رواية ديون النبض الفصل الثالث عشر 13 بقلم مروه صياح


 رواية ديون النبض الفصل الثالث عشر 



كملنا كلامنا أنا ومجد، وكان لسه عنده أمل إني أغيّر رأيي في موضوع الجواز، لكنه كان خايف من الوقت اللي ممكن نستناه لحد ما نكون مع بعض في بيت واحد.

مجد: أنا خايف يا وعد، خايف كمان شوية وإحنا بنتكلم في سنتين تلاتة، تقوليلي استنى لما أخلص ماجستير ودكتوراه، ونلاقي نفسنا بنتكلم في عشر سنين!

بصيت له وقلت له بهدوء:

وعد: مجد، ممكن نخلينا واقعيين شوية؟ هي شقة يعني إيه؟ يعني تجهيزات، والتجهيزات دي معناها إن إحنا الاتنين نتشارك في حياتنا اللي عايزين نبنيها. ما ينفعش الحياة دي تتبني على واحد بس، وما ينفعش شريك واحد يقدم كل حاجة والتاني لأ.

مجد: بس شرعيًا الزوج هو اللي بيكون عليه كل حاجة.

وعد: برضه العادات والتقاليد والعرف بينساقوا تحت الشرع بردوا...

مجد: مفيش الكلام ده يا وعد، الكلام ده للأسف الناس اتعودت عليه.

وعد: برضه أنا مش قادرة أخد خطوة زي دي دلوقتي وأضغط على ماما وحازم بالطريقة دي.

بصلي مجد، وحسيت إنه بدأ ييأس من محاولاته معايا، لكنه سكت لحظة، وبعدها بصلي وقال:

مجد: طب توعديني بحاجة يا وعد؟

وعد: إيه هي؟

مجد: بصي يا وعد، أنا شخص زيي المفروض يكون بدأ حياته، وحدد أهدافه وعرف مستقبله. كان ممكن أكون اتجوزت من سنتين تلاتة فاتوا.

سكت شوية، وكأنه كان عايز يقول حاجة تانية، لكنه رجع كمل كلامه.

مجد: بس بصراحة، ما لقيتش الإنسانة اللي تريحني وقتها. بالرغم من إن أمي كانت بتتضايق كتير من رفضي للجواز، لكن أنا كنت حاسس إني مرتاح كده وقتها.

لكن لما شوفتك، حسيت إن حاجات كتير جدًا اتغيرت. حسيت إني عايز أبدأ سنين عمري معاكي، وإن حياتي الزوجية اللي هبدأها تكون معاكي إنتِ، مش مع أي حد تاني.

بصلي مجد وكمل كلامه بجدية:

مجد: بصراحة، أنا مش عايز أضيع لحظة واحدة. عايز أستغل كل دقيقة وكل سنة وإنتِ معايا. مش عايز أكبر في سني من غير ما تكون عندي حياة مستقرة، وأكون أسرة، ويكون عندي زوجة وبيت وأولاد. أنا عايز أبدأ حياتي دي معاكي إنتِ يا وعد.

سكت لحظة، وبعدين قال:

مجد: وعد، أنا عايز أبدأ حياتي معاكي إنتِ.

بصيت له وأنا محرجة جدًا من كلامه، وفي نفس الوقت مش عارفة أرد عليه بإيه. مشاعري كانت ملخبطة، وكل اللي قدرت أقوله إني أحاول أهرب من الكلام ده.

وعد: مجد، إحنا وقفنا كتير هنا. ممكن ندخل نقعد معاهم؟

بصلي وضحك، وقال:

مجد: تعرفي إن شكلك جميل أوي وإنتِ بتتهربي من الكلام؟

بصيت له وضحكت، لكنه مسك إيدي، وبعدها قرب مني وسند راسه على راسي.

مجد: ممكن تبصي في عيني؟

بعدت عنه بسرعة، وقلت له:

وعد: لأ، إحنا ما فيناش من كده!

بصلي وضحك، وقال:

مجد: هو إنتِ دايمًا كده؟ بتهربي من كل حاجة؟ اطمني يا وعد.

وعد: طب يلا نقعد معاهم بره.

وفعلًا خرجنا وقعدنا معاهم. كان حازم وياسين بيلعبوا بالكوتشينة، فقعدت في النص بينهم.

حازم بصلي وقال:

حازم: هو إنتِ لازم كل مرة تقعدي في النص كده؟

بصيت له بكل ثقة وقلت:

وعد: أيوه!

كان مجد بيبصلي وبيضحك على تصرفاتي الطفولية، فقلت لهم بحماس:

وعد: بقولكوا إيه، إيه رأيكوا نلعب لعبة كلنا نتجمع فيها مع بعض؟ لعبة تجمعنا إحنا الستة!

حازم وياسين: هنلعب إيه؟

وعد: إيه رأيكوا في لعبة الشايب؟ واللي ييجي عليه الشايب يكون عليه حكم.

بصلي مجد وقال:

مجد: ويا ترى إيه الحكم ده؟

وعد: مش عارفة لسه، بس أكيد كلنا هنتفق على حكم كويس.

بصوا لي وضحكوا، وبعدها بدأنا نوزع الورق ونلعب الشايب.

قلت لهم وأنا بوزع الورق:

وعد: بصوا بقى، اللي هيمسك ورقة الشايب هو اللي هيقوم يرتب المكان بعد ما نخلص قعدتنا.

حازم بصلي وقال:

حازم: ما بلاش إنتِ يا وعد، كل مرة الشايب بيلزق فيكي!

ضحكت وقلت لهم:

وعد: ما يمكن المرة دي يمسك في مجد! وكلنا ندخل ننام ونسيبه هو يرتب المكان لوحده.

مجد بصلي وضحك، وقال:

مجد: أنا ما عنديش مشكلة، بس بشرط تكوني معايا.

بصيت له بغيظ وقلت:

وعد: نعم؟ هو إنت هتخليني أقوم بدورك من دلوقتي؟

ياسين بصلي وضحك، وبعدها قال:

ياسين: وعد، عايز أقولك على حاجة. مجد متعاون جدًا.

بصيت له باستغراب وقلت:

وعد: إذا كان مجد نفسه ما كانش عايش معاك، تعرف منين بقى إنه متعاون؟

ياسين سكت لحظة، وبعدها رد عليا:

ياسين: اللي ربّى خير من اللي اشترى يا وعد.

ابتسمت، وبعدها بصيت له وقلت:

وعد: تعرف يا ياسين؟ موضوع الفقد ده حاجة صعبة أوي. لما بتفقد شخص عزيز عليك وإنت عارف إنك مش هتشوفه تاني، بتحس إن الأمل اللي جواك اتقطع.

أسوأ حاجة في الفقد إنك تشتاق لشخص، ونفسك تشوفه قدامك مرة تانية، ونفسك تكون معاه وتقرب منه وتعيش معاه، لكن ما تقدرش تجتمع بيه ولا تلتقي معاه.

سكت شوية، وكملت كلامي:

وعد: أنا كنت بتضايق جدًا لما أفتكر بابا، إني ما شفتوش وما اتعودتش عليه. لكن لما ببص حواليا وبلاقي ماما وحازم وكلكم حواليا، بحمد ربنا على النعمة اللي أنا فيها.

بصيت لهم كلهم، وبعدها رجعت بصيت لياسين.

وعد: وأوقات كتير كنت بتضايق علشانك جدًا يا ياسين، لما كنت بشوفك زعلان ومتضايق علشان ابنك بعيد عنك، ومش قادر تقعد معاه زي ما إنت عايز.

ابتسمت له وقلت:

وعد: هقولك على حاجة بقى يا ياسين، مجد بيقول إنه هيعيش معاك خلاص.

مجد بصلي وقال:

مجد: الحمد لله...

وبعدها ابتسم وقال:

مجد: الحمد لله. الأيام اللي فاتت دي كانت مأثرة عليا جدًا، وكانت شاغلاني عن رغد وبابا، بس غصب عني، أعمل إيه؟

بصيت لياسين وقلت له:

وعد: ياسين، هو إنت السبب؟

ياسين بصلي وقال:

ياسين: ما كانش ينفع يا وعد أقوله يسيب أمه وييجي يقعد معايا، وخصوصًا إنها هتكون لوحدها بعد وفاة والدها، الله يرحمه.

مجد دخل في الكلام وقال:

مجد: بابا كان دايمًا بيضغط عليا، ويقولي ما ينفعش تسيب أمك لوحدها. بس أنا كنت بتضايق جدًا. أنا كنت مشغول في شغلي وهي كمان مشغولة، وتقريبًا ما بنشوفش بعض. ممكن نتقابل آخر اليوم بالعافية، تكون هي على آخرها وأنا كمان أكون جبت آخري.

سكت مجد، وكأنه كان عنده كلام كتير نفسه يقوله، لكنه ما كملش.

بصيت لياسين وقلت له:

وعد: خلاص، الحمد لله إن مجد هييجي يعيش معاك، وهي هتبقى براحتها، وهي كمان هتتجوز. تعرف إني فكرت في لحظة من اللحظات إنكوا ممكن ترجعوا لبعض؟

ياسين بصلي وقال:

ياسين: الكلام ده كان زمان أوي يا وعد، لكن دلوقتي صعب جدًا.

وعد: ليه صعب؟

ياسين: خلاص، الزمن بيغير النفوس. هي زمان كانت بالنسبة لي حاجة، ودلوقتي بقت حاجة تانية. هي دلوقتي أم ابني وبس.

بصيت له وضحكت، وبعدها قربت منه وهمست في ودنه:

وعد: ياسين، كنت وعدتك إني هقولك على حاجة، بس مش هقولها لك دلوقتي.

بصلي باستغراب وقال:

ياسين: إنتِ عايزة تقولي إيه بالظبط يا وعد؟

ضحكت وقلت:

وعد: مش وقته يا ياسين، مش وقته. هبقى أكلمك بعدين.

ضحك وقال:

ياسين: أنا نفسي أفهم دماغك فيها إيه!

حازم بص لنا وقال:

حازم: يا بابا ياسين، بعد إذنك، ما تركزش مع وعد. وعد هتجننك، وفي الآخر مش هترسيك على بر!

في اللحظة دي، كلهم بصوا لنا وضحكوا، وأنا ضحكت معاهم من قلبي.

في البداية كانت رغد وحازم هما اللي بيحلّوا قعدتنا، واللمسات الهادية بينهم كانت بتخلينا نحس قد إيه هما قريبين من بعض. لكن النهارده حسيت إن أنا ومجد بقينا فريق إحنا كمان، وإن فيه حاجة بدأت تتكون بينا.

نظراتنا لبعض، وابتساماتنا اللي كانت واضحة قدام الجميع، كل ده خلاني أحس إن حياتي في اليوم ده مختلفة عن كل الأيام اللي فاتت.

بالرغم من إني كنت سعيدة جدًا مع أسرتي الكبيرة، لكن النهارده كنت بعيش مشاعر عمري ما حسيتها قبل كده، وتفاصيل كتير ما عشتهاش قبل كده. كان قلبي حاسس بحاجات جديدة عليا، ومش عارفة أفسرها كلها.

فضلنا قاعدين مع بعض فترة طويلة، والوقت عدى من غير ما نحس بيه.

يا خبر أبيض! دي أول مرة نتأخر كده!

خلصنا لعب، وقمنا نتحرك مع بعض، ومن كتر الضحك والهزار نسينا لعبة الشايب والحكم اللي اتفقنا عليه. وفي الآخر كلنا ساعدنا بعض ورتبنا المكان.

لكن أنا ما قدرتش أكمل، لأني كنت نعسانة جدًا، خصوصًا إني متعودة أصحى بدري.

حطيت دماغي على كتف حازم وغمضت عيني.

مجد بصلي وأنا خلاص رحت في النوم، وياسين قال له:

ياسين: هي وعد دايمًا كده. ده كويس إنها سهرت أوي النهارده، لأنها تقريبًا كانت بتنام قبل ما نخلص قعدتنا مع بعض. حازم متعود يشيلها زي الأطفال ويدخل ينامها على سريرها.

مجد فضل باصص لي فترة طويلة، وأنا حاطة دماغي على كتف حازم، ولفيت دراعي حوالين كتفه واستغرقت في النوم.

حازم قام وشالني، ودخل بيا الشقة، ونامني على سريري.

فضلت نايمة لحد تاني يوم الصبح، واتأخرت في النوم أكتر من المعتاد.

ماما ورغد كانوا قاموا من بدري وحضروا الفطار، وحازم ومجد وياسين كانوا صحيوا، وأنا الوحيدة اللي لسه نايمة.

لما صحيت، حسيت إن اليوم ده مختلف.

قمت من سريري وفتحت الشباك، وشديت الستارة، وبصيت للشمس وأنا حاطة إيدي على خدي.

وعد: يا شمس يا شموسة، إنتِ النهارده مختلفة أوي! أنا شايفة فيكي حاجة غريبة. حاسة إن فيه شمس جديدة دخلت حياتي، بس يا ترى الشمس دي هتفضل تشرق في حياتي دايمًا؟

كنت لسه واقفة ببص من الشباك لما حازم فتح باب الأوضة، وبصلي وقال:

حازم: وعد يا كسولة، لسه صاحية من النوم؟

بصيت له بالطريقة المعتادة بتاعتي لما حد يصحيني، وقلت:

وعد: هو ليه محدش صحاني؟

قرب مني وطبع قبلة على راسي، وقال:

حازم: قلت أسيبك نايمة براحتك.

بصيت له وابتسمت، وقلت:

وعد: حازم، أنا بحبك أوي.

ابتسم وقال:

حازم: وأنا كمان. يلا علشان نفطر.

بصيت له باستغراب وقلت:

وعد: إيه ده؟ هو إنتوا كلكم صحيتم؟

حازم: من بدري، وكمان ماما ورغد حضروا الفطار. حتى مجد وياسين موجودين بره.

بصيت له بسرعة وقلت:

وعد: إيه ده؟ هو مجد بره؟

ضحك وقال:

حازم: أيوه يا ستي، مجد وياسين بره. يلا علشان نفطر كلنا قبل ما نروح لصلاة الجمعة.

وعد: خلاص، أنا هجهز نفسي وأخرج لكم بسرعة.

دخلت الحمام، وغسلت أسناني، وسرحت شعري، وغيرت هدومي، وبعدها خرجت.

لقيتهم كلهم مستنييني، وأول ما بصيت على مجد لقيته بيبصلي وبيبتسم.

مجد: صح النوم يا وعد؟ إحنا كلنا صحيين من بدري يا دكتورة وعد! هتفطري على الجاهز ولا إيه؟

بصيت له وقلت:

وعد: يعني إيه الكلام ده؟

مجد: يعني ماما ورغد هما اللي حضروا الفطار، أكيد كده الشاي عليكي.

بصيت له وأنا عاملة نفسي متضايقة، وقلت:

وعد: مش الشاي بس، أنا كده عليا المطبخ كله!

قرب مني مجد، وهمس في ودني وهو بيضحك:

مجد: هدخل أساعدك فيه.

بصيت له وضحكت وقلت:

وعد: بجد؟

مجد: أيوه.

بصيت لماما وقلت لها:

وعد: يا ترى يا ماما، هتغدينا إيه النهارده؟

ماما بصت لي وقالت:

ماما: طب ممكن نفطر الأول؟ إنتِ أخرتينا أوي النهارده على الفطار. بعد كده نبقى نفكر في الغدا.

وعد: ويا ترى بقى هنقف كلنا في المطبخ ونجهزه زي كل مرة، ولا دكتور مجد المرة دي هيفصل بينا؟

مجد بصلي وقال:

مجد: ومن قال كده؟ بالعكس، أنا بقالي كتير ما وقفتش في المطبخ مع بابا ورغد. أنا نفسي أحس الإحساس ده زي زمان. تقريبًا بقالي سنتين تلاتة ما عملتش كده.

بصيت له باستغراب، لكن ما علقتش وكأنه بيقولي أنه كان محروم من لحظات كتيره تجمعه مع ياسين ورغد....

، وبعدها اتجمعنا كلنا على السفرة وبدأنا نفطر.

خلصنا فطارنا وإحنا بنضحك ونهزر، وبعدها دخلت أنا ومجد المطبخ علشان نجهز المشروبات.

ياسين كان عايز قهوة، وحازم كان عايز شاي مظبوط، وأنا كمان بحب أشرب الشاي المظبوط زي حازم، أما ماما ورغد فكانوا عايزين ينسون.

بصيت لمجد وقلت له:

وعد: ويا ترى إنت بتحب تشرب إيه؟

مجد: أنا غالبًا مش بحب أشرب حاجة.

بصيت له وقلت:

وعد: خلاص، هتشرب شاي زيي. وبعدين أنا عايزاك من هنا ورايح ما تعترضش على أي حاجة أنا عايزاها، ماشي؟

قرب مني وقال:

مجد: يا دكتورة وعد، أنا عايزك تخففي من المنبهات دي.

وعد: على فكرة، هي كوباية شاي واحدة بس اللي بشربها. وبعدين إنت شكلك زي بابا بالظبط!

مجد: بصراحة، بابا معاه حق. كوباية قهوة كفاية أوي في اليوم علشان الواحد يركز.

وعد: بصراحة، ياسين معاه حق. هو ينفع اليوم يعدي من غير كوباية شاي؟ دي اللي بتظبط الدماغ وبتظبط الدنيا معايا!

بصلي مجد وكأنه افتكر حاجة فجأة، وقال:

مجد: وبعدين فين كوباية اللبن ومعلقة العسل الأبيض اللي إنتِ قلتي عليها؟

ضحكت وقلت له:

وعد: مجد، بعد إذنك، أقولك على حاجة؟ بس ما تضغطش عليا.

بصلي باهتمام وقال:

مجد: قولي.

وعد: أنا أصلًا ما بحبش اللبن، وكمان البيض مش باكله.

بصلي وفضل يضحك، وقال:

مجد: والله؟ يعني إنتِ بتنصحي الناس وبتنصحي المرضى بتوعك بالكلام ده، وإنتِ ما بتعمليهوش؟

بصيت له واتكلمت بطريقتي الطفولية المعتادة، وقلت:

وعد: والله غصب عني! أنا حاولت كتير، بس ما قدرتش فعلًا. ماما بتدخلي اللبن في الكيك والمهلبية والرز بلبن، والبيض كمان بتدخلهولي في بعض الأكلات علشان أستفيد منهم، لكن ما بعرفش آكل الحاجات دي لوحدها.

بصلي وقال:

مجد: طب وعشان خاطري يا وعد؟ الأكل ده مفيد جدًا.

وعد: بص، ما تحاولش! إحنا علاقتنا مع بعض حاجة، وإن إنت تجبرني على موضوع أكل وشرب دي حاجة تانية خالص.

ضحك مجد وقال:

مجد: بصي، على العموم أنا مش هقدر أجبرك على حاجة دلوقتي، لكن إن شاء الله لما تكوني في بيتي، هتكون فيه حاجات كتير هتكوني مجبرة عليها!

أول ما سمعت كلامه، مسكته من ياقته وقلت له بلهجة كلها تحدي:

وعد: اعمل حسابك، أنا محدش بيجبرني على حاجة! خليك حاطط الكلام ده في دماغك كويس جدًا.

وحطيت صباعي على دماغه وأنا بتكلم، فبصلي وهو بيضحك ومش قادر يمسك نفسه من طريقة كلامي.

لكنه فجأة مسك ياقتي هو كمان، وقربني منه وقال:

مجد: إنتِ قد المسكة دي يعني؟

بصيت له بكل ثقة وقلت:

وعد: أيوه، قدها وقدود!

فضل مجد باصص في عيني لفترة، وأنا كمان فضلت باصة له. للحظة حسيت بحاجة غريبة، وسكتنا إحنا الاتنين.

ما عرفتش أقول إيه، ولا قدرت أفضل باصة في عينيه أكتر من كده، فنزلت راسي بسرعة، وأنا حاسة بارتباك مش عارفة أخبيه.
فبعدت عنه بسرعه.... وكأني بهرب من إحساس جميل أول مره أعيشه بجد.....

Ghazal
Ghazal
تعليقات