رواية خلخال مشوه الفصل الثلاثون بقلم زمرده
كلمة وفي صارت قديمة
خل تفتهم روحي الغشيمة
شافت حزن حايط سجن
ماريد أحن صارت قديمة
°حواري°
شيخ واحد : وحده بوحده ،يطلع جعفر وتطونه رهيب والصار بهل يومين فصلهن عدي
فتحت عيوني بين المصدومه والفرحانه ،رفعت ايدي ادعي جدي يرضى ورديت اتقربت من الشباك من
ما سمعت رد وهدوء صار وماكو غير بس صوت شيخ واحد كسر هذا الهدوء يزيد على كلامه
شيخ واحد : اضن كافي حفيدك يا أبو محمد يضل بالسچن ،وكافينا زلمتنه عدكم
رأجس : وشني اليضمن لو اطيتكم ابنكم يطلع حفيدي ؟
شيخ واحد : تعارف حجايتي سيف على رگاب كل چبير وزغير من أل عبود
°ليث°
باوعله جدي ما مقتنع واندار يباوع للرباح من گال
الرباح : طلعوا ابنه ونطيكم ابنكم وغير هل حجي
ما عدنه
شيخ واحد : هاي هي يجرالكم
يوسف : شوكت تطلعوه ؟
شيخ واحد : بس نتأكد زلمتنه العدكم بخير
طفه چگارته بالنفاضه ومن حجه توجهت العيون
كلها عليه
صخر : ابنكم بالحفظ والصون ،سلمونه جعفر نسلمكم رهيب
غازي : ليش نكرتوا هو عدكم طول هاي المده ؟
رأجس : اللوع گلبك عليه
غازي : ما كافيك صرت السبب بموت ابوه ؟
رأجس : مو سبب لا تضل تحطها برگبتي
غازي : لا سبب ،اجيتك توسلتك ،عاندت وركبت راسك وحتى بتي ردت تشمرها علي وهسة ما اعارف گاعها وين ،لشوكت تضل تحس روحك الصح بكلشي وأنت بس الله وحده يعارف بيك شني من بشر
رأجس : انا گلتلك البت الابن عمها
نتر ضايج
الرباح : كافي لا تفتحون الماضي
گام ينفض عباته وگبل لا يطلع اندار
غازي : لا عبالك انسى سوايتك ،انا بسببك دفنت زلمة يسواله عشيره وتيمت اولاده وخطيتهم رگبتك أنت
ما حجه شي جدي وطلع غازي ولحگوه كل الجاين وياه ،حطيت المخده بحضني اباوعلهم مطفي والله هسة كون انامن وطز بالفصول وهاي الگعدات
الرباح : جا شو مشى واحنا ما مخلصين الگعده ؟
شيخ واحد : فضوا سالفة رهيب وجعفر والنا گعده ثانية
رأجس : ودوست البيت ؟
شيخ واحد : حلها عدي
رأجس : اسمعني كلش زين و وصل كلامي الهم ،اذا ما اجه أبن الجسار واعتذر على دوست البيت احنا كتاليه وگول ما گال ابن الغضب
شيخ واحد : شني سمي بسم الله ،مو مال كتل
رأجس : جا دوست بيت بيه بس نساوين ترديني هيج اعبرها اله بالهين
محمد : يا شيخ ترا السواه ابنكم لا چبيرنا ولا زغيرنا سواه ،سوايته زحمة حتى تنحجي
صخر : الزلمة يگابل زلم يهددهم اذا هو طالع من ضهر زلمة ،بس الظاهر حفيدكم زلمة نص ردن ورجوليته على گده
خزره أبوي ما راضي على حجيه ،وهو خله وطلع من الديوان اليوم كله خلصها مصايح علينا ويلوم لان ضال البيت فارغ مابيه زلمة ،كرهنا بعشيتنا من جهه هو ومن جهه ثانية جدي
گام شيخ واحد وكلنا گمنا
شيخ واحد : انا ماشي ، بعد ما تردلكم زلامكم النه گعده ثانية
الرباح : هاي هي
طلعنا وراهم للباب ،مشوا واحنا ردينا للديوان
°حواري°
طبيت اركض وأصيح طايرة من الفرحه
_ عمة شيماء ،عمة
وگفت ايدي على گلبي وهي وگفت على حيلها تسأل بخوف
شيماء : هاا ولج شكوو ؟
_ عمة باجر يطلع جعفررر
نشغت وصاحت ،وعماتي والبنات كلهن التمن على صوت صيحتها
شمياء : عليج الله
_ والله ،انا سمعت اتفاقهم ،باجر يطونه جعفر ونطيهم رهيب
كضتني من ايدي ما مصدگة
ميمنة : يعني جعفر راح يطلع
هزيت راسي ودمعت من عله صوت بجي عمة
_ أي والله أي ،راح يطلع باجر يتنازلون على الدعوة
حطت ايدها على گلبها وطاحت دموعها تباوع لعمة
ميمنة : يمة راح يطلع اخوي ،يمة راح تشوفيه يمة
مسحت عيونها عمة بين التضحك والتبچي هزت رأسها ب أي ،اندارت على صوته دگ باب المطبخ وصيح
عبد الحق : شكو شني هاي الهوسة
زهرة : تعال طب عمة
شوي واجه وگف گبالنه ،هز ايده
عبد الحق : ليش تبچن ،منو مات ؟
غضة : خايب اسم الله ،بس فرحانين لان راح يطلع اخوك
اندار بساع علي رافع حاجبة ،رمشت بعيوني من گال
عبد الحق : أم العلوم گالتلكم ؟
غضة : أول مره احبن بشارة تجيبها حورية
عبد الحق : بعد هي أم البشارات
غضة : خايب شبيك وياها ،چا مو زين فرحتنة
عبد الحق : جده ما متوازية توگف بره وساعة الساعة شايفها احد
غضة : جا هذا طبعها شنسويلها
عبد الحق : انا ابطلها منه
_ والله چذاب مو گلتلك خل اسمع ما حجيت شي
خزرني وجده ضحكت ،اندار عليها يخوزر وانا ضليت جامده ،شني يعني جفصت لو شكو ،شبيه عيونه صارت بگصته وخله وطلع ،وجده ابد ما گدرت تضل ساكته بلايه ماتحجي
غضة : يسوي روحه ما عاجبته سوالفها وهو راضي يخليها تتسنط
شيماء : ما تعارفينه شنكه وما يحب يطي بروحه
غضة : خايبة تحجين الحگ ،والله صدگ شنكه وما راح يغيره غير حويريه
_ شني جده شدخلها حويريه ؟
غضة : جا غير راح تصيرين مريته
صحت
_ جاا مو اگولن اناا ما راضييه
غضة : وسم لهل صوت ،رضيتي لو ما رضيتي أنت اله يعني اله ،حق من يريد شي ياخذه يعني ياخذه وكلنه نعارف بطبعه شني
_ بس انا مو شي انا بشر
غضة : سدي السالفة وخلينه فرحانين بطلعة جعفر
نترت
_ مو صوجكم صوجي انا اجيبلكم الاخبار الحلوه
غضة : بعدنه بسم الله عيرتنا
_ جا تردون تجبروني
سكتت من طبوا جدي والباقين ومشيت مطنگره گعدت على أول باية من الدرج اباوعلهم يحجون بالگعده الصارت وانا حاطه ايدي على خدي
وصافنه ،ومن درت راسي اجت عيوني بعيونه چان مخليهم يسولفون وعيونه وياي ،من شافني
اباوعله دار راسه بساع يسوي روحه يحجي وياهم
جريت نفس بين الحيره ومشاعري ،گمت ماگدر اباوعله ،انا هسة بين نارين ،حتى لو عافني حق بعد ما انجمع وي ليث ،وحتى لو دارت الدنيا غير
اله ما اصير ،عدنه البنية اليحجي بيها واحد من ولد العم ما تصير الغيره ابد وانا هذا الاحسنه راح يصير وياي ..! !
طبيت للمطبخ اباوعلها تسوي جاي وتتحرك بكل نشاط والفرحة مبينه من الابتسامة المرسومه على ملامحها ،من حست بي اندارت تحجي
ميمنة : احسن گلبي يريد يطلع من الفرحة ،راح اشوفنه بعد اكثر من سنة
أبتسمت
_ الله يدوم الفرحه علينا
ميمنة : أمين يارب
طلعت للحوش ما اگدر اضلن گاعده جوه وانا اباوع ،للأريده ولليردني ،احسن روحي بنارين لو گابلتهم بمكان واحد ..! !
گعدت على دچة الديوان اباوع للبطات مال جفون الحقيرة يفترن ،بالي احسن هوسة بيه
ما جاي يصفى حتى اعارف روحي شني الانسب الي كل الي براس براسي هسة هوسة بس هوسة...
انداريت من حسيت أحد گعد يمي ،رفعت حاجبي مستغربة
عبد الحق : شبيج ؟
بلعت ريگي مضيعه روحي والجواب
عبد الحق : شني سبب رفضج ،ليش ما ترديني ؟
درت وجهي دنگت اباوع للگاع واسمعنه بصوت ناصي گال
عبد الحق : اطيني سبب يخليني اشيلنج من راسي
رديت اباوعله حايره
عبد الحق : احجي .
_ شأحجي ؟
عبد الحق : ليش هيج قافله ما تردين حق ؟
_ ماكو سبب بس انا ما رايده اتزوج احسن روحي بعدي زغيره على هاي المسؤولية
عبد الحق : ما متزوجه غريب ولا طالعه لغير ديره منا لهنا ،وانا كلش زين اعارفج بعدج زغيره ،عادي نعقد والعرس شوكت ما تردين
يتاملني بعيونه يريد جواب ،اخر شي بالحياة توقعته حق يحجي وياي بهذا الهدوء والاسلوب ،طول الگعده ضليت متوتره ،هذا لساني اختفى وصوتي نصى مثل مستوى صوته
_ حق ،انا اعتبرك اخوي والله
بايده باكيت الچگاير ،فتحه طلع وحده ،خلاها بين شفايفه وشغلها ،جر منها نفس وبكل هدوء گال
عبد الحق : بس انا ما اعتبرج أختي ،أنت حواري
أم دلعة الاخذت گلبي من ساعة المثلت علي هي متخربطة
حسيت اطرافي رجفت من حجاياته ،اخر شي توقعته حق يحبني ...! !
عبد الحق : نعقد واذا شفتي روحج ما تگدرين تكملين نخرب كلشي وحتى لو تحطين السبب بي انا ارضى
درت عيوني ارطب شفتي بطرف لساني، ريگي نشف ،وفجأه من العدم احساس بداخلي وصوت عقلي حجه وگالي
"اقبلي هو ليث مباوعلج"
عبد الحق : هاا حوريتي ؟
باوعتله بساع مبتسم حس اثر علي من حجايته
"حوريتي"
عبد الحق : احجي
_ اقبل
كبرت ابتسامته القله اشوفنها
عبد الحق : تقبلين بحق ؟
هزيت رأسي ب أي ،ضحك وگام وگف
عبد الحق : جا اگلهم ؟
گمت وگفت مرتبكة
_ لا ،لا ،اذا ردوا حاجوني انا اگللهم موافقة
عبد الحق : جا خوش
مشيت اريدن اطب أول مره بحياتي ارتبك هيج واحيرن شأحجي ،چم خطوة وسمعت صوته وراي
عبد الحق : حوريه
اندريت عليه اطگطگ اصابعي ،ما اعارف شني المخليه هيج مبتسم
عبد الحق : متاكده قابله ؟
هزيت رأسي ب أي وانا احسن كلشي جاي اسويه خارج عن سيطرة گلبي ،طبيت امشي وبين اللومن بروحي وبين اگولن لا هذا الصح
سويته اجت عيني عليه وبساع درتها من طب حق وراي كملت دربي يم البنات ،گعدت بصف ميمنة
ندستني
ميمنة : وين چنتي ؟
_ هنا بالمطبخ
ميمنة : شني تچذبين علي جا غير چنتي بالحوش وشفت حق طلع وراج
_ أي صح
ميمنة : شحجيتوا ؟
رفعتلها حاجبي
_ شو صايرة فضولية
ميمنة : انعديت منج
_ لا والله
ميمنة : أي والله
_ جا ما اگلج شحجينه
ميمنة : جا شني اروحن اسأل اخوي
_ خوش اسألي
ميمنة : يعني ما تحجين
_ لا خصوصية
ميمنة : ما دام صارت بيها خصوصية يعني اخوي ايده بالدهن اليوم
خزرتها وانداريت اباوع عليهم ملتمين يحضرون لطلعة جعفر ،باوعت لبركة ماخذتلها زاوية وصافنة بالها ابد ولا يمنا ..! !
°بركة°
شعور بداخلي غريب ،ما راح اشوفنه بعد ،ما صدگت يجي الليل وتهيد الوادم وامشيله ،رايده اشوفنه اخر مره گبل لا يرد ل اهله ،او الصدگ اخوه الجان
السبب بطلعته لوما سوايته فلا چان اطاه جدي ولا طلع اخوي من السچن ..! !
لبست عباتي وطلعت ،اذكر روحي شصار وياي المره الفاتت ،بس رغم انا ما ناسية شلون الله نجاني بمعجزة بس رجلي مشت وكملت الدرب وحدها وانا ما بيدي شي غير وگفت گبال هذيج الغرفة
باوعتلها بحيرة ،انا ليش أجيت ،واذا رد الاهله ،واذا ما شفته بعد شنو راح يصير ؟؟
بايدي المفاتيح فتحت الباب وطبيت ،وعلى صوت فتحة الباب وخرخشة المفاتيح فز هو يباوع بعيونه علي ،ابتسم وگال
رهيب : گلت ما تصبر بعد وراح تجي
سديت الباب وضليت واگفه بمكاني ،اتمنى يرد الاهله يكمل حياته بس ليش هيج گلبي يوجعني ..! !
عگد حاجبه
رهيب : شبيج ساكته ؟
تقدمت بهدوء گعدت على ميز زغير مال جرباية عدلت عباتي ،اباوعله متانيني احجي ،نتر من شافني صفنت
رهيب : شني السالفة ما تحجين ؟
_ راح تطلع باجر
صفن بوجهي چن ما افتهمني
_ باجر راح تطلع منا
رهيب : وأنت شبيج ضايجة
_ ما ضايجة
رهيب : جا شبيج مغيمة ؟
_ شني هاي مغيمة ؟
رهيب : يعني مطنگره
_ ما مطنگره
رهيب : منين عارفتي باجر راح اطلع ؟
_ صارت گعده وشيخ واحد گال ،يطلع جعفر أخوي وأنت تطلع
رهيب : اممم ،هاي شوكت ؟
_ اليوم
گام وگف على حيله ،مشى مستقر گبالي ،مسح على لحيته وبصوت هامس گال
رهيب : ضايجة لان ما راح تشوفيني بعد ؟
بلعت ريگي اتهرب من الجواب الما اعارف شني
رهيب : بركة
باوعت بعيونه
_ هاا
رهيب : لا تنسيني ابد
هزيت راسي ب لا
رهيب : ولا تضنين هاي أخير مره تشوفيني بيها
گمت وگفت اغطي بايدي الصارت ترجف وسبب رچفتها عدي مجهول مثل ما جهلت سبب جيتي
لهنا ..! !
درت وجهي اريدن امشي بس اعترض دربي من سد الباب و وگف ساده بضخامته ،باوعتله وباوعت للباب مرتبكة
_ سويلي درب امشي
رهيب : بس اودعج
_ شتودعني ،وخر خل امشي
شهگت ورفعت روحي على اطراف اصابعي من دنگ حضني بقوه ،ضليت جامده وبس صوت نفس مسموع ،وخر وانا عيني بعينه بكل غضب اباوعله
ابتسم ولا چن السواه غلط
رهيب : مرة الجاية تصير بالحلال
خزرته وانداريت اريدن اطلع وسمعته وراي صاح
رهيب : "راح اكسر قواعدكم ،واسوي الما سواه أبوي"
كملت دربي وانا اتعثر بخطواني ،والنوم بهل ليلة چافه عيوني ما گدرت حتى اغفى ومن
الصبح صارت الخبصة بطلعة جعفر ،التمينا عد بيت جدي وصار ركضنا بفلس من قرب وكت جيته
فتحت الكاونتر طلعت دولكة الماي ترستها اباوع على الولد من الشباك ناصبين الجدوره بالحوش والطباخ وياهم يطبخون ،جدي مسوي عزيمة چبيره على الغده وحتى عراضه محضرين
ركضت بايدي الدولكة ،صبيت لعمة عطاء اخذت الگلاص مني واندارت على امي تسألها
عطاء : يعني راح يطلع ابن جسار ؟
شيماء : أي بس يجيبون جعفر يطوه الهم
عطاء : أي عاد تفض وحده ،ملت ارواحنا
شيماء : أي والله ياخية
اطتني گلاص الماي اخذته وافتريت على الباقين وبس خلصت مشيت للمطبخ يم البنات ينفضن بالخضره
بس شافتني گالت
ميمنة : تعاي ويانة
_ وين اعارف انا
ميمنة : تنضيف خضره ما تعارفين بركة راح تخبليني
اشرت على حواري
_ جا مو هاي گاعده
ميمنة : لا تصيرين حماية حية
ضحكت وگعدت يمهن ،شعور حلو الوجوه كلها تضحك ولمتنه لمة فرح نفتر بكل نشاط بلايه ما احد يضوج منتضرين شوكت يأذن الضهر ،گالوا وي
صلاة الضهر يوصلون ...
طلعت للحوش اجيبن السجاجين ولا وحده ضاله جوه ،بس ما لحگت وطبيت اركض من صار صوت رمي ،گمزت فرحانه من سمعت صوت الهوسات ودبچهم لهنا وصلنا ،كلنا التمينا نباوع من باب المطبخ ومنه الي طلعن بالحوش ،باب الشارع مفتوح
امي طلعت تبجي من سمعت الهوسة ،الجو اشتعل بالرمي ولدنا واحفاد الرباح وأل خبير اليوم كلهم التموا لطلعة اخوي من السجن ،فرحتنا ما منها فرحة الحجي كله قليل ما يوصف شني احساسنه من شفناه طب يضحك وراه ليث وعبد الحق ،بجيت وانا اشوفن طوله الحلو گدامي
فتحت ايدها امي وصاحت من بين دموعها
شيماء : جعفر يمة
بصيحتها بأسمه عيونه صارت علينا ،باوع على ايدها وركض لحضنها ،بجيت بصوت عالي بعد ما چنت بالگوه كاضه دموعي
شيماء : يايمة ياوليدي ،يابعد عيوني ،ياروح امك اخذت حيلي يايمة
حاضنته وتبچي وهو كلساع يبوسها من راسها ويردد
جعفر : رديت والله ،رديتلج
مسحت دموعي من اندار علينا ،انا وميمنة وبصائر وحده واگفه بصف الثانية ،ابتسم
جعفر : جا هذا انا واگف گبالچن المن البچي بعد ؟
مسحت عيونها وبصوت يرجف گالت
ميمنة : ما مصدگة هذا أنت گدام عيني
ضحك بتعب واجه لمنه تلاثتنا بحضنه ،كلساع بايس راح وحده بينا والبنات وعماتي يتحمدله بالسلامه وما وخرنا لا من صاح
صخر : طبوا جوه الوادم انشتلت بره
طبينا وهو مشى برا ،بدت خبصه الغده افتر واحس گاعي ما مكفيه فرحتي ،ما مصدگه شفته وسمعت صوته
طبيت للصاله صحتها
_ نسمات کومي شني صايبج اكتئاب ؟
گامت تعدل بثوبها الاسود وتحجي
نسمات : خايبة انا ما الحگ اكتئاب والله
_ جا تعاي يمنا شني ضاله هنا وحدج ؟
نسمات : اجيت
مشينا انا وياها للمطبخ ،بس طبيت صاحت
هيوفة : اخذي السفره افرشيها بساع
_ وينها ؟
اشرتلي
هيوفة : هذيج على الكاونتر
_ خوش
اخذتها وميشنا انا ونسمات نفرشها ولحگتنه غاية جايبة سلة الخضره
غاية : بساعچن افرشنها يمعوات
نسمات : ما جاي تنفتح
نزلت السله من ايدها واخذتها منه
غاية : يااا شبيها هاي بسلا خربانه ؟
نسمات : هو چن هيج
غاية : ماشية اجيبن غيرها
راحت جابت غيرها وردت ،تگابلنه فرشناها وبدينه نحط الاكل ،بس كملنه التمينا على السفره وبين السالفة والضحكه چان احلى غده بكل حياتنه يجوز
بس خلصنا كفينا السفره وتگابلنه على المواعين هستونه بدينا نغسلهن وطب
عزيز : هدنهن راح نغسلهن بره
ميمنة : منو يغسلهن ؟
عزيز : خير من الله احنا ،بساعچن سفطنهن
تگابلنه انا وغاية سفطناهن واحد فوگ الثاني وعزيز صاح ليث وحق وياه اخذوهن كلهن ومشوا بس ضلن النواعم كفيناهن احنا ،و ورا الغده التمينا نشرب جاي ونسولف
نزلت الگلاص من ايدها تسأل
عطاء : صدگ حق رايد حوريه ؟
غضة : أي صدگ
عطاء : گال عمي
غضة : هو اجه خطبها للأرحب بس ابن اخوج گمز ورادها
عطاء : والله يايمة هو الارحب ماكو منه مو لان ابن حماي وامدحه بس الله شاهد هو بعد جده ،بس كلشي بالدنيا نصيب والظاهر حويريه مقسومه لحق
غضة : ما ترضى المتعافية
اندارت على حواري
عطاء : صدگ ماتردي ولج ؟
حواري : چنت
زغرت عيونها جده تباوعلها واحنا كلنا ركزنه وياها
غضة : شني ولج چنتي ؟
حواري : فكرت
غضة : يا الله شفكرتي
حواري : گلت ولد العم ستر وعافية
غضة : شلون تغثني، وانا شأفتهم من هذا حجيج
حواري : جده مو تلحين علي ارضى ،ارتاحي رضيت
ضحكت من هلهلت بصائر وباست حواري
مسحتها وطگتها
حواري : حقدت عليج على گد ما لحيتي علي ،زقنبتيني
بصائر : جا غير بت عمنه واختنه تصير چنته منريد الغريبة تدوس عتبتنا
غضة : خايبة وروح أبوي فرحتيني ،يستاهلج حق
هزت رأسها واندارت على هيوفة الابد ما بدرت منها أي حركة ولا حتى بين عليها الفرح
شيماء : والله حتى انا فرحت ياعمة وفرحتي صارت فرحتين
زهرة : الله يدومها علينا
كلنه بصوت واحد ردينا
_ أمين
°حواري°
گمت من گامت واشرتلي ،عارفت السويته حيرها بس طبيت وراها للديوانية سدت الباب و وگفت گبالي
هيوفة : تحجين صدگ حواري ،جا مو گلبج مو يمه شلون رضيتي ؟
_ ابو المثل يگول اخذ اليحبك ولا تاخذ التحبه وانا الاحبنه ما يوم رفع عينه علي
هيوفة : بس هيج تضلميه وتضلمين روحج
_ لا احاول اعيشن وياه وانسى ،لان لشوكت أضل احبن من طرف واحد ولا انا البسما ولا بالگاع
هيوفة : بعد بكيفج بس لازم تصيرين گد قرارج
حاولت اقنع روحي وانا اگولن
_ أن شاء الله
فتحت الباب وطلعت گبلي ،گعدت اصفن وي روحي امس ما نمت واليوم كله خلص بالصفنات
وما اعارف السويته صح لو غلط ،وخاف لا يجي يوم انتدم ..! !
طلعت على صوت هوسات بره ،ركضت للمطبخ اباوع البنات كلهن واگفات يباوعن
الولد ملتمين كلهم ،ناس تغسل مواعين المفطح وناس تهوس ومن بينهم ضيرم شايل السلاح ورافع دشداشته لا يلوحها الماي ويهوس ،وبنصهم واگف
جعفر كلساع واحد شايله يهوسن فرحانين بيه
من انداريت چانت واگفه بصفي صافنه تباوعلهم بس انا حواري حسيت اكو شي جاي تفكر بيه ،ندستها
اندارتلي
بركة : شكو ؟
_ شبيج صافنة ؟
ردت تباوع عليهم ،چان شايله الارحب على چتافه والولد داير مدايرهم يهوسون
_ هذا ابنا سبع ،ما غيره سچن
_ هذا ابنا سبع ،ما تغير مجراه
بركة : فرحانة لان كملت لمة بيتنا
أبتسمت ارد عليها
_ الحمدلله
بركة : يستاهل الحمد
طبينا نتراكض من اجتنا خزره من صخر لگفنه حرامات شگد حلوه اجوائهم چان ضلينا نباوع
گعدت بصف جده تسولف وي عمة عطاء
غضة : أنت هم دگيله راس كافي عناد وخشم يباس
عطاء : والله فلا ادگله راس ،يبزع يمه على كلشي ينتر
غضة : جا اذا أنت چنج ابوج واگفه بوجهه شمتاني ما يتنر الزلمه
عطاء : والله ما ينرجع يا يمة
غضة : جا شتسوين احملي لخاطر ولدج
عطاء : هو شكاسر ضهري غير هل ولد
غضة : لا تضوجين خلگج وتخلين خلگي يگدر عليج انقهر من اشوفنج ضايجة
عطاء : ما مرتاحة والله ،وخطيتي برگت أبوي
غضة : خليها بينج وبين روحج زحمة احد يسمعج تتحسبين على ابوج
عطاء : جا السواه ابوي هين ،لهسه ما ناسية كلشي
غضة : خايبة كافي عوفي هل سوالف مو وكتهن وگومي تونسي
بلايه ما تحجي گامت ومن شافتني مركزة وياها أبتسمت ومشت ،اباوع عليها ولا چنها نهاية
التلاثين هلگد ما ناعمة ونازكة مبينة بعمر ريحانة وهيوفة ...
تثاوبت منعسة ،امس النوم جافة عيوني سهرت
انا وافكاري وضليت الليل كله افتر بنفس النقطة واگولن لروحي
_ هاا حواري چا وگلبج
واحس عقلي يجاوب
_ هو ما مباوعلج كافي تباوعليه
تمددت وانا اجرن مخده من المحطوطات على الحايط وما اعارف بروحي شلون غفيت بسرعة ما فزيت غير على ايد ريحانة تنهدني
فتحت عيوني النعاس لازگ بيهن احسن
ريحانة : خايبة گومي الدنيا مغرب موزين تضلين نايمة
_ بس شوي
ريحانة : ولا شوي ،گومي حواري ولا تعاندين
گمت ادگ رجلي بالگاع وهي تسحول بي وگفتني گبال المغسله
ريحانة : غسلي وجهج المزنجر بساع
فتحتلي البوري ومشت ،غسلت وجهي ادردم عليها مشيت للصاله امسح وجهي بشالي واحجي
_ يعني ما خليتني نايمة واذا الدنيا الغروب ؟
غضة : شلون يصير ولج جا غير الملايكة كلهم بالگاع
_ جا حتى لو جده شدخلني بيهم انا
غضة : اسكتي حويريه موزين عليج وكافي
تثاوبت وگعدت على الدرج اباوعل عليهن ياكلن
كعك وجاي ،شوي وأجت يمي نسمات بايدها كعكاية وگلاص جاي ،قدمتهن الي
نسمات : أكلي لا تضلين تباوعين
اخذتهن من ايدها
_ شكرا
نسمات : العفو
ردت لمكانها وانا ضليت اكل واباوعلهن وادعي الله يدوم هل لمة الحلوه ومن طر نص الليل گمت لبست عباتي اتحضر نمشي لبيتنه ،طلعت اوگف بالمطبخ گبلهن اريدن امشي حتى انامن وهن تذكرن يسولفن هسة ...
انداريت من حسيت أحد وراي ،وخرت بساع من الباب اصيرن على جهه من شفته حق واگف يدخن ويباوعلي ،نزل چگارته يسأل
عبد الحق : شني راح تمشين ؟
هزيت رأسي ب أي
عبد الحق : اممم ،جا وحدج ؟
_ لا امي والبنات جوه
عبد الحق : زين ،وبصائر شلونها اليوم ؟
_ لا الحمدلله زينة ،بس الله عليك فقار ما صار زين ؟
عبد الحق : جا مو گلنه طلعوه من العناية
_ زين ليش ما يطلعوه من المستشفى
عبد الحق : باجر لو عگب باجر يطلع
_ والله ؟
عبد الحق : والله
_ الحمدلله ارتاح گلبي هسة
أبتسم بطرف شفته
عبد الحق : سلامة گلبج
درت وجهي مرتبكة اباوع الامي من طبت ،شافتنة واگفين بس ما حجت غير
نجوى : يلا حور ،يلا بصائر وينج
طلعت تلبس بعباتها
بصائر : أجيت عمة
بركة : عمة خليها تبات يمنا تغير جو وهم لان جعفر هنا
باوعت لبصائر تسألها
نجوى : تضلين ؟
هزت رأسها ب أي
بصائر : ما شبعت من جعفر
نجوى : جا خوش ،يلا هيوفة ريحانة بساعچن
اجن يسولفن لابسات عبيهن وياهن ميمنة ،بس شافتهن أمي طلعت وانا وياهم لحگناها ،هن يمشن وانا وراهن ،بس طبيت للغرفة شمرت العباة والحجاب ومديت فراشي وتمددت ،بي بخت دوامي ضهري عاد اضلن نايمة براحتي ...
ركضت فحطانه ،حافية رجليه ،كل ما ادوسن الگاع خطواتي اثرهن دم يصير ،من شني شارده ما اعارف
بس الاعارفه انا خايفة احد يريد يكتلني
بنص الدرب عثرت حسيت عظم رچلي طگ عيطت وبنفس الوكت انكتم صوت عيطتي من حسيت چفوف ايد تلتف على رگبتي وتختنگي ،صيحت بس صوتي ما يطلع
فزيت كاضه رگبتي وابجي بخوف الدنيا كله ،انشغ فحطانه چن العشته صدگ مو حلم ،چني صدگ چنت اركض ،خايفة تحاجيني
ريحانة : ولج حواري شبيج ،حاجيني ؟
وانا بلايه وعي اردد
_ دم ،رجلي دم ،خنگني والله
لمتني لحضنها
ريحانة : اسم الله الرحمن ،ماكو شي لا تخافين
_ خنگني والله
وهي بس تريد تقنعني
ريحانة : ماكو شي حلم حلم
حطيت راسي على رجليها اچدي النفس ،فوگ الساعة ضلت تقره على راسي وانا وي كل حرف تگوله خنگتي تزيد بس ضاله أجبر روحي اسمع رغم جاي احسن بروحي اموت ...
°بركة°
مديت راسي اباوعله مبتسمة ،طب وراه حق وليث عدلت حجابي وطلعت بايدي الچكليت
درت على بصائر
_ هلهلي عليج الله
هلهلت وانا رفعت ايدي بايدي صم چكليت شمرته عليه ،ضحك ورفع ايده على رأسة
جعفر : موش چكليت ليگول حجار
رفعتله الچيس
_ يااا والله خوش چكليت
جعفر : الكويتي ،تعارفين بي احبنه
ابتسمت اهزن راسي ب أي
_ تذكر من چنت تضحك علي وتكلي الدنيا صفره وتخلي الچيس الاصفر گدام عيني لو الأحمر وانا مصدگه
جعفر : چنتي زوج ينضحك عليج بساع
رفعتله حاجبي
_ لا أنت چنت لوتي
اجه جر من ايدي چيس الجگليت حط صم بجيبة واطه لباقي ل ليث
جعفر : هذا الك كله
ليث : مشكور بس هيج يصير بي سكر
جعفر : ما عليك شي عار
ليث : والله ما عار غيرك
جعفر : جا خوش الا اخليك وحدك بالگيعان
ليث : جا تعلمت
جعفر : أي صارلك سنة وحدك
عبد الحق : ليش ما تطبون جوه مو احسن ؟
ليث : لا أنا ماشي ،تصبحون على خير
عبد الحق : تلاگي الخير
بس مشى وسد الباب حق وراه طبينا كلنه جوه انمله البيت علينه وكملت اكثر من رد أبوي من بيت جدي وميمنة اجت وياه
جعفر گاعد ياكل چكليت وانا بصفه احجي
_ ناقصنه بس برهان وتكمل لمتنه
عبد الحق : يخرب لمتنه قصدج ؟
ميمنة : لا تحجي عليه ،هو بس مايحب تطولون بالسهر
عبد الحق : كلش على الاساس هو ما يسهر
ضحكت من حط الجيس گبال عيني ،يعيد أيام طفولتنة
جعفر : بركة شوفي الدنيا حمرة
شلت كوم الچكليت الباقي من گدامه
_ كافي اكلت الچكليت كله
جعفر : جا غير الي
_ اطيني وحده
جعفر : اهوو ،عطيه وعين اهلها وراها
_ شبيك شبيك
عبد الحق : عود بعده جديد لازم ما يخزر وينتر وهو بالگوه كاض روحه
ضحكت اباوعله مدلغم ،اطاني وحده وتمدد حاط راسه على رجلين ميمنة
عبد الحق : اگلك جعفر
جعفر : گول
عبد الحق : هسة أنت صرت خريج سجون بعد منو ترضى بيك ؟
جعفر : مثل ما رضت بيك بت عمك انا هم وحده ترضى بي
ضحكنا وحق كفخه ،كض راسه
جعفر : بعدني خطار احترمني
عبد الحق : اكبر منك
جعفر : اگوم انام احسلي
ميمنة : وين مو گاعدين
جعفر : جا گلي الاخوج لا يطگ بعد
ميمنة : لا تحاجيه حق
عبد الحق : خوش
رد تمدد ،ضلينه لصلاة الصبح هاي لمتنه وسوالفنه بصائر بين التندمج ويانه وبين التصفن
واعارف بحالها عد فقار وحگها ،گبل لا يصعد فوگ أخير واحد سأل
جعفر : غرفتي منضفيها لا ؟
_ اصعد تلگاها تلمع لمع يوميا انضفها وياي حالها من حال غرف برهان وحق
أبتسم وصعد وانا مشيت للغرقة من صاحتني
ميمنة بس طبيت گالتلي
ميمنة : تعاي نامي اليوم شفتج بس تثاوبين
_ أي والله صدگ جنت نعسانة
ميمنة : شني ما نايمة ؟
درت وجهي منها اباوع لبصائر وجاوبت اسوي روحي طبيعية وما عارفت تريد تزلگني
_ نمت بس من دوخت امس ما حسيت شبعت نوم
ميمنة : جا نامي وراج دوام صبحي
هزيت راسي ب أي ،وتمددت ،من صفنة لحسبة ببالي نمت وما گعدت غير على صوت امي
مشيت للدوام وبس رديت لگيت بس ميمنة وهي هم تريد تمشي ،وبس تغدينا اجه عليها صخر اخذها وانا ضليت ضايجة افتر
والعصرية انا گاعده بالحوش وانفتح الباب طب جعفر من شافني گاعده على عتبت باب المطبخ اجه گعد يمي
جعفر : ضايجة لان وحدج ؟
_ كلش ،احسن روحي وحيده
جعفر : لا تچذبين شني وحيده جا واحنا مو يمج ؟
_ لا لان بس انا بت وحدي ضاله
جعفر : هسة يتزوج حق وجيبلج بت عمي باقر يمج
_ ختولي هاي تحب بس جفون
جعفر : بت عمي منير ؟
_ أي ،شني نسيت ؟
ضحك
جعفر : لا بس هواي بنات اخربط بيچن
_ حگك
جر نفس بايده السبحة يفر بيها
جعفر : سنة وچم شهر بس هواي غيرن ،طلعت بس لگيت خواتي معرسات ،اخوي يريد يخطب هواي امور متغيره صح اعارف بيهن وتوصلني الاخبار بس حرامات ما چنت وياكم بيهن
دمعن عيوني من حسيت الموضوع شاغل تفكيره
مسحت عيوني بساع من اندارلي
جعفر : هسة على شني البچي ،جاي نحجي طبيعي
وانا امسح بعيوني ارد عليه
_ لا بس انا انقهرت
جعفر : ديلا يمعوده
_ جوعان ؟
جعفر : تغديت يم بيت عمي محمد
_ يم ليث مو ؟
هز رأسه ب أي وگام من مكانه
جعفر : مني هاي البت الشفتها يمهم ،غريبة مو من البنات
_ يابت ؟
جعفر : سمعت غاية صاحتها يمكن نسمه
ابتسمت
_ لا نسمات بت اخت عمة زهرة
جعفر : يا اخت ؟
_ شبيك الماخذه اخو جده
جعفر : هااا
_ أي
جعفر : جا شعجب يخلوها تجي عاد أل خبير حقونه
_ جده تتعارك اذا ما يجيبوها
جعفر : طلعت جدتج مو بس علينا گادره
رفعت حاجبي اداهره
_ جا شعبالك
جعفر : اذا ضايجة اخذج يمهن ؟
_ وامي
جعفر : نايمة لو گاعده ؟
_ لا نايمة
جعفر : حق جوه ؟
_ أي
جعفر : گليله وامشي عاد من تگعد وما تلگاج هو يگلها
_ خوش
طبيت بساع للبيت حطيت عطر ولبست عباتي وطلعت چان متمدد بالصاله بس شافني
گال
عبد الحق : وين ؟
_ لبيت جدي جعفر راح يوصلني
عبد الحق : خوش
طلعت ورا جعفر وصلني ،هو طب للديوانية وانا طبيت يم البنات ،هستوني طبيت للصاله وسمعت غاية تقره
_ دهري يتمني والتزم عمي برباي
ما اعز عنه ،مهجتي وروحي ودماي
دهري يتمني والتزم عمي برباي
ما اعز عنه ،مهجتي وروحي ودماي
رمله بمصابي خل يغجعوها
حنتي دمي والچفن ذار التراب
يمة ذكريني من تمر زفة شباب
سكتت من شافتني واگفه ،نزعت عباتي وانا اگلها
_ حلو صوتج بهاي القصيده
غاية : هاي اكثر قصيدة تحبها چفون وخاصة هاي الابيات
نمسات : هذيج المره من اجيتكم انتبهت عليها هواي تعيدهن
غاية : تحبهن
گعدت يمهن
_ جا شو لا عمة ولا چده وحتى اختي ماكو ،وينهن ؟
غاية : نايمات عيني وبس انا ونسمات ضالات نفتر بالبيت
_ مثلي هم بس انا ضاله افتر وحدي
غاية : بعد من تضوجين تعاي هنا يمنا
_ جعفر شافني ضايجة وجابني ،وهو طب للديوانية
غاية : ليث بالديوانية
_ اگولن ،هل مشمه يمه
غاية : أي
نسمات : اگلچن
غاية : گولي
نسمات : ضوجة نگوم نسوي كيكة ؟
غاية : تعارفين ؟
نسمات : أي دوم اسوي
غاية : جا گومن
گمنا للمطبخ ،بدت تحضر موادها وانا وغاية نباوع بس بدت تخبط بيها اندارت على غاية
نسمات : حمي الفرن بس خلي النار ناصية بين ما اكمل خبطها
غاية : خوش
شغلت الفرن غاية وانا اباوع عليها تتحرك چن وحده خبره ،بس خلصتها حطتها بالقالب وطببتها للفرن وغاية كفت الهوسة وگعدنا متانيها ،نحسب بالوكت بس عدت نص ساعة گامت شافتها
نسمات : بعد عوزها شوي
غاية : خاف تحترگ ؟
نسمات : لا لاتخافين
شوي وشغلت الفوگ وانا وغاية نفتر على رأسها بس استوت وطلعتها گالت
نسمات : تبرد شوي واگصگصها
غاية : نودي للولد ؟
نسمات : أي بس سوي چاي بين ما تبرد
حضرت غاية الجاي وبس بردت اخذتلهم ماعون ومشت وانا وراها امشي ،دگت باب الديوان طلع ليث اخذ الصينية منها
ليث : هستونا انا وجعفر نگول اكو ريحة كيك
غاية : هاي نسمات سوتها
ليث : عاشت ايدها
انداريت على صوتها وراي
نسمات : بالعافية
ليث : الله يعافيج خوية
بس طب هو احنا حضرنا صينيتنا وگعدنا ناكل
غاية : عاشت ايدج والله تخبل
نسمات : والله
غاية : والله
عضيت من القطعه بأيدي
_ شگد ماكله كيك بس مثل هاي ما ماكله
أبتسمت ومن عليها فرحت بمدحنا ،بعدنا گاعدين ونزلت ،باوعت للصينية
ميمنة : شنو هاي عيني گاعدات وكيك ،جان عزمتني وياچن
غاية : عبالي نايمة
ميمنة : لا گاعده چنت اسفط بكناتير أخوج
غاية : خوما هوسة ؟
ميمنة : لا صخر ما يهوس ،بس انا جان عدي هدوم اكويهن اله وهدوم مطببتهم من الحبل عزلتهن
غاية : زين سويتي ،عاشت ايدج
گعدت يمنا وردت عليها
ميمنة : وايدج ،شعجب بركة هنا ؟
_ ضجت وحدي جابني جعفر
ميمنة : جا امي وين ؟
_ نايمة
ميمنة : امم ،حگها لان تگعد من الصبح
°غاية°
مشت بركة لبيتهم ،ونسمات ثاني يوم اجه ابوها عليها اخذها وردت وياه ،وانا بديت التهي
وي الامتحانات اليوميا ،ما اعارف منو گايل للمعلمات اكو احد يركض ورانا ولازم نخلص الماده حتى لو بلايه ما نفتهم منها شي
رديت من الدوام راسي احسن مثل الطبل ويدگون بيه فلا چن انا خامس ،كل ما اتعب اگولن وي روحي
_من راح اصيرن سادس شيسون بي
بدلت هدومي وطلعت من الغرفة تغديت ورديت نمتلي شوي وگعدت بديت اقره ،وجره وحده للعصر ما گمت غير بس من سمعت صوت عالي بالصالة ..! !
جريت شالي وطلعت متخردله ،وگفت بمكاني اباوع بعيوني
ضيرم : انا گلت ،گلت راح يگول ما اريدن فصل بس نردها اله ،حجيت لوما حجيييت
محمد : كافي هسة غير تسكت ،شبيك بس تصيييح
ضيرم : ما مصيييح
محمد : لا ابد وين مصيح
ضيرم : عمي اختي ما تردله والله والله وداعة العباس ابو فاضل ما تردله
محمد : وهسة ياهو الگايل تردله شو أنت هم ما اعارف شلونك
ضيرم : هسة يحط وسيطين وجيب عمك و ودي خالك وترد منين ما اجت
محمد : صاير تملل
صخر : كافي ضيرم ترا لحيت
عزيز : ما لح ،حگه ،اختنه اجت مكسوره وبكل عين صلفه ما يريد فصل يرد نردها اله
صخر : ابوي گال ما ترد يعني ما ترد
رديت للغرفة الباب مفتوح واسمعهم
صخر : كافي على كلشي وصيحت هم اطي درب نتفاهم وياك
ضيرم : اكثر انسان هادئ جاي يحجي
صخر : انجب لا تصنف
ضيرم : أنت ما تعارف شي اسمه تفاهم لا تعلمنياه
صخر : شلون راح اطي دفره اشمره بحضن امه
ضيرم : بحضن اختك احسن
صاح
صخر : اطلع بره لا اطلعك دفرااات
بنفس الوكت صار هدوء عارفتهم مشوا ،رديت اقره وانا ادعي على المعلمات
كلهن فديوم چن يتفقن علينا دربنا ما نندله من كثرة التحاظير ،احس عقلي صار يخبط
°هيوفة°
جاي امسح بالبيت وطب ضيرم روحه صايره بطرف خشمه ،صحت باسمه ما رد ،انداريت اباوع لعمه وهي بس شافتني اباوعلها گالت
نجوى : هدي من ايدج واصعدي وراه
وانا ما گلت شي نزلت ثوبي ومشيت غسلت ايدي وصعدت بس طبيت شفته يخابر
ضيرم : باااع لك نجوم السما اقرب الك وانا حاجيها الك گبل ،اختي لو تموت ما تلوحها بعد ،انجب
واكل تبن يا ابن التبن ،اششش لا تتوسل تطلگ يعني تطلگ ورجليك فوگ راسك
سده وگعد على الجرباية ينافخ ،بهدوء مشيت گعدت يمه ،اندار باوعلي وطالت صفنته ،بأيدي مسحت على لحيته ورسمت ابتسمه خفيفية على وجهي احاول إأثر عليه واسحب شوي من عصبيته واغير من حاله المگلوب گلب
_ ليش ضايج حبيبي ؟
غمض عيونه ورد فتحهن يحاول يتمالك اعصابه
ضيرم : ما خلوني امشي وياهم للگعده مال عار
الزلم حمزة ،ومن ماشين گايللهم ما اريدن فصل بس ردولي مرتي
_ وشني يعني واذا گال ،الشور الأول والاخير الكم
دار وجهه وگام ،ما لحيت عليه اكثر بعد وخليته ونزلت و ورا العشا من صعدت گبله چان هو جوه اخذت هدوم خفيفة وروبي الالبسه فوگاهن حتى انستر ومشيت للحمام
سبحت ورديت للغرفة بس طبيت شفته چان گاعد على الجرباية ،باوعتله يباوع بمبايله والحاجب بعده معگود مبين ابد ما فكته الضوجه ..! !
وخرت خاولي من شعري علكته ومشيت يم المراية امشط بشعري وعيني عليه يحوس كلساع
وحاجي شي وي روحه مبين شعل حمزة شعل هو واهله
انداريت على صوته ،عاگد حاجبه ضايج بس ما گدر ما يحجي
ضيرم : ذبي الروب حاره
أبتسمت وبساع خفيتها ،نزعت الروب علگته ورديت وگفت گبال المراية ،ضفرت شعري وتعطرت ومشيت طفيت الضوه وگبل لا اوصل لمكاني جرني مصعدني على الجرباية ،ضحكت من دنگ يبوسني من رگبتي ويردد
ضيرم : صايرة وكحه ،تتحارشين وانا گاعد بأمان الله
جريت روحي ارد راسي على المخده وهو معتليني
_ ما متحارشه
ضيرم : احلفي
_ والله ،بس شفتك ضايج وانا اعارف شلون أوخر ضوجتك
ضحك ودنگ يبوسني ،غمضت وكضيته من قميصه
من حسيت رچفه سرت بكل جسمي ،وخر وانا جريت نفس قوي وفتحت عيوني ،ضوه خفيف طاب
من الشباك يخليني اشوفن شي مو كلش واضح من ملامحه
ضيرم : سحتي بساع ،بعدني هسة بديت
درت وجهي منه اريدن اضم روحي ،رد دار وجهي يواجه عيوني بعيونه
ضيرم : حتى لو تصيرن وكحه بس وكحاتج ما تطول بساع تخليج وتنهزم
ابتسمت
_ انا احبن روحي يمك ،احب حتى من تخجلني
دنگ يشم رگبتي ويردد بصوت ذبلان
ضيرم : وانا احبنج كلج ،من چدمج لراسج ل أسمج كلج عاشگج
°حواري°
انداريت اباوعلها مبتسمة وكاضه ايدي ،رديت اباوع من ذبحوا جوه رجليه الذبحية لسلامته وطبووه للديوانية
بصائر : ما مصدگة والله ،معقولة هاي هي ردلي فقار
حطت اريدها على چتاف بصائر
ميمنة : هاي هي صارت سوالف وهذا فقارج يمشي بطوله
أبتسمت تهز رأسها ب أي ،وزعوا اللحم مال ذبيحة للفقره واحنا محضرين غدانا ،التميمنا على الغده مثل كل مره سفره الزلم وحد والنسوان وحد و ورا الغده طب للصاله سانده ليث ،ضليت واگفه بمكاني
يم الدرج اباوعله فرحانه ،تلگته امي وريحانة سلم عليهن ودروها بعيونه من شافها ماكو گباله
فقار : جا وين عيوني ؟
وخرت عمة شيماء وهي چانت واگفه بضهرها مبتسمة ،فتح ايده وهي راحتله ،حضنها على الجهه الما متصاوب بيها ،وجده تحجي عليه لان گدامنا وهو ولا مهتم ،وخرت حاطه ايدها بخفه على مكان صوابه
بصائر : شلون صرت ؟
فقار : كلش زين
بصائر : والله ؟
فقار : وداعة عيوني الاحبها
أبتسمت حتى عيونها تضحك ،گبل چم يوم چانت بس مدلغمة واليوم الضحكة ابد ما فارگت وجهه
مشيتله اريدن اسلم عليه
_ جا شو ما فگدتني ؟
أبتسم فاتحلي ايده
فقار : تعاي
مشيت حضنته، تحمدتله بالسلامه وهو باسني من راسي وشوي ورد يمهم من صاحوه
غضة : هاا حبوبة ،نوح شلونك ؟
اندار عليها چان يريد يصعد فوگ ،رد بتعب مبين عليه، ابد ما لفه للبيت حتى هدومه كلهن دم فقار
لهسه
نوح : هااا جده ؟
غضة : شلونك بعد حبوبتك ؟
نوح : صاحبي وزين ،انا بأحسن حال
غضة : الله يديم صحبتكم ياحبوبة
نوح : أمين
صعد يسحل بروحه ،بالنص ساعة ورد نزل
زهرة : ما ضليت تناملك شوي ؟
نوح : اگعد يمهم اللحگ على المخده
ما حاجته شي عمة وهو طب للديوانية ،شوي وكلهم أجوا گعدوا بالصالة ،فقار بنصهم نوح گاعد بصفه كلساع يسأله
نوح : خوما متوجع ؟
فقار : لا وجع طبيعي
نوح : عليك الله
فقار : والله
صخر : كافي لحيت كلساع وسأله
نوح : جا غير اخافن عليه
فقار : اگلك صدگ ابد ما رديت للبيت ؟
عبد الحق : ابد ضل يمك
فقار : دشوف شلون صاحب كفو
°غاية°
قدمت الجاي ومشيت گعدت يم باب غرفتنا اباوع على جدي يخوط استكان الجاي ويحجي
رأجس : الجمعة عقد عبد الحق ،ولا تگولون
ما نلحگ ومن هل سوالف
يوسف : بوية ثلاثت ايام نطير
رأجس : شعدكم ،باجر نعزم وحوريه تلحگ تحضر روحها بهل يومين وفضت راحت
يوسف : الحجي سهل يابة
رأجس : لا تسويها سالفة يوسف وخلنه نفضها
محمد : خليها الجمعة الجاية بوية
رأجس : لا أنا گلت هاي الجمعة يعني هاي
عبد الحق : جدي قرر بعد
ليث : قرر لمصلحتك هل صرت وياه
حركله حواجبه واندار على أبوي
محمد : من اليوم نبدي نحضر عاد نلحگ
رفع استكان الجاي يشرب منه وبعدم
اهتمام گال
رأجس : أي احسنلكم
ضيرم : جدي ترا البت ما طايره نگدر نخلي العقد ب أي وكت
رأجس : لا نفضها احسن
عبد الحق : أي والله
خزره
ضيرم : اسكت أنت
عبد الحق : تدلل
باوعت لحواري ساكته تطگطگ باصابعها ما حجت ولا حجاية ،تعجبت على هذا هدوئها بعد ما جانت رافضه كلش ..! !
اجت گعدت بركة بصفي
بركة : كل مره يخلونا نركض مايصير هيج
_ جا ما تعارفين جدي تعلمنا عليه
بركة : يعني هسة شنلحگ نحضر ونشتري
_ نلبس العدنا والله كريم هو عقد نخلي الشرايه للعرس
بركة : ياعرس حق يگول ورا السادس
_ يااا ،اكثر من سنتين
بركة : اندري امي گالتله هواي ،گالها خلها تتعلم علي
_ سنة كافي
بركة : بعد بكيفهم
رديت اباوعلهم ،وابتسمت من شفته يفر بالسبحه بايده وعينه عليها هي تحجي وي بصائر ،بس صار الليل كلمن طش البيتنه وثاني يوم بدت الخبصه
مال مثل كل مره جدي گال تصير هنا ببيتنا
خلصناها ركض ركض ،بحيث اجه يوم العقد اروحنا خاويه
°حواري°
صافنة على روحي اباوع على مكياجي وبدلتي الاختاريتها بنفشة خفيفة ،تسريحتي المفتوحة
كلشي مثل ما اريد بس گلبي ما يريد ورافض بس
جاي اجبره
اجت لبستني البرگع مستعجله تحجي
ريحانة : بساعج شدي زين بين ما المن الغراض عزيز واگفلنا برا
بلايه ما احجي شديت البرگع وخليت شوي من وجهي طالع ،شوي وأجت بايدها الجنطه حطتها على الكرسي تلبس بعباتها وتحجي
ريحانة : هواي تأخرنا ،هسة يضلون يحجون
_ جا شبيدنا ،غير ازدحام
جرت البرگه على حلگي
ريحانة : غطي حمرتج لا يضل يحجي عزيز
رفعت طرف البرگع على نص وجهي الباقي وطلعت رافعه بدلتي بأيدي الثانية ،بس شافنا طلعنا اجه اخذ الجنطه من ايد ريحانة
عزيز : ساعديها لا تعثر
ساعدتني اصعد بالسيارة ليوره وهي صعدت بالصدر وبس حرك السيارة حسيت بخنگه بصدري
وخرت البرگع من حلگي اريدن اتنفس من طبينا القرية وشفت الهوسة ،اندار خازرني
عزيز : غطي وجهج
رديت غطيت وجهي ومن فتح الباب ضيرم نزلت ايدي بايده ،طبيت بساع وريحانة وراي ،بس طبيت تلگني بالهلاهل وانا احسن كلشي جاي يصير حلم ..
گعدت اباوع للهوسة ،البنات يفترن يلمن بسفرة الغده وبس كفن الغده اجتني ريحانة تلبسني البرگع
_ شني وين ؟
ريحانة : راح يعقدولج
هي گالت هيج لو انا روحي راحت صوت الهلاهل ترس البيت، وانا حجاية ما طلعت مني گومتني طبيت لغرفة جده مدنگه راسي ورچلي احسنها ترجف ما مصدگه كلشي صار والسويته
انا اخافن لا اتندم ساعتها انا ضالمته گبل روحي ..! !
شوي وحسيت بيه گعد بصفي و وراي واگف ضيرم عارفته من كض چتافي ،بده الشيخ
يحجي ايات قرآنيه واحاديث للزواج وبالاخير سألني
_ حور باقر راجس ،هل تقبلين الزواج من عبد الحق يوسف راجس على المهر المعلوم بينكما ،ف اذا قبلتي قولي نعم أنت وكيلي
بلعت ريگي وحسيت بيه شد على چتافي چن جاي يشجعني
_ نعم أنت وكيلي
اعتلت صوت الهلاهل بره وسكتهن ضيرم من سأله الشيخ
_ عبد الحق يوسف راجس ،هل تقبل الزواج من موكلتي حور باقر راجس ،ف اذا قبلت قول نعم قبلت الزواج
عبد الحق : نعم قبلت الزواج
الهلاهل بره والهوسات علنت ارتباطي بيه بهل وكت باركلنا الشيخ وطلع ،و وراه جدي وضيرم وابوي وعمي يوسف طلعوا ،وبس ضل هو جرت هيوفة البرگع مني تكشفني گدامه ،حطيت ايدي على صدري خجلانه من باوعلي وادار وجهه بساع
هيوفة : اطلعوا شمتانين
باوعلي ودنگ حط ايدي بايده ومن حس برچفتي شدد عليها اكثر وطلعنا ،گعدت وهو گعد
بصفي يلبنسي الذهب و وي كل لمسه منا انتفض بين الراضيه على الصار وبين لا هوسوله
_ حبها ولك حبها ولا تخاف من امها
ابتسم وتقرب علي ،وجهه صار بوجهي
همس
عبد الحق : ترضين
بلعت ريگي وهمست
_ لا
وخر وجده صاحت
غضة : جا شو ما حبيتها حق
عبد الحق : مرتي تستحي جده
غضة : يااا مني التستحي ؟
عبد الحق : مرتي
غضة : خاب خليني ساكته ،حورية والمستحى
خزرتها ما اريد تشهرني گدام الوادم وتطير الثگل
غضة : هاا شبيج
لطمت بگلبي جده اليوم شبيها ناوية علي تشهرني تريد ،خليه مصدگ انا استحي
عبد الحق : لمي شعرج
انداريت عليه مستغربة ،باوعت بايده چان شايل گلاده ناعمة بشكل هلاهل اجت ريحانة رفعت شعري وهو لبسها الي ويم أذني همس
عبد الحق : "هلال وشاماتج نجوم"
بلعت ريگي و وخرت عيوني مرتبكه من عيونه ما جاي اتقبل كلشي جاي يصير بس ما اعارف شني المخليني متحمله
بس صاحوه طلع بره ،هفيت على وجهي مدخنه شوي وگمت نزعت بدلتي ورديت گعدت بالصالة بنص هوساتهن والرگص تمنيتها وياهن
چنت دوم اكلها انا وياج نعرس فرد يوم ،تالي حتى خطوبتي ما حضرتها
گاعده بنصهن اتثاوب انا ومكياجي وتسريحتي وبس طشت الوادم گمت للحمام اسبح ،وبس طلعت صار بوجهي ،فزيت حاطه ايدي على گلبي ،مسح وجهه من الماي وباوعلي
عبد الحق : أجيت اغسل وجهي
هزيت رأسي ب أي ،وهو تقدم جر الخاولي يفتحه يغطي رگبتي
عبد الحق : الولد كلهم بالصاله ،بساع اعبري هدومج منگعه ،غيريهن
هزيت راسي ب أي وبس وخر مشيت بساع لغرفة البنات ،فتحت الخاولي من شعري وگعدت امشط اقتنع بروحي استقبله بحياتي وانسى لان حرام هسه انا على ذمة حق
لميت شعري وبس طبت غاية گتلها
_ طلعيلي ثوب منج هذا تنگع
غاية : صار
طلعتلي ثوب اطتنياه ومشت ،لبسته ولبست حجابي بس طلعت وشافني جدي گال بصوت مسموع
رأجس : ياهلا بالعروس
أبتسمت ومشيتله من صاحني ،باركلي وعمامي هم. الولد ومن وگفت بصف بصائر اجه حق بحجة يحجي وياها وگف بصفي وشوي واجه ضيرم
جرني بصفه وبنفس الوكت سمعنا صوت ضحكة عالية اندار ضيرم خازره
ونتر
ضيرم : لا تضحك
صخر : الدنيا دواره سبحان الله
يضحك متشمت أول مره اشوفنه هيج يضحك
ضيرم : اهووو ،عمي سكت ابنك
محمد : اعذرني عده ثار وياك
ضيرم : جان مطيح حضي يا ثار هذا فدوه اروحلك
صخر : جا نسيت شلون چنت تحرگ بگلبي ؟
ضيرم : ما حارگ گلبك بس أنت مزودها حتى وگفه يمها ما تخليني اوگف
صخر : جا هسة ليش ماتخلي حق يوگف يم اختك
خزره من گال اختك وجرني گعدني يم هيوفة
ضيرم : بعدهم اليوم خطبوا شني يوگف يمها
وصخر كل ما يضحك ضيرم ينغث اكثر ،وانا حاطه ايدي على خدي واتثاوب منعسة مشيت للصالون ما نايمة هسة بس اريدن انام
هيوفة : شبيج ؟
_ منعسة كلش
هيوفة : جا امس شگد كلتلج نامي
_ ما اجاني نوم
هيوفة : حگج انا هم بليلة خطوبتي مانمت
تثاوبت مره ثانية وگمت للغرفة بعد مابي اضلن لازم اناملي شوي وكافي افكر احس روحي انتهيت من التفكير اخليها على الله و وين ما تصفى خليها تصفى
تمددت الف روحي بالبطانية ،الجو صح بادي يصير حار بس اخافن لا ثوبي يرفع وننفضح ،هستوني جاي
اغفى وحسيت بأحد گعد يمي
فزيت من ندهتني
بصائر : حواري ،ولج مرت أخوي
وخرت البطيانية من وجهي
_ ياستار ،شكو ؟
بصائر : گومي أخوي يريد يحجي وياج
_ شعده حاجي وياي ؟
بصائر : جا غير مرته واذا حجه وياج ؟
گمت جريت شالي وطلعت وراها
بصائر : باعي اطلعي ورا البيت هو هناك متانيتج
_ متفقين علي لو شني
أبتسمت تهز رأسها ب أي
بصائر : جا هو گالي صيحيها وانا ما اردله طلب
_ براسي
بصائر : أي
ضحكت ودفعتني
بصائر : امشي يلا
_ الخفيفة
بصائر : امشي يم اخوي يعلمج الخفه مثل ما اخوج علمها الي
خلتني وطبت ،مشيت ضايعة ،ما اعارف شني الاسويه وشني الاگوله ،شعور غريب احسن بروحي هاي مو انا اخر شي حطيته ببالي انا استحي ...
چان واگف بسد الحايط بس شافني ابتسم وشمر جگارته ،كض ثنينهن بين ايده وانا اباوع بعيونه ضايعة ما اريدن انتفض من لسماته
عبد الحق : شبيج ترچفين ؟
بالگوات طلع صوتي وانا اگولن
_ مابي شي
عبد الحق : تعاي نگعد
جرني وراه ،گعد وگعدني واشرلي اگعد بصفه ،گعدت مرتبكة اهز رجلي
عبد الحق : حوريتي
رفعت راسي اباوعله ،حرك اصبعه بشكل دائري على چف ايدي وبصوت جبرني اركز وياه گال
عبد الحق : سبحانه مغير الأحوال من سنة ما چنت اشوفج غير حواري الطفله ،وهسة هاي الطفله صارت مرتي وحلالي
أبتسمت ودرت وجهي منه اقنع روحي أضل گاعده وياه
عبد الحق : باوعيلي
باوعتله مرتبكة وردت اگوم من تقرب مني ومن نضراته عارفت نيته شني ،كض ايدي من حس
بي رجفت
عبد الحق : ما اسوي شي شبيج ،حواري شو باعيلي لا ترچفين
بلعت ريگي وجريت نفس طويل ،دار وجهي يحرك ابهامه على طرف شفتي
عبد الحق : رايد اضوگ طعمهن
هزيت راسي ب لا ،وخر اصبعه وشغل جگاره گبل لا يخليها بحكلها گال وهو يباوع لشفايفي
عبد الحق : خليها بيناتهن
سويت مثل ما راد ،بلايه نفس اباوعله حطاها بحلگه وجر نفس طويل منها
عبد الحق : اطيب چگاره بكل حياتي
گمت مرتبكة وهو گام وگف يعدل هدومه ،مشى گدامي بلايه ما يحجي بس طبيت جوه هو طلع برا
ومن شافتني بصائر واگفه بالمطبخ غمزت
بصائر : هااا استهرتوا لا ؟
خزرتها
_ مو مثلكم احنا
بصائر : تقنعيني گعدتوا حبابين ؟
_ أي والله
بصائر : حرامات
_ شو صايرة كلش
بصائر : منوره اخوج
طبيت جوه وعفتها وراي تدردم بس درت راسي عليها من گالت
بصائر : راح نمشي اللبسي عباتج
هزيت رأسي ب أي ،ومشيت جبت عباتي من الغرفة خليتها بايدي وضليت واگفه متانية اهلي يمشون وماصدگت امي گامت بساع لبست عباتي وطلعت
گبلهن ،طبيت للبيت بوجهي للغرفة تمددت وأجت گعدت يمي ريحانة
حسيت اكو شي تريد تحجي ،شجعتها من گلت
_ احجي شبيج ؟
دنگت حايره وردت باوعتلي
ريحانة : احسن بيج ما هاوية حق
گعدت على حيلي
_ لا مو ما هاويته بس مستحيه منه
ريحانة : يعني ماكو شي غير هذا ؟
هزيت رأسي ب لا ورديت تمددت ،طفت الضوه هي وانا غفيت كاضه الحلقه بايدي ما مصدگه هاي حلقة غير حب طفولتي
°هيوفة°
صعدت للغرفة بدلت مختنگه وهستوني جاي اللمن بشعري وطب ضيرم ،گعد على الجرباية
يباوعلي مبتسم عدلت شعري ومشيت گعدن يمه اسأل
_ شبيك ؟
حط گذلتي ورا اذني يباوع بعيوني
ضيرم : طالعة تخبلين اليوم
أبتسمت
_ صدگ
ضيرم : والله ،الماروني ياكل ويشرب عليج
غطيت وجهي خجلانه وهو ضحك ،وگام وگف چن متذكر شي ، وبس فتح الباب گبل لا يطلع صحته
_ وين ماشي ؟
مستعجل حجه
ضيرم : ناسي الكحيله ما رابطها
_ راح تمشيلها ؟
ضيرم : أي
_ خل امشي وياك
ضيرم : وين ولج
_ شبيك ضيرم اريدن اشوفنها
باوعلي حاير ومن حس بي صدگ متمنيه اردين امشي گال
ضيرم : بساع لبسي عباتج والحگيني
وانا ما چذبت خبر بساع جريت عباتي المعلگه ونزلت وراه ،فقار چان هستوه طاب من بره بس شافنه گال
فقار : خير وين ماشين ؟
ضيرم : ماشي اربط الكحيله وماخذ هيفاء وياي تشوفها
فقار : شو صايرين هيته لو بس براسي تبعيون مثاليات
ضيرم : مو ادمغك
فقار : حرام عليك مريض
ضيرم : خوش من تطيب
خلاه واگف بمكانه وطلع وانا وراه بس طبينا للگيعان كض ايدي بقوه بين ايده يباوع للمربط ،طبينا انا وياه ،شغل اللايت البيده يضوي عليها چانت نايمة
حرك ايده على راسها گعدت تباوعله ولا خافت هلگد ما تعرفه ،ابتسمت وانا اسمع كلامه وياها هلگد
ما يحبها حتى يبوسها ،هزيت ايدي واندار يباوعلي يضحك من سمعني گلت
_ الحمدلله والشكر
ضيرم : هاااا ولج ؟
_ شني تبوسها ؟
ضيرم : جا غير هاي الكحيله
_ وانا هيوفة
ضحكت بصوت عالي ،خله الهيلانة تگعد وصوت صهيلها يملي المكان
ضيرم : گعدت الخبله
_ سكتها
ضيرم : خلينا نطلع وهي وحدها تسكت
كض ايدي وطلعنا ساد الباب ورانا ،مشينا نسولف على الخطوبة وما اعارف شلون انداريت وطاح گلبي من شفت احد يمشي ورانا ،صحت بخوف
_ضيررررم ...
