رواية ديون النبض الفصل الحادي عشر 11 بقلم مروه صياح


 رواية ديون النبض الفصل الحادي عشر 



كنت لسه في صدمتي من إن دكتور مجد هو ابن ياسين، وإنه كمان أخو رغد. لحد اللحظة دي، كنت فعلًا مش قادرة أصدق اللي اكتشفته.

بص لي مجد وضحك، وقال:

مجد: أيوة، أنا ابن ياسين. بس على فكرة، أبويا مش صغير علشان تقولي عليه ياسين.

بصيت له وأنا لسه مستغربة، وقلت:

وعد: سيبك من ده دلوقتي، هو في الأول والآخر ياسين. بس أنا فعلًا مش مصدقة!

مجد: لأ، صدقي.

بصيت لياسين وقلت له:

وعد: اسمعني بقى يا ياسين، أنا ما كنتش راضية أتكلم علشان رغد كانت متضايقة، ولما كنت بشوفك إنت كمان زعلان، ما كنتش عايزة أزعلك أكتر. لكن دلوقتي، بعد ما عرفت إن دكتور مجد هو ابنك وأخو رغد، أنا بصراحة مش عارفة لساني هيسكت إزاي!

لفيت ناحية مجد، وبدأت أتكلم من غير ما أقدر أوقف نفسي:

وعد: يعني إحنا المفروض جيران بقالنا أكتر من سنة ونص، وأنا ما أعرفش إن إنت جاري؟
وبعدين إنت ليه مش بتزور ياسين ورغد كتير؟ وليه دايمًا سايبهم زعلانين ومتضايقين علشانك؟ هم يستاهلوا منك كده؟

سكت لحظة، وبعدين كملت وأنا ببص له باستنكار:

وعد: تصدق بقى إن إنت ما تستاهلهمش؟ هم دايمًا خايفين عليك، وحاسين بهمك أكتر منك، ومع ذلك إنت مقصر معاهم!

بصيت لياسين، وقلت له بجدية:

وعد: ياسين، هو إنت هتزعل مني لو قلت لك إن ابنك ده يروح يقعد مع أمه أحسن؟ كفاية عليك رغد وحازم وأنا. 

ما دام هو مش حاططك في دماغه ولا بيسأل عليك خالص، يعني إيه يزورك مرة كل أسبوع، ويقعد معاك ساعة ولا ساعتين بالليل؟ وحتى لو جه، بييجي ينام ويمشي تاني يوم الصبح! هو ده ينفع؟

ياسين بص لي، وحاول يهديني وهو بيقول:

ياسين: وعد، وعد! اهدي، اهدي يا وعد يا ألف كلمة في الثانية!

ساعتها بصيت لمجد، وحسيت إني ضايقته بكلامي. أول ما لاحظت إنه اتضايق، أنا كمان اتضايقت، وحسيت إني اتسرعت في حكمي عليه.

وعد: دكتور مجد، أنا آسفة. حضرتك عارفني، وإنت مش جديد عليَّ، وعارف إني ما بعرفش أسكت لما يكون فيه حاجة مضايقاني.

مجد بص لي بهدوء، وقال:

مجد: وعد، أنا مش زعلان. أنا عارف والله إن إنتِ معاكي حق، بس فيه حاجات كتير جدًا غصب عني، وفيه حاجات غايبة عنك إنتِ ما تعرفيهاش.

المرة دي، ولأول مرة تقريبًا، حسيت إني مش عايزة أكون فضولية، ولا أحاول أعرف إيه اللي وراه الكلام ده.

بصيت له وقلت:

وعد: أنا مش عايزة أعرف حاجة، بس كل اللي عايزة أقوله لك حاجة واحدة بس... ما تسيبش قلبك يتعبك بالطريقة دي.

قلبك ليك، لكن بص لياسين ورغد، هم محتاجينك. ما تبعدش عنهم مهما كان اللي إنت فيه أو اللي إنت حاسس بيه. 

إنتوا التلاتة عاملين زي أضلاع المثلث، لو واحد فيكم غاب عن التاني، المثلث ده عمره ما هيكتمل.

مجد بص لي وابتسم، وفجأة سألني:

مجد: وعد، فكرتِ في الكلام اللي أنا قلته لك النهارده؟

بصيت له باستغراب، وقلت:

وعد: هو إحنا في إيه ولا في إيه؟! أنا بتكلم معاك دلوقتي في موضوع تاني خالص، وإنت بتكلمني في إيه؟

قررت أهرب من الموضوع قبل ما يفتح كلام تاني أنا مش مستعدة له، فقلت بسرعة:

وعد: على فكرة، أنا جعانة أوي! وإحنا كل ده مستنيينك. ده لو كنت أعرف إن إحنا مستنيينك إنت، كنت أكلت من زمان!

ياسين بص لي وضحك، ومجد ضحك هو كمان، وبعدها ياسين قال:

ياسين: يعني أنا لو كنت قلت لك اسمه بس، كنتِ هتعرفي؟ وكانت الصدمة اللي إنتِ أخدتيها النهارده دي اتزالت!

وبعدين بص لنا وقال:

ياسين: طب يلا، نتغدى الأول، وبعد كده نكمل كلامنا.

حسيت إن لازم أهرب من اللي أنا فيه بأي طريقة، وموضوع الغدا جه في وقته!

---

بعد شوية، كانت رغد وماما وحازم معانا، وقربت من ماما وأنا لسه مش مستوعبة اللي حصل.

وعد: ماما، تعرفي دكتور مجد اللي أنا كنت بحكيلك عنه، واللي كنت بكلمك عنه قبل كده؟ طلع هو ابن ياسين!

كنت بتكلم وسط ضحكهم، فماما بصت لي باستغراب مصطنع، وقالت:

ماما: دكتور مجد مين؟

بصيت لها وأنا بحاول أوضح لها:

وعد: يا ماما، دكتور مجد! دكتور مجد بتاع العيادة، واللي أنقذني من دكتورة جيهان، ودكتور مجد اللي اعترف لي النهارده إنه بيحبني... هو ده دكتور مجد!

ماما فضلت تضحك، وبعدين قالت:

ماما: يعني ياسين كان عمال يضغط عليك علشان يخطبك لابنه، وفي الآخر طلع ابنه هو دكتور مجد اللي إنتِ بتحبيه!

بصيت لها وكأني بلومها على كلامها.

وعد: إزاي تقولي كده يا ماما؟!

كنت حاسة إن ردها ده ممكن يكون كلهم سمعوه، وده اللي حصل فعلًا. مجد قرب مني، وبص لي بابتسامة، وقال:

مجد: يعني أنا كنت مستني أسمع ردك إنتِ، وفي الآخر أسمعه من مامتك؟

اتلخبطت، وقلت بسرعة:

وعد: لأ، لأ، على فكرة ماما ما تعرفش حاجة! دي بتتكلم كده من دماغها وخلاص. إيه يا ماما اللي إنتِ قلتيه ده؟!

ماما بصت لي وقالت:

ماما: والله؟ طب وبالنسبة لاسمه اللي إنتِ عملاه جوه في أوضتك؟
وبالنسبة للوحة المكتبية اللي إنتِ عملاها باسمه الثلاثي؟ والميدالية اللي إنتِ عملاها لمفاتيحه؟

أنا بتكلم من فراغ يا ست وعد؟

وبعدين كملت كلامها وهي مبتسمة:

ماما: بالعكس، أنا لما عرفت إن مجد هو ابن ياسين، فرحت جدًا. وأنا بتمنى من ربنا إنه يكون شريك حياتك.

بصيت لها وأنا حاسة إن وشي هيولع من الكسوف.

وعد: ماما، إنتِ أحرجتيني أوي!

ماما قربت مني، وقالت لي:

ماما: وعد، فيه مثل عندنا بيقول: اخطب لبنتك وما تخطبش لابنك. 
وبعدين فاكرة إنتِ قلتي إيه لحازم أول ما شفتي رغد؟ إنتِ كنتِ صريحة من أول لحظة، وكنتِ السبب إنهم يحبوا بعض ويقربوا من بعض، وخلاص بقوا عايزين يتجوزوا. 

إنتِ اللي جمعتينا كلنا وخليتينا أسرة واحدة يا وعد.

سكتت لحظة، وبعدين كملت:

ماما: وأنا كمان لما قربنا من أسرة عمك ياسين ورغد، كنت واثقة ومتأكدة إن ابن ياسين هيكون شخص كويس. وكنت بتمنى من ربنا إن الشخص اللي تكوني معاه بقية حياتك يكون إنسان كويس، وأهله وأسرته ناس كويسين.

ابتسمت وهي بتكمل:

ماما: سبحان الله يا وعد، إحنا لو طلبنا معجزة، ما كانش هيحصل الكلام ده! الشخص اللي إنتِ بتحبيه وبيحبك، وكنتِ بتتكلمي عنه من غير ما أعرف هو مين، طلع ابن ياسين!

ما قدرتش أرد عليها. قربت منها ورميت نفسي في حضنها، وأنا ببص على مجد، وبعدها غمضت عينيَّ.

كنت حاسة إن القدر كان راسم لي حياة أنا نفسي ما كنتش راسماها قبل كده، وإن حاجات كتير كنت فاكرة إنها بعيدة عني، بدأت تقرب من غير ما أخطط لها.

رغد وحازم بصوا لبعض، وبعدها قالوا:

حازم ورغد: طب إيه رأيكم نقعد كلنا مع بعض بعد الغدا؟ كويس إن إحنا في آخر الأسبوع، ومجد النهارده هيقعد معانا ويسهر معانا زي كل ويك إند، ونسمع منه زي ما سمعنا منك يا وعد.

في اللحظة دي، حسيت إن مجد فعلًا ما بقاش غريب عني. بالعكس، بقى قريب من روحي، وقريب من أهلي وأسرتي، وكأن وجوده وسطهم كان حاجة طبيعية من زمان، وأنا بس اللي لسه باكتشفها.

---

اتجمعنا كلنا على سفرة واحدة.

كانت أول مرة أبص لمجد ويبص لي، ونظراتنا تتقابل كل شوية. كنا بنحاول نتصرف بطبيعتنا، لكن كان فيه إحساس جديد بينا، إحساس لسه مش عارفين نتعامل معاه.

خلصنا غدانا، وبدأنا كلنا نساعد بعض. أنا وماما وحازم ورغد، وحتى ياسين كان بيقوم ويدخل معانا الأطباق للمطبخ.

بصيت له وقلت:

وعد: ياسين، اقعد إنت وارتاح شوية.

وقبل ما يرد، مجد قام وقال:

مجد: أنا هساعدكم.

ابتسمت له وقلت:

وعد: لأ لأ، خليك إنت. إنت لسه أول مرة، ما تقلقش، دورك جاي!

مجد بص لي وضحك، وقال:

مجد: لأ، خليني معاكم. أنا كنت دايمًا بسمع من بابا عن قعدتكم مع بعض، بس ما كنتش أعرف إن الإنسانة اللي قلبي اختارها موجودة مع أبويا وأختي.

الكلام خلاني أبتسم من غير ما أحس. حاولت أغيّر الموضوع، فبصيت له وسألته:

وعد: دكتور مجد، هو إنت تعرف تعمل شاي؟

بص لي باستغراب وضحك.

مجد: دكتور إيه بقى؟ إحنا خلاص بقينا أسرة واحدة.

هزيت راسي وقلت له بتردد:

وعد: لأ... مش هعرف!

مجد: مش هتعرفي إيه؟

وعد: مش هعرف أعود لساني على كده. وبعدين أخاف أقول لك كده قدام زمايلي والدكاترة والمعيدين!

مجد رد من غير تردد:

مجد: وإيه المشكلة؟ قولي اللي إنتِ عايزاه. أنا مش شايف إن فيه حدود بيني وبينك. وبعدين ياسين طلب إيدك ليا كذا مرة، وإنتِ ما وافقتيش.

بصيت له وضحكت، وقلت:

وعد: ما أنا ما كنتش عارفة إن إنت ابن ياسين! وبعدين، هي جت متأخرة شوية.

مجد بص لي وسألني بسرعة:

مجد: يعني معنى كده إن إنتِ موافقة؟

اتكسفت وقلت له:

وعد: على فكرة، إنت بتحرجني!

قرب مني ووقف قدامي، وبص لي بجدية وسط ابتسامته، وقال:

مجد: وعد، تتجوزيني؟

حطيت إيدي على راسي، وبصيت لياسين وقلت:

وعد: ياسين، على فكرة بيقولوا إن الخبطة في الدماغ بتوجع! هو ابنك ده مش بيفهم؟!

مجد بص لي بصدمة، وأنا أول ما استوعبت اللي قلته، حطيت إيدي بسرعة على شفايفي.

وعد: يا خبر! والله أنا ما أقصدش! هي الكلمة خرجت كده... مش قصدي الكلمة نفسها! أنا قصدي إن إنت النهارده تقول لي بحبك، وآخر اليوم تقول لي تتجوزيني!

وأنا المفروض أستوعب كل ده إزاي بكل هدوء وأفضل ساكتة؟ أنا أصلًا مش مصدقة اللي بيحصل! حاسة إن إنت خبطتني على دماغي فعلًا!

مجد ضحك، وقال بثقة:

مجد: على فكرة، أنا بفهم كويس جدًا. وكمان بقول لك يا وعد: تتجوزيني؟ أقول لك على حاجة؟ أنا هجمعهم لك مع بعض، زي ما بنجمع المشرق والمغرب مع بعض. 

الصبح قلت لك إني بحبك، ودلوقتي بقول لك إني عايز أتجوزك. أنا بحبك يا وعد، وعايز أتجوزك.

عينيَّ وسعت من المفاجأة، وبصيت له وأنا بسأله:

وعد: مجد، هو إنت بتتكلم جد؟

ضحك، وقال:

مجد: وعد، أخيرًا قلتيها!

وعد: دكتور، إنت فعلًا بتتكلم جد؟

مجد: ليه يا وعد؟ إحنا مش اتفقنا؟

بصيت له وأنا بحاول أرتب أفكاري، وقلت:

وعد: يا دكتور، بعد إذنك، ممكن نأجل الموضوع ده دلوقتي؟

مجد: ليه؟

وعد: مش عارفة، بس حاسة إني مش قادرة أتكلم فيه دلوقتي.

مسك إيدي وقال:

مجد: طب تعالي نعمل الشاي سوا.

بصيت له بعدم تصديق، وقلت:

وعد: لأ بقى، إنت عايزني أتجنن! يا ابني، كل ده يحصل في يوم واحد إزاي؟ هو ده طبيعي؟!

مجد كان بيضحك بشدة، وسألني:

مجد: في إيه يا وعد؟ مالك؟

وعد: ما هو أنا مش مصدقة! إنت بتقول لي بحبك وعايز تتجوزني، ودلوقتي هنقف في المطبخ مع بعض ونعمل شاي! وإحنا من شوية كنا قاعدين بنتغدى، وكمان شوية هنكمل سهرتنا مع بعض. 
وبكرة إجازة، وأكيد إنت هتكون موجود معانا بكرة كمان!

مجد: أيوة.

بصيت له بصدمة أكبر، وقلت:

وعد: يعني فوق كل ده هتقعد معانا بكرة؟ وهنفطر سوا ونتغدى سوا، وإنت موجود معانا؟ كل ده يحصل في يوم وليلة؟ أنا حاسة إن دماغي مش مستوعبة كل اللي بيحصل ده!

مجد فضل يضحك، وبعدها قال:

مجد: أنا كمان اتصدمت من كل اللي حصل ده يا وعد. أنا بقالي كتير بحبك في صمت، ومش مصدق إني أخيرًا اعترفت لك. وبعدين بابا ورغد وحازم ومامتك كلهم بقوا عارفين. ليه بقى مش موافقة إن إحنا نتجوز؟

بصيت له وقلت بسرعة:

وعد: لأ، أنا ما قلتش إني مش موافقة! أنا موافقة.

مجد سكت لحظة، وبعدين بص لي وهو مش مصدق كلامي.

مجد: بجد؟ بجد يا وعد؟

وعد: آه والله، أنا موافقة. ما أنا كده كده بحبك أنا كمان.

ابتسم ابتسامة واسعة، وقال:

مجد: أخيرًا قلتيها!

بصيت له وقلت بجدية:

وعد: بس اسمعني، مش كل حاجة تفرح بيها كده!

بص لي باستغراب وقال:

مجد: مش فاهم.

وعد: هو إنت مش ليك أخت؟ المفروض إن أختك دي هتتجوز. هو إنت ينفع تتجوز وتسيبها؟

مجد رد عليَّ على طول:

مجد: طب ما إنتِ نفس الكلام! مش حازم أخوكي؟ ينفع هو كمان يتجوز ويسيبك؟

وعد: لأ، بس إحنا موضوعنا لسه جديد. إنما حازم ورغد بيحبوا بعض بقالهم كتير، وقدامهم مشوار لحد ما يتجوزوا. 

وبعدين أنا عايزة أقول لك على حاجة، حازم الحمد لله بيجهز نفسه واشترى الشقة، بس لسه قدامه شوية.
وأنا بالنسبة لي صعب إني أرتبط بأي شخص دلوقتي وأضغط على أخويا بالطريقة دي.

مجد بص لي وقال:

مجد: وعد، أنا مش عايز حاجة غيرك إنتِ.

حاولت أوضح له وجهة نظري، فقلت:

وعد: ممكن تسمعني، بعد إذنك؟ الموضوع لسه في أوله، وبعدين أنا لسه قدامي سنة خامسة وسادسة وسنة الامتياز. يعني لسه فيه مشوار طويل في دراستي.

مجد ابتسم، وقال لي بهدوء:

مجد: وعد، أنا عايز أقول لك على حاجة. إنتِ ناسية إني دكتور وفاهم كل اللي إنتِ بتقوليه ده؟ أنا عارف إن دراستك مهمة، وعارف إن قدامك مشوار لازم تكمليه

وأنا ههتم بدراستك زي ما بهتم بدراستي بالظبط، وهساعدك ومش هسيبك.

بصيت له، وسكتُّ لحظة.

يمكن كان عندي ألف سؤال، وألف حاجة لسه محتاجة أفكر فيها، لكن وسط كل الصدمة والارتباك، كان فيه إحساس جديد بيكبر جوايا.

إحساس إن الشخص اللي حبيته من غير ما أعرف إنه ابن ياسين، واللي كنت كل ما أتكلم عنه ألاقي نفسي بحكي عنه أكتر، بقى واقف قدامي وبيطلب مني أشاركه حياته.

والمفاجأة الأكبر إن الحكاية كلها بدأت في يوم واحد... يوم اكتشفت فيه إن الدكتور اللي قلبي اختاره هو نفسه ابن الراجل اللي بقى جزء من أسرتنا.

وكنت لسه بحاول أستوعب إن النهارده مش مجرد يوم عادي، وإن اعتراف مجد مش آخر المفاجآت، لكنه بداية حكاية جديدة في حياتنا.

Ghazal
Ghazal
تعليقات