رواية ديون النبض الفصل السادس والعشرون
د جيهان كملت كلامها، وملامحها بقت أكثر جدية وهي بتبص لي.
د جيهان: «شركة أدوية كبيرة، وشركة أجهزة طبية، ومستشفى استثماري... أكبر مستشفى استثماري في مصر. غير شغله اللي إنتِ عارفاه، وهو لسه متمسك بدوره في المستشفى الجامعي.
لما شافك، إنتِ غيرتي حياته. وأنا عايزة أقول لك إنه بَعِد عني خالص.
أنا عارفة إني بطلب منك المستحيل، بس بطلب منك حاجة واحدة. لو إنتِ فعلًا بتحبيه، أكيد بتتمني له الخير، وأكيد نفسك يكون أفضل وأحسن شخص.
كل اللي أنا بنيته ده هيستمر لو هو اتجوز سارة، وكل ده هيبقى ملكه هو. لكن لو ما اتجوزهاش، هيبقى زيه زي أي دكتور محدش شايفه ولا حاسس بيه.
مجد إنسان متميز جدًا، وعنده أهداف كتير نفسه يحققها. بس هيحققها إزاي وهو ما عندوش حاجة؟ شغله في المستشفى مش هيجيب له اللي يقدر يفتح بيه بيت، وفي نفس الوقت ممكن يفقد مكانته في كل حاجة.
وإنتِ أكيد ما ترضيش إن اللي بتحبيه يتدفن بالحياة بالطريقة دي».
كنت قاعدة بسمعها، وكل كلمة بتقولها كانت بتوجعني أكتر من اللي قبلها، لحد ما الدموع بدأت تنزل من عيني من غير ما أحس.
وعد: «يعني إنتِ عايزاني أسيب مجد؟»
جيهان: «أنا ما أقصدش كده. بس أنا بقول لك تبعدي عنه فترة، لحد ما يتجوز سارة.
سارة مش هتعترض إنه يتجوز عليها مع الوقت. ابعدي عنه لحد ما يقرب من سارة ويتجوزها، وأضمن له مستقبله. وساعتها أنا ما عنديش مشكلة لو هو اتجوزك إنتِ كمان.
أنا بقول لك ساعديني إنه يحافظ على اللي بناه، هو تعب كتير علشان يوصل له. وكل اللي عاوزاه منك إنك تبعدي فترة بس».
مدت إيدها وطلعت شوية ورق من مكتبها، وبعدها قدمته لي.
جيهان: «علشان تصدقيني، دي أوراق الملكية كلها».
أخدت الأوراق من إيدها، وفضلت أبص فيها والدموع مالية عيني. ما قدرتش أرد عليها، ولا حتى لقيت كلام أقدر أقوله.
يمكن هي كانت مستنية مني رد، لكن كل اللي شافته كان دموعي.
قامت من مكانها، وقربت مني، وقالت بنبرة أهدى:
جيهان: «أنا عارفة إن الموضوع صعب».
حسيت وقتها إن قلبي انغرس فيه سكين. رفعت راسي وبصيت لها، وأنا مش مصدقة إنها بتطلب مني حاجة بالشكل ده.
وعد: «إنتِ عارفة إنتِ بتطلبي مني إيه؟»
جيهان: «صدقيني، أنا فاهمة كويس قوي إن إنتِ بتحبيه وهو بيحبك. بس ساعات بنضحي بأغلى حاجة عندنا علشان اللي بنحبه يكمل حياته ونطمن عليه.
لو إنتِ عايزة تفضلي معاه، وأنا عارفة إنه هو كمان اختارك ومش عاوز أي حاجة غيرك، هيضحي بكل حاجة في سبيل إنه يكون معاكي إنتِ وبس.
بس إنتِ عايزاه يفضل زي ما هو؟ ما يبقاش له مستقبل؟
أنا مش هزعل من ده، أنا برضه أم وعاوزة سعادته. بس ساعات كتير بنقسى على أولادنا علشان نعلمهم ونكبرهم، لأنهم أوقات ما بيبقوش عارفين مصلحتهم.
وأنا كأم بترجاكي... سيبيه ياخد فرصته، ويثبت نفسه، وما يسيبش حقه».
سكتت، وأنا فضلت باصة لها، بحاول أستوعب كل اللي سمعته.
وعد: «صدقيني، أنا عندي إن مجد يكون أفضل دكتور جراحة قلب في مصر كلها. ده هدفي قبل نفسي، وده بالنسبة لي حلم عمري.
بس هو ليه خبّى عليّ كل ده؟»
جيهان: «علشان هو عارف إنه مش هيسيبك. إنتِ ممكن اللي تقدري تبعد عنه».
ساعتها فهمت هي بتفكر إزاي. هي عارفة إن مجد متمسك بيا، وإنه ممكن يختارني حتى لو خسر كل حاجة، علشان كده قررت تحط القرار في إيدي أنا.
كانت عايزاني أختار عنه، وأقرر أنا إذا كان يستحق يضحّي بكل اللي بناه علشاني، ولا لأ.
بس هي ما تعرفش إن أصعب حاجة ممكن أواجهها هي إني أكون مضطرة أختار بين قلبي ومستقبل الإنسان اللي بحبه.
-- وعد بالبعد 💔
د جيهان بصت لي آخر نظرة، وبعدها اتكلمت بهدوء.
جيهان: «وعد، بعد إذنك، المقابلة اللي حصلت بيني وبينك مش عايزة أي حد يعرفها. ولا حتى مجد، ولا ياسين، ولا رغد.
أنا يمكن بطلب منك المستحيل، بس صدقيني، كل ده لمصلحة مجد».
سكت ثانيتين، وبصيت لها وأنا حاسة إن قلبي مات جوايا.
وعد: «أوعدك إن أنا هبعد عنه.
أنا أتمنى إنه يسامحني، وأتمنى كمان إني أقدر أسامح نفسي... بس أنا ما قداميش حل تاني».
خرجت من مكتبها والدموع في عيني، وحسيت إن الدنيا اتسدت في وشي.
فضلت أفكر في كلامها، وفي كل حاجة قالتها عن مجد. وحسيت إن وجودها في حياته كان جزءًا من اللي وصل له، وإنها ساهمت في بناء الدكتور مجد ياسين الرفاعي، وساعدته يوصل للمكانة اللي هو فيها.
طب أنا هاجي آخده كده من أمه، وأهدمه بدل ما أبنيه؟ بدل ما أقف جنبه وأساعده يبقى أفضل وأحسن؟
لقيت نفسي تايهة وشاردة، ومش عارفة أعمل إيه، ولا أتصرف إزاي، ولا حتى هقدر أبعد عنه ولا لأ.
كنت لسه واعدة جيهان إني هبعد، لكن مجرد التفكير في البعد كان كفيل يوجعني.
افتكرت كلامنا سوا، وافتكرت مجد وهو بيبص لي ويقول:
مجد: «إنتِ مجدي أنا يا وعد».
فهمت وقتها هو كان يقصد إيه. كان يقصد إنه مستعد يضحي بكل حاجة في سبيل إنه يكون معايا.
وأنا كمان وعدته إنه يكون وعدي أنا من الدنيا واللي فيها، ووعدته إني أكون جنبه وما أبعدش عنه.
بس وقفت مع نفسي وقلت إن أنا كمان وعدته إني أحلم له بالأفضل، وإنه يكون أحسن وأعلى.
فضلت ماشية وأنا مش شايفة قدامي من كتر التفكير، وكل اللي جوايا إني بقول له:
سامحني يا مجد... أنا ما عنديش حل غير إني أبعد عنك، لحد ما أطمن عليك وأتأكد إن حياتك ماشية في الطريق اللي تستحقه.
لكن ما كنتش عارفة هقدر أبعد عنه إزاي.
وأنا ماشية، لقيته فجأة قدامي.
بص لي باستغراب، وقال:
مجد: «وعد! إنتِ ما رجعتيش البيت؟»
بصيت له وأنا مذهولة. إزاي ما أخدتش بالي من وجوده؟
مجد: «مالك؟»
حاولت أكون طبيعية، وابتسمت له.
وعد: «أبدًا».
فضل باصص لي باستغراب، وكأنه مش مقتنع بردي.
مجد: «ما رجعتيش البيت ليه؟»
وعد: «أبدًا، كنت قاعدة مع واحدة صاحبتي».
مجد: «مالك يا وعد؟ حاسك سرحانة وشاردة. في حاجة حصلت؟»
بصيت له وسكت شوية، وبعدها رديت:
وعد: «أبدًا، بس واحدة صاحبتي كان عندها مشكلة، وأنا مشغولة بيها».
سكت لحظة، وبعدها قال:
مجد: «طيب تعالي معايا. أنا كلها نص ساعة وأرجع البيت».
بصيت له وقلت:
وعد: «بس إنت النهارده مضغوط جدًا. كنت بتقول إنك مش هترجع دلوقتي».
مجد: «بصراحة، مش قادر أكمل شغل».
ابتسم لي، وكمل كلامه:
مجد: «وبعدين النهارده الويك إند بتاعنا. بصراحة مش عايز أضيعه ولا لحظة وإحنا مع بعض».
بصيت له، ورديت جوايا:
وأنا كمان يا مجد، مش عايزة أضيّع لحظة واحدة وإنت معايا. عايزة أقرب منك أكتر، وأشبع منك قبل ما أسيبك.
مجد: «وعد، مالك؟ إنتِ مش معايا خال».
ابتسمت بالعافية وقلت:
وعد: «أبدًا، طب يلا، أنا ... معاك».
دخلت معاه حجرة الكشف، وقعدت على الكرسي اللي على جنب، وهو رجع يكمل شغله.
لكن أنا ما كنتش مركزة في أي حاجة غيره.
فضلت عيني عليه، وسرحانة في ملامحه، وحاسة إني عايزة أحفظ كل تفصيلة في وشه، وأفضل فاكرة صوته ونظراته، وأستغل كل لحظة أكون فيها معاه.
ما كنتش عايزة أبعد عنه، ولا أشغل بالي بأي حاجة غيره، رغم إن جوايا كان فيه قرار أنا نفسي مش قادرة أتقبله.
بعد ما خلص شغله، بص لي وقال:
مجد: «يلا يا وعد».
بصيت له وسكت، فقام وقرب مني.
مجد: «إنتِ مش معايا خالص النهارده».
قعد جنبي على الكرسي، ومسك إيدي بحنان.
مجد: «طيب ممكن أعرف مشكلة صاحبتك دي إيه؟ يمكن نعرف نحلها سوا».
بصيت له وقلت:
وعد: «بلاش يا مجد».
مجد: «أنا أكيد مش عارف هي مين».
سكت شوية، وبعدها قلت:
وعد: «بصراحة، مش هقدر أقول. هي أمنتني».
فضل ساكت لحظة، وبعدها اتكلم بنبرة هادية:
مجد: «أنا عايز أقول لك على حاجة، بس ما تزعليش مني.
إنتِ دايمًا بتفكري في غيرك أكتر من نفسك. وأنا مش بقول لك إنك تبقي أنانية، بالعكس، بس عايزك كمان تفكري في نفسك زي ما بتفكري في غيرك.
أنا معاكِ إنك تشوفي مشكلة صاحبتك وتحاولي تحليها، بس مش عايزها تأثر عليكِ بالشكل ده».
في اللحظة دي، بصيت له، وما قدرتش أتماسك أكتر من كده.
الدموع نزلت من عيني، ومجد بص لي باستغراب واضح.
مجد: «وعد، مالك؟ في إيه؟»
وطيت راسي، وانفجرت في البكاء.
قرب مني، لكنه كان متردد ياخدني في حضنه،
لأنه وعدني أنه مش هيقرب مني ....
ويمكن لأنه مش فاهم إيه اللي حصل لي بالشكل ده.
لكن أنا اللي قربت منه، ورميت نفسي في حضنه.
كنت محتاجة حضنه واحتواءه بشكل ما قدرتش أقاومه. ولما حس بيا، ضمني لصدره بقوة، وفضل ساكت.
ما سألنيش تاني، وما ضغطش عليّ علشان أتكلم.
فضل حاضني، وأنا بعيط، ودقات قلبي بتزيد، ومش قادرة أقول له أي حاجة من اللي بتوجعني.
ما كنتش عايزة أسيبه، ولا أخرج من حضنه. كنت حاسة بالأمان معاه، وفي نفس الوقت عارفة إن الأمان ده هو نفسه اللي أنا بفكر أتنازل عنه بإيدي.
إزاي هقدر أبعد عنه؟ وإزاي هقدر أعيش من غيره؟
لكن وسط كل الوجع ده، قررت إني مش هحرم نفسي منه دلوقتي. على الأقل في الفترة اللي لسه موجودة فيها معاه، مش هضيّع لحظة واحدة.
هسمع صوته، وأبص في عينيه، وأتملى من ملامحه على قد ما أقدر.
مش هقدر أبعد عنه مرة واحدة. لازم يكون البعد تدريجي، يمكن أقدر أتحمله، ويمكن أقدر أهيّئ نفسي للي أنا داخلة عليه.
بعد فترة، حسيت بيه بيطبع قبلة على جبيني.
مجد: «وعد، مالك؟ أنا أول مرة أشوفك كده».
رفعت راسي بالعافية، ومسحت دموعي، وقلت له:
وعد: «أنا متأثرة قوي بمشكلة صاحبتي، وحاسة إن مشكلتها هي مشكلتي أنا».
بص لي بحنان، وقال:
مجد: «وبعدين في قلبك ده؟»
ابتسم ابتسامة صغيرة، وحاول يخرجني من الحالة اللي أنا فيها.
مجد: «طب ممكن عشان خاطري تضحكي؟»
حاولت أبتسم له، لكن ما قدرتش.
قرب مني شوية وقال بمشاكسة:
مجد: «هتضحكي ولا أقرب منك أكتر؟»
بصيت له وابتسمت رغم دموعي، وبعدها رميت نفسي في حضنه مرة تانية.
كنت محتاجة أعيش اللحظة دي، وأحس بقربه، من غير ما أفكر في أي حاجة تانية.
وأنا في حضنه، رفعت راسي وبصيت له.
وعد: «مجد، إنت بتحبني؟»
بص لي باستغراب، ومسك وشي بين كفوفه.
مجد: «لسه بتسألي السؤال ده يا وعد؟ إنتِ مجدي أنا».
أول ما سمعت منه الكلمة دي، حسيت إن قلبي بيوجعني أكتر.
كأنه بيأكد لي إنه فعلًا مستعد يضحي بكل حاجة علشاني، وإن اختياره ليا مش مجرد كلام.
بصيت له وقلت بصوت واطي:
وعد: «وإنت مجدي أنا، ووعدي أنا».
قرب مني وطبع قبلة على جبيني، وبعدها مسك كفوفي وطبع قبلة على باطن كل كف.
مجد: «وعد، إنتِ أغلى عندي من نفسي، وأغلى عندي من كل حاجة. مش عايز أشوف الدموع دي في عينيك أبدًا».
بصيت له وابتسمت، وحاولت أخبي الوجع اللي جوايا.
كنت نفسي أقول له كل حاجة، أحكي له عن المقابلة، وعن كلام أمه، وعن القرار اللي وعدتها بيه.
كنت نفسي أقوله إنه مش قليل، وإنه يستحق كل حاجة حلوة في الدنيا، وإن آخر حاجة ممكن أتمناها هي إني أكون سبب في تعطيل مستقبله.
لكن وعدي لجيهان كان واقف بيني وبينه، وأنا ما كنتش عارفة أعمل إيه غير إني أسكت.
مجد: «يلا علشان نرجع البيت، ونبدأ الويك إند بتاعنا بدري النهارده».
بصيت له وابتسمت.
وعد: «يلا».
قمت معاه، وخرجنا من حجرة الكشف، ورجعنا البيت سوا.
كنت ماشية جنبه، وإيدي في إيده، وهو بيتكلم معايا بشكل طبيعي، وأنا بحاول أشاركه اللحظة بكل ما أقدر عليه.
لكن جوايا كان فيه صوت مش بيسكت.
يا ترى هقدر أعملها يا مجد؟ هقدر أبعد عنك فعلًا؟ ولا قلبي هيسبقني كل مرة، ويرجعني ليك من جديد؟
ما كنتش أعرف إن أصعب وعد ممكن الإنسان يقطعه على نفسه، هو الوعد اللي بيكون عارف من البداية إنه هيكسر قلبه علشانه.
