رواية رحيلها مميت الفصل الثالث
طلع محمد ورا ميرنا وقفل باب شقتُه عليهُم.. قعدت ميرنا على الكنبة ضامة كفين إيديها وساندة عليهُم دقنها وهي بتهز، رجلها بعصبية.
كان عارف إنها لسه مهديتش، قرب منها بهدوء وقعد جنبها وهو بيقول: بـ رأيي كفاية لغاية إنهاردة مشاكِل، نريح أعصابنا بقى؟ قوليلي تحبي تاكلي إيه؟
رجعت ميرنا ضهرها لـِ ورا وقالت بتعب: مش جعانة.
بان على ملامحُه الضيق فـ قالت بسُرعة: ومش قمص والله بس عارف إنت نفسك إتسدت، مش عارفة.
سند راسُه على ظهر الكنبة ومسك الريموت يشوف التليفزيون وقال: خلاص يا حبيبتي وأنا كمان، ولو جوعت هقوم أعملي ساندوتش وأمشي الدنيا.
صعب عليها ونسيت اللي حصل وركزت في حاجة واحدة، طول النهار في الشغل ومأكلش حاجة وأكيد جعان، فـ إبتسمت وقالِت: فاكِر مطعم المشويات اللي جبتلنا منُه ساندوتشات الطرب؟
بص ليها بإنتباه وقال: أه، دا حاتم كان قايلي عليه وجربناه سوا، نفسك تاكلي حاجة من عنده؟
رفعت أكتافها بإستسلام وقالت: يعني، إتنين طاجن رز معمر كدا وربع طرب هيبقى أكلة حلوة بعد اللي حصل.
خرج الفون من جيبُه وهو بيدخن من سيجارُه الإلكتروني وقال: عينيا، حاجة تاني؟
ملست على كتفُه بحنان وهي بتقول: لا يا حبيبي، هقوم أحُط الحاجة الساقعة في الفريزر تبقى جاهزة جنب الأكل.
باست كتفُه وقامت وسابتُه يطلب، كانت عاوزة تعمل كيكة وقالت هتتحط في الفرن مش هتاخد وقت، وقفت تعملها عشان تلهي عقلها يفكرها باللي حصل ويضايقها، وفي نفس الوقت تعوضُه عن يومُه السيء دا.
حطتها في الفُرن وخرجت قالتلُه: ها يا حبيبي قالك قُدامُه قد ايه؟
محمد بهدوء: ساعة بالظبط، طلبت لأمي كمان زينا.. مينفعش يا حبيبي ناكُل حاجة وهي متاكُلش منها.
إبتسمت ميرنا بتعب وردت: وماله يا محمد، والله ما بكرهها ولا بتدخل بينك وبينها، هي اللي..
محمد بإنهاء للحوار: خلاص بقى مش هنفتح تاني في اللي فات أظُن رد فعلي إنهاردة كان وافي.
حركت راسها بهدوء وقعدت جنبُه، حاوطت بإيديها دراعُه وحضنتُه وهي بتنام على كتفُه، بتحبُه جدًا، ومش قادرة تنسى اليوم اللي إتعرفت عليه فيه وإزاي لفت إنتباهها بكاريزمتُه وشخصيتُه، وشكلُه كمان!
الكيك إستوى وسمعت صوت تنبيه الفُرن انُه خلص، قال محمد بإستغراب وهو شايفها قايمة: إنتِ حاطة حاجة في الفُرن ولا إيه؟
ميرنا وهي بتضحك ورايحة للمطبخ: لا متقولش مش شامم!
محمد بإستغراب: شامم ريحة حاجة بس قولت يمكن من برا، عاملة إيه؟
ميرنا بصوت عالي من المطبخ عشان يسمعها: كيكة ڤانيليا تستاهل بوقك.
ضحك وهو بيقولها: يا سيدي، هكلم الدليفري أشوفه فين.
إتصل على الدليڤري مفيش رد.
خرجت ميرنا من المطبخ وهي شيفاه مركِز أوي في الفون فـ قالتلُه: مالك؟ الدليڤري هيتأخر ولا إيه؟
محمد بتنهيدة: لا هو مبيرُدش أصلًا!
فضل يكرر الاتصال وميرنا بتهديه وتقوله إن شاء الله خير.
رد عليه في الأخِر بـِ صوت متضايق: ألو.
محمد بعصبية: هو إيه اللي ألو؟ مفيش رد ومستني الأكل بقالي ساعة، أنا هشتكيك للمطعم!
الدليڤري بضيق: يعني يا باشا الست الكبيرة تغلط فيا وتقولي خد أكلك البايظ وإمشي مبناكلش من برا، وأرجع بالأوردر للمطعم، يحاولوا يتصلوا بيك مشغول، كمان متصل بيا تتعصب! هي أرزاق الناس لعبة!
محمد بصدمة: ست مين!
الدليڤري بضيق: الست اللي فتحتلي البوابة من قبل ما أضرب الجرس أصلًا وهاتك يا غلط.
كور محمد إيدُه التانية بعصبية وقال: لا هات الأوردر هنزل بنفسي أستناك على ناصية الشارع أستلمُه منك، وهراضيك والله حقك عليا الحاجة بس تعبانة، ولو أكلكم بايظ مكونتش طلبت بس اللقطة دي عندي أنا.
الدليڤري بهدوء من ذوق محمد: يا باشا على راسي والله، خلاص نُصاية وأكون عندك، في أمان الله.
قفل محمد المُكالمة وقام من مكانُه وهو بيخبط الترابيزة برجلُه وقع المبخرة والمزهرية والحاجة.
غطت ميرنا بوقها بإيديها وهي عرفاه كويس لما بيوصل للمرحلة دي.
جريت وراه وهي سادة باب الشقة بضهرها وبتقول: محمد راعي إنك هتتكلم مع والدتك وأي حاجة هتقولها وقت عصبيتك هتاخُد عليها ذنب، عشان خاطري أنا إهدى.
حاول محمد يسحبها من دراعها وهو مغمض عينُه وقال: وسعي بس كدا على جنب.
إتحركت على جنب وهي بترجع مكانها تاني وبتحُط كفين إيديها على صدرُه تهديه: طب عشان خاطري أنا إهدى بس أنا خايفة عليك.
بدأ يزعق بإنفعال هستيري وقال: راجل في مركزي بقى شكلي زي الزفت قُدام أهل المنطقة وأي حد بيزصلي دليڤري سواء مطعم ولا سوبر ماركت، ليه عشان أمي فضحاني!
وفجأة..
