رواية رحيلها مميت الفصل الثاني 2 بقلم روزان مصطفي


 رواية رحيلها مميت الفصل الثاني 


نزلت ميرنا ودا كان أخِر شيء بيتمناه محمد في الوقت الحالي، كتفت إيديها وقالت بعصبية: أه طبعًا أعمل أنا الغدا وأشوحله كبدة، والمرة دي هتحُطيلي عليها إيه؟؟ صابون مواعين! 
محمد بص لها بتعب وقال: ميرنا! 
قاطعتُه وهي بتشاور بإيدها ناحية أمه: لأ، متقوليش ميرنا! أنا سمعت بـ وداني، سمعت وهي بتقول إني جعانة وإن أهلي ناس جعانة، وسمعتها بتقول إني فاشلة ومبعرفش أفتح بيت، وكمان بتتهمني إني أنا اللي راشة صابون على الأكل! ماشاء الله بتتعمد تعلي صوتها عشان الكلام يوصلني بوضوح. 
أمه ردت وهي بتزعقلها وبتبُصلها بقرف: أومال كُنتِ عايزاني أقول إيه؟ بتقلي أدبك على أم جوزك وبترميني بالباطِل، وفي بيتي! 
ميرنا بضحكة ساخرة: بيتك؟ أيوة، أخيرًا قولتيها بنفسك.
محمد حط إيده على دماغه وقال بنفاذ صبر: يا جماعة والنبي اهدوا، أنا مش ناقص.
ميرنا بصتله بعتاب: لأ، إنت ناقصك حاجة واحدة بس يا محمد.. إنك تختار.
محمد بصلها باستغراب: أختار إيه؟
ميرنا: تختار تكون جوزي بجد، ولا تفضل ابن أمك اللي بيخاف يزعلها حتى لو أنا اللي بيتداس على كرامتي.
أمه ضربت على صدرها وقالت: سمعت يا ابني؟ سمعت بتقول عليك إيه؟ دي عايزاك تعاديني عشان هي ترضى!
محمد بعصبية: يمااا، أنا محدش طلب مني أعاديكِ!
ميرنا: أنا كُل اللي طلبته إن يبقى ليا إحترام في بيتي.
أمه بحدة: إحترام؟ وإنتِ من ساعة ما دخلتي البيت وإنتِ عايزة تفرقي بيني وبين ابني!
ميرنا قربت خطوة وقالت: أنا؟ أنا اللي عايزة أفرق بينكم؟ هو أنا اللي وقفت أتصنت من ورا الأبواب؟ هو أنا اللي حطيت مسحوق غسيل في أكل بني أدمين؟
محمد بسرعة: خلاص، خلاص موضوع الصابون انتهى!
ميرنا بصتله بصدمة: انتهى؟!
محمد: أيوة إنتهى، المحشي إترمى وخلاص.
ميرنا بضيق من بروده: الأكل اترمى، بس اللي جوايا مترماش يا محمد!
سكت محمد وهو باصص لها، حس إن كل كلمة بتقولها بتضغط أكتر على صدره، بينما أمه وقفت تتفرج عليهم وهي ضامة شفايفها في صمت.. وكأنها.. شمتانة! 
ميرنا وهي بتحاول تمنع دموعها تنزل: أنا مش طالبة منك تطرد أمك من بيتها، ولا عمري طلبت منك تختار بيني وبينها.. أنا كنت مستنية منك بس مرة واحدة تحس إن اللي بيحصل فوق طاقتي وقدرتي على التحمل،دي كأنها عاوزة تطفشني أو إنك ترمي عليا يمين طلاق!.
محمد قرب منها وقال بهمس: ما قولتلك هنزلها أحِل الوضع معاها إيه اللي جابك ورايا! 
إفتكرت هي كُل مرة بلعت إهانة وتقليل الست دي ليها ولعيلتها، وشها وإيديها كانوا بيترعشوا من العصبية وعشان كاتمة دموعها وقالتلُه بنبرة مكتومة: دا اللي ربنا قدرك عليه؟ 
محمد: طب هعمل إيه أكتر من كدا؟
ميرنا: متسألنيش أنا أقولك تعمل إيه! إنت جوزي، المفروض إنت اللي تعرف تحميني.
أمه بانفعال: يحميكِ مني؟! هو أنا وحشة للدرجة دي؟
ميرنا لفت ليها وقالت: أنا مش هقول عليكِ وحشة، بس أنا مبقتش حاسة بالأمان ولا الراحة وأنا عايشة معاكِ.
أمه بحدة: يبقى روحي بيت أهلك!
محمد غمض عينيه للحظة وكأنه بيحاول يمنع نفسه من الانفجار، لكن ميرنا ردت عليها فورًا: هو دا اللي إنتِ مستنياه؟ عشان أروح ويبقى ابنك ليكِ لوحدك؟
محمد بص لأمه بصدمة: يما!
قالت وهي بتبص لميرنا: أهو هي اللي قالت.
ميرنا دموعها نزلت وهي بتقول: خلاص..أنا مش هطلب من حد حاجة تاني.
لفت عشان تطلع، لكن محمد مسك إيدها بسُرعة وقال بلهفة: إستني.
سحبت إيدها منه وقالِت: سيبني يا محمد.
محمد: لأ.
ميرنا بإنهيار: سيبني، أنا تعبت.
محمد قرب منها أكتر وقال بصوت ثابت: وأنا تعبت من اللي بيحصل طب ذنبي إيه تسيبيني وتمشي! 
بصتله بـ عيون مليانة دموع، فـ سكت لحظة قبل ما يكمل: بس مش هسيبك تمشي.
أمه قاطعته: وأنا كمان مش هقبل إنك ترفع صوتك عليا عشانها.
محمد لف ناحيتها وقال بهدوء مخيف: وأنا مقولتش إني هرفع صوتي عليكِ، بس من النهاردة أي كلمة على مراتي هتحصل قدامي مش هسكُت عنها. 
أمه اتصدمت من نبرته وقالت: يعني إيه؟
محمد: يعني اللي حصل إنهاردة مش هيتكرر.. 
ميرنا بصتله، ولأول مرة من ساعة ما نزلت حست إن كلامُه مُختلِف وهياخُد موقِف عشان يوقف المهزلة دي. 
أمه ضحكت بسخرية وهي بتمسح دموعها: إنت بتتحدى أمك عشان مراتك؟
محمد رد من غير ما يرفع صوته: أنا مش بتحدى حد يما، أنا بحاول أحافظ على بيتي.
سكتت أمه وهي بتبُصله بغيظ، بينما ميرنا فضلت واقفة مكانها، مش عارفة تصدق الكلام ولا تخاف يكون مجرد لحظة غضب عشان تهديدها ليهُم. 
محمد بص لميرنا وقال: اطلعي فوق.
ميرنا بإستفسار: وإنت؟
محمد بهدوء: هطلع وراكِ
ميرنا بصت لأمه، وبعدها بصتله وقالت: أنا مش عايزة خناقة تحصل بسببي.
محمد بتعب: مفيش الكلام دا، إطلعي إنتِ بس. 
ميرنا بهمس: مُتأكد؟
محمد بابتسامة صغيرة رغم تعبُه: أه. 
طلعت على السلم، وكل خطوة كانت بتاخدها وهي لسه مش عارفة إذا كان بالفعل بعد كدا هيتصدر لأمه عشان متضايقهاش تاني، ولا عمل كدا المرة دي عشان متروحش لأهلها ويحصل مشاكِل، بص لأمُه بعتاب وطلع ورا ميرنا.. 
أما أمه، فـ فضلت واقفة تحت مكانها، عينيها متعلقة بظهر ابنها وهو بيطلع ورا مراته، ووشها اتحول مِن الحُزن المُصطنع لـِ غضب مكتوم.
تمتمت وهي بتضغط على أسنانها: فاكر إنك كده هتكسر شوكتي قُدام المحروسة يا محمد؟ 
وبصت ناحية السلم وهي بتقول في نفسها: مبقاش مرا على حق لو ما خرجتها من بيتك وبـِ فضيحة.. 


Ghazal
Ghazal
تعليقات