رواية شجن القلوب الفصل الثاني
و ذهب علي لشقتهم
عند شجن كانت تصور الأشياء التي جلبها علي لها كعاده اي فتاه و هي تبتسم ابتسامه بلهاء و نزلت ستوري للحاجات الي علي جابهالها و نزلت استوري و كتبت(تمت الرشوة بنجاح )
عند علي دخل بيتهم لقاه فاضي لان مامته لسه عند شجن
دخل اوضته و أخد شاور و غير هدومه و فتح تليفونه فشاف استوري شجن ضحكت على الي كتبته و قال
_البت دي بتجيب الكلام ده منين
" في اليوم التاني "
صحيت شجن من النوم بدري و قبل ما تقوم من على السرير قالت
_جود مورنينج شاهندا
و بعدين غسلت وشها و أسنانها و صلت الصبح و خرجت للمطبخ تشوف مامتها فين لقيتها قاعده مع خالتها بيجهزوا الغدا
_ايه ده انتوا لسه قاعدين ده انا نايمه و انتوا هنا
فاطمه:
_انا مشيت بعد ما نمتي بشوية و صحينا بدري عشان نخلص قبل ما ييجوا
_طب انتوا فطرتوا و لسه
سميرة:
_احنا فطرنا مفيش غير انتي و علي استني اما يصحى تاكلوا سوا بدل ما نجهز الفطار كذا مرة
_ماشي
راحت شجن تنادي علي من البلكونة
_يا صباح الرعب
الساعه سته
و على المقيمين خارج مدينه الرعب المحافظة على فروق التوقيت
درجه الحرارة في الضل 25و ده كويس عشان الزواحف او الكسل في السرير
اصحى ياا عــــــــلــــــــــي
علي بداخل الغرفه
=كان يوم أسود يوم شوفتك يا شيخه
_يا لولا يا ابن العم ثكلتك أمك إستيقظ يا غلام الأمه تحتاجك
=أهي قلبت على المتنبي أهي
زهقت من كتر ما نادت عليه و قالت بتذمر
_والله لو ما صحيت هاكل لوحدي هاه انت حر
سمع علي تذمرها لينهض من على السرير و يخرج للبلكونه بشعر غير مرتب بسبب النوم و مش قادر يفتح عنيه بصتله و قالت بسخرية
_ماشاء الله ايه الطاقه الي على الصبح دي هتتحسد كده مالك متنح كده اكيد بتفكر ازاي القمر موجود الصبح
=لا بفكر ازاي ارميكي من البلكونة من غير ما تصرخي عشان مصدع
_و تفكر ليه يا لولا كنت تقولي و انا ما اعملش صوت
=معلش بقا المرة الجاية
قالت بجديه
_علي
=نعم
_تعالى اقولك على حاجة بصوت واطي عشان انت مصدع
قرب علي بهدوء لتصرخ في أذنه بصوت عالي
_تووووووووت
ليضع يده على اذنه لتجري للداخل قبل ان يأتي خلفها
=يا بنت المجنونه
جلست على السفرة تنتظره ليفطر لتجده لابس ترينج أسود و بيسرح شعره بايده و بيبصلها بتوعد
سميرة
_تعالى يا حبيبي افطر الااكل جاهز اهو
نظر لشجن بتوعد و قال
=مش جعان يا خالتو اكلت توت
_توت؟
=اه كنت بحلم اني باكل توت ما تركزيش بص حواليه
=هي ماما هنا صح
_اه يا حبيبي جوه في المطبخ
=ماشي يا سوسو انا هروح آكل قبل ما بنتك المجنونه تاكل الاكل
شجن من بعيد
_سمعاك على فكرة
بص لخالته بنظرة شوفتي فربتت على كتفه بمعنى ربنا يعينك
علي راح قعد على السفرة لقاها بتشرب شاي بلبن فاخد الكوبابه من قدامها و شرب منها
_دي كوبايتي قوم جيب لنفسك من جوة
=ملكيش فيه
_مليش فيه ايه دي كوبايتي
=حد قالك ما تجيبيليش معاكي
_و انت إتشليت
بصلها علي باستنكار فبصتله بنظرة عابسه
=خلاص يا ستي الكوباية اهي
علي قال كده و بعدين قرب الكوبايه ليها و كان شكله تعبان
_خلاص اشرب ان شاءلله ما حد حوش
قالت و قامت دخلت اوضتها و رجعت تاني معاها دوا للصداع و ميا اديتهوملي و شربهم
ابتسم علي بارهاق و قال
=ايه يا شلبي الحنيه الي نزلت عليك فجأه دي
_طيبه قلبي دي هي الي مشندله حالي
=يا راجل
أومأت له بتأثر كانها حمامه سلام و رمزا للمحبه و الطيبه
=طب حوشي جناحاتك دخلت في عيني
بصتله بقرف و كملت أكل
و بعدين ما خلصت دخلت الاطباق و سألت مامتها ان كانت محتاجه مساعده و قالتلها انهم قربوا يخلصوا
رجعت الصاله و قالتله انهم قربوا يخلصوا
و هو راح بيتهم و هي دخلت اوضتها تقرأ الأذكار و تقرأ سورة الكهف لانها مش هتبقى فاضيه انهاردة تقرأها
عند علي
صلى الصبح و بعدين مسكت تليفونه لحد ما الأذان يأذن بعدها بشوية قام اخد شاور و الأذان أذن فاتوضى و نزل عشان يصلي و يسمع خطبه الجمعه
عند الشجن دخلت اتوضت و صلت و بعدين لبست فستان بيج و طرحه لونها بني و عملت بلاشر خفيف و ليب جلوس وخرجت تستقبل عماتها و زوجات أعمامها سلمت عليهم و قعدوا يستنوا الرجاله ترجع من الصلاه قعدت شجن جمب جدتها و خالتها
عمتها كوثر بصتلها و قالت لها
_ازيك يا شجن يا حبيبتي عامله
_الحمدلله يا عمتو
فبصتلها عمتها بخبث و قالت
_مفيش حد كده ولا كده يا بت يا شجن
_كده ولا كده مين يا عمتو
_حد كده بتحبيه انا عمتك و ستر و غطا عليكي
_لا يا عمتو ما بحبش حد
ادارت عمتها وجهها و قالت
_كل البنات بتقول كده و في الأخر تلاقيها مرتبطه بواحد وبتكلمه
كانت شجن سترد عليها لولا ان خالتها أشارت لها تسكت
_انتي يا خالتو مش شايفة بتقول ايه
_معلش الست في بيتكم و ليها احترامها
زفرت شجن بضيق و بعدين تجاهلتها
عمه شجن جيهان
_الا صحيح يا بت يا شجن انتي بقيتي عندك كام سنه دلوقتي
شجن في سرها
_صدى صوت عمتي كوثر اشتغلت
_23يا عمتو
_و كل ده ما فكرتيش تتجوزي
ردت ابنه جيهان التي تسمى أميرة قالت بسخرية
_أصل شجن يا ماما عندها احلام عاوزة تحققها
جيهان
_أحلام إيه احنا عندنا الست
ملهاش غير بيت جوزها
كوثر
_ما هي بنات اليومين دول متدلعين كده لهما دول هينفعوا في بيوت
شجن باستفزاز
_ماهو انا مش هطبخ او اروق هخليه يجيبلي شغاله اخاف على ضوافري
شهقت عمتها شهقه مبالغه بيها
_ليه يا حبيبتي انتي مكسحه ولا ايه ما هو ده من دلع امك ليكي ما صحيح اقلب القدرة على فمها تطلع البت لامها
_و مالها امي يا عمتو ماشاء الله ست متعلمه و مدرسه في مدرسه و مهتمه ببيتها و عيالها و مش بتدخل في حياه حد و في حالها يااه لو كل الناس تبقى زيها كده كنا بقينا أحسن دولة في العالم
كانت سترد عمتها عليها لو دخول للرجال
سلمت شجن على اعمامها و حضنت جدها الي بيفضلها دايما من بين جميع أحفاده
_حبيبه جدها عامله ايه
_الحمدلله يا جدو
_يستاهل الحمد
استأذنت من جدها و بعدين دخلت عشان تجهز السفرة مع مامتها
و بعدين نادتلهم عشان يتغدوا
شجن ما كانتش طايقه تاكل معاهم بسبب تعليقاتهم الغريبه لاعتذرت عن الاكل بحجه بطنها وجعاها ووقفت في البلكونة لحد ما يخلصوا فبعدها بشوية سمعت صوت خطوات حد جاي بصت لقت مالك ابن عمتها كوثر
كانت هتستأذن و تدخل بس قالها
_استني يا شجن انا عاوز اتكلم معاكي في موضوع
_اتفضل بامالك بس بسرعه من فضلك مابنفعش وقفتنا دي
_حاضر والله
مالك اترددو بعدين قال
_شجن انتي عارفه اني اتوظفت في شغلانه كويسه وو متخرج من هندسه و الحمدلله و عندي شقتي في بيت العيله
_ماشاء الله ربنا يزيدك عاوزني احسدك يعني ولا ايه
_شجن انا معجب ب…
قاطع كلامه صوت علي
=شلبي يا سلبي ابوكي بينادي عليكي شكله عاوزك في حاجه مهمه
_حاضر هروح اشوفه بعد اذنك يا مالك
وقف علي جمب مالك فمالك بصله بغيظ و قال
_انت كنت قاصد تناديلها دلوقتي
=و انا هبقى قاصد اعمل كده ليه
_علي ما تستعبطش انت عارف انا قصدي ايه
علي بصله ببرود و قال
=طب حلو طالما انا و انت عارفين قصد بعض فهقولك على الناهيه مالكش دعوة بشجن عشان ما ازعلكش
_أنت عبيط و أنت مالك انت و تقولي كده بصفتك مين
=ما يخصكش اسمع الكلام زي الشاطر كده
_علي اتكلم كويس
=ما انا بتكلم كويس اهو لحد دلوقتي معرفش بعد شوية هيحصل ايه
و مشى و سابه و قصد يخبط كتفه بكتف مالك
عند شجن
_نعم يا بابا حضرتك ناديت عليا
_لا يا بنتي مة نادتش
_اومال علي بيقولي انك بتنادي ليه
_ممكن بيهزر معاكي ما انتوا زي العيال الصغيرة
شجن بصت لقت علي واقف و بيبصلها ببرود استغربت منه و جت تكلمه لقيته مشي بصتله باستنكار و بعدين قعدت جمب باباها و كانت متضايقه و حاولت تتجاهل كلام عمتها و فجأه لقت ابن عمتها جيهان الصغير كسر صورتها الي كانت متعلقه
عمتها كوثر
_كده يا بودي تكسر الصورةكده مرات خالك تزعل
سميرة
_خلاص يا كوثر عادي الحمدلله انها جت على قد كده
جيهان
_قولها أسف يا بودي
بودي بمنتهى الرخامه
_لا
جيهان ضحكت و هي بتقول
_يخيبك يا بودي
شجن ابتسمت ابتسامه لم تصل لعينها و قالت بهمس
_نفسي الناس تربي عيالها
سميرة
_طفل ربنا يهديه
جيهان
_ماشاء الله عليكي يا سميرة طول عمرك قلبك طيب على العيال مممن عشان ربنا ما كتبلكش تجيبي عيال بعد شجن
سميرة سكتت و شجن بصتلها و ردت
_نصيب يا عمتو انا بشوف تخلف طفل واحد و تربيه أحسن من دسته عيال و ما تربيهومش و تطلقهم على البشر بصراحه ده رأيي ولا ايه يا عمتو أصل أغلب العيال دلوقتي بقوا صعبين و اهلهم بيضحكولهم فلو طفل واحد متربي أحسن من دسته من غير رباية
جيهان سكتت و بلعت ريقها و كوثر بصت لشجن بضيق
أميرة
_ايه يا شجن بقيتي مثقفه
_اهو اتثقف بدل ما تبقى عيني في حياه الناس
_قصدك ايه
_اوعي تكوني اخدتي الكلام عليكي ليه انا بتكلم عموما كل ده كان على مسمع و مرأى من علي
الي كان بيبصلها بفخر و و بعد عينه عنها لما بصتله
بعد العشاء و بعد ما كله مشي
شجن دخلت اوضتها غيرت هدومها و لبست اسدال ووقفت في البلكونه لقت علي دخل بعدها كانه بيستناها و بص قدامه و ما بصلهاش اتكلم ببرود
=انتي ايه موقفك مع مالك لوحدكوا في البلكونة و كلنا جوة
شجن بصتله باستغراب من طريقته
_عادي ما كانش فيه حاجه كانت صدفه
=صدفه اه و الصدفه تخليكي تفضلي واقفه معاه ولا تدخلي جوة
_في ايه يا علي انت بتتكلم كده ليه
=ردي على قد السؤال
قال ببرود
ردت عليه بغيظ
_ارد على ايه انت مش شايف طريقتك و على العموم انا دخلت البلكونة لاني ماكنتش طايقه اقعد مع حد و اتفاجأت بمالك و كنت هستأذن و ادخل لولا انه قالي انه عاوز يتكلم معايا في موضوع و اتكلمنا شويه صغيرين و انت ناديت عليا فروحت اشوف بابا
=اتكلم معاكي في ايه
_هو تحقيق ولا ايه
رد عليها بتحذير
=شجن
_علي انا هدخل انام
=استني هنا
زعق لها و قالها
=مش هتمشي غير اما تقوليلي انتي كنتي بتتكلمي مع الواد ده ليه
شجن اتعصبت و قالتله
_مالكش دعوة يا علي و ما تتكلمش معايا
قد يبدو كلامها قوي بس كانت بتقولها صوتها مخنوق من كتم العياط
=يعني لما اشوفك و كل العيله موجودة و انتي و الزفت ده الي مش موجودين و ألاقيكم واقفين لوحدكم بعيد و البيه عمال يدردش معاك و انتي واقفه مش ممانعه دي مش حاجه تعصب و تضايق
_اولا انا ماكنتش واقفه احب فيه ثانيا انت تتعصب ليه أصلا
= شجن اتكلمي كويس ايه تحبي فيه دي
_علي انت عاوز ايه من الأخر
=الواد ده قالك ايه
_قعد يقولي انه عنده شقه في بيت العيله و انه اشتغل في شغلانه كويسه و فقلتله ربنا يباركلك فيهم فقبل ما يتكلم انت جيت
=و انتي ما لاحظتيش حاجه من الكلام ده
شجن و هي بتتظاهر بعدم الفهم
_حاجه زي ايه
علي بصراخ و غضب
=البيه عاوز يتقدملك
شجن
