رواية خلخال مشوه الفصل السادس والعشرون 26 بقلم زمرده

 

 

 

 

رواية خلخال مشوه الفصل السادس والعشرون بقلم زمرده



من دونك صرت ما اعيش
وي الناس
و انت بكل سعاده تعيش
من دوني ..

°غاية°

وبعدها ما مكملة وركض ضيرم و وراه عزيز ،وهي لحگتهم و وراهم مشى عمي باقر انداريت على
صوت ميمنة وراي تسأل شكو بعدني اريدن ارد عليها ومشالها صخر عبرني وهو يگلها

صخر : أجت هيوفة تگول ريحانة جاي تجيب

ميمنة : يااا ،بعدها وينها وين الجيابة

انداريت عليهم من صاحتني
ميمنة : انا ماشيتلهم ،تمشين وياي غاية ؟

_ أي أي امشي

ميمنة : جا بساعج اللبسي عباتج

طبت تهف گبلي وانا لحگتها بساع لبست عباتي وطلعت اعدل بيها من صاحتني ،وبس طلعنه جانوا عبد الحق واخواني بالحوش ،من وصلنه للباب اندارت ميمنة عليهم وبصوت مسموع گالت وهي
توجه الكلام لصخر

ميمنة : تعال وصلنه

بلايه ما يحجي ،اجه ،طلع هو واحنا وراه بس وصلنه رد ،اول ما طبينه لبيت عمي باقر ترس أذنه
صوت خبصتهم وبجيها ،ومبين صوتها صوت وحده مرعوبة وخايفة بنفس الوكت ...! !

طبت گبلي ميمنة مستعجله وانا وراها ،وهستونة طبينة ولاگونة يردون يطلعون ،باوعتلها بخوف من حالها وسألت

ميمنة : هااا عمة ،صدگ راح تجيب ؟

نجوى : چن صدگ ياعمة ،خااايبة هيوفة بسااااعج

طلعت هيوفة تركض بايدها عباتها وجنطة زغيرة اطتنياها وبساع لبست عباتها وردت اخذتها من ايدي تحجي بساع

هيوفة : عمة تجي امي ويانة ؟

نجوى : أي جا شلون انا اخافن .

ضيرم : ماشي اصيحنها ،هاك عزيز شغل السيارة

شمر عليه السويج وطلع يصيح امي، كلشي صار بساع بساع ،وبنفس الوكت انخبصنه خبص ،انا وميمنة وتگابلنه نضفنه البيت وحواري بس تبچي ما گدرت تساعدنه وحتى
أخاف احد يجي والصدگ انا ما اگدر اشتغل بس
افتر وياها وهي حتى فراشها حضرته

بصائر كلساع تخابر عليهم وبعدها ما جايبة
للمغرب احنا خبصتنه زادت وحتى عمة خالدة اجت تسأل عليها
خالدة : جا وين صارت ،مو تگولن مشت عدها طلوگ ؟

بصائر : ما اعارف عمة ،كلساع اخابر ويگلولي بعدها

شيماء : يجوز تقلصات مو طلوگ

ميمنة : لا يمة وين اكو هيج تقلصات ،وگفة ما گدرت توگف

شيماء : جا شني السالفة بعد

بعدها تحجي ودگ مبايل بصائر ،كلنا طفرنة واشرنالها تفتح الحاكية ،وريت ما سامعين السمعناه صدمتنة كفيلة تخلي صوت ملاطمنه يترس البيت وكل وحده بينة ما گدرت تكض
دمعتها واحنا نسمع الخبر الناثر هدوئنه وعلن خسارة تعبها وصبرها كل هاي السنين

بصائر : هااا خوية، بشر ما جابت

واول مرة اسمع الكسرة بصوت عزيز ،وطول الا گال
_ جابته ميت

مو كلمتين ،چن خناجر بنص الگلب ،وي كل دمعة تطيح ما على لسانة غير
_ ياتعبج وصبرج ،راح تعب ريحانة ،راح الانتظرته سنين

ومو يوم اسود صار ،ومن واعيه وما لاگيته يمها ماشين يدفنونة صاير عدها انهيار وفاقده الوعي من گد اللطم الاطمتة على روحها
غيم الحزن علينه ونص الاليل الا طلعوها بس ردت جثة بلايه روح نحير شلون نتلگاها وبشني نصبر عليها ..! !

مسحت عيوني وطبيت للغرفة ،وردت عيوني تصب بساع من شفت جده حاضنتها تسولف وياها تقنعها الله كاتبلها هيج ،بس ماعدها للصبر شعره
وصوت بجيها يكسر باب الگلب ،و وي كل حجاية تگولها تطيح دموعي

ريحانة : مات ابني جدة ،مات گبل ما احطنه بحضني ،گبل لا احجيلة شگد صبرت وتعبت الا شلته ببطني ،جدة ما شفتة دفنوووه

عجزنة نرد على كلامها ،عجزنة ومابيدنة غير بس الدموع وصوت بجينة المسموع اريد اكض دموعي ما اگدر احس جبل صار على صدري شلون هي
يعين گلبها الله

جدة عود اقوى وحده بينة عيونها تلمع يردن يطيحن دموعها بس بالگوات كاضتهن
غضة : كافي ولج حبوبة موزين عليج ،نفسه والبجي يمرضج

ريحانة : شلون ما ابجي جدة ،شلون وانا ضاع كل تعبي ،انا جنت يوميا اگله شوكت تجي وتگلي يمة
جدة بعد ما راح اسمعهاا ولا اشوفنة يكبر گدام عيني

غضة : خايبة بعدج بداية العمر ،تجيبين عشرة مو واحد

ريحانة : لا جدة لا ،هذا أول ضناي ،هذا فرحتي بعد سنين التعب ،ولج يمة ما كملت فررحتي

انهارت وخوت روحها من البجي وبالگوات عماتي وامي قون روحهن وي جدة يحجن وياها يردن بس يسكتنها وهي ما هادت الا من طب يحاجيها ضيرم هستوه اجه من المگبره لان بعد شوي وتفقد وعيها

ضيرم : كافي خوية ،فدوة لعيونج اروحن كافي ،الله ما قاسمله يعيش ،كافي بجي راح تموتين

ريحانة : خليني اموتن ،انا اريد اموت ،ولك خوية ما شفتة ،حتى ماشفتة ،ليش دفنتوها وماشفتة

ضيرم : جا هذا حالج بلايه ما تشوفي ،شلون لو شفتي ،كافي فدوه اروحلج

دنگت واباوع على دموعها يطيحن من عيونها للگاع وهو گاعد گبالها ثاني ركبته يتوسل بيها ،ومن حضن راسها لصدره افجرت تبچي وتشكيله بنفس الحجي تعيد بي وچن ماتدري بروحها شتحجي
يمسح على راسها ساكت وكلنه ما حجينه الا من تعبت سكتت وساعدتها هيوفة
تمدد مددت مغضمه بس مبين ما نايمة ،شارده هي وافكارها وقهرها ومو ويانة

طلعت من الغرفة وانا احس عيوني نار ،مشيت للمغسلة بللت طرف شالي بالماي البارد ومسحتهن وانداريت على صوت عزيز وراي يتحمحم يريد يطلب للحمام وبأيده شايل هدومه
سويتله درب طب وانا مشيت للمطبخ يم البنات وعود گلت ما ابجي بس ماگدرت اصبر روحي من طبيت وشفتها گاعده وميمنة گبالها وهي منهاره
ولا چنها گبل شوي
هيوفة الگاعده تصبر عليها ..! !

ميمنة : خايبة كافي ،ولج هيوفة فدوه العينج كافي انمردن عيونج

هيوفة : ماشفتي ،ولج انا شلته بايدي هاي ،ولج خدوده وشعره ،شكله يخبل ينحط بنص الگلب

تبجي وتحجي وبأيدها تأشر ،وميمنة تسكت بيها وعلى جهه گاعده حواري عيونها فصوص حمر من اللطم اللطمته على روحها من سمعنه باصعب خبر بكل حياتنا

هيوفة : للعصر هي عدها طلوگة ،بس فجأه هيج بردت وبعد ما حست بالجاهل ،گالت ما جاي احسن بيه ماكو مايتحرگ ،اطوها ابره وجابته ،طلع ميت
ميت ولج ميمنة ميت ،راح ذاك تعبها وصبرها كله

ميمنة اقوى وحده بينه چانت تصبر على الكل بس من اباوع بعيونها الگاها مدمعة وتباوع لريحانة بقهر الدنيا كله
ميمنة : كافي عليج الله ،گومي غسلي وجهج وشوفي رچلج شبيه جاي يصيح

هزت رأسها ب أي وگامت غسلت وجهه على السنك وطلعت للحوش تشوف شبي يصيح وكل ما جايه صوت صياحه يعلى اكثر ..! !

وفوگ الربع ساعة هيج وردت ،كلنا گمنه نسالها شكو
وهي بخوف واضح گالت
هيوفة : مخابره حمزة ،وگايله ابني كلشي مابي أنتم موتوه

فتحت عيوني مصدمه بالحجته
ميمنة : يااا ،وهذا شمدري ؟

هيوفة : انداري منين داري ،يگل الضيرم ابني اريدنه منكم

ميمنة : جا ما يعارف قضاء الله وقدرة ،شبي هذا ؟

هيوفة : يريدله طلابه والولد منا روحهم صايره بخشومتهم والله يحطوه ويكتلوه

ميمنة : هو يفتر على منيته ،خلي شيسوي يسوي احنا ضيمنه كافي علينا

عدت بالساعة ،وفززنة صوت صياح الولد برة ،طلعنا نتراكض ،گلوبتنه تتراچف كل حيل ماضل عدنا والله بس مصيبة ريحانة كافي

ضيرم : شلوووون راح ابتلي بي ،لك امشي منا لا والله اردك جنازه الاهلك

حمزة : اريدن اشوفنها ،بس خل اشوفنها انا رجلها والي الحگ اضل يمها ،المصيبه مصيبتنه ثنينة

ضيرم : احنا يمها ،نكفي ونوفي ،ما بعازتك هي

حمزة : حجي حاجيهم يخلوني اشوفنها ،والله ما اتحرك منا اذا ما احجي وياها

رأجس : طب عزيز گول الاختك رجلج يريد يحجي وياج

عزيز : شنيي جدي

رأجس : انطم وطب گول الاختك

حجيهم جان كله بصياح ،مابيهم احد يحجي بهدوء ابد ،من طب عزيز كلنا وخرنه من الباب نتراكض وهو روحه صايره بخشمه وبوگفتنه زيدنه النار حطب بس طبينا للمطبخ اجه ورانه يصيح

عزيز : شعدچن ورا المهجوووم ،المن واگفااات

حواري : نسمع شكو ،غير نريد نعارف شيريد حمزة

عزيز : احلف عليج أنت مطلعتهن كلهن

تمسح بعيونها وتحجي
حواري : حرااام لا تظلم بختك

خزرها وطب جوه ،وانا مشيت وراه اريدن اشوف ريحانة ترضى تحاجي حمزة مثل ما يريد ،دگ الباب وطب للغرفة وانا ضليت واگفة يم الباب بس اباوع
وهي گاعده وصافنة ،مشالها يحجي بكل هدوء عكس گبل شوي

عزيز : خوية رجلج العار برة ،يريد يشوفج ترضين تحجين وياه ؟

اندارت باوعتله وطولت وهي ساكتة وما جاوبت الا من رد سألها
عزيز : تحجين وياه لو اشحته ؟

ريحانة : وينه ؟

عزيز : بره

ريحانة : صيحه احاجيه

عزيز : خل يولي شعدج حاجيه وياه

ريحانة : چم حجاية اريدن اگلهن اله

سكت مبين ما راضي بس ماحجه شي وخله وطلع وشوي وطب ضيرم ،باوعلها بتعب وچن الصار بيها اذاهم قبلها
ضيرم : گومي خوية ،رجلج بالديوانية

هزت رأسها واشرت لحواري الواگفه وراي ،گومتها بالگوات تمشي بعدها تعبانة ،گعدت بصف امي اباوع على عمة نجوى انفجرت تبجي
مقهوره على حال بتها وخسارتها لكلشي برمشة عين

°حواري°

طبتتها للديوانية وطلعت وانا بحياتي ولا يوم هيج حاسة بعجز ،ولا يوم وصلت مرحله ما اعارف شني الاحجي ،چبت عمري لساني أطول مني والما اگدرله اخذه بشقة ،الا اليوم روحي ما گدرت
اهون عليها ولا گدرت اقلل من قهرها شوي ،تمنيت اخذ من تعبها واشيله وياها ولا اشوفها مكسورة هيج

چانت تگول لخاطره اهون على روحي ،بس هسة خسرت المانت على روحها علمود يضل بخير ..! !

درت وجهي اريدن ارد منين ما أجيت كل قابلية بكلشي ماعدي ،بس جذبتني صوت عيطتها ومو بس انا الردت اسمع شبيها انفعلت هيج وشني السواه وخلاها تنفجر

وگفت بصفي هيوفة وشوي وأجت بصائر وميمنة
وهي تصيح
ريحانة : لا تسوي روحك مقهور علي ،وأنت السبب
بكلشي صاااار أنت السببب ،والله كرهتك لك حمزة كرهتك

حمزة : صح صح ،بس لا تصيحين شوفي روحج شلون ترجفيين

ريحانة : ماعليك ،لا تدخل عسى ما اموت لا تدخل أخر واحد يحقله يتدخل هو أنت

حمزة : كااافي لا تدوسين بالحجي جاي اتفاهم وياج

ريحانة : ماريد اتفاهم وياك ،ماااريدك ،حمزة ما اريدك وما تطلع اذا ما تطلگني

مو حجاية گالتها گلبته گلب
حمزة : طلاگ ماا اطلگ ،ضليي يم اهلج بس مااا اطلگ سمعتييي

ريحانة : ليش كل ضنك بعدلك خط رجعة يمي ،والله لو تصير الهوه هم ما اتنفسك

حمزة : كافي ريحانة

ريحانة : لو احرگك ما تبرد نار گلبي ،كله منك انا اليوم حتى ابني ماشفتة ،اجه للدنيا ميت

حمزة : ليش تلوميني ،جا مو يگولون اهلج قضاء وقدر ؟

ريحانة : اطلع حمزة

حمزة : ريحانة

ريحانة : تطلع لو هسة اكتل روحي گدامك

حمزة : شبييج تخبلتي

ريحانة : خبلوني اهلك وكملتها علي أنت ،امشي اطلع ما اريدن اشوفك

حمزة : ماشي انا بس طلاگ ماكو

ريحانة : مو بكيفك

حمزة : جاا بكفجج

وخرنه بساع من شفنه يده الباب تحركت ،طلعت هي وانا بساع مشيت اسندها من شفتها رادت تطيح وديتها للغرفة ورديت اركض من سمعت صوت الصياح بره وهل مره عرگتهم جانت بالحوش بحيث كلنه التمينه على الشباك نباوع ،وهم وصلت حدها بيناتهم لا هو اليسكت ولا اخواني

ضيرم : اطلع بره ،لا تخلينه حتى الملح والزلد ننساهن

حمزة : تقبل بطلاگ اختك أنت ؟

ضيرم : بكيفهااا ،گلتلك ما تريدك هاي هي تطلگ

حمزة : ما امشي بكلامها انا

ضيرم : بس احنا نمشي بكلامها والقرار قرارها وهسة طگطگ نعالاتك وامشي من خلقتي

حمزة : ما اطلگ والله ،گلولها تضل هيج معلگة وتحلم اطلگها

عبد الحق : شلووون يخليني اجيبة بكفخة اشمره بحضن امه

حمزة : احترم نفسك لك

عبد الحق : واذا ما احترمتها شتسوي ؟

محمد : هااا حق شكوو

باوع لعمي ورد اندار يخوزر بحمزة وهذاك بكل استهزاء مبين گاله
حمزة : اخلاقك ضعيفة ما انزل نفسي لمستواك

كف رداناته ومشاله
عبد الحق : انا اخلاقي ضعيفة

حمزة : هاي اذا عدك اخلاق بالاص...

بعده ما مكمل وجابة بكله بنص وجهه خله خشمه يصب دم ،علگت بيناتهم كلش ،عمامي يصيحون وضيرم يجر عبد الحق ما راضي

ضيرم : هددده، راح اضربك والله

عبد الحق : شو هدددني اشوفة منو ماعده اخلاق

كاض خشمة ويحجي
حمزة : جاي وحدي بطرگ روحي تضربني وانا بنص بيتكم ،سهله ،وهذا دم خشمي اطلعه من نص عيونك

عبد الحق : دروووح

حمزة : سهلة ،سهلة والله

بس طلع حمزة تگابلوا عمامي وأبوي والولد يلومون بحق لأن كبرها ما زغرها وبنص الهوسة چان صخر بس يباوع بعيونة وهاي اول مره اشوفه ما يتدخل اذا اكو مشكلة ..! !

عبد الحق : خل يولي ،فوووك صخااام وجهه هو ابو الراهي والله لوما كاضيني الا ارده الاهله بالچفن

محمد : أي مو تايهلنه ما وراه وادم التطلع ،بطل تهور لا احبسنك بغرفة حالك حال المخبل

عبد الحق : هو انا الله مسلطك علي ،كل ما فكيت حلگي وگلت احبسك

محمد : لان ما تبطل تهور حتى اذا ماكو مشكلة أنت تخلقها من جوه الگاع

عبد الحق : جااا اخليه يتعنطز علي ،والله سنونة اكسرهن وشرط اخلي يبلعهن

محمد : تعال يوسف رد ابنك لان ما جاي اگدر اكض روحي عنه

يوسف : ليش هو يرد ؟

عبد الحق : سويتوني كلش ،ماشي انا للبيت اخلصكم مني

محمد : بعديش عمي

طلع بلايه ما يحجي وعمي كلش تنرفز منه نزل دوسة ونص عليه بالحجي ،انداريت على صوت طيحة قوية وراي

فز گلبي وانا اشوفنها بصائر طايحة ،لطمت ودنگتلها وهي لا من ايد ولا من رجل وكلنه نريدها بس تگعد وعلى صوت خبصتنه الولد حسوا اكو شي ،اندگ باب المطبخ وگامت غاية تفتحتة وانا اضرب على خدها ما جاي تگعد ولا حتى تتحرك

فقار : شكو شصاير ؟

ما احتاجينه نجاوبة لان بس دنگ وشافها ركض يجرها منه يضرب على خدها ومن ما صحت شالها بساع يركض بيها ،و وراه ركضت ميمنة تلبس عباتها وبايدها عباية لبصائر

مشت بس هي وياها وعمة شيماء فرفحت لان ما لحگت تمشي وياهم ،وانا كل بالي مو يمهم ،اباوع على الگاع مكانها الجانت طايحة بي كله دم
باوعت على هيوفة بلعت ريگها واندارت تحجي بخوف

هيوفة : ناازفة ،عمة صاير عدها نزيف هاي الگاع مدمره

لطمت على صدرها وهي تباوع ل أثر الدم ،نضفت المكان هيوفة ،والقلق ضل مسطير علينه منا لمن
رد ضيرم ،تلگيناه نريد نعارف شني الصار وليش ما ردوا وياه ..! !

شيماء : هااا عمة شني ،جا وينهم مو وياك ؟

جر نفس طويل وگال
ضيرم : راح يباتون بالمستشفى

لطمت على وجهه وكلنه صحنه
_ ليشش ؟

ضيرم : خابروا عليه وخله يطيكم ميمنة احجوا وياها وتعارفون

كلامة خوفنة اكثر عمة الگعدت تنوح
شيماء : يا يمة يا بصائر ،سودة علي ولا صحيتي بيوم

تبجي وتحجي وضيرم يقنعها ما بيها شي
شيماء : جا اذا ما بيها شي ليش ما ردت ؟

طلع مبايله من جيبة ،دگ على فقار ،حاجاه شوي وگاله
ضيرم : تگدر تمشي تطي المبايل الميمنة عمة أم برهان تريد تحجي وياها

ما سمعنه رده ،شوي ورد گاله
ضيرم : جا خوش بس تطلعلك خابرني ،لا انا بالبيت راح اخلي الموبايل عد هيفاء

بس سد الخط گال
ضيرم : ميمنة جوة ،بس تطلع لفقار يخابر واحجي وياها

هزت رأسها عمة ب أي ،وانا عفتهم ومشيت حيلي بايد ،امس فلا گدرت انام مثل البشر ضليت من حلم لحلم الخوف الما عارفتة بحياتي چاس گلبي امس
وانا اشوفن منظر بحلمي، بكل حياتي ما راح اگدر انساه ..! !

طبيت للغرفة وانا كل ما اباوعلها الگاها فاصله عن الدنيا والبيها ،گعدت بصفها وانا احطن ايدي على ايدها الحاطتها على رجلها ،اندارت باوعتلي والتعب ينشاف بكل كتر بوجهه ،غمضت عيونها وطاحت دمعتها وانا طاحت كل ذرة صبر عدي ،وي دموعها دموعي تطيح ،وصوت بجينه عله ،جده وعمة زهرة حتى امي يصيحن بي يردني اسكت وانا كل شهگة وي شهكتها احسنها طالعة من كل گلبي

عمة : خاااايبة حورية ،اسكتي لا اگومن اطگج والله

زهرة : جا هاي أنت اختها ولازم تصبريها ،تبچين وياها انوبه

نجوى : فدوة يمة اسكتي لخاطر اخيتج ،كافي ولج ريحانة عيونج راح يعمن

ريحانة : ريتهن يعمن يمة ،ما شفت وليدي بيهن

نجوى : اسم الله ولج لاتحجين هيج راح توگفين گلبي من القهر والله

مسحت عيوني وانا بس اريدن اكض روحي غلط بچيت گدامها وهي بالگوات تسكت
غضة : اذا ما افگس عيونج ،بجيتها ولج حورية انا الج

هفيت على وجهي وگمت بساع اريدن اغسل ،بالي ولا يم جدة ولا يم أي أحد يحاجيني ،غسلت ورديت يمها لگيتها ساكتة بس بعدها تناشغ وجرة نفسها مو طبيعية ،ما حجيت وياها بعد ورديت طلعت اشوفن ماكو اخبار عن بصائر ..! !

°هيوفة°

بس دگ مبايل ضيرم بأيدي بساع رديت
_ هاا فقار ؟

ميمنة : انا ميمنة

_ بشريني ميمنة شلونها بصائر ؟

ميمنة : زينة ،بس الدكتوره تگول لازم نحطلها دم .

نشغت
_ من النزيف موو ؟

ميمنة : أي ،باجر يحطولها واليوم لازم تضل بالمستشفى

حطيت ايدي على گلبي مقهورة عليها فلا ارتاحت ابد هل بنية ،شأحجي لعمة الواگفة تباوعلي وكلساع تأشريلي شكو
_ زين تردين شي اوديلج من يجيكم ضيرم ؟

ميمنة : أي فدوة اريدلها هدوم

_ وأنت تردين شي ؟

ميمنة : لا اذا اريدن اخليهم يجيبوني للبيت ابدل

_ خوش ،عينج عليها

ميمنة : أختي هاي ما تحتاج وصية ،امي يمج مو ؟

_ أي هاي عمة يمي

ميمنة : اطينياها

اطيت المبايل العمة ،حجت وياها وعمة خلصتها بس لطم وبجي ومتأكده ميمنة تهدي بيها بس گلب والده ما يفيد وياها عاندت الا ياخذوها ،وبس طب ضيرم گالتله

شمياء : وديني عمة للمستشفى ،فدوة اروحلك وديني

ضيرم : تدللين ،ماشي اشغل السيارة انا

گبل لا يطلع صحته ،اطيته مبايله وانا اگله
_ بس احظر هدوم لبصائر تانيني

ضيرم : بساعج لا تتأخرين

_ لا والله هسة بساع

بس طلع انا ركضت فوگ ،طلعت جنطة زغيرة حطيت كلشي تحتاجة ونزلت على نفس السرعة لگيت عمة لابسة عباتها ومنتظرتني
بس اطيتها الجنطة طلعت مستعجلة على صوت الهورن

مشيت للغرفة اشوفنها بلكت الله وصارت زينة ،بس من طبيت شفت العكس ،من هل يوم
وهاي گعدتها وصفنتها انگلبت گلب وجنها مو ريحانة انسانة ثانية ..! !

گعدت بصف غاية اسألها
_ شربتي دواج ؟

غاية : وين المصايب خلتني الحگ اشرب دوه

_ اووف ،بس تمشين اشربي مال ليل عاد لا تضلين اليوم كله بلايه دوه

غاية : اشرب والله بس اروحن

_ خوش

ضليت گاعده صفنة تاخذني وصفنة تردني والقهر ياكل بگلبي كل ما اباوع عليهم
واحاول اصبرها بنضراتي من تجي عيني بعينها...

وبس مددت وغمضت عيونها باوعت جدة الامي بمعنى نمشي ،انتبهت غاية وباوعت لبركة تسألها

غاية : جا وين تضلين أنت ؟

بركة : امشي للبيت غير

غاية : لا امشي باتي يمي

حواري : خوب تضل يمي

غاية : لا صاحبتي تمشي وياي

حواري : ذكرتيني بصاحبتي ،جده عود صدگ عقدولها لو يضحكون علينه ؟

غضة : لا صدگ ،عمج محمد يگول هو مطيها

حواري : شلون اطاها گلبها تعوفنة، والله حيل مقهورة منها

غضة : الصار صار ،انسن سالفتها ،بعد لاتحجن بيها

نجوى : زين عمة شني نحجي للوادم لو سألونه عنها

غضة : ياهو اليسألچن گلوله مشت لخوالها

خالدة : يا خوال عمة ،مو الوادم كلها تعارف جفون ما عدها خوال

غضة : خايبة شني ماعدها ،عدها بس احنا وياهم على خراب شني ما تعارفن ؟

خالدة : نعارف عمة ،بس كلها راح تسأل شوكت صار الصلح شنگول

غضة : تنحل بعدين ،گومي زهرة يلا ،وأنت امشي لبيتج

خالدة : احس بروحي گاعده على گلبج عمة

غضة : الله يشهد موغفة على گلبي ،فلك الصابج ولا تنبلعين

حواري : جدة سهلة اشربي وياها ماي

اندارت عليها عمة خالدة تخزر بيها وحواري مبتسمة دنگت بساع بالكوات كاضة أبتسامتي من شفت جده سكتت ماحجت يعني حواري حجت البگلبها ،الله يطيها غيرت الگعده بساع فلا
تگعد تموت على سوالف القصف والتحشيش
بأصعب الحالات اذا ما لگت احد تحجي عليه تحجي على روحها

گمت من شفت جدة گامت ،بساع گامن أمي وغاية وبركة لبست عباتها وتحجي
بركة : جدة احجي وي أبوي هسة هو بالديوانية .

غضة : خوش

بس طلعن مشيت وراهن انا وعمة نجوى ،ومن وصلت للديوانية ،دگت الباب بعوجيتها وصاحت

غضة : يوسف انا ماخذه بركة ،تمشي تبات يمنه

وحتى ما انتظرته يرد وخلت ومشت ،وعمي طلع
يريد يحاجيها وهي وصلت للباب
يوسف : شني يمة المن ماخذتها ،جا منو النه احنا ؟

غضة : ماعدكم شي لفوا روسكم وناموا

يوسف : اريدها تسويلي عشا طاگني الجوع

_ عمي انا راح اسوي لعمي وللولد وأنت ضل اكل وياهم
يوسف : خوش

مشوا اهلي وانا طبيت بساعي للمطبخ بديت بعشاهم وگبل لا اخلص اخذت مبايل عمي باقر اخابر على ضيرم ،بس فتح خط اجاني صوتة فحطان ومبين جاي يمشي

ضيرم : هااا بوية

_ ضيرم

حسيت بيه جر نفس وگال
ضيرم : هااا عيوني

_ سويت عشا وينك تجي تتعشا ؟

ضيرم : انا هستوني طلعت من المستشفى

_ يعني تتأخر

ضيرم : شغلة نص ساعة هيج

_ جا راح اضملك

ضيرم : خوش

بس خلصت حجي وياه ،حظرت الصنينة ومشيت صحت عزيز شالها وانا لحگته ب الخبز ،التموا يأكلون وانا رديت حطيت عشانه انا وعمة والبنات وعمة خالدة هم ضلت ويانة
تعشت ومشت ،وبس كملت صبيتلهم الجاي وتشلحت اكف المطبخ اجت وياي حواري تساعدنه وگبل لا نخلص بشوي طب ضيرم

أبتسمت رغم التعب وانا اگله
_ الله يساعدك

اجه باس راسي وهو يگلي
ضيرم : ويساعدج

مشى باس حواري وطلع من المطبخ يريد يسبح وانا بس خلصت حضرت صينيتة وصعدتها بس طبيت للغرفة شفتة واگف يمشط شعره ،بس شافني أبتسم
وهو يگلي
ضيرم : اروحن فدوه وسبع فدوات الايدج

ماگدرت اسيطر على أبتسامتي ،كل حجاية منة بعز تعبي ترد بي الروح وچن يعرف هو الانسان الوحيد يگدر يسحب كل تعبي بحجايته الحلوه

گعد وجر الصنينة يقربها عليه ورفع راسة علي
ضيرم : تجين تاكلين وياي ؟

_ لا اكل بالعافية ،بس اريدن اسبح لان كومة افتريت اليوم

ضيرم : جا روحي مي دافي اكو

هزيت رأسي ب أي ومشيت طلعتلي هدوم خفيفات مال غرفة ،وبساع سبحت ورديت لابسة الروب فوگاهن بس طبيت ذبيتة وهو جان
مخلص اكل وعينة بالمبايل من طبيت ورفع راسة شافني
صوفر مبتسم نزل الموبايل من ايده وعيونة اكلني اكل عود هدومي ما مكشوفات هواي

غطيت زنودي بالروب وهو ضحك
ضيرم : گلوب ،مايفيد يضون حتى لو تغطيهن

_ راح اطلع من الغرفة

ضيرم : اطلع وياج

ضحكت مأيسة منه ومشيت يم المراية امشط بشعري واحجي وياه
_ ضيرم گلبي لهسة يوجعني كل ما صفنت اتذكر شكلة ،شلون اطاكم گلبكم تدفنوه ؟

ضيرم : مو احنا الدفان دفنه ،نزله گدام عيني ذاك انا المتعلم على هاي السوالف گابلت گبرة وحسيت مو چن المات جاهل لا احنا الشفناه ولا الربيناه ،بس والله چن خسارته تعادل خسار زلمة مشورب على گد ما يتراولي تعبها وشگد تعذبت عليه بس لخاطرها لازم نقوي روحنه

هزيت رأسي ب أي وانا دموعي تهل ،گام مشالي وهو يلمني بحضنه
ضيرم : انا لو اعارف هيج يصير ما جان خليتج تمشين

تعلگت برگبته مقهوره ابجي من كل گلبي وهو خلاني ابجي براحتي والا من سكتت مشى للجرباية كاض ايدي بين ايده

ضيرم : نامي وانا اغسل واجي

هزيت رأسي وجريت الغطا علي وهو اخذ الصينية وطلع وشوي ورد ،طفه الضوه واجه تمدد وجرني على صدره ،بالساعة ضلينه احنا الاثنين ساكتين من تحركت حس بي گاعده ،نزلني على المخده وهو اندار يباوعلي بكل هدوء ،وانا تقربت اله اكثر احس حضنه صار مكاني الما اگدر افارگه ،يحس بي تعودت عليه ويلفني مربطني بأيده ورجله وانا
بكل حب عادي عدي ما اتحرك بنومتي بس المهم انا قريبة منه ...

°غاية°

لحگت امي للمطبخ احوس ،گامت تسوي الاكل وهي مابيها حيل ،الولد وأبوي كلهم جواعة اليوم حتى ما فگدوا روحهم بلگمة سوده علي

بس طبيت للمطبخ وشافتني صاحت
زهرة : خايبة كافي تفترين ،هيدي ما صارلج چم يوم طالعة من العملية

_ جا يمة شلون بيج ،انا اعاونج

زهرة : خايبة شكو يمة ،اگعدي فدوة لگلبج مابي حيل هبطات لا يصير بيج شي

_ يااا شيصير بي ،گليلي شأسوي وياج والله ما اعارف اگعد

تأفأفت جزعانة مني
زهرة : امشي ودي نوح يجيبلي باگله معلبه اسويلهم على تشريب عاد ما تتأخر

_ خوش ماشية

بساع مشيت للديوانية گلت لنوح ورديت وبس طبيت للمطبخ طبت بركة
بركة : عمة اساعدج بشي ؟

زهرة : خايبة لا ،ولچن شبيچن مللتني ترا والله صرت زينة

بركة : اهم شي زينة الباقي محلول ،اگلج غاية

_ گولي

بركة : ما عارفتي شوكت الدوام

_ ما ضل شي الاسبوع الجاي

بركة : راح نرد للشلاع گلب

_ والله علواه نداوم انا روحي بزعت من البيت والمصايب الما تخلص

بركة : خايبة صدگ ما سمعتي كوكبة مخطوبة

_ شمدريج ؟

بركة : ولج من مشيت وي أمي للسوگ شفتها يم محل مال عرايس ومن سألتها شعدكم گالت جاي أجهز لعرسي

_ وشلونها ،شفتيها زينة ،مبين عليها عروس لو لا ؟

بركة : لا والله ابد ،استغربت حتى ضعفانة گبل چانت احلى

ردت احجي بس سكتت ابلع بريگي من طب ليث باوعلنه بنضره سريعة وبساع مشى يطب جوه وانا كلش زين متأكده سمعنه ..! !

شوي وطب نوح بأيده علاگة الفول حطها على السنك وطلع وانا من كل كتر اباوع عليهم وينطحن گلبي اكثر واحدهم مصيبتة أكبر من
الثاني وادعي من الله يخفف على گلوبهم المتعوبة

بس خلصنا العشا ودينالهم واحنا تعشينا وبالمواعين تساعدنه انا وبركة
وبنص ذاك الهدوء اجه ببالي اسألها

_ اگلج

بركة : گولي

_ هم مشيتي الابن جسار بعد ؟

من سكتتها وبلعت ريگها عارفت الجواب
_ مشيتي مو ؟

بركة : اخذله اكل خطية والله كاتله الجوع

زغرت عيوني وحتى هديت المواعين من ايدي وركزت وياها
_ لا والله

بركة : أي والله

_ حنينة خطية

بركة : جا حرام محد يمشيله

_ ومنو عاتب عليج أنت ؟

بركة : انسانيتي والله ما تسمحلي اعوفن بشر جوعان

_ خطية حنينة ،عود من يكضوج گليلهم انسانيتي ما تسمحلي حتى يشيلوها منج

بركة : شمدريهم يمعوده

_ والله على يوم تلگطين واذا ما عضيتي اصابع الندم شوفي

صفنت وچن كلامي خوفها وانا هذا الاريدنه ،ما اريدنها تتورط لان لو لگفوها ساعتها ما يرحمونها وخاف جفون عدت يجوز سالفتها هاي ما تعدي ..! !

بس خلصنه ميشينه للغرفة ،گتلها هي تفرش وانا طلعت لان ليث صاحني ،مشيت وراه من شفته صعد الدرج ،طب للغرفة ساكت ومن شغل الجگاره وصاحني عرفت الباله ،بس گعدت سألني بعد ما جر
نفس منها

ليث : بركة وين شايفة كوكبة ؟

_ بالسوگ شايفتها

ليث : شبيها ،ما گلتلج شلونها ؟

_ زينة

ليث : لا تچذبين علي

_ سمعت ليش تسألني بعد ؟

ليث : مختفية ما جاي اشوفنها

_ شلون تشوفها وهي يعني مخطوبة مو حرام ؟

ليث : بس اتاكد هي بخير وهاي هي ،لان اهلها مو خوش اوادم

_ وشني لشوكت تضل هيج ؟

نفخ دخان الجگاره ورجع ظهره على تاج الچرباية وبصوت تعبان گال
ليث : ما اعارف، انا جاي احسن بروحي محترگ وما تطفيني غير شوفتها

حطيت ايدي على رجله المادها ،اريدن اهون عليه بس ما اعرف يا حجاية تطيب جرحة وتقلل
ولو شوي من تعبة المبين بالسواد الجوه عيونة المكحلات

من خلص جگارته ومدد ،گمت طفيت الضوه ونزلت وانا حايرة على منو اباوع
وانقهر يوم عن يوم يكبر همنه ،بكل بيت بهاي القرية اكو شي لاچم گلب اصحابة ..! !

بس طبيت للغرفة شفتها نايمة بفراشها وغافية، طفيت الضوه عليها وتذكرت لازم اشرب دواي طلعت بساع للمطبخ اجيبنه لان ميمنة خلته هناك حتى هي تطينياه لو نسيته ،بس طبيت ضليت واگفه بمكاني ما تحركت من شفتة گاعد على الكرسي وعيونة على قفص الطيور مالتها

مشيت بهدوء يمه ما اريدنه يفز لان مبين صافن وما حاس باليمه
_ نوح

اندار يباوعلي ورد يباوع لقفص طيورها وچن بكل نظره منه عتاب الها وقهر بنفس الوكت ولو ركزت اكثر راح احير بعد شأفسرهن ،بعيونه چان اكو شي غريب او مره اشوفنه ...! !

اخذت دواي وترستلي دولكة ماي ومشيت للغرفة شربتة وتمددت وانا بين صفنة والثانية نمت وگعدت الصبح على صوت صياح عالي
والاجه بأذني صوت صياح صخر ومبين اكو سالفة مضوجته

طلعت بساع اللم بشعري واباوع عليهم ،نوح واگف ورا امي وصخر گباله صياحه هرج الامه وانا بس اريدن افتهم شكو وشني السواه نوح وهيج صخر
ما گدر يكض عصبيته

صخر : هسة توولي گدااامي تبدددل وتنزل ،واذا ما مشيت للدوام بعد لو تموت ما اخليك تمشي من درب الكلية

نوح : احجي هندي جاي ،بس اليوم باجر امشي لخاطر دين محمد

صخر : حذرتك انا ،ونشوف بعد يا معتب يخليك تداوم

نوح : يمة احجي ويااااه

زهرة : لخاطري يمة اصعد بدل وانزل شبيك بس سجل حظورك ورد

صخر : لا والله ،دوام كامل يداوم ،شني ضحك هي

زهرة : خايب يمة شجاك ،على كيفك وي أخيك

صخر : لا على كيفي ولا هم يحزنون ،يولي للدوام لا من باجر اشمره بالگيعان

صيح مفرفح
نوح : شبيك ،شبيك ،جاااي اگولن بس اليوم مالي خلگ امشي

صخر : ويوم يجر يوم وتاليتك مبطل

نوح : لا ما ابطل ،شكو حتى ابطل

صخر : نشوووف

گالها وطلع ونوح وخر من امي
ومشى يصعد فوگ وامي تصيح وراه وهو ما على لسانة غير
نوح : هديني يمة

سكتت امي بعد وهو بالساعتين ورد نزل يركض صاحت وراه أمي وين وما جاوب ،ومن هل طلعة نوح بعد صار انسان ثاني ..! !

بأيدي الوصله اللمع بالكاونترات ،وسمعت صوت باب الشارع انفتح وشوي وطبت ميمنة وراها صخر بس شفتها هديت كلشي بايدي وانا اسأل

_ شلونها بصائر ،ما صارت احسن ؟

ميمنة : نفس الشي ،رديت بس اسبح وارتاحلي شوي وأمشي

_ اسويلج شي تاكلي ؟

ميمنة : لا اكلنه

_ خوش بالعافية

ميمنة : الله يعافج

طلعت هي من المطبخ وانا بس خلصت شغلي مشيت يم امي وجده ،ومن تذكرت الفراشات بعدهن بالگاع گمت للغرفة لميتهن وانا بيني وبين روحي افكر شلون باقي الليالي راح اضل وحدي بيها ،بركة مشت لبيتهم اجاها حق گبل شوي وردت وياه
ويعني اكيد ما راح تضل يمي ،اباوع على مكان جفون واحجي عليها وي روحي تدري بي اضوچن لو هي ماكو بالغرفة وفلا احب انام وما احد يمي ...

انداريت على صوت الباب من انفتح ،أبتسمت وانا احاول ما ابين ضوجتي گدامها وهي منا تعبانة مبين حتى ما نايمة زين ..! !

بس طبت ،سدت الباب وراها وأجت گعدت تثاوب
_ ما تنامين جا ؟

ميمنة : هو اريدن انام ،اطيني بطانية ومخده

_ جا غرفتج ؟

ميمنة : صخر گاعد ،وانا ما اگدر انام الا اطفي الضوه

نزلت الها بطانية ومخده مثل ما رادت اطيتها المخده
_ تمددي وانا اغطيج

سوت مثل ما گلت وانا طفيت الضوه وطلعت ،بس فتحت الباب صار گدامي صخر ،باوع للغرفة ورد
باوعلي ،الباب مسدود ،يباوع بحيره بين يريد يحجي وبين لا وبالاخير استسلم وسأل

صخر : جا ميمنة جوه ؟

هزيت رأسي ب أي
صخر : شعدها ،جا مو عدها غرفة

صخر : گالت أنت گاعد وهي ما تگدر تنام الا تطفي الضوه

صفن باله مو يمي وانا مثل الصنم ضليت
واگفه
متانيتة يحجي و بالدقيقية عدت الا گال

صخر : ساعة هيج وگعديها لان اردها للمستشفى

_ خوش

خله ومشى وانا ضليت حايره وين اگضي يومي ،لو يبدي الدوام احسن ولا هل حيره هاي
ومن عدت بالساعتين مشيت گعدتها اطيتها ساعة مني خطية لان مبين عليها التعب وساعة ما تكفيها

وبس صعدت فوگ حتى تحظر روحها طب هو يسألني
صخر : هاا گعدتيها ؟

_ أي ،صعدت فوگ تحظر روحها

ماحجة وصعد وراها ،وانا مشيت للمطبخ ،بس طبيت لگيت امي گاعده تعچن
_ يااا يمة ،شني أنت تخبزين ؟

زهرة : أي جم خبزة ،مو شفتي ماضل عدنه خبز و
امس

_ صدگ يمة وين وديتي العچين العاچنته ميمنة ؟

زهرة : حطيته بعلاگه واطيته ل ليث ،ما اعارف وين وداه لان حرام ينذب بالزبل

_ زين سويتي

زهرة : جا حرام هاي نعمة الله

هزيت رأسي وطلعت للحوش ،طلعت البطوط مال جفون يفترن ،فتحتلهن الباب احجي وياهن
_ هاي الادبسزز صاحبتچن تزوجت بعد ما تجيچن

وهن يسون صوت وي كل حجاية اگولها چنهن يعارفن الجاي اگولنه ،وهستوني هديتهن وطبيت ولاگوني يردون يطلعون

_ هااا راح تمشين ؟

ميمنة : أي عاد امي خطية ترد ترتاح شوي

_ أي احسن

ميمنة : ديري بالج على روحج لاتضلين تفترين

هزيت رأسي ب أي وهم طلعو ومن اندگ الباب طلع ليث فتحة وشوي واباوع طبوا كومة زلم ،طبيت اركض احجي الامي وجده

_ هاي طبوا كوم زلم ما اعارف منين مشايفتهم گبل

غضة : يااا ،شكو يا ستار

زهرة : خايبة ما عارفتي علموديش ؟

_ لا والله يمة

رديت للمطبخ بساع من سمعت صوت ليث ،بس شافني طبيت گال
ليث : بساعج دولكة ماي

_ منو ذولة ليث ؟

ليث : گوامة مودينله حمزة لان طگاه عبد الحق

_ ياا ياااا

ليث : هسة دعوفي الياء ،واطيني ماي بساعج الوادم ما احد يمهم

_ خابر عمي باقر بلكت بالبيت

ليث : هو بس خل اطيهم ماي

ترستله دولكة الماي وگلاص اطيته اخذاهن ومشى وشوي وشفت الباب انفتح وطب عمي باقر وضيرم وشوي واجه عزيز هم وبالنص ساعة التموا ولدنه كلهم ،وبس مشوا الزلم طبوا للحوش كل واحد بيهم روحه صايرة بخشمة

صفگ ايد بأيد مغتاض
عبد الحق : حرامات والله بس لو فد مره لو كاااسره والله هواي احسن

باقر : أي عمي مو هينة وحجي لسان هي ،ما تسكت هم ما اعارف شلون تحجي ،هو فطر والدنيا راح تحترگ

عبد الحق : علموديش ،ليش هو هذا زلمة ويطلعون وراه

ليث : هسة ليش تصيح ؟

باقر : ما يگدر ،اذا مو صياح وعياط ما يرتاح گلبه ما تعارفه وراح نفصل منوره سوادينه

عبد الحق: انا مسودن ،خلف الله عليك عمي

ضيرم : لا بوية لا فصل ولا شي ،انا اعارف براسهم اكو شي

باقر : شي مثل شني ؟

ضيرم : راح يطيح الفصل ويريد اردله ريحانة

عزيز : ياكل تبن

ضيرم : شوف وگول ما گلت اذا ما سوها هيج ما اطلع أبن أبوي

باقر : دخلي يولي ،حتى لو طيح نفصل وريحانة ما تردله

شوي وكلمن طش البيته ومن رد جدي وعمي يوسف كلهم التموا عدنه ،يتناقشون بالديوان وانا واگفة كلساع جاي ما يعارفون يحجون بلايه جاي على گولة جفون

صبيت الجاي وأطيت الصينية ل ليث ،اخذها ومشى وشوي وطب صخر بس شافني بالمطبخ نتر

صخر : شعدج يم الطباخ ؟

_ أصب جاي غير

صخر : والنار مو مايصير تتقربيلها ؟

_ لا بعيده والله

صخر : اخذتي دواج ؟

_ أي والله شربته ضل عدي بس مال ليل

صخر : خوش

مشى للديوان وامي طبت شايله صينية الخبز حطتها بالگاع وگعدت مهدود حيلها سوده علي ومن رادت تعزل الخبز اخذتها منها وانا اگولن

_ كافي يمة كلشي لا تسوين شي بعد انا اعزلهن طبي ارتاحي

ما حجت شي وگامت طبت جوه وانا كفيت هوسة الخبز وطلعت من المطبخ ،گعدت على الدرج حاطة ايدي على خدي عده الوكت وطب صخر يسأل

صخر : جا يمة نوح وينة ؟

زهرة : ما اعارف والله ،طلع ،صيحت وراه ما گال وين ماشي

عگد حاجبة
صخر : شني السالفة ،من شوكت ؟

زهرة : ورا ما مشيت أنت للمستشفى هو ضل فوگ الساعتين هيج وطلع

صخر : جا يمة طر المغرب

زهرة : خاف يم صحبانة ؟

صخر : يا صحبان اليتأخر عدهم هيج

زهرة : انداري يمة

طلع مبايله يدگ على نوح ،مرتين خابره وماكو ما رد وامي وجهه صار اصفر ،وكلنه نباوع على المبايل
بأيد صخر وهو من دگ عليه ثالث مره وماكو رد طلع بساع وماكو عشر دقايق وانخبصنه خبص كلهم خابروه وهو ولا رد على أحد ..! !

طلعت بساع من سمعت صوته العالي وچن جاي يخابر
صخر : فقار حاجيني ،يعني ابد ما اجاااك ،جااا
وين وله ،لا لا وين جاي وهاد النسوان وحدهن
لا اله الا الله يعني اذا اجيت شتسوي ،انجب جية
ماكو اكسر رجليك والله

سد الخط يحجي وي الولد
صخر : ضلمت الدنيا ما يطول هيج ،امشوا ندوره

ضيرم : وين ندوره ؟

صخر : ما اعارف ،بس الاعارفه ماتفيد ضلتنه بالبيت

رأجس : اذا طلع عد بيت غازي ،بيوتهم احرگها عليهم والله

باقر : جا على هذا الحجي احنا هم لازم يحرگون بيتونه علينه لان ابنهم عدنه

رأجس : اخذوا عزيز گبل وحگهم طاح عدي مو يردون على نوح

ساعات تمشي وكل خبر يريح الگلب على نوح ماكو لليل وكلها التمت يمنا ،الساعة دگت الهدعش وكل ما تعدي ساعة تغدي اروحنه نار من الخوف عليه ،لا هو الرد خابر ولا عارفوا مكانه وين ..! !

أمي كل حيل ما ضل عدها ،عمة نجوى گاعده يمها تهون عليها بس ما يفيد
الولد خبصتهم خبصه بره ماخلوا شي ما سووه حتى بس يعارفون مكانه وماكو نوح فص ملح وذاب ..! !

°هيوفة°

مشيت اغسل ايدي وبس طبيت للمطبخ سمعته يحجي بالموبايل بصوت ناصي
صخر : يمك هسة هو مو ،جايك ،لا بس انا نص
ساعة وتلگاني يمك

بس سد الخط واندار شافني وراه خزرني
صخر : چنتي تتسنطين ؟

_ لا والله أجيت اغسل ايدي ،انگلب علي الجاي

صخر : سمعتي ؟

حمحمت حايره اگله أي لو لا
_ أي ،نوح مو ؟

صخر : أي ،ماشي انا اجيبنه بس جيبلي هدوم اله بلايه ما يحس عليج أحد

_ ليش ؟

صخر : لا تسألين ،وبساع ما ضلي وكت امشي اريدن

هزيت رأسي وطلعت على كيف تسحبت فوگ طلعتله هدوم كاملة ورديت اطيتهن اله هم زين
من تحولن للغرفة لان لو ضالت بالصالة چان لجحني

اطيته العلاگة وهو اخذهن وطلع بساع ومبين الصاير مو هين لان شكل صخر انگلب اكثر من گبل شوي ..!

°ليث°

من شفتة طلع لحگته لان حسيت اكو شي من طلعته وحده وشلون يمشي مايريد احد يحس عليه ،بس صعد بالسياره انا فتحت باب الصدر وصعدت وهو صافن علي

_ لا تباوع هيج ،امشي وياك وين ما تمشي

استغفر وحرك ،ودگت بينه السياره فوگ الساعة لدرب هيمه ،استغربت شني الجايبنه هنا وبس طبگ وگبل لا اسأله گال

صخر : اخوك هنا ،انزل

نزلت وهو هم نزل اريدن اسأله شكو ،وشني الجابه نوح هنا بس اتردد شكله مو مال واحد يسأله ..! ! !

طبينه وهو ،يمشي گبلي وانا وراه افكر وي روحي شني الجابه نوح هنا وشيسوي بهيج منقطة مگطوعة
بس وصلنه للبيت الجان بنص البستان حصلت على اجوبة لكل سؤال سألته لروحي وانا اشوفن ابو درع تلگانه ،سلم على صخر وبعدين علي وأشر على البيت

أبو درع : اخوكم جوه

صخر : ممنون منك

أبو درع : يابة تدلل ،طب شوفة

طب گبلنه واحنا وراه ،وجمد الدم بعروگي وانا اشوفنة نايم على الگاع ومبين مو بوعيه ،ركضتله اشوفن شبي
أبو درع : شيلوه يسبح حتى يصحه

انداريت مستغرب
_ ليش شبي ؟

أبو درع : لگيته طايح على الدرب ،شارب العينتين وهل جبته هنا ماردت احد يشوفه

فتحت عيوني ما مصدگ الگاله وانداريت على نوح ما اگدر استوعب هيج سوه ،نوح حتى صلاته ملتزم بيها اكثر مني ..! !

صخر : گوم ليث وكافي صفنات ،گوم سبحه لا اسبحه بدمه

مارديت بشي وگومته وهو بين اليصحه واليفقد انشلع گلبي الا صحه ،اطاني هدومة صخر لبستهن اله ومن شفته صاحي جبته بتفله بنص وجهه وهو يباوعلي متعجب من السويتة

_ سگط عاااار ،متعجب الحبها تزوجت ،عاين علي وعلى اخوك بنفس ضيمك بس ما سوينه سوايتك النگسه ،ولا تنساها هاي التفله لان كل بعد كل يوم اخليك تصبح بوحده مثلها

ماحجه ومشى فتح البوري غسل وجهه وانا طلعت محترگ گلبي منه ولو اكسر البطل الشرب منه على رأسة هم ما يرتاح گلبي ..!

بس شافني سأل
صخر : جا اخوك وين ؟

_ جوه ،شراح تگلهم وين چان ؟

صخر : صاحبة عده فاتحه ومشاله وخذاه الوكت

هزيت رأسي اباوعله باشمئزاز من طلع من الحمام وهو ما يحط عينه بعيونه بس مدنگ ،صخر كلشي ما حاجاه وگبل لا نطلع وصه أبو درع السالفة تضل بيناتنا
أبو درع : تدلل يابة ،احسبني ما اعارف بشي .

صخر : عاشت ايدك وماتقصر

طلعنا وهو يمشي عكس دربنا ،صعدت انا بصف صخر وهو وره صوت ما اله ،وبس وصلنه تلگونه كلهم بره الولد ،يسألون بي وين چنت وهو ساكت وصخر يرد بمكانة

صخر : صاحبة جدة ميت وماشيله ،ومبايله صامت هل ما رد علينه

ضيرم : جا هيج من الصبح لهسه ما شفت مبايلك ما گلت اكو اهل اگلهم انا بفلان مكان لا يضل بالكم

نوح : التهيت وما اجه ببالي

عبد الحق : والله انا هاي الاعذار ما توكل عدي كون الزمك وانعنع ضلوعك على الهبطة الكلناها

عزيز : أنت ضايج وتريد تحط ضوجتك بنوح ما ميت عليه

عبد الحق : منو طلب رائيك

ضيرم : هااا راح تتعاركون ؟

عبد الحق : لا شعدي انا ويني وين العرك

ضحكت وهو عارف ضحكتي ضحكة استهزاء تخبل الا يطگني وضيرم كاضه وهو يصيح
عبد الحق : اناا هذا البشر غااااثني ،بس هدوني عليه انعنع ضلوعة

ضيرم : خاب دكاااافي ،وين برهان عناك ،موتتنه

عبد الحق : انا الك ليث

_ شبيك چن واحد مضروب بوري ،روحك بخشمك

عبد الحق : انجب

_ كلمن يحجي باخلاقة للأسف يعني

عبد الحق : شقصدك ؟

_ ما قصدي شي

صاح وهو يخزرنه
صخر : شلون هسة نطب لوو لا

عبد الحق : حاجي اخوك يكف مني لا

قاطعته
_ لا شتسويلي ؟

عبد الحق : ادفنك بالگيعان والله ،مو تحبهن ادفنك بيهن واسرع حنطه على گبرك

ملوا الولد وطبوا هذا عركنة كل ما احجي حجاية وياه روحه بخشمة بس جذاب شوي ويرد يحجي وياي ،طبيت وراهم واشوفن جدي وعمامي
وابوي تلگوه ما مصدگين جانوا كل ضنهم اخذوه بيت غازي بس والله لو ماخذي بيت غازي احسن
من سوايته

°غاية°

حضنته امي ما مصدگة ،بجت وچن بكل دمعة تطيح منها تروي خوف نهار كامل ،باسها من رأسها يحاجيها

نوح : يمة كافي هذا أنا كلشي مابي

زهرة : ليش ما خابرت ،ما گلت هاي امي يضل بالها علي ،ليش هيج يمة نوح

نوح : حگج ،والله حگج بس صارت بعد

ضل شوي گاعد وگام
زهرة : جا وين ماشي يمة ؟

نوح : فوگ ،اريد انامن

زهرة : نوم العافية

صعد هو وبالنص ساعة هيج وبعد ما ضل أحد يمنه لان راح ادگ الساعة بالثنتين ،بس مشوا انا طبيت للغرفة نزعت حجابي وفتحت شعري راسي يوجعني منه هلگد ما ثگيل واتمنى امي ترضى اگصن منه شوي ،ولو بكل مره احاجيها ولطمت وگالت ازعل لو حطيتي ايدج عليه ،وكل ما شافتني حجيت ضايجة گالت تعاي امشطلج انا وكل ضنها التمشيط المتعبني ،ما تعارف بالصدگ رگبتي التوجعني منه وحتى من انام مو براحه

شربت دواي وتمددت ضايجة وحدي ،كل مره اغفه وهي تحجي براسي ،تعلمت على لغوتها چنت اگلها بس اسكتي وهسة اشتاقيت تحجي براسي ولا هل فراغ هذا ..! !

°بركة°

كل ضني راح تجي امي اليوم بس ما اجت ،اعارفها ما يطيها گلبها ترد للبيت وبصائر بالمستشفى وانا خلص يومي يم بيت جدي من سالفة نوح لحد ما اجاني عبد الحق ردني

نزعت عباتي وطبيت گبله وهو ما اعارف ياهو الخابره وطلع مستعجل ،وانا بوجهي صعدت لغرفته طلعت هدومة الوصاني عليهن ونزلت
شغلت الاوتي اكوي بيهن وكل بالي يم أبن الجسار ،ما مشيتله بعد من أخر مره واحسن برجلي تحكني اريدن امشيله اشوفنه ميت عدل

وبنص صفنتي اشتميت ريحة حرگ ،وبس دنگت لطمت وانا اشوفن قميصة محترگ احس بلعت العافية ،وانا بعدني افكر طب هو عاگد حاجبة مبين اشتم الريحه

عبد الحق : هاي شني ،شكو ؟

بلعت ريگي واحس شوي وابچي قميصة غالي وبعده جديد ما لابسة هواي
عبد الحق : شني حرگتي الهدوم ؟

هزيت رأسي وانا بالگوات كاضه دمعتي ،اجه يمي يباوع على القميص ويهز بايده
عبد الحق : والله فلوسة يحرگن الگلب

_ ما ادري الاوتي عالي

عبد الحق : يلا خل يولي ،اللبس غيره امري ل الله

_ ياهو حتى اكوي الك

رفع ايده
عبد الحق : لا ،لا عمي شني ما رايد قمصاني ،الله يذكرج يا ميمنة چنتي ساتره على هدومي

ضحكت وهو گعد بصفي
عبد الحق : انا اوكيهن اطيني الاوتي

_ يااا

عبد الحق : أي والله لان اذا ضليت عليج الراتب الجاي كله للهدوم

ضحكت بصوت اعله وهو يصيح
عبد الحق : وجبح ،صوتج لا اطبع الاوتي بوجهج

گمت وانا اگله
_ ياقميص تكويه

عبد الحق : جيبلي القميص الزيتوني يرهم وي البنطرون الأسود

_ خاب والله حرامات مخرب هاي الهدوم الزينة للعمالة

عبد الحق : انجبي ،انا مهندس

سايرته وانا اگولن
_ أي صدگ

صعدت جبتله القميص ورديت وهو بساع كواهن بس شني احس القماش صاح الغوث يريد كون ولا عقچه بيه
_ حق عليك الله كافي والله خطية القميص

عبد الحق : خلصت اوكفي بس هاي الطبگة .

حطيت ايدي على خدي مقهوره على القميص ومن كمل صحت
_ اهلهل ،يايمة اهلهل راااح

عبد الحق : هلهلي حتى احط الاوتي على حلگج

_ هاااي شبيك خوية ما يتشاقة وياك ؟

عبد الحق : لا أنا مو مال شقة

أبتسمت
_ شقة لو بيت ؟

عبد الحق : ما تضحك وتافهه كلش

_ تفاحة لو برتقاله ؟

عبد الحق : راح تنكفخيين

حطيت ايدي على حلگي لان چن صدگ راح انكفخ كفخة تنسيني حتى اسمي ،بس خلص انا لميت كلشي وراه وقميصة المحترگ شگيتة اسوي وصله للطباخ وهو يباوع علي

_ عليك الله لا تبچي ،عدك هواي والله

عبد الحق : نجبي شني ابجي

ضحكت وهو عوج حلگه ما عاجبة وخله وصعد فوگ وشوي وأبوي اجه من بيت جدي طب لغرفتة ينام وانا ما اعارف شني الضربني على راسي بهل ليل وذيج انا الما اسوي الروحي اكل تذكرت اليوم كلهم ملتهين ومابيهم احد
مشاله حتى عضلاته راح يفشن منوره الولد واهمالهم اله

بساع سويتله لفة مال چبن وطلعت وانا امشي على اطراف اصابعي ،القرية هدوء والكل نايمين بعد يوم خلص تعب بتعب ،مريت من نفس دربي وانا اگولن وي روحي

_ ثول أي والله مو حلفتي ما تجين دوده برچلج ما تگدرين

وارد اگولن
_ لا هاي انسانيتي جابتني

وبس وصلت للورشة طگطگت اصابعي متوتره وفتحت الباب بالقفل وطبيت ،هو جان نايم وفز على صوت فتحت الباب ،باوعلي بنعاس بالگوات فاتح عيونه،وگفت گباله وانا امد ايدي البيها اللفه اريدنه ياخذها ،بس طول ما اخذها
وضلت عيونه علي احس وجهي بوخ چن جاي يدور شي بوجهي

بلعت ريگي و وخرت عيوني من عيونة ،وهو اخذ اللفه مني ورديت انا چم خطوة ليوره اباوع عليه ولا اكل منها بس صافن عليها

_ شني أول مره اجيبلك ،والله ما حاطة بيها سم

رفع راسة وجر نفس
رهيب : انا المدوخني ليش جاي تجازفين وتچين
اكثر من مره ؟

رفعت اچتافي وغير الجواب التعودت عليه ماعدي
_ انسانيتي ما تخليني اخليك جوعان وانا اگدر اجيبلك اكل

هز رأسة بس چنه ما مقتنع ،درت وجهي وطلعت
امشي منين ما أجيت واللومن بروحي ،هسة انا شموازيني اجي اجيبله اكل ،لو لجحني احد تفيد وياي هاي الانسانية ،يحطوني ويطموني ويقرون علي الانسانية مو الفاتحة ..! !

هستوني اريدن اطب لبيتنه ،فتحت الباب واول خطوة خطيتها جوه وسمعت صوته أحد وراي

_ وين چنتي ؟

°كوكبة°

نزعت الحلقة من ايدي اكرها ،فلا احبنها ،تسچني اكثر من السچن الأنا بي
عوجتها بسنوني وشمرتها وين راحت ما اعارف بس كل الاعارفة ماريدها واريد اخلص منها ومن صاحبها ب أي طريقة چانت ..! !

دنگت ابچي وانا احسن بروحي جاي تطلع ،اكره كلشي جاي يصير اكره كل قطعة هدوم جايبيها اكره كل طلعه طلعتها حتى اجهز
مثل العرايس وانا ما احسن بروحي عروس ولا يم العرس

مسحت دموعي صار ساعات انوح وحدي البيت فارغ وهاي فرصتي اللطم براحتي وما أحد يگلي
ليش، انا والله كل يوم جاي يعدي علي
ويقرب العرس اكره روحي وكلشي وكل الناس ،راح اتخبل يوميا اگلهم ما اريدن ،اريد افصخ ومابيهن احد يسمعلي الا سعد أخر مره گتله اريد
افصخ وحاجه خاله وقامت القيامة وطب علي
حسن كسرني تكسر ويگلي اذا
بعد جبتي طاري الفصخ افصخ راسج عن جسمج

گمت من سمعت صوت الباب يندگ ،بالگوات مشيت و وصلت للباب جسمي لهسه يون علي من ضرب أخوي الما يسمى أخوي ،فتحت الباب وانا اصيحن

_ منووو ؟

رديت صحت
_ خااب شني منو ؟

اندفر الباب وبراسي انضرب لان انا واگفه وراه كلش كضيت راسي ورجعت ليوره فاتحه عيوني مستغربة هذا شجابة ،ولا أحد من اهلي هنا بس انا ،شعده جاي

مرتضى : شبيج شفتي بعبع ؟

_ امشي اطلع مرتضى ماكو احد من اهلي هنا

مرتضى : لان ماكو احد انا اجيت

بلعت ريگي ما اريدن أخاف ،قويت نفسي وصحت
_ اطلع مرتضى

ركض سد حلگي وبأيده سد الباب وسحلني للبيت وانا بين ايده اتلاوه ،اريدن بس افك روحي من ايده وهو مسيطر على حركة ايدي
وبس رجلي ضاله احرك بيها ،جان قوي ،بايد وحده كاض اديه وبايد ساد حلگي

الدم نشف بعروگي من طببني للغرفة وقفل الباب ...


تعليقات