رواية انجدني من الغرق الفصل الرابع عشر بقلم امل بكر
بعد شويه وصلنا المكان نزلنا ودخلنا مكنش زحمه اوي ،
-هتطلبي اي ؟!
بهدوء ،
-اي حاجه هاخد زيك
رفعت حاجبي ،
-اي الهدوء ده ؟!
-مفيش انت ولو عايزاني اتكلم ولا عايزني ساكته
-احسن خليكي ساكته
-يلا اطلب انا جعانه
طلبنا وبعد لما اكلنا فضلت ساكته وانا كذلك المكان هادي وعايز مرتبه انام عليها
قطعت الصمت وانا بقول ،
-هو هي قالتلك اي لما قولتلها علي خطيبها ؟..
بصتلي وقالت وهي بترفع كتافها ،
-شكلها مش مصدومه بس حستها عايزه تفهم يعني بصراحه مش فاهمه اوي حكايتها مع خطيبها ده
سكت انا ..وهي ضحكت ،
-هو انت لي بتسأل !!
-عادي يعني من باب المساعده
-مساعده اي هو مش انت قولت ملناش دعوه بيها
-ايوه ما انتي فعلاً ملكيش دعوه
-انا !!! وانت لاء يعني
-وانا كمان ماتسكتي شويه ياكارما تعرفي
-هو مش انت الي بتتكلم
-سكت خلاص
ضحكت بشماته وهي بترفع حواجبها ،
-هتعمل اي مع ماما اشوفلك انا واحده بديل البنت تبع امك يمكن متعجبكش
-اي اي هو انا بتباع في السوق انتو لي معلقين في موضوع الجواز انا مدخلتش الاربعين يعني !!
سكت لما افتكرت البنت الي اسمها ليال وهي بتقولي في التلفون اول مره "انت اربعيني يعني "!!
ضحكت غصب عني وانا برجع شعري بصيت علي الي بتضحك بعبط قدامي ،
-قولي بسرعه افتكرت اي ؟!
-افتكرت اني لما اروح هديكي علقه بسبب كلامك الي قولتي لامك
-كذاب انت افتكرت حاجه تانيه وكمان كلام بنت مش كده
بخوف منها حقيقي،
-انتي مشعوذه انا بدأت اقلق منك
-شوفت اهو كلامي صح
انكرت ونفيت براسي ،
-لا مش صح ويلا قومي خليني اروحك
-لا مش عايزه اروح
-يبقي تقعدي ساكته وعينك مش راحه جايه
بضيق ،
-اي راحه جايه دي
عيني اجت علي شاب في التربيزه الي قصدنا الي بيبصلها ،
-اوعك تبصي لحد اقولك حطي ايديكي علي عنيكي
-اهو ده الي ناقص وبعدين مانا مرزوعه اهو قدامك شوفتني عملت اي يعني ؟..
بصيت بطرف عيني عليه قومت وقفت بغيظ ،
-يلا بينا خلينا نمشي من هنا
باصرار ،
-لا انا عايزه اقعد شويه انت لي زنان كده
-قومي هجبلك ايس كريم
-اي ده بجد ؟
-ايوه يلا قومي بقي
-ماشي يلا بينا
مشتها قدامي وقفلت وراها باب العربيه لفيت اقعد مكاني
-لا لا مش متعوده علي الدلع ده اي الي حصلك ؟
-ده انا هموتك
-نعمم انت تعبان !..
-الولا عمال يبصلك تعرفي لي ياست الهانم علشان عماله بتبتسمي ..اوعك اشوفك تاني بتضحكي بره
حاولت اكتم ضحكتي ،
-طيب خلاص مش هضحك تاني هاتلي ايس كريم
اتنهد بضيق وحرك العربيه بصلي مره واحده اتخضيت منها ،
-كان بيبصلك لي ان شاء الله والله لو مكنتيش معايا كنت ظبطه
-خلاص ياصالح بقي وانا مالي وبعدين عايز تعمل مشكله علي اي
-ويبصلك لي
بغرور الطف بيه الجو ،
-علشان حلوه اكيد
قرصني من دراعي وطلع كبته فيا ياررتني مانطقت وصلنا البيت وهو مازال قالب وشه ماما نامت واحنا طلعنا لاوضتنا بسرعه قبل لما تستفهم مننا علي الي انا قولته وهييي صوت لما لقيت ماما قاعده علي سريري !!!
-في اي ياماما قاعده هنا لي!..
شاورلتلي بايديها ،
-اقفلي الباب مستنياكي
روحت قعد قدامها وانا عايزه اعيط من التحقيق الي هيتفتح دلوقتي ،
-احكيلي كده من الاول صالح عرف البنت دي منين وهي كويسه احكي كل حاجه
-احم بصي ياماما انا كنت بهزر كنت برازيه يعني
-هو قالك متقوليش لحد ؟..
-لا انا بتكلم بجد انا كنت بهزر
-وانا قولتلك كذا مره الكذب وانك تقولي في الاخر بهزر ده حرام مش كده !.
-صح عندك حق معتش هعمل كده تاني
اتنهدت وهي بتبصلي بعتاب ،
-طيب عملتو اي فرحتي
ابتمست ،
-اه جداً يعني ابنك وشه يقطع الخميره وكل المخبوزات بس اهي خروجه احسن من مفيش
-ده صالح الحلاوي كلها
-ماهو القرد في عيون امه غزال
-ده انتي الي قرده
-ماهما برده بيفرقو بين عيالهم
-متخلنيش افرق رجلك عن جسمك
-ماهما برده ب…
-بت اخرسي انا هقوم من وشك
-طب استني اقولك
-هااا اخلصي
-انا حاسه فعلاً ان صالح بيفكر اخر فتره ومش علي بعضه تفتكري ماله
"خلصت كلامي وانا بضحك بتسالي"
-تقصدي اي ؟
ضحكت وهي بتقول من تاني ،
-تفتكري في دماغه حد
-يمكن مش بعيد
-وانتي عرفتي ازاي
-ده الي شايفا يعني انا عارفا صالح لو فيه حاجه كان قالي بس اكيد لو فيه واحده مش هيقولي
-اممم علشان كده بيرفض يروح المقابله
-مظنش ان كده ماهو علطول بيرفض
-اكيد مش بيكلمها اخوكي مش كده
-اكيد بس هنعرف بطريقتنا
-بطريقتنا !!! وازاي بقي
ضحكت وقولت ،
-هقولك من بكره هنعمل اي
-طيب انا طالعه وانتي غيري هدومك ونامي
-اوكي تصبحي علي خير
-وانتي من اهل الجنه ومتنسيش تقرءي سوره الملك
-حاضر …ماما انتي قولتيلي لي بنقرءها
وقفت عند الباب وقالتلي ،
-لانها بتنجي من عذاب القبر وبتشفع ليكي يوم القيامه والرسول كان بيقرءها ديماً قبل النوم
ابتمست ،
-ربنا يرحمنا ويردنا إليه رداً جميلاً يارب
-يارب ياحبيبتي
"""""""""""""""""""""""""""""""""""""""
قعد علي سريري بعد ما اخد شاور دافي اتغطيت بالبطانيه لغيت رقبتي افتكرت كلام كارما لي قالت كده !!! نفس كلام اخوها يبقي هو اكيد شاف حاجه خلا يحذرني
<<فات يومين انا و يحيي علاقتنا بقت احسن هو بيحاول.. كان متابع بخصوص موضوع طارق لو بابا هيعمل حاجه مفاجاة من ورانا لان ده المتوقع انا مسحت رقمه ارتحت اني اخد قرار لمره من غير فرض راي عليا
-قلقتني يايحيي اتكلم
قفل باب اوضي وقال ،
-انا مش مرتاح لهدوء ابوكي ابداً
-تفتكر ممكن يعمل اي
-اي حاجه انتي مش راضيه عنها من امتي بيختار راحتنا
بقلق قولت ،
-عندك حق بس انا خايفه اوي يعمل حاجه انا مش عايزاها وخصوصاً لو حاجه تخص طارق
-متقلقيش انا جمبك
بصتله بابتسامه وهو اخد باله قال اي ،
-المهم انتي مالك في حاجه مضايقاكي غير كده ؟..
-لا مفيش يعني بفكر في حاجه
-اي هي !!.
-صحبتي الي هو اخوها المحامي
بتذكر قال ،
-اه افتكرته ماله ؟.
-لا هو ملهوش قابلت كارما اخته امبارح وقالتلي بخلي بالك منه متعرفش اني سيبته
-امم طب لي قالت كده بس معاها حق هو من الاول طارق مش مناسب ليكي اصلاً
-اخوها حذرني برده وكأن شاف حاجه مأكداله ده
-شاف اي ؟!
سكت وبعدين قال من تاني ،
-هو ده نفس الشخص الي اخدك البيت !!!
-اهااا هوا الي انقذني بمعني اصح من طارق
قال بخنقه مكبوته بانت من نبرته ،
-يبقي الي في بالي صح
-واي هو؟!
بصلي وهز راسه ،
-مفيش بس انا استحاله اخليه يقرب منك تاني
-ياريت بس ممكن تقولي انت اتأكد من اي ؟!..
-هو خلاكي تشربي وهو لاء كان قاصد معرفش اي الي حصل بعد كده بس من كلامك هو معرفش يركبك عربيته وخاف لحد ياخد باله علشان انتي مكنتيش موافقه
-ايوه صح هو الشاب ده قالي كده
"سكت بخوف انه انسان مريض ازاي قدر يعمل كده واتجرء كمان!! بس يحيي عنده حق هو عارف ان محدش مهتم ليا وقال لنفسه ان محدش هيصدقني وفعلاً ده الي حصل بس مكنتش متوقعه رد فعل يحيي "
قاطع تفكيري وهو بيقول بتفهم للي في دماغي،
-اوعك تخافي وانا معاكي خلاص كل الي فات انتهي واستحاله يتعاد تاني تمام
قولت بهمس ،
-اوعدني !
-اوعدك طبعاً
-يلا انا ورايا مشوار معاكي رقم المحامي ده ؟
-اهااا لي ؟
-عايزه هاتي
"فتحت موبايلي مكنتش مسجلا لقيته من اخر مره اتصلت بيه اخده وطلع "
"""""""""""""""""""""""""""""""""""""""
بعد لما نزلت رجعت تاني لاوضي نسيت المحفظه وقبل لما ادخل لقيت ماما وكارما بيدورو علي حاجه في الاوضه
كارما وهي بتفتح الدولاب ،
-شوفي ياماما في الدفتر الي عندك اكيد كاتبلها شعر
ماما باستغراب وهي بتشوف فعلاً في الدفتر ،
-بس صالح مش بيحب الشعر لا ما أظنش
-يبقي اكيد مخبي صورتها تحت المخده
-تقصدي علشان يبص عليها قبل لما ينام يعني !!!
ضحكت وهي بتغمزلها واتخضت لما عنيها اجت عليا.
-احم صالح بتعمل اي هنا ؟
دخلت اخد المحفظه وحطتها في جيبي وانا ببصلهم بعدم فهم ،
-انتو بتعملو اي هنا واي الي كاتبه في الدفتر وحاطط صوره!!! صوره مين معلش ؟!..
"خلصت كلامي باستنكار مستني رد منهم "
ماما بتوتر قالت ،
-لا مش كده ده احنا بندور .. قصدي بنشوف انت .. لا مش كده م..
كارما قاطعتها بسرعه وهي بتشرح فضلت باصصلهم وانا عاقد حواجبي وانا مفهمتش حاجه برده !!
-مفيش ده احنا بنرتب الاوضه تحب ننقل السرير الناحيه دي ؟
بعدم تصديق،
-هو في اي احكو يلا
ماما اتكلمت باعتراف ،
-انا هقول كل حاجه
كارما ضحكت وهي بتبرقلها ،
-هتحكي اي ياماما ماما قولت كنا بنرتب الاوضه عادي
-اي النضافة دي ياست كارما مش قادر اصدقك احكي ياامي قولي في اي؟!
اتنهدت وقالت وهي بتشاور علي كارما وكأنها بترمي التهمه علي صاحبتها الي في المدرسه،
-هي الي قالتلي ان انت بتفكر في واحده و واحنا كنا بندور علي اي اثر هي السبب خلتني بفتش في حاجتك
بصيت لكارما وانا بضيق عيني بتوعد وهي عملت نفسها الوزير محتاجها طلعت بسرعه بصيت لماما ،
-وانتي يا امي بتمشي ورا بنتك هو في حد بيسمع كلامها
-معرفش بقي انت عارف اختك بتخلي الواحد يقتنع
-سيبيها عليا انا هوريها
-يعني فعلاً مفيش حد يعني !!!
برفض هزيت راسي ،
-لا مفيش انا مش فاهم انتو لي معلقين علي الموضوع ده!!
-طيب خلاص اعملك اي انهارده علي الاكل
ابتمست وانا بقرب احضنها ،
-اي حاجه ياحبيبتي منك حلوه
-حبيبي ..طب يلا روح شغلك
-ماشي في رعايه الله
-في رعايه الله وحفظه
نزلت وخرجت من البيت وانا في الطريق موبايلي رن وكان رقم فتحت ،
-ايوه استاذ صالح معايا ؟!
-ايوه مين حضرتك !
-انا يحيي لو افتكرتني اخو ليال صحبت اختك
وقفت العربيه باستغراب وقولت ،
-افتكرتك خير في حاجه ؟
-عايز اتكلم معاك نتقابل فين ؟..
-انا رايح مكتبي دلوقتي
-مفيش مشكله ابعتلي العنوان نشرب قهوه مع بعض
-هبعته في رساله
-تمام مع السلامه
باستغراب ،
-مع السلامه
بعتله العنوان وانا عندي فضول عايز مني اي وممكن يحكي في اي اصلاً روحت مكتبي وشويه ولقيت شريف دخله قومت مديتله ايدي للتسليم قعدنا وانا منتظر يتكلم
-انا عارف ان اول لقاء بينا مكنش احسن حاجه
-صح وعلشان كده مستغرب لي كلمتني !
-بخصوص اختي ليال
اتعدلت في قعدتي ،
-مالها !
شكرا لزيارتكم عالم روايات سكيرهوم
