رواية ديون النبض الفصل الرابع والعشرون
بعدها بيوم، كنت أنا ومجد في حجرة العيادة بتاعته، بعد ما خلصنا الكشوفات، وكنا لسه بنتحرك علشان نرجع البيت، لقينا دكتورة جيهان بتخبط على الباب.
بصيت لها وابتسمت، وبعدها استأذنت من مجد وتحركت بعيد عنهم شوية.
دكتورة جيهان: مجد، عايزة أتكلم معاك.
مجد: بعد إذنك يا دكتورة جيهان، أنا مستعجل جدًا. ممكن كمان شوية، ساعة أو ساعتين، أبقى أرجع لحضرتك؟
بصت له بنظرة خلته يقف مكانه، وقالت بلهجة حاسمة:
دكتورة جيهان: مجد، عايزة أتكلم معاك، وخصوصًا وعد
وقف وبصلها باستغراب.
مجد: وعد
دكتورة جيهان: أيوه، وعد. مش وعد دي البنت اللي خلتك متمرد عليَّ؟ كل ما أكلمك في موضوع سارة ترفض.
بصلها مجد، وبعدها رد بهدوء:
مجد: الموضوع ده ما ينفعش نتكلم فيه هنا ولا دلوقتي. بعد إذنك.
سابها وتحرك، وبعدها قرب مني ورجعنا مع بعض.
مجد حاول يبان طبيعي، وفعلاً نجح في ده، وما بانش عليه أي حاجة خالص. وعدّى اليوم بشكل عادي، زي ما إحنا متعودين.
لكن تاني يوم، بعد ما خلصت محاضراتي والسيشنز العملية، كنت بجهز علشان أرجع البيت. ما كنتش أعرف إن دكتورة جيهان عايزة تتكلم مع مجد.
استأذنت منه إني أرجع، خصوصًا إنه كان مضغوط جدًا.
وعد: أنا هروح البيت يا مجد، بعد إذنك.
مجد: خلاص، روحي. هشوفك لما أرجع.
وافقت ومشيت، وهو راح لمكتب دكتورة جيهان.
أول ما دخل، بدأت الكلام معاه.
دكتورة جيهان: أنا عايزة أتكلم معاك بخصوصك أنت ووعد. أنت من ساعة ما عرفت البنت دي، وأنت بقيت متمرد عليَّ. كل ما أكلمك في موضوع سارة ترفض.
بصلها مجد وقال:
مجد: أنتِ عايزة إيه دلوقتي؟
دكتورة جيهان: أنا مش عارفة أكلمك خالص، ولا حتى أتقابل معاك.
سكتت لحظة، وبعدها بصت له وسألته:
دكتورة جيهان: يا ترى وعد تعرف إن أنت ابني؟
مجد: لأ، ما تعرفش.
حاولت تشكك في كلامه، وقالت له:
دكتورة جيهان: أنت ضامن منين إنها ما تعرفش؟
مجد بصلها بثبات، وقال:
مجد: أنا عايز أقول لحضرتك حاجة يا دكتورة جيهان. الوحيدة اللي واثق فيها، من بعد رغد أختي، هي وعد. أنا ما بثقش في حد تاني. خلي الكلام ده في دماغك كويس جدًا.
بصت له بصدمة من كلامه، لكنه كمّل من غير ما يتراجع:
مجد: أنا آسف إني صريح معاكي، لكن أنا مش هسيب وعد مهما حصل. وعد هي البنت اللي أنا حبيتها، وإن شاء الله هرتبط بيها.
دكتورة جيهان: ومستقبلك يا مجد؟ وسارة؟ وكل اللي أنت بنيته؟ مش هينفع ترتبط بالبنت دي.
اتعصب مجد، ورد عليها بغضب:
مجد: خلاص! أنا ما صدقت خرجت من الحضانة بتاعتك. أنا عايز أتصرف في حياتي زي ما أنا عايز. عايز أحس بكياني أنا، بحياتي أنا، من غير ما يكون في حد رقيب عليَّ، يوجّهني أعمل إيه وما أعملش إيه.
بصلها وكمل:
مجد: وعد هي الإنسانة اللي حبيتها وحبتني. حبتني لشخصي، مش عشان أنا ابنك.
دكتورة جيهان: تفتكر لما تعرف إن أنت ابني، هتفضل متمسكة بيك لشخصك ولا عشان انت ابني واللي عندك؟
مجد: أنا عارف وعد كويس جدًا. هي قربت مني علشان شخصي أنا، مش علشان أي حاجة تانية. ويكفي إنها بتحبني وأنا بحبها.
سكت لحظة، وبعدها قال بلهجة حاسمة:
مجد: وبعد إذنك، مالكيش دعوة بيها. ياريت تبعدي عنها، وبلاش تضايقيها، ولا في يوم من الأيام تفكري إنك تضايقيها حتى بالكلام. أنا مش بطلب منك، اعتبريه أمر، واعتبريه تهديد كمان. أنا بقولك ما تقربيش منها خالص. بعد إذنك.
بصت له وهي متضايقة جدًا من تمسكه بيا وبعلاقتنا، وقالت بمرارة:
دكتورة جيهان: مش وعد دي البنت اللي كان ماسكها المريض النفسي؟ كنت سيبتها له!
الكلام خلّى مجد يقوم من مكانه، والغضب كان واضح عليه.
مجد: أنتِ عمرك ما تعرفي يعني إيه مشاعر وأحاسيس، ولا عمرك هتحسي باللي جوايا. أنتِ المفروض تكوني أكتر واحدة تحس بمشاعر ابنها، وتكون فاهماه وتحاول تساعده، لكن أنتِ عمرك ما حاولتي تفكري فيَّ ولا في مشاعري من زمان. أنتِ رمياني!
أخد نفسًا، وبعدها كمّل بوجع وغضب:
مجد: أنا ما أنكرش إنك السبب في اللي أنا فيه، وإنك بنيتيني لحد ما بقيت دكتور مجد، الجراح المعروف، في وقت قصير. لكن بالرغم من كل ده، أنا مش فاهم إزاي أنتِ دكتورة قلب، ومش حاسة بالقلوب! أنتِ المفروض تكوني أكتر واحدة حاسة بالكلام ده.
سابها ومشي، وهو متضايق جدًا.
خرج وركب العربية، وفضل سرحان في كلامه معاها. كان مخنوق لدرجة إنه مش قادر يتصرف، وساق بطريقة جنونية، لكن وسط كل اللي بيدور في دماغه، كان واخد قرار.
أول ما رجع البيت، ياسين بص له ولاحظ إن الضيق واضح عليه.
ياسين: مجد، مالك؟ في حاجة جديدة حصلت مع والدتك؟
مجد سكت وما ردش عليه، لكنه قام من مكانه وراح ناحية الباب، ورن الجرس.
فتحت له، وأول ما شافني بص لي وقال من غير مقدمات:
مجد: وعد، هنتجوز إمتى؟
بصيت له بذهول، مش فاهمة إيه اللي حصل له فجأة.
وعد: مجد، مالك؟ في إيه؟
مجد: بصراحة، أنا مش قادر أستنى أكتر من كده. ياريت نحدد مع بعض. وبالنسبة لدراستك، إحنا مع بعض في كل حاجة، وأنا مش هسيبك.
بصيت له باستغراب، وقلت له:
وعد: مجد، طيب ممكن بعد إذنك نقعد؟ أنت مالك؟
مجد: ماليش، بس زي ما بقولك، أنا خلاص مش قادر.
قعدنا مع بعض، وماما كانت في المطبخ.
بصيت له وأنا بحاول أفهم سبب التغيير المفاجئ ده.
وعد: ممكن أفهم في إيه؟
مجد: أنا عايز أبدأ حياتي معاكي. لحد إمتى هنفضل نأجل؟ إحنا عايزين نتجمع مع بعض في شقتنا.
سكت، لكني رجعت أسأله:
وعد: أنا عايزة أفهم مالك الأول.
بص لي، وارتفع صوته شوية وهو بيقول:
مجد: بقولك مش قادر! أنا عايز أنا وأنتِ نكون مع بعض.
سكتُّ، لكن جوايا كنت حاسة إن في حاجة كبيرة حصلت، وإن مجد مخبي عني حاجة.
هو اختارني أنا... اختارني على مستقبله، وعلى أمانه، وعلى أمه، وعلى طموحاته وأهدافه اللي حاططها لنفسه.
كل ده كان بيدور في دماغي وأنا ببص له، مش عارفة إيه اللي وصّله للحالة دي، ولا إيه اللي خلاه يستعجل بالشكل ده.
وعد: مجد، طيب ممكن تهدى الأول؟ نتكلم مع بعض بهدوء.
مجد: أنا هبدأ أجهز شقتي اللي فوق، ومجرد ما تخلص، أنا وأنتِ نتجوز على طول.
بصيت له وأنا حاسة إني اتلخبطت أكتر.
وعد: مجد، أنت بتقول إيه؟ إزاي نتجوز وأنا لسه حتى ما خلصتش السنة دي؟
بص لي، ومد إيده في جيبه وطلع مجموعة مفاتيح، وبعدها اداها لي.
مجد: وعد، دي مفاتيح شقتنا. عايزك تطلعي فيها وتشوفي لو حابة أي تعديلات، أو حابة أي نظام تاني. أنا معاكي فيه.
بصيت للمفاتيح في إيدي، وبعدها رفعت عيني له، لكني ما اتكلمتش.
مجد سابني وخرج، وفضلت أنا مكاني، بفكر في كلامه، وفي قراره المفاجئ، وفي إصراره إنه يحدد ميعاد جوازنا بأسرع وقت.
يا ترى إيه اللي حصل لمجد وخلّاه يستعجل في الجواز بالشكل ده؟ وليه حاسة إنه مخبي عني حاجة كبيرة؟
ديون النبض 🫀
بقلم الكاتبه مروة صياح 🎯 ✍️
حضني أمانك
بعد ما مجد خرج، دخلت أوضتي وأنا زعلانة ومش عارفة أرتب أفكاري.
ماما دخلت عليّا، وبصتلي باهتمام.
ماما: مالك يا وعد؟ ومجد ماله؟
وعد: مش عارفة يا ماما... إصرار مجد بالطريقة دي مخليني مش قادرة أفكر.
ماما: وعد، إيه المشكلة؟ الحمد لله الضغط اللي كان علينا خف كتير عن الأول. حازم اتجوز وبقى له حياته المستقلة، وأنتِ كمان جه الوقت اللي تفرحي فيه. أنتِ بتحبي مجد، ومجد بيحبك، إيه المشكلة إنكم تتجوزوا؟
بصيت لماما وسكت، لأني فعلًا ما كنتش عارفة أوصل لقرار.
كل ما أفتكر حالة مجد وهو معايا، وإصراره إننا نتجوز، أحس إني مش عايزة أضغط عليه أكتر من كده. أنا كل اللي عايزاه إني أريحه، وأكون سبب في فرحته، مش سبب في أي وجع أو ضغط جديد عليه.
عيني راحت للمفاتيح اللي جنبي، وبعد لحظات قمت وقلت لماما:
وعد: ماما، أنا هطلع عند رغد شوية.
ماما: ماشي يا حبيبتي.
خرجت فعلًا، لقيت نفسي ببص على شقة مجد. والمفاتيح كانت لسه في إيدي.
وقفت قدام الباب لحظة، وبعدها فتحته ودخلت.
الشقة كانت هادية، وأنا واقفة في نصها بتخيل شكل حياتي أنا ومجد لو بدأناها هنا فعلًا. تخيلت وجودنا مع بعض، وتفاصيل أيامنا، وكل حاجة ممكن تجمعنا تحت سقف واحد.
وفجأة افتكرت حالته، وافتكرت إصراره على الجواز.
لقيت نفسي بلوم نفسي للحظة.
هو أنا ليه فعلًا بحرم نفسي من لحظة السعادة اللي ممكن نعيشها مع بعض؟ ليه بفضل مأجلة فرحتنا، وإحنا الاتنين محتاجينها؟
لكن رغم كل ده، كان فيه سؤال واحد مش قادر يسيب تفكيري.
مجد ماله؟ إيه الهم اللي شايله جواه ومش قادر يحكيهولي؟
فضلت ألف في الشقة وأنا غرقانة في أفكاري، لحد ما فجأة سمعت صوت باب الشقة وهو بيتفتح.
اتحركت بسرعة ناحية الباب، وأول ما شفت مجد، قربت منه وقلت:
وعد: أنا هنزل.
مجد بصلي، وبعدها قال بهدوء:
مجد: وعد، ممكن تخليكي معايا شوية؟
اترددت في الكلام، وقلتله:
وعد: معلش يا مجد، لازم أنزل... مش هينفع.
غمض عينيه للحظة، ولما فتحها وبصلي، قال بصوت حسيت فيه وجع كبير:
مجد: براحتك يا وعد...
سكت شوية، وبعدها سألني:
مجد: أنتِ مش واثقة فيا؟
بصيتله بصدمة من سؤاله، وقلت بسرعة:
وعد: لأ يا مجد، ما تقولش كده. أنا واثقة فيك جدًا.
كنت حاسة إنه مخنوق ومتضايق، وإن فيه حاجة جواه أكبر من إنه يقدر يخبيها أكتر من كده.
قربت منه شوية، وسألته بقلق:
وعد: مجد، ممكن أفهم مالك؟ فيك إيه بالضبط؟
بصلي، لكنه ما ردش.
فضل ساكت، وكأنه بيدور على كلام مش قادر يطلعه. لحد ما سند ضهره على الحيطة، وغمض عينيه، ورجع راسه لورا.
مجد: أنا تعبان قوي يا وعد... حاسس إني مش قادر أتحمل أي حاجة.
وفي اللحظة دي، دموعه نزلت.
وقفت مكاني وأنا حاسة إن قلبي هو اللي بيتقطع. مجد اللي طول الوقت بشوفه قوي، واللي دايمًا بحس إنه قادر يواجه أي حاجة، واقف قدامي بالشكل ده، ومش قادر حتى يخبي تعبه.
قربت منه، وبدأت أمسح دموعه بهدوء.
وعد: مالك يا مجد؟ دي أول مرة أشوفك بالحالة دي... إيه اللي أنت حاسس بيه؟
لكن بدل ما يرد، انهار فجأة، وبدأ يعيط زي الطفل الصغير.
ما قدرتش أستحمل أشوفه كده.
أخدت راسه في حضني، وفضلت أطبطب عليه بهدوء، وأنا نفسي دموعي بدأت تنزل من غير ما أحس.
وعد: مجد، عشان خاطري... أنا مش قادرة أشوفك بالحالة دي. احكيلي، وقولي في إيه؟
فضل ساكت شوية، وبعدها قال بصوت مكسور:
مجد: وعد، ممكن أفضل كده شوية؟ حاسس إني محتاج حضنك... محتاج احتوائك ليا.
الكلام لمس قلبي بطريقة ما قدرتش أوصفها.
ما قدرتش أبعده عني، ولا حتى أفكر إني أسيبه في اللحظة دي. فضلت أطبطب عليه، وأحاول أطمنه من غير ما أضغط عليه بالكلام أو الأسئلة.
لكنه فضل ساكت فترة طويلة.
كنت حاسة إن جواه حاجة كبيرة قوي، حاجة واجعاه ومش عارف يطلعها، أو يمكن مش قادر يتكلم عنها دلوقتي.
مسكت راسه بين إيديا، وبصيتله بحب وحاولت أغير الموضوع وأخرجه شوية من الهم اللي هو غرقان فيه.
وعد: قولي بقى، أنت حاطط في دماغك نظام معين لشقتنا مع بعض؟
رفع عينيه وبصلي، وحاول يتجاوب معايا.
مجد: إيه اللي أنتِ عايزاني أنفذه؟
ابتسمت ابتسامة بسيطة، وقلتله:
وعد: أنا بس عايزة أسمع رأيك الأول.
ابتسم هو كمان، وقال:
مجد: بصراحة، كنت بفكر نخلي المطبخ مفتوح على أوضة السفرة، ونخلي أوضتنا إحنا هي اللي فيها البلكونة، والريسبشن الصغير ده يبقى فيه مكتبين لينا... أنا وأنتِ.
بصيتله باهتمام، وقلت وأنا بهزر معاه
وعد: ويا ترى ده بقى قرار، ولا أنت بتقول رأيك وخلاص؟
بصلي وابتسم، ورد من غير تردد:
مجد: اللي أنتِ عايزاه هنعملهولك. أهم حاجة إن إحنا نكون مع بعض.
سكتُّ للحظة وأنا ببصله.
يمكن ما كنتش لسه عرفت إيه اللي واجعه، ولا إيه السر اللي مخبيه جواه، لكن كنت عارفة إن وجودي جنبه فارق معاه، وإنه في اللحظة دي محتاج يحس إنه مش لوحده.
وأنا كمان، رغم كل حيرتي وخوفي من القرار، كنت كل ما أتخيل حياتنا مع بعض، أحس إن قلبي بيميل للخطوة دي أكتر.
يمكن لسه قدامنا كلام كتير، وقرارات لازم ناخدها، لكن وسط كل الحيرة دي، كانت فيه حقيقة واحدة بدأت تبقى أوضح جوايا...
إن سعادة مجد بقت جزء من سعادتي، وإن وجودنا مع بعض مش مجرد قرار جواز، لكنه حياة كاملة بنحاول نبدأها سوا.
ديون النبض 🫀
بقلم الكاتبه مروة صياح 🎯 ✍️
وعدك ليا
فضلت أنا ومجد في الشقة فترة، بنلف فيها ونرتب حياتنا اللي نفسنا نبدأها مع بعض.
مجد: إيه رأيك هنا نحط السفرة، والناحية دي نحط طقم الأنتريه، والمكتبة تبقى هنا؟
وعد: لأ، استنى بس! أنت كده هتخليني أغير رأيي في كل حاجة. طب ما تيجي نحط المكتبة في المكان التاني، و...
فضلنا نتكلم ونخطط، وكل واحد فينا بيقول رأيه في تفاصيل الشقة، لحد ما لقيت مجد بدأ يخرج من الحالة اللي كان فيها.
كنت بقفش معاه في الكلام وأهزر، وهو يبصلي ويضحك، لدرجة إننا بقينا نضحك ونهزر مع بعض، وكأن الهم اللي كان مالي قلبه من شوية بدأ يخف.
وفجأة، وأنا بتكلم، لقيته ساكت وبيبصلي، وعينيه بتلمع.
مجد: وعد، أنا بحبك قوي.
بصيتله، ولما لقيته بيقرب مني، قلتله:
وعد: وبعدين معاك؟
ابتسم وقال:
مجد: هتهربي مني برضه؟
سكت لحظة، وبعدها قلتله:
وعد: مجد، أنا هنزل.
مسكني من إيدي، وقال بإصرار:
مجد: وعد، ما تهربيش مني. خليكي معايا، أنا مبسوط جدًا وإنتِ موجودة معايا.
وعد: مجد، عشان خاطري، أنا هنزل.
لكنه قرب مني أكتر، ولف إيده حوالين وسطي، وبصلي بعتاب.
مجد: وعد، أنتِ مش واثقة فيا؟
وعد: لأ يا مجد، ما تقولش كده. صدقني، أنا واثقة فيك جدًا.
مجد: أومال ليه أنتِ اللي دايمًا بتبعدي عني؟ صدقيني يا وعد، أنا عمري ما أأذيكي.
بصيتله وسكت، لكن فجأة لقيته بيقرب مني أكتر.
زقيته بإيدي وقلتله بارتباك:
وعد: مجد، أنا عايزة أنزل.
لكنه شدني ليه مرة تانية، وفي اللحظة دي حسيت إن ضربات قلبي بتزيد بسرعة، وجسمي كله بيرتجف.
بصلي، وبعدها أخدني في حضنه.
وللحظة، حسيت إني استسلمت للمشاعر اللي جوايا.
الغريب إني كنت حاسة باحتواء عمري ما حسيته قبل كده. قربه مني المرة دي كان مختلف عن المرة اللي حضني فيها قبل كده، وكأن إحساسي بيه اتغير، أو يمكن أنا اللي بقيت مش قادرة أخبي مشاعري عنه.
وطيت راسي من الكسوف، لكنه رفع إيده ولمس خدي، وقال بهدوء:
مجد: وعد، مش قلتلك ما توطيش راسك كده؟
رفعت عيني وبصيتله، وهو قرب مني أكتر.
غمضت عيني، وفضلنا واقفين قريبين من بعض فتره، لكن فجأة بعدت عنه وقلتله بارتباك:
وعد: أنت إزاي تعمل كده؟
سكت لحظة، وبعدها بصلي وقال:
مجد: وعد، ممكن تسيبي نفسك لمشاعرك شوية؟
عيني وسعت من كلامه، لكنه كمل:
مجد: وعد، أنا عمري ما هقرب منك زي ما أنتِ فاهمة. أنا عايزك تثقي فيا، بس أنا حاسس إني فعلًا محتاج اللحظة دي قوي.
بصيتله وسكت، مش عارفة أرد عليه بإيه.
قرب مني تاني، وأنا كنت مستغربة نفسي جدًا. مش فاهمة إزاي كل مرة أقرر أبعد، ألاقي قلبي بيشدني ناحيته أكتر.
غمضت عيني، ولقيت نفسي ببادله الحضن، وأنا حاسة بحاجة غريبة جوايا، إحساس جديد ومختلف عن كل مرة قربنا فيها من بعض.
لكن فجأة، رجعت أفكر في اللي حصل، وحسيت إننا كده بنتخطى حدود ما ينفعش نتخطاها قبل جوازنا.
بعدت عنه، وأنا مش عارفة أتصرف إزاي.
اللي حصل بينا ده غلط... ما ينفعش نقرب من بعض بالشكل ده، والقبلة اللي حصلت بينا مش من حقنا قبل ما نكون مع بعض بالحلال.
سكت مجد، وبعدها قال باعتذار واضح:
مجد: وعد، أنا آسف... بس أنا فعلًا بحبك قوي، ومشتاق لليوم اللي نبدأ فيه حياتنا مع بعض. صدقيني، أوعي تفتكري إن ده هيتكرر تاني.
كنت مش قادرة أتكلم من كتر المشاعر اللي جوايا. قلبي بيدق بسرعة، وجسمي لسه بيرتجف، وأنا بحاول أستوعب كل اللي حصل.
مجد: أوعدك مش هيحصل كده تاني. إن شاء الله لما نكون مع بعض، نعمل اللي إحنا عايزينه.
ابتسم ابتسامة بسيطة، وكمل:
مجد: إحنا قربنا يا وعد... قربنا من بعض دلوقتي، وده يصبرني لحد ما نتجمع أنا وإنتِ في بيت واحد.
في اللحظة دي، لقيت نفسي أنا اللي عايزة أحضنه.
رميت نفسي في حضنه، ولفيت دراعاتي حواليه، وقلتله من قلبي:
وعد: مجد، أنا بحبك قوي. صدقني، أنا مش عايزة أبعد عنك، ولا عايزة أسيبك.
سكت لحظة، وأنا لسه في حضنه، وبعدها كملت:
وعد: بقى حلم من أحلامي إني أشوفك مرتاح. حلمي إني أحس إنك سعيد، وإنك بتضحك من قلبك. أنا ما بقيتش عايزة لنفسي أي حاجة قد ما عايزة أشوفك دايمًا أحسن، وتوصل لمكانة أعلى وأعلى.
مجد بعدني عنه بالراحة، ومسك راسي بين كفوفه، وطبع قبلة على جبيني.
مجد: وعد، أنتِ روحي... أنا فعلًا عايش بيكِ أنتِ.
بصيتله، وبعدها افتكرت وعده، فقلتله:
وعد: أنت وعدتني إنك مش هتعمل كده تاني.
هز راسه وقال:
مجد: أوعدك يا وعد، مش هيحصل تاني.
لكنه قرب مني مرة أخيرة، وأنا بعدت عنه بسرعة، وبصيتله بمكر وقلت:
وعد: على فكرة بقى، أنا مش واثقة فيك!
ابتسم، وقال:
مجد: بتتكلمي جد!
قربت منه تاني، ورجعت حضنته، وقلتله:
وعد: لأ يا مجد، أنا واثقة فيك جدًا... ممكن بقى أنزل؟
بصلي وابتسم، وبعدها قال:
مجد: طب يلا نخرج سوا.
وعد: على فكرة، أنا كنت طالعة أشوف رغد، لكن لقيت نفسي هنا.
مجد: تعالي ندخل لها سوا.
وفعلًا، خرجنا من الشقة، لكن أول ما وصلنا قدام الباب، لقينا رغد هي كمان خارجة من شقتها ونازلة عند ماما تحت.
بصت لنا وابتسمت، وبعدها قالت:
رغد: وعد، مجد... أنتِم كنتِم في الشقة؟
حسيت بالخجل، ووطيت راسي من الكسوف، لكن مجد بصلي وقال:
مجد: مش قلتلك ارفعي راسك وما توطيهاش كده؟
رفعت راسي بالعافية، وسمعت مجد بيرد على رغد:
مجد: أيوه يا رغد، كانت وعد بتتفرج على الشقة، وطلعت لقيتها موجودة.
بصيت لرغد وقلت:
وعد: كنت هعدي عليكي.
ابتسمتلي وقالت:
رغد: أنا كنت نازلة عند ماما تحت.
وعد: طب يلا ننزل سوا.
رغد بصت لمجد، وبعدها رجعت بصتلي وقالت:
رغد: طيب، أنا كنت عايزة أتكلم مع مجد شوية.
بصيتلها باستغراب بسيط، لكن رديت عادي:
وعد: خلاص، هستناكِ تحت.
وبعدها سبتهم، وأنا نزلت تحت عند ماما، لكن رغد دخلت مع مجد الشقة.
لكن طلب رغد إنها تتكلم مع مجد لوحدهم خلاني أتساءل بيني وبين نفسي...
