رواية مابيني وبينه قدر الفصل التاسع عشر والاخير بقلم رقية الأنصاري
_ يوسف بصلي.
أحلام شدت على إيده أكتر لما ملقتش منه رد، قربت منه وهي بتبص لوشه بقلق وبعد ثواني قليلة قلبها وقع لما لقت جسمه ساكن وعينيه لسه مقفولة بنفس الطريقة اللي كانت شافتها منه قبل كده، المرة اللي تعب فيها في أول جوازهم بسبب ضغط الشغل.
_ يوسف.
حركت إيده بإيديها وهي بتحاول تفوقه لكن مفيش رد، فقامت بسرعة جابت إزازة المية من على الترابيزة وبللت إيدها وحطت منها على وشه وهي بتنادي عليه بخوف.
_ يوسف فوق يا حبيبي بصلي كده.
اتحرك بعدها بثواني وفتح عينه ببطء، فضل باصص قدامه كأنه بيجمع نفسه وبعدها بص لها وهو بياخد نفس تقيل.
_ أنا كويس متخافيش.
أحلام بصتله بعدم تصديق وهي لسه ماسكة وشه بين إيديها.
_ كويس إيه يا يوسف إنت مغمى عليك وبتقولي كويس.
_ مش مغمى عليا أنا بس دوخت شوية.
_ وده اسمه إيه يعني.
يوسف حاول يتعدل في قعدته وهو بيمسح وشه بإيده لكن أحلام كانت لسه باصة له بضيق وخوف في نفس الوقت.
_ إحنا مش عدينا بالموقف ده قبل كده يا يوسف ومش الدكتور قالك وقتها إن الضغط وقلة النوم هيعملوا فيك كده إنت عارف إنك بتتعب لما تضغط نفسك ليه بتعمل كده.
يوسف سكت وهو حاطط كوعه على ركبته وبعدها غطى وشه بكفوفه، أحلام بصتله كام ثانية ولما لقت إنه مش بيرد قربت منه أكتر ومدت إيدها مسكت إيده وشدتها من على وشه.
_ بصلي.
يوسف بصلها وهو باين عليه إنه حتى مش قادر يجادل.
أحلام شدته من ايده ناحيتها من غير كلام، ويوسف قرب منها ودخل في حضنها كأنه كان مستني منها الحركة دي، لف دراعه حواليها وشدها له بقوة لدرجة إنها حسّت قد إيه هو فعلًا محتاج يهدى.
حاوطته بإيديها وبدأت تمسح على شعره بهدوء وهي بتبوس راسه كذا مرة.
_ اهدى اهدى أنا جنبك مفيش حاجة تستاهل كل ده.
يوسف أخد نفس طويل وهو لسه في حضنها وبعدها قال بصوت واطي ومهزوز من التعب.
_ أنا تعبت أوي يا أحلام.
أحلام ما قاطعتوش ولا سألته من إيه، فضلت بس ماسكة فيه ومستنية يكمل.
_ أنا عارف إني بضغط نفسي وعارف إن ده غلط وعارف إن اللي حصل دلوقتي ده بسببي بس أعمل إيه يعني أسيب الشغل وأمشي؟ كل حاجة هناك معتمدة عليا وكل واحد مستني مني حاجة ولو أنا وقفت يوم واحد الدنيا بتتراكم فوق بعضها.
أحلام فضلت بتمسح على شعره وهو كمل من غير ما يرفع وشه.
_ الأسبوع اللي أخدناه إجازة ده لوحده اتراكم فيه حاجات قد كده حاجات اتأجلت وحاجات حصل فيها مشاكل وحاجات كان لازم تتراجع من أول وجديد وكل واحد لما شافني رجعت بقى جاي يحط اللي عنده قدامي وكأنه خلاص يوسف جه يبقى كل حاجة هتتحل.
أخد نفس وضمها أكتر.
_ وأنا مش بكره شغلي إنتي عارفة إني بحبه وأنا دخلته وأنا عارف إنه مش سهل وعارف إن فيه مسئولية وأنا أصلًا بحب أبقى مسئول عن حاجة وأعملها صح بس أنا برضو بني آدم بتعب وببقى مش قادر وببقى نفسي يوم واحد بس محدش يطلب مني حاجة.
أحلام حسّت نبرته بدأت تتهز أكتر، فشدته لها وباست راسه.
_ طب ما تقول كده يا حبيبي ما هو مفيش حد هيعرف إنك تعبت لو إنت مصمم تبين لكل الناس إنك تمام طول الوقت.
يوسف سكت.
أحلام كملت وهي لسه بتمسح على شعره.
_ انت مش مطلوب منك تشيل كل حاجة لوحدك لو حاجة زيادة عليك سيبها لبكرة لو حد يقدر يعمل حاجة مكانك خليه يعملها ولو الدنيا اتأخرت يوم مش هتقف يعني إنت أهم من الشغل ومن اي حاجه يا يوسف.
يوسف رفع وشه وبصلها.
_ ما هي المشكلة إني لما بسيب حاجة وأنا عارف إنها واقفة دماغي مبتسبنيش.
_ يبقى دي الحاجة اللي لازم تفهمها مش كل حاجة هتتحل في نفس اليوم ومش كل حاجة لازم تكون بإيدك إنت.
دموعها نزلت من غير ما تاخد بالها.
_ أنا بجد بخاف عليك لما أشوفك كده وخصوصًا إني شوفت الموضوع ده قبل كده ومش عايزة أفضل كل كام شهر أشوفك بتنهار قدامي عشان شغلك.
يوسف فضل باصص لها وبعدها رفع إيده ومسح دمعتها بإبهامه.
_ يعني أنا اللي مخنوق وإنتي اللي بتعيطي.
أحلام بصتله بغيظ وهي بتمسح دموعها.
_ عشان شايفاك كده يا يوسف طبيعي قلبي يوجعني عليك يعني هبقى مبسوطة مثلًا.
ابتسم بخفة و قرب منها باس خدها وهو لسه حاضنها.
_ أنا مش زعلان طول ما إنتي معايا.
أحلام بصتله شوية وبعدها ضمت وشه بين إيديها.
_طب وأنا مش عايزاك تتعب طول ما أنا معاك برضو.
يوسف ابتسم ومسح على دراعها.
_ تعرفي إن كلامك فرق معايا.
_ يبقى اسمعه بقى ومتخلينيش أعيده كل يوم.
يوسف ضحك بخفة.
_ لا بجد أنا عمري ما كنت بعرف أحكي اللي جوايا لحد أصلًا ولا كنت متخيل إني في يوم هقعد أقول لحد أنا تعبت وأنا مضغوط والكلام ده كله.
سكت لحظة وهو باص لها.
_ إنتي أول حد أحكي له بالشكل ده وده لوحده مريحني بطريقة غريبة.
أحلام ابتسمت وقربت باست خده مرة وبعدها التاني.
_ عشان انت جوزي حبيبي لازم تحكيلي طبعا وكمان أنا شاطرة وحلوة وحنينة ومحظوظ إنك اتجوزتني أصلًا.
يوسف رفع حاجبه وهو باص لها باستغراب.
_ إيه ده إيه ده إحنا اتجرأنا وبقينا بنعاكس كمان.
أحلام ضحكت وهي بتبعد وشها عنه.
_ ما تحلمش دي عشان إنت تعبان بس.
يوسف قرب منها وهو بيضحك.
_ لا ده كده أنا هبقى تعبان كل يوم بقى.
أحلام زقته بخفة في كتفه.
_ لا والله قوم أحسن أندمك على الكلمتين.
يوسف ضحك وبعدين بص لها فجأة.
_ إنتي ما كلتيش صح.
أحلام سكتت ثانية وبعدين بصتله.
_ كنت مستنياك.
يوسف اتنهد وهو بيقوم.
_ طب يلا قومي نحضر الأكل سوا.
أحلام قامت وراه وهي باصة له باستغراب.
_ إيه ده بجد هتحضر معايا.
يوسف بصلها وهو بيعدل هدومه.
_ طبعًا يلا يا بنتي.
أحلام ضحكت وهي بتشاور ناحية الأوضة.
_ طب خش غير هدومك الأول وحصلني على المطبخ.
يوسف هز راسه ومشي ناحية الأوضة، وأحلام فضلت باصة وراه لثواني وهي مطمنة شوية عن الأول، وبعدها دخلت المطبخ تحضر الأكل وهو لحقها بعد ما غير هدومه، وأكلوا سوا بهدوء واتكلموا في حاجات عادية بعيد عن الشغل لحد ما يوسف بدأ يفك فعلًا ويرجع لطبيعته شوية، والليلة خلصت بشكل أبسط وأهدى من بدايتها بكتير.
••••••••••••••••••••••••••••••••••••••••••••••••
****************************************
••••••••••••••••••••••••••••••••••••••••••••••••
ميرال كانت واقفة قدام التسريحة بتظبط آخر حاجة في شعرها، لابسة فستان بسيط بس لايق عليها جدًا وحاطة ميكب خفيف مدي وشها شكل أهدى وأحلى، وفضلت تبص لنفسها في المراية وتعدل في الحلق لحد ما سمعت صوت المفتاح في الباب، سابت اللي في إيدها وخرجت بسرعة ناحية الصالة قبل ما آسر حتى يلحق يدخل.
آسر أول ما شافها وقف مكانه وبصلها من فوق لتحت وهو لسه ماسك مفاتيحه.
_ أوبا إيه الحلاوة دي كلها في إيه اللي حاصل عندنا النهارده.
ميرال ضحكت وهي رايحة ناحيته عشان تحضنه.
_ حمد لله على السلامة الأول.
آسر رجع خطوة وهو بيضحك.
_ استني استني إنتي متشيكة كده وهتحضنيني وأنا راجع عرقان من الشغل كده استني اغير الاول.
ميرال قربت منه برضو وكأنها مسمعتوش.
_ انت اهبل ولا ايه؟ ده أنا أمسح عرقك بإيدي مش ابعد عنك.
مسحت بإيدها على جبينه وبعدها حاوطت رقبته…آسر بص لها باشمئزاز مصطنع.
_ يا بت بطلي قرف.
ميرال باست خده وهي لسه في حضنه.
_ قرف إيه هو في حد بيقرف من جوزو برضو.
آسر بعد وشه سنة وبصلها.
_ جوزو؟ إيه جوزو دي إن شاء الله.
ميرال ضحكت.
_ مالكش دعوة دي كلمة في القاموس بتاعي إنت مش هتفهمها.
_ طب مقولتيليش متشيكه كده ليه برضو؟
بعدت عنه وهي بتزقه ناحية الأوضة.
_ روح بس غير هدومك وخدلك نفس وتعالى وأنا هقولك.
آسر رفع حاجبه.
_ ده انتي شكل ليلتك ليلة.
_ روح يا آسر.
دخل وهو بيضحك، وميرال رجعت قعدت على الكنبة وهي كل شوية تبص ناحية الأوضة ومستنية يخرج، وبعد كام دقيقة خرج وقعد جنبها.
_ قوليلي بقى يا ست البنات إيه المناسبة.
ميرال مسكت إيده وبصتله.
_ إنت كان نفسك في إيه أوي الفترة الأخيرة.
آسر فكر شوية.
_ مش عارف حاجات كتير بصراحة.
_ لا في حاجة إنت كنت بتقولي عليها كتير.
فكر أكتر وبعدها وشه نور فجأة.
_ عملتيلي بانيه!
ميرال بصتله ثانيتين وبعدها ضربته على كتفه.
_ لا والله؟! هو إنت نفسك في البانيه للدرجة دي.
آسر ضحك.
_ والله نفسي فيه أوي.
_ ماشي هعملك بانيه بس أكيد مش دي المفاجأة يا آسر فكر بقى.
آسر فكر تاني.
_ جبتيلي سكوتر.
ميرال حطت إيدها على وشها.
_ لا إله إلا الله وأنا هفاجئك بسكوتر ليه يا آسر.
_ ما أنا مش عارف ما تقوليلي بقى ايه شغل الألغاز الي أنتي عملاه ده.
ميرال بصتله بغيظ وبعدها مدت إيدها وطلعت من ورا المخدة بتاعت الكنبة اختبار حمل وحطته في إيده.
_ اتفضل.
آسر قلبه بين صوابعه وبصله.
_ إيه ده.
ميرال فتحت عينيها.
_ كمان مش عارف ده إيه؟!
_ يا بنتي والله ما أعرف.
ميرال خبطته في كتفه.
_ إنت بجد بوظت المفاجأة إنت مستوعب إنك بوظتها.
آسر ضحك وهو لسه باصص للاختبار.
_ طب ماتفهميني بدل ما إنتي سايباني كده زي الأطرش في الزفة.
ميرال قالت بغيظ وهي بتبصله.
_ أنا حامل يا آسر.
آسر رفع عينه لها فجأة.
_ إيه؟
_ لا بقى يعني مبتفهمش و أطرش كمان.
فضل باصصلها ثواني كأنه بيجمع الكلام.
_ حامل؟؟
ميرال هزت راسها.
_ آه والله.
آسر قال وهو ما زال مصدوم.
_ يعني ايه؟
_ حامل يا آسر يعني إحنا هنجيب بيبي يعني إنت هتبقى بابا وأنا هبقى ماما عايز شرح ايه أكتر من كده.
آسر ضحك مرة واحدة وشدها ناحيته بقوة.
_ إنتي بتهزري.
ميرال ضحكت وهي في حضنه.
_ والله ما بهزر.
آسر بعد عنها سنة وبصلها وعينه لمعت فعلًا.
_ ميرال أنا مش مصدق انتي بتتكلمي بجد.
هي أول ما شافت عينه دمعت عينها هي كمان وبدأت تضحك وهي بتمسح عينها.
_ لا بقولك إيه متعيطش عشان أنا ماسكة نفسي بالعافية.
آسر قربها منه تاني وهو بيضحك وسط تأثره.
_ وانا اللي بقولك سكوتر… سكوتر ايه وبانيه ايه بس ده أنا دماغي وقفت أصلا.
ميرال سندت راسها على صدره.
_ المهم إنك فهمت في الآخر.
آسر باس راسها وفضل حاضنها شوية من غير ما يقول حاجة، وبعدها بص لها وهو لسه مبتسم بنفس عدم التصديق.
_ يعني بجد أنا هبقى بابا.
ميرال ابتسمت ورفعت عينيها له.
_ آه يا آسر والله بجد.
رجع حضنها تاني وهو بيضحك، وميرال ضحكت معاه وهي حاسة إن كل اللي كانت مجهزاه في دماغها عشان تقوله اختفى تمامًا، بس بشكل ما اللحظة طلعت أحلى من أي حاجة كانت مخططاها.
••••••••••••••••••••••••••••••••••••••••••••••••••
الساعة كانت عدت نص الليل لما يوسف صحى مفزوع على صوت أحلام وهي بتخبطه في كتفه وبتنادي عليه بسرعة، فتح عينه بالعافية وهو لسه مش مستوعب حاجة وبصلها لقاها قاعدة على السرير وماسكة بطنها ووشها متغير من الوجع.
_ يوسف قوم الحقني أنا بولد.
يوسف غمض عينه تاني وحط وشه في المخدة.
_ نامي يا أحلام بالله عليكي إنتي بقالك أسبوع كل يوم تصحيني تقوليلي أنا بولد وفي الآخر ولا بتولدي ولا نيلة.
أحلام ضربته في كتفه أقوى وهي بتاخد نفسها بصعوبة.
_ لا يا يوسف المرادي بجد أنا مش قادره قوم بالله عليك.
يوسف فتح عينه مرة واحدة وقام قعد لما شاف ملامحها بجد.
_ استني إنتي بتتكلمي بجد ولا ايه.
أحلام بصتله بغيظ وهي ماسكة بطنها.
_ وانا ههزر معاك ليه ما تتلحلح يا يوسف!
يوسف نط من السرير بسرعة وبدأ يلف حوالين نفسه كأنه نسي البيت كله.
_ طب الشنطة فين الشنطة فين يا أحلام.
أحلام بصتله بعدم تصديق.
_ الشنطة بقالها أسبوعين جنب الدولاب وإنت بنفسك اللي حاططها هناك نسيت مكانها دلوقتي.
يوسف راح ناحيتها بسرعة وشالها.
_ معلش والله متوتر متوتر معلش.
أحلام كانت بتحاول تقوم ولما الألم شد عليها وقفت مكانها وغمضت عينيها، يوسف رمى الشنطة ورجع لها بسرعة ومسَكها من خصرها وهو قلقان.
_ استني براحة براحة خالص متقومييش مرة واحدة.
_ يوسف أنا مش قادرة.
_ خلاص خلاص أنا معاكي استني بس الوجع يخف شوية وبعدين نمشي.
أحلام فضلت ماسكة في دراعه وهي بتتنفس بسرعة، ويوسف واقف جنبها يمسح على ضهرها ويحاول يهديها رغم إن شكله هو نفسه كان محتاج حد يهديه، ولما الألم خف شوية لبس بسرعة وساعدها تلبس وأخد الشنطة ونزلوا، وبعد مكالمات سريعة كانت العيلة كلها عرفت واتفقوا يقابلوهم في المستشفى.
طول الطريق أحلام كانت قاعدة جنبه وكل ما الوجع يزيد تمد إيدها تمسك إيده، وفي مرة شدت عليها بقوة خلت يوسف يبصلها بسرعة.
_ بالراحة على إيدي يا أحلام أنا محتاجها والله.
بصتله وهي على وشك تعيط.
_ يوسف والله العظيم لو اتكلمت تاني هضربك مش وقت هزارك.
يوسف رجع يبص للطريق فورًا.
_ خلاص خلاص ولا كلمة خالص اعملي اللي إنتي عايزاه.
بعد ثواني رجع قال بهدوء وهو بيمسك إيدها كويس.
_ خدي نفسك براحة يا حبيبتي متخافيش إحنا قربنا.
أحلام بصتله وعيونها بدأت تلمع.
_ أنا خايفة اوي يا يوسف.
نبرة صوته هديت تمامًا.
_ عارف يا قلبي بس أنا معاكي وهفضل معاكي وكل حاجة هتبقى كويسة إن شاء الله.
_ طب لو حصل حاجة….
يوسف قاطعها فورًا.
_ مفيش حاجة هتحصل متفكريش كده أصلًا إنتي وهو هتبقوا كويسين وهتطلعولي بالسلامة ان شاء الله.
أحلام سكتت وهي ماسكة إيده،، ويوسف فضل سايق بإيد واحدة والتانية في إيدها لحد ما وصلوا.
العيلة كانت وصلت تقريبًا في نفس الوقت، وبعد الكشف الأول والدكتورة ما طمنتهم إن كل حاجة ماشية كويس، فضلوا كلهم قاعدين برا الأوضة وأحلام ويوسف جوا لحد ما الممرضة خرجت وقالت إن الوقت جه وإنهم هيبدأوا يجهزوها للولادة.
أول ما أحلام سمعت الكلام بصت ليوسف بسرعة.
_ يوسف.
قرب منها فورًا.
_ نعم يا حبيبتي.
مدت إيدها له ومسكته بإيديها الاتنين، والخوف اللي كانت بتحاول تسيطر عليه طول الوقت ظهر مرة واحدة على وشها.
_ أنا مش عايزة أروح.
يوسف قرب منها وهو بيحاول يخلي صوته ثابت.
_ لازم ياحبيبتي تروحي.
أحلام بدأت تعيط.
_ لا أنا مش عايزة أولد خلاص مش عايزة أنا خايفة أوي يا يوسف.
يوسف قلبه اتقبض بس قرب أكتر وحاوط وشها بإيديه.
_ طب بصيلي بصيلي بس يا أحلام.
بصتله وهي بتعيط فعلًا.
_ أنا مش عايزة أسيبك.
يوسف باس جبينها وقربها منه، وأحلام حضنته فورًا ومَسكت فيه بقوة كأنها فعلًا مش ناوية تسيبه.
_ خلاص يا حبيبتي خلاص متخافيش أنا معاكي وأنا هستناكي هنا ومش هتحرك من مكاني لحد ما تطلعي إنتي ويزن بالسلامة.
أحلام دفنت وشها في صدره أكتر.
_ أنا خايفة يا يوسف.
يوسف حط إيده على شعرها وباس راسها كذا مرة، وكان بيتكلم بهدوء بالعافية رغم إن قلبه بيخبط.
_ عارف والله عارف بس إنتي هتبقي كويسة وإن شاء الله كلها شوية وتطلعيلي وهنقعد نضحك وانتي هتضحكي على نفسك والله.
أحلام هزت راسها وهي لسه في حضنه.
_ مش هضحك.
_ لا هتضحكي وهنرجع البيت وإنتي هتفضلي تقوليلي قوم شيل ابنك وأنا هقولك إنتي اللي خلفتيه.
أحلام ضحكت وسط دموعها غصب عنها وضربته بخفة في صدره.
_ حتى دلوقتي بارد.
يوسف ابتسم وهو بيحاول يطمنها.
_ أهو ضحكتي خلاص دي علامة كويسة.
الممرضة قربت منهم وقالت إن لازم يدخلوا، وأحلام رجعت تمسك إيده بقوة وهي بتبصله بخوف، ويوسف فضل ماشي معاها لحد آخر نقطة مسموح له يدخلها، ولما طلبوا منه يقف كانت صوابعهم لسه متشابكة ومحدش فيهم عايز يفك.
_ يوسف متروحش.
_ مش هروح والله أنا هنا.
_ بجد.
_ ايوه والله أنا مستنيكي.
إيديهم اتفكت بالعافية وهي دخلت، ويوسف فضل واقف مكانه لحد ما الباب اتقفل قدامه، وبعدها بس رجع كام خطوة وحط إيده على وشه وأخد نفس طويل، كل الثبات اللي كان ماسكه قدامها وقع تقريبًا في ثانية.
قعد جنب أحمد وعماد لكن رجله فضلت بتتحرك بعصبية، وكل دقيقتين يقوم يمشي ويرجع يقعد، وعماد حاول يطمنه أكتر من مرة لكنه كان يهز راسه وخلاص.
_ يا يوسف اهدى يا ابني الدكتورة طمنتنا.
يوسف بصله وهو بيحاول ياخد نفسه.
_ عارف يا عمي بس أنا شوفتها وهي داخلة كانت خايفة بطريقة عمري ما شوفتها بيها.
زينب قالت بهدوء.
_ هي هتبقى كويسة إن شاء الله ومفيش حاجة تقلق.
يوسف هز راسه لكنه ما قدرش يرد، وبعد شوية قام وقف بعيد عنهم شوية وبص ناحية الباب، عينه لمعت غصب عنه ونزلت دمعة مسحها بسرعة قبل ما حد ياخد باله.
في الناحية التانية كانت ميرال قاعدة جنب آسر ودموعها بتنزل هي كمان، وآسر حاوطها بإيده وقربها منه.
_ يا حبيبتي ما تخافيش هي كويسة والدكتورة قالت كده.
ميرال مسحت دموعها.
_ أنا خايفة عليها أوي يا آسر والله شكلها وهي داخلة راعبني.
آسر باس راسها وحضنها أكتر.
_ إن شاء الله هتطلع كويسة ويزن كمان كويس وهنقعد نضحك على العياط ده كله.
ميرال خبطته بخفة في صدره ، قال وهو بيحاول يفك الجو عنها.
_ يلهوي إنتي عاملة كده في ولادة أحلام أمال يوم ولادتك هتعملي فيا إيه.
ميرال رفعت وشها له فورًا.
_ اسكت بقى مش لما ييجي ساعتها.
آسر ابتسم.
_ خلاص يا ستي سكت أهو.
رجعت سندت عليه وهو فضل يطبطب عليها من غير ما يتكلم.
بعد وقت حسوه أطول بكتير من حقيقته الباب اتفتح، والدكتور خرج وهو شايل يزن، واتجه ناحية يوسف اللي وقف فورًا ومكنش عارف حتى يقرب ولا يستنى مكانه.
الدكتور ابتسم وهو بيمدهوله.
_ ألف مبروك يا بابا.
يوسف بص ليزن وبعدين للدكتور كأنه لسه مش مستوعب إن الكلمة ليه، ومد إيده أخده منه بحذر شديد وإيده كانت بتترعش.
فضل باصص له كام ثانية طويلة ومحدش حواليه اتكلم، وبعدها ابتسامته طلعت لوحدها وعينه دمعت تاني، قرب يزن منه شوية وهو مش قادر يشيل عينه من عليه.
العيلة كلها قربت تباركله، ويوسف بعد ما هدي شوية بدأ يأذن في ودنه بهدوء وهو ماسكه بحذر، وبعدها رجع بصلهم بسرعة كأنه افتكر أهم سؤال.
_ أحلام فين.
الدكتور طمنه.
_ اتنقلت أوضة عادية وهي كويسة وتقدر تدخل لها دلوقتي.
يوسف إدا يزن لزينب ومشى ناحية أوضة أحلام بسرعة، ولما دخل لقاها مرهقة جدًا لكنها أول ما شافته مدت إيدها له.
_ هو فين.
قرب منها فورًا ومسك إيدها وباسها.
_ موجود يا حبيبتي موجود وهو كويس وزي الفل إنتي كويسة؟ قلقتيني عليكي اوي.
أحلام عينيها دمعت.
_ أنا كنت خايفة أوي يا يوسف أنا بجد حسيت إني مش هخرج.
يوسف قرب منها ومسح دموعها.
_ بس خلاص خلاص يا قلبي إنتي كويسة وابننا كويس وكل حاجة عدت.
أحلام خدت نفس وغمضت عينها ثواني وبعدها قالت.
_ عايزة أشوفه.
بعد وقت قليل دخلت زينب بيزن وسلمته ليوسف اللي قربه من أحلام وحطه في حضنها بحذر، وأحلام أول ما بصت له ملامحها كلها اتغيرت، قربته منها أكتر وفضلت تتأمله كأنها مش مستوعبة إن ده نفس البيبي اللي كانت مستنياه طول الشهور اللي فاتت.
رفعت إيدها ولمست وش يوسف وهي مبتسمة وسط دموعها.
_ مش مصدقة يا يوسف ده ابننا بجد.
يوسف مسك إيدها وباسها.
_ أيوه بجد.
أحلام بصت ليزن تاني ويوسف قعد جنبها، وبعدها دخلت العيلة واحدة واحدة يباركولها ويطمنوا عليها، والفرحة اتملت في الأوضة بهدوء من غير زحمة كلام، وكل شوية أحلام تبص ليوسف وهو يبصلها بنفس الابتسامة اللي مش راضية تروح من وشه.
وفي وسط كل الناس كان يزن نايم في حضنها بمنتهى الهدوء، ويوسف إيده فوق إيدها، وأحلام كل شوية تبصله كأنها بتتأكد إن اللي حواليها ده كله حصل بجد، لحد ما قرب منها وهمس بصوت واطي.
_ حمد لله على سلامتك يا أم يزن.
أحلام ضحكت وهي بتبصله.
_ الله يسلمك يا أبو يزن.
والاتنين ضحكوا مع بعض، ويزن فضل نايم بينهم كأن كل الخوف اللي من ساعات قليلة كان مالي المكان اختفى مرة واحدة.
••••••••••••••••••••••••••••••••••••••••••••••••
تاني يوم بعد ما أحلام خرجت من المستشفى رجعوا كلهم على بيت العيلة في الصعيد، يوسف في الأول كان ناوي ياخدها على بيتهم في القاهرة بس زينب رفضت أصلًا تناقشه وقالت له إنها لسه تعبانة ومحتاجة حد يبقى جمبها طول الوقت، وأحلام نفسها كانت مرتاحة لفكرة إنها تقعد كام يوم وسطهم لحد ما جسمها يفوق شوية، خصوصًا إن ميرال من ساعة ما رجعوا وهي تقريبًا لازقة فيها ومش سايباها تعمل أي حاجة لوحدها.
بعد العصر كانوا كلهم متجمعين في الصالة، وأحلام قاعدة على الكنبة ورجلها مرفوعة شوية قدامها ويزن نايم في حضنها.
يوسف كان قاعد لازق جنبها تقريبًا وعينه كل شوية تنزل ناحية يزن، لحد ما أحلام خدت بالها وبصتله.
_ يوسف هو نايم والله.
يوسف رجع بصلها.
_ ما أنا شايفه.
_ أمال كل شوية تبصله ليه.
_ عادي يا أحلام بتفرج عليه.
ميرال كانت قاعدة الناحية التانية جنب آسر وضحكت من غير ما تدخل في الكلام، يوسف لمحها فبصلها.
_ في إيه يا ميرال.
ميرال هزت راسها وهي لسه بتضحك.
_ مفيش خالص أنا ساكتة.
_ لا قولي قولي.
_ والله مش عايزه اقول حاجه بس إنت من ساعة ما رجعنا وإنت حاسس إنه لو بعد عن عينك دقيقتين هيقوم يجري.
أحلام ضحكت وهي بترجع ضهرها للكنبة.
_ أهو مش أنا لوحدي اللي واخدة بالي.
يوسف بص لهم الاتنين.
_ طب ما هو ابني وأنا أطمن عليه براحتي في مشكلة.
آسر دخل في الكلام وهو مبتسم.
_ مفيش مشكلة يا عم براحتك خالص.
يوسف بصله.
_ إنت اسكت خالص لما نشوف هتعمل ايه مع ابنك.
آسر رفع حاجبه.
_ ايه ده عرفت منين؟
يوسف كان هيرد بس ميرال خبطت آسر بخفة في دراعه بسرعة وهي باصة قدامها، وآسر سكت لحظة وبصلها من طرف عينه، أحلام لاحظت الحركة بينهم بس ما فهمتش معناها وسابتهم.
زينب خرجت من المطبخ وهي شايلة طبق فاكهة وحطته قدام أحلام.
_ خدي يلا كلي.
أحلام بصتلها باستسلام.
_ يا ماما أنا من الصبح كل شوية حد بيديني حاجة أنا حاسة إني هفرقع.
_ ما انتي لسه تعبانة ولازم تاكلي وتشربي كويس ومحدش هيقنعني غير كده.
_
ميرال ضحكت.
_ متتعبيش نفسك يا أحلام ماما داخلة في مود التغذية العلاجية ومحدش هيوقفها.
زينب لفت لها.
_ انتي تسكتي خالص.
ميرال سكتت فجأة.
آسر بص لها وبعدين بسرعة بص قدامه وهو بيحاول ما يضحكش.
زينب عقدت حواجبها.
_ مالك.
ميرال ردت بسرعة زيادة عن اللزوم.
_ مالي ايه مفيش.
أحلام بصت بينها وبين آسر، المرة دي خدت بالها فعلًا إن في حاجة غريبة، خصوصًا إن آسر من وقت ما قعد وهو كل شوية يبص لميرال ويبتسم لوحده.
_ إنتوا الاتنين فيكم إيه.
ميرال بصتلها.
_ إحنا؟
_ آه إنتوا بقالكم شوية عمالين تعملوا حركات غريبة.
آسر ضحك.
_ أنا معملتش حاجة والله.
ميرال بصتله بنظرة تحذير.
_ آسر.
_ ياستي ما أنا ساكت أهو.
أحلام رفعت حاجبها وهي باصة لهم.
_ لا في حاجة.
ميرال بصت لآسر.
_ شوفت؟ أهو.
آسر ابتسم.
_ أنا قلتلك من الأول مش هتعرفي تسكتي.
زينب قربت وقعدت.
_ في إيه يا بنتي ما تتكلمي قلقتينا.
ميرال بصت حواليها، لقت تقريبًا كل اللي في الصالة بدأ يركز معاها فملامحها اتوترت أكتر.
_ طب ما تبصوش كلكم كده بقى.
أحمد ضحك.
_ طب ما تخلصي تقولي مالك.
ميرال بصت لآسر مرة تانية كأنها مستنية منه ينقذها، هو بس هز راسه لها وابتسم.
_ قولي يلا.
ميرال أخدت نفس وحركت إيدها في شعرها.
_ أنا كنت عايزة أقولكم حاجة بس كنت مستنية نبقى كلنا قاعدين.
زينب قالت بسرعة.
_ خير يا حبيبتي.
ميرال بصت لها وبعدها ابتسمت رغم توترها.
_ خير متخافوش.
سكتت ثانية وبعدين قالتها على طول.
_ أنا حامل.
الصالة سكتت لحظة.
زينب كانت أول واحدة تستوعب.
_ إيه.
ميرال ضحكت بكسوف وهي عينيها بدأت تلمع.
_ حامل يا ماما.
زينب قامت من مكانها في ثانية وراحت لها، مسكت وشها بإيديها وباستها كذا مرة وهي بين الضحك والدموع.
_ يا حبيبتي ألف مبروك يا قلبي ربنا يتمملك على خير يا رب.
ميرال حضنتها وهي بتضحك.
_ الله يبارك فيكي يا ماما.
أحلام كانت باصة لها بفرحة كبيرة، مدت إيدها ناحيتها.
_ تعالي هنا إنتي مش هقدر اقوملك.
ميرال راحت لها بسرعة وحضنتها بحذر عشان أحلام لسه تعبانة، وأحلام شدت عليها وهي بتضحك.
_ ألف مبروك يا ميرا والله فرحتلك أوي.
ميرال باست خدها.
_ الله يبارك فيكي يا حبيبتي.
أحلام بعدت عنها شوية وبصتلها.
_ طب وإنتي ساكتة بقالك قد ايه.
ميرال بصت لآسر.
_ من كام يوم.
أحلام فتحت عينيها.
_ من كام يوم يعني يوم ولادتي انتي كنتي حامل وساكتة؟
ميرال ضحكت.
_ يا بنتي انتي كنتي بتولدي أقولك أنا حامل إزاي يعني لازم أستنى عليكي شوية.
آسر قال وهو بيضحك.
_ أنا أصلًا كنت هموت وأقول من يوم ما عرفنا.
ميرال لفتله.
_ عشان إنت ما تعرفش تخبي حاجة.
_ أنا أخبي عادي بس مش خبر زي ده.
عبدالله قرب من آسر وضربه بخفة على كتفه وهو بيباركله.
_ ألف مبروك يا ابني.
آسر قام وسلم عليه وهو مبتسم.
_ الله يبارك فيك يا بابا.
أحمد حضن ميرال وفضل يدعيلها، وعبدالحميد كان فرحان بشكل واضح وهو بيقول إن البيت كده بقى ناقصه حضانة بس، فضحكوا كلهم، وعماد باركلهم وهو باصص ناحية أحلام ويزن وفرحان إن الجو كله اتغير من توتر اليومين اللي فاتوا لفرحة جديدة.
زينب رجعت قعدت جنب بنتها وبدأت تسألها بسرعة.
_ طب روحتوا للدكتور.
ميرال هزت راسها.
_ آه.
_ وكل حاجة كويسة.
_ آه يا ماما كله كويس الحمدلله.
احلام كانت بتبتسم وهي بتبصلهم وبعدها بصت ليزن اللي بدأ يتحرك في حضنها ورفعت عينها لميرال.
_ خلاص أهو يزن هيبقى عنده حد قريب من سنه يلعب معاه.
ميرال ابتسمت.
_ إحنا لسه بدري أوي يا أحلام.
_ عارفة بس أنا بقولك من دلوقتي.
يوسف اللي كان ساكت شوية بص لآسر.
_ ألف مبروك يا عم.
آسر ابتسم ومد إيده له.
_ الله يبارك فيك يا أبو يزن.
يوسف سلم عليه وبعدين قال وهو بيبص لميرال.
_ ربنا يتمملكم على خير وتقوميلنا بالسلامة ياحبيبتي.
ميرال ابتسمت.
_ الله يسلمك.
فضل الكلام بعدها يتفتح لوحده، زينب تسأل وميرال ترد عليها وآسر يدخل في النص كل شوية ويطلع منه إنه حافظ كل معاد وكل حاجة حصلت من أول ما عرفوا، وأحلام قاعدة تسمعهم وهي مبسوطة إن البيت اللي من يومين كان كله قلق وخوف عليها بقى النهارده فيه خبر جديد وفرحة جديدة.
بعد شوية يزن بدأ يعيط، ويوسف اتعدل فورًا وقرب من أحلام قبل ما هي حتى تتحرك.
_ هاتيه.
أحلام بصتله.
_ هتعمل إيه.
_ هشيله شوية.
اديتهوله بهدوء، وميرال فضلت باصاله وهي مبتسمة وبعدها سندت على آسر من غير ما تحس.
آسر بص لها.
_ بتفكري في إيه.
ميرال بصت له ثواني وبعدها ابتسمت.
_ ولا حاجة.
آسر قرب منها سنة وقال بصوت واطي محدش غيرها يسمعه.
_ أنا عارفك على فكرة.
ميرال خبطته بخفة في دراعه.
_ اسكت خليك ساكت النهارده أحسن.
ضحك وحاوط إيدها بإيده، وهي سابتها في إيده من غير ما تبعدها.
واللمة كملت على نفس الهدوء، كلام فوق كلام وضحك بسيط ودعوات من الكبار، وأحلام كانت كل شوية تبص ليوسف وهو شايل يزن وبعدين لميرال وآسر وهما قاعدين جنب بعض، وتحس إن حاجات كتير اتغيرت في وقت مش طويل أوي لكن بشكل مريح، كأن البيت نفسه بقى فيه حياة أكتر من الأول وكل واحد فيهم بدأ يدخل مرحلة جديدة من غير ما يحس.
•••••••••••••••••••••••••••••••••••••••••••••••••
بالليل البيت كله كان هدي تقريبًا بعد ما كل واحد طلع أوضته، وأحلام كانت قاعدة على السرير في أوضتهم ويزن نايم جنبها في السرير الصغير بتاعه، ويوسف كان واقف قدامه وكل شوية يقرب يبص عليه كأنه مستني منه أي حركة.
أحلام فضلت باصاله شوية وبعدين ضحكت.
_ يوسف.
لف لها.
_ نعم.
_ تعالى اقعد بقى.
_ قاعد أهو.
_ لا إنت واقف بقالك عشر دقايق بتراقب الواد وهو نايم.
يوسف بص ليزن ورجع بصلها.
_ بطمن عليه.
أحلام ضحكت أكتر.
_ إنت اتطمنت عليه من نص دقيقة.
_ النص دقيقة دي وقت برضو.
أحلام حطت إيدها على وشها وهي بتضحك.
_ يا حبيبي هو كويس والله ولو احتاج حاجة هيصحى.
يوسف أخيرًا ساب السرير الصغير وقرب منها وقعد جنبها، وأحلام سندت راسها على كتفه على طول وهي بتاخد نفس براحة، حاوطها يوسف بإيده وباس راسها من غير ما يتكلموا شوية.
أحلام كانت باصة ناحية يزن وهي ساكتة.
يوسف خد باله.
_ سرحانة في إيه.
أحلام فضلت باصة قدامها.
_ مش عارفة.
_ لا عارفة.
ابتسمت وهي لسه ساندة عليه.
_ بفكر بس.
_ في إيه.
سكتت لحظة وبعدها رفعت عينيها له.
_ في كل حاجة.
يوسف ابتسم سنة.
_ بتفكري في حاجه كبيره بقى.
أحلام ضحكت.
_ أصل بجد يا يوسف أنا ساعات مش بعرف استوعب إحنا وصلنا لهنا إزاي.
يوسف بص ليزن وبعدها رجع لها.
_ لهنا فين.
أحلام عدلت قعدتها وبقت مقابلاه.
_ يعني من أول يوم جيت فيه الصعيد وأنا أصلًا مش طايقة فكرة إني أقعد هنا ومش فاهمة حاجة بتحصل حواليا لحد كل اللي حصل بعد كده.
يوسف سكت وهو بيسمعها.
أحلام كملت.
_ اتجوزنا واتخانقنا وسبنا بعض ورجعنا وخلفنا وكل مرة كنت أقول خلاص دي آخر حاجة تحصل ألاقي حاجة تانية بتحصل بعدها.
يوسف ضحك بخفة.
_ ما هو إحنا كنا بنحب الدوشة تقريبًا.
أحلام خبطته بخفة في كتفه.
_ إنت اللي كنت بتحبها أنا كنت غلبانة.
يوسف بصلها باستغراب.
_ إنتي غلبانة؟!
_ آه.
_ طبعا طبعا انتي صح.
أحلام ضحكت وبعدها رجعت تبص ليزن، ابتسامتها هديت شوية.
_ وبعدين دلوقتي ببص ألاقي ده كله عدّى وإحنا قاعدين هنا مع ابننا.
يوسف بص لملامحها وهو ساكت.
أحلام قالت بصوت أهدى.
_ أنا بجد مش مصدقة إن يزن ده ابننا يا يوسف.
يوسف قرب منها شوية.
_ وأنا كل شوية ببصله وأقول نفس الكلام.
أحلام بصتله.
_ ما هو واضح من إنك واقف فوق راسه طول الليل.
ضحك.
_ ما تسيبيني أفرح بابني بقى.
_ أنا سايباك يا أبو يزن.
يوسف ابتسم أول ما سمعها.
_ عجبتني.
_ إيه.
_ أبو يزن.
أحلام ابتسمت.
_ خلاص يا أبو يزن.
يوسف قرب منها أكتر وحاوطها بإيده.
_ وإنتي كمان أم يزن حلوة عليكي.
أحلام سندت راسها على صدره وهي بتضحك.
عدى شوية هدوء بينهم، ويوسف فضل يمسح بإيده على دراعها براحة.
بعد فترة أحلام قالت.
_ فاكر أول مرة قولتلي فيها إنك بتحبني.
يوسف رد فورًا.
_ طبعا فاكر.
_ أنا ساعتها كنت مستفزة صح.
يوسف ضحك.
_ جدًا.
رفعت راسها له.
_ ما أنا مكنتش هقولها بسهولة يعني.
_ ما انتي طلعتي عيني.
_ وإنت كنت مستعجل أوي.
يوسف هز راسه.
_ كنت مستنيها منك.
أحلام ابتسمت.
_ طب على فكرة إنت كسبت قلبي من قبلها بكتير بس أنا كنت بتقل عليك.
يوسف رفع حاجبه.
_ يعني كنتي بتحبيني وسايباني أتسوح.
أحلام ضحكت.
_ آه.
يوسف قرب منها أكتر.
_ طيبة أوي.
_ ما أنا كنت مستمتعة.
_ أهو اعترفتي.
أحلام ضحكت وهي بتحاول تبعد عنه لكنه شدها ناحيته أكتر.
_ خلاص يا يوسف بقى.
يوسف باس خدها وبعدها سابها تسند عليه تاني.
أحلام بعد شوية قالت بهدوء.
_ عارف أنا أكتر حاجة مبسوطة بيها إيه.
_ إيه.
_ إن كل حاجة كانت صعبة بينا في الأول بقت سهلة دلوقتي.
يوسف سكت.
أحلام كملت.
_ يعني دلوقتي لو زعلت منك أقولك ولو إنت مخنوق تيجي تحكيلي ولو خفت أمسك فيك وكل حاجه بتحصل من غير ما نحسبها.
يوسف بص لها.
_ وإنتي فاكرة إني كنت متخيل إننا نوصل لكده.
أحلام ابتسمت.
_ لأ.
_ ولا أنا.
قرب إيدها وباسها.
_ بس الحمد لله إننا وصلنا.
أحلام بصتله ثواني وبعدها قالت بهدوء.
_ عارف أنا لو رجعت لأول يوم من الأول ومعايا اختيار أعرف كل اللي هيحصل وأختار أجي ولا لأ هعمل ايه؟
يوسف رفع حاجبه.
_ هتعملي إيه.
أحلام سكتت كأنها بتفكر وبعدها ابتسمت.
_ هاجي.
يوسف ابتسم هو كمان.
_ حتى مع كل اللي حصل؟!
أحلام هزت راسها.
_ حتى مع كل اللي حصل.
بصت ناحية يزن وبعدها رجعت له.
_ عشان في الآخر أنا وصلتلك.
يوسف عينيه هديت جدًا وهو باصصلها، قرب منها وباس جبينها براحة.
_ وأنا بحمد ربنا إن كل طريق لف بيكي في الآخر جابك ليا.
أحلام سندت راسها على صدره تاني ويوسف حاوطها أكتر، والاتنين فضلوا باصين ناحية يزن وهو نايم بهدوء قدامهم، لأول مرة من وقت طويل مفيش حاجة مستنياهم بكرة لازم يحلوها ولا مشكلة واقفة بينهم ولا كلمة مستخبية جوا حد فيهم، كان في بس بيت هادي وطفل نايم واتنين أخيرًا بقوا فاهمين إن كل اللي عدى بيهم كان بيقربهم من اللحظة دي حتى وهما وقتها مكانوش شايفين ده.
________
وما بينَ دربٍ ظننتهُ يومًا بعيدًا
وقلبٍ أتى من حيثُ لم أنتظر
وجدتُكَ أنتَ في آخرِ الطريق
فعرفتُ أنَّ ما كان بيني وبينكَ
لم يكُن صدفةً عابرة
بل كانَ قدرًا كُتِبَ لنا منذُ البداية.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
