رواية خلخال مشوه الفصل السابع عشر 17 بقلم زمرده

 

 

 

رواية خلخال مشوه الفصل السابع عشر بقلم زمرده




زمخ بي فلت من ايدهم و راد يضربني
ضاري : نرد للبيت مو هنا حسسسن

أبتسمت بوجع وانا اباوع الأبوي درت راسي من جتهم اباوع للفراغ ودمعتي بعيني تفتر ،والله القهر البگلبي لو حجيته جرايد ما تكفي

طلعوني بساع بساع ،وانا بس طبيت للبيت قريت على روحي الفاتحة لان اعرف بيهم متحلفيلي وانا بهذا حالي تگابلوا علي ثنينهم والله كل كفخة اكلتها تگل للثانية انا اقوى منج من هدومني تعجبت شلون بعدني مفتحه عيوني واباوعلهم گدامي واگفين كل واحد بيهم كاف رداناه چن جانوا بمعركة مو يطگون ببت لا حول لا قوة

بلعت ريگي ومن گد ما عيطت احس ببلعومي مجرح،گمت گوه على روحي امشي والوجع
يزيد علي طبيت للغرفة
تمددت على الفراش وانا صافنه ما اعرف صابني هدوء غريب هدوء وراه لو حرگت البيت عليهم ما راح ارتاح ولا يهديلي بال

دگت ساعة 12 وانا كل مابي قهري يزيد وماكو حل گدامي غير امشي هناك گمت وبالگوه اسحل بروحي ومثل كل مره طلعت وانا چن رايحتلي لبشر اشكيله مو للشط ،دموعي تطيح عشره عشره الدرب گوات اشوفه ومن وصلت گعدت اليوم حتى صوت الططوه ماكو والهدوء غريب من غير برودة الجو تدگ بالعظم وانا لبسي خفيف ما يدفي ضليت ارجع بس ما اريد ارد هاي گعدتي هواي احسن من بيت ما محتويني

حطيت ايدي على خدي وضليت اباوع ع الماي وانا كل غصة ابلعها تحرگ روحي حرگ اخذت نفس ونزلت عباتي من راسي فتحت الشال اريدن اتنفس انا احسن بالنفس يضيگ عدي كل ما اتذكر موقف مو مواقفهم والزاد قهري ضربهم اليوم وانا بهذا الحال

شلت ماي من الشط غسلت وجهي ومن نشفته بعباتي انتبهت الشاش والاسق متنگعات فتحاهن وحطيتهن بصفي ضل جرحي مكشف والخيات ذيج هي مبينه فتحت قراصتي ونزل شعري وانا كلي تفكير ماكو احد يجي بهل برد غيري ياهو اليطلع والجو هيج يگص گص من البروده

بس الحسبته طلع غلط من حسيت بخطوات وراي انداريت بساع وگمزت من شفته وراي بس داير وجهه مني لبست شالي بساع و وگفت البس بعباتي وهو حمحم واندار

ليث : ليش تجين بهل وكت

_ شنو

ليث : شمطلعج بهالبرد

_ اهلي
وانا ياكلمة الاهلي شگد تهضمني لو شكيت حالي منهم

ليث : ماتخافين

هزيت رأسي ب لا
ليث : باچية

بحياتي ما احد سألني باچية لو لا ،وانا بس سمعتها بساع طاحن دموعي انشده هو مستغرب ليش بچيت
ليث : ليش تبچين

رفعت ايدي امسح بدموعي وهو عينه صارت وي أيدي نزلتها بساع

باوع بوجهي
ليث : رايده تنتحرين

هزيت رأسي ب لا
_ بس ردت اخلص منهم تعبوني والله

ليث : چا تخلصين منهم بهالشكل

تنفست حايرة شأرد عليه وانا أعرف السويته غلط بس چانت ساعة شيطان
ليث : لا تأذين روحج هيج بعد روحج امانة عدج وتتحاسبين عليها يم ربج

ضليت اباوعله بلاية ما احجي وهو سكت ومشى بس شوي واندار علي
ليث : امشي ردي لبيتكم

_ اريد اضلن هنا

ليث : امشي كواكب

رمشت بعيوني
_ كوكبة

ليث : ماكو فرق بالاثنين بالسمه

ضحكت وحطيت ايدي على حلگي وهو أبتسم وأشرلي امشي مشيت وراه وبس خلصت الگيعان سألني
ليث : منين دربج بعد

اشرتله بين كل مره
_ منا

ليث : شلون درب عمي النسوان فلا تنگدرن

أبتسمت ومشيت وهو ضل واگف رديت للبيت وبساع ضاگ صدري عكس گبل شوي احس بروحي مشى الهم مني

حطيت روحي على الفراش وغفيت بعد ما شگد توسلت بعيوني بس يغمضن ،ومن گعدت بين
علي وجع ضربهم گمت وانا بكل خطوه تشيغ روحي

فتحت باب الغرفة وباوعت على الصالة فارغة بس امي گاعده تحجي وي خالتي بالموبايل بلايه ما احجي وياها مشيت للمطبخ سويتلي ريوگ وگعدت اكل وبس خلصت مشيت گعدت بالحوش اباوع على النخل مال قرية أل غضب مبينات گدامي رديت طبيت جوه من صاحتني أمي بلايه ما احجي وگفت گدامها

أبتسمت من رفعت ايدها وغمتني
نادية : عاب لهل وجه هذا

_ شتردين صحتيني

نادية : خالتج خابرتني تگول الجمعة الجاية تجي تمشي عليج الابنها مرتضى

_ أي

نادية : شنو أي

_ يعني شأسوي

نادية : گلتلج حتى يصير عدج خبر

_ ما ارضى

نادية : ليش بكيفج

_ جا بكيف منو

نادية : انا من زمان گايلة لخالتج أنت الها شني بكيفج تحجين وتخربيني وي أختي

_ جا تجبريني

نادية : شبي أبن خالتج وما تردي

_ ما اطيق

نادية : تطيقي من تعقدون هاي السوالف مو حجة

_ يمة عوفيني بروح ابوج لان خلگ ماعدي

زمخت بي
نادية : امشي ولي ،مو صوجج صوج التكبر راسج وتگلج

مشيت للمطبخ اغسل المواعين الضاله احسلي ولا هل مغثه هاي غسلتهن وكفيت المطبخ كله وطلعت أرجف من البرد بساع گعدت گبال الصوبة ادفي أدية وثوبي ومن حسيت بروحي دفيت گمت انضف بالگوه ايدي انتهت من الوجع احس شوي والخياط بعد يطگ

كملت شغلي وطبيت للغرفة لازمة ايدي والدم يطيح منها جريت شالي وشديتها بي وگعدت اهون على روحي وجعها لان اعرف لو اتوسل
بيهم ما راح يأخذوني ولا بيهم واحد يحن لو شافني متوجعه عاد اضل انا وحدي هنا اضمد جروحي بلايه منيتهم علي

°حواري°

رديت من المدرسة بس طبيت كفختني ريحة مرگة الدجاج الصفره نزعت عباتي وشمرت الجنطه ومشيت فتحت قبق الجدر وصبيتلي من مايها ومشيت للصاله الكاسة بأيدي سلمت وگعدت بصف بصائر الأول ما شافتني گلبت ملامحها تباوعلي حسستني مادري شني بأيدي

_ خاب شبيج لعبتي روحي

حطت ايدها على خشمها
بصائر : اندري شو گلبت معدتي فرد نوب

نجوى : مو اگولن حامل تگولين لا والله حامل

بصائر : شني السالفة عمة شبسرعة

نجوى : جا شني مو مرة وما تحبلين

بصائر : عمة ماريد هسه والله

نجوى : مو اگوملج

ضحكت وبساع گامت ركضت للحمام ركضت وراها انا وامي وهي وگفت يم المغسلة شكو شي ماكلته فرغته روحها انسحنت غسلت وجهه وسندتها واحسن بيها ما مستقره اذا اهدها تطيح گعدت وامي گعدت بصفها

بصائر : عمة راح اموت ما اگدر اشوفن عدل دايخة

نجوى : خاف ضغطج نزل

باوعتلها تنود براسها ما مستقره
_ يمة مبينة عدها هبوط

نجوى : تمشين لبيت چدج تصيحن واحد من الولد بلكت ناخذها لاتضل هيج وتطيح فرد نوب

هزيت رأسي ب أي وگمت لبست حجابي وعباتي ومشيت لبيت جدي هستوني طبيت وطب ليث اندريت باوعتله مبين هستوه جاي من الگيعان هل هدومة كلهن ترابة

عدلت وگفتي وگلتله
_ الله يساعدج

أبتسم و وگف گبالي
ليث : مبين رايده شي گولي

_ بصائر تخربطت واخواني مو هنا تجي تاخذها أنت وأمي للمستشفى

ليث : سلامتها هم هبط ضغطها

_ أي وأمي گالت صيحي أحد گبل لا تفقد

ليث : بس تأنيني ابدل هدومي

_ خوش

مشى يطب جوه وانا مشيت وراه بس طبيت
للصالة شفتهن جده وعمة والبنات ملتمت سلمت عليهن وضليت واگفه

غضة : جا شبيج ما تگعدين

_ متاني ليث يبدل ونمشي انا وياه لان نريده ياخذ بصائر للمستشفى

زهرة : يااا خيرها

غضة : بسلا هم ضغطها

_ أي والله طاحت علينا وخلتنا حايرين وين نطي وجهنه وبالبيت ولا واحد ضال

غضة : جا انا ماشيتلها

زهرة : انا هم امشي وياج

غاية : شني واحنه المن ضالين

استغربت من ما مداومة
_ شني غاية غايبة أنت

غاية : أي ماعدي شي وغبت امس الامتحان كفه و وفى وياي

_ خلصتوا امتحانات لو بعدكم

غاية : هذا أخر امتحان من امتحانات الشهر الثالث

_ انا هم ضلي بس واحد والخميس

جفون : احنه اليوم أنتم شعجب الخميس

_ المعلمة گالت احنه وشعبة ثانية حتى لا تصير خبصة

نزل يعدل بشعره ومشى يصحني
ليث : يلا حواري

مشيت وراه بساع وهو بأيدة مفاتيح سيارة صخر شغلها وصعد بساع وانا مشيت لبيتنه بس طبيت صحت

_ يمة اجه ليث ياخذچن

طبيت وانا انزع بعباتي
نجوى : جا جيبيلها حجاب وعباة بساع

ماحجيت شي ومشيت صعدت لغرفتها طلعتلها شال وعباة ونزلت اطيتهن الها گامت لبست الشال والعباة وردت گعدت حاطة ايدها بالگاع تريد تسيطر على دوختها

من سمعت صوت الهوره ببابنه گومتها وامي طلعت من الغرفة لابسة عباتها ،بس شافنه نزل فتح باب السياره يحجي وي أمي مقهور من حالها هذا وبس
مشوا أجت يمي جده وعمة زهرة وماكو نص ساعة ولحگنهن البنات

وبس سمعنه صوت السيارة طلعنا انا والبنات نباوع طبت أمي شايلتلها المغذي وفقار ساندها ومبين ليث
مخابرة لان هدومة كلهن دهن

طبوا واحنه وراهم نمشي ،من طيبنه المطبخ طب ليث والضحكة لازمته من يحجي
ليث : خاااب فقار سواياتك ما نواقيص تزوجت گبلنه گلنه ميخالف تخلف گبلنه ليش

صاحله من الصالة
فقار : انعل ابو الجهال شوف حالها شلونه

طب وراهم للصالة واحنه لحگناه هي گاعده وفقار يسويلها بالمغذي
ليث : خاب دنچب غير من خابرتك طرت ،تسوي روحك ضايج گدامها

فقار : چا شني اچذب فرحت بس من شفتها هيج خفت عليها وفرحتي نگصت

غضة : خايبين شجاي تحجون

نجوى : چا عمة ماعرفتي من حجيهم بصائر حامل

ضحكت جده وباوعت لفقار
غضة : ياحبوبة بالمبااارك راح تصير ابو

أبتسم وهز رأسة ب أي ودنگ باس راس بصائر
ليث : طيح الله حضك ،مو اقن عمها واگف

فقار : جا شسويلك

زهرة : تگومين بالسلامة عمة

بصائر : الله يسلمج حبيبتي

هيوفة : بالعافية مرة حماي

ضحك فقار وجاوبها
فقار : راح اصير ابو گبلكم

ليث : ذكرتوني گومي هيوفة ماعدنه نسوان تجي لبيت عيالها گبل لا تتزوج

غضة : شني بكيفك

ضحك ومبين يريد يحجيها
ليث : جا بيكف منو

غضة : بكيفي انا وخلها تضل المملوح لا اگوملك

ضل يضحك ولزمته الگحه مشيت بساع جبتله ماي اخذه مني
ليث : رحم الله والديج

أبتسمت
_ و والديك

أول ما رديت گعدت حسيت بگرصة بخاصرتي
همستلها
_ راح اطيح حظج

جفون : الخفيفة

_ انجبي

جفون : مو اكتلج گدامهم

_ انا الاكتلج

جفون : انا واطيح حظج

_ ادبسزز

سكتت عنها حتى لا نتعارك ونتخزه گدامهم
ليث : يمة انا جوعان ما الج نية تمشين للبيت

نجوى : انا مسوية غده اصبلك أنت وفقار

فقار : صبيلنه يمه شني تاخذين رأية

ليث : شو صاير فرد نوب أنت

حركله حواجبة وندار يعدل بصوندة الكانونه وانا لحگت امي من صاحتني لگيتها شاعلة النار جوه الجدوره حتى يحمى الاكل

نجوى : حضري الصينية

حضرت الصينية وهي صبت ومن خلصت مشيت للصالة
_ گوم فقارة اخذ الصينية بالديوانية لا تشمتم الريحة بصائر وتتخربط

باوع بعيونها التعبانه وگام شال الصينية واخذها وانا وراه شلت دولكة الماي وبس رديت للمطبخ طب نوح
نوح : اهلي يمكم شو بيتنه فارغ

نجوى : أي جوه متغدي لا

نوح : لا والله طاگني الجوووع

نجوى : جا امشي اكل وي فقار وليث بالديوانية

نوح : شنيييي شعده گاعد وي ليييث

طب يصيح
نوح : ولك فقاااار بدلتني يا غداااار

صوتهم عالي لهنا يوصلنه
فقار : ما ابدلك بس خطية ليث جوعان وگعدته وياي

نوح : هااا

ليث : شني احسن بروحي طرف ثالث

نوح : ماحجيت الا الصدگ والله

ليث : نوح مو احطك بحلگ فقار

نوح : جا عبالك ما يعارف

ليث : زين هم بيناتكم اسرار وهيج

فقار : جا شعبالك هذا الضلع الماينشلع من الدنگة للدنگة

ليث : خل اكل وأمشي منكم احسلي

ضحكوا هم وليث بعد ما رد حاجاهم وانا مشيت للصالة گعدت بصف بصائر اتحارش بيها ومن الجهه الثانية گاعده هيوفة
_ خاب شبيج ما اطيتنه مجال احد گالج بس تزوجي حبلي

بصائر : دولي مني

غضة : لا تتگربين يم بصائر لا اجي اطگج

_ هااا هاي لان حامل

غضة : الله اطاها أنت شلج غرض

_ جده شوفيها روحها رايحة

غضة : راحت روح عدوها

_ هلا هلا جانت وحده صارن ثنين واحنه النا الله

غضة : عود من تتزوجين وتحبلين هم اوگف وياج

_ ياااع احبل شبي مخبله واصير فطسية مثل بصائر

بصائر : أنعم الله عليج

ضحكت وباوعتلها
_ تدللين

هيوفة : وخري منها لا اگوم انا اوخرج

_ خااااب شبيچن وياي بطلت بعد ما اخذج الاخوي

غضة : جا شني بكيفج

گمت تخصرت
_ انا اگله مرتك ماتحبني هدها وهو راح يدها لان يحبني

جده بصفها عوجيتها من رفعتها رفعت راح تشمرها علي ركضت وانا اضحك
وهي تصيح علي
غضة : خاب نص نصيص تعااااي يمي حتى اكسرها على راسج

مديت راسي من باب المطبخ
_ شني مخبله اجي يمج وانا مندگة بالعزيزة

غضة : انا الج حورية

ضحكت وطبيت للمطبخ اسوي جاي لان أعرف هسه راح يگولن وين الجاي ،وصدگ بس حطيت القوري ع النار طب فقار شايل الصينية حطها على المجمده

فقار : سويتي جاي

اشرتله ع الطباخ
_ هذا ع النار

فقار : خوش بس بساعج

_ شني احطه على گلبي غير هذا گدامك ع النار شوكت ما يخلص اصبلكم

فقار : موش لسان بلاء اسود

رفعتله حاجبي وهو جابني بغمه على راسي خلاني ارجع ليوره لزمت راسي اگمز

_ انا الك اذا ما گلت لضيرم عليك شوووف

فقار : جا تستاهلين شني ترفعيلي بحواجبج

_ انا متعلمه

فقار : جا خوش كل ما ترفعيهن اطگج

_ وانا اگل لضيرررم

فقار : گليلة

_ من يجي مو يطيحن ريشات

ضحك ومشى وانا ضليت بالمطبخ بين ما خلص الجاي صبيتلهم ومشيت دگيت باب الديوان حتى يجي ياخذه

فتح الباب يباوعلي صفح وانا گلتله
_ تعال اخذ الجاي

فقار : ليش ما جبتي أنت

_ عيب أنا اجيبنه وأنت موجود

طلع وسد الباب
فقار : قنعيتي

مشى گدامي اخذ الصنينة ورد وانا رديت للصالة بس شافتني جده گالت
غضة : وين شردتي

_ ما شردت سويت جاي

غضة : شعچب عاد أنت مو نادره

_ مني گالج انا مو نادره اصلا انا يوميا اغسل المواعين كلهن وما مخلية بصائر تغسلهن واسأليها

باوعت جده البصائر وجنها صدگت
غضة : ولج صدگ بصائر

ضحكت بصائر وهزت راسها لا وجده ردت تحجي علي وانا اضحك
غضة : مو اگولن خلصتي عمرج مو يم النداره شني من تالي تتغيرين

_ شني جده خلصت عمري هو أصلا انا منيلي عمر كله سطعش سنه

غضة : جا البعمرج امهات

_ هاي گبل جده مو هسه

غضة : جا شيفرگ

_ جده كل وكت واله عاداته

غضة : امشي أم الوكت جيبلي ماي يبس ريچي

حركت حواجبي
_ الله ييبس ريچ عدوچ

ضحكت تهز بايدها وتدعيلي بالعقل مشيت جبتلها ماي ورديت گعدت اباوع بوجه هيوفة
_ اگلج شني كل الينخطبن هيج يصيرن يطگن بالگاع لو بس أنت

ابتسمت خجلانة وما معقول جده ماترد بدالها
غضة : جا هي من يوم يومها حلوة حفيدات رأجس

_ شني جدددده جا واحنه

غضة : كلچن حلوات بس هي غير

فتحت عيوني وانا وغاية وجفون صحنه
_ شنيييي

ضحكت عمة تقنع بينه
زهرة : اعذرن جدتچن لان تحبها تشوفها احلى وحده

جفون : جا انا شبي مو حلوه

زهرة : تخبلين چنج حمامة بيضة

جفون : فدوة اروحلج ،باعي جده شلون جبرت خاطري مو مثلج تدوسين بخاطري

غضة : چنج بيضة لگلگ

جفون : جددده

غضة : وسما يوم عن يوم اعرف حفيداتي دلالات

بصائر : حتى انا جده

غضة : لا من عداج أنت وهيوفة وريحانة وميمنة وغاية

گمت اكف برداني
_ اليوم اتعااااارك قصدج انا وجفون مووو

غضة : أي وشني كفيتيلي رادناتج عبالج اخافن منج

_ لا بس انا من اريد احجي اكف رداناتي

غضة : جا احجي نسمعج

ضحكت وگعدت ،والله يا جده فلا تنگدر وكل مره هيج اريد اتعارك تخليني ابطل واگعد باوعتلها خاله اصبعها على راسها ردت اسألها شجاي تفكر بس باوعت الامي من سمعتها تحاجي بجده وعمة زهرة

نجوى : انا من گد ما انشدهت نسيت اودي احد على شيماء
هسه تضل تحجي

غضة : زين ما وديتي عليها تضل تنوح وتسطرني سطر

زهرة : جا شلون ما تنوح غير بتها ياعمة

غضة : ودن عليها هسه گللها بتج حبله هسه ترد روحها

ضحكنه نباوع لچده وهي مبين تحجي صدگ ما جاي تتشاقة
نجوى : گومي حواري گلي الاخوج يمشي لعمتة

گمت وانا من كل عقلي اسأل
_ أم مرته لو مرة عمة

نجوى : اثنيهن بساعج يلا

_ أي أي

مشيت دگيت باب الديوانية بس فتحها سطرتهن گدامة بساع
_ أمي تگول امشي لبيت عمي يوسف وجده تگول گلها بتج حبله

حجيتهن ورديت گعدت وماكو اقل الربع ساعة وطبت عمة
شيماء : السلام عليكم

ردينا عليها السلام وهي گبل لا تگعد گال
شمياء : جا هيج انا آخر من يعلم بتي واگعة وطابة مستشفى وما تگلولي

نجوى : خايبة خية انشهدت وراح من بالي

شمياء : جا أنت راح من بالج ورجلها هسه تذكر اجاني

غضة : احنه وديناه

شمياء : يعني لوما مودي هم ما يجي

نجوى : خايبة كافيج عتاب واگعدي يم بتج

گعدت بصف بصائر ،باستها وضلت تسأل على حالها وهم شوي وطبت بركة وصوت عبد الحق يصيح طريق يريد يطب وبس سمع صوته فقار طلع من الدوانية ومشاله طبوا ثنينهم سوه

عبد الحق : جا هيج يمه تعوفين البنات نايمات وتمشين

شمياء : اجاني فقار وانا ماعولت البس عباتي واجي

عبد الحق : ما خفتي يطبلهن أحد واحنه اليكرهونه هواي

شيماء : صارت بعد

عبد الحق : شبيها بصائر

ما اعرف ليش محد حجة شنگلة اختك حامل فقار رفع ايده يعدل بشعره يريد يلگالة طريقة مضمونه ما تخلي يندفر
فقار : احمم ،راح تصير خال

صفن بوجهه وشوي واحس بي يريد يطلع وجاي يسويها لوما صاحته امه
شمياء : وين ماشي يمة

عبد الحق : عدي شغل

فقار : شني تطلع عماله بهل وكت

عبد الحق : انا مهندس مو اشتغل عماله لا تضل تستهزء أبو الدهن

ضحك فقار وجره يجيبه يم بصائر
فقار : بارك الاختك لا تباركلي

عبد الحق : وخر مني ،مريضة هي مال جهال

فقار : أي والله بس بعد صار

عبد الحق : راح اجيبك بدفره احط بحضن امك

نجوى : نعم الله عليك عمة

عبد الحق : نسيت أنت گاعده

نجوى : يعني تحجي وراي ماتحجي گدامي

عبد الحق : أي جا زحمة منج

ضحكت امي وهزت رأسها مأيسة من عركهم
فقار : أنت لو شايفتة يمة من جنت امشيلهم يذلني والله كلساع وگال مو عدكم بيت ماتولي

نجوى : يا يااا

فقار : أي والله ومره سد الباب بوجهي

نجوى : يااا ولك ليش حق

عبد الحق : ابن عمي اتشاقة وياه

فقار : حق والشقه هاي چذبة لا تچذبها بعد زحمة لان تنكشف بساع

ضل گاعد وگبل لا يمشي باسها من راسها وباركلها ومشى ،وانا من مشيت گعدن بصف بصائر عطرة والله ضال لازگ بالمكان مبين ذاك هو عطر رجالي فخم بس بنفس الوكت بي هدوء غريب لا هو قوي
لا وسط ما اعرف شلونه حسيته طب ريتي على
گد ما چان مختلف

بصائر : لعبت نفسي شني حق حاط العطر كله وجاي

بركة : يااا مو چنتي تگولين عطر حق اطيب عطر

بصائر : لا شو هذا مو طيب

بركة : نفسة ولج

بصائر : ما ادري انا لعبت نفسي منه

زهرة : هاي من نساوتج هواي نسوان مثلج

بصائر : أي يجوز

ضلينه گاعدات وبين السوالف مشى بينه الوكت
تالي امي گالت گومن صبن غده وهيوفة گامت وياي تسوي چلفراي حتى يكفينه الغده

طلعت بصل و وگفت اثرم بي وهي واگفة تحمس باللحم
هيوفة : اثرمي كلش ناعم

_ هيج

باوعت
هيوفة : لا بعد نعمي

كملت ثرم واحس بعيوني نار صارن بجيت بچي بحياتي ما باچيته
ميمنة : ملتمات الحبايب

هيوفة : ياهلا هم زين اجيتي

نزعت عباتها و وگفت يمها
ميمنة : شجاي تسوين

هيوفة : چلفراي اگلج منو جابج

ميمنة : اجاني حق گعدني گال امشي يمهم

ميمنة : جا كملي انا ماشية لبصائر

هيوفة : خايبة صدگ راح تصيرين خاله

ابتسمت وهزت رأسها ب أي
ميمنة : گالي حق عرفتها حامل وگتلها گالت لا

هيوفة : منوره وضعها عبالها مو حامل هي دوم دايخة هل ما انتبهت

ميمنة : ماشيه اشوفها

مشت هي وانا كملت البصل واطيته الها بس شافتني ضحكت
هيوفة : هاي شصاير بيج

_ غير من البصل

بركة : رقيقة ما تتحمل

_ خايبة ولي مني

فتحت البوري غسلت ايدي بالصابونه وراها غسلت وجهي ورفعت راسي على صوت الباب من انفتح طب جدي وراه عمامي وأبوي جانوا معزومين على خطبة أبن صاحب جدي الروح بالروح وهل كلهم مشوا ومن طبوا بوجهم للديوانية لان شافونه مخبوصات بالاكل

ولان هم متغدين بساع سوتلهم غاية جاي ،و ودته

وانا كفيت رداناتي اباوع للمواعين عود صدگ انا اغسلهن من شافتني هيوفة صافنتلهن وخرتني من السنك وهي وگفت بمكاني

هيوفة : عدج حساسية من المواعين الله يسلمج

_ خايبة مااااحبهن

هيوفة : الله يساعد عمة شلون چنتي بس أنت ومعتمده عليج

ضحكت
_ نص المواعين چانت تغسلهن هي

هيوفة : أي مبين

هي تچلف بيهن وتحجي وياي وانا اعزل المغسولات ولهناك طبوا صخر وضيرم وبس طبوا
سلموا وباوعت على هيوفة من صخر جابها بخزره يمكن شوي وحتى الماعون يطيح من ايدها

انتبه عليه أخوي وماگدر يسكت
ضيرم : عليش تخزرها

صخر : أختي شدخلك أنت

ضيرم : جا مرتي

اندار عليه خزره ورد يباوع عليها حارت وين تطي وجهه عدلت حجابها من گاللها
صخر : عدلي حجابج

ضيرم : شارب نفط أنت لو شني

صخر : شارب التشربة أنت

ضيرم : لا يا خوش ادمي على هل دگة هاي

ضحك صخر ومشى گبلها بس ما اطاه گلبه يخلي هنا يم اخته
صخر : تعال وياي

ضيرم : شبيك وياي أنت

صخر : ما اطيقك ،وامشي گدامي لا اطببك سحل

ضحك ومشى گدامه مثل ما يريد ،اندريت عليها اضحك من گالت
هيوفة : گلبي وگف والله

بركة : والله حگج انا وياج صرت أرجف

هفت على وجهه وردت تغسل بس ومن اجت ميمنة تگابلنه انا وياها والباقيات نصب ونحظر وبس كملت السفره تگابلنه ناكل بس بصائر شردت بغرفة أمي ماتريد تشم ريحة الاكل

جفون : حواااري الچنة ناوشيني خبزة

اطيتها الخبزة اخذتها مني گسمت نصها وردتلي نص
جفون : ماريد اسمن

غضة : خايبة ياسمن چنج عود كتاب مطيرچي

جفون : هاي لو غير وحده ضعيفة چان گتيلها جسمج يخبل وما حجيتي عليها بس هي حضوض

ضحكنه من سوت نفسها زعلانة ،وبس خلصنه گمنة نغسل المواعين وانا انكربت هل مرة وهيوفة گعدت لان رجليها أذتها من الوگفة

بركة : خايبة فلك شبيج مطنگره

شمرت السميم من ايدي
_ شني وحده تغسل بدالي وانا امشي انضف الطباخ

غاية : وخري انا اغسل

ماگلت لا ووخرت وهي وبركة تگابلن يغسلن ويسولفن على المدرسة وانا مشيت طلعتلي سيم ثاني اجلف بالطباخ واحجي وي جفون ،وبس خلصنه ردينا كلنه للصالة لهناك وسمعت صوت الديوانية الجوه يندگ يعني واحد من الولد راح يطب لبسنه شالاتنه وانا عيني على الباب طب ضيرم ،سلم ومشى گعد يم جده يحجي وياها وشوي وشفته شاورها

°هيوفة°

گاعده بصف جده انا مثل كل مرة ومن اجه هو گعد بصفها ضل يحجي وياها ورا شوي تقرب
منها يشاورها ولان انا حيل قريبة سمعت شگاللها

ضيرم : جده ماتخليني اخنس بالريشة شوي

وجده تطرب على هل سوالف بساع گالتله
غضة : يا هاي گدامك اخذها وأمشي

ضيرم : واخوتها شلون

غضة : انا اگلهم جوه يم بصائر

ضيرم : جا خوش ماشي وگليلها تلحگني

غضة : تدلل

جده تعزب براسي ما اعرف شني ،شو بساع اطتني اله وبس گام ندستني
غضة : خايبة گومي وراه يريدج

_ ما جده وين امشي

غضة : فلك جا هيج صرنه ،مو گبل كاتلة روحج بس خله يباوعلي وهسه من يريد يحجي وياج تتعززين

اكلتني وشربتني حرت شأحجي وياها
غضة : دگومي يلا ولا تخلين احد يحس عليج

_ صار عيني

غضة : جا طبعا صار غصبا عليج

ابتسمت ودنگت راسي وعديت بالربع ساعة وگمت بس طلعت باب المطبخ شفته مطيني ضهره ضليت واگفه بلايه ما احاجيه اشوف طوله واگولن عود صدگ وكفته الي

"وانا المنتظرني"

ابتسمت من اندار وتلاگت عيوني وي عيونة ،تقرب وگف گبالي ومن كض ايدي تراجفت روحي كلها وحرت وين ادير عيوني منه من گال وخله روحي تتراجف

ضيرم : تلام جده من تگول هيوفة احلى وحده بيهن

ابتسمت من گال
ضيرم : وهم گالت هواي تخجل بهداي عليها وطلعت صدگ عيونها ماتحطهن بعيوني لو حاجيتها

أنا شحالي شحال وحده چانت تتمنى الحجاية
من محبوبها وهسه واگف گدامها ويحجي حجي
ما متوقعته منه
ضيرم : تمشين وياي

بلايه ما اعرف وين هزيت راسي ب أي وهو بس شافني راضيه بكل طريق يجمعنه ضل لازم ايدي ومشى بضهر البيت ،وخر ايده من ايدي ومشى
حط من حط بلوكتين وحده بصف الثانية وگعد وجر ايدي گعدني بصفة

أنا وبهالگعده يمه وبهالقرب حلم من أحلامي صعب اوصف شعوري صعب اوصللكم رچفتي من لمني لصدره وبافي كله ضل يم عطره ودگات گلبة الهادئه بهدوء گعدتنه هسه

ما بينه أحد حجه وكل الكافي على روحي هاي بس حضنه الدافي بعز هذا البرد من حس بي أرجف وخرني يلم وجهي بين ايده ومن كل خاطره يسألني يريد يعرف الجواب

ضيرم : تحبيني وهيج ترجفين بحضني

ضليت ساكته وانا اباوعله شأجاوبك اگلك انا ميته لطاريك من سنين انا من وعيت ما گدام عيوني غير عيونك وانا جنت اتمرض لو كل ما اجه يخطبني أحد وفكرة اصير لغيرة تكلتني شأحجيله اگله حتى اسمك انا احبه

ضيرم : ريشتي

رفعت راسي ودمعن عيوني بساع من سمعته هيج گالي

أبتسم ورفع أيدي لگلبة
ضيرم : مو بس گلبج العاشگني تراه گلبي ميت عليج

شهگت وانفچرت ابجي ماگدر بعد اكض دمعتي ولا اضم حسرة ذيج السنين كلها ،وهو اعتلت صوت ضحكته الاموت عليهم رد لمني الحضنه يبوسني من راسي ويردد

ضيرم : اروحلج فدوه لاتبچين

هواي على گلبي حجاياته تورط كلما يحجي ابچي حار شلون اسكت

ضيرم : شلون نسكت مانحجي

هزيت رأسي ب لا
_ بعد ما أبجي

ضيرم : عيونج الحلوات مو مال بچي "ريشتي"

ضحكت وهزيت رأسي ب أي مد ايده تلمس غمازتي
ضيرم : تنحفر بالگلب مو بالخد هاي

أبتسمت وانا اباوعله واتأمل شعره من ينزلن على عيونه ويرفعه هاي الگعده ولا شي نسيته منها
ولا نسيت شگد حجينه ،ولا حتى نسيت ضحكتي وأبتسامته كل ما يشوفني اضحك ويگلي

ضيرم : گلبي ،شوفي وين طاح

وكلما يگولها ارد اضحك بهل گعده ضحكت ضحك بحياتي ما ضاحكته وگبل لا نرد واحنه واگفين
مد ايده على شالي وفتحه يحرك بشعري بأيده

ضيرم : أخوج يريد يحرمني حتى شوفة حلالي

_ لا تلاشي هواي ترا هو مو بيده

ضيرم : أعرف مو بيده وانا احب الاشيه

_ خاف يزعل منك

ضيرم : لا ما يزعل بس احصل چم كفخة منه يبرد گلبة بيهن بي

ضحكت
_ أنت تعيل

ضيرم : جا ما بيدي

_ خل أمشي

جرني لحضنه
ضيرم : اخوج يريدني لا احضن لا أبوس لا اشوف وانا هسه احسن بروحي أدمنتج

ضحكت و جريت روحي منه
_ دخيلك لا يجينه شيخلصنه منه

ضيرم : يطبگنه ثنينة والانه الله

_ تخلصنه جده ،مثل ما توسطت يمها هسه

ضحك يمسح على شواربة الشگر
ضيرم : جا شني اگلج وجه لوجه وهم گلت جده توديلج غصب عنج

_ هاا صارت بيها غصب

ابتسم وهز رأسة ب أي ومشينى نرد وگبل لا نوص للمطبخ شفتها واگفه بس شافتنه أشرت بساع انا عفت ايده وركضتلها
_ شكو

ميمنة : خايبة راح يمشون اهلج واذا طلع صخر من الدوانية وما شافج شيخلصنه

_ أي والله

اندريتله سويتله بأيدي بأي وهو أبتسم ومشى يطلع حتى خاف يجي صخر لا يشوفة وصدگ بنفس الوكت طلع بحيث بس شفته وجهي انگلب هسه
غير ابينها طبيعي وما اخلي ينتبه علي بس انا گوه اجيبها لروحي وهو بساع گال

صخر : وين چنتن

ميمنة : هنا بالمطبخ وهسه طلعنه هنا

صخر : وليش تطلعن

ميمنة : نشتم هوه

صخر : هااا

ميمنة : أي

صخر : من ال أي راح اغسل ايدي واسبح هم لان مبين چذابات

باوعت على المطبخ من أجت جده لابسه عباتها وتتچه على العوچية بس شافتني گالت

غضة : تعاي هيوفة بعد گلب حبوبتج يمي

مشيتلها بساع همزين نقذتنه بس وگفت بصفها همستلي
غضة : شمسمعج ابو گمزة وهيج الوجع ورد

أبتسمت وردت وجهي بساع ما اريدن صخر يلگفني والله يشوي على اذاناتي بصل

طبت أمي لابسة عباتها تحجي هي وعمة نجوى
وانا طبيت اجيبن عباتي وهم اسلم على بصائر

بس طبيت لغرفة عمة گتلها
_ هااا متمدده من هسه ماخذه وضع الحامل المابيها حيل

حواري : أي والله وانا راح اطيح بيها

ضحكت
_ الوحيده الخسرانه أنت

رفعت ايدها تسوي روحها تمسح بدموعها واحنه نضحك عليها بس دنگت اوصيها على نفسها گالت

بصائر : عوفي بطني صارلج شگد يم حماي شتسوين

_ احم شمعرفج انا يم حماج

بصائر : جا ذني سوالفنه انا وحماج

_ على يوم احجيلج لان هسه ما الحگ

بصائر : يعني سالفتكم غميچه

ضحكت وكفختها خفيف على راسها
_ مطلع عينج كلش

بصائر : أي والله احس بروحي مابي برائه

_ أي والله صدگ

حطت راسها بنصنه
حواري : شعدج أنت واخوي خنستوا

_ شدخلج

بصائر : بعدج زعطوطه مو مال هل سوالف

حواري : مو اجفص ببطنج

بصائر : شلون عمة شريره

طلعت بساع اركض وعفتهن يتعاركن مادري يشتاقن
لبست عباتي وطلعت ورا صخر الضال متانيتني والولد وعمامي كلهم بره كلمن رد البيته واحنه بس طبينه راحت ارواحنه من المنضر الشفناه

حمامه بيضة بلاية راس لونها الابيض مصبوغ احمر من دمها وبصفها ورقة من رفعها صخر يقراها چانت مكتوبة بنفس دم الحمامة

"حالكم حالها بعد چم يوم" ...


ليحب من طرف واحد
ما يكفي ليل
رمشه بكل حلم من
يخطف يشده
العاشگ یختنگ لو
طاري فرگه يفوت

بلعت ريگي ورديت اباوعلها وانا احس بمعدتي كلش گلبت باوع جدي ع الورقة ورد باوع على الحمامة المذبوحة
رأجس : هاي سوالف بيت غازي ماكو غيرهم

محمد : شني بيت غازي ،جا والعطوه بوية

رأجس : جا تكضهم العطوه ومبين فاض صبرهم

صخر : يعني هسه هددونه

هز رأسه ب أي جدي واخذ الورقة من ايد صخر يباوع بيها
رأجس : انا ردت الأمور تمشي مثل ماتريد يامحمد بس مبين هم الما رايدها خاليه بلايه مشاكل

محمد : جا انا شمعرفني هيج راح يسوون

رأجس : خابر على شيخ خزعل خله يجينه بساع

أبوي بلايه ما يحجي طلع مبايله ودگ على شيخ خزعل وكل هل حجي واحنه بعدنه واگفين ومگابلين تهديدهم المدمه
محمد : مساك الله بالخير شيخ ونعتذر ع الازعاج بهالوكت بس بلايه زحمه عليك تگدر تجينه الحجي عده جم حجوه وياك

سكت شوي ورد گال
محمد : تجي وتعارف مو مال موبايل الاحسن نحجي وجه لوجه شيخنه خوش هاي هي في أمان الله

بس سده سأله جدي
رأجس : هاا شني شگالك

محمد : گال ساعة وانا يمكم

رأجس : امشي نوح اطي خبر لعمامك خلهم يجون بساع

نوح : صار جدي

مشى وانا طبيت ورا امي وهم لحگونة صخر وراي دوسته على الگاع صوتها ينمسع ومبين ليا مرحلة من الاعصاب واصل بس شلون ساكت وكاض روحه ماعرف گعد گبال جدي طابگ الحاجب والجگاره من ايده ما نزلت تطفى وحده يشغل الثانية وضل هيج الوكت كله وما فك شوي الا من طبوا عمامي والولد واحد ورا الثاني

طفى الجگاره وگام وگف على حيله يروح ويرد يسمع حجيهم ما يگدر يگعد ويهيد بمكان
باقر : انا والله انصدمت من گالي نوح شني جا المن العطوه والشلعان گلب بعد

يوسف : ولا توقعت هيج يسوون كل ضني راح تفض بفصل

محمد : واذا فضت وشني ينسون ابنهم العدنه

يوسف : جا مو ما يعارفون

محمد : أي ما يعارفون وحتى لا شيخ خزعل ولا اخوته ولا حتى ولدهم حاجين البيت غازي وضالين ضامين سالفة رهيب عدنه

رأجس : جا بعد عليش هل تهديدات هاي

سمير : بوية شني نغشم ارواحنه ماكو غيرنه يشكون بيهم والزلمة لا يوم ولا يومين صار عدنه وانا اشوف كل اليسونه من حگهم احنه هم من اخذوا عزيز
ما قصرنا وياهم ولو من خطفوا البنات مو ذاك اخوه غريب لليوم نايم بالمستشفى

رأجس : يستاهلون

محمد : جا احنه هم نستاهل

رأجس : أنت عدو موش أبن كل حجاية والثانية صحت نستاهل وحگهم امشي صير وياهم وفضها

محمد : شني بوية شكو اصيرن وياهم بس انا غير احجي حجاية الحگ جبت عمري اصيح فضوها وانسوا الطلايب تمرمرت اوراحنه هواي خسرنه وما مستعدين نخسر غير جعفر وكاظم بعد

خزرة جدي من ذكر ثاني أسم
رأجس : اشش اسمه لا تجيبه بالطاري هو الخسرنه مو احنه الخسرناه

محمد : بس

رأجس : بلايه بس وسد سالفتة وهل مره حجيت مرة الثانية ديررر بالك تحجي بي وانا گاعد

سكت أبوي من شاف جدي قافل وعمامي بساع غيروا السالفة حتى لا تضل الاجواء هيج مشتده وانا عفتهم يحجون ومشيت للغرفة ذبيت عباتي وعدلت حجابي ورديت طلعت ومن طبيت للمطبخ باوعتلها گاعده وتصفن ومن رفعت راسها وشافتني گالت
جفون : عمي كاظم وين

مشيت للطباخ شلت البيذنچان الامي على الأساس شوته للغده وگالت نسوي
وياه كباب عروگ بس طفته من مشينه لبيت عمي باقر وهل صاير ثلج

جفون : خايبة مو احجي وياج

_ وانا شمدريني عمج وين

جفون : يعني ما تعارفين

حطيت الماعون مال بيذنچان بالثلاجة واندريتلها
_ كلنه ما نعرف

جفون : جا عبالي تچذبين

خزرتها
_ شني هاي صراحتج

جفون : جا مچذبة اگص ايدي اذا ما كلشي
صاير گبل تعرفينة أنت وهذيج مرة اخوج الخوينسة

_ شو صايرة فرد نوب لسانج يغرد تغرد

جفون : شني صايرة انا هيج من يوم يومي

_ والله ماحجيتي غير الصدگ

جفون : اجه رچلج

انداريت بساع وأجت عيني بعينة بس شافني حركلي حواجبة أبتسمت ودنگت ياربي ولدنه كلهم
على حركة الحاجب هاي متوارثيها من واحد لواحد والاكثر عد ولد عمي باقر

جفون : شلونك نسيبنا رجل الريشة

أبتسم بطرف شفته
ضيرم : شني مو توج چنتي يمنه

جفون : صحيح ،بس هسه أنت جاينه يعني احنه لازم نرحب بيك خوما من تطب نباوعلك صفح مثل صاحبك رجل بت عمك

ضحك يهز براسة متعجب منها على أثر ضحكته أبتسمت وهو بس سكت باوعلها ورد انداريت يحجي

ضيرم : احسن ذلتنه ،ساعة نسيبنا رجل الريشة وساعة رجل بت عمك حجايتها تدگ بالعظم

جفون : جا مچذبة مو أنت رجل الريشة

ضيرم : أي

جفون : ومو ابن عم ميمنة مرة بت عمك صخر

ضيرم : أي

جفون : جا انا حجاياتي مابيهن كل غلط

ضيرم : أي والله

مبتسمة وباوعلهم فرحانة بي لان تفاعل وياها على سوالفها الماصخة بس مبين متعود لان تكها اخته حواري وبعد اضرب منها بقاطات جفون لا شيء بالنسبة لذيج المصيبة

اندرلي ومن شافني مبتسمة أشرلي تعاي مشيتله بگلبي مو برجليه

بس وگفت يمه همسلي
ضيرم : اروحن فدوه للغمازة

دنگت رأسي خجلانة وهاي بساع شردت گبلي چنها سمعته شگال

ضيرم : باوعيلي شو

رفعت راسي اباوعلة وهو اعتلت شواربة مبتسم
ضيرم : حتى الطلابة نسيتها وبعد ابو گمزة
ما ضل صار فد واحد هيلگي يموت على التسربت وي ريشتة

رديت دنگت بساع من جرني لسده رفع راسي يباوع بعيوني
ضيرم : چن اكو وحده هواي تخجل وراح تخلينا نحير بزمانة وياها

صخر : لك ضيرررم

گمزت وانا احسن بگلبي طاح من سمعت صوته
وخرت بساع بلايه حتى ما اباوع لضيرم الگدامي صخر مو ياهو الجان حتى ضيرم تبريت منه
وحتى اذا عديت منها سلامات بعد اذا اشوفه اديرن جهي

خرزني ومشى لضيرم وذاك مبتسم وواگف يباوعله جره من ياخة البدي ومبين راح يطلع سكوت اليوم كله بضيرم

راص على سنونه ويحاول ما يعلي صوته من يحجي حتى لا يمسعه احد
صخر : فد واحددد صلف وهاي صلافتك راح تخليني احطك واگضي بيك التوبة اخليك اذا شفتها تگلها شلونج خوية

ضيرم : لا شني يا خوية جا غير مرتي هي وحلالي وين اكو واحد يگول لمرتة خوية حتى حرام أخو المره احجي حجي معقول

جره بأثنين اديه انا گلت راح رچلي لان مبين راح يجيبة بكله يخليه ما يندل دربة ،وما لحگت احاجيه بسرعة نطحة خلاه يشوط لازم راسة ويغلط عليه

ضيرم : اشتعلت لشتك متعجب بس هو اخته انخطبت شبيييك واذا حجيت وي أختك جا غير مرتي

صخر : انا احلف عليك جاي تچني على روحك ومبين الكله ما فادت وياك وراح اجيبن التوثية اكسرك بيها

ضيرم : چيره بفرگك وفرگ الخوه بعتني بساع لان اخذت اختك

چان يريد يمشي ومن سمعة گال أخير حجاية اندارله يريد يرد وضيرم عرف بساع طفر من المطبخ وصوت ضحكته لهنا

بس تذكر بي هنا اندرلي خازرني وانا حرت وين اديرن عيوني منه عبالي راح يرزل ويحجي بس ما گال غير

صخر : هاي عود أنت الثگيله شخليتي للخفيفات

لو طاگني احسن لان بين ما درت عيوني عليه مشى وما اطاني مجال احجي وانا غميت نفسي الف غمه شجاني ونسيت احنه بالمطبخ وساعة الساعة يجي احد وننفضح
بس هذا البشر من اصيرن يمه انسه الدنيا والبيها وما افكر بشي غيرة هو وسوالفة الصادمتني

باوعتلها من طبت تتلفت ،بس شافتني واگفه هل وگفه گالت
جفون : الگفتوا مو

هزيت راسي ب أي
جفون : خايبة انا من شفتة گام زوعت العافية وگلت راح يلزمكم ثنينكم يطيح حضكم

_ جاية تزيدين قهري

جفون : لا اواسيج

_ مفتهمه المواسات بالغلط

جفون : چن هيج خوما ضربج

_ لا بس ضيرم وانا رزلني بأدب ومشى ومبين صار بخاطره مني

جفون : والله حقه شو أنتم صايرين كلش مستهترين صدمتوني والله

_ خايبة شبيج

جفون : كلشي مابي بس جاي احجي الصدگ

_ وخري مني وخليني بقهري

جفون : الريشة اسم على مسمى صرتي بخفتها

خزرتها وهي ضحكت
جفون : صايرة ما تخوفين

_ لا مو ما اخوف بس أنت استهرتي

جفون : چا اعوفنج بس أنت تستهرين خوب انا وياج هم استهتر

_ طيح الله حظج

جفون : احمم

_ تردين ترديها مو

جفون : أي والله ،بس عيب أكبر مني

_ جا هم زين عرفتي العيب

جفون : احسن منج أنت والنسيب أبو گمزة خايبة صدگ

_ خير شنو

جفون : شو من انخطبتوا لليوم ما شفتة يگمز هواي مثل قبل شني كسرتي رچليناته

من شافتني صدگ ما الي خلگ للحجي عافتتي ومشت وانا گعدت بالمطبخ ما الي عين اطب جوه احسن ما اگدر احط عيني بعين صخر

گمت بساع من اندگ الباب وكلهم طلعوا ومن ملگاهم اله عرفته هذا شيخ خزعل ،بساع مشيت حطيت قورية الجاي على النار وطبيت للصالة گعدت بصف جده

وجده مبين عرفت ضايجة لان بساع سألتني
غضة : شبيج حبوبة

باوعتلها وبقهر گلت
_ صخر شافني واگفة يم ضيرم

غضة : وشني يعني

_ عيب والله وهو حتى ضاج

غضة : ماعليج بي ما مسوين شي غلط حلالج مابيها شي لو وگفتي يمه بس هذا اخيج ما يگدر يكض غيرته

_ جا جده يگلي هاي عود أنت الثگيلة شخليتي للخفيفات

غطت نص وجهه بالشيلة تضحك
غضة : فلك الفلك عدوك على هل حجايات هاي

_ والله جده انقهرت

غضة : هو متقصد يقهرج حتى بعد لا يشوفج وي صويحبه

_ جده ضيرم هم يعيل بي گلتله لا تلاشي صخر يغار وهو يتقصد يگله اختك مرتي

غضة : ياا والله حگة لو شما يسوي وياه

تأفأفت حايره وهي من حست بحيرتي گالت
غضة : انا احجي وي ضيرم اخليه يكف من صخر لا تضوجين

_ أي عفية جده لان والله على يوم يصير بي شي من تكفخ صخر

غضة : تخافين عليه يمنعوله

دنگت وهي ضحكت
غضة : مبين تخافين عليه

باوعتلها مستحية احجي بس ما گدرت اضلن ساكته
_ جا جده من گبل لا يصير حلالي انا اخافن عليه

غضة : الله يحفظه الج يابعد حبوبتج ويتمملكم على خير انا كل الاريدنه اشوفنج بخير

_ لوما أنت ما جان صرتله

غضة : جا ما ارضى گلبج يضل عليل

كل هل حجي نحجي بصوت ناصي بس من بست ايدها وهي ردت باست راسي اچت وگفت
گدامنه جفون متخصره ومن باوعت لغاية چانت مزغرة عيونها وتباوعلنه

جفون : جا احنه هنا بنات البطه السوده لو شني

غضة : ياحبوبة كلچن نفس الشي

جفون : جده بيعيهن على غيرنا نعرفج تحبين منو أنت

غضة : انا احبچن كلچن بس هيوفة غير

غاية : خوب گولي هيوفة اكثر وفضيها

غضة : لا شني تردن تلزمن علي لزمه

غاية : هااا يعني صدگ

جفون : مبين صدگ

غاية : اذا ما احجي لبركة

جفون : وأنا احجي لحواري

غضة : فلك الصاب عدوچن راح تتگابلن علي أنتن الاربعة

جفون : أي جده جا شني هي هيته تحبين بس هيوفة

غضة : خايبات احبچن كلچن

جفون : لا ما يفيد گلتي هيوفة غيررر

غضة : يا چلمة ردي المچانچ

غاية : ماترد جده انحجت بعد

من ملت من مداهرهن عاطت ببهن
غضة : خايبات ولن مني ،شني خايفة منچن كلچن شبر ونص

جفون : تعيبين على طولنه لان هيوفة أطول منه مو

غضة : فدوه لطولها چنها شطب ريحان

جفون : ريحان يم عيالها شچابها عدنه

رفعت عليها العوجيه
غضة : تضحكين علي ولج

جفون : شبيج جده ما تتحملين اشاقه وياج

غضة : شنو بگدج وتتشاقين وياي

جفون : الله يطول بعمرج جده

أبتسمت وانا كلش زين اعرف قصدها شني
غضة : خوش

گمت بساع اركض للمطبخ من تذكرت الماي الخالته ع النار من شفته يفور حطيت ورگ ونصيت النار وبنفس الوكت طب نوح

نوح : شني وين صار جايچن

_ احسب خمس دقايق ورد بين ما يخدر

نوح : شني السالفة باچه

_ شني ما تعرفون تحجون بلايه جاي

نوح : اي

_ جا گلهم بين ما تخلص اختي الجاي سولفوا ميخالف هالمره سماح

نوح : لا والله

ضحكت اهز رأسي ب أي

هز ايده وگبل لا يطلع گال
نوح : شوي واردلج

مشى هو وانا حضرت الاستكاين وبس شفته هدر صبيت ومشيت بساع دگيت باب الديوان ورديت و وراي طب نوح اخذ الصينية ومشى وانا رديت گعدت بالصاله بصف جده وامي گبالي ماكلها القلق حتى ما تگدر تحجي على عكس جده عدها كلش عادي وانا كلما اصفن اتذكر شكل الحمامة وتلعب روحي
غاية : ماشية انام باجر وراي صبحي ،تصبحون على خير

_ وأنت من اهل الخير

ماكو اقل من الساعة وطبوا كلهم واحد ورا الثاني واولهم جدي گعدوا واحنه نباوعلهم نريد نعرف شسوا

رأجس : انا گلتلكم من البداية بيت غازي مو شكول عطوات يحبون الدم وحتى لو تدخلت العشاير لازم يطلعون خلاف الحجي بس ما سمعتوا مني

باقر : بوية احنه بكل الطرق ردنه بس حل يسترنه وأنت كلش زين تعرف تالي الطلايب دم

رأجس : دمهم مو دمنه ،هم جاي يجنون على روحهم

يوسف : وهسه شني بوية

رأجس : امشوا لبيتوكم وباجر نشوف شيخ خزعل شيگول وساعتها يحلها الحلال

يوسف : جا خوش انا ماشي باچر الصبح وراي شغل مرخصتكم

واحد ورا الثاني عمامي مشوا وما ضل غير بس فقار ونوح حتى جدي وجدي گاموا يمشون
لغرفتهم وبس أنا ضليت گاعده اباوعلهم يسولفون وچن ناسين الدنيا ليل

نوح : اگلك شني عود صدگ راح تصير ابو

فقار : أي والله راح اصير ابو گبلك

نوح : انا من اتزوج اخلف توم والحگك ويجوز اعبرك

_ مو سباق هو

باوعولي ومبين هسه الا انتبهوا انا هنا
نوح : شني شعدج گاعده

_ اسمع سوالفكم الما يتعوضن

فقار :شوف شلون تحجي اتعلم منها

نوح : خايب جاي تضحك علينا

فقار : گول والله

نوح : والله

من باوعلي چنت مبتسمه ،غم روحه
فقار : شگد غشيم انا وگدرتي تعبريهن علي

نوح : أي والله وسفه هاي عود أنت فقار التلگفها وهي طايرة

فقار : بس اختك عبرتهن ،ما أعرف انا صدگتها لان عود احسنها عاقله وما مال هيج سوالف

نوح : لا يغرك

فقار : أي والله المظاهر غداره يامرة اخوي

ضحكوا وانا اباوعلهم وادعيلهم بالعقل عفتهم وطبيت للغرفة مبين مطولين وانا صرت اطوطح من النعاس لگيت فراشي مدود بصف جفون
مبين هي فارشتلي بصفها مثل كل مره تحس بروحها تحتاج تنام بصفي

نزعت حجابي وتمددت وانا اعيد بكلامة وابتسم وي روحي بعد ما جانت هاي صفنتي
صفنة خوف تحولت لصفنة كلها فرح ما تغيب أبتسامتي لو تذكرته وكل ما تتردد حجاياته من گال

"مو بس گلبج العاشگني تراه گلبي ميت عليج"

تدمع عيوني من اتذكر مو بس انا العاشگته هو هم عاشگني گلبة ما توقعت بيوم يطلع يحبني ولا توقعت راح يفرح گلبي هيج بحجاياته طلع ضيرم غير عن ضيرم الكلنه نعرفه انا من گابلته تعجبت بشخصيتة الابد ما متوقعتها اصلا ما جنت أعرف هو يعرف يبتسم لو يضحك

°حواري°

گاعده اقره الامتحاني اليومي وارزل بنفسي ع التسخت السخته امس مگابله الكتاب واتثاوب وكدامي عزيز مگابل اوراق القضية العده
وكلساع واحد مخابر عليه شگد نشيط لو يطيني شوي من نشاطه چان طلعت من العام من الثالث
ولا چان هسه انا اهم اطب وزاري لو لا ولوما طبيت انكتل كتله تنذكر للتاريخ لو راح يبطلوني وحده منهن بس لو يبطلوني احسن عاد اخلص من گعدة الصبح هاي والخبصة وانام للظهاري

دنگت على الكتاب اشوف الكتابة مغوشة من النعاس بس رديت رفعت راسي من سمعته گال

عزيز : حق تعال اخذني وياك ديلا لاتضل تحجي بساعك ما اريدن اتأخر

باوعت عليها من نزلت تعدل بعابتها وجهه لونه رايح ومبين عليها تعب النساوه صبحت علينه وضلت واگفه مبين متانيه فقار شوي ونزل بأيدة محفضته وموبايلة خلاهن بجيبة وباوعلها من گالتله

بصائر : فقار توديني انت لو امشي وي حق

فقار : خل حق يوديج لان انا ماضل عدي وكت بس عينج على روحج بس تخلصين خابريني حتى اجيبن سيارة واحد من الولد واجيج

بصائر : خوش

عزيز : خابرته هسه راح يجي

فقار : جا خوش انا ماشي وصلوها لباي الكلية

عزيز : لا نوصلها لنص الطريق امشي الشغلك احسلك

فقار : شبيك شايل الخشم من صباح الله تعلم اضحك من اخوك

عزيز : ماعندي وكت للضحك

فقار : أي حگك محامي وعدك هواي قضاية ساطراتك وبنفس الوكت عدك هواي فلوس نايم عليهن

عزيز : طفي عينك الفگر لا تحسدني

فقار : عمي لو محصلي تعين جا هم صرت دفان فلوس مثلك

عزيز : خاب ماتسكت لو صدگ ادفن فلوس جان من زمان مخلص فلوس السيارة ولا ضال يوميا ماشي وي واحد

فقار : تخاف تخسر كراوي غير

عزيز : خوية سكتي رچلج لان راح اگوملة

بصائر : تحملة خوية مو مال تيتم ابن اخوك وهو بعده ما جاي للدنيا

عزيز : هم صدگ

هز ايده وطلع وماكو وراه بشوي اجه حق هم طلعوا وانا ضليت گاعده بس من رفعت راسي وشفت جنطتها على المعرض گمت بساع شلتها وطلعت اركض من وصلت للباب سمعت صوت السيارة تريد تحرك بساع فتحت الباب شوي ومديت ايدي
بيها الجنطه حتى بلكت واحد يشوفها بس ماكو ما انتبهوا الا من صحت وانا اطلع شوي من راسي من الباب

_ يمعودييين هاي جنطة بصائر

بساع حسيتها انجرت من ايدي وطب عزيز صرت بسد الباب وهو يباوعلي وعيونة بگصته
عزيز : صوتج العالي ومدة راسج من الباب على منو احسابج هسه

_ جا اول شي بس طلعتلكم الجنطه بس ما شفتوها

عزيز : لا شفتها وجاي انزل اخذها بس اخلص مخابره

_ وانا شمدريني شفتها گلت راح تمشون وهي تحتاجها لان بيها ملازمها

عزيز : هل مره سماح ،مرة الثانية افصم راسج لو شفتج مادته من الباب

هزيت راسي ب أي وهو طلع انا صفنت على روحي متعجبة عود صدگ انا سكتتله وما حجيت بس والله الصدگ وحگ الله انا غلطت من ما لبست حجاب بس انشدهت وحتى نسيت روحي ما مستوره
وماعولت الگاهم ما ماشين بس يلا استاهل

رديت طبيت جوه گابلت الكتاب ومن شفت ماضل شي لجية الخط گمت بدلت
وانا احسن بروحي دايخة وما متوازنه على الگاع

شلت جنطتي وطلعت والدوخة الغريبة ما جاي تعوفني هستوني چنت كلشي مابي بس طبيت للمطبخ شفت امي وابوي ما اعرف شعجب اليوم گاعدين متأخرين صبحت عليهم وافترت بي الدنيا گعدت بساع وامي اجتني تسأل بي شبيه وأبوي هم گام مخبوص

نجوى : شبيج ولج حواري ليش هيج وجهج انخطف لونه

غمضت عيوني حيل اريدن من افتحهن يشوفهن عدل ،وبس رديت فتحتهن حسيت بروحي احسن
_ ما أعرف يمه يجوز لان ما نايمة زين

نجوى : أي جا مبين ،گومي غسلي وجهج بلكت تصحين

هزيت راسي ب أي وگمت غسلت وجهي وانا انشفه بحجابي سمعت صوت هورن الخط بره بساع اخذت جنطتني وطلعت بس وصلت للمدرسة اول
درس امتحنت وماعرف شلون جاوبت من گومتني المعلمه

للفرصة وانا گاعده على الرحلة احجي وي البنات وبصفي جفون ما حسيت غير دارت الدنيا بي وبعد ما حسيت بشي

°جفون°

گاعده بصفها واحجي وي صاحبتي ما انتبهتلها غير من صاحت صاحبتها
_ ولچن حواااري جنها تخربطت

باوعتلها چانت مبين عليها فاقده نزلت بساع فتحت بطل الماي اغسل بوجها انشلع گلبي الا صحت روحي راحت من شفتها تفر بعيونها ومبين تريد ترد تفقد

ضربت على خدها بأيدي
_ ولج حوري شبيج لا تخوفيني فدوه فتحي عيونج

من حرگة حلگها مبين بلعت ريگها فتحت تباوعلي وانا احسن راح اطيح وياها انداريت على صوت وحده من البنات من گالت
_ لو تنزلن للأداره تخابرون اهلكم احسن لا مبين ماتگدر تضل هنا

هزيت رأسي ب أي وباوعت ل رقية المخطوف لونها وياي
_ رقية انزلي للأداره گليلهن اكو وحده متخربطة فوگ عاد من يجن يشوفنها بهل حال يصدگن

هزت رأسها ب أي ومشت ،وانا ضليت احاول ما اخليها ترد تفقد شوي وطبت المعاونة حچن الها البنات وانا ومن شافتها صدگ منتهيه باوعتلي
تسأل

_ حافظة رقم أحد من اهلج

هزيت راسي ب أي
_ وهم رقم ابن عمي عد الحارس

_ جا ماشية اخابرة وحاولن تنزلنها جوه

مشت المعاونة وانا سندتها حتى نطلع بس طبت المعلمة لان خلصت الفرصة

صاحت
_ شني وين ماشيات

وحده من البنات گالتلها
_ حواري تخربطت كلش وأجت المعاونة گالت نزلوها جوه

_ جا تنزلن كلچن وحده ثنين مو الصف كله

رقية : ست عادي بس انا امشي وياهن

_ امشي ولا تتأخرين بساع ردي

رقية : مشكورة ست

نزلنة و ورانة رقية شايلة جنطتي وجنطة حواري بس طبينة للأداره وشافته المديرة اجت تسندها من الجهه الثانية حتى نگعدها

المديرة : خيرها ليش هيج صاير وياها

عدلت حجابها وانا احجي وي المديرة
_ ست والله ماعرف شوي نحجي وهيج برمشة عين فقدت

المديرة : خاف صاير عدها هبوط

_ ماعرف والله بس هاي اول مره تصير عدها هل حاله

المديرة : خير أن شاء الله خابرنة اهلكم راح يجون

_ مشكورة ست

المديرة : لا شكر على واجب أمي

حطت الجنط يمنة وگبل لا تطلع دنگت تسألني
رقية : تردن شي بعد

_ لا ردي للصف لا تترزلين

مشت هي وانا ضليت حايرة بحواري صح مفتحه عيونها بس چنها فاصلة عن العالم گمت بساع من طبوا للأداره ضيرم و وراه صخر

بساع اجه ضيرم يحاجي بحواري وصخر يحجي وي المديرة ويتشكر منها على موقفها

لم وجهه
ضيرم : حواري خوية شبيج حاجيني

اندر علي من أيس منها
ضيرم : عباتها وين

فتحت جنطتها طلعت منها العباة اخذها مني ووگف يلبسها الها وهي گاعده تباوعله
كل ضنه جان حواري لان تعبانه ما تحجي بس ما چنه نعرف هاي البداية من كلشي راح تعيشة بالايام الجاية

گومها ساندها وانا لبست عباتي وردت اشيل الجنط بس ما رضى
صخر : جيبيهن وأمشي گدامي

اخذهن من ايدي ،ومشيت گبله اعدل بالعباة وهو وراي دخان جگارته واصلني ،صعدها ضيرم بالسيارة وانا صعدت بصفها وهم صعدوا صخر بالصدر وضيرم يسوق وكلساع ملتفت على حواري يباوعلها ويرد يباوع للدرب

صخر : عينك للدرب راح تگلبنه

ضيرم : لا شني بس جاي اشوفنها خاف تتخربط

صخر : بصفها جفون لو تخربطت هي تگلك

ضيرم : نطلع للمستشفى

صخر : وجفون

ضيرم : ناخذها ويانه جا شنسوي لان اذا ردينه امي من لطمها تلم الوادم علينه وما تخلينه نندل دربنه منين عاد ناذها صاحية للقرية

صخر : جا اطلع للمستشىق

ماحجه شي ضيرم وغير طريقة من القرية للمستشقى وبس وصلنه نزلنه للطوارئ ومن قاسوا ضغطها طلع عدها هبوط
خلولها مغذي مالح وگال الدكتور بس يخلص نگدر نطلع

گعدت بصفها على السدية مسحت على ايدها مكان الكانونه ودنگت احجي وياها
_ شني شعجب هواي صارلج ساكته

ابتسمت بتعب
حواري : جا غير مريضة

_ خوب ما صدگتي تتمرضين احجي ترا ما متعوده عليج هلگد تسكتين

حواري : الله وأكبر خلوني اتمرض واعيش الجو

_ مو اگلج ما صدگتي

حواري : خايبة هابط ضغطي

ضيرم : اذا كلشي ما ماكله شلون ما يهبط

حواري : والله انا من گعدت حسيت بروحي دايخة وبدت تزيد الدوخة وكل ضني لان منعسة

ضيرم : بعد ممنوع تمشين بلايه ريوگ

حواري : عبالي تگلي بعد ممنوع مدرسة جاي اگلك الف رحمة على والديك

ضيرم : گطنه وشيليها من اذنج سالفة التبطيلة

حواري : هو مأيسة انا

صخر : جنها صارت زينة

ضيرم : هو مبين لان رد لسانها

صخر : الله يعينك

ضيرم : شنسوي نتحملها الزغيره بعد

حواري : ابن عمي لا تغير أخوي علي بداعة اختك

أبتسمت ودنگت راسي من خزرها وضيرم بساع ضحك وانا مدنگة سمعت صوت الطبة القوية رفعت راسي وخليت ايدي علي حلگي من شفت ضيرم لازم رگبته
ضيرم : غضب الله عليك وعلى اليناسبك

صخر : شني شامرها عليك لو زايده عدنه

ضيرم : شني عمي ما يتشاقه وياك

صخر : لا تشاقيني بيها ،بكلشي احجي بس هي لا

ضيرم : ما اشاقيك بأختك

صخر : راح اجيبك بكفخة بيها والله امدك بصف أختك

ضحك ضيرم يعدل بشعره وصخر انگلب گلب بس خلص المغذي طلعنه وهو بعده ما يحجي وي ضيرم ويمشي گدامنه بس يريد يوصل للسياره صعدنه وهو طبگ الباب ينافخ

ضيرم : طنگورتك شگد قوية

خزرة
صخر : لا تحجي وياي لان ضال على الحافة وياك ماعرف شلون كاض روحي عنك

ضيرم : لان رجل اختك وهي بعدها زغيرة ما ترضها تترمل اعرفك تفكر ليگدام

صخر : لا اله الا الله ،ضيرم اطلگها منك والله اذا تضل هيج ذليتنه مو اخذت بتنه

ضيرم : لا هي ما ترضى ،شني بكيفك تطلك

صخر : نجرب

ضحك ضيرم ومسح على شواربة واندار عليه
ضيرم : عمي نشاقيك والله

صخر : هيج شقه ما احبنه وچم مره گايلك

ضيرم : انا لان اعرفك تضوج اتحارش بيك

صخر : هاا يعني تعترف

ضيرم : جا شني قابل انكر

صخر : لا منو گدك ابو گمزه بعد

ضيرم : اگلك

صخر : احجي

ضيرم : هم تمشي لهذاك

صخر : لا صار يومين ما فارغ حتى امشيله

ضيرم : جا المفروض تخلي احد غيرك يمشي يطي اكل شي مانريده يموت

صخر : يطبه نعال

ضيرم : يمعود جا اذا يصير بي شي شيخلصنه

صخر : ماتمشوله أنتم شو خالين كلشي براسي

ضيرم : جا غير المفاتيح عدك

صخر : عدي نسختين ،نسخه راح اطيكياها

ضيرم : جا خوش

بس وصلنه للقرية نزلت انا گبلها وساعدتها حتى تنزل سديت باب السياره ومشيت اسندها علي
حواري : خايبة صحيت كلشي مابي

_ لا خاف تطيحين

ضليت لازمتها صارت بي خوفه والله فتح الباب ضيرم وطب گبلنه وانا وحواري وصخر وراه بس طبينه المطبخ صارت گدامنه ريحانة تعدل بحجابها وتحجي وي ضيرم

ريحانة : شني ليش طاحت

ضيرم : هابط ضغطها لان ما ماكله

عافت ضيرم واجت لحواري ترزل بيها
ريحانة : جا شلون تمشين بلايه ريوگ

حواري : ماعرف ما عدي نفس اكل

ريحانة : أول تالي أنت كل مره ماتمشين بلايه ريوگ

حواري : من گعدت حالي ما أعرف شلونه بس هسه الحمدلله صرت احسن

ريحانة : أوووف منج

°حواري°

مبين اختي ما چان بالها صخر واگف ولوما هو گال
صخر : اريد ماي عدكم

ما جان انتبهتله أصلا ،عدلت حجابها لان قماشة ناعم وكلساع يريد يزلگ من راسها

ريحانة : صار

مشت ترست الدولكة ماي وبگلاص دارتله واطته اخذ الگلاص من ايدها مدنگ

ضيرم : اگلك صخر

رفع راسة عينه بس على ضيرم
صخر : احجي

ضيرم : نعرس انا وياك سوه

حط الگلاص ع الكاونتر وباوع لجفون
صخر : امشي نولي للبيت احسن

ضيرم : هسه شبيك صرت عصبي جا غير جاي أخذ رأيك

صخر : أنت كلش زين تعرف جدي گايل يعرسلنه سوه بس تتقصد تحجيني

ضحك يشرحله
ضيرم : لا والله ولا اعرف

صخر : مرخصتكم

طلع وجفون مشت وراه وانا نزعت عباتي ومشيت ضيرم كدامي صعد فوگ وريحانة وراي مشيتها ثگلانه لان بطنها باديه تكبر حتى ما تتحمل تضل واگفه وكت طويل

گعدت هي وانا مشيت بدلت هدومي ورديت يمها اتچه على الحايط الدوخة بين وكت ووكت تردلي

گعدت بصفها احاجيها وبالها مو يمي والا من صحة
_ ريحاااانة

فزت وباوعتلي
_ شبيج

ريحانة : مابي شي بس تعبانة

_ ليش

ريحانة : گبل لا اجي فرغت كلشي بغرفتي لان راح نشيل كمل البيت

_ يا صلاوات بسرعة

ريحانة : جا غير ليل ونهار يشتغلون بي والله حتى حمزة صرت ما اشوفه

_ بس هم نعمه راح تستقرون

ريحانة : أي والله

_ زين شعجب خلوج تچين

ريحانة : ماعرف والله عمتي شو گالت روحي يم اهلج ومن نكمل تعاي

_ خاف تريد تموت ولج

ريحانة : تموتني وما تموت بس يمكن حمزة محاجيها

_ أي هم صدگ جا بصائر ما أجت

ريحانة : أجت وجانت يمي وگبل لا تجون كتلها اصعدي نامي وجهه صاير اصفر

_ بعدها بالبداية وهيج تعبانة

ريحانة : لان نساوه بس والله من گالتلي طرت

_ راح نصير عمات

ضحكت وهزت رأسها ب أي
ريحانة :خلصت عمري اتوسل بضيرم يتزوج حتى اصير عمه بس هسه فقار هو راح يسوينه عمات

_ أول حفيد من الزغير

ريحانة : أي والله

گمنه انا وياها من سمعنه صوت امي من المطبخ
طبيت گبل ريحانة وهي وراي بس شافتنه گالت وهي تعلگ بعباتها
نجوى : انشلع گلبي وانا ادور تمر هندي وما لگيت

ريحانة : سوده علي تعبتج

نجوى : اسم الله عليج لا ماكو تعب بس مقهوره لان راح يضل بنفسج

ريحانة : لا ما اخليه بنفسي هسه اخابر على فقار يجيبلي وياه من يجي

نجوى : أي جا احسن بعد

من طبت أمي انا وريحانة لحگناها گعدت وانا مشيت حطيت راسي على رجلها وتمددت بأيدها مسحت على راسي
نجوى : جا شبيج شو خانسة

ريحانة : متخربطة بالمدرسة ومخابرين على صخر وماشيلها هو وضيرم طلع ضغطها هابط

نجوى : يااا يايمه ،سوده علي وانا اگولن مو من عوايدها ماتحجي

ريحانة : هسه زينة من أجت كلش

نجوى : شو باعيلي

رفعت راسي اباوعلها مبتسمة احاول ما اخليها تخاف لان هي من طبيعتها كلش تقلق لو واحد بينه تمرض

نجوى : تردين شي تاكلين

هزيت رأسي ب أي
ريحانة : يمه شلون تخليها تمشي بلايه ريوگ

نجوى : كل مره انا اصيحنها تاكل بس كل ضني لان گاعده گبلنه اكلت

ريحانة : لا وين طلعت ماشية للمدرسة على لحم بطنها

نجوى : ليش هيج ولج حواري

_ مادري يمة احسن بنفسي مسدوده

نجوى : ماشية اسويلج وماكو نفسي مسدوده

وخرتني تحط جوه راسي مخده وگامت للمطبخ وانا ضليت احجي وي ريحانة واشم بريحة الشوي
ريحانة : راح احك واشوه الجاهل على هل ريحة هاي

ضحكت
_ لا دخيلج

اجت امي شايلة الصينية حطتها وگعدت
نجوى : اشو تگابلن ما اريدن شي يضل

ريحانة : انا ما متغدية

نجوى : جا اكلي الج والابنج ،وأنت تعاي يمي انا اوكلج

ضحكت ريحانة وانا استغليت الوضع وگمت گعدت بصفها تسويلي لگم وتطيني منا لحد ما ترست معدتي بس الصدگ ما ضل شي بالصينية بحيث رديناها للمطبخ بطرگ الشياش

غسلت ورديت گعدت وريحانة ضلت بالمطبخ انا ما عولت صدگ اخلص من المواعين گعدت اباوع للدرج اسمع صوت شحاطتها التطگطگ من تنزل الدرج واضل متانيتها شوكت تنزل وتوگف تلف بشالها على المراية الگبال الدرج مثل كل مره

اندارت تحاجي امي
بصائر : شهل ريحة هاي عمة معدتي انتهت

نجوى : شويت تكه للبنات

بصائر : عمة اهچن من البيت لان أنتم ما تكفون من الاكل وانا ماي ما جاي يضل ببطني

نجوى : ها گبن السوادين

بصائر : أي گبن اطيني عباتج اهج مو بس أنت تهجين

ضحكنه وهي تحجي مبتسمة شگد ما هي تعبانة بس تضل دوم تحب تتشاقة
نجوى : تردين شي اسويلج تاكلين

بصائر : لا وين اگدر اكل خليت الاكل الكم

ضحكت وهي تهز بأيدها وتباوعلي
بصائر : شبيج چنج وحده هابط ضعطها

ريحانة : أي ولج هابط ضغطها حتى مشى ضيرم طلعها من المدرسة وماخذيها للمستشفى

باوعتلي وبساع ملامحها تبدلن للحزن
بصائر : صدگ

هزيت رأسي ب أي ،وهي اجت گعدت يمي تحاجي بأمي
بصائر : خوما وراثه عمة

نجوى : لا أن شاء الله مو هيج يگولون لان ما ماكلة شي

بصائر : الحمدلله ديري بالج تضلين بلايه اكل لا يلزگ عدج

أبتسمت
_ متعقده منه أنت

بصائر : كلش والله بس تعايشت وياه

ضلينه گاعدات نسولف و شوي وطب عزيز روحة صايرة بخشمة شمر جنطته الجلد
عزيز : أنعل أبو المحكمة ولابو حتى القانون واللعبان نفس بدولة كل قانون مابيها

نجوى : شبيك ولك يمة

گعد زهگانه روحه
عزيز : شتلوني من محكمة لمحكمة كرهوني بالساعة الردت بيها قانون

نجوى : جا أنت تستلم قضاية كبار وهل تتعب

عزيز : جا شني جديد انا واخذلي قضية شلون ما جان

نجوى : جا بعد عليش تحجي

عزيز : ما تعرفيني انا كل ما اضوچن أضلن احجي وتاليتي امشي ثاني يوم للمحكمة

نجوى : أي اعرفك

عزيز : هاي شني ريحانة يمنة

ريحانة : زين وشفتني خوية

عزيز : اعذريني بس چانت روحي طافره شلونج

ريحانة : الحمدلله بخير وأنت

عزيز : يدومج الله بخير انا شوفة عينج

ريحانة : مبين كلش زين

ضحك يهز رأسة ب أي وهي مبتسمة گام صعد فوگ بدل ونزل ما گدر يضل بالبيت وطلع

°جفون°

ليث : ما اصدگ وروح أبوج گتيلي اذبحلك طلي وكلشي ما حصلت كراااع ما حصلت تردين اصدگ بعرسي تذبحين سبع طليان

غضة : خايب فلك اطي مجال احجي تدري ليش اگلك اذبح سبع طليان

ليث : ليش

غضة : اذا تاخذ الغريبة الخابصنة بيها واذا جدگ رضى احسب ذابحتهن واذا لا اذبحلك عشرة

ليث : جده والحمزة ما اخذ من خواتي شني هي گوة جا غير انا كلهن احسبهن حسبة هيوفة

غضة : اصبر اذا ما جدك قرر وخلاك حاير بزمانك شوف

ليث : بداعة ابوج جده توسطيلي اذا راد يزوجني کليلة ليث مايخلف

غمزلها بأخر كلامة
غضة : يااا يامدهور على هل دگة

ضحك وگعد كبالها
ليث : شوفي جده انا غير الغريبة ما اخذ ولا تحلمون زايد خوش قرارات جدي مو يمي

غضة : فلك الفلك عدوك جا الكبار ما طلعوا من شوره تطلع أنت وتخالفه

ليث : جده هذا زواج مو لعبة بكلشي وياه بس الا هل سالفة اهچن والله

غضة : خايبة زهرة تسمعين شجاي يحجي

زهرة : جا مو تعرفينه عمة صار ودار يصيح ذني خواتي قابل نچبره

غضة : جا مو تعرفين عمج

زهرة : الله كريم لوكت مايريد يعرس بلكت الله ولن عمي مقتنع

غضة : هاي يرادلها معجزة

ليث : تصير المعجزة الخاطر عيون ليث جده

مأيسة منه گالت
غضة : انهجم بيت دمك المملوح تضحك علي بحجايتين

ضحك بصوت عالي وباسها من رأسها ومشى للگيعان شگد گالوله عوفهن اليوم لا تمشي عدنه طلابة بس هو مايگعد

انا ضليت گاعده لا شغلة ولا عمل امتحانات ماكو والملل ما يتسولف جا شگد جانت ملهيتني وساطرتني كثرة التحاضير

گمت طلعت برا يم بطاتي لان طلعتهن گبل شوي يلعبن وصوتهن تارس الحوش
اباوع عليهن واتذكر الكتاكيت من چانن يلعبن وياهن بس بغير جهه يخافن لا ينكتلن

گمت اجيبن واحد من الفروخ الصارن فيالة على گولة حواري دنگت اباوع بين البلوكات البانهين يم تنور الطين بشكل ميز طلعت الفرخ وگلبي انعصر من باوعت للمكان.



تعليقات