رواية ديون النبض الفصل الثاني والعشرون 22 بقلم مروه صياح


 رواية ديون النبض الفصل الثاني والعشرون 


بعد فترة طويلة من الضغط والامتحانات والسيشنز العملية اللي كانوا بيختبرونا فيها، أخيرًا جه الوقت اللي نقدر ناخد فيه نفسنا ونعيش أسبوع مليان فرحة وسعادة.

الفترة اللي فاتت كانت صعبة على الكل. حازم كان مضغوط في المصاريف وتجهيز شقته، وإحنا كنا معاه في كل خطوة، بنرتب ونجهز ونفرش لحد ما أخيرًا خلصنا كل حاجة، وبقت شقته جاهزة.

ومع استقرار مجد مع ياسين في الشقة، واقتراب فرح حازم ورغد، البيت كله بقى مليان لهفة وفرحة مش عادية. كل يوم كان بيعدي، كنا بنحس إننا قربنا أكتر من لحظة جميلة مستنيينها كلنا.

أما مجد، فكان أكتر حاجة لفتت نظري إنه اتغير فعلًا.

في الأول، كان ساكت كتير، وقاعد يفكر لوحده، وكأن فيه حاجة شاغلة باله ومش قادر يتخلص منها. لكن بعد ما استقر مع ياسين، وبقى يقضي وقت أطول معانا، حسيت إن حالته النفسية اتحسنت بشكل واضح.

بقى بيهزر ويضحك، وكلامه معايا زاد، ونظراته بقت مختلفة. كان بيحاول يستغل كل لحظة نكون فيها مع بعض، وكأنه أخيرًا لقى الجو اللي كان محتاجه، جو العيلة واللمة والناس اللي بتحبه وبتخاف عليه.

وجاء الأسبوع اللي كنا مستنيينه، أسبوع فرح حازم  ورغد.

فكرنا قبل الفرح إننا نخرج كلنا مع بعض، نروح جنينة أو أي مكان مفتوح، نفطر ونتغدى ونقضي اليوم في اللعب والضحك بعيد عن أي ضغط.

وفعلًا، خرجنا كلنا، وكان يوم من الأيام اللي صعب تتنسي.

أنا ورغد وحازم ومجد قررنا نلعب استغماية، وربطوا الغماية على عيني، وبدأت أحاول أستدل على مكانهم من أصواتهم وضحكاتهم وهما بيجروا حواليا ويبعدوا عني.

مديت إيدي أكتر من مرة أحاول أمسك حد فيهم، لكن كل مرة كان بيفلت مني، لحد ما أخيرًا إيدي جت في حازم ومسكته.

شلت الغماية من على عيني، وأول ما عرف إني مسكته، شالني وفضل يلف بيا، وأنا بضحك ومبسوطة جدًا.

وبعدها جه دور حازم إنه يدور على حد، ولما مسك رغد، ما صدق إنه وصل لها. شالها وحضنها ولف بيها، وهي بتضحك.

وقفت أبص عليهم، وابتسامتي وسعت من غير ما أحس. كنت مبسوطة بسعادتهم، ومغمضة عيني للحظات، مستمتعة بالفرحة اللي ماليانا كلنا.

وبعدها جه دور رغد، ومسكتني أنا المرة دي، فحاولت أقوم ياسين وماما يلعبوا معانا. في الأول كانوا معترضين، شايفين إنهم كبروا على الجري والتنطيط بتاعنا، لكن في الآخر اتحركوا وشاركوا معانا بطريقتهم الهادية.

فضلنا نلعب ونضحك، لحد ما إيدي جت في مجد.

في اللحظة دي، قلبي دق بسرعة غريبة.

حسيت بقربه مني، وبعدت إيدي بسرعة، ولما فتحت عيني لقيته واقف قدامي وبيبتسم.

حاولت أهرب من نظراته، فحطيت الغماية على عينيه وقلت له:

وعد: الدور عليك يا دكتور.

لكن قبل ما ألحق أجري وأبعد عنه، لقيته مسكني من وسطي.

اتجمدت مكاني للحظة، وحسيت بحاجة غريبة بتتحرك جوايا. قربني منه أكتر، وكأنه بيضمني لحضنه، وأنا مش عارفة أتصرف إزاي.

زعقته بسرعه وبعدت عنه ، وسيبتهم ومشيت بعيد.

الحقيقة إني ما كنتش متضايقة منه، ولا من قربه. بالعكس، كنت مبسوطة، لكن في نفس الوقت كنت حاسة إني بعذبه معايا.

أنا قريبة منه، وبحبه، وكل اللي نفسي فيه إني أكون معاه، ومع ذلك كل ما يقرب خطوة، ألاقي نفسي برجع خطوتين لورا.

قرب مني حازم، وبصلي وكأنه فاهم اللي جوايا، وقال:

حازم: وعد، إيه رأيك بعد أسبوع فرحنا، إنتِ ومجد كمان تلبسوا الدبل؟ بلاش تتعبي نفسك أكتر  أنت وهو من كده .

بصيت له وسكت شوية، مش عارفة أرد عليه بإيه، وبعدها قلت:

وعد: لما ترجع من سفرك، نبقى نتكلم في الموضوع ده.

حازم ما تضغطيش عليه أكتر من كده......

وخلصنا يومنا، وبدأنا نستعد لأسبوع الفرح.

---

البيت كله كان مليان لهفة وفرحة. كل يوم بيقرب كان بيزود حماسنا، لحد ما جه اليوم اللي كنا مستنيينه.

عزمنا أصحابنا وأخواتنا وحبايبنا، وكل واحد فينا كان بيستعد بطريقته.

يوم زفاف حازم ورغد كان مختلف عن أي يوم تاني.

كلنا كنا مهتمين بمظهرنا، وياسين وماما كانوا في قمة سعادتهم، ومجد كمان كان مختلف.

وأول ما عيني جت عليه، حسيت إن الدنيا كلها نورت قدامي.

هو ده حبيبي!

الكلمة دي عدت في بالي، فابتسمت لنفسي، وبعدها بدأت أعاتب نفسي.

أنا فعلًا ليه ببعد عنه؟ ليه كل ما يقرب مني أحاول أهرب، مع إن قلبي مش عايز غيره؟

وقفت أبص على حازم ورغد وهما قاعدين جنب بعض في الكوشة. ضحكتهم، ونظراتهم لبعض، وإيديهم اللي متشابكة، كل حاجة فيهم كانت بتحكي عن الحب اللي جمعهم.

في اللحظة دي، تمنيت من كل قلبي إني أكون أنا ومجد مكانهم.

يا رب، أنا ومجد نبقى زيهم، وربنا يحفظهم ويسعدهم.

ليه أحرم نفسي من سعادتي؟ ليه أفضل أأجل فرحتي مع الإنسان اللي بحبه، وأنا عارفة إنه كمان بيحبني؟

قلبي كان طاير من الفرحة. أخيرًا شفت حازم مع الإنسانة اللي اختارها وبيحبها، وشوفته بيبدأ حياته وبيكون أسرته.

الفرح كان مليان سعادة، وكلنا كنا مندمجين، بنسقف ونرقص ونغني.

لكن وسط كل ده، كانت عيني بتروح لمجد كل شوية.

وهو كمان، كانت عينيه ثابتة عليا، وابتسامته مرسومة على شفايفه.

قرب مني، وبصينا لبعض من غير ما نتكلم. كانت عيوننا بتحكي حاجات كتير جوانا، حاجات يمكن الكلام نفسه ما كانش هيقدر يوصفها.

ولأول مرة، لف دراعه حوالين وسطي، وحط إيده التانية على كتفي.

اتلاقت عيوننا للحظات، وابتسم لي وقال:

مجد: وعد، عايز أرقص معاكي.

كنت مكسوفة جدًا ومحرجة، لكن في نفس الوقت ما حسيتش إنه شخص غريب عني. بالعكس، كنت حاسة إني قريبة منه بشكل عمري ما حسيته قبل كده.

بدأنا نرقص، وفي الأول كنت متوترة ومش عارفة أتصرف على طبيعتي، لكن مع الوقت انسجمت معاه.

وسط الدوشة والأصوات والناس اللي حوالينا، ما بقيتش شايفة غيره.

ولأول مرة، ضمني مجد لحضنه بجد.

حسيت بكسوف شديد، لكن كان فيه إحساس تاني أقوى من الكسوف؛ إحساس بالأمان والراحة، وكأن المكان اللي أنا فيه هو مكاني الطبيعي.

كان ماسكني أكتر، وبيهمس في ودني بكلام خلاني أحس قد إيه هو مستني اللحظة دي من زمان.

مجد: وعد، نفسي نبقى مع بعض.

كنت خايفة أقرب منه أكتر، وخايفة أرفع إيدي وأحضنه زي ما هو بيحضني. لكن في اللحظة دي، حسيت إني تعبت من الحاجز اللي حطاه بيني وبينه.

ليه أفضل أخاف من حاجة أنا نفسي فيها؟

ليه أبعد عنه وأنا كل اللي بتمناه إني أفضل في حضنه؟

وفجأة، لقيتني بكسر الحاجز اللي جوايا، ومديت إيدي وحضنته أنا كمان.

كانت أول مرة أسمح لنفسي أقرب منه بالشكل ده، وأول مرة أحس بالراحة دي وأنا بين إيديه.

مجد بعد عني سنة صغيرة، وبصلي كأنه مش مصدق إني أخيرًا بادلتُه الحضن.

مسك إيدي، وخرجنا بعيد عن القاعة، لحد ما بقينا في مكان نقدر نتكلم فيه لوحدنا.

بصلي، وكانت ابتسامته مختلفة، وقال بصوت مليان مشاعر:

مجد: وعد، أنا بحبك قوي.

وطيت راسي من الكسوف، وضربته على كتفه وقلت:

وعد: بعدين معاك!

ضحك، وبصلي وقال:

مجد: وبعدين معاكي إنتِ؟ مش قلتلك ما توطيش راسك كده أبدًا؟

رفعت عيني وبصيت له، ولأول مرة ما حاولتش أهرب من نظراته.

وعد: مجد، أنا كمان بحبك قوي.

ما استناش أقول أي حاجة تانية. شالني وحضني ولف بيا، وفضل يعلي صوته وهو بيقول:

مجد: بحبك يا وعد! بحبك!

كنت ببص له وبضحك من قلبي، ومش مصدقة إن اللحظة اللي كنت بخاف منها وبأجلها، بقت حقيقة قدامي.

لكن وسط فرحتنا، ما أخدناش بالنا إن فيه حد كان بيراقبنا.

حد شافنا، وعرف بعلاقتنا.

وإحنا كنا لسه غرقانين في فرحتنا، مش عارفين إن فيه عين تالتة شايفة كل حاجة، وإن اللحظة اللي جمعتنا أخيرًا، ما كانتش سر بيني وبين مجد زي ما إحنا فاكرين.

ديون النبض 🫀

بقلم الكاتبة مروة صياح 🎯✍️

فضلت واقفة أنا ومجد، وكل واحد فينا حاسس بفرحة جديدة عليه. فضلنا نتكلم مع بعض شوية، لحد ما مجد بصلي وقال لي:

مجد: أنا مش شايف نفسي إلا وإنتِ معايا يا وعد. عارفة يعني إيه مجدي الحقيقي بالنسبالي؟ إنك تكوني موجودة في حياتي وجنبي.

بصيت له وسكت، فابتسم وكمل كلامه:

مجد: إنتِ مجدي أنا.

فضلت باصة له، مش مستوعبة هو يقصد إيه بالضبط. هو شايفني إيه في حياته؟ للدرجة دي أنا بقيت مهمة عنده؟

مجد اللي وصل لمكانة كبيرة، واللي بيحقق أهدافه وطموحاته، واللي اسمه بقى معروف في مجاله، كان بيقول لي إن كل ده مش هو المجد الحقيقي بالنسباله.

هو شايف إن وجودي جنبه هو الحاجة اللي نفسه يحققها ويحافظ عليها. كأن كل اللي وصل له ملوش معنى من غيري.

ابتسمت له وقلت:

وعد: وإنت كمان يا مجد. بالرغم من إن الدنيا بتديني وعود كتير، وبشوف حاجات منها بتتحقق قدامي، وبالرغم من حب الناس اللي حواليا، وحب ياسين وحازم أخويا، لكن أكبر وعد ليا هو إنت. بحس إن الدنيا كلها بتوعدني بيك. إنت كمان وعدي أنا.

قرب مني وقال بصوت هادي:

مجد: يا مجدي أنا.

غمضت عيني، وابتسمت وأنا برد عليه:

وعد: وإنت وعدي أنا.

في اللحظة دي، ضمني لحضنه أكتر، وكأن الكلام اللي قلناه لبعض كان أكبر من أي كلام ممكن يتقال.

لكن إحنا ما كناش واخدين بالنا إن العين اللي كانت بتراقبنا لسه موجودة، وإن الشخص ده شايف وسامع كل حاجة بتحصل بينا.

أما أنا ومجد، فمكنش في بالنا غير وجودنا مع بعض.

قرب مني أكتر، فحطيت صباعي على شفايفه وبصيت له.

وعد: مجد، عشان خاطري، ما تتعداش حدودك.

بصلي وابتسم، وبعدها أخدني في حضنه بهدوء. كان حضن احتواء وطمأنينة، مش أكتر من كده، حضن حسيت فيه إنه مقدر خوفي ومش عايز يضغط عليا.

بعد شوية، رجعنا القاعة تاني وكملنا فرحتنا.

كان يوم فرح حازم ورغد مختلف في كل تفاصيله. إحنا كلنا كنا فرحانين بيهم، لكن كان جوانا إحساس تاني بالسعادة، إحساس إن الحاجز اللي كان بيني وبين مجد بدأ يختفي، وإننا بقينا أقرب لبعض من أي وقت فات.

كنت حاسة إننا بقينا واحد، وإن وجودي معاه بقى حاجة طبيعية نفسي أفضل عايشاها.

بعد الفرح، حازم ورغد استقروا في شقتهم لمدة تلات أيام، لكن خلال التلات أيام دول، أنا ومجد وياسين وماما تقريبًا ما كناش بنسيب بعض.

كنا دايمًا مع بعض في كل حاجة، حتى مجد، رغم ضغط شغله في المستشفى والجامعة، كان بيروح شغله ويرجع وكأنه ملهوف على القعدة معانا.

وبعدها طلعنا زرنا حازم ورغد، واطمنا عليهم في شقتهم، ولما اتأكدنا إن كل حاجة تمام، سافروا شهر العسل وبدأوا حياتهم الجديدة.

أما إحنا، ففضلنا على نفس عادتنا.

كنت أنا وياسين بنصحى من بعد الفجر، وننزل نتمشى سوا، وأوقات نجري ونروح النادي، وبعدها نرجع نلاقي ماما مجهزة الفطار.

كنا بنفطر إحنا التلاتة، وكانت اللحظات دي من أكتر الحاجات اللي بحبها في يومي.

أوقات كتير كان مجد بيكون نايم بسبب ضغط الجامعة والشغل، ولما يصحى يلاقي ياسين رجع من بره.

مجد: بابا، إنت كنت فين؟

ياسين: كنت بتمشى أنا ووعد.

كان مجد يبص له ويضحك.

مجد: يعني أنا اللي أنام وإنت تاخد وعد وتتمشى بيها؟

ياسين: خليك إنت نايم كده، وأنا ووعد هننزل نتمشى مع بعض على طول!

مجد: أعمل إيه يا حبيبي؟ إنت شايف الضغط اللي انا فيه. جامعة وشغل وعيادة،

ياسين: خف على نفسك شوية، وحاول تنزل تتمشى معانا بدل ما تفضل شايل نفسك فوق طاقتها.

مجد: حاضر يا بابا، هحاول أنزل معاكم.

وكانت الأيام بتعدي، لحد ما حازم ورغد رجعوا من شهر العسل.

رجعنا تاني نعيش إحساس الروح الواحدة. بقينا ستة في البيت، وكل واحد فينا بيفكر في التاني قبل ما يفكر في نفسه.

لكن وسط كل اللمة دي، كان فيه موضوع شاغل بالهم كلهم، وهو الخطوة الجاية في حياتي أنا ومجد.

كلهم كانوا مستنيين اليوم اللي نلبس فيه الدبل ونبدأ حياتنا مع بعض، لكن أنا كنت لسه داخلة على سنة خامسة، ومعايا حماس جديد وخوف جديد.

مجد كمان كان مشغول بجامعته وعيادته وشغله، اللي أنا ما كنتش أعرف عنه تفاصيل كتير، وما كنتش بسأل. هو ما كانش بيتكلم عن شغله، وأنا كنت بسيب له مساحته ومش بضغط عليه.

لكن سنة خامسة كان ليها حسابات تانية.

كان المفروض أدرس قسمين كنت بخاف منهم جدًا: الطب النفسي، والنساء والتوليد.

كنت دايمًا لما أخلص العيادة والكشوفات وأقعد مع مجد، أتكلم معاه عن اللي شاغلني.

وعد: يا مجد، أنا بحب جراحة القلب قوي، ونفسي أتخصص فيها، وكمان بحب الأطفال. وبحب أقعد مع السيدات وأسمع منهم، لكن قسم النساء والتوليد بخاف منه جدًا، وكمان الحالات النفسية بتخوفني.

كان مجد يمسك إيدي ويطمنني.

مجد: أنا واثق إنك هتعدي القسمين دول يا وعد. إنتِ بس ادي لنفسك فرصة، وما تحكميش على نفسك قبل ما تجربي.

كنت بهز راسي وأنا بحاول أصدق كلامه، وأقول لنفسي إن يمكن الخوف ده يقل لما أبدأ أتعامل مع الحالات بنفسي.

لكن أول سيشن عملي في قسم النساء والتوليد كان مختلف تمامًا عن اللي كنت متخيلاه.

كان المفروض أدخل أشرف على حالة ولادة، لكن بمجرد ما سمعت الست بتصرخ من شدة الألم، وقفت مكاني متجمدة.

كنت فاهمة كل حاجة نظري كويس جدًا، لكن عملي كان مختلف. دي أول مرة أشوف حالة ولادة قدامي، وأول مرة أدخل أوضة العمليات في موقف زي ده.

حسيت إن قلبي هيقع من مكانه، وحاولت أجمع شجاعتي وأقنع نفسي إني لازم أقدر أكمل.

وقفت جنب الست، وكل ما كانت تصرخ من شدة الألم، كنت بحس كأني أنا اللي بتوجع مكانها.

فضلت أسأل نفسي: إزاي مستحملة كل التعب ده؟ وإزاي بتقدر تواجه الألم بالشكل ده؟

لكن وسط خوفي، بدأت أفكر في معنى الولادة نفسها.

يعني إيه طفل جديد جاي للدنيا؟ يعني إيه اتنين بيستقبلوا أول فرحة تجمعهم بالشكل ده؟ وحتى لو مش أول طفل ليهم، فكل طفل بييجي بيكون فرحة جديدة، وحب بيتجدد بينهم.

وفي اللحظة دي، جه في بالي سؤال:

هو فين زوجها؟ ليه مش واقف جنبها؟ ليه ما يكونش معاها ويطمنها؟

أكيد إحنا هنحاول نساعدها ونخفف عنها، لكن يمكن وجوده هو اللي يقدر يطمنها أكتر من أي حد.

خرجت من أوضة العمليات، وبدأت أدور على زوجها.

لقيت شاب واقف بره، وكان القلق واضح على وشه.

وعد: حضرتك زوج الحالة؟

هز راسه.

وعد: دي أول ولادة ليها؟

الزوج: أيوه.

بصيت له وقلت:

وعد: طيب، ممكن أطلب منك طلب؟ ممكن تحضر معانا الولادة وتكون جنبها؟

بصلي باستغراب، وبان عليه إنه مش عارف إذا كان ده ينفع ولا لأ.

الزوج: ينفع؟

وعد: هتلبس الكمامة واللبس المخصص، وتلتزم بالتعليمات. كفاية إنك تكون جنبها وتمسك إيدها وتطمنها. وجودك معاها ممكن يفرق معاها جدًا.

اتكلم بلهفة، وقال:

الزوج: يا ريت والله. أنا قلقان عليها موت، وإنتِ شجعتيني.

ابتسمت له وقلت:

وعد: أنا اللي هساعد في الولادة، ولسه دكتورة تحت التمرين، لكن أنا متأكدة إنها هترتاح لما تلاقيك جنبها.

بصلي وسألني:

الزوج: هو حضرتك متجوزة؟

هزيت راسي وقلت:

وعد: لأ.

ابتسم وقال:

الزوج: ربنا يرزقك بواحد يحبك ويحافظ عليكي.

ابتسمت له، وبعدها دخلنا مع بعض.

أول ما الست شافت زوجها، حسيت إنها هديت شوية. قرب منها ومسك إيديها، وبدأ يطمنها.

لكن فجأة، سمعت صوت دكتورة إيمان، الدكتورة المسؤولة عن الحالة.

د. إيمان: مين اللي دخله؟ هو ده ينفع؟ ده ممنوع!

بصيت لها، وحاولت أشرح لها وجهة نظري.

وعد: دكتورة إيمان، هو إيه اللي يمنعه؟ هو ملتزم باللبس والكمامة، وكل اللي بيعمله إنه واقف جنب زوجته وبيطمنها. ده أكبر دعم ممكن يكون ليها، ويمكن وجوده جنبها يفرق معاها أكتر من وجودنا إحنا.

بصت لي دكتورة إيمان، وبعدها ابتسمت وقالت:

د. إيمان: وعد، أنا سمعت عنك كتير. على العموم، ماشي يا وعد.

بدأت الولادة، ورغم إني كنت لسه خايفة ومرعوبة، حاولت أركز في اللي بيحصل قدامي.

دكتورة إيمان بصت لي وقالت:

د. إيمان: وعد، ركزي معايا. بصي أنا بعمل إيه، وكملي معايا خطوة بخطوة.

بدأت أركز في كل حركة بتعملها، وأساعدها على قد ما أقدر. ومع الوقت، الخوف بدأ يتراجع شوية، وحسيت إني قادرة أكمل.

وفجأة، سمعت صوت صرخة البيبي.

في اللحظة دي، أنا اللي مسكته بإيدي.

مش عارفة أوصف إحساسي كان عامل إزاي. كنت مبسوطة جدًا، لدرجة إن عيني دمعت من الفرحة.

بصيت للطفل الصغير، وبعدها بصيت للأم اللي كانت غايبة عن الوعي من شدة التعب.

جهزنا البيبي، وبعدها خرجت وأنا شايلاله، وبدأت أدور على أبوه عشان أسلمه له.

وفي الطرقة، لقيت مجد جاي ناحيتي.

أول ما شافني وأنا شايلة الطفل الصغير، ابتسم وقال:

مجد: وعد، إنتِ كنتِ في العمليات النهارده؟

هزيت راسي، لكن عيني كانت لسه معلقة بالبيبي اللي بين إيديا. كنت سرحانة في ملامحه البريئة وصوابعه الصغيرة.

وعد: مجد، إنت شايف البيبي الصغير ده؟

بص لي وابتسم.

مجد: شايفك متحمسة قوي يا وعد.

وعد: جدًا! إنت مش متخيل أنا مبسوطة قد إيه.

مجد: إن شاء الله، كلها كام شهر وحازم ورغد ربنا يرزقهم ببيبي صغير زي ده.

ابتسمت، وقلت له بحماس:

وعد: تعرف إن أنا مستعجلة قوي؟ نفسي أبقى عمتو أوي .. الإحساس ده حلو قوي.

فضل مجد باصص لي، وبعد لحظات قال:

مجد: وعد، ممكن أقولك حاجة؟

رفعت عيني له، واهتميت بكلامه، وأنا لسه ببص للبيبي اللي بين إيديا.

وعد: قول يا مجد.

كان هو مركز معايا، وقال جملة خلتني أتجمد مكاني:

مجد: تعرفي إني أنا كمان نفسي أشيل طفل منك إنتِ؟

بصيت له، وما قدرتش أرد.

كان الكلام أكبر من إني أستوعبه في اللحظة دي. مجد بيتكلم عن طفل يجمعنا إحنا الاتنين، عن مستقبل نفسه يعيشه معايا.

مد إيده وأخد البيبي مني، ومسك صباعه الصغير، وطبع عليه قبلة، وبعدها قربه من وشه.

بصيت له بسرعة وقلت:

وعد: مجد، إنت بتعمل إيه؟ ممنوع! إنت متأكد إنك معقم إيدك كويس؟

ضحك وقال:

مجد: ما تقلقيش، أنا معقم إيدي كويس.

وبعدها بصلي بنفس الحماس وقال:

مجد: وعد، إنتِ لسه ما رديتيش عليا. إمتى بقى ربنا هيجمعنا ويرزقنا بطفل منك زي ده؟

حسيت بالكسوف، وحاولت أهرب من السؤال زي ما كنت بعمل كل مرة الكلام بينا يوصل للمرحلة دي.

بصيت له وقلت بصوت هادي:

وعد: مجد، شوية بعد إذنك. لازم أروح أودي البيبي لأبوه.

ما ضغطش عليا، واداني الطفل، ودخلنا بيه حجرة الإفاقة.

لقيت الأب واقف جنب زوجته، وماسك إيديها.

قربت منهم وقلت:

وعد: الحمد لله على السلامة.

وبعدها بصيت للأب ومديت له الطفل.

وعد: اتفضل، ده ابنك.

بص لي بامتنان وقال:

الزوج: أنا بشكرك جدًا.

ابتسمت وقلت له:

وعد: ما تشكرنيش. على فكرة، ده حقك. إنك تكون جنب زوجتك وتطمن عليها، وإنها تلاقيك معاها في اللحظات الصعبة دي.

أخد ابنه وضمه لصدره، وبص له بحب، وأنا كنت مبسوطة إني قدرت أكون جزء من اللحظة دي.

خرجت من الحجرة، ولقيت مجد مستنيني.

بص لي وقال:

مجد: هو إيه اللي حصل بالضبط يا وعد؟

وعد: بالنسبة لإيه؟

مجد: بالنسبة لكلامك مع جوز الحالة.

وعد: أبدًا، أنا بس خليته يدخل يقف جنبها. كانت تعبانة جدًا، ولما شافته هديت.

ابتسم مجد وقال:

مجد: كل يوم باكتشف فيكِ حاجة جديدة.

وعد: يا مجد، هو ده الطبيعي. المفروض يكون جنبها ويطمنها. هي هتحس بالأمان بوجوده هو أكتر من أي حد.

سكت مجد للحظات، وبعدها بص لي وقال:

مجد: تعرفي أنا نفسي في إيه دلوقتي يا وعد؟

وعد: نفسك في إيه؟

مجد: نفسي أخدك في حضني قوي.

بصيت له وقلت:

وعد: وبعدين معاك بقى يا مجد؟ إنت هتاخد على كده؟

ضحك وقال:

مجد: حرام عليكي يا وعد! أنا ما أخدتكيش في حضني غير مرة واحدة بس، يوم فرح حازم ورغد.

بصيت له، وقلت وأنا بحاول أغير الموضوع:

وعد: بعد إذنك بقى، عشان عندي محاضرات.

ضحك وقال:

مجد: ماشي يا وعد. بس لحد إمتى هتفضلي تهربي مني؟

بصيت له بهزار وقلت:

وعد: تفضل يا دكتور، إنت كمان على شغلك.

ضحكنا، وبعدها كل واحد فينا راح للي وراه.

---

الأيام كانت بتعدي، وعلاقتي أنا ومجد بتقرب أكتر، لكن في حدود كنت لسه متمسكة بيها.

حازم ورغد استقروا في شقتهم، والحمد لله ربنا رزقهم بالحمل، وكنا مستنيين بفرحة كبيرة اللحظة اللي نشوف فيها البيبي بتاعهم.

أما مجد، فكان مستقر مع ياسين، وإحنا كنا بنتجمع كل ويك إند. نقعد ونسهر ونضحك ونهزر، ونحكي عن يومنا، وكل واحد يطمن على التاني.

لكن بعد فترة، بدأت ألاحظ إن مجد اتغير تاني.

بقى ساكت، ومضايق، وبيقعد لوحده كتير. وأوقات كان يسيب ياسين ويروح يقعد عند مامته، وبعد يومين يرجع تاني.

ياسين بدأ يقلق عليه، وأنا كمان بقيت قلقانة أكتر.

كنت ببص لمجد وأحاول أفهم إيه اللي حصل له، وإيه اللي مخليه بالشكل ده بعد ما كنت شايفاه بدأ يرجع لطبيعته.

لكن مجد ما كانش بيتكلم.

وأنا، رغم إني بقيت أقرب واحدة ليه، ما كنتش عارفة إيه

 اللي بيدور جواه، ولا ليه رجع يسكت ويبعد عننا بالشكل ده


Ghazal
Ghazal
تعليقات