رواية غزل بين الحب والخيانة الفصل الاول 1 بقلم هويدا زغلول

غزل كانت في المطبخ بتحضر الغداء قبل ما مروان جوزها يجي من الشغل دخلت عليها سما وتوامها هنا اللي قالت 

هنا 

مامي انا مش عارفه اعمل الهوم ورك لوحدي وانتي بقالك ساعه في المطبخ هتقعدى معايا امتى 

سما 

ايوه يا مامي وكمان لما بابا بيجي من الشغل بتقعدي معاه وبتنسينا خالص احنا كمان لينا حق عليكي

غزل 

حبايب قلبي والله ربع ساعه بس هطفي على الرز واكون عملت السلطه وهطلع اعمل معاكم الهوم وورك  لحد ما بابا يجي اطلعوا بس انتم من حر المطبخ دا علشان مش تتاذوا وانا هغسل ايدي وهحصلكم 

هنا وسما طلعو وغزل عينها عليهم وبتعب قالت 

غزل 

انا حاسه ان انا بسابق الزمن العيال دي صعبانه عليا قوي ومستواهم في المدرسه مش قد كده بس انا مش لاقيه وقت نبطشيه في المستشفى وشغل البيت مش عارفه اواظب بينهم

بعد شويه مروان وصل واتفاجي ان البيت هادي  وبذهول قال 

مروان

ايه الهدوء ده وايه ريحه الاكل الجامده دي هي طابخالي النهارده معقول تكون حنت عليا وعملت  دكر بط من اللي مخزناهم في الفريزر وبتقولي عيناهم لرمضان 

غزل طلعت على صوته وقالت 

غزل 

حمد لله على السلامه يا حبيبي تعالى ده انا عاملالك صينيه بطاطس بالفراخ هتاكل صوابعك وراها 

مروان 

اخيرا طلعت بروتين ده الواحد معدته نشفت من الاكل الأورديحي  فراخ فراخ مش مهم أهو كله من نفس الفصيلة 

غزل 

يلا بسرعه والاكل سخنه كده البنات جعانين مش رضيت اخلي حد ياكل لحد ما انت تيجي 

مروان قاعد على السفره واتفاجئ بالاطباق اللي على السفره وبذهول قال 

مروان 

ايه كل دا فراخ وحمام كمان هو حمار مين هيموت دا انتى على طول ماشيه بالورقه والقلم وتقولى مصاريف البنات كتيره 

غزل 

ما انا قولت ادلعك بقا وبعدين انا نزلى حوافز ولسه قابضة ايه رايك تعزم حماتى واختك على الغدا بكرا دا انا هشرفك مخططه لعزومه  صدقني هرفع راسك 

مروان 

انتى سخنه يا غزل ولا ايه دا ايه الكرم دا كله عاوزه تعزمى امى واختى على الغدا مره واحده دول مش بينزلولك من زور انتى ناويه تسميهم ولا ايه 

غزل 

لا طبعاً دول مهما كانو جدة بنتى وعمتها ولازم نخلى الود موصول ولا انت مش حابب تعزمهم 

مروان 

لا طبعاً ازاى انا أكره مش هناكل طيب ولا ايه ناوليني طبق الحمام دا اشوف بيقول ايه 

غزل قعدت جنبه واتغدو مع البنات وبعدها قعدت معاهم يعملو الواجب ومروان مش مصدق تغيير غزل

تاني يوم مروان عزم امه واخته  على الغداء 

الحمااااا 

ايه ده يا واد هو انت صرفت مرتبك كله علشان تغدينا امال هتمشي الشهر بايه جايبلي ديك رومي انا مش مصدقه اللي انا شايفاه 

مى أخته مسكت طبق ورق العنب وقالت 

مي

شوفي ياما دي حاطالنا صويا صوص من الغالي اوعي تكون هتعمل زي ما محمد علي عمل في المماليك 

الحما 

ايه البويا صوص ده يا بنت اوعى يكون ملين نقعد في الحمام اسبوع اصل انا عارفه الدكتوره مرات ابني شكلها هتعملنا عمل 

وبعدها خرجت غزل من جوا وبعدين قالت 

غزل 

ولا عمل ولا حاجه يا حماتى انا قلت بس نلم زيتنا في دقيقنا احنا بينا برده اطفال ولازم يشوفوا جدتهم هم والله اكلوا بدري وناموا قولت ده افضل عشان نبقى نقعد براحتنا 

مى 

وانت يا غزل بتعرفي تطبخي ديك رومي ولا جايباه جاهز من برا اصل مروان على طول بيقول نفسك حلو في الاكل وبصراحه حساه بيكذب وبيقول كده علشان يجبر بخاطرك وبس 

غزل 

كلى يا حبيبتي ودوقى قبل ما الاكل يبرد وبعد كده شوفي الاكل حلو ولا وحش 

مروان 

عنكم انتم كده الورك ده يلزمني اصل عزومه زي دي مش هتتكرر تاني غير وانا ميت والاكل ده مستحيل اقوم من على السفره غير ما انسفه وبدأ ياكل بشراهه 

غزل طلعت الموبايل بتاعها وفتحته على الرساله اللي وصلتها امبارح على الوتس من رقم غريب وحطته قدام مروان وقالت 

غزل 

بس كده يا مروان الرقم ده مش متسجل عندي وبعتلى  رساله دي امبارح ما تقراها كده 

مروان مسك الموبايل وشاف الرساله واتصدم  لما لقاها صوره عقد جوزه وبتوتر قال 

انت عرفتي انا ممكن اشرحلك الموضوع ده كنت مخبيه عنك علشان مش اجرح مشاعرك 

الحمااااا 

مالك يا واد قلبت زي الكلب البلدي كده ليه فيها ايه الرساله دي هي المحروسه بتبعت جوابات غرام لحد بقى في الشغل ولا ايه 

غزل 

لا والله يا حماتي ده ابنك المحترم طلع متجوز عليا ومراته حامل وبعتا لي تحاليل الحمل وقسيمه الجواز 

الحما زغرطت وقالت 

يا رب تكون ارضها ارض خصبه وتطلعلك الولد اللي نفسنا نشوفه بدل ما خلفتك كلها بنات 

مى 

معلش بقى يا غزل مش تاخدي على خاطرك اخويا هو مش مقصر في بيته ولا مع عياله وبعدين الشرع محلل اربعه ما فيش مشكله لو اتجوز عليكي طالما مكفي بيته 

مروان 

مش تحاولي انك تنصبيلي قاعده عرب انا عايز ولد يشيل اسمي عشان لما اموت اسمي يفضل موجود وانت ما شاء الله خلفتك بالتوام وكمان بنات 

الحمااااا 

انت بتبرر ليه يا حبيبي انت الراجل وتعمل كل اللي انت عايزه ما لهاش حق ان هي تعترض كل يا ابني كل اهو كله من خيرك 

غزل 

من خير مين يا حماتي ده مرتبي انا وانا اللي وقفت في المطبخ لحد ما ظهري اتقطع علشان اعمل السفره دي وفي الاخر بتوجهيله هو الشكر 

الحمااااا 

اه يا اختي من خيره مش شغلك ده وقته ملك لجوزك يبقى فلوسك فلوسه وبعدين ما تزعليش يا حبيبتي تبقى في بوقك وتتقسم لغيرك انتى  تحمدي ربنا ان هو مش دخلها عليكي البيت 

غزل 

معاكي حق فعلا انا طلعت قليله الذوق قوي المفروض كنت ابوس ايده علشان مش دخلها عليا البيت عموما بألف هنا على قلبكم وسابتهم ودخلت 

مروان 

انا خايف ياما تشيل ايدها من مصروف البيت مش هقدر على البيتين وكمان مصاريف البنات كتير 

الحمااااا 

طب تبقى تعملها وانا هخليها تقعد من الشغل ست الدكتوره هي هتخاف على شغلها ومش هتخاطر بيه

 وبفرحه قالت

 قول لي يا واد ولد ولا بنت وتوام ولا لا 

مروان 

لسه ياما والله مش عرفت نوع الجنين ايه دي لسه في الثاني شويه كده هنبقى نروح للدكتور نشوف بس اعرف بس هي اللي بعتتلها وعرفتها ان احنا متجوزين وحامل كمان مع اني محظرها ان غزل متعرفش

مى 

يادي الخيبه على الرجاله اللي خايفه من مراتاتها هو انت عملت حاجه عيب ولا حرام ده انت بتنفذ شرع ربنا مثنى وثلاث  ورباع كمان هاتلى كده طبق ورق العنب اللي غرقان دبس رمان ده اشوف بيقول ايه 

تاني يوم غزل  صحيت بدري جهزت الفطار للبنات ولبست هدومها مروان دخل عليها وهي بتلف الحجاب وبصلها بتقييم وقال 

مروان 

من امتى وانتى بتتشيكي كده وانتى نازله وبعدين لسه بدري وفين فطارى غريبه يعني هتنزليني من غير فطار 

غزل 

معلش يا حبيبي بقى عندي شفت بدري النهارده ومش لحقت اعمل فطار يا دوب حضرت حاجة البنات انت عارف مواعيد الباص بيجي امتى وكمان الدروس اصل انا طالعه ندوه هقعد فيها اسبوع 

مروان 

اسبوع  ازاي وهتسيبيني محتاس كده لوحدي طب وشغلي ومصروف البيت والاكل والليله دي كلها مين اللي هيعمل 

غزل قربت منه وبدلع قالت 

غزل 

البركه فيك يا قلبي بجد الندوه دي مهمه جدا لشغلي ولازم احضرها خلي بالك من البنات بقى على ما ارجع ومش تنسى تساعدهم في الهوم وورك وانت كده كده مرتبك لسه قابضه مشي الدنيا بقا المدرسين عايزين فلوس الشهر وفي كتب للمدرسه وفي سبلايز كثير عايزينها للمدرسه ومش تنسى وصل الميه والغاز والنور تيك كير يا بيبي انا اتاخرت وسابته ومشيت 

مروان بذهول قال

مروان

كل ده لسه مش اتدفع اومال انت مرتبك فين طالما بس اطلع اصلح طبقه الاوزون وجري وراها يمكن يلحقها بس كانت مشيت 

هنا وسما من وراه فى صوت واحد قالو 

بابي عايزين نسرح علشان نلحق الباص وفين الفطار بتاعنا وفين الشنطه بتاعتنا 

مروان 

واحده واحده عليا ايه كل دا ومالكم واقفين ورايا زي الفزاعه اللي بتقف في نص الارض كده ليه قدامى انتى وهيا أما اشوف الليله السودا دى هتخلص على ايه 

عند غزل كانت قاعده في الكافيه مع نانسي اللى  اول ما شافتها قالت 

نانسي 

بصي يا غزل احنا صحاب من واحنا عيال في اللفه وانا مش قادره اتعاطف معاكي بصراحه لما انتى حكيتيلي 

لسبب واحد بس ان انت كنت بتدي بغباء فبقى كل حاجه حق مكتسب 

غزل 

هو انتى جايه تشمتى فيا ولا ايه انا بعتلك رقم امبارح وقولتلك انا عايزه عنوان صاحبه الرقم ده انتي الوحيده اللي عارفاها وواثقه فيها وبعدين منصبك في شركات الاتصالات يخليكي تعرفي بيانات العملاء صح ولا لا 

نانسي طلعت ورقه من شنطتها وحطتها على الترابيزه وقالت 

نانسي 

انتي عارفه ان انا عمري ما هشمت فيكي انا متضايقه عشانك كنتى عماله تفركي يمين وشمال تصرفي من مرتبك وهو يحوش وفى الاخر اتجوز عليكي والحجه انه عايز يخلف ولد بني ادم زباله وادى العنوان بالتفصيل بس هتعملى ايه 

غزل خدت الورقه حطتها فى شنطتها وقامت وهى ماشيه قالت

غزل

هعرفها مقامها لا تكون فاكره ان هي بالمسدج اللي بعتتها دى هزت ثقتى فى نفسي هخليها تفوق من اوهامها واعرفها أنه اتجوزها بفلوسي انا وسابتها ومشيت 

عند مروان كان قاعد بيشرب قهوه بعد مانزل البنات الباص وبيعد فى الفلوس اللى معاه وبغيظ قال 

مروان 

وبعدين بقا دا يا دوب ادفع ايجار الشقه الثانيه طب هشحت باقي الشهر ولا ايه وطبعا غزل لو طلبت منها فلوس هتفهم انا عايزها ليه وطلع موباليه وكلم أمه اللى قالت 

الحمااااا 

ايه يا واد مراتك ماتت وريحتنا ولا ايه ازغرط ولا استني 

مروان 

تزغرطى ايه بس يا اما صلي على النبي  وبعدين انت عايزاها تموت وانا اغرق في الديون بقول لك ياما والنبي مش معاكي سلفه لاخر الشهر  أصل المرتب يدوب 

الحمااااا 

مش مكسوف من نفسك يا واد وانت بتطلب مني فلوس دا انت طول بعرض والجته قد كدا ومراتك فين ياخويا مخدتش منها ليه ولا انا في الحزن مدعيه وفي الفرح منسيه 

مروان 

اقفلى ياما انا غلطان انى كلمتك وقفل الموبايل وبغيظ قال هو الكل متفق عليا انهارده ولا ايه 

عند غزل وصلت العنوان خبطت على الباب فتحتلها سمر اللى قالت 

سمر 

افندم مين حضرتك 

غزل 

مش عيب يكون معاكي رقمي وتبعتي قسيمه الجواز ومتكونيش عارفه ضرتك تبقى مين 

سمر بصتلها بغل وقالت 

انتى غزل

 وحطت ايديها على بطنها وبدلع قالت 

قولي عايزه ايه بسرعه اصل الواد عمال يرفص في بطني وتعبني طولت الليل والدكتور قايلي الوقفه الكتير عليا غلط 

غزل زقت الباب وقعدت على اول كرسي قابلها وحطت رجلي على رجلها وببرود قالت 

غزل 

اولا بالنسبالك فأنا اسمي الدكتوره غزل

 وبسخريه قالت

 اقعدي وارتاحي علشان الكلام اللي انا جايه اقولهولك هيوطيلك الضغط وبعدين ولد ايه اللي بيرفص ده انت لسه في الشهر الثاني 

سمر اتغاظت منها اكتر وقعدت على الكرسي قدامها وقالت 

سمر

اخلصي قولي الكلمتين اللي محشورين في زورك اصل بصراحه وجودك مش مرحب بيه جوزي زمانه هيخلص شغله وهيعدي عليا ولازم اكون ليه عروسه حلاوه علشان مش يبص لبره 

غزل 

لو فاكره ان الكلمتين الخايبين اللي انت قولتيهم دول هزو فيا شعره ولا الرساله والتحاليل اللي انت بعتيها امبارح ضايقوني تبقي غلطانه ده انا حتى جايه اشكرك انك عرفتني حقيقه الانسان اللي انا عايشه معاه 

سمر 

ما تسيبك من اللف والدوران ده وخشي في الموضوع دوغري عاوزه ايه يا ضرتي ومش تحسسيني ان انت جايه لمصلحتي الضراير عمرهم ما يكونو على وفاق 

غزل 

بصي يا حلوه المحروس اللي عامل فيها سبع رجاله وماشي على شارع ربنا وعايز يتجوز تاني الفلوس اللي اتجوزك بيها دي من ورثي من ابويا هو اصلا مش بيصرف على بناته ولا على البيت انا اللي شايله الليله غلطتى لما حملتى منه لأنه هيشردك خصوصاً وانتى مش شغالة 

سمر 

هو انت جايه تحرقي دمي وخلاص بترديهالي يعني بس بعينك مش هديكى الفرصه ايه اللي يعرفني ان انت صادقه  

غزل طلعت ورق من شنطتها وحطتها قدام سمر وببرود قالت 

اعتقد انك متعلمه وبتعرفي تقرأي دي كل الفلوس اللي مروان واخدها مني وماضي عليها وصلات علشان يردهالي قوليلي واحد زي ده مراته اللي بتصرف معاه في البيت هيقدر يفتح بيتين ازاي  

سمر 

دا قايلي انه مقتدر ومعاه وديعه في البنك بقد كده وسايبها لابني لما يكبر يشق طريقه بيها 

غزل 

الودايع اللي في البنك دي بتاعه بناتي وباسمي انا مش باسم هو لحد ما بناتي تتم السن القانوني الودايع دي هتتفك وهجهزهم بيها مبروك عليكي جوازك منه ياقلبي بالرفاه والبنين وسابتها ونزلت 

سمر اتغاظت منها وبغل قالت 

سمر 

ماشي يا مروان وربي لأوريك مش انا اللي يتضحك عليها انت كنت عامل زي الكلب بتجري ورايا عشان اوافق عليك وفي الاخر طلعت مش حيلتك اى حاجه ومسكت موبايلها ولقته رانن عليها سبع مرات ولما رن تانى فتحت عليه 

مروان 

ايه واقعه على ودانك بقالي ساعه بحاول اوصلك مش بتردي عليا ليه 

سمر 

حيلك حيلك داخل فيا شمال ليه مش رديت عليك علشان مراتك كانت عندي الدكتوره غزل لسه نازله من عندي حالا 

مروان 

غزل وهي ايه اللي هيجيبها عندك وبعدين تعالي هنا انت ازاي تبعتي لها قسيمة الجواز وتعرفيها انك حامل انت هبله 

سمر 

بقولك ايه مش خدوهم بالصوت مبقاش انا قاعده في علبه كبريت ايجار والدكتوره قاعده في شقه ملك ومش شايله هم ايجار ولا نيله وكمان مش عاوز تاخدنى عندك فى البيت ليه هو انا كخه ولا ايه 

مروان 

انت هبله يا بنت انت اخدك فين هو انا رايح الملاهي وبعدين لو انتي مش بعتي ليها  الرسايل مكنتش جاتلك ومكنتش هتعرف ده انا كنت باخد منها ايجار الشهر بتاع الشقه اللي انت فيها 

سمر 

يعنى ايه كلامك ده يا راجلى انت كنت بتضحك عليا ومفهمني ان انت مليونيير وطلعت واخد ورثها من ابوها وفوق ده كله بتقولي ان انت واخد قرض من البنك وبتدفع كل شهر 

مروان 

ملوش لازمه الكلام ده دلوقتي انا لي كلام مع غزل اشوفها هي جتلك ليه وبتوتر قال بيعي خاتم ولا حاجه مشي امورك وادفعى الايجار وهاتى الباقي اسد بيه القرض وهمضي وصل عليهم وهسدهم أول ما ربنا يفرجها 

سمر 

احمد يا عمرو ابيع ايه يا ننوس عين امك اسمع يا قلب امك انا مش الدكتوره غزل انا سمر تربيه الحوارى تدفع الايجار وتصرف عليا زيي زيها انا حامل ومحتاجه اتغذا يإما ورب الكعبه اجيلك مكان شغلك أفضحك يا جوز الاتنين 

مروان 

يخربيت لسانك اقفلى هتصرف انا وقفل فى وشها

سمر 

ماشي يابن اعتماد ان ما وريتك النجوم في عز الظهر  مبقاش سمر بقى انا تختمني على قفايا  وطلعت فى الاخر نكره مش حيلتك حاجه 

عند مروان حدف الموبايل على الأرض بغيظ وقال 

مروان 

انا اللي جبت لنفسي وجع الدماغ ما كنت عايش ملك مش عارف ايه الهباب اللي انا عملته في نفسي ده اما اروح ادفعلها الايجار واجيبلها طلبات البيت لتعملى فضايح دى وليه قادره 

عند غزل وصلت المستشفى ودخلت على اخوها اللي اول ما شافها استغرب وجودها وقال 

رامى 

غزل مالك فى ايه مش من عادتك تيجي مكتبي هنا واتفاجئ بيها بتحضنه ودموعها نزلت غصب عنها 

غزل 

تعبت يا رامي من كل حاجه ليه يخونى انا عملت ايه وحكيتله على كل حاجه 

رامي 

ابن ال انا قولتلك من البدايه الراجل ده لا يؤتمن من يوم ما بص على فلوسك من ورث بابا  وخدها منك بحجه ان هو عايز يعمل مشروع وفى الأخر خدها ونام عليها ودلوقتي اتجوز عليكي هتعملى ايه دلوقتي 

غزل 

حتى انت كمان عمال تقطمنى كدا ليه كنت فاكره ان انا لما اقف في ظهره هيقدر ده انا مش بشم على ظهر ايدي عشان اعرف ان هو كدا انا أصلا مش طايقه ادخل البيت 

رامي 

ولا يهمك يا قلبي خليه يشيل بيته وعياله ويعرف ان الله حق بقول لك ايه انا طالع يومين اغير جو في الساحل ايه رايك تيجي معايا وبالمره تطفي النار اللي جواكي دى 

غزل 

موافقه وتكون فرصه اكون رتبت افكاري علشان اعرف اعمل ايه في اللي جاي  

عند مروان وصل البيت عند سمر وكان شايل في ايده اكياس كثير وخبط على الباب سمر فتحتله ودخلت جوا من غير ما تتكلم 

مروان 

ينعل ابو بوزك يا شيخه ده بدل ما تساعديني ودخل الاكياس في المطبخ 

سمر 

بتبرطم ليه اشيل ازاي معاك وانا حامل وبعدين فين الفيتامينات بتاعتي انت عارف ان الدكتور كاتبلي عليها علشان اعوض النقص اللي عندي والبيبي ينزل سليم 

مروان 

طب وبالنسبه للنقص اللي في تربيتك مين اللى هيعوضوا الفيتامينات برده 

سمر 

انا مش اسمحلك تتكلم معايا بالطريقه دي ولا هو رضينا بالهم والهم مش راضي بينا 

مروان 

ده انا صح ومسكها من شعرها وبغل قال يا زباله بتستغفليني وتلعبي بيا الكوره وتبعتيلها على رقمها بمناسبه ايه ده انا متجوزك عرفي يعني ممكن ثانيه اقطع العقد ده واقولك اخبطي راسك في اتخنها حيطه 

سمر 

ايوه بان بقى على حقيقتك مالك يا اخويا مقموص ليه عشان السنيوره عرفت ان انت متجوزني ما انت لو كنت عملت اشهار بالجواز ده وقعدتني في شقه كويسه مكنتش هفتح بوقي ولا هو حلال ليها وحرام عليا 

مروان 

يا غبيه انتي مش عارفه انتى عملتي ايه غزل دي انا كنت باخد مرتبها مع مرتبي وكنت بمشي الدنيا ومكنتش تسالني بصرف فين دلوقتي هتمسكني على الواحده وهتسال كل جنيه راح فين 

سمر 

انا ما ليش دعوه انا ليا حق عليك زي ما انت بتصرف على السنيوره هي وعيالها تصرف عليا انا وابني انا مش متجوزاك وانا حامل فيه انت واخدني بنت بنوت 

مروان شد شعره بغيظ ومسكها من شعرها وبغل قال 

مروان 

قسما بالله يا سمر لو اتكررت تاني لاكون مموت اللي في بطنك اللي انت مفكره انك هتلوي ذراعي بيه انت سامعه طفحك عندك جوه بالسم الهاري وسابها ومشي 

سمر 

مش هسمحلك يا مروان الفتره دي انت شوفت نسخه الحمل الوديع اللي جوايا لكن لو قربت مني او من اللي في بطني هتشوف نسخة الشيطان حتى لو هلبسك بدله الاعدام 

عند غزل كانت لابسه فستان طويل مناسب لأجواء البحر وحاطه ميك اب وبمكر طلعت الموبايل بتاعها واتصورت كم صوره ونزلتهم على الفيسبوك عندها 

رامي 

أن كيدهن عظيم فعلا طلعتى بلوه وانا اللي كنت فاكرك ملاك بريء 

غزل 

كل ده علشان نزلت صورتين ليا وانا قدام البحر لو فاكر ان انا بعمل كده عشان اشده ليا تبقى غلطان انا مبقاش فارق معايا وجوده من عدمه من النهارده ههتم بغزل و بس ما تخليك بقى جدع وقوم هات لنا شويه جندوفلي نقزقز فيهم 

رامي 

انا عارف انك طالعه وطمعانه في القرشين اللي انا محوشهم حاضر يا ستي طلباتك اوامر عشان نفسيتك بس غير كده قسما بالله لاكون مدفعك كل جنيه انت بتقبضي زيك زيي وسابها ومشي 

غزل 

سبحان الله الرجاله كلها طلعت كده نتنه يلا ادينا بنتعلم ماشي يا رامي انا هوريك 

عند مروان كان ماسك موبايله واتفاجئ بالصور اللي غزل منزلاها وبغيظ قال 

مروان 

هي دي الندوه اللي هي رايحه تحضرها في الساحل وقدام البحر وانا هنا مسحول ايه رايحه تعمل تعاقد مع مستر سلطع في قاع الهامور واتصل بيها 

غزل 

ايه يا مروان البنات كويسين في حاجه حصلت عندك مش من عوايدك انك تتصل بيا 

مروان 

الهانم سايباني اغير والبس وأحمي واكل ورايحه الساحل بتعمل ايه هناك 

غزل 

رايحه اغير جو بس ايه رايك في الفورمه الجديده انا عارفه انك اتجوزت عليا علشان انا مش بهتم بنفسي فقررت اغير من نفسي علشان نفسي 

مروان 

قصدك ايه بكلامك ده وبعدين مش هنفضل نفتح سيرة الجواز دي كتير  اللي حصل حصل 

غزل 

هو انت فاكرني غبيه يا مروان حته انك عايز ولد يشيل اسمك ستاره بتخبي وراها نزواتك انت كنت بتدور على الشكل فانا حبيت اوريك الشكل على اصوله طالما البنات كويسين وانت مشي امورك سيبني براحتي بقى استجم وبعدين انا مش طالعه على حسابك ومش خدت منك جنيه 

مروان 

من امتى وفلوسك بقت بتاعتك لوحدك ما كله للبنات انت محسساني ان انا هاخدهم واحطهم في جيبي 

غزل 

البنات عندهم ابوهم ربنا يباركلهم فيه انا من النهارده شلت ايدي من مصروف البيت انت عارف ان الدنيا غداره ولازم اعمل حساب لبكره سلام بقى عشان الموبايل هيفصل وقفلت الموبايل في وشه 

مروان اتغاظ اكتر من اللى بيحصل حواليه 

مروان 

بقى على اخر الزمن يتلعب بيا الكوره شويه من سمر وشويه من غزل وانا في النص بينكم لا لازم يفوقو ده انا الراجل وطلع يجري بسرعه على المطبخ يشوف الرز قبل ما يتحرق