رواية رحيلها مميت الفصل الاول
يا محمد!! تعالى من فضلك دلوقتي حالًا بدل ما أسيبلكُم البيت وأطفش!
مسح محمد على وشه بتعب وهو بيقول في نفسه: أنا عارِف أن اليوم مش هيعدي بالساهل كدا مستحيل.
دخل محمد للمطبخ وهو شايف ميرنا واقفة جنب البوتوجاز، جنب حلة تحديدًا بتغلي على النار وطالع منها فقاعات كتير للسقف.
محمد بإنبهار: إيه دا يا ميرنا يعني أنا أقولك حضري الغدا وإنتِ قاعدة تلعبي وتعملي فقاقيع!
ميرنا بصدمة وعينيها على وسعهُم: بلعب وفقاقيع!! تعالى شوف عمايل الست والدتك، شوف حطتلي إيه على السم الهاري اللي هنتسممه!
قرب محمد وبص على الحلة لقى محشي عليه رغاوي صابون كتير، غمض عينيه بأسف وهو مش عارف يبرر لمراتُه يقولها إيه.
إتنهد بهدوء وحاول يهديها: ميرنا، اهدي بس واسمعيني الأول.
ميرنا بعصبية أكتر: أهدى إيه يا محمد؟ أهدى بعد ما أمك حطت مسحوق غسيل في حلة المحشي؟
محمد بدفاع عن والدته عشان ميأزمش الموقف وهو مكانش يعرف أصلًا: هي قالتلي إنها كانت فاكرة إن ده ملح.
ميرنا بصدمة: ملح؟ مسحوق غسيل يا محمد! مسحوق غسيل! يعني إيه كانت فاكرة إنه ملح؟ هو المسحوق بقى شبه الملح للدرجة دي؟
مفيش مبررات في عقله،لكِنُه تمسك بحل الموقف وقال: يمكن اتلغبطت، مش قصدها.
ميرنا بيأس إنُه ينصفها مرة: مش قصدها؟! طب تعالى شوف الحلة! تعالى شوف الرغاوي اللي طلعتلي أول ما حطيتها على النار! أنا بقالي ساعتين واقفة في المطبخ، لفيت المحشي واحدة واحدة، وفي الآخر ألاقي نفسي بغسل المحشي مش بطبخه!
محمد بنفاذ صبر: خلاص، خلاص، ارمي الحلة كلها ونطلب أكل.
ردت بخيبة أمل: الموضوع مش موضوع حلة يا محمد!
محمد: عارف إنه مش موضوع حلة، بس مش عايزك تعصبي نفسك بالشكل دا، إعتبريها أمك وبتهزر معاكِ.
رمت فوطة المطبخ على الأرض وقالِت: وأنا أعمل إيه؟ أضحك؟ أقول يا سلام على المقلب الحلو؟! دي مش أول مرة تعمل حاجة معايا وأنا أسكت عشانك!
حاصرتُه بكلامها اللي عندها حق فيه فـ قال: ماما غلطت وأنا هتكلم معاها.
بنبرة تهكُمية ردت: هتتكلم معاها؟ بعد إيه؟ بعد ما أكون كلت من إيدها مسحوق غسيل؟!
قلب عينيه بملل: محدش هيجبرك تاكلي حاجة.
خرجت من المطبخ وخرج وراها،سمعها بتقول: لا، بس واضح إن محدش هيجبرها تحترم وجودي هنا!
محمد وهو بيحاول يهديها قبل ما تتخذ أي قرار: ميرنا، بلاش تكبري الموضوع.
لفت ليه وقالِت بنفاذ صبر: أنا اللي بكبره؟ إنت كل مرة تقولي "معلش، أصل دي أمي"، وكأن كونها أمك بيديها الحق تعمل أي حاجة وأنا لازم أبلعها!
حط إيدُه على كتفها وقال بهدوء: محدش قال كده.
بعدت إيدُه وردت: بس أفعالك بتقول كده!
حس إنُه بيدور في دايرة مقفولة،إتنهد وقال: طيب قوليلي أعمل إيه دلوقتي؟
قالِت بجدية ضايقتُه: هسيب البيت.
محمد بصدمة: إيه؟
ميرنا: سمعتني. أنا هسيب البيت.
قالها بهدوء عشان صوتهم ميعلاش: ميرنا، بلاش قرارات وإنتِ متعصبة.
بغلبة على أمرها ردت: أنا مش واخدة القرار النهاردة يا محمد. أنا واخدة القرار من زمان، بس كل مرة كنت بقول يمكن الوضع يتغير، يمكن أنت تقف جنبي، يمكن تحس بيا.. لكن واضح إني كنت بستنى على الفاضي.
حاول يسترضيها فـ قال: أنا واقف جنبك أهو.
ميرنا بقهر: لا، إنت واقف في النص! لا قادر تزعل أمك عشاني، ولا قادر تمنعها تأذيني، وفي الآخر عايزني أنا اللي أهدى!
بص ليها بـِ حُب وقال: عشان أنا مش عايز أخسرك.
لمت شعرها وهي بتقول: لو مش عايز تخسرني، متخلينيش أحس إني لو مشيت من هنا محدش هيفرق معاه.
محمد بنفس نبرة الحُب: هيفرق معايا أنا.
زفرت بضيق وقالِت: طب ليه حاسة إنك مش شايفني؟
سحبها من كتفها ناحيته وقالها: شايفك، والله شايفك.
كانت متعصبة،عروق جسمها نافرة من كُتر ما سمعت كلام منُه بدون فعل،فـ قالتلُه بصراحة: لو شايفني، كُنت هتدخل من أول مرة وتقول إن اللي بيحصل دا غلط.
محمد: اللي يرضيكِ هعملهولك، بس مش عايزك تمشي.
ميرنا بتعب: أنا مش قادرة أكمل هنا.
سحبها بهدوء وهو بيقول: طيب تعالي نطلع نقعد في أوضتنا، وأنا هتصرف.
ميرنا: لا.
بص ليها بنظرة رجاء وقال: ميرنا!
سحبت نفسها منه وقال: لا يا محمد، أنا هلم هدومي وأمشي.
كور ايدُه بتحكُم في أعصابُه وسألها: هتروحي فين؟
ميرنا بعد ما فاض كيلها: أي حتة. المهم حتة أحس فيها إني إنسانة مش ضيفة تقيلة في بيت جوزي.
بصلها بعتاب وقال: إنتِ مش ضيفة، ده بيتك.
كتفت إيديها وقالِت: البيت اللي كل يوم بتأكد فيه إني ماليش كلمة مش بيتي.
محمد بنظرات بتضعفها: طب بُصيلي.
رفضت تنصاع لصوته ولقلبها وردت: مش عايزة أبصلك.
محمد بتصميم: بصيلي بس.
بصت ليه وهي بترمش بعصبية وبعدم انصياع لنظراتُه فـ قال: أنا غلطت لما سكتت قبل كدا، وغلطت لما كنت بحاول أعدي كل حاجة عشان ماما. بس مش هسمح إنك تمشي وإنتِ مكسورة بالشكل ده وحاسة إنك ضيفة، كرامتك تهمني وهتكلم معاها لاجل عيونك، بس البيت من غيرك مسمهوش بيت، إنتِ سِت البيت.. وحبيبتي.
كادت تميل لنبرتُه وكلامُه لكنها زهقت من الكلام فـ قالِت: وأنا مش عايزة وعود.. أنا عاوزة فعل مش كلام من فضلك.
قلبُه كان مستني إجابتها بإنها تقعُد فـ قال: مش وعد. أنا هتصرف.
ميرنا: ولو اتكرر؟
محمد بإبتسامة واسعة: ساعتها لو طلبتي تمشي، أنا اللي هاجي معاكي.
بصت ليه بـِ شك وقالِت: متقولش كلام وإنت مش قدُه.
محمد: من إمتى وعدتك بحاجة وخلفت بيها؟
سكتت وهي باصة ليه، مسحت على شعرها وهي بتحاول تهدي نفسها
قالها وهو بيبوس راسها: سيبي الحلة دي في النار تتحرق، وسيبي المطبخ كله. تعالي معايا فوق، اهدي، وبعدها نتكلم. بس متاخديش قرار وإنتِ بتعيطي.
ميرنا بصوت مُتهدج: أنا تعبت يا محمد.
محمد ضمها ليه وهُما طالعين وقال: عارف.
ميرنا: بجد تعبت.
محمد: عارف..وعشان كده المرة دي رد فعلي هيكون غير.
دخلوا لأوضتهُم سوا وقعد يهديها ويهدي أعصابها، مكانوش واخدين بالهُم من اللي واقفة بتتصنت عليهُم وبتسمع كُل كلمة.
نزلت لشقتها بهدوء وهي بتتوعد لميرنا وبتقول: طيب يا بنت عزة، إن ما خليتك تمشي من هنا بالهدوم اللي عليكِ وطلعت العمل اللي ساحرة بيه إبني على جتتك، مبقاش أنا.
دخلت شقتها وهي بتقعُد على كُرسي الكنبة بتاعها وبتمسك الريموت، عاملة نفسها متعرفش حاجة.
شوية ونزل محمد وهو شايل حلة المحشي ومغطيها، حطها على الترابيزة قُدام أمه ووقف باصص ليها، بعدها قال بهدوء: دا الغدا اللي المفروض أتسممُه عشان راجع من شُغلي تعبان.
أمه بسُرعة: عدوك المُكرهه يابني بعد الشر! مالُه الغدا؟
إخييه دا صابون.
محمد بتعب: بتعملي كدا ليه؟ أنا مش هطلقها يما أنا بحبها ولو مشيت همشي وراها.
رمت امه الريموت ووقفت قُدامه بتقول بصوت عالي عشان تسمع ميرنا: بعمل إيه هي لحقت ملت قلبك من ناحية أمك، حسبي الله ونعم الوكيل.. البت الخبيثة راشة صابون على الغدا عشان مدوقش منه، جعانة زي اهلها.. ودلوقتي بتتهمني فيه، الفاشلة اللي كانت لا تعرف تقدح زيت ولا تفتح بيت.
محمد بعصبية: بس بقى يماا! عليا النعمة الموضوع دا لو اتكرر ما هتشوفي وشي تاني!
بعدت الحلة بإيديها ناحيتُه وقالت بعياط مُصطنع: خُد يابني خُد حلتكُم مش عايزة منكُم حاجة، الله الغني ربنا ما يحوجني، وأنا لُقمتي إيه دا حاجة تسد جوعي بس بنت الجعانة اللي جبتها بتستخسر في أمك، صابون! ونازل فاتح صوتك عليا عشان السنيورة.
إحتار وهو واقِف مش عارف يراضي مين ولا مين، أعصابه تعبت بيرجع من الشغل عاوز يرتاح يلاقي هم مستنيه كل يوم.
طبطب على أمه وقال: طب خلاص يما حقك عليا ماعاش اللي يفتح صوته عليكِ، أنا هطلُبلنا أكل من برا وتغور الحلة باللي فيها فداكُم، خلاص؟
بطلت عياطها المُزيف وقالت بزعيق عشان تسمع مراتُه: تطلُب أكل أومال اللي فوق دي جايبها ليه؟؟ ما هي قاعدة طول النهار لا شُغلة ولا مشغلة.. توقف تشوحلك حتة كبدة ولا تعملك لقمة سخنة في البيت أنـ.
خبط على الترابيزة بكفين ايديه وقال بغضب وزعيق: كفاية بقى انا تعبت! تعبت!!!
نزلت ميرنا ودا كان اخر شيء بيتمناه محمد في الوقت الحالي، كتفت ايديها وقالت بعصبية:
