالوا
صفنت متذكره
_ صح تذكرت
طبت تبدل وانا ضليت يم امي ،من القلق حتى ما راجعت وعدي امتحان ضاله بس اروح وارد بالمطبخ وامي گعدت تدگ وتلطم بزعت روحها كل ما يطبون ما چن يشوفونه
طبت جده تباوع الامي
غضة : شني سالفتج بكل مره تنوحين ،المثلج لازم تتعلم ،هاي احنه يوميا نفس السالفة شني الجديد ؟
زهرة : ونضل هيج منا لمن واحد منهم يروح من ايدنه
غضة : سمي بسم الله وگومي جوه هسه شوي ويطبون
زهرة : جا من يطبون غير يحاجوني ،يشوفني گاعده هنا ولا جني گاعده راح اموت من ضيمهم
ماحجت جده وطبت ،وبنفس الوكت طب نوح
نوح : غاية الخط برة متانيج ،اذا ماعدج امتحان ضلي لا تمشين .
گمت بساع حتى اجيب جنطتي وعباتي
_ عدي امتحان شهري لازم امشي
بساع طبيت جبتهن وأجيت لبست عباتي وشلت الجنطة وطلعت وراه ،مدنگة امشي بس صعدت باوعت عليهم واگفين جنهم سرب طيور شرسه يردن فريستهن ،كل واحد بيهم تفكته على جتافه و بكل شر واگفين وگفة ،متحزمين للمشاكل حزام
°حواري°
لبست عباتي ولزگت وي أمي تمشي لبيت جدي تريد تشوف شصاير ،وگبل لا نطلع اجت تركض بصائر ورانه صاحت بيها أمي
نجوى : وين طالعة عروس أنت
بصائر : جا شني عمه تخلوني وحدي
نجوى : جا جدتج لو شافتج طالعة ما تسكت وتضل تحجي
بصائر : حتى لو خلها تحجي ،امشي وياكم
نجوى : ياااايمه من عنادج مرت فقير بعد وأخت حق
ضحكت ومشت ورا أمي من طلعت ،وانا وراهن طبينه لبيت جدي واحنه مدنگات ،بس شافتنة جده طبينة گالت
غضة : كملت ،تعاي گابلي زهرة واللطمي وياها
وأمي ما صدگت خبر گابلت عمه زهره وگعدت و وحده ترفع والثانيه تكبس
زهرة : انا على يوم يوگف گلبي من مصايب احفادج
غضة : يااا واني شلي غرض ،شني گايلتلهم روحوا تعاركوا
نجوى : والله لو شايفين العين الحمره من جدهم ما جان يوميا مسويلنه مصيبه
غضة : جا شتردين ما يطلع وراهم ؟ والله تحيرن .
نجوى : عمه بس مو هيج على يوم يسولهم سالفه فلا ترگع
غضة : بس اسكتن تتفايلين بس بالفگر
سكتت أمي وضلت تتگلب على نار ولهناك وطب فقار عيونه بگصته وبرهان يدفع بي يريده يطب ،گامت أمي تصيح شكو تريد تعرف شبي وليش هيج صاير عصبي ،دفعه برهان بالمطبخ وهو يتهادد فلا سكت
فقار : هدنييي امشيلهم اكمل عليه ،هدونييي اطيح حضه اطلع غدرته الي من عيونه
برهان : جا قصرتوا أنتم ،كاااافي هيد لا أحطك برگبتي
فقار : هدد أيدي شگد قوي ،هدني
هد ايده و وخر يمسح بوجهه وشرايين گصته ناطه و وجهه صاير أحمر دم
نجوى : شكو شصاير ؟ احجولي شني المصيبة الجديده ؟
اندار خزر فقار ورد باوع الامي
برهان : أبنج عمه شايف محسن أبن بيت غازي بگاعهم وحاطه وكاتله ،و ضيرم وصخر بدال ما يوخرونه متگابلين ويا على الولد مسوين عليه وليه
فقار : جا شني تريدني انسه شسوه بي وشلون غدرني ،افاااا وانا من عگاب الرأجس ،ثلثين الحگ حگي من عيونهم
برهان : وهسه احسن الولد بالمستشفى ولو يطلع منها سلامات لو لا
فقار : وعساه لا طلع منها سلامات ،دمه جدي يفصله وفضت راحت
برهان : شني عبالك هيج هينه ،الحجي هين بس الله يستر شراح يصير وره هاي فعلتكم
فقار : لا تضل تلوم بي حگي ،انا انغدرت غدروووني وحگي ما نسيته و أخر همي شراح يصير
برهان : العتب مو عليك ،على الكبار التگابلوا عليه وياك
ماحجه شي فقار وضل بس يباوعله وعاگد الحاجب ومن طلع برهان مشى گعد گبال أمي من گعدت تلوب وتحجي والخوف ماكلها اكل
نجوى : ليش يمه ،ليش ولك فقور يمه ،ليش يوميا مخوفني عليك ،ما اتوب من بيت غازي أنت ؟
فقار : شني سالفتج يمه ،جا ترضينها اسكت عن حگي ؟
نجوى : جا شلون نخلصها طلايب ،اذا أنت ماتطي من روحك ولا هم يطون من روحهم ،ضلوا هيج لازمين تفگكهم و واكفين
فقار : احنه الها يمه ،وأنت شبيج ترجفين ؟
انداريت اباوع عليها واگفه بصفي وصدگ جاي ترجف گام بساع من شاف رجفتها زادت ،لزم ايدها يحجي وياها
فقار : بصائر ،حبيبتي ،شبيج ولج ؟
غضة : هاي من سوالفكم عروس وخوفتوها هسه تنچبس
فقار : يا چبسه جده ،حاجوني ليش هيج حلگها صار ابيض
غمضت عيونها وردت فتحتهن ،وضغطت على أيده
بصائر : مابي شي بس شوي خفت
فقار : جا هو هيج كل اليخافون مثلج ؟
بصائر : انا ما اتحمل هذا طبعي
فقار : اروحن فدوه الج أنت وطبعج ،بس لا تهبطيني هيج مرت الثانية
أبتسمت وهزت رأسها ب أي وهو صاحوا عليه وطلع بس گبلها هواي وصانه عليها الا مشى ،گعدت تباوع خاله ايدها على گلبها وأمي بصفها تحجي وياها
نجوى : شني عمه شجاج ؟
بصائر : مادري والله عمه هيج چن روحي انسلبت مني وردت
نجوى : اسم الله على روحج
غضة : أنت نجوى الفهمية ليش مطلعتها ؟
نجوى : والله گلتلها مايصير تطلعين عروس أنت بس هي ما عاندت الا تجي
غضة : ليش ولج ؟
بصائر : جا أضل بالبيت وحدي
غضة : جا مو حور يمج ؟
بصائر : لا اجت هم وي عمة وانا گلت خوما اضل بس اني لبست عباتي وأجيت
لافت السالفة علي وخلت جدة تجيبني بذيج الخزرة الزينة
غضة : ولج حووور ما ضليتي يم مرت اخوج
_ شني جدة اضلن هناك وفضولي منو يسكته مو تعرفي أنت
هزت ايدها ما راضية
غضة : الفلك الصاب راس فضولج ماتبطلين منه
_ لا جده وين اگدر يمشي بدمي
غضة : أي صح من وأنت زغيرة تحطين اذانج على باب الاستقبال وتتسنطين
_ أي جا هم زين من تعرفيني
سكتت من شافت الحجي وياي ما يجيب نتيجة وانا گمت اشوفن جفون وينها اشو ما بينت ،فتحت باب الغرفة وطبيت لگيتها صافنة ،طبگت الباب وتقدمت صحت بوجهه
_ جفوووون
هي گمزة وهي وگفت على حيلها وعاطت مخترعه
جفون : وسسسم شبيييج
_ سم السمج ،وين صافنة ؟
جفون : يعني حتى من اصفن لازم اگلج وين صافنة ؟
_ أي جا غير صاحبتج
انفتح الباب وطبت ،ستدته و وگفت تباوع علينا
نسمات : شبيجن ؟
جفون : انا صافنة وأجت گمزتني الله يقبلها اجه يوگف گلبي
نسمات : يااا وليش ؟
أبتسمت
_ جا شني شعدها صافنة ،انا صاحبتها خل تگلي وين صافنة
صفنت بوجهي
نسمات : هاي صدگ تحجين ؟
_ أي جا شني قابل جاي اجذب
نسمات : مبين لا
_ أي خوش هم زين مبين
ضحكت ومشت گعدت تباوع علينه ،جفون زعلت لان گمزتها وانا اجرجر بيها أريدها ترضى ،ومن مليت كفختها على رأسها وطلعت عفتها وراي تصيح وتتحلف بي
بس طلعت من الغرفة صار گدامي نوح نازل من فوگ بس شافني گال
نوح : جفون وين ؟
_ جوه ليش ؟
نوح : مو اگولن متعود اشوفجن سوه
_ زعلت علي
نوح : ليش ،شسويتيلها ؟
_ بس جانت صافنة وگمزتها وهي زعلت
ما حجه وعينة صارت على باب الغرفة المطبوگ ،زغرت عيوني اباوعلة ،واگف گدامي وصافن وانا بساع صرت اجيب منا واخلي منا واحلل صفنتة ،من شافني مركزة ويا عدل شعرة ومشى بساع يطلع من البيت ،يشرد مني يمكن ما أعرف من روحه المفضوحه ..! !
رديت للغرفة ،وانا خالة أيدي على خاصرتي ،گعدت گبالها ،وهي دارت وجهه عود زعلانة ،نترت بيها
_ عوفي الزعل وراح اسألج وجاوبيني
جفون : ولي ما احجي وياك
_ انجب واسمعني لا اكفخك
جفون : اهووو ،اجباري ؟
_ أي اجباري ،وگليلي أخر مرة حجيتي وي نوح شوكت ؟
بأستغراب سألتني
جفون : ليش ؟
_ دجاوبي
جفون : ما حجينه ،هو حجه
_ احجي عاد
جفون : بيوم الخطوبة بالليل جنت انضف بالديوان
_ هااا ،أي
جفون : أي
_ بس هيج ؟
دنكت مخلية اصبعها على رأسها ،واعرفها من تسوي هل حركة معناها جاي تفكر
زغرت عيوني بشك
_ احجي
جفون : احمم
_ هاي الاحم وراها شي ،غردي جفون شصاير ؟
جفون : شافني بالفستان
فتحت عيوني وصحت
_ وبلاية حجاب ؟
جفون : أي ،بس غطيت روحي ،وانت شبيج هيج فاتحة عيونج سديهن لايطب بيهن تراب ،انا جنت ما اللبس حجاب گدامة وهاي ما صارلي سنة من لبست واذا عادي
خرطتهن علي وتحركت تريد تگوم ،جريتها
_ بس فستانج مو مستور
جفون : جا شسوي انا شمعرفني راح يجي
_ حجيت ويا وعيونة لزگت على الباب من جبت طاريج
عتت ايدها مني ما راضيه على حجيي
جفون : شني سالفتج بطلي على كلشي تركزين
_ بس والله مو خالي ويجي يوم تتاكدين من الاگوله
عاطت ما راضيه
جفون : شبييج حوررر
_ لا تعيطين شبيج كلشي تاخذي عياط ،ترا سالفة عادية واذا تناقشنة ؟
باوعتلي وگامت بدون ما تحجي بعد ،وانا درت وجهي عليها من گالت
نسمات : انا هم انتبهت بي نظراته الها مو طبيعية بس الاحسن لا ترجعين تفتحين السالفة وياها حتى لا تضوج .
_ هي رابيه ويا مشوفين گامت تنتور
نسمات : جا حگها وأنت اكثر وحده ما لازم تضغطين عليها
هزيت رأسي ب أي وگمت طلعت من سمعت صوت صياح عالي بره ،بس طبيت للمطبخ شفتهم كلهم واگفين بره بالحوش و وي ما طبيت اشتعلت الدنيا علينا برة وصوت الجيلات وهن يخطفن من سمه القرية رعب بحد ذاتهن ،طلعوا الولد يتراكضون وصوت صياحهم وي صياحنه ومراكضنه حتى نعرف شكو ،رعب ولا انسى ابد من أمي طلعت تتوسل بولدنه لا يسوون الي براسهم والمتحلفين بي الهم
نجوى : ولك بويه ،مشوااا من ايدنه الووولد
وبس هده الرمي طب صخر گد ما يمشي سريع احس بي رجليه على الگاع ما يحطهن
زهرة : ولك يمة صخررر تعااال، وييين شتسوي ماخذ القفل
جر قفل مال الورشة مالتة وطلع بساع بدون ما يلتفت ولا يدير بال لصياح عمة ،گعدت عمة تنوح وتلوم بيهم وجدة تدعي
غضة : دخيلك يا أبو الحسنين ياعلي ،احظرنه دخيل اسمك عينك على هل وليدات
زهرة : عمة ليش أخذ القفل مال مخزن مالته ؟
غضة : اندري ياعمة جا مو حالي من حالحج ما اطانه فكه نفتهم شصاير
زهرة : والله گلبي لاعب منهم
غضة : هسه من يجون نعرف شسووا
شوي وطب جدي والباقين وراه ،بس شفناهم كلنه وگفنه ومن طبوا ما حجينه ولا اطونه مجال وگب صياحهم
محمد : اناااا على كلشي سويتووه ما راضي ولا راح ارضى ،الولد وين راح ،شني هيج اختفى بس وصلنه ؟
رأجس : أنت بس اطلع منها
محمد : ضل ،ضل صيح اطلع منها وخلهم على هذا الحال يوميا طلابة شكل ،ازغرهم علمته ما يحط رجليه بالگاع ويطگ بكيفه وچن ولد الناس تايهيلهم
رأجس : جا شني تريده يشوف الغدره وما يطگه ،
والله لو مسويها أنا الاطگه واخلي يتعلم لا يهد حگه ،بس هو حفيد الرأجس حگه ما ينساه لو بعد دهر
ضحك بأخر حجاياته وضرب على جتف فقار بصفه واخوي شوي بعد ويحطله جناحات ويطير ،يلامن أمي ونسوان عمامي من يگولون جدنه فرعنهم ،هاي جاي اشوف بعيني
طبوا واحنه وراهم نمشي وانا صافنه ،شني جيلات ،شني طبوا و ولا چن صاير شي ،اكو شي غلط لو شني ؟
گعدوا وجدي بنصهم وأمي وعمه زهرة واگفات يباوعون ومبين ما راضيات على كل فعل جدي جاي يأيدهم بي بس مابيدهن شي ..!
درت وجهي على صوت عمه شيماء تصيح بأسم حق
شيماء : حق يمه وينك
گعدت أول ماطبت الصاله حيلها رايح تباوع لحق وايدها على گلبها ،مشالها حق گعد گبالها
عبد الحق : شني السالفة ،شبيج يمه ؟
شيماء : تسأل شبيه وأنت طيرت گلبي من طبيت تركض واخذت تفگتك
عبد الحق : جا شني جديدة عليج ،هاي احنه يوميا جارين تفگنه
شيماء : أعرف بس انا ماعدي الحيل اخسر واحد ثاني من ولدي
برهان : وانا يمه شني مو من ولدج ؟
اشرتله تعال وهو اجه گعد گبالها من الجهه الثانيه ،لزمت ايده تفهمه
شيماء : أنت عاقل مو مثل هذا اخيك
عبد الحق : خلف الله عليج يمه
باوعت لجدي والخوف بعده مبين بنبرة صوتها
شيماء : عمي واليرحم موتاك بهذا اليوم ،كافي مشاكل لا توگف وياهم بعد ،هاك شوفهم كل واحد بيهم تفگته على جتافه
باوعلها جدي ودار وجهه ومبين ما راح يسوي شي من الگالته ابد ،لان جدي يهوس للمشاكل اكثر منهم
اجتها امي تگومها ،سندت روحها عليها وگامت ،مشت طبت لغرفة البنات وانا مشيت وراهن ،بس طبيت أجت أمي والبنات هم
نجوى : انا على يوم احطهم هم وجدهم وداير عليهم نفط واخلص من هل مشاكل
زهرة : اسكتي يمعوده لا يسمعوج
نجوى : امشي شوفيهم ،ولا معبرين أم ولا أب كلام عدهم الاهم واحنه لو حجينه يرگعون كلشي نگوله بعرض الحايط
زهرة : هاي بعد تربات جدهم غير ،ويمشون ورا اليصرف الهم ،احنه شنحجي ما يصرف ولا يعجب
وتردين ياخذون بي
شيماء : أي والله ما حجيتي غير الصدگ
گعدن مثل كل مره محترگ گلبهن يحجن عليهم وعلى جدي وكل فايده الحجيهن ماكو بس يفرغن قهرهن وخوفهن وكلمة جدي هي التمشي ومثل ما يريد يمشيهم
گعدت حاطة ايدي على خدي ،هدوء غريب صار بعد عاصفة صوتها لهسه بأذني بس ما جنت ادري هذا الهدوء راح هواي نستفقده بحياتنه ونگدر نگول هذا هدوء وقتي لا اكثر ولا اقل والعواصف جايتنه بالطريق ..!
رفعت رأسي على صوتها من طبت
ميمنة : السلام عليكم
ردينة السلام وهي أجت گعدت يم امها تحاجيها
ميمنة : جا يمة هيج تمشين وتعوفيني ،بالصدگ بالجذب گليلي وين ماشية مو أضل ادور عليج وما الگاج
شيماء : جا انا تيهت دربي بس اريد اشوفن اخوانج
سالمين
ميمنة : والله طاح گلبي من عرفت بروحي وحدي بالبيت
شيماء : منو جابج ؟
ميمنة : حق اجاني .
هزت راسها بخوش واندارت تحجي وي عمه زهرة وميمنة گامت گعدت يم هيوفة ،اصلا أستغرب اذا گعدن وحده بعيده عن الثانيه ،تعودنه نشوفهن دوم گاعدات وعكس وحده على رجلين الثانيه ،مثل ما گعدن هسه هيوفة ماده رجليها وعكس ايدها على رجلين ميمنة بصفها ،ما اتحمل من يگعدن ما امشي واروح اگرب عليهن واسمع سوالفهن المرات الگف منهن هواي سوالف انا ما اعرفها ،هذني الاثنين هسه كلشي يعرفن الصاير گبل ومرات الراح يصير بالايام التجي ...!
گعدت بصف نسمات الگاعده قريبة عليهن ،وأذني خليتها يمهن
ميمنة : اخوج يمكن ضغطه صاعد ؟
هيوفة : مو جديدة تلگي صاير عصبي وهل ضغطة صعد
ميمنة : من طبيت جان يحجي بس شافني سكت ودار وجهه
هيوفة : بعده ما مستوعب صرتي مرته
ميمنة : خلي براحته شوكت ما يستوعب خل يستوعب ولا انا الراح افرض روحي عليه مثل ما فرضوني
هيوفة : جاي انقهر من اشوفج هيج مشلوش بالج
ميمنة : كله من جدج هيوفة دمرني ،وابد لا تزعلين مني لان هو اخوج بس مقهوره عليه وعلى روحي ،لا انا اليتمناها ولا هو الانسان الخلصت عمري اتاني
عقلي ضل ياخذ ويجيب وانا اسمع الحجي الصار بيناتهن ،وكل ما اسمع كلمة زايدة تتاكد شكوكي الخلصت ذيج الفتره كلها افكر بيهن ،هسه بحجيها وقهرها المبين مثل عين الشمس صدگ صخر طلع يحب واليحبها أختي وانثبتلي هل شي من گالت ونبرة صوتها مبين بيها القهر والحيره وكل كسرات الدنيا
ميمنة : انا تمنيت الله جامعهم جان هسه شحلاهم بس تبقى أمنيات وانا الطحت بعنادهم .
گمت بساع من صاحتني جفون وانا أحس من گد ما انثولت حتى الباب تيهته ،طلعت امشي انا عقلي الصار اثگل من الطابوگة من تاكدلي كلشي فكرت بي صح وأكثر تفسيراتي گدام عيني جاي تتوضح وتبينلي هذا الانسان الي هسه گدامي گاعد وجگارته بأيده وعيونة صايرات دم گد ما حمر والحاجب المعگود وهو يحجي وياهم ويطي رأيه ،هذا الانسان حب أختي بس ليش ما اخذها وهو كلمتة ماشية حتى عد جدي ..! !
مشيت وراها من طبت للمطبخ ،گعدت وأشرتلي اگعد بصفها ،گعدت بصفها ومن گالت
جفون : أنت ليش تخليني ازعل وازعلج ؟
ذكرتني انا زعلانة ومن كل عقلي گمت وياها
_ جااا صايبج مرض تزعليني ؟
جفون : أنت هم مرات تزعليني مو بس انا ،بس أنت صار مرتين تحجين وياي على نوح وتعرفين انا رابيه ويا حاله من حال أخوي
_ انجبي أبن عمج منين اجه اخوج والله حلوه هاي اخوها
جفون : انا هيج احسه اخوي وحتى من اتعارك ويا لان احسه قريب على عمري
_ صح قريب على عمرج بس هو أبن عمج
جفون : چن لحيتي ،تردين دفره ؟
_ ارجعلها الج اسفط ضلوعج وي مصارينج،هديني تعرفين حواري شني
جفون : اعرفج حولية كل رقة مابيج
_ باع مني يحجي بالرقة ،استجن جعفر لا اطيرك بكفخه
جفون : اهوووو ،ولي مني صوجي انا الردت اراضيج
ضحكت وشبكتها
جفون : ادبسزز تتقصدين تغثيني
_ جا جاي احجي الصدگ
وخرتني وگامت طلعت للحوش وانا وراها اضحك خنگ
جفون : ولي من خلقتي لا اگلب خلقتج ترا بزعتيني
_ يلا بعد ما احجي
جفون : هم گلتيها گبل شوي
_ لا والله بس من تصير صدگ اجي اسحلج
جفون : لا يااااربي
سكتت بالگوة لازمة ضحكتي ومشيتلها
جفون : اذا تحجين والله كل ما اشوفج اگلج ليث
كفختها على رأسها ونترت بيها
_ حتى اطيح حضج
جفون : جا هديني انا ولا تحجين بسالفة بعقلي ما تطب
_ احاول
عافتني ومشت تشوف بطاتها وانا رديت طبيت للبيت ،وأبتسمت اسوي روحي ما شفتهم واگفين وجه بوجه يبسبون بالمطبخ وهو حاضن ايدها بين ايده ورافعها على صدره ومركز وياها شتحجي ،اخوي رايح ،واگع على وجهه هيج زرگ
عبرتهم وبدون ما اطلع صوت مشيت للغرفة رديت گعدت بصف نسمات المخلصتها تصفن ...
ندستها وباوعتلي
_ شبيج صافنه ؟
نسمات : كلشي مابي
_ خاف خايفة من طلابتنه ؟
نسمات : لا شني على الأساس كلش مشرميها أحنه ماعدنه طلايب
_ مو اگول ،جا شبيج ضايجة ؟
نسمات : هيج براسي سالفة
_ شني عبالج ما راح اگلج شني ،حجيتي يم الانسان الغلط سولفيلي شبيج ؟
نسمات : والله هيج خبط أصلا انا ما اعرف بشني جاي افكر
_ اصدگج ؟
نسمات : أي
_ جا خوش ما راح اصدگج
ضحكت وباوعتلي ما مصدگه ردي وعلى على ضحكتها ضحكت واجتني صيحته من برة فلك هلگد مركز وياي خرب بالحظ
عزيز : صوووتكم
وعود يجمع بس انا كلش زين اعرفه جاي يقصدني انا ،صميت حلگي وسكتت وبقيت حايرة بمعدتي تزقزق من الجوع من اجيت ما اكلت والتهينه بالطلابه وهسه ما ضل شي وافطس وأمشي شهيدة الجوع
طبت غاية و وراها بركة ،نزلت جنطتها وسألت
غاية : ها بعدها ما فضت ؟
زهرة : منين تفض يمه ،هاي گعدتنه ما نعرف شراح يصير بعد
غاية : الله يسترنه
نزعت عباتها وگعدت ،وبعدها ما گاعده وگمزنه كلنه على صوت جام البيت وهو يربد اصواتنه علت بخوف ورعب ،اريد اگوم ما اگدر أول مره احس بروحي خايفة ،ما أعرف شلون وشوكت جبت الحيل وطلعت اركض من سمعت صياح صخر بأسم ليث
طبيت للمطبخ اركض وانا ايدي على گلبي واشوفنه گدامي ممدود بباب المطبخ والدم ينزل من زنده وصخر گاعد گدامة و الولد طلعوا كلهم يتراكضون وتعالت صوت الجيلات صارت مواجهه بينهم وبين الرمونه ،وانا كل عقل براسي ما ضل ،لا خفت من صوت الرمي ولا خاف توگع بي جيله و وگفت يم راسه اباوعله واحس بگلبي يرجف خله حتى جسمي يرجف وما گدرت اسند روحي واضل واگفه بدون ما الزم ايد بركة بصفي واحط حيلي عليها ...
صخر : لييث خووية ،باوعلي ،شو لا اتغمض شبيييك
ضربة راجدي حتى يصحى وليث كلساع يگلب عيونة ،باوعت لمكان الطلقة وانعصر گلبي ما أعرف شلون لزمت دموعي ،كلش غميج مكانها
صخر : لك ضيرررم شغل السيااااره خل اخذه للمستشفى فقددد
وهو من ضخامته ماگدر يشيله وحده وصاح حق يجي ويا وگبل لا يدنگ حتى يشيله وي صخر جابني بخزره نشفت الدم بعروگي وخلتني اركز واحسب احساب لتصرفاتي ،رديت لوره وضليت اباوع عليهم شلون شالوه گدام عيني بدمه ،چن شالوا گلبي والله
باوعت على عمه زهرة گاعده يم مكانة الجان مدود بي وتنوح ،وانا احس بروحي بادت ،گعدت وضليت اباوعلها وبداخلي اگول هنيالها گدرت تحجي وتبين خوفها عليه ،هنيالها تگدر تسولف قلقها
زهرة : يمة ليث يمة وليدي يابعد حيل امك ،ولك خلوني اشوف دمك الما يخافون الله ،ولك ليوثي يمه ريت صوابك بگلبي يابعد حيل امك
لميت رجلي الصدري وانا اريد بس اهدي رجفة روحي ،ولا جنت اعرف هلگد احبه ،ولا جنت أعرف بروحي هيج أرجف عليه ،ولا بيوم تخليت انا هلگد عاشگته وراح يروح حيلي وي طيحته ،ذيج انا البكلشي ابقى مثل ما انا هسه ليث خلاني هاي روحي ما اعرفها ،جنت عبالي بس عاجبني لان يختلف عنهم ،يشاقي الكل ويضحك وي الرايح والجاي وشخصيته مرحله لدرجة من بين الكل گلبي تعلق بي هو واختاره ...! !
فزيت على گرصتها ،انداريت عليها گاعده بصفي
نسمات : انا الغريبة عنج عرفت ،سيطري على روحج
همستلها
_ ما اگدر
نسمات : جا گومي جوه احسلج لا يفطنولج
گمت بدون ما احجي شي وهي گامت وراي ،طبيت لغرفة جدة فارغة ،گعدت وباوعت للساعة ،وعلى صوتها من طبت درت عيوني ،حتى قابلية للحجي ما عدي وما ببالي غير صوابه
جفون : هاااا حواري شأخبارج ؟
جنها جانت متحلفه بي وهسه اجت تسأل على حالي وهي اكثر وحده عرفت حالي شلونه هسه
اجت گعدت بصفي
جفون : باعي انا مو حقيره مثلج وراح اگعد اواسيج لان خطية أنت محد يعرف بيج تحبي غيري
نسمات : انا عرفت
جفون : جا تگابلي وياي نواسيها
ضحكت نسمات وگعدت بس تستمع
جفون : باعي انا اگولن راح يسوله عمليه
نسمات : هم زين گتيلنه
جفون : أي والله ،جا باعي حواري عبالج بس أنت مقهوره انا هم خايفة عليه ،ليث أحسن واحد يعاملني بس من شفت الصواب بجتفه أمنت
سكتت ما اگدر احاجيها حيل مختنگه ،ساعة تجر ساعة وماكو خبر صار الغروب الا بين نوح وگال
نوح : طببوه عملية وطلعوله الجيله
زهرة : الحمدلله ،الك الحمد يا اللهي
خليت ايدي على گلبي وانداريت اباوع على هيوفة التمسح بدموعها وتردد
هيوفة : الحمدلله ،الحمدلله
أخذت نفس چن واحد غرگان وتنفس ،گمت على حيلي وطلعت من الصاله كلها ،مشيت للحوش گعدت بعتبة باب المطبخ وضليت صافنه وبالي بماعرف شنو يفكر ،عدلت شالي ورفعت رأسي على صوت خطوات قريبه مني ،بلعت ريگي من شفته مضيگ عيونه ويباوعلي ومن شافني گمت اريد اطب صاح
وراي بصوت بس انا اسمعه
عبد الحق : أم دلعة
انداريت اباوعله وهزيت راسي بمعنى شنو ،بنبرة حيرتني سألني
عبد الحق : شبيج اجيتي تطيحين فوگ ليث ؟
مزغر عيونه ويباوعلي وچن يريد يتأكد من شكوك برأسه ،بلعت ريگي
_ مابي شي بس خفت من الدم
عبد الحق : هاا زين ،امشي طبي جوه
درت وجهي منه وانا كلش زين احس بي كاشفني وهاي نترته مال واحد يريد يصدگ الگدامه بس ما يگدر ،بعدين صدگ لو لا أنا شدخلني بي ..! !
طبيت جوه اباوع بالوجوه ،شهيتي للاكل ردت انفتحت من شفت ميمنة واگفه تحظر للعشه هي وبصائر ويمهن غاية
_ تردن اساعدجن بشي ؟
ميمنة : لا أنا وياهن نكمل
_ بعد احسن
ضحكت ودارت تدور بالمجمده ،طبيت گعدت على الدرج وباوع عليهن يرحن ويردن بالبيت وچن خبر گومتة بالسلامة ردت الروح مو بس الي حتى البيت احس بي تغير وصارت بي حياة ما أعرف انا جاي اشوفن هيج لان فرحانه ...! !
ما أعرف شگد مر وكت وگمت من شفتهن جاي يفرشن السفره بالصاله وعلى الأخير صرت انگل المواعين وياهن ،وبس كملت السفره كلنه التمنيه ناكل وصوت سوالفنه تجيب التايه
°غاية°
خبر گومتة بالسلامة ردت الروح بي وبعد الدموع أنرسمت ضحكة أمل على وجهي ،تغيرت أجواء البيت كله بهذا الخبر المنتظريه وبس خلص خوفنه كلنه التمنيه على سفرة اكل وحده وسوالفنه محليتها وبس خلصنه شلناها وتگابلنه نغسل بالمواعين ونكف هوسة البيت بساع گبل لا يجون لان هم ورانه عشاهم وبعد الصار ما ضامنين شراح يصير وشني نهاية هاي الطلابة
جفون : اگلج ميمنة
واگفة تحمس باللحم تحظر بي لجيتهم
ميمنة : هاا
جفون : هاي شوكت يفقسن بيضاتها ؟
ميمنة : ماضل شي
جفون : يعني شگد ؟
ميمنة : حسبة اقل من عشرت أيام
جفون : زين
بصائر : وهي خرزتج شگد بيضت ؟
جفون : خمس بيضات
بصائر : صلاوات ،عينج عليها
نسمات : انا اشوفها شلون مداريتهن اتمنى روحي هم طير حب بلكت الله احد يداريني مثل ما جفون مدارية خرزة وكركم
ميمنة : ونسيتي كرفس وليمون
جفون : ذكرتيني امشي اشوفهن
خلتنه نسولف وصدگ مشت تشوفهن ،گعدت من كفيت تعزيل المواعين النضيفه
ميمنة : شنسوي بعد ؟
_ ماضل من تركيب أمي الركبته للغده ؟
ميمنة : ضل هاي الجداري مترسه
_ جا هم نصبلهم وطلعي كبه أمي لافة نگلي وهم بتيته وكافي
ميمنة : هو شفتها بالمجمدة وگلت اگلي منها لان هسه راح يجون رايح حيلهم من الجوع
مشت طلعت الكبه وبصائر وگفت تگشر بالبتيته وانا ماخذه وضعية التعبان ،بس صدگ تعبانه هدوم المدرسة گبل شوي الا نزعتهن ،مطيت ضهري متكسر من تذكرت روحي شلون صخمت بالامتحان حمدت الله وشكرته صخر ما فارغلي ويدور وراي ،هاي أول مره هيج ما اجاوب ،صح تجي درجة نجاح بس مو مثل ما انا متعلمه درجاتي عالية ...
زهرة : هااا يا بنيات ،شجاي تسون ؟
اندارت ميمنة ترد عليها
ميمنة : جاي أحظر عشه الهم لان اكيد راح يجون جوعانين
زهرة : أي والله صدگ ،عاشت ايدج بعد عمتج .
أبتمست
ميمنة : ايدج العايشة
زهرة : شوفن تعلمن منها ،لو هيج البنات لو ما يرادن
بركة : عمة خوب گولي الچناين
زهرة : أي والله صدگ ،وين اكو هيج چنه معدله
أمي تحجي وميمنة مبتسمه وساكته ماتحجي
بركة : انا هم بالمستقبل راح اصير خوش چنه حتى عمتي أم رجلي تمدح بي
زهرة : زين ما تسوين
شوي وامي طلعت من المطبخ وماكو ربع ساعة هيج وطبوا جدي وكلهم من غير صخر وعزيز ،بس شافونه بالمطبخ گالوا جوعانين ،حطيت السفره بأيده حتى يفرشها
نوح : لا يااااربي ،بزعت روحي من سالفة فرش السفره
شمرها على فقار الواگف يم باب المطبخ الجوه، اجت براسه عدل
فقار : خرررب لشتك ،راسي شبيييك ؟
نوح : امشي افرش السفره حس بيه وبضيمي
فقار : وسم فد مندله ،هي كلها سفره وتنفرش
نوح : جا امشي افرشها وخلصني ،وانا اريدلي وحده بعد كل ما تشوفني تگلي افرش السفره هذا فقار خلوه هو يفرشها
يحجي ويباوعلي واعرفه يقصدني ،غلست ومشيت يم البنات ،وهو وفقار نگلوا الاكل للصاله ،والتموا يأكلون ويحجون وانا مشيت گعدت على الدرج بصف حواري الاذا تيهتها اليوم الگاها گاعده على الدرج وحاطه ايدها على خدها
رأجس : صارن هواااي كلش على بيت غازي أل عبود ،هواي جاي يتمادون وكل ما بيهم يندگون بينه اكثر
محمد : جا بوية لكل فعل ردة فعل ،ابنهم بين الحياة والموت ترديهم يسكتون ؟
رأجس : بس مو هيج ،البيت ربدوه بالجيلات
محمد : والله هاي لو احنه نسوي الأكثر ،ستر الله عليهم احنه ناس نحرگ بيوت وگيعان
سكت جدي من حس بحجي أبوي صدگ ،گبل لا يخلصون العشه كمت حضرتهم الجاي وبس انشالت السفره صبيته واطيت الفقار الصينيه حتى يوزعه وانا رديت گعدت بمكاني
رأجس : شوكت يطلع ليث ما گاللكم الدكتور ؟
باقر : انا حاجيته گال باجر اذا شاف وضعه مستقر يكتبله خروج
رأجس : خوش
گمت للغرفة من حسيت بروحي هاي هي طفيت من النعاس ،فراش هيوفة مفروش مددت عليه وتغطيت وصدگ بساع جريتها نومه وما گعدت غير وي اذان الصبح ،گمت توضيت وصليت وبديت اقره دروسي البيت هدوء وكلها نايمة وبس انا مشغلة الصوبة وگاعده گبالها وكتابي بأيدي والقلق بالايد الثانيه إأشر بي ...
رفعت رأسي اباوع على الدرج من سمعت صوت خطوات عليه ،من شافني گاعده گالت
صخر : شني شعجب گاعده ؟
_ نمت من وكت ،وأنت شوكت اجيت من المستشفى ؟
صخر : گبل نص ساعة اجيب ابدل وارد
_ ليث شلونه ؟
صخر : لا زين ،شعدج باجر امتحان ؟
_ ماعدي بس تحاظير
هز رأسه بخوش ومشى يطلع وانا رديت اقره بس كملت گمت شغلت التلفزيون وضليت اباوع عليه بين ما يگعدون اليوم حتى محد گعد للصلاة هيج تعبانين حتى يمكن صوت المؤذن العالي ما سمعوه
نصيت صوت التلفزيون اكثر من سمعت صوت يباب غرفة أمي،باوعت عليها مبتسمه من طلعت من غرفتها بس شوفتها هاي كافي وانا ابدي بيها يومي بحجاية منها
زهرة : صباح العافية يمة غاية ،شمگعدج ؟
_ مو تعرفين نمت من وكت وهل گعدت عاد قريت دروسي وجاي اباوع مسلسل
زهرة : جا خوش ،تتريگين ؟
_ أي والله لان جعت
زهرة : خسه الجوع هسه اسوي واشبعج
ضحكت وگمت أبوس بيها
زهرة : خايبة عوفيني وجهي بعدني ما غاسلته
وخرت منها مبتسمه واحجي وياها وانا كل راحة الدنيا بگلبي بشوفتها
_ اروح فدوه لهذا الوجه
ضحكت ومشت للمطبخ وانا مشيت وراها أول ما طبت ترست القوري ماي وخلته على النار ومشت تغسل ،وانا بهل وكت طلعتلي خبزات من المجمده حتى يمعون ،وشوي وردت امي تسوي الرويگ وانا يمها بس كملت خلت الصينية وگعدنه ناكل واللگمه بحلگها وصفنت
_ شبيج يمه ؟
زهرة : سودة علي يوميا انا وليوثي نتريگ من يمشي للگيعان
_ يمه شني سالفتج هاي أن شاء الله اليوم راد وبعد يوميا هم ياكل وياج
زهرة : يايمه ما تعرفون انا شكثر روحي معلگه بيكم شفت المرار الا شفت اخوتچن زلم وأنتن نسوان
_ جا يمه لشوكت تضلين هيج تخافين علينه ،انا والله روحي تروح من اشوفج هيج قلقه وبالج ما مرتاح
زهرة : مو بأيدي انا ربيتكم كل شبر بنذر ،جان ما يثبت برحمي الطفل ومن بعد ما ثبت اخوج صخر انا صرت من الهوه الهاب أخافن عليه وكل ما يزيد واحد بيكم يزيد خوفي اكثر
_ جا شلون ،الدنيا ما نعرف بيها شضامتلنه مو أنت تگولين هيج ؟
زهرة : أي ،بس انا مو بأيدي
أبتسمت ودنگت اكل و افكر بقلق أمي هذا الخلصت عمرها ويا ،بحيث هذا صخر عبر الثلاثين وأمي بعدها تخاف عليه حاله حال ابو عمر ثلاث سنوات واصلا ما مفكره تبطله لان صدگ مثل ما گالت مو بايدها
جفون : صباح الخير
باوعتلها طبت تمشي اعوج مبين منعسة بس ما ضل شي الدوامها اليوم صبحي
_ صباح النور
زهرة : صباح العافية ،صبيلج جاي وتعاي تريگي
هزت رأسها ب أي ومشت صبت الروحها جاي وفتحت الثلاجه طلعت جبن العرب ،شگد ماتحبه هي ،دوم بثلاجتنه لان ما تاكل البيض واذا أكلته بالسنه حسنه يعني ،گعدت بصفي وبس خلصت ريوگ گامت بساع للغرفه بدلت وردت شايلة بأيدها عباتها والجنطه حطتهن بالگاع وگعدت تلبس حذائها وامي تحجي وياها
زهرة : قريتي البارحه ؟
جفون : أي عدي بس امتحان يومي
زهرة : خوش هم زين
گامت لبست عباتها وطلعت من سمعت صوت الخط بالباب ،وانا لان دوامي ضهري ضليت براحتي وگبل لا امشي اجه صخر وعزيز جايبين ليث ،تلگتهم أمي وما مصدگه شافته عينها ويمشي بطولة ...
واگفه اباوعلهم وعباتي بأيدي ،أمي حاضنته ما تعرف شتسوي وتعبر عن فرحتها بسلامته ،انداريت على صوت جده من طبت تهلي بي
غضة : يمه كل الهلا بونيس بيتنه ،يمه هلا بالمملوح أبو حجايات الحلوه ،الحمدلله على سلامتك جده
صخر : بس گلي شمسوي الجده ؟
ضحك وتقدم يمشيلها ويسوي روحه ضايج
ليث : جا جده هيج تتلگوني ناشفة ،هلبت ذبحتولي طلي دجاجه ،هاي لو هيوفة ما جان ذبحتيلها
غضة : ياا يااا ومنو گالك انا ما راح اذبح ،انا نذرت امس لو رديت سالم اذبح طلي واوزعنه على الفقره
ليث : جا خوش ،اريدن ريوگ جوعان
زهرة : يا جنك على ريوگ صدگ جذب
بساع طلعت من دگ هورن الخط بره ،ومن رديت حرت شلون انزل وانا اشوف لمة زلم كومة گدام بابنه وجدي والولد بس كلهم وياهم واگفين ،بس نزلت اجاني نوح دنگت رأسي ومشيت وراه وبس طبيت من الباب مشى هو وگبل لا أطب للبيت سمعت صياحهم واصواتهم العالية
_ النه زلمه يمكمم ،سلمونياه وتفض سالفتنه
رأجس : شني اليثبت يمنه ؟
_ اجوي ويا أثنين وهو ثالثهم ،ردولنه بس هم وعلى لسانهم يگولون أنتم مانعي ما يرد وياهم
رأجس : حجيهم صح بس جانت عدنه حجاية ويا وبس حجيناها خليناه يمشي ،واحنه ما مسؤولين وينه بعد
_ شنييي جااا غير نحگكم ،اخير شي جان يمكم
صخر : شني اليثبت بعده يمنه ؟
_ ماكو اثبات بس أنتم تنحگون ،زلمتنه من أيدگم نريده لا ينفتح بيناتنه بحر دم اله أول ماله أخر واعتبروا هذا الحجي تحذير الكم
صخر : دمشيي تنحگون روح الله وياك تندل من طريقك
طبيت جوه وبس شافتني أمي تلگتني تسأل
زهرة : شكو ؟ شصاير بره ؟
_ ما أعرف بس الفهمته زلمة من زلام بيت غازي مختفي وجاي يحطوها براسنه
زهرة : غضب الله على راسهم شوكت نفك منهم مو رواحنه بزعت
نسمات : خالة كافي تحرگين بدمج منا سكرج لا يصعد
زهرة : شمتاني ما يصعد على هل ضيم هذا
باوعتلها حايره وطبيت جوه بدلت هدومي ورديت بساع من سمعت صوتهم طبوا ،كلهم وگفوا فد وگفه واحد يباوع للثاني ،أبتسم صخر ومشى يطلع بره اعرفه يريد يدخن جگارته ...
رأجس : أيد بأيد ،ثاراتنه وياهم وحده وحده نطلعهن
والولد كلهم ردوا بصوت واحد
_ واحنه الها
ضليت اباوعلهم والخوف من الراح يسونه اكل گلبي مبين ما ناوين على خير أبد ،طبيت جوه من طلعوا كلهم للديوان مبين عدهم سالفة ما يردونه نعرف بيها
ومبين سالفتهم بس الله اليستر منها ..! !
گعدت بصف هيوفة بأيدها مفاتيح الجنان ،بس كملت سألتها
_ شجنتي تقرين ؟
هيوفة : زيارة عاشوراء
_ بعدج تقريها ؟
هيوفة : جا شلون تعودت عليها
_ انا هم اريد مثلج اقراها يوميه
هيوفة : جا زين ما تسوين ،ابدي بيها من باجر
_ خوش ابدي باجر
هيوفة : گومي تغدي واذا عدج دروس هم يلا تقرين ماضلج وكت
_ راح اگوم اكل واقره ماعدي هواي بس امتحان أدب شهري وانا ضابطته
هيوفة : جا زين ،ما ضل شي لنص السنه
_ أي جم يوم
هيوفة : اشتاقيت للدوام
_ لوما طيحتج جان بس بعد سنة وتتخرجين
هيوفة : شسوي بعد راحت علي
_ الحمدلله أهم شي صحتج
هيوفة : اكيد ،گومي اكلي يلا
_ گايمة
مشيت للمطبخ صبيتلي من الغده الطابخته أمي ورديت گعدت يمها احجي وياها واكل وهي منطلقة تحجي وياي ،بنص الكلام وتذكرت نسمات وجفون
_ اكلج اشو لا نسمات ولا جفون وينهن ؟
هيوفة : يم بيت عمي يوسف ودت عليهن ميمنة ضايجة وحدها ومنوراها أنا ضليت وحدي
_ يا شعجب مشن ؟
هيوفة : نسمات ما رضت تمشي بس جفون سحلتها واخذتها
_ أي مو اگولن هي تستحي تطلع جم مره حواري گالت الها امشي وياي وما رضت
هيوفة : بعد تعرفين جفون لو رادت شي تسوي يعني تسوي
_ أي
گمت شلت صينيتي وغسلت المواعين ومشيت للغرفة لبست حجابي واخذت عباتي بأيدي وطلعت گلت الأمي توصلني لبيت عمي يم البنات
هيوفة : هااا هم راح تمشين وتعوفيني ؟
رمشت بعيوني
_ شوي وارد
هيوفة : جا خوش وجيبيهن وياج
هزيت رأسي ب أي ومشيت ورا امي لبيت عمي بس طبيت شفتهن گاعدات بالحوش مشيت احجي وياهن
_ شني جاي ملتمات الحبايب وانا مو وياهن
جفون : جا غير أنت بالمدرسة جنتي
_ جا صار فوگ الساعه من أجيت ما وديتن علي
جفون : منو يجيج ؟
_ جان دزيتن عمه علي
ميمنة : خايبة اسكتي وتعاي گعدي ويانه
ضحكت ومشيت گعدت يمهن ،بس غربت الدنيا طبينه جوه ،شوي وسمعت صوت صخر وضيرم هنا بالديوانيه ،وما أعرف شلون وانا اعبر من بابها الجوه سمعتهم يحجون وبرهان يگلهم نصوا صوتكم
صخر : اذا ما خليتهم ينبشون الگاع وما يلگوه فلا اتسمى أبن أبوي ...
الفصل الثاني عشر من هنا
لقراءة فهرس رواية خلخال مشوه بجميع فصولها اضغط هنا
