رواية خلف الأضواء الفصل السابع عشر بقلم نور الهادي
فلاش
كان أحمد قاعد مع مراد، اللي بصله بقلق وقال:
— متأكد يا بابا من اللي هتعمله؟
رد أحمد :
— شايفني بهزر؟
قال مراد:
— أنا بس مش عايز أي حد يعلّق عليك.
بصله أحمد بغضب، وقال:
— الحرب هو اللي بدأها! شايف خسارة مصنع والدتك كانت قليلة؟ الخساير كانت كبيرة، والمرة دي هصيبه هو!
سكت مراد، لأنه كان عارف إن أبوه بيخطط يسرق خزنة جاسر، وإنه مش ناوي يسيب أي فرصة للانتقام منه.
وفجأة، دخل سامح عليهم، وقال:
— أحمد باشا!
بصله أحمد وسأله:
— عملت إيه؟
رد سامح بحماس:
— أنا جايبلك حاجة أهم من كل ده! أذية لجاسر بمساعدته... أذية كبيرة أوي ليه ولسمعته!
قطب مراد حاجبيه، وقال:
— أذية إيه؟
بصله أحمد وقال:
— اتكلم!
بدأ سامح يحكي:
— مساعدته دي مش معاه في الفيلا دلوقتي، دي في بيتها، وحصلت مشكلة كبيرة أوي! البنت دي في شبهة إنها متجوزة جاسر ومتجوزة راجل تاني كمان!
بصله مراد بصدمة:
— إنت بتقول إيه؟!
كمل سامح:
— يعني متجوزة اتنين! وجاسر ضرب جوزها واعتدى عليه، وفي فيديو كبير باللي حصل ده!
بصله أحمد بتركيز، وقال:
— إنت متأكد من اللي بتقوله؟
رد سامح بثقة:
— متأكد يا باشا، وتقدر تتأكد بنفسك. أنا جبت عنوانها، والشارع هناك مقلوب، وأكدوا إن جاسر كان موجود، وإنه مسك الراجل ده وكان هيموته! القضية دي كبيرة للبنت ولجاسر كمان.
سكت أحمد، وبص مراد لأبوه، مستني يشوف رد فعله.
بعد لحظات، قال أحمد بحسم:
— حضّر العربية. جتلي لحد عندي!
رد سامح فورًا:
— أمرك يا باشا.
قام أحمد من مكانه، مراد قال:
— بابا، حضرتك ناوي على إيه؟
بصله أحمد بابتسامة، وقال:
— هخليها سلاح ضد جاسر. هعملها قضية، وبإيدي هدمر جاسر بيها.
سكت لحظة، وبعدين كمل ببرود:
— واضحة؟ مش هعملها حاجة، هي خدت حقها وكفاية عليها اللي حصل... لكن هستخدمها ضده. والمقصود جاسر، إنما الضربة هتيجي فيها هي!
..............
في البيت، كان مراد بيتكلم مع اتنين من رجالتهم.
قال مراد: أيوه، أحمد باشا قال تنفذوا النهارده.
قال الراجل: الشركة متأمّنة، وهنحتاج عدد مننا.
قال مراد: هييجوا، المهم ميحصلش غلط تاني... أنا هكون معاكم عشان لو حصل أي حاجة.
قال الراجل: تمام يا مراد باشا.
مشيوا، فشاف مراد أمه اللي بصتله وقالت:
— إنت خارج بردو يا مراد؟
قال مراد وهو بيشغل عربيته:
— أيوه يا ماما.
قالت بقلق:
— ممكن تقولي إيه اللي بيحصل؟
قال مراد: مشاكل في الشغل.
قالت: قصدك المصنع؟ أنا مش زعلانة، اجمد، هو اللي كبّره. أنا مضايقة عشانه هو.
قال مراد: وبابا مضايق، ومش هيعدّي اللي حصل.
قالت باستغراب:
— مش هيعدّي اللي حصل إزاي؟ هو في حد ورا الموضوع؟
قال مراد: متشغليش بالك يا ماما.
قالت: إنتوا الاتنين بقالكوا فترة مشغولين، وكأنكوا بتحضروا لحاجة كبيرة. فإيه بالظبط يا مراد؟ متقلقنيش.
قال مراد وهو بيبصلها:
— بتثقي في بابا، مش كده؟ ثقي بردو إن اللي بيعمله ده عشاننا... هي محنة من أعداء عايزين يأذونا، زي ما اتعودنا، وبابا قدّها.
سكتت وهي بتبصله، فربت على إيدها ومشي.
.....
كانت عربية فخمة داخلة الشارع، والكل بص ناحيتها باستغراب، وبدأت التساؤلات:
— في إيه تاني؟ — مين ده؟! — جاي لمين؟!
وقفت العربية قدام عمارة ديما، ونزل السواق وفتح الباب، فنزل أحمد السيوفي بشموخه وقساوة ملامحه الجادة. نزل سامح معاه، وقال:
— هنا يا أحمد باشا.
طلع أحمد ببرود، لكنه وقف لما لقى باب الشقة مفتوح، وسمع صوت زعيق. قرب، وشاف امرأة غاضبة، بتاخد شالها وتلفه على راسها، وهي بتنادي:
— ريم... رييييم! روحتي فين؟!
لفت وهي رايحة ناحية الباب، لكنها وقفت مكانها فجأة، واتقطعت أنفاسها، وكأن الزمن وقف لما شافت منى قدامها.
منى شافت وجه أحمد اللي واقف قدامها بلحمه وشحمه، واتجمدت مكانها.
أما أحمد، فكان بيبصلها بصدمة كبيرة. الوجه ده عمره ما هينساه، مهما مر الزمن.
الصدمة كانت مسيطرة عليهم هما الاتنين، وكل واحد فيهم عنده أسئلة كتير، ومش مستوعب التاني بيعمل إيه هنا.
قطع الصمت صوت إبراهيم، اللي قال بغضب:
— بسببك ريم خرجت! لو حصلها حاجة، إنتِ اللي هتبقي السبب، و...
وقف فجأة، واتشل مكانه، لما شاف الراجل اللي قدامه. وشه اصفر، وكأنه شاف شبح.
قال برعب: — السيوفي؟!
رجع لورا بخوف، وقال بتلعثم: — إنت... جيت عشانها؟!
بصله أحمد بصدمة من سؤاله، فإبراهيم جري فورًا ناحية بره، هربان برعب وخوف، زي الجبان اللي بيهرب من اللي مستنيه.
لكن منى فضلت واقفة مكانها، وكأن حاجة قيدتها، ونسّتها حتى إنها كانت بتدور على بنتيها الاتنين اللي اختفوا.
رفع أحمد عينيه ليها، وقال بصوت هادي، لكنه مليان بوجع السنين:
— منى...
دخل أحمد، وعينه في عينها، وقال: — مش دي شقة ديما؟
قال سامح: — أيوه هي يا أحمد باشا.
اترعبت منى أكتر، وهي بتبص لأحمد، وقالت بصدمة: — ديما؟! إنت... إنت قابلت ديما؟!
قال أحمد باستغراب: — إنتِ... إنتِ بتعملي إيه هنا يا منى؟! في شقة البنت دي؟!
بصتله منى بصدمة من كلامه، فقال أحمد: — إنتِ ليكي علاقة بيها؟!
فضلت منى باصة له من غير ما ترد، فكمل أحمد بحدة: — إنتِ ليكي علاقة بيهم؟! إنتِ اللي زقّيتيها عليّا؟!
قالت منى باستنكار: — إنت بتقول إيه؟! وإنت تعرف ديما منين؟! إنت قابلت ديما؟!
بصلها أحمد باستغراب من أسئلتها المتلاحقة، فقالت منى بلهفة: — قابلتها إمتى وإزاي؟! وعرفت اسمها منين؟! وجبت عنواني إزاي؟!
قال أحمد ببرود: — أنا جاي لها، بس معرفش إن ليكي علاقة بيها.
قالت منى بتردد: — ديما بنتي و...
سكتت فجأة، فبصلها أحمد بصدمة، وقال: — بنتك؟! البنت دي بنتك؟! وهي فين؟!
قالت منى بقلق: — مش هنا... هربت من حسن ورجالته.
قطب أحمد حاجبيه، وسألها: — حسن جوزها التاني؟!
بصتله منى بذهول، وقالت: — إنت إزاي تعرف الحاجات دي عن ديما؟!
رد أحمد ببرود: — ابقي اسألي بنتك... هي هتقولك إزاي أعرفها.
قالت منى بسرعة: — أحمد، استنى!
وقف أحمد وبصلها، ولاحظ رجفة إيديها وهي بتحاول تتمالك نفسها.
قالت منى بصوت مرتعش: — معرفش في إيه بينك وبينها، معرفش... بس فاكرة جملتها ليا كويس.
افتكرت كلام ديما ليها، لما قالت:
«في حاجات كتير هحكيهالك، ومحتاجة أعرفها منك يا ماما... حاجات عن الماضي.»
اتملت عينيها بالدموع، وبصت لأحمد برجاء، وقالت: — لاقيلي ديما... ساعدني أوصل لها قبل حسن!
قال أحمد بحدة: — إنتِ فهمتيني غلط أوي يا منى! اللي بيني وبين بنتك عداوة، مش محبة تخليني أساعدها!
بصتله منى بصدمة، فقال أحمد ببرود: — معرفتي إنك أمها مش هتزود حاجة، بالعكس، زادت الطين بلة! متستنيش مني أمدلك إيدي في أي حاجة، سواء في عيشتك، ولا في حياتك، ولا حتى لبنتك... متستنيش مني أمد إيدي للي حرمتني من الخلفة، وحرمتني أكون أب، وخدت بنتي مني!
قالت منى بوجع: — متفتحش الماضي يا أحمد!
رد أحمد بقسوة: — إنتِ الماضي كله يا منى! الماضي اللي بيلاحقني!
قالت منى بمرارة: — بيلاحقك عشان ذنبك اللي هيفضل متعلق في رقبتك عمرك كله!
قال أحمد بغضب: — أيا كان ذنبي، محدش كان ليه حق يحرمني من بنتي، حتى لو كانت إنتِ!
سكتت منى، ودموعها لمعت في عينيها، بينما أحمد كمل بعيون مليانة شر:
— خلفتي ونسيتي، ولا كأنك عملتي حاجة! بسببك ماتت، وإنتِ عايشة حياتك... وفوق كل ده عايزاني أساعدك؟! إيه اللي ممكن يخليني أساعدك يا منى؟!
قالت منى بمرارة: — متغيرتش يا أحمد... لسه قلبك جامد زي ما إنت!
لف أحمد عشان يمشي، وقال بحدة: — مبحبش إن الصدف ترميكي قدامي تاااني!
قالت منى بسرعة، وصوتها مليان رجاء: — ساعدها! هي... متساعدنيش أنا، ساعد ديما! لو عندك ندم على اللي حصل زمان، ساعدها هي!
سكت أحمد، ووقف مكانه، من غير ما يلتفت ليها.
كملت منى بلهفة: — أظهر ندمك لو فعلًا حسيته، وأنقذها منهم!
لف أحمد راسه ناحيتها ببطء، وقال ببرود: — عايزاني أنقذ بنتك؟!
ابتسم أحمد بسخرية، وقال: — شوفتي مستقبلها قدامك وهي في السجن، ولا لسه؟
قالت منى بسرعة: — ديما مظلومة! ديما بريئة من كل ده!
قال أحمد ببرود: — أنا مش جاي أتعرف عليها، وميهمنيش أعرف!
قالت منى بصوت مرتعش: — يهمك... لأنها بنتك!
وقف أحمد عند كلمتها، وكأن رجليه اتشلّوا. لف ناحيتها ببطء، وجحظت عينيه بشكل مخيف، وقال بصدمة: — إنتِ قولتي إيه؟!
سكتت منى، ودموعها بتلمع في عينيها، بينما أحمد فضل باصص لها بصدمة كبيرة، وكأنه مش قادر يستوعب اللي سمعه.
قال بصوت مهزوز من الصدمة: — عيدّي اللي قولتيه!
كانت منى بتبصله بعيون مدمعة، وبتفتكر كلام ديما:
«ماما، عايزة أشوف بابا... خرجت أدور على بابا عشان يرجع يعيش معانا... ماما، هو بابا مش بيحبني؟»
نزلت دمعة من عين منى، وقالت بصوت مكسور: — ديما بنتك يا أحمد!
حس أحمد كأن صاعقة نزلت على راسه، بل وكأن السما السابعة اتطبقت فوق دماغه. اتراجع خطوة، وقال بذهول: — إنتِ بتقولي إييييه؟! مين اللي بنتي؟!
قالت منى وهي بتبكي: — ديما بنتك، والله!
بصلها أحمد بحدة، وقال بجنون والغضب بيظهر في عينيه: — إنتِ كداااابة!
قرب منها، ومسك إيديها بعنف، وصرخ: — إنتِ كداااابة! قولي إنك بتتكدبي!
هزها بقسوة، وصوته اتكسر وهو بيصرخ: — بنتي ماتتتت! أنا بنتي ماتتتت! إنتِ اللي قولتي إنها مااااتتتتت! شهادة وفاتها وهي طفلة... ماتتتت! إزاي البنت دي تبقى هي نفسها؟!
قالت منى وهي بتبصله بدموع: — هي نفسها ديما... مماتتش، هي عايشة... أنا...
حبست غصتها، وكملت بصوت مكسور: — أنا كدبت عليك عشان تسيبها، لكن هي عايشة... عايشة طول الوقت ده، وكبرت وبقت ديما!
سابها أحمد، والصدمة الكبيرة لسه مسيطرة على عينيه، وكأنه مش قادر يستوعب إن بنته اللي عاش عمره فاكرها ماتت، كانت عايشة طول السنين دي.
كان سامح واقف عند الباب، حاسس إن اليوم ده أشبه بأهوال يوم القيامة عليه، من شدة الصدمة اللي شايفها في أحمد، واللي عينيه كانت هتخرج من مكانها من هول اللي سمعه.
قالت منى بوجع: — بقولك دلوقتي لأني محتاجاك... محتاجاك عشانها، مش عشاني! محتاجاك تساعدها، لأني ضعيفة... بعترف بده، بعترف إني ضعيفة! أنا مقدرتش أحميها، مقدرتش أعملها حياة غير الشقا والتعب والمشاكل اللي اتحطت فيها... مقدرتش أحميها منها!
دمعت عينيها أكتر، وكملت بانهيار: — في كل مرة كنت بتكسر فيها وأندم على اللي عملته، كنت أكذب على نفسي وأقول: كفاية إنها في حضني... بس كنت غبية! كنت فاكرة إني كده بحميها، ومكنتش شايفة غير إني واحدة ضعيفة، وإن الدنيا متوحشة وأنا لوحدي، ومش كفاية ليها.
نزلت دموعها وهي بتفتكر كل اللي ديما عاشته، وقالت: — الدنيا كانت بتشيلها وتنزلها سابع أرض، وهي ساكتة وبتستحمل... لأنها اتعودت تسكت عشان متشيلنيش همها، أو عشان عارفة إني مقدرش أساعدها. مبقدرش أحميها من شر الدنيا والناس... بالعكس، كنت أنا اللي بحتاجلها دايمًا!
هزت راسها بألم، وكملت: — كنت أنا اللي برمي حملي عليها... ولا مرة قدرت أحميها، ولا مرة ساعدتها، ولا مرة قدرت أقف قدام الشر، لأني ضعيفة زيها... خليتها في الدنيا ضعيفة وملهاش حد، سهل أي حد يكسرها، وسهل يستضعفوها!
كان أحمد ساكت، والصدمة شلّت حواسه، بينما منى بصتله برجاء، وقالت: — أرجوك، الحقها! أنقذها منهم! لو حسن لقاها، هيقتلها!
رد أحمد بصوت مخنوق: — أنا قتلتها قبله!
بصتله منى، ولاحظت عينيه المحمرة من دموع بيحاول يخبيها. اتصدمت، وكأنها لأول مرة تشوف الدموع في عينيه، وتشوف النظرة دي في وشه.
كمل أحمد بصوت مبحوح: — أنا بإيدي دي قتلتها قبله!
مدت منى إيدها ناحيته، وقالت بقلق: — مش فاهمة...
وفجأة، نزل بقلم قوي على وشها، فاتسعت عينيها من الصدمة.
صرخ أحمد: — بسببك! بسبب إنك خبّيتيها عني! بسببك خلتيني...
رجع لورا زي المجنون، وبدأت صور ديما تتزاحم في دماغه، وهو بيفتكرها في مستشفى الإدمان، وهي بتصرخ من الألم، وبتتلوى من العذاب بسبب المخدرات اللي دخلها جسمها.
قال أحمد بذهول، وكأنه مش قادر يستوعب الحقيقة: — يعني بنتي... يـ... يعني إيه؟!
افتكر لما كلمها من قلب المستشفى، وهي في عز عذابها، عشان يدخلها المخدرات ويخلص عليها. افتكر كلامها وقتها:
«لو كان عندك بنت، كنت هتقبل تبقى هنا؟»
ووقتها رد عليها ببرود: «معنديش، ولو عندي بنتي متعيش مع واحد في الحرام!»
اتسعت عينيه، وهو بيستوعب كلامها من جديد. معقول كانت بتتكلم عن نفسها؟! كانت بترمي الكلام على نفسها وهي مش عارفة... ولا كانت عارفة؟!
افتكر نظراتها ليه، وهي راكبة العربية مع جاسر، وإزاي كانت بتبصله بعيون مليانة وجع. حتى لما كلمها، مانهرتش فيه، ولا واجهته، كانت هادية وهي بتسمعه بصمت، رغم إنها كانت بتتعذب بسببه، رغم إنه هو اللي عمل فيها كده!
حس أحمد إنه هيتجنن. كأنه بيعيش جحيم اكتشاف الحقيقة، وجواه رغبة إنه يخبط دماغه في الحيطة من هول اللي عرفه.
صرخ بألم: — خلتوني أعمل فيها إيه؟! أنا خليتها مدمنة!
بص لإيده اللي كانت بترتعش، وكأن قوته كلها انهارت في اللحظة دي. نزلت دمعة من عينه، وقال بصوت متقطع:
— أنا دخلت المخدرات جسمها... وخليتها تجري في دمها! أنا قتلتها... أنا قتلت بنتي!
حط إيده على راسه، وصرخ بانهيار: — بنتي أنا... أنا عملت فيها كده!
قالت منى بصدمة: — عملت إيه يا أحمد؟!
كان أحمد بيتراجع لورا زي المجنون، وبيصرخ: — أنا عملت إيييه؟! عملت إيييييييه؟!
قعد على كرسي، ورجليه مش قادرة تشيله. عينيه دمعت، وكانت محمرة من الصدمة، وقال وهو بيحاول يستوعب اللي حصل: — كابوس... أكيد كابوس!
افتكر أحمد ديما وهي قدامه، وافتكر الحفلة لما حط لها المخدرات، وهي بتتأذى قدام عيونه، وهو بيتفرج عليها باستمتاع.
«عرفتي تفتحي الشنطة إزاي؟ انطقي!»
«كتبت تاريخ ميلادي.»
كانت بتقول الحقيقة... مكنتش بتكدب. هو فعلًا عامل كلمة السر بتاريخ ميلادها!
قال أحمد بوجع: — ليه شر أعمالي يكون فيها؟! ياااا رب!
كان حاطط راسه بين إيديه زي المجنون، وبيعصر دماغه، وقال بانهيار: — ربنا ياخدني... أنا عملت إيه فيها؟! وصلت بنتي لإيه؟! كل ده وهي قدامي وقريبة مني، وأنا... وأنا بقتلها بالبطيء!
جت صورة جاسر قدام عينيه، فقبض إيده بغضب، وقال بشر: — شيطان!
رفع عينيه اللي مليانة جحيم، وافتكر ديما لما دخلت الفندق وسرقت العقد منه، وافتكر اللي زقّها عليه وخلاه يشوفها عدوه وينتقم منها قبله.
افتكر جاسر وعيونه الخبيثة، فصرخ بغضب: — هقتله... هشرب من دمه! هقتلك يا جاسر!
قام أحمد من مكانه، فقالت منى بلهفة:
— اجمد... هتقتل مين؟ عملت إيه في ديما؟ انطق!
وقف أحمد مكانه، فبصتله منى بخوف، وسألته بصوت مرتعش:
— إنت... إنت ما أذيتهاش، مش كده؟
نزلت دمعة من عين أحمد، دمعة قهر، وكأن الجبل القاسي اللي عمره ما انكسر بقى هش، وقلبه بيرتجف من الوجع.
قال بصوت بارد:
— لسه حسابك مجاش يا منى.
بصتله منى بصدمة وهو بيمشي. كان سامح واقف بره، ورجله مش قادرة تشيله من هول اللي سمعه. وأول ما أحمد خرج، حس إن جسمه هيقع، وفعلاً وقع قدام رجليه.
قال أحمد بحدة:
— باشا!
كان سامح مرعوب من اللي سمعه، ومن فكرة إن أحمد كان متفق على بنته من غير ما يعرف حقيقتها.
قال أحمد:
— خلوه تحت عينكم لحد ما ألاقي ديما.
مشي أحمد، لكنه وقف فجأة وبص لسامح وقال:
— هاتوا الكلب اللي هرب لما شافني... لو رجعت وملقتوش، هتتحاسب إنت!
أومأ له سامح، فمشي أحمد، بينما سامح بصله، وبعدها بص لمنى، وقام على رجله وقال:
— اتفضلي معايا.
قالت منى بقلق:
— على فين؟ أنا هقعد هنا، بنتي هترجع. لو ملقتنيش، هتوه!
قال سامح بحزم:
— ده أمر أحمد باشا.
نزل أحمد وركب عربيته، وهو بيعمل مكالمة. رد مراد:
— أيوه يا بابا، إحنا قدام الشركة.
قال أحمد بسرعة:
— ارجع يا مراد، إنت والرجالة.
قال مراد باستغراب:
— نرجع؟
قال أحمد:
— أيوه. لاقيلي ديما، سيبوا اللي في إيدكوا ولاقوها.
استغرب مراد وقال:
— في حاجة تانية؟! افتكرت إن جاسر بس...
قاطعه أحمد بنبرة حاسمة:
— لاقيها يا مراد، قبل ما تتأذى.
قفل أحمد المكالمة، وانطلق بعربيته، بينما مراد فضل باصص للتليفون، مش مستوعب اللي سمعه.
هو أبوه فعلًا بيقوله يلاقي البنت اللي اسمها ديما قبل ما تتأذى؟ هو خايف عليها، ولا محتاج منها حاجة؟
مراد مكنش قادر يفهم أي حاجة. رجع وهو بيشاور للرجالة يمشوا وراه، ولما وصل لعربيته، ركب وقال:
— امشوا، أحمد باشا لغى الموضوع.
............ باك.
وصل أحمد بعربيته ووقف قدام عربية جاسر. كانت عينيه مليانة شر، ودموعه محبوسة جواها، ونظرته جاحظة من شدة الغضب.
نزل أحمد وقرب من جاسر، لكن عينه وقعت على ديما اللي كانت بين إيديه، وهو شايلها بحذر. كان الناس كلهم واقفين بيتفرجوا على المشهد بذهول، مش مصدقين إن اتنين من أشهر رجال الأعمال، اللي مبيشوفوهمش غير على شاشات التلفزيون، واقفين قدامهم بالشكل ده.
قال أحمد بنبرة حادة:
— جاسر... جه وقت أصفي حسابي معاك!
لاحظ جاسر نظرة أحمد، نظرة عمره ما شافها في عينيه قبل كده، لكنه متهزش، ورد بثبات:
— استنيتك كتير.
قال أحمد بحدة:
— هات ديما!
قرب منه، لكن جاسر رجع لورا وهو لسه شايلها بين إيديه، وبصله بشك.
— عايز إيه منها؟
اشتعلت عيون أحمد بالشر، فكرر جاسر سؤاله بنبرة أقوى:
— عايز إيه منها؟ كلامك معايا! ولو كنت جايلي، فأنا مش ههرب منك... أنا استنيتك تجيلي يا أحمد!
قال أحمد بغضب:
— كنت عارف إن ده مخطط شيطان زيك!
جاسر مردش، فتابع أحمد بوعيد:
— المرة دي هتبقى نهايتك!
قال جاسر وهو بيحاول ينهي الكلام:
— استناني وأنا هجيلك، لكن دلوقتي كل اللي يهمني ديما، ومعنديش وقت ليك.
رد أحمد بنظرة مليانة كراهية:
— ديما نفسها هي اللي هتدمرك!
بصله أحمد بشر، وقال بنبرة آمرة:
— إنت سمعت أنا قلت إيه؟ سيب ديما وسلّمهالي... هي مش هتروح معاك في حتة!
سكت جاسر عند الجملة دي، وهو بيبص لأحمد، وكأنه مش شايف عدوه واقف قدامه، بل أبًا خايف على بنته.
بص جاسر لديما، وبعدها رجع بص لأحمد. هل أحمد عرف حقيقتها؟ هل عرف إن ديما بنته؟!
ده مستحيل...
في اللحظة دي، وصلت عربية مراد، ونزل منها وهو بيبص لأحمد وجاسر، وعينيه بتطلق شرار من الغضب.
— بابا!
فتح جاسر باب العربية، لكن أحمد قال بحدة:
— أنا مش قولتلك سيبها؟!
قرب أحمد منه، لكن مراد وقف في وشه وقال بقلق:
— بابا، الناس...
بصله أحمد بغضب عارم، لدرجة إن مراد نفسه خاف من نظرة أبوه، النظرة اللي عمره ما شافها في عينيه قبل كده.
في الوقت ده، دخل جاسر ديما العربية وركب وراها، لكن صوت أحمد وقفه:
— استنى عندك يا جاسر!
جاسر متلفتش له حتى، وانطلق بالعربية متجاهله تمامًا.
صرخ أحمد بغضب:
— اوعى يا مراد استنى عننندك!
قال مراد وهو بيحاول يهديه:
— بابا، الناس! خلينا نمشي.
بصله أحمد بحدة وقال:
— خدها بسببك!
رد مراد بسرعة:
— عارفين مكانها، هياخدها لفيلا جاسر.
بصله أحمد للحظات، وبعدها بعد عنه وركب عربيته، وانطلق بيها، بينما مراد فضل باصص لأبوه باستغراب، مش قادر يفهم اهتمامه الشديد بجاسر وديما، ولا سر الغضب اللي شافه في عينيه.
.............
كانت روز قاعدة في الفندق، وهي ماسكة تليفونها وقابضة عليه بضيق.
قالت بضيق: «جاسر مش بيرد ليه؟!»
رمت تليفونها بزهق، وهي بتعقد إيديها وقالت: «ممكن يكون عنده شغل، بس ليه مكلمنيش من الصبح؟ ولا حتى جالي بعدما سبته ليلة امبارح!»
مسكت التليفون تاني، وفجأة عينيها وقفت بصدمة لما شافت صورة في الشارع، صورة اتلقطت بالعافية من بين الناس اللي كانت واقفة. كان ظاهر فيها جاسر وهو شايل ديما بين إيديه وحاضنها قدام الكل.
اتصدمت من اللي شافته، وعينيها اشتعلت نار وهي بتقول بغل: «كانت إنتِ!»
قبضت على تليفونها بقوة، وقالت بغضب: «راحلها... رااااحلها! ماااشي، ماااشي يا ديما!»
خرجت تليفونها وعملت مكالمة، وهي بتتوعد بشر، وقالت بغل:
«مش هسيبهولك... مش ههنيكي عليه!»
................
كان جاسر سايق، وعقله مشغول بأحمد اللي ظهر قدامه فجأة وطالب بديما.
مكانش فاهم سبب ظهوره، ولا إيه اللي خلاه يطلبها بالشكل ده، لكنه مكنش مهتم بكل الكلام اللي قاله. كل اللي كان يهمه دلوقتي هو ديما، وإنها تكون بخير.
ومع ذلك، كان جواه إحساس إن الوقت جه... وإن المواجهة اللي استناها كتير مبقاش منها مفر.
بص لديما اللي كانت جنبه، وبعدين رن تليفونه.
رد على المكالمة، وكان أسامة على الطرف التاني:
— جاسر، إنت فين؟
قال جاسر وهو مكمل سواقة:
— راجع الفيلا، ديما معايا.
رجع جاسر الفيلا وهو شايل ديما بين إيديه، ونزل من العربية من غير ما يستنى حد يساعده.
همست ديما بصوت ضعيف: — جاسر...
لكنه مكنش بيرد، دخل بيها الفيلا وطلع على جناحه، وهي بتحاول تفتح عينيها وتفهم هي فين.
قالت بتعب: — جاسر، أنا فين؟
رد من غير ما يبصلها: — في البيت.
دخل جناحه وقفل الباب، وبص للخدم اللي كانوا بيقربوا منه، وقال بلهجة حاسمة:
— محدش يدخل!
ابتعد الخدم فورًا عن المكان، بينما جاسر دخل الحمام وهو لسه شايل ديما.
قالت بقلق: — جاسر، نزلني!
مردش عليها. حاولت ديما تنزل من بين إيديه، لكن رجليها خانتها وكانت هتقع، فلحقها بسرعة.
قال بحدة: — اقفي!
بصتله ديما بارتباك، وهي بتحاول تفهم هو بيعمل إيه، وشدت جاكته من عليه.
— جاسر، إنت بتعمل إيه؟!
فتح جاسر الدش، وسحبها ناحيته، فحاولت تبعد عنه وهي بتترجاه:
— جاسر، سيبني! أنا مفيش حاجة!
لكنه فضل ساكت، وعينيه بتراقبها بقلق، وكأنه مش سامع غير صوتها.
ولما حاول يساعدها تتخلص من هدومها المبلولة، اتسعت عيون ديما برعب، وبدأت تهز راسها وهي بتتراجع.
— ملمسنيش يا جاسر! ملمسنيش! سيبني... لأ!
في اللحظة دي، احتضنها جاسر بقوة، فانهارت ديما في البكاء، وفضلت تكرر وسط شهقاتها:
— ملمسنيش... بتعمل إيه؟ أنا مش متوسخة!
مردش عليها، وفضل حاضنها تحت المية اللي كانت بتنزل عليهم هما الاتنين، لحد ما صوت صراخها بدأ يهدى.
وفجأة، سكتت ديما ورفعت عينيها ليه.
كان جاسر بيعانقها تحت المية، من غير ما يبصلها بالطريقة اللي كانت خايفة منها. كان حضنه مختلف، كأنه بيحاول يخبيها جواه ويحميها من كل حاجة، حتى من خوفها هي نفسها.
مكانش بيبص لجسدها، ولا كان بيحاول يقرب منها بالطريقة اللي تخيلتها. كان كل اللي بيعمله إنه متمسك بيها، وكأنه خايف لو سابها لحظة تختفي من بين إيديه.
دمعت عيون ديما، وهمست بصوت مكسور:
— لى بتعمل كده...
قرب وشه منها قليلًا، وسألها بصوت مخنوق:
— لمسك فين؟
سكتت ديما بحزن، وهي بتفتكر حسن. مسح جاسر بإيده على كتفها وقال بهدوء:
— هقولهالك، وهرجع أقولها تاني... إنتِ أنضف من أي حد يا ديما، أنضف مني ومن كل اللي هنا.
بصتله ديما بعدم تصديق، وقالت بصوت متقطع:
— إزاي جيت؟ كنت... كنت فاكرة إنك مش هتيجي تاني، وإنها نهايتنا. افتكرت إن...
دمعت عينيها بحزن، وبدأت تنشج، فقربها جاسر منه أكتر وقال:
— المهم إني جيت قبل ما حاجة تحصلك.
مسكت ديما فيه وهي بتبكي، وجاسر حاوطها بدراعيه، ضاممها ليه وكأنه مش عايز يسيبها تاني.
همست بحزن وسط دموعها:
— ليه عملت كده؟ قدرت تجيب غيري؟ قدرت تستبدلني؟
رد جاسر بصوت مخنوق:
— مقدرتش... مقدرتش يا ديما، لأني مكنتش شايف غيرك.
حضنها أكتر، وهو بيخبيها جواه، كأنه عايز يعوضها عن كل لحظة خوف عاشتها بعيد عنه.
كانت ديما ملفوفة في الروب الصوف الناعم بعد ما خلصت استحمام، وقاعدة ساكتة، بينما جاسر كان لسه بملابسه المبلولة، وكأنه مش حاسس بالمية اللي بتقطر منه.
بصلها وسألها:
— بقيتي كويسة؟
قالت بقلق:
— حسن هييجي هنا وهيعمل مشاكل.
رد جاسر بنبرة حادة:
— المشاكل دي أنا اللي هعملها، مش هو.
بصتله ديما بقلق، ففضل مركز عينيه عليها، وبعد لحظات سألها:
— ليه قولتي كده؟
سكتت ديما، فكرر سؤاله:
— هتفضلي ساكتة زي ما سكتي وقتها؟
رفعت عينيها ليه باستغراب:
— عرفت منين؟
قال جاسر وهو بيحاول يتمالك أعصابه:
— لسه معرفتش. أنا عايز أسمع الحقيقة منك إنتِ.
قالت بسرعة:
— أنا كنت هقولك، بس...
قاطعها بغضب:
— بس إيييه؟!
اتخضت ديما من نبرة صوته، فمسكها جاسر من كتفيها وبصلها بحدة، وقال:
— بس إيه يا ديما؟! تقوليلي إنه جوزك؟ تقوليلي إنك متجوزة؟! عارفة إنتِ لبّستيني نفسي في إيه؟!
ردت ديما بصوت ضعيف:
— كان غصب عني.
قال جاسر بغضب، وصوته بيعلى أكتر:
— غصب عنك؟! غصب عنك تضيّعينا؟ تضيّعيني معاكي وتنهي كل حاجة بينا؟ تكذبي وتدمّرينا في لحظة؟!
قالت ديما بحزن: — أنا كل اللي كان همي إنت.
قال جاسر بغضب: — ليه؟! خفتي عليا يقتلني؟! ردي! إيه اللي خوفك؟ إيه مبررك؟ متقوليلي ليه مقولتليش؟ لييييه؟!
قالت ديما بحزن: — أنا آسفة يا جاسر.
زقها بغضب وقال: — هتفضلي لحد إمتى غبية، مبتفكريش في عواقب أفعالك وكلاااامك؟!
سكتت ديما بحزن من زقته، ونزلت دمعة من عينيها بسبب كلامه وغضبه.
قال جاسر بحدة: — مهما قولتي، مش هحطلك مبرر يا ديما! مهما قولتي وبررتي كدبك، مفيش مبرر!
سكتت بحزن، لكن جاسر مسكها وسحبها ناحيته بعنف، وقال: — كان عاجبك حالنا؟! كان عاجبك اللي هيحصل فينا من وراكي؟! مش قادرة تفهمي ليه إنك بقيتي حياتي؟! من غيرك هضيييع!
بصتله ديما بوجع، فمسك وشها بين إيديه وقال بغضب ممزوج بالألم: — ليه تحسسيني بالشعور ده؟ لييييه؟! بطلي تعملي كده! بطلي تتصرفي في علاقتنا كأنها ولا حاجة، وارمي أمورك عليا! ارميها وأنا أحلهالك، لكن متكدبيش وتدمرينا بسببك وبسبب تفكيرك!
قالت ديما بصوت ضعيف: — أنا...
قاطعها جاسر: — إنتِ إيييه؟! إنتِ إيييه يا ديما؟!
سحبها بقوة لصدره، وضمها ليه، بينما ديما فضلت ساكتة طول الوقت، مش قادرة تستوعب غضبه ولا الوجع اللي وراه.
كان جاسر بيحضنها بقوة، وكأن كل الغضب اللي جواه بدأ يهدى وهو حاضنها، رغم إن عتابه الحاد كان بيوجعها، وكلامه كان بيسيب أثر في قلبها.
لكنه، من غير ما يقصد، كان بيثبتلها قد إيه هي مهمة عنده، وإنها مش لوحدها في الوجع ده.
ديما كانت فاكرة إنها الوحيدة اللي بتتعذب، والوحيدة اللي خايفة تكون خسرت التاني، لكنها مكنتش تعرف إن جاسر هو كمان اتألم منها أكتر مما تخيلت، وإن خوفه من خسارتها كان أكبر من قدرته على تحمل كذبتها.
حضنته ديما وقالت بحزن:
— عارفة إني غلطت، بس مكنتش هعرّضك للخطر بسببي.
قال جاسر باستغراب وغضب: — خطر من مين؟ من حسن ولا إبراهيم؟!
قالت ديما بصوت ضعيف: — مني...
بصلها جاسر بعدم فهم، فكملت وهي بتحاول تشرحله:
— لو كان فيديو اتنشر، الكل كان هيتكلم عليا دلوقتي. ولو كانوا عرفوا باللي بينا وعلاقتنا، كانت سمعتك إنت اللي هتتضر.
نزلت عينيها بحزن، وكملت: — لقيتهم بيصوروك، حاولت أخفي وشك، حاولت أتكلم معاك كأنك مديري مش أكتر. وقلت إنه جوزي عشان أبعد العيون عنك، ومحطش عليك شبهة بسبب واحدة زيي.
قال جاسر بحدة: — غلطتك يا ديما... لو مكنتش أنا اللي هحميكي، يبقى مين؟!
قالت ديما بندم: — أنا آسفة يا جاسر، كل اللي قولته غلط. أنا روحت لقيته بيقولي إنه جوزي، معرفش إزاي ولا إمتى. أنا ممضيتش على أي حاجة، أنا متجوزتش ولا اديت موافقتي غير ليك إنت... إنت أول حد دخل حياتي، وآخر حد أنا...
اتكسرت نبرتها، ودمعت عينيها، وبدأت دموعها تنزل وهي بتحاول تكمل:
— أنا...
ربت جاسر عليها، وضمها ليه أكتر، وقال بهدوء: — ششش... خلاص.
لكن ديما هزت راسها وهي بتبكي: — صدقني، أنا مقصدتش يحصل فينا كده.
قال جاسر بثبات: — أنا مصدقك يا ديما.
رفعت عينيها ليه بخوف، وتمسكت بيه أكتر، وقالت برجاء:
— هياخدني منك... متخليهوش ياخدني!
ربت عليها وقال: «خلي حد يقربلك وأنا هقتله، أيا كان مين هو، حتى لو أبوكي. محدش هياخدك مني».
كانت بتبكي في حضنه، بينما عيون جاسر كانت بتشبه عيون الذئاب، فهو مذكرش أبوها من فراغ. كان بيفتكر أحمد اللي جاله عند حسن، وعينه كانت بتتحرك على ديما، وهو بيطالبه بيها: «سيب ديما وسلمهالي، مش هتروح معاك في حتة».
كان جاسر صامت وهو بيبصلها، فهل عرف أحمد حقيقة ديما؟
.......................
كان أحمد في بيته، وقال بغضب: «بسببك يا مراد! خدها من قدام عيني، خدهااا!»
قال مراد: «بابا، أنا عملت كده عشانك».
قال أحمد: «أنت كده بتحميه هو، مش بتحميني أنا».
قال مراد: «بس...»
قاطعه أحمد: «نهايته اتكتبت، نهاية الشخص ده على إيدي».
قال مراد: «بابا، أنا أول مرة أشوفك كده! هو حصل إيه؟»
قال أحمد: «حصل اللي أنت متعرفوش، ولا عقلك ممكن يستوعبه يا مراد. اللي حصل إني كنت مجرم وأذيت نفسي».
بصله مراد بشدة، فقال أحمد: «أذيت نفسي وقتلتها بإيدي دي... أنا اتلعب بيا».
جه سامح فورًا وقال: «أحمد باشا، لقينا إبراهيم وبقى معانا».
قال مراد: «إبراهيم مين؟»
قال أحمد: «و ديما».
قال سامح: «في فيلة عند جاسر».
قبض أحمد على إيده، فقال مراد: «في إيه يا بابا؟ ليه كل الاهتمام بالبنت دي؟ أنت كأنك... كأنك خايف عليها!»
قال أحمد: «لأنها بنتي».
بصله مراد بشدة من اللي سمعه، وقال بصدمة: «إيه... بنتك؟!»
...................
كان أسامة واقف تحت، ولما نزل جاسر قاله: «جبت اللي قلتلك عليه؟»
خرج أسامة حباية، وقال: «أنت هتعمل إيه؟»
قال جاسر: «هخرج، بس أنت هتكون هنا. خليك مع ديما، واتأكد إنها تفضل هنا، متخرجش أو تروح في أي حتة».
قال أسامة: «هو في حاجة؟»
رن تليفون جاسر، وكان رقم غريب.
قال أسامة: «في رقم بيرن عليك بقاله كتير».
قال جاسر: «أحمد».
بصله أسامة بشدة وقال: «أحمد السيوفي؟»
قال جاسر: «بيدور عليا، وأنا هروحله».
قال أسامة: «هتروحله؟ بس... إزاي؟»
قال جاسر: «طلب أصفي حسابي معاه. هبعد ديما وهتكلم معاه... عدو لعدو».
قال أسامة: «ديما لو عرفت...»
قال جاسر: «عشان كده خليك هنا لحد ما الموضوع ده يخلص».
قال أسامة: «قصدك إيه بيخلص؟»
مردش عليه جاسر، وخد تليفونه، وهو بيطلع خد كوباية العصير اللي الخدامة مطلعاها.
كانت ديما قاعدة على السرير، والإرهاق باين عليها. دخل جاسر، فبصتله ديما باهتمام.
قال جاسر: «لسه منمتيش؟»
قالت ديما: «عايزة أسألك عن حاجة».
قال جاسر: «أجّلي أي كلام دلوقتي لبعدين».
قالت ديما: «خليني أسألك السؤال ده بس دلوقتي... لما أُغمى عليا، أحمد السيوفي كان موجود؟»
سكت جاسر من سؤالها، وقال: «منين جبتي الكلام ده؟»
قالت ديما: «حسبت إني سمعته صوته».
قال جاسر: «ما اتكلمتيش معاه قبل كده عشان تعرفي صوته يا ديما، ومتقوليش إنك عرفتي صوته لما قابلناه في القرية وإنتِ معانا».
سكتت ديما وافتكرت أحمد وهو بيكلمها في المستشفى.
قال جاسر: «ديما، هو كلمك؟»
قالت ديما: «كلمني مرة لما كنت في المستشفى».
بصلها جاسر بريبة، وقال: «قالك إيه؟ وليه مقولتليش؟»
قالت ديما: «غرضي أطفي نارك، مش أزيدها. ومن غير ما أقولك، روحت حرقتله مصنع مراته».
قال جاسر: «قالك إيه؟»
قالت ديما: «كانت مجرد مكالمة عدوانية، وعرفني إنه السبب في اللي كنت فيه».
سكت جاسر وقبض على إيده، ومد إيده بالعصير. بصتله ديما وخدته منه، وقالت: «شكرًا».
قال جاسر: «متفكريش في أي حاجة دلوقتي».
قالت ديما: «معرفش ليه اتخيلت إني سمعته، جه كلمك عشان كده سألتك... بسبب اللي حصل نسيت أقول لماما عنه».
فتحت ديما عينيها فجأة وقالت: «ماما... ريم!»
قال جاسر: «ديما...»
قالت ديما بقلق: «هيتأذوا بسببي، لازم أروحلهم!»
قال جاسر: «ديما، هما بخير».
لكن ديما حست بدوخة، وبدأت الدنيا تلف بيها.
قالت بتعب: «أنا مش عايزة أي حاجة تحصل يا جاسر، أنا عايزة هدوء».
قال جاسر: «نامي دلوقتي، ومتفكريش في حاجة».
رمت راسها على كتفه، والكوباية وقعت من إيدها، فالتقطها جاسر.
قالت ديما بصوت خافت: «جاسر، أنت...»
غمضت عينيها غصب عنها، فمسح جاسر بإيده على شعرها وقال: «أنا آسف، مكنش فيه حل غير كده».
رجّعها ببطء على السرير، وساب الكوباية، وغطّاها، وبص في عينيها للحظات، وقال: «هخلص الموضوع وأجي على طول».
بعد عنها ومشي، ولما نزل شاف أسامة، اللي قاله: «هاجي معاك».
قال جاسر بحزم: «أنا قلت لأ».
قال أسامة: «مقابلكم إنتوا الاتنين هتبقى فيها عواقب كبيرة».
دخل جاسر مكتبه وفتح خزنته، وخرج سلاحه. بصله أسامة بشدة وقال: «جاسر، بلاش».
قال جاسر: «مقدرش آمن لأحمد وحقارته ممكن توصل لإيه».
قال أسامة: «عشان كده متروحش».
قال جاسر: «مش أنا اللي أديه ضهري».
قال أسامة: «وديما...»
سكت جاسر، فبصله أسامة وقال: «المنوم ده كان عشانها؟»
قال جاسر: «أسامة...»
قال أسامة: «أنا مش مطمن».
قال جاسر: «الموضوع انتهى. حاولت، بس أحمد هو اللي مُصر يظهرلي. مهما حاولت عشانها، هيفضل قدامي».
قال أسامة: «المقابلة دي مش هيكون فيها غير قاتل ومقتول».
قال جاسر: «أفضل أكون أنا القاتل في الدور ده، لأنه خده زمان مع أهلي».
عمّر جاسر سلاحه، وحط فيه الرصاص، ومشي قدام عيون أسامة اللي كانت بتلاحقه بقلق. ركب جاسر عربيته، وهو بيرن على رقم.
قال جاسر: «أنت فين؟»
قال أحمد: «متخيلتش إنك تكلمني».
قال جاسر: «عايز إيه؟»
قال أحمد: «قابلني في المصنع».
سكت جاسر، وقال بعيون مطفية: «جايلك».
قفل تليفونه وانطلق بسيارته.
.......................
بدأت ديما تفتح عينيها براحة وهي بتفوق، واتعدلت ببطء، لتلاقي نفسها في الأوضة لوحدها. بصت جنبها لكوباية العصير اللي جاسر ادهالها، واللي مكنتش شربتها كلها.
بصت للكوباية، وفجأة استوعبت اللي حصل.
قالت بصدمة: «جاسر!»
قامت بسرعة وخرجت من الأوضة وهي بتنادي عليه، ونزلت بقلق وخوف وهي بتدور عليه.
قال أسامة: «ديما!»
لفتله ديما فورًا وقالت: «أسامة!»
قال أسامة باستغراب: «إنتِ إزاي...»
قاطعته ديما: «قصدك على العصير؟»
سكت أسامة من إدراكها للي حصل، فبصتله ديما بقلق وقالت: «جاسر فين؟»
قال أسامة: «لما ييجي، اسأليه.»
قالت ديما بإصرار: «جاسر فين يا أسامة؟ مخبيين عليا إيه؟»
قال أسامة بتردد: «راح يقابل أحمد.»
بصتله ديما بشدة وخوف، وفجأة رن جرس الباب.
راحت ديما ناحية الباب فورًا، لكن أسامة ناداها بقلق: «ديما!»
وقفت ديما مكانها لما لمحت رجال الشرطة من خلف الباب، وبصتلهم بخوف شديد وقلق.
قال أسامة باستغراب: «في إيه؟»
قال الظابط: «ديما أحمد هنا؟»
بصتلهم ديما بصدمة لما استوعبت إنهم بيسألوا عنها، وقالت بقلق: «في إيه؟»
قال الظابط بجدية: «فى أمر بالتحقيق معاكي... اتفضلي معانا.»
...........
في مصنع مهجور ومعزول، نزل جاسر من عربيته. كان جه المكان ده قبل كده، لما حرقه وخلاه رماد. مبقاش غير مكان لا يصلح لأي حاجة.
دخل جاسر بكل ثبات، ولمح أحمد من بعيد. كان الضوء اللي بينور المكان جاي من لمبة خافتة، بتنور وتطفي.
قرب جاسر منه بهدوء وصمت.
قال أحمد: «جاي لوحدك؟»
قال جاسر: «مش محتاج حد يبقى معايا، أنا كفيل بيك».
قال أحمد: «أوقات الثقة الزيادة بتبقى غلط».
وفجأة، ظهر رجالة من ورا جاسر. لف جاسر بعينه عليهم ببرود، وشاف إن أحمد مأمّن المكان ومعاه رجّالته. رجع بعينه لأحمد وقال ببرود:
«ده الفرق بيني وبينك... لسه زي ما أنت، غدار بطبعك يا أحمد».
قال أحمد: «كأنك عارف عني كتير».
قال جاسر: «كفاية إني عارف أنت إيه بالنسبالي».
قال أحمد: «بشر، بس أنا لسه معرفش أنت مين».
خرج أحمد سلاحه ووجّهه ناحية جاسر، لكن جاسر متهزش قدام سلاح أحمد، اللي بصله بعيون شرانية وغاضبة.
قال أحمد: «مفيش سبب يخليني أسيبك تخرج من هنا عايش... غلطت أوي لما جيت، وغلطت أكتر لما جيت لوحدك».
قال جاسر: «المقابلة دي أنا استنيتها أكتر منك».
قال أحمد: «العداوة كانت شغل منافسة وفلوس... بس اتضح إن العداوة أكبر من كده».
قال جاسر: «يمكن لأنها مرتبطة بالدم».
قال أحمد بغضب: «وأنااا هشرررب من دمممك! هشرب من دمك يا جاسر، أنت وكل حد شارك معاك، وأنت بتستخدمها ضدي!»
صمت جاسر، وقرب أحمد منه وقال: «كنت عارف تبقى مين بالنسبالي؟»
سكت جاسر.
قال أحمد: «حطيتها هناك وبعتها لي، مهتمتش حتى لو عرفتها، لأني هأذيها، وهكون أذيت نفسي أنا... خليتها سلاح ليك بياااا!»
قال جاسر بصدمة: «ديما؟!»
قال أحمد: «كنت عارف دي تبقى مين، مش كده؟ كنت عااارف إنها بننننتي!»
صمت جاسر، وأدرك عيون أحمد الشرانية، اللي رغم غضبها مكنتش بتخلو من الرحمة. فهم أخيرًا الرحمة اللي كان بيشوفها في عيونه، وجت منين وليه.
قال أحمد: «ده كان تخطيطك؟»
قال جاسر: «عرفت منين إنها بنتك؟»
قال أحمد: «ميفرقش معاك».
قال جاسر: «ميفرقش، طالما مش فارق معاها هي كمان».
بصله أحمد بشدة وقال: «بتقول إيه؟»
قال جاسر: «أسئلتك بتدور حوالين سؤال واحد يا أحمد... عايز تسأل إذا كنت أنا اللي خططت لده؟»
قرب جاسر منه، وقال بثبات:
«أنا... خططت ودبّرت. مكنش المقصد ديما، كنت أنت المقصود».
لمعت عيون أحمد بشر، فقال جاسر: «مكنتش أعرف إن معرفة إنها بنتك هتفرق معاك كده، وأنت بنفسك اللي اتخليت عنها».
قال أحمد بغضب: «اخررررس! ولا كلمة!»
قال جاسر: «مش دي الحقيقة؟»
قال أحمد: «بقولك ولااا كلمة! أنت متعرفش حاجة!»
قال جاسر: «ده مش كلامي، ده كلامها».
قال أحمد بصدمة: «أنت بتقول إيه؟ ديما تعرف أنا مين؟»
قال جاسر: «عارفة».
بصله أحمد بشدة، والصدمة بانت في عيونه.
قال جاسر: «وهي السبب اللي خلاني آخد هدنة منك. مكنتش عايز أورطها في اللي بيني وبينك، عشان كده بعدتها وجيتلك دلوقتي».
قال أحمد بانهيار: «استخدمتها ضدي... خلتني أذيها... أأأذي نفسي!»
قال جاسر: «مصنعك كان أقل تمن على اللي عملته فيها، وأنا شايف إنك بتتعذب دلوقتي أكتر من اللي عملته، ونسيت خسارة كبيرة زي اللي أنت فيها».
قال أحمد بغضب: «أنت شيطان! قد إيه دماغك قذرة!»
قال جاسر: «صدقني، مهما حاولت، مش هتيجي جمبي حاجة يا أحمد».
قال أحمد: «اخررررس!»
قال جاسر: «شاكك في ده؟»
قال أحمد بصوت مهزوز، لأول مرة يخلو من الغضب: «لأول مرة أكون عايز أقتل نفسي قبل عدوي... بسببك أنا... أنا دمرت بنتي! دمرتها ودمرت نفسي معاها! لأول مرة أشوف سواد أعمالي، وأشوف نهايتي كتبتها بإيدي... في لحظة اكتشفت إنها بنتي».
دمعت عينه، وكمل بصوت مكسور:
«خليت اللحظة اللي المفروض أبكي فيها من الفرح إنها عايشة، أبكي من العذاب اللي مش هيسيبني بسبب اللي عملته فيها».
عمر أحمد سلاحه، وفي نفس اللحظة رفع جاسر سلاحه ووجّهه ناحيته هو كمان. وكل واحد فيهم فضل ثابت مكانه، من غير ما يهتز.
بصّ رجال أحمد لجاسر، وبعدين بصّوا لسيدهم، اللي كان الغضب مالي عينيه.
قال أحمد: «عملت كده ليه؟ ليه دخلتها بينا؟ ليه استخدمت بنتي عليّا؟ أنت مين؟ أنت مين يا جاسر بالظبط؟ إزاي عملت الخراب ده ولسه هتعمل؟»
وبعيون مليانة شر، كمل: «انطق! أنت ميييين يا جاااسر؟ أنت ميييين بالظبط؟ اكشف عن حقيقتك!»
قال جاسر: «حقيقتي بعترف بيها قدام الكل، مش أنت بس يا أحمد. وطالما سألت أنا مين، هديك الإجابة... أنا سواد أعمالك».
بصله أحمد بغضب، فقال جاسر: «أنا ذنوبك اللي عملتها زمان، أنا أثر جريمتك اللي فاكر إنها اتنست... لو نسيتهم، أفكّرك... أفكّرك أنا بيهم».
رفع جاسر عيونه الحمرا، ودم والديه قدام عينيه، وهو بيبص لسلاح أحمد، وشايف السكينة اللي عليها دم عيلته.
قال جاسر: «أنا جاسر كمال الهاشمي».
صمت أحمد عند سماع الاسم اللي اتردد في ودنه بصوت جاسر.
قال جاسر: «مش بيفكّرك بحاجة ده يا أحمد؟»
قال أحمد بتلعثم: «ك... كمال؟»
قال جاسر: «كويس إنك لسه فاكر، عشان هخليك تردد اسمه، ويكون آخر كلام يطلع منك وأنت بتموت».
بص أحمد لجاسر، وهو بيفتكر الولد الصغير اللي شافه مع كمال زمان.
«سلّم يا جاسر».
مدّ الصغير إيده وصافح أحمد، اللي ابتسم وقال: «برغم إنه صغير، إيده خشنة من شغلك يا كمال».
رجع أحمد للحاضر، وعينه متسمّرة على جاسر، اللي كان واقف قدامه بعيون مليانة شر وانتقام، ونار كأنها بتطلع منه.
قال أحمد بصدمة: «أنت ابن كمال... أنت جاسر!»
قال جاسر: «غلطت لما سبتني عايش... كان لازم تتأكد إنك تتخلص من العيلة كلها، حتى لو عيل صغير! كان لازم تخلص عليه عشان ميطلعلكش زي دلوقتي ويطالب بروحك».
صمت أحمد وهو بيبصله، وكأنه بيشوف حقيقة الشخص اللي واقف قدامه لأول مرة.
قال أحمد: «هربت يومها؟»
قال جاسر: «هربت عشان أقابلك دلوقتي... ولما رجعت، شوفت فلوسك ونجاحك وثروتك... ثروتك اللي اتبنت على دم عيلتي، دم أبويا اللي دخّلك بيته».
عمّر جاسر سلاحه، وعيونه بتطلق الشر، وهو بيفتكر اللي حصل زمان.
وفجأة، انقض عليه واحد من رجال أحمد، لكن جاسر تفاداه وشقلبه ووقعه على الأرض. واحد تاني قرب منه، فرفع جاسر سلاحه وضرب نار على رجله.
بص رجالة أحمد لجاسر بشدة، فقال بتهديد: «قربوا وهتموتوا!»
رفع جاسر عينه لأحمد، اللي كان بيبصله بذهول.
قال جاسر: «معنديش مشكلة أموت هنا، بس خليك واثق إن لما أموت، هاخد روحك معايا. هقتلك زي ما قتلتهم!»
قال أحمد بصدمة: «قتلتهم؟!»
قال جاسر بصوت مليان غضب: «أيوووه، قتلتهم!»
بص أحمد في عيون جاسر المريبة، وكأنه مش قادر يستوعب اللي بيسمعه.
قرب جاسر منه، وهو مشهّر سلاحه في وشه، ورفعه ناحية دماغه، عايز ينهي حياته في اللحظة دي.
قال بغضب: «قتلتهم يا أحمد! لو فاكر إن القضية اتقفلت، تبقى غلطان... أنا قدامك أهو، وأنا هاخد حقهم منك!»
قال أحمد: «أنا مقتلتهمش!»
قال جاسر: «مش مضطر تنكر يا أحمد، أنا مجتش أسمع كدبك».
بصله أحمد، وكأنه مش قادر يصدق إن جاسر شايفه بالشكل ده، بينما عقل جاسر مكنش شايف غير الدماء اللي فضلت تطارده سنين.
قال جاسر وهو بيثبّت سلاحه عليه: «خلينا ننهي الدم هنا».
نزل أحمد سلاحه، وبصله جاسر بشدة من اللي عمله، وبص لإيد أحمد اللي نزلت السلاح.
قال أحمد: «الغلط الوحيد اللي عملته يومها إني سكت. معاك حق يا جاسر، أنت الماضي اللي مخبيه، أنت جريمتي، بس مش جريمة القتل، لأني مقتلتش أبوك وأمك... أنا مقتلتش كمال!»
قال جاسر بغضب: «كداااب! أنا شوفتك... شوفتك بعيني!»
سكت أحمد، وبص لسلاح جاسر اللي كان واضح إنه مش بيهزر بيه.
قال أحمد: «دورت عليك، بس ملقتكش.»
قال جاسر: «كنت عايز تقتلني معاهم يا أحمد!»
قال أحمد: «هربت إزاي؟»
قال جاسر: «المكان مكنش فيه رجالتك بس يا أحمد، جه راشد وأنقذني منك قبل ما أعمل غباء وألحق بعيلتي، ويمسكوني رجالتك.»
قال أحمد بصدمة: «ر... راشد؟!»
قال جاسر: «مجرد تابع، بس كان أوفى من ناس كتير. كان سبب وجودي هنا دلوقتي، وكان سبب إني أفتكر أهلي اللي خدتهم مني.»
دمعت عيون جاسر، والغضب كان باين في ملامحه وهو بيبص لأحمد بشدة.
قال أحمد: «أنا مش بكدب عليك يا جاسر.»
قال جاسر بحدة: «امسك سلاحك، متعملش نفسك كويس. إحنا الاتنين مجرد أعداء.»
قال أحمد: «معاك حق، إحنا مجرد أعداء، بس أنا مش هقتلك. نزّل سلاحك، خلينا نتكلم.»
قال جاسر: «ملّيش كلام معاك.»
حرّك صباعه ناحية الزناد، فبصله أحمد بشدة وقال:
«جاااسر... مين قالك عن ديما؟»
سكت جاسر وهو بيبصله بحنق.
قال أحمد: «نفسه هو اللي قالك إني القاتل... راشد، أنت عارف يبقى مين؟»
قال جاسر بحدة: «مش أنت اللي هتعرفهولي!»
قال أحمد: «راشد يبقى عمك.»
بصله جاسر بصدمة كبيرة من اللي بيقوله.
قال أحمد: «راشد محمود الهاشمي...»
بصله جاسر بذهول، لأن مقالش اسم أبوه بالكامل،احمد قاله مع مع اختلاف اسم راشد.
كمل أحمد: «راشد مش تابع يا جاسر... راشد أخو كمال، ده عمك يجاسر!»
شكرا لزيارتكم عالم روايات سكيرهوم
