رواية مابيني وبينه قدر الفصل السادس عشر بقلم رقية الأنصاري
_ أنا عايز اتقدملها.
احمد ملامحه ما اتهزتش ولا ظهر عليها أي تعبير مفاجئ؛ مفيش لا رفض باين ولا ترحيب مبالغ فيه، وفضل ساكت ومتابع ردود أفعاله…آسر كمل بسرعة ونبرته هديت:
_ بس قبل ما تقولي رأيك أو تديني قرار أنا لازم أحكي لك على حاجة حصلت في الأول خالص ولازم تعرفها.
أحمد عقد حواجبه واستغرب كلامه:
_ حاجة إيه؟
آسر بص في عينه مباشرة:
_ حاجة حصلت في بداية علاقتي بيها.. ولو أنا جيت طلبتها منك دلوقتي من غير ما أقولها لك، هبقى بعمل نفس الغلط إلي أنا أصلا جاي أصلحه.
أحمد انتبه له أكتر:
_ اتكلم يا آسر.
آسر سند إيديه على ركبته وأخد نفس:
_ أنا و واحد صاحبي معانا في الكلية أنا وميرال.. حصل بينّا كلام عليها…هو كان مقتنع إنها مبتديش وش لحد ومبتتكلمش، وإنها صعبة وحتى أنا لو حاولت مش هعرف أخليها تهتم بيا أو تفتحلي كلام.
أحمد عينه ضاقت ونظرته بقت حادة، فـ آسر كمل بسرعة قبل ما يقاطعه في الكلام:
_ وأنا أخدت الموضوع عناد وتحدي معاه.. قولتله لأ هعرف وهتشوف.
وسكت.
السكوت اللي نزل في المكتب بعد الجملة دي كان أتقل من كل الكلام اللي اتقال…أحمد فضل باصص لآسر فترة طويلة وبعدها اتكلم بصوت واطي ومكتوم:
_ أخدت الموضوع تحدي؟
آسر هز راسه بـ أسف حقيقي:
_ آه يا عمي.
_ على مين؟ بنتي؟
_ آه يا عمي وأنا عارف إني غلطت.
أحمد قام من على الكرسي بتاعه بالراحة وبخطوات تقيلة، وآسر فضل قاعد في مكانه ما تحركش…أحمد مشي خطوتين جوه المكتب ولف وبص لآسر علطول:
_ يعني إنت داخل تقولي إنك في الأول كنت بتقرب من بنتي وبتتكلم معاها بس عشان تثبت لصاحبك إنك تقدر تخليها تتعلق بيك؟
آسر بلع ريقه وصوته خرج بالعافية:
_ أيوه يا عمي.
أحمد ضحك ضحكة قصيرة بس مكنش فيها أي حاجة تضحك:
_ براڤو عليك.
آسر ما حاولش يدافع عن نفسه ولا يخترع مبررات، وسابه يتكلم براحته…أحمد قرب منه خطوة ونبرته بقت حادة:
_ وإنت شايف بقى إن أنا المفروض أسمع منك الكلام ده وأقعد أطبطب عليك وأعديها بهدوء؟
آسر رفع عينه وبص له بصدق:
_ لأ طبعاً يا عمي.. وأنا أصلًا مش داخل ومستني منك هدوء، أنا عارف إني عكيت.
_ طب إنت كنت شايف ميرال إيه وقتها؟ لعبة؟ حاجة بتثبت بيها لنفسك إنك جامد ومفيش منك؟
آسر نزل عينه للأرض لثواني:
_ تقريبًا آه.. كنت غبي ومفكرتش في زعلها.
نبرة أحمد علت:
_ يعني ايه تقريبا؟ مفيش حاجه اسمها تقريبا يا اسر!
آسر رفع عينه وبص له تاني بثبات:
_ أنا عارف إني غلطت، وكنت داخل بعقلية غبية جداً بس بعدها لما بدأت أقرب منها بجد وأعرف ميرال على حقيقتها حاجات كتير فيها بدأت تفرق معايا من غير ما أخطط ولا أعمل حسابي.. و والله بقيت بحبها بجد ومبقتش شايف غيرها.
أحمد رد عليه بسرعة ونبرة ناشفة:
_ وده المفروض يخليني أطمن لك وأقولك خدها؟
_ لا يا عمي مش مستني منك تطمن و ده حقك.
أحمد سكت خالص، فـ آسر كمل كلامه:
_ أنا مش جاي أقولك إن البداية ملهاش قيمة عشان أنا دلوقتي بحبها.. البداية كانت غلط وأنا بدفع تمن الغلط ده من ساعة ما بعدت عني.
_ وميرال عرفت باللي حصل؟
_ آه عرفت.
أحمد رفع حاجبه بفضول:
_ من مين؟
_ مني يا عمي.. أنا اللي روحت قولتلها بنفسي.
أحمد سكت لحظة بيستوعب كلامه:
_ وإنت اللي روحت اعترفت لها؟ ليه؟
آسر أخد نفس طويل:
_ عشان مقدرتش أكمل معاها وأنا مخبي عنها حاجة بالشكل ده، وكل يوم كنت بـأجل فيه الكلام كان بيخليني أحس إني بني آدم ومش في عين نفسي ومستاهلهاش.. فـ قولت لازم تعرف.
أحمد رجع قعد على الكرسي تاني، بس ملامحه لسه مكنتش هادية:
_ ولما اعترفت لها وقُلتلها.. إيه اللي حصل؟
آسر ابتسم ابتسامة صغيرة تعبانة ومكسورة:
_ طلبت مني أبعد.
_ وإنت سمعت الكلام وبعدت؟
_ بقالي كتير بعيد تماماً يا عمي.
أحمد ركز في كلامه:
_ يعني بقالكم كتير مش بتتكلموا خالص؟
_ بنتكلم عادي لو في لمة عيلة أو حاجة تخص البيت والكل قاعد، كلام عادي وبسيط ملوش أي علاقة بـ زمان.. غير كدة مش بفتح معاها كلام.
_ ومحاولتش تبعت لها؟
_ ولا مرة يا عمي.
أحمد رجع ضهره للكرسي وبص له:
_ وليه ملتزم بكلمتها ومنفذ طلبها بالملي كدة؟
آسر ابتسم بخفة بس ملامحه فضلت جد:
_ عشان هي اللي طلبت كدة.. وعشان أنا أصلاً بوظت أول حاجة بينا لما فكرت في نفسي قبل ما أفكر في مشاعرها هي وإيه اللي يريحها.. فـ مش منطقي النهاردة أرجع أصلح غلطتي بنفس الطريقة الأنانية وأضغط عليها.
أحمد سكت ، آسر كمل وقال:
_ أنا مش جاي أطلب منك توافق النهاردة.. أنا جاي أقولك إن أنا عايزها بشكل رسمي وقدامك، وإن لو هي مش عايزاني ورافضاني، أنا مش هجبرها ولا هقرب منها تاني.
أحمد سأله:
_ طب وليه جيت دلوقتي بالذات وتتكلم بعد كل الوقت ده؟
_ عشان أنا سيبتها الوقت اللي هي طلبته ومضغطتش عليها.. وعشان خلال شهور البعد دول، أنا كنت قاعد مع نفسي ومستني أعرف إذا كان اللي جوايا تجاه ميرال ده مجرد تعلق وعناد عشان هي بعدت ورفضتني.. ولا أنا فعلاً عايزها في حياتي ومبقتش قادر أعيش من غيرها.
_ ووصلت لإيه بقى بعد التفكير ده كله؟
آسر بص في عينه بثبات:
_ وصلت إني عايزها أكتر من الأول بمية مرة، بس بطريقة مختلفة تماماً ونظرة تانية.. زمان كنت عايزها عشان عاجباني ومرتاح معاها وبستنى كلامها، دلوقتي أنا عايزها وأنا فاهم ومستوعب إن الموضوع مش بس ضحك وهزار. أنا عايز أبقى مسؤول عنها وعن اختياري ليها، وأبقى واضح وصريح قدامها وقدامك أنت بالذات قبل أي حد.
ك أحمد بص له بنظرة جادة:
_ والكلام ده أنا أضمنه منين يا آسر؟
آسر هز راسه ببطء واقتناع:
_ متضمنوش من كلامي النهاردة يا عمي.. أنا أصلاً مش مستني إنك تصدقني عشان قلتلك كلمتين حلوين فـ توافق.. أنا أقدر أخليك تشوف أفعالي وتصرفاتي من دلوقتي شكلها إيه وتحكم بنفسك.
سكت ثانية وكمل:
_ ولو رفضتني دلوقتي، مش هقول إنك ظالم وجيت عليا.. ولو ميرال رفضت، مش هقول إنها قاسية وجرحتني.. أنا عارف أنا عملت إيه وبدفع التمن ومستعد أتحمل نتيجته.
أحمد بص له فترة طويلة والسكوت ساد المكان. الغضب اللي في عينه ماختفاش تماماً، بس طريقة آسر وصراحته واعترافه بغلطه من غير لف ودوران كانت مانعة الغضب ده إنه يتحول لقرار سريع بالرفض…بعد شوية تنهد وقال:
_ أنا أكتر حاجة مضايقاني في الليلة دي كلها إنك ابن أخويا يا آسر.
آسر نزل عينه للأرض بوجع:
_ عارف يا عمي، ودي أكتر حاجة مخلياني مكسوف منك.
_ لو واحد غريب وبعيد عمل الحركة دي مع بنتي، كنت هزعل وأرفضه وخلاص وميفرقش معايا.. بس انت ابني يا اسر وميرال عارفاك وحافظاك من وهي عيلة صغيرة وبتثق فيك.
آسر قال بصوت واطي وهادي:
_ عشان كدة أنا ماليش أي عين أدافع بيها عن نفسي في الحتة دي..
أحمد سكت شوية بيفكر، وبعدين قال بنبرة قاطعة:
_ أنا مش هقولك انهارده موافق.
آسر هز راسه باقتناع:
_ حقك طبعاً.
_ ومش هقولك رافض برضو.
آسر رفع عينه وبص له بلهفة ورجاء مستني يكمل، فـ أحمد كمل كلامه:
_ القرار الأول والأخير مش بتاعي لوحدي.. دي حياتها هي ومشاعرها وهي الحرة فيها.
آسر سكت واستمع له بتركيز.
_ أنا هقعد وأتكلم معاها، ولو هي أصلاً قافلة السيرة ومش عايزة تفتح الموضوع، يبقى الحكاية تقف لحد هنا وكل واحد يروح لحاله.
_ تمام.
_ ولو قالت إنها مستعدة تفكر وتديك فرصة تانية وتسمعك، ساعتها يبقى بينّا كلام تاني وتفاصيل تانية خالص.
آسر قام من مكانه وحس إن جبل انشال من على صدره:
_ تمام يا عمي.. كتر خيرك.
•••••••••••••••••••••••••••••••••••••••••••••••
أحمد ما كلمش ميرال في نفس اللحظة.
استنى لحد بالليل، لما البيت هدي شوية.
كانت قاعدة في أوضتها بتذاكر لما خبط على الباب.
ساندة راسها على المكتب وسرحانة.
أحمد دخل بالراحة وطبطب على كتفها.
ميرال اتخضت ورفعت راسها بسرعة:
_ بابا! خضتني، إنت صاحي لحد دلوقتي؟
أحمد ابتسم وسحب الكرسي وقعد جنبها:
_ صاحي وقاعد مستني البيت يهدى عشان أعرف أتكلم معاكي براحتنا.
ميرال عدلت قعدتها بتوتر.
أحمد أخد منها القلم اللي في إيدها وحطه على المكتب:
_ قولي لي بقى إيه اللي شاغل بالك للدرجة دي ومخليكي سرحانة كده؟
ميرال لفت وشها بعيد وهي بتهرب بعيونها:
_ مفيش حاجة يا بابا.. ضغط المذاكرة والامتحانات بس.
_ عليا أنا برضه الكلام ده يا ميرال؟
ميرال بلعت ريقها وسكتت.
أحمد كمل بنبرة هادية:
_ آسر كان عندي في المكتب تحت انهارده.
ميرال جسمها اتشد تماماً، ولفت له وعينيها وسعت بصدمة:
_ هو.. هو قالك؟
أحمد هز راسه بطمأنينة:
_ اه قالي.
ميرال صوتها اترعش:
_ قالك ايه.
_ حكالي كل حاجة من أولها لآخرها.. وقالي إنك منفضة له بقالك حبه ورفضاه تماماً.
ميرال نزلت عينيها للأرض وحست بالكسوف واللخبطة:
_ أنا بجد كنت عايزة أجي أقولك والله بس مكنتش عارفة أبدأ منين وبقالي فترة بـأجل الموضوع عشان مضايقكش.
_ أنا مش زعلان منك إنك خبيتي يا ميرال.
ميرال رفعت عينها له باستغراب:
_ بجد؟
أحمد هز راسه وحط إيده على كتفها:
_ أنا بس زعلان إنك شيلتي الهم والوجع ده لوحدك ومجيتيش في حضني تحكيلي.. ليه خبيتي عني ياحبيبتي؟
دموع ميرال نزلت غصب عنها، واستخبت في كتفه وصوتها خرج مخنوق:
_ خوفت أقولك تضايق وتزعل منه او تدخل عمي عبد الله وتتقلب خناقة كبيرة.
أحمد طبطب على ضهرها بحنان:
_ يا بنتي إحنا أهل، وأنا ضهرك وسندك في الدنيا دي.. ومفيش حاجة هتكبر بينّا وبينهم ده اخويا ياحبيبتي.
ميرال بعدت وشها ومسحت دمعتها:
_ وهو جاي عايز إيه دلوقتي؟
أحمد بصلها بجدية:
_ هو عايز يتقدملك.
ميرال سكتت لثواني وبصت للأرض.
أحمد كمل كلامه:
_ وقالي إنه مستعد لأي قرار هتقوليه حتى لو رفضتيه.
ميرال لفت وشها وبصت لأبوها بحيرة واضحة:
_ بس أنا خايفة يا بابا.. خايفة أوافق على الخطوة دي كأني بسامحه بسهولة على اللي عمله.
أحمد ابتسم:
_ ومحدش قالك سامحيه من النهاردة يا ميرال.
_ إزاي يعني؟
أحمد شرح لها بهدوء:
_ الخطوة الرسمية دي مبتمسحش اللي فات، دي مجرد فرصة عشان يثبتلك بأفعاله وتصرفاته الجاية إن كان يستاهل الثقة دي وتكملي معاه ولا تقفلي الباب في وشه وميرجعش تاني خالص.
ميرال سكتت لثواني وبتفكر في كلامه، ونبرة الزعل لسه في صوتها:
_ بس يا بابا الزعل مش بيروح في يوم وليلة، وأنا بجد شايلة منه أوي.
أحمد هز راسه بتفهم:
_ عارف.
ميرال كملت بحيرة:
_ ينفع أديله فرصة وأنا لسه مش صافية له وزعلانة؟
أحمد رد عليها بهدوء:
_ وأيه المشكلة؟
ميرال بصت له بعدم فهم.
أحمد ابتسم:
_ توافقي على الخطوة الرسمية دي وأنتي لسه زعلانة، وتخليه يتعب ويشقى عشان يصالح قلبك.. الاتنين يمشوا مع بعض عادي ومفيهاش أي مشكلة.
ميرال بصت للأرض وسكتت، وحست إن كلام أبوها ريح حيرتها شوية بس لسه في فضول جواها، فسألته بصوت واطي:
_ هو.. هو كان عامل إزاي وهو بيتكلم معاك؟
أحمد ضحك عشان يفك توترها:
_ كان مرعوب ووشه جايب ألوان.
ميرال ابتسمت خفيف من غير ما تقصد:
_ بجد؟
أحمد هز راسه بضحك:
_ اه والله الصراحة صعب عليا من كتر التوتر الي كان فيه.
ابتسامة ميرال وسعت شوية ومقدرتش تداريها، وأحمد لقطها
علطول وبصلها بحب:
_ أنا مش هجبرك على حاجة يا بنتي.. دي حياتك وإنتي الحرة فيها.
ميرال تنهدت:
_ يعني لو رفضت مش هتزعل؟
أحمد أكد لها:
_ وانا هزعل ليه؟ لو مش عايزاه قوليلي حالا وهقفل السيرة دي ومحدش هيفتح بوقه معاكي فيها تاني أبداً.
ميرال نزلت عينيها للأرض وسكتت شوية.
أحمد استناها لحد ماتتكلم.
ميرال قالت بصوت واطي:
_ طب لو أنا لسه زعلانة وشايلة منه.. بس في نفس الوقت مش عايزة الباب يقفل خالص ومش عايزة أخسره؟
أحمد مال عليها شوية وبص في عينيها:
_ قولي لي بصراحة يا ميرال.. لو قُلتلك انهارده إن آسر مش هيفتح الموضوع ده تاني وخلاص حكايته انتهت وقفلنا الباب نهائي.. هترتاحي؟
ميرال سكتت لثواني طويلة، وبصت لأبوها وقالت وصوتها فيه غصة:
_ لأ.. مش هرتاح يا بابا.
أحمد هز راسه باقتناع وطبطب على إيدها:
_ خلاص.. يبقى أنتي كدة عرفتي قرارك والباب لسه موارب جواكي.
أحمد ابتسم:
_ قولي لي، هتعملي إيه؟
_ أنا مستعدة أدي فرصة كـ بداية.
_ متأكدة؟
ميرال هزت راسها:
_ بس عايزة أقعد معاه الأول، وأتكلم معاه بوضوح ويسمع شروطي كلها قبل أي خطوة.
أحمد ابتسم لها وباس راسها بحنان:
_ وهو ده الصح ومفيش كلام فيه.. خدي وقتك خالص يا حبيبي.
•••••••••••••••••••••••••••••••••••••••••••
تاني يوم، ميرال بعتت لآسر رسالة:
“عايزة أتكلم معاك لما تبقى فاضي.”
الرسالة فضلت قدامه على الشاشة دقيقة كاملة، باصص ليها ومش مصدق، لحد ما رد علطول:
“أنا فاضي، قوليلي الوقت اللي يناسبك.”
اتفقوا يتقابلوا في الجنينة بره بعد العصر.
ميرال نزلت، ولقت آسر قاعد ومستنيها ومتحركش من مكانه غير لما شافها.
آسر قام وقف علطول وسألها وهو بيشاور بـ إيده:
_ تحبي نقعد هنا ولا عند الترابيزة اللي جوه؟
ميرال بصت حواليها في هدوء:
_ هنا كويس.
قعدوا قصاد بعض، والسكوت فرض نفسه في الأول.
مكنش نفس الخنقة والتقل بتاعة قبل كده، الجو كان أهدى شوية بس التوتر لسه موجود.
آسر قطع الصمت ده وسألها بصوت واطي:
_ عمي قالك؟
ميرال هزت راسها:
_اه.
_ وأنا عارف إن يمكن كان المفروض أقولك قبل ما أروحله وأفتح معاه الكلام…
ميرال قاطعته:
_ لا، أنا مش زعلانة إنك رحتله.
آسر رفع رأسه وبص لها باستغراب وسكت.
ميرال كملت:
_ بالعكس… يمكن دي أول حاجة من وقت اللي حصل حسيت إنها فعلًا مختلفة عن طريقتنا القديمة.
آسر فضل باصص لملامحها ومحبش يقاطع هدوءها.
ميرال شبكت صوابعها في بعض بـ لخبطة:
_ بس أنا عايزة أقولك حاجة من الأول عشان ميبقاش في سوء فهم بينّا.
آسر انتبه لها:
_ قولي.
ميرال ثبتت نظرتها وقالت بـ حسم:
_ موافقتي إننا ندي الموضوع فرصة مش معناها إني سامحتك وخلاص وكل حاجة اتمسحت.
_ وانا فاهم.
ميرال كملت بـ وضوح:
_ ولسه في حاجات لما بفتكرها بتضايقني.
_ حقك.
ميرال صوتها هدي سنة كمان:
_ ولسة أوقات بسأل نفسي إذا كان كل موقف حصل بينا زمان كان حقيقي ولا كدب.
آسر اتنهد بـ ضيق من نفسه:
_ وأنا عارف إن دي حاجة أنا اللي سببتهالك وندمان عليها.
_ فلو إحنا هنبدأ حاجة من جديد… أنا مش عايزة نرجع لـ أسلوبنا الأولاني خالص.
آسر ركز في كلامها:
_ تقصدي إيه؟
_ أقصد إن تعاملنا يبقى بحدود واضحة.
آسر فضّل مستمع ليها وماتكلمش.
_ مفيش مكالمات بالساعات.
آسر هز راسه بالموافقة.
ميرال كملت:
_ مفيش خروج لوحدنا بره البيت مثلا.
آسر فضل متابعها بـ هدوء.
ميرال قفلت الكلام:
_ ومفيش تعامل كإننا رجعنا لبعض وكل الزعل ده اتمسح في ثانية.
آسر هز راسه ببطء ومن غير أي تفكير أو تردد:
_ تمام.
ميرال اتفاجئت من رده السريع ولفت وشها له بـ ذهول:
_ تمام كده؟ بالبساطة دي؟
آسر ابتسم:
_ آه طبعاً.
_ مش هتعترض؟
آسر ابتسم بخفة ونبرته بقت اخف بكتير وهو باصص لها:
_ لأ مش هعترض.. أنا أصلًا جاي أبدأ صح، مش جاي أرجع لنفس الطريقة الغبية اللي بوظت فيها كل حاجة بينّا.
ميرال سكتت خالص.
آسر كمل كلامه بثبات:
_ وبعدين إنتي من حقك تحطي الحدود اللي تخليكي مرتاحة ومتطمنة معايا.
_ و كمان مش بوعدك إن الثقة دي هترجع بسرعة ومتفتكرش إنها سهلة.
آسر رد عليها علطول بـ حنان:
_ ولا أنا مستنيها ترجع في يوم وليلة و بالي طويل.
_ وممكن نختلف كتير على فكرة ومنتفقش.
آسر ضحك ونبرة صوته لفت لـ مناقرة خفيفة:
_ إحنا كنا بنختلف كتير ونمسك في بعض قبل أصلًا ما يحصل أي حاجة بينّا.. دي مش حاجة جديدة علينا يعني.
ميرال حاولت تمنع ضحكتها:
_ آسر، أنا بتكلم بجد ومش بهزر.
آسر مأل براسه عليها سنة:
_ وأنا كمان بتكلم بمنتهى الجدية والله، بس مش لازم كل الكلام يبقى تقيل وخناق.. فكيها بقى.
ميرال ابتسمت رغماً عنها.
سكتوا شوية والمود اتقلب لـ راحة حقيقية صافية بينهم.
آسر هدى صوته وبص لملامحها بـ حب:
_ أنا بس عايز أقولك حاجة واحدة يا ميرال وتفضل في بالك.
ميرال رفعت عينها وبصت له بـ فضول:
_ إيه؟
_ أنا مش داخل المرحلة دي عشان أثبتلك إني اتغيرت بـ الكلمتين الحلوين دول.. لو هترجعي تثقي فيا تاني، خليه يحصل من الأفعال اللي هتشوفيها بنفسك من اول دلوقتي.
_ وده بالظبط اللي أنا عايزاه ومستنياه منك.
آسر ابتسم براحة:
_ خلاص اتفقنا.
•••••••••••••••••••••••••••••••••••••••••••
يوسف رجع من الشغل متأخر، دخل الشقة وهو هلكان، رمى مفاتيحه على التربيزة، ومكتوم ومصدع من ضغط اليوم كله.
أحلام كانت قاعدة في الصالة، مجهزة الشنط ومتحمسة للسفرية اللي متفقين عليها بقالهم أسبوع عشان يفصلوا سوا.
يوسف قعد على الكنبة وغمض عينيه بتعب:
_ أحلام.. اعمليلي اي حاجه اشربها بسرعه عشان نازل تاني، ومعلش اعذريني مش هنعرف نسافر بكره.
أحلام حركتها وقفت تماماً، وبصت له بصدمة:
_ مش هنعرف إزاي؟ إحنا مرتبين كل حاجة أنا جهزت الشنط يا يوسف.
يوسف أخد نفس طويل ومن غير ما يفتح عينيه:
_ عندي تسليم شغل مهم جداً الصبح جالي فجأة، ومينفعش أسيب الموقع وأمشي.. فـ السفرية لازم تتأجل.
_ انت ليه بتتكلم بالبساطه دي.
يوسف فتح عينيه وبص لها بضيق:
_ يعني أعمل إيه يا أحلام؟ الشغل جالي فجأة مش بمزاجي يعني.
أحلام صوتها خرج مرتعش بـ عتاب:
_ إنت لسه زي ما أنت يا يوسف.. الشغل عندك دايماً رقم واحد.
يوسف اتنرفز من كتر الصداع والضغط، وقام وقف ونبرته عليت:
_ هو أنا بطحن نفسي في الشغل ده عشان مين؟ مش عشان بيتنا وعشانك؟ بلاش بقى الحجج والنكد بتاع كل مرة ده وتكبير المواضيع!
احلام اتخضت من صوته العالي وبصتله بدموع ، وهو أتنهد بـضيق وقام وهو بياخد مفاتيحه وبيقول:
_ أنا هقوم انزل خلاص مش هشرب حاجه.
خرج و قفل الباب وراه، وساب أحلام قاعدة لوحدها في نص الصالة، ودموعها نازلة وهي بتعيط بانهيار.
شكرا لزيارتكم عالم روايات سكيرهوم
