رواية خلخال مشوه الفصل الثاني والعشرون بقلم زمرده
شگلك بعد عيني و أنت أقربلي من رمشي
حتى من أنعزل عن الناس بوكت بي كاره
الدنيا چنت وياك أحب كلشي
°جفون°
بس زفينا ضيرم وهيوفة طلعنا بساع نمشي لبيت عمي يوسف حتى نجيب ميمنة طبيت ركض گبل غاية وحواري متحمسة اشوفنها شلون طالعة وبس
شفتها وگفت بمكاني اصلي على محمد طالعة تخبل تخبل ما تقل جمال عن جمال هيوفة ورتابتها
انداريت اباوع طب صخر ورا جدي وخرت من دربهم وانا لازگة بحواري اسحل بيها واقنع اريدنها تشمرلنه وحده من هوساتها وهيَ ما ترضى
حواري :خايبة كافي تگرصين بيَّ راح اطگج والله
_ شبيج چنج صنم هوساتج المحظرتهن وينهن
حواري : نسيتهن
غميتها بأثنين أديه وانداريت اباوع على الولد وعمي طبوا يسلمون ميمنة بأيد صخر وانا تك حواري
ما گدرت اضلن بمكاني تحركت شويَ حتى اسمعهم شجاي يگلوله لان هوسة وما اسمع عدل
برهان : امانة عدك شمعة بيتنا ما اريدن بيوم اشوفن روحها طافية لو مكدر خلگها هاي عزيزة عدنه فوگ ما تتخيل بس انا كلي ثقة بيك
ما راح تكسرها لو تضوجها بيوم
صخر : أن شاء الله گد ثقتك انا
حضنها لصدره وهيَ صوت بيجيها خلاني ادمع وشوي واروحن ابجي وياها
عبد الحق : هاي ميمنة صخر عينك عليها هاي أم اخوتها غاليتنة
صخر : تحسسوني ماخذها للسچن موش لبيت جدها
عبد الحق : جا غير نوصيك عليها ،هاي اختنه
أبتسم بطرف شفتة يهز رأسة ب أي
صخر : من حگكم
صار مصايح الولد بره يصيحون يلا ،حط جدي ايدها بأيدة وگاله
رأجس : اطلع أنتَ وعروستك جدي
هز رأسة ب أي وطلعت ميمنة من بيت عمي يوسف لبيتنة عروسة لصخر طبت لبيتنة واحنه وراها نهلهل والنسوان الكبار تلگنها بالجكليت وبس گعدت بالصالة طلع صخر لان صاحوه وماكو شويَ وگالوا نزفهم
صعدنها عمتي زهرة وامها وبركة انا ردت اصعد وراهن وجده گعدتلنه على الدرج بأيدها عوجيتها تهش بينة ليگول طليان گدامها
غضة : ما تصعدن لا تضلن تلحن خايبات راح اطگچن
بنفس الوكت طبن ريحانة وبصائر وخرت جده تسويلهن درب يصعدن ومن شافتني حطيت روحي طگتني بعوجيتها ما راضية
غضة : مو اطيح حضج رموش لا تضلين تزاگطين مثل المطاية
توسلت بيها وانا اباوع ع الدرج
_خايبة شبيج جده انا مو بت ابنج الشهيد بداعتة خليني امشي
خزرتني
غضة : انا چم مرة گايلتلج لا تجيبلي طارية وتهدين حيلي
_ جا خليني اصعد
وخرت بلايه ما تحجي وانا سويت الدرج شبختين وطبيت للغرفة وبس طبيت صارت گدامي
ريحانة گاعده گبال ميمنة وما أعارف شني تبسبس وياها وميمنة بس تهز رأسها ب أي
ما ضلينه هواي وصاحوا راح يزفوه نزلت مشحوته گبلهن صارت گدامي حواري واگفه تباوع ع الدرج وبصفها غاية جريتها
_ خايبة والله احسن ميمنة مو طبيعية بيها شي ولا شفتها فرحانة ابد چن وحده مجبورة
حواري : جا صدگ هيَ ما رايده صخر
رفعت حاجبي
_ شني ما رايدته
حواري : هيج املست وحدي رأسي مأثر عليَّ
_ لا انچبي شني الخلاج هيج تحجين
حواري : لساني الفالت الما يعارف يكض روحه دوم يزلگ ما تعارفي
طگيتها على ايدها الحاطتها على چتفي
_ أي مزيت
أبتسمت ودرنه وجهنه سوا من سمعنه صوت هوسات الولد ومبين راح يزفون صخر جريتها نوخر من الدرج وندحس روحنا بزاوية يم النسوان لان شراح يخلصنة لو ضلينه گدامهم
ضحكت حاطة ايدي على حلگي من جراه ليث يگله
ليث : خاب وأنتَ صاعد ادعيلي يوم الالي وهمَ هيج تزفوني
أبتسمت صخر يگله
صخر : چن لگاها الغريبة
ما حجة بس ضحكتة چانت جواب خله الولد كلهم يصيحوله
_ هااا ليث هااا
وهوَ يريد يفلت منهم لان حتى صخر نسوه
فقار : انا گلتلكم شكلة مال واحد عاشگ مابيكم احد صدگني هسه تاگدوا
نوح : أنا أكثر واحد بيكم اعارف بيه عاشگ بس مغلس
ليث : اياا چذاب وين مغلس مخلصها تتختل وراي ومشبعك دمغ وما اتكف مني
فقار : شني السالفة ،وين يتختل وراك
جره من ايده
نوح : بعدين احجيلك
فقار : خوش
اجاهم أبوي يصيح ما راضي على وگفتهم
محمد : شني السالفة فضوها الوادم بره
تعالت هلاهل النسوان وردوا الولد يهوسوله وجده واگفه يم الدرج تهوس بشيلتها والولد يهوسون ودبيچهم رج البيت رج
_ زفيناه بصاية حيدر ،زيفناه بصاية حيدر
بس طب للغرفة نزلوا الولد بساع يمشون يصبون العشا ضحكت ومشيت اهزن بأيدي من شفت عمة شيماء تبچي ليگول ما اعارف وين زافتها هيَ منا لهنا بس بعد النسوان ما يرتاحن بلايه دراما
گعدت بصف نسمات اسأل بيها
_ اگلج شعجب خلوج تجين
نسمات : والله چانوا قافلين كلش ،بس لوما عمة خابرت چان فلا رضوا
_ أي مو اگولن
نسمات : شگد حجوا وشني يعرسون وما طالعة السنة مال جدي ومن هل حجي
_ اگولن ولا واحد بيهم بين
نسمات : جا غير حتى زعلوا على عمة وحالفين يعاتبوها
_ خطية مو المرحوم شاب
نسمات : بعد هاي عقليتهم
گمنه انا وياها من صاحتنه عمة مشيت بساع للمطبخ اخذت انا السفرة افرشها وتگابلت وياي غاية فرشنة السفرة وردينا للمطبخ ناخذ مواعين المفطح من ايد الولد وخبصتنه خبصة بالعشا لان الوادم كلها هنا تتعشا
رديت للمطبخ اجيبن الخواشيگ
غاية : خايبة بساعج النسوان كتلهن الجوع
اخذتهن من ايدها ومشيت اوزعهن عليهن ،وبس خلصن رديت اگعد يمهن بالمطبخ ياكلن حتى لا تلهيهن السوالف
جريت الماعون گبالي ،طگتني على ايدي
ريحانة : لا تمدين ايدج هذا الي انا وابني
فتحت عيوني
_ فلك تاكلينه كله
هزت رأسها ب أي
ريحانة : ضامة جوعتني علمود اكل زين يلا وخري
وخرت مستغربة منها واكلت ويَّ بركة وكل ضني صدگ راح تاكلة كله بس زاد استغرابي من شفتها صفنت وهدت الخاشوگة من ايدها و وخرت وچن بالها شارد كلش
حركت ايدي گبال وجهه
_ شني وين صفنتي
فزت واندرت تباوع على الباب من طبت عمة زهرة من بره
زهرة : هذا عشاهم بساع وحده منچن تصعده اللهم
گامت بصائر تمسح بأيدها
بصائر : انا اخذنه الهم ،بس خلِ اغسل
زهرة : خوش
وانا مندار فضول حواري عدي عمة مشت للصالة يم النسوان وبس بصائر شالت الصينة ومشت گمت انا وراها اصعد الدرج وهيَ من حست عليَّ دارت وجهه وچنها تگلي
_ ها ما گدرتي
بس وگفت گبال باب الغرفة صاحتني وعود انا واگفة بعيد اخافن منها
بصائر : تعاي دگي الباب ما اگدر
وانا مشيت ادگن بالباب على كيف أخافن لا تجيني عيطة منه ويخلسني
فتح الباب صخر بعده بقاطة بس نازع بس الستره
سوه درب لبصائر وانا جابني بخزره وكل ضنه راح انزل بس بعد انا وصلت دحست روحي ويَّ بصائر
بصائر : تأخرنه عليكم بس الولد انخبصوا بعشا الناس
صخر : لا عادي
حطت الصنينة بالگاع ومشت توگف گبال ميمنة لابسة الروب الأبيض وگاعده مدنگه راسها حتى من طبينة ما رفعت رأسها
بصائر : محتاجة شي
هزت رأسها ب لا وابد ما رفعت راسها ضلت بصائر تباوعلها والحيره مبينه بشكلها وانا حيرتي مو اقل من حيرتها ،باوعتلي وگالت
بصائر : امشي
مشت گدامي وانا وراها
نزلنه بس حالها وحالي انگلب ويَّ حالها الأبد مو طبيعي انا انتبهت الها اليوم كله بالگوات تبتسم بس هسه لا شكلها وگعدتها چانت مو مال وحده عروس راضية زافيها من بيت اهلها لبيت جدها احسنها ماشية لسجن وضايجة كل هل ضوجة
طشت الوادم واحنه انكربنه بالبيت ثنين حوامل عدنه گاعدات ويتأمرن علينا وبهل وكت حسيت بعازة هيوفة وميمنة
هديت المكناسة من ايدي وانداريت احجي وياهن
_ بربچن لو العرايس هنا مو جان ما تعبنة كل هل تعب هذا
تجلف بالمواعين وتحجي
بركة : أي والله خاب شني خلِ يّجن يعاوننة مو عرسهن ليش انكربنه احنه
حواري : انا مريضة المفروض اگعد مو بس مگعدين الحوامل
بصائر : خايبات شگد تلغن اشتغلن بلايه حجي هسه بساع تخلصن
نسمات : والله گتلهن بس ما يرتاحن اذا ما يحجن
حواري : جا خلني اگعد ووالله اسكت
غاية : لا عيني لا ضلي اللغي بس اشتغلي
رادت تجيبها بغمة بس نزلت ايدها من طب ليث من بره وگف يم غاية يحجي وياها ولان انا قريبة اسمع
ليث : هدومي مال شغل مغسولات
غاية : أي غاسلتهن وتلگاهن بغرفتك
ليث : الحمدلله صارت غرفتي چانت غرفة صخر
غاية : بعد ردلها لان رد لغرفتة
ليث : أي عيني رد الغرفتة هوَ ومرتة
أبتسمت اباوعلهم ومن شافني مركزة وياهم حركلي حواجبة ثينهن
ليث : شني ناسية اذاناتج يمنا
عله صوت ضحكتي اهزن براسي لا وبنفس الوكت طب نوح يخوزر
نوح : وجبح لهل ضحكة
دنگت راسي بساع ما اريدن اشوفنة
ليث : وبيش غاثتك ضحكتها
نوح : الولد بره مايصير هيج تضحك
ليث : صارت بعد لا تضل واگفلها ع الزلة
ماحجه بس ضل يستغفر وخله ومشى
ليث : بعد اخيج جيبلي هدومي من فوگ حتى ابدل
هدت من ايدها
غاية : صار
شوي وردت بأيدها الهدوم اطتهن اله وهوَ مشى للحمام وانا ضالة اباوع على حواري المعلگة عيونها يمهم جبتها بغمة من بعيد صايرة صلفة ولو هيَ صلفة من يوم يومها بس جاي تزيد وحتى تعديني لان انا كلش الگف العدوه منها حتى فضولي صاير خير من الله مثل فضولها
°بركة°
ردينا البيتنة حيل ما ضال بينة من تعب هل يومين هاي ،بس طبيت للبيت خمشني گلبي وانا اباوع هيَ مو ويانة طبيت للغرفة وانا اباوع بيها نزعت عباتي وضليت گاعده اتصفن ويَّ الحياطين ضليت وحدي بالغرفة
گمت اشوفن وجهي المحيوس حوس من الكحلة
مسحتها بردن دشداشتي وما فاد تشلعت عيوني وهيَ ضلت لازگة ،كحلة جدة طلعت اصلية خلصت عمرها تصيح كحلتي يجيبوها من السعودية وخوش كحلة وانا اگلها
_ لان كحلتج تگولين عليها خوش كحلة
بس هسة تأكدت حجي جدة صدگ وطلعت ما مغشوشة مثل ما جفون تگلها كحلتج مغشوشة
مديت فراشي حتى أنام هستوني تمددت وتذكرت ذيج الغرفة "الورشة"
گمت من فراشي وانا احاول ويَّ روحي لا ما امشي لا بركة استچني خاف هذيج المره الگفتج ميمنة هل مره الله يعلم منو راح يشوفج وترحين بيها بالرجلين وساعتها هاي انسانيتج خليها تفيدج
بس محاولاتي فشلت وما لگيت روحي غير ماخذه المفاتيح وماشية من نفس الدرب التعلمت امشي منه
گبل لا اوصل لمع گبالي ضوه الورشة بنص هاي الضلمة كملت دربي وانا اضوي باللايت البيدي فتحت الباب وطبيت على كيفي وانا افكر بيني وبين نفسي شراح اگله لو سألني شجابج
عفت الباب مفتوح وضليت واگفه بمكاني يباوعلي بأستغراب والنعاس بعينة مبين چان غافي وگعد من فتحت الباب
بلعت ريگي وتقدمت من گال
رهيب : طبي
وگفت گباله بس بعيدة عنه حرك ايده رفع بيها شعره وانتبهت عليه هل مره احبال مربطة ايده ماكو
رهيب : شني الجابج
بلعت ريگي وانا اطگطگ باصابعي حايرة
_ اجيت اشوفك
رفعلي حاجبة ما مقتنع
رهيب : وليش تشوفيني
_ هيج والله
رهيب : ما تخافين من اهلج
صفنت بوجهه حايره شأرد هزيت رأسي ب أي من طال النظر متاني الجواب
هز رأسه مبتسم
رهيب : ابد ما مبين عليج الخوف وأخر شي اتوقعة أنتِ خايفة هسه
وانا اذا احد هيج حاجاني بعد فلا اگدر اكض روحي واضلن ساكته
_ وشني المخليك هيج متأكد
رهيب : هاي ثالث مرة تجين الخايفة ما تطلع اكثر من مره
_ بس انا انقهر عليك واجي
رهيب : مو اگلج بس أنتِ عدج ضمير بيهم بس ما يفيدج هذا الضمير لان يطيح حظج لو لگفوج طالعة
_ شو أنتَ حباب
ضحك بصوت عالي وانا اباوعلة صافنة هذا شبي شگلت أني وهيج ضحك معقولة حجاية حباب هيج تضحك
مسح على شواربة ونزل على لحيتة الصايرة عالية وأبتسم بطرف واحد من شفتة
رهيب : انا من راح اطلع منا اخليج تتندمين على كلمة الحباب هاي
رچف گلبي واحس الرچفة تحولت لجسمي باوعتله بخوف وهو ضحك
رهيب : عليش تخافين مثلج وحده وينها وين الخوف
ضليت اباوعلة ابد ما مرتاحه لحجية درت وجهي اريدن اطلع بس وگفت بمكاني من صاحني
رهيب : تعاي
درت وجهي عليه ومشيتله من رد صاحني وگفت گباله
رهيب : شو دنگي شويَ
ضليت ما تحركت مستغربة ليش يريدني ادنگ
رهيب : شغلي اللايت
شغلته ورديت اباوعله صافن بوجهي أبتسم ومسح على شاربة وبكل صلافة گال
رهيب : مكحلة عيونج
خزرته وانا اردن ليوره ضل يباوعلي ولا نزل عينة
رفعت اصبعي إأشر عليه
_ شو ما تستحي أنتَ
خزرني وهوَ يباوع الاصبعي وگام وگف انا من شفت طولة وشلون من تقدم عليَّ صرت يمة نملة وگف گلبي گلت هسة براچدي واحد منة يطيرني وره الكره الارضية
نسيت اصبعي بعدني رافعته عليه وما تذكرته الا من وگف وجهه بوجهي ونتر
رهيب: نزلي اصبعج
نزلته بساع وتحركت اريدن افلت بريشاتي بس ما لحگت من كضني من ردن عباتي وگفت اخوز بيَّ وهو جر ايده وانا انهديت احجي
_ ما تستحي على روحك تكض بنية ما عدك خوات
رهيب : ترا من فوگ العباة كضيتج
_ حتى لو ماعدك خوات
رهيب : يا مصيبة الخوات لا والله ما عدي
_ أي هل اگولن
فتح عيونة
رهيب : شقصدج
_ وخر من دربي خليني أولي
رهيب : شبيج انگلبتي طنطل
_ وخر رهيب
زغرت عيونة ومن ارسمت أبتسامة على شفته بساع خفتها
رهيب : انا مو رهيب
_ لا رهيب اسمك
رهيب : لا مو رهيب
_ رهيب والله
ضحك يهز رأسه ب أي و وخر من دربي يخليني افوتن
رهيب : امشي للبيت وكافي تطلعين بنصاص الليالي
من وصلت يم الباب وگبل لا اطلع گلتله
_ مو صوجك صوج التجيك
ركضت بساع من راد يكضني بس وصلت وطبيت الغرفتي نزعت عباتي وشالي وتمددت حامده الله وشاكرته لان كلهم نايمين طاگهم التعب طگه زينة
°كوكبة°
ما انسى ولا تمر ذكر ذيج الليلة بذاكرتي مرور الكرام فلا گدرت هيج ولو فد شي بسيط أنساه حتى الوگفه حفضتها
واتذكر كلش زين كل حجاية حجاها وكل شوغة منه ما جنت ادري سببها شني انا ما انسى من گلتله
_ انخطبت
ردة فعلة وحجاياتة بوكتها انحفرن بگلبي وعبرن وياي بلايه ما ينسن كل هالسنين
انا صفنت بوجهه من گال وهوَ يبلع بريگة ويَّ كل حرف يگولة
ليث : شلون انخطبتي ،شلون وأنتِ الغريبة الردتها تطب بيت رأجس
صفنت بوجهه ما مفتهمة قصده
ليث : لمنو انخطبتي
نزلت راسي وانا لساني ما راضي يعترف ليا بشر صرت وانتهى بيَّ لمطاف بعقد انجبرت بي اگولن نعم اخافن لا انتكل لان اهلي هددوني اهلي جبروني
ليث : احجي كوكبة ،احجي ليش ساكتة
رديت ارفع راسي وعيوني أول مرة من تتلاگة ويَّ عيونة المكحلات احسن بيهن هواي
حجي يردن يحجنة الي لو ينطقن بدال اللسان
_ مرتضى
ليث : يا مرتضى
مسحت دمعتي الطاحت وانا اتمنى اگدر اشكي لأحد يفهم البيه
_ مرتضى أخو نسيبكم
عگد حاجبة ما مصدگ الجاي اگوله
ليث : مرتضى أخو حمزة
هزيت رأسي بـ أي صفن بعيوني وعيونة ونضراته ويَّ نزلة دموعي على خدي ثبتن بعيونة يسألني ومن عيوني محصل الجواب گبل لا يگول
ليث : جبروج
هزيت رأسي ب أي امسح بدموعي ويردن يطيحن
ليث : ليش رضيتي
_ ما خلوني هواي گتلهم ما اريدن وكل ما احجيها يموتوني والله حتى دم خلوني ازوع
رغم ملامحة المغيمة ما گدر ما يسألني
ليث : شني الخلاهم يوصلون لهل مواصيل
بلعت ريگي وانا اتذكر من رديت بذاك اليوم الأسود من فتحت الباب وشفتة گدامي جرني من شالي واحس حتى شعري اجه بأيده عيطت رايحة روحي من شمرني بالگاع وعلى صوت عياطي اجوي
كلهم يركضون جراه سعد ما راضي من طگني برجله خلاني ارافس بالگاع شايغة روحي
كاضه سعد وهوَ يتهادد يريد يّجيني
حسن : هدددني عليها لا اطگك والله
طگه على راسة وخزرة
سعد : أنجب تطگني شني
حسن : جا هدني اطيح حضها اريدن
سعد : غير نتفتهم شني شكووو
وامي تباوعلي وبدال ما تصير وياي شككتني بروحي چن شوف شمسوية
نادية : شمسوية ولج وهيج خليتي حاله احجي شمخصنة يا مصخمة الوجه
باوعلي ورد يباوعلهم وهوَ يشمر بحجية بلايه ما يعارف عواقبة شني
حسن : چانت واگفه ويَّ واحد يم الباب الخلفي انا مشيت اشرب ماي وسمعتها ،سمعت صوتها تبسبس وياه
فتحت عيوني على وسعهن ولطمت على صدري ما مصدگة الجاي اسمعنه شگد اعارف بيه نذل بس مو هيج مو لدرجة يتهم اخته بشرفها
عقل ما ضل براسي لطمت على وجهي بأثنين اديه اصيح
_ والله لا جذاب سعد والله جاي يجذب
كل همي بس سعد يصدگ والباقين طبهم نعال بس هوَ الي بس هوَ يحميني منهم واذا
وگف وياهم ضدي انا اروحن بيها بالرجلين مديوسة
باوعلي حاير وشكلة الباهت ابد ما انساه ولا انسى الراجدي الاطاه لحسن من صاح
حسن : اختنه مصاحبة واحنه يا غافلين الكم الله
الموقف لو شما حجيت عنه احس قليل الرجيف اخذني وشوي واحس بعد راح اموت وانا بمكاني
النفس عدي انگطع من تگابلوا أبوي واخواني يضربوني اليتعب الثاني يكمل وسعد واگف يباوع اصيحنه اريد يخلصني بس ما تحرك من مكانة ضال يباوعلي
ما هدوني الا من صرت جثة بلايه روح اريدن احرك ايدي ما اگدر من كل كتر جسمي يون عليَّ هذا من غير خشمي الغرگني بالدم
من مشوا كلمن الغرفتة يتحلفون باجر يكملون عليَّ اجتني سكينة دنگت تساعدني اگوم ودموعها ويَّ دموعي يطيحن طببتني للحمام تغسل وجهي وانا احسن الماي يهيج وجع جروحي من ضربهم اكثر متت چن تيزاب على وجهي مو ماي
بس خلصت ونضفت الدم البوجهي اخذتني للغرفة گعدتني وانا حجاية وحده ما گدرت احجي مصدمة شلون يتهمني هيج شلون يگول احجي ويَّ احد
انا حتى من يوصلني ليث بعيد عن الباب ما يتقرب واليوم حتى ويَّ روحي ما حاجية شلون يگول سمعتها تحجي
حطيت راسي بين ايديه احس راح اتخبل اجت وخرت ايدي
سكينة : كافي تحرگين بروحج والله سعد يحلها
هزيت رأسي ودموعي طاحت
_ صدگ سعد والله صدگ شفتي ما سوه شي وصعد فوگ
سكينة : لا والله ما صدگ يعارفج أنتِ شني بس انا اعارفة يريد يفكر بحل
_ ليش ما خلصني منهم
صفنت بوجهي حايرة
سكينة : ما اعارف
اخذت نفس وانا احسن حتى ضلوعي توجعني والله لو حيوان هم حرام ينضرب هل ضرب هذا مو بشر وبت لا حول ولا قوه
مددت وهيَ غطتني وكل حسبة براسي ولا الثانية القهر ماكل گلبي اكل وتوقعت اذا انامن ما راح اگعد بس رديت فتحت عيوني الصبح وعساني لا فتحتهن
گمت اسحل بروحي سحل الباب شبعده عليَّ صار بس فتحته صارت گدامي امي مشيت للمطبخ بلايه ما احاجيها وهيَ من الصبح استلمتني حجي وغلط خلت اكره يومي باول دقايق
معدتي من الجوع تطحن بس كل نفس للأكل ما عدي
مشيت اگعد بالحوش يم سكينة الجاي تكنس بيه
بس خلصت اجت وگفت گبالي فحطانة وبالگوات تحجي
سكينة : شوكت گعدتي
_ هسة
سكينة :اكلتي
_ لا ما اريدن
سكينة : اكليلج شي ولا تخافين انا حاجيت سعد
فزيت
_ شنو شحاجيتي
نزلت المكناسة وأجت گعدت بصفي
سكينة : هواي حاجيته امس من صعدت منج گال هوَ يحلها
تنفست حايرة وعيني اجت على اشجار قريتهم ما اعارف ليش تمنيته موجود تمنيت احجي وياه واگله اهلي تعبوني وگد ما مأذيني اريد اشكيلك يالغريب
عده اليوم وهدوئه يخوف وبيوم گاعدين وطب حسن حاله حال هاي انا الحاقده عليه طفرت اباوعله الدم يصب من راسة وشلون يمشي ما اعارف ،وجهه صاير خريطة هدومة كلهن ترابة ويسحل بوحده من رجليه
ركضتله امي وسكينة انخبصت تجيبله ماي وانا ضليت اباوع ما تحركت وما اجه ببالي غير ليث اتذكر كلش زين من سألني منو يضربج وگلتله حسن وبعيونة شفت وحسيت تحلف بيه
گعدته امي تسأل بيَّ وتمسح بدمه موتت روحها عليه عمن ولد وانا متت بأيد ولدها ما حركت روحها وگالت بتي احميها منهم صدگ هاي الدنيا كلشي تراوي
نادية : شصاير وياك هذا حالك شني
دنگ وكض رأسة متوجع
حسن : ما اعارف طلع بدربي واحد ملثم تضاربنه انا وياه بس بالاخير هبدني على راسي بتوثية واختفى
نادية : كسر بأيده شعده وياك
حسن : ما اعارف والله
سكينة : عمة چن رأسة يحتاج خياطات
نادية :أي مبين
خابرت امي على سعد حتى يّجي ياخذه للمستشفى بس طب باوعله يهز بأيده
سعد : هااا ابو الطلايب ويامن متعارك هل مره
حسن : گبل أجيت عليَّ بكلشي عدك انا الغلط
سعد :جا أنتَ الغلط راكبك من ساسك الراسك
حسن : راح تذلني مو تاخذني
سعد : گوم گوم
اجه يساعده يگوم واخذه وطلع وماكو بالساعتين وردوا لافين رأسة
سكينة : شني خيطوه
هز رأسة ب أي
سعد : ثمان خياطات
حسن : شو احسك متشمت
علگ سويج السيارة واندارله
سعد : والله عاشت ايده الطگك سوه الما سويته انا
حسن : گول والله
سعد : وقالع باب خيبر بعد شتريد
نادية : شني شبيك ويَّ اخوك
سعد : صاير ما اطيقنه مو بيدي
حسن : بعلي ماكو هيج أخو
سعد : شالك علي وسطرك وحطك بمكان الباب
صاح متنرفز
حسن : ترا هواي ذليتني سعد
مشى يريد يصعد بس وهوَ على أول باية من الدرج صاحله
سعد : لا تجيني بعد مدمه لان لو تموت ما راح اخذك يخيطوك
مشيت للغرفة لان مالي خلگ اگابله تمددت حتى انامن طگني النعاس نمت وريت ما نمت ولا غفت عيني هل ليلة على الصارلي بيها
°ليث°
گعدت تبجي چن بشر هاچن جروحة وانا ضليت اللوبن حيره تاخذني حيره تردني الحجي وياي ما يطلع واحس مثل الموس صار بزردومي
گعدت گبالها ثاني ركبتي ،بلعت ريگي بالخمس مرات طلعت من عدي
_ سعد مو تگولين احسنهم شلون رضى تعقدون
رفعت راسها ودموعها طاحت من عيونها للگاع وانا احسن بحيلي طاح وياهن
كوكبة : ما يعارف ،جان طالع وهمَ استغلوها
_ ليش رضيتي لو گايلة للشيخ ما راضية جان ما گدروا يجبرونج
كوكبة : هددوني اذا گلت لا ما يصبح عليَّ صبح حسن گعد يمي والسجينة بأيده
گمت افتر وكل مصايب الدنيا الشفتها تهون گبال مصيبة اخ يكض سجينة على أخته ويجبرها على بشر ما تريده
رديت گعدت بصفها بس بعيد عنها ضليت كل شويَ مباوعلها وهيَ ساكتة وبس دموعها اليحجن
مر وكت طويل الا اندارتلي تسأل جنها متفطنه
كوكبة : أنتَ الضربت حسن
باوعت بعيونها المورمات وهزيت رأسي ب أي وگلت
_ كل ضني الايد التنمد عليج اكسرها بس ما اطوني الوكت البي اصيرن مسؤول عنج
°كوكبة°
ضليت مركزة اريدن افتهم حجية بس ما اطاني مجال افكر هواي من دنگ يعدل بشعره ورد رفع رساله عينة بعيني صارت
ليث : من سنين وانا اتاني شوكت تجين بمحرم شارده من اهلج بلايه ما يعارفون حتى تحظرين المجلس جنت دوم اسمع عنج من البنات كوكبة
بت ضاري أم الشط ما جنت أعارف ليش هيج يسمنج الا ما باليوم التلاگيت بي وياج هنا جان عدي فضول هواي عنج صح شايفج اكثر من مره بس جنت بس اريدن احجي وياج وما اعارف شني المخليني هيج عدي فضول بكلشي ينذكر بي اسمج
اخذ نفس وكمل
ليث : صرت من اجي اگعد هنا بس علمود اشوفنج وانا جنت ما اوصل غير بالزايد مرة بالسبوع بس علمودج صرت اتعنا من البيت لهنا انا بساع هويتج بساع گلت هاي هيَ الغريبة الراح امشي عليها ورا عرس الولد
ويَّ كل حجاية يحجيها احس بحجم خسارتي ويَّ كل حرف گاله احسن انا شگد ماعدي حظ وفالي بس المصخم الما يعارف حتى يحجي
من القهر لو اگومن اغط روحي بالشط هسه ما تطفى ناري انا شخسرت وشني اللفاني
من شافني ساكتة ما حجة بعد وضلت بس صوت جرة نفس كل واحد بينة مسموعة گمت على حيلي من حسيت الوقت تأخر وهوَ طفر بساع من گمت انا نكث هدومة ومشى گبلي وگبل لا اوصل صاح بأسمي انداريتله
بلع ريگة
ليث : اريدن اگلج الله يوفقج بس گلبي ما يطيني
غمضت عيوني ورديت فتحتهن
_ ليث
دنگ ورد رفع رأسة بساع من گلت
_ انا حيل تعبت أنتَ الغريب احسك احسن من اهلي الما يفهموني
بقى صافن عليَّ يريد يحجي بس ما يعارف شني اليگولة ويهون عليَّ درت وجهي وكملت طريقي للجحيم مو البيت طبيت والخوف ماكل گلبي ابد ما طالعة من أخر مرة شافني بيها حسن ،بس هسة اختنگت واحسن بگلبي شابة بيه النار وما يهون عليَّ غير مكاني "الشط"
°غاية°
فزيت على ايد امي تندهني اگومن فتحت عيوني والنعاس كاتلني
_ هااا يمة
زهرة : گومي يمة نسوي الريوگ
_ بيش الساعة
زهرة : راح تصير بثمانية
_ يا يمة عوفني انامن بعد تعبانة
زهرة : ولج جا منو يعاوني
گمت وانا الحايط هسة الگدامي ما اشوفنة من النعاس طلعت ورا امي اتردم هسة حسيت بعازة هيوفة ابد ما تخليهم يگعدوني وهيَ
التگعدلهم يوميا غسلت وجهي ومشيت للمطبخ يم امي
زهرة : تعاي اثرمي طماطة للبيض
_ جا والگيمر
زهرة : مشى نوح يجيبة
_ خوش
ربع ساعة وطب نوح بأيدة صواني گيمر وحده فوگ الثانية حطهن ع الكاونتر
زهرة : جا الصمون والبيض وين
نوح : فقار راح يجيبهن هسة يّجي
بعده يحجي وطب فقار بايده طبقتين بيض وعلاگتين ،سلم وحطهن ع الكاونتر
زهرة : اخذلكم طبقة بيض وهاي العلاگة وأنتَ نوح اخذ صنينة الگيمر وأمشي وياه
نوح : والله ولا اروح
فقار : ليش تستحي لان مرة أخوي أختك
خزرة
نوح : خليني محترمك
ضحك وشالهن وطلع ونوح شال الصينية ومشى وراه گبل لا نخلص امي گالت امشي اگعدهم صعدت ادگن الباب عليهم وما اعارف شبيَّ مستحية
بس فتح الباب گتله
_ صباح الخير أمي تگول اگعدوا تريگوا
صخر : هسة نجي
هزيت راسي ب أي ونزلت بساع اردن يم امي من شفت روحي انخبصت مشيت اسحل بجفون ومن أيست منها تگعد گعدت نسمات بساع گعدت وأجت وياي ننگل الاكل على السفره
بس خلصنه صحت جدي وجده ومشيت صحت أبوي من برة التموا كلهم وضل بس ليث صعدت حتى اگعده
طبيت لغرفتة ضلمة ،شغلت الضوه و وگفت يم الجرباية نايم على وجهه بلاية فانلية ندستة من چتفة فز يباوعلي بالگوات فاتح عينة چنه
هستوه نايم
_ انزل تريگ
گلب على ضهره وهز رأسة ب أي طلعت من الغرفة و صاروا بوجهي صخر وميمنة أبتسمت وگتلها
_ صباح الخير ياعروس
أبتسمت وأجت يمي
ميمنة : صباح النور
نزلنه انا وياها وهوَ گدامنه تلگتهم أمي تهلهل وجدي وأبوي باركولهم گعدنه كلنا على السفرة واجه نوح گعد بصفي
دنه روحه يمي يحجي بصوت ناصي
نوح : يوم الالي ادعيلي عليج الله
_ خاب ما تسكت بعدك زغير
نوح : العمر مجرد رقم
_ اممم صح
زهرة : صبي الجاي يمة
_ اطيني الصنينة نوح
اطانيها حطيتها بصفي اصبن جاي وهوَ يحجي البگلبي
نوح : منا وجاي راح يكربوج أنتِ بدال هيوفة
اطيته گلاص استكان الجاي يطي الجدي وانا اگله
_ عادي ميمنة موجوده
نوح : صح ،مجنصة بهاي
أبتسمت من صارت عيني عليها تاكل مدنگة رأسها حطيت گبالها گلاص الجاي رفعت راسها وباوعتلي تتشكر مني بعيونها كملت وبديت انا اكل وكلساع اگولن بگلبي
_ حياة هيوفة چانت صعبة
بس خلصنا وكفيت المواعين گالت امي نمشي لبيت عمي باقر گبل لا تجي عمة شيماء لبست عباتي وضليت واگفة اتانيها وهيَ أجت يمي تحوس تريد اقنع امي
ميمنة : گلي لعمة امشي وياكم ،اريدن اشوف هيوفة
_ ما يصير وين تمشين
طبت أمي تسأل
زهرة : شكو
ميمنة : عمة خلِ امشي وياكم اشوفن هيوفة
زهرة : يااا ولج وين ماشية غير عروس مايصير تطلعين
ميمنة : جا شلون
زهرة : ضلي ما متوازية تمشين
ما حجت شي وانا وامي وجفون اجت ويانة مشينالهم
°هيوفة°
تحركت اريدن اعدل نومتي بس حسيت شي كاضني فتحت عيوني وأبتسمت من شفت روحي نايمة على صدره ايده محاوطاتني رفعت روحي اباوع لوجهه
وبگلبي اگولن
_ فدوه لهل وجه
ضحكت من جرني يردني بمكاني حطيت راسي على صدره وانا ارسم دوائر بأصبعي واحجي وياه لان گاعد
_ ضيرم هدني اريدن اگوم
فتح ايديه بس ما لحگت اگومن من گلبني وحط رأسه برگبتي يجر نفس ويردد بصوت ذبلان
ضيرم : افيششش احلى نفس اتنفسة بكل حياتي
ضحكت خجلانة وجريت روحي منة اريدن افلت وخر وگمت انا لبست روب طويل ومستور فوگ هدومي حتى امشي للحمام وهوَ ما كف مني اذا ما يحجي عيونة تحجي
مشيت للباب وانا احطن الحجاب على راسي وهدومي بأيدي
_ ضيرم بداعتي لا تباوع هيج والله جاي تخجلني
ضحك وگام من مكانة
ضيرم : شلون ما نباوع على حلالنه
_ نضراتك تخليني استحي
غمزلي
ضيرم : هو انا احبن من تستحين
رمشت بعيوني وطلعت بساع گبل لا يكضني سبحت ورديت للغرفة وهوَ بس رديت مشى يسبح وگفت گبال المراية امشط بشعري و هديت المشط من اندگ الباب
صحت
_ اتفضل
فتحت الباب وطبت مبتسمة وبس باوعتلي حصرتها الضحكة
بصائر : صباح الخير ياعروس
_ صباح النور
رديت شلت المشط اكمل شعري وهيَ حمحمت ووگفت وراي
بصائر : رگبتج يرادلها شركة مال باودر الا نغطي هاي المصايب
انداريت خازرتها وهي تضحك وانا وجهي دخن من الخجل
بصائر : اگلج شي
_ لااسكتي
بصائر : لا خلِ اگولن
_ مو اعارف بيج راح تحجين حجاية أكبر من راسج
بصائر : لا والله شي زغيررر
_ شنو هوَ
بصائر : انا مصدووومة
_ بشني
بصائر : ما توقعت كل هاي المصايب تطلع من أبو گمزة
_ ليش
بصائر : والله ما اعارف چنت احسنه عاقل
جاي ارد عليها وطب ضيرم بأيده الخاولي ينشف بشعره
ضيرم : خليت العقل لرجلج
ضحكت متفشلة ودنگت تريد تمشي بس وگفها من گال
ضيرم : ضلي انا راح انزل
بس مشى بصائر شمرت حجابها ضحكت وانا اباوعلها
_ تحجين علينا شو أنتم هم ما مقصرين
بصائر : شبيج جا غير على حس الطبل خفن يرجلية
ضحكت ولميت شعري بالقراصه
بصائر : حطي مكياج خفيف
هزيت رأسي ب أي وهيَ ضلت يمي بس شافتني كملت گالت
بصائر : امج والبنات جوه ترا
_ يااا هسه تذكرتي تحجين
بصائر : گلت تخلصين الا اگلج
طلعت شال اللبسة واحجي وياها
_ استحي انزل
بصائر : حقج انا مصباح عرسي ضليت ساعة واگفة يم الباب اگولن انزل لو ما انزل
صفنت عليها حايرة وهاي تزيدها عليَّ ما تنقصها اندگ الباب وطب
ضيرم : شني وين صرتن
مشت تريد تطلع بس باوعتلنه مبتسمة وگالت
بصائر : مرتك تستحي تنزل
باوعلي وهيَ نزلت وسدت الباب وراها من شافتة ساكت اجه وگف گبالي يعدل بشالي جرني لصدره أبتسمت وانا اشمن عطرة وبعدني لهسه ما مصدگة انا بهل قرب منة
باسني من راسي وگال
ضيرم : تنزلين
وخرت اهز ىأسي ب أي ،أبتسم وگرص خدي وباس اصابعة
ضيرم : اريدن احطج بخبزة واكلج
_ أخوك فقار حجاية والثانية گال احطن بصائر بخبزة واكلها
ضحك يمسح على شواربة ومشى يطلع گبلي وگبل لا ننزل الدرج لزم ايدي ونزلنه سوه ويَّ صوت هلاهل عمة وريحانة بين الخجل والفرح احسن بروحي ترجف وانا ايدي بأيدة هدني و وحده وحده باركلي وانا شويَ واموعن من المستحى
جابت صينينة ريوگنة بصائر اخذها منها وحطاها گبالي
ضيرم : جا شني بس احنه ناكل
بصائر : أي كلنه تريگنة ضليتوا بس أنتم
باوعلي
ضيرم : تقربي
تقربت على الصينية شگد جوعانة بس لان هوَ گاعد استحي اكل حس عليَّ وصار هوَ يوكلني وياكل وانا أذني يم أمي وعمة گاعدات يسولفن ويمهن البنات
بس خلصنة شلت الصينية اوديها للمطبخ وهوَ لحگني عزلتهن اريد اغسلهن وطبت
بصائر : شجاي تسوين
_ اغسلهن
بصائر : امشي اطلعي
ضيرم : واذا غسلتهن
بصائر : مايصير عروس وفال مو حلو عليها تشتغل بمصباح عرسها
كضني من ايدي
ضيرم : جا اغسليهن أنتِ
جرني بطلعني وبصائر تدردم ورانه وانا مبتسمة اعارفها جاي تداهره وتريد تحجي طبعها صاير كلش چن طبع فقار
شويَ ومشن امي والبنات وانا صعدت للغرفة من اجو عليه الولد وطلع نزعت شالي وتمددت بالفراش هستوني غفيت وحسيت عليه من تمدد بصفي وجر الغطا يتغطا وياي
من حس عليَّ فزيت جرني على صدره وغطاني زين بساع رديت غفيت لهسة تعب الايام الفاتن بيَّ واحس لو شگد ما انام ما اعوض
°غاية°
واگفة يم باب المطبخ واباوعلة گاعد على دجات الديوان وصافن مشيتله مستغربة من حاله أول مره اشوفنه هيج مگدر خلگه
_ ليث
رفع رأسة ورد دنگ يهز برجله
_ شبيك ليث
ادنه يسويلي مكان بصفة گعدت وانا متانيتة يحجي ليش هيج حاله مگلوب گلب وهوَ أمس كلشي ما بي
_ شصاير وياك
مسح وجهه بأثنين اديه وبس نزلهن باوعلي وانا متانية جوابة
ليث : كلشي ما بيَّ
_ شلون كلشي ما بيك وأنتَ حالك مگلوب گلب
بلع ريگة وبصوت ناصي نطق اسمها
ليث : كوكبة
رمشت بعيوني مستغربة من طاريها بهل وكت
_ شبيها
ليث : الغريبة الجنت رايدها انخطبت جبورها اهلها
حجاهن كلهن دفعة وحده بقيت جامده لا اخذ ولا اطي ما توقعت هذا المگدر خاطره ابد گلت كلش كلش عده مشكلة بالگيعان لو متعاركلة ويَّ فلاح لو شوف شكو
تحمحمت وسألته
_ من شوكت
جر نفس صدره عله ورد بشكل واضح ومن جرته للنفس عرفت السالفة مو هينة
ليث : من سنين كلما تچيچن انا عدي فضول ناحيتها واريدن اعرف شني سالفتها ليش هل بنية احسنها مختلفة شفتها يم الشط وبساع حسيتها اخذت شي مني صرت احسب الأيام الما تجي بيهن وشفت روحي رايدها حلالي گلت احاجي جدي واحاول وياه بس ما لحگت ما خاطي خطوه بعدني وانخطبت جبروها على أبن خالتها
بس اسمعلة وحرف ما نطقت الا من خلص سألته
_ شوكت انخطبت
ليث : ما اعارف بس اليوم لاگيتها وگالتلي ذبلانة اكثر من گبل تعبوها اهلها غاية
گلبي احسن بي انمرد عليها وعلى أخوي هل بنية من زمان اعارف بيها مظلومة بس مو لدرجة يجبورها على الزواج
ضليت گاعده يمة حايرة حتى ما اعارف شحجي گام وگف على حيلة
ليث : طبي جوه انا ماشي للگيعان
_ شعدك رايح ما ترتاح شويَ
ليث : بس اشوفن مكاين الماي واردن
_ خوش بس لا تتأخر
گمت طبيت جوه وهوَ مشى تمددت بفراشي اريدن انام ما اگدر ضليت اتگلب بفراشي ومر وكت طويل الا غفت عيني ومن گعدت ضليت حايرة بالبيت افتر بين الشغل والولد گضه يومي
°حواري°
گمت من فراشي اتثاوب واباوع على الكانونه بأيدي
مأوته وصاير بيها زراگ طلعت من الغرفة بساع من سمعت صوتة
بس شافني گال
ضيرم : هاا شني
رفعتله ايدي
_ شيل الكانونة موتتني
ضيرم : تعاي
مشيت گعدت يمة ،وخرها وگال
ضيرم : اكلي مو اجي والگاج بلاية اكل
هزيت رأسي ب أي اندار على البنات گاعدات يتريگن
ضيرم : اجبرنها تاكل اعارف بيها تچذب عليَّ وما تاكل
هيوفة : لا بكيفها ،انا بايدي اوكلها
أبتسملها وگام يعدل بقميصة طلع و وراه طلعت هيوفة وبصائر ضلت گاعده تاكل ومبين هيج على اعصابها هيج تاكل من لا جاره
شويَ وردت هيوفة گعدت تكمل ريوگها وانا اباوعلهن لعبانة روحي صاحت
بصائر : خايبة كافي انا اكل بالگوات لا تباوعين هيج
ضحكت وگمت للغرفة ،طلعت دفتر الرسم وگعدت ارسم بس خلصت باوعتلها غرابين وبنصهن حمامة واگفات على غصن شجره وجواهن ساگية
تثاوبت ومددت بنص الهوسة غفيت وبساع فزيت من حسيت أحد گاعد يمي تلفتت ادور بعيوني ماكو احد جا منو الجان يمي
طفرت بساع من تحركت البرده طلعت اركض واحسن بگلبي طاح ركضت لحضن امي أرجف
نجوى : بسم الله شبيج يمة
_ يمة البردة تتحرك وحدها
نجوى : امشي هيوفة شوفي خاف الشباك مفتوح
بلايه ماتحجي مشت شويَ وردت
هيوفة : الشباك مفتوح وهل تتحرك البرده
بلعت ريگي و وخرت امسح على گصتي بأيدي
_ والله احسن گلبي طاح
بصائر : صايرة خوافة ولج
_ أي والله ما جنت هيج
بصائر : تاكلين شي ما جعتي
_ لا ما اريدن
بصائر : جا ضيرم شحجة
_ خاب بعلي ما اشتهي
هيوفة : الا اگله عليج
_ خاب شبيج مو بت عمي أنتِ
ضحكت
هيوفة : لا مرة اخوج
_ خرررب ترا والله ما اشتهي
هيوفة : لگمتين علمود الدوه
سكتت لان مبين بعد قفلت من شافتني ساكته گامت صبتلي وأجت گعدت گبالي
هيوفة : يلا اكلي
شلت الخاشوگة وبديت اكل بالگوه على روحي لگمتين وحسيت بمعدتي گلبت هديت الخاشوگة ما اگدر اكل بعد
هيوفة : هااا شني
_ ما اگدر والله
هيوفة : شني السالفة
_ والله معدتي
سكتت من حست بيَّ صدگ متوجعة اخذت الصنينة ومشت وضيرم بس رد جاب دواي واجه گعد گبالي
ضيرم : ايدج يا حبابة
_ خليها على باجر
ضيرم : لا مايصير
_ خاب والله توجعني
ضيرم : حتى تطيبين بساع شبيج
مديتله ايدي حطلي الكانونة وشد المغذي بيها وعلگة ورد گعد يمي
ضيرم : اكلتي مو
هزيت رأسي ب أي
هيوفة : بس لگمتين
ضيرم : المهم اكلت ،صدگ امي وينها
هيوفة : يم بيت اهلي هسة مشت تشوف جدة
ضيرم : لو بعدج يمهم چان لحگتها
ضحكت ودنگت وانا حتى لو مريضة كل ما يگعدون يمي اضلن بس اتبسم
ضيرم : هااا شو فاتحة حلگج
رمشت بعيوني
_ شگد حلوين أنتم
ضيرم : من زمان انا حلو
هيوفة : وانا هم
ضحكت وضليت حاطة ايدي على خدي ضلوا يحجون وانا صافنة عليهم چنت اگول احلى اثنين فقار وبصائر لا هسة كسروهم هيوفة وضيرم
ضلوا يمي بس خلص المغذي شاله وگال
ضيرم : تضلين بالكانونة لان الوريد جديد حرامات
هزيت راسي ب أي وانا اكثر شي اكرهنه من ابات بالكانونة من ضوجتي لبست عباتي وگلت لضيرم يوديني لبيت جدي وهوَ ما حجة شي لان بس يرديني اطلع من الخنگة الانا بيها وصلني ومشى يرد للبيت لان ماكو احد يم البنات
طبيت من باب المطبخ اصيح
_ وينكم يا اهل الدااار
طبيت وانا انزع بعباتي بس شافتني جده گالت
غضة : هاي مني حواري الچنة
أبتسمت ومشيت سلمت عليها وعلى عمة والبنات وگعدت بصف امي
أجت گعدت بصفي
جفون : ليش ما تجينة هااا
_ جا غير مريضة ولازم أنتِ تجين
جفون : مو اجيتج
_ صار شگد
جفون : چم يوم
_ اي جا شني غير تردين تجين تشوفين حواري الچنة شلون صارت
جفون : خاب شو ماخذه الدور كلش چم يوم وتطيبين
_ احسن ما راح اطيب
جفون : دنجبي عجبج الوضع لان دللوج
_ من يوم يومي مدلله
جفون : لا تحمين
ضحكت وگمت گعدت بصفهن يسولفن وجفون گامت وراي
نسمات : اريدن امشي والله هسة راح يلعبون بيَّ لعب صار هواي هنا
غاية : خايبة ضلي شعدج ماشية
نسمات : ما تعارفين شراح يسوون بيَّ نجوم الظهر اشوفنها من اروحن لان تأخرت
غاية : جا خليها على باجر الصبح وأمشي
نسمات : هوَ هيج اريدن اگول لخالة تحاجي ليث
رفعت راسي من سمعت صوتها
ميمنة : السلام عليكم
ردينا عليها السلام وگمتلها اسلم عليها لان ما شايفتها صار چم يوم سلمت على أمي وگعدت يم عمة زهرة تبسبس وياها بمعارف شني وانا حتى لو مريضة بس اعراض الفضول تضل عدي
گمت امشي وراها من مشت يم كتاكيتها گعدت گبالهن وانا وگفت اباوعلها طب نوح وگف وراها گامت من اندرات وشافته
عدلت شالها وهوَ يباوعلها ساكت ضليت اباوع عليه واردن اباوع عليهم هذولي شبيهم
حمحمت وبصوت ناصي سألته
جفون : رايد شي
نوح : تووو سلامتج يابة
اباوعلها مو طبيعية بس تدير عيونها منه وهوَ يباوعلها چنه مختنگ عافنه ومشى وانا ضليت مثل الاطرش بالزفة
جفون : شبيج
_ شكو شصاير وياكم
جفون : ماكو شي
_ لا تچذبين
جفون : هو صاير مو طبيعي وانا ما اريدن احجي وياه
_ مو طبيعي شلون
جفون : بعدين احجيلج
_ انا مو اگلج يحبج
جفون : وانا ما اريدنه تعارفين شني معنى انا اعتبره أخوي
_ بس هوَ ما يعتبرج اخته
جفون : جا شني امشي على مزاجة
_ طبعاً على مزاجة
جفون : انجبي لا اطگنج
_ هوَ عوزي بس طگه حتى اموتن
ضحكت ومشت تطلع من المطبخ وانا لحگتها اخذنه بالساعة گاعدين وردينا انا وامي للبيت
°غاية°
واگفة اغسل المواعين وهنَّ يفترن يمي صرعتني بالسوالف وجفون ولگت احد يسملعها جيب اليسكتها بعد
صحت
_ خايبات كافي ولچن راسي
نسمات : انا ما حاجية
_ اعرف هاي جفون انفتگت بعد
جفون : أنتِ انفتگتي
رفعت الماعون عليها
_ اطگج بي والله
جفون : اطگج بالجدر انا
_ ادبسززز
جفون : انجبي راية
_ خايبة العرمة الصلفة رموش
جفون : رايت العشيرة اسكتي ترا محترمتج
_ لا تحترمين وشوفي شأسويلج
جفون : اجي اعضنج والله
_ تعاي حتى احجي لصخر عليج شلون تعيلين ببنات غازي
جفون : ايااا حقيرررة
رديت اغسل المواعين واحجي وياها
_ جا شعبالج وحده بوحده
غمتتي ومشت كملت المواعين وطلعت للحوش اكنس بي واندگ الباب مشيت اشوفن منو وبس فتحته صارت گدامي ام أحمد رحبت بيها وبساع صحت أمي اجت تلگتها تطببها للديوانية
مشيت بساع ترست دولكة الماي وطبيت اقدملهن
أم احمد : والله ياخية گلت امرن عليج وهم احجي وياج بسالفة
زهرة : كل الهلا بيج وتأمرين بالتردي
أم احمد : بعد روحي ما تقصرين
طلعت من الباب ولاگتني جده تطب تريد وخرت اسويلها درب ومشيت للمطبخ حطيت قوري
الجاي على النار وافكر بسلا اجت على نفس السالفة الحجت بيها گبل فتره
صبيت الجاي واخذته الهن قدمته وضليت اريدن اگعد اسمع شكو من بدن يحجن
أم احمد : انا والله يا ام محمد جايتكم بسالفة حجيت وياج بيها من گبل وگلتي الله كريم ويصير خير
غضة : والله الشور مو شوري تعارفين عدها عمام وعمها أبو صخر هوَ ولي امرها والمسؤل عنها
أم احمد : يعني شني
غضة : احاجي أبو محمد وعمامها واردلج خبر
أم احمد : جا خوش ،انا اترخص
گامت تمشي البيتها وصلناها للباب وردينا وبالليل من التموا على العشا نزلت الخبزة من ايدها وگالت بصوت مسموع
غضة : عدي حجاية وياكم
باوعلها جدي يسأل
رأجس : خير شكو
غضة : اليوم أم احمد اجت خطبت جفون لأبنها وانا گتلها اشوفن رايكم واردلج خبر
انا گاعده بصفة اباوع عليه انگلب گلب ضل بس يباوع بالوجوه
رأجس : مابيها شي بيت ابو احمد خوش وادم واحنه النه سنين ناعرفهم
صخر : أي والله ونعم منهم
رأجس : شتگول محمد
محمد : انا ماعدي مانع بس الشور شورها
نوح : يا الشور شورها بوية جا انا شحاجي وياك
محمد : تريدك
نوح : مو بكيفها انا نهاي عليها ولغيري ما تصير
شكرا لزيارتكم عالم روايات سكيرهوم
