رواية مابيني وبينه قدر الفصل الثامن عشر بقلم رقية الأنصاري
_ ايدك بتترعش ليه؟
آسر رفع عينيه لها.
_ عشان من كام شهر كنت ببقى فرحان لو رديتي عليا كلمتين ودلوقتي أنا قاعد قدامك وبلبسك دبلتي فاديني ثانية أستوعب إن ده بجد.
ميرال سكتت.
ملامحها هديت غصب عنها.
بصت للدبلة وبعدها رجعت بصتله.
دخل الدبلة في صباعها.
وفور ما استقرت مكانها صوت التصفيق والزغاريد علي حواليهم.
زينب كانت واقفة جنب أحمد وعينيها بتلمع من الفرحة.
عبدالله بيضحك وهو بيبص لابنه.
عبدالحميد بيدعيلهم.
وأحلام واقفة جنب يوسف بابتسامة كبيرة.
ميرال بصت لإيدها.
لسه مش مستوعبة شكل الدبلة فيها.
آسر قرب منها وقال بصوت واطي.
_ إيدي بطلت تترعش على فكرة.
ميرال رفعت عينيها له بنص ابتسامة.
_ متفرحش أوي عشان لسه قدامك اختبارات كتير.
آسر ابتسم.
_ وأنا مش مستعجل على حاجة.
ميرال سكتت لحظة.
وبعدين ابتسمتله.
ابتسامة صغيرة.
لكنها كانت كفاية بالنسباله.
•••••••••••••••••••••••••••••••••••••••••••
عدى يومين.
يوسف وأحلام كانوا ناويين يرجعوا القاهرة من تاني يوم بعد الخطوبة، لكن زينب رفضت تسيبهم يمشوا، وباقي العيلة شاركوها الزن لحد ما وافقوا يقعدوا يومين زيادة.
واليوم ده كان آخر يوم ليهم في الصعيد.
كانوا الأربعة قاعدين في الجنينة بعد العصر.
يوسف وأحلام في ناحية.
وميرال وآسر قدامهم.
الجو كان رايق، وكلهم تقريبًا من ساعة ما قعدوا وهما بيضحكوا.
يوسف بص لميرال وهي بتلف الدبلة في صباعها للمرة اللي مش عارف يعدها.
_ إنتي على فكرة من ساعة ما لبستي الدبلة وإنتي كل شوية تبصي عليها.
ميرال رفعت عينها له.
_ عشان لسه مش متعودة عليها ومش معنى كده إنكم تفضلوا تراقبوني طول اليوم على فكره.
أحلام ضحكت.
_ محدش بيراقبك بس إنتي واضحة أوي يا ميرو.
ميرال بصتلها.
_ إنتي بالذات اسكتي عشان بقالك يومين مستنياني أعمل أي حاجة عشان تمسكيها عليا.
آسر كان ساكت وبيضحك.
أحلام بصتله.
_ وإنت ساكت ليه ما تقول حاجة.
آسر رفع كتفه.
_ أنا شايف إن الدبلة عاملة شغلها كويس ومبسوط وساكت.
ميرال لفتله بسرعة.
_ ما تتغرش أوي.
آسر ضحك.
_ حاضر يا ستي.
فضلوا شوية يتكلموا.
وبعدين آسر افتكر حاجة ومد إيده للموبايل.
_ صحيح الواد مروان كان قايلي إن الشلة كلها خارجة النهارده في القاهرة.
ميرال بصتله.
_ شلة الجامعة؟
_ آه أغلبهم خارجين ومروان كان بيزن عليا أروح معاهم.
سكت ثانية وبص لهم.
_ ما تيجوا نروح كلنا بدل ما كنا هننزل إحنا الأربعة لوحدنا وأنتي أصلًا بقالك كتير مشفتيش حد منهم.
ميرال تحمست فورًا.
_ والله أنا موافقة جدًا أنا فعلًا وحشوني وبقالي فترة طويلة مشفتهمش.
أحلام قالت بسرعة.
_ وأنا كمان موافقة.
يوسف هز راسه.
_ خلاص طالما الكل موافق يبقى منقعدش نضيع الوقت.
آسر قام.
_ يلا بقى كل واحد يجهز ونمشي عشان نلحقهم.
ميرال قامت وراها أحلام.
_ يلا بينا.
يوسف بص لآسر وهو بيقوم.
_ يلا يا ابو الزمالة.
آسر قام معاه.
_ يلا.
•••••••••••••••••••••••••••••••••••••••••••
بعد وقت قليل كانوا كلهم واقفين قدام البيت.
يوسف حط شنطته وشنطة أحلام في العربية لأنهم بعد الخروجة هيرجعوا بيتهم في القاهرة على طول.
بص لآسر وميرال.
_ طب تعالوا معانا ونروح كلنا بعربية واحدة.
آسر أشار ناحية عربيته.
_ لا أنا لازم أخد عربيتي عشان لما نخلص أنا وميرال نرجع بيها على هنا مش عايز اطلب عربية.
يوسف هز راسه.
_ خلاص خد خطيبتك معاك وأنا وأحلام نروح بعربيتنا.
ميرال لفت له.
_ خطيبتك دي بقت سهلة على لسانكم أوي.
آسر فتح لها باب العربية.
_ سيبيهم براحتهم أنا الصراحة الكلمة عاجباني.
ميرال بصتله.
_ محدش سألك.
آسر ضحك.
_ اركبي يا ميرال.
أحلام وهي رايحة لعربية يوسف قالت.
_ ربنا يصبرك عليه في الطريق.
ميرال ردت فورًا.
_ أنا اللي هحتاج الدعاء فعلًا.
آسر قرب من العربية وهو بيضحك.
_ كل ده ولسه متحركناش.
••••••••••••••••••••••••••••••••••••••••••••••
في الطريق كان آسر سايق وميرال جنبه.
الراديو شغال بصوت خفيف.
آسر لمح الدبلة في إيدها وهي بتحرك صوابعها مع الأغنية.
ابتسم.
ميرال خدت بالها.
_ بتبصلي ليه.
آسر رجع عينه للطريق.
_ مفيش بس الدبلة حلوة عليكي.
ميرال حاولت ما تبتسمش.
_ الحمد لله إن اختيارك عجبك ما انت الي اخترتهالي.
آسر ضحك وهو بيبصلها بحب.
_ أنا اختياراتي كلها عجباني بصراحه مش الدبلة بس.
ميرال بصتله ثانيتين.
_ إنت بقالك يومين لسانك طويل أوي.
آسر ابتسم.
_ بقولك إيه أنا بقيت خطيبك رسمي ومحدش يقدر يمنعني أتغزل في خطيبتي.
ميرال ضربته بخفة على دراعه.
_ ركز في الطريق يا آسر.
ضحك وكمل سواقة.
أما يوسف وأحلام فالطريق عندهم كان أهدى.
أحلام فاتحة الشباك شوية ويوسف مشغل أغنية هادية.
بص لها وقال.
_ مبسوطة إننا قعدنا اليومين دول؟
أحلام ابتسمت.
_ جدًا وحلو إن آخر يوم نخرج كلنا كده قبل ما نرجع.
يوسف مد إيده ومسكت إيده.
_ وأنا مبسوط عشان إنتي مبسوطة.
أحلام بصتله.
_ النهارده مفيش شغل ولا تليفونات صح.
يوسف رفع إيدها وباسها.
_ النهارده لسه إجازة يا ست البنات متقلقيش.
•••••••••••••••••••••••••••••••••••••••••••
أول ما وصلوا الكافيه كانوا أغلب الشلة سبقوهم.
ميرال لسه داخلة لما تاليا قامت بسرعة وجريت عليها.
_ وحشتييييني أوي! إنتي فين من زمان.
ميرال حضنتها وهي بتضحك.
_ وإنتي كمان وحشتيني والله بس الدنيا كانت ملخبطة معايا شوية.
جودي قربت وهي باصة لإيد ميرال.
_ ملخبطة إيه بقى وأنا شايفة الدبلة من قبل ما أشوفك أصلًا ألف مبروك يا عروسة.
ميرال ضحكت بكسوف.
لارا حضنتها بعدها.
_ بجد فرحتلك أوي لما عرفت.
ميرال سلمت عليهم كلهم وبعدها شدت أحلام ناحيتها.
_ استنوا أعرفكم دي أحلام بنت عمي ومرات يوسف.
تاليا ابتسمت لأحلام.
_ أهلًا بيكي إحنا سمعنا عنك من ميرال.
أحلام بصت لميرال.
_ يا ترى قالت كلام كويس ولا أقلق؟!
جودي ضحكت.
_ لا متقلقيش كانت بتتكلم عنك بحب أوي.
أحلام دخلت معاهم في الكلام بسرعة.
وفي الناحية التانية آسر كان بيسلم على الشباب ويعرف يوسف عليهم.
سليم ، زياد ، رامي ، ومروان.
مروان أول ما شاف آسر وميرال والدبل في إيديهم ابتسم ابتسامة فهمها آسر فورًا.
قرب منه وهو بيسلم.
_ أيوه يا عم أهو الرهان طلع...
آسر قاطعه بـ نظرة حادة.
_ مروان اسكت أحسنلك.
مروان رفع إيده وهو بيضحك.
_ خلاص يا عم مش هفتح بوقي.
آسر هز راسه.
_ ده أحسنلك.
قعدوا كلهم حوالين ترابيزة كبيرة.
الكلام اتفتح بسرعة وكلهم اندمجوا مع بعض.
بعد شوية جودي بصت في موبايلها.
_ كارما بتقول في الطريق بس هي لو قالت في الطريق يبقى غالبًا لسه خارجة من البيت.
زياد ضحك.
_ كارما لو قالت خمس دقايق زودي عليهم نص ساعة وانتي مرتاحة.
بعد حوالي ربع ساعة ظهرت كارما فعلًا.
دخلت وهي بتضحك.
_ متبصوليش كده والله الطريق كان واقف بطريقة تخلي البني ادم يكره الخروج من البيت.
بدأت تسلم عليهم واحد واحد.
ولما عينها وقعت على آسر وقفت.
_ إيه ده آسر! إنت هنا بجد.
آسر رفع عينه.
_ آه عاملة إيه.
كارما قربت وهي بتضحك.
_ إنت مختفي فين بقالك قد إيه مش بنشوفك ولا حتى بتظهر معانا زي زمان.
آسر ابتسم ابتسامة عادية.
_ الشغل والله والدنيا كلها دخلت في بعضها.
قعدت كارما في كرسي فاضي قريب منهم.
ميرال كانت وقتها بتتكلم مع أحلام وتاليا ومركزتش معاها أوي في البداية.
لكن بعد كام دقيقة سمعت كارما بتضحك وتقول.
_ فاكر يوم المشروع اللي كنا هنترمي بسببك برا السكشن.
آسر رفع حاجبه.
_ بسببي أنا ده إنتي اللي ضيعتي الفايل وفضلتي تتهمينا كلنا.
كارما ضحكت.
_ ما هو طلع عندك في الآخر.
آسر رد.
_ عشان إنتي اللي اديتهولي ونسيتي.
ميرال بصت ناحيتهم نظرة سريعة.
وبعدين رجعت لكلامها.
بعد شوية كارما سألت.
_ إنت لسه بتشرب القهوة السادة اللي كنت مصمم تقنعنا إنها أحسن حاجة في الدنيا.
آسر ضحك بخفة.
_ آه بس بطلت أحاول أقنع حد.
ميرال بصتله تاني.
المرة دي أطول شوية.
أحلام لمحتها.
بصت ناحية كارما وآسر.
وبعدين رجعت لميرال من غير ما تقول حاجة.
كارما فضلت تتكلم.
_ على فكرة إنت فعلًا وحشتنا في الجامعة محدش بقى يستحمل رخامتي زي ما انت كنت بتستحمل.
آسر رد وهو بيرفع الكوباية.
_ أنا مفيش حد زيي يبنتي.
ميرال نزلت عينها على الطبق.
أحلام قربت منها سنة.
_ إنتي كويسة.
ميرال بصتلها.
_ آه كويسة في إيه.
أحلام رفعت حاجبها.
_ مفيش بس إنتي مركزه مع حاجه بقالك شويه.
ميرال فهمت فورًا.
_ أنا مش مركزة في حاجة سيبيني في حالي.
أحلام ابتسمت وسكتت.
بعد دقائق كارما طلعت موبايلها وقربت من آسر عشان توريه حاجة.
_ بص فاكر الفيديو ده.
آسر رجع بجسمه سنة قبل ما تقرب منه.
_ ابعتيهولي يا كارما وأنا أشوفه بعدين.
كارما ضحكت.
_ يا بني ده ثانيتين بس بص.
آسر بص بسرعة من بعيد.
_ آه فاكر خلاص.
ميرال كانت ماسكة الشوكة في إيدها.
أحلام بصت لإيدها وبعدين لها.
_ الشوكة ملهاش ذنب طيب.
ميرال حطتها على الطبق بسرعة.
_ أحلام بالله عليكي اسكتي أنا أصلًا مفيش فيا حاجة.
أحلام كتمت ضحكتها.
_ أنا ماقلتش إن فيكي حاجة أصلًا.
ميرال بصتلها بنظرة تحذير.
_ عارفاكي وعارفة اللي في دماغك فمتقوليش حاجة.
أحلام رفعت إيديها باستسلام.
_ حاضر يا ستي أنا ساكتة.
لكن كارما ما بطلتش.
رجعت تقعد وهي بتبص لآسر.
_ إنت بطلت تروح المكان اللي كنا بنقعد فيه بعد المحاضرات.
آسر هز راسه.
_ آه بقالي كتير مروحتش.
كارما ابتسمت.
_ خسارة والله القعدة كانت بتحلو لما تكون موجود.
ميرال رفعت عينها ببطء.
بصت لكارما.
وبعدين لآسر.
آسر نفسه حس إن الكلام زاد.
رد بهدوء.
_ الدنيا اتغيرت وكل واحد بقى عنده حاجات تشغله.
كارما ضحكت.
_ ما هو واضح إن عندك حياة جديدة ومختفي علينا.
آسر بص ناحية ميرال تلقائيًا.
لكن ميرال كانت عاملة نفسها مش شايفة.
بعد شوية كارما قامت ووقفت قريب منه توريه صورة تانية.
آسر رجع الكرسي لورا سنة.
_ يا كارما أنا شايف من هنا والله مش لازم تقربي.
كارما ضحكت.
_ إنت بقيت رسمي أوي كده ليه.
آسر رد.
_ مفيش بس إحنا قاعدين كلنا مش محتاجة تقفي فوق دماغي عشان صورة.
ميرال سمعت الجملة.
بس الغيظ كان سبق المنطق عندها خلاص.
قامت من مكانها.
أحلام أول ما شافتها بتقوم عضت على شفتها عشان متضحكش.
ميرال مشت ناحية آسر.
وقفت جنبه.
بصتله الأول.
وبعدين بصت لكارما بابتسامة هادية جدًا.
_ بعد اذنكم أنا عايزة خطيبي في حاجه ثواني.
واتكت على كلمة خطيبي بطريقة خلت يوسف يلف وشه الناحية التانية عشان يخبي ضحكته.
مروان حط إيده على بوقه.
أحلام نزلت عينها على الطبق.
أما آسر فاتسعت عينه لحظة وبعدها حاول يخبي ابتسامته.
كارما بصت لميرال باستغراب.
_ خطيبك؟
ميرال رفعت إيدها وهي بتعدل شعرها والدبلة ظهرت بوضوح.
_ آه خطيبي.
كارما بصت للدبلة.
_ يا نهار أبيض أنا مكنتش أعرف أصلًا ألف مبروك والله.
ميرال ابتسمت.
_ الله يبارك فيكي يا حبيبتي.
وبعدين لفت لآسر.
_ ممكن تيجي معايا ثانية.
آسر قام فورًا.
_ يلا.
مشى وراها وهو بالعافية ماسك نفسه.
أول ما بعدوا عن الترابيزة ميرال لفتله.
_ هو في إيه إن شاء الله ممكن افهم؟!
آسر حاول يفضل جاد.
_ في إيه يا ميرال.
ميرال عقدت دراعاتها.
_ البت دي مالها من ساعة ما جت وهي لازقه فيك.
آسر رفع حاجبه.
_ وأنا أعملها إيه والله إنتي شايفاني برد عليها على قد كلامها وكل ما تقرب مني أبعد.
ميرال بصتله بغيظ.
_ بس إنت سايبها تتكلم معاك براحتها وتهزر وتفتكر معاك ذكريات وكأنها مش شايفة إنك قاعد وسط ناس.
آسر قرب سنة.
_ ما هي كانت معانا في نفس الشلة يا ميرال وأنا مقدرش أزعق لها قدام الناس لمجرد إنها بتتكلم معايا أنا عملت إيه غلط.
ميرال ردت بسرعة.
_ كان ممكن تقفل معاها الكلام من بدري.
_ ما أنا بقفله وهي بترجعه تاني أعمل إيه أطردها من القعدة ولا أُتف في وشها.
ميرال قالت من غير تفكير.
_ آه تُف في وشها.
آسر سكت ثانية.
وبعدين ضحك غصب عنه.
ميرال فتحت عينيها.
_ إنت بتضحك وأنا متضايقة بجد.
آسر مسك نفسه فورًا.
_ لا حقك عليا والله أنا بس اتخيلتني واقف أتف في وشها قدام الناس.
ميرال عينيها بدأت تلمع من الغيظ.
_ خلاص يا آسر وأنا مالي أصلًا اتكلم معاها براحتك واعمل اللي إنت عايزه أنا مش فارق معايا حاجة.
آسر ابتسامته اختفت لما شاف عينيها.
_ طب إنتي هتعيطي ليه طيب.
ميرال مسحت تحت عينها بسرعة.
_ أنا مش بعيط أنا اتعصبت وخلاص وسيبني نرجع.
لفت عشان تمشي.
آسر مسك معصمها بخفة ورجعها ناحيته.
_ لا والله ما إحنا راجعين وإنتي كده.
ميرال بصتله.
_ وأنا مالي يعني أنا كويسة.
آسر قرب سنة.
_ إنتي متضايقة مني.
_ أنا مش متضايقة.
_ طب بصيلي وقوليها.
ميرال رفعت عينها له بعناد.
_ أنا مش متضايقة منك أنا بس اتضايقت من طريقتها.
آسر ابتسم.
_ يعني إنتي مش غيرانة خالص بس متضايقة إن بنت بتتكلم مع خطيبك وبتقرب منه.
ميرال ضيقت عينيها.
_ ما تلفش الكلام عليا يا آسر.
ضحك بخفة.
_ خلاص مش هقول إنك غيرتي بس خليني أطمنك عشان متفضليش مضايقة.
نبرته هديت.
_ ولا كارما ولا غيرها مش فارقين معايا في حاجة وإنتي بنفسك شايفة إني مش فاتحلها مجال.
ميرال سكتت.
آسر كمل وهو باصلها.
_ وبعدين إنتي زعلانة على إيه يابت ده انتي حبيبتي وخطيبتي واللي قاعدة في القلب والدماغ من غير ما تستأذن كمان.
ميرال حاولت تمنع ابتسامتها.
_ إنت بتقول أي كلام عشان أسكت.
آسر هز راسه.
_ لا والله أنا بقول اللي عندي وبعدين أنا أصلًا من ساعة ما جت وهي بتتكلم وأنا كل شوية ببصلك إنتي.
ميرال نزلت عينها.
آسر ابتسم أكتر.
_ أهو الوش بدأ يفك.
ميرال رفعت عينها له.
_ أنا لسه متضايقة.
_ خلاص وأنا هفضل أصالحك لحد ما الشوية دول يروحوا.
ميرال سكتت.
آسر قال وهو بيضحك.
_ بس على فكرة كلمة خطيبي وهي طالعة منك قدامها كانت حلوة أوي.
ميرال بصتله بحدة.
_ والله لو جبت سيرة الجملة دي تاني الصلح هيتلغي.
آسر رفع إيده.
_ خلاص سكت أهو.
ميرال لفت تمشي.
آسر مشي جنبها.
وقبل ما يوصلوا للترابيزة قال بصوت واطي.
_ بس أنا مبسوط.
ميرال بصتله.
_ مبسوط بإيه.
_ إنك غيرتي عليا حتى لو هتنكري لحد بكرة.
ميرال ضربته في دراعه.
_ آسر.
ضحك ورجع معاها.
أول ما قعدوا أحلام بصت لميرال.
ميرال رمقتها بنظرة تهديد.
أحلام ابتسمت وسكتت.
كارما أول ما رجعوا قالت لميرال.
_ بجد ألف مبروك مرة تاني أنا مكنتش أعرف خالص والله.
ميرال ردت بهدوء.
_ الله يبارك فيكي.
ومن بعدها الجو رجع طبيعي.
وآسر قعد جنب ميرال باقي القعدة من غير ما يعلق بكلمة واحدة على اللي حصل.
بس كل شوية يبص لها ويبتسم.
وكل مرة هي تاخد بالها تبصله بغيظ وهي بالعافية مانعة ضحكتها.
•••••••••••••••••••••••••••••••••••••••••••
في آخر الخروجة وقفوا كلهم برا الكافيه.
تاليا حضنت أحلام.
_ بجد اتبسطنا أوي إننا عرفناكي ومش عايزينها تكون آخر مرة.
أحلام ابتسمت.
_ وأنا والله اتبسطت معاكم جدًا وكده فهمت أخيرًا ميرال وآسر كانوا بيعملوا إيه في الجامعة طول اليوم.
جودي ضحكت.
_ لسه في فضايح كتير متعرفيهاش.
ميرال قالت بسرعة.
_ لا مفيش فضايح وخلاص كفاية لحد هنا.
لارا سلمت على أحلام.
_ لازم تخرجي معانا تاني.
أحلام هزت راسها.
_ أكيد إن شاء الله.
يوسف سلم على الشباب.
رامي قال له.
_ نورتنا يا يوسف ولازم تتكرر.
يوسف ابتسم.
_ إن شاء الله وأنا اتبسطت معاكم جدًا.
مروان قرب من آسر وقال وهو بيبص لميرال.
_ توصلوا بالسلامة يا عريس وخلي بالك من نفسك عشان واضح ان عروستك عامله معاك الواجب.
ميرال بصتله.
_ مروان اسكت احسنلك.
مروان ضحك.
_ أنا مليش دعوه.
آسر خبطه بخفة في كتفه.
_ امشي ياض بقى خلينا نروح ده أنا ماصدقت رضيت عني.
كل واحد راح لعربيته.
يوسف وأحلام أخدوا طريق بيتهم في القاهرة.
وآسر وميرال رجعوا ناحية الصعيد.
•••••••••••••••••••••••••••••••••••••••••••
بعد شوية من الطريق آسر كان سايق ومبتسم لوحده.
ميرال لمحت ابتسامته.
_ إنت بتضحك على إيه من ساعة ما ركبنا.
آسر حاول يخبيها.
_ ولا حاجة الطريق رايق بس.
ميرال بصتله.
_ متستعبطش عليا.
آسر ضحك.
_بعد اذنكم أنا عايزة خطيبي ثانية.
ميرال حطت إيدها على وشها.
_ والله يا آسر لو هشتمك.
آسر ضحك أكتر.
_ طب ما هي حلوة وأنا أول مرة أسمعها منك بالشكل ده.
ميرال بصتله.
_ أنا قلتها عشان كارما تعرف حدودها مش عشان حضرتك تفضل فرحان بيها أسبوع.
آسر هز راسه.
_ السبب مش مهم النتيجة إن خطيبتي غارت عليا قدام الشلة كلها.
ميرال ضربته بخفة على دراعه.
_ أنا ماغيرتش.
آسر قال وهو مركز في الطريق.
_ حاضر يا ميرال إنتي بس كنتي هتقتلي البت عشان طريقتها مش عاجباكي.
ميرال ضحكت غصب عنها.
_ إنت مستفز أوي.
آسر ابتسم.
_ بس اتصالحنا.
ميرال سكتت شوية وبعدين قالت.
_ بس بجد أنا مبحبش أحس إن في واحدة بتاخد راحتها معاك بالشكل ده.
آسر نبرته هديت.
_ وأنا فهمت وعمري ما هعمل حاجة تخليكي تحسي إن مكانك عندي مش واضح.
ميرال بصتله.
_ ماشي.
آسر ابتسم.
_ كده أحلى.
ميرال رجعت بصت للطريق.
والابتسامة فضلت على وشها باقي الطريق.
••••••••••••••••••••••••••••••••••••••••••••••••
تاني يوم في القاهرة.
الساعة كانت قربت من عشرة بالليل.
أحلام قاعدة في الصالة مستنية يوسف يرجع.
كان نزل من الصبح بدري لأن أول يوم شغل فعلي بعد الإجازة كان مليان حاجات متراكمة.
بعتتله العصر تسأله أكل ولا لأ.
رد بعد وقت.
"آه يا حبيبتي متقلقيش."
وبعد المغرب سألته هيرجع إمتى.
الرد اتأخر.
"مش عارف لسه عندي شوية حاجات."
عدى الوقت.
وأحلام قامت حطت الأكل في التلاجة للمرة التانية.
كانت لسه راجعة ناحية الكنبة لما سمعت المفتاح في الباب.
ابتسمت تلقائيًا وقامت.
الباب اتفتح.
يوسف دخل.
وأول ما شافته ابتسامتها هديت.
كان شكله مرهق جدًا.
قربت منه.
_ حمد لله على السلامة يا حبيبي أنا كنت لسه هكلمك أشوفك وصلت لفين.
يوسف رفع عينه لها.
حاول يبتسم.
_ الله يسلمك يا حبيبتي.
حط مفاتيحه على التربيزة.
ومشى ناحية الكنبة وقعد.
سند راسه لورا وغمض عينه.
أحلام فضلت واقفة ثواني.
وبعدين راحت قعدت جنبه.
_ أجهزلك تاكل أنا كنت مستنياك ومأكلتش عشان نتعشى سوا.
يوسف فضل مغمض عينه.
_ لا يا أحلام مش عايز آكل دلوقتي.
نبرته وحدها خلتها تبصله أكتر.
_ طب حتى حاجة خفيفة إنت من الصبح برا.
يوسف هز راسه.
_ لا يا حبيبتي بجد مش قادر دلوقتي.
أحلام سكتت.
فضلت باصاله.
إيده على جبينه ونَفَسه تقيل.
مدت إيدها وحطتها على دراعه.
_ مالك يا يوسف.
فتح عينه وبصلها.
_ مالي.
أحلام قربت سنة.
_ إنت مش طبيعي النهارده ووشك تعبان أوي في حاجة حصلت.
يوسف سكت لحظة.
وبعدين رجع سند راسه.
_ مفيش حاجة يا أحلام أنا بس تعبان شوية من الشغل.
أحلام فضلت باصاله من غير ما تتكلم.
يوسف لمح نظرتها.
_ بتبصيلي كده ليه.
أحلام ردت بهدوء.
_ عشان أنا عارفاك وعارفة إنك مش تعبان شوية بس.
يوسف نزل عينه.
وسكت.
أحلام قربت إيدها من إيده ومسكتها بهدوء.
_ لو مش عايز تتكلم دلوقتي مش هضغط عليك بس متقوليش مفيش وأنا شايفة إن في حاجة.
يوسف فضل ساكت.
وفجأة غمض عينيه.
أحلام قلبها بدأ يتقبض.
شدت على إيده سنة.
_ يوسف بصلي.
شكرا لزيارتكم عالم روايات سكيرهوم
