رواية ديون النبض الفصل الثالث والعشرون
كان واضح على مجد إنه متضايق، وكلنا كنا فاهمين كويس جدًا هو متضايق من إيه. علشان كده ما كناش بنفتح معاه الموضوع، لأن مجرد الكلام فيه كان بيتعبه أكتر.
لكن أنا، رغم إني كنت بسكت، بدأت أحس بالضيق من جوايا. لحد إمتى هيفضل مخبي عني؟ إمتى هيحكي لي ويشاركني اللي جواه؟ أنا مش عايزة أفضل حاسة إن فيه حاجة بتوجعه وأنا بعيدة عنه، حتى لو كنت عارفة سبب ضيقه.
قررت أتكلم معاه، لكن رده وقفني مكاني.
كنت أنا ومجد قاعدين في العيادة بعد ما خلصنا الكشوفات، فبصيت له وقلت:
وعد: مجد، كنت عايزة أسألك على حاجة.
مجد: قولي يا وعد.
وعد: أنت بقالك فترة تعبان ومتضايق، وأنا كتير بتردد إني أسألك. أنا عارفة السبب اللي أنت بتمر بيه، بس ممكن أعرف في إيه بالضبط؟ أنا من حقي أطمن عليك.
بص لي وقال:
مجد: من حقك؟ بصفتك إيه يا وعد؟
بصيت له بصدمة، وقلت:
وعد: بصفتي إيه!........المفروض إن إحنا واحد يا مجد!
مجد: وعد، أنتِ عارفة أنا قد إيه بحبك، بس أنتِ ليه مصرة إن إحنا نفضل بعيد عن بعض؟
وعد: إحنا مش بعيد يا مجد. إحنا مع بعض في كل مكان، في المستشفى والعيادة، وبشوفك في البيت. إحنا تقريبًا مع بعض باستمرار، وما بيفصلناش عن بعض غير النوم. يمكن ضغط شغلك بيخليك مشغول، وبشوفك في يومي مرة أو حاجة، بس ده مش معناه إنك بعيد عني.
ابتسمت له وقلت:
وعد: أنت ساكن روحي يا مجد.
بص لي وقال:
مجد: يا وعد، أنا شايف إن كل ده مش كفاية.
قام من مكانه وقعد قصادي، وقرّب الكرسي مني، وبعدها مسك إيدي. لأول مرة أحس قد إيه هو مشتاق إننا نبدأ حياتنا مع بعض.
مسك كفوف إيدي وطبع قبلة على باطن كفي، وغمض عينيه، وبعدها ضم إيدي بين كفوفه وسندها على وشه. في اللحظة دي حسيت قد إيه هو تعبان، ويمكن أنا كمان كنت سبب في تعبه من غير ما أقصد.
قربت منه وقلت بهدوء:
وعد: مجد، افتح عينيك.
رفع راسه، ومسك وشي بين إيديه، وسند جبهته على جبهتي، وبص في عيني وقال:
مجد: وعد، أنا بحبك قوي. نفسي نبدأ حياتنا مع بعض من دلوقتي.
سكت شوية، وبعدها قلت له:
وعد: مجد، أنا موافقة.
عيونه وسعت، وبص لي وكأنه مش مصدق اللي سمعه.
مجد: وعد، أنتِ بتتكلمي جد؟
ابتسمت، وهو لسه ساند راسه على راسي، وقرب مني أكتر.
مجد: وعد، أنتِ فعلًا بتتكلمي جد؟ ولا بتهزري؟
هزيت راسي وقلت:
وعد: لأ يا مجد، مش بهزر. أنا موافقة، بس نعلن خطوبتنا الأول، وممكن بعد نهاية سنة خمسة نكون مع بعض في بيت واحد.
في اللحظة دي قام وقرّبني منه جدًا. بصيت له وقلت:
وعد: وبعدين معاك؟ ما تتعداش حدودك!
بص لي وعلى وشه ابتسامة عريضة، وقال:
مجد: وعد، أنا مش مصدق إنك فعلًا موافقة!
ضحكت وقلت:
وعد: آه والله يا مجد، موافقة.
كنا مندمجين في كلامنا لدرجة إننا ما سمعناش خبط الباب. دكتورة جيهان كانت دخلت علينا وسمعت كلامنا، وعرفت كل حاجة.
كنت أنا ومجد منسجمين مع بعض، وهو قرب مني أكتر ولف دراعاته حوالين وسطي. حسيت بإحراج شديد، وحاولت أبعد عنه، لكنه ضمني ليه أكتر وقال:
مجد: إمتى يا وعد أمسكك كده وما تقدريش تفكي نفسك مني؟
وطيت راسي من الكسوف، فرفعها بإيده وقال:
مجد: مش أنا قلت لك ما توطيش راسك كده أبدًا؟
ابتسمت وقلت:
وعد: مجد، على فكرة أنت بتحرجني!
أخدني في حضنه، لكني بعدت عنه تاني وقلت:
وعد: مش من حقك تشدني ليك مرة تانية.
مجد: بكرة يبقى من حقي كل حاجة.
بصيت له وقلت:
وعد: هنشوف يا مجد!
وبعدها رجعنا البيت، واتفقنا إننا نلبس الدبل بعد ما أخلص السيشنز العملي بتاع الترم الأول.
كنت مضغوطة شوية بسبب الدراسة، وفي نفس الوقت كان جوايا قلق وخوف من قسم الطب النفسي. مجد كان بيحاول يطمني ويقول لي إني قدها وقدود، لكن خوفي كان لسه موجود.
وعد: أنا بحب أتكلم مع الناس وأخليهم يخرجوا اللي جواهم، لكن الطب النفسي مختلف. أنا ببقى عارفة ومتأكدة إن اللي قدامي تعبان، وإن جواه وجع كبير، والوجع بيختلف من شخص للتاني. وفي نفس الوقت مش عارفة ليه بحس بقلق شديد وخوف من تصرفات بعض المرضى.
عدى الوقت، وفي يوم دخلنا عنبر كان فيه ستة مرضى نفسيين. اتوزعنا على الحالات، وكانت حالتي مع مريض قاعد على السرير في آخر ركن، والسرير جنب الحيطة.
قربت منه وقلت:
وعد: إزيك؟ عامل إيه؟
بص لي من غير ما يرد.
حاولت أتكلم معاه بهدوء أكتر، وقلت:
وعد: أنا دكتورة وعد، ممكن نتكلم مع بعض شوية؟ ممكن تحكي لي أنت زعلان من إيه؟ متضايق من إيه؟
فضل يبص لي بنظرات خلتني أحس بالخوف، لكني تشجعت وقربت منه شوية، وبعد ما بصيت في الملف اللي معايا، قلت:
وعد: أنت اسمك محمود، وموجود هنا من تلات شهور. ممكن أعرف إيه سبب وجودك هنا؟ وإيه اللي مخليك قاعد لوحدك كده طول الوقت؟
بصيت على باقي العنبر، ولقيت زملائي بيتكلموا مع المرضى وبيتفاعلوا معاهم، فرجعت بصيت له وقلت:
وعد: أنت ليه مش زيهم؟ ليه قافل على نفسك ومش بتتكلم؟
فجأة، مسك إيدي وبص لي بقوة وقال:
محمود: أنا مش هسيبك... مش هسيبك يا منى!
اترعبت من كلامه وقلت:
وعد: منى؟ لأ، أنا مش اسمي منى. أنا دكتورة وعد، وجاية أتكلم معاك.
حسيت بالخوف والقلق بيزيدوا جوايا، وفجأة شد على إيدي بقوة. كنت بحاول أفك نفسي منه، لكني ما قدرتش.
مرة واحدة صرخ في وشي وقال:
محمود: مش هسيبك!
قام من مكانه ومسك وسطي بقوة. قوته كانت شديدة بشكل صعب، لدرجة إن جسمي بدأ يرتعش، وما بقيتش قادرة أتحكم في نفسي. الخوف سيطر عليّ، وزمايلي بدأوا ينتبهوا للي بيحصل.
كان دكتور حاتم موجود، فبص لي وشاور لي إني أحاول أهدى. كنت بحاول أتنفس بصعوبة، فقال لي:
د. حاتم: حاولي تجاريه في الكلام.
لكن محمود سمعه، فصرخ بأعلى صوته:
محمود: مش هسيبها! ما حدش هياخدها مني تاني! أنا ما صدقت إنها جت لي برجليها! مش هسيبك يا منى، مش هسيب حد ياخدك مني تاني!
شدني ناحيته بقوة أكبر، وكان قريب من سرير تاني فيه كوب إزاز. مد إيده ومسكه، وقال:
محمود: اللي هيقرب مني وياخدها مني، أنا هموته!
في اللحظة دي حسيت إن قوتي بدأت تنهار تمامًا.
دكتور حاتم نادى على زمايله وزمايلي، وطلب من الكل يخرج من العنبر علشان يقدروا يسيطروا على محمود، خصوصًا إنه وصل لمرحلة من العنف بقت تهدد سلامتي.
اللي حصل عمل دوشة وقلق في المكان، والخبر وصل لمجد. أول ما سمع، ساب العيادة وتحرك بسرعة ناحية العنبر.
وأول ما وصل، شافني بين دراعات محمود، وإيده محاوطه رقبتي، وأنا بنهار ومش قادرة أستحمل.
في اللحظة دي، أول ما شفت مجد، حسيت إني اطمنت شوية.
لكن مجد ودكتور حاتم، كل ما كانوا بيحاولوا يقربوا بهدوء، محمود كان بيصرخ ويشد دراعه على رقبتي أكتر.
وفجأة، رفع كوب الإزاز بإيده التانية وصرخ:
محمود: ما حدش يقرب! ما حدش هياخدها مني!
انهرت أكتر، ومجد ودكتور حاتم حاولوا يهدوه ويقولوا له:
مجد: اهدى يا محمود، محدش هياخدها منك.
د. حاتم: اهدى، إحنا مش جايين نأذيك.
لكن كنت خلاص فقدت الوعي.
مجد بص لمحمود وقال له بانفعال:
مجد: شفت؟ شفت أنت عملت فيها إيه؟ في حد بيحب حد ويتعبه ويأذيه بالشكل ده؟
في اللحظة دي، كان فيه دكتور تالت جهز حقنة مهدئة بسرعة علشان يحقن بيها محمود.
محمود بص لي وأنا بين إيديه، وبدأ ينادي عليّ بصوت مليان خوف:
محمود: منى... لأ، فوقي يا منى! ما تروحيش مني! أنا مش هسيبك، مش هسيبهم ياخدوك مني تاني!
بدأ جسمه يسترخي تدريجيًا مع تأثير المهدئ، وفي الوقت ده مجد ودكتور حاتم أحاطوا بيه من الناحية التانية، والزميل التالت حقنه بالحقنة.
أول ما محمود استرخى، مجد أخدني منه بهدوء وشالني بين دراعاته، ودخل بيا حجرة الكشف اللي جنب العنبر، ورقدني على السرير.
كان فيه بعض زميلاتي واقفين، والدكاترة طلبوا منهم ما يعملوش دوشة، وإن حالتي هتكون كويسة.
واحدة من زميلاتي قربت من مجد وقالت له:
الزميلة: يا دكتور، هجيب لحضرتك مية بسرعة.
بقينا أنا ومجد لوحدنا في حجرة الكشف. كان بيحاول يفوقني، ويمرر إيده على جبيني، وينادي عليّ بصوت مليان قلق:
مجد: وعد... وعد، فوقي عشان خاطري. خلاص، هو بعد عنك. ما تقلقيش، أنتِ معايا أنا.
دخلت أميرة في الوقت ده، لكن مجد ما انتبهش لوجودها، وكان لسه بيحاول يفوقني.
مجد: وعدي أنا، عشان خاطري فوقي. أنتِ كويسة، أنا جنبك.
وفجأة، أخدني في حضنه وضمني لصدره. وبعدها انتبه لوجود أميرة، لكنه ما اهتمش، وكمل محاولاته إنه يفوقني.
أخد منها المية، وفضل جنبي لحد ما بدأت أستعيد وعيي.
فتحت عيني، وأنا لسه حاسة برعب وخوف شديد. أول ما شفته، قلت له:
وعد: مجد...
مجد: اهدي، اهدي يا وعد.
ضمني لحضنه أكتر وقال:
مجد: ما تقلقيش، أنتِ معايا أنا. أنتِ كويسة.
الدموع نزلت من عيني، وقلت له:
وعد: مش أنا قلت لك إني خايفة من القسم ده؟
بدأ يمرر إيده على جبيني بهدوء وقال:
مجد: أنتِ كويسة، وأنا معاكي دلوقتي. كل حاجة خلاص عدت.
فضلت ساكتة فترة، وأميرة كانت قاعدة جنبي بتحاول تطمني. ومن نظراتها وابتسامتها، فهمت إنها عرفت إن أنا ومجد بنحب بعض، لكنها فضلت ساكتة.
بعد ما بدأت أهدى، بصيت لمجد وقلت:
وعد: أنا مش قادرة أكمل اليوم. أنا عايزة أرجع البيت.
أميرة: لسه عندنا محاضرة يا وعد، مش هتقدري تكملي؟
هزيت راسي وقلت:
وعد: مش قادرة. بعد إذنك يا أميرة، هاتي لي حاجتي.
مجد بص لي وقال:
مجد: خلاص، هوصلك أنا.
وعد: لأ، أنت مضغوط جدًا النهارده.
مجد: مش هسيبك تروحي وأنتِ في الحالة دي.
أميرة جابت لي حاجتي وشنطتي، فبصيت لها وقلت:
وعد: أميرة، عايزة أقولك على حاجة.
أميرة: معاكي يا وعد.
وعد: مش عايزاكي تبلغي حد حاجة... علاقتي بدكتور مجد.
بصت لي وابتسمت وقالت:
أميرة: اطمني يا وعد، أنتِ عارفة إني مش هقول.
مجد بص لها وقال:
مجد: يا ريتك تقولي يا أمير دماغها ناشفة ومش راضية حد يعرف خالص!
ابتسمت أميرة وقالت:
أميرة: يا دكتور، بكرة الكل هيعرف.
بصيت لمجد وقلت:
وعد: يا مجد؟ كلها أسابيمعدودة ونعلن خطوبتنا.
بص لي وابتسم، وقرب مني ومسك وشي بين كفوفه وطبع قبلة على جبيني.
اتكسفت، خصوصًا إن أميرة كانت واقفة قدامنا، لكنها ضحكت وقالت:
أميرة: بقى في حد يلاقي الحب ده كله ويداريه يا وعد؟
وعد: اسكتي أنتِ، ما تتدخليش!
وبعدها اتحركت مع مجد، وهو رجعني البيت.
أول ما ماما شافتني، هي وياسين بصوا لي بقلق.
ماما: وعد، في إيه يا حبيبتي؟ مالك؟ وشك مخطوف كده ليه؟
ما قدرتش أتكلم، لكن مجد حكى لهم كل اللي حصل.
ماما جريت عليّ ومسكتني وقالت:
ماما: حبيبتي يا بنتي، الحمد لله... الحمد لله إن ربنا نجاكي من إيده.
بعدها بدأت هي وياسين يتكلموا عن اللي ممكن يوصل مريض للحالة دي.
فضلت أسمعهم وأنا ساكتة، لكن كان جوايا إحساس إن اللي وصل محمود للحالة اللي هو فيها ممكن يكون فراقه عن حبيبته.
وعد: الحب هو اللي سبب له الحالة دي. اللي بيحبها سابته، بس الله أعلم هي سابته بمزاجها ولا كانت مجبرة. وإيه اللي وصله للحالة دي بالضبط؟
رغم كل اللي حصل، كنت مشفقة عليه، وكان صعب عليّ جدًا أشوف إنسان وصل للحالة دي من الوجع.
فضلنا قاعدين شوية، وبعد ما مجد اطمن عليّ، استأذن ومشي. دخلت أوضتي وأنا مرهقة جدًا ومحتاجة أرتاح، فسيبت كل حاجة ونمت.
لكن الأيام كانت بتقربني من اليوم اللي أنا ومجد بنحلم بيه؛ اليوم اللي علاقتنا فيه هتبقى رسمية، وألبس دبلته ويلبس دبلتي.
ما بقاش الحلم بعيد، والفرحة كانت مش سيعانا. حتى أنا بقيت مستنية اليوم ده بفارغ الصبر.
كانت الأيام بتعدي، لكنها كانت تقيلة بسبب المحاضرات والسيشنز العملية والامتحانات. ومع ذلك، كنت بستحمل، علشان وجود مجد في حياتي كان بيهون عليّ كل الضغط ده.
ومش بس كده...
كنا كمان مستنيين فرحة كبيرة، فرحة هتزود واحد في عيلتنا.
قلب صغير هيجمع ما بين حب حازم لرغد...
