رواية قمر اسود ج 2 الفصل الاول
احنا تلت بنات اخوات اصغر واحدة فينا اكبر مننا في السن بتقولو ازاي دة سؤال اجابته هتعرفوها جوة احداث قصتي تعالو بقي اعرفكم علينا الاخت الكبيرة اسمها عزة ودي رمت نفسها في اول ليلة جواز والثانية انا واسمي حنان ممرضة وهموت واعرف اختي لية عملت في نفسها كدة والثالثة
هي هند عزام ورغم اني واختي ابونا اسمه سيد لكن هند عزام اختنا مفاجاة ليكم صح لكن هقول اية الله يسامحها امنا دلال اللي بسبب الحرام اللي عملته كانت نهايتنا احنا الثلاثة علي ايد الجن ما تيجوا بقي نقراء باقي حكاية هند ونخلي باقي الاسرار تتكشف في الموسم الثاني من قمر اسود بعنوان
هند عزام
كتابة واقتباس
محمد منصور **منص**
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
فاكرين حنان الممرضة اللي قاعدة تسمع ل حكاية هند عزام اللي جت لهم المستشفي وهي محروقة حروق من الدرجة الرابعة وبين الحياة والموت وكانت حنان بتسمع لهند وهي بتقول
والعمارة اتهدت بكل اللي فيها وماحدش طلع من تحت الانقاض غيري انا وكان مكتوب علي ذراعي اسمي وكأن في حد قاصد يعرف كل اللي يلاقيني بان دة اسمي ومش مسموح يكون ليا اي اسم تاني
حنان
وبعدين اية اللي حصل
هنا برقت هند اوي وبصت لسقف الاوضة وقالت
اية جاي تخلص عليه علشان ما كملش حكايتي
بصت حنان ما كان ما كانت بتبص هند ولقت السقف فاضي فقالت
انتي بتكلمي مين
لكنها شافت هند بتصرخ وعيونها بتموت من الفزع ولحم جسمها المحروق بينزل مادة لونها اخضر واترسم علي جبينها رسمة ل قمر اسود خرجت جري تنادي الدكتور شهاب الدكتور اللي بيعالج هند وعقبال ما رجعت هي والدكتور هند حصلها نفس اللي حصل قبل كدة كل المؤشرات الحيوية ليها توقفت والاجهزة كلها اشارت الي انها ماتت فقرب منها شهاب وبدا يكشف عليها وبعدها بص ل حنان وقال
القلب نبضة ضعيف جدا لكن لسة شغال انا هديها دواء ينشط القلب وخليها علي الاجهزة وتكون تحت ملحظتك
وفعلا عمل الدكتور كدة وخرج من الاوضة وحنان فضلت باصة ل هند اللي حالتها فضلت زي ما هي وهنا تسمع حنان صوت خبط علي باب الاوضة فقالت
ادخل
لكن الخبط فضل شغال وبيزيد وما حدش بيدخل بصت حنان للباب وبدات تقلق وقامت وراحت ناحية الباب وهي متوترة وبمجرد ما مسكت مقبض الباب سمعت صوت عزة اختها جاي من وراها وهي بتقول
حنان ابعدي عنها دي ملعونه ومش عارفة انتي ازاي ناسية اللي عملته فيا
حنان
عزة
ولفت وبصت ناحية مصدر الصوت لقت عزة اختها بفستان الفرح غرقان دم واقفة علي حافة الشباك وفي ظل اسود ل ست ماسكة مقص وبتقص خصلة شعر من راس عزة وبعدها عيطت عزة وحنان بتقرب منها مش مصدقة اللي شافته وقالت عزة
هاتي حقي منها هي واللي خلتها تعمل فيا كدة
حنان لسة بتقرب وبتقول
هي مين
عزة
هما اثنين واحدة عملت لي عمل بالموت والتانية ربطت العمل بالقمر الاسود
حنان
مين هما دول
لكن الظل الاسود زق عزة خلاها تقع من الشباك جريت حنان ناحية الشباك وهي بتصرخ وبتقول
عزة
وبصت شافت اختها بتتخبط بالاسفلت وجسمها كله بيتكسر صرخت باعلي صوتها وهنا فتحت عيونها لقت ممرضة زميلتها واسمها اميرة بتهزها وبتقول
حنان اصحي
حنان بصت لها وفضلت تبص حوالين منها ودقات قلبها سريعه واميرة بتقول
انتي كنتي بتحلمي بكابوس ولا اية
بصت لها حنان وماردتش وبصت ناحية الشباك وشافت عليه بقع دم نازلة لغاية الارض وفي اخر بقع الدم خصلة شعر اختها عزة قامت حنان من مكانها وراحت ناحية خصلة الشعر ومسكتها وبصت لها وهي مفزوعه وفضلت باصة لها وهنا اميرة قالت
بتاعت مين خصلة الشعر دي
حنان بصت لها وسكتت وقالت في سرها
مين قصت لك شعرك ومين خلتها تعمل كدة انا لازم اعرف واجيب حقك يا عزة ،،،،،،،،،،،،
ومن جوة شقة حنان كانت حنان بتحط الاكل ل ولادها وجوزها نسيم وقعدت ولكنها ما كانتش بتاكل وعماله تفكر في اللي حصل لاحظ نسيم الحالة اللي فيها مراته فقال
مالك
بصت له وقالت
مافيش
نسيم
طيب ما تاكلي
حنان
هاكل اهو
وبدات تاكل ولكنها افتكرت عزة اختها العروسة اللي رمت نفسها في اول ليلة من جوزها وغضب عنها عيونها خانتها ودموعها نزلت نسيم قام وراح قعد جنب منها وخدها في حضنه وقال
في اية يا حنان حد ضايقك في الشغل
حنان وهي لسة بتعيط
انا اسفة بس افتكرت اختي
نسيم
عزة الله يرحمها لكن دة عدي سنة وزيادة علي موتها اية اللي حصل تاني يخليكي تعيطي بحرقة كدة
حنان
في حد عملها عمل وبسبب العمل دة ماتت
نسيم
حد مين ولية يعمل فيها كدة وانتي عرفتي ازاي اصلا
حنان
هي اللي قالت لي وطلبت مني اجيب لها حقها
نسيم بص لها باستغراب شديد وقال
انتي حلمتي بيها ولا اية
حنان بصت له وهزت دماغها يان دة حصل فقال
حنان انا مش عايزك تسيبي نفسك للكلام دة والتخاريف
حنان
انا مش سايبه نفسي لحاجة وانا مش بخرف
نسيم
دة بامارة انك ما كلتيش وكنتي عماله تفكري في اللي قالته اختك مش كدة
حنان
نسيم انا كويسة
نسيم
ما فتكرش
وسابها ومشي وحنان فضلت باصة له وهو بيبعد وقالت في سرها
كنت ناقصة زعلك انت كمان ،،،،،،،،
وبعدها بيومين تفوق هند مع اذان العصر وتسال اميرة الممرضة اللي كانت عندها في الاوضة وقالت
فين حنان
اميرة
بتيجي بالليل
هند
ممكن تتصلي بيها وتعرفيها اني محتاجها
اميرة
بس دي لسة ماشية من تلت ساعات
هند
قولها تيجي وانا هقولها علي اسم اللي عملت ل اختها العمل اللي بسببه ماتت
اميرة باهتمام شديد
انتي بتقولي اية
هند
ما فيش وقت لازم تيجي وتعرف الحقيقية علشان تحرقة
اميرة
هو مين
هند
صاحب الدم الزفر
اميرة
انا مش فاهمة حاجة
هند
ومش هتفهمي علشان دي حكاية تخص تلت اخوات بنات اصغرهم هي اكبرهم
اميرة فضلت مصدومة وهند بتقول
اتصلي وخليها تيجي
اميرة طلعت الموبيل بتاعها واتصلت ب حنان اللي كانت نايمة وفضلت تتصل اكتر من مرة لغاية ما الموبيل اتفتح ورد نسيم وقال
الو
اميرة
استاذ نسيم جوز حنان صح
نسيم
ايوة انا انتي اميرة زميلة حنان في الشغل صح
اميرة
ايوة انا ممكن بعد اذنك تديني حنان
نسيم
حنان نايمة
اميرة
صحيها علشان في موضوع خطير
نسيم
خير ان شاء
اميرة
في مريضة هنا عايزها ضروري
نسيم
هخش احاول اصحيها
ودخل نسيم للاوضة علشان يلاقي حنان قاعدة في وسط السرير وبدخل خصلة الشعر في بوقها وكانت بتبص لسقف الاوضة وبدات تتخنق ورائحة الموت بتفوح في الاوضة ،،،،،،،،،
