رواية ديون النبض الفصل الخامس والعشرون
نزلت أنا ورغد ومجد دخلوا شقه حازم ورغد....
طول ما أنا نازلة، كان عقلي مشغول بمجد ورغد. يا ترى مجد عايز إيه منها؟ وهي كانت عايزة تتكلم معاه في إيه بالضبط؟
لكن أول لما وصلت شقتي، دخلت أوضتي وقفلت الباب ورايا، وقعدت على سريري.
غمضت عيني، ورجعت بذاكرتي للحظات اللي قضيتها مع مجد في شقتنا. كل تفصيلة كانت بتمر قدام عيني من جديد، وكل ما أفتكرها أحس إني عايشة اللحظات دي مرة تانية.
وفي الوقت ده، كان مجد قاعد مع رغد، اللي بصت له وقالت:
رغد: مجد، أنت ناوي على إيه؟ لحد إمتى هتفضل مخبي على وعد إن مامتك هي دكتورة جيهان؟
بصلها مجد وسكت شوية، وبعدها رد عليها:
مجد: كل يوم باخد قرار إني أبلغها وأقول لها، لكن لما باجي أنفذ بتردد جدًا يا رغد.
كل ما أشوف علاقتها بأمي، وأحس قد إيه هيا مش مرتاحة معاها، مش ببقى عايز أي حاجة تعكر صفو العلاقة بيني وبينها.
رغد: بس أكيد هتعرف في يوم من الأيام. عايز تقول لي إنك هتتجوز وعد من غير ما مامتك تعرف؟ أو حتى تكون موجودة في فرحك؟
بصلها مجد ورد بثبات:
مجد: أنا عايز أخد القرار ده وأنفذه، وبعد كده ماما تعرف. يعني ممكن بعد ما نكتب كتابنا.
رغد: ووعد؟ فكرت في رد فعلها وقتها؟ أكيد هتزعل وتتضايق، وممكن كمان تاخد منك موقف.
سكت مجد لحظة، وبعدها قال:
مجد: لأ، أنا حاسس إن وعد مش هتزعل مني. أنا في الأول والآخر واثق إنها بتحبني أنا، لشخصيتي أنا، مش عشان أنا ابن دكتورة جيهان. وبعدين، لما تعرف، هفهمها إن حياتي هتكون مستقلة،
وإن ماما ملهاش دخل في علاقتنا. ومع الوقت الموضوع هيبقى طبيعي، ودكتورة جيهان نفسها هتتعود على الوضع. أنا مش عايز أي حاجة تأثر على علاقتي بوعد.
رغد: بس ده مش معناه إنك تفضل مخبي عليها. هي من حقها تعرف منك، مش من أي حد تاني.
مجد: أنا هبلغها، بس مش دلوقتي. لما تخلص امتحاناتها، وقبل ما نبدأ ترتيبات جوازنا، هقول لها على كل حاجة، وهشرح لها إني كنت مضطر أخبي عليها. أنا متأكد إنها هتفهمني.
رغد فضلت باصة له، وكأنها لسه مش مقتنعة بقراره، لكنه قام بعدها وسابها ونزل.
دخل مجد شقته، لكنه ما كانش مركز في أي حاجة حواليه. كان سرحان في اللحظات اللي قضاها معايا، وكل ما يفتكرها، يبتسم لوحده.
كان مبسوط، لكن في نفس الوقت جواه خوف وقلق من اللي جاي. فرحته بقربنا من بعض كانت كبيرة، ومع ذلك كان عارف إن في حاجة لسه مخبيها عني، وإنه لازم يواجهها في الوقت المناسب.
دخل ياسين عليه، ولما لقاه سرحان وبيبتسم، استغرب وبص له وقال:
ياسين: مجد، مالك؟ أنت كل شوية بحال شكل! من شوية كنت على آخرك ومتضايق ومخنوق، ودلوقتي قاعد مبتسم ومبسوط. إيه اللي حصل؟
مجد بص له، وابتسامته وسعت شوية، وبعدها قال:
مجد: بابا، أنا إن شاء الله أول ما وعد تخلص امتحاناتها، هنخلص شقتي على طول خلال الأيام اللي جاية، وبفكر نتجوز على طول، منستناش للإجازة الكبيرة.
ياسين بص له باستغراب:
ياسين: يعني وعد وافقت؟
مجد: إن شاء الله يا بابا. أنا مستني الأيام اللي جاية دي بفارغ الصبر.
ابتسم ياسين وهو بيبص لابنه، لكن مجد رجع يفكر في الأيام اللي مستنيها، واللي بالنسباله بقت أقرب وأهم من أي وقت فات.
أما أنا... فكان الوضع مختلف تمامًا.
من اللحظة دي، وبعد ما قربنا من بعض بالشكل ده، بقيت كل ما أشوف مجد أحاول أهرب منه.
كل ما أفتكر اللحظات اللي جمعتنا في الشقة، وأفتكر إنه كان موجود معايا وقريب مني بالشكل ده، أحس بخجل شديد، ومبقدرش أتصرف بطبيعتي.
ومش بس كده، ده مجد نفسه اتغير في تعامله معايا. كل ما يشوفني، عينه كانت بتفضل عليا، وكأنه مش عايز يفوّت أي لحظة وأنا قدامه.
وأنا بقيت كل ما أقابله أحس إن قلبي بيدق بسرعة، وجسمي بيرتجف من التوتر، فأحاول أهرب من نظراته قبل ما يلاحظ اللي بيحصلي.
ومع الوقت، دخلت في فترة الامتحانات، وكانت أيام مليانة ضغط ومذاكرة وتوتر.
مجد كان دايمًا بيدعمني ويشجعني، ويسألني عن امتحاناتي، ويحاول يخفف عني، لكنه في نفس الوقت ما كانش بيضغط عليا ولا بيطلب مني أروح له العيادة زي الأول.
وأنا، من كتر كسوفي منه، بقيت أقلل زياراتي للعيادة، رغم إني كنت متعودة أروح له باستمرار.
كنت بحاول أركز في مذاكرتي وامتحاناتي، وأقنع نفسي إن ده مجرد توتر وهيعدي، لكن الحقيقة إني كل ما أشوف مجد، كنت برجع أحس بنفس الخجل من جديد.
لحد ما جه يوم، خلصت فيه يومي وكنت خلاص ناوية أمشي، لكن الممرضة اللي موجودة مع دكتور مجد وقفتني وقالت لي:
الممرضة: دكتورة وعد، دكتورة جيهان عايزاكي في مكتبها.
بصيت لها باستغراب، وسألتها:
وعد: دكتورة جيهان؟ هي عايزاني أنا؟
الممرضة: أيوه يا دكتورة، قالت لي أبلغك تروحي لها.
وقفت لحظة بفكر في السبب، وأنا بحاول أفتكر إذا كنت عملت حاجة تستدعي إنها تطلبني بنفسها.
لكن مهما فكرت، ما وصلتش لأي إجابة.
أخدت نفس، واتحركت ناحية مكتبها، وأنا مش عارفة إيه اللي مستنيني ورا الباب ده
ديون النبض 🫀
بقلم الكاتبه مروة صياح 🎯 ✍️
القنبلة اللي فرقعت 💥🖤
بقلم الكاتبة مروة صياح ✍️🎯
الممرضة: دكتورة وعد، دكتورة جيهان عايزاكي في مكتبها.
وقفت مكاني باستغراب، وبصيت لها.
وعد: دكتورة جيهان عايزاني أنا؟ وفي إيه؟
الممرضة: هي عايزاكي ضروري دلوقتي.
حسيت بضيق، وبدأت أفكر: يا ترى عايزاني في إيه؟ أنا ما صدقت إني بقيت بعيدة عنها، وإن مفيش حاجة هتضطرني أتعامل معاها تاني.
مشيت مع الممرضة لحد مكتبها، خبطت على الباب، ولما سمعت صوت دكتورة جيهان، فتحته.
جيهان: تعالي يا وعد، تعالي اقعدي.
استغربت من هدوئها في الكلام معايا. دي أول مرة تكلمني بالهدوء ده، من غير حدة ولا نظرات تحسسني إني عاملة مصيبة.
دخلت وقعدت قدامها، وهي بصت لي وسألتني:
جيهان: تشربي إيه؟
وعد: لا، شكرًا، مش عايزة حاجة.
جيهان: طبعًا إنتِ مستغربة إني طلبتك؟
وعد: بصراحة، مستغربة جدًا. خصوصًا إنه ما بقاش فيه أي علاقة بين حضرتك وبيني دلوقتي، ولا حتى في الدراسة. يعني حضرتك لسه هتدرسِي لي السنة الجاية، وهكون معاكي في التخصص.
جيهان: إنتِ ناوية على قسم القلب والجراحة؟
وعد: أنا دخلت طب علشانه.
بصت لي وضحكت، وقالت:
جيهان: بحب فيكِ إصرارك وجرأتك.
بصيت لها باستغراب، وبعدها سألتها بصراحة:
وعد: ممكن أفهم حضرتك عايزة إيه بالظبط؟
جيهان: أنا جبتك هنا علشان مجد. بصيت لها باستغراب...
وعد: دكتور مجد؟
جيهان: أيوه، علشان دكتور مجد.
سكتت لحظة، وبعدها كملت وهي باصة لي بتركيز:
جيهان: أنا بكلمك دلوقتي كأم، مش كدكتورة جيهان.
بصيت لها بصدمة، وحاولت أفهم هي تقصد إيه.
وعد: مش فاهمة.
جيهان: إنتِ فعلًا مش عارفة، ولا بتعملي نفسك مش عارفة؟
وعد: لا، أنا فعلًا مش عارفة حضرتك تقصدي إيه.
سكتت ثانيتين، وبعدها قالت الجملة اللي قلبت كل حاجة في لحظة واحدة.
جيهان: يعني إنتِ ما تعرفيش إن مجد يبقى ابني؟
حسيت إن الكلام نزل على دماغي زي الصاعقة.
قمت من مكاني بسرعة، وبصيت لها بعدم تصديق.
وعد: إنتِ بتقولي إيه؟!
جيهان: اللي سمعتيه. اقعدي، أنا عايزة أتكلم معاكي.
فضلت واقفة مكاني، مش قادرة أستوعب اللي سمعته. مجد ابن دكتورة جيهان؟! إزاي؟ وليه محدش قال لي حاجة زي دي؟
وعد: طب وليه؟ وليه محدش عارف في الجامعة ولا المستشفى؟
جيهان: دي رغبته، دي إرادته. هو عايز يكون نفسه بعيد عن اسمي ومكاني، وعايز الناس تتعامل معاه على أساس إنه مجد، مش ابن دكتورة جيهان.
سكتت لحظة، وبعدها كملت:
جيهان: ولما قرب منك، ما كانش عايز أي حد يعرفك بالموضوع ده. حتى أخته رغد وياسين نبه عليهم إنهم يخبوا عليكِ الأمر ده.
حسيت إن الصدمة بتزيد جوايا مع كل كلمة بتقولها.
وعد: وليه كل ده؟
بصت لي بجدية، واتغيرت ملامحها وهي بتتكلم.
جيهان: اسمعيني يا وعد. أنا بكلمك كأم دلوقتي، مش كدكتورة. أنا عارفة إن العلاقة بيني وبينك مش تمام، وإنك شايفاني شديدة وقاسية، وما عنديش قلب.
سكتت لحظة، وكأنها بتحاول تختار كلامها بعناية، وبعدها كملت:
جيهان: بس أنا لو ما كنتش كده، ما كنتش هعرف أكبر مجد، ولا كنت هعرف أحافظ عليه، ولا أحافظ على مستقبله.
فضلت باصة لها، ولسه مش قادرة أستوعب إن الست اللي قدامي، واللي طول الوقت كنت بحاول أتجنبها، هي نفسها أم الشخص اللي قلبي اختاره.
بس السؤال اللي فضل يلف في دماغي، وسط كل الصدمة دي، كان واحد بس:
مجد كان عارف إني مش عارفة... ومع ذلك سابني أقرب منه، من غير ما يقولي الحقيقة!
ويا ترى إيه تاني لسه مستخبي عني؟...
ديون النبض 🫀
ملف جيهان الأسود اتفتح 🖤
بقلم الكاتبة مروة صياح ✍️🎯
بصيت لدكتورة جيهان وأنا متلخبطة، ومش قادرة أربط الكلام اللي سمعته ببعضه.
وعد: دكتورة جيهان، أنا مش فاهمة حاجة.
دكتورة جيهان اتنهدت، وسندت ضهرها على الكرسي، وبدأت تحكي.
جيهان: أنا هحكي لك يا وعد. أنا زي أي أم بتحب ابنها، وبتحاول على قد ما تقدر تفرش له مستقبله وتحافظ عليه.
سكتت لحظة، وكأنها رجعت بذاكرتها لسنين بعيدة، وبعدها كملت.
جيهان: كان ليا أخ وحيد، مات في حادثة هو ومراته، وساب بنت اسمها سارة. وأنا كنت بحب ياسين، واتجوزته وخلفت منه مجد. بس الجواز ده كان غصب عن أبويا، عشان ياسين كان مستواه المادي مش أحسن حاجة.
فضلنا نقاوم ونعافر، لكن في النهاية أبويا فضل ورايا لحد ما ياسين طلقني.
وعد: طلقك؟!
جيهان: أيوه. ما كانش قدامي مفر. بابا قفل السكة في وش ياسين، وضغط عليه عشان يطلقني.
وياسين وقتها ما كانش في إيده حاجة يعملها غير إنه يبعد عني، غصب عنه. هو كمان اتجبر على كل ده.
بصت قدامها شوية، وبعدها كملت بصوت هادي، لكنه كان شايل جواه وجع سنين.
جيهان: وأنا عشان مجد يفضل معايا، اضطريت أرجع لبابا، وإلا ما كنتش هشوفه تاني. في الوقت ده كان ياسين وضعه المادي صعب جدًا بسبب اللي حصل، وما كانش قادر يواجه أبويا ولا يقف قدامه.
سكتت، وبعدها قالت:
جيهان: ما علينا، ده مش موضوعنا قوي دلوقتي. بس عايزة أقولك إن أنا وياسين عانينا كتير، وفي النهاية أنا اخترت ابني.
فضلت ساكتة، وأنا بحاول أستوعب اللي بتقوله. الست اللي كنت شايفاها طول الوقت قوية ومش بتسمح لحد يقرب منها، كان وراها حكاية عمرها ما حكتها لي.
جيهان: المهم إن مجد فضل معايا، وجده هو اللي ربّاه. وأنا كنت لسه في سنك، دكتورة متخرجة جديد، وبابا كان مستثمر كبير. عنده شركة أدوية، وشركة أجهزة طبية، وكمان فتح المستشفى الاستثماري اللي أنا ماسكاها دلوقتي.
رفعت عيني ليها باهتمام، وهي كملت:
جيهان: لما حصلت حادثة أخويا، أخويا كان له نصيب كبير في الميراث ده كله، لأنه كان شريك بابا في كل حاجة. وبعد وفاته، بقت فيه وصية غيّرت مستقبل مجد كله.
وعد: وصية؟!
جيهان: أيوه. جده كتب وصية إن مجد ابني يتجوز سارة، عشان كل اللي نملكه ما يروحش لحد غريب.
حسيت إن الموضوع أكبر بكتير من مجرد خلاف عائلي، فسألتها وأنا مش فاهمة:
وعد: يعني إيه؟ هو لازم يتجوزها عشان الورث؟
جيهان: أيوه. يا إما يتجوزها، يا إما جزء كبير من الميراث يروح لسارة، وطبعًا إنتِ فاهمة إن لو سارة اتجوزت حد غير مجد، أكتر من تلتين الميراث هيكون في نصيبها.
سكتت لحظة، وبعدها كملت كلامها:
جيهان: غير كده، مستقبل مجد مرتبط بكل ده. هو تعب من خمس سنين، وكبّر المستشفى أكتر، وطوّر شركة الأدوية، وبقى ليه اسم وشأن في مجاله.
كنت بسمعها وأنا مصدومة، وكل كلمة كانت بتفتح قدامي باب جديد من الأسرار اللي ما كنتش أعرف عنها أي حاجة.
لكن أول ما ذكرت حلم مجد، قلبي اتقبض.
جيهان: هو نفسه عنده أحلام كتير عايز يحققها. أنا عارفة إنه نفسه يفتح مستشفى اقتصادي لمرضى القلب وجراحة القلب، عشان الناس اللي مش قادرة تتحمل تكاليف العلاج تلاقي مكان يساعدها. بس هينفذ كل ده إزاي لو خسر جزء كبير من الإمكانيات اللي قدامه؟
في اللحظة دي، افتكرت كلام مجد عن أحلامه، وعن رغبته إنه يعمل حاجة مختلفة، وعن إصراره إنه يساعد الناس.
وعرفت إن حلم المستشفى مش مجرد فكرة عابرة عنده، ده حلم حقيقي بيشتغل عشانه، ويمكن بيهلك نفسه في الشغل عشان يقدر يحقق أحلامه ويساعد غيره.
فضلت ساكتة، لحد ما دكتورة جيهان بصت لي وكملت.
جيهان: مع الوقت، كنت مخبية على مجد موضوع الوصية دي. سارة ومجد اتربوا مع بعض، وهو شايفها كأخت ليه، لكن هي حبته.
وعد: بتحبه؟!
جيهان: أيوه. وجدها كان دايمًا يقول لها: «مجد نصيبك إنتِ، وهيكون شريك حياتك».
ملّوا دماغها بالكلام ده من وهي صغيرة. كبرت وهي بتحبه، وما بتفكرش في حد تاني غيره.
سكتت شوية، وبعدها كملت بصراحة:
جيهان: وأنا كنت مشغولة عنه طول حياتي. كنت عايزة أحقق ذاتي، وأرسم له طريقه، وأضمن له مستقبل محدش يقدر ياخده منه. لدرجة إنه كان بيحس إني بفضّل شغلي عليه.
نزلت عينيها للحظة، وكأنها بتعترف بحاجة كانت بتتهرب منها سنين.
جيهان: كنت عايزة أحافظ على قد ما أقدر على مستقبله وعلى ورثه. وإنتِ عارفة إن الحياة دلوقتي صعبة، والفلوس والإمكانيات بتفرق في كل حاجة.
بصت لي تاني، وكملت:
جيهان: وأوعي تفتكري إن مجد الفترة دي كلها ما فكرش يرتبط بأي بنت. لأ، بالعكس، مجد قدامه بنات كتير، وأي واحدة تتمناه. بس هو لو وافق يتجوز سارة، كل ده هيكون بتاعه هو، وهيكون تحت أمره.
فضلت باصة لها من غير ما أرد.
كل حاجة كانت بتتغير قدامي. مجد اللي عرفته، واللي حبني، واللي كان بيكلمني عن أحلامه، طلع وراه عالم كامل من الأسرار والالتزامات اللي ما كنتش أعرف عنها حاجة.
والأصعب من كل ده، إني اكتشفت إن فيه ناس كتير كانت عارفة الحقيقة، وأنا الوحيدة اللي كنت بعيدة عنها.
لكن وسط كل الصدمة دي، كان فيه سؤال واحد بيلح عليا:
مجد مخبي عليا الحقيقة دي ليه؟
هل لأنه كان خايف أخاف من عالمه، وأبعد عنه؟
ولا لأنه كان عارف إن فيه مستقبل مرسوم له مع سارة، ومش عارف يواجهني بالحقيقة؟
بصيت لدكتورة جيهان، وأنا حاسة إن الكلام اللي سمعته لسه أوله، وإن اللي جاي ممكن يغيّر كل حاجة بيني وبين مجد🖤
