رواية حين تتغير الاقدار الفصل الثاني والثلاثون بقلم سناء الهموندي
يم باب الأحبهم خلوني اهلي دمــوع
خلوني انـــقهر عالملگـــه واتحـــسر
مو فرگـــــة بنايه وحــايط وشبــــــاچ
بس فرگـــة حبيب وطيبـة المعــشــر
ما صــدگ عفتكم وانتهى الـمشـــوار
مخنوگ وصعـب عالعبـــره يتسيطـــر
معقوله بصوركـم نبقــــــى نتــذكــــر
ما ردنه العتب عالقسمه والمـكـــتوب
بس ردنه الوداع شــــــويه يتــــأخـــر
دخيلك يا وكـــــت رد بينه لــــو يـــوم
ما نگــــــدر بلاهم والله ما نـــــگــــدر
شمس : وصلت لباب الهول وأشوف نوره منهاره بالكاع تبجي وامهه واخته حواء واكفات يحجن وياهه طبيت جوه وتقربت منهه لزمتهه وكتلهه شبيج يا روح صديقتج باوعت عليه بنضرات كلهه دموع وحضنتني قوي وهمست
نور :شمس مستحيل تطلع زفتي لغير غلام أنا كلبي من صغره نكتب باسم غلام شمس اموت والله اموت اذا صرت الغيره محد حاس بوجعي غيرج عبن هوه اخوج وتحسين بوجعنه.
شمس : حجت هل كم كلمه وندارت على امهه وكالت بهمس بس انا اسمعهه .
نوره : يمه ابوس ايدج اخذيني لبيت عمي أنا احجي ويا وأكله مستحيل اقبل بدمام يمه دمام حاله حال اخواني كضينه عمرنه رابين فد بيت .
ام علي : بدموع ولج يمه السالفه طلعت عن طورنه وعمج ناهي عليج وقافل .
شمس : نزلت عليه الكلمه مثل الصاعقه شنو منو ناهي وليش وشوكت وغلام ياربي اذا عرف ينتهي والله وهوه يعد يوم يوم حتى يملكهه وتصير اله .
نور : حواء انتي مو جنته العمي بعد ليش يريدني انا هم ودمام ليش محجه شي فهميني هوه طول عمره يكول انتن خواتي هوه مو يريد بنت خالته خل يروح ياخذهه أنا ما اقبل لو اعرف تذبحوني .
حواء : بدموع والله يا نوره ماعرف عمي فاجأ البيت كله البارحه اجه أبويه حتى ياخذ رأيه على خطبتج من غلام فجأه عمي كام على حيله وكال نور أنا من قبل اريدهه لدمام ابو علي ودمام ابن عمهه وأوله من الغريب ابوي من سمع هيج تخبل وكاله غلام مو غريب غلام ابني الماخلفته حجايه من عمي حجايه من ابوي كوم يا عمي وصيح جا مدامك تعاند يا نور ما تصير اله الدمام لو يصير دم للرجاب ابوي كاله شتقصد عمي كال أنا ناهي على نور الدمام .
شمس : احس بنفسي نقبضت من سمعت الحجي مبين السالفه منتهيه سوده عليه يا غلام حضك وين نايم مادري .
نوره : نهاريت بالبجي كعدت بالكاع ودكيت على رجلي وصحت كل صوتي موتيييي أهون عليه من انو اتزوج دمام .
أم علي : بسج يمه كومي غسلي وانا هساع اروح لجوري افهمهه السالفه واخليهه تأجل سالفه الخطوبه لحد ما عمج يهدأ وغصب عن الكل تصيرين الغلام عبن ابوج منطي حجايه ومايرد بحجايته .
شمس : راحت خالتي وانا كومت نور غسلتلهه وكعدنه نحجي وياهه أنا وخواتهه ونهدي بيهه .
نور : داخلي تهشم شون عمي هيج يسوي أنا مستحيل اتخايل نفسي غير الغلام لو هوه لو انسه شي اسمه زواج واستقرار وتكوين عائلة احجي بيني وبين نفسي ونايمه بحضن شمس وهيه تمسد على راسي بهدوء باوعتلهه وكتلهه شمس اريد احجي ويه غلام .
شمس : تفاجاة من طلبهه وكتلهه واهلج نوره شون لو عرفوا .
نوره : بدموع وحركه جا وانا شون شمس ولج والله ما اتخايل نفسي ويه شخص غير غلام .
شمس : قال الامام علي بن ابي طالب (ع)
فـإنْ غَـدرت بكْ ٱلاياام..فأصـبـر
لا تَيأسُوآ ؛ فَـ والله مَابكت عَين إلا وَفوقهَا رب ّ يُخبّئ لهَا الاجمل حبيبتي انتي ادعي وربج ما يشوفج غير كل خير .
نوره : ضليت استمع الكلام شمس و ما حسيت بنفسي نمت من القهر كعدت العصر على صوت امي كمت بياس كضيت يومي سمعت من شمس امي رايحه لخالتي جوريه وكايلتلهه انو عمي ناهي عليه بس ابوي كايل بس تمر فتره يهدي عمي حكمت وراهه يدز على غلام .
شمس : بعد سالفه نور بيومين اجتي امي حتى تحجي ويه خاله ام علي وعمي أبو علي .
جورية : بعد ما اجتني ام علي وطلبت اناجل موضوع الخطوبه تفاجات وكلت اجي بنفسي افتهم السالفه واليوم اجيت وبعد ترحيب من ام علي لتفتت على شمس شونج يمه شموسه بطنج شونهه .
شمس : الحمدلله يمه زينه .
ام علي : يا هلا وكل الهله بخيتي .
جوريه : بيج أكثر حبيبه تعرفين بيه اليوم جيتج حته افتهم السالفه مادام تكولين ابو علي موافق والبت موافقه ليش التأجيل بعد .
ام علي : ارتبكت عبني ما كتلهه بنهوه نوره كتلهه ام فالح خيه نوره الكم بس ابو علي كال اناجل شويه عبن مشغول بسالفه فصل ابو خاله .
نوره : التهن امي وخالتي جوري بالسوالف واجه عمي حكمت وأبوي وكميل ابوي سال على امي .
ابو علي : وين امج يبعد ابوج .
نوره : باوعت على عمي بقهر وكتله جوه يم خالتي جوري .
حكمت : كون جايه ام فالح حتى تفتح الموضوع أنا نهيته وكلت قراري .
نوره : ويه هل حجي طلعت خالتي جوريه وأمي توصلهه للباب خالتي جوريه سلمت على ابوي وعمي ردولهه السلام وبحكم ميانتهه وياهم كالت الأبوي .
جوريه : شنهي ياابو علي مادامك موافق على غلام جا ليش التأخير بعد نط عمهم حكمت من مكانه وفاجاني بكلامه .
حكمت : ام فالح يا غلام التحجين عنه أنا نور ناهي عليهه لابني وانشاء الله هل شهر ازوجهم .
ابو علي : بعصبيه شنو هل حجي حكمت .
جوريه : لا ابو علي خل يحجي بس انا اريدن اعرف شبي غلام وشناقصه حتى ترفضه غلام زينه الشباب .
حكمت : بكل تجريح أنا ما معترض على غلام أنا معترض على عيشتكم ام فالح لا تضوجين بس انتي عندج كوم لحم وكوه مشبعتهم ومعيشتهم ولا تنسين ابن عمهه اولى بيهه من الغريب الي منعرف داخل على طمع لو ياذيهه .
ابو علي : بصياح حكمتتتتتت .
ام علي : اباوع لجوري العيونهه نترست دمع وكالت .
جوريه : باوعت بشموخ وكلت أنا ما طالبه منك مره هاي اولا ثانيه الحمدلله طول عمري ما فد يوم دكيت باب وكلت تعالو عيشو جهالي عيشتهم بعرق جبيني بتعب سنيني وما فد يوم خليتهم بعازه لأحد لتفتت على ابو علي جريت حسره وطلعت ام علي طلعت تتوسل بيه وتبوسني حتى ارجع وما ازعل بس انا جن كلبي شال منهم كلهم خليت ومشيت لبيتي تلكتني احلام تفاجات بيه ضايجه رحت صليت وشبعت بجي ليش ياربي الفقر صار عيب والله لو ما اعرف ابني هاويهه وانا هم احبنهه لنور جان فلا انزل راسي بس اخخخخخخ اخخخ غلام لو عرف مر سبوع وانا نايمه بالفراش مريضه نزل غلام للبيت شافني تخبل .
شمس : بعد ما طلعت امي كعدت بغرفتي شبعت بجي اجتي نوره تواسيني وتبجي وياي وتكول .
نور : شغلتنه صعبت بعد هيهات اصير الغلام .
شمس : بدموع كولي يا الله وربج يسهلهه بس نوره امي تاذت بحجي عمج وانا كلبي تكطع عليهه .
نوره : سوده عليه خاله جوري فوك ضيمهه ضيم عمي بس والله يا شمس لو شايفه ابوي شون حجه على عمي ولعب بي لعب .
شمس : شيفيد يا نور شيفيد .....مر اسبوع رحت مرتين لبيت اهلي وشفت امي كلش مقهوره مره من المرات جتي خالتي ام علي وياي بس امي حجت وياهه بثكل انقهرت على الوضع الصار بين اهلي واهل تمار وضليت حايره .
غلام : رجعت ملهوف للبيت حتى اعرف امي حجت ويه بيت ابو علي بموضوع نوره بس من رجعت وشفت امي تعبانه ومالهه خلك الدنيه كلهه طلعت من عيني وحرت بيهه أتوسل بيهه اوديهه للمستشفى وهيه قافله تكلي شنهي تريد تموتني اضحك على تفكيرهه امي تتخبل من المستشفى اليوم امي صحت شويه رحت للكاع الجو ربيع والخضار يخبل شلعنه فاكهه أنا وسلطان وخضره وردينه للبيت باوعت على التفاح الاخضر الصغار وصارت شمس كبالي تحبه كلش حطيتلهه بعلاكه وأخذته الهه هم اشوف تمار واشوفهه عبن ما اجتي يمكن ما تعرف بيه اجيت رحت وصلت لبيت ابو علي دكيت الباب عصريه كلهم موجودين طلع كميل سلم عليه كميل سبع وأخو خيته وكلش احبه رحب بيه وتوسل اطب جوه بس انا استحيت كلت خاف امي حاجيه وياهم بموضوعي وكفت بالباب وكميل عاف الباب مفتوح وراح يصيح تمار كلت بكلبي بالكي تطلع والمحهه واكحل عيني بشوفتهه بس ماكو مطلعت طلع تمار ورا شمس ملهوفه اجتي سلمت عليه نطيتهه العلاكه وتمار رادني اطب جوه بس انا مقبلت كتله تعال نروح نكعد بلكهوه شويه واحنه نمشي حجيتله على شغلي وهواي أمور بس هوه جان يجاوبني بابتسامه لو يكتفي بكلمه اي تفاجات بي تمار مستحيل مو هوه تمار اذا لتقينه خمس دقائق ياكلني بالسلام والحجي حسيته بعيونه كومه حجي وكفت بالطريق هوه مشه مسافه ورجع التفت عليه وكال.
تمار : شو وكفت .
غلام : عكدت حاجبي وكتله تمار ما توقعتهه منك مع الاسف أنا كل نيتي اكله احجيلي شبيك ليش ضايج انت متعلم كلشي تحجيلي بس الي فاجأني من كال .
تمار : غلام أنا آسف واعتذر بالنيابه عن عمي صدك وثق بالله أنا حجيت على عمي وحتى عليت صوتي وأبوي زعل مني جي عليت صوتي غلام عمي نهى على نوره جي متعلق بيهه كلش وتمناهه الواحد من ولده .
غلام : هوه يحجي وانا متفاجاء بحجيه صرت نار من كال ناهي على نور شنو ناهي نور مالتي انا محد تعب بكدي حتى يحصد التعبه وتالي تصير الغيري والله اسويهه مجاتل سكتت وستمعتله أكثر وداخلي يغلي غلي والله احرك عمامهه واخذهه من عين السبع .
تمار : غلام خويه ثق بالله نور الك وانا كد كلمتي .
غلام : ما حجيت شي سويت نفسي اعرف بالسالفه ترخصت منه ورديت للبيت وانا نار هسه عرفت سبب الي مخلي امي مالهه خلك طبيت جوه صار بوجهي فالح شايل ابنه فتت الحجره امي وكتلهه ليش يمه ليش ضميتي عليه نهوه نوره .
جوري : بتفاجا ياهو الكلك هل حجي يمه .
غلام : عوفج من الكلي وكليلي انتي مقهوره لهذا السبب مو .
فالح : لا يغلام امك مو لهذا السبب مقهوره امك مقهوره لان نهانت بيت ابوي علي وكل هذا بسببك انت .
غلام : شنووووووو امي حاجين عنهه .
فالح : حكمت يا استاذ غلام كايل آلامك انتي بلاوي شبعي كوم الحم العندج بعدين زوجي ابنج وانا سمعت انو هوه هم كايل لابو علي على اساس انت تريد تزوج نور على طمع .
غلام : فرت فور وطلعت ركض من البيت لبيت ابو علي امشي وحس من القهر آذاني تون وراسي يصل عليه صل انعاد شريط حياتي من اول يوم اجتي على الدنيه وانا واكف اباوعلهه بحضن امي لحمه حمره عيونهه جانن شذر تقربت بستهه بخدهه الترف وابتسمت امي كالت لخالتي هاي هيه خيه بوسه غلام النور معناته ختم اله ضحكت خالتي وكالتلي ها ولك غلوم تزوجهه أنا من لهفتي هزيت راسي باي ومن يومهه اعتبرت نور مالتي إليه رجعت من ذاكرتي وانت واكف قريب بيتنه وذكرت كلام حكمت وحس اريد افترسه لهل رجال الطلعلي صفح توني امشي و لاكاني تمار يمشي سريع جاي علينه ملهوف شافني ركض عليه وحضني أنا متحملت دفعته وصحت بصوت ولك تمار شون كلي شون يهينون امي كدامك وما تحجي .
تمار : غلام اهدء فدوه اروحلك اهدء والله انا ما جنت موجود من رجعت امي حجتلي ورحت لبيت عمي صيحت وحجيت بس شنو الفايده يا غلام أنا ما جنت موجود ساعتهه والله انا خجلان ومادري وين اضم راسي من خالتي جوري .
غلام : بصوت ولك تمار شنو احنه جنه ميتين من الجوع .
تمار : شبيك غلام جا مو أنا واخواني الجنه ساكنين بيتكم ونأكل ونشرب كله وياكم لحم اجتافنه نبنه بخيركم يخوي كافي فدوه اروحلك لا تخلي كلام عمي يخرب بيناتنه عمي سوه كل هذا حتى بعد متاخذون نور وانا يا خوي نور ما انطيهه غير الك .
غلام : تمار ناررررر موجره بصدري شون هيج يصير باامي وانا ما اسوي شي .
تمار : خويه امشي وياي .
غلام : اسكت تمار تره كلش مالي خلك .
تمار : لزمت ايده وجريتهه دمشي جاي اكلك مشه وياي وينافخ رحنه كعدنه بكاعهم الي مار بنصهه نهر يفك الكلب وكتله هاي يخوي هاي الكاع الكبرنه بيههه هاي الكاع العبنه بيهه وتربينه لا تنسه خوتنه يا غلام لا تخلي الشيطان يدخل بنصنه وثق بالله ابوي كال نور غير الغلام ما تصير عبن ما يلكي واحد مثلك يصيرلهه حزام وكفو .
غلام : نعلت الشيطان وكعدت بصف النهر خليت ايدي على راسي وانا أعصر بي قوي كعد بصفي تمار وخله أيده على جتفي وكال .
تمار : حجيت مباشر بدون مقدمات وكتله ...اسبوع الاخ التحق للدوام .
غلام : التفتت متفاجاء بكلام تمار شنهي يتمار جا انت مو كلت عفتهه للشغله .
تمار : اي عفتهه بس طلبوا حارس شخصي لبيت أحد الوزراء وطلع تعييني هناك بغداد ورحت سويت مقابله وبحكم شكلي وطولي راسن وافقوا وانشالله الاحد اباشر تعرف نعجبوا بيه بعد ميكدرون يبدلوني حجيتهه بضحك اغيرله جو .
غلام : ابتسمت رغم ناري وكتله اي نعجبوا بعيونك الخضر وضربته على ضهره .
تمار : وشبيهه عيوني عيني ما عاجبتك تره للمعلومات عيون اختي الراح نورطك بيهه نفس عيوني .
غلام : حجيت بهدوء وانا شطيح حضي غير عيونهه .
تمار : شنو .
غلام : اكول خل نروح هسه امي ضل بالهه .
تمار : ياله وانا هم شمس ضل بالهه عبن من رجعت للبيت حجيتلهه الصار كالت الحك غلام تلكي جاي عليكم ثأري تعرف سوادين اخوهه حجيتهه وضحكت وما احس اله ضربه على ضهري كطعت نفسي .
غلام : بشقه وضحك حتى ما تحجي على اخوهه نوبه لأخ .
تمار : شرايك اليوم تعزمونه عدكم أنا ومرتي عبن من جيتكم شميت ريحه فاصوليه وصراحه فاصوليه خالتي جوري ما تتفوت .
غلام : بضحك ابو بطن حتى وانت بعز مصايبك تشمشم ارياح .
تمار : ياله أنا رايح اجيب شمس حضرونه ثريد .
غلام : ليش منو وافق على العزيمه .
تمار : مشيت وصحت اريد البن من ايدك لاتنسه .
غلام : صفكت ايد بايد وكلت لا حول ولا قوه الا بالله وضحكت على سوالفه ورجعت للبيت كتلهه الأمي راح يجون فرحت كلش وانا رحت خبطت الهم البن ماكو أقل العشر دقائق ودكو الباب شمس وتمار تغدينه سوه سوالف وضحك وتمار كلساع كايم بايس امي من راسهه وانا اكومله نتعارك امي سوده عليه شويه ارتاحت وشمس الكاعده بصف اني عيونهه دمع فرح وتمسحهه بشيلتهه دعيت الله يلم شملنه وما يخربنه شي .
شمس : مرت الايام والأشهر ودخلت بشهري تمار مستمر بدوامه الحمدلله مرتاح كلش وانا بين يوم ويوم انروح يم امي نوبات تجي نوره ويايه من غلام ملتحق امي وخالتي ام علي رجعت علاقتهن مثل قبل وطبعا خاله فضه وراهن نلتم كلنه يم امي خالتي فضه زوجت جهالهه ثنينهم وصار عدهه جنه بيوم كاعدين نضف أنا وحواء و نوره بالبيت طب عمي ابو علي وفاجانا بكلام مجنه متوقعي ......
شكرا لزيارتكم عالم روايات سكيرهوم
