رواية مذبحة الفران الفصل الأول بقلم ياسر عوده
-اهدي يا سمير علشان اقدر افهم منك اللى حصل.
-كل حاجه ضاعت يا باشا، كل حاجه ضاعت مراتي وعيالي ماتوا، والفرن بتاعي اتحرق، كل حاجه ضاعت يا باشا.
-طيب استهدي بالله كده، وعرفني ايه اللى حصل علشان اقدر اساعدك.
-طيب ممكن كوبايه مايه، انا مش قادر اتمالك اعصابي.
وقتها ضابط الشرطه ضرب جرس المكتب، ودخل العسكري وقاله:
-هاتلي كوبايه مايه بسرعه.
وفعلا راح العسكري وجاب كوبايه المايه، ولما مسك سمير الكوبايه كانت ايده بترتعش لدرجه انه ماكنش قادر يشرب، المايه كانت بتقع من الكبايه من كتر رعشه ايده، ووقتها الضابط قال لـ العسكري:
-ساعده انه يشرب مايه.
-تمام يا باشا.
وفعلا مسك العسكري كوبايه المايه من سمير وشربه لغايه لما سمير ابتدي يهدي، ووقتها الضابط قاله:
-براحه كده فهمني اللى حصل، وعرفني ايه اللى وصلك للحاله دي؟
-انا كنت بره البيت سهران بمناسبه ليله العيد، انا متعود لما بيبقى صابح العيد بسهر للصبح، بس وانا سهران جالي تليفون من واحد من المحلات اللى بتبقى فاتحه جنب الفرن بتاعي وقالي:
-الحق يا سمير، الفرن بتاعك بيتحرق.
وقتها انا اتخضيت وروحت جاري على الفرن علشان اشوف ايه اللى حصل، ولما وصلت للفرن لقيته راكيه نار يا باشا، الفرن كله النار ماسكه فيه وعرفت ان الناس اتصلوا على المطافي، بس عقبال لما المطافي جت كان الفرن خلاص انتهي، مابقاش فيه طوبتين على بعض من الاساس، كل حاجه جوه الفرن اتدمرت.
-ايوه انت تقصد الفرن اللى جالنا بلاغ بانه بيتحرق، انا بعت واحد من الضباط اللى شغالين معايا علشان يباشر التحقيق في الموضوع، وكمان في فريق للمعمل الجنائي هناك علشان يعرفنا ايه سبب الحريق.
-ويفيد بايه معرفه السبب مدام الفرن راح يا باشا، ومش دي المصيبه الوحيده اللى حصلت معايا، علشان المصيبه الاكبر واللى ماتتعوضش هي اللى لقتها مستنياني لما روحت البيت.
-ايه اللى حصل؟
-انا فضلت في المكان اللى اتحرق فيه الفرن علشان اشوف ايه اللى حصل وفي حاجه لسه متبقيه من الفرن ولا لا، ولما المطافي طفوا الحريق ودخلت الفرن مع رجال الشرطه، وقتها كانت صدمتي لا توصف، طبعا زي ما قولتلك كل حاجه كانت اتدمرت، واتأكدت من خراب بيتي وضياع كل حاجه، حسيت وقتها اني هيحصلي حاجه، وحسيت ان لساني تقل، ولما واحد من جيراني شاف اللى بيحصلي قالي:
-الاحسن انك تمشي يا معلم سمير وترتاح شويه، وجودك هنا هيزود تعبك، كل ما تشوف اللى حصل هتتعب اكتر، روح ونام شويه وربنا يعوض عليك.
انا حسيت ان كلامه مظبوط، وبصراحه كنت حاسس اني هيجيلي جلطه لاني لقيت تنميل في بوقي ولساني وكمان في ايدي، وعلشان كده انا قولتله:
-معلش انا حاسس اني مش هقدر اروح لوحدي، مش قادر امشي ممكن تساعدني وتوصلني للبيت، انا مش قادر ادوس على رجلي.
وبصراحه هو عمل اللى عليه وساندني لغايه لما وصلني لباب البيت، ولما لقاني مش قادر اطلع السلم لوحدي بشكل طبيعي قالي:
-استنى يا معلم سمير انا هساعدك تطلع السلم.
-كتر خيرك انا فعلا مش قادر اطلع لوحدي.
وفعلا بعد ما طلعني السلم وخبطنا على الباب مافيش حد رد علينا، فهمت وقتها ان مراتي وعيالي نايمين، وطلبت من جاري انه ياخد المفتاح مني ويفتح هو الباب، وفعلا خد المفتاح من جيبي علشان ماكنتش قادر اططلعه، وبعدها فتح الباب ودخلني جوه الشقه، واول لما دخلنا لقيت الصدمه، لقيت مراتي مدبوحه على سجاده الصلاه، اول لما شوفت المنظر ده لاقيت نفسي مش قادر اتكلم او انطق، اما جاري فماقدرش يتخيل المنظر ولقيته جري وسابني.
انا حسيت نفسي في عالم تاني خالص، وبعد لحظات افتكرت عيالي، وبقيت اتسند على الحيطه وروحت لـ اوض الاطفال، ولما فتحت الاوض لقيتهم كلهم مقتولين في اواضهم بطريقه مرعبه ومافيش عقل يستوعبها.
وكل اللى جه على بالي بعدها اني اجي هنا واقولكم على اللى حصل.
ولما سمع الضابط كلام المعلم سمير، بسرعه طلب فريق من الشرطه وخرجوا كلهم لـ بيت سمير، وهناك لما وصلوا للشقه اللى عايش فيها سمير ودخلوا الشقه لقوا كل الكلام اللى قاله سمير، وكانت مجزره حقيقيه، ام مقتوله ومعاها 8 اطفال مقتولين بطريقه وحشيه.
طبعا تم استدعاء فريق الطب الشرعي وفريق المعمل الجنائي، وفي الوقت ده اتكلم الضابط مع سمير وقاله:
-امتي اخر مره شوفت المجني عليهم.
-قبل ما انزل بعد العشا من البيت، وكانوا كوايسين اوي وعرفتهم اني هسهر بره وهتأخر، وطلبت منهم ان مافيش حد فيهم يستناني.
-طيب في بينك وبين أي شخص عداوه ممكن تخليه انه ينتقم منك بالشكل دا؟
-يا فندم انا راجل مسالم وفي حالي، ومافيش بيني وبين أي شخص عداوه، وحياتي كلها عايشها في هدوء وسلام، وعمري ما كان بيني وبين أي حد عداوه لدرجه انه يعمل اللى حصل، بس طبعا اوقات كانت بتحصل شويه مشاكل صغيره في الشغل عندي، بس دي مشاكل عاديه مش اكتر من كده.
-حتى لو شايفها عاديه، انا محتاج اعرفها، أي معلومه لو انت شايفه صغيره ومش مهمه، احنا بنشوفها بطريقه تانيه خالص.
-حضرتك انا اقصد بمشاكلي ودي حصلت من حوالي 9 شهور تقريبا، مع واحد كان شغال معايا في الفرن اسمه بسام.
-ايه نوع المشاكل اللى حصلت بنكم.
-مشاكل صغيره مش مهمه.
-انا عاوز اسمع تفاصيل يا سمير، ايه نوع المشاكل اللى حصلت بنكم.
-بسام كان شغال عندي من قبلها بحوالي سنتين، وكل حاجه بنا كانت تمام، بسام شاب في سن المراهقه، عنده وقت لما اشتغل عندي 17 سنه، وجالي علشان يتعلم الصانعه وكان بيقولي انه هيفتح فرن لنفسه، المهم اني كنت بحاول اساعده لاني كنت عارف ان ظروفه الماديه مش قد كده، كنت عارف ان هو من اسره فقيره وطبعا نتيجه لاحوالهم دي كان صعب اوي انه يفتح فرن خاص بيه، بس انا ماكنتش بقدر اقوله الكلام ده وكنت بشجعه وبقوله انه اكيد ربنا هيكرمه لانه طموح وعاوز يبقي حاجه.
بس في يوم من الايام انتبهت لـ حاجه غريبه كانت اول مره تحصل عندي في الفرن، والحاجه دي اني حسيت ان الفلوس في درج الفلوس قلت او بمعني اصح اتاخد منها، ووقتها انا جبت بسام وسألته:
-كان في فلوس في درج الفلوس انا مش لاقيها، ماتعرفش هي راحت فين.
وقتها لقيته انفعل في الكلام وقالي:
-انت تقصد ايه يا معلم سمير، مافيش حد في الفرن غيري انا وانت، ازاي يعني فلوس اتخدت.
-انت منفعل ليه، انا بسألك بس لاني حاسس ان الفلوس اللى كانت في الدرج قلت، فقولت اسألك دا حقي يا بسام انا مأذنبتش لما سألتك.
-لا يا معلم انا واحد عيني مليانه وعمري ما امد ايدي على فلوس مش بتعتي، انا مابخدش فلوس حرام حد الله الله بيني وبين الحرام.
-طيب خلاص الموضوع خلص، يمكن انا خدت منها وجبت حاجات وانا ناسي، على العموم حصل خير.
-انت بتتهمني بالسرقه يا معلم وجاي دلوقتي تقولي حصل خير بالسهوله دي؟
-عاوزني اعملك ايه يعني، ما قولنا حصل خير يا بسام الموضوع خلص، هات راسك ابوسها علشان تعرف اني غلطان ليك.
وكان المفروض الموضوع خلص على كده، او دا اللى انا كنت مفكره، بس الحقيقه ان اللى حصل ماكنش اول مره، وبعد فتره يمكن شهر او شهر ونص تقريبا، لقيت في مبلغ اتاخد من درج الفلوس، وقتها انا مابقتش عارف اعمل ايه، اخون بسام اللى كان شغال معايا بقاله فتره وشرب الشغل وبقيت اعتمد عليه ولا اسكت عن اللى بيحصل، وبعد تفكير طويل في الموضوع قررت اني ماسبش في الدرج الا مبالغ صغيره اوي، فلوس فاكه للشغل وبس، وفعلا من ساعه لما عملت الموضوع دا والدنيا معايا اتظبطت ومابقاش في فلوس بتتاخد من الدرج خالص.
-تمام يعني المشكله بينك وبين بسام انتهت وقتها؟
-ايوه دا بالنسبه لـ مشكله الفلوس، بس في حاجه تانيه حصلت ماكنتش اقدر اتساهل فيها زي ما عملت في موضوع الفلوس.
-ايه اللى حصل؟
-انا مراتي سميحه الله يرحمها كانت بتجيله الفرن اوقات كتير اوي، ومش بس هي كانت بتيجي هي وكمان اوقات كتير بتجيب معاها اطفالنا او حد من الاطفال، وخصوصا بنتي الوسطانيه واللى كان عندها 8 سنين، وكان اسمها اسماء، المهم ان في يوم من الايام لقيت سميحه بتقولي:
-في حاجه عاوزه اتكلم معاك فيها يا سمير بس مش عاوزاك تتعصب وتاخد الموضوع براحه.
-موضوع ايه يا سميحه اتكلمي.
-الاول ايه رأيك في الشاب اللى شغال معاك واللى اسمه بسام ده.
-رأي فيه من نحيه ايه؟
-يعني من نحية تربيته واخلاقه.
-وليه بتسألي عليه؟
-بسأل وخلاص، جاوبني وهقولك.
-انا ماشوفتش عليه حاجه وحشه، من فتره حصلت شويه حاجات بس ماكنش في دليل على حاجه ضده، واظن انه شاب كويس ومجتهد وطموح كمان رغم ظروف اهله السيئه، اهو انا جاوبتك قوليلي بقى انتي ليه سألتي الاسأله دي؟
-بصراحه كده وبدون عصبيه انا كنت عاوزه اقولك اني مش مرتحاله خالص.
