رواية خلخال مشوه الفصل الثاني عشر بقلم زمرده
سلس ماصير وأبقي
بكيفك انگاد
وحطب ماصير
وأنت بعازة النار
•---∞∞∞∞∞∞∞---•
انداريت على صوتها وراي
نسمات : غاية ما نمشي ؟
احجي وياها وبالي كله يم حجيهم اريد اعرف شيقصد صخر ،معقولة اله أيد بأختفاء ابن غازي ..! !
_ جا شعدي بس گلي لجفون
بركة : ما تضلن يمنه
_ عدي تحاظير هواي وباجر صبحي
بركة : انا كلشي ماعدي
_ هل مترهيه و تردينه نضل
ضحكت وهزت رأسها ب أي ومشت تصيح لجفون وانا
رديت اسمع بس ما افتهمت شي صوتهم كلش ناصي ،خليت وطبيت جوه بس شفتها گاعده صحت باسمها
_ جفون
باوعتلي وردت تحجي وي ميمنة
_ شني جفون جا شوكت نمشي ؟
جفون : اريد اضل ما صار هواي من اجينه
_ وراي قراية غير مره نجي
تأفأفت ما راضيه تمشي وگامت ،وانا لحگتها البس عباتي
جفون : اذا مشينه وحدنه شراح يخلصنه ،ميمنة ماتدگين الباب عليهم وتگولين لرجلج ابو بيتج يجي يودينه
ميمنة : خوب ماتمشني أنت شعدج
جفون : مو أنت مرته
ميمنة : خطيبته
نسمات : ما تمشين تصيحي أنت
جفون : لا هي ، اذا ما تمشي تصيحه اروحن اگله ميمنة تريد تحجي وياك وگدام اخوج
خزرتها
ميمنة : شگد نذله
حركتلها حواجبها بخباثه وبقت واگفه بمكانها معانده ماتمشي تصيح لصخر وخلت ميمنة تستسلم ومشت دگت باب الديوانيه وفتحته شوي بس مطببه راسها
ميمنة : السلام عليكم
ردوا عليها السلام وبأختصار گالت
ميمنة : البنات هنا يردن توديهن للبيت
ردت طبگت الباب واجت
ميمنة : بعد رموش شتردين ؟
أبتسمت
جفون : سلامتج عيني
باوعتلها وتنهدت بدون ما تحجي وانا بس سمعت صوت صخر جريت جفون وطلعت ونسمات وراي بس طلعنه شفته واگف ومطينه ضهره يحجي وي برهان بس شافنه ضيرم گال
ضيرم : هل اجنك وديهن ورد
اندار باوعلنه وگال
صخر : امشن
مشينه وراه بس طبينه هو رد لبيت عمي يوسف ،
نزعت عباتي وانا اباوع عليها شلون عبرت نوح بلايه ما تحجي شي ابد غير عن كل مره ما ترتاح اذا ما تشمرلها حجاية ،استغربت وانا اباوعلهم هي طبت للغرفة وهو ضل واگف يباوعلها
_ نوح
من صحت بأسمه اندار يباوعلي وهز رأسه بشكو
_ شني متعاركين أنت وجفون ؟
نوح : لا
_ جا ليش ما تتحاجون ؟
نوح : ما أعرف ،هي ماتحجي وياي
ضليت اباوعله مستغربة ،اول مره اشوفها ثابته على موقفها كل مره يتناگرون و وره شوي تنسى وترد تحجي ويا ناسية روحها زعلانه عليه ،بس هل مره صفنتني من عبرته و ولا جنها شايفته گدامها
طلع هو وانا مشيت للغرفة ،بس طبيت شفتها گاعدة ومطلعة كتبها تقره
_ جا شني عدج امتحان باجر ؟
جفون : لا بس تحاظير
_ وردتي تضلين هناك ؟
جفون : انا قاريتهن گبل بس جاي اراجع
_ ها زين ،اگلج
جفون : گولي
_ شني أنت ونوح ما تتحاجون ؟
جفون : ليش ؟
_ مو شفتج أول ما طبيتي ما حجيتي ويا
جفون : ماكو شي بس انا فكرت بكلامچن وگلت عيب اتناگر وياه بعد
_ هاا
جفون : أي والله
_ والله صدمتيني
جفون : مو هذا التردنه ،وخلصتن عمرچن تگللي اكبري واكبري وعوفي المناگر وي نوح
باوعتلها ما مصدگه ،شني هيج بين ليلة ويوم اقتنعت بحجينه ،طلعت من الغرفة وعفتها تقره من سمعت صوت أمي تصيحني ،بس شافتني طبيت للمطبخ گالت
زهرة : يمه تعاي سوي جاي بساع
_ ليش منو يمنه ؟
زهرة : ناس دزايهم بيت غازي علمود ابنهم هذا اليگولون عدنه
مشيت طلعت القوري اترسه ماي واحجي
_ يمه چن صدگ الولد عدنه
نشغت
زهرة : ياااا يمه شني
_ سمعت صخر اليوم يحجي وي الولد يگول، اذا ما خليتهم ينبشون الگاع وما يلگوه
زهرة : يااا يمه صدگ تحجين
_ أي والله
زهرة : فلك الفلكني ،ولج يمه غاية جا غير مصيبة وتطيح علينه اذا صدگ
_ والله انا هذا السمعته ومن ساعتها واحس بروحي مسطوره
زهرة : اگص ايدي اذا ما يطلع جدج يعارف وهو مأيد اخوج
_ جا شلون هو جدي يحب المشاكل اكثر منهم
غضة : ها ولج العاقلة شو طولان لسانج وصايره تحجين على جدج
ضحكت متفشله وانداريت
_ هو انا كل ما افك حلگي الله يسلط أحد علي
غضة : جا انا ولا غيري ،فار الجاي ولج
ركضت بساع نصيت النار وشلته خليت التاوه حتى يتهدر ومشيت أحظر بالاستكاين ،واذني يم جدة وأمي
زهرة : انا فلا مرتاحتلهم وگلبي يگلي الزلمه صدگ يم احفادج
غضة : مو گلبج يگلج هاي غاية گالتلج شني زهرة جا عبالج ما سمعت
ضحكت بالخنسه وكملت تشكير الاستكاين
زهرة : جا گلبي لو غاية شني الفرق بس انا صدگ من البارحه لليوم ما مرتاحتلهم واحس بيهم مسويها صدگ وگولي زهرة گالت
غضة : شني گولي يا الله هاي عود أنت منهم وبيهم وهيج تحجين جا الغريب شلون
زهرة : والله انا فلا احلف عليهم لان اعارفهم اكثر من هيج يسون وجدهم وياهم يدگون دروب الطلايب ويتعنولهن عنوه
غضة : فلك الفلكجن جدهم داقجن أنت وهذنيج
زهرة : عمه جا بروح ابوج اذا طلع صدگ الزلمه يمنه شراح يخلصنه،شني تفض هيج ؟
غضة : هدنهم هم يصافون ،يمهم مو يمهم زلم يحلوها
زهرة : واحنه لان زلم نهدهم هيج يحطون روحهم بسوالف تاليها ينفتح بحر دم
غضة : بسم الله شني أنت ما تتفايلين بس بالفگر ولج زهرة مال احطج واكتلج حتى تبطلين نگ جنج بومه
سكتت أمي من نزلت جده عليها دوسه ونص وانا شلت القوري اصب جاي من طب نوح
نوح : بساع خفي ايدج يمعوده الوادم گاعده
نزلت القوري من ايدي
_ اخذها
اجه شال الصينية وطلع وانا مشيت اروحن للغرفة هم يلا ابدي اقره دروسي كوم شيخلصهن
بس طبيت للغرفة شفتها گاعدة وماده رجليها ونسمات بصفها ،جبت جنطتي وأجيت گعدت يمهن
هيوفة : والله بزعت روحي شوكت الله يخلصني من هاي الحدايد وارد امشي
نسمات : تخلصين وتصير سوالف
هيوفة : كون انام واگعد هيج بساع اخلص منهن
نسمات : أن شاء الله ،ماضل شي
هيوفة : الله وارد امشي واشتغل
جفون : لو حواري هنا وسامعة حجيج جان تمنت نفسها هي الطايحه
ضحكت وطلعت الجدول اشوف باجر شعدي
هيوفة : عاد حواري والشغل عداوة ،وعبالچن ما حجتها هذاك اليوم من مشينه علمود من جابوا غرفة فقار تگلي باعي شلون كاربيتي هنيالج مكسورة رجليج وگاعدة ضليت حايرة شأرد عليها بس غميتها وسكتت وجده سكتتها برزاله زينة
نسمات : انا تضحكني من تسوي روحها ميتة حتى لا تغسل المواعين
هيوفة : ششايفة أنت ،مرة سوت روحها مكسورة رجلها وماتگدر توگف
نسمات : سوالفها تنحب
جفون : وهي تحب
جنت مركزة بالكتاب درت وجهي عليها بساع وهيوفة ونسمات صفنن بوجهه وهي بساع خلت اصبعها على رأسها تفر بعيونها
جفون : انا قصدي على سوالفها تنحب وتحب شبيچن طگيتن صفنه بخلقتي اعرف روحي اشع شع بس وخرن عيونچن لا تحسدني
هيوفة : اللهم صل على محمد وآل محمد ،صدگ سمنانه ولج
انا حسني گلبي هيوفة غيرت السالفة بس لان عدي هواي تحاظير غلست ورديت اقره
نسمات : أي صدگ شدعوه هيج بيضه أنت ؟
هيوفة : عمتي الله يرحمها بجفون هواي شربت حليب حتى تطلع بيضه
نسمات : انا شايفة صورتها هي هم بيضه
هيوفة : جا هي جفون هواي تشبهه ،بس عمه أطول
نسمات : أي صح
باوعتلها تسوي روحها تقره بس من ركزت وياها شفت عيونها مغورگه بالدموع ،شگد ما أمي ربتها وتعبت وياها ويمكن مرات احس بيها تحبها حتى اكثر مني بس جفون كل ما ينجاب طاري امها الحته ما وعت عليها هذا حالها تبقى غصتها تصعد وتنزل بس اشوفنها ترد تمسح دموعها وترفع راسها تباوع لفوگ حتى لا تبجي مثل ماهسه سوت ...
گمت بساع من سمعت صوت خبصه بره ،حطيت حجابي على راسي وبس فتحت الباب شفتهم كلهم واگفين بالصاله وأبوي بنصهم يصيح وجدي يكست بي ما راضي على عصبيته ،بس يرضى على الولد لان هم وحد عده
محمد : اناااا عرررفت والله من گلتوا وصلناه لقريتهم ما صدگت بيكم بس جذبت روحي وگلت لا مو لهل درجة ما يسوهااا ،بس نسيت هم تربات ايدك ويسون الاضرب
رأجس : لا تضل تخوط وخلني محترمك گدامهم
محمد : خوش ما اخوط ،بس احجيلي شلون راح تفضها ؟
رأجس : دليل ما عدهم وشني بأيدهم خلهم يسونه
باقر : بالحالتين ما راح تفض ،لو طلع راح يعرفون يمنه ولو ضل هم ما راح نخلص منهم ،بويه خليتنه بسالفة أكبر من الگبلها
يوسف : هسه لو ضالين بس على كتلة محسن اهون ولا مكبريها هيج
سمير : أي والله
محمد : أنت اسكت تعرف وضام علينه
سمير : جا شني غير أبوي گال لا تحجي
محمد : وأنت شيحجي ابوك تسوي
سمير : جا وأنتم هم ،اسكت لا تلومني كلنه نفس الشي
دار وجهه أبوي على جدي
محمد : احجيلي بوية شراح نسوي ؟
رأجس : ما نسوي بس اودي عليهم ناخذ عطوه ونفصل على كتلة محسن
محمد : ورهيب اليمنه ؟
رأجس : مو يمنه .
محمد : شلون مو يمنه ،هستوكم شحجيتوا ؟
رأجس : نمشيها مو يمنه
اندار على صخر الواگف يفر بمفاتيح الورشة بايده
محمد : وأنت معتبرني انا والماكو سوه ،ضل اللعب هيج بكيفك ضل وتاليها بس السجن مكانك
رأجس : يخسه اليسجن واحد منهم وانا موجود ،انا واگف بالمرصاد لكل من يوگف بوجهم
صفگ أيد بايد أبوي محترگ گلبة ومشى يطلع ما يتحمل يضل اكثر لان شوي بعد ويتعارك هو وجدي
رأجس : هذا الله حاطة بوجهي على كلشي ما يرضى
باقر : جا بوية وين صايرة تاخذون زلمة لا هو هين ولا اهله وتحطوه يمكم وتنكرون السويتوه وين عايشين احنه
رأجس : رد الصاع صاعين ،انا ما ناسيلهم من اخذوا فقار ومثل ما ضل يمهم يوم واحد انا اخلي زلمتهم يمي شهر
باقر : جا هيج خل نحظر تفگنه والجفن من هسه
وخله عمامي يفورون من گال
رأجس : جا حظروهن
وبس مشى طب لغرفته هدوا عمامي على الولد وأبوي بس سمع اصواتهم طب يمشي بساع على صخر عته من قميصة
محمد : انا جم مرة گلت سوالف العصابات بطلهن ؟
صخر : اعذرني ما اگدر
محمد : تريد ابتلي بيك انا ؟
صخر : فدواتك ابنك انا
محمد : لا اله الا الله ،انا راح اموتن من سوالفكم وداعة ذاك العزيز اللفه الچفن وهو بعده بعز شبابة
رد طلع ضايج وما يعرف شيسوي وعمي يوسف وعمي باقر نزلوا دوسة ونص على الولد وهم ساكتين ولا حجوا وعمي سيمر بس يباوع بعيونة لان مبين من حجيهم مشاركهم بالسالفة
باقر : انا أعتب على الولد لو على عمهم ،سمير ضل طمطم الهم مثل أبوك
سمير : جا شتريد ؟
باقر : سلامتك كلشي ماريد
دار وجهه عمي باقر علي يأشرلي ماي ،مشيت بساع للمطبخ جبتله ،اطيته الدولكة ورديت وگفت بمكاني يم جفون الواگفه تباوعلهم وجعفر البداخلها متحمس يريد يهد وياهم
شاورتني
جفون : شگد حلوه حيات الزلم كلها طاگ وطيگ وعركات وتفگ
_ هيد جعفر لا يعيط بيك صخر ويفششك
ضحكت بصوت ناصي وردت تباوع عليهم ومن فتحت الباب نسمات شوي وصاحتها طبت بساع وانا لحگتها من تذكرت بعدني ما مخلصه تحاظيري ،بس شافتني طبيت گالت
هيوفة : شكو ؟
_ الزلمة طلع صدگ يمهم ومبين اخوج الحابسة لان أبوي لعب بي لعب
لطمت على خدها
هيوفة : صخر مو ؟
_ أي صخر ،وگايلين لبيت غازي هو مو عدهم
هيوفة : ياا يااا ، بس الله اليسترنه من أفعالهم
_ أي والله
طبت أمي تدگ وتلطم
زهرة : والله عرفتهم مسويها ،انا أعرف صخر من اسأله وعينه بعيني ما يحطها اعرفه مسويله مصيبه
جفون : جا شني عمه هو ابنج غير أبو المصايب
خزرتها امي
زهرة : فلك الفلكج والله لو يسمعج
جفون : جا مو أنت تگولين
زهرة : انا أمه بس أنت اخيته مايصير هيج تحجين
جفون : جا عمه غير الحجي الصدگ
زهرة : تعاي گليلي وأنا احجي الصدگ على لسانج
جفون : جا خوش ،باعي عمه انا شاكة الولد حابسي بورشة صخر
هزت رأسها أمي
زهرة : أعرف مبينة لان ماعدهم غير مكان بعيد عن العين
هيوفة : والله يايمه حيل خايفة
زهرة : جا انا ما خايفة ،گلبي يريد يوگف من الخوف ومنا مزيدها علي اخوتج ولا جنهم ولا بيوم گالوا ما نخوف امنه ولخاطرها نحط رجلينه بالگاع ونعوف المشاكل
نسمات : خاله التردينه صعب ،اطلبي غير شي
ضحكت وباوعت الامي أبتسمت
زهرة : فلك طيرتي ضوجتي ،جنج بركة تسكت تسكت وتطينه قمبله هلكبرها تخلينه ننسى روحنه شجاي نحجي
نسمات : جا هنيالچن صرنه ثنين
ضحكت امي وغطت وجهه بحجابها
زهرة : فلا تنگدرين
أبتسمت وگالت
نسمات : عمه خليها على الله وهي تنحل لاتضلين يوميا هيج مشلوط گلبج وكلساع راكضيلج بحباية السكر
زهرة : سودة علي يا خية يا عذبة ،وينج عن بتج تشوفيها شلون كبرت وصارت مرة سواليفها تنحط على الجرح يطيب
باوعتلها بلعت ريگها ودنگت ،گمت طلعت من الغرفة من سمعت صوت ليث يصيحني بس شافني گال
ليث : انا نسيتوني ،وهاي أكبر دگه ناقصه ،حتى ما حسيت بروحي مريض ولا تدللت ولا شفت لحمه من ذبيحة جده الگالتلي ناذرتها
طب صخر جگارته بأيده ،ومبين سمع حجي ليث
صخر : جا مو اگلك أنت زايد علينه بس ما تصدگ ،هسه صار لازم تصدگ كل حجايه احجيها
ليث : لا هو صار لازم اصدگ حجيك
صخر : أي عاشت ايدك ،غاية جوعان اريدن عشه
ليث : وانا هم جوعان اريدن شوربة مال مرضى
صخر : أنت بس تريد تحس بروحك مريض ،باع ماطول ما صار بيك شي وتأذيت كلش ما راح تدلل
ليث : لا اتدلل شني، بس جا غير أنتم بفعلتكم سطرتوا حتى أمي
صخر : هاي لان ما الك ايد هل تلومنه لو ويانه أنت أول واحد تركض
ضحك ليث لان حجي صخر صحيح ،شگد ما هو حباب بس سوالفه مو اقل مو سوالفهم ،مشيت للمطبخ طلعت عدس غسلته حتى اسوي شوربة وخليته ينگع لان حسيت صدگ الشوربة ضاله بنفسه وبين ما ينگع العدس طلعت طماطه ثرمتها حتى اسوي بيض وطماطه ،وانا اشتغل انداريت باوعت من الشباك الما ضال بي جام ،طب عزيز يصيح
عزيز : صخررر وينك ،وينك النجار الخوينس ،لييث
من صاح باسم ليث بصوت عالي طلعلة صخر ،استغل واباوعلهم
عزيز : هااا الخوينس مو گلت مو يمي الزلمه
صخر : جا شني اگلك حتى تقيم بي دعوه
ضحك
عزيز : جا واذا محامي اوگف ضدكم ،لو مو القانون انا وياكم
صخر : عرفت الوطن ليش انباع من امثالك
عزيز : عمييي والله حرنة ،جا شتريد ؟
صخر : انا گلبي ما مرتاح لبرهان ،ساعة الساعة يجيب دورية ويجينه
عزيز : لا مو لهل درجة ،بس هو صدگ ضايج منكم وبالاخص أنت
صخر :جا شني قابل انا ضميت عليه
عزيز : يگول انا من البداية ما راضي بس اعرف لو حجيت ما يفيد
صخر :جا شني نسى دگايگ بيت غازي ويانه .
عزيز : شني خوية شينساهن لا وحده ولاثنين بيت غازي دگوا بالعظم بس دگتنة الأخيرة راح تعم علينه وحتى حگنه نخسره
صخر : انا سويت الگاله جدي وما اعرف شلون تصفى ،بس الاعرفه راح يحلها
عزيز : الله كريم ،ليث وين ؟
صخر : جوه
عزيز : گاعد نايم ؟
صخر : لا گاعد ،تعال طب
عدلت حجابي بساع من شفتهم أجوي يردون يطبون وبس طبوا للمطبخ وشافني واگفه دنگ سلم علي ومشى ورا صخر للصاله ،وانا بساع كملت الشوربة وسويت بيض وطماطه وطلعت طرشي خاف يردون يأكلون وي البيض وبس كملت الصينية صحت على صخر اجه شالها وگبل لا يمشي گال
صخر : جاي
_ بس يخلص اجيبه
صخر : خوش
مشى هو وانا حظرت الگلاصات وعلبة الشكر بالصينية وبس خلص الجاي خليته وياهن وشلتها بس شافني صخر گام اخذها من ايدي وانا مشيت طبيت للغرفة ،نزعت الحجاب وگعدت حتى اكمل قريتي ماضل وكت
زهرة : سويتلهم عشه ؟
_ أي خطية جواعه
زهرة : عفية بعد امج ،ونوح هم ؟
_ لا بس صخر وليث واجه عزيز وياهم، بس نوح تلگي هسه يم فقار
هيوفة : هسه تلگن بصائر عشتهم
زهرة : لو يضلون على حواري ما يأكلون بس هم زين عاد هناك بصائر تحب تطبخ
هيوفة : فدوه الگلبها تحجيلي شتعلمت علمود من تزوج ماتحير شتوكل فقار اذا جاع على گولتها تدلل بطنه
غمزتلها تشاقيها
نسمات : تدمحيها لان بت عمج لو لان مرة حماج
ضحكت من شفتها دنگت مستحية وأمي ردت بمكانها
زهرة : لا هن من يوم يومهن گلب على گلب وادعي من الله ما يجيهن يوم يتخاربن
نسمات : أن شاء الله يضلن هيج طول العمر
زهرة : بعد روحاي ياخالة ،جفون ما تگومين وياي ماطولج خلصتي خل نسويلنه عشه
جفون : جا عمة اخذي بت أختج وياج
زهرة : گومن ثنينجن
ضحكت وحركتلها حواجبي وعطت لازمة راسي من كفتني بالكتاب
جفون : بطلي تغوريني
زهرة : الله يطيچن العقل ،امشي رموش لا اصيح لصخر عليجن
لبست حجابها وطلعت گدام امي تتأفأف وامي گد ما تعودت على سوالفها ولا تضوج منها ،ضليت گاعده اقره بين ما طبت جفون شايلية الصينية هي ونسمات نزلنها بالگاع وانا اريد اعيل بيها بس بنفس الوكت لا اريد اكبر عقلي
_ اگلج يمه الولد بعدهم بالصاله ؟
زهرة : گبل شوي مشى عزيز وهم صعدوا كل واحد لغرفته
_ وماكلين ؟
جفون : ماسحين المواعين مسح
زهرة : صلي على محمد
جفون : عمة والله مانحسد ،هذا عمي يوسف عيونه صفر مو انا
زهرة : مو قصة لون العيون بس بني آدم يضر بدون ما يحس بروحه
هيوفة : أي والله صح
زهرة : هاي هيوفة عيونها صفر وماتضر
جفون : يخبلن عيونها
أبتسمت
هيوفة : خجلتيني
جفون : انا لان أحبج اشوفج حلوه لو صدگ أنت حلوه ؟
نسمات : لا صدگ هي حلوه
زهرة : اكلن وكملن حجيچن
عفت الكتاب وگعدت بصف هيوفة اكل واسمع لحجيهن وگد ما مسطورة بكثرة التحاظير حتى ما گدرت اشارك وياهن غير بس بجم حجاية وما صدگت اكمل وارد أقره لان انضربت على راسي من شفت الساعه عبرت الهدعش وانا بعدلي تحظيرين
والوكت يركض ركض من عدي صبحي وحتى نوم ما انام عدل ،مشى بي الوكت وللوحده ونص الا خلصت بحيث طگ ضهري نصين وشگد دعيت عليهن لان دوم هيج يسون بينه بهذا اليوم النحس البين الضهري والصبحي
طلعت من الغرفة اسحل بروحي سحل ،شربت ماي ورديت اريد انام وما أعرف شلون لجحت عيني البرده متحركة ومبين شوي من شباك الغرفة لون جنه لون السمه من تصير ترابة حمره ،استغربت وما خليت ببالي ابد الصاير من فتحت البرده كلها وشفت النار گدامي ...! !
دربي تيهته اريد بس اوصل للباب رجليه ترجف ،بس فتحته ما صار گدامي غير غرفة أبوي بأثنين ايديه دگيتها ومن دگتي ابوي طلع مفزوع ،وانا يا الحجاية حرت شلون اطلعها
_ ناااار بوية ،حرگ ،احترگنه
وبس استوعب الگلتله حار شيسوي ،يطلع لو يگعدهم
بس گبل لا يمشي حتى يطلع گال
محمد : غاية بساعج گعدي اخونج وجدج
وانا واگفه الرجيف ماخذني من الخوف بالگوه حركت روحي وصعدت اول شي طبيت اگعد صخر بس ندهته فز وانا بساع گلتله وكل كلمة اعيدها الا احس بي افتهمها
_ نار ،احترگنه صخر اگعد
وبس استوعب الاگوله طفر من الجرباية ونزل يركض وانا مشيت لغرفة ليث اريد اگعده وافكر منا صوابة شلون بي ،بس طبيت وصحت بأسمه فز وگبل لا احجي نزل من سمع صياح صخر ،نزلت وراه صار گدامي جدي واگف والشر يطاير من عيونه ...!
°ليث°
طلعت اركض ومن شفت النار وگفت اريدن استوعب الجاي تشوفه عيني ،من كل كتر النار محاوطه البيت ومبينه مثل عين الشمس فعل فاعل
اجه عبد الحق يركض من بيتهم ،صفگ ايد بايد
عبد الحق : لااا يا عارية على هل دگه
صاح أبوي بصوته العالي
محمد : امشوا مدوا الصوندات خلنه نحاول نطفيها
مشيت مديت الصونده وشغلت الماطور ومن كل بيت من بيوت عمامي مدينه صونده ويلا گدرنه نطفيها بعد ما كل واحد بينه حيله راح ،من غير ريحة الحرگ والدخان ما تنحجي بس الحمدلله ما طبت النار جوه وسيطرنه عليها وبعد ساعات طر الصبح الا گعدنه نباوع على البيت والحيرة من الجاي تذبح ،جدي گدامنه يروح ويجي حتى ما يعرف شيحجي ،اكو فرق بين تحرگ بيت فارغ واكو فرق بين تحرگ بيت بي اوادم عايشين ،بهل حاله الضرر صار في ثنين و معناها أنت استهانيت بهاي الارواح الهنا ..! !
رجعت ضهري على الحايط النفس ضاگ عدي ،عزيز گاعد بصفي بساع عرفني اختنگت
عزيز : شني ليث شبيك ،بسلا اختنگت ؟
بالگوه گدرت احجي واگله
_ أي
عزيز : ضيرررم تعال شوف ليث يگول اختنگت
اجه يمشي بساع ويحجي متذكر
ضيرم : خرررب جا غير مسوي عملية وهذا الدخان كله موزين على ابو البنج العام
التموا علي كلهم مخبوصين
عزيز : جا احنه شيذكرنه ،شلون هسه شوفه ما جاي يتنفس
ضيرم : صخررر وينك
فقار : ما أعرف وينه طلع
ضيرم : طب جيبلي سويج سيارته بساع
مشى فقار جابة ورد وانا گاعد اجدي النفس بس اريد هوه يطب ريتي ماكو
ضيرم : ماشي اشغل السيارة ،عزيز بساع جيبة وراي
گمت ساند روحي على عزيز ،بس وصلنه للمستشفى طببوني على الطوارئ وبساع على جهاز الاوكسجين الا شوي بده يردلي النفس ولو بيدي ما ارد لان الهوه بقريتنه كله يختنگني من گد ما متشبع بالدخان ولو يجي ما أعرف ياهو اليوم ما يصفى الهوه هناك ...
أنا متمدد على الجرباية واجاني يسأل
ضيرم : شلون صرت ؟
رفعتله ايدي وسويتله حركة زين بأصبعي
ضيرم : اشتريلك جهاز أوكسجين راح، حتى اذا تختنگ تستعمله
بعده يحجي وياي وطب صخر يمشي بساع ،باوع علي
صخر : شني شبي ؟
ضيرم : اختنگ وهو مسوي عملية وبنج عام هذا الدخان كله مايصير لحاله
صخر : وشلون صار هسه ؟
ضيرم : لا احسن ،وين جنت أنت ؟
صخر : وديت شغلة لبيت غازي جدي رادني اوصلها
ضيرم : جا شو ما گتلي ؟
صخر : جدي گال بساع وانا مشيت ولو گايلك راح تمشي وياي وهو ما يرضى
ضيرم : خوش صاير تسمع الحجي
صخر : اكل تبن ،جا انا شبي ؟
ضيرم : كلشي مابيك بس بالمشاكل تسمع الحجي وبغير شي لو حجينه وياك يطيب منا يطلع منا
صخر : انا بكيفي عدك شي يمي ؟
ضيرم : أي اختك
شمرت جهاز الاوكسجين وگمت وي صخر من شفته كف ردانه واجه عليه وضيرم حار وين يطي وجهه منه وضل بس يضحك ويگله
ضيرم : زلة لسان
وبس وصل يمه جابة بضربة على رگبته خلتني أضل واگف بمكاني اباوعله متشمت بي
ضيرم :انعل شيب اهلك ليش تطگ مو اطگك وتعرف ايدي شلون ثگيله
صخر : جا أنت ارفعها علي وشوف شلون اگصها واحطها بحضنك
ضيرم : حطها بحضن اختك
صخر عيونه صارت بگصته وانا لوما فالت من الردهه جان ابتليت بي ،هذا الحجي مو بس استفز بي صخر حتى انا خلاني افور ،رديت على على الاوكسجين من حسيت بروحي بعدها الخنگه ما هادتني
وبس اجه الدكتور وگال اگدر اطلع خابر عليه صخر استلمه غلط بالبداية وبعدين گاله
صخر : وينك ؟
صخر : جا هج من القرية شوفلك ديرة
سكت شوي ورد گال وانا كلش زين اعرف ،يتمنى هسه ضيرم گدامه
صخر : انعل ساسه اليطيك مره انا الك ضيرم تريد تخبلني عليك ،اششش لا تعتذر
سد الخط بوجهه واجه سندني حتى نطلع ونرد للقرية
°غاية°
مو يوم اسود صار علينه ،ما بينه أحد عينه غفت ولا بينه أحد هاد وارتاح من القلق والتفكير الذبحنه هاي من غير الدخان الوي كل نفس اتنفسه اكثر من الهوه
يطب لريتي
باوعتلها من طبت وصاحت بأسمي
ميمنة : غاااية
_ هاا
ميمنة : صخر يگول الخط برة متانيج
گمت بساع
_ والله نسيته ،اطلعي گليله بس خلي يحاجي يتانيني دقيقتين
ميمنة : خوش بس بساع
مشيت للغرفة وانا اريد عليها
_ أي والله ما اتأخر
طبيت بساع بدلت وطلعت انخبصت خبص علما صعدت الخط وطبيت للمدرسة انا كلشي ما مفتهمه لا أنا النمت ولا حتى من گومني عرفت اجاوب چن عقلي من النعاس تفرمت
°حواري°
طبيت انا وأمي وبصائر لبيت جدي و ورانه طب ليث يريد يصعد فوگ ومبين حتى يبدل لان هدومه مصخمات تصخم ،بس ما خلته جده يصعد من صاحته
غضة : حبوبة ليوثي تعال يمي اشوفنك
اجه گعد بصف جده
ليث : ها غضة شتردين ؟
غضة : غضة بعينك ولك اختنك الزغيره انا
ليث : اداهرج جده اگولن خطية محد مداهرها كلهم ما ينحملون و ولا واحد بيهم يتحاجه بس انا فقير وخوش حفيد
غضة : أي والله سوده علي ياحبوبة ،شلون صرت ؟
ليث : موزين جده فد نوب
غضة : ريت المرض بعدوك يابعد حبوبتك
ليث : جده لو موفيتلي النذر جان ما صار بي هيج
غضة : يا جا انا محسبه اليوم اوفي ،بس حرگونه مصخمين الوجه
ليث : جا خوش راح اطيج مهله اسبوع
ضحكت جده وگالتله
غضة : صار تدلل گبل الأسبوع خلهم يذبحوها الك
ليث : راح اطيبن
غضة : أصعد بدل وانزل تريگ
ليث : أي والله جعت من الركض
غضة : خسه الجوع حبوبة
باسها من راسها وگام يمشي يريد يصعد ،بس اندار باوع على هيوفة چت متذكر شي يريد يگوله
ليث : البارحه شفت دواج مخلص ليش ما حجيتي ؟
هيوفة : نسيته والله ومن ردت اشرب الا تذكرته
ليث : جم مره موصيج ،هواي تتهاونين وي روحج
هيج
هيوفة : بعد ما انساه
أبتسم وصعد وانا ابتسماته لزگت بعيوني بحيث ضليت مبتسمه ،ماكو بشر هيج ابتسامته حلوه وتخلي حتى اليمه يبتسمون بدون ما يحسون على روحهم ،ما أعرف انا ليش هلگد اشوفة انسان عبارة عن ايجابية لان احبه لو الكل مثلي هيج يشوفوه .! !
گمت من صاحتني ميمنة من المطبخ ،بس طبيت گالت
ميمنة : تعاي عاونيني بالريوگ
باوعتلها مزغره عيوني
_ جا ما لگيتي غيري هاي كومة اكو بنات
ميمنة : هسه اصيح لبصائر ويانه ،بس ترسي قوري الجاي ماي وحطي على النار
مشيت للكاونتر احجي واحجي وهي مشت للصالة ولا عبرتني أصلا ،شوي وردت تمشي و وراها بصائر بس طبت گالت
ميمنة : هذاك صخر واگف اطلعي گليلة يجيب ريوگ
_ جا مو رجلج ما تطلعيله أنت ؟
بصائر : تستحي ،اطلعي أنت هذا قريب بس تصيحي يجي
باوعتلهن ما مقتنعه ،شني قابل تعبر علي ،بس راح أعدايها هيج بكيفي ،وصدگ بس طلعت وصحت بأسمه اجاني يسأل شأريد وانا حاولت الزم لساني بلايه ما اذكر اسمها بس ما گدرت
_ ميمنة تگول جيب ريوگ
هز رأسه بخوش ومشى وانا بس رديت للمطبخ كضتني تريد تكتلني
ميمنة : ليش گتيله ميمنة ،يعني الا تحطيني بالنص هاا
اجر بأيدي من ايدها اريدها تهدني
_ جا واذا گتله ميمنة شني غير مرته أنت
ميمنة : كارثه أنت والله
بس هدت ايدي باوعتلها صايره حمره من المعصم وتوجعني
_ فلك ولا جنج مرة ،مو حرام عليج ليش هيج كضيتيني ؟
ميمنة : تستاهلين من ايدج
_ الك الله يالفقير على گولة جفون
جفون : سمعت اسمي
انداريت على صوتها من طبت ،نزلت قفص زقزوقاتها
جفون : شني شجاي تسون ؟
ميمنة : ريوگ غير ،بصائر اثرمي بصل وي البيض الهم
سوينه الريوگ أو سون الريوگ لان أنا ضليت بس اباوع عليهن وما سويت شي غير بس حظرت گلاصات الجاي ،من كملن صاحتهم جفون وطبوا للصاله ،تريگوا وردوا طلعوا،ومن صار وكت دوامي گلت ل أمي تمشي وياي ابدل ...
لبست عباتي وطلعت و وگفت متانيتها من تأخرت صحت
_ راح علي الدوام يمه شني السالفه
اجت طلعت وانا وراها ،اول ما طبيت لبيتنه ركضت للغرفة بدلت بساع بساع لان ماضل شي لجية الخط وبس سمعت صوت الهورن طلعت ،بس فتحت الباب صار گدامي حق جاي يخابر ،عبرته ومشيت أريدن أصعد وانداريت عليه من سمعته يگول بصوت ناصي
عبد الحق : أم دلعة
خزرته وردت درت وجهي ،بزعت روحي صار جم مره كل ما يشوفني يگلي أم دلعة كرهني بالساعة السوده البيها طلعت اشر الهدوم ...
صعدت وسديت الباب ،النعاس كتلني ومنا هذا ضوجني ،ندستني جفون ،باوعتلها
جفون : شبيج مطنگره ؟
_ بعدين احجيلج .
جفون : حق مو ؟
_ أي
° غاية°
رديت من الدوام ولزمت گلبي بأيدي من شفتهم مسلحين بالباب ،طبيت للبيت بساع ادور بالوجوه أريدن افتهم شكو وشنو الخلاهم يوگفون هل وگفه
بس شفت ميمنة بالمطبخ سألتها
_ شكو شصاير ميمنة ليش واگفين بالتفگ ؟
ميمنة :حق طب يصيح ويگول گايليله جاييكم وكل واحد جر تفگته وتحزمولهم بره
خليت ايدي على گلبي
_ يمه الله يستر ،شني انگلبت الايه وفوگاها هم يردون يهدون علينه
ميمنة : بيت غازي جاي يطلعون ثارهم القديم ويانه
_ أي والله صدگ جنهم متحملين علينه وهل جاي ينفجرون
ميمنة : هو هيج ،اگلج
_ گولي
ميمنة : امشي بدلي وتعاي وياي نكمل الغده
_ خوش
مشيت للغرفة بدلت ورديت يمها ،بس شافتني گالت
ميمنة : نگعيلي تمن
_ شگد
ميمنة : حطي وانا اگلج شگد
اخذت نجانه وگلاص وگعدت يم السطله مال تمن وهي تباوع علي
ميمنة : هاي هي كافي
گمت اغسله واحجي وياها
_ بركة بعدها نايمة ؟
ميمنة : أي بعدها گالت لا تگعدوني
_ والله انا لوما عدي كومة تحاظير فلا جان مشيت وبالاصل حتى ماكو فايده لروحتي ما جاوبت
ميمنة : لان ما نايمة طبعا ما تجاوبين
_ والله حتى المعلمه ام الأحياء استغربت ومن گتلها عدي ظروف گالت تحسبلي اليومي مال أسبوع الجاي في ثنين
ميمنة : أي احسن أقري بي زين حتى تعوضين
_ أي
اطيتها التمن ومشيت اريد اطلع من المطبخ بس فززني صوت صياحهم العالي ،رديت اركض اباوع من الشباك طبوا ثايرين
صخر : خررررب لشتهم انا الهم ،ما أجوي احنه نمشيلهم
عبد الحق : مثل النثاية يتهاددون وكل خير ما بيهم
وأبوي يصيح عليهم يريدهم يطبون ،ومن جهه ضيرم بالگوه لازمه برهان ،طببه بالمطبخ دفع وصاح بي
برهان : راح ارتكب بيك جررريمه ،لك هيد كااافي تگمز
طب أبو يسحل بصخر
محمد : أبو گمزة بعد شيكضه
صخر : هدني بويه هدددني
محمد : امشي طب جوووه وكااافي لان هل مره صدگ ما راح اسكتلك لو مو جدك يصير گبالي
طب جدي جاب ابوي بضربه على ضهره مني حسيت ظهري وگف ولا جن هلگد عمره
رأجس : مد ايدك عليه وشوف شأسوي بيك
اندار أبوي على جدي وعيونه صايرات بگصته ،بالگوه يحجي بدون ما يعلي صوته
محمد : جا بوية ما تشوفه ،راح يوگف عقلي ،يشتري المشاكل مشتره
رأجس : ما عليه هو انا گلتله
صفن أبوي بوجه جدي ،ومن استوعب صاح
محمد : يعني صخررر الماشيلهم
رأجس : أي
صفگ أيد بأيد حاير شيحجي
باقر : جا بوية شلون تودي بله لزموه وسوها وحده بوحده
رأجس : انا وديته لان اعرفهم ما يگدروله ،راح ورد هذا كلشي مابي صل ماينخاف عليه
باوعله أبوي ما عاجبه ومشى طب للصالة وعمامي ضلوا يسألون بجدي
يوسف : شني الوداه صخر ؟
رأجس : تحذير على طبتهم للقرية وحرگت البيت .
يوسف : شنو هو ؟
رأجس : ورقة بيها رماد من رماد حطيان بيتنه .
يوسف : فارغة الورقة ؟
رأجس : لا
يوسف : يعني تهديد ؟
رأجس : تحذير
صخر : لا جدي تهديد ،احجيها جا شني خايفين
يوسف : لك أنت شني ؟
صخر : بشر قابل شني عمي
ما حجه بعد ما صاح بي عمي
يوسف : بلاء اسووود
رأجس : شو تصيح عليه أنت ؟
يوسف : جا ما شفته يستهزء .
رأجس : أنت گلتله أنت شني هو گالك بشر ،جا غير أنت سألته
يوسف : حتى لو يغلطون عدك تبرير الهم ،بوية جاي تصگطهم والله
باقر : شني يوسف شبيك ؟
يوسف : جا ما تشوف طلابيهم يوم عن يوم يكثرن كل سواية تحجي للگبلها انا اضرب منج
باقر : اسكت جدهم يحلهن، هو وياهم وهو يحلهن بعد عليش نتعب ارواحنه
يوسف : جا هاي وگفتهم بالتفگ يوميا يطلعون منها سلامات
رأجس : ما عليهم شي
باقر : يا ماعليهم شي بوية ،المره الفاتت الله سترنه بضيرم وليث بعد مرة الجاية ماتعدي هيج
رأجس : عگابي ما ينخاف عليهم وهم للطلايب وگدهن
باقر : جا انا گايل مو گدهن ،بس يابوي الحرص واجب خوما نحطهم بنص الطلايب وتالينه نخسرهم
رأجس : أنتم بس اطلعوا منها
باقر : شنطلع بوية جا غير ولدنه
رأجس : أريدن اشوف غضة من حبلت بيكم عاينت على ططوه لو بومه
مشوا للصاله بدون ما يردون على جدي لان مبين يريد ينزل عليهم بالرزايل عاد اختصروها من طبوا
وهو لحگهم ،انداريت على صوتها
ميمنة : غاية بساع طلعلي مصفي ابزل التمن
مشيت للكاونتر بساع طلعتلها المصفي واطيتيها
وهي اخذته مني مستعجله حطته بالسنك ومشت جابت جدر التمن يفور والبخار يطلع منه ،و وي ما دارته بالمصفي حتى تصفي گمزت و طاح منها على السنك ،لطمت على وجهي وجريت ايدها اباوع وهي مثل الطير المذبوح روحها راحت و گعدت بالگاع لازمة أيدها المحترگه بأيدها الثانية وتباوع على جفها البساع انگلب لونه گلب وصار أحمر دم ،كلها التمت عليها وامها تخبلت من شافت ايدها ،حق گعد گبالها يريدها تحجي ويا وهي من الوجع تريد تنطق ماتگدر
عبد الحق : ميمنة باعيلي ،ولج شبيج وجهج انگلب
زهرة : لان انهبطت
رأجس : امشوا اخذوها للمستشفى بساعكم ،لاتضل هيج مگابلها وگاعد
هز رأسه حق ب أي وضل يحجي وياها
عبد الحق : گومي اسندي روحج علي
صخر : ماشي اشغل السيارة ،لبسوها عباتها
طلع صخر وبرهان اندار لبصائر
برهان : عباتها بساع
ركضت جابت عباة وأجت ،گومها حق وبرهان لبسها الها وبس طلعوا عمه لبست عباتها وطلعت وراهم بساع ،كلهم طبوا للصاله مشيت جبت المكناسه والمكرافه وگعدت اللم بالتمن الترس المطبخ ،وبس خلصت جبت علاگه وخليته بيها وطلعت حطيته بره حتى يشوفون وين يودوه لان هواي وهم حرام اذبه بالزباله عاد تاكله الحيوانات
بس طبيت للمطبخ صارت گدامي تغسل بالسنك ،أبتسمت و حجيت
_ انا رديت اكمله لا يتدمر ثوبج
نسمات : ماكو فرق اعاونج ،وهم ضجت من الگعده ما متعلمه انا يومي يخلص فره وشغل
_ أنت مثل هيوفة ،ماتبجي من رجليها تبجي لان گاعده
نسمات : تعلمنه
_ صدگ هو تعلوم
غسلت ايدي ومشيت اشوف المرگة ،من شفتها مستوية طفيتها ومشيت للصاله
_ يمه ماتجين تركبين تمن
زهرة : نگعيلي تمن وانا اجي وراج اركبه
_ خوش
مشيت طلعت تمن من جديد بگد الرادته ميمنة ،وهم غسلته ونگعته وطلعت للحوش ،ابتسمت من شفتهن يگمزن بالقفص يردن يطلعن ،فتحتلهن الباب وخليتهن ينزلن يلعبن ،ومشيت اجيبلهن من التمن الوگع حتى يأكلن مبين جوعانات لان حتى من امشي يمشن وراي ،سبحان الله حتى گتاكيتها مشعوذات مثلها ...
حطيتلهن تمن وطبيت من صاحتني أمي
_ ها يمه
زهرة : شوفيلي دهن عدنه لو لا
مشيت فتحت الكاونتر ،طلعت بطل اطيته الها وردت ارد اطلع بس وگفني صوتها
بصائر : غاية أريدن لبن عدكم ؟
رديت فتحت الثلاجة حتى اطيها ،دوم ما نخلى من اللبن بس هل مره ما جان اكو
_ مخلصين دزي أحد يجيبلج
بصائر : امشي گلي لنوح يجيبلي فقار طلع
_ صار
أبتسمت وانا من طبيت شفته گاعد يحجي وي عزيز صحته
_ نوح تعال احاجيك
نوح : تانيني شوي واجيك اكملك
عزيز : لا تتأخر وراي طلعة
نوح : وين ؟
عزيز : عدي چم شغله استنسخها
بس اجه يمي گتله
_ مرة صاحبك تريد لبن
نوح : صار يابة تدلل
فتحت حلگي مصدومه هاي شني عود صدگ هيج بساع راح بدون ما يحجي شي ويضوج ،فات مني وانا بعدني بصدمتي
عزيز : سدي حلگج راح تطب بي ذبانه
رمشت بعيوني وحطيت ايدي على حلگي وهو ابتسم من شاف فشلتي وخله وطلع ،مشيت للمطبخ متفشله من روحي گبل الگاعدين هو گالها يضحك بس انا استحيت صايره ما اسيطر على تعابير وجهي وحركاتي من يصير موقف وهاي زين من غير حركتي من اتخصر وانسى روحي وما يخليني أتذكر غير خزره زينه من واحد من اخواني ...
طلعت اركض من تذكرت الكتاكيت ما ضامتهن و وي طلعتي طب صخر و وراه عمه وميمنة وحق لازمها من ايدها الثانيه ، وبس تقدمت عليها انتبهت ايدها المحترگه لافيها
_ ها عمة شسولها ؟
شيماء : سوده علي گشطوا الجلد المحترگ راحت روحها
باوعتلها بقهر وهي كل حيل ما ضال بيها بحيث حجاية وحده ماتگدر تحجي ومبين هواي باجية لان لان عيونها مورومات ،مشيت وراهم اطب للبيت وهي بس طبت تلگنها البنات حايرات شيسون الها
اجت بصائر اخذت العباية منها ،ونسمات مشت جابتلها گلاص ماي وردت اطته الها شربت واخذتها منها وحطت رأسها على جتف امها واحنه كلنا يمها والولد على صفحه يحجون
عبد الحق : الدكتور گال بيها بخت ما لايحها الماي الحار
برهان : جا هو بس البخار وهيج صالخ ايدها صلخ لو الماي هم جان شصار بيها
باوعلها يحجي بقهر ،بس ما يتحمل اذا ما يعيل بحق
ليث : كون بأيد حق ولا بأيدج ياخوية
أبتسمت بتعب وحق لاول مرة ما يحجي من ليث يعيل بي وعود شني سكت ابد اخوي ولا يگدر
ليث : شنو ماحجيت شي ؟
عبد الحق : جا صدگ كون بي ولا بيها عاد انا اتحمل
ليث : عمي خوش ،شو أنا محد گالي كون بي ولا بيك
عبد الحق : جا أنت غير زلمة وتتحمل
ضحك ليث وهز رأسه ب أي ،وانا مشيت للمطبخ ومن سمعت صوت نويصهن العالي طلعت اركض و وي ما طلعت طبت هي وحواري من سمعت صوتهن عرفت بيهن شي ،شمرت جنطتها وأجت تركض على قفصهن من لگتهن ماكو أندرتلي
جفون : وينهن ،غااااية الكتاكيت وييين
_ طلتهن يلعبن وما أعرف وين راحن بس صوتهن اسمعي
جفون : هذا صوت مال واحد بس ،الثاني ماكو ماله صوت
افترت تدوره وتصيح
جفون : كرفس ،ليمون ،وينچن
حواري : هااا جفون هنا احنه
عاطت بيها والدمعه تفتر بعينها
جفون : لا اجيييج والله
حواري : خبال أي والله
مشيت تدور ومن وصلت يم التنور عاطت وگعدت بالگاع ،مشيتلها بساع اشوف شبيها وهي ترجف رجف ،گعدت گبالها احجي اريد بس اعرف شنو شافت وهي فاتحه عيونه كل وسعهن ،ومن أشرتلي على التنور انداريت اشوف شكو وعطت من شفته
وهي عاطت مستوعبة
جفون : كرررفس ماكلته ولج اكلت كرفس
غمضت عيونها بأيد ما اريدها تباوع وگومتها وهي بايدي ترجف وتردد
جفون : كرفس غاية كرفس اكلته
طبتتها جوه وامي بالمطبخ بس شافتها ترجف اجتها بساع مفزوعه من حالها تحاجيها وماترد من أيست منها سألتني
زهرة : شبيها غاية ؟
_ البزونه اموته كرفس وعايفته
زهرة : ياااا جا شطلعهن ؟
_ انا طلعتهن لان شفتهن يگمزن ونسيتهن
زهرة : يا يمه والثاني وين ؟
_ ما أعرف ،هسه امشي اشوفه
اخذتها من ايدي وفتحت بوري السنك تغسل وجهه وتحجي وياها
زهرة : شني يمه شبيج كافي ترجفين راح يوگف گلبج
غمضت عيونها وردت فتحتهن
جفون : عمه والله احبنهن ،صار شگد اداري بيهن وتالي تجي تاكله
زهرة : جا شسوين ،بس هدي روحج وانا اخلي نوح يجيبلج غيرهن
جفون : عمه كبرتهن
زهرة : جا تضلين تلطمين قدر وصار ،امشي غاية شوفي الثاني وينه
هزيت رأسي ب أي وطلعت ادور على ليمون ،ومشيت اركض من سمعت صوته وره النبگه ،بس شفته ضحكت وشلته ورديت للبيت ،هي گاعده بالمطبخ وامي يمها بس شافته بأيدي گامت بساع اخذته من ايدي تحجي ويا
جفون : مات اخوك ،مات كرفس
زهرة : والله انا فلا احب الحيوانات الج لان أعرف بيج كلش زين شلون تتعلقين بيهن ولو صار بيهن شي تتسودنين
جفون : عمه والله گلبي احترگ والله
زهرة : كافي تاكلين بروحج شني السالفه نجيبلج غيرهن
سكتت تباوع على ليمون بأيدها ،وانا تأنيب الضمير كتلني ،وضليت اكل بروحي شلون نسيتهن بس والله انشلشت بس لو ما مطلعتهن هواي احسن ولا هيج صاير ومحترگ گلبها
طبت نسمات للمطبخ تطگطگ باصابعها
نسمات : خاله
أندرت أمي عليها
زهرة : ها حبيبتي
نسمات : أبوي خابر على عمه وگالها جاي بالطريق يريد ياخذني
زهرة : جا مو على الأساس ملتحق ؟
نسمات : ما أعرف منزلي امس وهسه جايني
زهرة : والله ما يهلي تمشين احسن بيج هناك ما مرتاحه
دنگت رأسها وتنهدت
نسمات : ولا شايفه الراحه هناك بس لازم امشي
زهرة : شعدج هناك ،منو غير بس ابوج ،ضلي وانا حتى لو احجي ويا
نسمات : لا والله خاله امشي احسلي وهم اخذلي فتره وارد
زهرة : حتى لو نجيج انا و واحد من الولد اذا ابوج ما يگدر ،بس اطينه خبر تلگيني يمج
أبتمست وأجت حضنت أمي ،وامي لمتها بحضنها ومن وخرت مسحت عيونها
زهرة : لا تبجين بعد گلبي والله يحترگ افادي من تنزل دموعج
مسحت دموعها
نسمات : هاي مسحت دموعي ،ماشية أحظر هدومي
ماضل شي ويوصل
زهرة : خوش
مشت للغرفة وانا وراها ،بس طبيت شفت ميمنة امدده وهيوفة گاعده يم رأسها ،فتحت الخانه الخليناها الها وطلعت جنطتها وگعدت تسفط بهدومها وهيوفة تحجي وياها
هيوفة : لا تطولين هواي علينه ،هم تعاي عاد اخلصي من الحيايه اليمج
نسمات : عالات گلبي بس شبيدي هذا الموجود ولازم ارضى بيه
هيوفة : انا بس شفت زينة بيهن هي زينه ،اسم على مسمى
نسمات : أي صدگ بس هي گلبها طيب بيناتنهن
هيوفة : أي والله الباقيات كلهن مسمومات
نسمات : تعلميني بيهن ،انا الاعرفهن سم عرابيد سمهن
هيوفة : والله اتعجب على هيج بشر
نسمات : مو كل اصابعج سوه ولا كل الوادم خيره بيهم الشين وبيهم الزين
هيوفة : والله حجيج صح
طبت عمه شيماء گعدت يم ميمنة
شيماء : يمه جوعانه اصبلج شي تاكلي ؟
ميمنة : لا ما اشتهي
شيماء : وشني تضلين بلايه اكل ؟
هيوفة : صبيلها عمه وانا اوكلها بكيفها
شيماء : والله أنتن وحده دوه الثانيه
أبتسمت هيوفة وعمه گامت طلعت وشوي وردت شايله بأيدها صنينه زغيره حطتها يم هيوفة
شيماء : وكليها بعد عمتج ولو أنت هم تعبانه بس انا اعرفها ماتگلج لا
گعدت على حيلها من گالتلها
هيوفة : يلا اگعدي ولا تگولين لا
شيماء : والله دوه
ضحكت اباعلها شلون بالگوه تبلع اللگمه بس ماتگدر تعاند هيوفة ولا هيوفة هم تگدر تعاندها
انداريت على صوتها تحجي بالگوه لان هستوها گاعده
بركة : شني نسمات راح تمشين ؟
باوعتلها وردت تسحب بسحاب الجنطه
نسمات : أي أبوي على جيه هسه
بركة : والله تعلمنه عليج وين ماشية
نسمات : انا هم تعلمت عليكم بس لازم امشي خوما اضل هنا وهم ما اريد احصلي حجاية
بركة : براحتج نسومات
گامت تتثاوب ،حطت حجابها على راسها ومشت تغسل وشوي وردت گعدت بصفي ،ندستها من شفتها صافنه ،باوعتلي
_ وين صافنة ؟
بركة : افكر
_ بشني ؟
بركة : تمشين وياي ؟
_ وين ولج ؟
بركة : بس تظلم الدنيا نمشي وتعرفين .
_ يمه خفت وين تمشين ؟
بركة : هسه شبيج مستعجله عود من نمشي تعارفين
باوعتلها ما مرتاحه بس ما اعرف شني الخلاني امشي وياها من طر الليل واجتني بالمطبخ گالت
بركة : راح اطلع گدامج وأنت تلگيني يم السايج الوره البيت
_ ولج بركة وين مولين
بركة : هسه امشي وتعارفين
طلعت گبلي وانا ضليت شوي وطلعت وراها بس انداريت بضهر البيت شفتها واگفه يم السياح
بركة : شني وين صرتي ؟
_ ضليت شوي حتى لا يحسون ثنينه اختفينه سوه
بركة : طلعتي تفكرين
_ جا شعبالج مو كل الوادم مثلج
ضحكت ودارت وجهه تباوع على السياج ،وانا وگفت بصفها اباوع وما أعرف بيها بشنو جاي تفكر
_ گليلي شعدنه هنا ؟
بدون ما ترد علي جابت برميل نفط فارغ مكترينه احنه على جهه ،صعدت عليه
بركة : راح اعبر وأنت الحگنيني
_ فلك شعدنه عابرين ؟
بركة : شگد تسألين هسه اعبري وراي وتفتهمين ليش بس لا تسألين
سكتت اباوعلها شلون صعدت على السياج وجيتت على الگاع الورانه وانا رفعت ثوبي وعبرت مثلها بس شافتني مشت گبلي وانا ركضت وراها
_ ولج اوگفي ،احجيلي هسه وين ماشين
بركة : خاب الحگيني وتفتهمين ،شني قابل ماخذتج للأعدام
_ أخاف منوره سوايتج صدگ يعدمونه
بركة : يمعوده شمدريهم ،يلا امشي بساع
رفعت ثوبي وركضت وراها ،وضليت واگفه بمكاني من شفت ذيج الغرفة گدامي "الورشة" مال صخر
_ وين ولج بركة شجابنه هنا ،تحجين صدگ ؟
بركة : بس نباوع من الشباك أريدن اشوف منو هذا المحبوس يمنه
_ صخام بعييينج
اجت جرتني ومشت ،وگفت وراها وهي مدت راسها مغطية وجهه بالشال وبس عيونها مبينه ،سويت مثلها من شفتها ضلت هواي تباوع ،ومن ركزت وشفت الگاعد على الكرسي ومربط بحبال گمزت گمزة تسوه عمري ومنظرة ما يروح من بالي ،من ضخامته لافينه بالحبال لف ،فاتح عيونه ويباوع بالگاع وما أعرف شلون عرف اكو احد وره الشباك وبس رفع راسه وخرنه بساع
بركة : من كل عقلهم ياخذون هذا شلون گدروله ؟ ...
شكرا لزيارتكم عالم روايات سكيرهوم
