رواية مذبحة الفران الفصل الثاني بقلم ياسر عوده
-مش مرتحاله ازاي؟، حصل حاجه منه؟
-مش مرتحاله وخلاص، ويا ريت تشوف حد تاني غيره يشتغل معاك وتمشيه يكون احسن.
-يعني ايه امشيه واشوف حد غيره، انا مش فاهم حاجه يا سميحه، ما تتكلمي على طول وتقوليلي ايه اللى حصل بالظبط؟
-هقولك بس اوعدني انك ما تتعصبش او تتصرف أي تصرف بتهور، عاوزاك هادي.
-طيب قولي؟
-اوعدني الاول.
وقتها اتعصبت عليها وقولتلها:
-ما تقولي يا سميحه واخلصي.
-شوفت اهي عصبيتك دي اللى انا خايفه منها، علشان كده ماكنتش عاوزه اقولك على احساسي.
وقتها حاولت اهدي نفسي، وبعدها رديت عليها وقولتلها:
-تمام يا سميحه انا هادي اهو، عرفيني بقى انتي ليه قولتي كلامك دا، فهميني.
-بصراحه كده يا سمير انا مش مرتاحه للي اسمه بسام، اوقات كده بلاقيه بيبصلي بطريقه مش كويسه، بحس انه بيتابع جسمي وانا قاعده او لو اتحركت، وحصلت حاجه كده مش عارفه كانت مقصوده ولا كانت من غير قصد.
انا طبعا انفعلت عليها لما قالت كده ورديت وقولتلها:
-حصل ايه؟
-شوفت انت بتتعصب ازاي، علشان كده انا ماكنتش عاوزه اقولك الكلام ده.
-ما تنطقي يا سميحه ماتخلنيش اكسر الفرن فوق دماغه، حصل ايه؟
-خلاص خلاص، انا هقولك، من كام يوم لما كنت عندك ولقيتك بره الفرن، وقتها سألت بسام عليك وقولتله:
-اومال سمير فين يا بسام.
-المعلم سمير راح يجيب حاجه للشغل وجاي.
-هو هيتأخر ولا انت ماتعرفش؟
-لا ابدا يا ست مش هيتأخر خالص، هو قال هيجي على طول.
-خلاص هقعد واستناه.
ووقتها قعدت على الكرسي اللى قدام درج الفلوس، وهو كان شغال وبيبيع للناس، وكان بيطلب مني احط الفلوس في الدرج، وفي لحظه كده لقيت ايده خبطت في جسمي، وقتها اتفزعت بس لما بصيت عليه مالقتهوش باصص عليا خالص، ساعتها انا قولت انه اكيد ماكنش يقصد انه يعمل كده، بس بعد كام دقيقه نفس الموضوع اتكرر اكتر من مره، وكل مره كان بيبقى باصص في مكان تاني، بس انا جالي احساس انه كان بيلمسني عن قصد، ولما لقيت الوضع كده انا قومت من مكاني وقولتله:
-انا ماشيه وهبقى اجي لـ سمير في وقت تاني.
لقيته مرسوم على وشه ابتسامه صفره كده ماريحتنيش ولقيته بيقولي:
-طيب ماتخليكي شويه يا مدام اكيد هو على وصول.
-لا انا همشي علشان اتأخرت على العيال.
ومشيت وطول الطريق وانا مروحه كنت بفكر في اللى كان بسام بيعمله، وفكرت اقولك اكتر من مره بس كنت خايفه من رد فعلك عليا.
ولما سمعت اللى قالته سميحه، وقتها انا انفعلت طبعا، وكان بسام بره الفرنه ونديت عليه ومسكته وزعقت معاه، وكنت هضربه بس سميحه وقفت بيني وبينه واترجتني اني مالمسهوش، كانت خايفه عليا اتهور عليه او اموته مثلا واودي نفسي في داهيه، وكل اللى عملته وقتها اني طردته من الشغل بعد ما زعقت معاه.
اتكلم الضابط وقاله:
-يعني دا كل اللى حصل بينك وبين بسام؟
-لا يا فندم، في حاجه تانيه حصلت، بس لو ينفع بلاش اتمكلم عنها.
-أي حاجه حصلت بينك وبينه لازم اعرفها يا سمير، علشان اقدر احدد لو كان بسام فعلا من ضمن المشتبه فيهم او لا.
حط سمير عينه في الارض وبعدها قال:
-بعد اللى حصل بكام يوم انا عرفت حاجه ماكنتش اقدر اسكت عليها، ودا حصل لما لقيت بنتي اسماء جايالي وقالتلي:
-احسن حاجه عملتها يا بابا انك مشيت بسام من الفرن بتاعك.
طبعا استغربت لما قالتلي الكلام دا، وكنت طبيعي اسألها:
-ليه بتقولي الكلام دا يا اسماء، هو بسام حصل حاجه منه؟
-اقولك وماتضربنيش؟
-قولي وماتخفيش مني.
-بسام كان ديما بيطلب مني حاجات وحشه اوي، وكمان كان بيلمسني بطريقه بتضايقني، ولما قولتله اني هقول لـ بابا وقتها قالي:
-انتي لو قولتي لـ ابوكي، وقتها هو هيدبحك.
وكان بيفضل يهددني ويخوفني منك، وقالي انك هتموتني وكمان قبل ما هتعمل كده هتضربني وتعذبني كمان.
فهمت من كلام بنتي اسماء وقتها ان الزفت دا كان بيتحرش بيها، وقتها مابقتش شايف قدامي، ازاي اسكت على حيوان زي دا اتحرش بطفله صغيره زي بنتي، ووقتها خرجت من البيت وانا بدور على بسام، ولقيته في الشارع ووقتها مسكت فيه، وماحستش بنفسي غير وانا عمال اضرب فيه، كنت باخد حق بنتي وحق مراتي كمان، وفضلت اضرب فيه لغايه لما وشه كله بقى دم، ولولا ان الناس في الشارع اتدخلوا وحجزوا بنا كان زمانه مات في ايدي.
طبعا بسام كان عاوز يعملي محضر في القسم، بس الناس اللى حجزوا بنا عملوا قاعده صلح، وفي القعده هما حكموا ان الموضوع يخلص لغايه كده، هو اتجراء على مراتي وبنتي وانا خدت حقي بايدي. والناس حكمت ان انا ماعترضش طريقه، وهو كمان مايعترضش طريقي، والموضوع خلص على كده.
-تمام، كده بسام اول المتهمين، بس في أي حد تاني بينك وبينه أي عداوه؟
-لا يا فندم.
وبعد ما خلص ضابط الشرطه كلامه مع سمير، سابه بشكل مؤقت بس كان عارف انه هيحتاج يتكلم معاه تاني، واتوجه ضابط الشرطه لـ رئيس فريق المعمل الجنائي علشان يعرف منه المعلومات اللى وصلها، واتكلم ضابط الشرطه معاه وقاله:
-ايه الادله الجنائيه اللى قدرتم توصوللوها من معاينه مسرح الجريمه؟
-اولا احنا لقينا في علامات عنف على باب الشقه، والعلامات دي كان المفروض انها دليل ان الباب اتفتح بطريقه غير شرعيه، عن طريق مجرم او لص مثلا، بس بمعاينه كالون الباب اتضح ان الباب اتفتح عن طرق مفتاح.
-انت تقصد ان القاتل كان معاه مفتاح باب الشقه، وعمل علامات العنف على الباب علشان يوهمنا انه فاتحه من غير مفتاحه؟
-دا احتمال طبعا، بس في احتمال تاني، ان القاتل دخل الباب بفتح الكالون فعلا، بس مش بمفتاحه لان معظم اللصوص بيبقى معاهم مجموعه كبيره من المفاتيح وبيجربوها على الابواب وبيقدروا يفتحوا الابواب دي، ويمكن دا اللى حصل هنا.
-تمام يعني ممكن الجاني يبقى شخص غريب عن الشقه، اقصد مش من الاشخاص المقربين؟
-دا وارد طبعا، بس لسه في معلومات تانيه حضرتك ماتعرفهاش ممكن توضح الصوره اكتر.
-ايه هي المعلومات دي؟
-اولا احنا مالقناش أي بصمه غريبه عن سكان الشقه، ورغم كده لاحظنا ان في مسح للبصمات، واضح ان في شخص دخل الشقه وكان حريص ان بصماته ماتبقاش موجوده في الشقه نهائي، وكمان بمعاينه الشبابيك وباب البلكونه اتضح ان كل حاجه سليمه تماما.
-طيب اداة الجريمه، لقيتم أي اثر لـ اداة الجريمه؟
-لا مالقنهاش، واضح ان الجاني خدها علشان البصمات اللى عليها.
-طيب في أي مسروقات تخلينا نقول ان الجريمه دي بدافع السرقه مثلا؟
-طبعا احنا سألنا زوج المجني عليها لو كانت مراته معاها مصوغات ذهبيه مثلا وتم سرقتها، اصل احنا مالقنا شمعاها أي مصوغات ذهبيه، وكمان سألناه على أي فلوس نقديه بيشلها في البيت، ووقتها قال ان مراته فعلا كان معاها دهب، وكمان هو كان شايل في الدولاب مبلغ حوالي 64 الف جنيه، وطبعا احنا لما فتشنا الشقه مالقناش أي فلوس نهائي حتى في محفظه المجني عليها كانت فاضيه، وكمان مالقنا شمعاها أي مصوغات دهبيه نهائي.
-يعني احتماليه ان الجريمه حصلت بسبب السرقه موجوده؟
-الحقيقه ماعتقدش يا فندم.
-ليه بتقول كده؟
-لو الغرض من الجريمه السرقه ماكنش الجاني ماكنش محتاج انه يقتل المجني عليهم من الاساس، لانهم بكل بساطه كانوا تحت تأثير المخدر، يعني كان من السهل انه يسرق الدهب وياخد الفلوس وماكنش في أي شخص منهم صاحي علشان يقاومه او حتى يشوفه، واضح كده ان الغرض الاساس هو القتل والانتقام، وان السرقه اللى حصلت ممكن تكون عمليه تمويه عن الجريمه الاساسيه مش اكتر من كده.
- عندك حق، الله ينور، في أي معلومات تانيه ممكن تفدنا في التحقيقات؟
-بالنسبه لينا لغايه دلوقتي دي كل المعلومات اللى وصلنا ليها، بس اكيد لو وصلنا لـ أي معلومات تانيه هبلغ حضرتك.
-شكرا على مجهوداتكم.
شكرا لزيارتكم عالم روايات سكيرهوم
