رواية خلخال مشوه الفصل الواحد والثلاثون 31 بقلم زمرده

 

 

 

رواية خلخال مشوه الفصل الواحد والثلاثون بقلم زمرده




حاسب ضفيرتها شكثر
واسكيها من جانت شبر
تالي الغريب ينولها
زفتها من بابي مشت
وارجف كمت ماسيطرت
واسمع ترن احجولها
لحد يكللها بجه ولسانه
مافكه
وحجه فرحانلج كلولها

°هيوفة°

كض ايدي وطلعنا ساد الباب ورانا ،مشينا نسولف على الخطوبة وما اعارف شلون انداريت وطاح گلبي من شفت احد يمشي ورانا ،صحت بخوف

_ضيررررم

فز مخترع من صيحتي واندار بساع من شافني منداره اباوع ورانا بخوف ،وطاح گلبي من
شفته نزل اللثام بكل صلافه ما مهتم لكلشي وچان هو نفسه الداس بيتنا هذاك اليوم ..! !

من عارفه ضيرم عيونه صارت بگصته يريد يمشيله وانا متخبله ما ارضى اهد ايده
_ عليك الله ضيرم لا ضيرم ،لا هددده

صيحت بخوف من ركضله وهذاك واگف ولا تحرك من مكانه ،لطمت على خدي ابچي واحد يطگ الثاني بكل حقد بلايه رحمه ،وي كل ضربه انشغ رايحه روحي منو يفكهم واحنا بنص الگيعان بمنگطعة ...! !

صيحت ابجي
_ ضيرم كافي ،فدووه ضيرم هددده

طگاه براسه مني راسي وجعني ،كضاه من فالينته وهذاك بعيون مليانه حقد يباوعله
ضيرم : دست بيت من بيوتنا ،وزدتها من دست گيعان أل غضب ،ما رايد روحك أنت

عت فالينته وبصوت خشن الكره ينسمع بي گال
_ ادوس راسك وراس الاكبر منك هم ،مو بس گيعانكم وبيوتكم ،اشهر حارميني من
اخوي وما اعديها الكم بالساهل ،نكرانكم اخوي عدكم ما تعدي "لا والخلق الماكو بطهارتهم"

طگاه ضيرم وهذاك يا جبل ما يهزك ريح ،چن بشر متعلم ،حالي حال الظيم اتلفت اريدن بس اشوفلي احد وبنص ذيج الظلمه لمحت ليث اجه يركض عليهم صيحت مفرفحه وضيرم يصيح علي ما يرد صوتي يطلع

_ ليث ،الحگ ليث

وهذا اليگلك ردته عون وطلع فرعون ،تگابلوا عليه هو وضيرم اليتعب يكمل الثاني بداله وابن غازي مثل الصل يرد الطگه بطگتين ...

گعدت رايحة روحي ،خوفي تضاعف ،من جهه أخوي ومن جهه ثانية رچلي الما صدگ طاح بايده غريب

انداريت على صوت صياحه
جعفر : شني ليث شكووو ؟

اجه يركض من صياحهم عله ،بعده ما واصل وصاح
جعفر : ياهلا بالضييف

نزع قمصلته ،شمرها وتگابل وياهم ،خوت روحي من البچي والخوف اخذ حيلي بعد حتى
ما بي اگومن ومن كل عقلهم قرروا يردون بيه نفس سوايتهم بأخوه ..! !

جعفر : هده ضيرم كاافي ،راح يموت بأيدك ،خااااب كافي

ضيرم : ما اهده وحگ من زرع بي روح

وگف فحطان يباوعله
ليث : خله يمشي ،هذا مو بشر طبيعي وتحبسه عدنه

ضيرم : على روحه

ليث : مابينه حيل للمشاكل بعد ،شيخلصنا من أبوي

ضيرم : جا اخليه يمشي هيج ؟

ليث : اخذ جزاته ،لا تغلط ضيرم

خزر ليث بالگوات يتنفس فحطان ،واندار يباوع للگاعد بالگاع يمسح بدمه
ضيرم : جانك زلمه ما چان دست بيت تعارف ما
بيه غير النساوين

گام وگف على حيله تفل بالگاع دم ،وگبل لا يمشي رفع ايده
غريب : كل يوم ثاري وياكم يكبر ولو نسته الدنيا
كلها انا ما انسى ،مستعد ثاري اخذه من احفادكم وخلها ترچيه بأذن كل عار منكم

كضاه ليث ،صيح
ضيرم : تريد اردك بچفن ل أل عبود لو شنييي ؟

غريب : ما يفرق ،وأنت لا تشوف روحك زايد لا ينكسر عظمك

ضيرم : خاااب هدني ،هدنيي لا اطگك والله .

بس يريد ليث يفكه ويمشي ل هذا الواگف گباله بكل استفزاز ولا چن هستوه طالع من حرب والدم تارس
وجهه
جعفر : ابن الخررره المن ضال واگف ،انگلع لا نهده واحنا وياه والله

أبتسم بأستهزاء خلاهم يتخبلون
غريب : شايفني خايف منكم ؟

أول مره انحط بهيج موقف ،ردوا تعاركوا وما فكوه هل مره غير جنازه لا يحرك ايده ولا رچله ،گمت ارچف اباوعله ،نايم على الگاع بهيئته الضخمه فاتح ايديه
_ ماااات ،ولكم ميت ميت

ابجي بهستيريا ،والراعبني الدم الينزل من راسه اثر طگه ليث اله بحديده لگاها بالگاع ،صح اعارفهم ما بگلبهم رحمه تربات جدي بس اول مره اشوفن هيج بعيوني ..! !

جراني وصيح
ضيرم : دفنوه اذا ميت واذا بيه نفس خلوه بمكانه يموت

اعت ايدي منه وبدموع احجي
_ شني يدفنوه ضيرم ،والله حرام حرام

كض ايدي حيل
ضيرم : ماعليج

هو يمشي ويسحل بي بس وصلنا للبيت گعدت بعتبة باب المطبخ وهو بس يريدني اطب لا أحد يگعد وانا لازگه اريدهم يگعدون لا صدگ يسووها ويدفنون ابن الوادم ،وما صدگت عمي گعد ومبين فز من صوته العالي من صيح بي متنرفز من جرني يريد اصعد وما گمت ...

باقر : شكووو ،خير ؟

ضيرم : ماكو شي

باوعتله ورديت اباوع لعمي بين الخايفة من خزرات ضيرم وبين لا لازم احجي لان لو سكتت بكل دم بارد يدفنوه والله
_ يا ماكو شي ،عمي والله كضوا غريب بالگيعان موتوه

صاح بي
ضيرم : اسكتييي

باقر : شتسكت ،شمسوين ضيرم ؟

ضيرم : بس طبطبناه شوي

_ موتوه عمي ويردون يدفنوه بالگيعان

ضيرم : راااح اطييح حظج

باقر : انجب وخليها تحجي ،شكو عمي شصاير ؟

ضيرم يخزر ما يريدني احجي وانا متخبله، منضره ابد ما جاي يروح من راسي
باقر : كافي تخزر بيها راح افگس عيونك

درت عيوني منه
_ عمي تگابلوا هو وليث وجعفر على غريب ابن الچسار وموتوه والله
اشرت عليه
_ وهذا يگلهم اذا مابيه نفس ادفنوه بالگيعان .

ضيرم : هذا بعينج ادبسززز

گمت ورا عمي خايفه منه فلا چنه ضيرم ،چن بشر ثاني گدامي
باقر : شني ناوي تطگها ؟

رد ليوره ومشى صعد فوگ ،ضليت واگفه بمكاني حايره اصعد فوگ لو وين امشي وعمي
خابر على أبوي و بلايه حس مشوا للگيعان بعد ما دليتعم المكان

صعدت فوگ وانا ادعي ما يسويلي شي ،جريت نفس وفتحت الباب بخوف ،طبيت للغرفة بلايه ما اباوعله حطيت عباتي بالسله صايره كلها ترابه
ونزعت حجابي ومشيت للكنتور اطلعلي هدوم
وكل هذا وانا ابد ما رفعت عيني عليه أخاف اباوعله والله

طلعت للحمام سبحت ورديت من گد السحوله الصارت احس جسمي يحكني ،بس طبيت ورفعت عيني عليه خزرني ،گاعد على الجرباية
يهز رجله حركه مال واحد واصل الاخر مرحله من مراحل العصبية ..! !

بلعت ريگي وسديت الباب ،بس مشطت شعري مشيت للجربايه تمددت مطيته ضهري ،شوي وطفه الضوه ،حسيت بيه من تمدد بصفي ضليت اتگلب وبعد شلعان گلب غفيت ،بس فزيت من حسيت بيه رفعني على صدره

وهمس
ضيرم : دگتج ناقصة بس نامي بمكانج

غمضت مبتسمة ،والصدمني من گعدنه الصبح رد ما يحجي وياي ضليت حايره ،جا منو امس حطاني على صدره ...! !

نزلت ميته من القهر، بس شافتني عمة عارفت بي شي
نجوى : شكو ،ليش مگدر خلگج ؟

باوعتلها بقهر وعيوني دمعت بساع
_ ضيرم عمة مايحجي وياي

نجوى : علمود سالفة امس مو ؟

هزيت رأسي ب أي
_ منين عارفتي ؟

نجوى : عمج گالي وبينه بخت بأخر لحظه لحگوا على الولد

_ الحمدلله ،زعل ضيرم لان حجيت العمي

نجوى : خله يزعل يوم يومين ويرضى ،احسن ما يطيحون بسالفة چبيره

_ زين عمة شعجب بيت غازي ما هدوا علينا علمود ابنهم ؟

نجوى : والله ياعمة ما اعارف ،انا هم انصدمت

_ الله يجعله خير ،هذا الهدوء يخوفني

نجوى : والله حتى انا وبس الله اليسترنا

انداريت على صوتها طلعت من الغرفة تحجي
ريحانة : والله حل تشافه گلبي بيه ،على دوسته للبيت كون يكسروه ويحطوه بحضن غازي

نجوى : صح غلط بس مو مال يطيح بأيد وليداتنه وهم متحملين عليه ،هيج كبرت ما زغرت مشاكلنا

ريحانة : شني جديدين ،لا من اليوم ولا امس من زمن الجاهلية هاي مشاكلنا

گعدت تتثاوب وعمة هزت ايدها ،هاي صايرة كلش لا أبالي
ريحانة : والله لو ياخذوني اتفل بوجهه يرتاح گلبي

نجوى : خايبة فلك الصابج ،شتسوين ،زلمة لو مرة أنت ؟

ريحانة : مرة مرة ،بس بوكت العازة زلمة

هزيت ايدي
_ اشوفنج من طبلنه ابد ما خفتي ابد .

ريحانة : لا تضحكين ،جا غير خرطت العافية

أبتسمت وگعدت گلبي يلعب من هذا الهدوء فلا مرتاحتله ..! !

°غاية°

طلعت من المطبخ حاطة ايدي على گلبي من صوت الهوسة الصار برا ،بسلا بيت غازي هدوا علينا ..؟؟

هوسة وكلشي ما افتهم ،وحظي هستوني تقربت من الباب اريدن اسمع واضح بس انفتح بقوه وانا رديت ليوره خايفة من شفته صخر گدامي ،من عصبيته لو كضني هسة ما يخلي عظم بي صاحي وهو محذر ما وحده توصل يم الباب

خزرني يأشر طبي ،مشيت وانا اطگطگ يلا ميخالف بس خزره نعمه من الله...

وگفت يم الشباك اباوع عليهم شبساع كل واحد شال تفگته ،طب صخر الگاع اليدوس عليها تصيح الغوث ،صعد يركض وميمنة ركضت وراه
مشيت اباوع على الدرج نزل يركض والتفگه بأيده وميمنة تتوسل يهدها وتجرها من ايده وهو يصيح بيها
صخر : هديهااا لا اطگج ،هديهاا ميمنة ،لج هديهااا

گامت جده تتچه على عوچيتها ،وگفت گبال الدرج تصيح عليهم
غضة : ولكم شبيكم

باوع لجده ورد اندار عليها جراها بقوه منها وهي من قوة عتته للتفگه ما گدرت تتوازن بعد وطاحت
من الدرج ركضتلها طايح گلبي برمشة عين تكومت بالگاع ،كضيت ايدها خايفة وهي عاطت

نزل يركض مهبوط ،شمر التفگه ودنگ گبالها ،بجت من سألها
صخر : ايدج ،شني شبيها ؟

غضة : خاب كسرتهاا يمفلوووك

رفع ايدها
صخر : شني طحتي عليها ؟

هزت رأسها ب أي ،گومها كاضها من زنها ،واندار علي
صخر : عباتها بساعج

صعدت اركض جبت عباتها ونزلت ،لبستها الها وبالي يم الخبصه الصارت برا صخر وحق تعركوا
عبد الحق : والله اذا طلعت أنت مطيحها ،انسى أبن عمي وحگ العباس ابو فاضل

صخر : لا تضل تاكل تبن زايد

طلعت وانا وراها ،بس انتبه عليها واگفه اجه بساع يسألها
عبد الحق : صخر طيحج مو ؟

عينها راحت على صخر ،ومن رد حجاها عبد الحق نفت برأسها تباوعله
ميمنة : انا الصوج مني ،جريت التفگه منه ومن جرها من ايدي طحت

بلايه ما يحجي كضها من ايدها الثانية وطلع ماخذها للمستشفى ولحگه جعفر يركض، خلوا صخر يباوع وراهم
ضيرم : الحگهم بساع ،لا تضل واگف بمكانك ،صخرر

فز يباوعله
صخر : هاا ؟

ضيرم : راح تضل واگف هيج ،امشي الحگ مرتك

ما رد على ضيرم وطلع ،رديت طبيت جوه وجده مفرفحه تحجي على صخر وتلوم ،وبس طبت امي هاي جيتها من بيت عمة شهلاء ،ومن شافت حال جده بهتت
زهرة : شكو عمة ؟

غضة : خايبة چبريج طيح ميمنة واضن انكسرت ايدها

نشغت
زهرة : يايمه صدگ ؟

غضة : وروح أبوي ،تناگروا على الدرج وطاحت

خليتهن وطلعت برا بساع من سمعت جدي يصيح هستوه جاي من بيت الرباح
رأجس : ياهو الخابرر ،ما عارفتوووه ؟

ضيرم : مبين من صوته واحد من بيت غازي

رأجس : يعني هددكم ؟

باقر : هدد ضيرم

اندار عليه
رأجس : شگالك ولك ؟

ضيرم : يريد يردني الكم مدمه ،خوش زلمه هو .

انداريت على صوت امي
زهرة : شعدج ولج هنا ؟

اشرت عليهم
_ مهددين ضيرم

زهرة : يااا

_ أي والله

زهرة : وهذا منو مهدده ؟

_ واحد من بيت غازي

زهرة : سترك ياربي ،استرنا

اجت وگفت بالباب تباوع عليهم مثل الاعصار واگفين منتضرين كلمة من جدي ،وبس گالهم امشولهن طلعوا وبس العجاجه وراهم اثر شخطتهم
للسيارات طبيت انا وامي بين الخايفين والتعلمنا گضه الوكت وردوا داگين بيت غازي على تهديدهم

واگفه اباوع من الشباك، هستوهم طبوا وطب عبد الحق سأند ميمنة و وراهم صخر الچگاره استغرب اذا مو بايده ..! !

تلگيتها نزعتها عباتها بباب المطبخ ،على كيفي أخاف لا اطخ ايدها واسألها
_ شبيها ايدج ،شسوولها ؟

ميمنة : مفصوخه ،لفوها الي واطوني دوه

_ الحمدلله مو كسر

طبينا انا وياها وهم ضلوا يتناگرون ،گعدت هي وانا رديت اجيبلها ماي وشفت صخر كاض حق من
رگبته
صخر : ساكتلك هواي ومعديها الك واگولن حگه اختك وگالتلك مو قصدي بعد عليش المحله هاي

عبد الحق : صوچك لوما عاتها من ايدها ما چان طاحت

صخر : تعارفني من اصير عصبي تنعمي عيوني لا تضل تلح لان بالگوات كاض روحي

عبد الحق : فوگاها أنت ابو الراهي

صيح
صخر : شني الرايده أنت ؟

خزر صخر ومشى طلع بره ،حتى للديوان ما طب يم الولد ،جر نفس من الچگاره وطلع وراه، من المطبخ
تحركت ترست دولگة ماي ورديت للصاله
امي گاعده يمها تحجي وياها ،اطيتها الماي وگعدت بصفها

بقلق سألتني
ميمنة : خوما تعاركوا حق وصخر ؟

_ لا بس تناگروا

ميمنة : وشني الفرق ؟

_ يعني ما تضاربوا

ميمنة : ليش ومن شوكت ولدنه يتضاربون بيناتهم ؟

_ اندري

ميمنة : الحمدلله ،شگد فاهية

_ مو فاهية والله

ميمنة : هاا صح ،هادئه

_ اگلج

ميمنة : گولي

_ شو ناسيه ايدج وحاطه بالج وي فهاوتي ؟

ميمنة : والله اريد انسى الوجع

_ توجعج ؟

ميمنة : أي والله توجعني ،بس احسن من اول ما طحت

_ الحمدلله فصخ ولا كسر

ميمنة : يعل الفصخ ،لو كسر احسن يضل هواي الا يطيب ،اتذكر حق انفصخت رچله ضل معلول عل

_ حظج هذا

ميمنة : الحمدلله

غضة : خايبة كافي سوالف ،ما تاكلين شي ؟

ميمنة : لا جده شبعانه من اهد الغده

زهرة : اسويلج عصير برتقال تروين روحج بي ؟

ميمنة : لا عمة عليش اتعبين روحج

گامت امي
زهرة : ياتعب عمة نمونه هو عصير

أبتسمت
ميمنة : فدوه الايدج

دنگت امي باستها من گصتها وهي جرت ايد امي تبوسها ،حطيت ايدي على خدي مبتسمة
من گامت حضنت أمي ،هلگد احب علاقة امي بيها فلا چنها مرة ابنها ،چن هاي رابع بت عدها ...

°هيوفة°

صعدت وراه اركض من طب روحه بخشمه ،فتحت باب الغرفة وطبيت ،جريت نفس حايره
اريدن احاجيه بس هو معتبرني انا والحايط سوه حتى من طبيت للغرفة ما كلف روحه ورفع راسه حتى ..! !

سديت باب الغرفة وگعدت يمه على الجربايه ،همست اسمه
_ ضيرم

رفع راسه باوعلي وبساع دنگ ،هلگد ما منگلب حاله
اخافن احجي بس دست على خوفي وسألته
_ صدگ مهددينك ؟

بلايه اهتمام رد
ضيرم : عارات بس تهديد

بصوت يرجف من الخوف عليه گلت
_ واذا نفذوا تهديدهم ،شلون بي ؟

ضيرم : ما ينفذون لا تحطين بالج

گام على حيله ،طلعله هدوم وبدل ،تمدد حاط ايده على عيونه وانا احوس ،حتى من حجه وياي منوره خشمه
ضيرم : كافي تحوسين نامي

تربعت على الچرباية اباوع عليه رافع ايده يباوع علي
_ ضيرم لا تطلع عليك الله ،والله گلبي ما مرتاح

ضيرم : الله كريم ،طفي الضوه

تأفأفت وگمت طفيت الضوه وشمرت شالي وتمددت مطنگره اطيته ضهري ونمت ،ومن گعدت الصبح ما لگيته يمي ،للعصر وطب يركض
مستعجل صعدت وراه فاتح الكنتور يبدل والموبايل على اذنه ومن حجيه عارفت جاي يحجي وي صخر

وبس شفته سد الموبايل حاجيته
_ شكو شصاير ،ضيرم حاجيني

لف جراويته وطلع من الغرفة فلا چن جاي احاجيه
نزلت وراه مفرفحه روحي وهو فلا چنه ،اصيح وراه وهو يركض
وگفت عمة بطريقه
نجوى : خايب شصايرررر ،ولك اطي درب احجي شكوووو ؟

ضيرم : خليني اولي يمة

نجوى : حاجيني ،اخوانك بيهم شي ؟

ضيرم : لا لا ،بس وخري

نجوى : شأوخر ،ولك بعلي ما اوخر

ضيرم : لا اله الا الله ،يمة أجوا الوادم واليرحم دينج وخري

وعمة معانده تريد تعارف
نجوى : يا وادم ؟

ضيرم : ناس عاااريه تريد تصالحنا وي بيت غازي

وعمة ما صدگت
نجوى : يا الله ،اي تصالحوااا

ضيرم : يا صلح يمة شبيج ؟

نجوى : تصالحوا وفضونا ،خل نخلص بزعت ارواحنا

ضيرم : تحجين صدگ ؟

نجوى : أي بروح أبوي صدگ

ضيرم : بروح ابوج خليني امشي و وخري من الباب

وخرت عمة وهو طلع شبه يركض ،اندارت علي محترگ گلبها
نجوى : رچلج راح يموتني والله ،راح اموتن يگمز للمشاكل تگمز

_ من يوم يوميه هذا ابنج ،انا مخبلني وچماله ما يحجي وياي

نجوى : صالحي حتى يفك من الوادم

_ ياعمة انا شدخلني ؟

نجوى : جا ما تشوفيه من امس لليوم روحه بخشمه

_ هو ما يحجي وياي مو أنا

نجوى : لو نحجي الحگ هو ما رادج تحجين وحجيتي ومن حگه يزعل بس احسن شي حجيتي لان من صدگ چان دفنوه

_ عمة والله من اول امس وانا ما ناسيه شلون كضوه گضوا بيه التوبه حسيت روحي فلا اعارفهم

نجوى : جا هم تربات جدهم كل رحمة ما بگلبهم

جاي اگلها أي والله وكضيت روحي ،ضليت ساكته افتر بالبيت ،انداريت فازه من حسيت أحد
كض ايدي حطيت ايدي على گلبي من شفتها بصائر

_ هبطتيني والله

بصائر : تعاي اگعدي ،كافي تفترين اتملخت رجليج

_ شلون اگعد وانا بالي عده ،مهددين رچلي بصائر والله گلبي مثل النار من الخوف ،لا يصيرله شي ساعتها اموت والله

بصائر : اسم الله ،تفائلي بالخير وتعاي جوه ،شعدج گاعده بالحوش

_ اختنگ من اطب

بصائر : دگومي عليج الله ،منا الشمس بعدها نازله بالگاع احترگتي حرگ
جريت نفس بقوه اهدي روحي ،وگمت طبيت جوه وياها

°بركة°

شيماء : والله ما اخليك تمشي ،ولك انا ما صدگت تردلي مو حتى ترد للطلايب

كاضته أمي وهو يجر روحه منها بس يريد يمشي وصوت الهورن برا هرجنه
جعفر : هديني يمة واگفيلي الولد بررررا

شيماء : ما اهدك ،خلهم يخلوك ،شعدك ماشي وياهم لو تطرب على المشاكل تريد ترد للسچن

جعفر : الله واكبررر ،گعده گعده مو طلابه ،وادم وشيوخ وانا طرف بالمشكله لازم اروحن

شيماء : طالع من السچن حامي على الوادم ،حطيت روحك طرف

جعفر : جا شتردين اشوفن ابن عمي يعارك وما اهدن وياه لو شني ؟

شيماء : ما تمشي والله

جعفر : لا تحلفيين

عت ايده وطلع يركض وامي گعدت بالحوش تلطم ،مشيت اگومها واحجي
_ كافي تلطمين يمة ،ترا ماشي لبيت الرباح مو للسجن

شيماء : مابي حيل فراگ واحد بيهم بعد ،لا حق يرد ولا هذا ،شيبوا گلبي والله

_ جا يمة شلون ما يمشون للگعده ،يضلون گاعدين يمنا ؟
ما ردت علي ومشت گبلي تطب جوه ،لحگتها وانا ادعي تفض على خير

°ليث°

فريت السبحة بأيدي اباوع عليهم ،غازي أل عبود وشيخ واحد وزلامهم گبالنه ،صايرين قمسين
قسم أل غضب ،وأل عبود ومترأس الگعده الشيوخ الوسيطه

انداريت عليه
_ هاي اول گعده الك بعد السجن ،ابو السجون

جعغر : زحمة امدك بنص الديوان واجفص بمصارينك

_ انجب لا اهينك

جعفر : انچب أنت

سكتت انا وياه من اجتنه خزره من أبوي ،سوالي بايده بسيطة ،معناها منتضرتنا رزاله من هاي الزينة

جعفر : ركز راح يفصلون ويطوك فصلية

صحت منفعل
_ انجب لك

اباوعله وجهه صار اصفر ،وبعديش انا تذكرت روحي گاعد بالديوان ،رفعت راسي مبتسم ،بس يا ابتسامه تفيد غير لو طحت بايد أبوي وعمامي عظم صاحي ما يضل بي

لزگوها تلزگ لان فشلوا من الوادم وانا قطرة دم ما ضلت بوجهي ،بس اريد الگعده
تخلص گاعد على اعصابي ،عدلت گعدتي مركز وياهم

الرباح : أنت التكفلت يا شيخ ،وگلت النه گعده ثانية ونحل سالفة دوسة البيت ،بس طلعتوا ما عدكم گدره على أبن الچسار ،وزادها بدوسة الگيعان والصار
ردة فعل من زلامنا وحگهم دمهم حامي عليه وطاح بايدهم شترديهم يحبوه ويردوه الكم ؟

شيخ واحد : بس مو هيج يا شيخ ،الزلمة نايم مستشفى

رأجس : حيل وابو زايد وياه ،وزين ما سواا عگابي

غازي : جا اردها الك رأجس لاتضن تعبر بالهامش وحگ اليتم اولاده

رأجس : ايدك الك ،شتسوي سوي ،لا تضن نهاب افعالك ،وشفت أنت زلامي شلون ردوها

شيخ خزعل : سموا بسم الله ،ملتمين نفضها من نكبرها

غازي : انا ما فشلتك واجيت ،بس لا تضن تدگ ايد الصلح بايد أبن الغضب وابني جوه التراب

شيخ واحد : الصار صار واحنا اولاد اليوم

غازي : لا موش اولاد اليوم ،لو مر قرن ما انسى هل بشر وفعلته بي

شيخ خزعل : جا اذا تضلون هيج ما يطيح بيها غير هل شباب

گام يريد يمشي وصاح
الرباح : الگعده بعدهي ،ما فاضيها

باوعله بكل حقد
غازي : وحده بوحده تفض ،وكلشي يمي ما الهم بعد

رأجس : الك بت لو نسيتها

غازي : بس اعارف گاعها ساعة وحده ما اخليها عدكم والله

طلع ما متحمل الگعده ،وفكت وحده بوحده مثل ما گال ،طلعت من الديوان گبلهم كلهم ،ولحگني جعفر
كفخته على رأسه

_ شراح يخلصني منهم ،ليش تحجيني وتعارف انا لساني ماعدي گدره عليه ؟

جعفر : أنت انفعلت بساع انا شدخلني

_ جا غير أنت حجيتني لو لاصم حلگك وساكت ما جان فكيت حلگي

جعفر : هسة عليش صاير عصبي ،هي رزاله ويجوز كفخة من صخر وتعدي

_ مجرب ايد صخر مو ؟

جعفر : والله مره طگني اسبوع رگبتي ضلت مشنچه

ضحك من شافني سكتت لان طلعوا ،تلفتت منين اشرد بكل الأحوال انكض ،وگفت عدل عود
انا ما متهم ،استغربت من ما بيهم احد حجه ،ردينا للبيت وانا احجي وي روحي

_ شني معقولة عدوها الي ؟

بس وصلنا القرية ونزلت من السيارة ما حسيت غير بطگة چن بكرك على رگبتي ،صيحت متوجع والتفتت عليه

مغندب يباوعلي وعيونه بگصته
صخر : شلون تسترعن هيج بالديوااان ،وين گاعد بگهووووه ؟

فركت رگبتي احس من ضربته فقراتي تكسرن ،اشرت على جعفر الواگف على جهه متبري مني
_ هذا حجاني

بس اندار عليه صخر رفع ايده ثنينهن
جعفر : ما محاجيه انا

_ لا تصدگه انا ساكت وهو جبرني أغلط

جعفر : جا ما گدرت تكض لسانك

_ أنت ما گدرت تكض روحك وما تحجيني لو العتب بس علي

مشاله صخر يريد يكضه وانا ضحكت من طفر فوگ سيارته
صخر : انزل لا اسمط الجابوك ،لك كلب السيااارة .

دبچ على القماره خله صخر يتخبل يريد يصعدله بس يعارف روحه ثگيل وهو وياه يگعدون السيارة للگاع

صخر : انزززل ابن الكلب

يوسف : طيح الله حظك

محمد : اعذرني خوية ،تعارف ما يرتاح اذا ما يغلط

اندار على عمي الواگف بصف أبوي ،وجعفر گعد فوگ السيارة ما تحرك بعد
صخر : عمي حاجي ابنك خله ينزل لا انزله چنازه

يوسف : انزل بوية وچفينا الشر

جعفر : خله يطيني الامان وانزل

محمد : دنزل وما يحاجيك اخذها مني

گمز من فوگ السيارة و وگف يم أبوي
جعفر : عمي ابنك ماخذ خاوه علينا لو شني ؟

محمد : من زمان عمي ،لا من اليوم ولا امس

جعفر : ترا مايصير هيج عمي ،دگ عمري نص العشرين وهو يعاملني مثل الجاهل

محمد : لان ازغر منه هل ماخذه ايده عليكم

جعفر : مطيح حظنخ عمي يا ماخذه ايده

محمد : اجته الطنگوره

ضحكت اباوع على جعفر صدگ طنگر وعگد الحجاب وبس حجه أبوي هيج خله ومشى لبيتهم
طبوا كلهم للديوان وانا احسن جسمي يحكني من الدشداشة بس طبيت جوه تلگتني

غاية : بشر شني الصار ؟

_ فضت فصل ببطن فصل

غاية : الحمدلله ،والتهديد ؟

_ على حسب الگاله غازي ما يعارف ب خفيده غفير مهدد

غاية : ياا وانوبه منو هذا غفير ؟

رديت ضهري على الكاونتر
_ هذا اخس من غريب ،اسمه فلا يمه ،هم شايف روحه برتباته

غاية : يعني هم بالدوله ؟

_ أي

غاية : منو الأكبر هو لو غريب ؟

خزرتها
_ تردين تطلعيله جنسية ؟

غاية : لا ،بس اسأل لان صار عدي فضول

_ اممم

غاية : جوعان ؟

_ لا تغدينا عد الرباح ،شلون مفطح يلوگ لهاي الخلقة

غاية : بالعافية
جريت خدها بايدي مبتسم

وطبيت حتى اصعد ابدة هدومي ،بس وگفني امي وجده ونفس الحجي حجيتن الهن بساع
وصعدت ،وبس نزلت وشفتها هستوها طابة ،فتحت ايدي الها
_ ياهلا بچبيرة خواتي

°هيوفة°

أبتسمت ومشيتله ،باسني من راسي ولم وجهي بايده
ليث : شلونج ،ضيرم شلونه وياج ؟

_ الحمدلله ،زين

ليث : شو زين منوره خشمج ؟

أبتسمت اضيع ضوجتي
_ شوي هل يومين صاير عصبي

ليث : حگه ،وأنت هم اعذريه

هزيت رأسي وبس طلع ،سلمت على امي وجده ومن شفتها ماكو سألت
_ جا شو ميمنة ماكو ؟

زهرة : فوگ اضن نايمة

_ شعجب راح تصير المغربية وهي نايمة ؟

زهرة : ما اعارف والله

_ صاعده اشوفها

صعدت دگيت الباب وفتحته اباوع عليها متمدده على الجرباية ومطيه ضهرها للباب ،بس حست بالباب انفتح اندارت ومن شافتني گعدت على حيلها مبتسمة
ميمنة : ياهلا هاي مني الاجتنا

سديت الباب ومشيت يمها
_ صاحبت عمرج اجت تشوفج

ميمنة : شلون صاحبة تخبل ،تعاي اگعدي

سوتلي مكان يمها گعدت اسألها
_ صدگ ايدج شلونها ؟

ميمنة : زينة ،بس ما اگدر احركها هواي

_ چم يوم وتصير زينة ،بس ديري بالج على روحج

ميمنة : ما جاي احركها هواي والله بس ضايجة انا ويني وين الگعده هم من احترگت ما عولتها تطيب

_ هم هسة تطيب وتصير سوالف

جرت نفس
ميمنة : أن شاء الله

_ خوما تحاجيتوا أنت وياه ؟

ميمنة : لا

_ يعني ما حاجاج ،ولا اعتذر ؟

ميمنة : ساكت بس عيونه تحجي انا اعارفه متندم بس مايطي بروحه

_ أي هو هذا صخر ،لا تضوجين روحج

ميمنة : لا يمعوده صارت بعد

تربعت اسولفلها مثل كل مره
_ وانا هم ضيرم مطنگر علي

ميمنة : لان حجيتي بسوايتهم مو ؟

هزيت رأسي ب أي
_ بالليل يحضني ،اگعد الصبح يرد يطنگر وضالين هيج صار يومين

ميمنة : خليه بكيفه وحدها تفك الطنگوره

_ ضجت والله ،شني ما ما متعلمه هيج

أبتسمت
ميمنة : عدي خطه

_ شني هي ؟

ميمنة : لا تمشين للبيت ،الا هو يفدگج ويجي ياخذج

_ وشني راح يتغير ؟

ميمنة : راح يحس بروحه ما يگدر على فراگج وينجبر يجي عليج وهيج راح يطيح الزعل بيناتكم

_ اممم

گمنا انا وياها ننزل من سمعنا صوت امي تصيح علينا ،بس شافتنة نزلنا گالت
زهرة : تعالن اگعدن يمنا شني ضالت فوگ وحدچن

غاية : عدهن اسرار يمة

طگتها خفيف على ايدها
زهرة : فلا تگعدين راحة

غاية : الگعده وياچن حلوه بس انا عدي قرايه

زهرة : امتحان لو شني ؟

غاية : أي والله امتحان شهري

زهرة : جا أقري زين

هزت رأسها ب أي ومشت للغرقة ،گعدنا يم امي وجده نسولف ،ومن سالفة لسالفه والولد اجو يمنا
وگضه الوكت ،ودگت الساعة هدعش وهو
ماكو وانا احس بگلبي شاط ،امي طبت نامت وجده وجدي غاية تقره وبس ميمنة ضاله يمي

انداريت عليها مقهوره
_ جا شوكت يجي ؟

ميمنة : يجي والله ،بس خلينا نطب زحمة يلگاج واگفتله هنا

جرتني من ايدي وانا شوي وابجي ،گعدت على الدرج معانده ما اطب ،عيني على الساعة وهي تروح وتچي تباوع علي واحسنها تريد تغمني بس بالگوات كاضه روحها
نوح : هيوووفة

گمزت من سمعته يصيح بأسمي ،وطلعت بساع واسمعها وراي تحجي
ميمنة : خفيفة كلش ،امداج

بس شافني گال
نوح : رچلج بالباب متانيج

_ جا ليش ما يطب ؟

نوح : يگول خل تطلع بساع ،يريد ينحم لان عده دوام

_ يااا اسم الله

نوح : لا والله ؟

_ أي والله

نوح : دجيبي عباتج و ولي

ضحكت ورديت للصالة اجيبن عباتي
ميمنة : هاا ورد وجهج ،اجاج مو ؟

هزيت رأسي ب أي
_ اجه

ميمنة : بيعي ثگل شوي

مشيت وانا اگلها
_ أي

صاحت وراي
ميمنة : لا مبييين

ثگلت خطواتي من صرت قريبة من باب الشارع المفتوح شفته واگف ونوح يمه ،گلبت ملامحي وطلعت بس شافني گال

ضيرم : يلا امشي ست

بالگوات كضيت ابتسامتي ومشيت وراه ،ضل هو يقفل بالبيبان وانا صعدت گبله ،نزعت عباتي وحجابي واخذتلي هدوم ركضت للحمام ،وگبل لا اطلع لفيت روحي لف ،وهستوني فتحت الباب وصارت گبالي ،بس وخرت طبت للحمام ،ضليت انا واگفه مصدومه اسمعها جاي تزوع ...! !

طبيتلها خايفة ،احاجيها
_ بصائر خايبة ولج شبيج ،يمة اسم الله شجاج ؟

رفعت وجهه بأيدي خايفة مسحونه روحها بالگوات تحجي
بصائر : معدتي هيوفة راح اموتن ،روحي جاي تطلع

_ اسم الله ،شو گومي بس عينيني

بالگوات وگفت على حيلها ،طلعتها من الحمام امشيها لغرفتها ،كاضتها بايد وبأيدي الثانية كاضه الخاولي لا يطيح من راسي ،بس دگيت الباب فتحته ،شافها بهل حال بهت وطفر من الجرباية كضها من ايدها الثانية
يسأل
فقار : شني شبيها ؟

_ طبت للحمام فرغت شكو شي بمعدتها ،حيل ما ضل بيها يسوده علي

گعدها وانا واگفه اباوعلها
فقار : شني بصائر شكو ؟

وهي الحجاية بالگوات تطلع منها ترد عليه بتعب
بصائر : ما اعارف معدتي

فقار : شماكله اليوم وهيج انغثت ؟

بصائر : من گعدت گبل لا اكل هي توجعني وبس تگلب

صفن وچن باله شرد ،وانا استحيت اضلن واگفه اكثر بالروب والخاولي وخليت ورديت لغرفتي بس طبيت گال وهو عينه بمبايله

ضيرم : شني شبيها بصائر ؟

سديت الباب وانا ارد عليه بثگل
_ اضنها حامل لان هسة صار وياها مثل ما صار بحبالتها الفاتت

رفع راسه مبتسم بطرف شفته يريد يحجيني
ضيرم : جا أنت شوكت تحبلين ؟

_ من الله يقسملنا

ضيرم : اممم ،والنعم بالله

نزعت روبي ومشطت شعري وتمددت بمكاني ساكنه ما اتحرك عكسه هو يحوس ،اطيته ضهري ونمت
لان كلش زين اعارفه ما راح يتنازل بهل سرعة فزيت من راد يروح الدوامه ،تحركت مضوجني
الضوه غطيت راسي ورديت نمت ،ومن اجه نفس الضوجه زايده ما ناقصة وجهه ما يگصه السيف حتى من صبيتله الغده اكل شوي وصعد ينام

باوعت وراه حايره واندارت على صوت عمة تسأل
نجوى : شني بعدكم متزاعلين ؟

_ عمة ابنج خشيمي ،يريد انا الاصالحه

نجوى : جا واذا صالحتيه يطير نصج ؟

_ جا ما يصالحني هو هم يطير نصه ؟

نجوى : يااا فلك شو صايره ما تنگدرين

_ جا عمة شبيها لو فك شوي ،انا احجي وياه طبيعي خله هو هم يرد طبيعي وفضت راحت

نجوى : حلوها بيناتكم ،مره ورجال أنتم

سكتت حايره ،سويتله جاي واخذته ،بس طبيت وشافني دار وجهه ،حطيت الجاي على ميز المراية ومشيت يمه ،گعدت على رجليه رفعلي حاجبه أبتسمت
_ گلبي رهيف وما يحمل زعل حبيبي ،خل نتراضه

مديتله اصبعي ،علت شواربه مبتسم
ضيرم : هذا الصلح مايفيد

_ جا شني ؟

تقرب محتضن شفايفي بين شفايفه ،حسيت افترت بي الدنيا من طول بالبوسة ،كضيت قميصه بقوه دايخة حس بي وابتعد يضحك
ضيرم : جا مو اگولن لا تتوكحين لان تخسرين يمي

غمضت عيوني خجلانه من رفعني من حضنه منزلني على الجربايه خلاني ومشى قفل الباب يضحك من رديت غمضت ،عده وكت احنا سوه ،نام هو
وانا ضليت احوسن بحضنه وهو كلساع فاز رادني على صدره ما يريد اوخر

همس بصوت ذبلان
ضيرم : توو توو ،كافي تحوسين اريدن انام

استقريت بحضنه ساكنه ،غفه هو وانا ما اعارف شلون اجتني النعوسه ونمت ،ما گعدت غير
على صوت دگة الباب ،گمت لبست الروب وفتحت الباب افرك بعيوني
حواري : صح النوم عيني

تثاوبت وهي واگفه گبالي تهز ايدها
حواري : الدنيا المغرب امي گالت اگدوا

_ خوش

حواري : مو تردين تنامين

_ لا والله خوما انا مثلج

رفعت ايدها ونزلتها
حواري : جاي اغمج بس تذكرت أنت أكبر مني وعيب

_ أي عفية صيرري خوش حماية

حواري : جا انا من زمان خوش حماية

_ اگلج

حواري : گولي

_ شو احسج عقلانه ،هي كل وحده تنخطب هيج تثگل لو شني ؟

حواري : لا ما عقلت بس بعدني تعبانة ،وهل أيام الأحلام مطحيه حضي

_ بعدج تتحلمين ؟

هزت رأسها
حواري : فلا فارگني ،تعبت والله

_ كون تمشين الساده احسن

حواري : لا ما اريدن

_ جا تضلين هيج ؟

حواري : ما اعارف ،راح انزل ،گعدي ضيرم هم

_ أي

نزلت هي وانا طبيت گعدت ضيرم وسبحت ونزلت ضيرم طلع يم الولد وانا گعدت بالصالة يمهن ،عمة تصلي وحواري حاطة كتبها وتقره
_ اليوم شلونج ما صرتي احسن ؟

بصائر : لا احسن ،بس بعده اللعبان نفس موتني

_ خاف حامل ؟

بصائر : حتى عمة گالت ،بس والله مابي حيل للنساوه

_ بلكت هل مره اخف

بصائر : اذا صدگ وحامل ما راح تطلع اخف ،تطلع اتعس من امس والصارلي وقيسي

_ گولي يا الله وتفائلي شوي

بصائر : يا الله

باوعتلنا عمة بايدها السبحة تسبح
نجوى : گلتلج وصي رجلج يجيبلج تحليل وياه ، وصيتيه ؟

هزت رأسها
بصائر : أي

نجوى : خير أن شاء الله

رددنا
_ أن شاء الله

وبس اجه فقار تلگيناه اخذنا العلاگة من ايده ،اخذت التحليل ومشت للحمام ،باوعتله صافن
على باب الحمام ،عجزت افتهم شني اليفكر بيه ،بس الاعارفه يخاف عليها من الحباله...

طلعت واحنا متانيها ،ابتسامة مرسومة على وجهه بايدها التحليل گبل لا تحجي عارفت النتيجة
نجوى : هااا ولچ ،شني ؟

بصائر : حامل

صحت فرحانه
_ عليج الله

بصائر : أي والله

نجوى : اللهم صل على محمد وال محمد ،يمة صلاوات الله عوضج ياعمة

أبتسمت وباوعتله واگف ورانا ،انداريت مستغربه من شفت ابتسامتها اختفت ،بأستغراب سألته
_ شكو ،شبيك فقار ؟

بلع ريگه ومسح وجهه بچف ايده ،ورد يياوعلها ملامحه مگلوبه
نجوى : خايب شبيك ؟

فقار : خايف عليها يمة

نجوى : گول يا الله ،لا تخرب فرحتنا

هز رأسه وردد
فقار : يا الله

تباوعله مدلغمه ،أبتسم ومشالها ،حضنها يحاول يبين روحه طبيعي
ريحانة : خربت فرحتنا

فقار : ما اريدنها تتعب والله ،جا انا ما اكيف اصير أبو

ريحانة : فدوه شلون ابو

كبرت ابتسامته و وخرها موگفها گباله ،حط ايده على خدها
فقار : انا مو بس فرحان طاير ،بس اخافن من وضعج ولان الدكتورة گالت موزين عليج

بصائر : جا انا مو اخذ مانع بس بعد الله راد يطي

نجوى : صدگ ولج شلون حبلتي على المانع ؟

بصائر : مرات انسى اشرب ،بس ما حطيت براسي راح احبل بساع

نجوى : جا مني حبلت گبل السبعة

حواري : وحده اسمها بصائر

°حواري°

ضحكنة وهي غطت وجها خجلانه ،وبالليل أجت عمة شيماء تشوفها فقار ماشي گايل الها ،گمت من
شفتها تأشرلي ،بس وصلت يمها گالت بصوت ناصي

هيوفة : حق بره يريدج

_ شيريد ؟

هيوفة :اندري ،اطلعي بساع صارله هواي واگف

بلايه ما احجي طلعت اعدل بحجابي ،بس رفعت راسي واجت عيني بعينه أبتسم
عبد الحق : ياهلا بحورية گلبي .

أبتسمت اضيع ارتباكي وكملت دربي يمه ،وگفت گباله اسأل
_ شلونك ؟

عبد الحق : بأحسن حال ،أنت شلونج ؟

_ زينه

كض ايدي يباوع بوجهي
عبد الحق : ليش ما جاي اشوفنج ؟

_ ملتهيه بالامتحانات

عبد الحق : حگج ،شدي حيلج حتى ورا الثالث نسوي العرس

جريت ايدي منه
_ جا أنت مو گلت براحتج ؟

عبد الحق : أي براحتج منا للعطلة

_ يااا

عبد الحق : وداعة الدلعة

_ حق شني خلي ورا السادس

عبد الحق : انا هم چنت مفكر ورا السادس

_ جا ليش هسة تگول بالعطلة ؟

عبد الحق : حلالي اريده قريب مني

_ وين اگدر مدرسة وزواج انا

عبد الحق : تگدرين

_ شبيك حق والله ما اريد

عبد الحق : هسة خلصي الثالث والله كريم

تأفأفت ضايجة ،وهو رد كض ايدي يمشي گبلي وانا وراه روحي طافره بعدني ما متعوده عليه ويريد يسوي العرس بهل سرعة وانا يرادلي سنة الا اتقبل وجوده بحياتي

بس طبينا وشافتنه عمة ،صاحت
شيماء : ولك حق هد ايد البت لا يشوفك واحد من الولد

عبد الحق : شسويلهم واذا ما شافونا

شيماء : يااا ولك زحمة منهم

عبد الحق : جا فقار من چنت الگفه طافر علينا بنصاص الليالي مو زحمة

شيماء : جا شني تريد تاخذ حگك منه لو شني ؟

عبد الحق : أي والله

يحجون وانا احسن بروحي جاي اموع من المستحى ما صدگت يهدني واشرد ،طبيت للغرفة وحلفت ما اطلع الا يمشي

فتحت الباب ماده راسها وتحجي
ريحانة : هااا شو خانسة ؟

_ استحي اطلع والله

ريحانة : حواري تستحي ،عجييب

_ احس جاي اعيش شي غريب

سدت الباب وأجت وگفت گبالي
ريحانة : هسة حاجه امي يريد العرس بالعطلة ولو مبين متمني يسوي العرس اليوم گبل باجر

_ بس ما صارلنه اسبوع مخطوبين

ريحانة : جا قابل راد العرس هسة ،منا للعطلة بعد بالثلاث اشهر وبين ما ترتاحين وتجهزين روحج دگت الاربعة اشهر

_ بس هو گالي براحتي

ريحانة : هذا حجي لسان حتى تقبلين بالخطوبة

_ يعني ضحك علي ؟

أبتسمت
ريحانة : أي

جريت نفس احس من حيرتي ما اعارف شني الاسويه بين الراضيه وبين لا ،خلصت
اليوم كله صفنات ،مره اقنع روحي ومره اريدن اقنعه هو ...

°كوكبة°

امشي بلايه روح ،ضلمه وهوه عالي ،صوت سعف النخل وهو يتحرك يخوف بس انا روحي ميته ،مو بس گلبي الذرة خوف مابيه ،تعلمت امشي للشط
من وعيت على الدنيا ،بس اليوم انا ماشيتله الاخر مره ...! !

جريت نفس وگعدت روحي لايبه ،ما اعارف شني الاسويه ،عقلي ما يفكر ،اباوع للأشجار بضياع
ما حاسته من گبل ،گلبي يگلي بعد يومين ويبدي ويبدي مصير جديد مجهول ..! !

نزلت العباة من راسي ودنگت اغسل وجهي بالماي وحسيت صوت وراي ،رفعت راسي من گال اسمي

ليث : كواكب

باوعتله وجهي ينگط ماي ،رفعت عباتي امسحه ورديت عليه
_ هاا

ليث : الجمعة عرسج مو ؟

غمضت عيوني من ما طلعت وياي ال "أي"

ليث : ضلن يومين

غصة سيطرت على حنچرتي وانا اگولن
_ عساهن لا گضن

اجه گعد ،ماحجه شي ،بس شغل چگاره خلصها وهو ساكت ومن شغل الثانية باوعلي ،درت
وجهي دموعي ما اگدر اكضهن بعد وصوت شهگتي ملت المكان جاي اموتن والله ،بكل ساعة تگضي انا اموتن ...

رفعت راسي منداره عليه من گال
ليث : لا تبچين ،گلبي ما معوز قهر

رفعت ايدي الترچف امسح عيوني واحجي
_ انا روحي تعبانة انا روحي ملينانه قهر ،اريدن اموت والله

ليث : اشش ،لا تحجين بالموت

_ الموت اهون شي الي ،انا تعبانة ومحد يحس بي

ليث : كوكبة

_ هااا

عيني راحت على ايده سادها ،عگدت حاجبي من شفت شي يلمع بأيده
_ شنو هذا ؟

ليث : حجل

_ الي ؟

هز رأسه ب أي ورفعه گبالي
ليث : هاج

اخذته مستغربة
_ بس شني المناسبة

ليث : من تلاگينا أول مره چبته وضميته كل ضني اللبسه الج من تصيرين على ذمتي بس ما صارت خليه تذكار مني

باوعتله بايدي يلمع ،مبين غالي ثگيل وكلش حلو
أبتسمت
_ ذوقك حلو

ليث : اعارف

گمت اريدن امشي بس اعترض دربي
ليث : خليج گاعده ،بعد ما اشوفنج

_ ليث

ليث : هاا كسرته

_ حاول تنساني ،العمر يگضي كون عائلة وعيش حياتك ،انا وأنت قصتنا انتهت گبل لا تبدي

جر نفس طويل وهمس
ليث : انا عدي امل بيوم راح ترديلي ،وحتى لو تطلگتي انا اخذج

_ شتحجي أنت ،اهلي يموتوني وما يخلوني اردلهم مطلگه

ليث : احجيلي شني الخلاج تكملين ؟

تلبكت من سؤاله ،درت عيوني مرتبكة
ليث : يعني اكو شي ؟

_ ما يفرق ،اول وتالي كلمتهم التمشي علي

ليث : بكلشي خلها تمشي بس مو بالزواج

_ هذا نصيبي ،تعبت حتى بعد ما عدي قابليه اعترض شيصير خله يصير ماعدي ذرة حيل بعد

ماحجة ونضرات الحيره البعيونه تحير حيرتي ،درت وجهي كاضه الحجل بايدي ،دموعي يتسابقن منو تطيح گبل منو ،رديت للبيت روحي رايحة جثه بلايه روح بس طبيت وشافتني گالت

سكينة : شني ليش تأخرتي

من ما رديت عليها اجت وگفت گبالي ،رفعت وجهي بأيدها تباوع بعيوني الما جاي يسكتن
سكينة : شني سالفتج ،كافي ولج عيونج راح ينعمن

امسح بيهن واردد
_ عساهن

سكينة : گلتلج انا احجي السعد وشيصير يصير بي أنت عنودية وراس يابس

_ ما تعارفين ،بليله ضلمه يذبحني حسن والله

سكينة : شني هيته ويذبح ،بس أنت خوافه

_ الروح الشبعت ضرب مثلي ما تخاف ،بس انا صار عدي اكتفاء ،لان اعارف كلمتهم تمشي غصبا علي

تأفأفت بقهر وكضت ايدي
سكينة : تعاي اسوي جسمج ماضل وكت

مشيت وياها بلايه حس ،ومن كملت طبيت سبحت ورديت للغرفة ،انشف بشعري عيوني ما اشوف بيهن احس ورومن كلش

سكينة : امشطلج ؟

هزيت راسي ب أي وگعدت ،وهي اجت گعدت وراي تمشط بشعري وتسولف
سكينة : عيونج مورمات كلش

_ شسويلهن خلهن يورمن

گامت وگفت گبالي ،مبتسمة تحاول تخفف من قهري بس لو ضحكت الدنيا كلها بوجهي ما يخف الشعور الجاي احسن بيه
سكينة : ماشية اجيبن الشسوار

طلعت بساع وردت ،ربطته بالكهرباء وبس كملت تنشيف شعري گالت
سكينة : نامي ،ورانا مشية للصالون

هزيت رأسي وتمددت على فراشي ،الليل المر على الوادم بيهم المرتاح والمگدر خلگه والحسبة بباله ،وانا مثل المحترگ بتيزاب ،اتگلب اريدن انام ما اگدر ،كل ما عدت ساعة اموتن الف مرته

غطيت عيوني من فتحت الباب وطبت تصيح بأسمي
سكينة : كوكبة ،ولج گومي ما ضل وكت

وخرت ايدي من عيوني
_ جاية وراج

سكينة : بساعج

طلعت وانا گمت ،غسلت وجهي ورديت للغرفة بدلت ولبست شالي ،وطلعت بأيدي عباتي بس شافتني گالت
سكينة : جا وين چنطة الصالون ؟

_ بالغرفة

سكينة : جا دجيبيها بين ما اصعد اجيبن عباتي واشوفن سعد جاي يبدل

_ خوش

رديت للغرفة وهي صعدت فوگ ،ومن طلعت تلاگيت وياهم نازلين من الدرج سوه يسولفون ،ضليت واگفه بمكاني بين ما نزلوا ،سعد مشى للسيارة وهي وگفت گبالي اخذت من ايدي الجنطة

سكينة : يلا امشينا

_ امي بعدها نايمة ؟

هزت رأسها ب أي
سكينة : ماعليج بيها انا وياج

بلعت غصتي وطلعت للصالون ،شگد طلعت حلوه بس ما فرحت بروحي ابد ،اباوع لشكلي وبدلتي الحمره ،تسريحتي وشعري المبروم بشكل
كلش حلو كل هذا ومو بعيني ،بالگوات كاضه دموعي ما ابجي وسكينة تفتر على راسي

سكينة : مكياجج ،اذا تبچين اطگج والله

مسحت عيني بطرف اصبعي ،وشلت البرگع حطيته على راسي وخنگني فوگ خنگتي ،طلعت رافعه بدلتي و سكينة گدامي ،صعدت بالسيارة اجر النفس گوات
سعد : غطي وجهج سكينة ،معرسة وحمرتج حمرة

سكينة : اهوو

سعد : اهوو بعينج ،غطي حلگج لا اخليج تمسحيها والله

حجيت بزعانه روحي من ورا البرگع
_ شني السالفة تضلون تتناگرون

سعد : ما احرك اذا ما تغطي وجها

_ غطي وجهج لخاطري

سكينة : آمري ل الله

بنفس الوكت حرك السيارة ،الدرب بالساعة وانا بهل ساعة متت الف موته ،اليوم وهيج خنگتي باجر شيصير بحالي ..! !

طبگ السيارة گبال الباب ونزلت بساع سكينة تساعدني ،بس طبيت تلگني بالهلاهل ،رفعت البرگع وكملت دربي للصالة ،و ورا المغربية گالوا راح يجي يحنيني وانا على اعصابي گاعده

دنگت تحجي وياي
سكينة : كلساع وحده من عماتج تسأل عمتي عليج خاف جابرينج ،بس افريدها شوي

_ ما اگدر والله ،ولج جاي احس مثل الحبل يلتف على رگبتي كل دقيقة يخنگني اكثر

تريد تحجي وصاحتها امي يحضرن التوزيعات غمضت عيوني انا ويني وين العدسات چنهن
جمر بعيوني ،فتحتهن بساع من سمعت صوت الهلاهل برا

گمت اوگف على حيلي ،من طب هو مبتسم اليشوفه يگول خير ،بس انا كلش زين أعارف هذا اخيس بشر بالدنيا كلها ...

اجه وگف گبالي ،باس راسي وهمس
مرتضى : صايرة حبابة

وانا لو بيدي هسة احط سچينة ببطنه واخلص منه ومن كلشي يربطني بيه
بشرى : اگعد يم عروستك حنيها يمة

كض ايدي وجرني ،گعد على الكرسي وانا گعدت احوسن عيوني ما اريد اديرهن عليه واشوفن اكثر وجه كارهته بالدنيا

هلهلن من عمة رفعت طاست الحنه وگفت يمنا تحجي ،فرحانة وگاعها ما مكفيه فرحتها ،حتى هي حقدت عليها مثل ابنها واكثر منه

بشرى : حنيها يمة

اخذ من الحنه باصبعه وعينه علي گال
مرتضى : اطيني ايدج

اطيته ايدي ،حناها وانا حنيته وكل لمسه منه يكش جسمي نافرته كله مو بس گعدته يمي ،ما صدگت يمشي ،وبعدهم ما عابرين دربوتنا وانا مشيت للغرفة انزع البدله وعماتي يصيحن وراي ما راضيات چي اريد انزعها يگولن بعد وكت ما يعارفن كارهتا وكارهه روحي وكارهه كلشي بهذا اليوم الأسود بداية لحياتي السوده ..! !

انداريت من انفتح الباب وبس شفتها طاحن دموعي
_ تعاي افتحي البدله لا اشگنها

سدت الباب وأجت مفزوعة من صيحتي
سكينة : شبيج صوتج

گعدت بالگاع ابجي من كل خاطري بعد ما جنت بالگوات كاضة عيوني طول اليوم
سكينة : راح يسمعنج ،عليج الله اسكتي لا تصيرلنه سالفة وتعارفين عماتج ما يكستن

غطيت وجهي بايدي اناشغ
_ مو بيدي ،والله مو بيدي

سكينة : گومي افتحلج البدله وأمشي سبحي لان وجهج تلوص

گمت وانا احسن روحي مسلوبه مني ،فتحت البدله واطتني دشداشة لبستها وطلعت للحمام سبحت ورديت ،اريدن اطب للغرفة وصاحني عماتي يمهن

مشيت گعدت يمهن يحجن وياي وانا بالي ابد مو يمهن ،ما صدگت يخلني امشي للغرفة ،بس طبيت تمددت ،ما اعارف شلون وشعجب
غفيت بس كل الاعارفه چانت اخر مره تغفى بيها عيني گبل لا اطبن لحياة مثل الجحيم ،او الجحيم بذاته ..! !

فتحت عيوني على صوتها بوجهي تگعدني ،بس شافتني گعدت عدلت وگفتها
سكينة : گومي يلا ،تتريگين حتى نمشي للصالون

_ ما اريدن

سكينة : عماتج گاعدات وهن گاللي اصيحج

_ گليلهن نايمة

سكينة : جا لازم تگعدين ماضل وكت لازم نمشي

گمت متململه هلگد ما دعيت على روحي
گبل لا انامن كل ضني بعد ما راح أصبح

سكينة : هاا شو صافنه ؟

_ ماكو شي

باوعتلي ما مقتنعه وخلت وطلعت ،مشيت وراها غسلت وجهي وكملت دربي للصالة ملتمات يتريگن الكل فرحان الا انا

گعدت يمهن اريدن اللگمة اكلها ما اگدر ،كلساع وحده حاطه شي گبالي وانا نفسي مسدوده ندستني سكينة وهمست
سكينة : اكلي

اكلت لگمة وگمت ،وهن يحجن ما راضيات الا امي من بينهن چانت ساكته ،حضرت روحي
وطلعت للصالون ،ومن لبست البدله البيضا ،لو لابسه چف اهون الي من بدلة عرس ل أنسان انا مجبوره عليه واعارف كل خياساته ...

سكينة : اضبها اكثر بعد لو كافي ؟

حطيت ايدي على صدري
_ كافي ،انا مناه مختنگه

وخرت تلم بالغراض وانا گعدت اللبس الحذاء ،فجأه احتلني هدوء غريب ،ومن رديت للبيت
ما ضليت اكثر من ساعة وطلعت لبيت بيه راح ابدي حياة جديده ،حياة ابد انا ما رايدتها ولا
مختارتها بس مجبوره اعيشها وارضى بالمقسوم ..!

طبيت لبيت خالتي متلگياتني بالهلاهل وبهوسات ما ركزت بيهن على گد الهوسة الچانت براسي
ضاهري هادئ داخلي صايرة حروب من التفكير ..

رچفه سرت بجسمي من گالوا نزفهم گبل العشا اجتني سكينة مشدوها ،كضت ايدي ما ترديني أخاف ما تعارف انا متت بحجاية

سكينة : كافي ترچفين فدوه

كضيت ايدها حيل الحجاية ما تطلع وياي ،صعدني امي وسكينة وخالتي واستبرق ،گعدني على الچرباية وخالتي توصيني

بشرى : أقري الفاتحة ل أم البنين وسورة الفتح والله يسهلها عليكم

بذاك الضيم گلت بگلبي "انهجم بيتج"

هزيت رأسي ب أي وصاحوهن ينزلن لان راح يزفوه كضيت ايد سكينة حيل
نادية : شني ما تهديها ؟

سكينة : انزلن وانا اجي وراچن

ماحجن شي وطلعن وهي مسحت على ايدي توصيني
سكينة : لا تخافين وحاولي من هل ساعة تبدين حياة جديده

_ يا حياة التحجين عنها وانا ما اگدر اباوع بوجهه

سكينة : جا شني تضلين هيج لا أنت للسما ولا للگاع

_ ما اعارف ،خطيتي برگبة اخوي ،الصار وياي ما يتعداه وحرامات يتمسى اخ لان كسرتي والصارلي هو السبب بيه

سكينة : الله ياخذ حوبتج منهم كلهم ،بس هوني على روحج راح تموتين والله

_ ياريت

سكينة : اسم الله ولج عروس وما يصلح هل حجي الج والله

_ انا ويني وين العروس ،چواد فاتحة بگلبي هسة

دنگت باستني من خدي وطلعت بساع من سمعت الهوسات ومبين راح يزفوه ،جريت نفس احط ايدي على صدري واردد سورة الشرح بس
كملتها انفتح الباب وطب ،سده وراه ونزع
حذائه وطب يباوعلي بنضرات لعبت روحي ،گمت وگفت على حيلي من تقرب مني ...

رديت ليوره حاطه ايدي گبالي ،وكشيت وجهي لعبانة روحي من شميت ريحة جيفه بنفسه ،
صيحت خايفة من كض ايدي حيل بأثنين اديه سيطر على حركتي
مرتضى : شبيج تشردين ،كل ضنج اعوفنج ،خلي كلشي برضاتج لان ما امشي على مزاججج أنت .

بخوف اجر ايدي منه ،جسمي ما اسيطر على رچفته بس ما گدرت اقاومه چنت اضعف منه بهواي ،نفذ الي براسه وطلع من الغرفة بايده نيشاني ،لميت الغطا على روحي ابجي بخبال وما صدگت اشوفها أول وحده صعدتلي

تباوعلي مصدومه من وضعي لهسه بعدني بالتسريحة ومكياجي كل ما امسح عيوني من الدموع يجي بأيدي ،قفلت الباب وگومتني ،لبستني هدوم بساع وطلعتني للحمام الفوگ ،ايدي ما اگدر
احركها بالگوات سبحت والوجع نهش جسمي نهش

فتحت باب الحمام وطلعت واگفتلي هي ،كضتني من ايدي ورديت للغرفة ،مشطلتي ولبستني گلبيه بيضه

من بين دموعي حجيت
_ نزعيها الي بعده دم يطيح علي

سكينة : يااا ،هواي ؟

هزيت رأسي ب أي

غيرت گلبيتي وعدلت وجهي ونزلت لان يردن يصعدن يتباركلي ،شوي وطبلي مثل الروج ،يتباركلي وانا رد ما ارد ،مستهضمه على روحي وعلى
السواه وياي حسنني بأحساس ما حاسته بكل حياتي

دنگت شايله بتها ،بوستني تحجي
عذراء : كلشي تردين انا يمج ،بعد صرتي أختي

باوعتلها ما مقتنعة وما رديت ،اختها انا الحية بواگة الزلم ،بدن ينسحبن وحده ورا الثانية ومن امي وسكينة رادن يمشن ،تمينت روحي
امشي وياهن لذاك البيت الخلصت عمري بي تعبانة ولا ضلتي يم وادم من هل يوم بديت انصدم بيهم
وبالمخفي عدهم ...! !

°جعفر°

جريت باكيت الجگاير منه ،اختنگ وخنگني وما مل تطفى وحده يشغل الثانية وصار فوگ الساعة گاعد هنا حجاية ما طلعت منه

ليث : اطيني الباكيت جعفر

صيحت خايف عليه
_ كافي راح تموووت ،عيونك دم ،راح تنجلط والله

ليث : اطيني الباكيت ماكو غيهرا تطفي ناري

_ ما مقسومتلك

ضحك مستهزء وانفجر يصيح
ليث : لك شفت زفتهااا گداااامي ،لك گدامي طلعت من بيتهم ،ولك متت وانا واگف متت من شفتها بالبدله البيضه

يصيح منفعل بعد ما چان قمة من الهدوء تحول لكتله من الاعصاب ،صيح هواي صوته راح
طفرتله من وگف على حيليه يريد يمشي وطاح من طوله ...

حاولت وياه هواي ما گعد ،گلبي احسن بيه طاح اريد اشيله ما اگدر ضخم ما اگدرله ،دگيت على
صخر وفتحت سبيكر احجي مستعجل خايف عليه لان نفسه ثگل

عيني عليه واحجي
_ الحگلي صخر ،ليث طاح وما اگدر اشيله

رد علي فاز
صخر : وين أنتم ؟

_ بالگيعان يم الشط ،بضهر المكاين

صخر : جايكم جايكم

ما صدگت اشوفن ضوه سيارته ،صيحت من شفته نزل حتى السيارة مشتغله خلاها
_ بساع صخر ،ما جاي يصحى بساع

ركض مفزوع ومن وصل يمنا دنگ يشيله وياي، تگابلنا عليه ماخذيه للسيارة ،حطيناه ورا وانا گعدت يمه ،حرك السيارة طاير وانا كلساع وأصيح

_ استعجل

بس وصلنا ركضت جبتله سديه ،حطيناه عليها وطبينا للطوارئ ،تلگوه الدكاتره والممرضين انخبصوا من صياح صخر ...

گعدت بايد حيلي متاني احد يطلع ،بالساعة وطلع الدكتور ،سبقني صخر شبختين و وگف گبال الدكتور

صخر : شبيه اخوي دكتور ؟

الدكتور : جلطة ...

•---∞∞∞∞∞∞∞---•

ليث وكوكبة ؟؟؟ 
نگدر نگول من هذا البارت بدت تتوضح الرواية ...


شكرا لزيارتكم عالم روايات سكيرهوم

تعليقات