رواية خلخال مشوه الفصل الواحد والعشرون 21 بقلم زمرده

 


 

رواية خلخال مشوه الفصل الواحد والعشرون بقلم زمرده




لگيت الدنيا بس أنت الصدگ بيها
ولگيت الگمره زفة ليل وعيونك تراچيها

°هيوفة°

حرت شأسوي وانا اشوف الدم التارس وجهه لو الترابه العادمه لون هدومة ،مشيتله متخردله وگفت گباله اسأل بي شصاير وهو ولا يمي صاح لغاية تجيبله ماي وانا واگفه گباله بس اريدن اعارف شصاير

عليت صوتي متنرفزه
_ ليث مو احجي وياك ؟

اخذ الگلاص من ايد غاية ،شرب الماي ومبين فحطان وكاتله العطش ،اطاها الگلاص فارغ وباوعلي
ليث : شنو ؟

_ يا شنو ليث ،شبيك ،شصاير وياك ؟

ليث : تضاربت

_ جا ما اعارف ،بس ويامن ؟

ليث : وي واحد سطگ ونگس ،وطايح حظ ،لو كاسرله ايده هم ما يرتاح گلبي

_ ياااا

ليث : جوعان ،شمسويات عشه ؟

_ خاب حاجيني ويامن ،وي بيت غازي مو ؟

تحرك يريد يطلع من المطبخ ،ومن وصل يم الباب اندرلي
ليث : مو وي بيت غازي ،هيج واحد لاگيته بدربي وانا راد من الگيعان

ضليت حايره وانا اباوعله وهو يطلع من المطبخ إلى أن اختفى من گدام عيني ،مشيت اشوفن الچدر وكل فكري يمه ،انداريت على صوت غاية وراي

غاية : شفتي حالة ،ليگول ملاگي عدوه ومتعارك وياه

وانا كلي حيره گتلها
_ ما اعارف ،شفتي ما اطه لزمه ،ولا اطاني درب افتهم شي

غاية : انا ماتدخلت لان اعارف ما راح يحجي

_ صاير يضمضم ولا چن ليث القديم ،احسن بي متغير لو اكو شي مغيره

غاية : انا هم هيج احسن

گلبت المحروگ اصبعة وانا حايرة وكل فكري يمة وما گدرت اضلن بلايه ما امشيله ،گلت لغاية تضل بالمطبخ وانا مشيت للصالة ،بس طبيت شفته گاعد ومبين هستوه طالع من الحمام لان شعره
مبلل ولازگ بالصوبة ،وباله ولا عده ،صافن ما اعارف بشني حتى من وگفت گباله ما حس بي ابد والا من صحت بأسمة اكثر من مرتين يلا رفع رأسة وباوعلي عاگد الحجاب

ليث : شني ،شتردين ؟

غضة : خايب المملوح بالك وين چنك واحد عاشگ

ما رضى على حجيها ،نتر
ليث : شني جده ؟

غضة : جا شلعت گلب الريشة ،تحاجيك وبالك مو يمك حتى ما تسمع

ليث : افكر بالحصاد

غضة : جا شني من هسه تفكر ،بعد وكت .

ليث : ما تعارفيني جده اهمن بيهن
وانا اعارف هل مرة حصادنة مو قوي

غضة : يا أسم الله ليش ولك ؟

ليث : ما اعارف جده عقلي واگف

غضة : جا شنسوي هذا رزق ،وكل بشر ما ياخذ غير رزقة وهل مرة يجوز مكتوب النه حصانده مو قوي

ليث : جا وتعبي

غضة : شتسوي ،تعوض بالسنة الجاية

هز رأسة ب أي ،وطلعت امي من الغرفة
ومبين ما شايفتة لان بس باوعت بوجهه
نشغت
زهرة : شبي خدك ؟

باوعلي وچن بنضرته يريدني ما احجي،ومبين لا امي ولا جده شايفات حاله گبل شوي
ليث : هيج تعورت بالكرك وعدت

زهرة : ياا يااا ،ولك خدك محفور غير تنتبه

ليث : صارت بعد

وانا من دونهن ما عبرت علي ،ليث كلش زين اعارفه لو راد يچذبله چذبه ،ومبين مو هذا الصدگ الجاي يحجي واكو شي ورا جرحه وحاله وبالاخص صفنته

مشيت اردن للمطبخ ،لگيت غاية تحظر بالصينيه
تعاونت وياها وبس خلصنه تگابلنه شلناها ،حطيناها بالگاع وانداريت عليه
_ يلا ليث تعال اكل .

ليث : اكلوا بالعافية

طبگت حواجبي مستغربة
_ جا مو گلت جوعان ؟

ليث : ما اشتهي ،من اريدن اگلج

ما لحيت عليه وهو مشى يصعد فوگ وانا گعدت اكل بس فلا مرتاحة عليه واحس اللگمه ما تنبلع عدي وانا ما مرتاح بالي من حالة الغريب الأول مره اشوفنه بي!

بس خلصنه عشا خليت غاية تغسل المواعين وانا صعدت فوگ لغرفة صخر
اجيبن دشداشته حتى اكويها لان هسه الا تذكرتها

طبيت وانا اشغل الضوه ،باوعت للغرفة مرتبة تلمع لمع ولا چن العايش بيها رجال ،بكلشي بيها مهتهم يرتب لان ما يحب يگعد بمكان فوضوي ابد وهاي طبيعتة من زمان من وعيت على الدنيا وانا اشوفنه يموت على الترتيب وعده مهم كلش ...

طلعت الدشداشة من الكنتور ونداريت اريدن اطلع بس وگفت من شفت دفتره الطول عمري اتمنى يطيح بأيدي ،باوعتله وانا گبل لا افتحه صابتني رهبه من المكتوب بيه ،كضيته بأيدي لونه اسود مثل لون عيون أخوي ،والمكتوب بيه خلاني احيرن وين اضم دموعي

فتحت أول ورقة وانا اباوع بيها ،چن مو حروف مكتوبة لا چنهن مرسومات رسم
"يخص التي لم تبادلني ما في روحي لها "
"من أجل التي بترت أجنحتي بكلمة "

ومكتوب بشكل كلش واضح كلش ومخطوط خط
"لا"

گلبت الورقة وانا احسن گلبي طايح بالدفتر ،غمضت عيوني ورديت فتحتهن من شفت التاريخ نفسه تاريخ يوم خطوبتها ،نفسه اليوم الشفته بي منتهي وما أحد بيهم يعارف شبي ،نفسه اليوم الأول مره بي
أخوي ضعف ومن رد وگف على حيله زاد قساوه فوگ قساوته

بلعت ريگي وانا اعيدن المكتوب
/. / الالفينات
"اليوم انا واحلامي معها وكل تخيلاتي اصبحت
لا فائده
فقد لمع خاتم غيري في أصبعها وأصبحت حلالا لمن لم يحلم بها"

ضليت اگلب وانا اشوفن كلشي كاتب ،اول جيته اول مره شافهم سوه ،يوم عقد المحكمة ،يوم جهازها
يوم حنتها ،چان طالع من البيت أخوي بس مبين من راد كاتب انا اتذكر كلش زين من رد ورا ما خلصت الحنه جانت ببيتنه

صح الصار عدت عليه سنين هواي بس انا كلش زين اتذكره

أتذكر من چنت بالمطبخ وسمعت صوته يصيحني
لان عرف بي موجوده
صخر : هيوفة خوية .

صحت للبنات يوخرن وانا فتحت الباب ماده بس راسي واباوعله العيون مگلوبات دم
صخر : سويلي درب اريدن اطب .

هزيت رأسي ب أي وگلت للبنات يتسترن ،ما ضل أحد غير بس احنه كلها طشت ،فتحتله الباب ومشى وراي بس هو صعد الدرج وانا ضليت اباوعله

رديت گعدت وكل فكري يمة ،ما چنت كلش چبيرة يطلع عمري بالسطعش سنة لو اقل بس انا كلش زين چنت واعية واعارف شحاله بهل وكت ..! !

بدلت بدلتها بثوب ولبست حجابها لان جدي وعمامي والولد كلهم راح يطبون يودعون أول وحده تطلع من البيت أول بت عدهم تتزوج مشيت انا اللبس
حجابي ومن رديت طلعت من الغرفة طبوا هم ،وهي گامت بساع تطگطگ بأصابعها متوترا

صاحها جدي مشتله ،باسها جدي من رأسها يوصيها لو شما صار وياها هو بظهرها ،وعمامي واحد واحد سلموا عليها والولد من بعيد حجوا وياها متمنيلها الخير واخوانها واگفين بصفها كل واحد من جهه وحلالي الچان مو حلالي كلساع لامها الصدره يبوسها چنه راح يفارگ قطعه من روحه

وخرها وباوع الامي يسألها
ضيرم : جا وين صخر ،گال ماشي للبيت ؟

زهرة : أي فوگ

باوعلي جدي وگبل لا يحجي توقعت الراح يگولة
رأجس : امشي هيوفة صيحي أخيج

وانا لو بيدي احجي واگولن وين اصيحه ،شلون اگله انزل وانا اعارف البگلبه شني
اعارف أخوي هسه حاله لا يسر عدو ولا صديق .! !

دگيت الباب عليه وانا كل حيرة الدنيا بي ،شلون ارتب الحجاية واگله انزل وهي جوه ،ما عدي هل جرئه والله

فتحلي الباب والقلم بأيده ،باوعلي وبعيونة سألني شتردين
_ جدي يگول انزل

صفن بوجهي وكلمة وحده ما حجة ،هز رأسه ورد طب للغرفة وانا نزلت ،ولنص الدرج وسمعت صوت وراي ،انداريت لگيته هو ،كملت دربي بس انا مثل ثگل الموقف الراح يتخله بي تمنيت روحي كلشي
ما اعارف ابد چان ما هسة هيج كاتلني القهر ..! !

أنا بس نزلت مشيت يم ميمنة الواگفه تباوع، عيونها وين ما انا جاي اباوع ،بس شافة جدي صاحة
رأجس : شني صخر ما تودع بت عمك ،اليوم أخر يوم ريحانة عدنه

وهي بس سمعت جدي هيج گال رفعت رأسها باوعتله ودارت وجهه بساع علينه انا وميمنة

تنفست حايرة احسن بروحي راح اموت بمكاني من القهر ،وهو بكل هدوء عكس طبيعتة گال

صخر :مودعة ب الله بت عمي ،ولا تنسين عدج اهل يكسرون اليكسرج لو بحجاية

حرف حرف انا ركزت بيهن وفلا نسيت منهن حتى نبرة صوته بهل وكت وچم مرة بلع ريگه
وهو يحجي ابد ما نسيت شلون بساع طلع وما ضل من شاف الولد طلعوا واخذها حجه

ويوم العرس الما تنحجي سالفتة ،اليوم البي أخوي ما كاتب غير بس جملة وحدة بالگوه تنقري على گد
ما چان الخط مكسر ومو مفهوم
"هلبت يلفني الچفن ال بلون بدلتها"

بلعت ريگي وانا اگعد واباوع واحجي وي روحي
_ سوده علي ،ريت من عمري على عمرك يابعد
روح أختك

باوعت على التاريخ الكاتبة ببداية الورقة وتذكرت الليلة الگشرة البيها لوما ملحگيلة چان راح من
ايدنه ،الليلة الضربته بيها چلطة وخلت فرحنة ينگلب رعب ،وكل هذا ما احد لاحضه ،كل هذا وگالوا لان اتعارك بالعرس وصار عصبي لان رموا وهو
يخاف لا تطيح چيله بجاهل لو احد ثاني ،بس كلهم ما جانوا يعارفون هاي حجه حتى يفرغ البگلبه ..! !

أنا لوما فاتحة الدفتر احسلي ،اريدن عيوني تكف بچي ماكو ،اريدن بس الخنگة تروح مني ،لزگت

فركت صدري حتى بس ارد اتنفس عدل ،بس فزيت أنا احسن بگلبي طاح من انفتح الباب والزادها علي
شوفته گدامي ،گمت والدفتر طاح من ايدي على گد ما ترجف صارت

باوع للدفتر الطاح ،ورد باوعلي باهت ،حجاية وحده ما حجه وما سوه شي غير بس أشرلي اطلعي ،اخذت الدشداشة وطلعت الطم وارزل بروحي،موقف اضرب من موقف ،وكلساع جاي ازيدن الطين
بله شلون افتهمني هسه وشگله وبيا عين أصلا اجي احاجيه وانا ماده ايدي على شي من خصوصياته ..!

نزلت وانا اصفن ،شغلت الاوتي اكوي بالشداشة وبالي ولا يمي ،كون هسه اصعد اشمر روحي من الدرج على المصايب الصارت وياي اليوم

خلصت الدشداشة واطيتها بأيد جفون ودتها وانا لفيت راسي ونمت لان لو اضلن گاعده اموت روحي من التفكير

ثاني يوم گعدت على صوت هوسة وصياح بره ما عولت اوصل للباب حتى اشوفن شكو وشني الصاير وبس طلعت صار بوجهي صخر ،عدلت حجابي من شفت برهان هم

صخر : خرب ببليسك ليش خليتنه نرد ،لو مخليني نازله اطيح حظ حظه

يفتر من عصبيتة حاير شيسوي
برهان : تريد اخليك تنزله وانا اعارف لو طاح بأيدك ما تهده اذا ما تشوفة جثة

صخر : جااا شتريد ،احبنه من رأسه لان شخط سيارتي واگله عاشت ايدك

برهان : نصير احسن منه ،هو غبي من سوه هيج
ما يعارف هاي ينحگون بيها

صخر : خرب لشتك ،لك كووون ادوس ببطنك أنت

ضل يفتر فايره روحه ومن حرگة گلبة كلساع وساب برهان ،طب جدي من برة يباوعله وي ما صخر گال

صخر : خرررب اهلك

رأجس : استلمتنه مسبة ،وساكتلك انا

صخر : جا أنت ترضاها ،ترضى قفل السيارة علي ما خلاني انزل اطيح حظ حظه

اندار جدي على برهان خازره
رأجس : جا ليش ما خليته ينزله ؟

برهان : جدي ما تعارفة ،ما تعارف صخر لو طايح بايده واحد ما يهده غير ميت

باوعله جدي بين المقتنع بكلامه وبين الما راضي لان ما ردها اله ،مشيت غسلت وجهي وكملت دربي للمطبخ ،لگيت امي واگفه تخدر جاي ،صبحت عليها

وسألتها
_ يمة عدنه خبز ؟

زهرة : لا والله ،متانين ميمنة تدزلنه

_ لو مگعدتني انا خابزة

زهرة : لا يمة شني ،هستونه گلنه يا الله و وگفتي على رجلج

_ جا يمة الخبز شيسويلي ،حاله حال غسل المواعين هم وگفه

زهرة : جا خوش اخبزي للغده ،بس لا تعچنين هواي

_ صار

شوي وسمعت صوت الباب انفتح ،جان عبد الحق
طب للمطبخ بأيدة گرصات الخبز

عبد الحق : صباح الخير ،شلونج عمة ؟

زهرة : الحمدلله بعد عمتك

عبد الحق : هذا الخبز ودته ميمنة الكم

اخذتهن من ايده وهي تحجي
زهرة : الله يسلم ايدها على هل خبزات الترد الروح

عبد الحق : بالعافية ،رايدين شي ؟

انداريت على صوته من طب للمطبخ
ليث : تعال لك وين ماشي

عبد الحق : لك بعينك ،شو ما تحترم مو اكبر منك ؟

ليث : خاب دمشي كلهن چم يوم

عبد الحق : جا ما سامع المثل اليگول

ليث : لا والله ما سامع

عبد الحق : عمة نسيت ،شني هذا المثل مال اكبر منك بيوم ؟

أبتسمت أمي
زهرة : أكبر منك بيوم اعقل منك بسنة

ليث : يعني أنت اعقل مني ؟

عبد الحق : أي

ليث : والله انا ما اشوفن هيج

عبد الحق : شقصدك ؟

أبتسم
ليث : ما قصدي شي ،تجي تتريگ ويانة ؟

عبد الحق : لا ميمنة محظرة الريوگ وانا ما افوت المخلمة التسويها

ليث : شهيتني بالمخلمة

عبد الحق : امشي اكل ويانة

ليث : لا زحمة

عبد الحق : خاب دمشي يا زحمة

باوعلنه انا وامي يشوفنه ما معارضات لان راح
يمشي ويهد ريوگنة وامي تعارف أخوي ما يحب يسكر بخاطرنه

زهرة : امشي يمة لا تضل بنفسك مخلمة ميمنة

أبتسم وباوع ل عبد الحق
ليث : جا امشينة

طلعوا واحنه بس كملنه الريوگ انا حطيتلي معجنه وگعدت يم سطل الطحين انخل واحجي وي چفون الهستوها گاعده

_ باعي القوري مليان حمي وطلعيلج چبن واكلي لا تضلين بلايه اكل وراج قراية

جفون : هسه

_ لا تخلصيها علي هسه وهسه وتضلين كاتلج الجوع

جفون : خايبة ما احبن الريوگ اذا مو من ايدج

نزلت المنخل من ايدي وگمت شغلت النار جوه قوري الجاي ورديت گعدت
_ بس يحمه الجاي صبي واگعدي اكلي

هزت رأسها ب أي وانا بس كملت جبت الماي وگعدت اعجن وبس خلصت مشيت غسلت ايدي بساع ومشيت الامي من سمعتها تصيحني ،بس شافتني گالت

زهرة : حظري روحج ،نمشي نودي القماشات ل أم أحمد

_ خوش

حظرت روحي بساع وطلعت من الغرفة ،أمي محظره روحها وحاطه علاگة القماشات گدامها بس شافتني گامت وگفت تلبس عباتها

أجتي من المطبخ اللگمة بحلگها تلوج وتحجي
جفون : اخذني وياچن عليچن الله

زهرة : امشي اللبسي عباتج بساع هم حتى اخليها تخيطلج ثوب جديد

صفگت بأيدها
جفون : فدوووه لليفكر بي

أبتسمت أمي
زهرة : جا شلون غير اريدنج تكشخين

جفون : تعاااي ابووووسنج

ضحكت اهز بأيدي من اجت جرت وجه أمي حيل وباستها بوسة أم الطگه من الدرجه الاولى وركضت للغرفة لبست حجابها وعباتها وردت

وامي تصيح عليها
زهرة : خايبة لا تركضين هسه تطيحين

جفون : ما علي شي عمة ،لا تخافين

طگتها خفيف على رأسها
زهرة : انا چم مرة گايله گليلي يمة

ضحكت وهزت رأسها ب أي
جفون : صار يمة صار ،بعد أمر خدمة

زهرة : لا ،يلا امشن

مشت واحنه طلعنه وراها ومن امي گالتلها هلگد ضال للعرس صفنت
أم احمد : شالحگ يا خية وأنت جايبة كومة قماشات

زهرة : والله ما اعارف تعارفين چدهم لو قرر بعد ما بأيدنه نحجي

أم احمد : خية شني سالفتة دومة مستعجل

زهرة : اذا ما يركضنه ما يرتاح حتى الخطوبة خلانة نحير بزمانة

أم احمد : انا راح ابدي بيهن من باچر بلكت الله والحگ

زهرة : فدوه الگلبج راح نتعبج

أم احمد : لا عيوني تدللين

زهرة : وهم اريدنج تخيطين لجفون وغاية بغير وكت

أم احمد : جايبتلها قماش لو انا اگصلها ؟

زهرة : گصيلها أنت

باوعت لجفون تسألها
أم احمد : يا لون قماش تردين وشني الفصال البراسج ؟

جفون : اريدن لون ازرگ وردناته بيض وهيج كون مخصر من الصدر

أبتسمت
أم احمد : دوم تطلعيلي بخياط جديد

ضلينه يمها بالنص ساعة وردينا ،انا بوجهي مشيت اشوفن العچين من لگيته شايل روحه مشيت
أحظر التنور ،حطيت الحطب بي وشعلته وبين ما يهفت مشيت شنگت ورديت

تلثمت وانا اباوع للنار بادية تهفت ،صار هواي ما خابزة واحسن حتى العجينه بالگوات تنفر بأيدي

وگبل لا اخلص بشوي طب ليث مستعجل ،بس من شافني أبتسم واجه علي ،وگف گبالي
ليث : خاااب فدوه للتخبز ،عمي صار هواي ما مشتعل التنور

ضحكت أفر بالخبزة ،وهو اخذله گرصة حاره يباوع بيها
ليث : تنباس وتنحط على الراس خبزاتج

طبيت الخبزة بالتنور وانداريتله ،نزلت اللثام وهو گسم من الخبزة ياكل
ليث : شلون خبز طيب

_ خاب سويتلي واهس اخبز حتى لبيت غازي

ضحك بس ما چنها ضحكة ليث هيج الصوتها يرن بالبيت ،احسن بضحكته باهته كلش ،مشى يطب
جوه وانا بس خلصت خبزاتي شلتهن وطبيت وراه

°حواري°

گاعده افرك برجليها مورمات كلش ،مرجعة ضهرها على الحايط و وراها المخده

ريحانة : راح اموتن من الوجع والله

بصائر : ما ضل شي وتخلصين وكلشي يصير سوالف

ريحانة : شوكت مو روحي خلصت

بصائر : گولي يا الله وتهون ،مو دوم هيج تگليلي ؟

هزت رأسها ب أي
ريحانة : تعبت والله حاطه گلبي بشيشة ،اخافن لا بعد هذا التعب ما احصل شي

بصائر : اسم الله شبيج ،مو الدكتورة گالتلج تحتاجين راحة وتصيرين زينة

ريحانة : مو تشوفيني هل گاعده ومنا لهنا ما جاي اتحرك بس مخوفني النبض لان ضعيف

بصائر : يستعدل والله ،بس هذا القلق عوفي على صفحة

ماحجت شي بس ملامحها الخوف مبين عليهن تسكت بس عيونها تشرح قلقها ،گامت بصائر
من سمعت فقار يصيحها ،وانا من تعبت هديت رجلها
وضليت گاعده يمها وهي تغفي ،شوي وتمددت ماكو اقل الربع ساعة وباوعت عليها غافية وانا جبت جنطتي وگعدت اقره وي وجع الرأسي الشبه بديت اتعود عليه

على گعدتي هاي خلصت بالنص فصل من الفيزيه الاحبنها كلش كلش، وعلى گد ما محبتي بيها
قوية ضل راسي يوجعني اليوم كلة مسطورة منها

ثاني يوم الظهر مشيت لبيت جدي ،بس فتحت الباب اطبن صار بوجهي ليث ،باوع وراي ورد باوعلي

ليث : شني محد جابج ؟

هزيت راسي ب أي
ليث : شلون تطلعين وحدج ؟

_ وين ماشية هي منا لهنا

ليث : حتى لو چان خليتي امج تجيبج

بلعت ريگي وانا اشوفون خده وبلايه وعي سألته
_ شبي خدك ؟

حط ايده على نفس المكان المتعور بي
ليث : انضربت بالكرك ،يلا طبي وبعد لا تطلعين وحدج

هزيت راسي ب أي وهو وخر من دربي وانا مشيت وكل بالي يم حجاياته ،هن عاديات بس حتى الوجع نسنياه

أول ما طبيت صارت گدامي جفون تغسل مواعين
وما انتبهت علي الا من گلت
_ شعجب صايرة نادره

فزت وباوعتلي ،وانا مشيت وگفت گبالها
_ هااا شني انخرستي ؟

ضحكت تهز رأسها لا
جفون : بس اشتاقيتلج

فتحت عيوني مصدومة
_ اعتراف قووووي

ضحكت بصوت عالي وسدت البوري ،نشفت ايدها بهدومها
جفون : طگ گلبي احسن يومي ما جاي يخلص لان مگضيته وحدي

_ شني اليوم ،يوم الاعترافات العالمي وانا ما اعارف ؟

جرتني من ايدي
جفون : تعال ضلعي طب

مشيت وياها للصالة ،جده وعمة والبنات گاعدات سلمت عليهن وگعدت
غضة : صايرة ما تجينة

_ مو گبل چم يوم اجيتكم

غضة : چنتي يوميا يمنة

_ كبرت ولازم ابيع ثگل ،زحمة يوميا لابسة عباتي وطالعة

هيوفة : يااا هاي مني التحجي هيج ؟

_ چذب ما كبرت بس مالي خلگ اطلع منوره راسي ما اتحمل

غضة :جا شوكت تمشين للدكتور ؟

_ ما اريدن امشي جده ،والله فلا احبن سوالف المستشفيات

غضة : جا شني تضلين هيج ؟

_ ما اعارف

ضليت گاعده يمهم للعصر رديت للبيت من حسيت بروحي بديت اتعب ،بس طبيت للصالة نزعت عباتي وگعدت على الدرج اباوع عليهم يسولفون

باقر : جا شني شوكت تجيب الغرفة ؟

ضيرم : گبل صخر گالي هو يشتغل غرفتي بس هاي گبل لا اخذ اخته

ضحك أبوي يهز بأيده
باقر : كله منك أنت تعيل بي

ضيرم : اشاقيه بس هو ما يحمل شقه

باقر : جا أنت ما تعارفة يغار

ضيرم : اعارف بس لازم يتقبل انا رجل اخته

رفعت راسي من سمعت صوت شحاطتها ،گمت حتى تنزل ،وگفت واباوع عليها تعدل بشالها ،بس وصلت يمي گالت
بصائر : شعجب رديتي ؟

_ ما اتحملت اضلن هواي

بصائر : عدي شك مبدليج

_ انا هم شاكة

ضحكت ومشت للمطبخ ،اباوعلها مخلية ايدها على الحايط جنها وحده بشهر التاسع مو بأول شهر .! !

مشيت للغرفة اشوفن ريحانة ،بس طبيت لگيتها گاعده والمبايل بايدها ومن حجيها عرفت جاي تحجي وي حمزة

ريحانة : ادري بيك تبهذلت ،بس خل اصيرن زينة واجي والله

گعدت حاطة ايدي على خدي وهي كملت تحجي
ريحانة : حموزتي

ضحكت بصوت عالي وكتمت ضحكتها بأيدها وانا صار عدي فضول اعارف شني الگاله وخلاها هيج تضحك
ريحانة : حموزتي اريدك تجيبلي هدوم لان ما اعارف شجايبة وياي

أبتسمت
ريحانة : خوش ،هلا بيك ياروحي أنت

هزيت ايدي صافنة ،شو هاي صلفة لو كل النسوان هيج يحجن وي زلمهن ؟؟

من خلصت حجي وياه باوعتلي
ريحانة : اگلج شلونهم بيت جدي ؟

_ زينين

ريحانة : شسووا ما سووا ،ما ضل شي للعرس

_ باجر راح يصبغون غرفة صخر ،واليوم البنات يفرغنها ويطلعون الغرفة

ريحانة : وهيوفة ؟

_ جاي تجهزها عمة ،خطية يركضن ركض

ريحانة : وميمنة ؟

_ عمة شيماء بادية تجهزها گبل عمة زهرة ،لان تعارف دگايگ جدي

ريحانة : كون اصيرن زينة منا للعرس

_ أن شاء الله ،بعد وكت تگومين على حيلج

ريحانة : الله يسمع منج

°جفون°

صعدت بساع من سمعتها تصيحني ،طبيت للغرفة وانا اگلها
_ خايبة شبيج خبصتيني

شايلة بأيدها دشدايش الطلعة
غاية : امشي گبلي افتحي باب غرفة ليث

مشيت بساع وهي وراي فتحت الباب وطبيت وهي وراي حطت الدشدايش على الجرباية و وگفت فحطانة تباوعلي
غاية : نجيب كل غراضه وهدومة هنا نحطهن بين ما يخلصون شغل

_ ليث يعارف ؟

غاية : أي گلتله وما حجه ،حتى گال ينام يم نوح هل چم يوم

_ جا خوش

ردينا للغرفة فوگ الساعة احنه نعزل ونحول بغراضة ومن خلصنه انگطع نفسنه ،هلگد عده هدوم ما اعارف شيسوي بيهن ،كنتايره مترسة بس الدايش ترسن چرباية ليث

نزلنه ولاگانه نوح بايده الدرنفيس يفر بي ،بس شافنه گال وهو يباوع لغاية
نوح : هاا خلصتن ؟

غاية : أي ،صيح فقار وياك ما تگدر وحدك

نوح : هو راح يجي وراي

غاية : خوش

صعد هو وشوي واجه فقار صعد وياه ،بس تلاگوا صوت دبچهم وهوساتهم بنص الصاله ،فرحانين اكثر من العرسان والله

ليث : السلام عليكم

ردينا السلام وبلايه ما يحجي صعد فوگ ،غاية سوتلهم عصير برتقال طبيعي وگالت صعدي لان ما تگدر تصعد بعد واليوم خلصتها صاعده ونازلة حتى الفحطة لزگت عدها

أخذت الصنينة منها وصعدت للغرفة گبل لا أطب عدلت حجابي وبس طبيت وشافني ،اجه اخذ الصينية مني بلايه ما يحجي ،هزيت ايدي وأجيت اغمه بس كضيت روحي من شفت ليث يباوع علينا

نزلت جوه وانا ادردم وي روحي
_ الخفيف يريد يصير ثگيل ،والله فلا لايگتلك

مشيت للغرفة اقرالي شوي ،شلون وكت حصرنه بي جدي ،امتحانات وعرس

قريتلي شوي وبس سمعت الضجه بره طلعت وانا اشوفنهم ينزلون الاخشاب فاكيهن يتعونون عليهن

ليث ،عزيز ،فقار ،نوح

من خلصوا گالتلهم عمة
زهرة : اطوها لبيت أم دحام ،تريد تزوج أبنها

ليث : أم دحام اليم بيت ضاري ؟

زهرة : أي هي ،وصتني گبل چم يوم من لاگيتها بالسوگ

ليث : خوش

عزيز : ماشي اجيبن البيكم مال أبوي نسويها دربين بيها

ليث : خوش

عمة طبت وعزيز مشى يجيب السيارة و ورا شوي طب صخر من برة بأيده جگارته
وگف يباوع على الأخشاب الحاطيهن بالحوش

وگف يمة يداهره
ليث : كل ما اشوفنك لازم الجگاره اتخيل راح تحرگنه

باوعله بطرف عينة وگبل الجگاره بصابعه طفاها وشمرها بالگاع وليث يباوعله

هز أيده
ليث : شني ما تحس أنت

صخر : توو

ليث : أي مبين

صخر : خدك وراه سالفة ،وما ارتاح اذا ما اعارفها

ليث : امشي حاجي الكرك هسه هو يحجيها الك

صخر : عبرهن على الودام كلها ،بس أنا لا ،اعارف دروبك شني ومغلس

ليث : جا ضل مغلس

صخر : انا وياك

أبتسم ليث وانا مثل الاطرش بالزفة ،شردت اطبن جوه من لجحوني ما جانوا منتبهين علي واگفه اسمع حجيهم ...

ثاني يوم ،انخبصنه خبص بالصبغ ،صخر كرب على نوح وليث وهو ابد ولا سووه شي بحيث نوح يصعد و ينزل يحجي على صخر

طب بايده الروله مال صبغ جديده ،وگف على الدرج
نوح : الوادم تعرس واحنه نطيح بيها

غضة : خايب جيره بفرگك ،عرس أخيك وذا اشتغلت

نوح : جده أنت واگفتلي مثل الموس بزردومي حسره احجي حجاية

غضة : جا موتتنه من امس بس تلطم

نوح : تعبت جده تعبت

غضة : تعبت من الحجي الله يساعدك

غم روحه وصعد وانا صعدت وراه اشوفن شجاي يسوون ،اول ما طبيت صار بوجهي ليث لازمله روله يصبغ الحايط
ليث : بساعك فكها وابدي وياي ،خل نخلص بساع

فتح الروله و غطها بالصبغ يحجي على فقار ما اجه وياه وهل هو ضايج ،هو وعزيز هم جاي يصبغون غرفة ضيرم

صاح ضايج
ليث : كاافي اسكت راااسي صرعته

نوح : شبيك مطنگر ؟

ليث : تعبان ،ما تعارف شني معنى تعبان ،صار چم مرة تسأل واگلك مسموطين اهلي ما نايم

نوح : فلا اصدگ

ليث : لا تصدگ واشتغل وأنت ساكت لان راح اغطن راسك بسطل الصبغ

نوح : هاي عصبيتك مو مال واحد تعبان ،لا مال واحد ما شايف معشوگته

هد الروله من ايده و وگف ايده على رأسة
ليث : استغفر الله ،استغفرك ربي ،اريدن اعارف ما رايد روحك أنت ؟

نوح : أي والله ما رايدها لان مثلك مضروب بوري

ليث : أنت مضروب بوري عمنك غبي ،انا مو غبي مثلك

نوح : لا لا قهرتني

ليث : خل تصير صدگ ،والله انا اگلها لا تاخذي

نوح : شگد خير

ليث : مثلك اللاحوگ

ضلوا يتناگرون وانا گاعده على الكرسي اباوع عليهم ومن مليت خليت ونزلت ،وهيج الايام بدت تكضي وبدينه امتحانات وبده التعب يتضاعف وبالاكثر على هيوفة وعمة لان احنه نص الشغل اذا مو اكثر جاي نعوفه عليهن وما يدوب نلحگ نقره ..! !

نزلت من السيارة مهدود حيلي ،كتابي بأيدي فتحت الباب وطبيت وانا اباوع للماي جاي يغسلن فراش هيوفة وغاية ،سلمت وگتلهن

_ تردن اعاونچن ؟

هيوفة : لا راح نخلص ،امشي بدلي واكلي وناميلج شوي لان العصر يجوز امي تاخذچن للسوگ

_ جا خوش ماشيه

طبيت جوه لگيت عمه بالمطبخ ،بس شافتني گالت
زهرة : بدلي وتعاي بساع راح أحظر غداج

مشيت ابوسنها واحجي
_ خاااب فدوه اروحلج

فزيت بساع أوخر من سمعت صوته
نوح : جا شو انا محد يروحلي فدوه

ضحكت تگله
زهرة : أنت تغار ؟

نوح : أي والله اغارن

مشيت اطلع من المطبخ واسمعنه وراي يحجي
نوح : شردت

طبيت للغرفة وانا اهفي على وجهي ،بكلامة حسيت جاي يقصدني بس بشكل مو مباشر .! !

أنا ما اريدن افكر حتى ،التفكير يخليني انسطر وما اعارف اگضي يومي شلون ،چبت عمري كله احسبهم اخوتي وما اريدن افكر بشي غير هم اهلي ..! !

بدلت هدومي وطلعت ،لگيت عمة جاي تصبلي بس خلصت اخذت الصينية ومشيت فرشتلي مده زغيره يمهن بس بعيد عن الماي ،اكل واباوع عليهن
اليوم غاية ما عدها امتحان وهل انكربت،بس خلصن تگابلن ينشفن بالحوش وانا اعلس گشور ليمون واباوع عليهن

باوعتلي لامه وجهه
غاية : خاااب كافي الحموضه ضربت معدتي والله

_ منو يمج ؟

غاية : لعبتي نفسي

_ اكل بحلگي لو بحلگج ؟

هيوفة : خايبة صدگ ولج اليوم شفت البزون طابة يم كتاكيتج

فزيت
_ گولي والله

هيوفة : والله وشحتتها

_ يمة

هيوفة : بداية قفصهن لان مو امان

_ اكو قفص فوگ اصعد اجيبنه هسه

هيوفة :أي احسن

شلت الصينية حطيتها على السنك وعمة تباوعلي كل ضنها راح اغسلها ،وانا طلعت اضحك من المطبخ من أيست مني وصاحت

زهرة : اعااارفج ما تغسليهن

صعدت الدرج وانا اضحك ،ومن وصلت لباب السطح جان مفتوح ،طبيت وانا اباوعه نضيف يلمع لمع لان امس نضفناه

مشيت للزاوية المخلين كل الغراض بيها ،ضليت ادور على القفص وانا اغني
_ كتوكتات كتوكتات بيت جديد للكتكوتات

بلعت ريگي وانا اسمع صوته وراي انداريت وانضربت بصدره ،فزيت ورديت ليوره وانا اگله

_ خاب شبيك ؟

مزغر عيونة ويباوعلي
نوح : شبيه ؟

_ انا اسألك ،شني جاي وراي شعدك ؟

نوح : اخوج واذا أجيت وراج ،شني مايصير ؟

زغرت عيوني وانا احسن بحجاياته فخ الي ،حرت شجأوب ،هيج لو هيج الجواب ما مقتنعه بيه ..! !

تقدم يمشي علي يعدم المسافة البيناتنه
نوح : شو سكتي ؟

رديت ليوره وانا احطن ايدي گبالي
_ شبيك نوح ؟

نوح : بي أنت

درت وجهي منه ،ما اريدن انحط بهيج موقف وياه ما اريدن تخرب صورتهم بعيني

نوح : جفون ،شحمتي .

بساع رديت انداريتله وانا فاتحة عيوني مصدومة

هذا شجاي يحجي ؟؟

نوح : ما تحسين ،لشوكت تضلين بلايه احساس ؟

عگدت حاجبي وهو مسح وجهه ورد باوعلي عينه بعيني
نوح : مليت ،منج مليت ،كلشي جاي اسويه ما تشوفي بعينج ،كل فعل مني تفسري بس حسب التردي أنت

_ شبيك نوح ؟

نوح : كافي تگولين شبيك وأنت اكثر وحده لو حجيتلها ما راح تفتهمني ،ايام صار وانا ما حاجي وياج وأنت عدج عادي انا والحايط سوه

_ ليش يعني شسويلك

صفگ ايد بأيد وضحك
نوح : هذا انا الاقصده ،امشي انزلي

_ عقلك

خرزني
نوح : شبي

_ احم مابي شي

وخرت من گدامه ومشيت انزل وانا ادردم وي روحي والله خوفني فلك ولا يوم خايفة منه بس هسه احسن يريد يرتكب بي جريمة ،حسيتة مو نوح عبالك واحد ثاني گبالي ..! !

بس نزلت صارت گدامي جده واگفه تباوع للدرج من شافتني نزلت رفعت عوجتها
غضة : وين چنتي ولج ؟

_ فوگ جده ،مشيت اجيبن قفص للكتاكيت

غضة : جا وينة القفص ؟

_ ما لگيته

ما حجت شي بس مبين عبالك ما مقتنعه ،كملت دربي للمطبخ وانا احسن بكل ذرة بجسمي ترجف الموقف الانحطيت بي خلاني احيرن بزماني
واليوم كله خلصته اصفن وما اعارف ساسي من راسي

العصر حظرنه روحنه ومشنى للسوگ ،انا وغاية
وعمة زهرة و ويانة اجت عمة شمياء وبركة وميمنة
افترينه السوگ فر ما خلينه محل يعتب علينا ،كلهن اشترن وانا ضليت اصفن على الهدوم واحسن ماكو شي يعجبني

جرتني توگفني گبال فستان سمائي يخبل وبالصدر شلون الورد الأبيض ناعم
غاية : شوفي هذا يخبل يطلع عليج

_ كلش حلووو

غاية : يعني عجبج ؟

ميمنة : عليج الله حتى لو ما عاجبج اخذي ،طاحت رجليه من الفره

أبتسمت
_ اريدن اشوف بعد ،خاف اكو احلى

زهرة : خايبة امشي نرد وانا صوجي جبتج مشترتلج انا احسلي

ضحكت و جريت ايدي منها
_ هذا حلو اريدنه

شيماء : يا رحمة الله

بركة : والله وي بياضج راح يطلع يخبل

هزيت رأسي ب أي ،وعمة حاجت أبو المحل عليه
گال
_ سعره ستين الف

غاية : هلا عيني على راسها ريشة تلبس فستان بستين الف

حزرتها عمة لان مبين أبو المحل سمعها لان ضل يباوعلها مبتسم وهي ولا يمها تحجي
غاية : انا فستاني بأربعين ورموش بستين عود
ليش

شمياء : خايبة بس اسكتي انا اشيلن العشرين مني بس خل نرد گطعت گلوبنه

_ هااا عمة شو اختلفتي علي

شمياء : خايبة اشتري وخل نرد

هزيت رأسي ب أي وباوعت لعمة وهي افتهمت اريدنه حاجت أبو المحل عليه والصدفة طلع أخر قطعة وقياسي ،حطه النه بعلاگة واخذته وطلعنه ،مريت اشتريت حذاء ترهم وياه وردينه وعمه گالت غير
يوم تجيبني اجي اشتري فستان ثاني للعرس لان انا ماعدي فستان مستور مال زفة

ردينا للبيت احنه بسيارة صخر وعمة شيماء وي برهان ،بس طبيت للبيت گبل السلام فتحت العلاگة وانا اشوف فستاني لجده وهيوفة

_ باعن ،حلووو ؟

هيوفة : يخبل ولج

_ والله

غضة : لو تتصلخين احسن

ضحكت اباوع للفستان ،لان مابي ردانات هيج حجت
_ جده هذا للحنه

غضة : جا حتى لو للحنه نتصلخ

_ أي جده انا اتصلخ ،تغارين مني مو لان جسمي حلو ؟

غضة : فلك انا اغارن منج ؟

_ أي جده تغارين

غضة : خايبة مو اگوملج

ضحكت وضميت الفستان بالعلاگة وطلعت الكعب
هيوفة : خااايبة يخبلن راح تطلعين تشگين شگ

أبتسمت وانا أغطي وجهي ،اخذت الغراض ومشيت اوديهن للغرفة من بسطت غاية تشوفهن هدومها وانا
ما عولت يجي الليل والفن راسي اشحن طاقة بما أن باجر جمعة وما عدي امتحان

گعدت الصبح على صوت الترگع ،گمت وانا اتردم بالحايطين ،فركت عيوني
وانا اباوع الولد جاي يصعدون غرفة الأخشاب مال صخر

نسيت روحي بلاية حجاب ولوما خزرة نوح فلا چان فگدت روحي وطگيتها ركضه للغرفة ،طبيت ادگ واللطم كلهم هنا بس هم زين ما شافوني والله عيب شبي صايرة من اگعد انسه حجابي مثل حواري

لبست شالي وطلعت وانا ما الي وجه احط عيني بعين نوح ،طبيت للمطبخ وانا اتحرك بكسل الدنيا
كله چن جنت بالحصاد لو اشتغل بالگيعان وي ليث

تريگت وانا اباوع لقفص زقزوقاتي الكبرانات وصايرات يطيرن ملن القفص وصوتهن تارس البيت ابد ولا يسكتن ...

°حواري°

صعدت فوگ اباوع لغرفة الأخشاب مال ضيرم
تخبل شكلها كلش حلو ومرتب وتصميمها ابد
مو هوسة

غمضت عيوني وانا اتخايل شي وراي ،فتحت بساع من حسيت حركة صارت على چتفي
والزاد خوفي وخلاني انزل ركض من انداريت وشفت ماكو شي أصلا

ركضت للمطبخ ادور امي وبس شفتها شمرت روحي بحضنها احجيلها
_ يمة يمة چني والله بالغرفة مال ضيرم ،انا حسيت بيه والله حسيت حتى لزم اچتافي

لمتني الحضنها وانا احس بروحي تطلع كل ما تردد
نجوى : سلام قولا من الرب الرحيم ،اللهم صل على محمد وآل محمد

لزمت رگبتي وانا احس مثل الحبل يلتف عليها ويخنگني ،احس شوي شوي روحي تطلع مني إلى أن بعد ما حسيت بشي ،ما حسيت غير بس بأصوات عالية وراجديات على وجهي ،نزلت دموعي وانا مغمضة احسن بجسمي كله تخشب بس رديت تذكرت الحسيت بيه ..! !

ضيرم : حواري ،خوية ،افتحي عينج ،حاجيني ولج

فتحت عيوني ملينات دموع ،باوعتله وانا أخذ النفس بالگوات وهو يمسح على شعري وصوته بره يصيحه

عبد الحق : خايب ضيرم شصااااير ،ولك شكو شبيكم

گام يحاجية وانا بين ايد امي روحي رايحة ،ما جاي حتى اگدر اسمع شيحجون وياي و ولا احسن
بروحي وياهم ،كل الاعارفه جسد بس وروحي ما اعارف وينها هسه ،ايدي بالگوات احركها وارفع شعري النازل على وجهي

رديت غمضت اريدن وجع راسي يخف ،الوجع الما صدگت بس اخلص منه

گمت على حيلي اسند روحي عليه من طب يگومني
ويحجي وياي
ضيرم : اخذنج للدكتور وما اريدن اسمع كلمة لا لو ما اريد

ما حجيت لان صدگ انا هسه احسن صدگ بعازة الدكتور طببني للغرفة واندار
لبصائر وريحانة الواگفات يرجفن يحجي وياهن

ضيرم : بدلن الها حتى اخذها ما ضل وكت

طلع واجت ريحانة يمي ترجف حلگها صاير ابيض وبصائر مو اقل من حالها

گعدت وراي تلم بشعري وتحجي
ريحانة : انا والله احسن الشغله ابد مو مال دكتور لازم لو ساده لو إمام

بصائر : انا هم هيج اگولن ،بس ما تعارفين الولد عدهم كلشي دكتور

ريحانة : طلعيها عباتها الجديده

هزت رأسها ب أي وأجت حطت العباة يمي وشالي مال طلعة ،وريحانة لبستني الشال ومن وگفت حطت العباة على راسي

ريحانة : والله لو بي حيل امشي وياج ،بس طيحتج اخذت كل حيلي الضال

بصائر : عمة مشت تحظر روحها تمشي وياها

طلعت ايدي بأيد بصائر الگاع بي مثل المنخل وي طلعتنه من الغرفة طبت أمي من المطبخ ،اجتني بساع تسأل شلون صرت وانا اهز رأسه ب أحسن بس بالصدگ انا وضعي صاير اتعس

وبس اجة ضيرم طلعنه ،الدرب كله هو يجر حسرات وانا اعارف حسراته هاي من قهر وضعي الما معروف شني! !

بس وصلنه للدكتور طبينه بلايه سره ،سلم عليه ضيرم وگعد يحجي وياه وبعد كلام هواي عن وضعي گال
الدكتور : سويلها تحاليل قبل لا نتخذ أي إجراء

ضيرم : تحاليل عامة مو ؟

الدكتور : نعم ،وبس يطلعن ردلي

ضيرم : خوش

گام ضيرم واحنه هم گمنه وياه ،سحبوا مني دم وگالوا نضل گاعدين بين ما يطلعن ،واخذن فوگ الساعة ونص ومن طلعن ما طولنه هواي وردينا للدكتور ،اطاه ضيرم التحاليل وگعدنه ،يقراهن وعينه عليه ،وكل ما جايها عگدة حاجبة تقوه

ضيرم : شني السالفة علي ما تحجي ؟

نزل التحاليل من ايده
الدكتور : شاك بشي واتمنى بعد كثرة الادله يطلع شكي مو صحيح

ضيرم : خير يا ستار ،شنو ؟

نجوى : شكو دكتور ،شبيها بتي ؟

بحيرة نطق
الدكتور : اعراض السحايا كلها عد بتكم

لطمت امي على خدها وضيرم صفن بوجه الدكتور وانا اباوع عليهم ما مفتهمة شني هذا المرض

الدكتور : واكو احتمال مرحلتها كلش متقدمة من خلال كلامكم عن حالها

ضيرم : گول غيرها علي

الدكتور : مو اكيد ضيرم من خلال سحب عينة من السائل النخاعي راح نتأكد ونشخص حالة اختك بالتحديد

گام يفتر ضيرم حاير وانا من حيرتهم وخوفهم خفت
ضيرم : شلون علي شأسوي ؟

الدكتور : گتلك من نتأكد بوكتها نتخذ جميع الاجرائات اللازمة

هز رأسة ب أي وباوع الامي الدموعها كل ما مسحتهن يطيحن ،تشكر من الدكتور وطلعنه ،الدرب كله كلساع يخابر واحد يستفسر منه وامي حتى ما
گعدت بالصدر وأجت گعدت يمي وره وكلساع لامتني الصدرها تبوسني من راسي وتگلي

نجوى : ريت المرض بي ولا بيج

وصلنه للبيت وخبر مرضي گلب البيت كله ،من فرح لضوجه وكل الوجوه غيمت ،وانا ما جنت أعارف شني مرضي وليش هلگد هم مطي اهمية ولا اعارف شگد راح اتعب بعلاجه

ثاني يوم مشيت سحبوا مني خزعة لو چن سحبوا روحي هم ،رديت للبيت ميتة ،ورغم الوجع القوي گعدت اقره ل امتحان باجر كلهم
يصيحون خل يولي الامتحان وانا داگة رجل امشي امتحن حتى لو اجيبن بس خمسين ...

امتحنت ورديت وما ضلي غير بس امتحان واحد واخلص ،تلگاني عزيز الشايف روحة ،يسألني شلوني
باوعتله مزغرة عيوني

_ هيج وضعي خطر وحتى أنت خايف علي

عزيز : مو صوجج والله ،اليصير وياج زين تذلي

_ جا صير زين خاف اموتن وياكلك تأنيب الضمير
ولو انا اعارف ما عدك ضمير

عزيز : ساكتلج لان مريضة

أبتسمت
_ وهو انا جاي احجي لان مريضة وما تگدر تطگني

أبتسم وبساع خفاها وگال طبي ،طبيت اسحل بروحي سحل
_ عيون فقار هلووو

اندارتلي چانت واگفة تمسح بالكاونترات
بصائر : هلا بحواري الجنة

_ شو اسلوبكم صاير حلو ،بديت اخافن على روحي

ضحكت بس اعارف ضحكتها تسليك
بصائر : جوعان تاكلين ؟

هزيت راسي ب لا
_ بس اريدن انام

بصائر : مشيتي ما ماكلة وهسه تردين هم ما تاكلين

_ ما اگدر والله

بصائر : لان حاسة بيج ما راح اللحن عليج

شمرتلها بوسة بالهوه ومشيت للغرفة ،بس طبيت سديت الباب على كيف من شفت ريحانة
نايمة وايدها على بطنها ،طلعتلي هدوم بدلت وتمددت بفراشي وانا حايرة وين اديرن وجهي من اشياء كل ما أجن ببالي أرجف من الخوف

ما اعارف شلون غفيت وما گعدت غير العصر گلت خل اصلي الضهر قضاء حتى اردن التزم صار فتره مخربطة بصلاتي ،گمت توضيت و وگفت على المصلاية كبرت وبديت احسن بخنگه وشي يلتفت على رگبتي
كملت بس احسن بروحي تريد تطلع للركعة الثانية وانا بعد ما گدرت أقاوم گطعت الصلاة وتربعت على السجاده اجرن النفس بالگوه ولازمة رگبتي

فاتت مني بصائر بس ردتلي من حست بي ما جاي اصلي و وضعي مو طبيعي ،فتحت عيونها من شافت حالي احس بروحي انعصرت عصر

صاحت على أمي بصوت يرجف
بصائر : عمة وينج، اللحگي لحواري

اجتني توخر ايدي من رگبتي وامي اجت متخردله گعدت گبالي توخر ايدي من رگبتي وانا وياهن اريد اوخرها ما اگدر احسها لازگة والنفس كل ما جاية يقل

نجوى : عزيز الحگ اخيتك ولك

اجه عزيز بساع من سمع صحية امي ،فتح عيونة واجه بساع جر ايدي من رگبتي وانا طحت نايمة بالگاع اريدن يستعدل نفسي

گعد گبالي ثاني ركبتة يضرب على خدي ويحجي
عزيز : شني سالفتج شو باوعيلي ،لا تغمضين حتى

وانا بالگوات مسيطرة على عيوني ما اغمضهن ،وما صحاني غير من رشگ ماي بوجهي فزيت الا درتلي روحي

عزيز : سالفتها مو خالية ،چم مرة اگولن اخذيها عوفي حجي جده

نجوى : تگلي تخربين مستقبل البت

عزيز : طز بالمستقبل ،بتج حالها مو مال بس دكتور اكو شي أكبر والله ،وانا وأنت شفنه بعيونة

هزت رأسها تباوعلي ،گوموني بصائر وامي ،گعدت امي وانا مددت على رجلها ،وبالي بشني جاي يفكر ما معروف ،احسن بخربطة ،ومثل السواد محاوط فكر

باوعت للباب من سمعت صوتها ،طبت تصيح بأسمي
من شافتني اباوعلها گالت

جفون : السلام عليكم و الرحمة ،حواري شوكت تشترين هدوم ؟

°جفون°

نجوى : عليكم السلام عمة ،تعاي

مشيت گعدت يمهن اسأل
_ شبيكم ضايجين ؟

نجوى : تكج تخربطت وطيحت گلوبنه

باوعتلها مقهوره
_ شبيك تكي يوميا مطيح گلوبنه ؟

حواري : اندري

_ خايبة شلون بعدج ما مشترية هدوم ؟

حواري : مالي خلگ

نجوى : والله اتوسل بيها ،يوميا مطلعتلي حجة

_ خايبة امشي ويانة راح نمشي هسة

حواري : ما أروحن أنتن جيبلي

_ والله فلا اجيبلج ،امشي أنت

حواري : لا تضغطين علي والله ماعدي قابلية الطلعة

_ شوف هاي مني تحجي حواري أم السربتة

حواري : ما اريدن هدوم

_ مو بكيفج يلا بساع حضري روحج

حواري : خاب والله ما امشي

_ لا تحلفين لان اخذنج سحل

فركت وجهه حايرة وگامت مشت بخطوات مو متساوية للغرفة ،شوي وطلعت لابسة حجابها وعباتها
حواري : اذا تخربطت وحرتن بي مشكتلچن

هزيت رأسي
_ ميخالف ،يلا عمة ورقيلها

أبتسمت تباوع على حواري ،بس مبين ابتسامتها مال واحد مهموم ،شوي وردت اطت فلوس الحواري وطلعنه لبيتنه ،بس طبينه شفت عمة واگفة متانيتني

زهرة : وين صرت خايبة راح تغرب الدنيا

_ شعدنه عمة هو فستان

زهرة : بس أنت وحدج يرادلج نهار كامل

حركتلها حواجبي وگلت
_ مضلومة انا

زهرة : أي كلش ،خايبة هيوفة يلا

طلعت هيوفة تعدل بعباتها ،أبتسمت وانا اباوع لوجهه يلمع مبين عليها عروس من شمرة حاجبها

زهرة : حواري منو من اخوتج هنا ياخذنه ؟

حواري : عزيز

زهرة : ماشية اصيحنه اوگفلي

مشت عمة تصيح عزيز واحنا ضلينه نحجي واگفات نسولف ،شوي وطلعت غاية توصينة
غاية : مو تنسين هيوفة جيبلي وياج صبغ اظافر ماروني

هيوفة : خايبة والله ما انسى شگد لحيتي

ضحكت وردت طبت ،ومن سمعنا صوت الهورن طلعنا ،صعدنه ورا وعمتي گدام بس حرك السيارة گال
عزيز : ما تخلص سواگتچن يوميا سوگ

زهرة : جا غير عدنه عرايس يجهزن وبنيات يشترن

عزيز : هو التجار عايشين براس النسوان

وصلنه وضل متانينة ولان نعارف عزيز حقنه اشترنه بساع بساع ،وما عولنه نرد ،وكل هذا وبعد ما بادين بجهاز العرايس البس اطه فلوس
تجهيزهن جدي صارن يطلعن سوه يجهزن واحنه البنات انتانيهن ببيت جدي نشوف شني الجايباته

°هيوفة°

واگفين گبال بدلات العرس محتارات وحده تگل للثانية هاي البدلة احلى

ميمنة : خايبة انا لو البسلي ثواب زايد على اخوج

خزرتها
_ صوتج

ميمنة : هديني احجي لا احطن ظيم گلبي كله بيج

_ انا شدحلني ؟

ميمنة : اخته

_ جا مو چنت أختج

ميمنة : بطلت ما اعرس

_ مو هي لعب بكيفج

ميمنة : خايبة خليني ساكته لان اذا حجيت هاي انا الما ابجي اگعد انوحن بنص السوگ واخزيكم وياهو يسألني شبيج اگله جابريني

باوعتلها مقهوره تحجي والغصه تصعد وتنزل ويوم عن يوم خنگتها تزيد ،حجزنه البدلات وردينا وهي الدرب كله گالبة الوجه ،وبس وصلنه عافتنه ومشت لبيتهم ،ما تريد تتلاگه وياه مثل امس من شافته وهو ما حاجة وياها غير بس كلمة "شلونج"

انا ما الومنها أخوي وياها صاير اسم على مسمى

طبيت للغرفة انزع بعباتي واحجي وي روحي
_ معقولة بعد بس ثلاث ليالي

وبيوم الحنة انا هاي الما ارگص واستحي عود، گمت بنص الصالة وي البنات وميمنة تباوع علي وتهز بأيدها يمكن مصدومة مني ،والله هو انا مصدومة بروحي بس هي مرة بالعمر

أبتسمت وگعدت من گالوا راح يطب يحنيني ،ميمنة طبت للغرفة وانا ضليت اباوع للباب اتاني شوكت يطب ...

كبرت ابتسامتي من شفتة طب وريحانة وامة گدامة عينة بس علي اكلني اكل ،حطيت ايدي على صدر البدلة وهو بس وصل يمي باسني من راسي وهمس

ضيرم : وخري ايدج خليني اشوفن حلالي

وانا هيج گلالي لو متت ،صمغت ايدي بعد فلا نزلتها وهو گعد يباوعلي مبتسم من گعدت

جابت الحنه جده حنتني وانوبه حنته وهو يگلها
ضيرم : راح اخذ الريشة منج جده ،بعد ماكو الريشة عدكم راح تصير يم ضيرم

وجده ولا چن تسمعة وخرت وهو بحجة يشاورني جر ايدي نزلها بكل هدوء
ضيرم : باجر كلشي اشوف لاتغطين شي ،مايفيد
بعد

خرزته وانا احسن بوجهي بوخ وهو مبتسم يباوعلي
ضيرم : خاب فدوه للصفر

ماگدرت اضلن ضايجة واكض ابتسامتي ،أبتسمت وهو عصر ايدي بين ايده
ضيرم : هم زين باجر اخوج هم عرسة جان حتى باجر خبث علي

هو يحجي وانا كل بالي يم ايده ،غمضت عيوني من گام وگف وجراني لحضنه ،لمني لصدره ،تنفست عطره الاحبه من يوم يومي ،وخرني وطلع بساع من سمع الهوسة برة والولد يصيحوه ومبين بادية حنته

جريت البرگع مالتي لبستة بساع من گالوا راح يطب صخر ،طلعت ميمنة من الغرفة تمشي بكل راحة بدلتها مستورة عكس بدلتي ،گعدت وانا مشيت گعدت يم نسمات المشت امي وليث جابوها لان انا وجده لحينه على جيتها وابوها مو هنا

اندارتلي مبتسمة
نسمات : خايبة طلع خفيف رجلج

أبتسمت
_ بس وياي

رفعت راسي على صوت الهوسات ،طب أخوي بكامل اناقته وحظورة ،قابض بأيدة على السبحة الشايلها بأيدة ،وگف گبالها ،باوعلها وبلايه حجي ينگال باسها من رأسها وگعدوا ،حنتهم جده وهو احسن بي گاعد على اعصابة وما صدگ يمشي

بس طلع هي بساع مشت للغرفة ،مشيت انا وراها ورا شوي ،لگيتها نازعة البدلة وصافنة ،گعدت بصفها

_ شبيج ميمنة ؟

باوعتلي وردت دارت عيونها
ميمنة : لو الله ياخذني بهل ليلة هواي احسن ،لان انا جاي اموتن بس بعدني اتنفس

_ شني سالفتج

ميمنة : سالفتي ما تتسولف هيوفة ،أنت التعارفيها ما حاسة بي

_ حاسة بيج بس ما اريدن ازيد قهرج

ابتسمت بقهر وگامت
ميمنة : بدلي وأمشي نطلع

_ افتحيها

ميمنة : جا انا فتحتها وحدي

_ انا ما اگدر

وگفت وراي فتحت قيطان البدلة ورغم كلشي جاي تعيشة بس ما نست انا بنفس الوكت راح انزف عروسة لشخص طول حياتي اتمنى نضرة من عيونة

ميمنة : اليوم انا فتحتهن وباجر دور ضيرم

ضحكت واندريت اطگها على ايدها ،طلعت مبتسمة وانا لبست الثوب المخيطته امي حتى اللبسة ورا ما انزع البدلة ،وگبل لا اطلع رشيت عطر من غاية
لان انا كل غراضي تحولن من بيت اهلي بعد لغرفتة

طر نص الليل واللمة الحلوه بعدها ،وبس الگرايب مشوا وما ضل غير بس احنه طبوا جدي وأبوي وعمامي والولد ،التموا كلهم ،يوصن بصخر وضيرم

صاحني مشيت اوگف بسدة ،لمني لصدرة يگله
صخر : باوع صح انا هل فتره ما اطيقنك بس متاكد راح تحافظ عليها

ضيرم : احطنها بروحي

صخر : الله ياخذ روحك

ضحك ضيرم وهز رأسه مأيس ،ومن ايد صخر جرني ليث يبوس راسي ويحجي
ليث : شلون بي انا منو يسويلي بيض وطماطه بعد

ضيرم : يعني أنت ما ميت عليها

ليث : لا تدخل انا واختي

ضحكت وبسته من خده من گال
ليث : خايبة والله من هسة شايل هم لباجر شلون اطبن وما الگاج

باقر : وين ماشية ،ومو بعيده عليك كل ما تريد تجي تشوفها هلا بيك البيت بيت عمك

ضيرم : اطردهم والله

باقر : اسكت بكيفك

ضيرم : اسوي السوه بي

ليث : ثارك وي صخر موش وياي

أبتسم
ضيرم : صح

وخرت من حضن ليث وانا اباوع على صخر چانت عينة على ميمنة الواگفة بسد برهان وعبد الحق ومبين بباله حسبة ..! !

ضلوا بالساعة وكلمن طش البيتة وحتى بيت عمي يوسف كلهم مشوا لان باجر زفة ميمنة تطلع من بيتهم ،وانا من شفت البيت فرغ مشيت سبحت ومن
طلعت لاگاني ليث ينزل من الدرج ،أبتسم من شافني ومبين نعسان ،وگف گبالي وبلايه ما يحجي حضني

ومن سألته شبيك گال
ليث : ما جاي اگدر انامن والله ،شلون راح افارگنج

دمعن عيوني و وخرت منة
_ هسة اگعد ابجي وابطل

أبتسم
ليث : مو هي لعب تبطلين ،تورطتي بعد .

_ يعني الزواج ورطة ؟

ليث : يگولون

ضحك ومشى يطلع مبين يريد يمشي للگيعان من انتبهت على هدومة ،مشيت للغرفة وانا افكر
شلون بي خلصت بالواحد وعشرين سنة يمهم شلون راح افارگهم وما أصبح بوجهم يوميا ..! !

شغلت الضوه وانا امشي على كيفي لان البنات نايمات ،وگفت امشط وانا اسمع صوت جرة نفس قوية ،هديت المشط من ايدي وضليت اسمع ومن عرفت هذا الصوت ،صوت جفون مشتيلها چانت لازگة فراشها بصف فراشي الفارغ ومغطية رأسها

وخرت الغطا منها وفتحت عيوني خايفة من شفت وجهه غرگان بالدموع

سالتها بخوف
_ شبيج ولج ؟

وهي حجيها ما مفهوم بس انا افهمنه من تبجي
ما تنفهم
جفون : شلون راح افارگنج ،بصف منو أنامن

وانا عوزي بس حرشة واگعد ابجي ما اعارف شلون صبرت روحي وگعدت گبالها احجي وياها
_ انا ما ماشية بعيد منا لهنا شوكت ما يعجبج تعاليلي

تهز رأسها ب أي وتمسح بعيونها ،بستها من رأسها وگمت بساع كملت شعري وانا اباوعلها واريدن اطگ بجي ،جفون كلش متعلقة بي اعارفها هذا الريوگ لوما سويتها الها انا ما تاكله

مددت بصفها وهي أجت لزگت روحها وياي ،غفيت بس كلساع افزن ،ومن گعدتني امي حتى اروحن للصالون گمت بس مطفية بالگوات امشي ،احذنه عبد الحق انا وميمنة وصلنه ورد

وماكو گبل لا تصير الساعة بالثنتين ردينا ،تلگني خالاتي وامي بالجكيلت والهوسات ،وانا ابتسامتي احسنها طالعة من كل گلبي

وگفت گبالي تعدل بالطرحة
نسمات : عين الحارة بارده طالعة تخبلين

_ والله

نسمات : والله ،اگلج

_ گولي

نسمات : وميمنة شلون طالعة ؟

_ تخبل تخبل

نسمات : هي بالاصل حلوه

_ أي والله ،بس اليوم حتى طلعت احلى من امس

ضليت اسولف الها على ميمنة ويمنه اجت غاية وگبل العشا گالوا نزف ضيرم حتى وراه نزف صخر حتى لا ننجبس مدري شنو

رجفت روحي وانا اگومن اوگف بايدي القرآن واباوعله طب لابس قاط اسود ،وگف گبالي مبتسم مزغر عيونة وانا كلش زين أعارف هاي حركاته مال واحد ناوي على شي ،بلعت ريگي من اجت خالتي تلبسني البرگع وخلت بس وجهي طالع

باوعتلهم ودموعي طاحت ،وگفوا اربعتهم گبالي
أبوي ،وصخر ،وليث ،ونوح

وجدي طب گاله
رأجس : أخذ عروستك ومبارك عليك بعد جدك

ضيرم : الله يبارك بيك جدي

غطة وجهي صخر وطلعت ايدي بأيد حب حياتي وحلم سنيني ،طبيت لبيت عمي وانا اسمع الهوسة
الدوم يرحبون بيها بدخول العروس ل أي بيت عراقي

_ طبت يالزهره تلگيها ،وطبت يالزهره تلگيها

طبيت ايدي بايده ،گعدت وانا احسن بالرجيف اخذني ،طلع بساع يمشي وي صخر لان راح يجيبون ميمنة البيتنه

تمنيت انا وياهم بهل وكت،ماكو بالربع ساعة واجتني عمة عطاء تگومني حتى يصعدوني لان راح يزفوه صعدت وانا اصلي على محمد بگلبي حتى يخف خوفي وتوتري

گعدني على الجرباية ومن كلهن نزلن وما ضلت غير بس امي وريحانة تعدل بمكياجي وبالاخير رشتلي عطر تحاجيني بصوت ناصي
ريحانة : صيري سباعية ولا تشلعين گلبه وتذكري هذا حب حياتج

هزيت رأسي ب أي
ريحانة : سباعية اعارفج

اندارت على أمي
ريحانة : ها عمة ننزل ؟

زهرة : أي

وگفت گبالي گبل لا تنزل بوستني
زهرة : بعد امج لا تخافين ضيرم خوش ضيرم

وانا من گد التوتر بس اهزن رأسي ب أي ،نزلن وانا ضليت اطگطگ بأصابعي واباوع على الباب ومن سمعت صوت الهوسات جوه وصولا للدرج راحت روحي من سمعت صوت الباب انفتح ،گمت على حيلي من شفته طب ،سد الباب وباوعلي مبتسم

وانا ما گدرت ما أبتسم وياه ،نزع حذائه و وگف گبالي يحجي
ضيرم : هلا بريشة گلبي ،هلا بالنورت حياتي ،هلا ومليون الف هلا

احسن بگلبي طار بحجايته ،ضحك من شافني غطيت حلگي بايدي ورمشت بعيوني ،گبل لا يوصلي نزع سترته وضل بس بالقميص والبنطرون اجه وگف گبالي
ضيرم : ما اختتگتي من البدله ؟

وانا كل ضني سؤاله عادي
_ أي والله اختنكت كلش

ضيرم : تنزعيها ؟

_ هااا

دارني وهو يفتح قيطان البدلة ،وانا وي كل لمسة منة احسن بروحي تنسلب ،من حسيته راح ينفعل اندريت بساع وانا لامة البدلة على صدري
_ خل نصلي ضيرم

هز رأسه ب أي ومشى يگعد على الجرباية ،وشوي واندگ الباب گام فتحة جانت بصائر بايدها صينة العشا ،اخذها من ايدها وانا صحتها گبل لا تمشي

_ بصائر

بلايه ما تشوفني ردت
بصائر : ها عيوني

_ اريدن اطلع للحمام

وخر ضيرم من الباب وهي طبت مستحية ،طلع من حس بي مضايقة
بصائر : اللبسي گلبية بساع واخذي وربج وياج اسبحي والبسي

هزيت رأسي ب أي وهي طلعتلي گلبية وكلشي احتاجة ومشت گبلي وانا وراها ،طبت وياي
للحمام حتى تفتحلي التسريحة ،فتحتها وطلعت وانا بس سبحت طلعت بالروب هم زين جان مستور ولافة شعري بالمنشفة من طبيت للغرفة الا هي مشت

بس شافني گال
ضيرم : تعاي اكلي

هزيت رأسي ب أي وگعدت هو يسويلي لگم وانا اكل واللگمة بالگوات تبلع وياي ،من شافني اصفن لزم ايدي ورفعلي اللگمة يحطها بحلگي
ضيرم : لا تفكرين بشي ،اكلي هسه والله كريم ريشتي

هزيت رأسي ب أي وبس خلصنه شال الصينية ونزل وانا مشيت للحمام غسلت بساع ورديت گبل لا يريد مشطت شعري وانا جاي ارشن عطر طب هو اخذ هدوم ومشى للحمام وانا مديت مصلاياتنه هو گدام وانا وراه

ومن رد وگف گبال المراية مشطت شعره وتعطر وگال
ضيرم : تعاي نصلي

هزيت رأسي ب أي و وگفت على مصلايتي ،كبر وبده يصلي وانا هم وبس خلصنه كل واحد لم مصلايته وهنا بعد انا كل قطره دم ما ضلت بي

لزم ايدي ياخذني للفراش ،تمدد وحطني على صدره يحرك ايده على شعري الرطب ويحجي وياي
ومن شافني ساكته رفع راسي بايده يباوع لعيوني

ضيرم : دوهنن حالي العيون الصفر

_ تحبني ؟

أبتسم وحرك خشمة على خشمي
ضيرم : ميت بالريشة انا

وبأعترافة بديت ليلتنة ،ليلة توجت حبي وصبري ليلة شهدت على حب چنت اضنه من طرف واحد ،عاملني معاملة ما جنت متخيلتها ،خاف علي من روحة ،بكل حركة منه يگلي
ضيرم : خوما اذيتج ،ريشة حاجيني ؟

وانا اهزن رأسي ب لا كاتلني المتسحة ،نمت بحضنة وجانت احلى نومة انامها بكل حياتي ،غفت عيني وانا ما رايدة شي من الدنيا بعد غير هل حضن يلمني كل ليلة

°ليث°

طلعت من البيت ما طايق اطبله وهي مو بي وما يلفيني بهل وكت غير الگيعان ،مشيت وما اخذتني رچلية غير للمكان التگعد بي بت ضاري ،گعدت وانا احسب الأيام البيهن ما بينت

اختفت هيج فجأه واول مره احسن بالي يم احد واخافن لا صاير شي وياها ومن جهه احسن بگلبي لاعب وچن يگلي جايتك مصيبة

رفعت راسي على الگمر ،وبساع انداريت من حسيت بخطوات وراي ،عرفت هي ماكو احد غيرها يجي هنا

بس انداريت طفرت بساع من مكاني وانا اسألها
_ وينج ،وين چنتي مختفية ؟

وهي ساكتة وتباوعلي ،حجاية ما حجت ومن سكوتها كضني گلبي واول مره احسن بروحي خايف وانا اسأل
_ شصاير كوكبة ؟

رفعت ايدها تعدل حجابها ،وانا بساع اجت عيني على ايدها وچن نبتت بگلبي اسهام من شفتها تلمع بايدها ،أشرت بأيدي فاتح عيوني اريدن أچذب
الجاي اشوفنه

_ شني هاي كوكبة ؟

دنگت تباوع على ايدها وبصوت ما ينسمع بس انا على گد ما مركز سمعتة ،سمعت وريت ما سمعت من
گالت
كوكبة : انخطبت ...


تعليقات