رواية خلخال مشوه الفصل السابع والعشرون 27 بقلم زمرده

 

 

 

 

 

رواية خلخال مشوه الفصل السابع والعشرون بقلم زمرده




يجي وكت العتب
وأتعاتب وياك
وأخليهن گبالك وحدة وحدة

°كوكبة°

الدم نشف بعروگي من طببني للغرفة وقفل الباب

اندار علي وانا كل ذرة بجسمي ترجف ،اباوعله واباوع للباب ،ومن مشى وبخطواته انا المقصودة ونواياه بعينة تنشاف گبل لا تنحجي ..! !

رديت ليوره وانا إأشر على الباب وبصوت عالي احجي
_ افتح الباب ،مرتضى افتح الباب ليش قفلته ؟

مرتضى : صوووتج ،لا تصيحين شبيج ،بس نتفاهم انا وياج

احس رجلي بعد ما تشيلني من الخوف ،احاول ابين روحي طبيعية بس انا رجفتي فاضحتني
_ نتفاهم بره ،بس افتح الباب الله عليك مرتضى

مرتضى : بس نحجي ما اسويلج شي

_ بره نحجي ،بره

وهو بكل خباثه معاند
مرتضى : لا هنا

گعدت بالگاع حيلي بايد
_ احجي ،بساع احجي شرايد

طگطگ اصابعه وبصوت ونبرة خلتني أرجف من گال
مرتضى : كل ضنج انا ما اعارف شعدج وي أبن الغضب

بلعت ريگي من اجه گعد گبالي ثاني ركبته
مرتضى : عبالچ ما اعارف منو الطگ حسن ،كل ضنج احنا هيج غشمة ؟

باوعت بعيونة متفاجئه ،أبتسم ابتسامه وراها الف مصيبه
مرتضى : ليث ،ابن محمد رأجس آل غضب ،اطيج
بعد معلومات عنه ؟

شبكت اديه اريدن اضيع خوفي من كلامة بس زادها علي من گال
مرتضى : افضحج والله لو عدتي سالفة فصخت الخطوبة ،احجي كلشي اعارفة وتعارفيهم شني انا وحسن ساكتيلج وضامين عملتج بس والله بس لو رد سعد گالي أختي تريد تفصخ انا اخليها تصير دم بين أهلج وآل غضب وگولي ما گال مرتضى

كل كلمة حجاها التهديد بيها واضح وضوح الشمس ومبين ما جاي يحجي بس حتى يخوفني لا مرتضى يسويها ويسوي الاكبر منها ،هذا البشر كلش زين أعارفه مثل البلاء لو طب بحياة
بشر وانا هل بلاء طاح على راسي وراس الخلفوني وابتليت بي طول حياتي ...! !

وگبل لا يطلع وگف بكل تحذر بأصبعة يأشر علي گال
مرتضى : ماشي انا ونفس بعد ما اريدلج ،لان تعارفين شراح اسوي

وبس طلع ،لطمت على روحي لطم ما صاير ،هاي هي لازم إأيس ،انا انتهت حياتي وكل طفره بعد ما الي وراح اربط بي ما راح اخلص منه ولا من شره لان بحجاية وحده منه انتهي انا يموتوني اهلي بلايه ما يرفلهم جفن

بجيت بكل ماعدي من حيل ،عيوني وصلت لمرحلة ما اشوفن بيهن ،تمددت وانا روحي احسنها جاي تحترگ ،كل امالي انتهت وهاي هي بحجاياته دمرني وعلن خسارة تالي تعبي وبعد ما اگدر لا اعترض
ولا اگولن لا ،لان لا انا ولا حفيد رأجس نخلص من شره لا عده گامت ولا گعدت ويحجي ويتبلى عسى
ما الدنيا تحترگ ..!

لو عدي اهل يصدگوني جان حجيتلهم الصدگ وگتلهم بيناتنه ماكو شي ،بس اعارف حرف لو احجي سنوني تتكسر ،وياريت بس سنوني عظامي يكسروهن ويحطوني بظيم اكثر من الظيم الانا بي

مسحت دموعي وانا عيني على الباب ،انفتح وطبت سكينة بعدها لابسة حتى حجابها ومبين
هاي جيتها من اهلها باوعتلي وابتسامتها الطبت بيها اختفت وانزرع الخوف والقلق بملامحها من حالي

تخردلت بخطواتها وهي تمشيلي ،گعدت گبالي مصدومة من الوضع الانا بيه
سكينة : شكوو ،شني صاير ،ليش جاي تبچين ؟

رديت ابجي بصوت يروي قهر الدنيا كلها وي كل شهكة تطلع مني احس تطلع روحي وياها
واتمنى لو صدگ طالعة روحي بهل وكت وخلصانة ولا الجاي اعيشه

بكل مرة اگول راح تفرج بس تعكس وياي اكثر والسبب من اهلي مو من احد ثاني ،اخوي هو السبب بكلشي وحرامات يتمسى أخوي ...

سكينة : ولج احجي فدوه شبيج ،ليش هل بجي هذا ؟

حطيت ايدي على وجهي ودنگت ازيد بالبجي لان ماعندي غيره ،ماعندي وسيله اواسي روحي بيها غير الدموع ،انا والله هم گلبي هواي ،جبت عمري عايشة خدامة الهم بس كلشي ما غزر بيهم وخلصوا عمرهم نافريني بحجة هم ما يحبون البنية وچان من المفروض انا اجي ولد لان اهلي ناس يعبدون الولد

سكينة : تحجين لو اگول لسعد عليج من يجي

رفعت راسي احركه ب لا ،لان حتى لو گالتله بعد ما يتغير شي
بالگوات گدرت احجي وگتلها بصوت رايح منتهي
من التعب والقهر

_ اجه مرتضى

سكينة : هسة اجه ؟

_ أي

سكينة : ومحد موجود ؟

_ أي ،اجه يهددني ما افصخ الخطوبة

سكينة : يااا ،دخل يولي ،سعد حاجة خالتج الحية

_ ماريد افصخ بعد

زغرت عيونها متعجبة من الحجيته
سكينة : جا امس ردتي تفصخين ،وهسة تگولين ماريد ،شني التغير كوكبة ؟

بلعت ريگي ،بين الحايرة احجيلها وبين لا ،وبالاخير استسلمت وگلت احجي ،اريدن اشارك احد ضيمي

بديت احجيلها شلون شفتة أول مرة ،وشحجة من عارف بي مخطوبة ،وشسووه من حسن ضربني
وهي تباوعلي بقهر وي كل كلمة احجيها ومن خلصت
گالت

سكينة : والله لو صايرة من نصيبه جان تغيرت كل حياتج وخلصتي من هل ضيم بس شلاع الگلب مكتوبلج

_ سكينة ما چنت افكر بي ولا حاطته ببالي بس من حجالي احسن بروحي خسرت اكبر عوض بالدنيا لو صايرة وصدگ انا اله چان شديت ضهري بي ،ما اگدر ما اقارنه بمرتضى ،لج بس لان عارف أخوي ضاربني ضربه وما خاف لا من چبير ولا زغير

سكينة : هم ذولة آل غضب ،لا يهابون چبير ولا زغير

_ چنت دوم اسمع من غاية عنه ،تحجيلي شلون هو حباب وما يوم معلي صوته على وحده ويحترمهن كلهن ،تالي طلع البشر الانا اقارنه بأخواني گبل، نفسه عاشگني

سكينة : زين گليلي مرتضى شدراه ؟

_ حسن گايله ،بس هو متلثم شلون عارفه ،راح يوگف عقلي

صفنت حايره وبعد ما ضلت ساكتة شوي گالت
سكينة : شلون شتگولين ل سعد ؟

_ حاجي أنت ،گليله كوكبة بطلت ما تريد تفصخ بعد

سكينة : واكيد راح يجي يسألج ليش ،وشني الخلاج تغيرين قرارج

_ أنت گليله هي گالتلي هيج لان تستحي تحجي وياك حتى لا يجي يحاجيني

هزت رأسها حايره وگامت طلعت ،وهاي مرتين صار اچذب عليه ،من رد من بغداد وعارف بي مخطوبة وسألني جبروج ،گلتله لا وانا رضيت ،وهل مره هم صار مرتين انجبر اچذب وما احجي الصدگ والسبب حسن ...

گمت اريدن اغسل وجهي وبس طلعت صار بوجهي سعد هستوه طاب من بره ،ردت اضم روحي منه وما يشوفني باچيه
بس ما اطاني مجال وصاحني بساع من درت وجهي ومبين من نبرته شايفني

سعد : كوكبة ،اوكفي احاجيج

انداريت وانا متوتره ،متاكده هسة وجهي مورم واذا ما عارف ليش باجيه ما راح يرتاح ولا يهودله بال ..

درت وجهي عليه اباوعله عاگد حاجبة وانا بكل ما
عدي قابليه دست على
روحي ابين ماكو شي
سعد : شني شبيج ،باجيه ؟

هزيت رأسي ب لا
سعد : شني تچذبين علي ،ما شايفة وجهج بالمراية ؟

_ ماكو شي بس حسن غثني گبل لا يطلع لان ما منضفه غرفته

سعد : وتبچين على هاي ،يمعوده طز بي لا تهميله

هزيت رأسي ب أي وگبل لا يمشي سألني
سعد : سكينة أجت مو ؟

_ أي اجت

سعد : منو جابها ؟

_ ما سألتها

ماحجه شي وصعد وانا بس غسلت وجهي رديت للغرفة وشوي وانفتح الباب وطبت سكينة مستعجله
تحجي
سكينة : سعد گال حضرن روحچن ،يطلعنه نغير جو شوي

لميت رجلي لصدري ،حاضنتهن بأيدي ودنگت احط راسي عليهن
_ انا بيا حال ،ويني وين الطلعة

اجت تجرني
سكينة : جا هيج تضلين تلطمين ،والتالي شني من تحبسين روحج وتگعدين هل گعده تنحل ؟

_ شيحلها

سكينة : جا دگومي عليج الله

_ سكينة امشي مني روحي صايره بطرف خشمي

سكينة : لا تتعيقلين ويلا امشي لا اصيحن سعد عليج

_ شبيج مو تعارفين بي ضايجة ؟

سكينة : هو لان أنت ضايجة نريد نطلع ونطلعج ويانه

تأفأفت
_ وين مولين ؟

طگتني على راسي بخفة ايدها
سكينة : وله التولج ،گومي حضري روحج يلا بساعج

_ هسة غير اعارف وين نولي

سكينة : للمگبرة ندفنج ونرد

_ الله هنيالي

سكينة : گبر أي والله ،گومي بساع گدامي لا تضيعين وكت

گمت وانا ادگ رجلي بالگاع وهي تحجي
سكينة : طلعي هدوم من هدومج الجدد المن ضامتهن

_ شيخلصني من امي

سكينة : اكشخي هسة والله كريم من تعارف

_ بعلي ما بي كل حيل

سكينة : راح اصيحن سعد والله

_ شگد تلحين لخاطر محمد

طلعت وخلتني گدام الأمر الواقع وانا روحي جاي تطلع ويني وين الطلعة ،رديت گعدت داگه عناد ما امشي اريدن اختلي بروحي وضيمها

ماكو شوي وطب سعد من شافني على گعدتي استغرب
سعد : شني بعدج گاعده ،جا مو وديت سكينة
عليج حتى تطلعين ويانه ؟

_ ما اريدن اروحن ،والله ما الي خلگ ليش اطلع واخرب واهسكم

سعد : دگومي گومي ،هو احنا نريد نطلع علمودج

باوعتله حايره
سعد : راح اطلع ،وشوي واريدج مزروعة وراي

هزيت رأسي ب أي وهو مشى ،طلعتلي فستان لبسته و وگفت گدام المراية اللم بشعري وكلام مرتضى ابد ما يروح من بالي ،ابد شگد حاولت بس سيطرت كل كلمة گالها على بالي طول الوكت حتى من طلعنه
ما گدرت اتفاعل وياهم وكلساع سعد حاجي علي بس سكينة ساكتة لان تعارف البي شنو ...

ردينا للبيت وانا بس اريدن امشي للغرفة من شفت حسن راد وگاعد بالصالة ،يگلب بمبايلة
عبرته اچفه الشر بس هو ما يگدر يضل ساكت اذا ما يسممني

حسن : وگبر لهاي الشكولات

اندريت اريدن احجي بس رده سعد ،هستوه طاب ورانه وسمعه
سعد : شايف شكولاتك الخايسة بالمراية لو اجيبنها
هنا الك حتى تشوف زين

حسن : شايف ومقتنع بخلقتي ،اخبل شبيه

سعد : أي صدگ تخبل

أشرلي روحي ،مشيت للغرفة واسمعهم وراي يتناگرون ،بس نزعت العباة وبدلت هدومي بساع ما طايقتهن بس لان ما عدي انجبرت اللبسهن ،گعدت
وانا حالي بالظيم ،اريدن بس انسى ،ليلي ما نمته ولا گدرت اغمض عيوني ،ومن حسيت الدنيا ضاگت بي
كلش مشيت للشط وانا وي كل خطوة اخطيها
احسن بدموعي جمر يطيحن من عيني ،اتمنى اموتن ولا انزفله ،ما عندي بعد كل وسيله حتى اخلص منه
هاي هي طفت الدنيا بعيني

نزلت عباتي من راسي وگعدت ماده رجلي بالماي اريدنه يسحب هذا قهري الما اعارف بروحي شلون راح اتقبله ..! !

غمضت عيوني وبلعت ريگي من حسيت بصوت خطوات وراي ،انداريت وصار طوله گبال عيني واگف يباوعلي وكلمة وحده ماحجه ،اجه گعد بس بعيد عني ،طول وهو ساكت وانا كلساع ادير راسي اباوع عليه
وهو عينه على الماي

دنگت راسي احرك برچلي من گال
ليث : شلونج

بالگوات نطقت بحس ناصي
_ زينه

رفعت راسي اباوعله من گال
ليث : بس ما مبين هيج ،شصاير وياج ؟

_ ما صاير شي

ليث : لا تچذبين ،كل ما ضچتي تجين هنا ،يعني صاير شي مضوجج

بلعت غصتي وانا احاول ما احسسه
_ ما صاير شي ،بس انا ضايجة هيج

ليث : كوكبة

رفعت راسي ،ومن اجت عيني بعينة درتهن منه بساع
ليث : احجيلي

رديت باوعتله وانا ضاله ناكره الصاير ما اريدنه يعارف لان كلش زين أعارفة ما راح يسكتلهم

_ ماكو شي

زغر عيونة ما مصدگ
ليث : هاي هي ما راح اللحن عليج ،براحتج كواكب

گمت بساع ما اريدن اضل گاعده يمه اكثر بعد وهو بس شافني وگفت طفر بساع من مكانة يسأل
ليث : وين ماشية ،خليج ،صار هواي ما شايفج .

_ لا امشي لا تصيرلي مشكلة

صفن بعيوني شوي و هز رأسة ب أي ،درت وجهي ومشيت وهو ضل واگف بمكانة ما تحرك ،بهل ليلة من رديت شبعت بجي وقهر على
روحي وعليه وعلى چذبتي ونكراني حتى بس لا تصير سالفة وانا اكثر بشر يخسر فوگ خسارتي هسة ..! !

نمت وانا دموعي بعيوني وگعدت على صوت خالتي تگعدني ،لفيت راسي بالبطانية ما اريدن اشوفها حتى هي كرهتها بگد كرهي الابنها وأكثر ..! !

بشرى : ولج كوكبة كافيج نوم اگعدي احجي وياج

جرت مني البطانية وانا سويت روحي هسة فزيت مطيت جسمي وانا بگلبي اگولن
_ والله لو اخنگج ما تبرد نار گلبي

بشرى : دگومي گومي ،ماضل وكت ورانه روحه للسوگ

_ ليش بيش الساعة ؟

بشرى : راح تصير بالعشرة

گمت وهي مشت ،وانا بدون اعترض من هل يوم لازم اساير كلشي ،ومشيت وياهن للسوگ بس جثة بلايه روح ،كلشي يگللي عليه اگولن أي
وما اعترض بس اريدن ارد للبيت وارد احبس روحي بالغرفة وحدي ،واتقبل وضعي الراح يزيد سوء اكثر من ما هو مصخم

°بركة°

_ وين چنتي ؟

احس نسيت عدي رگبة واگدر اديرها ،رجف گلبي والله وانا اعارف كلش زين هذا صوت ياهو من ولدنه
ومن رد گال
_ انداري احجي وياج

انداريت وهو أشر علي ،مستغرب طلعتي بهل ليل
رد سألني
_ وين چنتي ؟

بلعت ريگي اريدلي چذبة
_ ردت اجي يمكم بس الباب مقفول وما گدرت افتحه

_ جا ليش طالعه وحدج ؟

_ أبوي وحق نايمين وگلت انا اجي انامن يم غاية لان ضايجة

_ بس مايصير تطلعين وحدج بهل ليل

يحجي وياي بكل هدوء ،حمدت الله وشكرته هو شافني ولا غيره ،بلعت ريگي وگلت لازم اكمل الچذبه من گال

_ امشي

مشيت وراه ومن وصلنه لبيت جدي من فوگ الباب مد ايده وفتح السرگي العالي وسوالي درب اطبن وهو يمشي وراي ،وبس طبيت و وصلت لغرفة البنات گالي

_ طبي

طبيت بساع نزعت عباتي اهفي على وجهي ما مصدگة الله عداها الي ،عدلت شال وشغلت الضوه ومشيت يمها من سمعت صوتها تسأل منو

جاوبتها
_ انا بركة

گعدت على حيلها متفاجئه
غاية : شجابج هسة ولج ؟

گعدت گبالها وانا اگلها
_ چابتني الج چذبة هل كبرها

غاية : يااا ،چذبتيش ؟

دنگت خايفة تكفخني وبكل تردد گتلها
_ مشيت لرهيب ومن رديت لچحني ليث

رفعت راسي من طولت ساكتة ،هزيت ايدي من شفتها تمددت ودارت وجهه تدردم
غاية : انامن احسلي لان حتى لو حجيت ما يفيد الحجي

گمت رافعه حاجبي اباوعلها
_ اريدن فراش

غاية : نزلي فراش وانحمي

_ أنت انحمي ليش انا

غاية : دنچبي بركة ،فورتي دمي

غطت راسها ولبستني ،وانا فرشت لروحي ونزعت شالي ومددت ،اهمن شلون لو گعد
حق وابوي وما لگوني بالبيت شراح يخلصني منهم!

فتحت عيوني على صوتها الصبح تگعدني ومن أيست مني جرت الغطا
غاية : خايبة گووومي ،حق لعب طوبة لان گاعد وما لاگيج يامصخمه

طفرت بساع چن طاح علي صاروخ البس بشالي وهي يمي تحجي
غاية : شلون تلزگيها ،ولج عيونة صايرة بصگته

گبل لا اطلع گتلها
_ لا تخوفيني اكثر ترا راح اطيحن من طولي

غاية : تستاهلين أم الدروب

طلعت اطگطگ وهي وراي ،بس شافني چن شاف طنطل خاف چان يحجي صار يصيح
عبد الحق : تعاااي لج تعااااي ،اذا ما اكسر رچلج الطلعتي بيها واحنا نايمين شووفي

غضة : خايب ماتسكت واذا طلعت كلهن خطوتين وماكو كل غريب بالقرية

عبد الحق : حتى لو جدة ،مايصر تطلع ،شلون تطلع بلايه ما نعارف ،لو جاية حاجيتلي مو اگعد الکاها ماكو

غضة : دنصي صوتك ولا تاخذنه بحسك العالي وكافي بعد اجت ،ملت وحدها

غاية : أي خطية ما چانت معنسة وأجت يمي

تأفأف ضايج وانا احسن بحجي غاية بسامير الي بس المهم حق بعد ما حجه وخله ومشى ،وانا سمعتلي رزاله هلگدها من جدة

غضة : خايبة بركة شلون تطلعين بنصاص الليالي ،انا ما اطيت بيج گدامه لان اعارفه عصبي ،بس والله سوايتج چبيره ،جايتنه وبلايه ما يعارفون لا هو ولا أبوج ،وين صايره ؟

_ جدة غير چانوا نايمين وهم بس ليث هو الجابني لان انا اجيتكم ولگيت الباب مقفول وهو فتحه الي

غضة : بس هذا ما يغفرلج طلعتج بلايه علمهم

_ صارت جدة بعد شأسوي

غضة : اذا عدتيها انا احطنج بأيده واگله طيح حضها وفلا احاجيك

_ يااا يااا صدگ ؟

غضة : جا من ايدج

غاية : لا تضيعين حجي وياها جدة ،بركة تسمع من أذن وتغلس من الاذن الثانية

زهرة : هدنها للبت ،طلعتن الجيه من عينها

غضة : جا ما شفتي اخيها اجه متخبل ،والله لو طايحة بأيده يكسرها

_ لا جدة ما يسويها

غضة : طارت بركتج على هل ثقة

ضيعت خوفي ولومي لنفسي بأبتسامتي ومشيت ورا غاية ما شفتها مشت للمطبخ بس طبيت اندارتلي
غاية : ورا هذا الصار لازم يصيرلج درس وما تمشين بعد

بلعت ريگي وانا اگلها
_ التوبة

غاية : لا وكلش راح اصدگج

غيرت السالفة بساع وانا اگلها
_ متريگة أنت ؟

غاية : لا متانيتج

_ اسوي انا ؟

غاية : لا بس حتى تاكلين وياي

_ خوش

غاية : راح اسوي بيض عيون تاكلين ؟

_ أي احبه

غاية : اعارفج

بس خلصت الريوگ شلت الصينية انا ومشينا للصاله تريگنة وللعصر ومشيت لبيت عمي باقر وي جدة حتى نشوف ريحانة

°حواري°

ليلتين مرت على البشر غفت بيها العيون كلها الا عيون ريحانة الهلكتهن من البجي والنويح،حالها ما يتسولف من يهده البيت تهيج كل مواجيعها وانا
وامي نحير شني النحجي وتخف حرگة گلبها الواجه بي نار فقد الضنى

فتحت عيوني الصبح وانا احس بيهن مثل النار امس ما نمت وضليت وياها ومن حطيت راسي على المخده شفت الموت بعيوني ،من الحلم للخنگة احس
ما جاي اعيش حياتي مثل البشر ،عبارة عن أحلام وخوف افز مثل المحترگ اچدي النفس جداوه وچن بالدنيا ماكو هوه كافي حتى اشتمه ..! !

گمت وانا اباوعلها فاتحه عيون وصافنة، اتحرك على كيف ما اريدنها تفز وبنفس الوكت اندارتلي ،سألتها مستغربة عيونها حمر ومورمات چن واحد ما نايم

_ شوكت گعدتي ؟

ريحانة : ما نمت

_ ليش هيج تسوين ،جا ضلت بس عافيتج هم تردين تخسريها ؟

غمضت عيونها وردت راسها على الحايط بحركتها عارفت بعد ما تريد تحجي وانا خليت وطلعت بره و وي طلعتي طب فقار وامي وراه تسأل

نجوى : بشر يمة ما صارت زينه ؟

فقار : لا الحمدلله أحسن العصر يطلعوها

نجوى : الحمدلله ،چا ليش جاي هسة أنت ؟

فقار : أجيت ابدل هدومي واردن

نجوى : جوعان اسويلك شي تاكله ؟

فقار : لا ماريد شي ،هسه تريگنه

نجوى : بالعافية

فقار : الله يعافيج

صعد فوگ وانا مشيت اكمل دربي ورا امي بس طبيت وراها اندارت علي
نجوى : ما گعدت اخيتج ؟

_ هي بالاصل ما نايمة

نجوى : يااا ،جا شو كل ما اطبن للغرفة اشوفنها مغمضة

_ تضحك عليج

حطيت ايدي على حلگي من حسيت بروحي چفصت واجتني خزره من امي من هاي الزينه
نجوى : السانج شوكت تكضي وتكفينه شره ؟

_ زلة لسان يمة

نجوى : احنا نضل يوميا زلة لسان أكبر من الگبلها

_ جا شني انا جديدة عليج

نجوى : كبرتي عيب لازم تحسبين حساب بكلشي تگولي

_ لا يمة شني هيج اتعب ،خليني احجي و وين تصفى خل تصفى

نجوى : ما يفيد الحجي وياج

_ أي والله ما يفيد

هزت ايدها ومن أيست مني غيرت الموضوع
نجوى : امشي صيحي أختج تتريگ

_ وين ترضى اختي ،مو تعارفين صار چم يوم مسوية اضراب على الاكل

نجوى : دروحي گليلها واذا ما رضت رديلي

بلايه ما احجي درت اطلع من المطبخ ،و وي طلعتي طبت
هيوفة : صباح الخير

نجوى : صباح النور يالريشة

_ صباح النور ريشة گلب أخوي

أبتسمت خجلانه من ردودنا ،وانا خليت وطلعت بس فتحت باب الغرفة شفتها متمدده وتباوع للسگف كضيت الباب بايدي اباوعلها ،مأيسة تگوم تاكل بس
گتلها

_ ريحانة امي تگول گومي تريگي

اندارت باوعتلي وگبل لا تحجي عارفت الجواب
ريحانة : ما اريدن

_ خاب شني ما تردين صارلج چم يوم لگمه ما حاطة بحلگج

ريحانة : هديني حواري

_ ماشية اصيحن امي عليج

سديت الباب ومشيت احجي
_ يمة ريحانة ما ترضى تاااكل

طلعت من المطبخ على صوتي
نجوى : شني بكيفها

همت تريد تمشي بس وگفتها
هيوفة : انا ماشية احاجيها عمة

جرت نفس وهزت رأسها ب أي
نجوى : قنعيها

هيوفة : أي والله اقنعها

من مشت هيوفة للغرفة انا مشيت وراها ،هي طبت وانا ضليت واگفه يم الباب اسمع حجيها وي ريحانة ومحاولات الاقناع

هيوفة : اذا تحبيني گومي لخاطري بس اگعدي ويانه

ريحانة : ما الي نفس والله ،ما اريدن اطلع من الغرفة

هيوفة : ما مليتي من الگعده وحدج

هزت رأسها ب لا
هيوفة : جا مو دوم تگولين احب اللمات ؟

گامت وگفت حايرة من ما شافت رد گالت
هيوفة : نجيب ريوگنه يمج

وگبل لا تحجي اندارت تطلع وانا ضليت واگفه اباوعلها بقهر الدنيا كله اتمنى اگدر اخفف شوي من تعبها واشيل من حزنها بس ما بيدي شي اباوعلها
وانا احسن بأيدي مربطة ،مشيت گعدت يمها
وهي بين صفنة والثانية صوت جرت نفسها تسولف خسارتها وقهرها...

شوي وطبت هيوفة شايلة الصينية ،حطتها بالگاع وامي وراها بايدها قوري الجاي وسفط الخبز اخذتهن من ايدها هيوفة وگعدن وريحانة تباوعلهن تدنيت يم الصينية من گالتي

نجوى : اكلي حواري ولا هم تگليلي ما اشتهي حتى احط راسج بطاوة البيض

اخذت الخبز من ايد هيوفة بعد مابيها مجال احجي
مدت ايدها بيها لفة زغيره
نجوى : هاج يمة ريحانة

ريحانة : ما اريدن يمة روحي ما تهوه الاكل ،ليش تلحون علي

نجوى : جا شني تضلين صايمة ؟

ريحانة : مو بيدي والله ،معدتي احسنها مسدوده

نجوى : شوي شوي اكلي ،لخاطري

بلعت ريگها واخذت اللفه من ايد امي ،وامي طارت تباوعلها شوكت تعض منها ،اخذت لگمة منها تاكل بيها من لا چاره ،ماكو لگمتين وردت اللفه بالصينية

نجوى : هااا يمة ،شأكلتي ؟

ريحانة : والله ما اگدر

نجوى : جاا شني تضلين هيج ؟

هيوفة : خليها عمة لا تضغطين عليها

سكتت امي بعد وهي مددت ،وانا بالگوات اكلت أخاف من امي لا تحط ضيم گلبها بي ،هستونه خلصنه ريوگ وهيوفة شالت الصنينة تغسل المواعين واچت جده والبنات علمود يشوفون ريحانة

گعدت بصف ريحانة مسدت على ايدها تسألها
غضة : هاا ياجده شلون صرتي

نجوى : شلونها عمة ،لا اكل ولا نوم شلعت گلبي

غضة : يااا ،مو هيج ياحبوبة

ريحانة : مو بيدي ياجدة نار احسنها بنص ضلوعي لا يطفيها ليل ولا صبح

غضة : جا شبيدج شتغيرين ،هذا المكتوب الما منه مهروب

ريحانة : اريدن اموت جدة ،لو ميته انا وياه ولا ضاله بحسرة شوفته

غضة : عوذه من لسانج ،البطن الخضرت مره تخضر مره ومرتين وتلاثه لا تضلين تاكلين بروحج بعد حبوبتج

جرت نفس ساكته وانا اعارف لو شما حجت جده وياها ما راح تطفى نار ريحانة ،ولا راح تتقبل هي خسرت الجاهل الانتظرته سنين

ضلن فوگ الساعتين گاعدات ومشن ،والعصرية طلعوا بصائر من المستشفى ،لبست حجابي وطلعت بساع وانا اباوع الامي وهيوفة تلگنها ،فقار ساندها وامها وميمنة وحق وراهم
بساع طببنها وفقار ضل واگف يباوعلها التعب مبين عليه مثل ما مبين عليها ذبلان مثلها والتعبها أخوي تعبان ..! !

طبيت وراهن و وراي طبوا هو وحق ،گعدنها بغرفة امي ،وهم ضلوا بالصاله ،ضليت واگفه مرجعه ضهري على الحايط واباوعلها وجهه رايح وميمنة حايره
بيها نزعتها شالها ولمت شعرها زين وبصائر تحجي وياها بصوت تعبان
بصائر : نامي لا تضلين گاعده ،لا يصير بيج شي .

ميمنة : كلشي ما يصير بي ،لا تخافين فكري بروحج

بصائر : جا شوفي عيونج من النعاس انتهن

نجوى : صدگ عمة امشي نامي وردي بالليل

ميمنة : والله ما يطيني گلبي اعوفنها

شيماء : جا مو احنا يمها ،دمشي اسبحي وناميلج شوي

ميمنة : بس خل اسويلها شي تاكله

هيوفة : انا راح ادز فقار يجيبلها معلاگ زين الها

بصائر : لا عليج الله ،والحسين بزعت روحي من المعلاگ

هيوفة : جا غير يصعد دمج

بصائر : ما اريدنه ،سويلي شوربة والمعلاگ باجر

گامت هيوفة تسويلها الشوربة وامي ضلت تحجي عليها ،بس هي تحلف ماتگدر تاكله ،ميمنة مشت لبيت جدي وشوي وردت وياها بركة الخلصتها اليوم بينه وبين بيت جدي ...

طبن ثنينهن وانا مشيت يم هيوفة لگيتها تحظر بصينية بصائر وبس شافتني گالت
هيوفة : اخذيها الها ،انا اريدن اسوي جاي للولد

_ خوش

وديتها ورديت يمها ،بس طبيت للمطبخ طب حق من بره ،عبر مني يريد يمشي للديوانيه بس بصوت ناصي بس انا اسمعنه گال

عبد الحق : أم دلعه

انداريت بساع عليه متنرفزه اريدن اتعارك وياه لان مليت كل ما شافني وگال ام دلعه ،بس ما لحگت عليه لان اختفى

هيوفة : حواري

انداريت عليها
_ هااا

هيوفة : شحاجاج حق ؟

تقدمت امشي يمها وانا اگولن
_ مليت كل ما شافني وگلي أم دلعه

هيوفة : اممم

_ على يوم اتعارك وياه لان مليت من هل سالفه

هيوفة : تعاركي مو هي هيته

_ جا ما يكف مني مو يعارفني طگه ونص

هيوفة : لا يعارف بس الدلعه

مبتسمة تحاجيني وانا رفعتلها حاجبي
_ شقصدج ؟

هيوفة : كلشي ما اقصد

_ اصدگ ؟

هيوفة : بكيفج

_ جا ما راح اصدگ

هيوفة : هم بكيفج

_ توسلي حتى اصدگ

هيوفة : لا والله

ابتسمت احرك حواجبي وهي أجت جرتني من رداني وگفتني گبال السنك
هيوفة : اغسلي المواعين يلا

_ مريضة حرام عليج ،وين اكو مريض يغسل المواعين

هيوفة : كلشي مابيج هستوج تردين تعاركين لو بس من توصل للمواعين تتمرضين

كضيت راسي
_ دخت راح اطيحن

هيوفة : ميخالف اغسليهن وطيحي

_ حرام عليج

هيوفة : خوش ،اغسليهن

_ الا اگول الامي عليج

هيوفة : گليلها

_ مرت أخوي الحية

هيوفة : حماتي الخايسة

اشرت على روحي
_ انااا خايسة

هيوفة : شو وخري خليني انا اغسلهن ،جان مخلصتهن هسة

وخرت وهي غمتني
هيوفة : ما صدگتي

_ جا ظلم ،تعارفين ما احبن المواعين ليش تجبريني اغسلهن

هيوفة : مو بس المواعين ،أنت ماتحبين كلشي اسمه
تنضيف

_ أي والله صدگ

هيوفة : تعترفين ؟

_ جا شني اچذب عليج واتورط

ضحكت مأيسة وانا خليت ومشيت لغرفتنه من شفت الباب مفتوح ،طبيت وانا اشوفن عمة شيماء
وامي يمها بالگوات قنعها تطلع واخذنها لغرفة امي يم بصائر والبنات ،گعدت وياهن بس تسمع جثه
بلايه روح بكلشي ما تشارك ولا الها قابليه تحجي

گعدت بصفها وانا اسمع مركزة بحجيهن
شيماء : طگ گلبي على شوفته ياخيه ،ما ضل عدي صبر والله ،شوكت يطلع واشوفن طوله الحلو

نجوى : حگج والله ،جا مو گالوا هل شهر يطلع ؟

شيماء : يوميا يگلولي هل شهر ،وشهر يجر شهر وهل صار اكثر من سنة

نجوى : انا هم سألت باقر گال ما ضل شي

شيماء : جا هاي الما ضل شي شوكت ،والله احسن فاگده قطعه من روحي

نجوى : لو يتنازلون بيت غازي جان طلع بساع ولا هل ركضه هاي

شيماء : عمي راكب رأسه ،لو بس الله يهدي ويطلع ابن جسار جان صارت وحده بوحده وطلعوا جعفر

نجوى : ما تعارفينه ما يريد يدگ راس الهم ،بس لا تخافين والله يطلع ،عمج ما يفرط بواحد من احفاده

شيماء : جا سنة صار ،هنا هنا ،ضاله بحسرة شوفته

نجوى : ما ياخذج برهان تشوفي ؟

شيماء : ما يرضى يگول شني تطبين سچن

نجوى : جا واذا غير ابنج

شيماء : بعد برهان وگال حجاية ما يغيرها لو شوف شني يصير وانا متانيه رحمة الله

گمت من سمعت صوت هيوفة تصيحني ،بس طلعت من الغرفة صارت گبالي بايدها المكناسة
هيوفة : راح اصعد انضف غرفة عزيز واذا سألج منو نضفها گليله أنت ،خوش ؟

_ خوش

صعدت هي وانا رديت للغرفة ،وهيج الايام بدت تگضي ،بصائر ردت وگفت على حيلها بس ريحانة تمثل
هي بخير بس انا والليل شاهدين ريحانة ابد مو
بخير ..! !

°غاية°

لبست عباتي وانا اسمعلها
ميمنة : لا تخافين هو كله خيط يجروه وفضت راحت

_ خايبة هاي انا الما خيطت رجلي من تعورت تاليها اتحمل وجع خياط خشمي

ميمنة : جا شتسوين ،بساعج اطلعي لايضل يحجي

عدلت عباتي وطلعت بساع ،و وراي اجه ليث صعدت ورا وليث بالصدر ،حطيت ايدي على گلبي وانا اردد دعاء الصباح مشغلة صخر بالسيارة ،بس تحرك اندار
وهو يسوق سأل

صخر : نوح امس بالليل يمك بالگيعان ؟

ليث : ابد فلا شفته ،بس خابرني و وصاني امس لو سألتني اگلك چان يمي

صخر : يعني يريد يچذب علي

ليث : والله انا ما اريدن اضم عليك وبعدين تلومني

صخر : خوش خوش ،انا اله

ليث : لا تگله انا گتلك ،گله امس مشيت للگيعان وما لگيتك ما اريدنه يضوج مني

صخر : سهله

مركزة وياهم وما عارفت ليش هيج مشددين صايرن على طلعة نوح ومنتبهه كل ما راد يطلع لازم يطيهم تقرير وين ماشي و ويامن ..! !

نزلنه انا وليث گبال المستشفى ،وصخر گال يطبگ السيارة ويلحگنه ،كض ايدي وطبينه سوه وانا ردلي الخوف الچنت ناسيته
ومن صار سرانه طبيت وهم وياي ،شاغت روحي من جر الخيط كضيت ايد الدكتور حيل من الوجع وبنفس الوكت حسيت على ليث من جر ايدي يكضها بين ايده ويحجي وياي

ليث : راح يخلص ،اتحملي شوي خوية

ضغطت على ايده حيل ،وبس خلص بجيت بوجع وليث يسكت بي وصخر يتناقش وي الدكتور على العلاج وغيره
وانا شايطة روحي گمت وانا بالي بس يم خشمي وليث يعدل بعباتي ويحجي وياي يريد بس انسى
الوجع

ليث : كافي خلص ،عليش البچي بعد ،شو ارفعي
راسج

رفعت راسي اباوعله وهو بعباتي يمسح بدموعي
مبتسم يحاجيني
ليث : جبانه هم دميعه

_ مو جبانه

ليث : والله اكبر جبانه ،بس تنوحين خزيتينه

_ جا الوجع مال خيط ما ينحمل وبس اللاسق من شاله كافي

ليث : أي أي صح

زغرت عيوني اباوعله اعارف جاي يسايرني ،اندار علينه صخر يأشر نطلع ،طلع گبلنه واحنا وراه
ليث يداهرني وصخر كلساع يصيح بيه ومن سمع ضحكت بصوت اندار خارزنه ثنينه

صخر : هاي عود أنت الچبير مأمن تمشي وي اختك تالي أنت التطلع صوتها

ليث : يابة والله ما ضحكت بصوت عالي ،شبيك على كلشي مسويلك سالفة

صخر : هااا ،هاي انا ؟

ليث : أي والله ،ما تشوف روحك صاير تعارك الرايح والجاي

صخر : انجب

ليث : حجاية الحگ ما تراد

صخر : تحملتك ترا

ليث : جا حگ ،انا اتحملك وأنت هم لازم تتحملني خوما بس أنت اجفص ببطني

صخر : اكل نعل ،شوكت مجفص ببطنك شو ما تعارف تحجي

هز ايده وجرني يمشي
ليث : توكلني نعل وهذا كله وما مجفص ببطني عوزك بس تلبس چزمه وتدوس بمصاريني

يجرجر بي وراه ويمشي سريع وصخر يصيح يريد نوگف وما وگف ليث الا يم السيارة ،ضلينه متانينه بين ما يوصل ،وهو مبين صارت روحه بخمشه
من شفته من بعيد شلون يمشي گلت راح بيها ليث
وبس وصل يمنا جابه بكله بنص گصته خلاه يطيح على السيارة ساند روحه

لطمت بخوف من شفته مغمض عيونه وركضت اجرن بأيده من وجهه
_ ليث ،ليث شبيك ،حاجيني

فتح عيونه عينه على صخر
ليث : متحملك وعاذرك بس نوبه الجايه اردها الك والله

صخر : حتى اكسرك

عدل هدومه ومشى وعرفته زعل ،صحت وراه
_ وين ماشي ،لييث ؟

ليث : ردي وي اخوج انا إأجر تكسي احسلي

صخر : انجب ورد لا اسحگك والله

ليث : الله وايدك تخلصني من سحگات الدنيا

ركضله يجر بيه يريده يرد وليث عاند
صخر : رد ولا تگلبها نويح

عت ايده يريد يكمل دربه ،وصخر رد جره
ليث : شلون راح يخليني اشمر روحي جوه السيارات واخلص

صخر : ما احاجيك بعد

ليث : ما أثق بيك ،انا اعرفك لازم تحط ضوجتك بأحد وانا منا روحي بخشمي وساكتلك واگولن لا ضايج حگه

صخر : ديلا لا تسويها سالفة ورد ما احاجيك بعد

ليث : احلف

صخر : وداعت ام الشط

ليث : لا هاي هي كلش ما راح تحاجيني

ضحك وجره ،صعدت من فتح السيارة اباوعلهم صعدوا يضحكون و واحد يشمر حجي على
الثاني حطيت ايدي على خدي وگعدت بالنص اباوع
عليهم

_ اگلكم چن نسيتوا دواي ؟

اندار علي ليث وصخر لزم بريك بنص الشارع
صخر : كله منك ليث

ليث : منك أنت ،انا شلي غرض

صخر : غير أنت طنگرت

ليث : خوب ليش ماتگول أنت جفصت ببطني

_ ما اريدن الدوه بس لا تتعاركون فدوه

ليث : لا ما نتعارك ،اتحمل اخوج شأسوي أمري ل الله

صخر : لا صدگ ؟

ليث : أي وعيونك الجقل

صخر : تروحلهن فدوه

ليث : عليش ،عدي عيون احلى من عيونك

صخر : اطفيهن الك ؟

ليث : راح نتغرم ،حرك وانا العصر اجيبن الدوه

ما گال شي وشغلها ،وبس وصلت نزلت مسطور راسي سطر من مناگرهم الدرب كله ،شجاهم ما جانوا هيج ..! !

بس طبيت تلگتني
ميمنة : هااا شلونج ؟

_ شلوني ،سطروني حماج ورچلج

ميمنة : شبيهم ؟

_ بس يتناگرون ،واحد ما حامل حجاية الثاني

ميمنة : هم ذولي ولدنه ،شني الجديد ،گليلي خشمج شلونه خوما توجعتي

_ گليلي شگد توجعتي

ميمنة : يااا صدگ ؟

_ أي والله متتت

ليث : هو خيط بس غاية خوافه

انداريت عليه
_ هم گال خوااافه

ليث : جا هو خيط جره وأنت خبصتني الدنيا

زهرة : هاا يمة اجيتوا ؟

ليث : لا بعدنه بالطريق

ابتسمت وانا كلش زين اعارفها جاي تسايرنه بأبتسامتها وتضم قهرها على جفون، امس من مشيت
للمدرسة وكلنه داومنه وهي ماكو خلصت
اليوم كله كل ما نحاجيها نلگاها صافنه وشگد تحاول ما تبين بس امي ماتگدر حيل تحبها ...

صخر : السلام عليكم

زهرة : هلا يمة

ميمنة : عليكم السلام

صخر : جوعان مسوين غده ؟

ميمنة : أي بس احمي

صخر : خوش

طب جوه لحگه ليث وامي وانا نزعت عباتي احجي وياها
_ تردين اساعدج بشي ؟

ميمنة : لا ارتاحي هستوج جاية من المستشفى

_ جا وذا

ميمنة : ماريد شي والله كلشي مخلصه

مشت شغلت النار جوه الچدوره وانا طلعت للغرفة بدلت هدومي ورديت يمها ساعدتها بالاگدر عليه وبس خلصنه التمينه على الصينيه
جدي وأبوي طالعين بعدهم ما يتحاجون بس
بوكت المشيات والفصول لا يحجون ومن يردون للبيت يتخاربون وهيج ضالين

°حواري°

طبيت للبيت من الباب اصيح
_ انا نجحتتتت

طگيتها ركضه من اجاني صوته من بره يصيح
عزيز : وسم صوووتج

طبيت اضحك ما مصدگة نجحت ،صح قاومت المرض وامتحنت بس كل ضني اطيح بواحد مو اطلع ناجحة ودرجاتي زينة

طبيت للصاله بايدي الشهاده وهي چانت نازله من فوگ وگفت بمكانها على الدرج
هيوفة : هااا ،ناجحة مو ؟

هزيت راسي ب أي
_ نجحت ولج ولا واحد طحت

هيوفة : انقط رچلي

صفنت متذكره ضيرم واعدني بهدية لو طبيت وزاري وما دام نجحت يعني راح احصلها
كملت دربي للغرفة من سمعت صوت امي تصيحني نزلت جنطتي بالگاع واطيتها الشهاده

_ نجحت يمة

نجوى : يايمة صلاوات ،العافية

ريحانة : بالعافية حورية

_ الله يعافيچن

نزعت عباتي وگعدت احسب بدرجاتي ،وهم الممنونين يطببوني وزاري ،صفگت بايدي وغميت روحي
_ جيره بگصتج ياجفون

ريحانة : شدخلها جفون ؟

_ قهرتني ردت اخذ شهادتها وما اطونياها بس گالت المعلمة درجاتها كلش عالية لان چانت تاكل الكتاب اكل

نجوى : هي گالت لان تاكل الكتاب ؟

_ لا أنا اگولن ،تدرين يمة

نجوى : شني ؟

_ اليوم احس روحي تايهه ،حتى رحت واجيت ما مشيت للحانوت ،كل مره انا وياها نخلص الفرصة اكل وحجي

نجوى : جا بعد الصار صار ،شتسوين تعلمي وحدج

_ والله فلا اتعلم ،شني ضوجه

نجوى : شني تبطلين تردين ؟

_ لا ،بس بعد ما اطلع من الصف حتى لا اضوجن والله من طلعت بالفرصه مشيت الصفها وتذكرت
هي ماكو ما تداوم شوي وابجي

ريحانة : ذكرتيني بروحي انا وسيوف ،من كله چنه نداوم سوه بالابتدائية

نجوى : وچانت كل ما تمرضت لو غابت تسوين روحج مريضة حتى تغيبين وياها

ريحانة : شگد چنه ما نتفارگ ،بس تالي غصب الدنيا فارگتنه

طرت وانا اشوفنها تفاعلت وي امي ،بس ما دامت الفرحه من ردت سكتت وبعد ما شاركت
بحجينه وحتى من طبت بصائر بس ردت عليها گالت

بصائر : صباح الخير

وردت سكتت ،باوعتلها بصائر وردت باوعت الامي
بصائر : متريگين عمة ؟

نجوى : هذني الثنين ما متريگات

ريحانة : انا ما اريدن

نجوى : جا شني صايمة ؟

ريحانة : والله ما اگدر يمة

نجوى : دخيل الله ،سوي عمة وغصب عنها تاكل

بصائر : صار

طلعت بصائر وانا گمت طلعتلي هدوم مشيت للحمام بدلت ورديت ،وشوي وطبت هيوفة

هيوفة : عمة اريدن امشي الاهلي اشوفن غاية اجت من المستشفى هسة

نجوى : منو يوديج ؟

هيوفة : فقار بره اگله ياخذني

نجوى : خوش روحي

°هيوفة°

صعدت فوگ جبت عباتي ونزلت شايلتها بايدي وكملت دربي للمطبخ حمحمت وطبيت
وهو چان واگف يم بصائر وهي تسوي الريوگ المتأخر الهن هي والبنات الوادم هسة تتغده
وهن تذكرن يتريگن

_ فقار تاخذني لبيت اهلي ؟

اندار علي بايده لفة ياكل بيها
فقار : هو انا اريدن امشي اشوفن نوح

_ جا خوش

لبست عباتي وطلعت وراه وهي تصيح
بصائر : مو ما ترد تاكل مو گلتلي جوعان

بحلگه اللگمه وصاح
فقار : ضميلي من اجي اكل

بصائر : اهوووو ،هم اضملك وتبرد

طلعت وراه وبس طبيت تلگتني ميمنة ،سلمت عليها وانا اسألها
_ غاية اجت مو ؟

ميمنة : أي اجت

فقار : نوح هنا ؟

ميمنة : أي فوگ ،بلكت تصعد تگعده لان اليوم ابد ما نزل

فقار : جا بس سويلي درب

ميمنة : طب ماكو احد

من مشى انداريت عليها اسألها
_ تصالحتوا أنت وصخر ؟

ميمنة : لا بس نحجي عادي يعني

_ يعني شني عادي ؟

ميمنة : عادي يعني ،عادي نحجي

_ جا ما راضاج ؟

ميمنة : گالي زعلانه گتله لا وفضت راحت

_ عاد صدگ تحجين ؟

ميمنة : جا شسوي مليت

_ وتضلون هيج بنفس الدائره ؟

ميمنة : جا شني واذا ما ضلينه ؟

_ متزوجين أنتم ترا مو اخوان

ميمنة : عايشين مثل الإخوان وهذا احسن شي

_ خاب اكسبي ميمنة ،أنت شاطره وتعارفين ،مو چنتي تعلميني

ميمنة : الا اخوج انا ما اريدن لا اكسبه ولا افرض روحي عليه

_ ادچن روحي ؟

أبتسمت
ميمنة : لا يمعوده وضيرم وين يطي وجهه

_ اطب جوه احسلي

ميمنة : أي والله

مشيت اطبن جوه وهي وراي اجت ،سلمت على جده جانت گاعده بالصاله وكملت دربي للغرفة بس فتحتها شفت غاية متمدده وامي تعزل بالهدوم المغسوله سلمت وگعدت يمهن وبس شفت صار وكت جية ضيرم گمت

_ انا راح امشي يمة رايده شي ؟

زهرة : لا سلامتج

طلعت اللبس بعباتي ونزل نوح و وراه فقار يحجي
فقار : بزعتني كون ادفرك من الدرج ،شلعت گلبييي .

نوح : كافي فقار لحيت

فقار : أنت لحيت ولعبت روحي ،اشغلك نعاوي خاف تريد تبچي

نوح : اكل تبن

فقار : ايااا طايح الحظ مو اكبر منك

من نزل وشافني واگفه اباوعلهم مسح وجهه يباوعلي مبتسم
نوح : هاي مني هنا اليوم ؟

فقار : مرة اخوي وراح اخذها وياي

نوح : انجب تضل يمنه

فقار : تمشين لو تضلين ؟

بلعت ريگي حايره وهم يباوعلي مركزين بالجواب واحدهم يريد يتشمت بالثاني

_ اريدن امشي لان ضيرم هسة على جيه

ضحك فقار بصوت عالي ونوح لم وجهه يهز بأيده
نوح : كافي وهرش لا تخليني ما اخليها تروح وياك والله

فقار : ماتگدر والله

نوح : لا تحلف وامشوا گبل لا اخبث وياكم

فقار : امشي خوية اخوج صاير طگه ونص

لبست عباتي اباوع عليه حايره من حاله ،حيل متغير حيل ولا چن هذا نوح ،طلعت ورا فقار من مشى وصدگ بس رديت هستوني صعدت فوگ وسمعت صوته جوه ،ركضت رشيت عطر
وفتحت الكنتور اطلع هدومه اعارف أول ما يرد يحب يسبح گبل لا حتى ياكل

انداريت وانا ارسم ابتسامه على وجهي من سمعت صوت الباب انفتح وهو بطوله الماخذ گلبي
واگف گدامي مبتسم يباوعلي ،مشيتله وانا اگولن

_ الله يساعدك

ضيرم : ويساعدج ريشتي ،تعاي

فتحلي ايده ومن صرت قريبه منه جرني لامني بين ايديه ،ابتسمت وانا احسن بيه يجر
النفس من شعري تحركت بين ايديه وهو وخر يرجع خصلات شعري الفتحه ورا أذني ،باس خدي و وخر

ضيرم : ماشي اسبح جيبي الهدوم وراي حبيبتي .

_ صار

مشى هو وانا بساع عزلت الغرفة وبدلت ثوبي واخذتله الهدوم ،اطيتهن اله ونزلت حميت الغده الطابخته عمة وصبيت الي واله وصعدت فتحت الباب برجلي وطبيت ،حطيت الصينية بالگاع
ورفعت راسي اباوعله واگف يتعطر بس خلص گعد وجرني مقربني يمه ياكل ويوكلني وياه ،وبس خلصنه نزلت الصينية غسلتها بساع وصبيتله جاي ورديت صعدت وهستوني طبيت وسمعته يحجي بالموبايل

ضيرم : دمشيله وديله اكل جا المن حاطين المفتاح عدك ،شني نسيت حق هو هذا هم حجي ،ديلا يلا
بساعك

سده وباوعلي ،اطيته الجاي وگعدت اسأل متردده
_ قصدك على هذا رهيب مو ؟

ضيرم : أي ،حاطين المفتاح عد عبد الحق وكل ما سألته وديت اكل للزلمه يگلي نسيت

_ ياا ،جا حرام هسة تلگاه ميت من الجوع

ضيرم : جاي انقهر عليه

_ جا ما تطلعوه ،والله خطية

ضيرم : بيدنه ،غير بكيف جدي

_ حاجوه أنتم

ضيرم : مايفيد ،حاجيته وگال لا تدخل

_ جا لشوكت الزلمه يضل محبوس ؟

ضيرم : من الله يهدي جدج عود بذاك الوكت يطلع

سكتت حايره وهو هم بعد ما حجه ،من خلص الجاي گام غسل ورد ،تمدد وفتحلي ايده ،طفيت الضوه ومشيت لحضنه ،لمني بين ايديه وشوي وحسيت بيه غفه من ثگل نفسه
وانا ماگدرت اقاوم النعاس ونمت ما گعدنه غير على دگة الباب وصوت بصائر تگعدنه

گعدت اللم بشعري وضيرم گام يفتح الباب
ضيرم : هااا خوية ؟

بصائر : جدي وده نوح عليك ،جاين بيت الرباح ويگول خله يجي

ضيرم : خوش ،بس ابدل

نزلت هي وهو اندار علي
ضيرم : هم راح يردون يفتحون سالفة جفون صارت بحلگ الرباح الچان انسدت بعد

يحجي ويلبس بهدومه ،وبساع عدل روحه ومشى وانا لبست حجابي ونزلت ،غسلت وجهي
ومشيت يم ريحانة ،استغربت من ما شفت لا عمة
ولا حواري
_ جا وين عمة وحواري ؟

ريحانة : امي مشتلكم علمود تمشي واجب هي وامج وحواري لحگتها

بصائر : اجتني تگلي انزلي يم ريحانة نغيرلها جو تالي بس نزلت لبست عباتها وطلعت

ضحكت وگعدت يمهن
_ هي هاي حواري شتسوي لا تستغربن

بصائر : لا مو جديده علينه

ضلينه گاعدات نسولف وكل تفكيرنه بيت الرباح صدگ جايين على سالفة جفون بس الموضوع الاجو بي ابد ولا واحد بينه مفكر بيه ..! !

°حواري°

اخذ ليث الجاي وطلع ،وانا بس شفته طب للديوان مشيت على اطراف اصابعي وراه ،ما تقربت من الشباك حيل حتى لا واحد يشوفني وهم اكل رزاله

الرباح : شصار على سالفة بت منير يابو محمد ؟

رأجس : الحال مثل ما هو ،البت تزوجت وسالفتها بعد انسدت

الرباح : وهيج بكل بساطة ؟

محمد : جا شتريدنه نسوي عمي ؟

الرباح : أنت لا تحجي گلبي محمل عليك

رأجس : اشرب جايك هسه خوية ،واحجيلي شني الموضوع الگلت جاي علموده ؟

سكت شوي وگال
الرباح : انا اعارفك ما راح تردني

رأجس : افاا ،تشلع عيوني الثنين

الرباح : انا اريدن مرة منك للأرحب

رأجس : گبع واخذ

الرباح : لا ماكو گبع واخذ هو گالي بت منو يريد

°ليث°

رفعتله حاجبي وخزرته ومن باوعت على الولد لگيتهم كلهم خازرينه والولد دنگ
رأجس : مني ،گلي ياهي واطيكياها بثوبها .

الرباح : بت باقر

كلمتين خلت الديوان كله يسكت ،بس من بيناتنه هو جان بصفي سأل وعينه على الرباح
عبد الحق : ياهي منهن ؟

باوعله ورد باوع لجدي
الرباح : شگد عده باقر بنات ما معرسات ؟

رأجس : بس وحده

الرباح : أي جا هي

ضيرم : بس أختي بعدها زغيره ،وتداوم مدرسة

الرباح : أي عود تداوم يمنه

اندار على عمي ما راضي
ضيرم : بوية

اشرله يسكت ،وانا لا اردايا انداريت على الگاعد بصفي وما ادري چنت گاعد
بصف بركان ساعة الساعة ينفجر ويحرگ الوادم

الرباح : هااا ياخوي ،تطيني المره للأرحب ؟

رأجس : اذا مو للأرحب اطي منو الاحسن منه

الرباح : المعنى ؟

رأجس : اطيتك خوية

حطيت ايدي على رجله من حسيت بيه شي غريب وراح يلوصها علينه
الرباح : جا انا باجر اوديلكم النسوان يتفقن والجمعة الجاية نعقدلهم

باقر : بويه غير تشوف ولد عمها ،خاف واحد منهم يريدها

رأجس : مابيهم احد حجه ،يعني تطيها الأخوي والارحب مايفرق عنهم زلمة والنعم منه ومتاكد يصونها

هيج بدون سابق انذار شمر حجايته مثل القمبله بنص الديوان
عبد الحق : بت عمي انا اريدنها ،وتعذرنه شيخ بس انا اوله بيها

انداريت عليه فاك حلگي والولد كلهم انضارهم صارت عليه ،باوع على عمي باقر
عبد الحق : ما اريدن انهي واغلط ،بس عمي بتك الي ماتصير لغيري

باقر : تگبع وتاخذ بعد عمك

محمد : اعذرنه عمي بس شفت ابن عمها يريدها

سدوها بوجه الرباح ماگدر يحجي شي وگام يريد يمشي
رأجس : خوية لا يصير بخاطرك بس أنت تعارف بالعادات عدنه ابن العم اوله

الرباح : لا خوية حگ هو الاحق بيها

°غاية°

طبت حالها حال ،وجهه صاير اصفر ،استغربت وانا اشوفنها هيج ،اسألها شبيج وهي ما ترد بس صافنه وفاتحه عيونها ،وما طول أستغرابي من مشى الرباح وطبوا
عبد الحق : هسة عليش هرجت الامه ؟

عزيز : ما اطيها الك والله ،وگول ما گال عزيز

عبد الحق : مو بكيفك

صيح
عزيز : جا بكيفن

رأجس : كافي عزيز ،ابن عمك تراه مو غريب وراد اختك

عزيز : زغيره بعدها ،ما اطيها لا اله ولا للغريب

ضيرم : كافي عزيز

عزيز : راضي على الصار ؟

ضيرم : ابن عمك ما نلگه الاحسن منه ،جربنه الغريب وشفت شصار

عزيز : انا ما راضييي

عبد الحق : ما ماخذها منك ،عمي ولي امرها

محمد : كافي مناگر عيب عليكم ،وهاي أنتم الصحبان

ضيرم : جا هو منو يخرب الصحبه غير النسوان ،چن هذاك الواحد عاداني من خطبت اخته

صخر : ساكتلك بمزاجي

عبد الحق : حظروا روحكم الجمعة الجاية اعقد

رأجس : شو بكيفك تقرر ؟

عبد الحق : جا جدي مو رضيت أنت ؟

رأجس : أي بس مو هيج اطينه درب .

عبد الحق : جا اربعت ايام ما يكفن ؟

يوسف : صارت الك ،عليش نستعجل بعد

ليث : خاف تطير من ايده لو يخطفها الرباح

ضيرم : انجب ليث

ضحك وسكت ،وكل هذا وهم بالحوش ،وبس طب نوح سألته
_ مني هاي الرايد يخطبها حق ؟

أشر على حواري الواگفه وراي
نوح : حواري الجنة ،طلع يريدها العكرة

فتحت عيوني مصدومة
_ عليك الله

نوح : أي والله ،هاي شبيها تريد تموت ؟

انداريت اباوع على حواري وراي ،چن واحد روحه جاي تطلع ،ركضتلها بخوف
_ حواري ،شبيج ،حاجيني .

كضت ايدي ترجف وما طلعت من حلگها غير حجاية وحده
حواري : ماريده

وهو من وراي يگلها
نوح : والله حگج ما ينجرع

كضيت وجهه بأيدي الثانية
_ بس كافي ترجفين ،حواري شبيج ،حواااري

صحت اسمها بخوف من طاحت بايدي رايحة روحها
على اثر صوتي طب ضيرم يركض و وراه عزيز ،جرها من ايدي يضرب على وجهه وهي فاقده كلش
بجيت بخوف من شالها عزيز وطلع يركض وضيرم گدامه اخذوها للمستشفى

كضني من ايدي
نوح : هااا راح تطيحن أنت هم ؟

ابجي واحجي
_ شفت عيونها تگلبن والله

غضة : خااايبة وينج ،ولج غاية شصاير ؟

_ هااا جده

غضة : تعاي ولج مابي اگومن

غسلت وجهي ومشيت للصاله ،بس جده گاعده ميمنة يم اهلها وعمة نجوى وامي طالعات
واجب اخذهن فقار بسيارة صخر وما ضال غير بس انا وجده وحواري ضلت يمي

غضة : شصاير ،شبيها حواري ؟

نوح : تخربطت لان خطبها حق

غضة : يااا ،حق خطب حواري ؟

نوح : أي والله جده ،اضن يحبها

غضة : جا اذا ما يحبها شعده خاطبها

نوح : احفادج خوينسين

غضة : وأنت واحد منهم

جر نفس وسكت وانا كل بالي يمها ،ردت أمي وعمة ماشية لبيتهم ،وهم بعدها ما راديها ،وطر الليل الا اجه نوح گال اجوي ،من شفت امي لبست عباتها تريد تمشيلهم ركضت انا لبست عباتي ومشيت وياها وجده مشت گبلنه بس طبينه من للمطبخ صار بوجهي عزيز يريد يطلع
نزل رأسة ومشى يكمل دربه وانا بس شفت بصائر سألتها

_ حماتج جوه ؟

بصائر : مرت اخوي قصدج ،اي جوة

أبتسمت حايرة من حالها الشفته
_ چنها ما تريد اخوج

بصائر : حسيت ما تريده

_ وشلون ؟

بصائر : ما اعارف والله ،بس ما اضن حق يعوفها

_ هاي خبله لا تروح تسوي مثل جفون

بصائر : ما ناهي عليها

_ گال نوح ،بس يريد يعقد الجمعة

بصائر : يااا فلك

_ أي والله

بصائر : اندري منين طلعلنه الرباح ،طبي شوفيها حجاية وحده ما حجت من اجت لهسه

_ مصدومة

بصائر : هو گايل الهم الدكتور طايحة اثر صدمة

_ والله تردين الصدگ حتى انا انصدمت

بصائر : واحنا ضالين يوميا مصدومين وي الوادم

_ ولج ابد ما توقعت حق وحواري ابد ابد ،احس اريد اصدگ ما اگدر

بصائر : ولا انا توقعت ،اخوي صعب وحواري شي ما يشبه شي

_ اسبوع يرادلنه الا نستوعب

بصائر : جا الله يساعد حواري على الصدمة اذا احنا اسبوع استيعابنه

ضحكت وحطيت ايدي على حلگي من شفته رد طب
بس اختفى من گدامنه سألتها

_ هذا شبي راح ينجلط ؟

بصائر : ولج يصيح ما اطيها ،واليسأله ليش يگله زغيره وحق عصبي

_ صح ترا

بصائر : حظ وبخت أخوي روحة بطرف خشمة

_ دتعاي نطب ،اشوفنها وارد وراي اصعد انضف غرف الولد

مشيت انا وياها لغرفة البنات ،واول ما طبينه شفت جده گاعده بصفها تقنعها
غضة : خايبة أنت الشبر ونص حق يريدج وما تردلي
وين صاحلج مثله

وهي ساكته ما تجاوب
غضة : والله زينت البنات ترضى بي وأنت تتعيقلين متعافيه

جرت نفس وباوعت لجده
حواري : شوفيله زينت البنات ،انا ما اريدنه جدة ويني وين الزواج

غضة : اختارج بعد هو انا شبيدي ،وشني وينج وين الزواج عمرج دک السبعطعش مو زغيرة

سكتت الدمعة تفتر بعينها بس ما تبجي ،تحمدتلها بالسلامة وطلعت اردن للبيت ،الولد بره كلهم مأمنه وحدي ،اخذت كلشي احتاجة وصعدت انضف غرفهن بديت بغرفة ليث وبس خلصتها حولت لغرفة نوح

رفعت شعري اعزلها گبل لا اكنس ،شلت النزله اغيرها اريدن ،ومن دنگت استغربت وانا اشوفن بطل ،مديت ايدي جريته من جوه الچربايه
ومن شميته حسيت روحي طلعت ريحته تكتل ذبيته بالجيس مال زبل وانا ادردم وي روحي لعبانه نفسي

كملت تنضيف ونزلت ،و وي نزلتي طب نوح و وراه صخر ،نزلت الغراض من ايدي وانا اگله
_ نوح لگيت جوه الچربايه بطل عصير خربان ذبيته ،چن صاير اكسباير شلون تشربه ...

ستموت نادما بكل الأحوال
ربما بسبب ما فعلت
وربما بسبب ما لم تستطع
فعله

الحظ الا گدام صخرررر

حواري وحق ؟

تتوقعون راح ترضى بحق ؟

زين ومشاعرها ل ليث ؟

هيوفة وضيرم للأبد ابقى احبهم

كوكبة وياقهر كوكبة تتوقعون هيج نهاية قصتها هي وليث ؟

بركة اتمنى بعد الصار صدگ تابت وما تطلع


شكرا لزيارتكم عالم روايات سكيرهوم

تعليقات