رواية ديون النبض الفصل الثاني عشر
بص لي مجد وكمل كلامه، وقال لي:
مجد: «وعد، إنتِ هتكوني معايا، وفي نفس الوقت هتكملي دراستك زي ما إنتِ. ومع الوقت ممكن نسافر مع بعض ألمانيا، وتكملي دراستك هناك».
بصيت له وأنا مستغربة، ومش قادرة أستوعب كل المفاجآت اللي بيقولها لي.
وعد: «مجد، ممكن تهدى؟ أنا لسه ما فوقتش من صدمة بحبك وتتجوزيني، ودلوقتي إحنا مع بعض وبتكمل كلامك وبتقول لي نسافر ألمانيا! إنت مش شايف إن ده كتير قوي على دماغي؟».
بص لي، فضحكت وقلت له:
وعد: «إحنا بقالنا كتير واقفين بنتكلم على فكرة. ممكن نجهز الشاي سوا ونروح نقعد معاهم كلنا، وبعد كده نتكلم في الموضوع ده براحتنا».
بص لي وسكت، فكملت كلامي وقلت له:
وعد: «بص يا مجد، صعب قوي إننا ناخد قرار في يوم وليلة، وباللحظة والتانية، بالطريقة دي. أنا مش هفكر في موضوع الزواج ده قبل سنتين أو تلاتة».
بص لي وقال:
مجد: «وعد، إنتِ مش عارفة أنا عندي كام سنة؟».
وعد: «آه، إنت قلت لي إن عندك تمانية وعشرين سنة».
مجد: «يعني إنتِ بتتكلمي في سنتين تلاتة كمان؟ يعني أتجوز وأنا عندي واحد وتلاتين سنة؟ وده طبيعي إني أبدأ حياتي متأخر كده؟ وبعدين إنتِ ليه عايزة تستني الوقت ده كله؟ مش إنتِ بتحبيني وموافقة إنك تتجوزيني؟».
بصيت له وقلت له:
وعد: «ممكن أعرف حاجة؟».
بص لي واهتم بكلامي، فكملت:
وعد: «إيه اللي خلاك تستنى السنين دي كلها، وما تبنيش حياة زوجية؟».
بص لي وقال بكل بساطة:
مجد: «كنت مستنيكي».
ضحكت وقلت له:
وعد: «يا سلام! يعني إنت كنت عارف إنك هتقابلني؟».
مجد: «وعد، ممكن ما نفكرش في موضوع الوقت ده دلوقتي؟ بس على الأقل إنتِ علمتيني إني أعيش اللحظة. خلينا مع بعض دلوقتي، في قعدتنا وسهرتنا».
ابتسمت وقلت له:
وعد: «تمام، يلا نقعد معاهم».
وفعلًا خرجنا وقعدنا مع بعض، ودي كانت أول مرة نسهر ونطول في سهرتنا بالشكل ده.
كنا دايمًا بنقعد نلعب ونهزر، ونلعب كوتشينة، ونعمل فشار، ونأكل لب وسوداني، ونتفرج على فيلم؛ ممكن يكون أكشن، أو رومانسي، أو درامي.
المهم إننا كنا بنقضي وقتنا مع بعض، وكل واحد فينا بيشارك التاني لحظات بسيطة بتخلّي البيت مليان ضحك وحياة.
وأنا كنت دايمًا بقعد جنب حازم، وأسند راسي على كتفه علشان لو نمت ولا حاجة. كنت بحس إني عايزة أنام وأنا مطمنة إن في حد جنبي، ماما أو حازم.
حضن ماما بالنسبة لي كان حاجة تانية خالص، لكن وقت النوم، لو كنت قاعدة بتفرج على التليفزيون أو بعمل أي حاجة، ما كنتش بنام إلا على كتف حازم.
في اليوم ده طولنا في سهرتنا زي عادتنا، ضحك وهزار وكلام كتير. مش بس كده، أنا وياسين كنا في أوقات كتير بنقف في البلكونة ونتكلم مع بعض، لكن المرة دي ياسين غمز لي وقال:
ياسين: «وعد، أنا مش قادر أقف في البلكونة دلوقتي. اقفي إنتِ ومجد براحتكم».
بصيت له وفهمت هو يقصد إيه، فقلت له وأنا بضحك:
وعد: «طبعًا! ما هو دلوقتي ابنك. وإنت ما عاوزه يقرب مني على قد ما تقدر! إنت طلعت خبيث يا ياسين، مش فتان وبس!».
كلهم بصوا لي وضحكوا، وماما ردت عليَّ وقالت:
ماما: «وعد! ينفع تقولي كده، إنتِ لسانك ده أنا اللي هقصهولك!».
بصيت لها وقلت:
وعد: «يعني إنتِ مش شايفة هو بيعمل إيه؟».
بصت لي وضحكت، ومجد بص لي، ومد إيده ومسك إيدي، ودخلنا فعلًا البلكونة.
في الأول كان واقف ساكت، وفضل يبص لي كتير. حسيت إني مكسوفة ومحرجة. هو كان بيبص لي قبل كده، لكن كنت بهرب من نظراته، وما كانش بيستمر في النظره بالطريقة دي. إنما المرة دي كان الموضوع مختلف شوية.
وقفت أنا ومجد في البلكونة، وحطيت إيدي على سور البلكونة، فحط إيده على إيدي.
بصيت له وسكت، وحسيت إنه عايز يزيل كل الفوارق اللي بيني وبينه، وإنه عايزني أكون مرتاحة معاه من غير ما أحس بأي حواجز.
بدأت أتكلم معاه وقلت له:
وعد: «احكي لي بقى، إنت حكايتك إيه بالضبط؟ إزاي بقيت دكتور، وليك المكانة والمركز ده في المستشفى الجامعي؟».
ضحكت وكملت:
وعد: «بس تعرف؟ أنا حاسة إن هيبقى ليك شأن عظيم جدًا في المستشفى، وأكتر من كده كمان. لكن أنا بصراحة مستغربة؛ المفروض إنك لسه في بداية حياتك، إزاي بنيت اسم ومكانة بالطريقة دي؟».
بص لي وبدأ يتكلم:
مجد: «أنا بدأت مشواري بدري قوي».
كنت ببص له باستغراب، ومش فاهمة يعني إيه بدأ مشواره بدري.
فكمل كلامه وقال:
مجد: «الدراسة النظري اللي إنتِ درستيها في أولى وتانية وتالتة، دي بالنسبة لي كانت معلومات قديمة. أنا جهزت نفسي لكلية طب من أيام ثانوي، وكنت بذاكر مناهج أولى وتانية وتالتة، مناهج الطب نفسها، وبدأت أدخل عمليات من سنة رابعة».
بصيت له باستغراب شديد وقلت:
وعد: «تدخل عمليات من سنة رابعة؟! هو مين اللي ساعدك في كل ده؟».
مجد: «دكتورة جيهان».
وقفت وأنا مستغربة وقلت:
وعد: «إيه؟ دكتورة جيهان؟».
مجد: «أيوه. أنا كنت طالب متميز ومجتهد وشاطر، وبنيت نفسي بدري قوي. وهي دايمًا بتقف جنب الإنسان المجتهد».
وعد: «بس مش غريبة إنك تدخل عمليات وإنت لسه في رابعة؟».
سكت شوية، وبعدها بصيت له وسألته:
وعد: «يعني أنا كمان ممكن أدخل عمليات؟».
بص لي وقال:
مجد: «إيه المشكلة؟ أهم حاجة يكون عندك أساس نظري كويس جدًا، وتدخلي العمليات وتتابعي الشغل العملي مع الدكاترة.
وإنتِ ما شاء الله عليكِ بتجيدي الكشف والكلام مع المريض كويس جدًا. نقطة إنك تدخلي عمليات دي محتاجة قلب جامد، ومع التدريب هتلاقي نفسك مرة في التانية بتتعلمي أكتر، وهتلاقي الموضوع بقى أسهل بالنسبة لك، لحد ما تقدري تقومي بالجراحة بنفسك».
بصيت له وقلت:
وعد: «بس أنا حاسة إن الموضوع صعب».
مجد: «مش موضوع صعب ولا حاجة».
فضلت باصة له شوية، وبعدها قلت:
وعد: «مجد، ممكن أسألك سؤال؟».
مجد: «اتفضلي».
وعد: «طب أنا دايمًا حساك مهموم وحزين كده ليه؟».
بص لي وسكت، وسرح شوية، وبعدها قال:
مجد: «مش إحنا اتفقنا نخلينا في اللحظات اللي إحنا فيها؟ بصراحة، أنا عايز أسرق اللحظة الحلوة اللي إحنا عايشينها مع بعض».
بصيت له وضحكت، وقلت:
وعد: «إنت فاكر أول مرة شفتك فيها؟ إنت ساعتها كنت منفعل جدًا. وقتها سألتك إذا كنت خاطب أو متجوز، وسألتك عن عيلتك أو إذا كانت عندك مشكلة في شغلك.
حسيت إني بضغط على جرح عندك، ومن وقتها وأنا مش عارفة إيه مشكلتك بالضبط. هي فعلًا مشكلتك مع أمك؟».
بص لي وسكت شوية، وبعدها قال:
مجد: «وعد، هقولك على حاجة».
حطيت إيدي على خدي وقلت له:
وعد: «أنا سامعاك».
مجد: «خلال الأيام الجاية هاجي أعيش جنبكم، في شقة ياسين هنا».
بصيت له وضحكت وقلت:
وعد: «بجد؟».
مجد: «آه والله».
سكت لحظة، وبعدها كمل:
مجد: «ماما مش هتكون لوحدها. هي خلاص رسمت لنفسها طريق تاني، وأنا صعب أكون موجود معاها بالشكل ده».
بصيت له باستغراب وقلت:
وعد: «يعني إنت هتسيبها لوحدها؟».
مجد: «لأ، ما هي مش هتكون لوحدها، هي هتتجوز».
بصيت له وقلت:
وعد: «هي هتتجوز؟!».
سكت لحظة، وبعدها افتكرت ياسين، وقلت له:
وعد: «عشان كده ياسين تعب؟».
مجد: «أنا مش رافض إنها تتجوز، أنا رافض الشخص نفسه اللي هي هتتجوزه».
بصيت له، وحسيت إن الموضوع أكبر من مجرد خلاف عادي، وإن فيه حاجة مضايقاه ومأثرة عليه وعلى ياسين كمان.
لكن بدل ما أضغط عليه بأسئلة أكتر، قلت له:
وعد: «بقولك إيه، سيبك من الهموم دي كلها، وخلينا فعلًا في اللحظات اللي إحنا فيها».
بص لي وقال:
مجد: «أقولك على حاجة؟».
بصيت له وأنا مبتسمة، فبدأ يتكلم:
مجد: «إنتِ متسرعة أوي على فكرة، وبتوقعي نفسك في مشاكل كتير. بس تعرفي؟ ده بيحلي روحك أوي يا وعد».
ضحكت وقلت له:
وعد: «آه، ما أنا عارفة».
بص لي وضحك وقال:
مجد: «ومتواضعة أوي كمان».
بصيت له وأنا بعمل نفسي متضايقة، وقلت:
وعد: «إنت بتتريق عليَّ؟».
ضحك أكتر، وقرب مني وقال:
مجد: «طريقتك في الكلام دي بتجنني بصراحة».
بصيت له وقلت:
وعد: «أنا ممكن أعرف الفترة اللي فاتت دي كلها إزاي كنت بتفكر فيَّ؟».
سرح شوية، وبعدها بدأ يحكي لي:
مجد: «عارفة، من أول يوم شفتك فيه وإنتِ غيرتي نهج حياتي كله. أنا أصلًا مش طبعي إني أكون زعلان أو غضبان أو عصبي بالشكل ده، لكن يمكن في الفترة الأخيرة كنت بضغط على نفسي كتير، لدرجة إني بقيت حاسس إني مش عايش لنفسي أصلًا».
سكت لحظة، وبعدها كمل:
مجد: «صدقيني، من وقت ما شوفتك حسيت إن بقى عندي هدف تاني.
أنا يمكن في فترة من الفترات ما كنتش بفكر في نفسي خالص، كنت بفكر في راحة أمي وراحة اللي حواليا بس، لكن من جوايا كنت بتعذب. كان نفسي أعيش لنفسي، وأحس إن جوايا أمل جديد».
بص لي وكمل:
مجد: «ومن ساعة ما شوفتك يا وعد، إنتِ اديتيني الأمل ده. بكلامك وبطبيعتك المرحة. أوقات كتير كنت بشوفك مع أصحابك في الطرقة، سواء في المستشفى أو في العنابر، وإنتِ بتضحكي ومش حاطة في دماغك أي حاجة، كنت بحس إني مبسوط قوي. كل مرة كنت بشوفك فيها، كنت بحس إنك بتديني أمل جديد».
فضل ساكت لحظة، وبعدها قال:
مجد: «وأوقات كنت بحس إنك بتهربي مني، يمكن علشان الموقف اللي حصل بيني وبينك وقتها.
بس صدقيني، إنتِ خطفتي قلبي من أول مرة، وخطفتي عقلي كمان. أنا ما كنتش مصدق إن طالبة في سنك ممكن تتجرأ وتعمل اللي إنتِ عملتيه ده. في الأول كنت مستغرب جدًا، وبعدها فكرت في كلامك وقتها، ومع الوقت بقيت آخد بالي من طريقة كلامك وتصرفاتك وردود أفعالك، وحسيت قد إيه روحك جميلة».
كنت بسمعه وأنا مبسوطة جدًا، مش لمجرد إنه بيشكر فيَّ، لكن لأني كنت حاسة إن اللي بيني وبينه مش مجرد كلام وخلاص. كانت لحظات بتتبني جوانا، وذكريات بتتكون، وارتياح بيكبر مع كل كلمة بنقولها لبعض.
بصيت له وقلت:
وعد: «تعرف يا مجد؟ أنا نفسي في اللحظة دي من فترة كبيرة. كان نفسي أقعد معاك وأسمعك. كنت حاسة إن جواك حاجات كتير أوي، وكان نفسي أسمعك بصراحة».
ضحكت، وبعدها قلت له وأنا بشاور على كرسي البلكونة:
وعد: «كنت عايزاك تقعد على الكرسي كده وتحكي لي، أو ترقد على سرير الكشف وتسترخي وتحكي لي كل حاجة».
بص لي وقال:
مجد: «بس إنتِ كده تنفعي دكتورة نفسية أكتر».
بصيت له وسكت لحظة، وبعدها قلت له:
وعد: «المهم، كمّل بقى واحكي لي كل حاجة».
حط إيده على خده، وسند على سور البلكونة، وقال:
مجد: «أوعدك إن ده هيحصل».
بصيت له باستغراب وقلت:
وعد: «يعني إيه؟».
مجد: «يعني بعد كده هسيبلك نفسي، وأحكي لك كل اللي إنتِ عايزة تعرفيه، وكل اللي جوايا».
بص لي وابتسم، وبعدها كمل:
مجد: «هو مش إحنا المفروض زملاء دلوقتي، وإنتِ بتساعديني في عيادتي في المستشفى؟ طبعًا لو وقتك يسمح، أنا هستأذنك تكشفي عليَّ أنا كمان».
ضحكت وقلت له:
وعد: «على فكرة، إنت كمان محلل نفسي ممتاز».
سكت لحظة، وبعدها كملت:
وعد: «بس أنا مش عايزة أطلع دكتورة نفسية، أنا بحب القلب أكتر، وعايزة أفهم وأدرس كل تفاصيله».
بص لي وسألني:
مجد: اشمعني قسم القلب هو اللي عايزة تدرسيه؟».
سكت شوية، وبعدها بدأت أحكي له:
وعد: «من بعد وفاة بابا الله يرحمه، ماما تعبت بقلبها. كانت متعلقة بيه جدًا، ومن وأنا صغيرة كنت بفكر إني لما أكبر هبقى دكتورة وأعالجها».
ابتسمت وأنا بكمل كلامي:
وعد: «كنت فاكرة إن ماما هتفضل تعبانة كده لحد ما أكبر وأبقى دكتورة، لكن الحمد لله رب العالمين، هي كانت قوية وشديدة، وقدرت تقوم وتعدي حاجات كتير جدًا، والحمد لله بقت كويسة».
افتكرت كلامي القديم مع ماما، وقلت له:
وعد: «كنت دايمًا أقول لنفسي: هي ماما هتفضل تعبانة كده يا وعد لحد ما تبقي دكتورة؟ وكنت أقول لها: لأ يا أمي، إنتِ هتكوني كويسة، علشان روحك حلوة، وبتضحكي وبتهزري. إنتِ ما حسستينيش بفقدان بابا، وعشان كده كنت دايمًا حاسة إنك هتكوني كويسة».
بصيت لمجد وقلت له:
وعد: «تعرف إن من أسباب شخصيتي دي ماما؟ عمري ما حسيت إني مفتقدة بابا، لأنها كانت الأم والأب. وحازم كمان ما كانش مجرد أخ ليا، ده كان أخ وصديق وأب».
خدت نفس وكملت:
وعد: «كنت دايمًا حاسة إنه مهموم وعايز يوفر لي كل حاجة. كان عايش دور الأب أكتر من دور الأخ، ويمكن كان شاغل نفسه طول الوقت إنه يوفر لي كل اللي محتاجاه، مع إنه أكبر مني بتلات سنين بس. لكن أنا كنت حاسة إنه أكبر مني بتلاتاشر سنة».
ابتسمت وأنا بفتكر تعبه معايا، وقلت:
وعد: «كان بيشتغل الليل قبل النهار علشان يوفر لي مصاريف كليتي وكتبي. وكنت دايمًا حاسة إنه دعمي وسندي. كان بيقول لي: بكرة هشوفك أجمل دكتورة، ودكتورة متميزة كمان، بس أهم حاجة إنك تريحي اللي حواليك بكلامك وقلبك، حتى لو كانوا مرضى».
بصيت لمجد وكملت:
وعد: «أنا كنت بحس إن ماما وحازم بيدوني دفعة كبيرة جدًا في حياتي. هما دول عيلتي الكبيرة، وصدقني عمري ما حسيت إن إحنا قليلين في العدد. بالعكس، مشاعرنا واحتواؤنا لبعض كانوا أكبر بكتير من قلة عددنا».
كان مجد بيبص لي وبيبتسم، ولما خدت بالي من نظراته حسيت إني اتكسفت شوية، فلفيت وشي بسرعة وقلت له:
وعد: «على فكرة، أنا ما بحبش حد يبص لي كده».
قرب مني وقال:
مجد: «وعد، ممكن أطلب منك حاجة؟».
وعد: «لو هقدر أعملها، تمام، لكن لو ما قدرتش، أنا مش هقدر أوعدك».
مجد: «لأ، هتقدري».
وعد: «طيب، عايز إيه؟».
بص لي وقال:
مجد: «عايزك تتعاملي معايا طبيعي في المستشفى وفي كل مكان. أنا مش عايز أخبي حبي ليكي مهما كان».
بصيت له وقلت بسرعة:
وعد: «لأ، لأ، لأ! اسمعني وافهمني كويس. أنا مش هقدر أبين ده دلوقتي خالص، وخصوصًا قدام زميلاتي في المستشفى».
بص لي باستغراب وسألني:
مجد: «ليه يا وعد؟».
وعد: «أنا مش عايزة أذيك، وبعدين أنا بخاف من كلام أي حد لما يشوفنا قريبين من بعض بالشكل ده. هيقولوا إيه؟».
مجد: «ما تبصيش لكلام حد. أنا بقولك إني عايز الناس كلها تعرف علاقتي بيكي. وبعدين يا وعد، إيه المشكلة؟ إحنا نتجوز وخلال سنة أو اتنين، هنسافر ألمانيا».
بصيت له وقلت بحزم:
وعد: «لأ، أنا مش هقدر أوعدك بالكلام ده. صدقني، أنا مش هقدر أفكر في الجواز قبل ما أخلص دراستي أنا كمان»
وقبل كل ده كنت بفكر في حازم مش عاوزه اضغطه أكتر من حيث الماديات....
كنا عاوزين نفرح بيه هو ورغد الاول....
واللي هيكون معاه يا دوب يبدأ بيه حياته مع رغد في تجهيز شقتهم....
فضل مجد باصص لي، وأنا كنت متمسكة بكلامي. أنا فعلًا بحبه، لكن الحب بالنسبة لي مش معناه إني أستعجل خطوة كبيرة زي الجواز، أو أتنازل عن حلم تعبت علشانه سنين....
كنت عايزة أكمّل دراستي وأحقق هدفي، وفي نفس الوقت أدي علاقتنا فرصتها الطبيعية إنها تكبر وتثبت نفسها.
أما مجد، فكان واضح إنه بدأ يرسم لحياتنا طريق كامل، من الجواز للسفر لألمانيا، لكن أنا لسه بحاول أستوعب إن الشخص اللي كان يومًا مجرد دكتور قابلته في المستشفى، بقى دلوقتي بيكلمني عن مستقبلنا مع بعض.
ويمكن دي كانت أول مرة أحس فيها إن الحب مش بس مشاعر جميلة بنعيشها، لكنه كمان قرارات محتاجة وقت، وتفاهم، وقدرة من الطرفين إنهم يسمعوا بعض ويحترموا أحلام بعض.
