رواية خلخال مشوه الفصل الرابع عشر بقلم زمرده
خل نكعد الليلة سوه
أحچيلك وتحچيلي
ونتسامر وخلي الگمر
ينزل يجي يغنيلي
وأنت بمكانه تصير وتضويلي
•---∞∞∞∞∞∞∞---•
°ليث°
صعدت بالسياره حتى امشي وياهم صاح بي صخر
_ شني وين ماااشي ،مو متصاوب أنت ؟
_ جا شني أضل هنا ؟
اجه بأيده حجارة يلف الورقة عليها
ضيرم : شني تمشي ويانه ؟
_ كلكم تمشون وانا اضل شني ضلتي هنا ؟
ضيرم : متعافي تضل جا غير متصاوب
_ يمعود يا صواب هذا ،خلوني امشي وياكم ولا تعرضولي
باوعلي عاگد الحاجب ما راضي بس انا غلست عنه وصعدت بالسيارة بصف نوح ،جريت التفگه من ايده
_ جيبها
نوح : جا غير تفگتي
_ شتسوي بيها انا ارمي بالنيابة عنك وأنت باوعلي
نوح : تحجي صدگ
صعد صخر ليگدام وبصفه ضيرم ،شغل السيارة وحركها متوجهين لقرية غازي أل عبود ،و ورانه سيارة حق بيها برهان وعبد الحق وفقار ،طبتنه للقرية صارت سهله لان ما اعرف شعجب هدوء بس وصلنه لبيتهم الچبير التصير بي كل المصايب نزلنه كل واحد شايل تفگته وخلينه الجيلات تنزل عليهم مثل المطر وصوت صياحهم ترس القرية ،وگبل لا
نمشي صاح
صخر : اشمر الحجارة ضيرم
طلعها من جيبة و وي ما شمرها سمعنه صوت كسرة
الجامه يعني وصلتهم جوه وصارت قريبة عليهم ،انداريت حتى امشي للسيارة و وگفت بمكاني من صارت عيني بعينه ،ضحك بايده التفگه
_ اجيتوا والله جابكم ،خطار قريتنه ما تطلعون بلايه ما نضيفكم
اندريت على الولد وراي ورديت اباوع للواگف گبالي نسخة المحبوس عدنه ،مبين اخوه
صخر : اچفه الشر وخلينه نطلع منا لن لو ضلينه بعد دقيقة هنا تصير مو زينة
_ لا والله فلا تطلعون ،افااا وانا حفيد غازي ،بدون ضيافه تعلمنه ما نطلع خطارنه
خزرة وهم يريد يمشيله وانا جريته من ايده اوگفه ما عايزين نكبرها اكثر ،بس ما لحگنه نمشي من طلعولنه من جوه الگاع وكل واحد بيهم بيده توثيه ،وبعد ما منهه رجيه لان مبين انغدرنه وهذا هدوء القرية فعل من افعالهم حتى من نطب ما يخلونه نطلع بعد ..! !
رفعت التفگه وهبدته بيها على راسه خليته ما يندل دربة فلا ينگدر هل بشر هذا وبس شفته گعد دايح ركضت بساع اصعد بالسيارة شغلوا السيارات وبساع صعدوا وانا أخر واحد بس صعدت شغل ضيرم السيارة وطار بيها نطلع من القرية و برهان ورانه وما ينشاف غير بس التراب بدربنه من السيارات
نوح : ليث ايدك تنزف
باوعت على ايدي ولا حاس بيها ،هزيت راسي ودرت اباوع من على الدرب اشوف خاف لحگونه
نوح : ما يلحگونه لا تباوع مابيهم حيل يحركون روحهم
صخر : مبين كبرت وما زغرت وراح يدگون عناد اكثر
ضيرم : طز بيهم شني فد مندله هم
صخر : لاتنسه عزيز يمهم ومبين مثل ما نكرنه ابنهم راح عزيز يمهم
ضيرم : انا اجيبه
صخر : شلون ؟
ضيرم : تذكر البيت المهجور بمنطقة ****
صخر : أي اتذكره ،بس شدخل البيت بسالفتنه ؟
ضيرم : انا مراقب كل خطوه يخطوها وكل بيت ومزرعة بأسمهم انا اندلهن ،وحده وحده اطبلهن ومتاكد عزيز بواحد منهن
صخر : جا ما حجيت گبل لا نجي وندگهم ،شني سالفتك ضيرم شلون تنسى
ضيرم : طار من بالي ،شنسوي هسه ؟
صخر : نرد للبيت نطيعهم علم ونمشي
ضيرم : خوش
كملنه طريقنه للبيت وبس وصلنه تلگانه جدي يسأل شسوينه وعمامي وأبوي يسألون ليش هيج حالنه وشصاير ويانه
صخر : خل نطب جوه ونحجيلكم
°حواري°
گعدت على باية الدرج اباوعلهم ،حالهم حال كلهم تراب وعبد الحق فالينته مشگوكه من الرگبة ،وليث صوابة ينزف
محمد : احجوا شصاير وياكم وهذا حالكم شني ؟
صخر : ناصيبلنه كمين ومبين حتى متحظرين لجيتنه
فقار : طبينه القرية هدوء دگيناهم وردنه نطلع وما نحسلكم الا واحد گدامنه چنه رهيب بس اضخم بعد واگفلنه وبأيده التفگه عبالنه بس هو تالي طلعوا ولد القرية كلهم وياه
رأجس : هذا اخوه غريب
ضيرم : من شوكت اخوه ؟
رأجس : هذا مسكون ما يطلع هواي ولا ينشاف ،مثل الطنطل تلگاه طالع بس بالليل
ضيرم : اگولن ولا شايفة گبل
صخر : انا شفته مرة گبل بس صار هواي فوگ الخمس سنين
گام وگف يحجي وي نوح
ليث : ماشي فوگ الحگني حتى تضمدلي ايدي
نوح : امشي وجاي وراك
گمت بساع من شفته اجه يريد يصعد وخرت على جهه وهو صعد يصيح
ليث : بساعك نوح مو اطول
نوح : جاي وراك والله ،بس امشي اسبح شني تضل هيج كلك دم
مد راسة من المحجر يرد عليه
ليث : جا تعلمني ؟
نوح : لا بس اسبح ومن تخلص صيحني
ليث : خوش
مشيت انا گعدت بصف ميمنة ماخذتلها ركن بعيد عنهم وگاعكه تباوع على ايدها ،بس گعدت بصفها گالت
ميمنة : ايدي موتتني الحرگ شگد يأذي ،وفوگاها احس بروحي متقيده حتى من اريدن اطب للحمام گلبي ينشلع
باوعتلها ورديت باوعت الايدها الملفوفه
_ ما گالولج شوكت تفحتيها ؟
ميمنة : يوميا افتحها يطگها الهوه ومن تنشف احطلها دهن مال حرگ وارد الفها منا لعشرة أيام
_ اووف عشرة ايام شيحملهن
ميمنة : أي والله ،لا تبچيني انا واگفه على الحافه
_ لا يمعوده مو عيب عود چبيرتنه أنت
أبتسمت ودنگت تضم ضحكتها وردت رفعت رأسها من حست احد وگف گبالها ،رفعت راسي اباوع ،صخر واگف گبالنه دنگ يباوعلها وسألها
صخر : شلونها ايدج ؟
وبكل ثبات ردت
ميمنة : الحمدلله زينة
صخر : شربتي دواج
ميمنة : أي شربته
صخر : خوش ،عدج ابرة مسكن بالليل
ميمنة : هسه اگول لبصائر تضربها الي
صخر : جا خوش
رد گعد بمكانه وبصائر اجت گعدت يمنه مبين سامعه كلشي لان من گالتلها
ميمنة : تضربيني الابرة ؟
طلعتلها حجه وعرفت تريد يختلون وحدهم
بصائر : لا أخاف خل صخر ياخذج للمضمده
ميمنة : شني تخافين أول مره قابل
بصائر : مو اخاف لان أنت أختي يعني بله ضربتج الابره ونشليتي
ميمنة : خوفتيني
بصائر : جا الاحسن تمشين للمضمده ،انا اگول لصخر ياخذج
ميمنة : لا شني صخر امشي لحق يجي ياخذني
بصائر : حق صعد فوگ وبرهان خابروه وطلع
ميمنة : ميخالف اتاني حق هو ياخذني احسن
بصائر : خايبة شني جا غير خطيبج
گامت تريد تمشي تصيحه وميمنة تجر بيها بايدها السليمه ،وهو انتبه على خبصتنه ،گام مشى للمطبخ وشوي ورد وگف گبالنه
صخر : أخذج للمضمده مبين بصائر خايفة
خزرت بصائر
ميمنة : لا شني وين خايفة
بصائر : والله يا ابن عمي انا ما اريد اضربها واطيح بخطيتها ومنا ولابرة قوية اخذها للمضمده احسن
صخر : گومي ميمنة و ودلي غاية تمشي ويانه
بصائر : غاية وين تگدر تمشي
صخر : صدگ نسيت ،جا گومي أنت حواري
ميمنة : علاگة دواي گلي لهيوفة تطيجياها
هزيت رأسي ب أي وباوعت لبصائر اشرتلي بعيونها لا تريدني ما امشي وياهم وانا سويت روحي ولا چن
افتهمتها
گمت مشيت للغرفة جبت عباتي واخذت عباة ميمنة وانداريت على هيوفة الگاعده بصفها غاية
_ علاگة الدوه مال ميمنة وينها ؟
هيوفة : هاي
اشرتلي عليها مشيت اخذتها وطلعت ،بس رديت يمهم وشافني مشى يسترخص من عمي يوسف وانا لبست عباتي و من گامت ميمنة لبستها عباتها وعيني واذني يمهم
صخر : عمي اذا ترضى اخذ ميمنة للمضمده لان عدها ابرة
يوسف : جا مو عدنه بصائر تعرف ؟
صخر : ما ترضى
يوسف : شني السالفه ليش
بصائر : أخاف اضرب ميمنة لعنها ميته بايدي شاگول لروحي موتت اختي
يوسف : تحجين صدگ ؟
بصائر : أي والله
يوسف : امشي اخذها عمي مبينه هاي من كل عگلها تحجي
أبتسمت بصائر وحركت حواجبها لميمنة ،وميمنة عضت اصبعها متحلفه بيها وهي ولا هامها ،طلعوا وانا وراهم ،صعد بالسيارة وهي صعدت گدام وانا ورا طول الطريق هم ساكتين ولا واحد بيهم حجه ومن وصلنه ،نزلنه أنا وياها وهو نزل ورانه وگبل لا نطب للمضمده وگفنه
صخر : اوگفن
طلع محفضته فتحها وطلع منها عشرة الالف ومد ايده الها يطيهيها ،باوعت عليه وردت باوعت الايده
صخر : اخذيها
اخذتها وطبت گبلي وانا وراها ،شوي وطلعنا لان ماكو احد يمها ،بس صعدت ردتله الضل من العشره ،تمنيتهم يحجون مثل كل المخطوبين بس ماكو ولا واحد بيهم حجه حجاية ،تندمت لان أجيت واقنع بروحي لان انا وياهم ماحجوا شي يجوز يستحون ..!
بس وصلنا نزلت من السيارة گبلها حتى يضلون وحدهم وما يروح تعب بصائر على الخالي بلاش بس طبيت للمطبخ جرتني
بصائر : شعدج وليتي وياهم ،مو اشرتلج لا ،سويتي روحج ما شفتيني
_ هاي شوكت
بصائر : سوالفج مو علي ،وينهم هسه ؟
_ عفتهم بره وانا طبيت
باوعت من الشباك طبت ميمنة وهو وراها
_ هل أجوي
بصائر : شبي هذا ولا يستغل الفرص ،وين فقار اجيبه يعلم ابن عمه الچبير
بركة : والله تلگي أكبر ملعب بس مسوي نفسه ثگيل
بصائر : انجبي هو طبعه ثگيل
بركة : والله من السكوتي موتي ومن المطگطگ فوتي ،اذا ما يطلعهم كلهم گول شوفي
رادت تحجي بصائر وسكتت من طبت ميمنة وهو طب وراها هي ضلت يمنه وهو مشى للصالة يمهم
بصائر : هاا شلونج
زغرت عيونها
ميمنة : مو علي سوالفج عبالج ما اعرف سويتي نفسج كلش تخافين تضربيني الابره بس حتى صخر ياخذني
بصائر : جا موزين اخليكم تطلعون سوه
ميمنة : أي مشكوره
مشت طبت جوه وخلتنا انا وبصائر وحده تصفن بوجه الثانيه انا يمكن أعرف السبب بس بصائر انثولت كلش من تصرف اختها وضوجتها المسيطره على ملامح وجهه
بصائر : متحاجيه هي وصخر ؟
هزيت رأسي ب لا
_ أصلا ما حجوا
بصائر : جا شبيها هيج مطنگره
_ اندري يمكن تحاجوا من طبيت انا
بصائر : يجوز
طبيت انا وهي وراي ،مشيت للغرفة نزعت عباتي وگعدت يم غاية
_ شلون صرتي ؟
غاية : لا احسن ،اگلجن صدگ نسمات شوكت مشت نسيت اسأل عليها
هيوفة : يا من چنتي بالمستشفى اجه ابوها ومشت وهسه يجوز وصلوا
غاية : حرامات مشت وانا ما شفتها
هيوفة : جا شسوين قابل بيدج
غاية : لا والله ،يمه صارت ساعة السودة الطلعت بيها مو گرصة ضيم
هيوفة : من ايدج
غاية : أي أعرف
سكتت منها هيوفة وباوعتلي تسأل
هيوفة : شصار ،شني أخر الأخبار
زغرت عيوني
_ جا أنت ليش گاعده هنا وكلهم بره
غاية : تستحي تطلع لان اخوج بره
أبتسمت وهي ضربت غاية ودنگت تدردم عليها
هيوفة : خوب أنت ما تنحجيلج حجاية
غاية : جا غير هي سألتني شني اجذب عليها تردين
هيوفة : لا اهم شي لا تچذبين
باوعتلي
هيوفة : استحي اطلع وكلهم يعرفون انا محجوزتله
_ يا جا شبيها ؟
هيوفة : ماعدي صلافتج
فتحت عيوني مصدومه من ردها وهي ضحكت
هيوفة : شبيج اشاقيج
_ جا انا مو صلفة بس انا ما اعظم الأمور
هيوفة : بعدج ماتحطين عينج بعين حق ؟
خزرتها وتذكرت هي أكبر مني
_ أي بعدني بس هو كل ما يشوفني يگلي أم دلعة كرهني بالساعة السوده الطلعت بيها بلايه حجاب
هيوفة : جا انا چم مرة اگلج حجابج حطي على رگبتح من تطلعين للحوش حتى بس يطب احد تلبسي
_ جا انا غير لبيت الصدرية المنگعه
هيوفة : وهم رد شافج
_ وياريت بس هل مرة خليها سكته
هيوفة : يا شني شوكت شافج هم
_ ما اريدن احجي لان ارد لنفس القهر
سكتت ما لحت علي من حست بي صدگ ما اگدر احجي ،گمت انا اشوفن شكو اخبار على عزيز ،وبس طلعت اجت عيني بعينه ،دنگت بساع ومشيت بصف أمي دحست روحي يمها ،فلك شگد تحرجني نضراته بكل مرة يذكرني بمواقفي الطايح حضهن ويا
رأجس : وين تردون تمشون ؟
صخر : ضيرم يگول عدهم بيت بمنطقة **** وهو أقرب بيت منا يجوز عزيز بي
رأجس : جا گوموا امشوله
محمد : لا اله الا الله ،امشوا انا وياكم اروحن
رأجس : جنك ما راضي ؟
محمد : خلصت عمري ما راضي ،بس ما يفرق عدك بوية
رأجس : جا ترديهم يهدون عزيز بين أيد أل غاز عبود
محمد : جا هم هم حگهم لو شما سووا لان زلمة من زلامهم عدنه
رأجس : امشوا شوفوا عزيز والله كريم
نزل من الدرج يمشي بساع وگف بصف حق وعمي بس شافه صاح
محمد : وين ماشي مو جرحك جان ينزف
ليث : جا حتى لو بوية شني اضل هنا ؟
محمد : أي تضل ورجلك فوگ راسك
رأجس : مو بكيفك يمشي وياهم شني ضلته هنا وهم كلهم ماشين
عمي بساع عيونه صارت بگصته
محمد : حجايتي تنضرب بعرض الحايط ،ولدي يابة هم الي كلمة عليهم
رأجس : انا گايل ما الك كلمة عليهم ،بس مو وكت الخوف اولته وتاليه ما يگدر يضل و اخوته و ولد عمامه ماشين ،شني المن مبقي هنا
عمي محمد راد يحجي وسكت لان يعرف روحه ابد ما يگدر يكض لسانه لو حجه ،خزر ليث وطلع والولد كلهم طلعوا وراه
°ليث°
مشيت أصعد بسيارة برهان لان أبوي كلش ما طايقني بهذا الوكت وكل ضنه انا كسرت حجايته بس بكل الاحوال انا ما راح ارضى كلهم يمشون وانا تگعد اتاني جيتهم
وگبل لا نحرك صاح عمي باقر علينا ،اجه نزل عبد الحق وصعد بمكانه وره ،اجه گعد بصفي
عبد الحق : ابهاتنه لو تضل عليهم يخلونه ننطگ وما نحجي
_أي والله
حرك برهان وره ضيرم اليسوق سيارة صخر ،الطريق اخذله بالساعه الا وصلنا للمكان المتعنيله ..! !
نزلت من السيارة اباوع على البيوت كلهن جنهن مهجورات وذاك من ذاك البيت المرتب
محمد : هااا ضيرم يابيت ؟
أشر ضيرم على بيت اكثر واحد بيهن منتهي وخرابه
ومشى گبلنه واحنا وراه ،بس وصل يمي الباب دفره ما انفتح
باقر : جنه مقفول
ضيرم : أي مبين ،تعال صخر وياي
دفر الباب هو وصخر اكثر من دفره وما انفتح لان حديد قوي ،يمكن باب البيت أغلى من البيت نفسه
محمد : واحد منكم يعبر يفتحه
باقر : وين يعبرون بله اكو احد جوه ويغدرهم
محمد : جا تعنينه بعد شني نرد ايد وره وايد گدام
نوح : انا اعبر
من شاف أبوي أيده بهزه رأسه بمعنى اعبر ،سمه بسم الله وصعد على الباب وطفر جوه البيت شوي وصاح
نوح : هذا الباب مقفول
محمد : شوفلك حل طگ القفل بحجاره شي
ضل يحاول ويا الى أن انفتح وطبيته كلنه ،انا بصف عبد الحق أمشي وأبوي گدامي
عبد الحق : من القفل مبين اكو شي هنا ،اذا مو عزيز فضاميلهم غير ضمه
_ هم انا هيج اگولن
دورنه بالبيت غرفة ،غرفة ،وضل بس الطابق الثاني صعدنه انا وعبد الحق وفقار وضيرم نتراكض ندور بالغرف ،حتى اذا ما لگيناه هنا نمشي لغير مكان ،بس
أنا الابد ما توقعته لو لگيناه اشوفنه بهل حال هذا ..!
ما ضل كل دم بعروگي من طبيت للغرفة وشفته گدامي مربط وأثار الضرب مبينه عليه وگد ما مبين تعبان وحيله رايح مشيت افتح بالحبل البيده وهو ما حاس علي ،هاي ايدي ترجف ما گدرت احركه وحدي وصحت
_ ولكم هناااا عزيز تعالوووا .
طبوا يتراكضون وبس شافوه حالهم ابد مو اقل من حالي من شفته بهذا الشكل
اجه گومه يشيله يريد وحده بس ما گدر
صخر : لك برهان تعال وياي
تگابلوا عليه هو وبرهان ونزلوه ،شوفته بهل حال خلت حقدنه يزيد على بيت غازي ،احنه هم سوينه سوايتهم وحطينه واحد من ولدهم عدنه بس ما ضربناه و ولا وصلناه هل مرحله هاي بحيث فاقد الوعي ...
بوجهنه حركنه السيارات للمستشفى ،اول ما طبينه بي الطوارئ خابر جدي على ابوي خلاه ما يعرف دربه منين ،بس سد الخط گال بساع
محمد : امشونه نرد للقرية بساع ،حق أنت وفقار ضلوا يمه
°حواري°
گاعدين بأمان الله ومتأملين خير بروحتهم يردون عزيز ، بس فززني صوت الباب وهو يندگ ،گمت بساع اعاين من الشباك ،اصوات زلم عالية ومبين لا واحد ولا ثنين هواي
درت وجهي أريد اطب جوه بس وگفت بمكاني من طلع عمي يوسف و وراه جدي ،شوي وسمعت جدي
يگول
رأجس : تفضلوا جوه نتفاهم
فتح الباب وطبت كومة زلم معگله ،ومن طبتهم هاي عرفناهم لو گوامه لو ناس وسيطه
جفون : راح احط القوري على النار لان شوي وراح يصيحون جاي
_ أي احسن
مشيت وياها أحظر بالاستكاين وهي ترست القوري ماي وحطته على النار ومشت طلعت من المطبخ وانا عفت الشكر بأيدي ومشيت وراها بس ربطت اذاني وياهم حتى اسمع فززني صوت باب الديوان من انقتح وطلع منها عبد الحق ،بس شفته صرت بيب بيب ،مابي حيل رزاله انا روحي طالعه هسه واعرف روحي كلش زين اعاركه لو حجه عاد خليت ورديت اشكر بالاستكاين وطبت جفون مطنگره
_ شبيج ؟
جفون : انا انسى وكلساع واحد جاي گايلي البقيه بحياتج ،يعني شأگلهم حياتكم الباقية لو شني ؟
_ يا صدگ انا هم نسيت اگلج البقية بحياتج على كرفس
جفون : باع انا الغمه المن أجيت اشكي هو أنت اضرب منهم
حركلتها حواجبي بخابثه ومشيت طبيت جوه وعفتها هي والجاي وحدها لان كلش ما الي خلگ اوگف ،گعدت بصف بصائر اصفن ،ومن سمعت صوتها تصيحني گمت رديت يمها
جفون : جا شني شو خليتيني وحدي ؟
_ تعبانه والله
جفون : بس اگعدي يمي لان اضوج وحدي
هزيت رأسي ب أي وگعدت على المجمده اباوعلها تصب الجاي ،طب عمي يوسف من شافها تصب ضل واگف وبس خلصت اخذه ومشى ،و وي طلعته طبوا الولد وعمي محمد ،نزلت بساع وطلعت وگفت بعتبة
باب المطبخ اباوع بالوجه ادور الخبر عنه دواره ،بوجهم مشوا للديوان ،و وي طبتهم تعالت الأصوات هم والناس الجاينه ...
مشيت بساع طلعت اريدن اسمع حتى لو ترزلت لان ضليت احوم شمعنى من طبوا گب هذا الصياح
محمد : تعرفووون سالفة حرگ البيت أمس طيحناها
وتعرفووون دوستهم لقريتنه هم طيحناها ،بس من خطفوا واحد من زلامنه تردونه ما ندوس
قريتهم شني عمي وين الحگ بيا قانون وبيا عدل عدل تحجون أنتم
_بس احنه ما نعرف بيهم حارگين ولا نعرف ماخذين واحد من زلامكم كل النعرفه رهيب يمكم وما جاي تردونه
رأجس : الي حگ يمهم لوما ردولياه ما يردلهم ابنهم
_ وشني الحگ ؟
رأجس : عشر دوانم اريدنهن منهم
_ يا دوانم حجي ؟
رأجس : انا بزماني بايعلهم دوانم بس ما مستلم ولا فلس من فلوسهن ،اريدنهن لا يحلمون يلگون ابنهم
_ يعني الزلمه عدكم ؟
رأجس : أي عدي ،وهم شرط ثاني ،يتنازلون عن جعفر ويطلعوه
_ خلينه بس على الگاع
رأجس : لا هد الگاع هسه وانسه حجيت بيها ،انا أريدن يتنازلون عن جعفر حتى اطيكم رهيب غير هل حجي ما عدي ،وصدگ عزيز
ما خلاه يكمل أبوي من گال
باقر : ليگناه بويا ،جان عدهم
گمز واحد منهم
_ منين عدهم شني عمي تتهمون بيهم ،كلشي يصير وحطيتوهم بالنص
صخر : لا تصيييح ، واسألهم البيت بمنطة ال****
وراح تعرف الجواب كلش زييين
_ انا راح اسألهم واذا طلع حجيكم صدگ انا وياهم ما اوگف بعد
وگبل لا يمشون سمعت جدي بحزم گال
رأجس : وصلولهم الاگوله ،انا وياهم والجيلات على عملتهم الاخيره ،لا أنتم ولا دولة ولا أي مخلوق يوگف بوجهي ،ولوما طلع جعفر مستعد اخلي ابنهم طول العمر عدي ،وثاري وياهم ما يخلص طول العمر وماطولني اشم الهوه بأي ساعة اطير جيلاتنه بسماهم
طبيت اركض من سمعت صوتهم صار عالي ما راضين على حجي جدي ،و وي ما طبيت للمطبخ طلعوا هم وبس طب ضيرم للمطبخ سألته مستوعبه الگاله أبوي
جان يريد يطب للصاله بس من سمعني گلت
_ صدگ لگيتوا عزيز ؟
اندار باوعلي وهز رأسه ب أي
_ جا وينه ؟
ضيرم : بالمستشفى
لطمت على خدي
_ يمه وليش بالستشفى ؟
ضيرم : مابي شي بس جروح خفيفه واخذناه يعقموهن
باوعتله ما مصدگه بحجيه ،احس جاي يحجي هيج بس حتى لا اخاف ،مشيت وراه من طب للصالة وتلگته أمي تسأل بي
نجوى : ها ضيرم عزيز وين ؟
ضيرم : رديناه من عيونهم ،عزيز ليگناه يمه .
نجوى : عليك الله ،جا وينه ؟
ضيرم : احسبي ساعه وتلگي يمج
نجوى : ليش وينه هسه ؟
باوعلي ورد باوع الامي حاير هو انا من گالي بالمستشفى وگف گلبي شلون لو گال الامي شحالها يصير ..! !
ضيرم : عده جرح براسه بس اخذوه حق وفقار يخطونه ويردون
وأمي ما تعبر عليها ،كضت ايده تحلف بي الجاي يحجي صدگ لو جذب
ضيرم : شني سالفتج يمه جا قابل انا اجذب عليج
نجوى : انا گلبي يگلي جاي تچذب علي ،احجي يمه ضيرم اخيك شبي ؟
بلع ريگة وگعد گبالها ومبين اخوي ضامله شي
نجوى : انا من گعدتك هاي گلبي طاح ،احجي لان راح يوگف گلبي
ضيرم : لگيناه فاقد الوعي بالخرابه ،وجرح برأسه جبير وعلى الأساس مابي شي غير هبوط بالضغط طبيعي بس هسه خابرني حق گال الدكتور شاك مشكل عده سكر وهل فاقد الوعي وما حس على روحه من حاولنه شگد نگعده
لطمت على خدها فقدت امي من گال سكر ،واما دموعي بساع هلت مثل المطر من عيوني ،كلشي ولا السكر وينه وين السكر اخوي بعده شاب ،مرة عمي محمد من صار بيها كلنه شلنه همها والقهر اكل گلوبنه وتالي يصير البعده ما مفتهم شي من حياته مخلصها بس طلايب ومحاكم...!
نجوى : يمه ابني ،ولك يمه عزيز ريت المرض بأمك يابعد حيلها
أجت عمه گعدت بصفها
زهرة : شني سالفتج نجوى گالج شاك مو اكيد ،كافي لطم وداعي يطلع شك الدكتور غلط
غضة : وين نجوى تگدر تتفايل الزين ،تموت على اللطم ،هسه وحدت الغيرج تحمد الله وتشكره من لگوه والباقي كله ينحل
نجوى : يا ينحل عمه ،سكر هذا يضل ويا طول العمر
غضة : ما تسكتين لا اگوم اكسر العوجيه على ضهرج ،ما سمعتي گالح شاك جاي يحجي هندي لو شني
سكتت أمي تبجي ،ضيرم خله ايده وره راسها وقرب راسها لچتفه وامي انفجرت تبجي وهو يقنع بيها مابي شي وهذا الدكتور يحجي وحده ،صار عدها أمل يطلع عزيز مابي شي ..! !
ضليت گاعده واباوع بعيوني ،ضيرم طلع وامي متانيه شوكت يجيبون عزيز وانا گاعده گبالها ومثل كل مره اگعد على الدرج حتى اباوع على كل الگاعدين
فزيت وگمت على حيلي من سمعت صوت فقار طب معناها عزيز اجه ،ركضت بساع ونشغت من شفت راسه كله مفلوف وبالگوه يمشي سانده عبد الحق
اندريت على صوت أمي وراي
نجوى : يمه عزيز ،يابعد امك طولك ،ولك تعالي حيل ماعدي امشي بعد
مشى بالگوه وحق سانده ،گعد گبال أمي وهي لمت وجهه بأثنين اديها تباوع على وجهه المزلغ ومجرح
عيونها نترسن دموع وهي تگله
نجوى : كسر بايدهم شمسوين بوجهك
عزيز : يطيبن ،هاي انا گدامج يمه لاتبجين
حجه هيج وباسها من راسها وگام ،اخوي مبين حيل ما ضال عده ما صدگ يتمدد ،كلهم التموا على راسه وهو ضال بس يباوع بعيونه بدون ما يحجي شي
گعد بصفه يداهر بي
ليث : شني خطفوك وخطفوا لسان المحامي منك ،شني شبيك ساكت ؟
عزيز : مالي خلگ احجي ،خلوني ارتاح هسه .
عبد الحق : وسفه أبو المحاكم مابي حيل يحجي
،باوع لك عزيز هيج تضل ساكت بلايه ما كلساع گايلينه الماده والماده احطك برگبتي ما اتحمل تسكت
أبتسم
عزيز : تعبان عمي والله ،بس ارتاح اسطرلكم عشر مادات بس هدني هسه
عبد الحق : جا خوش
كلنه باوعنه على جدي من گال
رأجس : كلكم ضلوا هنا ،گلبي لاعب من بيت غازي الليله
ما احد اعترض على حجي جدي ،گامت عمه زهرة وگبل لا تمشي للمطبخ گالت
زهرة : بصائر ،وحواري ،وجفون ،وبركة ،الحگني نسوي العشه
ردت اغلس بس ما فاد اجت جفون جرتني ،بس طبيت للمطبخ گلت
_ شني عمه موزين الاكل قبل النوم ،يسمن .
زهرة : گولي عمة انا ما اريد اشتغل وفضيها لا تضلين تفتين بكيفج
_ لا والله عمة الاكل تالي الليل يتفخ البطن
زهرة : جا انا ما أعرف ،بس غير هسه كتلهم الجوع
_ اممم صدگ
استسلمت وبديت اشتغل وياهن ،وبس كملنه العشه هم مشوا يتعشون بالديوانيه واحنه بالصاله وبس خلصت عشه گمت انا غسلت وركضت للغرفة بس شافتني هيوفة گالت
هيوفة : شردتي من المواعين مو ؟
هزيت رأسي ب أي
_ بداعة أخوي خليني يمج ،يردني انكرب بالنواعين
أبتسمت ودارت عيونها على الباب من انفتح
بركة : هااا الحياله شردتي ؟
_ لا أجيت اشوف هيوفة وگالت ضلي گاعده يمي ضايجه وحدها خطية
بركة : هااا ،صدگ هيوفة ؟
هيوفة : أي جا أنتن عايفاتني وحدي
بركة : مو جانت يمج ميمنة ؟
هيوفة : طلعت وغاية نامت باجر صبحي
بركة : أي والله حتى انا ومنا عدي امتحان غبت حتى اقراله تعالي كلشي ما قريت
هيوفة : يااا صدگ
بركة : أي والله ،بلكت الله احاجي المعلمه باجر تأجله الي
هيوفة : خاف ما ترضى ؟
بركة : لا حبابة ما تگول شي
هيوفة : جا خوش
بركة : ماشية اغسل المواعين وي بصائر ،وأنت حور ابد ما مصدگه بيج
حركتلها حواجبي ،غمتني ومشت طلعت من الغرفة وانا مددت اباوع للسگف واجتني النعاسه، ولا حسيت بروحي منعسة التهيت بالمصايب ومن هده البيت غفيت وگعدتني جفون گبل الدوام بساعتين
جفون : خايبة التنبل گووومي
لفيت روحي بالبطانية اريد ارد انام ومن تذكرت الدوام طفرت ،طلعت غسلت وجهي وتريگت وبس خلصت لبست عباتي ومشيت لبيتنه اخذني فقار بدلت وطلعت للخط من سمعت صوت الهورن مالته بالباب
بس صعدت سألتني
جفون : مو عدج امتحان ؟
_ يومي وهم زين انا قاريتله بس ارجع
جفون : انا شهري وين يالله تذكرته وگعدت اقره لصلاة الصبح يلا نمت
_ يااا
جفون : أي والله ،وغاية هم گعدت مصخنه ومشى صخر لمدرستها اخذلها إجازة وهم أجل امتحانها وبركة وصته يأجل امتحنها مال عربي لان مالحگت تقره
_ يوم التأجيل العالمي ،بس أنت لحگتي تقرين ،سجاجه مو بيدج
جفون : انا قريت حتى لا يضل هم على گلبي عاد اخلص منه
_ أي والله صدگ
بس وصلنه وگبل لا ننزل گال الرجال ابو الخط يطينه علم
_ عمي انا ما راح ارجعلچن لان راح اودي السيارة للمصلح ،بس راح اخابر على اهاليچن حتى يجوچن
ما حجينه شي ،لان صدگ مبين سيارته عطلانه بالگوه وصلتنه تعتعت
طبيت للمدرسة أيدي بأيدها نمشي براحتنه لان بعده ما داگ الجرس اشترينه من الحانوت ومشينه كل وحده لصفها وبس خلص الدوام طلعنه بالباب متانيات واحد من الولد يجينه خليت ايدي على گصتي حتى اركز بالسياره الجاي تدگلنه هورن جنها سيارة صخر جريت جفون ومشيتلها واگف قريب علينه فتحت الباب الوره وصعدنه بس گلت السلام
نشغت من شفته هذا مو صخر ولا واحد من ولدنه...
اندريت لجفون وأول مره بحياتي احس بروحي هلگد خايفة وبعدني ما فاكه حلگي ولا حاجية وسمعت صوت السيارة تقفلت وطارت بينا صيحت
بصوت عالي
_ منوووو أنت نززززلنه ويين ماااخذنه
ولا تزحزح ولا رد علي هرجت السيارة بصياحي وجفون تضرب على الجامه وهو ياجبل ما هزك ريح ولا چن يسمعنه
جفون : شترريد منيمنه وييين ماخذنه شني هذا
الطريق
حرت شأفكر وما ببالي غير هاي هي احنه انخطفه وبعد ما بيها مجال من طبينه بمنطقه مهجوره تصوصي وچن ماكو بشر بيها أيست وقريت على ارواحنه السلام وماعدي غير البجي ضل وجفون هم ملت وضلت بس تباوع للطريق وجنها تريد تحفضه ..!
لزمت بأيد جفون حيل من داسلها يمشي بسرعة وگفت گلبنه سياقته بخبال مال واحد متوتر ،وبنص ذاك الخوف حاوط گلبي الامان وضحكت امسح بدموعي من التفت تباوع وزاد ارتباكه من گالت..
جفون : اجووونه ،ما خلووونه اجوووي هاي سيارتهم ورااانه ولج حواري هاي سيارة حق مو ؟
باوعت وياها سيارة حق طارت ورانه والترابة هبت غطت سيارتهم الباقيه ،مد راسة من الجامه والتفگه بأيده يحجي بس ما نسمعه ،رد طب وساق بسرعة كسر بيها على سيارتنه حار منين يفلت وحق گدامه وگف يعيق طريقة راد يديور وماگدرت من حاوطونه الولد بسيارتهم من كل مكان ،بهل وكت حسيت كل الخوف انشال من گلبي وانا اباوعلهم نزلوا من سيارتهم كل واحد تفگته على چتافه ياشروله ينزل استغفر وضل گاعد ايده على السترين ،نزل وضل الباب مفتوح ،وبنفس الوكت انفتح الباب من يم جفون ومن شفت نوح وهو ازغر واحد بيهم چن شفت الامان كله
باوعلها ورد باوعلي
نوح : بيچن شي ؟
بنفس الوكت حجينه انا وياها
_ لا
نوح : انزلن
شلت جنطتي ونزلت اعدل بعباتي ونوح يمشي گدامنه وكل ثانيه يلتفت يباوعلنه ،من صارنه گدامهم عيونهم كلهم صارت علينا ،ومن باوعت الاخوتي تمنيت هذا عزيز البس انا عرك
وياه اروحن
احط راصي على.چتافه حتى احس بحمايتهم
صعدت بسيارة برهان ،وضليت اباوعلهم وكل خوف ماكو بگلبي من تگابل حق وليث وضيرم عليه ،ماخلوا يمكن عظم بي صاحي ،اباوعلهم وروحي متشفيه بي و وي كل ضربه يضربوهيا اگولن
_ حل وابو زاايد
ما هدوه الا من صار جنازه بين أيديهم ،وصاح بيهم
صخر : كافي ،امشونه لقريتهم
ضيرم : شني ياقريتهم ؟
صخر : حطوه بالسيارة و واحد منكم يصعد يسوقها ويم بوابة القرية تشمرونه
ضيرم : سهله ،انا الها
تگابلوا شالوه ضيرم وحق حطوه بالكشن الوره وصعد ضيرم وبصف صخر وگبل لا يحركون گال
صخر : اخذوا البنات وردوا للقرية بساعكم هسه ضل بالهم عليهن
برهان : بساعكم ودوه وردوا
صخر : لا بساع بس نشمر هل فطسية عليهم
صعد برهان وبصفه صعد عزيز ،وبس حرك برهان كلهم وراه مشوا ،اندر باوعلي
عزيز : خوما سوالچن شي ؟
هزيت رأسي ب لا
_ كلشي ما سوالنه بس عيشنه بربعب والله لوما أنتم جايجن جان بس الله يعلم شصار بينه
عزيز : خلف الله على الحارس لوما مخابر صخر جان فلا لگنالچن أثر بهل منگطعه
برهان : انا من امس گتلكم انا خايف على البنات كون احنه نوديهن لان الوضع مو شي ،وهاك شفت هل صار الخفت منه
عزيز : المخانيث ما گدرولنه انداروا على النسوان
برهان : بكل صوره يردون يلون ذراعنه وشافوا هاي انجح طريقة
عزيز : بس على ما اضن ما يعرفون بسوايته ،لان بس هو وحده سوه سوايته
برهان : هو جنها هيج
الغضب مبين بكل كلمة يحجوها ،بس المهونها عليهم لحگوا بينه ،شگد اضوج من القرية
بس من طبيتلها ردتلي روحي وتلهفت لحضن امي ،شحالها هسه ..! !
نزلت يم بيت جدي وچنها متانيتني ،بس فتحت الباب صارت گدامي وصاحت
نجوى : يمه حواااري رديتي
هزيت رأسي ب أي ،ومشيت بساع لحضنها ،حارت شلون تعبر عن الخوف العاشته ،تباوع بوجهي وتلمه بين ايديها وتگلي
نجوى : گلبي مو حمل فراگ واحد بيكم وداعتكم .
_ هاي انا يمه ،رديت ،ما خلوني وردوني يمج
نجوى : گلت ما راح يلحگون ويسكرون ضهرنه بيچن
غضة : يسخى اليسكر ضهر أل غضب
انداريت على جده ،باوعتلها واگفه وراي وبصفها عمة زهرة لامه جفون على صدرها وكلساع تبوسها من رأسها وجفون بايدها الاثنين حاضنه ،طبيت جوه ومن وخرت من أمي البنات كلهن وحده
وحده بوسني جنهن غاسلات ايدهن من رردتنه ..!
وأول مرة ما يصير عدي فضول اعرف الصار بره ولا الي خلگ امشي منا لهنا ،كل الاريده أضل گاعده واباوع على لمتهم يمي
وبكل نضره بزواية المكان اتخيل روحي بذيج المنگطعه واگول شلون لوما ملحگلينه ،وارد انفض افكاري واحمد الله واشكره من خابرهم الحارس ولحگولنه ...
°هيوفة°
يا صعوبة ذيج الساعة البيها طبوا الولد يتراكضون على التفگ ويصيحون خطفوا حواري وجفون ،لهسه ما مستوعبين ولا فاضين سالفة خطف عزيز وزاد ضيمنه من وصلت للنسوان ،أمي شأحجي عليها تخبلت على جفون ومرة عمي باقر من طلعت من مصيبة طبت لمصيبة أكبر
والله لطف بحالنه من لحگوهن وردن سالمات وكل مكوره ما صايبهن
واحمد الله واشكره كل ماتصد عيني عليهن ،لو ما رادات جان هسه شحالنه! !
باوعتلها واگفه على صفحه ،وايدها المحترگه رافعتها وتباوع ،من يوم خطوبتهم هي واخوي وميمنة صارت انسانه ثاني ،وچنها جاي تعيش بلايه روح ،كل
ما اباوعلها ما اللوم غير جدي ،اتخيل روحي انا هم ما اريدن ضيرم وهو مقرر وانا لازم أنفذ بلايه اعتراض ساعتها شني موقفي ...! !
والله يمكن اطگ اموت ،لو اتخيل انا احبه وهو مقرر اتزوج غيره جان وين أطيت وجهي وشلون اتقبل غير شخص فتحت عيني على عيونه وگلبي يدگ باسمه ..! !
صحتها تجي يمي اريدن اعرف شبيها هيج صافنه وشني الجاي تفكر بي وهل حتى صوتي من صحتها ما سمعته وما انتهبتلي الا من صحت بأسمها مرت الثانية يلا اجتني
گعدت بصفي
ميمنة : صحتيني ؟
_ أي ،شبيج صافنه ؟
ميمنة : ما أعرف
_ اكو واحد ما يعرف روحه ليش صافن ؟
ميمنة : أي انا ،احير من اصفن بشني افكر ،افكاري تعبني والله
سألتها وانا متوقعه الجواب
_ صخر ؟
صفنت بعيوني ،شوي وهزت رأسها ب أي
ميمنة : تعبت وانا افكر شلون اعيش وياه لو تزوجنه
تنهدت حايره ،مسحت على ايدها المابيها شي
_ لا تفكرين هيج وتتعبين ،خلي كلشي على الله ،وانا حاسني گلبي أخوي ما راح يكسرج بيوم
بلعت ريگها ودارت عيونها مني تحجي بغصه
ميمنة : ما يوم باوعتله غير على هو أخوي حاله من حال برهان ،ولهسه مرات انسه عاقدين واريد اگله خويه ،تعرفين كارهه نفسي لان رضيت بالعقد وانا كلش زين اعرف بي ليا مرحله واصل حبه الها ،بس اصفن وي روحي وافكر أني حتى ما سألوني شرايج راضيه لو لا ،يعني حتى لو گلت لا جان محد عبرني أصلا
تحجي والدموع يفترن بعيونها ،شلون المختنگ وگالوله شبيك وانفجر ،هذا حالها هسه ،حرت شأحجي وبيا كلمة اهون على صديقة عمري وهي بهذا الحال الضايع گدامي ..!
بعجز حجيت وانا بنفسي ما مقتنعه بالاگوله ،بس ما اريدها تضل هيج
_ المحبه تجي بالعشرة ،ويمكن بيوم راح تگليلي بالغت انا واخوج صدگ ما كسرني
باوعتلي وعيونها گالن ياريت گبل لسانها ،گامت بساع تطلع من گب صوت صياح الولد بره
°غاية°
گمت بالگوه امشي صوت صياحهم وهم بالحوش لهنا وصلنا للصاله ،وگفت يم باب المطبخ واباوع عليهم بالحوش كلهم واكفين واحدهم يگل للثاني انا صاير اعصاب اكثر منك
صخر : شمرته هو وسيااارته گبال قريتهم ولو يلحگوله لو لا لان حگ السواه تكسرت عظامه
رأجس : عاشت ايدكم ،سوايته ما سواها گبله احد شگد مرت سنين ما توقعت بيوم من الايام أخافن منهم على النساوين
محمد : يابه مبينه يردون يلون ذراعنه بكل الطرق حتى نردلهم رهيب
رأجس : على هاي عملتهم اخيسه بذيج الغرفة وما اطي الهم ،يحلمووون يشوفون خلقته بعد
فقار : هاذا اخوه جدي هايج فرد نوب
رأجس : وخله يهيج
ضيرم : هذا اذا رد وگف على رجليه بعد ،لان عظم صاحي ماضل بي
باقر : يستاهل ،انعدمت غيرتهم فرد نوبه وتاليها گلبولنه على بنياتنه يخطفوهن
اباوع على أخوي يسحگ جگاره وره جگاره والحاجب مطبوک ،ماخذله زاوية منهم وصافن وچن متانيله شي ؟
وما طول تفكيري بصفنته هاي من دگ مبايله وطلعه من جيبه بساع ،وبس رد صاح
صخر : خلهم يدگون شني خايفين منهم ،والله اذا ما طلعتهم جنايز من القرية فلا اتسمى حفيد رأجس أل غضب
وگبل لا يسد الخط مراكض الولد صار بفلس واحدهم يصيح على الثاني جيب تفگتك ،طلع وراهم بساع يذكرهم
عبد الحق : كل التفگ بسيارتي
بس سد الخط گال
صخر : انا عرفت بس يشوفونه يجونه ،وصيت صاحبي محله على دربهم بس يشوفهم يخابرني وهسه يگول سيارتهم عبرت من دربه جاين لقريتنه
رأجس : بجيتهم شنوا على روحهم ،ايدكم الكم وياهم
هز رأسه ب أي وطلع من صاحه ضيرم ،گعدت بالگاع حايره بكلشي جاي يصير ،من زمان احنه عداوه من يوم فتحت عيوني على الدنيا وجدي يشوف دم سنونه ولا يشوف واحد من بيت غازي ،عداوتهم مشت بينه سنين وما رضت تخلص ،ويا خوفي نخلص احنه وهي تضل ..! !
غمضت عيوني من حسيت بوجع برجلي ،هاي الرجل شگد تضررت مره گزازه ومره عگرب مادري شجاها خطيه احسنها
فتحت عيوني اباوع أمي گعدت بصفي حيلها رايح بس هل مره ولا وحده بيهن فتحت حلگها واعترضت على طلعتهم ،وهم بره محزمين حزام وصوتهم لهنا يمنه ،كل واحد بيهم يتحلف بيهم بطريقته ،دعيت الله كون ما يسوها ثدگ ويجون لان طبتهم لهنا أكبر غلط وراها بلاوي مو بس مشاكل ،ومثل ما گالوا لو صدگ وصلوا القرية ما يطلعوها غير جثث ...
تنهدت ادعي كون تعدي على خير ولو هو وينه الخير وبيت غازي موجودين بالحياة
زهرة : فوگ شنية گوات عينه ،الغيرهم يعتذرون الا بيت غازي يهدون ،بكلشي يختلفون عن خلگ الله
شيماء : جا ما سمعتي مكسرين الولد الخاطفهن وابنج يگول عظامه تكسرت
زهرة : والله يستاهل
نجوى : يمكن هذا اخوه اليمنه ؟
زهرة : أي هو هذا الخاطفهن غريب
نجوى : واليمنه رهيب مو ؟
زهرة : أي
شيماء : هاج على اخوه هل تخبل وانا ما مستغربه من لان من گبل جانت حنان تگول الچبير يتخبل على اخوه لان بس هل واحد اله بالدنيا
زهرة : وانا مرة من المرات لاگيتهم بالسوگ ،جنت ما اعرفهم بس الخلاني اگولن هذول هم عيونهم الوساع كلش يشبهن عيون حنان ،جان الزغير والچبير وراه يخاف عليه لا يطيح ،بوكتها أجيت حجيت لحنان گالت هذول هم ،وبعد ابد ما رديت شفتهم
اسمعلهن وعقلي افتر ،شجاي يحجن ،شو احسن بروحي اطرش بالزفه ،رفعت راسي وحسيت بروحي مو بس انا الاطرش بالزفه لا شو كل البنات صافنات ومن بيناتهن بس ميمنة الملامحها طبيعية وچنها تعرف بشني جاي يحجن ،گمت طلعت وراها أريدن اسألها من گامت كالت تمشي يم هيوفة
گعدت بصفها وانا اجيت لزگت نفسي بصفهن
_ شجانن يحجن أمي وعماتي ،ميمنة احجيلي چنج تعارفين
ميمنة : شأعرف ؟
_ اليحجن بي ،تعرفينه والله مبينه .
ميمنة : دخيل الله ،حالي من حالچن انسطرت بس ليش اسأل وهن مبينات لو سألتهن ما راح يحجن ضليت ساكته احسلي
زغرت عيوني اباوعلها ،والله فلا اصدگ بيها ،ميمنة كلشي تعرف ويامه سوالف صايرة تعرف بيهتن ومن نحجي تگول
_ أعرف
و ولا تبين أي ملامح صدمه لو شي على وجهه ،ضليت اصفن واجيب واخبط شغلت فضول حواري وتحليلاتها وهم ما فاد ،وبنص تفكيري فززني صوت الربد الصار بره ،گمت اركض للمطبخ واردد
_ دخلك ربي ،استرنه بسترك يا اللهي
خليت ايدي على گلبي من ترس أذني صار صوت صياحهم الهرج القرية هرج ،عبرت باب المطبخ حتى امشي اشوفهم ،بس جرتني امي وعاطت بي
زهرة : وين موليييه ،بله شافوج ؟
_ بس امشي اشوفهم
غضة : وين تمشين ،هيدي لا احجي لصخر عليج وتعرفينه كلش زين أنت
تافأفت وضليت واگفه بمكاني ،جده دوم من تشوفني اريد اسوي شي تهددني بصخر وهي كلش زين تعرف صخر مو مال تنحجله حجاية وتريد تگله غاية رادت تباوع عليكم بالعركه...
مشيت گعدت على المجمده وبس ضاله اباوع واحفظ بعيوني ،امي جاي تفتر وكلساع فازه لو صار صوت قوي ،وعمه نجوى تدعي وعمه شمياء ساكته بس احس القلق ماكلها ،انا ومثل الجاي يحفظ بشي يحتاجه بيوم من الايام وهذا حالي هسه من طبوا للصاله و ولا چن جاي نسألهم شكوا ،شمروا التفگ وگعدوا ،مشيت گعدت على الدرج بصف حواري الما أدري وين بالها
محمد : زين ما سويت بويه ،احسن خليتهم يمشون بلايه ما يتضاربون وي الولد
صخر : جدي ما راد يخليهم يمشون بس بويه أنت گلتله
محمد : احسن ،نحلها عشاير والحگ ويانه وحتى ضربكم واذيتكم لغريب راح تطيح بحجة ردت فعل ،بس لو ضاربيهم هسه جان كلشي خسرنه و ولا أحد يوگف ويانه
رأجس : صدگ حجي محمد ،الحگ النه بهل وكت بس لو ضاربين واحد ثاني منهم جان فلسنه
گمز من مكانه يصيح
ضيرم : ما مرتاح گلبي بيهم ،والله لو هاديني عليهم وجتهم الزفررره ادوسهااا برجلي ،كضيوتوني ليششش
محمد : جا شني تريدني اخليك تگمز عليهم ونبتلي
ضيرم : جا شني عمي سوايتهم هينه ؟
محمد : انا گايلك هينه ؟ بس كلشي ينحل بالعقل ،مره وحده خلوني انا احلها وشوفوا اذا ما حتى فصل فصلناهم
رأجس : نشوف
باوع جدي الأبوي واندر يحجي وي عمي باقر
محمد : تخابر على شيخ خزعل ،تگله كيت وكيت السالفه وهيج أل عبود سوو بينا ومو أنت بكل مره تجيلهم وسيط هل مرة رادينك بالحگ حتى لو ضدنه مو ويانه
باقر : ليش ما تخابره أنت ؟
محمد : ماكو فرق أنت لو انا
باقر : جا ماشي اخابره
گام عمي باقر طلع بره يخابر وشوي ورد وبس طب سأله أبوي
محمد : ها شگالك ؟
باقر : گال ساعة وانا يمكم ،وبعد شراح تسوون ؟
محمد : شيخ واحد عدك رقمة ؟
رأجس : وين تريد توصل محمد ؟
اندار أبوي على جدي
محمد : لحل بوية ،لحل ما يخلي زلامنه التعبنه بترباها تتكتل
رأجس : بس رهيب ما يطلع
محمد : ليش ؟
رأجس : تضل ناكر هو يمنا
محمد : جا بوية شلون تفض هيج ؟
رأجس : ماعدي غير هذا الحجي وشوف شتشوي أنت
باوعله أبوي حاير
محمد : راح احل بس الاخيرة
رأجس : احسن
مشى أبوي طلع بره ولحگه عمي باقر ،شوي واجه وگف گبالي حاير ،رجع شعره بأيده وانا اباوعله اريده يحجي ،واخيرا گال
نوح : جا رموش وينها ؟
رفعت چتافي بمادري
_ شوفها خاف بالغرفة
نوح : منو بالغرفة ؟
_ ميمنة وهيوفة هستوهن مشن هناك
نوح : خوش
مشى للغرفة وانا گمت وراه اريد امدد الصخونه نهتني ولا عظم ضل صاحي عدي ،فلاونزه ما أعرف من گرصة العگرب تاهت علي
دگ الباب وطب من گالتله هيوفة تعال ،وانا بس طبيت مشيت جريتلي مخده وتمددت اباوعله وگف حاير وهو يباوع عليها حاطه راسها على رجل ميمنة ونايمة
حمحم وسأل
نوح : شني ليش نايمة ؟
هيوفة : امس الليل كله ضلت تقره وما شبعت نوم هل نامت هسه
نوح : عبالي بيها شي ،عينجن عليها
درت راسي اباوع لميمنة من گالت بأبتسامة تلاشي
ميمنة : چن ابو السفينه غرگان ؟
أبتسم منحرج على شني ما اعرف ،وشني قصدها ميمنة بالغرگان ..! !
مسح على رگبته بأيده وهز رأسه ب أي يجاوبها على سؤالها
نوح : غرگان لا من اليوم ولا امس بس ساكت لان السفينه مبين مابيها مجال
ميمنة : حتى لو ضل حاول وياها لا تهدها وتتندم وغيرك يصيرلها قبطان
هز رأسه ب أي ومشى يطلع من الغرفة وانا ضليت اصفن والله احس بكلامها مو خالي من غير الغصه الصارت تنزل وتصعد ببلعومها ودارت وجهه عني تباوع الهيوفة الصارت تسمح على ايدها وچن تواسيها على شني ،وشني الصار حتى بجت هيج وغطت وجهه بشالها هو كل الحجي الصار عادي ليش بجاها ..! !
ضليت اباوع بعيوني بلايه ما ادخل وهيوفة تمسح بدموعها وتحجي وياها ترديها تكف بجي
هيوفة : كافي بجي ،شني ميمنة ولا عرفتج ،دموعج هيج هينه عدج ،كافي ولج شلعتي گلبي
وخرت الشال من وجهه تمسح دموعها بي ،وهيوفة تباوعلها ساكته ،درت وجهي على الحايط حتى انام بس ما نمت نمت وطارت النعاسه من سمعتها گالت ..
هيوفة : هيج ماعدج أمل بأخوي ؟
ميمنة : ابد فاقده الامل بي ،انا والله يا هيوفة يوميا اتمنى روحي الله ياخذها ولا انزفله وهو يحب بت عمي وصاحبتي
طبگت حواجبي ،شني صخر يحب ،ومني قصدها ببت عمي ؟
هيوفة : تضلين هيج تطحنين بروحج ،شجاج ميمنة راح تموتين شوفي عيونج من يوم العقد وانا ما شفتج بيوم ضحكتي
ميمنة : اضحك على شنو ،اضحك لان ماخذتلي واحد يحب غيري لو اضحك لان انا حالي حال المجبوره لو على شني اضحك ،انا كلش عكست الدنيا وياي وكل أيامي الجاي اعيشهن بلايه روح والله
فتحت عيوني كل وسعها اباوع على الحايط ،واردد بيني وبين روحي
_ شني مجبوره ،شجاي تحجي ميمنة ؟
وبعد ما سمعتلها صوت من گالتلها
هيوفة : شبيج ميمنة ،نسيتي گاعنه محضوره والحجي كله ينحجي ولا بكل مكان ينگال
ضليت حايرة افكر بكل حرف گالته ،وما حسيت بروحي من نمت وما گعدت غير على ايد بركة تنهدني فتحت عيوني وشفتها گاعده گبالي بس شافتني گعدت گالت
بركة : گومي حبابة سوي الجاي أخاف اسوي ويحترگ
غطيت راسي بالبطانية الما اعرف مني مغطيني بيها
_ امشي مني ،مگعدتني علمود جاي
بركة : جا شلون أخاف احرگه وزحمة من الوادم
_ احرگي وحطيلهم سم بي هم انا شلي غرض ،والله يالله ماكو غيري تگعدوني تعاي سوي جاي
ضليت ادردم وردت ارد انام بس ما اطاني گلبي،گمت لبست حجابي وطلعت ،عماتي گاعدات بالصاله ويمهن حواري متمدده وبصائر گاعده تشرب لبن ومندمجه ويا ،ردت امشي للمطبخ بس ضليت واگفه اباوعلها من گالت
بصائر : اريد بعد لبن
زهرة : گومي ودي نوح يجيبلج
بصائر : وين الگاه كلهم هسه هناك بالديوان
زهرة : جا تاني يمشون الوادم وبس يجي نوح انا اگله يجيلج
بصائر : يا عمه شني عبالج ما يرضى يجيبلي ،اصلا شرچتي تتعنالي بلايه ماتحجي
ضحكت امي وانا بعد ما سمعت شگالتلها من طبيت للمطبخ ،بس شافتني صاحت
بركة : والله انا اعرفج أدمية وبت اوادم
مشيت للطباخ اشوف شكد خاله ماي
_ لا تصبغين
بركة : أي صدگ أنت بيضه ما تحتاجين صبغ
باوعتلها مزغره عيوني ،ضحكت
بركة : فلك شگد تشابهن أنت وميمنة ،خوب العيون ماكو هيج
_ جا غير بنات عم
بركة : انا اختها بس ما اشبهه
_ جا انا وهيوفة هم ما نتشابه
بركة : صح
باوعتلها ،سمراها حلو بس لان هي اكثر وحده بينه بارز لون بشرتها بسمار تضوج مرات وتگول انا ما اشبهجن بس هي ما تصدگنه من نگلها هي
مختلفه وهل شي حلو تحسنه جاي نچذب عليها
من فار الماي حطيت الورگ وحطيت التاوه حتى يتهدر الجاي ومشيت أحظر بالاستكاين واسولف وياها ...
بركة : هذا المحبوس هم يطوه اكل ؟
اندريت خزرتها ما راضية من جابت طارية
_ واحنه شدخلنه ؟
بركة : لا بس هيج اسأل
_ لا تسألين بعد مابينه حيل مشاكل بركة
هزت رأسها ب أي ،بس ما أعرف ليش ما ارتاحيتله
شلت القوري حتى أصب جاي وحاجيتها
_ امشي بس دگي باب الديوان حتى احد يجينه
بركة : خوش
مشت وشوي وردت وراها نوح ،شال الصينيه ومشى وانا رديت للصاله ،گعدت بصف بصائر ،وماكو اقل الساعة من گعدتنه طب جدي و وراه الباقين ،گعد جدي وهم حاوطوه وجدي بكل حزم گال ينبه أبوي
رأجس : شوف محمد اذا سوايتك ما جابت فايده لا تلومني لو رديت هديت عگابي عليهم
محمد : تجيب فايده يابة بس اطي مجال
رأجس : خوش نشوف ،شوكت گالولك يردولنه خبر ؟
محمد : باجر
نوح : يابة هي مال فصول رحمة لدينك ،مخلينه مكسريهم وهم الطابين قريتنة وفضت راحت ولا جيب فلان و ودي علان وما تفض لو يحضر رهيب من الغرفة هم
فقار : شلون يحضر ؟
نوح : اذا طلعناه الهم مو راح تصير مشاكل وراح يعرفون هو يمنه جان ؟
فقار : أي
نوح : جا باع ما تنحل لومو يطلع رهيب هم
ضحكوا ثنينهم وخلونه صافنين كلنه عليهم ،ابد مو وكت شقاهم الماصخ هاذا ،ضحكت وغطيت حلگي من صاح بيهم أبوي ،واجتهم خزرة زينة من صخر خلتهم رگبتهم واحد على الثاني ما يديورها بعد بس انا اعرفهم كلش زين هسه يردون يضحكون وبالگوه كاضين نفسهم ...
رأجس : يجي باجر ونشوف شراح يصير ،والله لو ركبوا راسهم كل فرصه الهم يمي بعد ماكو
محمد : لا نستعجل جاينه باجر ولكل حادث حديث
أنا طاگني الضيم وصاحتني امي تعاي نسوي عشه ،
وياي گومت بصائر وبركة ومشينا وراها للمطبخ وشوي ولحگتنه عمه نجوى تعاونه وميمنة اجت گعدت تباوع علينا ،ايد بايد خلص العشه بس تأخر شوي و مثل كل مره لان هواي ما نطول بي ،مشيت للصالة بأيدي السفره بس شافني باوع لفقار
نوح : گوم افرشها يلا
غمه وگام اخذ مني السفره يحجي وي نوح
فقار : حجيت حجاية وتورطت ،گوم وياي لا اكفخك
نوح : عائلتنا تتعاطه كفاخات ،من چبيرنه لزغيرنه نصيح لا اكفخك
صاح بي أبوي
محمد : شهل حجي نووح
بلع ريگة وصفن يتذكر روحه شحاجي ومن تذكر حجايته "تتعاطه" باوع الأبوي وگال
نوح : زلة لسان يابة
محمد : ما اريدن هيج حجي ينعاد نوح
هز رأسه ب أي ،ومن حيرته حار شيسوي حتى نگل الاكل للسفره بلايه ما يحجي وفقار يتحارش يحجي بي
فقار : بعد يوميا اخلي عمي يرزلك حتى هيج تشتغل بلايه حجي
خزره واخذ الصينية بيها الطرشي والزلاطه
نوح : وخر مني فقار ،كلش روحي صارت بخشمي
فقار : اعطسها
نوح : شني ؟
فقار : روحك بخشمك ،اعطسها
نوح : كلششش مو وكت خفت دمك فقار ،وخري مني
عبره ومشى للصاله وانا ضليت اباوع على فقار ،چنه زعل من نبرة صوت نوح عليه
بصائر : هاك فقار اخذ سفط الخبز
اخذه من ايدها ومشى بلايه ما يحجي ،انقهرت انا وياه ،واحدهم ينقهر لو الثاني حجه حجاية هلگدها وشوي ويردون يتراضون و ولا جنهم ،بس تعجبت من مشت للصالة وشفت كل واحد بيهم گاعد بمكان مو مثل كل مره يگعدون واحد بصف الثاني
باوعت عليهم هاي عود صدگ يعني تزاعلوا ؟؟
محمد : غاية ،ملح
جبت الملح ورديت بساع اطيته الأبوي أخذه من ايدي ورد ياكل
وانا بس صاحتني بصائر رديت اكمل وياها العشه النه
وأمي تعبت وطلعت ولحگتها عمه نجوى ،شغلت النار جوه الباگله وسألتها
_ جا وين بركة ؟
بصائر : ما أعرف شو اختفت
_ يا جا شلون تعوفنه بس انا وياج شنلحگ
بصائر : نلحگ يمعوده اهم شي الزلم ياكلون احنه نضل على راحتنه
_ هم صدگ
بصائر : جا شعبالج انا ما احجي حجاية مو صدگ
_ بصائر المبصره بعد
ضحكت وهزت أيدها
بصائر : وانا كل ضني نسيتوها
_ لا والله فلا نسيتها ،اتذكر من چنه جهال ونلعب أنت تگولين "انا بصائر المبصره" وعود تاخذيلنه خيره على گولتج ابصرلچن
ارتفعت صوت ضحكاتنه نتذكر مغامره من مغامرات الطفولة ،گطعت ضحكتها تنبهني
بصائر : ولج نسينه كلهم گاعدين بالصاله راح يطيحون حضنه على هل ضحك الشهيره
_ كلنه نعمه يم ضحكة ريحانة الشهيره
بصائر : جنت عبالي بيوم راح تبطلها بس ما شاء الله علت اكثر
أبتسمت
_ بس حلوه تحسيها هيج مادري تدغدغ
ضحكت وخلت ايدها على حلگها
بصائر : أي والله انا هم مرة گتلها ضحكتج تضحك
_ كلش ناعمة وعالية بنفس الوكت شلون ما أعرف
بصائر : بس تضل حلوه
_ أي والله ،اگلج ماشية أصيحن بركة
بصائر : خوش
طبيت جوه ادورها ومن ما لگيتها لعب گلبي طلعت للحوش من باب الديوانية ،وافتريت وره البيت ونشف الدم بجمسي من شفتها عبرت الحايط ورفعت روحها تنكت بهدومها وبس شافتني بهتت وانا ضليت اباوعلها ،ما مصدگه سوتها ومشت مرة الثانية ...! !
تلفتت ومشت وگفت گبالي ،طگطگت اصابعها وانا من خوفي جبتها براچدي فر وجهه فر ،لزمت خدها مصدومه وضلت تباوعلي وعيونها دمعن بساع استهضمت مني بس انا خوفي عليها ومن تصرفها الطايش انفعلت
_ ليش مشيتي بركة ،انا شحجيت وياج ؟
بركة : بس باوعتله من الشباك
_ وليششش تباوعليه أصلا ،حواري الفضولية ما سوت سوايتج هاي شبيييج أنت ؟
بركة : شني غاية ؟
_ وشنشانه ،والله فورتي دمي ،هذيج المره الله سترنه ما فكرتي هل مرة يلزموج ؟
بركة : فكرت بس گلت گاعدين يتعشون .
_ وهذيج المره هم چانوا يتعشون وفطنوا احنه ماكو وهجوا يدورنه ،لا تعيدها بعد خوووش
هزت رأسها ب أي ومشت اگبلي ،وبس طبت للمطبخ انتهت بصائر على خدها
بصائر : شبي خدج أحمر بركة ؟
خلت ايدها على خدي ،وبساع طلعتلها چذبة
بركة : چنه نتشاقة وضربتني
والله چنت اگول على جفون الداهية ،طلعت بركة الاضرب منها وانا ما اعرف ...
ما حجت بركة ولا تدخلت وكملت تگلاة البيض تحطه فوگ الباگله ،كل ضنها صديقات وتشاقينه بيناتنه ما تعرف اختها وين جاي تدگ دروب وحدها هل مره انوبه
طب للمطبخ كاف رداناته يريد يطلع يغسل ،بس گبلها سألنه
صخر : جاي مسويات ؟
بصائر : أي راح نصبلكم
صخر : عاشت ايدچن
بصائر : ايدك العايشة خوية
مشى غسل ورد ينشف بأيده بالمنشفه ويحجي وي بصائر
صخر : چن شريتج ورچلج متعاركين
بصائر : يا اشعجب عاد هم حبايب
صخر : شمعرفني بس حتى كلمن بمكان گعدوا على السفره
بصائر : يااا جا صدگ متاخربين
صخر : جا انا جاي اجيبلج اخبار موثوقه
ضحكت
بصائر : اللهم لا شماااته
أبتسم وطب للصاله وهي صبت الجاي وگالت
بصائر : ودي
شلت الصنينه ومشيت للصاله بس شافني صخر اخذها وانا رديت وهي بس شافتني گالت
بصائر : امشي افرشي السفره بغرفتچن
جاي اطلع وهو لاگاني طب للمطبخ
بصائر : فقاري ،أنت وشريچتي جيبوا مواعينكم فدوه
بلع ريگه ورمش بعيونه ومشالها وانا ضليت شايله السفره واباوعله وعبالهم طلعت من المطبخ بس خطية شو هاذا سلمها تراب كلش
فقار : يروحلج فدوه فقارج ،واذا تردين نغسلج المواعين هم
ضحكت وهزت رأسها
بصائر : لا عمري أنت ،بس جيبوهن كلشي مانريد منكم
فقار : تدللين
شمرتله بوسه بالهوه وهو سوه روحه راح يتخربط وهي تضحك وتضم بضحكتها ما تريدهم يسمعوها
مشيت بساع للغرفة والابتسامه مرسومه على وجهي بشوفتهم هيج متراهمين
ياررربي شگدد حلوووين
بس طبيت گتلهن
_ سون مجال افرش السفره
گامت وياي حواري فرشناها وجبنه الاكل ولتمينه ناكل ،وبس كفينه المواعين كلمن مشى لبيته ،وانا حضرت هدومي وحطيت راسي ونمت ما گعدت غير على صوت امي تنهدني للدوام ،گمت بدلت وطلعت تريگت ورديت للغرفة احظر بجدولي ناسيه البارحه احظره هم زين تذكرت ...
بس كملت شلت عباتي والجنطه وطلعت ،شوي وسمعت صوت الخط ،طلعت اعدل بعباتي و وي طلعتي انفتح باب بيت عمي باقر وطلع عزيز بكامل كشخته بأيده جنطته الجلد ،وبايده الثانية مخلي مبايلة على اذنه يخابر ومبين مستعجل ،صعدت انا وضليت اباوع عليه صعد بسيارة ضيرم شغلها وطار وهاي خبصته كلش زين نعرفها ينخبصها من عده مرافعه ...
بس صعدت بركة حرك السيارة وبهل يوم صادف مطر قوي كلش وي الدوام ،بحيث گد ما صوت المطر قوي ولا معلمه گدرت تشرح شي ،وخلصنه الدوام تسخت وبس اجه ابو الخط لبست جنطتي جوه العبايه وطلعت من ألصف صارت گدامي بركة كملنه طريقنه سوه ،جو شتائي بحت ،بس رديت ماعولت احضن الصوبة نزعت عباتي بالباب صايرة شثگلها من الماي وطگيتها ركضه جوه بس شافتني أمي گالت
زهرة : اركضي بساع بدلي لا تتمرضين
هزيت راسي ب أي ومشيت طلعتلي هدوم وطبيت سبحت وطلعت بعدما دفيت روحي بالماي الحار وبس گعدت يم الصوبة لزگت بيها بعد جان تحركت
شوي وأجت امي جايبتلي صنيتة غداي ،خلتها گدامي وگعدت ،مديت ايدي اكل واحجي وياها
_ جا وين جده ماشفتها ؟
زهرة : نايمة ،شلت همچن گلت هسه شحالهن بالمطر
_ والله حلو بس لوما بارده
زهرة : ومنا أنت ما لابستلج شي يدفيج
_ اندري راح تمطر هيج
زهرة : من الصباحيات الجو مغيم
_ يلا دفيت بعد
انا احجي وياها وطب ليث يسحل بروحه كله طين مشى بوجهه للحمام وگبل لا يطيب گالي
ليث : اريدن هدوم بعد اخوج ماگدر اصعد كلي طين
زهرة : شني طايح ؟
ليث : أي مشيت للكيعان اشوف شكو ماكو وساعة السوده تورطت لا سيارة لا شي وانا امشي زلگت وبنص الساگية طحت
زهرة : يايمة شوداك ومنا صوابك بعده اخضر
ليث : جا يمه مليت روحي بزعت من الگعده انا مخلص أيامي بالگيعان تالي انحبس هل حبسه هاي
زهرة : جا شني كلشي مابيك ومحبوس غير تطيب وترد مو تمشي أنت وصوابك
ليث : صارت بعد
باوعتله امي عاجزه ،ليث كلش يحب روحة الگاع ويمكن اكثر واحد بالولد ما يتعاجز منها من وهو زغير لو تيهوه يلگوه بيهه ،شگد يگلوله لا تمشيلها هواي وحتى لو راح احد ببداله هو يضل يحوس ويطلعله حجه ويمشي ...
گمت جبتله هدوم واطيتهن الامي ودتهن اله وانا رديت گعدت بمكاني وبس دفيت مشيت للغرفة وجفون طلعت تريد تباوعلها مسلسل لان ما راح تمشي للدوام الدنيا بعدها تزخ مطر وحتى ابو الخط ما راح يجي
هيوفة من مللها گاعده تحوك ،من زمان اتذكر عليها لو ملت طلعت بكرات الصوف وگعدت هل گعده هاي وتندمج وي الخيوط مثل ما هسه حتى انا جاي احجي وياها ولا جنها تسمعني ...
_ هيوووفة ،مو احجي وياااج ؟
نزلت السنارة من ايدها
هيوفة : هاا شبيج ؟
_ احجي وياج وبالج مو يمي
هيوفة : جا مو تشوفيني جاي احوك طبعا بالي مو يمج
_ اگلج
هيوفة : گولي
_ شوكت خطوبتج ؟
ابتسمت تهز بايدها
هيوفة : مبين ما عدج سالفه بس تردين تحجين وما تضلين ساكته
_ جا شسوي ضوجه
هيوفة : ما أعرف خطوبتي شوكت ،بس الاكيد جدع گالت من اشيل البلاتين
_ جا يعني ما ضل شي
هزت رأسها ب أي وگالت
هيوفة : منو هنا من الولد ؟
_ بس ليث
هيوفة : وجدي وأبوي ما ردوا من العزيمة ؟
_ لا چنهم انحصروا يم الوادم من وره المطر
هيوفة : چن هيج
ضليت گاعده يمها نحجي وما طلعت غير من سمعت صوت أبوي وجدي ،فتحت باب الغرفة ومديت راسي اباوع
محمد : بوية خابرني شيخ خزعل يگول نأجل جيتنه الكم على باجر گلتله براحتكم
رأجس : حگهم اليوم مطر وهم احسن تضل على باجر أنا منا راسي ما اعرف شبي مسطور
محمد : يجوز لان ما نايم زين ،بدل هدومك وناملك ساعة تصحى
هز رأسه ب أي ومشى لغرفته هو وجده ،وانا مشيت للمطبخ شفت مواعين شوي غسلتهن ونزلت قفص طيور جفون حطيتلهن ماي ما أعرف شعجب عايفتهن بدون ماي وهي يوميا تحطلهن الاكل والشرب ومداريتهن جنهن جهالها
علگتهن ومشيت اغسل ايدي وبنفس الوكت طب صخر من برة يلمع لمع ولا چن اكو مطر الوادم اجت مطينه وهو چن جاينه بطيارة لان حتى الجاي بسيارة هم يطين من ينزل لو يصعد بس صخر عجيب امره حتى هاي طرف دشداشته من جوه مابي ولا لثگايه ...
گبل لا يطيب للصاله گال
صخر : غاية جاي اذا اكو
_ صار
مشى هو وانا حميت الجاي وصبيته اله ،من ما لگيته جوه صعدت لغرفته اطيته الجاي ونزلت ،الجو حلو بس ملل وين اروحن وباجر جمعه وجفون صايره لا تتناگر ولا تحجي أصلا ...
گعدت اباوع على المسلسل ،و وحده تجر الثانيا منا لمن خلص الضهر واليوم كله وباليوم الثاني اجونه الناس الوسيطه ،سويت الجاي ومشيت دگيت باب الديوان ورديت بساع شوي وطب نوح اخذه ومشى وانا مشيت للصاله گاعدات أمي وجده وهيوفة ،گعدت يمهن أمي تدعي تنحل وجده بأيدها سبحتها تسبح
زهرة : حليها يا أم الحسن ،تعبنه من المشاكل وحيل ما ضل عدنه
غضة : ادعي الله يهديهم ويطخون راس ،لان اذا ضلوا معاندين ماتفض وتكبر ما تزغر
زهرة : لا ،لا تنحل أن شاء الله
غضة : الله يسمع منج عاد نكف من وحده
گمت بساع على صوت نوح بالمطبخ يصيح بأسمي
،بس طبيت گال
نوح : جاي بعد يردون غاية
اخذت من ايده الصينيه
_ لان جايي طيب هل حبوه
نوح :.فد مندله هو جاي
_ جا خوش فلا اسوي
نوح : عمي يخبل بس فضينه مو الوادم راح تمشي
مشيت شغلت النار وخليته يحمه بين ما اغسل الاستكاين واحجي وياه
_ شيگلون ،شراح يصير ؟
نوح : راح نطيهم عطوه منا ل 15 يوم و وراها نفصل على سالفة الخطف
_ وابنهم الكسرتوه شلون ؟
نوح : نايم بالمستشفى و واحد من الشيوخ يگول صاير عده كسر بأيده ورجله
_ جا شلون مايصير اذا كلكم متگابلين عليه
نوح : يستاهل محد سوه سوايته واندگ بالنسواين هاي نسوانهم يمشن ويطلعون وبناتهم يداومن ولا فكرنه نندگ بيهن لان زحمه بحق رجولته ناخذ نسوان حتى نلوي ذراع الزلم
_ خوش تفكر
نوح : جا شعبالج ،صبي بساع فار
طفيت الجاي وبساع شكرت الاستكاين وهو شال القوري يصب وياي وبس كملنه اخذ الصينيه ورد للديوان وانا مشيت للغرفة ،الاحد عدي امتحان وشلون امتحان يخبل اگعد من هسه اقراله احسلي
طلعت جنطتي وهستوني بديت اقره وسمعت صوتهم ،طلعت بساع وانا اللبس حجابي ،وگفت يم باب الغرفة اباوع عليهم ،رديت للغرفة اكمل قريتي
و وي سالفة بيت غازي مشت ايامنه واجه اليوم المتانينه كلنه ،اليوم البي راح هيوفة تشيل البلاتين
وترد تمشي على رجليها
احوس بالمطبخ بس انا وجده بالبيت ،امي مشت وياها وجفون بالمدرسة وانا ضاله افتر ماكلني القلق عليها وبنفس الوكت فرحانتلها راح تخلص من هاي الحدايد ...
باوعت من جام الشباك الشدوه بالجديد ،طبت حواري تهف بعباتها ،بس شافتني اباوعلها مشت بساع وطبت تسأل
حواري : هاا ما أجت ؟
_ لا بعدها ،شني ما مشيتي للمدرسة ؟
حواري : لا اليوم غبت ماعدي شي وهم صبحت داگتني الصخونه
_ يااا ،مابيج غير العافية
حواري : الله يعافيج ،جده جوه ؟
_ أي جوه
حواري : شعجب ما مشت وياها
_ ما رضى صخر گاللها ما نطول ،بس امشي شوفيها شلون گاعده على نار ،خوب من طبيت من المدرسة لگيتها تصلي وتدعيلها
حواري : أي عيني جا غير الريشة هاي
أبتسمت
_ عزيزة گلبها
حواري : واحنه هيج زايدين على گلب جده
ضحكت وهزيت رأسي ب لا
_ هي تحبنه كلنه بس هيوفة اكثر
غضة : ولج غاااية تعاي حبوبه
مشيت للصاله واجت وراي حواري ،بس شافتها جده گالتلها
غضة : شني يمته اجيتي ؟
حواري : هسه
گعدت بصف جده تداهر بيها ،وانا مشيت گعدت يم الصوبة ،باوعت لباب المطبخ من صار صوت بره ،طب ليث رافع رداناته وهدومه كلهن ترابه ،مبين جان بالگاع ...
ليث : السلام عليكم
ردينا السلام وصاحته جده
غضة : تعال ليث حبوبة اگعد يمي
هز رأسه ب أي ومشى گعد بصف جده من الجهه الثانية
ليث : گولي جده رايده شي ؟
غضة : أي اريدنك تمشي للدواچن تجيبلي اربع ديوچه ناذره اسوي غده الأم البنين بس تشيل الحدايد
ليث : ياغده جده هو وين ضل وكت
غضة : حتى لو يصير عشه
ليث : جا بس خل اسبح
غضة : كلشي مابيك جنك العافية
ضحك وهي كملت تحجي
غضة : يلا گوم ومن ترد عود بدل هدومك
ليث : صار
بس مشى ليث انا گمت وگلت لحواري
_ گومي نضفي وياي
رفعت ايدها تدردم
حواري : اهووو وين ما امشي لاحگني التنضيف
_ عياره خلصتي منه ،بصائر تنضف
حواري : أي والله بس انا هم اعاونها
_ گومي يلا راح نضيع وكت ساعة الساعة يجون
حواري : شسوي ؟
_ اكنسي البيت وانا ماشية اكنس الحوش وارشنه
گامت وياي وانا طلعت للحوش وبديت اكنس
بي وگبل لا اخلص طبت ميمنة بس شافتني گالت
ميمنة : شني ما أجت ؟
_ لا بعدها
ميمنة : شني السالفه من الصبح مشوا
_ اندري
طبت جوه وانا كملت الحوش ولحگتها ،بس شافتني جدع گالت
غضة : هاي غاية يمج بس يجي ليث اوگفي يمها وعلميها شلون تركب الدجاجات
ميمنة : سهله جده انا اركب ،بس كونه يجي بساع
غضة : انا گلتله لا تبطي
مشيت للغرفة طلعتلي هدوم سبحت وبس طلعت گعدت يم الصوبة امشط بشعري ،وشوي وسمعنه صوته
ليث : غاية جبت الدجاجات
صحتله
_ حطهن على السنط
شوي وطب سلم على ميمنة وباوع لجده يحجي وياها
_ جبتلج الدجاجات بعد امر خدمه
غضة : سلامتك حبوبة ،امشي اسبح كلك وصخ
ضحك ومسح على لحيته
ليث : گبل الدجاجات جنت چني العافية هسه صرت كلي وصخ
غضة : جا غير جنت اريدنك تمشي
ليث : ها يعني چنتي تصبغين بي
غضة : لا ابد
زغر عيونه
ليث : اصدگ ؟
غضة : وغصب عنك تصدگني
ضحك ومشى صعد فوگ جابله هدوم ونزل طب للحمام وانا مشيت وره ميمنة من مشت للمطبخ
ميمنة : تعرفين تنضفيهن ؟
هزيت راسي ب لا
_ جا غير اموت بس انضفهن
ميمنة : جا شلون ؟
_ اندري
صفنت تباوعلي
_ اخذهن الامج ؟
ميمنة : امي ذبتني عليكم ومشت للسوگ وبس بركة وحق بالبيت وهم نايمين
_ جا اخذهن لعمه نجوى احسن
ميمنة : خوش ،امشي لبسي عباتج وتعاي
مشيت بساع لبست حجابي وعباتي ورديت اخذتهن بعلاگتهن وطلعت وهي تباوعلي من بابنه ،بس دگيت باب بيت عمي باقر فتحه عزيز ،عدلت حجابي بايدي الثانية اريدنه يوخر لطش بالباب
حمحم وسألني
عزيز : شعجب جايتنه اليوم ؟
_ اريدن عمة تنضفلنه الدجاجات
مبين ما جان منتبه على العلاگه بايدي والا من حجيت يلا شافها و وخر حتى يسولي درب طب طبيت بساع ماضل وكت ،اول ما طبيت صارت گدامي بصائر بالمطبخ
بس شافتني گالت
بصائر : هاي شكو اليوم الگمر منين طالع
ضحكت
_ من بيتكم
أبتسمت تريد تحجي بس من طب عزيز سكتت ومن شافت العلاگه بأيدي سألتني
بصائر : شني هاي ؟
_ اريدن عمه تنضفلنه الدجاجات ،نريد نركبهن ،ميمنة يمنه بس تعرفني ايدها ماتگدر
بصائر : طبي جوه تلگياها گاعده بالصاله
خليتهن على السنك ومشيت بس طبيت للصاله شفتها گاعده تنضف بالتمن ،بس شافتني گالت
نجوى : ياهلا بغايتنة
_ هلا بيج عمه ،بلايه زحمة عليج اريدج تنضفيلنه الدجاجات
نجوى : صار ،وينهن ؟
_ بالمطبخ
نزلت صينية التمن وگامت للمطبخ وانا وراها كفت رداناتها ومشت للسنك تنضف بيهن وبس خلصت گالت ...
