رواية قط وفار والقلب احتار الفصل التاسع عشر بقلم شيماء يسري زهران
- مرام مالك..ردي عليا.
شالني مراد ونزل بيا بسرعة لتحت، قال لسليم في صوت عالي وهو متوتر:
- هات مفاتيح عربيتك بسرعة.
طبعا كل اللي موجودين شافوني كده على ايده وشبه مغمى عليا وكلهم سابوا الشقة وجريوا علينا في خضة، قال سليم:
- في ايه!!!!
- مش عارف مرام مش قادرة تقف، هات المفاتيح بسرعة هروح المستشفي اللي جمبنا دي.
اداله سليم المفاتيح وكلهم نزلوا وراه جري معادا الضيوف مكانوش فاهمين ولا مهتمين اوي..قالت الست ام العريس:
- هو في ايه يا واد؟ الراجل ده نزل بالبت فجأة لما كنت بكلم امها، يكونش ادا.ها علقة ولا ايه؟
- علقة ايه ده اخوها هيديها علقة ليه..
كمل وهو بيمسك خده:
- ده شكله حتى طيب.
ركب العربية، بس فجأة اكتشف حاجة من التوتر مكنش واخد باله منها! مراد مبيعرفش يسوق عربيات اصلا!
طلب من سليم يسوق، قعد مراد في الكنبة اللي ورا وانا معاه ماسكة بطني وبتو.جع وحاسة اني بفقد وعيي، كان بيحاول يطمني رغم أنه خا.يف:
- مش قادرة يا مراد، حاسة روحي بتخرج.
قال في نبرة توتر:
- لأ متقوليش كده يا قلبي مش هيحصلك حاجة.
ضيق سليم عينيه في استغراب من الكلمة، وكمل سواقة، لحد ما لقينا نفسنا قدام المستشفى ولما طلعت طلبت الدكاترة غسيل معدة عشان نكتشف بعدها الآتي..
كانت عيلتي كلها واقفين برا وخرج الدكتور قال:
- دي محاولة انتـ.*حا.ر؟
استغربوا كلهم، قالت ماما:
- انت*حا.ر ايه يا دكتور انا بنتي لا يمكن تفكر في ده.
رد الدكتور:
- يبقى حد حاول يسممها، رجعت عصير وده اخر حاجة شربته وكان مسـ.مم.
بصوا كلهم لنوال، اتخضت نوال وقالت:
- في ايه!!! العصير اللي انا جايباه كله كان عِلَب ومقفول وربنا!
قال جدو:
- عِلَب أيوة لكن اتصب في كوبايات يا فتحي..مش كده؟
قالت نوال:
- يعني ايه يا حاج؟ يعني انا هسـ.مم البت! مانا عندي عيال زيها مش هخاف من ربنا؟ وهعمل كده ليه يعني! ما يمكن العصير كان با.يظ يا دكتور!
رد الدكتور:
- لأ ده نوع سـ.م اتصب جوا العصير، مش العصير نفسه اللي فاسد.
سابهم مراد ودخل الأوضة مسك كف ايدي ورجع شعري لورا:
- أنتِ كويسة؟
رديت بنبرة مرهقة:
- أيوة..انا بكره المستشفيات عندي عُقدة منها بجد، عايزة اقوم امشي.
- هتمشي حاضر متقلقيش.
دخلوا كلهم، عيني وقعت على هاجر اللي داخلة مبتسمة شوية وهي بصالي وهنا اتأكدت..طبعًا المعتاد دخلت ماما تقرب مني تطمن عليا وكانت خايفة عليا، قالت عمتو حنان وهي باصة ع الچاكيت بتاع ابنها اللي عليا:
- الف سلامة يابت، مسم..يكونش الچاكيت هو اللي تعبك كده؟
اتحرجت، هي قاصدة ترمي كلام، قال مراد:
- فستا.نها اتقـ.طع يا امي مكنش ينفع تقعد بالفستان كده.
استغربت ماما عشان ده عكس اللي انا قولتهولها..اتكلم جدو وهو متعصب:
- أيوة يعني مين اللي عمل حوار التسـ.مم ده!!
اتخضيت وقولت:
- تسـ.مم!!
بصيت لهاجر تاني لقيتها بصالي في نظرات حا.دة، خوفت وقولت:
- انا عارفة مين عمل كده، بس انا كويسة خلاص.
قال بابا:
- مين اتكلمي!
قولت وانا بصالها:
- هاجر.
ردت هاجر في تمثيل:
- ايه!!!! ايه اللي انتي بتقوليه ده يا مرام!!! ياربي هو مفيش غير هاجر في البيت ده اللي مظلومة!! انا هعمل كده معاكي يابنت عمي!!!
سألت هالة في فضول:
- ليه طيب يا مرام بتقولي اختي هاجر السبب؟؟
- ابقي اسأليها يا هالة.
عيطت هاجر، كانت ممثلة حقيقي:
- هو ايه اللي بيحصل ده!!! ليا ربنا بجد !!! ازاي تفكري فيا كده!!! حد يرد عليا، يا جدو..انا هعمل كده ليه يا بابا؟؟!!!!
محدش رد عليها، كلهم مستغربين.
| في العربية|
كنت قاعدة مع بابا حاضني في الكنبة اللي ورا وماما جمبه، مراد كان جمبهم بس بعيد عني ناحية الشباك، بص في المرايا عليا وانا سرحانة مش مركزة معاه..
| في البيت|
دخلت اوضتي وماما ساعدتني وبابا، مراد وصل معاهم لحد الأوضة، دخل يقعد جمبي على طرف السرير، اتوترت وقولت:
- ما تطلع دلوقتي..
- ليه؟
- مش عارفة حاسة متوترة..
- بجد والله؟؟؟ انا بقالي كام سنة باجي هنا يا متخلفة وبنقعد سوا؟
- أيوة بس..بس تفتكر يعني ممكن بابا وماما يحسوا بحاجة؟
- يحسوا بايه؟
- ولا حاجة..
- اني بحبك يعني؟
سكت وانا حاسة اني متثبتة، ضحكت وانا محرجة وهو مبتسملي وقولت:
- هي قصة؟ ما خلاص وخِف.
- اخِف؟ لو معاكي دوا هاتي طيب.
ابتسمت وحطيت راسي على المخدة سرحت، قالي:
- اتخضيت عليكي..ليه بتقولي هاجر؟
- معرفش، بس عمالة تضحكلي كانت كأنها شمتانة فيا.
- البت دي محتاجة أهلها يشدوا عليها، معرفش ازاي في سنها وبالحر.بئة دي كلها.
زقيته في كتفه:
- عشان عايزاك مني يا ز.بالة.
مسك دراعي ينزله وهو مبسوط من جواه:
- وانا مالي بتشـ.مي ليه! هي اللي بتحبني.
زقيته بايدي التانية، مسك ايدي التانية وهو بيضحك:
- بس اتلمي..بس كده ابدأ اخاف عليكي منها دي بت لا.سعة.
- لا.سعة والله؟ خلاص روح حبها واعملها اللي هي عايزاه.
- والله فكرة، وعشان تبعد عنك..قولتي ايه؟
- قولت انك د**مك سِم يالا..اوعى ايدي انا مفرهضة من اللي حصل مش قادرة والله اناهد.
ضحك وقرب مني:
- طب اقلعي الچاكيت بتاعي.
- لأ أنا بردانة هنام بيه، بكرة هديهولك.
- لأ دلوقتي ..
- هو انت بتتكلم كده ليه؟ ما تحترم نفسك واسلك!
ضحك وقال:
- تقصدي اني يعني عايز اشوف الفستان؟ طب ما اه.
ضحكت وانا بزقه وهو بيحاول يشيل الچاكيت، دخلت ماما فجأة:
- اعملك شاي يا مراد؟
اتعدل مراد وقام وقف مخضوض:
- لـ.. لأ أنا تمام يا مرات خالي، انا طالع انام، المهم اطمنت على مرام.
بصيتلي ماما في شَك كده وخرجت تاني من الأوضة، قرب مني وانا بضحك على منظره وقال:
- عجبك كده؟ ما تديني الچاكيت خليني اطلع!
زقيته وانا بضحك:
- انت بني ادم مش متربي الفستان المفروض ميلفتش انتباهك، انت نسيت اني اختك وانت اخويا يالا؟
- لأ مانا قررت اغير الوظيفة بقى، جو اختي ده هيجيب شوية ***** عايزين يلبسوكي دبلة.
- يا مراد اوعى قولتلك هديك الچاكيت بكرة متبقاش سخـ.يف!
دخلت ماما تاني:
- طب اعملك عشا؟
اتخض مراد تاني وقال وهو بيقرب يخرج من الأوضة:
- لأ تصبحوا على خير.
وشي كان محمر من الكسوف بس كنت كاتمة ضحكتي، بصيتلي ماما وقالت في شك:
- اعملك عشا يا قلب امك؟
- لأ أنا هنام.
خرجت ماما من الأوضة، ضحكت كتير اوي وانا بحضن المخدة..مش قادرة اصدق العبث اللي بقى يحصل ده..يعني ايه مراد فجأة مبقاش اخويا!!!!
ــــــــــــــــــــــــــ
كانت الساعة حوالي أربعة الفجر، كان نايم مراد في اوضته وفجأة باب الأوضة خبط، قام قلق وصحي يفتح الباب لقاني قدامه..
- مرام!! في ايه! ايه مطلعك في وقت زي ده!
- خايفة انام لوحدي..
- أنتِ قلعتي الچاكيت؟
- أيوة..بس سيبته تحت..
دخلت الأوضة وقولت:
- عايزة انام هنا..
- أنتِ اتهبلتي! تنامي هنا فين مينفعش انزلي نامي تحت.
قربت من السرير ونمت وانا ببصله وبقوله:
- انت مكسوف مني عشان طول عمرنا في وضع الاخوات صح؟ بس لو غيرك لبسني دبلة هيكون جريء عنك..
قفل الباب وقرب يقعد جمبي وحضني وقال:
- أنتِ محدش هيقرب منك..
- انا بحبك اوي يا مراد..
فتح عينيه مراد من النوم يبص حواليه في الأوضة ملقاش حد..اتعدل وهو بيتنهد وحاسس من جواه بتوتر.. خرج برا الأوضة لقى سليم قاعد ماسك الفون بيتكلم وبيضحك..
- ثواني خليكي معايا.
- في ايه! حد يخض حد كده!
- انا كلمتك يابني! خارج من اوضتي عادي يا منحنح!
- منحنح!! انا بردو اللي منحنح؟
اتوتر مراد وسأل:
- يعني ايه؟
- انت مش عاجبني يالا، مالك كده؟
- يعني ايه مالي؟؟؟
- بتقول لبنت خالك في العربية يا قلبي!!!! وملبسها الچاكيت بتاعك!!
- انا قولت يا قلبي؟؟
رد بتريقة:
- لأ قولت يا كبدي.
- وانت مالك اصلا؟ هو أنا صغير يعني؟
- لو اللي في بالي صح تبقى اه صغير..
اتوتر مراد وسأل:
- ايه اللي في بالك؟؟
- انت عارف كويس..مفيش اخ بيحب أخته، اكبر كده واعقل.
- انت اتجننت!!! اختي مين؟؟ هو انتوا مصدقين ان هي اختي!!! دي بنت خالي وانا ابن عمتها!!
- يعني اللي في دماغي صح اهو! تبقى اهبل والله، مش لايقة عليك ولا شبهك..مالها هاجر؟
- نعم؟؟؟ هاجر؟؟
- اه هاجر، لايقة عليك والله، وبصراحة أنا شايفة مرام بتتبلى عليها، غيرة بنات وكده..
- انت بتقول ايه يابني انت!
- انا بقول اللي شايفه، مرام دي بت زنا.نة وبتاعت مشاكل طول عمرها، كفاية نضارتها دي..لكن بنت خالك هاجر هادية عنها وحاسسها معجبة بيك من نظراتها.
زعق مراد:
- انت اكيد اتهبلت يا سليم!!! هو انت عشان خاطب اختها هتظيط!!! هو أنا قولتلك تختار تخطب مين! ما تخليك في حالك وبلاش حكاوي الستات دي!
- ياعم انا غلطان ماشي، بس حوارك انت ومرام ده با.يظ عشان أهلها مش هيرضوا ولا امك، البيت كله شايفك اخوها اصلا، تلاقيكم راضعين على بعض.
- لأ مش اخوات في الرضاعة حتى، خليك انت في حالك بس..انت مش اول ما تخرج من عشِتك هتخرج عليا أنا.
دخل مراد الحمام، مسك سليم الفون وقالت هالة:
- هكلمك بكرة عشان هنام يا حبيبي.
- ده انت اللي حبيبي..تصبحي على خير.
قفلت هالة المكالمة وقالت لهاجر اللي قاعدة جمبها:
- سمعتي؟ عشان تعرفي اني مسيطرة بس كله بالهداوة.
- تفتكري هيقدر يقنعه يسيب مرام دي ويحبني؟
- بصي متقلقيش، انا شغالة العب في ودان سليم اهو وهو اصلا دايب فيا أي كلمة بيقبلها، انا تمام معاكم طول مانا مخطوبة لسليم لأني بحبه، لكن مبطيقش مراد ده..بتحبيه على ايه؟
اتنهدت هاجر وقالت:
- ده ميتحبش؟ ده من اجمل ما خلق الله.. الواد قمر اوي يا هالة..بحبه.
- واللي خلقه مخلقش غيره؟
اتعصبت عليها وقالت:
- وبعدين معاكي! هتساعديني في سُكات؟
- اه هساعدك..أنتِ اختي بردو، بس حوارات زي الصبح دي لأ أنا خوفت حد يعرف اني انا اللي حطيتلها حاجة.
- أنتِ محدش هيشك فيكي خالص اسكتي..
- أيوة، طب افرض مسمعش كلام سليم؟ عندك خطة بديلة؟
- أيوة.
ـــــــــــــــــــــــــــــــــ
تاني يوم في الكلية، خلصت محاضراتي وخرجت برا لقيته واقف بالموتوسيكل، فرحت وجريت عليه:
- انت ايه جابك هنا!
- جاي اخدك تيجي الاستاد معايا..قادرة؟
فرحت وقولت :
- أيوة..هتجيبلي علم؟
ضحك وقالي:
- اه يا هبـ.لة، اركبي بس.
ركبت وراه وانا فرحانة ومشي بيا، كنت مبسوطة اوي، مراد بدء يتشهر وكانت بعض العيون بتبص عليه وهو ماشي..
- اشتري عربية..
- لأ، بحب الهوا.
- وهي العربية يابني تحت الارض هتمشي بيها؟ العيون بقت قادرة تميزك بجد..انا فرحانة ليك اوي.
ابتسم وقالي:
- عادي..انا بلعب حاجة بحبها والشهرة إن جات اهلًا وسهلًا.
- انت جميل اوي.. شخصيتك مميزة.
مردش عليا لكن كان مبتسم وعيونه بتلمع.
وصلنا وكالعادة كسب فريق مراد، خرجنا من الاستاد، قالي:
- تيجي نخرج؟
- مش قادرة يا مراد أنا صاحية من الصبح للكلية اصلا..
- طيب يلا اركبي نروَح.
وصلت قدام البيت لقيت اللي واقفين بيعيطوا، نزلنا مخضوضين وسألنا:
- في ايه!!!
رد خالو فتحي مخضوض:
- هاجر مرجعتش من المدرسة لحد دلوقتي.
شكرا لزيارتكم عالم روايات سكيرهوم
