رواية ساعة شيطان الفصل الأول بقلم محمود الأمين
جريمه النهارده اسمها ساعه شيطان.. قد ايه الشيطان ممكن يتمكن مننا ويخلينا نعمل افعال نندم عليها بعد كده؟
2023، وفي محافظه الاقصر بيوصل بلاغ لرجال الشرطه عن جث. ة بنت موجوده في منطقه الكرنك، والاهالي اللي هناك اللي اكتشفوا الجث. ة دي مفيش حد منهم اتعرف عليها، وبمجرد ما بيوصل البلاغ بتتحرك قوه من القسم على مكان البلاغ، ولما بيوصلوا بيكتشفوا انها جث. ة بنت في اوائل العشرينات، في كدمات كتير على وشها وجسمها، واثار واضحه على رقبتها، وواضح من الاثار دي ان السبب الاساسي في الوفاه هو الخن. ق.
بيتم عمل شريط تحذيري من رجال الشرطه حوالين الجث. ة لحد ما بيوصل فريق من الطب الشرعي والمعمل الجنائي لفحص الجث. ة والمكان.. البنت بتكون لابسه لبس خروج، ولكن مش معاها اي حاجه من المتعلقات الشخصيه، لا تليفونها ولا حتى بطاقه نتعرف منها على هويتها، واثناء ما فحص الجث. ة شغال بيكون في فريق تاني من رجال الشرطه بيفحص بلاغات التغيب في الفتره الاخيره، وبعد حوالي ساعه بتوصل معلومه ان في بلاغ تغيب متقدم من واحد اسمه علاء، وده راجل كبير وقايل في البلاغ ده ان بنته اللي عندها 18 سنه متغيبه عن البيت، وانه بيحاول يوصلها ومش عارف، وكان قايل في المعلومات اللي قالها في المحضر ان البنت كانت بتدرس في معهد سياحه وفنادق، وانها في اليوم ده راحت المعهد وكانت معرفه اهلها انها هتتاخر شويه عشان عندها عملي، ولكن لما الوقت اتاخر بزياده وحاول الاهالي يتواصلوا مع زمايلها، اتفاجئوا ان الكل روح، ولكن بنتهم ما راحتش في اليوم ده اصلا المعهد، وعشان كده الوالد اتحرك على طول على قسم الشرطه وحرر البلاغ.
ومن البيانات اللي موجوده في المحضر بيتاكد رجال الشرطه ان الجث. ة دي فعلا هي جث. ة البنت المتغيبه عن اهلها، واللي كان اسمها شهد علاء، واللي بتدرس في معهد السياحه والفنادق.
طيب هي كانت بتعمل ايه هنا، وليه اتق. تلت؟ دي الحاجه اللي اتعرفت بعد كده في التحقيقات، والاحداث اللي في القضيه بتعرفك ان في ناس مؤذيه من جواها، وان الاذيه دي ممكن توصل للم. وت.
...
#ساعة_شيطان
#الجزء_الأول
انا المقدم ابراهيم سليمان رئيس المباحث، كنت واقف اثناء ما بيتم فحص الجث. ة، وكان جنبي وكيل النيابه مدحت علي، واضح ان البنت دي اتعرضت لضرب مبرح قبل ما الشخص ده يخل. ص عليها، ودي الحاجه اللي اكدها دكتور الطب الشرعي، ولكن كان واضح ان في مقاومه من البنت دي، عشان لاحظ الدكتور ان في ضوافر متكسره نتيجه للمقاومه.
وطبعا كان واضح من منظر الجث. ة اللي قدامنا والمكان اللي هي فيه ان ده مش مسرح الجريمه، في حد خل. ص على البنت دي وبعدين جه ورماها هنا.
وبعد ما الرجاله بتخلص شغلها، بتتنقل الجث. ة على الطب الشرعي عشان يتم عليها التشريح النهائي، وبعدها بيتم التواصل مع الاستاذ علاء عبد الحافظ، والد المجني عليها والشخص اللي بل. غ ان بنته متغيبه، وساعتها الراجل بيتصدم لما بيعرف اننا لقينا جث. ة فيها نفس مواصفات بنته، ولما بيوصل المشرحه بيتعرف عليها فعلاً، هي بنته شهد واللي متغيبه بقالها 72 ساعه.
الاستاذ علاء بتكون حالته صعبه، وعشان كده بياخدوا الرائد فهمي على المكتب عندي عشان نبدا نتكلم معاه ونفهم اللي حصل، وفي نفس الوقت بكون مبلغ رجاله البحث الجنائي بعمل تحريات عن المجني عليها عشان نعرف دايره المعارف والعداوات.
ولما بيوصل الاستاذ علاء قدامي، واللي بيكون في حاله صعبه، ببدا كلام معاه عشان احاول اعرف منه اي معلومه ممكن تفيدنا.
_ البقاء لله يا استاذ علاء، شد حيلك.
= الشدة على الله يا باشا.. انا لحد دلوقتي مش مصدق انها ماتت، دي كانت نور عينيا، مليش غيرها هي واخوها سعد، وطول عمرنا ناس في حالنا وكافيين خيرنا شرنا.
_ يعني افهم من كلام حضرتك ان مكنش في اي مشاكل مع حد، او مثلا مافيش مره بنتك جت حكت معاك على حد مضايقها في المعهد او حاجه شبه كده؟
= هي من ناحيه المشاكل في مشكله ما بينا وما بين عيله ايوب، وتقدر تقول ان الموضوع تار، بس احنا التار عندنا بيتاخد من رجاله مش من حريم، وعشان كده انا مش هقدر اتهمهم بحاجه.. لكن بنتي عمرها ما جات وحكت معايا اي حاجه.
....
وفي الوقت اللي كنت بتكلم فيه مع الاستاذ علاء، والد شهد المجني عليها، بتوصلني معلومه من رجاله البحث الجنائي، والمعلومه دي بتكون صدمه بالنسبه ليا، وانا اسف يعني بالنسبه للاستاذ علاء، فاعتقد واحد زيه ملهوش علاقه بالنت والحاجات اللي بتحصل عليه دلوقتي، عشان لو كان يعرف حاجه زي دي كان اكيد هيتكلم.
المعلومه اللي وصلتني من البحث الجنائي ان في فيديو انتشر على السوشيال ميديا من حوالي خمس ايام، والفيديو ده كان فيه فضيحه، وبسببه حصلت مشاكل كبيره لشهد، الفيديو ده كان لشهد مع شاب في وضع مش كويس، ولكن الفيديو ده في ناس كتير اوي قالت انه معمول بالذكاء الاصطناعي، وان اللي استخدم الذكاء الاصطناعي ده شخص فاهم لدرجه انه طلع الجوده فيديو يبان انه حقيقي، ولكن في نفس الوقت شهد كان معروف عنها التدين، وانها مش بتاعه الكلام ده خالص، وده اللي خلى جزء كبير من الناس في المعهد تدافع عنها، ولكن كلام السوشيال ميديا اكيد طبعا كان في طعن في الشرف وكلام مش محترم.
والسؤال اللي جه في دماغي وقتها.. هل ممكن والدها يكون عارف بالموضوع اللي بقى فضيحه اصلا ولا لا؟!.. ولو كانت الاجابه اه، ساعتها الاستاذ علاء هيكون مشتبه فيه وبقوة، خصوصا اننا في الصعيد، والحاجات دي عندهم خط احمر، مش بيتفاهموا فيها ولا بيسمعوا، وممكن يكون الاستاذ علاء هو اللي عمل كده في بنته لما انتشر الفيديو، ولكن انا قررت اني اسكت لحد ما اشوف التحريات النهائيه هتقول ايه تاني.
طلبت من الاستاذ علاء يروح ويرتاح، عشان كان شكله تعبان ومجهد جداً، وبصراحه كتر خيره، وفضلت مستني تقرير الطب الشرعي والمعمل الجنائي والتحريات عشان نعرف مين اللي عمل في شهد كده.
وبعد 48 ساعه بتظهر التحريات النهائيه وبتتعرض عليا.
اسمها شهد علاء، عندها 18 سنه، وبتدرس في معهد السياحه والفنادق بالاقصر، عايشه مع والدها واخوها سعد، واللي اكبر منها بسنتين، والدتها اتوفت من زمان.
شهد كانت بنت متدينه ومحترمه جداً، وسمعتها في المعهد كانت زي الفل، محبوبه من زمايلها، ده غير انها كانت متفوقه في دراستها، ولحد كده الوضع تمام.
ولكن مع بدايه ظهور المشاكل، واللي كانت بدايتها هو التار، وساعتها بنعرف ان بدايه التار ده اصلا كانت بسبب اخو شهد، واللي هو سعد، واللي كان بيحب بنت من عيله ايوب، وكان بيقابلها من ورا اهلها، وفي يوم اخو البنت دي، واللي كان اسمها زينه، عرف، وحصلت ما بينه وما بين سعد مشكله كبيره، وللاسف سعد قت. له عن طريق الخطأ، وده اللي خلى في تار ما بين العيلتين، والمعلومه دي بتقول ان ممكن عيله ايوب تاخد التار من شهد عادي، عشان الموضوع مش خلاف على حته ارض ولا حاجه تانيه، الموضوع كانت بدايته سعد اللي حب واحده من عيله ايوب، وكان بيقابلها من ورا اهلها.
ولكن بنكمل التحريات، وساعتها بنعرف ان في ولد كان مع شهد في المعهد، والولد ده اسمه شهاب.. والمعلومه اللي بتوصل عن شهاب ده انه شخص فاهم في الكمبيوتر وفي برامج الذكاء الاصطناعي، وبنسبه كبيره هو اللي عمل الفيديو اللي بيخص شهد، والتحريات بتقول ان السبب في ده هو رفض شهد انها تتكلم معاه، رغم محاولاته العديده انه يفتح معاها كلام، وشهاب ده كان شاب صايع كان عاوز يتصاحب عليها، مش ياخد خطوه رسمي زي ولاد الناس.
واكيد هو اللي عمل كده لما شهد رفضته، بس نرجع لنقطه مهمه، لو كان هو اللي عمل كده فعلا، طيب قت. لها ليه؟!
اصل السيناريو اللي في دماغي بيقول ان شهاب ده هو اللي فبرك الفيديو عشان شهد رفضته، وكان الغرض منه هي الفض. يحه، وفعلا نجح في ده.. وساعتها الموضوع وصل لاهلها، اللي اكيد مفكروش في الموضوع وخل. صوا عليها.. وجايز اللي عمل كده هو اخوها سعد، وبما انه في سن الشباب فاكيد بيفتح سوشيال ميديا، واحتمال كبير يكون شاف الفيديو وقت. ل اخته، وفعلا الاستاذ علاء ما يعرفش حاجه.
....
قفلت ملف التحريات، وفي الوقت ده كان وصل تقرير الطب الشرعي، والتقرير كان بيقول ان شهد بنت بنوت، وان مفيش اي اعتداء حصل عليها، والموضوع مجرد الكدمات، وسبب الوفاه هو الخن. ق.. واللي خلى الطب الشرعي يفحص موضوع الاعتداء ده هو انه اثناء الفحص تلاحظ ان هدوم شهد كانت متقطعه، وهنا كان في شك عند الطب الشرعي ان شهد تعرضت للاعتداء.
وساعتها طلبت من مباحث الانترنت فحص الفيديو المتداول والتاكد من صحته عشان نعرف هل فعلاً الفيديو ده حقيقي ولا مفبرك؟
وبيطلع اذن من النيابه بضبط واحضار شهاب حمدي، الطالب اللي كان ليه علاقه بموضوع الذكاء الاصطناعي، وبنسبه كبيره هيطلع هو اللي ورا فبركه الفيديو ده.
ولكن في الوقت ده بتيجي واحده على قسم الشرطه، وبتقول ان عندها معلومات مهمه عن قضيه شهد، والبنت دي اسمها ايناس، وكانت صديقه مقربه لشهد، والكلام اللي قالته زود مشتبه جديد في القضيه، وايناس دي قالت ان اليوم اللي اختفت فيه شهد هي شافتها بتركب مع الدكتور عاصم عربيته، والدكتور عاصم ده.. دكتور شاب بيدرسها في المعهد، وكان ناوي يتقدملها، ولما حصلت الفض. يحه بتاعه الفيديو، للاسف كان مصدق في شهد الكلام اللي بيتقال عليها.. وده اللي خلاها مستغربه ليه شهد بتركب معاه العربيه؟
المعلومه دي بتكون في غايه الخطوره، خصوصا ان الدكتور ده هو اخر واحد كان معاها قبل ما تختفي، ولكن بعد شويه بيبلغوني ان القوه جاهزه عشان نروح نجيب الشخص اللي اسمه شهاب حمدي، وفعلا بنتحرك بقوه من القسم على العنوان، ولكن لما بنوصل هناك بنلاحظ ان الباب موارب، فبناخد حذرنا كويس وبندخل الشقه، ولكن بيكون في انتظارنا مفاجاه غير متوقعه، لاني شوفت...
